November 29,  2008

 

IFund Auditan

Ang tanang government expenditures ang ipailawom sa pag-audit sa COA lakip na sa intelligence funds sa mga kagamhanang local.

Mao kini ang pagklaro ni Mrs. Myrna Lubaton, Provincial Auditor sa ZaNorte may kalabutan na sa intelligence fund nga gibatunan sa nagkadaiyang mga kagamhanang local.

Sa sayu pa gusto ipaklaro ni Board Member Anecito Darunday kon ang intelligence fund dili ba moagi sa pag-audit sa COA kay maoy gipagawas karon nga inpormasyon sa mga kritiko ni Governor Rolando Yebes.

Matud pa ni Provincial Auditor Lubaton ang adunay gahum sa pag-audit giunsa sa paggastu sa mga kagamha-nang local ang intelligence fund mao ra ang chairman sa Commission on Audit ug dili moagi sa ilang ang-ang.

Sumala pa sa provincial auditor ang pag-audit sa intelligence fund dili na gani moagi pa sa ilang opisina ug dili usab sila makalantaw bisan na lang ug lili sa maong dokumento kay selyado kini nga report nga derecho nga isumitir ngadto sa ilang chairman sa commission.

Matud pa ni Darunday gusto gayud niya nga makla-ro kini nga ang inpormasyon magagikan gayud sa baba sa provincial auditor sa ZaNorte aron mahibawo sa husto ang mga katawhan ug dili motuo sa mga bakak nga gisabwag karon sa mga kritiko sa administrasyon. (Press Freedom, Vol. XXI No.4)

 

KATAKUS gi-organizar

Jose Dalman- Zamboanga del Norte- Nanumpa atubangan ni Gobernador Lando Yebes ang hiniusang pundok nga gitawag ug KATAKUS, kon KAUBAN alang sa TAWHANONG KAUSBAWAN sa lungsod sa Jose Dalman ning lalawigan niadtong nakalabay nga Nobyembre 16, 2008 adlaw nga Dominggo didto sa Tabon, Mini Gym.

Mao kini ang nahibaw-an gikan ni Mr. Rony Pacilan, pangulo sa CDAU ug Provincial Information Officer sa Zamboanga del Norte. Si Pacilan mao ang convenor sa maong kapunungan, ubos sa kamandoan sa gobernador sa tinguha nga adunay empowerment and capacity development ang mga sakup sa maong kapunungan nga gilangkoban sa mga barangay Capitan, mga barangay Kagawad ug Lando-BIBO presidents sa 18 ka mga barangay sa maong lungsod, pundok nga gimugna sa provincial nga pamunoan aron nga maoy motindog diha sa mga proyekto ug serbisyo gikan sa liderato sa gobernador.

Ang gobernador mao mismo ang nagpapanumpa sa maong mga lideres nga gilangkoban sa 120 ka mga barangay kagawad, 7 ka mga kapitan ug 18 ka mga LANDO-BIBO Presidents.

Ang mga pangulo nga naumpa gilangkoban nila ni Nonoy Felecia, numero unang konsehal sa barangay Poblacion isip pangulo sa mga barangay Kagawad uban sa ilang adviser nga si SB Member Melchor Grate, Boy Recososa isip federation president sa Lando BIBO ug pito ka mga kapitanes sa pagpangulo ni SB member Joseph Quinit.

Sa iyang mensahe ngadto na sa mga meimbro sa maong pundok, si Governor Yebes midasig nga maghiusa alang ug tungod sa kalamboan sa lungsod sa Jose Dalman, diin giilang usa sa mga pobre nga lungsod sa lalawigan sa Zamboanga del Norte.

Matod pa sa gobernador nga iyang gikalipay nga naghiusa ang maong pundok sa mga barangay officials ug mga pangulo sa LANDO-BIBO timaan nga gisuportahan sa mga lideres sa maong lungsod ang programa ug mga inisyatiba sa kagamhananng provincial, ilabi na sa mga proyekto niini. Gipasalig usab sa gobernador ang kanunay niyang pagpaluyo sa mga kalihokan sa maong pundok ilabi na ang pagpalambo sa ilang mga barangay pinaagi sa mga proyekto ug programa sa lalawigan. (RP, Press Freedom, Vol. XXI No.4)

 

Lambigit concert ipahigayon sa Estaka Blues

Usa ka concert para tabang sa Barangay Pange ang ilusad sa ZaNorte Estaka Blues, Incorporated sa hinapos nga bahin karong buwana.

Kini ang gipahibawo ni Engr. Senador Jalandoni, ang presidente Estaka Blues, Inc. sa programang Kapihan sa Hotel Camila 2.

Gipatin-aw nila ni Engr. Jalandoni ug Mr. Edgar Uycoco nga ang nasangpit nga concert giuluhan nila ug LAMBIGIT kay maoy tuyo nila nga ang ubang mga katawhan sa atong lalawigan sa ZaNorte magpakabana ug maglabotlabut diha na sa pagtabang sa atong mga kabus nga kaigsoonan sa Barangay Pange.

Ang Barangay Pange sa lungsod sa Siayan maoy napili nila nga hatagan sa ilang suporta sa mamahimong kita sa ipahigayon nilang concert kay kini ang nadeklarar sa gipahigayong survey sa National Statistics Office ug National Statistical Coordination Board nga maoy pinaka pobre nga barangay sa tibook nasud sa tuig 2003.

Maoy tinguha nila nga makatabang sila sa pagpa-lambo sa panginabuhi ug pagpuyo sa mga katawhan sa nasangpit nga barangay.

Giklaro ni Engr. Jalandoni nga ang ilang grupo dili gayud mosuhid sa ubang mga NGO nga giilang “No Good Organization” kay dili sila gustong magpakauwaw.

Gitataw usab niya nga wala gayuy nagpahiping vested interest sa ilang pagahimoong pagtabang sa katawhan sa Pange.

Ang ilang concert gikatakdang ipahigayon karong Nobyembre 29, 2008 sa alas 7:00 ang takna sa gabii sulod sa ZaNorte Teachers Gym.

Gitataw usab nila ni Engr. Jalandoni ug Uycoco nga ang ilang gitinguhang pagtabang sa Brgy Pange dili lamang kutob sa usa ka lakdop pagka human biyaan kon dili himoon nila kining commitment sa ilang grupo sa mosunod nga lima ka tuig para magbonga gayud ug manalingsing ang ilang itisok nga tabang sa katawhan sa maong barangay.

Sa iyang kabahin si Governor Rolando Yebes nakadayeg sa ZaNorte Estaka Blues kay kini maoy unang grupo sa pribadong sector nga nakita niya nga nagpakabana kabahin sa pagtabang sa kahimtang sa katawhan sa Barangay Pange.

Kahinumduman sa tuig 2007 sa Barangay Pange nagpahigayon si Governor Yebes sa pagsaulog sa iyang adlaw’ng natawhan sa tuyo nga mahatagan ug tukmang pagtagad.

Gipahibawo sa goberna-dor nga sa kasamtangan mokabat sa P2 milyones ka pesos ang gipahat sa probin-siya para sa pagkomponi sa dalan sa Pange pinaagi na sa kagamhanang local sa Siayan ug laing P3 milyones ka pesos nga pundo gikan sa Department of Agriculture ang gipahat para sa samang katuyuan.

Gipanghinaut ni Governor Yebes nga unta ang ZaNorte Estaka Blues, Inc. dili mahisama sa ubang mga NGO nga ang ilang kaugalingong vested interest maoy motigbabaw.

Gisaysay sa gobernador nga adunay pipila ka mga NGO karon nga gihimong taming ug pasumangil ang pagtabang sa mga katawhan sa barangay apan ang bugtong tuyo niini nga ang mga kadagkuan sa nasangpit nga grupo mamalit diay ug yuta para sa ilang kaugalingong kabulahanan. (Press Freedom, Vol. XXI No.4)

 

Nakalapas sa Ordinance 123 walay mga disiplena

Kakulang sa disiplina sa kaugalingon maoy nag-unang hinungdan ngano nga daghan pa gihapon ang makalapas sa Ordinance 123 dinhi sa dakbayan sa Dipolog.

Mao kini ang gibutyag sa buhatan sa maayong panglawas samtang daghan pa gihapon karon ang napahamtangan ug multa gumikan kay nasakpan nga naghugawhugaw dinhi sa palibot sa poblasyon.

“Disiplina ra gayud sa kaugalingon nga dili maghugawhugaw maoy angay buhaton sa mga katawhan aron dili sila mapahamtangan ug multa.”

Subli na usab karong nagapahinumdom ang lokal nga buhatan sa Panglawas dinhi sa dakbayan ngadto sa tanang mga dumuduong ug katawhang Dipolognon alang sa padayong pagsanong ngadto sa nagapadayong kampanya dinha na sa pagpreserbar sa kalimpyo dinhi sa dakbayan.

Kini maoy subling pagpahinumdom aron sa pag agni kanila sa paghatag ug todong suporta ngadto ning naasoy’ng kampanya diin gilusad sa kagamhanang lokal ning dakbayan aron magpabiling limpyo kining atong siyudad.

