2

November 8  2007

 

Ayaw paggamit resibo nga dili rehistrado –BIR

Higpit nga gipasidan-an sa Bureau of Internal Revenue District No. 91 ang tanang mga magpapatigayon ug Value Added Tax payers sa pagparehistro gayud sa ilang ihatag nga resibo sa ilang buhatan para dili siya mapahamtangan sa tukmang silut ug multa.

Matud pa ni BIR Administrative Officer Rudy Suello, kini nga kalapasan maoy kasagarang masakpan sa ilang gipahigayong tax mapping nga ang mga magpapatigayon nagbatun ug mga resibo apan dili rehistrado sa ilang buhatan. Sa samang bahin gitambagan usab sa BIR ang mga consumers nga lantawon gayud nila sa husto ang itunol nga resibo sa mga negosyante kon kini rehistrado ba sa ilang buhatan.

Ang mga resibo nga rehistrado sa BIR, matud pa ni Suello mao kadtong nagbatun Tax Identification Number, pangalan sa tag-iya sa patigayon, address ug labaw sa tanan ang authority number nga gikan sa ilang buhatan. Sumala pa kini nga kalapasan maoy daghan nilang nasakpan atubangan sa nagapadayon nilang Papremyo Sa Resibo. (Press Freedom, Vol. XX No. 2)

 

ZN gamiton para ‘biofuel production’

Ang lalawigan sa Zamboanga del Norte pabiling giila sa Department of Agriculture nga usa sa mga probinsiya nga gamiton para na sa biofuels production particular na diha sa pagtanum sa gikinahanglang feedstock. Kini ang report nga nadawat ni Agriculture Secretary Arthur Yap gikan sa Biofuels Feedstock Group sa iyang departamento kinsa mipahibawo nga adunay 15 ka mga interesadong kompaniya nga andam mobutang ug puhunan nga mokabat sa P34.08 bilyones ka pesos alang na sa pagtanum sa mga produkto sa agrikultura para sa  biofuel feedstock.

Sigun sa report ang giplanohang investments maglangkub na sa pagtanum sa biofuel feedstock sama sa tubo, cassava, jatropha, mais, palm tree ug lubi. Sa kinatibuk-an ang proyekto nagkinahanglan ug 725,300 ka ektaryang luna sa yuta para katamnan sa maong feedstock. Hinoon wala ibutyag sa Department of Agriculture ang mga pangalan sa kompaniya nga mipadayag sa ilang dakung interest nga mobutang ug puhunan para na sa biofuels production, samtang anaa pa sa nagkadaiyang ang-ang sa negosasyon ang nasangpit nga mga investors tali na sa mamahimo nilang mga kasosyo nga mga kompaniya dinhi sa Pilipinas uban sa mga investors gikan sa Australia, Japan, America, China, United Kingdom, Germany ug India.

Sumala pa ang ibutang nga puhunan nabahin sa duha diin ang P19.18 bilyones ka pesos niini ang gamiton para sa pagtanum sa mga gikinahanglang feedstock ug ang P14.9 bilyones ka pesos maoy gamiton sa pagpa-tindog sa gikinahanglang processing plants o inpras-traktura. Ang mga investors matud pa sa Department of Agriculture naglaraw sa pagpatindog sa ilang mga processing plants sa pipila ka mga reheyon sa atong nasud diin usa na sa nahisgutan mao ang lalawigan sa Zamboanga del Norte para sa pagtanum ug sugarcane.

Ang ubang mga reheyon nga gipuntirya para sa biofuels feedstock production ug processing plant naglakip na sa reheyon sa Ilocos, Cagayan Valley, Western Visayas, Northern Minda-nao, Southern Mindanao ug Davao. Sumala pa maoy gitinguha karon sa mga investors nga makakuha sila ug mga lease agreements ug contract growing kay maoy ilang gusto nga makasapi usab ang mga mag-uuma sa maong proyekto pinaagi sa profit sharing o sa uban pang mga pamaagi para makamugna ug dugang trabaho ingon man mapalambo ang ilang production.

Kahinumduman dinhi sa atong probinsiya ang nainterest nga kompaniya mao ang Zambo Norte Biofuels Energy Corporation kinsa naglaraw sa pagtanum ug sugarcane sulod sa napulo ka libu ka ektaryang luna nga nahimutang sa Gutalac, Kalawit ug Labason. Sa sayu nga bahin ning tuiga ang mga kadagkuan sa Zambo Norte Biofuels Energy Corporation pormal nga milusad sa ilang 200 hectares nga nursery sa sugarcane didto sa lungsod sa Gutalac diin sunod tuig giplanohan nila ang pagsugod ug patindog sa processing plant alang na sa biofuels production. (Press Freedom, Vol. XX No. 2)

 

Serbisyo sa mga bag-ong opisyales magsugod Nov. 30

Mosugod sa ilang opisyal nga paglingkud sa katungdanan ang tanang bag-ong napili nga mga opisyales sa barangay karong udto sa Nobyembre 30, 2007. Kini ang gipahibawo ni Atty. Wilfred Jay Balisado, Provincial Election Supervisor sa Zamboanga del Norte karon nga nahingpit na ang pagproklamar sa migawas nga mananaug sa bag-ong gitapos nga barangay ug Sangguniang Kabataan elections sa Oktobre 29, 2007.

Matud pa ni Atty. Balisado sama sa mga local officials ang mga bag-ong napili nga mga opisyales sa barangay ug SK magbatun ug tulo ka tuig nga termino sigun sa nabutang sa balaod. Ang mo-instalar sa tanang mga bag-ong napili nga mga opisyales sa barangay mao ang mga tinugyanan sa Department of Interior and Local Government sa matag munisipyo o siyudad.

Gawas sa Barangay Sigayan sa dakbayan sa Dapitan nga nagpatas sa nakuhang botos ang managka atbang pagka kapitan diin mag toss coin ang duruha ang tanang 690 ka barangay sa ZaNorte naka proklamar sa manana-ug nilang opisyales sa barangay. Sa sayu pa gideklarar sa COMELEC sa ZaNorte nga malinawon ug malamposon ang pagpahigayon sa maong eleksiyon nga walay dagkung panghitabo nga nakapatay-og ug nakapatugaw sa pagpahigayon sa maong piniliay.

Sa samang bahin nang gawas usab ang mga naandang reklamo ilabi na pagka wagtang sa pangalan sa botante diha sa talaan sa mga rehistradong elector. Dinhi sa Dipolog ubay-ubay nga mga rehistradong botante ang mipasibaw sa ilang katingala sa pagka-wagtang sa ilang pangalan sa list of voters nga gibutang diha sa mga presento. Apan sa ilang pagsubay sa listahan sa mga botante nga gihuptan sa mga sakup sa Board of Election Tellers anaa nagapabilin ra.

