2

November 22  2007

 

Mga opisyal sa barangay kaalyado sa APP maoy priority Nga programa sa probinsya

Himaya ang mga opisyal sa barangay nga nahimong kaalyado sa Alliance of Parties for Progress kon APP kay maoy priority sa mga programa ug proyekto nga ipatuman sa kagamhanang probinsyal. Kini ang walay lipod-lipod nga gipadayag ni Governor Rolando Yebes atubangan sa mga kapitan, konsehal ug SK sa mga lungsod sa Roxas ug Jose Dalman nga gikontra sa ilang mayor.

Matud ni Governor Yebes, dili mabalaka ang mga kapitan nga dili ila ang mayor kay siya nga gobernador, maoy mayor sa lungsod nga andam motabang unsa ang panginahanglan. Ang gobernador nagkanayon nga sa iyang ikaduhang termino, iyang tabangan ang segundo distrito nga mouswag ug molambo ilabi na sa mga lungsod nga ang mayor dili kaalyado sa APP aron dili mabiyaan sa mga kalamboan. Matud niya, wala na siyay problema sa una ug ikatulong distrito kay nagtambayayong sila sa mga kongresista.

Sumala pa ni Governor Yebes nagbuhat siya karon ug balance fleet ug kini exclusibo lamang gamiton sa mga lungsod sa segundo distrito ilabi na sa mga kapitan nga nagpasilong sa iyang bando. “Mipalit ko ug lima ka dumptruck, usa ka pizon, usa ka buldozer ug uban pang kahimanan para sa segundo distrito. Wala laing makagamit niana, kadtong mga kapitan ug mga kagawad nga ako ug ato nga motabang para sa atong grupo.” Matud ni Governor Yebes sa unang panahon wala siyay gipihig sa mga bara-ngay nga iyang gitabangan apan ang mao niyang pasensiya miupos sa dihang iyang nakita ang ubang kapitan nga mibalingbaling sa pikas gumikan kay nawong ug kuwarta.

“Sa una miingon ko ninyo wala koy gipihig, tanan akong gitabangan pero humana. Nakit-an na nako ang mga hiyas sa mga kapitan nga dali rang mobali ug makadungog ug tagingting sa salapi,” prangka nga gipadayag sa gobernador. “Ang ako karon, kuyog ug kauban. Atong mapakita karong sunod panahon, inig sugod na sa atong ABC president eleksiyon kon kanang mga kapitan nga atong kauban karon motabang ba gayud sa atong pilion nga ABC federation president o kaha SK federation president para sa atong balay lungsod.”

Sama sa gipahayag ni Vice Governor Olvis nga wala sila magsalig sa segundo distrito, si Governor Yebes nagkanayon nga bisan ug dili motabang ang segundo distrito sila dili gayud mapildi kay anaa solido nga nagsuporta kanila ang permero ug tersero distrito. “Ang ako lamang gitan-aw kaninyo, ang inyong kinasingkasing nga pagtabang sa atong grupo kay ugma damlag kamo ra gihapon ang mabulahan nianing akong pagabuhaton sa segundo distrito.” Matud pa ni Governor Yebes, ang ubang politiko sigi pang saad unsang proyekto nga ihatag sa barangay apan samtang sigi pa silang saad, siya nagtrabaho na. “Samtang sigi pa silang saad, ako gatrabaho na, ako nang gihuman ang akong mga proyekto.”

Sumala sa gobernador dili madani ug mahaylo ang mga opisyal kon saaran kini ug politiko nga mohatag ug proyekto. “Timbanga ninyo ang akong mga proyekto sa ilang saad.” Hinoon giawhag ni Governor Yebes ang mga kapitan nga kon ang kongresista o mayor mohtag ug proyekto kini ilang dawaton kay ang salapi nga gigamit niini gikan sa buhis sa mga katawhan. Apan iyang gipahimangnoan nga kon modawat man ug pro-yekto gikan sa congressman o mayor nga dili kauban sa APP, “basta walay bolok sa politika dawata ninyo ang ilang gisaad.” Aminado ang gobernador nga ang politika seloso kaayo busa dili gayud magpadala sa haylo nga dili kauban sa bando.

Gipasalig usab ni Governor Yebes nga iyang tabangan ang Sanguniang Kabataan nga kaniadto daw nahimo lang tawo-tawo sa barangay kay walay budget, apan karon apil na kini na sa iyang programa. Matud sa gobernador, iyang tabangan ang Sanguniang Kabataan nga makalihok ug makahimo sa ilang programa bisan pa kon dili ila ang kapitan ug mayor kay andam kini niyang agakon pinaagi sa mga programa sa YES, kon Youth Enhancement Support. (The New Nandau, Vol. XVII No.19)

 

Marathon budget hearing sa SP daghang mipalta

Nakita karon nga daw dili interesado ang ubang mga meyembro sa Sangguniang Panlalawigan sa Zamboanga del Norte sa pagtuki sa budget sa probinsiya para sa sunod tuig kay daghang absent.

Kagahapon sa pagpadayon sa marathon nakighinabi sa mga mitambong nga board members nga kinahanglan ilang amendahan ang ilang internal rules nga kadtong mga bokal nga dili motambong sa marathon budget hearing ikonsiderar nga absent.

Sa nasayran bisan ug dili motungha ang mga bokal sa marathon budget hearing gikonsiderar nga sila present ra gihapon sanglit igo lamang nagrecess ang Sanggunian nga gihimong usa ka komitiba sa kinatibuk-an diha na sa pagtuki sa executive budget sa gobernador para sa tuig 2008 sa matag tak-op sa ilang session pagka hapon.

Kagahapon ang mitungha mao sila si Board Member Felixberto Bolando ang majority floor leader, Board Member Edgar Baguio ang minority leader ug sila si Board Members Norbidieri Edding, Cedric Adriatico, Fernando Cabigon, Jr. ug Ismael Arasam. (Press Freedom, Vol. XX No. 5)

 

KAPITAN PATANGAN GIHULGA SA MGA BARANGAY KAGAWAD
SA DIWAN NGA SABOTAHION IYANG ADMINISTRASYON

Gibaharan karon ang bag-ong napili nga barangay chairman sa Diwan, Dipolog City nga sabotahion sa iyang mga barangay kagawad ang iyang administrasyon aron dili makalihok. Si Diwan Barangay Chairman-elect Nathan Patangan mipahayag nga wala siya mahadlok sa maong bahad sa mga barangay kagawad nga kaalyado sa administrasyon sa dakbayan sa Dipolog sa ilang mga pagpanghadlok kon unsay dangatan sa iyaha unya nga administrasyon.

Sa nasayran walay bisan usa sa kauban niyang kandidatu pagka barangay kagawad ang nakalusot sa bag-ong gitapos nga eleksiyon sa barangay. Ang mayoriya sa mga napiling barangay kagawad sa Diwan matud pa ni Kapitan Patangan kaalyado sa city hall ug nakita na niya daan nga gamiton gayud sila para lisud-lisuron iyang administrasyon. Apan iyang giklaro nga wala kini makapabalaka kaniya kay iyaha na kining gipangandaman sa unsa nga paagi nga makahatud gihapon siya sa gipangitang sirbisyo ug mga proyekto nga maoy gipangayo sa mga katawhan sa Diwan bisan ug dili mosuporta kaniya ang ilang mga konsehal.

Sa nasayran gisultihan na siya daan nga kon si kinsa man ang itudlo niyang barangay treasurer dili nila ikonpirmar sa Sangguniang Pambarangay. Matud pa ni Kapitan Patangan wala siya mahadlok niini kay kon ang barangay wala gayuy barangay treasurer kay dili ikonpirmar sa Sangguniang Pambarangay wala usay madawat nga honorarium silang mga opisyales sa barangay. Giklaro daan ni Kapitan Patangan nga andam siya mosirbisyo sa mga katawhan sa Diwan bisan walay dawaton nga honorarium.

Gibaharan usab ang bag-ong kapitan sa Diwan nga dili mopanday ug resolusyon ang ilang konseho kon unsa may pangayuon niining mga proyekto. Sumala pa niya sayun ra kaayo pagpangita ug lusot diha na sa pagkuha ug mga proyekto gikan sa nasudnong kagamhanan ilabi na sa kagamhanang probinsiyal nga wala na magkinahanglan ug resolusyon gikan sa Sangguniang Pambarangay. Gawas niini ang mga kagawad sa Diwan nga kaalyado sa city hall mibahad usab nga kon magpatawag si Patangan ug session moboykot sila dili motungha.

Sumala pa niya dili session iyang himoon kon dili barangay assembly diin mga katawhan sa Diwan gikan sa nagkadaiya niining mga sitio ang iyang tapokon ug pahibaw-on unsay iyang mga plano, programa ug gusto nila nga mga proyekto ug sa samang bahin iyaha usab nga pangutan-on unsay programa ug proyekto nga gusto sa mga barangay kagawad ug iyaha kining paaprubahan sa tanang katawhan sa Diwan sa pagahimoon niyang barangay assembly.

