2

November 1  2007

 

Kontraktor sa TVI wala bayri sa ilang serbisyo

Nagreklamo na karon ang mga kontraktor nga gisuhulan sa TVI alang sa ilang Canatuan Gold Project sa Siocon, Zamboanga del Norte human makasinati ug kalangay ang pagbayad sa ilang gilugway nga sirbisyo. Usa sa mga kontraktor sa TVI nga nalambigit sa pagkonstrak sa usa sa sulphides dam ang mibutyag nga dili moubos sa P36 milyones ka pesos ang kolektahonon sa mga kauban niyang kontraktor nga gisuhulan sa pagtrabaho sa nasangpit nga proyekto.

Samtang kasaligang tinubdan gikan sa lang-yaw’ng kompaniya mikon-pirmar nga naglisud karon ug pundo ang kompaniya sa mina tungod kay miabot na sa punto nga ang ilang pagmina ug bulawan sa Canatuan mihinay. Sumala pa karon na lang buwan sa Oktobre kutob ang operasyon sa pagmina ug bulawan sa TVI sa Canatuan ug maoy sunod nga pagaminahon niini ang copper ug zinc sa ilang Canatuan Open Pit Mine. Ang tinubdan midugang sa pagpahayag nga ang grado sa bulawan nga nakuha karon sa TVI sa Canatuan nagka ubos na tungod kay taas ang concentration sa copper ug zinc dili sama sa una nilang pagmina nga ang sagul sa makuhang bulawan mao ang silver.

Kini ang rason ngano nga mihinay usab ang nahimong kita karon sa nasangpit nga kompaniya, dugang pahayag sa kasaligang tinubdan. Ang sulphides dam, sumala pa gikonstrak para na sa operasyon sa pagmina sa copper ug zinc nga gituhuang masugdan sa sunod tuig. Sumala pa ilawom sa copper ug zinc mao na usab ang deposito sa bulawan nga maoy ilang tiwasyon sa pagmina. (Press Freedom, Vol. XX No. 1)

 

BARANGAY PUNTA NAPUTOS SA KURAPSIYON, COA MIREKOMENDAR PAGPASAKA UG KASO

Daw gisuhid usab karon sa kagamhanang pambarangay sa Punta ang nagpanghitabong kurapsiyon sulod sa city hall sa dakbayan sa Dipolog sigun sa findings sa Commission on Audit. Sa Audit Observation Memorandum nga gipakanaug ni Dipolog City State Auditor Manuel Urquiaga niadtong Agosto 9, 2007 nga gipadala ngadto kang Kapitan Armando Drilon gikwestyon sa COA ang gihimong pagpalit sa barangay ug mga kahimanan para sa ilang opisina nga wala motakdo sa description sigun sa nabutang sa Purchase Order.

Gitataw ni State Auditor Urquiaga nga usa kini ka klarong paglapas sa balaod nga gipatigbabaw sa COA. Sigun sa records sa COA ang Barangay Punta namalit ug mga kahimanan para sa ilang barangay nga mobalor ug P62,207 sa SECC Computer Sales, Dipolog City kay gamiton para sa opisina sa Sangguniang Kabataan. Sa gihimong pagsubay sa COA nasuta nga ang mga items nga gideliver wala motakdo sa description sigun sa nabutang sa Purchase Request, Purchase Order, product warranty, brochure ug sa sales invoice.

Sa report sa COA girekomendar nga ang Bids and Awards Committee sa Barangay Punta kinahanglan sa tanang higayon mosunod sa higpit sa procurement process of units sigun sa gimandu sa mga mahinungdanong probisyon sa Republic Act 9184. Girekomendar usab ni State Auditor Urquiaga ang pagmugna ug usa ka investigating team alang sa pagpahigayon ug higpit nga imbestigasyon sa nasangpit nga irigularidad para ikapasaka ang tukmang kaso batok sa mga nalambigit nga mga opisyales sa barangay sa nasangpit nga kurapsiyon tungod sa paglapas sa Anti-Graft and Corrupt Practices Act ug uban pang mga balaod.

Kahinumduman si State Auditor Urquiaga mipagawas usab ug Audit Observation Memorandum para sa city hall sa Dipolog sa miagi nga nagbulgar sa garapalang kurapsiyon sulod sa city government. Gawas sa maong findings sa COA nasuta usab sa gihimong pag-audit sa Barangay Punta nga ang mga collector sa Barangay Punta Water System sa ilang pagpangolekta ug bayad wala silay giisyu nga cash tickets ngadto sa mga water concessionaires sa barangay.

