December 20,  2008

 

Rep. Labadlabad uyon sa pag-usab sa konstitusyon apan supak sa term extension sa mga elected officials

Kon gikinahanglan usbon ang batakang balaod, kini himoon apan walay labot ang paglugway ug dugang tuig nga termino sa mga piniling opisyal.

Kini ang barugaranan nga gipadayag ni Congressman Rosendo Labadlabad nga alang kaniya, tungod sa ka-karaan nang konstitusyon sa pilipinas, kini angayan na nga paga-amendahan apan dili tanan usbon gumikan kay gamay lamang ang bikil niini.

Alang kaniya, ang isyu sa Chacha sa matag karon ug unya mura ug uhong nga mogawas ug mawala ug mogawas napod kay sa panahon nga kini mahis-gutan mokalit lang ug kawala gumikan sa dagha-nang mga pagsupak sa uban.

Apan para kaniya, taliwala sa nasinati nga krisis sa atong nasud, ang problema dili ang batakang balaod kon dili ang mga opisyal nga maoy nagdumala sa renda sa pangagamhanan atubangan sa nagka-grabe nga pagpangawkaw sa kaban sa katawhan.

“Of course wala may perfecto sa atong konstitusyon. Ug angayan nga ilisdan, seguro maayo nga ilisdan ang parte o tipik niini. Apan mas maayo unhon ug ilis kining mga nahubog sa pagpangawkaw sa salapi sa kaban sa atong gobiyerno mao nga dili kita maka-irog ngadto sa pikas daplin sa kausbawan tungod kay talamak ug grabe na gayud ang mga isyu sa corruption.”

Kabahin sa tinguha sa ubang kongresista nga usbon ang batakang balaod ug dunay term extention si PGMA ug sa mga piniling opisyal, si Congressman Labadlabad dakong supak niini.

Matud niya, isip citizen sa nasud siya dako gayud nga supak nga lugwayan pa ang termino sa mga elected officials tungod kay kini dili maayo ug klaro kaayo nga supak sa gimbut-an sa batakang balaod nga sa matag tulo ka tuig kinahanglan mosubmiter ang mga politikos alang sa laing mandato ngadto sa mga katawhan pinaagi sa piniliay.

Hinoon gipasabot ni Labadlabad nga sa iyang official nga kapasidad dili pa siya makahatag ug tinung pamahayag sanglit nga ang maong sugyot giumol atol sa 13th congress pa, nga wala pa siya mahisakop niini ug kini gibuhi lamang karon sa 14th congress.

Apan sa maong sugyot nga lugwayan silang mga elected official ug termino nga maoy usa sa ugat alang sa pag-usab sa batakang balaod, usa siya sa mobarug arun supakan ang maong lakang.

“Any suggestion or proposal to extend the term of any elected officials it is an invitation of disaster, nagkanayon si Congressman Labadlabad. (The New Nandau, Vol. XVIII No.19)

 

PNP Chief Verzosa nangulo sa tree planting activity sa Dapitan

Police Director General Jesus Verzosa dinhi sa Zamboanga del Norte misaulog sa iyang ika ‘one hundred days’ sukad kini mi-asumer sa katungdanan isip PNP Chief ug maoy nangulo sa gipahigayon niyang proyekto, ang tree planting activity nga gihimo sulod sa duha ka adlaw didto sa coastal barangay sa dakbayan sa Dapitan.

Matud pa ni PNP Provincial Director P/SSupt. Crestito Gonzalodo, si Police Regional Director Angelo Sunglao maoy nagdapit kang PNP Chief Verzosa nga dinhi sa mindanao, partikular sa Zamboanga del Norte pagahimoon ang iyang unang usa ka gatus ka adlaw sa gitakdang mga kalihukan.

Nasayran nga gihimo na sa PNP Chief ang iyang nationwide tree planting activity gikan sa Luzon ug Visayas. Dinhi sa mindanao, ang Zamboanga del Norte maoy napilian nga maoy pahigayunan sa maong kalihukan. Kini mao ang pagpahigayon ug tree planting acitivity sama sa bakhaw sa baybayon sa Taguilon ug Tag-ulo, coastal cleaning sa Sunset Boulevard ug Escubasurero.

