2

December 14,  2007

 

HUWES GI-HOSTAGE UG PINIRISO!

Wala magtoo ang usa ka huwes sa Bulwagan ng Katarungan lakip ang mga impliyado ug mga manlalaban nga mahimo sa usa ka piniriso ang pag-hostage sa huwes nga mipahigayon sa pre-trial sa kaso niini. Niadtong Huwebes alas 9:20 sa buntag dihang gihimo ang pre-tial sa kaso sa usa ka Royro Ajero Y Tan, 25 anyos molopyo sa Miputak ning siyudad sa branch 9 sa pagdumala ni Judge Yolinda C. Bautista sa kasong paghupot ug pagbaligya sa ginadiling druga dihang gihimo sa suspitasdo ang pag-hostage sa huwes ginamit ang tinalinsan nga toothbrush kolor blue.

Matud pa ni court interpreter Cicel Flores sa branch 9 nga nagapadayon ang pagdungog sa kaso sa suspitsado dihang mikalit kini sa paglayat gikan sa prisoners bench latas sa duha ka lamesa dritso sa lamesa ni Judge Bautista dala ang tinalinsan nga toothbrush ug miduslak kini ngadto sa nawong sa huwes, apan nakobtan sa huwes ang kamot sa suspitsado hinungdan nga wala kini molampos sa iyang dautang tinguha ngadto sa huwes. Dugang pahayag ni Flores nga wala makabantay ang huwes dihang milayat na pa-ingon kaniya ang suspitsado tungod kay nagdungo kini ug didto na lamang nabantayi sa huwes ang suspitsado dihang dool na kini sa huwes nga miduslak sa gidalang tinalinsang toothbrush.

Sa maong  aktuwasyon, wala usab makalihok ang mga abogado ug ubang impliyado sa korte tungod sa kakalit sa gihimo sa suspitsado kinsa dali kaayong nakalayat gikan sa nahimutangan nini pa-ingon sa lamesa sa huwes. Sumala pa sa court interpreter nga mga 5 minutos ayha nasanta ang suspitsado tungod kay nakobtan man niya ang huwes ug iyang nadungog nga mi-ingon kini ug “Ayaw mo ug dool kay patay ni. Maayo na lang nasanta kini sa usa ka sheriff nga si Lamberto Cabuguas ug usa ka impliyado nga si Boy Realiza, ilang gikobtan ang suspitsado ug gibira kini palayo sa huwes.

Sa maong kahimtang ayha pa mihimo ug aksiyon ang mga BJMP kon Bureau of Jail Management ang Penology nga maoy nagbantay sa maong piniriso nga mihimo sa pag-hostage sa huwes. Tungod sa maong hitabo nakapangutana ang pipila ka mga katawhan nga nasayud sa maong hitabo ingon man ang mga impliyado sa Bulwagan ng Katarungan kung nganong nakdala ug bladed weapon ang suspitsado atul sa pre-trial sa kaso niini nga unta gikan man kini sa prisoshan ug binantayan pa sa mga sakop sa BJMP.

Human sa maong hitabo si judge Bautista nakaangkon ug samad sa iyang nawong tungod kay naabtan gayud kini sa tinalinsan nga toothbrush nga gigamit sa suspitsado. Atul sa maong pre-trial sa kaso sa suspitsado kini gisaksihan sa mga manlalaban nga sila si board member Atty. Edgar Baguio, Vice Mayor Atty. Senen O. Angeles ug uban pang mga abogado. Ang suspitsado nga si Royro Ajero ang nag-atubang kini sa kasong paghupot ug pagbaligya sa ginadiling drugas kinsa nadakpan sa kapulisan ni-adtong Octobre 4 ning tuiga sa Boulivard Miputak ning dakbayan sa Dipolog. (Mindanao Star, Vol.III No.45)

 

Dress Code sa Sicayab gisaway

Nakaani ug pagsaway ang dress code ordinance sa Barangay Sicayab ilang sugdan sa pagpatuman karon.

Si Atty. Ivan Patrick Ang, Provincial Tourism Officer sa Zamboanga del Norte miila sa nasangpit nga ordinansa nga anti-poor. Matud pa ni Atty. Ang dapat ang pagpanirbisyo sa publiko dili mamili kadtong makasuot lamang ug hustong bisti maoy mamahimong maka transak sa kagamhanan.

Ilawom sa nasangpit nga ordinansa higpit nga gidid-an kadtong mga lungsuranon nga makasulod sa ilang barangay hall nga naka sando lamang ang lalaki. Lakip na sa gidili ang pagpasulod ug lalaki o babaye nga mubo kaayo ang short pants. Matud pa sa provincial tourism officer sa ZaNorte ang paglugway ug sirbisyo sa kagamhanan walay pagpili unsa ang imong gisuot kay dili tanang tawo may kaya nga makapalit ug mga tarong nga sanina.

Ang Sicayab mipadas-og sa nasangpit nga lakang kay ang ilang barangay hall gipakasama nila nga Bulwagan ng Katarungan sa rason nga dili ra usab ipahigayon ang paghusay sa Lupong Tagapamayap ug Pangkat ng Tagapagkasundo. Matud pa ni Atty. Ang kapitolyo probinsiyal nga maoy pinaka daku nga buhatan sa kagamhanan wala gani mag-imposar ug dress code ngadto sa mga lungsuranon nga adunay tuyo sa buhatan sa gobernador.(Press Freedom, Vol. XX No. 8)

 

Gasolina para sa PNP DplG kalooy lang sa Mayor

“Dili obligasyon sa kagamhanang local sa dakbayan sa Dipolog ang paghatag ug petrolyo alang sa Dipolog Police Office kon dili ayuda lamang”, kini ang giklaro kagahapon ni City Information Officer Atty. Alanixon Selda. Sa nasayran ang tag 50 litros nga gialokar nga petrolyo para sa Dipolog Police Office kada adlaw ang gikuha gikan sa gasoline allocation ilawom sa buhatan sa mayor kay mismo ilawom sa budget para sa kapulisan walay nakabutang nga pundo para niini.

Gipasabot ni Atty. Selda nga ang pagputol sa Dipolog sa paghatag ug petrolyo ngadto sa kapulisan gipasikad sa hinungdan nga gidaginot karon ang nahibiling alokasyon sa gasoline ilawom sa buhatan sa mayor nga molungtad pa hangtud sa katapusang bahin karong tuiga. Matud pa ni Atty. Selda dili angayang basolon ni Police Provincial Director Senior Superintendent Mario Biong Yanga ang Dipolog kabahin niini tungod kay ang PNP usa ka lahi nga institusyon o ahensiya sa kagamhanan nga nagbatun usab sa iyang kaugalingong budget para sa petrolyo alang sa ilang operasyon.

Matud pa sa buhatan sa mayor sa Dipolog ang siyudad nakahatag ug petrolyo ngadto sa kapulisan nga mokabat sa P92 mil pesos nga krudo kada buwan alang sa upat ka mga jeep ug usa ka Toyota FX sa tag 15 litros kada adlaw. Samtang laing kapin sa P64 mil pesos nga gasoline kada buwan alang sa duha ka police mobile ug usa ka pick-up ug laing dos mil ka pesos para gasoline sa duha ka motorsiklo nga iya tanan sa Dipolog Police. Mibawos usab ang buhatan sa mayor sa pagpangutana karon ngadto kang Police Provincial Director Yanga kon giunsa man diay niya ang alokasyon sa petrolyo para sa kapulisan sa Dipolog.

Sa kabahin sa Zamboanga del Norte Police Provincial Office gipatin-aw sa ilang supply officer nga ang gialokar nga petrolyo para sa Dipolog Police mokabat lamang sa 130 litros kada buwan sigun sa nadawat nilang alokasyon gikan sa Camp Crame. Kini ang gipatin-aw ni SPO4 Hiyasmin Bustallino kinsa nagkanayon nga dili gayud pasigo para sa ilang operasyon ang gialokar nga gasoline gikan sa Camp Crame busa naandan na nila nga mangayo gayud ug suporta sa mga kagamhanang local.