Tungod niini gikatahong gatusan ka mga botante ang napakyas sa pagbotar sa bag-ong gitapos nga piniliay sa barangay sa rason nga nawagtang ilang pangalan sa talaan nga giplastar gawas sa mga presento. Daghang nagtuo nga gituyo gayud sa pagwagtang ang ilang pangalan diha sa voters lists nga giplastar sa gawas sa presento ilabi na kadtong giila nga wala mosuporta sa mga kandidatu sa administrasyon sa Dipolog. (Press Freedom, Vol. XX No. 2)

 

BIR Dist.No. 91 sa Dipolog kinahanglang makakolekta ug P532M karong 2007

Gitahasan karon ang Bureau of Internal Revenue District No. 91 ning dakbayan sa Dipolog sa pagkolekta ug P532 milyones ka pesos nga buhis hangtud sa katapusang bahin sa Desyembre 2007. Si Revenue District Officer Cres Agad mibutyag nga mitakilid ang ilang koleksiyon gikan sa buwan sa Enero hangtud sa Setyembre 2007 na short sila ug balig P19 milyones ka pesos batok sa ilang target collection sulod sa maong panahon.

Hinoon iyang giklaro nga na short sila sa ilang target collection nga maoy gihatag sa ilang central office apan kon itandi ang ilang nakolekta karon sa susamang panahon sa tuig 2006 nagpakita nga mitubo sila ug P45 milyones ka pesos. Apan tungod sa kataas sa target goal nga gitakda sa ilang central office wala gayud nila kini makab-ot ilabi na gayud sa buwan sa Mayo ug Hunyo karong tuiga. Gipatin-aw usab ni Revenue District Officer Agad unsa rason nga miubos ilang koleksiyon karong 2007 sa buwan sa Mayo ug Hunyo komparar sa 2006.

Sa 2006 matud pa niya nakakolekta sila ug P442 milyones ka pesos labaw sa ilang target nga P389 milyones ka pesos. Sa dihang gikomparar ang ilang nakolekta sa 2006 ug sa tuig 2005 nakita nga ang ilang nakolekta nga buhis milabaw sa target goal nga balig P90 milyones ka pesos. Tungod niini, matud pa ni Agad para sa tuig 2007 gihatagan sila ug mas taas nga target goal. Matud pa ni Agad nakata-bang nila sa tuig 2006 sa pagpasaka sa ilang nahimong koleksiyon sa buhis ang pagkonstrak sa Zamboanga del Norte Medical Center diin daku-daku nga withholding taxes ang ilang nakolekta ug maoy nakatabang sa ilang collection performance.

Karong tuiga aduna may mga bag-ong proyekto nga gipatuman karon sulod sa lalawigan apan dili bastante nga maka-abono kon unsa may ilang nakolekta sa miaging tuig. Sumala pa ilang gipaning-kamutan paghangyo ilang central office nga paubsan ang ilang target collection apan wala kini dasoni ug usba. Si Revenue District Officer Agad miapilar karon sa mga magbubuhis sa lalawigan nga kon aduna pa silay napending nga mga transaksiyon nga wala pa makabayad sa tukmang buluhisan nga unta kini ila nang lihukon karon aron makadugang sa ilang koleksiyon.

Samtang didto sa ikatulong distrito, gidasig karon ni Congressman Cesar Jalosjos nga higpitan sa mga coastal municipalities sulod sa 3rd congressional district sa Zamboanga del Norte ang kampanya batok sa illegal fishing nga maoy napunting sa reklamo sa mga yanung mananagat gikan sa lungsod sa Sibuco hangtud na sa Leon Postigo. Si Congressman Jalosjos nga naghupot sa ranggong commodore sa Philippine Coast Guard Auxiliary mipahibawo nga naggahin gayud siya ug pundo sa iyang congressional funds para sa pagpalit ug patrol boats alang na sa mga lungsod nga sakup sa iyang distrito.

Gidayeg ni Congressman Jalosjos ang kagamhanang local sa Leon Postigo sa pagpangulo ni Mayor Rolando Tablezo tungod sa gipakita niining pagpakabana sa pagprotiher sa ilang marine resources sulod sa ilang municipal waters ilabi na sa pag-establisar nila ug usa ka marine sanctuary. Tungod sa gipakitang kadasig sa Leon Postigo sa pagpanalipod sa ilang marine resources gipahibawo ni Congressman Jalosjos nga ang iyang buhatan naggahin karon ug pundo para sa pagpalit ug patrol boat alang na sa maong lungsod.

Ang nasangpit nga fiber glass patrol boat nga gikuha gikan sa iyang congressional fund nalista na sa mga proyekto nga gihan-ay para karong buwan sa Nobyembre 2007. Samtang ang mga meyembro sa Sangguniang Panlalawigan sa ZaNorte nga nagrepresentar sa 3rd legislative district ang nagtam-po-tampo usab ug pundo ilawom sa ilang Provincial Identification Fund para sa pagpalit ug laing speed boat nga gamiton para sa pagpat-rolya batok illegal fishing para sa lungsod sa Salug. (Press Freedom, Vol. XX No. 2)

 

Programa sa agrkultura unahon ayha pa palapdan ang merkado

Ang pagpadulot una sa programa sa agrikultura maoy unang lakang nga gusto nga makab-ot sa Office of the Provincial Agriculturist ayha iplastar ang mga mag-uuma sa mas lapad nga merkado. Kini ang gipahayag ni Maybel Bustallino, Provincial Agriculture Specialist, atubangan sa panawagan ni Governor Rolando Yebes nga maoy gusto niya nga mapatuman sa Zamboanga del Norte ang corporate farming alang na sa mas lapad nga merkado sa mga produkto sa agrikultura sa probinsiya.

Matud pa ni Bustallino dugay ra silang gipaninglan sa gobernador kabahin niini nga kon mahimo mapalapdan ang merkado sa mga produktong agrikultura sa probinsiya. Apan maoy giuna nila karon nga matisok una sa alimpatakan sa atong mga mag-uuma ang tukmang sistima sa pagpanguma nga maoy modasig kanila sa pagdugang sa ilang production para na sa mas lapad nga merkado sa ubang mga probinsiya. Matud pa ni Bustallino sa pagka karon ang mga giproduce nilang mga utanon ilawom sa Hi-Green Program kuwangon ra sa gikinahanglang supply sa merkado sa Dipolog.

Gipatin-aw sa provincial agriculture specialist nga maoy gusto nila nga mahitabo nga mismo ang mga hingtungdang mag-uuma maoy madasig sa pagdugang pa sa ilang production tungod sa rason nga aduna silay mas daku nga ginansiya o kita nga nahimo sa ilang mga produkto.  Karong bag-o subling gipalanog ni Governor Yebes ang daku niyang tinguha nga moabot sa ZaNorte ang corporate farming para makabatun sa hustong trabaho ang atong mga katawhan ug magamit gayud sa hingpit ang atong mga bakanting kayutaan.

