December 13,  2008

 

Suspetsado sa extortion / robbery group sikop sa Kalawit PNP, nabawian ug armas

Nag-atubang na sa kasong illegal possession of firearms ang usa ka 19 anyos nga lalaki human kini nasikop sa kapolisan nga naghupot ug high-powered nga armas de fuego ug membro sa extortion and robbery group sa lungsod sa Kalawit.

Ang elemento sa Kalawit PNP nga gipanguluhan sa ilang hepe nga si Police Inspector Chamer Lacay misikop  sa usa ka Michael Ambrona, ulitawo ug molopyo sa Barangay Fatima, sa maong lungsod, samtang mipahigayon sila ug pagpatrolya sa maong dapit uban sa barangay police nga gipanguluhan ni Barangay Captain Antonio Baliling.

Na-recover usab sa kapolisan mao ang  US carbine caliber 30 M2 nga armas de fuego.

Dugang pa ni Police Inspector Lacay nga ang maong suspetsado uban sa usa ka Alejandro Ambrona, J rang dugay nang nag-operate sa maong lungsod ug sa kasikbit nga dapit sa maong kalihukan.

Niini, ang kasong illegal possession of firearms ang gipasaka na kini sa korte samtang si Michael gitanggong na kini sa Liloy BJMP ug si Alejandro padayon pang gipangita sa otoridad.

Matud pa usab ni Police Inspector Lacay nga hingpit ang ilang operasyon karon batok sa nasigpatan nga grupo sa Moro Islamic Liberation Front kon MILF nga ilawum sa pagdumala nila ni Commander Bungol ug Commnader Saluddin Sangkalia ingon man ni Commander Baby  Aguila nga nagagikan sa lungsod sa Sirawai.(Sheng, Southpoint, Vol.1No.47)

 

1st ICT Provincial Summit ipahigayon 

Subay sa laraw ni Governor Rolando Yebes nga mahatagan ug katubagan ang luya nga proceso sa mga transakyong panggobyerno dinhi sa lalawigan mopahigayon sa pinaka-unang Information Communication Technology (ICT) Provincial Summit ang Kagamhanan karong umaabot Disyembre 10 niining tuiga.

Ang nasangpit nga Summit ang pagatambongan kini sa mga nagkadaiyang opisyales ug myembro sa tagsa-tagsa ka Local Finance Committee sa  27 ka mga LGU, Municipal ug City Assessors ug mga personahe nga maglangkub sa programa sa ICT sa matag lungsod.

Gipamahayag ni Information Technology Officer II Gereo Patrimonio sa buhatan sa Management Information Systems ning lalawigan kinsa maoy nangulo sa maong kalihukan nga ang paghimo sa maong Summit magsilbing eye-opener kini sa mga opisyales nga mohimo usab sa susamang programa.

Gidugang ni Patrimonio nga atol unya sa maong kalihukan mohatag sa ilang mahinungdanong mensahe sila si Honorable Ray Anthony Roxas Chua III, ang Secretary sa Commission on Information and Communications Technology  ug Commissioner Angelo Timoteo Diaz de Rivera sa National Computer Center.

Lakip usab sa mopaambit sa ilang kahibalo sa bag-ong teknolohiya sila si Director Ma. Teresa Camba, Consultant Grace Martha Amberong ug Land Bank Dipolog Branch Manager Vinicius Saguin Hamoy.

Gikatakdang mopabati usab si Mr. Querubin Momongan, ang IT Consultant sa Munisipyo sa Argao sa probinsya sa Sugbo sa nahimo niining kalampusan sa programa sa ICT nga gisunod sa nasangpit nga lungsod.

Kahibaloan nga sugod sa paglingkod ni Governor Yebes niadtong tuig 2004 buot na niining himoon ang computerization program sa lalawigan aron matan-aw niini ang dagan sa revenue generation sa probinsya.

Angayang masayran nga gumikan sa gihimong implementasyon sa kagamhanang probinsyal sa electronic governance nahimo kining resipiente isip model LGU kaniadtong bulan sa Pebrero niining tuiga nga gihatag sa National Computer Center didto sa dakbayan sa Sugbo. 

Ang maong pasidungog ang nagsilbi kining hagit ni Governor Yebes nga ipadayon ang pag-implementar sa programang computerization dinhi sa probinsya gumikan usa man kini ka dakong investment sa lalawigan. (Roldan, Southpoint, Vol.1No.47)

 

Mga opisyales sa Zamboanga Sibugay miduyog sa birthday celebration ni Cong. Jalosjos

Daw usa ka senaryo sa 2010 election ang pagsaulog sa adlaw nga natawhan ni Congressman Cesar Jalosjos kagahapong adlawa.

Gawas sa taga Zamboanga del Norte nga miduyog sa adlaw sa natawhan sa kongresista, miduyog usab ang taga Zamboanga Sibugay uban sa pagpakita sa ilang lig-ong suporta sa panaghiusa.

Sa pagpanguna ni Congresswoman Cabilao ug Vice Governor Olegario sa Zamboanga Sibugay ang 13 ka mga mayor sa maong probinsiya ang dungan nga mitimbaya sa pagsaulog sa adlaw nga natawhan ni Congressman Jalosjos.