Ang mga kalapasan nga nahimo mao’y yano lamang sama sa: urinating o pagpangihi sa bisan asang pangpublikong dapit; littering o pagsinagbot sa bisan asang dapit, sama sa paglabay ug mga putos sa kendi, mani ug ubang susama niini, lakip na ang mga upos sa sigarilyo, ug uban pang mga kalapasan nga nahalagda sulod sa Ordinansa No. 107 o nailang “The Garbage Collection and Environmental health Protection and Saniatation Code of 1998.”

Nakita karon sa nagpatuman ning nasangpit nga balaodnon nga ang bugtong hinungdan sa padayong paghimo sa mga kalapasan sa nasangpit nga ordinansa dili ang katapol sa pagbuhat niini, kon dili gumikan sa kakulangon sa personal nga disiplina sa atong pipila ka mga kaigsoonan. Busa kusganon karong gisugyot sa nagpatuman nga ang bugtong lamang nga pagabatunan sa atong mga katawhan mao ang tukmang disiplina sa ilang mga kaugalingon aron sila maanad ngadto ning maong matang sa buhaton, sanglit nag dili man kini bug-at nga pagabuhaton.

Ang pagbaton ug didsiplina ngadto sa atong kaugalingon maoy makatabang ug dako dinha na sa pagpalambo sa atong kinatibuk-ang personalidad, diin makatabang usab sa paglambo sa atong katilingban sa kinatibuk-an. (CIO)

 

P80 Mil X-Mas bunos sa mga kawani tun-an pa sa Sangguniang Panlalawigan

Kon dunay legal nga basehanan ang paghatag ug dakong kantidad para bunos sa mga kawani sa gobiyerno hayan magmaya ang ilang pagsaulog sa pasko karong tuiga kay kini ihatag ngadto kanila.

Si Board Member Anecito Darunday, Chairman sa Committee on Appropriation and Finance sa hunta probinsyal mipahayag nga ilang tun-an sa Sanguniang Panlalawigan sa Zamboanga del Norte unsang balaod ang gibasihan sa probinsya sa Bukidnon nga nakahatag man kini ug christmas bunos nga 80 mil ka pesos sa mga opisyal ug regular employees ug 40 mil pesos sa kaswal nga kawani.

Atol sa Mindanao Island Conference sa Provincial Board Members League of the Philipines nahibaw-an ang probinsya sa Bukidnon nanghatag sa maong kantidad nga pahalipay isip pinaskohan sa ilang mga empleyado nga maoy gikagubtan sa ubang probinsya nga gusto usab nga mosuhid.

“Didto sa Bukidnon, ang christmas bunos sa mga regular nga empleyado otsenta mil ka pesos cash ug sa mga JO kurenta mil. Ambot ug giunsa na ni Governor Zuberi nga nakahatag man siya ana.”

Dinhi sa Zamboanga del Norte, gipahayag ni Darunday nga nagdepende na kini ni Governor Lando Yebes ug mohatag ba siya sa susamang kantidad ngadto sa iyang mga empleyado ilabi na kon dunay igo-igong pundo. “Ngano man pod ug dili ihatag nga puwerti mang lipaya sa atong mga katawhan ana.”

Para ni Darunday, kinahanglan hatagan ug daghang kuwarta ang mga katawhan ilabi na karon nga mitiorok ang atong ekonomiya.

Naglaraw karon si Darunday nga mobalik sa Bukidnon arun iyang subayon kon giunsa sa maong probinsya ang paghatag sa maong dakong kantidad para bunos sa mga empleyado ug dis-a pod gikan ang pundo nga gigamit para niini. “Kay ug naa ta ana nganong dili man nato hangyuon si governor nga puwerti man gyong lipaya sa atong mga katawhan ana,” nagkanayon si Darunday. (The New Nandau, Vol. XVIII No.17)

 

PBMLP mihimo’g aksiyon mahimong legal ang operasyon sa habal-habal
People’s Initiative himoon aron ka-amendahan ang balaod trapiko –BM Mejorada

Hangtud karon nagapabiling question legal ang problema sa pagpamasahero sa mga habal-habal motorcycle dili lamang dinhi sa Zamboanga del Norte kon dili lakip na niini ang halos tanang probinsya sa nasud. Kini nga problema taudtaud nang nasinati sa matag local government units nga wala masanta atubangan sa reklamo sa mga lihitimong de pasaherong sakyanan nga illegal ang maong operasyon.

Atubangan ning maong problema, ang Provincial Board Members League of the Philipines mihimo ug lakang arun mahimong legal ang operasyon sa habal-habal o skylab.

Atol sa Board Members League Mindanao Island Conference didto sa Malaybalay Bukidnon karong bag-o, si Board Member Uldarico “Ricky” Mejorada, II nangamahan ug resolusyon nga mohimo ug Citizen’s Initiative o People’s Initiative para ka-amendahan ang balaod nga maka-regulate ug mahimong legal ang operasyon sa single motorcycles for hire o ang nailado nang gitawag ug habal-habal o skylab.

Si Mejorada misugyot sa liga nga momugna ug special committee aron maoy mo-draft sa petisyon nga maoy gamiton sa Citizen’s Intiative ug kini gidasunan usab sa mga membro.

Matud ni Mejorada taudtaud na kining maong problema nga gireklamo sa mga katawhan pinaagi sa local legislative bodies sa tibook nasud nga nag-awhag sa kongreso nga ma-regulate ang operasyon sa habal-habal apan hangtud karon kini wala mahatagi ug aksiyon.

Gumikan kay nagkulang ug regular transportation services atubangan sa pagsaka sa demand sa mga pasahero ug sa kalisud sa dalan nga dili maabot sa ubang sakyanan hinungdan nga mihugpa ang pagpamasahero sa mga single motorcycles o habal-habal.

Tungod kay wala gitugot sa balaod, daghanan sa mga single motorcycles for hire ang nadakpan sa mga law enforcers gumikan sa paglapas sa balaod trapiko.

Atubangan sa nagapadayon nga operasyon sa habal-habal nagsagubang usab sa kapeligro ang publikong sumasakay gumikan kay kasagaran niini walay safety built ug labaw sa tanan walay insurance sa panahon nga madisgrasya, “tabla”, dili pareha sa regular registered public transportation vehicles.

Kasagaran sa mga operators sa habal-habal nagtinguha nga ma-rehistro ang ilang operasyon ngadto sa gobiyerno apan wala kini mahitabo gumikan kay walay balaod nga nagtugot nga marehistro ang single motorcycles isip pamasaheroan.

Niini, si Board Member Mejorada mipahayag nga gikinahanglan ang ammendment sa kasamtangan balaod trapiko pinaagi sa Citizen’s Initiative nga maoy alternatibong pamaagi nga gitugot diha sa batakang balaod.

Maud ni Mejorada, ang mao niyang resolusyon ang gidasunan sa mga membro sa liga atol sa ilang Mindanao Island Conference didto sa Malaybalay, Bukidnon karong bag-o. (The New Nandau, Vol. XVIII No.17)

 

5 Alay Lakad Scholars mipasar sa LET

Mapasigarbuhong gipahalipayan karon ni Mayor Evelyn T. Uy ug kinatibuk-ang miyembro sa Alay lakad Council sa Dipolog, ang mga alay lakad scholars nga milampos ug mipasar sa bag-ohay lang nga gipahigayong Licensure Examination for Teachers (LET) sa professional Regulation Commission nga gitakda niadtong bulan sa Sityembre ning tuiga didto sa Zamboanga City.

Mapasigarbuhong gipahalipayan karon ni Mayor Evelyn T. Uy ug kinatibuk-ang miyembro sa Alay lakad Council sa Dipolog, ang mga alay lakad scholars nga milampos ug mipasar sa bag-ohay lang nga gipahigayong Licensure Examination for Teachers (LET) sa professional Regulation Commission nga gitakda niadtong bulan sa Sityembre ning tuiga didto sa Zamboanga City.

Ang mga alay lakad scholars nga mipasar naglangkob nila ni : Mary Jane Adaro, Janneth Barbaso, Eva Marie de la Pena, Madel Gerasol, ug Mary Jane Sumambod, kinsa migradwar sa bachelor in Elementary Education sa Jose Rizal memorial State College, Dipolog Campus niadtong school year 2007-2008.

Sa laing bahin, mipabati usab sa ilang dakung pasalamat ug pagdayeg ang nasangpit nga scholars ngadto sa Alay lakad Council nga gipangunahan kani-adto ni kanhi Mayor Roberto Y. Uy ug gidumala karon ni Mayor EvelynT. Uy, ug sa tanang ahensya, organisasyon, mga indibi-dual nga mitampo sa ilang pinansyal nga hinabang nga maoy nahimong dalan sa kalampusan nga ilang natagamtaman karon. (CIO)

 

AMATONG UG CARLOTO APIL SA NAKADAWAT SA FERTILIZER FUND –DBM

Mga kaalyado kanhi sa politika sa partido Lakas-CMD nga maoy naglingkod sa gahum dinhi sa Zamboanga del Norte apil sa talaan nga nakadawat sa nakontrobersiyal nga Fertilizer Fund niadtung tuig dos mil kuatro. Sila si kanhi Governor Isagani S. Amatong ug kanhi 3rd District Congressman Angel Carloto apil sa listahan ni kanhi DA Under Secretary Jocjoc Bolante nga nakadawat sa maong salapi.

