2

November 15  2007

 

Bag-ong Zonal Valuation sa BIR SUGDAN ’08

Gitinguha karon sa Bureau of Internal Revenue District 91 ning dakbayan sa Dipolog nga masugdan nila sa pagpatuman ang bag-ong zonal valuation karong sunod tuig 2008. Si Revenue District Officer Cres Agad, mipahayag nga wala pa sila mahingpit sa pagpanday sa bag-ong zonal valuation para sa dakbayan sa Dipolog kay hangtud karon wala pa mosumitir sa ilang taripa o proposal ang pribadong sector ilabi na ang mga bangko. Matud pa ni Agad kini na lang ang ilang gihuwat para magpatawag sila ug public hearing.

Human sa Dipolog maoy ilang isunod ang dakbayan sa Dapitan ayha ang ubang mga kalugnsuran. Para sa Dipolog matud pa ni Agad adunay pipila ka bahin sa siyudad nga taas ang ilang zonal valuation kon ikomparar sa gipadas-og karong proposal sa BIR. Gitataw ni Mr. Agad nga ilang paabot ang pagsumitir sa proposal gikan sa pribadong sector gikinahanglan ayha nila isumitir ngadto sa ilang central office ang proposal nga bag-ong zonal valuation sa Dipolog.

Gipatin-aw sa BIR nga angayan lamang nga ang zonal valuation nga ilang gipatigbabaw sa Dipolog mabag-o sanglit sulod na sa pipila ka tuig kini nga maoy ilang gipatigbabaw samtang sulod na sa pipila ka higayon nga gibag-o ang zonal valuation sa siyudad. Ang zonal valuation maoy basihanan sa BIR diha na sa pagsingil ug buhis sa mga yuta nga idisposar o kaha masunod sa mga heredero. (Press Freedom, Vol. XX No. 4)

 

Brgy. Capt. Patangan sa Diwan gipetisyonan 

Mipasaka karon ug petisyon para judicial recount ang naparot nga kandidatu pagka kapitan sa Barangay Diwan ning dakbayan sa Dipolog sa alegasyon nga dunay mga botos nga pabor kaniya nga wala maapil ug ihap sa pagcanvass sa mga botos sa bag-ong gitapos nga barangay election. Sa iyang kabahin si Diwan Barangay Chairman-elect Nathan Patangan mibutyag nga nadawat niya ang kopya sa petisyon ni Letecia Bagarinao nga nangayo ug judicial recount sa alegasyon nga adunay mga botos pabor kaniya nga nabutang sa linya para barangay kagawad ang wala malakip sa pag-ihap.

Apan ang petisyon ni Bagarinao napakyas sa pagtumbok asa sa napulo ka presento sa Barangay Diwan nahitabo ang kapakyas sa pag-apil ug ihap sa nahis-gutang botos pabor kaniya. Alang ni Barangay Chairman-elect Patangan ang petisyon sama sa nagpahi-gayon ug fishing expedition kay ang tanang presento sa Diwan maoy gusto sa iyang kaatbang nga ipailawom sa judicial recount. Angayang kahinumduman ang labaw ni Patangan batok kang Bagarinao dos botos lamang sa bag-ong gitapos nga barangay election.

Sumala pa ni Kapitan Patangan samtang nagkamulo pa ug ihap sa botos didto sa ilang barangay walay protesta nga gipalanog ang mga watcher ni Bagarinao kabahin na sa maong mga punto nga nasulod sa iyang petisyon. Giangkon ni Kapitan Patangan nga ang nasangpit nga petisyon bisan sa iyang tan-aw dili mosalir apan nakaperwesyo kini kaniya.

Unta dawaton na lang sa iyang kaatbang nga napilde kini sa nakalabay nga eleksiyon sama sa usa ka duwang basketball nga adunay referee o sa boxsing nga pag-isa sa kamot sa mananaug wala nay protesta ang napildidng kontra.

Hinoon iyang gitahod nga katungod kini sa iyang kaatbang ang pagpasaka ug protesta. Giangkon usab ni Kapitan Patangan nga kini nga aksiyon nakapabalaka kaniya kay siguradong mga disturbo kini sa iyang pagpanirbisyo sa katawhan. Sa samang bahin nanawagan si Kapitan Patangan sa mga katawhan sa Diwan nga dili motuo sa nagpalakaw karon ug istorya sa ilang barangay nga nagsugod na daw ang judicial recount ug nakita nga milabaw na iyang kontra ug walo ka botos. Gituhuan sa kapitan nga adunay nag-ulog-ulog sa iyang kaatbang nga napiling kagawad sa ilang barangay nga nangambisyon nga molingkud pagka kapitan kay nagtuo kini nga kon magka sakit ang ilang kandidatu tungod sa kataas sa pangidaron niini sila ang otomatik nga mopuli ug lingkud sa gahum.

Sa samang bahin gipahibawo ni Kapitan Patangan ang nagkadaiyang mga proyekto nga iyang giandam para sa katawhan sa Diwan diin sa iyang paglingkud karong Nobyembre 30, 2007. Matud pa ni Kapitan Patangan bisan ug wala pa siya mosugod sa iyang opisyal nga paglingkud pagka kapitan sa Diwan apan gilakaw na niya ang pipila ka mga proyekto nga gusto niyang mahitabo sulod sa ilang barangay nga iyang napangayo gikan sa ubang ahensiya sa gobyerno sama sa kagamhanang probinsiya sa Zamboanga del Norte.

Pipila sa mga proyekto nga iyang gihisgutan mao ang pagkomponi sa ilang dalan gikan sa Lower Diwan hangtud na sa Pamansalan nga himoong all weather road pinaagi na sa mga ekipo sa Provincial Engineering Office sa ZaNorte nga mokostar ug P300 mil pesos. Lakip na ang pagkutay sa tubig nga mainom sa ilang barangay kay adunay gigahin nga tunga sa milyon ka pesos kaniya si Governor Rolando Yebes para sa maong katuyuan. Uban usab sa iyang gilihok karon ang pagkutay sa elektrisidad sa iyang barangay kay sa iyang nakita anaa na ang linya apan wala pay koryente nga nagdagan.

Gipahibawo usab ni Kapitan Patangan nga maoy gusto niya nga makapahimulos usab ang iyang mga katawhan sa livelihood program sa probinsiya particular na sa Hi-Green Program diin aduna na siyay gigahin nga yuta para himoong nursery. Sa samang bahin andam na usab ang mga technical personnel sa Provincial Engineering sa ZaNorte sa pagbuhat ug detailed engineering sa submarine bridge nga ikonstrak gikan sa Cayasan tabuk sa Barangay Sinuyak sa Katipunan. Kini tanan maoy iyang gisaad panahon sa kampanya sa eleksiyon sa barangay ug maoy iyang gisugdan karon ug trabaho bisan ug wala pa siya makalingkod sa puesto. (Press Freedom, Vol. XX No. 4)

‘Mass appointment’ babag sa administrasyong Yebes

Hangtud karon nagapabiling babag sa administrasyong Yebes sa ika duhang termino niini ang pagtudlo ug bag-ong mga kawani sa pipila ka mga bakanting posisyon sa kagamhanang probinsiyal nga mahinungdanon unta nga mabutangan ug kawani tungod sa mass appointment sa kanhi gobernador nga nakaso ug kasamtangan naka apilar atubangan sa Civil Service Commission. Kini ang milutaw sa pagsugod sa Sangguniang Panlalawigan sa ilang marathon budget hearing sa 2008 Executive Budget sa gobernador.

Sa ilang pagsugod ug tuki sa budget para sunod tuig namatikdan sa mga magbabalaod sa probinsiya nga adunay mga bakanting posisyon ang pipila ka mga opisina sa kapitolyo. Gipatin-aw ni Aurora Barrios, Human Resource Development Officer sa probinsiya nga ang nasangpit nga mga posisyon kabahin pa sa mass appointments ni kanhi Governor Isagani Amatong pabiling dili mabutangan ug tawo kay sa kasamtangan wala pa maresulbar sa hingpit ang kaso niini nga gisang-at atubangan sa Civil Service Commission.

Sa nasayran gidis-aprubahan na sa Civil Service ang maong mass appointments apan ang nasang-pit nga disisyon sa commissioner kasamtangang giapilar sa mga hingtungdang mass appointees ug pabilin pa kini wala madisidihi hangtud karon hinungdan nga dili usab matandog sa kasamtangang administrasyon ang nasangpit nga mga posisyon. (Press Freedom, Vol. XX No. 4)

 

Zamboanga West Coast Project gisugdan na

Gisugdan na ug trabaho sa pito ka mga kontraktor ang Zamboanga West Coast project nga naglangkub na sa unom ka mga road opening ug duha ka concreting. Kini ang gipahibawo ni Congressman Cesar Jalosjos sa 3rd Congressional District sa Zamboanga del Norte may kalabutan na sa implementasyon sa usa ka SONA Project ni Presidente Arroyo dinhi sa Mindanao. Matud pa ni Congressman Jalosjos ang tanang P380 milyones ka pesos nga gipahat nga pundo para karong tuig 2007 sa Zamboanga West Coast project ang tapos nang napa-ilawom sa public bidding ug na-award na ngadto sa pito ka mga kontraktor.