Unang mideklarar si Congresswoman Cabilao nga ang pagpakita kanilang taga Zamboanga Sibugay sa birthday ni Jalosjos kini subay sa pagsanong sa hangyo sa mga katawhan sa ilang probinsiya nga dili mapasagdan sa panahon nga mobiya na siya sa iyang katungdanan.

Gihatagan ug gibugaton ni Cabilao nga sa iyang pag-retiro sa politika gusto niyang ibilin ang Zamboanga Sibugay sa mga maayong kamot. Iyang nakita nga sa mga Jalosjos adunay naghulat nga maayong kaugmaon sa Zamboanga Sibugay.

Sama sa kontrobersiyal nga prayer ni Sec. Dureza sa Malacańang, gi-ampo usab ni Cabilao subay sa pagsaulog sa adlaw nga natawhan ni  Congressman Jalosjos nga hatagan kini sa dugang kapiskay sa panglawas to go beyond 2010.

Samtang giklaro usab ni Vice Governor Oligario sa Zamboanga Sibugay nga dugay na nilang gipangandoy nga makabaton sila ug lederato nga maghatag ug dakong kauswagan sa ilang probinsiya. Ang ilang pangandoy ang hapit nang matuman tungod kay maka-uban na nila sa Zamboanga Sibugay ang mga Jalosjos. Sa 16 ka mga mayor 13 niini ang mipakita sa lig-on nga suporta.

Nakita ni Oligario nga dinhi sa Zamboanga del Norte nagkahiusa ang mga opisyal. Sama sa mga igsoon ang relasyon sa gobernador ug mga kongresista ug kini maoy wala nila sa Zamboanga Sibugay.

Susama usab ang gipadayag sa mayor sa lungsod sa Ipil nga maoy kasamtangan nga president sa mayors league nga duha ang ilang tumong sa ilang pagpakita kagahapon atol sa birthday ni Congressman Jalosjos, gawas sa pagtimbaya mao usab ang pagpakita sa ilang hugot nga suporta. Sila ang nangandoy uban sa paghangyo nga sa umaabot panahon ilang makauban sa Zamboanga Sibugay ang mga Jalosjos. (Southpoint, Vol.1No.47)

 

Pagbalik ni Maclang sa Dipolog, kontrobersiyal

NAHIMONG kontrobersiyal karon ang paglingkod ug balik ni Police Chief Inspector Reynaldo Maclang pagka-chief of police dinhi sa dakbayan sa Dipolog. Kini human nga gipahawa sa mga katawhan dinhi sa dakbayan dili pa lamang dugay hinungdan nga napunta kini sa dakbayan sa Zamboanga ug nahimong hepe sa dakbayan sa Pagadian.

Tak-om usab ang baba sa bag-ong Regional Director sa PNP nga si Gen. Sunglao sa pagbalik karon ni Maclang dinhi sa Dipolog.

Sa ambushed interview kagahapon didto sa lungsod sa Liloy atol sa adlaw nga natawhan ni Congressman Cesar Jalosjos, gipahayag ni Sunglao nga ang paglingkod ug balik ni Maclang pagka chief of police kini subay na sa kagustohan ni Mayor Evelyn Uy.

Angayang masayran nga sa pag-abot ni Maclang dinhi sa Dipolog kaniadto nakaani kini ug mga pagsaway gikan sa mga yanong katawhan tungod sa palisiya nga gisagop niini sa Dipolog PNP nga dili makitawhanon. Una kining mipatuman sa balaod sa trapiko apan pakyas kining nakasulbad sa sunod-sunod nga tulis dinhi sa Dipolog. Mihimo kini sa pag-upaw sa ilang mga dinakpan nga kasamtangan nga gibalhog sa selda sa Dipolog PNP station ug ang gihimong pagsikop sa usa ka Dipolognon nga gidudahan nga maoy mastermind sa mga kawat apan igo lamang nangayo ug pasaylo si Maclang sa dihang iyang nasayran nga nasipyat lamang siya sa pagdakop. Nahimong mas midako pa ang kaguliyang sa dihang gisumbag ni Maclang si kanhi konsehal Joseph Herera.

Nahimong kontrobersiyal usab panahon ni Maclang ang pagbuhi sa  duha ka mga tawo nga gisikop ug parehong nakuhaan ug armas ug Granada. Nahitabo ang pagkasikop sa duha ka mga tawo atol sa pagbisita ni Presidente Arroyo dinhi sa Dipolog.

Ubay-ubay nga mga kaso ang napasaka batok kang Maclang hinungdan nga napahawa kini dinhi sa dakbayan sa Dipolog. Apan kagahapon kini ang gi-instalar pagbalik dinhi sa dakbayan isip chief of police.

Alang kang Regional Director Gen. Sunglao nga mintras dili pa konbiktado ang usa ka tawo sa kaso nga iyang gi-tubang nagpabilin kining inusinti.

Wala nay lain pang gi-istorya si Sunglao kabahin sa pagbalik ni Maclang. Kini ang mihandos ngadto kang Provincial Director Police Senior Superintendent Cristito Gonzalodo nga maoy angayang mopasabot pag-ayo kung nganong nakabalik si Maclang dinhi sa Dipolog.