Gipasabot ni Gonzalodo nga ang ‘escubasurero’, salumon ang dagat sa mga escuba divers ug limpyohan ang mga hugaw sa ilawom niini ug pagkahuman, duha ka pawikan ang pagabuhian timaan sa kalimpyo na sa kadagatan.

Mismo si PNP Chief Verzosa maoy nangulo sa ‘escubasurero’ uban ni 3rd District Congressman Cesar Jalosjos nga kinsa parehong mga escuba divers.

Sumala pa ni Provincial Director Gonzalodo, ang mangrove seedlings gian-dam sa DENR ug ang tree planting activity gisalmotan sa kapolisan, mga kawani sa kagamhanang probinsyal sa Zamboanga del Norte ug kagamhanang lokal sa dakbayan sa Dapitan, estudyante, Diocese of Dipolog ug NGO’s.

Ang maong kalihukan ni PNP Chief Jesus Verzosa iyang gitawag ug ‘project blue heart’ para mapabalik ang kalunhaw sa kalipokan ug proteksiyonan ang kadagatan gikan sa illegal nga kalihukan. (The New Nandau, Vol. XVIII No.19)

 

Dugang Nat’l High School gimugna sa segundo distrito

Usa ka house bill arun mugnaon ang dugang national high school sa segundo distrito ang gidasunan na sa ubos balaoranan ang gipangamahanan ni 2nd District Congressman Rosendo “Dodoy” Labadlabad arun matukod ang dugang pang mga tunghaan para kadtong mga kabataan nga atua nagpuyo sa lagyong mga barangay matabangan sa pagtungha sa pampublikong eskuwelahan.

Sa interview ning pamantalaan, gipahayag ni Congressman Labadlabad nga iyang gipaningkamotan nga madungagan ang mga tunghaan gumikan kay iyang nakita nga nagkulang kini sa lawak saringan. Ug tungod kay lagyo ang ubang barangay sa high school, daghanan sa mga kabataan ang wala makatungha ug secondarya. Gumikan kay dili siya gusto nga extension o annex lamang ang high school nga matukod sa usa ka barangay, maoy iyang gipaninguha nga mahimo kining regular pinaagi sa pagpasar ug balaodnon.

Ang mga barangay nga butangan ug National High School mao ang Saluyong sakop sa lungsod sa Manukan, Lapero ug Natividad, Dinokot sa Sindangan, Matam sa Katipunan, Mangilay, Gunyan ug Dioangan tanan sakop sa Siayan.

Matud ni Congressman Labadlabad ang pagmugna ug national high school sa Saluyong daku kaayo ug ikatabang sa mga kasikbit niining barangays sa Situbo, Gubat ug Salisig tanan sakop sa Roxas, Lupasang sakop sa Manukan gumikan kay subra sa dyes kilometros ang gilay-on niini gikan sa high school sa Dohinob ug Villaramos.

Karong semanaha, tulo ka mga lungsod sa segundo distrito ang gitugyanan sa mga school buildings ug kini mao ang Barangay Saluyong sa lungsod sa Manukan, Barangay Paranglumba sa lungsod sa Siayan ug Barangay Piao sa lungsod sa Roxas.

Ang Barangay Piao sa Roxas ug Poblacion East sa Manukan mao lamang ang walay elementary school busa kini gibutangan ug tagurha ka school building.

Sa Paranglumba, gibutyag ni Congressman Labadlabad nga ang gahin nga pundo niini maoy ilang gipangayo ni AFP Chief of Staff Gen. Alexander Yano sa Filipino Chinese Chamber of Commerce and Industry samtang sa ubang mga edipisyo maoy nagagikan sa iyang PDAF.

 Matud ni Congressman Labadlabad, ang upat ka class room school building maoy iyang gitugyan alang sa bag-ong gitukod nga national high school sa Barangay Saluyong sa lungsod sa Manukan.

Alang kaniya, kon mapasar na ang balaodnon sa senado daku na kaayo ug ikatabang sa mga kabataan gumikan kay aduna naman kini kaugalingong alokas-yon sa Department of Education nga dili na matawag ug annex o extention kay duna naman siyay kaugali-ngong principal, regular nga magtutudlo, libro para library ug uban pang gikinahanglan.

Sa pikas bahin, kusga-nong gihimakak ni Congressman Rosendo Labadlabad nga daghang kulang ang iyang gipatukod nga mga school buildings sama sa siling, pintal ug baratuhon nga kahoy kay gamay lamang kaayo ang gipagawas niining kantidad nga maoy gi-angalan sa ubang mga kontraktor.