Particular nga gitawag niini ang atensiyon sa ilang barangay treasurer nga si Luzvilla Pacio. Giklaro ni State Auditor Urquiaga nga ilawom sa balaod ang tanang koleksiyon kinahanglang isyuhan ug tukmang resibo ug ang makolektang kuwarta kinahanglan ideposito gilayon sa depository accounts sa barangay ug dili gamiton ang maong koleksiyon sa bisan unsa man nga katuyuan. Sigun sa report sa COA giangkon mismo sa mamahandi sa Punta uban sa pag-examine sa iyang libro ug mga records nga ang mga collector nasuta nga dili moisyu ug cash tickets ngadto sa mga water consumers.

Girekomendar sa COA nga kinahanglang magbutang gayud ug kwentador aron maklaro pila ang nakonsumo nga tubig ug pila usab ang angayan niining bayran ngadto sa barangay. Samtang laing Audit Observation Memorandum ang giluwatan ni State Auditor Urquiaga ngadto sa treasurer sa Punta atubangan sa kalangay sa pagremit sa mga collections sa pipila ka kolektor sa ilang barangay. Nasuta sa COA nga adunay mga koleksiyon sa barangay nga modagan na ngadto sa unom ka buwan nga wala maremit sa kolektor.

Giangkon usab sa mga kolektor nga ang nakolekta nilang bayad para sa barangay ilang nagamit personal hinungdan nga malangay sila sa pagremit niini. Usa sa kolektor nga nakita nga walay remit-remit sa iyang koleksiyon mao si Albello Padayhag nga usa ka meyembro sa Sangguniang Pambarangay sa Punta.

Sa report sa COA nagpakita nga sa Schedule of Monthly Remittance of Collections gikan sa Hunyo 2006 hangtud sa Pebrero 2007 milutaw nga sa lima ka mga collector sa Barangay Punta si Konsehal Padayhag mao ray bugtong kolektor nga wala makaremit sa iyang koleksiyon. Girekomendar ni State Auditor Urquiaga ang pagpasaka ug kasong criminal ug administratiba batok kang Padayhag tungod sa iyang pagwaldas sa kuwarta sa kagamhanan. (Press Freedom, Vol. XX No. 1)

 

$100M OFW REMITTANCE SA ZANORTE KADA BUWAN

Mokabat sa $100 million US dollar ang remittance nga mosulod sa Zamboanga del Norte kada buwan gikan sa mga Overseas Filipino Workers nga taga atua wala pay labut sa undocumented nga pagpadala sa kuwarta gikan sa gawas. Apan ang nasangpit nga pundo nakita nga wala gayud magamit sa hingpit para sa pagpalagsik ug dugang sa atong ekonomiya aron mokatap ang daghang mga kalambuan nga magahatag ug kahigayunan sa atong mga katawhan sa pagpanarbaho ug pagpa-umento sa mahipos nga buhis sa gobyerno.

Sumala pa kini gumikan sa rason nga walay gibuhat ang kagamhanang local sama sa Dipolog nga mga programa o lakang para makagiya sa mga pamilya sa mga OFW’s asa nila ibutang nga puhunan ang gidawat nilang pundo kada buwan gikan sa gawas. Kasagaran niini diha ra kutob sa pagkonstrak ug bag-ong mga pinuy-anan ug pagpamalit sa mga panginahanglanon sa panimalay nga limitado lamang ang mamahimong impact kay dili man para sa lahutay.

Pipila ka mga tinugyanan sa mga kabangkuhan sa Dipolog ang mipalanog sa ilang sentimiento nga daw gisayangan sila nga sa kadaku sa pundo nga mosulod sa dakbayan gikan sa remittances sa OFW’s kada buwan kini wala gayud magamit sa husto para makatabang sa pagpalagsik sa atong ekonomiya pinaagi sa pagbutang niini ug mga proyekto nga makamugna ug malungtarong pagpanarbaho sa katawhan ug makatabang sa pagpaligsi sa lakat sa patigayon.