Angayang masayran nga sa gihimong courtesy call nila ni Gen. Sunglao ug Provincial Director Gonzalodo ngadto sa panimalay ni Mayor Uy karong bag-o usa sa  gihisgutan ang pagpabalik ni Maclang dinhi sa Dipolog. Daw sa nakombinser ang duruha ka mga opisyal sa PNP sa dihang nakatilaw kini matod pa sa manindot nga pagkaon nga gidalit ni Mayor Uy. (Southpoint, Vol.1No.47)

 

Mga Subanen gipailalom ug training sa CAFGU

MAGSILBING ehemplo sa mga katilingban ug katimbayayong sa gobyerno ang gipakitang kaisog sa mga subanen nga nagtinguha karon nga mahimong miyembro sa Civilian Active Auxillary kung giila nga CAFGU dinhi sa Zamboanga del Norte.

Kini maoy gilauman ni Governor Rolando Yebes uban sa pagdasig sa 120 ka mga nitibong subanen dinhi sa atong lalawigan nga mipailalom karon sa pagbansay-bansay sulod sa 45 ka adlaw. Ang training sa usa ka kompanya sa CAFGU ilalom sa class 37-08 ang pormal nga gibuksan kagahapong adlawa sulod sa Camp Karbala sa lungsod sa Siayan.

Dako kaayo ang pagpasalamat ni Governor Yebes kang Chief of Staff Gen. Alexander Yano sa pagsanong sa iyang hangyo nga mahatagan sa kahigayunan ang atong mga kaigsoonang subanen nga mamahimong usa ka miyembro sa CAFGU.

Atol sa pagbukas sa training pagka CAFGU para sa mga lumad dinhi sa Zanorte

Gihatagan ug gibug-aton sa gobernador nga sagad ma-recruit sa MILF, MNLF ug NPA diha sa mga kabukiran mao ang atong mga kaigsoonang subanen. Tungod sa kawad-on kini ang mo-uban usab sa grupo.

Human sa training gusto ni Governor Yebes nga ang usa ka kompanya sa CAFGU nga mga subanen magsilbing kining ehemplo sa katilingban ug maoy manguna sa pagsabwag ug impormasyon sa kaayohan nga gihatag sa gobyerno ug sa militar. Iyang gipanghinaot nga sulod sa 45 ka adlaw nga pagbansay-bansay walay mo-atras sa 120 ka mga subanen tungod kay walay subanen usab nga talawan ug mo-atras sa tahas nga gisangon kaniya.

Gipahayag ni Governor Yebes nga andam siyang mo-agak sa mga subanen tungod kay gusto usab niyang ipakita nga ang mga subanen ang andam nga moserbisyo sa gobyerno sa Pilipinas.

Tinguha usab sa gobernador nga iyang ipaabot ngadto sa Department of Education pinaagi ni Division Superintendent Dr. Habib ADzhar Sarahadil nga hatagan ug special class sa ilang pagtuon aron ma-qualify nga mamahimong regular member sa Philippine Army .

Samtang gipahayag usab ni Col.Roland Amarille, commanding officer sa 101st Brigade, Philippine Army nga gikinahanglan ang determinasyon aron makahuman sa training ang 120 ka mga subanen.

Gipanghinaot usab ni Mayor Wilfredo Siasico sa Siayan nga kung panahon nga pweding nang makahupot ug armas kinahanglan dili usab kini mag-abuso. Ipabilin ang maayong gawi aron magpabalin usab ang pag-respito niini sa mga katawhan. Mapasalamaton usab ug dako si Mayor Tablezo sa Leon Postigo sa paghatag ug kahigayunan sa mga subanen gikan sa iyang lungsod tungod kay makatabang kini ug dako sa pagpatunhay sa kalinaw sa ilang lungsod.

Ang class 37-08 maoy unang grupo sa mga subanen dinhi sa Zamboanga del Norte nga gipailalom na karon sa training pagka-CAFGU sulod sa 45 ka adlaw. Kini ang nagagikan sa mga lungsod sa Leon Postigo, Manukan, Sindangan, Siayan ug Jose Dalman. (Southpoint, Vol.1No.47)

 

P2M para tribal house gipagawas

Gipahibawo sa opisina ni Senador Manuel Villar nga gipagawas na sa Department of Budget and Management ang P2 milyones ka pesos nga pundo nga gipangayo ni Governor Rolando Yebes para sa pagkonstrak ug tribal house sa ZaNorte Medical Center.

Ilawom sa Special Allotment Release Order No. ROCS-08-09049 mokabat sa P5.1 milyones ka pesos ang gipagawas gikan sa Priority Development Assistance Fund ni Senador Villar ang gipagawas diin ang P2 milyones niini para sa lalawigan sa ZaNorte.

Sa sayu pa gipahibawo daan ni Governor Yebes nga ang nasangpit nga pundo maoy gamiton niya sa pagpatindog sa usa ka tribal house sa likud nga bahin sa ZaNorte Medical Center aron maoy kapuy-an sa mga ZaNortehanon gikan sa mga kalungsuran ug lagyong kabarangayan nga adunay gibantayan nga pasiente.