Samtang si Noli Bengua mipahayag nga sa pagkakaron ang ania sa atong probinsiya mga small farmers nga dili pa makasugakod sa pagsupply sa gikinahanglang volume sa nga industrial buyers. Sumala pa niya maoy ilang gipaningkamutan nga magkahugpong kining mga small farmers para makaabot sila sa gikinahanglang gidaghanon sa produkto nga gusto paliton sa mga industrial buyers. (Press Freedom, Vol. XX No. 2)

 

KAGAMHANANG LOKAL SA ZANORTE HALOS MILAPAS SA ILANG PERSONAL SERVICES

Nakita karon nga halus tanang mga munisipyo lakip na sa duha ka siyudad ang nagpakita nga milapas na sila sa gimandung limit sa balaod diha sa pagpahat ug pundo para sa Personal Services sa ilahang budget. Mao kini ang gibutyag ni Board Member Ricky Mejorada, chairman sa committee on laws, ordinances, resolutions, rules and style sa Sangguniang Panlalawigan sa Zamboanga del Norte sa ilahang pagreview sa mga ordinansa gikan sa mga kalungsuran ug duha ka siyudad.

Ilawom sa balaod gimandu nga kinahanglan ang ialokar nga pundo para sa suweldo ug uban pang mga benepisyo para sa mga kawani ug opisyales sa kagamhanang local ilawom sa Personal Services kinahanglang dili molabaw sa 45 porciento sa total budget nila kada tuig. Sa pagreview nga gipahigayon sa balay balauranan sa probinsiya nagpakita nga kadaghan karon sa mga kagamhanang local sa ZaNorte milapas na sa gipahat nilang pundo para sa Personal Services.

Matud pa ni Mejorada kini maoy namatikdan sa mga meyembro sa Sangguniang Panlalawigan sa ZaNorte kinsa nagka-uyon nga ilang tabangan ang mga lungsod o siyudad nga nakalapas sa maong polisiya diha na sa pagmugna ug mga lakang nga maluwas sila sa maong situwasyon. Gipatin-aw ni Mejorada nga kon ang Personal Services sa usa ka kagamhanang local molapas na sa gitakda sa balaod nga alokasyon diha sa ilang annual budget kasagaran niini makahinagbo ug problema sa Commission on Audit nga dili itugot ang paghatag sa dugang mga benepisyo o kon nahatag na kini irefund.

Usa na sa gihisgutan ni Board Member Mejorada nga sulbad sa maong problema mao ang pagbalhin sa pundo gikan sa General Fund ngadto sa Economic Enterprise. Matud pa niya sigun sa gimbut-an sa balaod ang mga kagamhanang local kansang Personal Services nga budget milapas na sa gitakdang limit dili na gayud mamahimong makahatag ug additional nga bonus kon ugaling aduna may imandu ang Malacanang karong Desyembre kay kon ipamursigir kini sa paghatag mosangko ra gihapon kini sa COA nga momandu nga irefund ang nadawat sa mga kawani.

 

MONEY RULES SA BARANGAY ELECTION

Ang kuwarta gayud ang mitigbabaw nga unang rason sa mga nakadaug sa gipahigayong eleksiyon sa barangay ug Sangguniang Kabataan kagahapong adlawa. Sa dakbayan sa Dipolog sa 21 ka barangay niini walay laing gihisgutan ang mga katawhan lakip na sa mga kandidatu nga nakadaug ug napilde kon dili ang kuwarta nga mikatap kagahapon aron sa pagpalit sa mga botos. Sa nasayran ang mga kandidatu pagka kapitan sa Dipolog nga giilang gisuportahan ni Mayor Evelyn Uy mipalit sa tag P300.00 ang kada botante sa kondisyon nga ang tanang kandidatu sa ilang linya botohan.

Samtang ang ilang mga kaatbang misukol usab sa palit apan kutob ra sa tag P200.00 para sa kapitan. Samtang ubang mga kandidatu sa pagka kagawad sa barangay nga adunay igong pundo ang nagpusil ug palit gikan sa tag P20.00 kada botante ngadto sa tag P50.00 kada botante. Sa nakita ang mga kandidatu nga gisabak sa administrasyon maoy nangharos sa eleksiyon kagahapon kay nagpakita nga adunay igong pundo nga magamit para sa pagpalit sa mga botos. Sumala pa maoy gipuntirya sa palit sa administrasyon kadtong mga meyembro sa LANDO BIBO nga maoy gisaligang puhunan sa mga milansar sa barangay kontra sa mga kapitan ni Mayor Uy.

Sa nasayran wala gayud makawang ang pagpamalit sa mga kandidatu sa administrasyon nga ang gipuntirya mao ang mga meyembro sa LANDO BIBO kay nakuha gayud niini ang ilang pagbali sa ilang pagsuporta. Sa 21 ka barangay sa Dipolog ang kawhaan niini mga kandidatu pagka kapitan pulos midaug gawas sa Barangay Diwan. Didto sa Barangay Diwan, nagbinugtong nga kapitan nga dili suportado sa mayor sa Dipolog maoy nakadaug mao si Nathan Patangan batok kang Letty Bagarinao. Si Barangay Captain-elect Patangan milabaw lamang ni Bagarinao ug duha ka botos didto sa Barangay Diwan.

Samtang ang midaug nga mga kandidatu sa administrasyon mao sila si Rosanna Diaz sa Central Barangay, Kapitan Graciano Alloba sa Sicayab, Gomercindo Calague sa Biasong, Ricardo Albarote sa Minaog, Kapitan Paquito Pano sa Cogon, Dioscoro Endab sa Sta. Isabel, Kapitan  Juanito Cabale sa Olingan, Kapitan Nelson Saldon sa Sta. Filomena, Tito Maligro sa Dicayas, Kapitan Dionisio Dangase sa Sinaman, Kapitan Armando Drilon sa Punta, Alfonso Delos Reyes sa Barra ug Barangay Chairman-elect Leonardo Tan sa Estaka, Kapitan Janus Yu sa Miputak, Maynard Baes sa Turno.

Samtang didto sa dakbayan sa Dapitan nakuhaan ang mga kapitan ni Mayor Dominador Jalosjos, Jr. diin sa 50 ka barangay natipakan ug siyam ka kapitan.Sumala pa si Judge Cedrick Ruiz maoy nakita nila nga nangunay sa pagtabang sa kandidatura sa mga kapitan nga kaatbang sa administrasyon ug maoy mihatag sa pundo para sa ilang kampanya. Samtang pipila sa mga kandidatu pagka kapitan nga wala masabak sa administrasyon ang midaug tungod kay nakahipos ug igong pundo gikan sa gawas diin aduna nay mga anak nga atua sa gawas nanarbaho o kaha naminyo ug langyaw nga maoy mitabang sa pag finance sa ilang kandidatura.