Samtang gibutyag usab ni Kapitan Patangan nga ang nag-unang kagawad sa Diwan nagpalakaw na ug bakak nga istorya aron sa paglansis sa mga katawhan sa ilang barangay nga siya maoy molingkud pagka chairman kay nagsugod na daw ang recount ug pildi si Natan ug walo ka botos. Ang bag-ong kapitan sa Diwan nagkanayon nga ang tanang posibilidad sa pagsabotahe sa iyang administrasyon iyaha nang gitun-an daan unsay lusot niini. (Press Freedom, Vol. XX No. 5)

 

GO GREEN ZANORTE ILUSAD SA SERGIO OSMEñA

Pormal nga ilusad ugmang adlawa Nobyembre 17, 2007 ang Go Green ZaNorte tali sa utlanan sa Zamboanga del Norte ug Zamboanga del Sur didto sa lungsod sa Sergio Osmena. Subay niini gidasig ni Governor Rolando Yebes ang tanang mga opisyales ug kawani sa kagamhanang probinsiyal sa ZaNorte sa pagsalmot sa Go Green ZaNorte Program. Si Governor Yebes mipatin-aw nga gipili niya ang paglusad sa maong programa sa lungsod sa Sergio Osmena kay anaa sa maong lugar nahimutang ang utlanan sa managsoon nga probinsiya ang ZaNorte ug Zamboanga del Sur.

Gidasig ang gobernador ang tanang mga kawani regular, casual ug contractual sa pagsalmut sa maong programa pinaagi sa pagtanum ug mga bongang kahoy subay na sa nasudnong dalan gikan sa utlanan sa duha ka lalawigan nga manukad sa tulay sa Salug Daku River. Ang nasangpit nga kalihukan pagapangunahan sa Zamboanga del Norte Environment Management Office o ZANEMO.

Si Atty. Jes Gal Sarmiento, Jr. ang hepe sa ZANEMO mipahayag nga maoy gusto sa gobernador nga ang ilang itanum sa Go Green ZaNorte mao ang mga bongang kahoy kay ilang nakita nga mas akatahan kini sa mga katawhan sa barangay sanglit pag-abot sa panahon nga kini mamonga ang mamahimong income niini mapaingon sa barangay. Sumala pa kon ang tanum nga bongang kahoy matunong sa usa ka panimalay nga maoy moakatar niini ihatag kanila ang katungod sa pagbaligya sa mamahimong bonga niini diin 70 porciento sa halin iyaha sa tagbalay ug bahinan sa 30 porciento ang kagamhanang barangay.

Ang mga bongang kahoy nga giplanohan nilang itanum subay na sa nasudnong dalan sulod sa ZaNorte naglangkub na sa mga longkong Lanzones, Mangosteen, Rambutan, Bangkok Santol ug uban pa alang sa mga 1st congressional district. Samtang maoy itanum usab ilawom sa Go Green ZaNorte sa 2nd district ang Mangga ug uban pang prutas nga moayon sa klima sa mga lungsod sulod sa distrito. Kini hangtud na sa utlanan sa ZaNorte ug Zamboanga Sibugay sa Barangay Gatas, Kalawit.

Gipasabot ni Governor Yebes nga ang Go Green ZaNorte maoy tampo sa kagamhanang probinsiyal sa paningkamut karon sa tibook kalibutan nga matubag ang problema kabahin sa global warming. Sa gihimong pagtuon sa mga environmentalist milutaw nga ang pagtanum ug kahoy maoy pinaka epektibo ug pinaka gamas ug gastu nga paagi sa pagkumbati sa global warming para mawagtang ang greenhouse gases nga maoy nakamugna niini gikan sa hinungaw sa tambutso sa mga sakyanan, planta ug paktorya ug uban pang tinubdan samtang ang kahoy maoy mosuyop sa carbon dioxide nga maoy nakaingon sa greenhouse gas nga anaa sa atong kawanangan nga maoy makapatangong sa kainit gikan sa adlaw imbes ibanda ra kini ug balik ngadto sa kawanangan gawas sa kalibutan.

Tungod sa naghinobrang carbon dioxide nga anaa sa atong kawanangan ang kainit sa adlaw nga mohapak sa kalibutan dili mabanda ug balik pagawas kay masangit sa gitawag ug greenhouse gases hinungdan nga nakasinati karon ug pagka usab ang klima sa kalibutan tungod sa kainit karon sa panahon. (Press Freedom, Vol. XX No. 5)

 

LIBRENG TAMBAL PARA SA KABUS PADAYONG GIPATUMAN

Gipasalig sa provincial health officer sa Zamboanga del Norte nga padayong gipatuman karon sa nagkadaiyang mga hospital sa lalawigan ang ordinansa nga nagmandu sa paghatag ug libreng tambal alang sa mga kabus nga pasiente nga maadmit sa tambalanan. Kini ang giklaro ni Dra. Carmencita Icao, atubangan sa pangutana ni Board Member Joseph Brendo Ajero nga nangumusta sa implementasyon sa nasangpit nga ordinansa nga gipangamahanan ni kanhi Board Member Uldarico Mejorada.

Sa samang bahin gipahibawo usab sa provincial health officer nga karong sunod tuig irehistro na sa PHILHEALTH ang mga meyembro sa LANDO BIBO. Sa pagka karon 70 porciento sa drugs and medicines sa mga hospitals sa probinsiya ang nahatag libre ilawom sa indigency program sa probinsiya nga wala gayuy nabalik nga income sa panudlanan sa lalawigan.

Apan ilawom sa PHILHEALTH, matud pa ni Dra. Icao ang kagamhanang probinsiyal adunay mahimong income ilawom sa capitation fund. Sa samang bahin gihisgutan usab sa provincial health officer nga ipa-sanitized ang mga meyembro sa LANDO BIBO aron sa pagsiguro nga ang mahimong meyembro niini mao gayud kadtong kabus sa tanang kabus sa atong lalawigan nga maoy angayang hatagan ug pagtagad sa kagamhanan ug busgon sa gipangita nilang sirbisyo. (Press Freedom, Vol. XX No. 5)

 

ZANORTE GOVERNMENT HOSPITAL IPA-ILAWOM SA UP-GRADING

Gikatakdang ipailawom karon sa upgrading ang pipila ka mga government hospitals sa Zamboanga del Norte sa tinguha nga kini makasirbisyo sa husto ngadto sa katawhan ug magamit sa husto ang sirbisyo sa mga doctor. Kini ang gipahibawo ni Dra. Carmencita Icao, Provincial Health Officer sa ZaNorte sa pagpanalipod niini sa ilang gipangayong budget para sa sunod tuig atubangan sa Sangguniang Panlalawigan.

Si Dra. Icao mitataw nga sa kasamtangan karon adunay kakuwangon sa gikinahanglang personahe ang mga government hospitals sa ZaNorte ilabi na sa doctor. Tungod niini gitahasan sila ni Governor Rolando Yebes sa pagbuhat ug Rationalization Plan diin pipila sa ilang mga proposal, matud pa ni Dra. Icao giaprubahan na sa gobernador diin ang kuwang niini mao na lamang ang pag-implementar.

Gibutyag sa provincial health officer sa ZaNorte nga adunay mga tambalanan nga ilawom sa pagdumala sa probinsiya nga giplanohan nilang himoon na lang nga Basic Emergency Management Obstetrical Cases o BEMOC nga ang modumala niini ug mopadagan sa iyang operasyon mao ra ang mga nurse ug midwife nga wala na magkinahanglan ug doctor.

Matud pa ni Dra. Icao ilawom sa maong lakang dili na maperwesyo ang probinsiya kabahin sa pagpangita sa gikinahanglang medical personnel sa usa ka hospital sa panahon nga mopahigayon ug pagsubay ang hospital licensing division sa Department of Health ug sa PHILHEALTH nga aduna gayuy tukmang gidaghanon sa doctor nga batunan sa usa ka hospital para mahatagan kini ug lesensiya sa pag-operate. Alang sa operasyon usab sa ZaNorte Medical Center, matud pa ni Dra. Icao nauyunan na nga ang probinsiya mosuhol gayud ug mga medical specialists aron maoy mangulo sa nagkadaiyang mga departamento sa hospital.

Sa pagkakaron adunay mga hospital sa ZaNorte nga usa ra ka buok ang nabiling doctor nga siguradong dili gayud makapasar sa licensing sa DOH busa ilang giplanohan nga kini maoy ikonbirtir na lang ngadto sa BEMOC. Samtang ang mga kasamtangan karong district hospitals himoong CEMOC o Comprehensive Emergency Management of Obstetrical Cases sama sa Pinan District Hospital.

Ang mga hospital nga himoong BEMOC pagadumalahon ra sa usa ka nurse apan modawat gihapon ug mga pasiente diin ang mga doctor igo na lang mobisita sa mga panahon nga adunay pasiente nga magkinahanglan sa ilang sirbisyo o kaha ang pasiente dalhon ngadto sa Medical Center. Sa samang bahin gibutyag ni Dra. Icao nga giplanohan usab nila nga ikonbirtir ang Sergion Osmena Hospital ngadto sa pagka drug rehabilitation center ilabi na nga ilawom sa mandu sa balaod ang Dangerous Drugs Act ang mga probinsiya gikinahanglan nga magbatun gayud sa susamang pasilidad.

Ang Sibutad Hospital himoong BEMOC ug ang bugtong doctor nga nagdumala niini ibalhin sa Pinan District Hospital. Samtang ang Rizal Memorial Hospital sa dakbayan sa Dapitan nga ilawom sa DOH ang himoong specialty hospital nga moatiman lamang sa mga kaso kabahin na sa problema sa mata o ophthalmologic cases. Samtang ang Manukan Hospital giplanohang himoong 25 bed o 50 bed capacity hospital aron maoy motubag sa pagsirbisyo sa mga katawhan sa kanait niining kalungsuran.