Maoy ilang gipangandoy nga unta ang kagamhanang local sa Dipolog momugna ug oportunidad alang sa mga pamilya sa OFW’s nga ang pundo nga ilang gidawat kada buwan dili lang mahulog diha sa pagpamalit sa ilang mga inadlaw nga panginahanglanon kon dili ma-inganyo sila sa pagbobo niini isip puhunan sa negosyo ug uban pang mga proyekto nga makatabang sa pagpaligsi sa atong ekonomiya. Sa pagka karon wala silay nakita nga kongkretong programa nga maoy makapadani sa pamilya sa mga OFW’s nga gamiton ang ilang mga pundo para sa mga proyekto imbes patulog lamang kini diha sulod sa bangko. (Press Freedom, Vol. XX No. 1)

 

KANDIDATO SA ADMINISTRASYON DILI MAKAHAWID SA PUNDONG ILANG GIUTANG

Gipanghinambog karon sa mga kandidatu sa administrasyon sa dakbayan sa Dipolog nga andam ang ilang grupo sa gikinahanglang pundo aron sa pagsiguro nga modaug tanan nilang kandidatu. Sumala pa maoy target karon sa administrasyon nga masunod ang nahitabo sa eleksiyon sa Mayo 14, 2007 nga 10-0 dinhi sa dakbayan sa Dipolog diin tanang kandidatu sa administrasyon gikan sa mayor hangtud sa tanang meyembro sa Sangguniang Panlungsod midaug.

Aron sa pagsiguro nga kini maoy mamahimo gihapong nilugdangan sa eleksiyon karong Oktobre 29, 2007 gipaniguro na daan sa mga kandidatu sa administrasyon sa nagkadaiyang barangay sa Dipolog nga aduna gayuy pundo ang mga kapitan lakip na sa kandidatu sa pagka konsehal. Gikonpirmar sa pipila ka mga kandidatu sa administrasyon nga sila karon gipautang sa mayor ug kuwarta para magamit sa ilang kandidatura diin ang kandidatu pagka kapitan gipautang ug P50 mil pesos ug ang mga barangay kagawad tag P20,000.

Sumala pa aduna gayud silay gipirmahan nga dokumento nga naglatid unsaon nila sa pagbayad ang gikuha nilang pundo ug pila ka porsiento ang ipatong niining tubo. Sa ilang gisaysay sa mga kandidatu nga modaug ang hingpit nga kantidad nga ilang nahulaman sa mayora maoy ilang bayran. Samtang sa mga kandidatu sa administrasyon nga mapilde ang katunga lamang niini maoy ilang bayran pinaagi sa pagpasulod kanila nga mga job order sa city government para otomatik ang salary deduction.

Dugang usab nilang gibutyag nga bisan tuod ug ang nasangpit nga pundo nga ilang gamiton karong eleksiyon nahulog nga ilahang inutang gikan sa mayora apan pabiling dili sila makahawid niini kay sumala pa ang mga money bagger mismo sa mayor maoy mangunay sa pagpamalit niini ngadto sa mga botante sa ilang mga barangay. (Press Freedom, Vol. XX No. 1)

 

SCHOOL BUILDINGS UG PRE-FAB PROJECT PADAYON IPATUMAN SA 2008

Padayon nga ipadas-og sa administrasyong Yebes ang pagkonstruk ug dugang mga school buildings uban sa mga pre-fabricated buildings para sa barangay halls, health centers ug uban pa ilawom sa 2008 budget sa Zamboanga del Norte. Mao kini ang gibutyag ni OIC Provincial Engineer Ramon Ochotorena, atubangan sa pagdeklarar ni Governor Rolando Yebes nga ilawom sa iyang ikaduhang termino maoy hingusgan sa iyang administrasyon sa pagpatuman ang mga proyekto para na usab sa tiyan sa tawo kon mga livelihood projects.

Hinoon mikonhod gamay ang ilang budget para sa sunod tuig alang na sa mga infrastructure projects komparar sa budget nilang karong tuiga 2007. Matud pa sa provincial engineer kini tungod sa paghatag karon ni Governor Yebes ug prayoridad sa mga proyekto para sa tiyan sa tawo ang livelihood. Matud pa ni Engr. Ochotorena maoy tutukan nila karon nga mapasutoy ang pag-implementar human molibkas ang public works ban sa COMELEC ang paghingpit sa mga proyekto sa barangay nga gisaad ni Governor Yebes nga mobalor ug tag tunga sa milyon ka pesos.