Sa pagkakaron maoy ilang giandam ang P450 milyones ka pesos nga budget para sa tuig 2008 nga gusto niyang mapa-ilawom na sa pagbidding karong sunod buwan sa Desyembre ug maandam usab ang ubang mga kontraktor para mopartisipar sa ipahigayong bidding kay maoy gusto niya makabatun na ug dakung agi sa maong proyekto sa tunga-tungang bahin sa sunod tuig aron makuha nila ang P490 milyones ka pesos nga budget para sa 2009 nga ilang makuha ug masugdan sa pag-implementar sa hinapos nga bahin sa sunod tuig.

Ang lima ka mga road opening projects nahimutang Sibuco-Sirawai. Matud pa ni Congressman Jalosjos, maayo ra ang lakat sa mga kontraktor nga wala makahinagbo ug problema sa ilang mga trabaho. Kabahin sa mga hulga, adunay nadawat nga mga extortion letters apan wala kini makapatugaw sa implementasyon sa proyekto, dugang pahayag sa kongresista.

Kini nga problema matud pa ni Congressman Jalosjos iyaha nang giduso ngadto sa 1st Tabak Infantry Division ug sa 44th Infantry Battalion para kahimuan sa tukmang aksiyon para maprotihian ang mga kontraktor. Kabahin sa Engineering Brigade, sila naka programa sa pagtrabaho sa bahin sa maong proyekto ilawom sa 2008 budget nga nahimutang sa Lintangan, Sibuco nga mga lima ka kilometros paingon na sa poblacion. (Press Freedom, Vol. XX No. 4)

 

ZN daghang yuta walay mga permit

Hangtud karon 55 ka tuig na ang nakalabay gikan sa pagka himogso sa Zamboanga del Norte sa pagka probinsiya nagapabilin nga daghan pa kini ug mga gibatunang yuta nga wala pay titulo. Gipahibawo ni Provincial Attorney Jes Gal Sarmiento, Jr. nga gitahasan karon ni Governor Rolando Yebes ang ilang buhatan sa pagpatitulo sa nagkadaiyang mga yuta nga gipanag-iyahan sa probinsiya nga hangtud karon wala pa mabutang sa pangalan sa ZaNorte.

Si Atty. Sarmiento sa iyang pag-atubang sa Sangguniang Panlalawigan alang na sa pagpanalipod sa ilang budget para sunod tuig hugtanong nagahangyo sa mga bokal sa pagdason sa gipangayo nilang pundo nga gamiton para na sa pagpatitulo sa mga yuta nga gipanag-iyahan sa probinsiya nga pabiling wala pa mabalhin sa pangalan sa ZaNorte. Matud pa ni Atty. Sarmiento sa gihimo nilang pagsubay maoy milutaw nga pipila sa mga kayutaan sa probinsiya nga nabatunan niini pinaagi sa donasyon o kaha gipalit ang wala pay titulo ilawom sa pangalan sa ZaNorte.

Gibutyag sa provincial attorney nga sa mga yuta nga gitindugan sa mga buhatan sa Provincial Engineering ang adunay titulo mao ra ang Obay sa Polanco ug didto sa Labason. Mismo sa provincial capitol area dili tanang yuta nga giokopahan niini ang adunay titulo nga nakapangalan sa probinsiya. Samtang sa 11 ka mga nurseries sa agrikultura nga nakatag sa nagkadaiyang bahin sa lalawigan duha lamang niini ang nagbatun ug titulo. Sa mga lote nga gitindugan karon sa napulo ka mga hospitals sa probinsiya ug ang Medical Center sa kasamtangan giproseso na nila ang paghingpit sa lima ka mga titulo ilabi na sa lote nga gitindugan sa kasamtangan karong ZaNorte Provincial Hospital.

Matud pa ni Sarmiento nakahinagbo sila karon ug problema kay adunay lote sa gitindugan karon sa Provincial Hospital nga adunay duha ka Deeds of Sale nga gi-execute. Gipahinumduman usab sa provincial attorney ang Sangguniang Panlalawigan nga ilawom sa ilang administrasyon duha ka mga dagkung lote nga gigamit sa probinsiya ang hingpit nang balhin ilawom sa pangalan sa ZaNorte human aprubahi sa balay balauranan ang pagpalit niini. (Press Freedom, Vol. XX No. 4)

 

Election sa ZANECO BOD Nobyembre 17

Gikatakda ang pagpahigayon sa eleksiyon sa Board of Director, District 7 sa Zamboanga del Norte Electric Cooperative kon ZANECO karong Nobembre 17, 2007. Kini ang gipahibawo ni Mrs. Baby Belotendos, Manager Information Services sa kooperatiba nga maoy incharge sa pagpahigayon sa maong piniliay. Ang electric cooperative sa Zamboanga del Norte gibahin siyam ka mga distrito gikan sa mga lungsod sa Rizal paingon na ngadto sa lungsod sa Liloy diin karong tuiga ang eleksiyon pagahimoon sa District 7, District 8 ug District 9.

Matud ni Mrs. Belotendos, ang District 7 gilangkoban sa mga lungsod sa Katipunan, Roxas, Manukan ug Jose Dalman diin ang eleksiyon ipahigayon na karong Nobembre 17.

Ang makapartisipar sa pagboto kadto lamang membro konsumante sa kooperatiba sa electrisidad diin pagahimoon ang eleksiyon sa gipahimutang voting center diha sa Katipunan Central School sa lungsod sa Katipunan, Roxas Central School sa lungsod sa Roxas, Manukan East Central School sa lungsod sa Manukan ug Jose Dalman Central School sa lungsod sa Jose Dalman.

Ang botasyon magsugod alas otso sa buntag ug motapos sa alas tres sa hapon. Ang deadline sa pagsubmiter sa Certificate of Candidacy alang niadtung interesado nga magpapili pagka Board of Director sa ZANECO kutob na lamang karong adlawa nga diha isubmiter sa main office sa Zaneco dinhi sa dakbayan sa Dipolog. Human sa piniliay sa District 7 karong Nobembre 17, matud ni Belotendos, ipahigayon na usab ang laing hugna sa piniliay karong Desyembre 8 sa Distrito 8 nga manglangkob na sa mga lungsod sa Sindangan, Siayan ug Leon B. Postigo. Pagka Desyembre 15 ang eleksiyon didto na usab ipahigayon sa Distrito 9 nga maglangkob sa mga lungsod sa Salug, Liloy, Labason, Tampilisan, Gutalac, Godod ug Kalawit.

Matud ni Mrs. Belotendos, ang first congressional district nga gilangkoban sa mga lungsod sa Rizal, Lalibterad, Sibutad, Piñan, Polanco, Mutia ug Sergio Osmeña tapos na nakapahigayon sa eleksiyon sa miaging tuig. Dinhi sa Dipolog ang eleksiyon gikatakda nga pagahimoon karong sunod tuig. Sumala pa nga sa matag tuig, tulo ka mga distrito ang magpili ug Board of Director. Ang mapili nga Board of Director sa Zaneco makaserbisyo lamang sulod sa tulo ka tuig ug puwede nga makapa-re-elect sulod lamang sa duha ka higayon isip katapusan nga termino. Dili sama sa local elective position sa gobiyerno nga ang mga politiko mahimong makapa-re-elect sulod sa tulo ka termino, apan ang Board of Director sa koperatiba gitugot lamang sulod sa duha ka termino.

Alang niadtung nagplano ug nag-interes nga magpapili pagka Board of Director sa kooperatiba sa elekrisidad sa Zamboanga del Norte, ang kualipikasyon ug disqualification sigun sa gimandar sa guidelines, ania si Mrs. Baby Belotendos. Sa nasayran nga tulo ka mga personalidad ang mipadayag sa ilang interes nga magpapili karong Nobembre 17. Sila mao si Incumbent Board of Director Arestela Adasa, Danilo Estrella nga taga Jose Dalman ug Antonio Liao, taga lungsod sa Katipunan.

Matud ni Mrs. Belotendos ang kopya sa COC diha kuhaon sa main office sa ZANECO dinhi sa dakbayan sa Dipolog diin ang deadline sa pagsubmiter kutob nalang adlawa. Iyang gipaklaro nga ang COC sa pagka Board of Director dili pareha sa COC sa Comelec. Ang piniliay pagadu-malahon sa mga magtutudlo sa Department of Education. (Press Freedom, Vol. XX No. 4)

 

Election Officers Zanorte mihimo’g
manifesto batok sa Comelec Manila

Kon nadismayar ang mga magtutudlo sa nahimong kausaban sa honorarium nga ilang madawat kay migamay, wala usab mahimoot ang mga election officers sa Zamboanga del Norte sa nadawat nilang memorandum nga nagpahibalo sa dakong kausaban sa nahunang kasabutan sa madawat nga suhol sa mga membro sa Board of Election Tellers.