Ang Sindangan District Hospital magapabilin nga 75 bed capacity hospital, samtang ang Liloy nga ten bed capacity himoong 75 bed capacity hospital para mahimong district hospital, dugang pahayag ni Icao. Ang mga district hospital, gipatin-aw ni Dra. Icao pagailhon nga CEMOC o Comprehensive Emergency Management of Obstetrical Cases nga magbatun na ug ceasarean section. Matud pa ni Icao adunay mahitabong repositioning sa mga doctor kay ang ubang mga hospital sa probinsiya himoon na lang nga BEMOC nga wala na magkinahanglan ug doctor para sa operasyon niini.

Samtang sa ZaNorte Provincial Integrated Hospital, matud pa ni Dra. Icao kini nagbatun karon ug siyam ka mga doctor ilawom sa kontrata isip mga job order. Ilawom sa ilang kontrata ang mga doctor gikinahanglan lamang nga molugway sa ilang pagsirbisyo sulod sa 40 ka oras sulod sa usa ka semana dili sama sa mga regular doctors nga sulod sa 24 oras magduty.

Samtang si Board Member Anecito Darunday misugyot kon puede ba nga ang suhol sa probinsiya sa mga contractual nga mga doctor himoong P40,000 ang buwan para siguradong dili gayud mosibat aron mangita ug laing trabaho. Apan gitubag siya ni Dra. Icao nga kon kini maoy mahitabo daghan sa mga regular nga doctor sa probinsiya ang mamahawa ug makig kontrata na lang sa probinsiya kay mas daku sila ug madawat.

Sa samang bahin gibutyag sa provincial health officer sa ZaNorte nga sila karon nga mga health workers sa probinsiya nagdawat ug nagkadaiyang mga benepisyo nga wala madawat sa ubang mga opisyal ug kawani sa kagamhanang probinsiyal gikan sa laundry allowance, hazard pay ug uban pa. (Press Freedom, Vol. XX No. 5)

 

KASO BATOK MACLANG NAGPATONG-PATONG, PROMOSYON APEKTADO

Nagpatong-patong na hinoon karon ang mga kaso nga giatubang sa kanhi hepe sa Dipolog Police nga gusto sa mayor ug Obispo nga ibalik sa dakbayan. Kini ang gihulagway sa kasaligang tinubdan gikan sa Zamboanga del Norte Police Provincial Office sa Camp Hamac, Sicayab ning dakbayan sa Dipolog kabahin na sa estado karon ni Police Chief Inspector Reynaldo Maclang.

Gawas sa kaso nga gipasaka ni Mr. Joseph Herrera tungod sa gihimong pagsumbag kaniya ni Maclang adunay buwag usab nga reklamo nga gisang-at si Engr. Franklin Lim didto mismo sa Camp Crame ug laing petisyon nga gipadas-og sa Zamboanga del Norte United Correspondents nga gipadangat ngadto sa buhatan sa presidente.

Matud pa sa tinugyanan sa Camp Hamac gawas sa maong mga kaso nga giatubang karon ni Maclang ang pinaka bug-at niini mao ang nahitabong pagbuhi niya sa duha ka mga suspek nga armadong ug mga Granada nga unang nadakpan sa mga meyembro sa Dipolog Police. Kahinumduman girekomendar karon sa Provincial Investigation and Detective Management Branch sa Zamboanga del Norte Police Provincial Office ang pagpasaka ug kasong criminal ug administratiba batok kang Maclang tungod sa nasangpit nga insidente.

Nalakip na sa kasohan usab sila si Police Senior Inspector Isidro Sasuman ug Police Inspector Normal Dela Rosa tungod sa gihimo nilang pagdason sa illegal nga lihuk ni Maclang imbes ilahang pakgangon ang ilang hepe. Tungod sa maong mga kaso, gipatin-aw sa Camp Hamac nga apektado karon ang gitinguhang promotion sa rango ni Maclang. Giklaro sa Camp Hamac nga giaksiyon gayud nila ang nadawat nilang reklamo batok sa kanhi hepe sa Dipolog Police.

Sa sayu pa ang Camp Crame mipadangat ug suwat ngadto sa ZNUC nga gihimuan na nila ug kongkretong aksiyon ang gipadangat nga petisyon nga nadawat ni Presidente Arroyo batok kang Maclang. Sa imbestigasyon nga gipahigayon sa Camp Hamac milutaw nga si Maclang nakabuhat ug bug-at nga sala tungod sa gihimo niining pagbuhi sa duha ka mga suspek nga nagdala ug Granada nga sila si Edwin Dagpin ug Alexander Bondawog diin usa kanila ang wanted sa balaod.

Gihisgutan usab sa imbestigasyon sa Camp Hamac nga ang pagbuhi sa duha ka suspek adunay politika nga nagpaluyo sanglit ang sila si Dagpin ug Bondawog nailang mga bata-bata o goons sa kandidatu pagka mayor sa lungsod sa La Libertad nga kaalyado ni kanhi Mayor Roberto Uy sa Dipolog sa politika diin nagkauban sila sa nakalabay nga eleksiyon. (Press Freedom, Vol. XX No. 5)

 

DIPOLOGNON APIL SA NAKALAS SA BOMBING SA BATASAN

Usa ka Dipolognon ang nalakip sa nakalas sa nahitabong pagpamomba didto sa Batasan Pambansa kagahapon sa gabii. Ang biktimang Dipolognon naila nga si Maan Gale Bustaliño, staff member ni Congressman Pryde Henry Teves sa Negros Oriental. Nalakip na sa nakalas sa maong pagpamomba sa Batasan mao si Basilan Congressman Wahab Akbar ug driver ni Gabriela party-list Representative Luzviminda Ilaga nga si Marcial Tando.

Si Ilo-ilo Congresswoman Janet Garin nga usa usab ka doctor ug mitabang sa pag-aswat sa mga nasamdan sa interview sa television mipahayag nga si Bustallino namatay didto na sa Capitol Medical Center diin didto siya gidali ug dala apan paspas usab nga mi-deteriorate ang iyang mga vitals signs sa dihang gibalhin kini ngadto sa St. Luke’s Medical Center.

Samtang samdan usab si Congressman Teves sa nagkadaiyang bahin sa iyang kalawasan lakip na sa mga paso nga naangkon niini apan gideklarar sa mga doctor nga anaa na kini sa luwas nga kahimtang. Ang ubang nasamdan mao sila si Nulasiri Hayugini ug Denis Manila nga nagapabiling gitambalan sa New Era Hospital. (Press Freedom, Vol. XX No. 5)

 

KAPITAN PATANGAN MAOY NATIKASAN SA DIWAN, PROTESTA NI BAGARINAO IPA DISMISS

Gipadas-og karon sa Diwan Barangay Chairman-elect ang pagpa dismiss sa election protest nga gipasaka kaniya ni Letty Bagarinao sa rason nga wala kiniy igong basihanan kay napakyas kini sa pag-tataw o pag specify sa mga presento diin nahitabo ang limbong, vote buying o irigularidad nga iyang gialigar diha sa iyang sumbong. Kini ang unod sa gidusong tubag ni Diwan Barangay Chairman-elect Nathan Patangan pinaagi sa iyang abogado nga si Atty. Cres Palpagan.

Sa samang bahin mipasaka usab si Kapitan Patangan ug counter protest batok kang Bagarinao sa giduso niyang tubag diin gitataw sa napiling kapitan sa Diwan nga siya pa hinoon ang biktima sa tikas sa nakalabay nga eleksiyon. Sa tubag nga giduso ni Atty. Palpagan gitataw niini nga si Kapitan Patangan mas aduna pay katungod ug moral duty sa pagkwestyon sa botos nga nakuha ni Bagarinao tungod kay naangkon kini pinaagi sa grabing pagpanikas sa nakalabay nga eleksiyon gikan sa pagpamalit ug botos, paggamit ug puersa, violence, pagpanghulga sa mga botante ug meyembro sa Board of Election Tellers, pagsoborno sa military ug kapulisan nga maoy gihimo niining goons sama sa paghatag ug pagkaun, mainum ug kalingawan, paghakot sa mga botante sa ilang mga safe-houses ug ang pagsuway ug soborno sa mga personahe sa COMELEC para dugangan ang nakuhang botos ni Bagarinao.

Diha pa mismo sa presento si Bagarinao migamit na ug mga illegal nga pamaagi pinaagi sa pag-andam ug human daan nga mga peke nga balota ug election returns aron maoy iapil sa pag-ihap sa botos pabor kanila. Sa tubag ni Patangan dalang counter protest gialigar niini nga gisobornohan sa iyang kaatbang ug gibayaran ang mga meyembro sa Board of Election Tellers para mokooperar sa ilang mga watchers sa tanang mga presento sa Diwan gikan sa Precinct No. 0308-A; 0310-A/0310-B; 0311-A; 0312-A; 0312-B; 0313-A; 0314-A/B; 0315-A ug 0316-A.

Matud pa ni Patangan maklaro gayud nga gidugangan sa resulta sa eleksiyon tungod kay ang gidaghanon sa mga botos nga nakasuwat sa numero ang milabaw kay sa nakuhang botos nga gisuwat sa pulong ug sa mga tallies. Sumala pa aron sa pagsiguro nga ang kuwarta nga gihatag makonbirtir gayud sa botos ang iyang kaatbang ug ang mga money baggers niini uban sa mga watchers ang nagkakonsabo sa pag-andam ug mga timailhan diha sa balota.