Sa 691 ka barangay sa tibook ZaNorte modul-an na lamang sa usa ka gatus ka barangay ang wala pa makadawat sa ilang tagsa-tagsa ka proyekto nga tag tunga sa milyon ka pesos. Sa samang bahin gimandu usab sa gobernador ang pagmintinar sa higpit sa mga kadalanan sa probinsiya karon nga nakabatun ug dugang ekipo ang Provincial Engineering. Matud pa ni Provincial Engineer Ochotorena ang bag-ong mga ekipo nga napalit karon sa probinsiya iyang gidistino sulod sa 2nd congressional district aron maoy motabang sa pagpasutoy sa implementasyon sa mga proyekto sulod sa distrito ilabi na diha sa pagmintinar sa mga kadalanan.

Si Governor Yebes sa tigum sa Provincial Development Council, mipahibawo usab daan ngadto sa tanang mga municipal mayors nga ilawom sa ika duha niyang termino magapabilin pa gihapon nga mohatag siya ug mga infrastructure projects apan maoy gusto niya nga ang mga lungsod motampo niini o mohatag sa ilang counterpart. Samtang gikatakdang sugdan sa Sangguniang Panlalawigan sa ZaNorte ang pagpahigayon sa ilang marathon budget hearing sa 2008 executive budget ni Governor Yebes karong Nobyembre 5, 2007.

Ilawom sa gidusong executive budget sa gobernador para sa sunod tuig mokabat sa P1.025 bilyones ka pesos ang gipadas-og niini nga gituhuan sa gobernador nga paga dasonan sa balay balauranan sa probinsiya nga walay mahimong kausaban. (Press Freedom, Vol. XX No. 1)

 

YEBES MITATAW NGA WALA GAYUD SIYAY NADAWAT GIKAN SA MALACAñANG

Gitataw sa gobernador sa Zamboanga del Norte nga wala gayud siyay nadawat nga kuwarta samtang nagkatigum ang mga gobernador didto sa Malacañang nga gilugway gikan sa ilang Liga para capability building. Kini ang giklaro ni Governor Rolando Yebes dungan sa paggawas kagahapong adlawa sa usa ka open letter sa liga sa mga gobernador diin usa siya sa mga mitimaan nga nanawagan nga ihunong na ang kabanha o ka-alingasa karon sa politika.

Sa maong paid ad sa usa ka nasudnong mantalaan giklaro sa mga mipirmang mga gobernador uban ni Governor Yebes nga sila walay nadawat nga salapi samtang nagtigum sila didto sa Palasyo sa Malacanang. Ang gobernador sa ZaNorte, nagkanayon nga sa pagka hibawo niya sa balita nga si Governor Panlilio adunay gibulgar nga nakadawat ug kuwarta didto sa Malacanang ang una niyang reaksiyon mao ang kasuko kay ang mga lideres sa Mindanao kanunay nga mapihig sa taga Luzon kon aduna may ipangbahin nga mga kalambuan sila dili mahatagan.

Iyang gikonpirmar nga didto siya sa maong tigum sa Malacanang apan wala gayud siya mahibawo nga ang ubang mga gobernador sa Luzon adunay gibitbit nga paper bag nga ang sulod kuwarta. Kagahapong adlawa giangkon sa League of Provinces nga nanghatag sila ug tag tunga sa milyon ka pesos sa duha ka mga gobernador didto sa Malacanang apan ang maong kuwarta para sa capability building sa mga first term governors.

Matud pa ni Palawan Governor Joel Reyes ang tigpamaba sa liga sa mga gobernador ang pundo nagagikan sa contributions sa mga meyembro sa liga nga mokabat sa P21 milyones ka pesos ug diha nagagikan ang gihatag nga kuwarta ngadto nila ni Pampanga Governor Eddie Panlilio ug Bulacan Governor Joselito Mendoza. Hinoon giangkon ni Governor Reyes nga sayup nga didto nila gihatag kini sa Malacanang. Matud pa sa liga sa mga gobernador nga kon wala kinahanglana nila ni Governor Panlilio ug Governor Mendoza ang maong kuwarta angayan lang nga ila kining ibalik sa ilang liga. (Press Freedom, Vol. XX No. 1)

 

Eleksiyon sa Barangay Biniray, Katipunan!
Epok Tunguia vs. Mayor Cris Eguia

Mayor Crisostomo “Cris” Eguia maoy mahi-mong kontra ni Carmelito “Epok” Tunguia sa elek-siyon pagka Barangay Kapitan sa Barangay Biniray sakop sa lungsod sa Katipunan. Kini ang gipahayag ni Tunguia samtang gihatagan ug espisyal nga atensiyon ni Mayor Eguia ang Ba-rangay Biniray kay kanu-nay gipadalhan ug polis uban sa mga armadong sibilyan. “Dili man ang kapitan sa Biniray akong kontra, si Cris man kay nag-apil-apil man siya.”