Ang mga barangay sa Dapitan nga giilang midaug ang gisuportahang kapitan ni Mayor Jalosjos mao ang Banbanan, Baylimango, Daro, Kauswagan, Maria Uray, Napo, Aseniero, Ba-o, Bagting, Banonong, Canlucani, Carang, Cawa-cawa. Dawo, Diwaan, Guimputlan, Larayan, Linabo, Liyang, Masidlakon, Opao, Oro, Polo, Potol, Putongan, Ilaya, San Nicolas ug San Pedro. Sa mga barangay nga ang midaug ang kaatbang mao ang Aliguay, Barcelona, Burgos, Owaon, Hilltop, Oyan ug San Francisco samtang sa Barangay Sigayan mag-toss coin kay nagtabla ang managkaatbang pagka kapitan.

Didto sa 3rd congressional district sa Zamboanga del Norte, gibutyag ni Congressman Cesar Jalosjos, nga mayoriya sa kapitan nga gitabangan sa ilang grupo ang midaug sa eleksiyon kagahapong adlawa. Sa lungsod sa Roxas migawas usab nga natipakan ang mga kapitan ni Mayor Carlito Feras diin sa 31 ka barangay 13 ra ka kapitan nga kaalyado sa mayor ang midaug sama sa Barangay Denoman, Capasi, Villahermoso, Pongolan, Upper Irasan, Galukso, Gubat, Situbo, Langatian, Pangologon, Panampalay, Marupay ug Piao.

Ang 18 ka mga barangay kansang mga kapitan giilang dili kaalyado ni Mayor Feras mao ang Sebod, Nabilid, Minang, Dohinob, Lower Irasan, Cape, Salisig, Banbanan, Tanayan, Lipakan ug Balubo. Samtang dugang barangay nga nag-una ang mga kapitan nga kaatbang ni Mayor Feras ang Pinalan, Pinamar, Tantingon, Labakid, Moliton, Canibongan ug Sibatog. Sa kabahin sa COMELEC gideklarar usab ni Atty. Wilfred Jay Balisado, Provincial Election Supervisor sa ZaNorte nga malinawon ang pagpahigayon sa eleksiyon kagahapong adlawa sa tibook probinsiya ug walay natalang dagkung panghitabo nga nakatugaw sa piniliay. (Press Freedom, Vol. XX No. 2)

 

MGA KANDIDATU SA ADMINISTRASYON SA DIPOLOG NGA WALA MOKUHA SA PAUTANG GITAGAK

Igo na lang sa pagbagolbol ang pipila ka mga kandidatu sa barangay nga giilang ngisuportahan sa administrasyon sa dakbayan sa Dipolog human nila masayri nga gitaktak sila sa hugna sa kampanya. Kini ilang gipalanog human migawas ang sample ballot sa ilang grupo nga wala na malakip ang ilang mga pangalan ilabi na kadtong milansar pagka konsehal sa barangay.

Sa ilang pagka kita sa sample ballot nga wala na sila giapil sa linya igo na lamang sila sa pagpahungaw sa ilang kapungot ug pagsaway. Pipila sa mga kandidatu pagka kagawad sa barangay nga giilang iyaha sa administrasyon sa Dipolog nga mireklamo nga gitaktak sila miangkon nga wala sila moapil sa pagpangutang nga gitanyag sa mayora alang sa mga kandidatu sa barangay ilawom sa ilang grupo. Ilang gikonpirmar nga gitanyagan sila sa mayora nga mangutang para magamit nila karon nga eleksiyon ilabi na diha sa pagpamalit sa botos.

Alang sa mikandidatu pagka kapitan gipautang kini ug P50,000 ug P20,000 alang na sa mga kandidatu pagka barangay kagawad nga pulos ilang gipirmahan nga pagabayran paghuman sa piniliay uban na sa gipatong nga porciento tubo sa kuwarta. Kon sila modaug ilang bayran sa hingpit ang kantidad nga giutang uban sa interest niini ug kon mapilide katunga sa kantidad nga nakuha maoy bayran. Aron sa pagsiguro nga sila makabayad sila gipasabot nga kon mapilde pasudlon sa trabaho sa city hall isip job order para otomatik ang salary deduction.

Gikonpirmar usab sa pipila ka kandidatu nga suportado sa administrasyon sa Dipolog nga sa giutang nila nga kuwarta gikan kang Madam dili sila makahawid niini kay ang mga money bagger man sa mayora maoy mangunay sa pagpanghatag niini ngadto sa mga botante. Gikampanya karon sa mga kaalyado sa administrasyon sa Dipolog nga mopalit sila ug botos P700.00 basta 8-0.

Samtang sa sayu pa pipila ka mga kandidatu nga nailang kaatbang sa administrasyon sa Dipolog nga nakitang lig-on ug mosukol sa palit nila ang gihanyagan nga mosibog bayran ug P50,000 palargahon pa ug Hongkong. Usa sa mikonpirmar niini mao si Leny Acis-Dahonan kandidatu pagka kapitan sa Barangay Barra, kinsa mibutyag nga paghuman gayud niya ug duso sa ilang kandidatura gipaduulan dayon siya sa tawo sa mayora nga gipahibawo sa maong tanyag apan derecho niya kining gibalibaran. (Press Freedom, Vol. XX No. 2)

 

budget hearing gitakda sa hunta probinsyal

Gitakda sa kinatibuk-ang miembro sa hunta probinsyal sa Zamboanga del Norte ang marathon budget hearing para sa P1.2 billion pesos executive budget sa Zamboanga del Norte alang sa sunod tuig. Kini subay na sa sulat nga giduso ni Provincial Governor Rolando Yebes ngadto sa Sanguniang Panlalawigan para sa pag-review ug pagtuon sa Executive Budget sa ZaNorte alang sa fiscal year 2008 sa gibanabana ng appropriotion nga mokabat ug P1.02 billion pesos ug laing budget para sa Botika sa Katawhan nga mokabat ug tunga sa million ka pesos.

Matud pa ni Governor Yebes, ang budget sa tuig dos mil otso gitagana para sa nagkadaiya niining proyekto ilabi na ang gigahin nga pundo para sa tabang sa panginabuhi sa mga katawhan nga maoy nag-unang programa  nga iyang gitotokan sa sunod tuig.

Si Minority Floor Leader Edgar Baguio misugyot nga sa panahon sa marathon hearing, ang buhatan sa gobernador pinaagi sa provincial budget officer, treasurer ug accountant mosubmiter sa gikinahanglang dokumento subay na sa giplano niining implementasyon sa nagkadaiyang buhatan aron maoy sumbanan sa ilang pagdason sa maong budget proposal. Gitakda ang marathon hearing sa committee of the whole sugdan karong November 6 ug kini ilang taposon sulod sa napulo ka adlaw. (Mindanao Star, Vol.III No.40)

 

Brgy. Treasurer sa Siayan gipusil patay

Nakabsan gayud sa iyang kinabuhi ang usa ka Barangay Treasurer human kini gipusil sa mga wa mailhing suspetsado didto sa may Barangay Pange sakop sa lungsod sa Siayan ning lalawigan, karong bag-uhay pa lang. Ang maong biktima giila sa pangalang Melencio Maricol, hingkod ang panuigon, minyo nga nagpuyo sa naasoy’ng dapit ug kinsa usab maoy ilang Barangay Treasurer.