Sigun sa nagbansiwag nga balita nga namantala sa The Philipine Daily Iquirer gula ning semanaha, si kanhi 3rd District Congressman ug karon Gulatac Mayor Angel Carloto nakadawat ug tres milyones ka pesos samtang si kanhi Governor Isagani S. Amatong nakadawat ug singko milyones ka pesos.

Sila si Amatong ug Carloto lakip sa mga opisyal nga kaalyado sa Malacañang ang nakadawat sa mokabat P728 milyones ka pesos gikan sa Ginintuang Masaganang Ani program sa Department of Agriculture sigun sa talaan sa dokumento niadtung dos mil kuatro sa Department of Budget and Management diin ang maong kopya nadawat sa usa ka reporter gikan kang Anakpawis Representative Rafael Mariano.

Mga kaalyado kanhi sa politika sa partido Lakas-CMD nga maoy naglingkod sa gahum dinhi sa Zamboanga del Norte apil sa talaan nga nakadawat sa nakontrobersiyal nga Fertilizer Fund niadtung tuig dos mil kuatro. Sila si kanhi Governor Isagani S. Amatong ug kanhi 3rd District Congressman Angel Carloto apil sa listahan ni kanhi DA Under Secretary Jocjoc Bolante nga nakadawat sa maong salapi.

Angay masayran nga gisugdan na ug gisa sa senado ang unang pagtunga ni kanhi DA Under Secretary Jocelyn “Jocjoc” Bolante nga maoy giilang archetic sa Fertilizer Fund scam gumikan kay taliwala sa kadako sa gipagawas sa maong pundo kini wala mapadapat ngadtu sa mga mag-uuma.

Dinhi sa Zamboanga del Norte, sukad napildi sa pagka gobernador si Isagani Amatong ug Angel Carloto sa pagka kongresista niadtung dos mil kuatro, walay naimplementar nga programa gikan sa nadawat nilang salapi sa GMA program sa Department of Agriculture.

Ning maong kantidad, wala usay mga mag-uuma ang mikonpermar nga sila nakadawat ug fertilizer nga gihatag sa kanhi liderato sa probinsya gikan sa Ginintuang Masaganang Ani program sa Department of Agriculture. Kini nagpasabot nga nahanaw lamang ang maong salapi nga daw bola sukad sila nangawala sa ilang gihuptan nga puwesto.

Angay mahinumdoman nga ang maong fertilizer fund scam ilawom karon sa imbestigasyon sa Senate Blue Ribbon Committee human sulod sa tulo ka tuig nga pagkawala ni kanhi Usec. Jocjoc Bolante niadtung dos mil kuatro nga nagdulong ang eleksiyon.

Gituhoan sa mga senador nga dunay dakong anomaliya ug irregularedad ang pagpagawas sa maong salapi atubangan sa pagduda nga kini gigamit sa eleksiyon niadtung dos mil kuatro.

Hinoon ning maong pagbalita wala pa makuhae sa ilang pamahayag sila si kanhi Governor Isagani Amatong ug kanhi 3rd District Congressman ug karon Gutalac Mayor Angel Carloto kon dis-a mipadulong ang maong salapi nga ilang nadawat gikan sa fertilizer fund sa GMA program sa Department of Agriculture. (The New Nandau, Vol. XVIII No.16)

 

BUS NABALINTONG, 5 NA-ANGOL

Lima ang nanga-angol sa nahitabong pagkabalintong sa usa ka bus sa Rural Transit Mindanao human mawad-an ug control ang driver sa iyang pagmaniho subay sa National Highway sa brgy. Olingan kaniadton sayo sa buntag November 13, 2008.

Giila ang biktima nga mga pasajero sila si Jamallah grace Cawi Clerego 27 anyos taga Sinubong Zamboanga City, Arnulfo Nocon y Tubalado 51 anyos taga B-4 Lustre st. Calarian Zamboanga City, ug usa ka PO3 Jordan Dacules y Batanes 35 anyos taga Sto. nino Zamboanga City lakip sa driver nga si Rene Cuaresma y Alberio 35 anyos taga Jose Dalman ug conductor niini giilang si Nelson Abad y Bongcawil 29 anyos taga Dansalan longsod sa Labazon ning lalawigan.

Ang lima maoy pasajero apil ang driver ug conductor ang nahimong angol sa nahitabong pagkabalintong sa bus sa Rural Transit nagtangag sa plate number 10431 nga gimaniho ni Cuaresma lulan sa walo ka mga pasajero padung unta sa Zambaoanga City pasado alas sinco sa buntag apan pag-abot sa liku-onong bahin sa national highway sa Binalabag brgy Olingan gikaaligar nga nawad-an ang driver ug control sa manubila kay gitoho-an nakatagpilaw sa iyang pagmaniho hinongdan sa pagsimang sa dalan sa maong sakyanan ug didto mipakaras sa Traffic Sign Board, Street Lights, District Water Pipe, ug Ferimeter Fence sa Young Residence ug didto milahos sa usa ka puno-an sa kahoy mahogany ug didto nasandig ang nasangpit nga bus ug wala na matikalbong pa sa kimpa nga gikabalak-an mas daghan pang madisgrasya.

Ang mga biktima dali usab dayon nga na-rescue sa Ambulansya ug gipangdala sa tambalanan sa ZN. Medical Center ug sa Dipolog Medical Center ug gikataho nga luwas na ang kahimtang sa mga biktima.

Sa nasayran nga hangtod ning pagsulat ning pamantalaan South Point ang mga hingtongdan mga biktima wala mopasaka sa tukmang kaso human ang Management sa maong transportasyon ang mipasalig nga maoy mangabaga sa tanang mga galastuhan ug obligasyon sa pagpatambal sa nahimong mga biktima sa disgrasyas sa kadalanan. (Southpoint, Vol.1No.45)

 

Peke nga kuwarta mikatap sa Dapitan

Peke nga salapi nga tibook tag usa ka libo ug kinientos pesos ang gikatahong mikatap karon sa mga kabarangayan sa dakbayan sa Dapitan human mireklamo ang daghang nangabiktima.

Kini ang gibutyag ni Mayor Dominador Jalosjos, Jr. sa dihang daghanan sa iyang mga katawhan ang mipaabot sa ilang reklamo nga sila nakadawat ug peke nga kuwarta gikan sa magpatuong mopalit sa ilang tindahan ug mokompra ug baboy.

“Bag-o pa kaayo ang tag usa ka libo ug kinientos kinsa may dili masilang.”

Tungod niini, kusganong nag-awhag si Mayor Jalosjos uban sa pagpahimangno sa mga katawhan nga magbantay diha sa pagkuyanap sa gipakatap nga pekeng kuwarta (1,000 ug 500) ilabe na nga lima na ka mga tawo ang nahimong biktima. Gituhoan nga mosubra pa sa lima ang nahimong biktima niini. “Lima pa karon ang nagreklamo kay duna pay daghan ang nakadawat sa peke nga kuwarta.”

Gibutyag ni Mr. Hoff Bauer “Boy” Insong, OIC-Task Force Lupad Commander nga dunay lima ang mipadangat sa ilang reklamo nga kasagaran nanag-iya ug mga tindahan ug mga mamagliyaay sa Dapitan.

Niadtung Domingo, usa ka Kulas Quizo ang nabiktima sa peke nga 1,000 ug 500 samtang dunay usa ka tawo ang nagpaka-aron ingnun nga magpasensilyo sa iyang kuwarta. Human masensilyo ang kuwarta, ayha pa usab nasuta sa biktima nga peke diay. Gituhoan nga dili taga dakbayan sa Dapitan ang nagpalusot niini.

Duna pay laing nabiktima sa barangay nga gipalit ang iyang baboy sa nagpatuong kumprador. Gibayaran ang iyang baktin ug mil kinientos pesos (1,500). “Lipay kaayo siya kay hagtik kaayo ang kuwarta pero sa himan-himan iyang nahibaw-an peke diay.”

Si Insong sa Task Force Lupad nanawagan sa mga katawhan kon ugaling adunay mamatikdan nga magpakuyanap pinaagi sa pagpasensilyo o pagpalit sa tindahan gamit ang peke nga kuwarta sa pagtaho gilayon sa ilang buhatan o kaha sa kapolisan sa dakbayan sa Dapitan aron ilang mahatagan ug tukmang aksiyon. (The New Nandau, Vol. XVIII No.16)

 

Aron mapaabot ang health program sa ZaNorte
USAID makig-alayon sa LANDO-BIBO

ANDAM karon nga molugway sa ilang tabang ang United States Agency for International Development (USAID) alang dinhi sa Zamboanga del Norte sa ilang health program.

Ang mga staff sa USAID ang nakig-atubang kini kang Governor Rolando Yebes aron pag-paabot sa ilang katuyuan. Tinguha sa grupo nga ilang mapatuman dinhi sa probinsiya ang dugang programa alang sa panglawas sa mga katawhan.