Gipahayag ni Governor Yebes nga nahimong batasan natong mga Pilipino nga maghugop gayud ang halos tibook pamilya nga mag-ampong kon adunay sakup nga magdaut ug maadmit sa hospital.

Aron kalikayan ang pagdasok sa tawo sulod sa bag-ong hospital ug paghatag ug gibug-aton sa gipatigbabaw karong patakaran nga duha ra ka bantay ang gitugot kada pasiente ang ubang meyembro sa pamilya ilabi na sa mga sakup sa tribung Subanen mamahimong makapuyo sa kasamtangan sa ipatindog nga tribal house nga adunay higda-anan, kusina ug kaliguanan nga libre sa ilang paggamit. (Press Freedom, Vol. XXI No.5)

 

Mindanao Railway System gitun-an

Bag-ong feasibility study ang gipahigayon karon sa mga consultants para sa Mindanao Railway System Project sigun na sa gihangyo ni Governor Rolando Yebes nga kon mahimo kini nga proyekto magsugod dinhi sa atong lalawigan sa ZaNorte ilabi na sa dakbayan sa Dipolog.

Matud pa ni Miss Rosevic Lacaya-Ocampo, Provincial Planning and Coordinator Officer sa ZaNorte kini maoy gipahibawo ngadto kaniya ni NEDA Regional Director Arturo Valero sa ilang panagtagbo karong bag-o sa dihang gihisgutan ang pag-umol sa bag-ong Mindanao Development Plan.

Sumala pa maoy gimandu karon ni Presidente Gloria Macapagal-Arroyo ang pagbuhat ug pagtuon sa hangyo ni Governor Yebes ang posibilidad sa pagsugod sa Mindanao Railway System Project gikan sa Dipolog paingon sa Iligan nga maoy first phase sa proyekto.

Kahinumduman sa miaging semana si Governor Yebes sa dihang mibisita si Presidente Arroyo sa lung-sod sa Baliangao, Misamis Occidental mipadangat sa maong hangyo.

Sa iyang gitunol nga suwat ngadto kang Presi-dente Arroyo sa Baliangao, gihisgutan ni Governor Yebes nga sulod na sa taas nga panahon nga gipaabot sa Mindanao nga makabatun sa iyang kaugalingong railway system.

Matud pa ni Governor Yebes karong bag-o sa gipahigayong tigum sa Mindanao Economic Development Council didto sa Tandag City, Surigao del Sur diin siya ra ang bugtong gobernador nga nakatambong higpit niyang gipadas-og nga malakip ang Zamboanga Peninsula Region sa maong proyekto ilabi na gayud sa Zamboanga del Norte diin maoy iyang gipangayo nga kon mahimo sa Dipolog o kaha sa Dapitan manukad ang maong proyekto.

Gihisgutan sa gobernador nga ilawom sa phase 1 sa maong proyekto maoy gitun-an karon nga ang proyekto mosugod sa Davao paingon na sa Iligan City.

Giklaro ni Governor Yebes sa iyang suwat ngadto kang Presidente Arroyo nga ang katawhan sa ZaNorte nagahangyo nga kon mahimo ang railway system magsugod gayud gikan sa Dipolog paingon sa Iligan.

Ilawom sa kasamtangang plano karon ang pagkutay sa railway system sa Mindanao ang ZaNorte nabutang sa katapusang hugna sa proyekto.

Matud pa ni Governor Yebes nga kon kini maoy mahitabo sigurado nga ang ZaNorte mabiyaan sama sa ubang mga kalambuan nga nadawat karon sa ubang probinsiya sa Mindanao.

Gitataw sa gobernador nga mas angayang nga sa ZaNorte magsugod ang Mindanao Railway System sa rason nga makatabang kini sa pagpasutoy ug dugang sa Strong Republic Nautical Highway nga maoy nagdugtong karon sa Mindanao paingon sa mga dag-kung merkado sa Visayas ug Luzon agi sa Pulauan Port sa dakbayan sa Dapitan.

Si Gov. Yebes nagkana-yon nga kon dasonan ang iyang hangyo aduna kiniy dakung ikatabang sa pag-haw-as sa katawhan sa ZaNorte gikan sa pinaka pobre nga probinsiya sa tuig 2003 diin mitala ug 64.6 porciento ang poverty incidence.

Sa pagkakaron tungod sa mga paningkamut nga gibuhat sa kagamhanang probinsiyal, matud pa ni Governor Yebes ang poverty incidence sa ZaNorte sigun sa pinaka ulahing report sa National Statistical Coordination Board anaa na lamang sa 55.9 porciento ang poverty incidence sa lalawigan.

Sa nasayran sa pagdawat ni Presidente Arroyosa suwat hangyo ni Governor Yebes gimanduan gilayon niini ang kalihim sa Department of Transportation and Communications sa pagbuhat ug pagtuon nga ang Mindanao Railway System magsugod sa Dipolog o kaha Dapitan paingon sa Iligan, Cagayan de Oro ug Davao. (Press Freedom, Vol. XXI No.5)

 

Siocon Municipal Hospital imposible mahitabo –Dr. Icao

Gihulagway sa provincial health officer sa ZaNorte nga usa ka “Dream in the wilderness” ang gitinguha ni Vice Mayor Cesar Soriano nga Siocon Municipal Hospital.