Si Epok Tunguia, kan-didato pagka Barangay Kapitan sa Barangay Biniray sakop sa lungsod sa Katipunan mipahayag nga sa tanang barangay sa Katipunan, ang iya lamang gamay’ng baryo nga gilansaran maoy kanunay gipabalik-balikan ug polis nga unta wala may mitumaw nga kasamok sa maong dapit. Nagtuo si Tunguia nga kining kanunay nga presen-siya karon sa kapolisan didto sa Barangay Biniray maoy mando ni Mayor Cris Eguia aron hadlokon ang iyang mga tawo ug supporters nga mitabang kaniya ning umalabot nga eleksiyon.

Ang gireklamohan pa ni Tunguia kay dunay duha ka mga sibilyan nga kaswal sa lungsod sa Katipunan maoy gihimong “goons” sa mayor kay gipadala kini ug armalite paka-aron ingnon nga mem-bro sa kapolisan kay gipasuot usab ug fatigue uniform. Sumala pa nga ang maong duha ka sibilyan maoy kanunay kuyogon sa mga polis nga moadtu sa Barangay Biniray. Gihinganlan ni Tungia ang mga sibilyan nga magdala-dala ug armas nga sila si Nonoy Mueco ug Terio. Matud ni Tunguia, nag-libog siya kon unsay tuyo sa mga polis ngano nga nagsigi kining adtu sa maong barangay nga unta, wala may kaguliyang ug kagubot nga mitumaw. Matud niya, sukad siya miduso sa iyang kandi-datura pagka Barangay Kapitan gipadalhan gilayon ug armadong polis ang iyang barangay sa walay igong hinungdan.

Giangkon ni Tunguia nga duna siyay mga tawo nga gipahimutang sa Barangay Biniray apan igo lamang kining mangampanya para sa iyang kandidatura ug walay gihimo niining dautan. Dako ang pagtuo ni Tunguia nga kining adlaw-adlaw nga presensiya sa mga polis didto sa Biniray uban sa mga sibilyan nga magdala-dala ug armas maoy mando sa mayor sa tuyo nga horo-horohon ang iyang mga tawo aron dili makalihok sa umalabot nga eleksiyon.

Kini maoy iyang pagduda gumikan kay sa dihang gidungog na nga molansar siya ug kapitan sa Biniray, si Mayor Cris Eguia sa matag meeting niining ipatawag sa laing barangay, siya mao kanunay ang dauton nga dili pabotohan. Para ni Tunguia, unsa may labot sa laing barangay nga dili siya pabo-tohan nga dili man kini bo-tante sa Barangay Biniray.

Naglibog siya kon ngano nga gikontra siya ug maayo sa managsuong Eguia nga unta ang iyang tuyo ug tumong sa pagbalik sa politika sa usa lamang ka gamay nga barangay mao man ang pagtabang sa Barangay Biniray nga molambo kay sukad sa iyang pagbiya sa maong dapit diin siya kanhi nahimong kapitan wala gayud mapadayon ang iyang nasugdan nga mga mehoras.

Gihangyo ni Tunguia si Mayor Cris ug Vice Mayor Patchi Eguia nga dili mag-apil-apil sa eleksiyon kay kini usa man ka “none partisan” nga kalihukan sa barangay ug sanguniang kabataan. Matud niya, kon ugaling motabang man sila ug mga kandidato, mahimo nila kining ipatawag sa ilang opesina ug dili kay sila mismo ang moadto sa barangay aron mangam-panya sa mga kandidato nga ilang gidapigan. Matud ni Tunguia, mali-pay siya kon dunay presen-siya ang tinugyanan sa kapolisan aron mapahapsay ang kahusay ug kalinaw, apan kon ang pag-anha aron lang harason ang iyang mga tawo andam kini niyang panalipdan. (The New Nandau, Vol. XVII No.17)