Sa pagka karon ang Camp Hamac maoy naghatag sa Dipolog Police sa 50 litros nga petrolyo kada adlaw para sa ilang mga sakyanan. Sa sayu pa si Police Provincial Director Yanga mipadala ug suwat ngadto kang Governor Rolando Yebes nga naghangyo nga matabangan sila sa problema kabahin sa gikinahanglang petrolyo sa Dipolog Police kay giputol na sa city hall ang ilang gihatag nga alokasyon.

Sa iyang kabahin si Governor Yebes nagkanayon nga andam siyang mohatag ug dugang alokasyon para petrolyo nga magamit sa Dipolog Police. Matud pa sa gobernador ang probinsiya adunay programa nga gitawag ug Pulis Laban sa Krimen nga may pahat nga usa ka milyon ka pesos nga posibling maoy kuhaan sa pundo alang sa gikinahanglang alokasyon sa petrolyo sa Dipolog Police.(Press Freedom, Vol. XX No. 8)

 

PHO gimanduan pagsubsob ‘information drive’ vs bitok

Gimanduan karon sa gobernador ang Provincial Health Office sa Zamboanga del Norte sa pagpakig koordinar sa nagkadaiyang mga Rural Health Unit diha na sa paglusad ug subsub nga information campaign batok na sa capillariasis. Matud pa ni Governor Rolando Yebes dili lamang solo nga problema sa Siayan ang Capillariasis kay aduna usay mga kaso nga natala sa mga lungsod sa Katipunan, Manukan, Jose Dalman ug uban pa.

Sa iyang nakita adunay panginahanglan nga matudluan gayud ang mga katawhan diha sa kabarangayan sa pagsagup sa hustong sanitasyon diha sa ilang mga pagkaun. Matud pa niya sa gihimong pagsubay sa Provincial Health Office milutaw nga ang dili husto nga eating habit sa mga katawhan sa ba-rangay maoy nakatampo sa paglamay sa maong sakit sa pipila ka bahin sa lalawigan ilabi na ang pagkilaw sa mga isda ug uwang gikan sa suba ug sapa nga maoy gisuspetsuhang nagdala sa bitok nga Capillariasis.

Uban na usab niini ang batasan nga kon adunay iresita nga tambal ang mga doctor dili motunong sa gihatag nga tukmang pana-hon sa pagtumar niini hinung-dan nga dili hingpit nga ma-patay ang bitok diha sa tiyan. Gidasig usab ni Governor Yebes ang mga municipal mayors sa pagpadayon sa paghatag ug mga pahimang-no sa ilang mga katawhan sa barangay para malikay sa mga susamang mga sakit.

Gitataw sa gobernador nga ang maong mga sakit sayun ra kaayo masumpo nga wala magkinahanglan ug dakung kantidad kay mapakgang kini pinaagi lamang sa pagsagup sa tukmang pagsunod sa hustong sanitasyon diha na sa ilang pagpuyo. Giklaro sa gobernador nga wala magkatulog ang probinsiya sa nagkadaiyang problema nga giatubang sa atong mga katawhan hinungdan nga siya mismo panagsa ra makita diha sa iyang opisina sa kapitolyo nga magsigid ug hangad-hangad sa alkuba kay kanunay nga atua siya sa mga barangayan. Bisan pa ug atua siya sa kauluhan sa kanunay gisuhito niya ang mga nagpanghitabo sulod sa nagkadaiyang bahin sa atong probinsiya.(Press Freedom, Vol. XX No. 8)

 

SP-ZN mag-recess sa pasko

Wala nay session nga pagahimoon ang balay balauranan sa Zamboanga del Norte hangtud sa katapusang bahin sa tuig 2007 human gideklarar nila kagahapon nga magsugod sila ug recess sa Desyembre 10, 2007 ug mobalik sila sa unang semana sa Enero 2008. Si Vice Governor Francis Olvis, mipahayag wala hinoon mabutang sa ilang internal rules nga aduna silay recess panahon sa pasko.

Apan ang ubang mga balay balauranan nagbuhat na niini nga modeklarar ug recess panahon sa pasko. Hinoon matud pa niya pangitaan nila kini ug basihanang legal ang pagdeklarar nila karon ug recess gikan sa Desyembre 10 hangtud sa katapusang bahin sa tuig. Luyo sa pagdeklarar karon ug recess sa balay balauranan sa probinsiya gipasalig ni Vice Governor Olvis nga andam silang mopahigayon ug special session kon gikinahanglan ilabi na kon ipadas-og na sa gobernador ang lakang alang sa paghatag ug 14th month bonus sa mga kawani sa probinsiya.

Sa samang bahin mipalanog usab si Vice Governor Olvis sa iyang birthday wish sa pagsaulog sa iyang ika 57 anyos ka tuig nga kasumaran sa adlaw’ng natawhan nga unta makalugway pa siya ug dugang pagsirbisyo ngadto sa mga katawhan. Matud pa ni Vice Governor Olvis doblihon karon nila sa ilang ika duhang termino ang pag-alagad sa katawhan kay maoy tuyo usab niya nga mapapa na ang mantsa nga nakahatag ug lama sa panagway sa atong probinsiya human madeklarar nga maoy pinaka pobre nga lalawigan sa tibook nasud. Sama sa gobernador maoy damgo usab ni Vice Governor Olvis nga mamahimong usa ka progresibo nga probinsiya ang ZaNorte sa umaabot nga mga katuigan.(Press Freedom, Vol. XX No. 8)

 

Pagatukuron nga Sun CelL site gikahadlokan sa mga taga Sicayab
By:  ALFREDO “PEDOY” OGOC

Tumang kabalaka ang gihambin karon ngadto sa pipila ka mga lumulopyu didto sa may Purok D’ Beach sakop sa Barangay Sicayab dakbayan sa Dipolog mahitungod na sa usa ka Cellphone Tower kon Cell Site nga anaa gitukod duol sa ilang tugkaran. Mao kini ang gibutyag sa mga lumulopyu sa naasoy’ng dapit diin ilang gikahadlokan nga ang radiation niini sa maong cell site makahatag unyag kadaut sa ilang panglawas ilabina sa ilang mga anak.

Nasayran nga ang maong Cellphone Tower or Cell Site gipanag-iyahan kini sa Sun Cellular Company ug ang ilang nahimutangan o pwesto niini duol ra kaayo sa mga panimalay nga adunay siyam ka mga bubong ang nagpuyo.  Ug matud pa sa mga residenti nga ang maong Sun Cellular Company ang wala kini gihuptan nga mga permits gikan na sa mga buhatan sama sa City Engineering, City Planning, Health and Sanitation Division sa lokal nga buhatan sa Maayong Panglawas ning dakbayan ug uban pa.  Nahibulong na lamang ang mga lumulopyu nga gipadayon man nila sa pagpatrabaho ang naasoy’ng Cell Tower o Cell Site nga unta walay insaktong mga dokumento kon angayan ba kini pagabutangan ang maong dapit.  Labot pa, halos kada gabii kini nilang gitarbaho ang maong Cell Tower ug dili gayud makatulog sa husto ang mga lumulopyu tungod sa kabanha niini sa ilang pagpatrabaho.

Dugang natong nasayran basi sa usa ka internet pinaagi na ni Dr. Carlos Sosa, usa ka Physician ug Surgeon nga nagabasi sa Medelin, Columbia sa South Africa diin mibutyag nga ang Cell Tower o Cell Site nga anaa gipahimutang duol sa mga lumulopyu ang kini nakahatag sa dakung peligroso diha na sa panglawas sa tawo tungod sa radiation niini.  Ang apektadong katawhan makasinati niini sama sa kanunay’ng paglabad sa ulo, maglipong – lipong, dili makatulog, amnesia ug ang uban niini makasinati sa mga dermatological allegies, mamula ang pamanit, magpula ang mata ingon man ang maong epekto usab ang ikamatay kini sa tawo.  Ang maong matang sa sakit ginatawag kinig Microwave Syndrome / Electromagnetic Hypersensitivity, Microwave Disease, Radio Frequency Sickness, Radar Disease, Electric Sensitivity o Cellphone Disease.

