2

December 7,  2007

 

ZaNorte gipasidunggan sa COA isip Most Updated Financial Statements

Human sa sunod-sunod nga pasidungog nga naangkon sa Zanorte, lain na usab ang pasidungog nga nadawat sa lalawigan sa natad sa financial statements. Ang Zamboanga del Norte gipasidunggan sa Commission on Audit isip Local Government Unit with the Most Updated Financial Statements gumikan sa pagpatuman sa electronic New Government Accounting System (e-NGAS).

Sa pagpakighinabi ni Provincial Accountant Marivic Carpitanos ang maong pasidungog gidawat kini sa personahe sa accounting ug budget office niadtong Nobyembre 22 niining tuiga didto sa Sulo Hotel, Diliman, Quezon City, gikan ni Chairman Guillermo Carague sa COA. Dugang pa ni Carpitanos nga ang Zanorte lamang maoy nakaduso sa pinaka-ulahing report pinaagi sa e-NGAS ngadto sa COA nga ikumparar sa ubang local government units dinhi sa nasud diin maoy usa sa gibasehan sa maong pasidungog.

Nasayran nga gisugdan ang pagpatuman sa e-NGAS niadtong Nobyembre 28 sa miaging tuig ug karon diretso na masulod sa system ang tanang transakyon sa maong buhatan, ug dali na sa pagpadagan niini. Niini, hingpit nga gipasalamatan ni Carpitanos si Governor Rolando Yebes gumikan sa hugtanong suporta sa computerization program sa kagamhanang probinsyal, ni Vice Governor Francis Olvis ug sa mga bokal, e-NGAS Administrator Atty. Rafael Cabanlit ilabi na sa personahe sa accounting office sa ilang kaalam mahitungod sa maong programa. (Mindanao Star, Vol.III No.44)

 

MindanaoStarEditorialCartoon120707

 

Sa Siayan
100 sakong bugas gipanghatag ngadto sa Moyo

 Mokabat sa 100 ka mga sakong bugas ang gihatag sa kagamhanang probinsyal ubos sa pamunoan ni Gov. Rolando E. Yebes didto na sa Muyo, lungsod sa Siayan ning lalawigan. Sa gipahigayong ambush interview ni Dra. Carmencita P. Icao, Provincial Health Officer sa Integrated Provincial Hospital kini nagkanayon nga magdali sila og adto sa Barangay Muyo, Siayan aron pag-apod-apod sa 100 ka mga sakong bugas sa mga lumulupyo nga kinsa biktima sa sakit nga capilliaria.

Si Dra. Icao namahayag nga hatagan sa kagamhanang probinsyal og bugas, mga pagkaon ang mga katawhan sa maong dapit tungod kay mosamot ang sakit sa tiyan niini tungod sa walay kan-on apan nagsige og inom ug tambal. Suma pa nga unsaon man ang tambal kon way sulod ang tiyan sa pagkaon maoy hinungdan nga gihimoan gilayon ni Gov. Yebes og aksyon ang maong hitabo.

Suma pa ni Dra. Icao nga sa 221 ka mga pasyente nga gi-eksamin ang  hugaw kon “etarts” 30 niini ang positibo sa capilliaria, 11 ang heterosids ug daghanang may bulate sa ilang hugaw diin, kaniadtong Dominggo,Nobyembre 25 adunay 13 ka mga pasyente nga gidala sa Sindangan District Hospital nga positibo usab sa sakit nga capilliaria.  Dugang pa ni Dra. Icao nga himoan gilayon nila’g makuting aksyon ang maong kaso aron maluwas ug maayo ang mga biktima niini. Sa katapusan, si Dra. Icao mipasalamat ug midayeg ngadto kang Gov. Yebes tungod sa pagtabang niini sa maong hitabo sa Muyo, Siayan ning lalawigan. (Mindanao Star, Vol.III No.44)

 

50 migradwar sa peanut processing seminar

Mokabat sa 50 ka mga kababayen-an ang migradwar human gipahigayon ang duha ka adlaw nga TECHNO & LIVELIHOOD TRAINING COURSE ON PEANUT PROCESSING didto sa Fatima, Liloy ning lalawigan kaniadtong Nobyembre 22-23 ning tuiga.