Sa initial nga imbestigasyon nga gihimo sa Siayan PNP, nasayran nga si Maricol samtang naglakaw kini padulong pauli sa ilang panimalay ug sa dihang paghidangat na niya sa may Barangay Pange Proper matud pa kalit lang ang mga wa mailhing suspetsado mipusil sa biktima ginamit ang wa usab masayring kalibre nga armas. Biktimang si Maricol nakaangkon kinig mga samad .pinusilan sa nagkalain-laing parti sa kalawasan nga mao usa’y hinungdan sa iyang hinanaling kamatayon.

Dugang pang nasayran nga human sa ilang pagpusil- patay ngadto sa biktima ila pa gayuy’ng gikuha ang wa usab matino nga salaping cash diin ang maong salaping cash ang honorarium kini sa mga Barangay Opisyales sa Pange.  Labot pa niini giapil usab pagkuha sa mga suspek ang mga personal nga gamit sa biktima.  Ug daling mipalayo gilayon sa lugar sa nahitabuan ang mga suspetsado sa wala usab masayring direksiyon.

Hinuon, ang mga elemento sa Siayan PNP padayon pa kining mihimo sa makuting imbestigasyon alang na sa posibling pag ila ug pag-aresto usab sa mga suspetsado nga maoy responsible sa pagpusil – patay kang Pange Barangay Treasurer Melencio Maricol.  (Pedmark, Mindanao Star, Vol.III No.40)

 

Mindanao Star Police Round-up

Cashier nakig-date, gikawatan

Pwerting hanggab unta ug preskong hangin sa manag-uyab human nakig-date sa iyang minahal didto sa baybayon sa Brgy. Galas, apan wala damha ang iyang shoulder bag gikamang usab sa wala ilhing tawo. Sigon sa nahipos nga reklamo nga gipadangat sa buhatan sa kapulisan, giila ang biktima nga usa ka Brenda Peres Teves, 28 anyos ug temporaryong nagpuyo sa Brgy. Estaka. Usa siya ka casheir sa Giacominos atbang sa Capitol Plaza ning dakbayan.

Sa asoy sa biktima suma pa ang iyang violet handbag nga gisudlan sa iyang pitaka ug dunay sulod cash nga salapi mokabat sa P10,000.00 ka pesos nga halin sa tindahan lakip sa iyang ATM card, ug Nokia 3610 ang gikawat kini sa wala mailhing tawo. Samtang gibutang sa biktima sa iyang kiliran samtang naglingkod  kini dito sa cottage sa kilid sa Chip In By the Sea sa Baybay Galas ning dakbayan samtang ang mga biktima nakigdate sa iyang minahal sa kinabuhi atol sa kalagkalag. Ang maong kaso gireper sa detective unit sa Dipolog PNP para sa dugang imbistigasyon, pero gilantaw usab sa otoridad kun dili ba inside job ang nahitabo. (Mindanao Star, Vol.III No.40)

 

Ulitawo giluba, patay

Patay diha – diha dayon ang usa ka ulitawo human kini lubaa sa usa ka 30 anyos didto sa Barangay Antonio sakop sa lungsod sa Labason ning lalawigan, karong bag-uhay pa lamang. Ang biktima giila sa ngalan nga usa ka Nuen Pangasian, 25 anyos ug molopyo sa maong dapit.  Samtang ang suspetsado gitumbok sa kapolisan nga usa ka Rosie Galiana, hingkod ang panuigon, minyo ug molopyo sa Barangay San Isidro sa mao gihapong lungsod.

Sa pasiunang imbestigasyon nga gihimo sa Labason PNP nasayran nga ang duruha kuyog kining nag-inum, ug damtan ug pipila ka oras ang milabay,  ang suspetsado kalit kining mihulbot sa iyang kutsilyo ug sa walay daghang langan, kalit nga miluba sa biktima sa walang bahin sa iyang kilid nga miresulta sa iyang hinanaling kamatayon. Hinuon, ang suspetsado nasikop ra kini sa mga Barangay Tanod sa naasoy’ng dapit ug gidala ngadto sa buhatan sa kapolisan sa maong lungsod alang na sa tukmang disposasyon.  (Sheng & Budz, Mindanao Star, Vol.III No.40)

 

Lalaki gipusil sa beerhouse, kritikal ang kondisyon

Usa ka lalaki ang kritikal ang kondisyon human maka-angkon sa duha ka pinusilan sa party sa iyang kalawasan, sa dihang giluthang sa wala pa mailhing suspetsdao sulod sa usa ka imnanan didto sa Brgy. Estaka kaniadtong kadlawon sa November 1. Giila ang biktima nga si Juvie Agan, 26, minyo ug taga purok golden doranta sa Brgy. Turno.

Sa pasi-unang imbestigasyon nga gihimo sa Dipolog PNP nasayran nga ang biktima kauban sa iyang barkada giila nga si Michael Bahian, 21, naginom sulod sa Jims Van diin ang biktimang si Agan maoy nagbadlong badlong sa maong kaguliyang. Apan sa dihang nahusay na ang maong kasamok diin ang maong lalaki  nga gika-engkwentro sa kauban sa biktima ang mipauli pipila ka gutlo ang nakalabay duha ka wala mailhing suspetsado ang mibalik nga armado, sa dihang makamatikod unta ang biktima mitagi unta sulod sa Jims Van apan gisulod kini sa suspetsado dayog pusil sa biktima sa makaduha ka higayon.

Sa nasayran ang biktima naka angkon kini sa duha ka igo sa pinusilan sa iyang suwang ug sa to-ong abaga nga mitangon angbala sa wala pa masayring kalibre sa iyang samad diin angbiktima gidala pagdali sa tambalanang probinsyal apan gikatahong gibalhin sa tambalanan didto sa Sugbo tungod sa kritikal nga kondisyon. Samtang ang suspetsado misibat usab dayon sa crime scene lulan sa usa ka XRM color pula walay plate number nga gisakyan sa suspetsado sa ilang pagsibat padung sa wala masayring direksyon. (Mindanao Star, Vol.III No.40)

 

Malapason sa Liquor ban 41 ka mga pala-inom naskiop

Gumikan sa pagbaliwala sa pipila ka mga video-K bar sa gipatumang liquor ban panahon sa election period, mokabat sa 41 ka mga customer ang nasikop sa team sa kapulisan human masakpan sa akto nga nag Video-k sulod sa imnanan dinhi sa dakbayan kaniadtong Oktubre 28-29 panahon sa election period. Sa nasayran ning pamantalaan ang pwersa sa SWAT team pangpangulo ni Police Inspector Aniway ug Police Inspector De la Rosa sa (CIDG) ang malampusong nakasikop sa mokabat 41 ka mga customer sa managlahing operasyon sa tulo ka mga Video-k bar sa may Bea Balbacua sa dalang Tomas Claudio sa Brgy. Miputak, Cabaron Karaoke Bar sa dalang Quezon sa Brgy. Barra, ug Nickers Dine-In sa Central Barangay ning dakbayan.