Gipabati sa mga staff sa USAID ang ilang pagdayeg sa programa sa atong gobernador pagsumpo sa kapobrehon nga apil sa gihatagan sa igong pagtagad ang health services. Dako usab ang ilang pagdayeg sa programa nga Lando-BIBO (Barangay Indigent Beneficiaries  Organization), hinungdan nga gi-presentar sa taga USAID ang ilang interest nga gusto usab silang makig-koor-dinar o makig-alayon sa maong organisasyon tungod kay sa ilang nakita direkta ngadto sa mga pobreng katawhan ang mga prog-rama nga gihatag sa kagam-hanang probinsiyal tungod sa organizational set-up.

Gihangyo ni Governor Yebes ang maong grupo nga motabang kini sa iyang kawsa batok sa kapobrehon.

Kombinsido ang taga USAID nga pinaagi sa pag-atiman sa panglawas sa katawhan dako kaayo kini ug gikatampo pagsumpo sa kapobrehon. Sama sa gihimo karon sa Yebes administration nga gihatagan sa igong pagtagad ang maong programa sama sa pagpabarog sa bag-ong hospital ug ang Provincial Health Care Assistance Program (PHCAP).  Ila usab nga gikahibulong kung nganong nahimong pinaka-pobreng probinsiya ang Zamboanga del Norte sa tuig 2003, apan sa karon anaa na lang sa ika-upat.

Gipasalig sa taga USAID nga moduyog sila sa ipahigayon nga Lando-BIBO Congress sa sunod tuig aron mahisgutan kung unsa ang ilang ikatabang ngadto sa mga katawhan.

Sa laing bahin, gikatakda nga mahidangat dinhi sa Zamboanga del Norte ang grupo sa mga doctors nga gikan sa Amerika aron subling mohimo na usab sa ilang libreng operasyon ngadto sa mga pobreng katawhan dinhi sa Zanorte nga naghambin sa ilang sakit. Gipahibalo ni Governor Yebes nga kung kinsa ang gusto nga mopahimulos sa maong libreng operasyon magpalista kini daan sa Lando-BIBO president sa matag barangay. Ang maong libreng operasyon ang anha kini himoon sa Zanorte Medical Center. (The New Nandau, Vol. XVIII No.16)

 

P/SSupt. Gonzalodo bag-ong ZaNorte PNP PROV’L Dir.

Bag-o na ang modumala sa Provincial Police Office human migawas ang kamandoan nga polihan si P/SSupt. Mario Yanga, ang kasamtangang PNP Provincial Director sa Zamboanga del Norte.

Kini nasayran human migawas ang kamandoan gikan ni PNP Chief Verzosa nga si P/SSupt. Cristeto Rey Delos Reyes Gonzalodo maoy gipili isip bag-ong Provincial Director sa PNP Provincial Command sa Zamboanga del Norte.

Si Gonzalodo maoy kanhi Regional Director sa Traffic Management Group o TMG maoy usa sa gipili ug gi-endorsar ni Provincial Governor Rolando Yebes nga mahimong Police Provincial Director sa Zamboanga del Norte.

Ang rekomendasyon ni Governor Yebes nahitabo sa miagi pang tuig sa panahon pa ni retired PNP Chief Avelino Razon apan wala mahatagi ug hinanaling aksiyon.

Tulo ang gipilian pagka provincial direvtor, sila si P/SSupt. Rolando Gaco-Lim, P/SSupt. Rumolo Alimbaba-Esteban ug P/SSupt. Rey Gonzalodo.

Sa tulo, si Gonzalodo ang gipili ni Governor Yebes ug maoy iyang gi-endorsar ngadtu sa PNP Chief.

Niadtung miaging adlaw, human migawas ang order gikan ni PNP Chief Verzosa, si PNP Regional Director Angelo Sunglao mihatag ug kamandoan nga si Gonzalodo mo-asumer sa iyang katungdanan karong sunod semana, Nobembre 19 isip bag-ong PNP Provincial Director sa Zamboanga del Norte.

Angay masayran nga si P/SSupt. Gonzalodo membro sa Integrated Bar of the Philippines. (The New Nandau, Vol. XVIII No.16)

 

Col. Amarille bag-ong CO sa 101st IB-PA

Pormal nang mi-asumer sa iyang bag-ong katungdanan si Col. Roland Amarille isip Commanding Officer sa 101st Infantry Brigade, nga nakabase sa Del Pilar, Piñan tapos siya gi-instalar ni Major General Nehemias Pajarito, Brigade Commander sa Ist Infatry Tabak Division, Philipine Army, Pulakan, Pagadian City atol sa turn-over ceremony niadtung Nobembre 8, 2008 didto sa 101st Brigade sa Del Pilar, Piñan.

Gipolihan ni Col. Amarille si Col. Romulo M. Bambao, kinsa miserbisyo sa 101 Brigade isip Commanding Officer sulod sa usa ka tuig. Nahibaloan nga si Col. Amarille maoy deputy commander ni Col. Bambao sa dihang CO pa siya sa 101 IB PA.

Nasayran nga si Col. Bambao gi-assign sa Special Operations Command, 4th Magsaysay sa Philipine Army nga atua mahimutang sa Laur, Nueva Ecija.

Col. Roland Amarille, bag-ong Commanding Officer sa 101st Brigade sa Philippine Army

Sa iyang mensahe, si Bambao isip outgoing Commanding Officer sa 101 Brigade mipabate sa iyang pagpasalamat sa tanang opisyal sa dakbayan sa Dipolog ug sa probinsya kinsa mihatag sa ilang igong suporta ug kooperasyon ilabi na sa pagmintinar sa kahapsay-kahusay-kalinaw sa ilang hurisdiksyon sa panahon nga siya pa ang nagdumala sa 101 Brigade.

Giila usab ni Major General Pajarito atol sa iyang mensahe si Mayor Evelyn T. Uy nga usa ka “consistent pillar of support” sa pagmintinar sa kalinaw ug usa ka maayong “partner in development”.

Ang turn-over ceremony sa change of command sa 101 IB-PA gitambongan nila ni Mayor Evelyn Uy sa Dipolog, CIO Atty. Alanixon Selda, Atty. Rafael Cabanlit, Provincial Administrator nga maoy nagrepresentar kang Governor Lando Yebes, Mayor Tablezo sa Leon B. Postigo uban sa mga representate sa mga mayores sa Zamboanga del Norte. Mitambong usab ang mayor sa Calamba, Misamis Occidental. (The New Nandau, Vol. XVIII No.16)

 

Kampo ni Cong. Dodoy Labadlabad mipatin-aw sa isyu kabahin sa pag-angkat sa mais

“Tungod kay wala makas-a ang delivery mao nga wala dayon mabayri ang gi-angkat nga mais.” Mao kini ang nahi-mong tubag ni Atty. Crisologo A. Decierdo, chief of staff ni 2nd District Congressman Rosendo ‘Dodoy’ Labadlabad human ilambigit ang pangalan niini sa gikaalegar nga reklamo sa giingong pipila ka mga mag-uumag mais sa lungsod sa Sergio Osmeña, Zamboanga del Norte. Sumala pa nga wala dayon mabayri sa usa ka korporasyon nga NABCOR ang pipila ka mag-uuma nga didto niini mihandos sa ilang sinanggi nga mais tungod kay ang kompaniya sa Kongresista wala makabayad sa binultong mais gikan sa NABCOR nga tua magbase sa maong lungsod.

Gipatin-aw ni Atty. Decierdo nga pipila na ka buwan ang milabay dunay tinugyanan sa National Business Corp. nga mi-adto sa Guisokan Trading Corp diin si Cong. Dodoy Labadlabad chief executive officer ug mitanyag nga paliton ang ilang pundo nga mais. Midugang sa pag-asoy si Atty. Decierdo nga ang naandan unta nga mga suki sa NABCOR mao ang mga magpapatigayon sa Sugbo. Apan sumala pa nga ubos ang palit didto sa Cebu niadtong panahuna ug mas taas ang presyo sa palit sa Guisokan Trading Corp. maoy hinungdan nga didto nila gitanyag ang ilang estak.

Samtang ang mga tinugyanan sa Guisokan Trading Corp. nga tua magbase sa Guisokan, Sindangan nagkanayon nga entrada sa buwan sa Septyembre ning tuiga gisugdan paghakot ang mais gikan sa pasilidad sa NABCOR paingon sa bodega sa Guisokan Trading Corp. Apan tungod sa maot nga panahon ug sa nagpadayong rehabilitasyon sa karsada sa lungsod sa Sergio Osmeña maoy hinungdan nga gidangtan pa ug mga tulo ka semana ang pagkompleto sa delivery sa nasabutang gidaghanon sa mais gikan sa NABCOR ngadto sa Guisokan Trading Corp. Apan gipaklaro ni Atty. Decierdo nga human mahingpit ang delivery ug ang naandang proceso sa transaksyon miluwat gilayon ug bayad ang Guisokan Trading Corp. ngadto sa NABCOR. Gipamatud-an kini sa resibo nga gihuptan sa buhatan sa Guisokan Trading Corp. nga giisyu sa NABCOR. Ang maong resibo pinitsahag Septyembre 28, 2008 ug nagdala sa OR Number 7522. Samtang giila ni Atty. Decierdo ang representante sa NABCOR nga nagsilbing payee nga Evangeline Castillon.