Si Atty. Jay Balisado, Provincial Election Supervisor sa Comelec, Zamboanga del Norte mipahayag nga nahingangha sila sa dihang nadawat nila ang Memorandum gikan sa ilang Finance Services Department sa Commission on Election sa kaulohang Manila nga nagpahibalo kanila nga ang sohol nga honorarum nga ihatag sa matag membro sa Board of Election Tellers mokabat lamang ug tag usa ka libo ka pesos sigun sa Department of Budget and Management kon DBM SARO/NCA. Ang mga membro sa BET nga midumala usab sa Sanguniang Kabataan precincts ang pagadungagan ug kinientos ka pesos. Dugang kinientos ka pesos sa matag BET member alang sa transportation allowance.

Ang maong memorandum gipermahan ni Eduardo Mejos, Director IV, Finance Services Department sa Comelec Manila ug gi-parubahan ni Resurrection Borra, Acting Chairman sa Commission on Election. Matud ni Atty. Balisado, mismo ang mga election officers sa mga kalungsoran ug duha ka siyudad sa Dipolog ug Dapitan wala gayud mahimoot sa kalit nga kausaban sa honorarium nga madawat sa mga membro sa Board of Election Tellers. “Gisabotan na gud sa DepEd ug Comelec nga ang mga magtutudlo nga moserbe sa eleksiyon isip membro sa Board of Election Tellers makadawat ug tag dos tres mil ka pesos, unya karon nahimo naman hinoong usa ka libo,” reaksiyon sa mga election officers.

Tungod niini, gipahayag ni Provincial Election Supervisor Balisado nga ang tanang election officers sa Zamboanga del Norte ang mohimo ug manifesto ug ipadala sa ilang ulohang buhatan aron i-konsiderar ang nakabutang sa Memorandum gikan sa Finance Services Department nga tumanon gayud unsa man ang nahaunang kasabotan tali sa DepEd ug sa Commission. “Kon ang mga maestra wala malipay, kami sad sa field wala mahimoot sa gibuhat sa among ulohang buhatan, nagkanayon si Balisado.

Nagtuo si Atty. Balisado nga ang mga election officers maoy mahasngan sa kasuko sa mga magtutudlo, apan iyang giklaro nga dili sala ug sayop sa mga election officers nga mikupos ang ilang madawat nga honorarium kay kini maoy pagbuot sa ilang finance department. Angay masayran nga ang budget para honorarium sa mga magtutudlo ug uban pang galastohan gikaltas gikan sa Internal Revenue Allotment kon IRA sa Barangay hinungdan nga naglibog sila kon ngano nga gikapnan pa sa Comelec, Manila ang suhol sa mga membro sa Board of Election Tellers.

Base sa resolusyon sa Comelec, ang honorarium nga madawat sa mga mem-bro sa Board of Election Tellers tag tres mil ka pesos ug dugang kinientos pesos isip transportation allowance base sa Memorandum of Agreement tali sa Comelec ug Department of Education. Si Atty. Balisado nanawa-gan sa mga magtutudlo nga miserbe sa nakalabay’ng piniliay sa barangay ug saguniang kabataan isip membro sa Board of Election Tellers nga dili lang sila maoy basolon kay dili kini maoy ilang pagbuot. Gani tungod niini, sila mismo ang nadismaya hinungdan nga naghimo sila karon ug manifesto aron kon unsa ang nahaunang nasabutan nga tag tres mil mao gayud ang ihatag ngadto sa mga magtutudlo. (Press Freedom, Vol. XX No. 4)

 

P14.3M NAKOLEKTANG BUHIS GIKAN SA SAND AND GRAVEL

Gipahibawo sa hepe sa Zamboanga del Norte Environment Management Office o ZANEMO nga napalambo sa administrasyong Yebes ang pagkolekta sa buhis gikan sa sand and gravel gikan sa paglingkud niini sa tuig 2004 nga nakatabang ug daku sa nahipos nga pundo sa probinsiya nga gigamit sa nagkadaiya niining mga programa ug proyekto. Kini ang gibutyag ni Atty. Jes Gal Sarmiento, Jr. ang hepe sa ZANEMO atubangan sa Sangguniang Panlalawigan sa gipahigayon niining marathon budget hearing sa executive budget sa gobernador para sa tuig 2008.

Matud pa ni Atty. Sarmiento sigun sa records sa Provincial Treasurer’s Office nagpakita nga gikan sa paglingkud ni Governor Rolando Yebes sa tuig 2004 hangtud na sa buwan sa Oktobre 2007 ang nakolektang buhis gikan sa sand and gravel mokabat sa P14,336,775.90. Sa maong gidak-on sa buhis nga nakolekta ang probinsiya nakabahin niini ug P4,301,031.53 gikan sa 30% share sa lalawigan sa maong buhis kay ang bulto sa buhis gibilin sa barangay diin gikuha ang balas ug graba ingon man sa lungsod diin nahimutang ang barangay.

Matud pa ni Atty. Sarmiento sa panahon lang ni Governor Yebes nga kada tuig ang probinsiya makabahin ug tag kapin sa usa ka milyon ka pesos sa makolektang buhis gikan sa sand and gravel. (Press Freedom, Vol. XX No. 4)

ZANORTE WA PAY NADAWAT NGA BAYAD
SA PATRIMONIAL PROPERTIES NIINI SA ZAMBOANGA

Wala pa gayuy nadawat nga bayad ang kagamhanang probinsiyal sa Zamboanga del Norte sa iyang mga patrimonial properties nga nahimutang sa dakbayan sa Zamboanga nga kasamtangang giokopahan karon sa ubang mga ahensiya sa kagamhanan. Kini ang gipatin-aw ni Provincial Attorney Jes Gal Sarmiento, Jr. atubangan sa Sangguniang Panlalawigan sa pagpanalipod sa ilang gipadas-og nga budget para sa sunod tuig.

Matud pa niya sa pinaka ulahing panagtagbo nila ni Governor Rolando Yebes ug Mayor Celso Lobregat sa dakbayan sa Zamboanga gipasabot sa mayor nga nabayran na ang probinsiya sa paggamit nila sa patrimonial properties niini. Apan sa gihimong pagsubay sa Provincial Attorney’s Office wala silay nakitang records nga nabayran ang probinsiya sa iyang mga patrimonial properties nga nahimutang sa dakbayan sa Zamboanga nga gigamit karon sa ubang mga ahensiya sa gobyerno.

Angayang kasayran sa dihang gibuak ang Zamboanga province ngadto sa Zamboanga del Norte ug Zamboanga del Sur ang atong probinsiya nakabahin ug mga kayutaan sulod sa Zamboanga City. Ang mga mga patrimonial properties nadisisyunan mismo sa korte suprema nga kini gipanag-iyahan sa ZaNorte. Ang nasangpit nga mga patrimonial properties sa ZaNorte giokopahan na sa pipila ka mga ahensiya sa nasudnong kagamhanan.

Si Atty. Sarmiento midugang sa pagpahayag nga dili usab igkita ang titulo sa maong mga properties sa dihang gisubay nila kini sa Register of Deeds sa Zamboanga City. Sa kasamtangan ang Provincial Attorney’s Office nagapadayon pa sa pagpangita sa titulo sa maong patrimonial properties hangtud na didto sa korte suprema. (Press Freedom, Vol. XX No. 4)

SPECIAL PROVISION SA 2008 BUDGET SA
GOBERNADOR GIPATANGTANG SA SANGGUNIAN

Gipatang-tang sa mga meyembro sa Sangguniang Panlalawigan sa Zamboanga del Norte ang gipataban nga special provision sa 2008 Executive Budget sa gobernador nga nagtumong sa paghatag kaniya uban sa bise gobernador ug blanket authority diha na sa pagbalhin ug pundo nga dili na moagi sa pagdason sa balay balauranan. Unang mikwestyon niini mao si Board Member Anecito Darunday human gipresentar ni Provincial Budget Officer Mary Joy Abitona ang 2008 Executive Budget ni Governor Rolando Yebes nga gipailawom karon sa marathon budget hearing sa Sangguniang Panlalawigan.

Ilawom sa 2008 Executive Budget sa gobernador nga giduso para sa pagdason sa Sanggunian adunay gipataban niini nga special provisions diin ang una naghisgut nga pinasikad sa Section 336 sa Local Government Code of 1991 ang mga hepe ehekotibo o ang presiding officer sa Sanggunian ang gihatagan ug gahum sa pagdugang ug pundo sa bisan asa nga item sa maaprubahang annual budget nga kuhaon gikan sa savings sa ubang mga items nga nahulog sa samang expense class ilawom sa ilang tagsa-tagsa ka mga pahat nga pundo.