Kini ang gipalanog nga reaksiyon ni Dra. Carmen-cita Icao may kalabutan na sa tinguha karon ni Soriano nga ang Siocon magtukod sa iyang kaugalingong hospital.

Sa sayu pa gipahayag ni Vice Mayor Soriano nga ang hospital nga ilang gitinguha nga ipatindog sa Siocon mokostar ug P40 milyones ka pesos diin kabahin sa maong pundo magagikan sa pork barrel ni Congressman Cesar Jalosjos, sa kagam-hanang probinsiyal sa ZaNorte, Department of Health ug ang pagpangutang sa lungsod  .

Si Dr. Vidal Micobo, ang hepe sa Siocon District Hospital sa dihang gipangutana ni Board Member Cedric Adriatico sa iyang opinion kabahin sa proyekto ni Soriano sa pagtukod ug municipal hospital kini nagkanayon nga ang maong tambalanan nga giplanohan sa ilang lungsod para sa mga sapian nga pasiente.

Gihulagway ni Dr. Micobo nga ang mga sapian ra gayud ang maka afford sa pagpa-tambal sa maong hospital sigun sa plano ni Soriano.

Para niya mas maayo pa nga maoy tabangan ni Soriano ang Siocon District Hospital kay kini maoy nag-alagad sa mga kabus nga katawhan sa ilang lungsod ug sikbit nga mga munisipyo.

Sumala pa ni Dr. Micobo dili gayud maghimpos ang giplano nga hospital ni Soriano kay kon aduna may lungsuranon sa Siocon nga sapian ug magkadaut mode-retsoo ra kini ug patambal sa Zamboanga City kay duol ra.

Para kaniya ang pagtukod ug usa ka specialized hospital sa Siocon dili gayud advisable o tukma.

Matud pa ni Dr. Micobo kon ugaling adunay may angayang palamboon nga health facility sa Siocon angayan nga ang district hospital maoy hatagan ug pagtagad kay kini karon ang dangpanan sa mga kabus nga katawhan nga nangita ug pag-atiman sa doctor kay sa plano ni Mayor Soriano.

Sa samang bahin ang chairman sa committee on health sa Sangguniang Panlalawigan nga si Board Member Cedric Adriatico, mibutyag nga mismo si Regional Director Aristides Tan dili uyon sa plano ni Soriano nga magtukod kini ug kaugalingong hospital ang ilang lungsod.

Ang provincial health officer sa ZaNorte nagkana-yon nga ang giplano ni Mayor Soriano nga hospital sa Siocon daghang kuwang para mahimo kining secondary o tertiary hospital.

Gihulagway ni Dra. Icao, nga alang sa usa ka hospital nga magbatun ug secondary o tertiary level license para maka perform ug surgery bisan pa ug anaa kay doctor nga surgeon ug anesthesiologist gikinahanglan nga magbatun kini ug hustong laboratory, blood bank ug uban pang pasilidad nga wala sa Siocon.

Nakita usab sa provincial health officer nga dili gayud makaya sa lungsod sa Siocon ang pagpadagan sa ilang kaugalingong hospital kay karon pa lang nagsalig ra kanunay sa tabang gikan sa probinsiya.

Sa pagkakaron, matud pa ni Dra, Icao ang nasangpit nga plano ni Soriano dili pa gayud feasible karong mga panahuna.

Sa samang bahin gipahibawo ni Dra. Icao nga ang Siocon District Hospital gikonsiderar na nga sa European Commission ilawom sa ilang programa nga GIDA o Geographicaly Isolated and Depressed Area. (Press Freedom, Vol. XXI No.5)

 

Pagkaun sa Provincial Jail umentuhan

Pipila ka meyembro sa Sangguniang Panlalawigan sa ZaNorte ang nag-awhag sa provincial warden sa pagpadas-og ug lakang nga maumentuhan ang gipahat nga budget para tsibug sa mga detention prisoners sa ZaNorte Correctional and Rehabilitation Center sa Sipulan, Manukan.

Kini ang gipadayag sa mga meyembro sa Sanggunian sa probinsiya sa dihang gihisgutan ang budget para sa provincial jail sa sunod tuig.

Sa kasamtangan matud pa ni Provincial Warden Fortunato Reganon, anaa lamang sa P30.00 ang budget sa kaun sa kada detention prisoner sa provincial jail sa usa ka adlaw.

Para niya pasigo na ang maong kantidad nga gipahat para tsibug kada detention prisoner kay kon itandi kini sa kahimtang sa bukid, sumala pa niya adunay mga pamilya nga maglisud sa pag-abot ug gastu sa P30.00 para pagkaun kada adlaw.

Nahisgutan usab ni Board Member Fernando Cabigon, Jr. ang kabahin na sa mga nagpanghitabong pagpuga sa maong prisohan kon kini dili ba tungod sa pagkaun busa molayas na lang ang piniriso.