Sa iyang giduso nga counter protest si Kapitan Patangan mikwestyon sa pag-ihap sa mga botos pabor kang Bagarinao sa nahisgutan nga mga presento sa unahan kay kini produkto sa pagpanikas sa eleksiyon. Matud pa ni Patangan kon iphon ug balik ang mga balota magpakita nga si Bagarinao nakakuha lamang ug 535 botos ug dili 696 botos. Samtang ang botos nga nakuha ni Patangan kon iphon ug balik ang mga balota sa tanang presento sa Diwan magpakita nga nakakuha siya ug 723 botos diin aduna siyay labaw 188 botos ug dili dos botos lamang batok kang Bagarinao.

Alang sa bag-ong kapitan sa Diwan ang gihimo sa iyang kaatbang usa ka basiyo nga pagpanagat lamang diha sa pagpangita ug mga ebedensiya. Tungod sa maong protesta matud pa ni Patangan nakagastu siya karon sa pagsuhol ug abogado hinungdan nga mangayo siya ug danyos nga mokabat sa P100,000.00. Si Atty. Palpagan mitataw nga wala gayuy cause of action si Bagarinao sanglit ang gipasaka niining protesta napakyas sa pagklaro asa nga presento nahitabo ang limbong, vote buying o irigularidad.

Matud pa ni Atty. Palpagan sa disisyon nga gipakanaug sa korte suprema gihisgutan niini nga kinahanglan ang usa ka election protest motumbok gayud asa nga presento nahitabo ang tikas, vote buying ug irigularidad ug pila ka botos ang gikinahanglan para makasiguro ang nagprotesta nga siya maoy madeklarar nga mananaug. Ang korte suprema sa iyang disisyon mitataw nga kon ang petisyon mapakyas sa pagpakita sa maong mga requirements ug mapakyas sa paghisgut unsay cause of action kini angayang idismis gilayon.

Pila ka botos sa particular nga presento ang gusto ipa ihap nila ug balik ug pila ka botos nga kon maihap makapa usab sa resulta sa eleksiyon nga mopabor kanila para ianular ang proklamasyon ni Patangan. Pinasikad niini gipadas-og ni Patangan ang pagdismiss sa maong protesta ni Bagarinao. (Press Freedom, Vol. XX No. 5)

 

MGA PROYEKTO SA GOBERNADOR NGA DILI DAWATON SA
UBANG BARANGAY SA DIPOLOG IHATAG SA DIWAN

Walay supak ang gobernador kon itipas ang gigahing mga proyekto sa kabarangayan sa dakbayan sa Dipolog ngadto sa Barangay Diwan kon pabiling dili modawat ang mga barangay kapitan sa proyekto gikan sa probinsiya. Kini ang gipahayag ni Governor Rolando Yebes, atubangan sa gihimong pagbalibad sa mga kabarangayan sa Dipolog sa pagdawat sa gihatag nga proyekto gikan sa kagamhanang probinsiyal.

Matud pa ni Governor Yebes kon dili gayud sila modawat sa proyekto gikan sa probinsiya adto kini niya ihatag sa Diwan sa administrasyon karon ni Barangay Chairman-elect Nathan Patangan kinsa mipadayag sa dakung interest sa pag-angkon sa mga proyekto ug programa gikan sa kagamhanang probinsiyal sa ZaNorte nga gitagana para sa katawhan. Angayang kasayran nga pipila ka mga proyekto nga gipadas-og ni Governor Yebes sa nagkadaiyang barangay sa Dipolog ang wala ipadawat sa mga kapitan.

Gituhuan nga kini pinasikad na sa mandu gikan sa city hall nga ang tanang proyekto gikan sa probinsiya dili ipadawat lakip na sa gipatuman niining mga programa. Pipila niini mao ang covered court sa Barangay Biasong nga gipahunong sa city hall ang construction, drainage canal sa Sta. Isabel nga wala dawata sa kapitan, tubo sa tubig para sa water system sa Barangay Punta gipatangtang sa konseho sa barangay, kongkretong foot bridge sa Sta. Filomena tabuk sa Fishermen’s Village gipaundangan kay city hall ra mokonstrak diin nagbuhat ug kawayan nga taytayan ug daghanan pang uban.

Tungod niini ang gobernador nagkanayon nga kon ang Barangay Diwan andam modawat sa mga proyekto gikan sa probinsiya ang tanang nakapahat para sa Dipolog adto niya ibuhos. Sa sayu pa si Kapitan Patangan mibutyag sa Radyo Ronda-DXKD nga sa iyang pagsugod ug lingkud sa gahum sugdan usab niya ug dala ang gipangitang mga proyekto sa katawhan sa Diwan nga gihikaw kanila sa kagamhanan.

Gipahibawo ni Kapitan Patangan nga maoy giuna niya karon ang pagkomponi sa ilang mga barangay road diin ang probinsiya mipahat ug P300 mil pesos alang niini, laing tunga sa milyon ka pesos usab nga pundo para sa ilang water system sa barangay ug ang pagpalig-on sa ilang Hi-Green Program. (Press Freedom, Vol. XX No. 5)

                                                       

ZANORTE NAGMUGNA TASK FORCE PAGSUBAY SA MGA PROPERTIES SA LALAWIGAN

Usa ka task force ang gimugna karon sa gobernador pinanguluhan sa Provincial Attorney sa Zamboanga del Norte sa tinguha nga subay ang tanang properties sa probinsiya nga hangtud karon wala pa gihapon makabatun ug titulo. Si Governor Rolando Yebes, mibutyag nga ang ubang kayutaan sa kagamhanang probinsiyal nagbatun ug mga papeles apan ilaha kini karong gipangita asa gibutang o gihipos sa kanhi namunuan sa lalawigan.

Maoy iyang mandu nga patituluhan na gayud ang tanang mga kayutaan sa lalawigan para mabutang na sa pangalan sa Zamboanga del Norte para dili na magka problema sa umaabot nga mga panahon. Wala isalikway sa gobernador ang posibilidad nga hayan adunay mga sumosunod sa mga yuta nga napalit sa probinsiya nga wala pay titulo nga mokalit lang ug botho ug magpabayad pinaagi sa pagblackmail sa kagamhanan nga sirad-an kay walay klarong dokumento ang probinsiya.

Gipahibawo usab ni Governor Yebes nga kon kini mahitabo mapursigir usab ang probinsiya sa paggamit sa iyang “power of eminent domain”. Sumala pa niya dugay na kini nga problema nga nahinagbo sa kagamhanang probinsiyal nga ang mga gibatunan niining mga yuta nga napalit o kaha nakuha pinaagi sa donasyon wala gayud malihok ang paghingpit sa ilang mga dokumento para mabutang na sa pangalan sa ZaNorte ang mga titulo niini.

Gituhuan sa gobernador nga kini nga problema gipasagdan lamang sa miaging mga gobernador kay ang pagproseso niini nagkinahanglan ug dakung gastu o kaha tungod sa rason nga walay makuha ang mga miaging mga namunuan sa probinsiya kon ilang lihukon ang pagpatitulo sa mga propriedad sa lalawigan.

Giklaro ni Governor Yebes nga maoy gusto niya nga sa iyang pagtapos sa iyang termino sa iyang pagkanaug unya limpyo na ang tanang papeles sa probinsiya. Pipila sa mga yuta sa probinsiya nga wala pa makabatun ug titulo ang gitindugan karon sa pipila ka mga government hospitals, sub-provincial office sa engineering diha sa mga lungsod, nurseries lakip na sa gitindugan karon sa provincial jail sa Manukan. (Press Freedom, Vol. XX No. 5)

 

HANGYO SA SIRAWAI NGA ELEKTRISIDAD GIPANGITAAN NA UG PAAGI

Giaksiyunan na karon sa representante sa 3rd congressional district sa Zamboanga del Norte ang hangyo sa kagamhanang local sa Sirawai nga matabangan sila mahangyo ang National Transmission Corporation o ang ZAMSURECO II sa pagbutang substation sa ilang lungsod atubangan sa pagsulod sa duha ka processing plant sa guma ug laing planta para sa vinyl factory.

Si Congressman Cesar Jalosjos sa 3rd district nagkanayon pipila ka kapilian ang gitun-an karon sa unsa nga paagi nga makabatun ang Sirawai sa gikinahanglang supply sa elektrisidad para pagsuporta sa ipahiluna nga mga planta sa ilang lungsod subay usab sa kampanya nga gilusad karon sa administrasyong Yebes sa pagdani ug mga investors.

Sa sayu pa si Mayor Romeo Carino sa Sirawai miapilar sa tigum sa Provincial Development Council sa ZaNorte nga unta matabangan ilang lungsod sa pagkonbinsir sa Transco ug ZAMSURECO II sa pagbutang ug power substation sulod sa ilang lungsod para sa gikinahanglang supply sa enerhiya sa duha ka mga dagkung planta nga ibutang sa Sirawai. Sa iyang kabahin si Governor Rolando Yebes mipasalig sa pagtabang sa Sirawai ug sa paghangyo kang Congressman Jalosjos nga maoy mokonbinsir sa Transco ug ZAMSURECO II sa pagbutang sa maong pasilidad.