Matud sa kongresista, ang iyang gipangtukod nga mga school buildings nag-sunod ug project specification sigun sa program of works nga gigama sa Department of Public Works and Highways.

“Mas maayo nga ilang lantawon para makita kon nagsubay ba sa specification sa Department of Public Works and Highways.”

Dagkung tarpaulin

Mahitungod sa mga dagkung tarpaulin nga anaa nagbuntaog nga gibutang sa mga national highway, gipaklaro sa kongresista nga kini mao lamay pagpahibalo sa mga katawhan nga ang representante sa segundo distrito wala magkatulog sa iyang tahas ug gimbuhaton diha sa pagpangita ug pamaagi nga makahatag siya ug daghang proyekto sa kabarangayan.

Matud ni Congressman Labadlabad, sa isyu sa maayong pang-gobiyerno, kinahanglan ang transparent sa mga katawhan. Ang mga dagkung tarpaulin nga iyang gibutang dili usa ka propaganda kay duna may gitukod nga proyekto.

“Ako kining gituyo kay sa isyu sa good governance ang usa ka component requirements niini mao ang transparency. Daku ang tarpaulin para makita sa kataw-han kon pila ang kantidad, asang lugara gidapat.”

Giangkon ni Labadlabad nga tinuod dunay uban nga layo-layo sa project site ang gibutang nga tarpaulin apan kini mao lamang ang pamaagi sa pagpahibalo.

“Ang matag tarpaulin nagrepresentar ug physical project. Dili pod na puwede nga mahimo lang propaganda kay usa na ka dakung distraction sa akong pag-katawo kon ako magbutang-butang ug tarpaulin nga wala diay project.”

Gipaklaro ni Labadlabad nga dili tinuod nga nag-una ug plastar ang tarpaulin nga wala pa gani proyekto. “Gadungan…ang pundo niana ug ang pagpahibalo sa katawhan usab gikinahanglan.”

Kabahin sa isyu nga ang mga dagkung tarpaulin gastu sa gobiyerno, giang-kon ni Labadlabad nga kini pareho nga gigamitan ug kuwarta tipik sa proyekto ug sa iyang personal.

“Combination…dunay uban nga tipak sa project ug duna poy uban nga akong personal. It’s a combination of booth.”

Usa ka kontraktor mipahayag nga sila mismo maoy nagasto sa ubang tarpaulin nga anaa gibutang sa national highway. Matud nila, kini maoy ilang silbing pakapin sa proyekto tungod kay si Congressman Labadlabad dili man mangayo ug porsyento.

Matud pa nila, halos dili na sila maka-ginansiya sa proyekto nga gitukod ni Congressman Labadlabad gumikan kay gawas sa mahal ang mga materyales, gamay lamang ang gahin sa pundo samtang padak-an pa ang proyekto sama sa dalan ug eskuwelahan ug uban pang edipisyo.

Sama pananglit sa usa ka libo metros nga dalan nga gibutang sa program of works, kini himoon ni Congressman Labadlabad ug mil dosyentos metros kay dili naman siya mangayo ug porsyento sa proyekto hi-nungdan nga ang mga pro-yekto sa kongresista gamay ug kantidad apan dako ang mamahimong resulta. (The New Nandau, Vol. XVIII No.19)

 

Regular Session sa Jose Dalman wala madayon kay mayoriya sa mga konsehal naglaag-laag ra?

Wala na maghunahuna sa ilang tahas ug kaakohan ang ubang membro sa konseho sa Jose Dalman alang sa ilang opisyal nga gimbuhaton kay ang nagpasulabe mao ang pagbuot sa ilang kaugalingon nga walay makabadlong kanila.

Kini ang obserbasyon nga gipasibaw sa mga katawhan sa Jose Dalman human mahibaw-e nga niadtung Miyerkules, Disyembre 3, wala mahinayon ang regular session sa Sangguniang Bayan sa maong lungsod gumikan kay ang mga konsehal nga polos kaalyado sa administrasyon ang parehong wala magpatim-aw alang sa ilang opisyal nga semanang gimbuhaton.