Sa kabahin ni Board Member Joseph Brendo Ajero, kini mipadas-og nga angayan mga maumentuhan ang budget sa tsibug sa mga priso para makabatun usab sila ug tukmang pagkaun nga makatabang sa ilang rehabilitasyon.

Matud pa ni Reganon lakip na sa sud-an sa mga priso ang preskong isda ug adunay panalagsang karning baboy.

Gibutyag usab sa provincial warden nga nalakip na sa ilang rehabilitation program ang paghatag kanila ug livelihood project sama sa pagbuhat ug hollow blocks ug gardening diin ang mamahimong kita o halin bahinon sa mga priso nga nalambigit sa pagtrabaho. (Press Freedom, Vol. XXI No.5)

 

LGU’s mag-atubang ug disallowances sa COA

Gipahayag sa provincial auditor sa ZaNorte nga ubay-ubay na nga mga kagamhanang local sa probinsiya nga napahamtangan sa Commission on Audit ug disallowances diha sa paghatag ug dugang benepisyo sa ilang mga kawani tungod sa paglapas sa Personal Services budget limitation sa ilang annual budget.

Kini ang gipahayag ni Mrs. Myrna Lubaton, Provincial Auditor sa ZaNorte agig tubag sa pangutana ni Board Member Anecito Darunday kon unsay aksiyon nga gibuhat sa COA sa mga kagamhanang local kansang budget para sa Personal Services milapas na sa gitakdang limitasyon diha sa balaod.

Gibutyag ni Darunday nga sa gihimong pagreview sa Sangguniang Panlalawigan sa budget sa nagkadaiyang kagamhanang local sa ZaNorte gikan sa duha ka siyudad ug 25 ka munisipyo maoy ilang nakita nga tanan pulos na milapas sa gitugot nga budget para sa Personal Services gawas lamang sa kagamhanang probinsiyal.

Ang provincial auditor sa ZaNorte mipahayag nga sila sa COA sa ilang pagpahigayon ug pag-audit kon molutaw nga milapas na ang budget para Personal Services sa usa ka kagamhanang local ang una nilang gibuhat mao ang pag-isyu ug audit observation memorandum aron mahatagan ang kagamhanang local sa pagkoriher sa ilang sayup pinaagi sa pagpakupos sa gidaghanon sa ilang mga kawani.

Apan kasagaran sa mga kagamhanang local, matud pa ni Lubaton mohatag ug justification ngano nga mitudlo pa sila ug dugang mga kawani nga maoy hinungdan sa paglapas sa limit sa budget.

Matud pa ni Lubaton sila sa COA morekomendar gayud ngadto sa mga hingtungdang kagamhanang local nga pakupsan ang gidaghanon sa ilang mga kawani nga gibatunan apan ang mga hingtungdan moinsistir gayud nga ipabilin ang gidaghanon sa ilang mga kawani sa rason nga gikinahanglan ang ilang mga sirbisyo ug lisud nga nga taktakon sa trabaho.

Gipahayag sa provincial auditor sa ZaNorte nga kon ang justification nga gihatag sa kagamhanang local dili gayud nila mahatagan ug gibug-aton mopakanaug gayud sila sa COA ug notice of disallowance sa pagpagawas sa pundo.

Apan kon ang kagamhanang local padayon gayud nga moinsistir sa pagpangayo ug rekonsiderasyon kini ilaha nang iduso ngadto sa ilang labaw aron mao nay mopakanaug sa disisyon.

Gipahibawo usab ni Lubaton nga daghan nang mga disallowances nga gipahamtang sa COA batok sa mga kagamhanang local tungod sa paglapas sa ilang budget para Personal Services ilabi na diha sa paghatag ug dugang mga benepisyo sa ilang mga empleyado.

Sumala pa sa provincial auditor kini maoy usa sa mga requirements nga giimposar karon sa Department of Budget and Management nga kinahanglang dili gayud molapas ang usa ka kagamhanang local sa limit sa budget para sa Personal Services aron makahatag kini ug dugang benepisyo ngadto sa iyang mga empleyado.

Gipasabot ni Darunday nga usa sa mga rason nga ang usa ka kagamhanang local milapas sa ilang budget para Personal Services tungod kay nanobra ang gidaghanon sa mga empleyado niini.

Ang ubang mga lungsod milapas sa ilang PS limitation tungod kay giimplementar nila ang kinatas-ang ang-ang sa salary standardization aron makadawat sa mas taas nga taripa sa suweldo ang ilang mga kawani. (Press Freedom, Vol. XXI No.5)

 

Prerogative sa mayor magpili  ug kaugalingong police chief

Iya nga prerogative sa hepe ehikutibo ang pagpili ug iyang kaugalingong police chief alang sa pagmintinar sa kahusay ug kalinaw. Mao kini ang gipasabot sa bag-ong PNP Provincial Director  sa Zamboanga del Norte nga si P/SSupt.  Cristeto Rey Gonzalodo samtang iyang gipapanumpa sa pagbalik sa iyang katungdanan isip OIC Police Chief dinhi sa dakbayan sa Dipolog ni Police Chief Inspector Reynaldo Mendieta-Maclang.