Apan kini nga special provision higpit nga gikwestyon ni Darunday kinsa nagkanayon nga pinasikad sa gimbut-an sa balaod ang pagdugang ug pundo sa bisan asa nga item sa budget nagkinahanglan ug pagpanday ug usa ka ordinansa. Gawas niini nakita usab sa mga bokal nga depektoso ang gipataban nga special provision sa executive budget particular na sap unto pag-usab sa staffing pattern sa pipila ka mga buhatan sa probinsiya.

Gipasabot sa balay balauranan sa probinsiya nga ang pagmugna ug bag-ong mga posisyon kinahanglan nga ipaagi sa usa ka ordinansa. Kon ipataban kini sa pagpanday sa annual budget pagka sunod tuig kinahanglang ilakip na usab ug balik ang pag-aprubar sa maong mga posisyon sanglit ang kinabuhi sa usa ka budget sulod lamang sa usa ka tuig. Giklaro sa mga magbabalaod sa probinsiya nga ang pagmugna ug bag-ong mga posisyon kinahanglang himoong sa usa ka buwag nga ordinansa ug dili ikarga sa annual budget.

Kabahin sa gipangayong blanket authority para sa gobernador ug bise gobernador alang na sa pagdugang ug pundo sa bisan asa nga items sa budget, ang mga bokal mipasalig nga magbuhat sila ug siparar nga ordinansa para niini ug dili ilakip sa annual budget.  Gawas pa ilang gipasabot ni Darunday nga wala sukad maglisud ang gobernador sa pagpangayo ug approval sa Sanggunian sa gipadas-og niining mga supplemental budget kay tanan niining mga hangyo ilaha mang giaprubahan.

Ang nasangpit nga baruganan ni Darunday gidasonan usab nila ni Board Member Edgar Baguio ug Cedric Adriatico. Sa sayu pa gipatin-aw ni Provincial Budget Officer Abitona nga kini ilahang gisuhid lamang sa budget ilawom sa buhatan sa presidente sa Republika sa Pilipinas, presidente sa senador ug house speaker diin gihatagan sila ug blanket authority sa pagdugang ug pundo sa ilang tagsa-tagsa ka mga budget kansang pundo kuhaon gikan sa savings sa susamang expense class. Samtang si Darunday mitataw nga ang gipangayo sa gobernador wala masubay sa Local Government Code.

Sa iyang kabahin si Board Member Adriatico nagkanayon nga kinahanglan tun-an nila kini ug ang pagpanday ug ordinansa kinahanglang isiparar sa annual budget. Samtang si Baguio mipahayag nga sukad sa iyang pagka meyembro sa Sangguniang Panlalawigan wala mahitabo nga ang annual budget sa probinsiya adunay ipataban nga special provision. Sa samang bahin namaymayan ang mga meyembro sa Local Finance Committee ni Board Member Felixberto Bolando, Majority floor leader sa Sanggunian nga unta sa sunod nilang sumitir ug budget proposal kinahanglang tun-an ug maayo ang tanang items niini kon nasunod ba ang mga gimbut-an sa balaod.

Kini ang nahimong panawagan ni Bolando tungod sa nakitang sayup sa gisumitir nga executive budget diha na sa paglakip sa P20 milyones ka pesos nga pundo nga surplus o savings nga wala pa mapa-ilawom sa reversion paingon sa General Fund. Unang nakamatikod niini si Board Member Baguio kinsa mitataw nga dili mamahimo nilang matuki ug apil ang nahisgutang pundo nga surplus kon wala pa kini mabalhin ilawom sa General Fund pinaagi sa pagpanday ug usa ka ordinansa.

Matud pa ni Baguio dili usab sila makapadayon sa pagtuki sa executive budget sa gobernador kon dili pa marevert ang nasangpit nga surplus balik sa General Fund sanglit kabahin kini sa gipahat-pahat nga pundo para sa operasyon sa probinsiya sa tuig 2008. Tuod man gipadas-og ni Bolando ang usa ka reversion ordinance nga ilang giaprubahan sulod lamang sa usa ka hugna ug pagadasonan sa sunod nilang regular session karong sunod semana nga retro-active ang pag-epekto niini gikan sa pagsumitir sa executive budget. (Press Freedom, Vol. XX No. 4)

DIPOLOGNON WALA MAGKINAHANGLAN UG
HUSTONG PROGRAMA SA GOBYERNO KAY KUWARTA RAY ILAHA

Maoy nakita karon sa kagamhanang probinsiyal sa Zamboanga del Norte nga ang mga katawhan sa dakbayan sa Dipolog wala magkinahanglan ug hustong programa sa gobyerno nga makatabang kanila. Kini ang nahimong reaksiyon ni Governor Rolando Yebes may kalabutan na sa nahimong resulta sa bag-ong gitapos nga eleksiyon sa barangay.

Sa iyang nakita andam ibaylo sa mga katawhan sa Dipolog ang gipahimuslan nilang libre nga sirbisyo bugti sa gamay nga kantidad nga ilang nadawat sa nakalabay nga pinalitay sa barangay. Matud pa sa gobernador dili sirbisyo ang gipangita sa katawhan sa Dipolog kon dili mao diay ang kuwarta. Hinoon sumala pa sa gobernador kini nagpanghitabo sa tibook 2nd district sa ZaNorte dinhi lamang sa dakbayan sa Dipolog ug wala sa mga kalungsuran diin hugtanong gilabanan sa katawhan sa mga kabarangay ang mga sirbisyo nga ilang nadawat gikan sa kagamhanan ug wala magpahaylo sa pinalitay sa barangay.

Sa iyang nakita aduna gayuy gamay nga problema ang mga katawhan sa Dipolog kay mosugot man sila nga mawagtang libreng sirbisyo sa kagamhanan ug mga proyekto bugti sa gamay nga kantidad nga ilang nadawat. Tungod niini, gipatin-aw ni Governor Yebes nga hayan makahinagbo ug kalangay ang hingpit nga implementasyon sa ilang programa sa barangay indigents kay iyaha kining patun-an ug balik. Samtang si Barangay Chairman-elect Nathan Patangan sa Diwan sayun ra sulbahon ang maong problema sa Dipolog magpalit lang ang mga kagamhanan ug makina nga mogama ug kuwarta kay magbuhat na lang sila ug daghang kuwarta para ipalit sa tawo.

Sa samang bahin mipalanog usab si Kapitan Patangan sa iyang kabalaka nga hayan kon adunay mamatay nga molopyo sa iyang barangay dili na usab kini malubong kay dili mohatag ug permiso ang city hall ilabi na nga dili siya kaalyado karon sa administrasyon. Tungod niini, iyang gipahibawo nga maoy iyang paningkamutan nga sila sa Diwan makabatun sa ilang kaugalingong sementeryo aron dili mahisama sa uban nga ang ilang patay wala malubong kay dili mohatag ug permiso ang city hall sa rason nga kontra partido ang patay.

Samtang si Governor Yebes miklaro nga magapadayon gihapon ang programa sa probinsiya para sa Dipolog sama sa livelihood ug libreng health care assistance program. Giklaro ni Governor Yebes nga bisan pa sa nahitabo magapadayon kini nga ipatuman tungod kay ang maong programa gimugna para man sa pagtabang sa mga kabus nga katawhan. (Press Freedom, Vol. XX No. 4)

 

DUGANG TULO KA MGA POSISYON SA
PROVINCIAL ACCOUNTANT GIAPRUBAHAN SA SANGGUNIAN

Giaprubahan kagahapon sa balay balauranan sa Zamboanga del Norte ang pagdugang ug tulo ka mga bag-ong posisyon ilawom sa Provincial Accountants Office pinasikad sa usa ka ordinansa nga gisertipikahan ni Governor Rolando Yebes nga urgent o dinalian. Ang nasangpit nga lakang gipanday sa Sangguniang Panlalawigan sulod lamang sa usa ka higayon. Sa sayu pa gipadas-og unta ni Board Member Anecito Darunday nga patun-an una kini sa hingtungdang komitiba sa Sanggunian.

Apan si Board Member Edgar Baguio, minority floor leader mitataw nga angayang ilang iduso ang nasangpit nga dili na kinahanglang ipasa pa nila sa komitiba kay ipailawom sa pagtuon sanglit ang nasangpit nga lakang gisirtipikahan sa gobernador nga dinalian. Tuod man gibakwi ni Darunday ang nahauna niyang mosyon ug gipadas-og niini nga ilang aprubahan dayon ang pagpanday sa maong ordinansa sulod lamang sa usa ka hugna sa ilang session.