Base sa local government code, gikinahanglan ang matag sanguniang mopahigayon sa ilang regular session matag semana arun tratahon ang calendar of business sama sa ordinansa ug resolusyon sa lungsod ug gikan sa sanguniang pambarangay. Kon kini mapaltos gumikan sa opisyal nga lakaw, kinahanglan kini tapakan sa mosunod nga adlaw o semana arun kadtung nakapending nga official business dili malangan alang sa interes sa mga katawhan.

Apan ning semanaha, lahi ang nahitabo sa lungsod sa Jose Dalman kay ang mayoriya sa mga konsehal wala mitambong sa ila untang gikatakdang regular session, bisan walay official travel kay kini namista sa Katipunan samtang ang uban anaa lamang naghaploy-haploy sa iyang manok ug nangumpra ug isda sa Linay.

Kini maoy gikuwestion karon sa mga katawhan sa maong lungsod kon ingon naba niini ang kinaiya sa ilang mga konsehal nga nagdawat ug dakung suweldo sa lungsod samtang daw gibaliwala lamang ang ilang responsibilidad ug kaakohan nga unta, sa usa ka semana, kas-a lamang kini mohimo sa ilang opisyal nga gimbuhaton. (The New Nandau, Vol. XVIII No.19)

 

ZMC PAGKA ECONOMIC ENTERPRISE MITABOK NA SA IKA DUHANG PAGBASA SA SANGGUNIAN

Giaprubahan na sa Sangguniang Panlalawigan sa ZaNorte ang gipadas-og nga ordinansa para sa pagkonbirtir sa ZaNorte Medical Center ngadto sa pagka economic enterprise sa probinsiya.

Kini human giduso sa Committee on Laws, Ordinances, Resolutions, Rules and Style ang ilang report sa plenary session sa Sang-gunian karong semanaha.

Matud pa ni Board Member Ricky Mejorada, chairman sa komitiba ang nasangpit nga lakang gipailawom sa pagpaminaw sa iyang komitiba sulod sa makadaghang higayon uban sa mga tinugyanan sa ZaNorte Medical Center, Local Finance Committee ug Provincial Attorney’s Office.

Hinoon sa report nga giduso ni Mejorada nagpakita nga si Board Member Edgar Baguio wala pirma.

Sa kabahin ni Board Member Bullet Jalosjos, kini wala makapirma sa rason nga absent sa ilang session.

 Ang ubang meyembro sa komitiba nga mipirma mao sila si Board Member Felixberto Bolando ug Board Member Joseph Brendo Ajero.

Gipahayag ni Mejorada nga sa higayon hingpit nang mapanday ngadto sa pagka balaod ang giduso karong ordinansa ang operasyon sa ZaNorte Medical Center isip economic enterprise ang gipasikad sa gimbut-an sa Local Government Code of 1991.

Ilawom sa ordinansa ang ZaNorte Medical Center gilantaw nga makatabang sa paghipos sa gikinahanglang pundo para sa pagpadagan sa operasyon niini ug sa samang bahin padayong molugway ug libreng sirbisyo ngadto sa mga kabus nga katawhan.

Aron sa pagsiguro nga ang gipatuman karong indigency program sa kagamhanang probinsiyal magapadayon tulo ka managkaluhang lakang ang giduso usab sa Sanggunian sa ilang session karong semanaha alang na sa libreng pagpatambal sa atong mga kabus nga katawhan sa nagkadaiyang tambalanan sa ZaNorte ilabi na sa bag-ong hospital nga giaprubahan na sa unang pagbasa.

Ang ZaNorte Medical Center kon hingpit nang mahimong economic enterprise ang mamahimo niining kita magapabilin ra diha sa iyang panudlanan para magamit sa pagpadagan sa hospital ug pagmintinar sa iyang mga pasilidad.

Gilakip gayud sa gipanday nga ordinansa ang indigency program karon ni Governor Rolando Yebes ilawom sa Barangay Indigents Beneficiary Organization.

Ilawom sa gipanday nga balaod ang pagpadagan sa ZaNorte Medical Center ang gobernador maoy gihatagan ug gahum sa pagdumala niini uban sa hospital administrator ug uban Medical Director nga maoy magsilbing chief of hospital; Chief of Clinics/Medical Services; Chief of Ancillary Services ug Chief of the Nursing Services.