Ang 41 ka mga customer nasapnan sa akto sulod sa maong mga beerhouse nga nanganta ug uban nag-inom-inom. Nakonpiskar sa otoridad sa maong mga establisamento ang mga binotelyang grande sa ilimnong makahubog nga pipila niini nabasiyu na diha sa lamesa nga gi-imnan sa mga customer. Sa nasayran, mokabat sa 73 ang nadakpan sa kapulisan ug gipa-ilawom sa Liquor test didto sa tambalanang probinsyal apan base sa resulta sa liquor test exam sa attending physician sa maong tambalanan mokabat sa 41 positibo sa alcohol breath. Samtang ang uban niini negatibo sa inpluwensya sa ilimnong makahubog.

Dugang nasayran nga samtang gipangdala sa kapulisan ang mga dinakpan para sa liquor test didto sa tambalanang probinsyal ang tulo nga sila si Sabair Laranjo, Richard Campomanes ug Anjay Bulwag ang mi-eskapo ug makasibat sa gihang nalipat ang mga pulis. Sa nasayaran ang 41 nga malapason gihikay na ang kaso batok kanila ug andam na ipasaka ang kiha ngadto sa piskaliya, sa pagyatak sa COMELEC Res. 8310 sa Omnibus Code of the Philippines nga nagtangag s Special nga silot sa maong balaod mag-atobang sa pagka-bilanggo sa dili mo-minos sa usa ka tuig ug dili molabaw sa unom  ka tuig. Angayan masayran nga base sa balaod sa Comelec basta panahon sa election period gidili ang pagtapok-tapok, salo-salo ilabi na ang pag-inom sa ilimnong makahubog. (Mindanao Star, Vol.III No.40)

 

APP allied nga mga kandidato miratsada segundo distrito

Mayoriya sa mga barangay kapitanes nga midaug sa lungsod sa Roxas, Katipunan, Manukan, ug Siayan, ingon man tabla sa Sindangan ug Jose Dalman maoy nahimong resulta karon sa piniliay sa segundo distrito ning lalawigan, tali sa KAMPI/APP ug LAKAS, samtang dinhi lang sa Dipolog gihapon nakatagamtam ug kapildehan ang maong pundok, sa dihang usa ra ka barangay ang milusot, niadtong Lunes nga barangay ug SK elections.

Sa Katipunan, 26 ka mga barangay ang midaog samtang upat lang ang Lakas, sa Roxas 20 ka barangay ang midaog samtang 11 ang sa Lakas, sa Manukan 21 batok usa, sa Jose Dalman, 9 batok 9, Sindangan 26 batok 26 ug sa Siayan 19 batok 3, dinhi sa Dipolog 20 ang Lakas batok 1 lang ang Kampi. Sa pasiunang natala nga mga mananaog sa lungsod sa Roxas ug Ponot ang mga nakadaug nga mga kapitan sa Roxas nga nagpasilong sa grupo sa gobernador mao sila si Ceferino Gaile sa Balubo, Uldarico Lugo sa Minang, Gilbeerto Lagutin sa Nabilid, Perper Montemayor sa Cape, Jesus  Tao sa Lipakan, Dahlia Calimot sa Banbanan, Arnold Dinglasa sa Tanayan, Tita Aseniero sa Lower Irazan, Tony Gonzales sa Dohinob, Harry Pialago sa Labakid, Leslie Villaester-Codilla sa Salisig, Joel Santiago sa Tantingon, Guillerma Generoso sa Canibongan, Joel “Noknok” Calubag sa Capase, Mardonio Tagad sa Sebatog, Amado Manta sa Moliton ug Barangay Sebod Esperedion Anguit.

Samtang sa Jose Dalman nagpakadaog usab isip barangay capitan mao sila si Fulgencio Lerin Jr., sa Tabon, Bebot Dalman sa Tamil, William Ellis sa Lopero, Faustino Maccion sa Labakid, Edgardo Lituan sa Lipay, Celso Bael sa Bitoon, Arsenio Cabiara sa Litalip ug Reinerio Cuenca sa Lumaping. Sa sayo pa ang midaug nga kapitan sa Marupay, Roxas nga si Rey Abetona mihangyo na sa grupo sa oposisyon sa Roxas nga siya mopasilong sa bando ni Governor Yebes bisan pa kon duna kini lider nga gipalansar sa maong barangay. Karon nga nakadaug na siya (Abetona) andam kini mopasilong ug mosuporta sa maong grupo sa umalabot nga eleksiyon.

Samtang sa Marupay usab Jose Dalman, ZN, ang midaog nga kapitan si Dionesio Daque ang andam usab karon magpasilong sa grupo sa APP, sa dihang gibisitahan kini sa mga sakup sa maong partido. Nasayran nga ubay-ubay usab sa mga incumbent barangay kapitan sa Roxas ang nangapildi sama nila ni Hipolito Bularon sa Situbo nga napildi ni Mario Samorin, Gina Verzano sa Upper Irazan nga napildi ni Joven Belocura, Flor Manuales sa Dohinob nga napildi ni Tony Gonzales, Walter Azcuna sa Langatian nga napildi ni Cliford Bayloses, Esperato Quintero sa Villahermoso nga napildi ni Galo Pialago, Crispin Badiango sa Gubat nga napildi ni Pesing Solatorio.

Si Vice Mayor Cyrus “Boy” Agatep nakig-negotiate na karon nga andam siya makigtipon sa grupo sa oposisyon para na sa posibling panag-alyansa sa iyang grupo tungod ug alang sa eleksiyon sa ABC Federation President ug Sanguniang Kabataan Federation President.

Si Vice Mayor Agatep nga mibulag na sa ilang panag-alyansa ni Mayor Carlito Feras niadtung nakalabay’ng piniliay ang mipahayag nga andam siya mosuporta ug mopaluyo kon si kinsa man ang kandidato sa opisisyon alang sa pagka ABC federation president ug SK federation president.

Nasayran gikan sa kasaligan nga tinubdan nga nasuko ang bise mayor nga gi-interesan ni Konsehal Saniber “Emong” Feras, (igsoon ni Mayor Carling Feras) ang posisyon sa pagka SK federation president hinungdan nga gipakontrahan ang iyang anak pagka SK chairwoman sa Langatian ug napildi. Matud pa, gipangitaan ug kontra ang anak ni Agatep aron wala nay babag para sa maong giilogan nilang puwesto. “Traydor gyud ning mga tawhana dili angay kakumpiyansaan,” maoy hilabihang pagmahay sa mga supporters ni Agatep. “Ingnan bitaw namo si vice (Agatep) sa una nga dili siya motipon ni Carling, wala gyud siya magpatuo di biktima man siya karon.”