Hinungdan nga dili gayud ang mga lumulopyu mosugot nga mapadayon ang ilang pagpatrabaho sa nasangpit nga Cell Tower o Cell Site tungod kay nakahatag man kini nila sa dakung peligroso sa ilang kinabuhi. Sa kabahin ni Barangay Kagawad Ada Cadavedo Lee daku usab ang iyang pagsupak nga ang naasoy’ng Cell Tower o Cell Site anaa kini duol gipahimutang sa mga lumulopyu tungod kay alang kaniya makahatag kinig kadaut sa ilang kinabuhi ilabina sa ilang panglawas.  Apan uyon siya kon ang Cell Tower ipahimutang kini sa husto ug layo sa mga katawhan. Niining bahina, wala pa nato kakuhaig pamahayag ang mga representanti gikan sa Sun Cellular Company tungod kay atua man kini sa kauluhang Manila. (Mindanao Star, Vol.III No.45)

 

Guba nga generator sa merkado, wa pa aksiyoni

Nahimong mulo karon sa mga stall holders sa merkado publiko ning dakbayan sa Dipolog kung nganong hangtud karon wala pay aksiyon nga gihimo ang kagamhanang lokal sa Dipolog mahitungod sa nagubang generator diin panahon sa brown-out o mawala ang kutay sa sugang dagitabnon ngi-ob kaayo ang pipila ka mga stall sa merkado.

Gawas sa kangit-ngit ug kainit nga ilang masinati panahon nga walay koryente namiligro pa gayud ang ilang mga baligya batok sa posibling pagpahimulos sa mga kawatan tungod sa kangit-ngit niini. Sa maong sitwasyon nanawagan ang pipila ka mga stall owners sa Dipolog Public Market ngadto sa liderato sa siyudad nga unta ayuhon na ang nagubang generator aron magamit panahon sa walay koryente.

Gawas sa maong problema nga mitumaw karon diha sa merkado ning siyudad napunting usab sa pagsaway sa pipila ka mga mamalitay’ng publiko ang nagkadaghang makalilimos nga mihugpa karon sulod sa merkado nga halos dili gyud magpabalibad nga mangayo ngadto sa mga customer nga mamalit diha sa merkado publiko ning dakbayan.

Nanawagan usab sila ngadto sa local chief executive sa Dipolog nga pakgangon kining nagkadaghang makalilimos dili lamang sulod sa merkado lakip na usab kining mga naglibod-soroy sa mga kadalanan dinhi sa siyudad nga nagpakalimos. Sa naobserbahan dugay-dugay na nga panahon nga gihugpaan sa mga makalilimos ang dakbayan sa Dipolog ilabi na ang merkado publiko apan hangtud karon walay aksiyon nga gihimo ang lokal nga pangagamhanan ning dakbayan sa Dipolog. (Mindanao Star, Vol.III No.45)

 

Kon dunay ihatag nga proyekto ang Dipolog sa Diwan,
dawaton NAKO -Kap. Natan Patangan

“Andam nakong dawaton kong duna may proyekto nga ihatag ang kagahamhanang lokal sa Dipolog para sa among barangay sa Diwan”. mao kini ang prangkang tubag ni Kapitan Natan Patangan sa barangay Diwan ning dakbayan sa Dipolog kalabot na sa pangutana nga modawat ba kini sa posibling proyekto nga ihatag sa dipolog bisan pa man sa rason nga dili kini tawo sa mayor sa dipolog.

Matud pa ni kapitan Patangan dihang nahinabi kini sa mga sakop sa ZNUC sa kapihan sa 1948 cafeteria nga kong proyekto para sa kaayuhan sa mga katawhan sa ilang barangay ang ihatag sa dakbayan walay rason nga iya kini balibaran kay makadugang kini sa kalambo-an para sa ilang barangay. Sumala pa niya nga dili siya susama sa ubang mga kapitan nga kong dili ka-grupo ang opisyal nga mohatag sa proyekto kini mobabag bisan pa man ug makaayo kini sa mga katawhan.

Kini nga kahimtang nagapanghitabo kani-adto sa daghang barangay dinhi sa Dipolog kinsa ang mga kapitan misupak sa proyektong gihatag sa kagamhanang probinsiyal. Usa na niini ang barangay Biasong kinsa mibalibad sa covered court nga gihatag sa probinsiya. Alang kang kapitan Patangan nga magpasalamat siya ug mohatag sa daghang proyekto ang dakbayan sa Dipolog tungod kay ang barangay Diwan sakop man sa Dipolog ug maoy pinakadaku ug land area sa tanang mga barangay sa siyudad ug daku pa kaayo ang panginahanglanon sa mga katawhan sa maong barangay.

Gi-asoy sa bag-ong napili nga kapitan nga malinawon ang iyang pag-asyumer ni-adtong Disyembre 1 ning tuiga isip mao nay bag-ong kapitan sa barangay Diwan ug nakahan-ay na ang iyang mga prayoridad nga programa para sa ilang barangay. Iya usab gi-awhagan ang iyang mga ka-ubang kapitan sa Dipolog nga unta dili mobalibad sa proyektong ihatag sa kagamhanang probinsiyal tungod kay kini dili pamolitika kung dili para sa kaayuahan sa mga katawhan nga maoy makatagamtam sa naasoy’ng proyekto. (Mindanao Star, Vol.III No.45)

 

Siayan unang natakboyan ug malaria

Sulod sa 17 ka mga lungsod sa probinsya ang lungsod sa Siayan maoy nanag-una lungsod nga natakboyan sa sakit nga malaria basi sa tahu nga nasubay pinaagi sa Malaria Data nga nahipos gikan sa buhatan sa Provincial Health Office. Ang lungsod sa Siayan adunay10 ka mga barangay ang naapektuhan sa sakit nga Malaria A. nga diin nilangkubang sa barangay Guibo, Moyo, Domogoc, Diongan, Macasing, Balunokan, Pange, Mangilay, Balok ug brgy Seriac nga gikan sa tuig 2003-2006 basi sa nakab-ot  nga tahu sa naasoy’ng buhatan.

Ang mga lungsod nga naapektuhan sa sakit nga malaria.

Sa pakignabi ni Dra. Carmencita P. Icao ang hepe sa Provincial Health Officer nga ang sakit nga Malaria ang makuha sa lamok nga babaye ug adunay 2 ka klasi sa sakit nga Malaria ug suma pa nga ang Malaria area A adunay mga lungsod nga diin ubay-ubay ug naapektuhan nga mga resendenti sanglit ang Malaria area B pipila ka mga katawhan ang natakboyan diha sa matag barangay. Adunay 11 ka mga lungsod nga naigo sa Malaria A nga nilangkuban sa lungsod sa Siayan, Sindangan, Leon B. Postigo, Baliguian, Godod, Siocon, Sirawai, Gutalac, Sibuco, Sergio Osmeña,ug kalawit samtang sa Malaria B adunay 6 ka mga lungsod lakip na ang dakbayan sa Dipolog, lungsod sa Katipunan, Roxas, Jose Dalman, Manukan ug lungsod sa Labason.

Kahibaloan nga kaniadtong bulan sa November petsa 19-20 ning tuiga gipahigayon ang Provincial Project Orientation of the Global Fund Malaria Component didto sa Mibang Hotel ning dakbayan aron masubay ang matag lungsod nga naapektuhan sa sakit nga malaria ug matud pa adunay 8 ka mga inilang nasud nga mi-ayuda ug mohatag ug dagkong pundo nga mokabat sa 22.23 milyones dolyares aron sa pagwagtang sa sakit nga malaria dinhi sa probinsya.