Ang ZaNorte Medical Center isip usa ka economic enterprise mokuha na sa gikinahanglan niining pundo sa iyang kauga-lingong income lakip na sa budgetary allocations gikan sa kagamhanang probinsiya ug donasyon o grants gikan sa ubang tinubdan.

Alang na sa operasyon sa ZaNorte Medical Center karong sunod tuig pasiunang P91M ka pesos ang gipahat ilawom sa maong balaodnon. (The New Nandau, Vol. XVIII No.19)

 

LABASON NAHIMONG HALL OF FAMER PAGKA CHILD FRIENDLY  MUNICIPALITY SA TIBOOK REHIYON

Pormal nga gidawat ni Mayor Wilfredo Balais ang pasidungog isip Most Child Friendly Municipality sa tibook Zamboanga Peninsula Region sa gipahigayong tigum sa Regional Development Council didto sa lungsod sa Ipil, Zamboanga Sibugay kagahapong adlawa.

Kini maoy ika tulo na ka tuig nga ang lungsod sa Labason gitunulan sa maong pasidungog sa Department of Health isip Child Friendly Municipality sa tibook reheyon.

Ang pagtugyan sa pasidungog gipangunahan mismo ni Governor Aurora Cerilles sa Zamboanga del Sur nga maoy chairperson karon sa RDC uban ni Governor Rolando Yebes.

Giuban usab ni Mayor Balais ang iyang mga opisyales sa lungsod ug mga barangay kapitan sa ilang pagdawat sa nasangpit nga pasidungog.

Sa interview sa Radyo Ronda-DXKD, si Mayor Balais nagkanayon nga sa unang tuig nilang pag-implementar sa dihang gisagup nila ang programa naglisud sila tungod kay wala dayon mosuporta niini ang ilang katawhan.

Apan sa dihang napasabot na nila sa husto ang katuyuan sa nasangpit nga programa miani kini ug suporta gikan sa mga lungsuranon hangtud nga gikatag nila sa kabarangayan.

Pipila sa mga lakang nga gisagup nila sa Labason mao ang pagdeklarar sa tibook nilang lungsod nga Smoke Free Municipality.

Daku ang pagpasalamat ni Balais sa katawhan sa Labason nga mihatag sa ilang suporta sa maong programa. (The New Nandau, Vol. XVIII No.19)

 

 

 

NOTE: SEND US YOUR NEWS.  Tell us what's going on in your barangays, clubs, schools, businesses and non profit organization. You can also send notices and announcements.
          

 

    Email to webmaster@dipolognon.com

      
Google
WEB THE DAILY DIPOLOGNON
 

THE DAILY DIPOLOGNON
DIPOLOG CITY, PROVINCE OF ZAMBOANGA DEL NORTE PHILIPPINES
www.dipolognon.com www.dipolognon.net  www.dipolognon.org  Keyword: dipolognon
www.dipologcity.com  www.dipologcity.net  www.dipologcity.org  www.dipolognon.com  www.dipolognon.net  www.dipolognon.org    www.dipolog.org  www.dapitan.com   www.eartajo.com  www.cagayandeoro.us 
www.artajo.us www.artajo.info www.eddie.artajo.name www.zamboangadelnorte.com  www.zambonorth.com  www.pagsalabuk.com  www.dipolog.biz www.artajo.biz  www.plasticextrusion.us www.cebu.org
www.davao.us  www.tagum.com  www.giscard.us  www.pagadiancity.com www.malaybalay.net  www.ozamis.com  www.tangub.com  www.oroquieta.net
 www.nabunturan.com www.znuc.org www.znch.ph
www.gingoog.com  www.ozamiz.us www.general-santos.com  www.surigao.net  www.kidapawan.com  www.iligan.us www.raelene.us  www.cagayan-de-oro.com   www.mutyasadipolog.com   www.twinzel.com
 
www.zamboanga.net   www.palmbeachgardens.us   www.islandgarden.net  www.cotabato.net  www.tacurong.com  www.butuan.us  www.pagadian.com  www.dipolog.us
www.zamnai.com
www.dipologhotels.com
   www.dipologpress.com  www.dipologsardines.com   www.extrusion.us www.ozamizcity.com  www.marawi.net www.dipologchamber.com   www.twinzeldipolog.com

Copyright©2008 by The Daily Dipolognon All Rights Reserved  PRIVACY POLICY & DISCLAIMER
Email : webmaster@dipolognon.com  Since October 18, 2000