Samtang sa pikas bahin nagtuo ang chief of staff sa Kongresista sa Segundo distrito nga politika ang motibo sa paggawas sa maong report nga dunay pipila ka mga mag-uuma sa mais nga wala magpakadawat sa bayad sa ilang produkto nga ilang gihandos sa NABCOR kay sumala pa wala makabayad ang Guisokan Trading Corp. ngadto niini. Gipaklaro niini nga tungod kay ang mga mag-uuma didto man miba-ligya sa ilang abut sa NAB-COR, busa walay direktang obligasyon ang korporasyon sa magbabalaod ngadto sa mga mag-uuma. Kini tungod kay kon aduna may mga mag-uuma nga wala magpakadawat sa ilang kita, ang ila nang gibaligyaan maoy manubag niini.

Samtang gikwestyon usab ni Atty. Decierdo ang kridibilidad sa mipagawas sa maong taho sa kaha-nginan ug ang gitumbok niini nga tinubdan sa impor-masyon nga sumala pa ang bodegera sa NABCOR. Tataw kaayo, sigun pa kani-ya, ang pagda-ut lamang sa pangalan ni Cong. Dodoy Labadlabad maoy matuod nga motibo sa paggawas sa report sa radyo. Kini tungod kay ang mipagawas niini nga koresponsal tua man unta magbase sa lungsod sa Sergio Osmeña ug na-ila na kaayo nga dili ma-uwahi sa bisan ginagmay nga mga kasikas, apan katingalahan nga karon pa lamang miga-was ang balita nga bahaw na kaayo tungod kay niadto pa mang buwan sa Septyembre napahigayon ang tran-saksiyon ug nabayran kini sa wala pa gani motapus ang maong buwan.

Samtang ang mga tigpa-luyo sa kauban sa kauswa-gan nga si Cong. Dodoy Labadlabad nagtuo nga tungod kay sensirong pag-alagad sa katawhan ang gipakita niini nga estrikto kini diha pagpatuman sa mga proyekto nga gigas-tuhan sa kwarta sa gobyerno aron walay mausik maoy hinungdan nga ang pribado nga kinabuhi niini isip usa ka malampusong magpapa-tigayon mao na lamay gipangitaag bikil. Milutaw karon nga dunay gipanghalangan tungod sa dagkung mga tarpaulin nga makita daplin sa kadalanan sa segudo distrito nga nagmantala sa mga proyekto nga ipatuman sa Kongresista diin makita kon unsa kining proyektuha, asa mahimutang, ug labaw sa tanan pila ang kantidad nga gigahin alang niini. Pinaagi sa maong mga tarpaulin nahibaw-an nga dagku, apan mas barato ang mga proyekto niini karong panahuna taliwala sa kamatu-oran nga mas mahal ang presyo sa mga materyales karon, kon ikompara sa minglabay nga mga katuigan.

Hinoon kabahin ning maong punto, si Atty. Decierdo mi-asoy nga ang grupo ni Cong. Dodoy Labadlabad wala maglantaw kon unsay sipyat sa mga tawo nga wala makig-abin niini sa politika. Igo lamang naningkamot sila ug labi na ang Kongresista pinaagi sa ligdong nga panerbisyo aron makahatag ug kaayuhan sa kinabag-ang katawhan. (The New Nandau, Vol. XVIII No.16)

 

Ilhon ang badlongon nga kawani –Ocampo

Ilhon ug himoong pormal ang sumbong kon duna may reklamo batok sa serbisyo sa mga personahe sulod sa Zamboanga del Norte Medical Center.

Kini maoy reaksiyon ani Ms. Rosevic Lacaya-Ocampo, Hospital Administrator sa ZMC kabahin sa daghanang mulo ug reklamo nga milutaw sa kahanginan (radio stations) mahitungod sa operasyon sa bag-ong tambalanan nga nagtumbok sa mga kawani nga estrikto ug dili makamaong moat-iman sa ilang pasyente ug wala mahatagi ug hustong serbisyo.

Ang hagit ni Ocampo ngadto sa hingtungdang pasyente ug tagtungod iyang gihimo para makahimo siyag aksiyon aron matul-id ang mga kawani nga wala magtinarong sa ilang pagserbisyo sa tambalanan.

Iyang gipasabot nga ‘unfair’ ug dili makatarunganon para sa ubang kawani sa hospital nga sensirong nag-tinarong sa ilang panerbisyo apan nadalahig sa dili maayong binuhatan sa ubang nagpabuyag nga kawani. Busa iyang gi-awhagan kadtong dunay gipadayag nga reklamo sa pag-ila sa personahe kinsa kini para kahimoan ug hustong lakang.

Kahinumdoman nga sukad sa pagtukod sa bag-ong tambalanan sa Sicayab kini nakadawat na sa walay puas nga pagbatikos diin hangtud karon nga kini nagsugod na sa iyang operasyon padayon gihapon ang mga pagsaway.

Naglaom ang hospital administrator nga sa higa-yon nga adunay reklamo sa mga pasyente kini mo-ila sa maong kawani kay siya na mismo ang mohimo ug aksiyon tungod kay matud pa niya, dili gusto si Governor Lando Yebes nga adunay mga ligoy nga kawani dili lamang sa hospital kon dili apil na sa tanang nagserbisyo sa kagamhanang probinsyal.

Samtang walay puas ang reklamo batok sa serbisyo sa ZaNorte Medical Center, si Ocampo nagkanayon nga nagkadaghan usab ang midayeg niini nga mga local tourist nga nakakita sa kaanindot ug kadaku sa maong tambalanan.

Gidasunan usab ni Board Member Cedric Adriatico, Chairman sa Committee on Health sa Sanguniang Panlalawigan nga matud pa niya sa daghan nga mibisita dinhi sa probinsya ang nakadayeg gayud sa bag-ong tambalanan.

Gipahayag ni Ms. Ocampo nga gipaningka-motan karon sa kagamha-nang probinsyal nga makonberter na ngadto sa tertiary level ang bag-ong tambalanan para makahatag pa kini ug dugang serbisyo ngadto sa mga katawhan.

“Gamay nalang ang kulang mahimo nang tertiary level ang ZaNorte Medical Center”, panapos pa nga pamahayag ni Ocampo. (The New Nandau, Vol. XVIII No.16)

 

Mga Turista sa Cebu, Bohol ug Boracay: molahos na unya sa ZaNorte

Sa dili madugay hingpit na unyang malakip ang mga tourist destinations sa probinsya sa himoong tour package sa mga tour operators nga nagabase sa dakbayan sa Sugbo. Kini maoy nakuhang kalambuan ni Provincial Tourism Officer Atty. Ivan Patrick Ang human kini nakigtagbo sa mga myembro sa Cebu Association of Tour Operators (CATO) kaniadtong nakalabayng adlaw.

Gibutyag ni Atty. Ang nga atol sa pakigpulong niini sa Secretary sa CATO ug General Manager sa Wanderlanes Travel Co.Inc. nga si Miss Joan Young Tiu, kini ang misaad nga tabangan ang lalawigan sa Zamboanga del Norte nga mapa-uswag ang industriya sa turismo.

Gitan-aw nga basehan ni Tiu ang kalinaw ug kahapsay sa lalawigan mao nga positibo kini nga ang lalawigan ang makakabig sa daghanang foreign tourists ug lakip usab ang mga lokal nga dumuduong nga nagagikan sa mga dagkong syudad sa Visayas.

Gidugang ni Tiu nga dakong posibilidad nga dugukon sa mga turista ang lalawigan gumikan kay bag-o kini sa ilang pangdungog ug napul-an na usab sagad ang mga turista ug urban professionals sa mga talan-awon sa Sugbu, Boracay ug Bohol nga maoy sagad suroyan niini.

Kahibaloan nga kadaghanan sa mga local travelers nga mokuha sa tour package nga gihanyag sa mga tour operators mao kadtong mga nagtrabaho sa call centers ug mga young executives.

Ang CATO ang aduna usab kini daghanang mga branches sa probinsya sa Bohol ug dakbayan sa Dumaguete.

Lakip sa nakita ni Tiu nga mamahimo unyang prime destination sa probinsya mao ang mga island destinations sama sa Aliguay, Piñahon ug Selinog island ug Dakak agi sa kaputi sa balas niini. Apil usab sa gitan-aw ug gi-konsiderar niini mao ang Dolphin watching ug scuba diving. Ug alang usab sa Adventure tourism nakita niining posibleng pagdugokan mao ang Libuton Cave sa Manukan, Morias Falls sa lungsod sa Katipunan ug ang Situbo Falls sa Tampilisan.

Gipamahayag ni Miss Tiu nga usa usab sa side trip nga pagahimoon sa mga dumuduong sa ZaNorte mao ang pagbisita sa mga historical landmarks niini ug ang pag-obserbar unsaon pagproceso ang pinakasikat nga bottled sardines.

Dakog pagsalig ang mga myembro sa maong organi-sasyon nga ang turismo sa ZaNorte ang taas pa kinig makuhang kalambuan gumikan kay suportado kini sa kagamhanan. Kini nagpaila lamang nga himsog ang industriya sa turismo.