Ang maong pagbansay-bansay ang gi-abagahan kini sa AGRI AGUA DEVELOPMENT COALITION kon AADC dinhi sa Mindanaoug pinaagi sa kagamhanang probinsyal kansang misuporta ang buhatan sa TECHNOLOGY and LIVELIHOOD DEVELOPMENT CENTER sa pagpangulo ni Mr. James Montejar ang TLDC Manager kinsa ang mibuhat ug tukmang pagtuki may kalabot sa pamaagi as Business Counselling, Marketing Tips, Product Development, Labelling ug ang packaging sa maong produkto.

Si Mrs. Salud B. Cruz ang Coalition Builder ang namahayag nga gipasalig sa maong ginang ang mahitabong pagbansay-bansay dili lamang sa usa ka higayon ang ilang makat-onan ug mahibaw-an kon dili magpadayon ug mamahimong dugang panginabuhian alang sa ilang pamilya ug lakip sa ilang panag-abin. Gidayeg ni james B. Montejar ang TLDC Manager ang mga kababayen-an sa AADC sa ilang kaasgot nga matuman ang pagproseso sa produkto sa mani ilabina nga ang lungsod sa Liloy maoy adunay dagkong produkto sa mani ug dako usab ang pagtuo ni Montejar nga mapalamboNG ILng grupo tungod ka yang mga kababayen-an magkahiusa alang sa paglantaw nga mapalambo ang ilang lungsod.

Diin adunay 7 ka mga produkto gikan sa mani nga nabuhat sa 50 ka mga kababayen-an nga migradwar susama sa nabuhat niini nga Peanut Brittle, Peanut Kisses, Peanut Butter, Peanut Sauce ug ang Garlic Coated Peanuts. Subay sa maong kalihukan mitabang si Maybel Cruz Bustaliño ang Supervising Agriculture sa provincial Agriculture Office ug matud pa nga iyang gihagit ang mga kababayen-an sa maong grupo nga ilang maugmad ang pagbuhat sa igong produkto aron masuhid ang ubang mga kababayen-an dili lamang ang lungsod sa Liloy lakip na ang tibook sa Zanorte sa pagbuhat ug mga livelihood nga proyekto tungod ka yang gobernor ang misuporta ug pinaagi sa iyang programa mamahimong modugang ug igong pundo ang kagamhanang probinsiyal alang sa maong livelihood nga programa.

Dugang pa ni Bustaliño nga ang kagamhanang probinsiya ang mogahin ug igong pundo nga mokabat sa 22 milyones ka pesos alang sa livelihood project dinhi sa Zanorte ug adunay pay laing misuporta ug mi-ayuda ang mga inilang mga nasud ug mohatag ug dugang pundo lakip na ang Department of agriculture sa dakbayan sa Zamboanga City. Mitambopng sa maong kalihukan si Hon. Pepito BracamonteIII ang Brgy. Captain sa Fatima Liloy, sila si Elma Balana, Jeofrey A. Gomisong ang AADC Coalition Builder, u gang mga meyembro sa Agri- Agua Development Coalition. (Mindanao Star, Vol.III No.44)

 

Magtutudlo namuno ug basurahan sa iyang tinun-an, pasakaan ug kaso sa ginikanan

Hayan mag-atubang sa kasong administratibo ang usa ka magtutudlo sa Dipolog Pilot Demonstration School human kini nanglabay ug trash basket ngadto sa iyang tinun-an niadtong Nobyembre 23, niining tuiga. Si Fhreanch Jashmin Sevilla Siao, usa ka grade III pupil ni Mrs. Theresa Mabilog sa maong tulunghaan ang nakaangkon ug samad sa ilong ug maayo pagkahubag human kini gilabay ug basurahan sa iyang maestra. Asoy pa sa maong bata ning mantalaan nga niadtong higayona, nag-record si Mrs. Mabilog sa ilang grado sa Filipino.

Si Jashmin, nangutana sa iyang classmate sa likod kon pila ang iyang score sa Filipino, ug sa dihang nakit-an siya ni Mabilog, gibuno gilayon kini sa basurahan ug una naigo ang usa ka classmate niini. Dugang pa sa maong bata nga una siyang gilabtikan ug panyo sa maong magtutudlo. Sa pagpakighinabi usab sa inahan sa bata nga si Jennifer Sevilla Siao, siya nagkanayon nga nag-iyak na ang iyang anak nga miadto kaniya sa canteen ug misumbong sa nahitabo. Niini, gipangutana sa inahan si Mrs Mabilog kon unsa ka tiunod ang gisumbong sa iyang anak.