Sa sayu pa gipasabot ni Mayor Carino anaa ra tungod sa Barangay Guban sa Sirawai mitadlas ang high tension wire sa Transco diin sa maong lugar usab ipahimutang ang duha ka mga planta sa guma. Matud pa ni Congressman Jalosjos ang pagbutang ug substation sa Guban maoy usa sa unang kapilian nga gitun-an karon. Ang ika duhang plano mao pagkutay ug linya sa ZAMSURECO II paingon sa Guban nga mokostar ug P17 milyones ka pesos.

Ang unang option nga magbutang ug substation sa Guban pinaagi sa pagkabit direkta sa high tension wire sa Transco mokostar ug P21 milyones ka pesos, matud pa ni Congressman Jalosjos. Ang problema kay ang ZAMSURECO II ug Transco sa kasamtangan wala magbatun sa maong pundo para na sa nahisgutang proyekto. Sumala pa maoy gisugyot karon ni ZAMSURECO II Manager Jess Castro, nga abagahon unta sa investor sa Guban ang pagpatindog sa substation nga mokostar ug P21 milyones ka pesos ug igo na lang morenta ang electric cooperative niini hangtud nga hingpit mabayran sa ilang puhunan ang investor.

Sa samang bahin gipahibawo usab ni Congressman Jalosjos nga aduna nay 49 ka mga barangay nga natala nga iyang gipangitaan ug pundo para makutayan sa gikinahanglang elektrisidad nga nasakop sa mga lungsod sa Sibuco ug Sirawai. Karon lang bag-o matud pa ni Congressman Jalosjos nahumana ang electrification project sa lima ka barangay sa Sibuco nga gikatakdang pasug-an karong Nobyembre 22. Samtang laing lima ka mga coastal barangays sa lungsod sa Baliguian ang makabatun na ug elektrisidad ug pasigaon karong buwan sa Desyembre. (Press Freedom, Vol. XX No. 5)

 

GOVERNOR YEBES MISALIKWAY SA MGA
ESPEKULASYON KABAHIN SA KALANGAY SA OCCUPANCY PERMIT

Hingpit nga gisalikway sa gobernador ang mga espekulasyon nga adunay laing nagpaluyo nga laing rason ilabi na kabahin sa politika ang hinungdan sa kalangay sa pag-isyu sa “occupancy permit” sa Zamboanga del Norte Medical Center. Matud pa ni Governor Rolando Yebes, walay katinuuran ang mga espekulasyon nga may nagpaluyong politika sa kalangay sa pag-isyu sa occupancy permit gikan sa Office of the City Building Officials sa Dipolog para sa ZaNorte Medical Center.

Matud pa sa gobernador nagsabut na kabahin sa pag-isyu sa occupancy permit sila si Provincial Attorney Jes Gal Sarmiento, Jr. ug Vice Mayor Senen Angeles sa dakbayan sa Dipolog mahitungod niini. Sa iyang nasayran maoy gihuwat ang paghibalik ni Mayor Evelyn Uy gikan sa China para ipagawas na ang maong permit.

Gihisgutan sa gobernador nga mahinungdanon kaayo ang maong occupancy permit para mohatag na ang Department of Health sa lesensiya para sa operasyon sa ZaNorte Medical Center. Kon wala ang maong permit dili gayud makasugod sa iyang operasyon sa medical center kay kini maoy gipangayo sa DOH para sa pagpagawas usab sa gikinahanglang lesensiya. (Press Freedom, Vol. XX No. 5)

 

LIGA SA BARANGAY FEDERATION PRESIDENT GIKAN GIHAPON SA 3RD DISTRICT

Hayan magagikan lang gihapon sa 3rd congressional district sa Zamboanga del Norte ang molingkud nga ex-officio member sa Sangguniang Panlalawigan nga magrepresentar sa tanang barangay sa tibook probinsiya. Kahinumduman ang federation president sa Liga ng mga Barangay sa ZaNorte nga naglingkud pagka ex-officio member sa Sangguniang Panlalawigan mao si Board Member Ismael Arasam gikan sa lungsod sa Sirawai.

Kagahapon sa pagpanumpa sa mga napiling opisyales sa barangay sa lungsod sa Gutalac gipahibawo ni Congressman Cesar Jalosjos nga maoy nauyunan sa Alliance of Parties ug gidasonan ni kanhi Congressman Romeo “Nonong” Jalosjos nga si Barangay Chairman-elect Joy Candelaria sa Poblacion Gutalac maoy pilion nilang presidente sa Liga sa ilang lungsod kay kini maoy ilang ituboy usab nga mamahimong federation president sa tibook ZaNorte para maoy molingkod pagka ex-officio member sa Sangguniang Panlalawigan.

Sa nasayran nag-ambisyon usab nga mamahimong federation president sa Liga ng mga Barangay si Kapitan Joy Olvis sa Polanco apan wala kini maka kuha sa bendisyon gikan ni Nonong Jalosjos ang giilang titular head sa APP. Mismo si Mayor Angel Carloto sa Gutalac nasayran nga adunay laing kapitan nga gimanuk nga gusto niyang maoy molansar pagka presidente sa Liga sa ilang lungsod apan na-awop kini sa dihang gideklarar ni Congressman Jalosjos nga si Joy Candelaria maoy ilang ituboy nga presidente sa Liga kay gusto ni Nonong nga kini maoy mopuli ug lingkud ni Arasam sa Sangguniang Panlalawigan.

Angayang kasayran nga naglingkud usab karon isip ex-officio member sa Sangguniang Panlalawigan si Board Member Luzviminda Torino nga nagrepresentar sa Philippine Councilors League. Si Torino kasamtangang meyembro sa Sangguniang Bayan sa lungsod sa Liloy ning lalawigan nga maoy mipuli kang Board Member Felormino Cabale nga meyembro sa Sangguniang Bayan sa Gutalac. (Press Freedom, Vol. XX No. 5)

 

YEBES UG JALOSJOS NANAWAGAN SA PAGPATIGBABAW PANAGHIUSA UG REKONSILASYON

Gidasig karon ang mga napiling opisyales sa barangay ug Sangguniang Kabataan sa pagpatigbabaw sa panaghiusa ug paglugway sa ilang mga kamot ngadto sa nahimo nilang kaatbang sa nakalabay nga piniliay para mahibalik ang ilang maayong mga relasyon sa ilang mga katawhan.

Kini ang mga mensahe nga gipalanog nila ni Governor Rolando Yebes ug Congressman Cesar Jalosjos sa 3rd congressional district sa Zamboanga del Norte sa pagpanumpa kagahapong adlawa sa mga napiling opisyales sa barangay ug Sangguniang Kabataan sa mga lungsod sa Salug ug Gutalac kagahapong adlawa.

Si Congressman Jalosjos nanawagan sa mga napiling opisyales sa nakalabay nga eleksiyon sa paglugway sa ilang mga kamot alang na sa rekonsilasyon sa nahimo nilang mga kaatbang para mahibalik ang maayong relasyon sa mga katawhan sa ilang lugar sa tinguha nga magkahiusa silang tanan para mas mosutoy ang pagpadas-og sa gipangitang kalambuan.

Matud pa ni Congressman Jalosjos, susamang mensahe ang iyang gipalanog sa ubang mga kalungsuran sa 3rd district sa gihimong pagpanumpa sa napili nilang mga opisyales sa barangay ug SK sama sa lungsod sa Sibuco. Sa nasayran particular nga nanumpa atubangan ni Congressman Jalosjos didto sa Dakak Park and Beach Resort sa dakbayan sa Dapitan ang mga napiling kapitan sa Sibuco nga dili sakup sa Alliance of Parties for Progress nga maoy nagpakadaug sa mga dagkung barangay sa maong lungsod sa nakalabay nga eleksiyon.

Matud pa ni Congressman Jalosjos, nanumpa usab sila pagka sakup sa APP. Gitataw sa kongresista nga mahinungdanon kaayo nga sila magkahiusa para makahatag sila ug mas daku nga tingog diha na sa pagpangayo ug mga proyekto. Matud pa sa magbabalaod sa miaging panahon nga bungkag pa ang mga lideres sa ZaNorte naglisud kini sa pagpangayo ug mga proyekto gikan sa nasudnong kagamhanan. Nadeklarar pa hinoon nga maoy pinaka pobre nga probinsiya sa tibook nasud sa tuig 2003.

Sa iyang kabahin si Governor Yebes, mipahibawo usab sa mga napiling opisyales sa Sangguniang Kabataan nga ang kagamhanang probinsiyal karon nagbatun ug programa para pagtabang sa panginahanglan sa ilang sector ang YES o Youth Enhancement Support program para makabatun ang mga SK tarung nga mga proyekto diha sa ilang barangay. Sa samang bahin gidasig ni Governor Yebes ang mga napiling barangay officials nga kinahanglang ilang bawsan ang gihatag nga kumpeyansa sa ilang katawhan nga sila maoy gituboy diha na sa paghatud sa tukmang sirbisyo. (Press Freedom, Vol. XX No. 5)

 

Pamilya mibasol sa kaluag sa seguridad sa Batasan

Dili pa makadawat hangtud karon ang pamilyang Bustaliño sa nahitabo ni Maan Gale Bustaliño nga apil sa namatay atul sa pagboto sa bomba sa Batasang Pambansa niadtong Martes sa gabii. Si Maan Bustaliño maoy chief of staff ni Congressman Henry Teves sa probinsiya sa Negros nga apil usab ang maong kongresita sa mga nahimong biktima.