Angayang kahibaloan nga subsob karong naning-kamot si Governor Rolando Yebes nga mapalambo ang lalawigan aron dili na kini malakip sa pinakapobreng probinsya sa nasud.

 Niini, hingpit karong nagtutok sa mga progra-mang pang-agrikultura, kapanginabuhian, maayong panglawas ug ingon usab ang turismo nga maoy usa sa naghatag ug dakong tampo sa paglambo sa ekonomiya.

Atol usab sa pagbisita ni Atty. Ang, nakigtagbo usab kini kang RGMA Manager Bobby Nalzaro, gipasalig ni Nalzaro nga andam usab siya motabang sa ZaNorte pinaagi na sa pagpadala sa mga local media ug news writers sa Cebu aron maoy mosulat sa promosyon sa lalawigan.

Lakip usab sa gikatagbo ni Atty. Ang mao si Mr. Lemuel Arogante, usa sa mga hanas nga photographers sa Sugbo kinsa mihanyag sa posibleng paglakip sa probinsya sa ZaNorte isip wedding destination.

Angayang masayran nga ang grupo sa mga photographers ang padayon kining nangita ug mga bag-o ug maanindot nga talan-awon gumikan sa nakitang trend karon nga pre and post nuptial pictorials.

Mapasaligon si Arogante nga usa unya sa ihanyag nga destinasyon niini mao ang mga maanindot nga talan-awon sa Zamboanga del Norte.(Roldan, The New Nandau, Vol. XVIII No.16)

 

Suweldo sa mga kawani sa City Hall nadilatar!
Kalangan sa IRA maoy hinungdan –Caroro

Ang kalangan sa pagdawat sa Internal Revenue Allotment maoy nag-unang hinungdan nga nadelatar ang suweldo sa mga regular nga kawani sa kagamhanang lokal sa dakbayan sa Dipolog. Kini ang gipatin-aw ni City Treasurer Sancen Caroro human mipabate sa ilang reklamo ang pipila ka mga kawani nga hapit na nanungatunga ang bulan sa Nobyembre wala pa sila makadawat sa ilang suweldo nga unta sa naandan sa miagi, sa una palang semana sa bulan kini ila namang madawat.

Hinoon iyang gipahayag nga dili lang angay maba-laka ang tanang mga kawa-ni sa lokal nga pangagam-hanan sa dakbayan tungod kay human madilatar ug pipila ka mga adlaw ang ilang suweldo sa unang kinsinas ning bulan sa Nobyembre kini ila nang madawat sulod ning simanaha.

Iyang gipasabot nga ang kalangan sa pag-abot sa Internal Revenue Allotment kon IRA sa Dipolog maoy rason nganong nalangan usab ang pagsuweldo sa mga empliyado.

Sumala pa niya nga dili pa hinoon matawag nga due and demandable ang wala nila madawat nga suweldo kay wala may pre-payments sa suweldo tungod kay trabaho-an man daan nila ayha makobra ang suweldo ug wala pa usab molapas sa pitsa kinse niining bulan sa Nobyembre.

Kini matawag nga nadilatar ang suweldo tungod kay naandan naman nga ang suhulan sa kinsenas madawat sa unang simana pagtong-tong sa bulan.

Hinoon gi-angkon ni Caroro nga gi-process na karon ang payroll para sa su-weldo sa tanang mga ka-wani sa kagamhanang lokal lakip ang mga job order.

Samtang sa pangutana kung pila ang kinatibok-ang budget sa Dipolog sa tuig 2009 ang mamahandi sa Dipolog mi-asoy nga mokapin sa 600 milyones ka pesos ug kini ipadapat sa hepe ihikutibo sa siyudad sa mga importanting programa ug proyekto sa dakbayan sa Dipolog. (Rene Buaya, The New Nandau, Vol. XVIII No.16)
 

Zamboanga del Norte Medical Center nakigdugtong ug pribadong korporasyon para sa dialysis machine

Aron matabangan pa ang mga katawhan nga dili na moadtu sa mga dagkong siyudad nga magpatambal ilabi na ang pagpa-dialisys, ang Zamboanga del Norte Medical Center nakigdugtong karon ug pribadong corporasyon para mopahimutang ug Clinical Chemistry Analyzer sa maong tambalanan.

Kini maoy unod sa napasar nga ordinansa human gisubmite ang committee report sa committee on laws rules and ordinances nga gipangulohan ni Board Member Ricky Mejorada atol sa ilang regular session sa Sangguniang Panlala-wigan ning semanaha.

Sa maong ordinansa, tulo ka kontra ang gidasunan sa hunta probinsyal tali na sa kagamhanang probinsyal sa Zamboanga del Norte pinaagi ni Governor Rolando Yebes ug sa Fresenius Medical Care Philipines, Inc. pinaagi sa Managing Director niining si Mr. Ronilo P. Quinio. Kini subay na sa operasyon sa hemodialysis center diha sa Zamboanga del Norte Medical Center.

Ang maong kontrata nga pagatiman-an maoy pinasubay sa pagtuon nga gihimo sa committee on laws human gipatawag ang mga hingtungdang personahe gikan sa buhatan sa Provincial Attorney, ZMC ug representante sa 99 commercial kabahin sa mga kondisyon nga mahasulod sa kasabutan.

Matud pa ni Board Member Mejorada, ang Zamboanga del Norte Medical Center naghandom nga maka-operate ang hemodialysis center para sa mga out-patient ug in-patient diagnostic and treatment center sa Zamboanga del Norte ug sa kanait niing probinsya.

Ang Fresenius Medical Care Philippines, Inc. maoy mo-supply sa mga kagamitan ug tambal para sa iyang operasyon. (The New Nandau, Vol. XVIII No.16)

 

DepEd District Supervisor gireklamo kay suweldo sa mga magtutudlo iyang gikitnan

Sindangan, ZaNorte- Modul-an sa 150 ka mga magtutudlo nga sakop sa Sindangan Central School district sa lungsod sa Sindangan ang mipabati sa ilang kapungot ug kalagot ngadto sa ilang district supervisor tungod sa gihimo niining pagkida sa ilang suweldo bisan ug walay igong rason, sulod na sa duha ka higayon.

Matud pa sa mga magtutudlo nga nahinabe sa DXFL News team nga ang gihimo sa ilang district supervisor maoy dakong irregular ug anomaloso hinungdan nga sila karon nagplano nga moduso ug hustong reklamo ngadto kang Provincial Schools Div. Supt. Shariff Adzar Sarahadil ug kang Board Member Edionar Zamoras, Chairman sa Committee on Education sa Sangguniang Panlalawigan, sa dili pa sila moduso ug pormal nga sumbong ngadto sa Ombudsman Mindanao.

Ilang iapel ug duso sa ilang reklamo ang buhatan ni Board Member Zamoras, subay sa gipahayag niini sa miaging National Teachers Day celebration nga diin siya maoy nahimong guest speaker nga kung dunay magbinuang sa mga magtutudlo pinaagi sa pagkibra sa ilang suweldo ug mga amot, itug-an lang kaniya kay iya kini himoan ug hustong lakang.

Matud pa sa mga magtutudlo sa Sindangan Central School district, makaduha na ka higayon ang gihimo sa ilang district supervisor nga giilang si Dr. Lourdes S. Ortega diin ang una sila gikitnan ug tag tres syentos pesos, ug karong bag-o o sa miaging bulan sa Oktobre ang ilang suweldo gikitnan na usab ug tag kinientos ka pesos bisan ug walay pagtugot o hustong authorization sa mga hingtungdang magtutudlo.

Tungod niini gipasalig ni Board Member Edionar Zamoras nga andam niyang ipatawag ang district supervisor alang sa usa ka imbestigahon atubangan sa mulo ug reklamo sa mga magtutudlo sa Sindangan Central School sa lungsod sa Sindangan.

Kini human niya mabate ang reklamo sa usa ka magtutudlo nga na-interview ni Mar Uy ug nabalita sa DXFL Headline Balita nga nagtumbok kang District Supervisor Ortega nga mikida sa suweldo sa mga magtutudlo nga walay pagpaninghid ngadto sa hingtungdan.

Si Zamoras nagkanayon nga iyang hulaton ang maong reklamo nga madangat sa iyang buhatan kay andam kini niyang himoan ug imbestigasyon ug ipatawag ang hingtungdang district supervisor arun mahimoan ug tukmang aksiyon. 

Si Dr. Lourdes Ortega nga mipadangat ug sulat/tubag ngadto sa Kasayuran Program sa DXFL ni Board Member Zamoras mipatin-aw nga wala siya magpataka ug kuha sa kuwarta sa mga lending. “Ang nahitabo nga pagkuha ug tag P500.00 per teacher atong miaging bulan, kadto tungod sa mga hangyo sa kadaghanan ilabi na kadtongt gagmay nala’g sukli sa lending kay dili naman sila maka-amot. Duna pay uban dagk0dagko na ang sukli pero duna pod silay gipanggahinan nga lain kay dili man gayud kahatag sa mga alamutan.”

“So, problema kaayo kay ang mga kalihukan dili man kapugngan. Mao nga nagsabot mi nga ang among buhaton mao nalang gayud ang akong pagpakaulaw ug hangyo sa mga lending nga ilang apilan. Wala ko kahibalo nga duna na diay mga upat sa ila nga nakahatag na dihang naghangyo kog tag P500.00,” maoy pagpasabot ni Dr. Ortega.