Si Dr. Raymund Nadela ang Municipal Health Officer sa lungsod sa Siayan ang mikompermar nga adunay pipila ka mga barangay ang naapektuhan sa naasoy’ng sakit tungod usab sa mga kalasangan nga diin didto sa nagpuyo ang mga lamok ilabina sa kasigbit nga mga barangay nga diin gipuy-an sa mga lamok ug matud pa ni Dr. Nadela ang uban lamok nagagumikan sa Zamboanga Del Sur. Dugan pa ni Dr. Nadela nga kaniadto ilang gihimo ang pag-fogging o pagpa-aso sa matag barangay apan ilang nakita nga misulabi ang mga lamok ug mikatap ug minglalin ang lamok sa ilang lungsod. Sanglit gipasalamatan ni Dr. Nadela ang buhatan sa Global Fund nga diha sa ilang tinguha matabangan ang mga katawhan alang sa pagwagtang sa sakit nga Malaria dili lamang sa ilang lungsod lakip na ang naapektuhan sa maong sakit dinhi  sa Zanorte. (Mindanao Star, Vol.III No.45)

 

Pagpananom ug goma giawhag

Aron masayran ang kabilinhon  diha sa pagtanum ug Goma, ang buhatan sa Provincial Agriculture pinanguluhan ni Maybel C. BustaliÑo ang Supervising Agriculturist kinsa ang midapit sa mga inilang professor o magtutudlo gikan sa inilang unibersidad  aron mabansay-bansay ang mga mag-uuma dinhi sa Zanorte ug ilang matino ang.ka importansya diha sa pagtanum ug pinaagi sa bag-ong teknologiya.

Diin ang buhatan sa Department of Agriculture Region 10, Agricultural Training Institute kon ATI ug ang buhatan sa Provincial Agriculture ang mipahigayon ug 4 ka adlaw nga TRAINER’S TRAINING ON RUBBER PRODUCTION TECHNOLOGY IN SUPPORT TO HI-GREEN PROGRAM niadtong November 29-30 alang sa 1st batch ug sa 2nd batch niadtong petsa 1-2 ning bulan sa December didto sa ATI Irasan, Roxas ning lalawigan. Atol sa maong pagbansay-bansay adunay 81 ka mga partisipante alang sa 1st batch ug  sa 2nd batch adunay 76 ka mga partisipante nga gikan sa 1st distrist hangtud sa 3rd distrist nga nilangkuban sa mga Municipal Agriculturist, Municipal Technician ug mga membro sa Farmer’s Association kinsa ang mitambong sa maong pagbansay-bansay.

Ang 2 ka mga inilang dinapit nga professor sila si Dr. Eugenio Alcala ang Vice President sa Research & Extension gikan sa University of Southern Mindanao ug kasamtagan nga Executive Director sa Philippine Rubber Board Inc. kauban ni Dr. Tenny Alcala ang Designated Planning Officer gikan sa Statellite Center sa University of Southern Mindanao Kabacan Cotabato kansang ang mga hanas nga magtutudlo diha sa industriya sa Goma ang nahimamat sa mga partisipante.

Matud pa ni Dr. Eugenio Alcala nga basis sa ilang nakuha nga research nga diin ang industrial crops nga motubo diha sa mga tropical country nga matud pa, nga ang goma maoy makahatag ug malungtaron ug sustinable abot ug suma pa sa maong professor, diin dili kini makuha sa ubang tanum susama sa mga prutas nga matud pa tempo-tempo ang pagbunga niini salit ang goma gikan sa pagtanum sulod sa 5 ka tuig nga pagpatubo sa maong kahoy triple ang mamahimong abot niini.

Saysay pa sa magtutudlo nga adunay 23 ka  mga inilang nasud ang mi-ila sa  kahoy goma lakip na ang nasud  sa Pilipinas ug dinhi sa Zanorte pinaagi sa program ni Governor Rolando Yebes ug  nahimogso ang HI-GREEN Program nga maoy gitutukan pag-ayo sa buhatan sa agrikultura aron mahanas ang mga mag-uuma ginamit sa bag-ong teknologiya sa Goma. (Mindanao Star, Vol.III No.45)

 

Alliance Building orientation tulay sa mga LGU
ngadto sa regional directors -Vice Gov. Olvis

Gipahigayon ang Provincial Alliance Building Orientation Program didto sa Plenary Hall, ZN Convention Center nga gipasiugdahan sa buhatan sa Department of Interior and Local Government ning lalawigan sa Zamboanga del Norte sa pagpangulo ni Provincial Director Jaime Paler inabagan usab sa Provincial Planning and Development Office pinaagi ni Ms. Rosevic Lacaya-Ocampo.

Ang maong kalihokan ang gisalmutan kini sa mga mayor sa 25 ka mga lungsod ug 2 ka mga syudad ning lalawigan, regional directors ug mga representante sa mga National Line Agencies apil na niini ang mga local chief executives sa kapitolyo probinsyal. Si Vice-Governor Francis Olvis namahayag nga ang maong Alliance Building orientation program mao unya ang mamahimong tulay aron mapaabot sa mga LGU ang ilang mga panginahanglanon sa ilang lungsod ngadto sa mga regional directors ilabi na sa mga ayuda nga gikan sa national nga buhatan.

Sa kabahin usab ni Atty. Jes Gal Sarmiento Jr. nga maoy ni-presentar sa mga programa ni Governor Yebes, nga ang gobernador ang nagtutok kini sa iyang 8-point agenda nga nag-prioridad sa paghatag ug tabang sa mga pobre nga katawhan subay sa iyang sumbanan nga “Una sa Tanan ang Katawhan”. Kahibaloan nga kaniadtong 2003, ang National Statistics Coordinating Board ang mipagawas sa resulta sa survey nga ang lalawigan sa Zamboanga del Norte maoy pina-pobre nga probinsya sa Pilipinas, ug tungod niini ang gobernador ang mipahigayong kini ug Poverty Mapping Program aron maila ang mga kabus nga katawhan sa tibuok probinsya.

Atol sa maong programa ang DILG ning lalawigan ang mipagula sa over-all performance sa mga lungsod may kabahin na sa mga nahimo niining mga kalampusan ilabi na sa paghatod sa mga serbisyong sosyal lakip na niini ang environmental developments. Sa mga presentasyon sa mga resource speakers, nahimong nahan-ukan sa mga pangutana sa mga mayor ang repsentante sa National Nutrition Council- Region IX may kalabot na sa Malnutrition Program diin probinsya sa ZaNorte ang apil sa Priority One sa Presidente sa Pilipinas nga adunay pinakataas nga rating sa malnutrasyon diin ang lungsod sa Godod ang nag-una sa 21 ka mga lungsod nga adunay problema sa malnutrisyon.

Matud pa na NNC nga ang ilang buhatan karon mao ang nag-implementar sa Food-Poor School program nga naghatag ug libreng usa ka kilo nga bugas sa mga tulunghaan dinhi sa lalawigan apan mayoridad sa mga mayor ang wala kini kalibutan sa maong programa ka yang ilang mga eskwelahan ang wala pa usab makadawat sa maong libreng bugas gikan sa NFA. Si Mayor Norbie Edding sa Sibuco ang usa sa mga mayor ang mipaabot sa iyang klaripikasyon sa NNC mahitungod na sa maong programa, tungod kay walay taga NFA ang naghatod sa mga bugas sa iyang lungsod.

Hinuon, ang representante sa NNC ang mobisita kini karong adlawa sa DepEd ug NFA aron sa pagsuta kung unsa ang mga kakulangon sa pag-implementar sa maong programa. Nasayran, subay sa maong programa aduna nay 451 outlets sa Tindahan Natin ni PGMA diin ang mga katawhan ang pwedi nga makapalit sa baratong bugas, noodles ug ubang basic goods. Sa pagtak-op sa maong programa, si Atty. Sarmiento ang mapasalamaton kini sa mga partisipante ug nag-awhag sa mga LGU nga maghiusa kini ug magtinabangay sa pagyayong unya sa mga maayong programa sa tagsa-tagsa ka mga lungsod ug syudad alang na na sa katawhan ning lalawigan. (Sam Buddy, Mindanao Star, Vol.III No.45)

 

Sa Tampilisan ug Kalawit
Bag-ong opisyales nanumpa na!