Gawas pa niini, nasuko usab ang bise mayor ngadto kang Congressman Rosendo “Dodoy” Labadlabad kay kanunay lamang gisa-aran nga motabang sa eleksiyon sa barangay apan pag-abot na sa panahon walay miabot nga kuwarta hinungdan nga siya ang nagkabuang ug pangolipas sa iyang gi-organisar sa barangay.

“Moabot na tingale ang panahon karong umalabot nga eleksiyon sa 2010 nga duna nay kausaban sa liderato ang lungsod sa Roxas ilabi na nga last term na si Mayor Carling Feras,” reaksiyon ni oposition leader Nick Carbonel, Municipal Chairman sa partido KAMPI. P/Inspector Tingkang, ang hepe sa Roxas PNP mipahayag nga walay dagkong kagubot ang nahitabo panahon sa eleksiyon ug sa kinatibuk-an, malinawon ang pagpahigayon sa piniliay sa 31 ka mga barangay sa lungsod sa Roxas. (Mindanao Star, Vol.III No.40)


 

Breading Station sa Villaramos kuhaon’g balik sa mga Ramos

Kuhaon na ug balik sa mga Ramos ang yuta nga maoy gigamit nga breading station sa Barangay Villaramos sakop sa lungsod sa Manukan, Zamboanga del Norte. Kini ang gipahayag ni Vic Sanchez Jr., OIC Provincial Veterenarian Officer sa dihang gipadalhan na ug notisya ang buhatan sa gobernador nga nagpahibalo niini nga ila nang bawion ug balik ang maong lote nga ilang gipagamit pinaagi sa Deed of Usufract.

Matud ni Sanchez, ang yuta nga maoy gipahimutangan sa breading station sa Villaramos dugay nang katuigan nga gigamit sa kagamhanang probinsyal ug sumala pa, hapit nang motapos ang kontrata sa Deed of Usufract nga singkuwenta ka tuig. Apan sumala pa, ang Deed of Usufract nga gipermahan sa kanhi namonoan sa probinsya tali sa pamilyang Ramos wala ma-anotar ang titulo ug karon sa panahon ni Governor Rolando Yebes nga hapit nang miabot ang tagal sa pag-expire sa kontrata ila nang kuhaon ug balik.

Sumala pa ni Sanchez, dunay naka-pending nga kaso karon gumikan kay duna nay porsyon sa maong luna ang gikuha ug gigamit bisan kon wala pa ma-resolba ug ma-setle ang maong isyu. Apan matud pa ni Sanchez, nagdepende na usab kini ni Governor Rolando Yebes kon iya bang hatagan ug positibong aksiyon ang sulat sa mga Ramos nga kuhaon na ug balik ang maong luna.

Para ni Sanchez, uyon ra siya kon ihatag ug balik sa probinsya ang maong luna gumikan kay sa taudtaud nang katuigan nga gigamit sa probinsya, ang mga Ramos maoy nagbayad sa pingkasan. Busa isip paghatag ug saktong hustisya sa pamilyang Ramos kini ibalik kanila ang maong luna.

“Para sa akong personal nga opinion, aron mahatagan ug hustisya ang kabilin sa mga Ramoses ibalik nalang kini kanila kay pipila na ka tuig kining gigamit sa gobiyerno sila pa gayud ang nagbayad sa pingkasan.” Gawas pa niini wala pa gayud ma-anotar ang Deed of Usufract sa titulo sa yuta, “clean title pa gayud ang titulo so, mao ni akong gihimo nga breifing note kang governor (Yebes) kay gipangyuan ko niya ug reaksiyon kabahin sa sulat sa mga Ramos.

Giangkon hinoon ni Sanchez nga wala pa siya makakita sa dokumento kon wala ba gi-anotar ang Deed of Usufract Ang gikalainan lang ni Sanchez kay gikuha ni Jery Barrica ang unom ka ektarya nga maoy tipik nga bahin sa maong luna nga wala makahibalo ang iyang opesina. Matud niya, ang sulat ni Barrica didto naka-address sa opesina sa gobernador nga wala pod dayon siya pahibaw-a hinungdan nga migamay ang gidak-on sa ilang pastohanan sa mga baka ug kabaw nga maoy usa sa nakapaniwang niini. “Wala gyud ko maka immediate reactionary measures kay wala man ko pahibaw-a nga ila na diay gamiton ang balig unom ka ektarya. Matud ni Sanchez gikoral ang unom ka ektarya ug gibutangan ug “No Tresspassing” diin ang maong luna maoy ilang gitamnan ug napiyer para pagkaon unta sa mga Buffalo.

Gisugyot ni Sanchez ngadto kang Governor Yebes nga paliton ang 64 ektaryas nga yuta sa mga sumosunod sa mga Freas sa Barangay Sanaw sa lungsod sa Katipunan aron maoy himoong breading station kay nindot ang lugar ug sibo nga himoan ug ransohan ug buhian sa mga kahayopan kay kasikbit niini ang suba sa Dicayo. Mintras nga wala pa silay kabutangan sa ilang kahayopan, kon duna nay positibong desisyon ang gobernador kabahin sa sulat sa mga Ramos nga ibalik ang maong luna sa Villaramos kini anha temporaryo ipahimutang sa PAIC, Irazan sakop sa lungsod sa Roxas.

Aminado si Sanchez nga nanganiwang ang binuhing Bufalo nga anaa gipahimutang sa breading station sa Villaramos ug kini maoy iyang dako nga pagkadismaya sa iyang sinaligan. “Ug magbutang ka ug general, imo man gyud na nga e-entrust, I do not know ug unsa gyud ang iyang technique nga unta animal husbanrey graduate man pod unta ni siya (Otik).

Si Sanchez nga maoy nalabhan sa gobernador tungod sa walay hustong pag-atiman sa mga kahayopan nga gigastohan ug minilyon nga salapi sa probinsya mibasol sa iyang manager nga gibutang sa breading station nga walay pagpakabana sa ilang binuhe hinungdan nga kini nanganiwang. (The New Nandau, Vol. XVII No.18)

 

Mass grave sa NPA sa Fimagas natultulan na

KATIPUNAN, ZN.- Natultulan na ang usa ka mass grave sa New Peo-ple’s Army didto sa lungsod sa Katipunan, Zamboanga del Norte nga maoy gilub-ngan sa ilang mga kauban nga gisilutan sa kamatayon ilawom sa ilang Oplan Ahos diin gipang-ihaw kadtong ilang mga kaubang rebelde nga gidudahang mga espiya sa military o gobyerno. Ang pagtultul sa mga mass graves sa NPA gipa-ngunahan sa usa ka non-governmental organization nga ang acronym PATH nga nagbasi sa kauluhang Manila, diin dugang tulo pa ka mass graves sa mga rebelde ang ilang gipangita sa Katipunan sa mga lugar nga ilang gikampuhan kaniadto.