Si Provincial Accountant Marivic Carpitanos, mipahayag nga ang tulo ka mga bag-ong posisyon nga nahimogso karon gikinahanglan kaayo alang na sa paspas nga pagpasutoy sa trabaho sa ilang opisina ilabi na pagsagup karon sa probinsiya sa electronic accounting. Gipatin-aw ni Carpitanos nga sulod sa dugay nga panahon ang staffing pattern sa Provincial Accountant sibu pa sa karaang panahon ug nabiyaan na sila sa ubang buhatan sa kagamhanan nga nagbatun na ug mga posisyon para sa ilang assistant.

Sumala pa niya kini maoy rason nga pipila sa mga karaang kawani sa Provincial Accountant ang namalhin ug laing trabaho kay wala silay kahigayunan nga mosaka sa ang-ang sa pagpanirbisyo kay walay gibutang nga mga posisyon alang sa ilang pag-uswag paingon sa unahan. (Press Freedom, Vol. XX No. 4)

ASPHALT OVERLAY SA LILOY-TITAY NAKARGA NA SA 2008 BUDGET

Nasakay na sa budget para sa sunod tuig 2008 ang pagbutang ug overlay asphalt sa nasudnong dalan gikan sa Leon Postigo, Zamboanga del Norte hangtud sa Titay, Zamboanga Sibugay. Kini ang gipahibawo ni Congressman Cesar Jalosjos, sa 3rd Congressional District atubangan sa nakita karong pagka guba na sa pipila ka bahin sa maong dalan.

Alang sa Liloy-Leon Postigo kini may gahin nga P112 milyones ka pesos para sa asphalt overlay ug laing P130 milyones ka pesos gikan sa Liloy paingon sa Titay. Ang nasangpit nga asphalt overlay gikatakda nang ipailawom sa public bidding karong buwan sa Nobyembre ug Desyembre. Matud pa ni Congressman Jalosjos aduna nay duha ka mga kontraktor nga mipadayag sa ilang interest nga moapil sa bidding.

Ang kongresista sa 3rd district sa ZaNorte iyaha nang gisultihan si DPWH Secretary Hermogenes Ebdane nga ipadali ang pagbidding sa maong proyekto para kasugdan gilayon ang pagtrabaho niini tungod kay ubay-ubay na nga bahin sa maong nasudnong dalan ang guba. Ang gihimo karong asphalt overlay gikan sa Leon Postigo paingon sa Salug, matud pa ni Congressman Jalosjos kabahin na sa P242 milyones ka pesos nga pundo nga gigahin ilawom sa 2008 budget para sa maong asphalt overlay project.

Kon aduna pay bahin sa maong nasudnong dalan nga dili matiwas sa pagpahigayon sa asphalt overlay, si Congressman Jalosjos nagkanayon nga iyaha kining pangayuan ug dugang pundo ilawom sa 2009 budget para mahingpit gayud ang proyekto. (Press Freedom, Vol. XX No. 4)

 

PAGPALAGPOT KANG DE VENECIA SA SPEAKERSHIP
HAYAN MAHINAYON –CONG. JALOSJOS

Gituhuan ni Congressman Cesar Jalosjos sa 3rd congressional district sa Zamboanga del Norte nga mahinayon gayud ang laraw nga pagpalagpot kang Speaker Jose De Venecia sa pagka pangulo sa ubos balay balauranan sa nasud sa pagbalik sa ilang session karong adlawa.

Giklaro ni Congressman Jalosjos nga ang plano sa pagpalagpot kang JDV sa speakership nagagikan mismo sa kaugalingong partido niini ang Lakas-CMD. Matud pa sa kongresista aduna nay mga tigum nga gipahigayon sa Lakas sa miaging mga adlaw nga gipatawag ni Congressman Datumanung ug ubang mga lideres sa maong partido.

Hinoon wala gayud siya masayud unsay nakab-ot nga disisyon kabahin sa planong palagpoton si De Venecia sa speakership sa ubos balay balauranan. Si Congressman Jalosjos nga sakup sa KAMPI apan kabahin sa kowalisyon sa kongreso nga naglangkub na sa Lakas, nagkanayon nga sila maghuwat lang unsay mahitabo karong adlawa didto sa hawanan sa balay balauranan sa nasud. (Press Freedom, Vol. XX No. 4)
 

Puya na-abandonar, gisagop

MAAYO na ang pagkahiluna karon sa usa ka puya nga nagpangidaron pa lang ug usa ka bulan nga una nang gikataho nga matod pa gi-abandonar sa iyang kaugalingong inahan haduol sa plaza sa capitolyo. Niadtong Lunes sa udto nabaniog pag-ayo ang report nga matod pa adunay gi-abandonar nga usa ka puya diha na sa plaza sa kapitolyo nga diin gibilin kini sa iyang inahan ngadto sa usa ka estudyante nga Grade 5. Ang inahan ang daritso lang kining milakaw ug wala na mibalik.

Ang mga tawo nga nakabantay sa maong estudyante nga nagkugos ug bata kini ang gibati ug kaluoy hinungdan nga gisukit-sukit kini pangutana. Siya ang misugilon nga matod pa igo lang siyang gipakugos sa maong puya gikan sa wala niya mailhing babaye. Human mapagya ang maong report. Mismo ang Provincial Social Welfare and Development Office ang mihimo kini ug action, ila kining gi-refer ngadto na sa Balay Dangpanan sa DSWD. Wala magdugay naabot ang mga personahe sa maong departamento. Taud-taud adunay usa ka 18 anyos nga babaye ang mibutho.

Sa gihimong follow-up sa mga miyembro sa Zamboanga del Norte United Correspondents (ZNUC) pinaagi sa telephone interview kagahapon. Gipasabot sa usa sa mga personahe sa Balay Dangpanan nga ang maong hitabo dili kini usa ka kaso sa pag-abandonar sa inahan ngadto sa iyang anak. Basi sa ilang gihimong pagsukit-sukit ang 18 anyos nga babaye ang mi-angkon kini nga iyang anak ang maong puya. Ug ang estudyante nga maoy iyang gibinlan iya kining igsoon nga diin niadtong higayuna igo lang siyang mi-uli sa ilaa aron mokaon ug mokuha ug gatas alang sa maong puya.

Sa nasayran ang maong usa ka bulan nga batang lalaki kini ang gihilantan niadtong higayona. Sa karon anaa na kini sa maayong pagkahiluna human usab nga boluntaryo nga mitugyan ang inahan niini ngadto sa Balay Dangpanan nga diin gisagop na kini karon sa usa ka magti-ayon. (Mindanao Star, Vol.III No.41)

 

2.8M farm equipment, cash assistance gitunol sa DA ngadto sa probinsya

Mokapin sa 2.8 milyones ka pesos nga farm equipment ug rainshelters ang pormal nga gi-turn over sa buhatan sa Department of Agriculture, regional office IX ngadto sa kagamhanang probinsyal sa Zamboanga del Norte kagahapon didto sa PAIC Irasan, lungsod sa Roxas.

Ang lungsod sa Jose Dalman, Gutalac, Sergio Osmeña, Tampilisan ug dakbayan sa Dapitan mao ang resipiente sa Corn sheller, Rice Thresher ang gidawat sa lungsod sa Sirawai, Hand Tractor sa lungsod sa Baliguian, Water Pump usab ang nadawat sa Irasan, Roxas Farm, barangay Gunyan sa Siayan, barangay Patawag ug Fatima sa Liloy nga adunay mga HI-GREEN program.

Ang tanang mga munisipyo usab ning lalawigan ang pulos nagpakadawat ug mga springklers, bolo, organic fertilizer ug grab hoe. Ang barangay Gunyan sa Siayan ang aduna usab kini usa ka incubator equipment. Gawas niini, pinaagi sa Support Emergency Livelihood Assistance Program kun SELAP ang lalawigan ang nakadawat usab kini ug pahat alang sa livelihood programs sama sa Budwood Nurseries sa kantidad nga P270,000 ka pesos ug P207,000 ka pesos usab nga pahat alang sa Coco Charcoal Processing and Marketing.

Ang maong mga farm equipment ug cheque ang personal kining gitunol ni Mr. Oscar Parawan ang Executive Director sa Department of Agriculture, Region IX ngadto kang Gov. Rolando Yebes ug sa buhatan sa Provincial Agriculturist pinaagi ni Ms. Maybel Bustaliño. Ang maong kalihokan ang gitambungan usab kini sa mga mayor gikan sa mga lungsod nga midawat sa maong farm equipment. (Sam Buddy, Mindanao Star, Vol.III No.41)

 

Water Pump naangkon sa Brgy. Lapu-lapu  gikan NI CONG. Cely Carreon, OPA

Mapahimuslan  na karon ang gihandum nga water pump alang sa mga mag-uuma nga maoy masilbang nakuha-an ug patubig alang sa ilang lagotmon ug goma  human na turn-over sa buhatan sa Provincial Agriculture pinaagi ni Maybel C. Bustalino ang Supervising Agriculturist didto sa Brgy Lapu-lapu sa lungsod sa PiÑan ning lalawigan niadtong November 5 ning tuiga. Pinaagi usab sa pagpaningkamot sa Congresita nga si Hon Cely J. Carreon sa premiro distrito nga nahatagan sa bag-ong kahimanan ang naasoy’ng mag-uuma sa ilang patubig nga mapadali ang pagpasaka o masuyop ang tubig gikan sa sapa nga maoy duol sa ilang mga similya ug tanum.