ANG pagkuyog sa tanang mga kapitan ug mga barangay kagawad sa lungsod sa Tampilisan ning atong lalawigan sa Zamboanga del Norte sa pagpanerbisyo uban sa mga kadagkuan sa lungsod ug sa probinsiya, dili lamang kutob sa kuyog, kinahanglan ipakita gayud nga kauban diha na sa pag-alagad ngadto sa mga katawhan. Kini maoy gipabati nga mensahe ni Governor Rolando Yebes uban sa paghagit sa mga bag-ong napili nga barangay officials sa maong lungsod nga dungan nga nanumpa uban sa Sangguniang kabataan.

Gipahayag sa gobernador nga kung ang pagkuyog sa mga kapitan ngadto sa grupo sa APP tungod lamang sa proyekto nga ilang pangayoon dili kini kinasing-kasing nga pagkuyog ug dili kauban. Iyang gihatagan ug gibug-aton nga kung igo lang mikuyog ang kapitan ug dili kauban, dili na lang kini mokuyog sa grupo diha na sa pagpanerbisyo nga unang gihatagan ug pagtagad ang mismong katawhan.   Samtang gihagit usab ni 3rd District Congressman Cesar Jalosjos ang tanang mga barangay officials sa Tampilisan nga abri ang ilang tagsa-tagsa ka mga kamot alang sa panaghi-usa ug hikalimtan na ang nakalabay nga barangay election. Pinaagi niini, mahatagan gilayon ug kasulbaran ang problema sa matag barangay.

Gipahibalo usab ni Congressman Jalosjos nga usa sa iyang prayoridad karon mao ang pag-develop sa mga kabataan. Isip House Chairman sa Committee on Youth ang Sports Development nagpahimo na siya ug program karon  sa iyang komitiba nga makahatag ug kaayohan sa tanang mga kabataan sa tibook nasud ilabina sa probinsiya sa Zamboanga del Norte. Gidugang sa kongresista nga e-develop ang mga kabataan pinaagi sa maayong gawi ug pamaagi. 

Ang maong mass oath taking sa mga barangay ug SK officials sa Tampilisan kini ang gisaksihan usab sa mga kadagkuan sa maong lungsod sa pagpanguna nila ni Mayor Jan-Jan Jalosjos ug Vice Mayor Enriquita Bomediano, mga miyembro sa Sangguniang Bayan ug mga katawhan sa maong lungsod. Human sa Tampilisan, gisunod usab ang mass oath taking sa tanang mga barangay ug SK officials sa lungsod sa Kalawit ning atong lalawigan. Hini-usang gipabati nila ni Governor Yebes ug Congressman Jalosjos ang ilang panawagan sa tanang mga opisyales sa barangay ang sinsero nga pag-alagad ngadto sa mga katawhan.  (Mindanao Star, Vol.III No.45)

 

Oath taking sa Liloy

LAING mga barangay officials na usab sa tersiro distrito ang hini-usang nanumpa atubangan nila ni Governor Rolando Yebes ug 3rd District Congressman Cesar Jalosjos. Sa wala pa ang alas dose sa udto, nga maoy opisyal nga paglingkod sa mga elected barangay ug SK officials, hini-usang nanumpa ang tanang mga barangay kapitan ug kagawad sa lungsod sa Liloy ning atong lalawigan.

Sa gihimong programa, gipahayag ni Governor Yebes nga sa opisyal nga paglingkod karon sa mga opisyales sa barangay huna-hunaon na  kung unsaon pagserbisyo ngadto sa mga katawhan nga misalig ug mipili kanila sa nakalabay nga barangay election. Dili na kini maghuna-huna alang sa kaugalingong interest. Iya usab nga gipaambit ngadto sa tanang mga opisyales sa barangay sa Liloy ang usa ka pasumbingay nga adunay amahan ug anak ang mitabok sa suba nga kinahanglang maginunitay. Ang maong suba nga tabukon sa amahan ug anak mao ang suba sa pagpanerbisyo, samtang ang amahan mao ang mayor, congressman ug gobernador. Kung makabuhi mahulog ngadto sa piligro nga kahimtang.

Gidayeg usab ni Congressman Jalosjos ang gipakita sa mga barangay officials sa Liloy alang sa panaghi-usa. Importanti kaayo sa mga opisyales sa barangay ang ilang tahas aron makab-ot ang dugang kalambuan sa matag barangay. Magpabilin kining abri alang sa panaghi-usa. Gihatagan ug gibug-aton sa kongresista nga ang pagkuyog ni Mayor Jaime Lim sa Liloy ngadto sa grupo sa APP nakahatag kini ug kaayohan karon sa lungsod.  Gipahibalo ni Congressman Jalosjos nga aduna siyay singko milyones pesos nga iyang gihatag karon alang sa pagpalambo sa Liloy Gym uban sa usa ka milyon ka pesos nga gihatag usab ni Governor Yebes.

Samtang gihangyo usab ni Mayor Lim ang tanang mga opisyales sa barangay nga sa ilang opisyal nga paglingkod karon sa ilang katungdanan himoon ang kutob sa ilang makaya diha sa level sa barangay, ug kung dili na kini mahimo ayha pa ipaabot ngadto sa mayor, congressman ug gobernador.  Ang maong mass oath taking sa tanang mga opisyales sa barangay sa Liloy ang gisaksihan ni Presidential Assistant for Western Mindanao Ferdie Mahusay.

Gihimo usab ang mass oath taking sa tanang mga opisyales sa barangay sa Manukan niadtong milabay’ng semana. Direktang gipalanog usab ni 2nd district congressman Rosendo Dodoy Labadlabad nga uban sa lederato karon sa probinsiya pinaagi ni Governor Yebes nagkahiusa alang na sa pagsuporta ug pagpalambo sa tibook lungsod sa Manukan. (Mindanao Star, Vol.III No.45)

  

PPO miangkon konsumo sa gasolina gikan sa PNP Reg’l Office dili paigo

Giangkon sa Provincial Police Office nga dili paigo ang supply para konsumo sa gasolina sa tanang police stations sa mga kalungsoran ug siyudad sa Dipolog ug Dapitan, Zamboanga del Norte gumikan kay limitado lamang ang budget allocation para niini nga gilugway gikan sa ilang labaw’ng buhatan. Mao kini ang gibutyag ni SPO4 Gejasmine Santiago-Bustaliño, Supply Officer sa Provincial Police Office sa Camp Hamac Sicayab ning dakbayan sa Dipolog mahi-tungod sa gasoline alloca-tions nga ilang nadawat gikan sa national ug gibahinbahin sa tanang police stations sa tibook probinsya.

Matud ni SP04 Bustaliño, sila sa Provincial Police Office nag-agad lamang sa budget nga ilang madawat gikan sa PNP Regional Office ug mao usab kini ang ilang bahinbahinon sa mga kalungsoran. Sumala pa sa supply officer ang PPO magdawat ug 2,888 litros nga gasolina matag bulan, apan kini magdependi sa presyo. “Hindi pare-pareho pagka nagmamahal ang gasolina lomo-lower ang quantity ng issuance.” Dinhi sa Dipolog, ang Campo Hamac naghatag ug 120 ngadto sa 130 litros matag bulan. Ang maong gidaghanon sa gasoline allocations para sa Dipolog PNP wala magdepende pila ang gidaghanon sa sakyanan nga gigamit sa kapolisan.

Giangkon ni SPO4 Bustaliño nga wala gimando sa balaod nga obligado ang usa ka local government units nga mohatag ug gasoline assistance sa iyang kuwerpo sa kapolisan kay igo lamang sila mohangyo sa mayor. Matud niya, kon ang mayor dili mosuporta sa mga kalihukan sa kapolisan wala gayud silay mahimo ug labaw sa tanan dili nila mapugos maoy hinungdan ang ilang gibuhat, mao nalang gayud ang pagpakilouy ngadto sa mayor nga sila ayudahan ug sportahan. “Kon wala silay support namo, we cannot pursue ang among mga police visibility.”