Gawas niini gipahayag usab ni Gonzalodo nga giaprobahan sa ilang kaulohang buhatan sa kampo crame ang pag re-assigned ni Maclang dinhi sa dakbayan sa Dipolog gikan sa iyang katungdanan didto sa dakbayan sa Pagadian isip hulip kang OIC Police Chief P/Supt. Gervacio Balmaceda.

“Wala tayong magawa diyan kasi inaprubahan na sa aming PNP Chief ang assigment ni Maclang dito sa Dipolog.”

Gipasabot ni Gonzalodo nga dapat dunay ‘harmony” ang liderato sa PNP ug local government unit kay nagkinahanglan kini ug suporta sa mayor. Kon walay suporta ang mayor kay dili siya ganahan sa polis nga gibutang sa iyang lungsod hayan dili masulbad ang krimen.

Busa alang kaniya, kinahanglan dunay pagsinabtanay tali sa mayor ug kapolisan arun mahatagan ug igong suporta sa unsa man ang gikinahanglan niini.

Atubangan sa kaso administratbo nga giatubang ni P/CI Maclang nga gipasaka ni Mr. Joseph Herrera, si P/SSupt. Gonzalodo nagkanayon nga wala siyay kalibutan niini. Apan iyang gipahayag nga bisan pa kon dunay kaso giatubang ang usa ka opisyal sa police dili kini babag nga mabutang siya sa usa ka lugar ug maoy gusto sa mayor kay wala kini gidili sa balaod.

Angay hibaloan nga niadtung Dominggo sa gabii (Nobembre 23, 2008) si PCI Reynaldo Maclang ang gi-instalar ni P/SSupt. Gonzalodo isip OIC-Chief of Police sa Dipolog Police Station. (Mar Uy, The New Nandau, Vol. XVIII No.18)

 

Rep. Jalosjos: Walay kalainan kaniadto impeachment complaint batok PGMA

Walay kalainan kaniadto ug karon sa bag-ong giduso nga impeachment complaint ni Joey De Venecia batok kang Presidente Gloria Macapagal-Arroyo. Kini nakahatag lamang sa pagbahinbahin sa mga katawhan ug nakalangan sa mas daghan pang importanting gimbuhaton sama sa pagpalagsik sa atong ekonomiya ug pagpalambo sa nasud.

Kini ang reaksiyon ni 3rd District Congressman Cesar Jalosjos atubangan sa gidebatihan nga impeachment complaint nga gipasaka ni Joey De Venecia ug gisuportahan sa iyang amahan, kanhi House Speaker Jose De Venecia uban sa pro-impeachment representative sa ubos balay balaoranan.

Para ni Congressman Jalosjos, ang bag-ong impeachment complaint nga gi-reffer sa House Committee on Justice usa ka ‘re-hash’ o sama da sa gipresentar kaniadto nga walay kalainan.

Alang kaniya, hapit na mahuman ang termino ni Presidente Gloria Arroyo karong dos mil dyes ato na lang kini hatagan ug higayon nga makatiwas samtang nagkadool na ang eleksiyon aron magpili na usab ug bag-ong presidente sa nasud. (The New Nandau, Vol. XVIII No.18)

 

PNP Chief Verzosa mahidangat
sa Dapitan alang sa tree planting

Mahidangat dinhi sa Zamboanga del Norte si PNP Chief P/Director General Jesus Verzosa ug uban pang mga henerals arun paglusad ug tree planting acivity partikular sa pagpa-nanum ug bakhaw sa kada-gatan sa mga coastal bara-ngays dakbayan sa Dapitan.

Kini ang gibutyag ni Police Provincial Director P/SSupt. Crestito Rey Gonza-lodo nga karong sunod semana, Desyembre 4 ug 5, duha ka adlaw ang pagahi-moong kalihukan sa kapoli-san pinangulohan sa PNP Chief.

Unang adlaw sa pagahi-moong kalihukan karong Desyembgre 4 mao ang tree planting sa Taguilon ug pagka Disyembre 5 ang mangrove planting sa Tag-ulo. Uban na sa duha ka adlaw nga kalihukan ang coastal cleaning ug scubasurero.

Ang maong kalihukan pagasalmotan sa mga opis-yal sa probinsya sa Zambo-anga del Norte nga pangu-lohan ni Governor Lando Yebes, Dapitan City nga pangulohan ni Mayor Domi-nador Jalosjos, studyante sa nagkadaiyang tunghaan, NGO’s, Diocese of Dipolog ug militar.

Ang pagpananum ug bakhaw adto pagahimoon sa Tag-ulo sa dakbayan sa Dapitan diin human sa kali-hukan himoon ang ‘bodol fight’. “Bodol fight, magka-mayan lang kami sa lahat nang pagkain.”

Matud ni PD Gonzalodo nga kini maoy proyekto sa Philipine National Police ubos sa liderato ni P/Director General Verzosa pina-subay sa conservation of marine resources and natural resources to ensure ecology balance arun maproteksiyon ang kalipokan.