Giangkon kini sa maong maestra ug misaysay nga nag-alingasa sa iyang klase. Dugang pangutana sa inahan nga ang pagsaba-saba sa iyang anak, naka-disturbo ba kini sa iyang klase, ug igo lamang siyang gitubag sa maestra nga galain iyang ginhawa ug dili siya ganahan nga naay magsaba-saba sa iyang klase. Si Mrs. Siao ang nagkanayon nga sa unang higayon nga gibuno usab niya ug bag, gilabtikan ug panyo wala niya kini panumbalinga, apan karong higayona dili na niya tugutan nga pasagdahan lamang nila ang gibuhat sa maong maestra sa iyang anak.

Hinoon, si Mrs Mabilog nangayo lamang ug pasaylo sa iyang gihimo sa maong bata, apan matud pa ni Mrs. Siao bisan pa man nangayo ug dispensa ang maong magtutudlo, dili gihapon nila kini madawat gumikan kay nasakitan na ang ilang anak. Gilaraw karon sa amahan sa bata nga si Ferdinand nga ipabalhin nila ug laing section si Jashmin ug pasakaan nila ug tukmang kaso ang maong magtutudlo. (Mindanao Star, Vol.III No.44)

 

City Hall mihimakak giputol gasoline allowance sa Dipolog Police Station
PSI Maclang wala nay purohan makabalik sa Dipolog

Kusganong gipanghi-makak sa kagamhanang lokal sa dakbayan sa Dipolog nga ila nang giputol ang gasoline allowance para gamiton sa nagkadaiyang operasyon sa kapolisan. Kini ang gipamahayag ni Atty. Alanixon Selda, City Information Officer sa kagamhanang lokal atuba-ngan sa reklamo nga gipa-bate sa pipila ka membro sa Dipolog Police Station nga wala na sila makadawat ug gasoline assistance niining semanaha human masuta nga nagkahanap ang pag-reinstate ni PCI Reynaldo Maclang isip hepe sa kapolisan sa Dipolog.

Gibutyag sa tinubdan nga atol sa usa ka programa nga gipahigayon sa Camp Abendan, Mercedes Zamboanga City nga gitambongan ni PNP Director General Avelino Razon, miadto si Mayor Evelyn Uy aron hangyuon ang labaw’ng opisyal sa PNP nga ibalik sa Dipolog si PCI Maclang, apan matud pa, direkta kining gibalibaran. Gumikan niining maong kalamboan, gipatangtang ang dakong tarpolin nga dunay hulagway nila ni Mayor Uy ug Maclang gibitay atuba-ngan sa Dipolog Police Sta-tion gumikan kay wala nay porohan pa nga makabalik sa iyang puwesto ang kanhi hepe sa Dipolog PNP.

Sukad niadto matud pa sa pipila ka membro sa Dipolog PNP, giputol na ang suporta sa kagamhanang lokal sa Dipolog ngadto sa kapolisan pinaagi sa paghatag niini ug gasolina hinungdan nga karong panahona, adto na sila magyangongo ug pangayo ug gasolina sa Kampo Hamac, Sicayab. Sa interview ni Atty. Selda, kini kusganon niyang gihimakak gumikan kay dili mahimo sa siyudad nga putlon ang gasline allowance para sa Dipolog PNP tungod kay mao man kini gamiton para pagsanta sa nagkadaiyang kriminalidad. Matud ni Atty. Selda nagkita sila ni Mayor Uy ug OIC-Chief of Police Isidro Sasuman sa miaging adlaw apan wala man kini mipaabot sa iyang reklamo kabahin sa problema sa gasolina. (The New Nandau, Vol. XVII No.21)

 

Apan ubos sa kondisyon “i-comply tanang requirements”
Capitol ug City Hall nagkasinabot na pagkuha sa balas, graba sa Lawayan

Gikasabutan karon sa kagamhanang lokal sa Dipolog ug kagamhanang probinsyal nga kinahanglan makumpleto ang area clearance ug Environmental Compliance Certificate kon ECC sa aplikasyon sa NIA alang na sa pag-angkon sa gratuitous permit gikan sa kagamhanang probinsyal aron makuha sa kagamha-nang lokal sa Dipolog ang balas ug graba  nga nakabara sa duha ka water dams sa Layawan River.