Ang unang mass grave nakita sa Purok 3 sa Bara-ngay Fimagas nga giilang kuta kaniadto sa mga NPA. Ang nasangpit nga NGO nagbawon sa ilang kauga-lingong mga forensic doctors ug anthropologists gikan sa UP Diliman nga maoy motabang sa pag-ila sa bukog sa mga biktima sa Oplan Ahos sa NPA. Sumala pa maoy gisubay karon sa maong NGO ang uban pang mga mass graves sa NPA sa tuyo nga mahibalik ngadto sa ilang mga ginikanan o kaha kaliwat ang ilang mga bukog para mahatagan kini sa tukmang pagpahiluna.

Sa nasayran usa na sa nahimong biktima sa Oplan Ahos sa NPA nga ilang gisilutan ug kamatayon mao si Vicente Gonzales, Jr. anak ni kanhi District Engineer Vicente Gonzales, Sr. ning dakbayan sa Dipolog. Kini gikonpirmar sa mga kanhi kauban ni Vicente sa walhong kalihukan ug maoy ilang gisugilon ngadto sa iyang mga ginikanan nga nakasaksi sila sa pagpahamtang sa silut nga kamatayon niini didto sa Fimagas ug nalubong sa usa sa pipila ka mass graves sa NPA sa maong lugar. Sa nasayran ang Barangay Fimagas unang gisudlan sa usa ka grupong kulto nga gipanguluhan usa usa ka Father Galido hangtud nga nahimong kuta sa NPA. (The New Nandau, Vol. XVII No.18)

 

Ordinansa pagdili sa pagamit ug Air Compressor sa pangisda girekomendar

Usa ka Ordinansa ang gi-rekomendar karon ni Mr. Vicente “Vic” Sanchez, Jr., hepe sa Special Project Unit ilawom sa buhatan sa gobernador nga ipadali ug pasar sa Sangguniang Panlalawigan mahitungod sa pagdili sa pagamit ug Air Compressor diha sa pagpa-nagat o pagkuha sa rekursos sa kadagatan sama sa kinhasong Andres-andres ug uban pa, tungod kay kini ang naghatag ug dakong risgo o piligro sa kinabuhi sa mga mosalomay.

Matud ni Sanchez, bisan nga ang pagamit sa Air Compressor dinha sa pagpanagat ang karon wala dili sa atong nasudnong balaod sa pagpangisda kon Philipine Fisheries Code, kini ang dili paga-ilhon nga dili na puwede makapasar ug Ordinansa ang mga lokal nga pangagamhanan nga magdili sa pagamit sa Air Com-pressor sa pagpanagat ug pagkuha sa ubang rekurso sa kadagatan tungod kay katung-danan sa atong kagamhanan nga maprotihian o maproteksyonan ang kinabuhi sa iyang mga katawhan.

“Daghan na nga mga kinabuhi ang nakalas tungod sa pagamit sa Air Compres-sor sa operasyon diha sa atong kadagatan dili lang dinhi sa atong lalawigan, kon dili sa uban usab nga mga probinsya nga adunay kadagatan,” nagkanayon si Sanchez. Dili palang dugay, niadtong Oktobre 23, 2007 didto sa lungsod sa Roxas nahipos ning mantalaan nga usa ka mananalom ug Andres-andres nga si Rito Abejar ang nakabsan sa iyang kinabuhi human malumos sa dihang ang Air Compressor nga gi-operate sa tag-iya niining si Roland Villarin ang mikalit lang ug kapalong hinungdan nga wala na kini makabuga o makahatag pa ug hangin sa mga divers nga niadtong tungora didto na ilawom sa dagat aron sa pagkuha ug Andres-andres nga ilang ikabaligya ngadto sa mamalitay niining giila si Dodo Alvarico, usa ka trader nga namaligya ug Andres-andres ngadto sa nasud sa Taiwan.

Ang maong rekomen-dasyon ni Sanchez sa pagmugna sa pagpasar sa maong ordinansa ang gidasonan ug gi-certipikahan usab ni Governor Lando Yebes nga usa ka “Urgent” ngato sa Sangguniang Panlalawigan, ug kini anaa na karon sa Committee on Agriculture nga gipangulo-han sa chairman nga si Board Member Fernando Cabigon, Jr. alang na sa dugang pagtuon. (The New Nandau, Vol. XVII No.18)

 

Bag-ong kapitan sa Diwan aktibong mopartisipar sa City develoPment council

Gipasalig sa bag-ong napili nga barangay kapitan sa Diwan ning dakbayan sa Dipolog nga iyang paning-kamutan nga aktibo siyang makapartisipar sa City Development Council dala sa iyang kasinatian sa pagpanirbisyo sa kagamha-nan para matampo usab sa gitinguhang pagpalambo sa atong siyudad. Kini ang giluwatang paha-yag ni Barangay Chairman-elect Nathan Patangan sa Diwan ning dakbayan sa Dipolog.

Si Kapitan Patangan kanhi budget officer sa dak-bayan sa Pagadian sa wala pa siya mosulod sa politika. Matud pa ni Kapitan Nathan daku ug ikatabang sa iyang pagka meyembro karon sa City Development Council ang nahimo niyang kasinatian pagka budget officer sa usa sa mga siyudad dinhi sa reheyon diha na sa pagpahat sa mga pundo ug unsay tukmang proyekto nga maoy anga-yang hatagan sa unang pagtagad.

Si Kapitan Patangan nagkanayon nga kinahanglan ang mga proyekto sa siyudad mosibo sa nasudnong programa saman sa gilusad nga anti-poverty program karon ni Presidente Gloria Macapagal-Arroyo. Angayang kasayran si Kapitan Patangan midaug sa bag-ong gitapos nga elek-siyon sa barangay batok kang Letty Bagarinao didto sa Diwan sa gamay lamang kaayo nga abante nga balig dos botos. Matud pa niya kinahang-lan nga ang pagpatuman sa mga development project sa Dipolog patas ug dili kimpang nga napulos na lamang infrastructure project.

Nalakip na sa gusto niyang mapadas-og mao ang mga livelihood project ug buot niyang mopahimulos sa programa ni Governor Rolando Yebes sa iyang ika duha karong termino nga ang unahon sa paghatag ug pagtagad mao ang proyekto para sa tiyan. Sumala pa niya kon dili man siya paminawon sa mayoriya sa city develop-ment council kay nagbinug-tong ra siya iyang ipahibawo sa katawhan pinaagi sa media unsay nagpanghitabo sulod sa konseho. (The New Nandau, Vol. XVII No.18)

 

 

 

NOTE: SEND US YOUR NEWS.  Tell us what's going on in your barangays, clubs, schools, businesses and non profit organization. You can also send notices and announcements.
          

 

    Email to webmaster@dipolognon.com

      
Google
WEB THE DAILY DIPOLOGNON