Dugang niyang gipahayag nga nagdulong ang mga kalihukan sa eskuwelahan busa wala siyay kadangpan gawas sa pagpangayo ug amot sa mga magtutudlo. Kay wala man silay ‘cash’ nga ikahatag, diha nalang sa lending gipaagi.

Atubangan sa katin-awan ni Dr. Ortega, gipahayag ni Bokal Zamoras nga iya gihapon himoan ug legislative inquiry ang maong reklamo sa higayon nga madangat na sa iyang buhatan kay lihitimo ang mulo sa mga magtutudlo. (The New Nandau, Vol. XVIII No.16)

 

Lungsod sa Polanco ipailawom sa Lando-BIBO

Gisugdan na kaniadtong miaging semana ang sunod-sunod nga pag-organisa sa mga kabarangayan sa lungsod sa Polanco, ning probinsya ilawom sa LANDO-BIBO program, human aprobahi ni Gober-nador Lando Yebes ang usa ka resolusyon sa Sang-guniang Bayan sa maong lungsod nga naghangyo sa kagamhanang probinsiyal nga ipailawom ang maong lungsod sa LANDO-BIBO.

Atol sa panagtagbo niadtong nakalabay semana tali ni CDAU Unit Head Rony Pacilan ug Mayor Anacleto Olvis, Jr. uban sa 30 ka mga barangay capitan sa maong lungsod, gihulad niini ang mga schedule alang sa sunod-sunod nga organizing sa 30 niini ka mga barangay.

Niadtong Biyernes ang unang adlaw sa pag-orga-nisa gipahigayon didto sa Barangay Dansullan ug Dange ug sa pagka Sabado kini gipahigayon sa Isis ug Villahermosa dayon gisundan sa mga barangay sa Litapan ug Labrador.

Si Rony Pacilan, pangulo sa CDAU ang mibutyag nga duha ka mga teams sa iyang buhatan ang iyang gitahasan nga mopahigayon sa orientation sa mga molopyo niini, ug aron nga hingpit nga mapasabot gayod ang mga programa ug katuyoan sa administrasyon sa probinsiya diha sa pagtabang sa mga kabos.

Matod pa ni Pacilan nga ang maong grupo gipangluhan nila ni Titus James Obido ug Geronimo Patangan Jr., nga pulos mga beteranong facilitator sa CDAU diha sa natad sa organizing ug orientation. Giklaro sa maong opisyal nga ilang gisiguro nga masabtan gayod sa mga katawhan ang programa nga LANDO-BIBO ug ang mga benepisyo nga dala niini.

Matod pa ni Pacilan nga atol sa panagtagbo tali kaniya ug mga opisyales sa maong lungsod sa pagpa-ngulo ni Mayor Olvis, gipa-dayag niini ang pagdawat ug ang pagpabati sa ilang kali-pay nga nahidangat na sa ilang lungsod ang maong programa.

Lakip sa gipasalamatan sa maong mga opisyal mao sila si Cong. Cely Jalosjos Carreon sa unang distrito, board member Jun Cabigon ug Bullet Jalosjos sa unang distrito nga maoy mirepre-sentar sa ilang lungsod diha sa pagpangayo gayod sa maong programa.

Dugang pa ni Pacilan nga sa unang adlaw pa lang sa orientation program diha sa duha ka mga barangay sa Dange ug Dansullan ug Isis ug Villahermosa kini gidugok na sa mabagang hut-ong sa mga katawhan nga dugay na nga naghuwat sa maong programa.PIC

 

‘PEGSALABUK-AN FESTIVAL’
Gisaulog mga Lumad sa Diongan

Jose Dalman, ZaNorte- Mokabat sa 145 ka mga miembrong subano ang mahinangpog mipahigayon sa ikatulo nga Pegsalabuk-an Festival, ang tinuig nga pagpahigayon, isip pasalamat ug panaghiusa sa mga katawhang subanen didto a Sityo Diongan, Barangay Siparok, lungsod sa Jose Dalman niadtong Nobyebre 9, 2008, adlaw nga Domingo.

Si Timuay Mario Tiong, pangulo sa Diongan Indigenous People’s Association kon DAPI sa maong barangay ang malipayon nga midawat usab sa mga bisita niini pinanguluhan ni Mr. Rony Pacilan, pangulo sa Community Development Assistance Unit kon CDAU nga maoy nagdumala sa LANDO BIBO.

Si Timuay Tiong atol sa iyang pag-abli sa maong programa ang mipahibawo sa kalampusan ug kahiusahan sa iyang mga kaigsoonang subano sa maong dapit, ug ang kaasgot sa ilang grupo nga padayon nga moobserba sa maong ‘Pegsalbuk-an’. Diin matod pa niya ang maong pulong nagpasabot sa kahiusahan.

Gipahalipayan usab ni Timuay Tiong ang mga opisyales sa National Commission for Indigenous Peoples kon NCIP nga gipanguluhan ni Pedro Gumalal, sa probinsiyaol nga buhatan, Edgar Gumanas sa Sindangan District ug Clarita Timbasal. Lakip usab nga mitamong mao si Bai Cristena Andus, sa PIPCU sa buhatan sa Gobernador.

Si Rony Pacilan, atol sa iyang pamulong ng mipaabot sa plano sa gobernador nga ipailawom sa healthcare aid program ang mga kabus nga mga kaigsoonang subano, pinaagi sa LANDO-BIBO initiative. Matod pa niya nga ang kasamtangan nga pamunoan diha nakasentro sa pagtabang sa mga lumad, ilabi na sa ilang panginabuhi ug panglawas.

Iyang gipasabot nga ang gobernador, kansang kasing-kasing ug hunahuna iyaha sa dugong subano, tungod kay siya aduna may kaliwatan niini ang mituyo karon sa pagmugna ug linain nga buhatan sa PIPCU aron maoy motutuk sa mga problema sa mga lumad nga pamilya dinhi sa tibuok lalawigan.

Sa pikas bahin si Pedro Gumalal sa NCIP ang malipayong midasig usab sa mga kalampusan nga naangkon sa DIPA, diin siya nagtan-aw gayud gikan sa sinugdanan. Matod pa niya nga angayan nga mobangon ug mo-abante na ang mga kaigsoonang lumad dinhi sa lalawigan aron nga mapa-tunhay ang pagpalambo sa ilang panginabuhi.

Si Cristena Andus , ang PIPCU coordinator sa pikas bahin ang midasig usab sa pamilyang lumad sa maong barangay nga dili magmakuli sa pagduol sa iyang buhatan aron nga kahatagan ug tabang sa probinsya.

Mitambong usab sa maong kalihokan si Timuay Labi Diolito Tigon sa lungsod sa Jose Dalman ug uban pang mga lideres sa pundok lumad dinhi sa lalawigan.PIC

 

Dipolog dili financially sound

Milutaw karon nga apike ang panudlanan sa dakbayan sa Dipolog nga nagsalig kanunay sa pag-abot sa Internal Revenue Allotment para makabayad kini sa iyang binuwan nga obligasyon ilabi na para sa suweldo sa mga regular employees sa city government.

Gikonpirmar mismo ni City Treasurer Sancen Caroro nga nadilatar ang ilang paghatag sa suweldo karon sa ilang mga regular employees sa city hall kay wala pa moabot ang IRA nga maoy ilang kuhaan sa gikinahanglang pundo.

Pipila ka mga local finance officers sa nagkadaiyang kagamhanang local sa ZaNorte mipahayag nga ang tanang mga LGU’s nagsalig gayud sa IRA para pagbayad sa suweldo sa mga kawani niini kada buwan ug sa ubang mga obligasyon.

Apan kadtong mga kagamhanang local nga nagbatun ug mga savings bisan dili pa moabot ang alokasyon sa IRA kada buwan makahimo sa pagbayad sa suweldo sa iyang mga empleyado pagahulipan lang unya pag-abot na sap undo.

Ang matuod nga kahimtang sa panudlanan sa Dipolog padayon karong gitabunan para dili makita sa mga mata sa publiko apan nagpasulabi ang pagtuo sa kadaghanan nga ang siyudad naglisud karon sa iyang panalapi pinasikad sa pipila ka mga timailhan sama sa langay nga paghatag sa benepisyo sa mga kawani ug karon ang pagdilatar sa paghatag sa suweldo kay gihuwat pa nga moabot ang alokasyon sa IRA.

Sa kabahin sa kagamha-nang probinsiyal giklaro ni Governor Rolando Yebes nga walay ikabalaka ang mga kawani niini bisan ug malangay ang pag-abot sa alokasyon sa IRA sanglit adunay daghang pundo ang lalawigan nga anaa sa bangko nga mamahimong magamit para sa paghatag sa ilang suweldo ug mga benepisyo.

Ang Internal Revenue Allotment sa ZaNorte maoy naglangkub sa 80 porciento sa total income niini ug ang 20 porciento gikan sa local sources.