Mao kini ang nakab-ot nga desisyon sa duha ka local government units atul sa panagtigum ning semanaha nga gipahigayon sa buhatan sa National Irrigation Administration kon NIA uban ni NIA OIC-Provincial Irrigation Officer Engr. Bonifacio Judilla, Provincial Irrigation Officer Engr. Fabius Ramayrat, Irrigators Association President Martin Pulmaran, ug Mr. Ildefonso Jimenez, presi-dente sa Dipolog Polanco Irrigators Association, Inc Ang kagahamhanag probinsyal nga gi-repre-sentahan ni Provincial Attorney Jes Gal Sarmiento Jr., ug Mr. Remelo Damuag sa Provincial Environment and Development Office kon PEDO ang nagkanayon nga ipakumpleto ang maong mga rekisitos sa dili pa nila makuha ang maong permit.

Samtang ang dakbayan sa Dipolog gi-representahan kini ni Vice Mayor Senen Angeles, City Legal Officer Cyril Ruiz ug City Engineer Nedilla Magdayao ang misanong sa gimando sa probinsya ug mipasalig nga ilang kumpletohon ang maong mga rekisitos nga kinahanglan. Kahibaloan nga niadtong Setyembre 11, niining tuiga, ang LASILELA Irrigators Association Inc., ang miduso ug resolusyon nga nag-awhag sa kagahamhanang lokal sa Dipolog pinaagi ni Mayor Evelyn Uy sa pagkuha sa balas ug graba nga nakabara sa maong water dams nga anaa nahimutang sa Dapdap, lungsod sa Polanco diin maoy hinungdan sa paghinay sa supply sa tubig alang na sa mga basakan sa lungsod sa Polanco.

Sanglit walay igong pundo ang NIA alang niini, si Engr. Judilla ang mihangyo kini sa probinsya sa pagtugot sa Dipolog sa pagkuha sa maong mga balas ug graba diin ilang magamit usab kini alang sa mga proyekto nga ilang ipatuman. Gituhuan ni Provincial Atty. Jes Gal Sarmiento Jr., nga dili na interesado ang dakbayan sa Dipolog sa pagkuha sa balas ug graba sa duha ka water dams sa lungsod sa Polanco tungod kay wala kini miduso sa kinahanglan nga mga rekisitos alang niini human nila giduso ang government gratuitous permit application sa NIA aron sa pagkuha sa 45,000 cubic meters sa balas ug graba.

Si Vice Mayor Senen Angeles ang mipasabot nga interesado gihapon sila sa maong lakang apan ila usab gihuna-huna nga ikumpleto una ang maong mga rekisitos tungod kay gawas nga makadaginot sila, dekalidad usab ang matang sa maong mga balas ug graba. Niini mitumaw na dayon ang isyu sa Occupancy Permit nga gi-aplayan sa probinsya para sa Zanorte Medical Center nga hangtud karon wala pa gihatag sa dakbayan sa Dipolog nga unta dili angayan iapil ug hisgot ni Vice Mayor Angeles tungod kay lahi ang gihisgutan sa maong meeting, nagkanayon si Sarmiento.

Matud ni Atty. Sarmiento dili malikayan ang sentimento sa kapitolyo nga gi-ipit ug maayo sa city hall mahitungod sa occupancy permit sa Zanorte Medical Center tungod kay bisan pa man gituman na sa Metropolis Construction Inc. ang mga rekisitos nga ilang gipangayo, gilisud-lisud gihapon sila. (Mishel Bala)

Lungsod sa Roxas gibaligya na

Ang lungsod sa Roxas gibaligya na ni Mayor Carlito Feras. Kini ang gipahayag ni Vice Mayor Cyrus “Boy” Agatep sa dihang karong bag-o, si Mayor Feras nangayo na usab ug authority sa Sanguniang Bayan nga mo-loan sa bangko aron pagtiwas sa pantalan, pagpalit ug barko ug paghimog municipyo. Ang proposed loan ni Feras mokabat ug P58 milyones ka pesos.

Matud ni Agatep sa miaging tuig ang lungsod naka-loan na ug P30 milyones ka pesos para sa pagtiwas sa Feeder Port sa Nabilid. Matud niya, nagsingkiig na kaayo ang panudlanan sa lungsod gumikan kay nabangkarota na kini kay siging ka-overdrop sa matag tuig, dungagan pa sa dakong interes sa loan nga P30 milyones ka pesos ug karon, sa laraw niining mangutang na usab ug dugang P58 milyones ka pesos, “samot na nga moyabo ang lungsod.”