Meanwhile, Mayor Siasico of Siayan is one of the recipients of a waterpump for barangay Gunyan Hi-Green program.

Kini maoy gabay sa naalimahan nga proyekto gikan sa Intergrated Hillyland Green Rehabelation and Livelihood Program kon Hi-green sa Provincial Government nga maoy priority nga proyekto ni Governor Rolando E. Yebes diha sa industriya sa agrikutura. Sa pakighinabi ni Patricio Kilop ang presidente sa mag-uuma nga matud pa nga ila na gayud nga mapahimuslan ang bag-ong water pump nga diin makapamubo’ sa ilang lagotman susama sa talong, atsal, Cabbage ug ang ilang usa ka libo nga igtalamon nga paliya ug ang alang 10 thousand  ka mga halaman sa goma nga gisugdan niadtong bulan sa Hulyo ning tuiga nga diin maoy gi-alimahan sa 30 ka mga mag-uuma sa maong barangay.

Si  Fedel Pitugo ang Brgy Capitan sa Lapu-lapu ang mipaabot usab sa iyang pasalamat ngadto kang Hon. Cely J. Carreon ug sa amahan sa probinsya ug sa mayor sa ilang lungsod kinsa ang mi-ayuda sa ilang association aron mapalambo ang ilang barangay pinaagi sa program ug dugang panginabihian alang sa mga katawhan ilabina ang mga mag-uuma. (Psalm, Mindanao Star, Vol.III No.41)

 

Kabataan nagpabiling paglaum sa katilingban
–Yebes sa mga opisyales sa Rotary Youth

“ANG mga kabataan maoy nagpabiling paglaum sa katilingban alang sa maayong pag-gobyerno ug demokrasya nga dili kinahanglang mogamit ug kuwarta kung kini ang mosulod sa politika aron mamalit ug boto.” Kini maoy gihatagan ug gibug-aton ni Governor Rolando Yebes atul sa conference sa gi-instalar nga mga opisyales sa rotary youth sa probinsiya tali sa mga Department Heads.

Gipahayag ni Governor Yebes nga subo kaayo lantawon nga ang bag-uhay pa lamang nga Barangay ug SK Election nagpasulabi ang kuwarta nga maoy gigamit pagpamalit ug boto bisan ang Sangguniang Kabataan. Ang mga kabataan gitudloan na sa maong hugaw kaayo nga pamolitika. Sa temporaryo karon nga pagdumala sa probinsiya pinaagi sa mga rotary youth provincial officials wala nila kini palita. Alang sa gobernador kinahanglan nga ipakita nga molihok sila sama sa usa ka ordinaryo nga opisyal sa lalawigan.

Gidugang sa gobernador nga nawad-an na siya ug pagsalig sa ubang mga barangay ug Sk officials tungod kay uban kanila ang nanglimbong sa adlaw sa piniliay. Prangka usab niyang gipadayag nga bisan sa kadaghan sa mga programa ug tabang nga gitunol sa gobyerno ngadto sa barangay mahikalimtan kini sa mga katawhan pag-abot sa adlaw sa election tungod kay nag-apas kini ug kuwarta. Busa alang kaniya kinahanglan nga usbon na ang balaod nga diin sa karon gihatagan ug gahom ang anaa sa pinaka-ubos nga ang-ang sa katilingban nga makabotar nga diin alang kang Governor Yebes mas maayo ibalik ang kaniadto nga balaod nga ang mga tawo nga anaa sa middle class mao lamang ang gihatagan ug gahom nga makapili ug kandidato. Nakita ni Governor Yebes nga mas gipahimuslan ang mga pobre nga linglahon lamang ug kuwarta atul sa election.

Samtang gihagit usab ni Governor Yebes uban ni Provincial Administrator Atty. Rafael Cabanlit ang mga Rotary Youth Provincial Officials pinaagi sa ilang gobernador nga si Angelica J. Carreon nga dili kini magpanuko sa pagtug-an kung unsay nakita nilang kahiwian sa mga buhatan sulod sa capitolyo sa usa ka semana nila nga paglingkod. (Mindanao Star, Vol.III No.41)

 

Tabang ug pribelihiyo sa mga Senior Citizens
ipadayon sa pagtunol sa kagamhanang probinsyal

Gipahigayon kaniadtong, Nobyembre 8 ang duha ka adlaw nga Provincial Convention of Senior Citizens didto sa Restaurant Area, ZN Convention & Exhibition Center nga gipasiugdahan sa kagamhanang probinsyal pinaagi sa Provincial Social Welfare & Development Office. Ang maong kalihokan, kini gisalmutan sa mga Municipal Federations of Senior Citizens gikan sa una hangtod sa tersiro distrito ning lalawigan sa Zamboanga del Norte uban ang partisipasyon usab sa mga Municipal Social Welfare and Development Officers.

Nahimong pinasidunggang dinapit usab si Governor Rolando Yebes ug Vice Governor Francis Olvis nga mapasalamaton kaayo sa mga Senior Citizens sa ilang dakong pagpakabana sa katilingban ug sa probinsya. Gipamahayag usab sa duha ka mga respitadong opisyal nga wala sila magmakuli sa pagtabang sa maong hut-ong sa katilingban pinaagi sa pagtunol ug mga nagkalain-laing mga proyekto, benipisyo o pribelihiyo ngadto sa mga miembro sa asosasyon sa tibuok probinsya.

Sa kabahin ni Vice Governor Olvis, garbo usab sa kasamtangang administrasyon ang patas nga paghatod sa serbisyo ngadto sa 691 ka mga barangay ning lalawigan diin nahatagan kini ug tag tunga hangtod usa ka milyon o labaw pa nga mga proyekto nga napahimuslan na sa katawhan. Sa mensahe ni Gov. Yebes, iyang gihimong gabayan ang panultihon nga “Ang hindi lumingon sa kanyang pinanggalingan, ang hindi makakarating sa kanyang paroroonan” kini maoy hinungdan nga ang mga partisipante nakab-ot nila ang ilang retiring age.

Gihatagan usab ug panahon ni Gov. Yebes si Ms. Angelica Jalosjos Carreon ang Rotary Youth Provincial Governor nga mopalanog sa iyang mensahe. Matud pa ni Carreon nga ang mga senior citizens ang angayang hatagan kini ug dakong respito ug ang paghatag kanila ug gugma, benipisyo ug mga katungod diha sa katilingban. Ang buhatan sa PSWDO ang mipahigayon usab kini ug mga lectures uban ang mga resource speakers sama ni Mr. Edsel Eway, RN gikan sa Dipolog Medical Center nga mituki sa Healthy Lifestyle and Diet for Elderly, Ms Pilar Francisco, Technical Staff sa DSWD Region-IX nga mihatag ug Updates of Senior Citizens Programs and Services.

Niadtong Nobyembre 9, Biernes gihimo ang culmination program diin aduna usay mga kompetisyon sa Vocal solo, Balak, Balitaw ug dula nga Dama diin ang mga mananaog ang makadawat kini ug mga certificates ug cash prizes. Si Hon. Cedric Adriatico, Chairman, Committee on Social welfare & Community Development diha sa Sangguniang Panlalawigan, mao ang ilang pinasidunggang dinapit sa pagtak-op unya sa mga kalihokan. Ang mga municipal federations of senior citizens ang nagpadawat usab ug mga gitara nga pormal nga gitunol si Gov. Yebes, Vice Gov. Olvis ug Ms. Sabal. Si Ms. Grace Marylen Sabal, PSWDO assistant department head ang mapasalamaton kini sa mga misalmot sa maong duha ka adlaw nga kalihokan. (Sam Buddy, Mindanao Star, Vol.III No.41)

 

Hi-green program gilusad sa Labason

LAING integrated Hillylands Greens Rehabilitation and Livelihood Program kun na naila na sa gitawag nga HI-GREEN ang gilusad sa kagamhanang probinsiyal sa Zamboanga del Norte sa barangay Patawag sa lungsod sa Labason niadtong Nobyembre 4, 2007. Kini ang gipangunayan mismo ni Governor Rolando Yebes uban sa taga Provincial Agriculture nga mainiton usab nga gidawat ug gisaksihan sa mga kadagkuan sa Labason ug mismo sa taga barangay Patawag. Sa gihimong programa gipaabot ni Governor Yebes ang iyang pagdasig sa mga katawhan sa maong barangay ang dugang kakugi. Sa iyang ikaduhang termino magasentro ang iyang programa sa livelihood nga maoy usa sa sulbad sa kagutom sa mga katawhan.