Ekslusibong nahinabi sa mga miyembro sa Zamboanga del Norte United Correspondents (ZNUC) ang igsoon ni Maan nga si Abegail Bustaliño Khio. Iyang gisaysay nga nianang martes sa gabii ila na lang nahibaw-an ang balita sa television nga adunay bomba ang miboto sa south wing sa Batasan Complex. Tungod niini natigaw na dayon ang ilang pamilya tungod kay ang opisina ni Maan ang anaa tungod sa maong lugar nga naboto ang bomba. Diha-diha ila gilayong gitawagan si Maan aron pagklaro subay sa mitumaw nilang kabalaka.  Mas misamot ang ilang gibating kabalaka sa dihang walay mitubag sa cellphone ni Maan nga ilang gitawagan.

Pipila ka mga gutlo nahibaw-an na lang sa pamilyang Bustaliño nga apil si Maan nga nabothan ug bomba sa dihang gipagawas na sa mga balita sa television ang pangalan sa mga nahimong biktima. Matod pa ni Abegail nga wala usab magdugay nakadawat na sila ug tawag nga nagpahibalo sa nahitabo ni Maan. Wala gililong ni Abegail ang iyang tumang kasuko ngadto sa mga tawo nga naghimo sa maong demonyo nga binuhatan. Alang kaniya unsa may sala sa iyang igsoon nga si Maan, ug kung si Congressman Akbar sa Basilan maoy target sa maong bomba nganong dili man kini maoy ilang sentrohon, usa kini ka timailhan sa terorism. Gibasol usab sa pamilyang Bustaliño ang Philippine National Police ilabina ang mismong mga tinugynan alang sa seguridad palibot sa Batasan Complex.

Dugang saysay ni Abegail nga niadtong Martes sa may alas 3:30 sa kahaponon nadawat niya ang text message gikan kang Maan nga nagpahibalo nga anaa siya sa meeting. Wala niya damha nga mao na diay kadto ang katapusan nga text ni Maan. Si Maan Bustaliño ang siyam na kini ka tuig nga nagsilbing staff ni kanhi Congressman Herminio Teves ug karon maoy chief of staff ni Congressman Henry Teves apo sa maong kanhi kongresista. Ang asawa ni kanhi Congressman Hermino Teves maoy igsoon sa amahan ni Maan Bustaliño.

Bag-o lang usab nga gisaulog ni Maan ang iyang ika 30 ka tuig nga adlaw’ng natawhan niadtong Nobyembre 10, 2007. Sa maong adlaw gi-greet usab ni Abegail si Maan pinaagi sa text uban sa pagpadala niini sa mensahe. Si Maan maoy kinamanghuran sa duha ka mga anak nila ni Mr. and Mrs. Rodolfo Bustaliño.Matod  pa ni Abegail nga katapusan nilang kita ni Maan niadto pang Septembre 20 didto na sa kaulohan ug kini ang iyang makita karon nga patay na nga mahibalik sa ilang panimalay.

Gikatakda nga karong adlawa mahidangat sa Dipolog City Airport ang patay nga lawas ni Maan ug kini ang daritso sa ilang pinuy-anan nga anaa nahimutang subay sa dalan Magsaysay kilid sa panimalay ni kanhi konsehal Romy Velasco. Sa milabay’ng semana, ang mga ig-agaw ug si kanhi Governor Dalman ang maoy mi-adto sa Manila aron sa pagkuha sa patay nga lawas ni Maan. Dugang nasayran nga si Maan usa ka regular employee sa kongreso. (Mindanao Star, Vol.III No.42)

 

Certificate of occupancy nakalangan pag-operate sa ZaNorte Medical Center

Gitumbok karon ni Gov. Lando Yebes nga ang certificate of occupancy maoy nakalangan alang sa hingpit nga pag-operate sa Zanorte Medical Center nga anaa nahimutang sa barangay Sicayab ning dakbayan sa Dipolog. Kini gipahayag sa gobernador atubangan sa pagpanumpa sa mga bag-ong opisyal sa barangay gikan sa pagka-kapitan, barangay kagawad ug Chairman sa Sanguniang Kabataan sa duha ka lungsod dinhi sa sigundo distrito nga mao ang Roxas ug Jose Dalman.

Matud pa sa amahan sa probinsiya nga hangtud karon wala pa gihatag sa kagamhanang lokal sa Dipolog ang maong certification nga maoy usa sa mga rikisitos aron mabuksan na ang bag-ong hospital sa probinsiya  bisan pa man ug nakompleto na ang requirements nga gisitar alang sa pag-released niini. Sumala pa niya nga kompleto na ang mga kahimanan sa bag-ong hospital, mga doktor ingon man ang mga modumala niini aron makaalagad na kini sa mga katawhan sa lalawigan apan tungod kay hangtud karon wala pa man mo-isyu sa maong certification ang kagamhanan sa Dipolog kini maoy dakung rason nganong wala pa makaserbisyo ang bag-ong hospital sa Zanorte.

“Para kanako maayo nga mahibaw-an sa katawhan nga ang hospital ready na, ang mga doctor, naa na ang mga kahimanan, pero wala pay certificate of occupancy, ambot ug unsay ilang rason” dugang pahayag sa gobernador. Sumala pa niya nga gilisud-lisud gayud ang probinsiya sa dakbayan sa Dipolog kalabot na sa pagpalogwa sa nahisgutang certificate of occupancy hinungdan nga hangtud karon wala pa mo-operate ang Zanorte Medical Center.

Sa iyang mensahe gibutyag usab ni Vice-Gov. Francis Olvis atubangan sa daghanang opisyal sa barangay nga nanumpa sa ilang katungdanan nga bulahan kaayo ang atong lalawigan nga nakapili ug usa ka gobernador nga maalagaron ug naglantaw gayud sa mga kaayuhan sa katawhan ug kini andam gayud nilang suportahan sa hunta probinsiyal.

Gipahayag usab sa bise gobernador nga karong sunod tuig mogahin siya ug tunga sa milyon ka pesos gikan sa iyang PIF kon Provincial Identification Fund aron ipamalit ug binhi sa humay ug mais ug kini iyang ipanghatag sa mga mag-uuma sa tibook sigundo distrito. Sila si Gov. Lando Yebes ug bise gobernador Bebie Olvis nagkahi-usa sa ilang mga baruganan nga mao ang tinud-anay nga pagserbisyo sa mga katawhan sa probinsiya sa Zamboanga del Norte. (RENZ, Mindanao Star, Vol.III No.42)

 

Mga na-admit sa ospital sa Manukan tungod sa diarrhea gi aksyonan!

Gipaklaro karon ni Dra. Carmencita P. Icao, Provincial Health Officer sa Integrated Provincial Health Office nga di tinuod nga aduna’y daghanang kaso sa diarrhea nga mga pasyente ang nahilandig sa Manukan District Hospital karong bag-o pa lamang.

Matud pa ni Dra. Icao nga tinuod sa nakalabay nga bulan adunay daghanang nahilandig sa tambalanan sa lungsod sa Manukan tungod sa “kalibanga” diin, gihimoan gilayon nila kini’g makuting imbestigasyon kon unsay hinungdan sa maong insedente. Gikahibaloan nga nasayran sa investigating team sa buhatan sa maayong panglawas nga tungod sa pagkilaw sa isda gikan na sa kasubaan, paggawas sa hugaw sa tawo ngadto na sa suba dayon kan-on na usab isda ang hugaw sa tawo nga nagdala og “bitok” maoy hinungdan sa nahiagumang kalibanga sa katawhan particular na ang barangay Lumaping, Jose Dalman.

Si Dra. Icao namahayag nga human sa maong hitabo ang buhatan sa Provincial Health Office inabagan sa Rural Health Office, ang mipahigayon kinig pagpanghatag og 54 ka mga water shell sa Barangay Lumaping,Jose Dalman ug sa mga kasilingang dapit niini aron malikayan ang maong sakit nga sagad nahiaguman sa mga katawhan niini.

Dugang pa sa Hepe sa maayong panglawas ning probinsya nga angayang mopagawas gayod ang tawo sa insaktong dapit kon Comfort Room ug dili hugaw-hugawan ang kasubaan aron malikayan ang sakit nga motakboy sa tawo. Subay niini, dako ang pasalamat niini ni Dra. Icao ngadto na ni Barangay Lumaping Kapitan Felipe Cuenca ug ni Gov. Rolando E. Yebes nga miayuda usab sa gipahigayong aksyon sa Provincial Health Office. (Mindanao Star, Vol.III No.42)

 

bag-ong napiling opisyales nanumpa

Nanumpa kaniadtong Nobyembre 12 ang mga bag-ong napili nga mga opisyal sa lungsod sa Roxas ug Jose Dalman ning lalawigan atubangan ni Gov. Rolando Yebes ug Vice Governor Olvis didto sa Plenary Hall, ZN Convention & Exhibition Center. 20 ka mga kapitanes uban ang mga kagawad ug 19 usab ka mga SK Chairmen ug SK Councilors sa lungsod sa Roxas ang pormal nga nanumpa sa ilang katungdanan isip bag-ong mga napiling mga opisyal sa ilang tagsa-tagsa ka mga barangay. Samtang 8 usab ka mga kapitanes ug mga kagawad apil niini ang 11 ka mga SK Chairmen ug SK Councilors ang nanumpa sa lungsod sa Jose Dalman kagahapon.