Para sa bise mayor, gibaligya na gyud sa mayor ang lungsod sa Roxas alang sa iyang personal interes. Sa maong poposed loan nga P58 milyones ka pesos matud ni Agatep, si Feras nangayog authority nga mokuha ug consultant nga pagabayran ug tres milyones ka pesos nga maoy nakapasamot sa ilang pagduda nga gipangwarta na gayud sa mayor ang nahibilin niyang mga adlaw sa pagdumala sa lungsod. Gibutyag usab sa bise mayor nga ang nasunog nga municipyo gibalbag kay kuno magtukod ug bag-ong municipyo. Sa pagbalbag lang, ang lungsod migasto ug dos milyones ka pesos sumala sa dokumento nga gipasa niini ngadto sa Sanguniang Bayan.

Nasayran nga ang dos milyones ka pesos gikan nga ayuda sa PAGCOR para tabang sa pagpabarug sa bag-ong municipyo. Apan katingalahan kay wala gani nakapatindog bisan usa ka poste, migasto na ang lungsod ug dos milyones ka pesos. Matud pa ni Agatep, ang lungsod sa Roxas utangan karon sa mga kaswal nga mokabat ug tres milyones ka pesos inig tapos niining tuiga. Sumala pa niya, unsaon man pagbayad sa lungsod sa Roxas isip suweldo sa mga kaswal nga “arang kadaghan” nga wala naman kini igong pundo gumikan kay kini bangkarota man.

Sumala pa niya, karon nga sila na ang majority ug ang oposition block maoy maghupot sa mga dagkong komitiba sa Sanguniang Bayan, ila gayud bokikion ang kuwarta sa lungsod kon giunsa pagasto ni Mayor Feras.  Matud sa bise mayor, makalolooy lang ang mga kaswal nga karon nagyampongad sa lungsod nga walay trabaho nga naghandom nga makadawat ug suweldo kay dili gayud kini nila mahatag tungod sa kaapiki sa panudlanan. (The New Nandau, Vol. XVII No.21)

 

Sementeryo tukoron sa Zanorte

Gilaraw karon sa kagamhanang probinsyal ang pagtukod og usa ka lubnganan o sementeryo aron mahatagan og pormal ug walay kalangan sa paglubong ang atong mga ka-igsuonan nga mutaliwan na sa laing kalibutan ilabina ang mga sakop sa programang Lando Bibo sa Zanorte. Kini nga laraw natawo human ang pangagamhanang lokal sa Dipolog ang nagdumili sa pagpalubong sa mga sam-ang dinhi sa dakbayan sa mga minatay nga meyimbro sa Lando Bibo.

Kahinunduman nga daghanan na sa mga namatay nga sakop sa lando bibo sa Dipolog ang wala gayud malubong sa mga sam-ang ning dakbayan ug kini biktima gihapon sa pamolitika sa liderato sa siyudad sa Dipolog. Gawas sa pag dili sa pagpalubong sa mga mamatay nga sakop sa lando bibo gihikawan usab kini sa maayong serbisyo sa lokal nga pangagamhanan sa Dipolog sama sa serbisyo sa ,maayong panglawas, panginabuhi-an ug uban pang serbisyo sa gobyerno sa Dipolog nga itanyag niini.

Gumikan sa daghanang panghitabo nga dili malubong ning dakbayan ang mga sakop sa Lando bibo nakahukom si Gov. Lando E. Yebes nga mohimo na lang ang probinsiya ug kaugalingong sementeryo. Sa pagkakaron nagpadayon na ang proseso alang sa pagpalit sa probinsiya sa usa ka luna sa yuta didto sa Brgy. Basagan sakop sa lungsod sa Katipunan ning lalawigan aron sa dili madugay masugdan na ang pagtukod sa maong lubnganan. (The New Nandau, Vol. XVII No.21)

 

 

 

NOTE: SEND US YOUR NEWS.  Tell us what's going on in your barangays, clubs, schools, businesses and non profit organization. You can also send notices and announcements.
          

 

    Email to webmaster@dipolognon.com

      
Google
WEB THE DAILY DIPOLOGNON