Matud pa ni Governor Yebes ang probinsiya sa ZaNorte dili maglisud sa paghatag sa suweldo sa iyang mga kawani tungod kay nagbatun kini ug dakung cash deposit diha sa bangko nga puede magamit sa provincial treasurer ug pagahulipan lang pag-abot sa IRA.

Sa pinaka ulahing COA report nagpakita nga ang ZaNorte nabutang sa ika pito sa mga lalawigan sa tibook nasud nga nagbatun ug daku nga cash deposit diha sa bangko.

Si Ms. Rosevic Lacaya-Ocampo, Provincial Planning Coordinator sa ZaNorte mipahayag nga ang pundo sa probinsiya nga nakadeposito karon sa bangko kuwarta kini nga gigahin na sa nagkada-iyang mga proyekto ug balayronon nga obligasyon uban sa thrust fund apan anaa gibutang sa bangko kay wala pa moabot ang panahon nga kini gamiton.

Sa report sa COA matud pa ni Ocampo ang ZaNorte ika pito sa pinaka daghan ug cash deposit sa bangko nga mokapin sa P800 milyones ka pesos. (Press Freedom, Vol. XXI No.3)

 

Ay Maring, “it is our fault”

Sen. Barack Obama is making history in U.S.A. . The 44th president and an African American. Dunay posibilidad ang White House pinoy-anan sa mga presidenti sa U.S.A. mahimong Black House.

Pililiay sa U.S.A. niadtong Nov. 4 nakapagamating pa sa tugnaw sa atong COMELEC ugmga dagko ug gagmay’ng opisyales sa maong buhatan. Pag tak-op o closing sa piniliay, gitaho gilayon ang napiling presidenti. Walay mani-obra sa taga COMELEC gihimo pagtapok sa mga “election returns” dayon gi-asin-asinan, gidoktoran sa hospital sa kongreso, ayha gihimo ang “counting of ballots”.

Nakapa paminghoy ang piniliay sa U.S.A. kang PGMA nga napili si Obama pagka presidenti nga walay sagol “Hello Garci” ug Jocjoc Bolante, ang mga magikero sa salapi binilyon nga alang ipalit fertilizer nga gigasto ni PGMA sa piniliay.

Matod pa sa usa ka Sikihodnon sa iyang kumare: Ay Maring, “it is our fault” baya gyod. Panahon sa “election our politico-negosyo mo give man god ug something”. Di diya roy masabot, “we sold atong boto” kay makabongol “the ringing of their money” bisan unta sila “we know” dili “qualified” sa maong “Position” di ba Maring?

Karon gihisgotan sa Tang-an sa COMELEC nga namalit computer, pag computerized sa piniliay karong 2010. Giklaro na gyod nila nga ang unang gipamalit, pamulsa lang, pamutirik sa kaugalingon nga gipalit nga pulos puyay basta na lang malugwa ang salapi nga gikinahanglan sa bulsa.

Sa ato pa magpagasto na usab ang COMELEC laing binilyong pesos ipalit computer. Laing, sumpay binilyong pangurakot, sa bag-ong nahapoli ni kanhi bagni sa daghang bikil COMELEC Chairman Abalos. Nay kahimanan pag computerized sa piniliay karong 2010, dan ipadayon ang tema sa administrasyon nga, “cooperative with the virus of graft and corruption of the country.

Wala pa gani mahurot makuha ang natanggom mga pasaheros sulod sa Princess of the Star nga nakulob, nasigundohan dayon sa pumpboats de pasaheroan sa Masbate ug Iloilo. Mao gihapon ang findings. Daling nalunod sa balod gumikan sa overloading. Nagpasabot nga kulang tawo ang hingtongdang sa atong mga pwerto nga makabadlong nianang overloading sa mga sakiyanan sa kadagatan. Kon ugaling igo sila ug diha sila nay “question mark” ilang pag serbisyo.

Usab Public Knowledge, naka overloading sa mga sakiyanan sa kadagatan ang mga pasahero nga libre pasahi sa mga hinatagan passport sa taga Coast Guard, Bureau of Custom, Port Area In-Charge, ahenti sa opisina sa mga barko ug sa mga bagni opisyales sa local government officials. Kini intawon nga nalibre sa passports labing makalolooy kon malundag ang barko, mangamatay o maangol walay madawat bisan usa ka dako. Wala sila giapil sa listahan sa mga pasahero nga nakapalit tikit pasahi. (Press Freedom, Vol. XXI No.3)

 

Med School gitinguha ni Gov nga matukod sa probinsya

SA panglantaw nga makahatag ug dugang kaayohan sa mga katawhan dinhi sa Zanorte, gitinguha karon ni Governor Rolando Yebes nga matukod ang School of Medicine dinhi sa atong probinsiya pinaagi sa mga dagkong unibersidad dinhi sa Pilipinas.

Sa nasayran gikan sa atong gobernador nga sa karon nakig-negotiate na siya sa Silliman University sa Dumaguete ug Ateneo de Zamboanga. Gusto ni Governor Yebes nga pinaagi sa maong tulunghaan magtukod kini ug School of Medicine dinhi sa atong lalawigan.

Matod pa ni Governor Yebes nga dili na kinahanglan pang mo-adto sa mga dagkong lugar aron adto magtuon ug medisina hinungdan nga makagasto kini ug dako. Kung ania na kini dinhi sa atong lalawigan gamay na lang ang gasto sa usa ka tinun-an. Gawas pa, makabaton na usab ug daghang doctor ang Zanorte Medical Center.

Dako kaayo ug kahigayunan nga anha kini matukod sa lungsod sa Katipunan. Suportado usab sa mga opisyales sa lungsod pinaagi ni Mayor Cris Eguia ang maong tinguha sa gobernador. Abri ang kagamhanang lokal sa Katipunan sa maong katuyuan. (Southpoint, Vol.1No.45)

 

Panagtigum sa mga VPAs gipahigayo 

Aron mapahingusgan pa ug mapalambo ang Volunteer Probation Aide (VPA) program sa Parole and Probation Administration sa Department of Justice, 50 ka mga Volunteer Probation Aides (VPAs) nga gikan sa nagkalain-laing parte ning probinsya ug duha ka syudad sa Dipolog ug Dapitan ang motambong sa Regional Convention for VPAs sa Liga City ug Pagadian City karong Nobyembre 25-26, 2008.

Ang maong panagtigom sa mga VPAs basi kini sa Orden Ehekutibo No. 468 ni Presidente Gloria Macapagal Arroyo nga nagtumong nga mapalambo pa ang pakiglambigit sa mga VPAs sa comunidad ug partisipasyon sa pagsumpo sa mga krimen, pag himong saktong lakang pag matuto sa mga nahisalaag ug tukmang administrasyon sa Criminal Justice System.

Dinhi sa probinsya, aktibo na nga mipadayag sa ilang partisipasyon sa conperensya ang Heads of Office sa ZaNorte Cluster, mga presidente sa ZaNorte Volunteer Probation Aide Association, Dipolog “Orchid” Probation Aide Association ug Dapitan Shrine Volunteer Probation Aide Association.

Kahibaloan nga ang tema, sa maong conperensya mao ang Volunteer Service: A choice and a responsibility. (Southpoint, Vol.1No.45)

 

 

 

NOTE: SEND US YOUR NEWS.  Tell us what's going on in your barangays, clubs, schools, businesses and non profit organization. You can also send notices and announcements.
          

 

    Email to webmaster@dipolognon.com

      
Google
WEB THE DAILY DIPOLOGNON
 

THE DAILY DIPOLOGNON
DIPOLOG CITY, PROVINCE OF ZAMBOANGA DEL NORTE PHILIPPINES
www.dipolognon.com www.dipolognon.net  www.dipolognon.org  Keyword: dipolognon
www.dipologcity.com  www.dipologcity.net  www.dipologcity.org  www.dipolognon.com  www.dipolognon.net  www.dipolognon.org    www.dipolog.org  www.dapitan.com   www.eartajo.com  www.cagayandeoro.us 
www.artajo.us www.artajo.info www.eddie.artajo.name www.zamboangadelnorte.com  www.zambonorth.com  www.pagsalabuk.com  www.dipolog.biz www.artajo.biz  www.plasticextrusion.us www.cebu.org
www.davao.us  www.tagum.com  www.giscard.us  www.pagadiancity.com www.malaybalay.net  www.ozamis.com  www.tangub.com  www.oroquieta.net
 www.nabunturan.com www.znuc.org www.znch.ph
www.gingoog.com  www.ozamiz.us www.general-santos.com  www.surigao.net  www.kidapawan.com  www.iligan.us www.raelene.us  www.cagayan-de-oro.com   www.mutyasadipolog.com   www.twinzel.com
 
www.zamboanga.net   www.palmbeachgardens.us   www.islandgarden.net  www.cotabato.net  www.tacurong.com  www.butuan.us  www.pagadian.com  www.dipolog.us
www.zamnai.com
www.dipologhotels.com
   www.dipologpress.com  www.dipologsardines.com   www.extrusion.us www.ozamizcity.com  www.marawi.net www.dipologchamber.com   www.twinzeldipolog.com

Copyright©2008 by The Daily Dipolognon All Rights Reserved  PRIVACY POLICY & DISCLAIMER
Email : webmaster@dipolognon.com  Since October 18, 2000