Sa paglusad sa maong HI-GREEN program sa nasangpit nga barangay makatabang na kini ug dako sa mga katawhan nga makakuha libre sa unsa mang tanom nga mapahimuslan sa umaabot nga adlaw. Ang maong programa ang gituyo ni Governor Yebes aron mapaduol ngadto sa katawhan ang gikinahanglan sa mga tawo ilabina sa agrikultura, gawas niini aron mahibalik usab ang naandan nga hitsura sa atong kabukiran nga puno sa mga kahoyu.

Dako ang pagpasalamat ni Governor Yebes ngadto sa mga barangay officials sa Patawag sa gipakita niining suporta sa programa alang sa mga katawhan. Samtang mipaabot usab sa iyang panawagan si SB member Riza Melicor nga hikalimtan na ang nakalabay nga Barangay ug SK Election ug kinahanglan nang magkahiusa. Sa paglusad sa HI-GREEN program giturn-over usab ni Governor Yebes ang mga seedlings ug mga kagamitan sa pang-uma. (Mindanao Star, Vol.III No.41)

 

10 barangay sa Piñan padayon mag-ugmad sa HI-GREEN

Pulo ka mga barangay sa lungsod sa PiÑan ang padayon karon sa pag-ugmad sa ilang program nga gihatag sa probinsya pinaagi sa Intergreted Hillylang Green Rehabilation and Livelihood Program kon Hi-Green diha sa buhatan sa Provincial Agriculture. Sa nasayran pinaagi ni Marlyn Regencia ang municipal Agriculturist sa lungsod sa PiÑan nga adunay mga Nursery sa Goma ug mga nagkadaiyang lagotman ang gipangtanum sa matag 10 ka mga barangay nilangkubang sa Brgy Adante, Lapu-lapu, Villarico, Tinaytayan, Sta Fe, Gumay, Bagong Silang , Junom, Lower Gumay ug ang Brgy Daan Tipan.

Dugang pa ni Regencia nga diha sa ilang pag-monitor sa napulo ka mga barangay ang barangay Lapu-lapu, Villarico ug barangay Gumay ang nakapundar ug dinagku sa pagtamun ug Goma sukwahi sa ubang barangay nga diin ang logotman ang ilang nasugdan. Ang Barangay Lapu-lapu diin adunay 10 mil ka mga halaman sa Goma nga gisugdann niadtong bulan sa Hulyo ning tuiga ug pinaagi usab sa ilang barangay Capitan nga si Fedel Pitugo nga mihatag ug luna alang sa pagtanum sa Goma ug lagotman nga mag-ugmad ang usa ka hectaya sa yuta diha sa ilang barangay.

Ang program sa Hi-Green ang gisugdan kini niadtong nakalabay’ng tuig diha sa maong lungsod pinaagi sa ayuda ni Mayor Ricardo Sabandal, Hon Cely J. Carreon ang congresita sa Ist district ug ang napulo ka mga barangay kina ang naningkamot nga naangkon ug igong proyekto ug dugang panginabuhian sa ilang pamilya. (Mindanao Star, Vol.III No.41)

 

Yebes mihagit SA mga school board teachers nga
ipabilin ang pagtudlo ug maayong gawi sa mga tinun-an

ANG pag-umol sa mga kabataan pinaagi sa pagtudlo ug maayong gawi maoy nag-unang kaakohan sa mga magtutudlo. Niadtong Martes, Nobyembre 6, 2007 gihimo ang Values Formation Seminar uban sa pagpili sa bag-ong hut-ong sa mga opisyales sa School Board Teachers Organization dinhi sa Zamboanga del Norte nga gipahigayon sa Convention Center.

Gipaabot ni Governor Yebes ngadto sa 160 ka mga partisipante ang pagpatuman sa nag-unang kaakohan sa mga magtutudlo ngadto sa mga kabataan nga tudloan kini sa mga maayong gawi. Iyang na-obserbahan nga hangtud karon nagpabilin pa gihapon dinhi sa Zamboanga del Norte ang crab mentality - kinaiya sa usa ka tawo nga kung kinsa ang anaa nabutang sa ibabaw nga bahin iya kining birahon paubos tungod kay anaa ang kasina. Gusto sa gobernador nga kini ang mausob pinaagi sa tabang sa mga magtutudlo diha na sa ilang matag estudyante pagtudlo ug mga maayong gawi.

Gipaambit usab sa gobernador ang iyang gibating pagkadismaya sa nakalabay nga Barangay ug SK Election tungod kay sa usa lamang ka adlaw nawala na ang loyalty ug utang kabobot-on tungod lang sa kuwarta nga gihatag gikan sa mga kandidato. Busa itudlo unta sa mga kabataan nga dili na angayang matintal ug kuwarta panahon sa election, tungod kay mao kini ang hinungdan nga kadaghanan sa mga kabos ang dili na malubong kung kini ang mamatay.

Nakita nga ang mga magtutudlo ang maoy maka-impluwensiya ug dako sa mga kabataan, Gipangandoy ni Governor Yebes nga sa umaabot nga panahon ang election dinhi sa atong lalawigan dili na maghari ang kuwarta. Iyang gipanghinaot nga kung mahuman na siya sa iyang termino ug mobalik na siya pagka sibilyan ang tanang mga katawhan sa Zanorte ang magkahiusa ug mag-usab niini ang mga maot nga kinaiya.

Gipasabot ni Governor Yebes ngadto sa mga school board teachers nga sa karon ngsilbing training pa ang ilang kahimtang ug sa maabot nga panahon hayan makaangkon na kini ug item ilalom sa Department of Education. Gipahimumduman ni Governor Yebes ang mga School Board Teachers nga kinahanglan ibutang sa kasing-kasing ang pag-awit sa National Anthem ug Zanorte Hymn kini human nga iyang namatikdan nga uban kanila baliwala ra ang pagkanta niini. (Mindanao Star, Vol.III No.41)

 

Mayoriya sa midaug sa barangay kaalyado sa APP
Yebes preparado na Sa piniliay sa 2010

Bisan kon lima pa lang ka bulan ang milabay human gipahigayon ang local election, ug semana pa ang nakalabay human gitapos ang piniliay sa barangay, gideklarar ni Governor Rolando Yebes nga preparado na siya bisan si kinsa ang mokontra kaniya karong umalabot eleksiyon sa dos mil dyes.

Kini ang gipahayag sa gobernador atubangan sa mga barangay kapitanes sa lungsod sa Roxas samtang iyang gipaabot ang iyang pahalipay sa mga midaug nga kandidato sa barangay. Matud sa gobernador, mas kampante siya karong panahona human sa resulta sa eleksiyon sa barangay gumikan kay halos sa midaug nga kapitan ug konsehal sa tulo ka mga distrito polos kaalyado sa Alliance of Parties for Progress kon APP.

Nasayran nga permero ug tersero distrito nangharos ang mga kandidato nga kaalyado sa APP samtang dinhi sa segundo distrito, ang Dipolog lamang ang mamahimong maangkon sa ilang kaatbang sa politika. Matud ni Governor Yebes, niadtung nakalabay’ng eleksiyon wala siya magdahum nga modaug sa segundo distrito apan sa migawas nga resulta, milabaw pa siya ug dose mil botos batok sa iyang kaatbang nga si kanhi Mayor Roberto Uy pagka gobernador.

Aminado ang gobernador nga dinhi sa Dipolog ra ang problema sa kamada sa politika gumikan kay sa 21 ka barangay, usa lamang ang iyang kapitan nga midaug, apan kon sumadahon sa kinatibuk-an sa segundo distrito, mas lamang gihapon ang iyang mga lider sa barangay tungod kay gikan sa lungsod sa Katipunan, Roxas, Manukan, Sindangan ug Siayan halos tanan kaalyado sa APP. Sa nasayran nga sa lungsod sa Jose Dalman nagtunga sila ug lider gumikan kay sa 18 ka barangay, siyam ang iya nga midaug.

Busa matud sa gobernador, mas kampante kaayo siya karong panahona kon sa eleksiyon sa dos mil dyes ang hisgutan kay iya na kining gipangandaman bisan kon layo pa kaayo ang piniliay. Giawhag lang ni Governor Yebes ang tanan niyang kaalyado nga mga barangay kapitan nga magapabiling mosalig sa iyang liderato sa probinsya kay dili niya ihikaw ang tanang tabang kutob sa iyang mahimo alang sa kauswagan ug kalamboan sa barangay sa mga katawhan niini. (The New Nandau, Vol. XVII No.19)

Duha lamang ang magsangka Pagka  Board of Director sa zaneco

Duha lamang ang magsangka pagka Board of Director sa Zamboanga del Norte Electric Cooperative kon ZANECO diin ang piniliay pagahimoon karong Nobembre 17, alang sa Distrito syete nga maglangkob sa mga lungsod sa Katipunan, Roxas, Manukan ug Jose Dalman.