Aminado ang supply officer nga ang ilang gihatag nga gasoline allocations para sa Dipolog PNP dili gayud paigo sa ilang inadlaw nga operasyon gumikan kay ang Dipolog mo-konsumo kini ug mil kinientos litros matag bulan (1,500 liters/month) samtang ang ilang gihatag anaa lamang sa 120 ngadto sa 130 litros matag bulan nga kon sumadahon duha lamang ka adlaw mahurot na ug gamit ang gasolina.

Gani mismo sila sa Provincial Police Office matud ni Bustaliño dili gayud paigo ang supply sa gasolina nga gi-alokar ngadto kanila gikan sa PNP Regional Office hinungdan nga adto sila modangop ug mang-hangyo sa provincial government. “Sa amo sa PPO duna rami 300 liters every month nga sa kadaghan namo sak-yanan. Unya duna pa time nga moadto sa mga lung-sod…so nanginahanglan pod mig support sa province.” Sumala ni Bustaliño sa panahon nga duna silay mga conferences ila gayud ipadayag ang ‘Enhancement LGU Support’ kay kon wala ang mayor mag-suporta maapektahan ang ilang prog-rama ug operasyon maong duna gayoy coordinasyon tali sa kapolisan ug sa mayor. (The New Nandau, Vol. XVII No.22)

 

Jalosjos makagawas na sa dili pa ang pasko

Hayan makagawas na sa dili pa moabot ang adlaw sa pasko si kanhi Congressman Romeo “Nonong” Jalosjos. Sigun sa report sa pamantalaang Philippine Star si Nonong makagawas na karong Desyembre 16, 2007 gikan sa New Bilibid Prisons human gipamub-an ang iyang sentensiya ngadto na lamang sa 16 ka tuig. Kini ang gibutyag ni New Bilibid Prison Chaplain Father Roberto Olaguer sa usa ka news forum kagahapong adlawa.

Matud pa ni Father Olaguer ang orihinal nga silut ni Nonong mao ang double life imprisonment, apan si Presidente Arroyo pinasikad sa rekomendasyon sa Board of Pardons and Parole, gipamub-an niini ang silut ngadto na lamang sa 16 ka tuig sa sayung bahin ning tuiga. Si Father Olaguer midugang sa pagpahayag nga taposon ni Nonong ang iyang 16 ka tuig nga silut unya pa sa Nobyembre 2008, apan tungod sa gipakita niining maayong gawi mamahimo siyang makapauli ug sayu.

Gipatin-aw ni Olaguer nga pinasikad sa atong balaod nga ang silut nga gipahamtang mamahimong mapamub-an ug dugang kon ang konbiktado magpakita ug maayong gawi. Si Nonong nga bag-o rang nagselebrar sa iyang birthday, matud pa ni Olaguer nakapundo ug daku nga “good conduct time allowance” nga maoy basihan karon sa iyang mas sayu nga paggawas sa prisohan. Apan si Congresswoman Cely Jalosjos-Carreon sa dihang nahinabi kini sa Radyo Ronda-DXKD kini nagkanayon nga gitawagan usab siya kagahapon ni Nonong ug gipahibawo nga ang Desyembre 16 mao ang adlaw nga ipahibawo kanus-a gayud siya makagawas sa prisohan.

Samtang kini ang nahimong pahayag ni Congresswoman Carreon, namatikdan usab nga nalinga karon ang Dapitan sa pagpangandam alang na sa pag-abot ni Nonong nga sumala pa mahidangat pagka Desyembre 17. Samtang usa ka opisyal sa Malacanang ang mihimakak nga aduna nay release order si Jalosjos kay sa gihimong pagsubay sa Bureau of Corrections ug sa buhatan ni Executive Secretary Eduardo Ermita walay nakitang mga nakapundo nga papeles o dokumento alang na sa pagpagawas ni Nonong. Samtang wala itago sa kanhi chairman sa Kapisanan ng mga Brodkaster ng Pilipinas o KBP Zamboanga del Norte Chapter ang iyang kalipay nga makagawas na gikan sa bilangguan si kanhi Congressman Romeo “Nonong” Jalosjos nga nahimong kanhi national president sa KBP.

Giklaro ni Mr. Sally Elia o “Auntie Sally” mga ang iyang gipalanog karong kahinangop iyahang personal nga kapasidad ug walay labut ang KBP apan isip kanhi chairman gusto siyang mopalanog sa iyang kalipay human makabati sa balita nga si Nonong hayan makagawas na sa dili pa ang pasko. Matud pa ni Auntie Sally angayan lang nga sugaton sa tumang kalipay sa mga katawhan ang paghibalik ni Nonong dinhi sa atong lalawigan ilabi na sa dakbayan sa Dapitan tungod kay bisan atua siya sulod sa prisohan nagapadayon ang iyang pagtabang sa katawhan sa iyang distrito ug ubang bahin sa atong lalawigan.

Si Auntie Sally nagkanayon nga iyang gikalipay nga si Nonong makapadayon sa iyang pag-alagad sa atong mga katawhan. Sa sayu pa gipahibawo ni New Bilibid Prison Chaplain Father Roberto Olaguer nga gikatakda nang mogawas si Nonong karong Desyembre 16, 2007 human gipamub-an ang iyang silut ug nadugangan sa maayong gawi niini sulod sa prisohan. Hinoon si Congresswoman Cely Jalosjos-Carreon mipahayag nga ang Desyembre 16 maoy petsa nga gitakda para ipahibawo kanus-a makagawas si Nonong gikan sa New Bilibid Prison. (The New Nandau, Vol. XVII No.22)

 

Gov.Yebes mimando giyera batok illegal sugal

Gimando karon ni Gov. Lando yebes ning lalawigan sa Zamboanga del Norte ang pakig gira batok sa tanang matang sasugal dinhi sa lalawigan. Sa usa ka order ihikutibo nga gipagawas sa gobernador kini nag-awhag sa tanang mga hintungdang opisyal sa tibook probinsya alang na sa hingpit nga kampanya batok sa mga illegal nga sugal ilabina ang kuyanap na kaayong suertres.

Ang maong kamandu-an sa gobernadordirikta usab nga gipahidangat ngadto sa mga mayores sa 25 ka mga lungsod ug duha ka dakbayan ingon man sa buhatan sa kapulisan sa lalawigan pinaagi kang PNP Provincial Director Mario Biong Yanga alang na sa pagpadulot sa balaod nga maoy hingpit nga makapakgang sa mga ginadiling sugal sa Zanorte. Gipasabot sa maong kamandu-an nga ang sugal maoy nakapa-ot ug samot sa panginabuhi sa mga katawhan kay bisan mao-maong salapi ila pa kining itaya sa sugal.

Gumikan sa sugal modaghan usab ang krimen sa pagpangawat busa angayan lamang kining hatagan sa tukmang aksiyon pinaagi na sa pagsumpo niini ingon man pagsikop sa mga tawong nalambigit sa ginadiling sugal nga surtres ilabina ang mga bangkero niini. Kahinumduman nga dugay nang mikuyanap ang illegal nga sugal nga suertres dinhi sa lalawigan ug panahon na para magkahi-usa ang mga opisyal sa probinsiya ug mga sakop sa kapulisan aron hingpit kining batukan. Ang maong kamandu-an sa gobernador gipitsahan sa Disyembre 4, 2007 ug hingpit gilayon kining ipatuman sa tibook 25 ka mga lungsod ug duha ka dakbayan ning lalawigan. (The New Nandau, Vol. XVII No.22)

 

Sangguniang Panlalawigan nag-recis na
ABC President Joy Olvis wala manginit ang sampot paglingkod isip SP member

Si ABC Federation President Jose Joy Olvis sa lungsod sa Polanco ang gi-instalar niadtung lunes isip ex-officio member sa Sanguniang Panlalawigan sa Zamboanga del Norte atol sa ilang regular session sa dihang mikanaog na sa iyang puwesto si Arasam Ismael, Liga President nga anaa na sa iyang katapusang termino apan mao ra usab kadto ang iyang permero ug katapusan nga pagtambong sa session kay gideklarar nga magsugod na sila ug recis karong semanaha.