Sa pakigpulong ni Gov. Yebes, iyang gipasalamatan ang maong mga opisyales sa pagsuporta sa iyang mga programa nga gihatod ngadto sa mga hilit nga kabaranggayan diin gikahimuot usab sa mga katawhan ang iyang mga nahimong kaayuhan sa tibuok lalawigan. Gusto sa gobernador nga ipatunhay ang panaghiusa sa tanang mga opisyal dinhi sa Zamboanga del Norte tungod kay naila na kita sa Pilipinas tungod sa iyang paningkamot nga mabaligya ang probinsya ngadto sa ubang dapit ma lokal man o sa gawas sa nasud.

Nanghinaot ang gobernador nga ang pagtapon sa mga opisyales sa duha ka mga lungsod kinasingkasing unta aron mapalambo pa ang lalawigan sa Zamboanga del Norte. Iyang dakong garbo usab nga wala gayud siya naglantaw sa bulok sa politika kay ang lungsod sa Roxas bisan dili iyang mayor iya kining nabuboan ug mokapin sa 36 milyones nga mga proyekto ug 23 milyones balor nga mga proyekto usab ang nahatag sa lungsod sa Jose Dalman bisan mayorya kaniadto sa mga kapitan ang wala musuporta sa gobernador sa 2004 ug 2007 nga piniliay.

Dugang pa sa gobernador, nga sa iyang ikaduhang termino tutokan niya ang programang panginabuhian pinaagi sa HI-GREEN program ug uban pang mga programa. Gihatagan usab ug dakong pagtagad sa gobernador ang bag-ong napili nga mga SK Chairmen ug SK Councilors, nga tipik usab sila sa iyang Youth  Enhancement Support Program nga naghatod ug maayong programa sa mga kabataan sama sa scholarship grant ug sports development nga gisugdan na sa kasamtangang administrasyon sukad sa unang termino ni Gov. Yebes.

Sa kabahin ni Vice Gov. Olvis, ang segundo distrito na lang ang wala magkahiusa, apan wala kini nila pasagdi tungod kay gibubo usab sa adminitrasyon ang mga infrastructure projects ug uban pang programa alang sa mga kabus nga katawhan. Dugang pa sa gobernador ug bise-gobernador nga mas dako sila ug mahatag nga pahat kay sa mga kongresista nga makahatag lang ug 70 milyones ka pesos gikan sa ilang CDF kompara sa probinsya nga makahatag ug sobra sa 1 ka bilyon ka pesos. Sa pamahayag ni BM Cedric Adriatico, kuyog ug kauban gayud ang bugtong itusok sa mga kasingkasing sa mga opisyal aron magskahiusa kini sa usa ka tumong nga mapalambo ang lalawigan.

Si Hon. Teresita Aseniero sa Lower Irasan sa Roxas ug Hon. Fulgencio Lerin sa Tabon, Jose Dalman pulos napili nga mga bag-ong kapitan nga dili na kinahanglan nga magpalingla ang mga opisyales ug kwarta aron motapon sa usa ka partido kun dili tan-awon unta sa mga opisyal ang maayong plano alang sa ilang mga barangay sama sa gihimo ni Gov. Yebes ug Olvis nga wala magpihig daog o pilde man sila apan gipabaha gihapon ang daghang mga mehoras sa 691 ka mga barangay sa tibuok lalawigan.

Mosubra sa 300 ka mga opisyales sa Roxas ug Jose Dalman ang nanumpa ug mipasilong sa bando sa APP kaniadtong Nobyembre 12. Gihatagan usab ug oras aron mapadayag sa mga Chief of Offices ang mga maayong programa sa gobernador sama nila ni Ms. Maybel Bustaliño sa OPA, Ms. Grace Marylen Sabal sa PSWDO, Engr. Ramon Ochotorena, ug Provincial Atty. Jes Gal Sarmiento Jr. (Mindanao Star, Vol.III No.42)

 

Tungod sa sobrang selos!
Nursing student sa DMC gipatay sa iyang ka live-in

Nakabsan sa iyang kinabuhi ang usa ka Graduating Nursing Student sa Dipolog Medical Center human nahiagum sa daghanang tusak-tusak sa mga samad-dinunggaban sa iyang lawas sa dihang giluba sa iyang ka live-in partner sulod sa gimanehong service multi cab didto sa may national highway sa Barangay Turno ning dakbayan niadtong biyernes sa gabii.

Ang biktima nga molam-pos na unta sa iyang pagtungha sa nursing sa DMC sunod tuig nailhan nga usa ka Ranor Bonjoc y Pon, 28 anyos, dalaga ug lomolop-yo sa lungsod sa Jose Dalman, Zamboanga del Norte. Pasiunang imbestigasyon sa Dipolog PNP mibutyag nga pasado alas 8:00 ang takna sa gabii ang elemento sa kapolisan pinaagi nila ni PO3 Talaid, PO3 Tabiliran ug PO3 Bilas mirespondi sa maong mangilngig ug madu-guong kremin ang milampos pagsikop sa principal nga mamumuno giilang usa ka Gerald Dalman Y Zamoras, 30 anyos, ulitawo ug taga- Barangay Poblacion sakop sa lungsod sa Jose Dalman ning lalawigan. Si Dalman maoy gitudlong responsabli sa pagpatay sa biktima.

Sa initial nga imbestigasyon sa otoridad nasayran nga ang duruha nagkuyog pa kini ug sakay sa suzuki double cab nga gipanag-iyahan sa biktima. Matud pa nagkalalis ug nagka-irgo ang duruha sulod sa maong sakyanan ug misampot sa ilang mainit nga panag-away. Sumala pa nga ang hinungdan sa ilang panaglalis kabahin na sa ilang personal nga kinabuhi ug relasyon agi sa tumang pagsilos. Apan sa tanto-tanto nilang panag-irgo ang suspek walay daghang langan ang miluba-luba kini sa biktima sa makadaghan nga higayon ginamit ang kutsilyo. Sigon sa report, human sa krimen ang suspek nga si Dalman mao ra usab ang nagdala sa biktima didto sa tambalanang probinsyal aron kapatam-balanan. Apan human sa pipila ka gutlo ang milabay ang biktima nga si Bonjoc nakabsan sa iyang kinabuhi gumikan sa mga grabing samad – dinunggaban nga naangkon sa iyang kala-wasan.

Narekober sa mga otoridad diha sa crime scene sulod sa multi cab mao ang usa ka stainless knife nga adunay gitas-ong pito ka pulgadas ug nagkabulit pa kini sa dugo sa biktima. Nasayran si Bonjoc dunay usa ka anak, tinun-an sa Dipolog Medical Center ug graduating kini sa kursong Nursing karong umalabot Marso 2008. Ilang gituhuan nga usa sa mga motibo sa naasoy’ng insidenti mao lamang ang tumang pagpangabugho sa suspetsado ngadto sa biktima. Sa pagkakaron si Dalman anaa karon gibalhug sa bilangguan sa Dipolog PNP ug gihikay na ang kasong pagpatay nga ipasaka sa korte. (The New Nandau, Vol. XVII No.19)

 

BOD Adaza nakakuha ug TRO

Gitugotan sa korte nga mahiapil ang pangalan ni Aristela “ Daylinda “ Adaza diha sa listahan sa mga kandidato pagka Board of Director sa Zamboanga del Norte Electric Cooperative kon ZANECO sulod sa Distrito VII. Ang piniliay gipahigayon niadtung Sabado, Nobyembre 17 ning tuiga.

Mao kini ang unod sa giluwatan nga Temporary Restraining Order (TRO) nga gipagawas ni Honorable Judge Chandler O. Ruiz sa Regional Trial Court, 9th Judicial Region, Branch 10 ning dakbayan ug pinitsahan Nobyembre 16 ning tuiga sa dihang si Adaza ang miduso ug Certiorari and Injuction with Prayer for the Issuance of Temporary Restraining Order atubangan sa ‘findings’ sa mga membro screening committee nga nagpugong kaniya nga makasalmot sa piniliay pagka Board of Director.

Hinoon gipaklaro ni Judge Ruiz nga ang TRO dili ‘final and executory’ tungod kay mahimo pa kining mabakwi sa National Electrification Administration. Matud sa hukmanan, ang issue ni Adaza kabahin sa iyang ‘qualification or disquali-fication’ ang naglambigit kini sa ‘question of law’ diin ang korte mao lamang ang makaresolbar niini. Ang Election Committee sa ZANECO nga gilangkoban nila ni Violeta L. Belotendos, Leonora I. Timtim, ug Eduardo B. Castor ang gimandoan sa hukmanan nga dili una ipatuman ang ‘findings’ sa screening committee pinitsahan ug Nobembre 10, 2007 nga nag-disqualify ug nagwagtang sa pangalan ni Adaza sa Official List of Candidates sa posisyon pagka Board of Director sa ZANECO District VII; ug pag-apil niini sa pangalan sa petitioner sa official list of candidates sa pagka Board of Director alang sa piniliay.

Ang TRO mo-epekto lamang sulod sa byenti ka adlaw.

Gimando sa korte nga pagahimoon ang pagdungog sa application for injunction ni Adaza ug giktakda karong Nobembre 28, 2007 sa may alas dos sa hapon. Para sa nasangpit nga pagdungog, ang Election Committee sa ZANECO gimandoan sa hukmanan nga mopakita ug basehan ngano nga ang injunction sa petitioner dili tugotan. Sa interview, gipadayag ni Adaza ang iyang dakong kahibulong sa migawas nga ‘findings’ sa mga membro sa screening committee nga nag-disqualify sa iyang kandidatora nga unta ang trabaho sa maong komitiba igo lamang modawat ug Certificate Of Candidacy sa buot magpapili ug dili mopa-gawas ug desisyon kon wa-lay mopasaka sa protesta.