Sumala pa ni Gonzalodo nga kini maoy pinaka-una nga proyekto sa PNP dinhi sa mindanao. Kini maoy ika 100 days sukad sa paglingkod ni PNP Chief Verzosa nga mohimo ug tree planting acitivity dinhi sa Zamboanga del Norte. “Dito niya kompletohin ang 100 days niya didto sa mindanao especialy in Dapitan City.”

Sumala pa nga nakahimo na si Verzosa sa susamang kalihukan didto sa Luzon ug Visayas ug dinhi niya kom-pletohon sa mindanao parti-kular sa Dapitan. “Mapalad tayo na didto maglagay nang scubasurero, tree planting and coastal cleaning si PNP Chief.”

Human sa maong kalihu-kan, buhian sa dagat nila ni PNP Chief Verzosa ang duha ka sea turtle o pawikan isip pagpamatuod nga limpyo na ang kadagatan. (The New Nandau, Vol. XVIII No.18)

 

DTI nanghunaw sa responsibilidad sa pagbadlong sa mga gasoline station nga wala mipa-us-us sa presyo sa gasolina

Dili iya ang responsi-bilidad sa Department of Trade and Industry ang pagbadlong sa mga gasoline stations nga wala mituman sa roll-back o pag-us-us sa presyo sa gasolina kay ang adunay kaakohan niini mao ang konsumedor mismo nga magpili ug asa sila magpa-tubil sa ilang sakyanan.

Kini ang nahimong tubag ni DTI Provincial Director Noel Bazan kabahin sa reklamo sa mga katawhan nga may pipila ka mga gasoline station dinhi sa Dipolog maayo lang mopasaka sa presyo sa gasolina apan kon dunay roll back sa presyo, hinay pa sa ulod ang pagpa-ubos niini.

Gipaklaro ni Engr. Bazan nga ang kaakohan sa pag-monitor sa presyo sa mga petroleum products ug LPG wala nahasulod sa iyang hurisdiksyon sa DTI, pina-subay na sa Republic Act 7581 nga mao ang Price Act. Hinoon giawhag sa provincial director ang mga konsumedor nga magbantay sa presyo nga gi-charge sa gasoline stations ug dealer, ilabe na sa sa panahon sa price roll back. Kini maoy obligasyon sa mga konsu-mante nga makamaong mopili asa nga gasoline stations sila magpatubil.

Matud ni Bazan, tungod kay kita anaa sa free market economy, ang local gasoline dealers lakip na ang LPG dealers ang kanunay mosu-nod sa tukmang presyo nga gimandar sa market forces.

Sa gihimong survey sa mga personahe sa DTI dinhi sa Dipolog, bisan tuod kon dili kini mandatory function sa iyang buhatan, ilang nasubay nga walay gasoline stations nga illegal nagma-nipular sa pagpataas sa presyo sa gasolina.

Matud ni Bazan, kon ang mga konsumante makahi-nagbo niining maong prob-lema, iyang giawhagan sa pagduso ug pormal nga sumbong arun kahatagan kini ug hinanaling aksiyon sa local price coordinating council. (The New Nandau, Vol. XVIII No.18)

 

 

 

NOTE: SEND US YOUR NEWS.  Tell us what's going on in your barangays, clubs, schools, businesses and non profit organization. You can also send notices and announcements.
          

 

    Email to webmaster@dipolognon.com

      
Google
WEB THE DAILY DIPOLOGNON
 

THE DAILY DIPOLOGNON
DIPOLOG CITY, PROVINCE OF ZAMBOANGA DEL NORTE PHILIPPINES
www.dipolognon.com www.dipolognon.net  www.dipolognon.org  Keyword: dipolognon
www.dipologcity.com  www.dipologcity.net  www.dipologcity.org  www.dipolognon.com  www.dipolognon.net  www.dipolognon.org    www.dipolog.org  www.dapitan.com   www.eartajo.com  www.cagayandeoro.us 
www.artajo.us www.artajo.info www.eddie.artajo.name www.zamboangadelnorte.com  www.zambonorth.com  www.pagsalabuk.com  www.dipolog.biz www.artajo.biz  www.plasticextrusion.us www.cebu.org
www.davao.us  www.tagum.com  www.giscard.us  www.pagadiancity.com www.malaybalay.net  www.ozamis.com  www.tangub.com  www.oroquieta.net
 www.nabunturan.com www.znuc.org www.znch.ph
www.gingoog.com  www.ozamiz.us www.general-santos.com  www.surigao.net  www.kidapawan.com  www.iligan.us www.raelene.us  www.cagayan-de-oro.com   www.mutyasadipolog.com   www.twinzel.com
 
www.zamboanga.net   www.palmbeachgardens.us   www.islandgarden.net  www.cotabato.net  www.tacurong.com  www.butuan.us  www.pagadian.com  www.dipolog.us
www.zamnai.com
www.dipologhotels.com
   www.dipologpress.com  www.dipologsardines.com   www.extrusion.us www.ozamizcity.com  www.marawi.net www.dipologchamber.com   www.twinzeldipolog.com

Copyright©2008 by The Daily Dipolognon All Rights Reserved  PRIVACY POLICY & DISCLAIMER
Email : webmaster@dipolognon.com  Since October 18, 2000