Si Joy Olvis nga ABC President sa lungsod sa Polanco maoy executive vice president sa Liga mipoli kang Arasam kay wala na kini milansar pagka Barangay Kapitan sa usa sa mga Barangay sa lungsod sa Sirawai.

Isip executive vice president sa Liga, si Olvis ang giinstalar isip Acting Provincial Liga President ug maoy mag-representar sa Association of Barangay Captain sa Sanguniang Panlalawigan kutob sa Desyembre 29, 2007 mintras tanto wala pay mapili nga bag-ong federation president sa ilang liga.

Si Olvis sa dihang gihata-gan ug higayon nga maka-estorya sa hawanan sa hunta probinsyal nagpasalamat ug dako sa opurtunidad nga gihatag ngadto kaniya isip membro sa Sangguniang Panlalawigan. Sa maong regular session gidasonan ang resolusyon nga mag-recis sila sugod karong semanaha. Si Olvis nga mao pay paglingkod niadtung lunes isip membro sa hunta provincial ang mipahayag nga bisan pa kon kas-a lang siya nakalingkod sa maong posisyon apan nalipay gihapon siya tungod kay tapik ug parte na siya nga nahimong membro sa Sanguniang Panlalawgan bisan usa lang ka higayon. “Mao ni giingon nga first and last sa akong pag-apil sa session,” kahimoot nga pamahayag ni Olvis.

Matud niya, ang eleksiyon sa mga opisyal sa liga federation sa ilang asosasyon pagahimon karong Disyem-bre 29, apan dili siya ang gituboy sa grupo nga molan-sar sa maong posisyon. Busa matud niya, ang iyang pagka board member kutob lamang karong Disyembre 29 niining tuiga o hangtud nga duna nay mohulip kaniya. Gipaklaro ni Olvis nga wala siyay laraw nga molansar sa pagka presidente sa liga sa barangay tungod kay nagtamod siya sa pagbuot sa ilang labaw’ng lider sa grupo. “Gusto unta ko molansar ug presidente apan kay gibalibaran man ko, dili nalang pod ko molansar.”

Hinoon matud niya, iya gihapon nga gikalipay ang maong opurtunidad ug pribilihiyo nga siya nahimong membro sa hunta provincial bisan sa kadyot nga panahon. Gikatahong ang gituboy ni kanhi Congressman Nonong Jalosjos nga molansar sa pagka ABC Provincial Federation President mao si Joy Candelaria, asawa ni kanhi Mayor Mariano Candelaria, Jr. sa lungsod sa Gutalac. (The New Nandau, Vol. XVII No.22)

 

Birthday Wish ni Vice Gov. Francis Olvis:
“Magapadayon ang pagserbisyo ug mawagtang ang kapobrehon sa Zanorte”

Gihandom ni Vice Governor Francis Olvis nga sa nahibiling gutlo sa iyang kinabuhi magapadayon siya sa pagserbisyo sa mga katawhan ug mapapas na ang talaan sa Zamboanga del Norte nga usa sa pinaka pobre nga probinsya sa tibook pilipinas.

Kini ang birthday wish sa bise gobernador kinsa nagsaulog sa iyang ika 57 adlaw’ng natawhan niadtung lunes. “I have many many more birthdays to come.” Sumala pa ni Vice Governor Olvis doblehon pa ang ilang mga paningkamot sa pagserbisyo sa mga katawhan gumikan kay namansahan ang pangalan sa Zamboanga del Norte nga natala sa survey sa NSCB nga pinaka pordoy nga probinsya sa tibook pilipinas.

Matud niya nakaserbisyo na siya sa unang termino isip ikaduhang amahan sa lalawigan ug iya pa kining dungagan ang mga paningkamot. “We will double our time because the name which tainted our province that we are the poorest province…we will erase that.” “We will make our province the progressive and developing province through out the country,” kanayon si Vice Gov. Olvis. (The New Nandau, Vol. XVII No.22)

 

City Hall Inspectorate Team: Moderno ang STP sa Zanorte Medical Center

Gidayeg sa mga membro sa Inspectorate Team sa siyudad sa Dipolog ang gihimo nga Sewerage Treatment Plant nga gi-pahimutang sa bag-ong gitukod nga Zanorte Medi-cal Center atol sa ilang akto nga pagsubay niadtung miaging lunes.

Pinangulohan mismo ni City Mayor Evelyn Uy, uban sa mga membro sa Pre-Occupancy Team ang misubay sa Sewerage Treatment Plant didto sa bag-ong hospital sa Sicayab. Kuyog sa maong pagsubay ang usa ka Sanitation Specialist gikan sa kaulohang Manila nga gituyo ug hire sa siyudad.

Aminado si Atty. Alanixon Selda, City Information Officer sa dakbayan nga moderno ang gipahimutang Sewerage Treatment Plant kon STP nga sa miaging semana nahimong kontrobersiya tapos napakyas ang kontraktor pag-submiter sa gikina-hanglang rekisitos nga gipangayo sa City Building Official para sa pag-relis sa Application for Occupancy Permit sa Metropolis Construction.

Matud ni Atty. Selda ang Metropolis Construction naghatag na ug mga papeles nga gipangayo sa siyudad ug misaad ang contractor nga ilang i-demons-trate unsa ang system works sa Sewerage Treatment Plant ayha ihatag sa siyu-dad ang Certifi-cation of Occu-pancy para sa Zamboanga del Norte Medical Center. (The New Nandau, Vol. XVII No.22)

 

Dr. Jose Rizal in Dapitan sa 2nd Handuraw

Andam na ang tanan alang sa Search for Best Performer sa Dr. Jose Rizal in Dapitan diin aduna nay onse ka mga partisipante gikan sa mga nagkadaiyang tlonghaang sekondarya siyudad ng gikalatid mahitabo karong petsa 28 sulod ning bulana sa may alas 9 ang takna sa buntag didto sa RMI Covered Court. Kini maoy usa sa mga kalihukan nga maghatag ug dugang bulok sa 2nd Handuraw.

Sa pakighinabi kang Dr. Lilia Bravo, Education Supervisor I membro sa steering committee sa maong programa nga ang mogawas nga mananaug basehan sa pinkamaayong moganap sa kinabuhi ni Dr. Jose Rizal sa upat ka tuig nga pagpuyo niini sa dakbayan. Ang nahisgutang indigay magpakita sa maayong pag-arte ug pag-istorya sa usa ka butang kalambigit sa nasudnong bayani sama sa love life niini kang Josephine Bracken, Rizal isip magtutudlo, Rizal isip trainer sa fencing, Rizal isip doktor nga nagtambal sa iyang inahan, Rizal isip mag-uuma ug giunsa niini pagpalambo ang Rizal Park, Rizal sa paghidangat ug pagapanaw niini sa Dapitan ug uban pa dii gitugutan sulod sa 5 minutos nga pagperform, adunay back-up characters nga dili molapas sa napulo ug mosubay sa tema nga “Relevance of Rizal’s life to the present generation”.

Dugang ni Dr.Bravo nga gipangandaman na ang tanan sa mga tulonghaang sekon-darya kinsa misalmot sa pag-ka-Dr. Jose Rizal nga mao ang Sulangon NHS ug RMI. Ang mga mananaug magpakadawat sa dagkong ganti ingon man tropeo samtang ang mga non-winners adunay tag-usa ka libo ka pesos. Gipaningkamutan kini sa administrasyong Jalosjos nga sa maka-usa pa masadyaon ug malampuson ang kasaulogan sa Handuraw sa Dapitan. (The New Nandau, Vol. XVII No.22)

 

Provincial Alliance Building Orientation Program gipahigayon!