Matud ni Adaza walay mipasaka ug protesta batok sa iyang kandidatora busa dili mahimong diskumpiyado ang screening committee kay ang ilang trabaho igo raman modawat ug COC niadtung gusto molansar. “Nganong sila man (screening com-mittee) ang diskumpiyado nga dili man sila ang kan-didato?” maoy pangutana ni Adaza. Gikatingad-an usab ni Adaza nga sa una ug ikaduhang piniliay aduna ma’y Candidates Forum nga gihimo uban sa mga Election Screening Committee ingon man usab sa mga kadag-kuang opisyales sa naa-soy’ng electric company. Apan karon sa iyang kata-pusang termino nga magpa-pili sa mao gihapong posis-yon lahi na man ang pamaagi sa mga nasangpit nga komitiba ug matud pa niya daw murag “luto na daan.”

Sumala ni Adaza iya lamang gibalewala ang tanang pagbatikos tungod kay wala kini igong kapasi-karan.  Busa naningkamot nalang siya nga mapagawas sa korte ang Temporary Restraining Order (TRO) aron adunay kapilian ang mga konsumante sa ZANECO sulod sa Distrito VII nga gilangkuban sa mga lungsod sa Katipunan, Roxas, Manukan ug Jose Dalman nga siya ‘qualified’ pa gihapon nga makahupot sa maong posisyon.

Tumong ug tinguha lamang sa iyang pagpasubli sa maong posisyon mao lamang ang pagtunol sa mga maayong programa alang na sa kaayuhan sa tanang mga konsumante sa ZANECO sulod sa Distrito VII. Angay masayran nga si Incumbent Board of Direc-tor Arestela “Daylinda” Adaza ang gi-disqualify sa eleksiyon pagka Board of Director sa Zamboanga del Norte Elelectric Cooperative kon ZANECO tungod sa pagka konbikto sa iyang kasong giatubang.

Matud sa Member Information Services sa buhatan sa ZANECO ang ‘ground for disqualification’ sa kandidatora ni Adaza nga maoy gibasehan sa mga membro sa screening committee ang kasong “theft of minerals” nga nasang-at sa korte ug gihukman niadtung 1997. Base sa clearance gikan sa Provincial Prosecutors Office ug sa kopya sa desis-yon sa korte nga nahipos sa screening committee, si Adaza nakonbikto sa iyang giatubang kasong pagpangawat ug minerales.

Usa sa mga rekesitos nga isukip ug ipataban sa Certificate of Candidacy mao ang mga clearances gikan sa Provincial Prose-cutor, sa PNP, Finance Department sa ZANECO ug uban pa. Ang maong mga clearance nga gikinahanglan isip maoy pagpa-ila nga ang usa ka kandidato dunay “good standing” ug wala makonbikto sa kasong giatubang. Apan gumikan kay si Adaza nakonbikto sa iyang kaso, kini maoy gibasehan nga dili siya mo-qualify nga makapartisipar sa pagpapili sa umalabot nga eleksiyon.

Sigon sa election guide-lines ug sa by laws sa ZANECO, lima ka adlaw sa dili pa ikapahigayon ang piniliay dawaton ang unsa man nga protesta apan si Adaza wala misubmiter sa iyang counter affidavit o kaha protesta kabahin sa iyang disqualification sa eleksiyon. Mrs. Violeta Belotendos, membro sa screening com-mittee ug maoy in-charge sa pagpahigayon sa piniliay ang mikonpermar sa findings nga si Adaza na-disqualify sa iyang kandidatora pagka Board of Director sa eleksiyon.

Nasayran nga ang mga membro sa screening com-mittee gilangkoban nila ni Leonora Timtim, Violeta Belotendos ug Engr. Eduardo Castor. Apan si Castor gikatahong mi-ihibit sa gipakanaog nga findings. Sigon sa talaan sa mga kandidato pagka Board of Director, bugtong si Antonio Liao nalang ang nakabutang sa final list of candidates. Atol sa Board Meeting sa hunta directiba sa koope-ratiba sa elektrisidad, nawas-awasan ug gilabhan ug kasaba ni Mrs. Adaza si Mrs. Belotendos sa dihang gituki sa mga membro sa Board of Director ang migawas nga findings sa screening committee.

Matud ni Belotendos, ang ilang findings nagabase lamang sa by laws and guidelines alang sa quali-fication ug disqualification sa usa ka kandidato diin sa clearance gikan sa Provincial Prosecutors Office ug sa nahipos nilang kopya sa desisyon sa korte, si Mrs. Adaza nakonbikto sa kasong “theft of minerals” niadtung 1997, ug kini maoy ground nga siya ma-disqualify. Gipaklaro sa Information Services Manager nga ang hunta direktiba dili makabakwi ug makapa-usab sa findings sa screening committee gumikan kay ilawom sa by laws and election guidelines, ang makadeterminar sa usa ka kandidato kon kini mo-qualify ba o dili sa paglansar, ang gahum iya lamang sa maong komitiba. Ang Board of Director walay gahum nga maka revoke sa findings sa screening committee.

Hinoon gipahayag ni Mrs. Belotendos nga andam nilang tubagon ang order sa korte atubangan sa petition nga giduso ni Mrs. Adaza. Kagahapon ang ZANECO pinaagi sa mga membro sa screening com-mittee mipahibawo nga apil si Mrs. Aristela B. Adaza sa final list of qualified can-didates sa eleksiyon human giluwatan sa korte ang Tem-porary Restraining Order. (The New Nandau, Vol. XVII No.19)

 

City Hall nakalangan pagsugod sa iyang operasyon kay wala pa gi-isyu ang occupancy permit sa CBO Medical Center andam na apan…

Andam na ang tanan alang sa iyang operasyon ang Zamboanga del Norte Medical Center apan ang nakahinagbo sa kalangan mao ang occupancy permit nga hangtud karon wala pa gihatag sa kagamhanang lokal sa dakbayan sa Dipolog.

Kini ang gipamahayag ni Governor Rolando Yebes samtang iyang gipahibawo atubangan sa mga barangay opisyales sa mga lungsod sa Roxas ug Jose Dalman atol sa mass oathtaking ceremony niining semanaha nga ang Zanorte Medical Center iyang gihalad alang sa mga katawhan sa probinsya. Matud niya, ang bag-ong tambalanan andam na sa iyang operasyon gumikan kay kompleto na kini sa tanang gikinahanglan gikan sa mga doktor ug aparatus apan dili pa maka-operate gumikan kay ang nahimong babag mao ang Dipolog nga nagmagahi sa pag-isyu ug occupancy permit nga maoy usa sa mga requirements alang sa iyang operasyon.

ZaNorte Medical Center andam na apan…

Alang sa gobernador, usa ka timaan nga paglisod-lisod ang gibuhat sa City Hall diha sa paglangan sa pagpalugwa ug occupancy permit hinungdan nga hangtud niining bahina dili pa gayud puwede mabuksan sa iyang operasyon ang bag-ong tambalanan sa Sicayab.

“Dili lang nako ma-ablihan karon kay gilisodlisod ko sa siyudad sa Dipolog sa ilang certificate of occupancy kay dili paman sila mohatag nako.” Matud ni Governor Yebes gusto niya ipahibawo sa mga katawhan sa Zamboanga del Norte nga ang bag-ong hospital sa Sicayab “ready na” kay naa na ang mga doctor, kahimanan, “pero wala pay certificate of occupancy kay…ambot unsang rasona,” nagkanayon ang gobernador.

Board Member Cedric Adriatico mipahayag nga dili na kaakohan sa buhatan sa gobernador ang pagkuha sa certificate of occupancy kay iya kining trabaho ug responsibilidad sa contractor nga maoy nagtrabaho sa ospital. Mao usab kini ang gipadayag nga obserbasyon ni Atty. Rafael Cabanlit, Provincial Administrator sa dihang gibutyag sa gobernador nga gilisod-lisod ang iyang buhatan diha sa paglukat sa maong permiso.

Matud ni Cabanlit, ang adunay tahas sa paglukat o pagkuha ug occupancy permit ngadto sa City Building Official sa City Hall mao ang Metropolis Construction kay maoy nagtrabaho sa maong edipisyo. Sumala ni Cabanlit, subayon sa taga CBO ang edipisyo nga gitrabaho sa contractor nga ug kini makapasar ayha ihatag ang certificate of occupancy.

Board Member Adriatico nagkanayon nga sila sa probinsya maghulat nalang kanus-a iturn-over sa contractor ang maong proyekto ug kini ilang pagadawaton nga limpyo na ang tanang dokumento nga gikinahanglan kay dili trabaho sa buhatan sa gobernador ang paglukat ug mga clearances kabahin sa engineering works gawas lamang sa permit to operate nga pagaluwatan sa Department of Health. (The New Nandau, Vol. XVII No.19)

 

 

 

NOTE: SEND US YOUR NEWS.  Tell us what's going on in your barangays, clubs, schools, businesses and non profit organization. You can also send notices and announcements.
          

 

    Email to webmaster@dipolognon.com

      
Google
WEB THE DAILY DIPOLOGNON