Kini ang gibutyag sa buhatan sa ZANECO diin kagahapon lamang adlawa kutob ang deadline sa pagsubmiter sa Certificate of Candidacy pagka Board of Director alang sa Distrito 7 nga gilangkoban sa nasangpit nga mga lungsod. Ang magpapili pagka BOD mao sila si Antonio Liao, taga lungsod sa Katipunan ug Arestela Adasa, Incumbent Board of Director.

Sa sayo pa, tulo ang miduso ug COC ngadto sa ZANECO apan kagahapong adlawa nasayran nga si Danilo Estrella nga taga Jose Dalman ang miwithdraw sa iyang kandidatura human matud pa, gipohalan ni Adasa nga dili nalang mag-apil-apil sa eleksiyon. Wala hinoon gibutyag kon ang pagsibog ni Estrella gibayran ilabi na nga duha na sila sa lungsod sa Jose Dalman ang magpapili.

Ang mga kandidato sa pagka Board of Director dunay polo ka adlaw sa pagpangam-panya diin gipahayag ni Mrs. Baby Belotendos nga ang kualipikado lamang nga makaboto mao ang membro konsumante sa ZANECO. (The New Nandau, Vol. XVII No.19)

 

ZN daghang yuta walay titulo

Hangtud karon 55 ka tuig na ang nakalabay gikan sa pagka himogso sa Zamboanga del Norte sa pagka probinsiya nagapabilin nga daghan pa kini ug mga gibatunang yuta nga wala pay titulo. Gipahibawo ni Provincial Attorney Jes Gal Sarmiento, Jr. nga gitahasan karon ni Governor Rolando Yebes ang ilang buhatan sa pagpatitulo sa nagkadaiyang mga yuta nga gipanag-iyahan sa probinsiya nga hangtud karon wala pa mabutang sa pangalan sa ZaNorte.

Si Atty. Sarmiento sa iyang pag-atubang sa Sangguniang Panlalawigan alang na sa pagpanalipod sa ilang budget para sunod tuig hugtanong nagahangyo sa mga bokal sa pagdason sa gipangayo nilang pundo nga gamiton para na sa pagpatitulo sa mga yuta nga gipanag-iyahan sa probinsiya nga pabiling wala pa mabalhin sa pangalan sa ZaNorte. Matud pa ni Atty. Sarmiento sa gihimo nilang pagsubay maoy milutaw nga pipila sa mga kayutaan sa probinsiya nga nabatunan niini pinaagi sa donasyon o kaha gipalit ang wala pay titulo ilawom sa pangalan sa ZaNorte.

Gibutyag sa provincial attorney nga sa mga yuta nga gitindugan sa mga buhatan sa Provincial Engineering ang adunay titulo mao ra ang Obay sa Polanco ug didto sa Labason. Mismo sa provincial capitol area dili tanang yuta nga giokopahan niini ang adunay titulo nga nakapangalan sa probinsiya. Samtang sa 11 ka mga nurseries sa agrikultura nga nakatag sa nagkadaiyang bahin sa lalawigan duha lamang niini ang nagbatun ug titulo.

Sa mga lote nga gitindugan karon sa napulo ka mga hospitals sa probinsiya ug ang Medical Center sa kasamtangan giproseso na nila ang paghingpit sa lima ka mga titulo ilabi na sa lote nga gitindugan sa kasamtangan karong ZaNorte Provincial Hospital. Matud pa ni Sarmiento nakahinagbo sila karon ug problema kay adunay lote sa gitindugan karon sa Provincial Hospital nga adunay duha ka Deeds of Sale nga gi-execute. (The New Nandau, Vol. XVII No.19)

 

Barangay ug SK ELEKSYON MALINAWON Lungsod sa Siayan

Hapsay ug linaw ang nahitabong Barangay ug Sangguniang Kabataan Eleksyon sa Lungsod sa Siayan kaniadtong Octobre 29, 2007. Mao kini ang nasayran sa buhatan sa kapolisan sanglit wala may mga sumbong nga kasamok niadtong miaging piniliaya.

Ang mga napiling bag-ong kapitanes mao kining mosunod: Barangay Pobla-cion, Brgy. Captain Primitivo Castillo; Brgy. Balok, Jaime Manginsay; Brgy. Balunokan, Ely Okay; Brgy. Dagatan, Marcos Alas; Brgy. Denuyan, Ubaldo Ansacon; Brgy. Diongan, Inocencio Limbang; Brgy. Domogok. Florentino Agustin; Brgy. Dumpilas, Alfredo Magallano; Brgy. Gonayen, Eduardo Bimbo; Brgy. Guibo, Victor Mosep; Brgy. Litolet Abdon Aloc, Jr.; Brgy. Macasing, Virgelio Padilla; Brgy. Gunyan, Camilo Ledesma; Brgy. Mangilay, Fulgencio Marin-doque, Jr.; Brgy. Moyo, Emeliano Villalon; Brgy. Muñoz, Allan Banzuela; Brgy. Pange, Dalmacio Lubac; Brgy. Paranglumba, Johnny Anugon; Brgy. Polayo, Henry Decierdo; Brgy. Seriac, Carlos Caba-niero; brgy. Soguilon Felo-mino Gumandam; and Brgy. Sayaw, Venciano Sugabo.

Tulo lamang ka mga kapitan nga walay kaatbang sila Brgy. Captain Abdon Aloc, Jr. sa Brgy. Litolet; Brgy. Captain Henry De-cierdo sa Barangay Polayo ug Barangay Captain Fulgencio Marindoque, Jr. sa Barangay Mangilay. Karong umaabot Nov. 30, 2007 mao ang unang adlaw sa ilang katungdanan sa mga bag-ong napiling opisyales. . (The New Nandau, Vol. XVII No.19)

 

Ordinansa pagdili sa pagamit ug air compressor
sa pagpanagat giduso na sa SP Zanorte

Giduso na sa Sanguniang Panlalawigan sa Zambo-anga del Norte ang provincial ordinance sa pag-regulate diha sa pagpanguha ug isda ug kinhason sama sa andres-andres sa kadagatan nga gidili ang pagamit sa bisan usang gadgets sama sa Air Compressor ug uban pa. Ang maong ordinansa ang gipangamahanan ni Board Member Fernando “Jun” Cabigon, Chairman sa Committee on Agriculture subay na sa sugyot ni Mr. Vicente “Vic” Sanchez, Jr., OIC-Provincial Veterenarian Officer ug maoy nagdumala sa mga special project ilawom sa buhatan sa gobernador.

Sa iyang explanatory note atol sa ilang reglar session niadtung Lunes, gibutyag ni Board Member Cabigon ang Andres-andres nga kinhason abunda sa mga kadagatan sa mga lungsod sa Katipunan, Roxas, Manukan, Jose Dalman, Leon Postigo ug Baliguian, Zamboanga del Norte.  Kaniadto kini gibaligya sa tag dyes pesos matag caltex apan karon mapalit na sa tag P30 pesos sa bisan unsang gidak-on gumikan kay dunay mamalitay niini nga dad-on sa Manila ug gi-export ngadto na sa Taiwan ug Hongkong.

Matud ni Cabigon sa matag adlaw, ang Andres-andres nga makuha gibanabana nga anaa sa usa ka tonilada ngadto sa duha ka tonilada gamit ang Air Compressor nga wala gidili sa balaod ilabi na sa Philipine Fishiries Code. Para ni Cabigon, alarming na kaayo ang gidaghanon sa gagmay’ng Andres-andres nga makuha ug gibaligya ngadto sa merkado. Kon kini mapasagdahan ug dili ma-regulate, hayan mawala ang Andres-andres dinhi sa atong dapit ug dili na makatilaw pa ang umalabot sa atong henerasyon.

Busa pinasubay niini, si Board Member Cabigon mipadas-ug sa maong ordinansa sa pag-regulate sa pagpanguha ug Andres-andres nga did-an ang pagamit ug Air Compressor. Ang masakpan dunay multa nga usa ka libo alang sa unang kalapasan, duha ka libo sa ikaduhang kalapasan, tres mil ka pesos alang sa ikatulong kalapasan ug singko mil ka pesos sa ika-upat nga kalapasan ug pagka bilanggo ug usa ka bulan, depende sa diskrisyon sa korte. . (The New Nandau, Vol. XVII No.19)

 

 

 

NOTE: SEND US YOUR NEWS.  Tell us what's going on in your barangays, clubs, schools, businesses and non profit organization. You can also send notices and announcements.
          

 

    Email to webmaster@dipolognon.com

      
Google
WEB THE DAILY DIPOLOGNON