Gipahigayon sa miaging semana ang Provincial Alliance Building Orientation Program didto sa Plenary Hall, ZN Convention Center nga gipasiugdahan sa buhatan sa Department of Interior and Local Govern-ment ning lalawigan sa Zamboanga del Norte sa pagpangulo ni Provincial Director Jaime Paler inabagan usab sa Provincial Planning and Development Office pinaagi ni Ms. Rosevic Lacaya-Ocampo.

Ang maong kalihokan ang gisalmutan kini sa mga mayor sa 25 ka mga lungsod ug 2 ka mga syudad ning lalawigan, regional directors ug mga representante sa mga National Line Agencies apil na niini ang mga local chief executives sa kapitolyo probinsyal. Si Vice-Governor Francis Olvis namahayag nga ang maong Alliance Building orientation program mao unya ang mamahimong tulay aron mapaabot sa mga LGU ang ilang mga pangina-hanglanon sa ilang lungsod ngadto sa mga regional directors ilabi na sa mga ayuda nga gikan sa national nga buhatan.

Sa kabahin usab ni Atty. Jes Gal Sarmiento Jr. nga maoy ni-presentar sa mga programa ni Governor Yebes, nga ang gobernador ang nagtutok kini sa iyang 8-point agenda nga nag-prioridad sa paghatag ug tabang sa mga pobre nga katawhan subay sa iyang sumbanan nga “Una sa Tanan ang Katawhan”. Kahibaloan nga kaniad-tong 2003, ang National Statistics Coordinating Board ang mipagawas sa resulta sa survey nga ang lalawigan sa Zamboanga del Norte maoy pina-pobre nga probinsya sa Pilipinas, ug tungod niini ang gobernador ang mipahiga-yong kini ug Poverty Map-ping Program aron maila ang mga kabus nga katawhan sa tibuok probinsya.

Atol sa maong programa ang DILG ning lalawigan ang mipagula sa over-all perfor-mance sa mga lungsod may kabahin na sa mga nahimo niining mga kalampusan ilabi na sa paghatod sa mga serbisyong sosyal lakip na niini ang environmental developments. Sa mga presentasyon sa mga resource speakers, nahimong nahan-ukan sa mga pangutana sa mga mayor ang repsentante sa National Nutrition Council- Region IX may kalabot na sa Malnutrition Program diin probinsya sa ZaNorte ang apil sa Priority One sa Presidente sa Pilipinas nga adunay pinakataas nga rating sa malnutrasyon diin ang lungsod sa Godod ang nag-una sa 21 ka mga lungsod nga adunay problema sa malnutrisyon.

Matud pa na NNC nga ang ilang buhatan karon mao ang nag-implementar sa Food-Poor School program nga naghatag ug libreng usa ka kilo nga bugas sa mga tulunghaan dinhi sa lalawigan apan mayoridad sa mga mayor ang wala kini kalibutan sa maong programa ka yang ilang mga eskwelahan ang wala pa usab makadawat sa maong libreng bugas gikan sa NFA. Si Mayor Norbie Edding sa Sibuco ang usa sa mga mayor ang mipaabot sa iyang klaripikasyon sa NNC mahitungod na sa maong programa, tungod kay walay taga NFA ang naghatod sa mga bugas sa iyang lungsod.

Hinuon, ang repre-sentante sa NNC ang mobisita kini karong adlawa sa Dep-Ed ug NFA aron sa pagsuta kung unsa ang mga kaku-langon sa pag-implementar sa maong programa. Nasayran, subay sa maong programa aduna nay 451 outlets sa Tindahan Natin ni PGMA diin ang mga katawhan ang pwedi nga makapalit sa baratong bugas, noodles ug ubang basic goods.

Sa pagtak-op sa maong programa, si Atty. Sarmiento ang mapasalamaton kini sa mga partisipante ug nag-awhag sa mga LGU nga maghiusa kini ug magtina-bangay sa pagyayong unya sa mga maayong programa sa tagsa-tagsa ka mga lungsod ug syudad alang na na sa katawhan ning lalawigan. (Sam Buddy, The New Nandau, Vol. XVII No.22)

 

Guba nga generator sa Dipolog Public Market wa pa aksiyoni sa siyudad

Nahimong mulo karon sa mga stall holders sa merkado publiko ning dakbayan sa Dipolog kung nganong hangtud karon wala pay aksiyon nga gihimo ang kagamhanang lokal sa Dipo-log mahitungod sa nagubang generator diin panahon sa brown-out o mawala ang kutay sa sugang dagitabnon ngi-ob kaayo ang pipila ka mga stall sa merkado. Gawas sa kangit-ngit ug kainit nga ilang masinati panahon nga walay kor-yente namiligro pa gayud ang ilang mga baligya batok sa posibling pagpahimulos sa mga kawatan tungod sa kangit-ngit niini.

Sa maong sitwasyon nanawagan ang pipila ka mga stall owners sa Dipolog Public Market ngadto sa liderato sa siyudad nga unta ayuhon na ang nagubang generator aron magamit panahon sa walay koryente. Gawas sa maong problema nga mitumaw karon diha sa merkado ning siyudad napunting usab sa pagsaway sa pipila ka mga mamalitay’ng publiko ang nagkadaghang makalilimos nga mihugpa karon sulod sa merkado nga halos dili gyud magpabalibad nga mangayo ngadto sa mga customer nga mamalit diha sa merkado publiko ning dakbayan.

Nanawagan usab sila ngadto sa local chief executive sa Dipolog nga pakgangon kining nagka-daghang makalilimos dili lamang sulod sa merkado lakip na usab kining mga naglibod-soroy sa mga kadalanan dinhi sa siyudad nga nagpakalimos. Sa naobserbahan dugay-dugay na nga panahon nga gihugpaan sa mga makali-limos ang dakbayan sa Dipolog ilabi na ang merkado publiko apan hangtud karon walay aksiyon nga gihimo ang lokal nga pangagam-hanan ning dakbayan sa Dipolog. (The New Nandau, Vol. XVII No.22)

 

Display center sa mga produkto sa kabarangayang makita sa Landing Site

Subsob ang pangandam s Handuraw Committee diha sa pahimutangan unya sa mga nagkadaiyang booths nga maoy magsilbing display center sa mga produkto nga makita sa matag-barangay sulod sa dakbayan. Kini maoy gibutyag ni Engr. Rodiolan Porlas, City Tourism Officer ug maoy chairman sa komitiba sa 2nd Handuraw nga ang duha ka lugar nga ipahimutang ang mga booths sa Ten Anchor Destinations ingon man ang produkto sa 40 ka mga barangay makita unya sa Landing Site Sta. Cruz.

Makita ug mapalit unya ang mga produkto gikan sa Ten Anchor Destinations sa dose ka mga barangay nag mao ang Bagting, Banonong, Cawa-cawa, Linabo, Dawo, Sta. Cruz, Talisay, Ilaya, Tamion ug duha ka mga isla sa Aliguay ug Selinog nga ilado na sa ilang mga de-klaseng bulad. Itanyag usab ang mga produkto sa ubang mga barangay nga wala mahis-guti sa unahan sa susamang dapit diin ipahimutang ra usab didtong lugara ang display center sa Sta. Cruz human sa mga kalihukan sa 2nd Handuraw nga maoy plano sa administrasyon ni Mayor

Dominador Jalosjos, Jr. sanglit kanunay mang dagsaan ang siyudad sa Dapitan sa mga bakas-yonistang langyaw ug lokal nga mga dumuduong. Masaksihan ang pagbu-kas sa mga booths sa unang adlaw sa kasulogan sa 2nd Handuraw karong petsa 27 sulod ning bulan Disyembre.(The New Nandau, Vol. XVII No.22)

 

 

 

NOTE: SEND US YOUR NEWS.  Tell us what's going on in your barangays, clubs, schools, businesses and non profit organization. You can also send notices and announcements.
          

 

    Email to webmaster@dipolognon.com

      
Google
WEB THE DAILY DIPOLOGNON