 

2 ka mga kandidato pagka Kapitan sa Galas misibog

Duha ka mga kandidato pagka barangay kapitan sa Barangay Galas ning dakbayan sa Dipolog ang misibog sa ilang kandidatura pabor kang Esteban Zamoras. Matud ni Bong Amarille, gi-withdraw ang iyang kandidatura pagka kapitan sa Barangay Galas gumikan kay na-preasure siya sa ilang grupo. Kini ang gipamahayag ni Amarille, incumbent barangay kagawad sa Barangay Galas sa dihang iyang gisibog ang nahauna niyang giduso nga COC paka Barangay Kapitan.

Matud ni Amarille, tungod sa hangyo sa iyang kapartido sa politika, aron dili duha sila ang kauban sa grupo nga mosangka sa kandidato sa administrasyon, isip paghatag ug respeto ug pabor, iya nalang gihatagan ug higayon nga si kanhi Barangay Kapitan Esteban Zamoras ang molansar pagka kapitan. Mao usab kini ang gipamahayag ni Felomino Zamoras kinsa mi-withdraw usab sa iyang kandidatura pagka Barangay Kapitan aron dili maglibog ang mga botante ilabi na ang ilang kadugo ug supporters nga duha sila nga milansar sa susamang apelyedo.

Si Felomino Zamoras miduso sa iyang Affidavit of Withdrawal ngadto sa COMELEC-Dipolog nianang hapon sa Oktobre 18. Matud ni Zamoras, tapos na siyang nakaduso ug Certificate of Candidacy ngadto sa Comelec nianang buntag sa Oktobre 18 aron magpapili pagka Barangay Captain sa Galas niining pagpahigayon sa Synchronized Barangay ug Sanguniang Kabataan eleksiyon karong Oktobre 29 diin iyang gibutang sa COC ang angga nga “Teban” sama sa dangga sa iyang oyuan. Apan nahimong kontrobersiyal ang ilang kandidatura sa dihang duha sila nga Zamoras ang milansar pagka kapitan nga si Esteban “Teban” Zamoras nga kanhi kapitan sa maong barangay nga iya mismong uyoan.

Matud ni Felomino Zamoras, iyang nalantaw nga dako kaayo ug epekto sa ilang pamilya ug sa tibook nilang banay sa mga Zamoras kon siya mopadayon sa iyang kandidatora nga mao ang dako niyang rason nga misibog sa iyang tinguha nga magpapili pagka-kapitan sa Galas. “I am withdrawing my candidacy for Punong Barangay of Barangay Galas, Dipolog City for the October 29, 2007 Synchronized Barangay and Sanguniang Kabataan Elections; hence, will not participate in the said political exercise anymore,” nagkanayon sa iyang gipermahan nga Affidavit of Withdrawal si Felomino “Teban” Zamoras.

Sa pagkakaron duha nalang ang magsangka pagka kapitan sa Galas, sila mao si Esteban “Teban” Zamoras ug Eustiquio “Tikyo” Carpitanos. Sa Barangay Estaka gikatahong misibog usab sa iyang kandidatora si Nardo Tan pagka Barangay Kapitan hinungdan nga walay kontra karon si incumbent Barangay Captain Bong Ortega. (The New Nandau, Vol. XVII No.17)

 

SP Zamboanga: Babagan ang Pagadian mahimong regional center
SP Zanorte: Ibalhin ubang regional offices sa Zambonga del  Norte
Zamboanga nangayo’g suporta gisalikway sa SP Zambo. Norte

Wala hatagi ug gibug-aton sa hunta probinsyal sa Zamboanga del Norte ang hangyo sa Sanguniang Panlungsod pinaagi ni Mayor Celso Lobregat sa Zambo-anga City nga nangayo ug suporta nga supakan ang pagbalhin sa regional center gikan sa Zamboanga paingon na ngadto sa Pagadian City, Zamboanga del Sur. Kini maoy subay na sa resolusyon sa Sanguniang Panlungsod sa Zamboanga City nga gipadangat ngadto sa Sangguniang Panlala-wigan, Zamboanga del Norte nga nangayo kanila ug suporta.

Matud pa ni Board Member Edionar Zamoras nga maoy proponent sa maong resolusyon ang Zamboanga del Norte pina-agi ni Governor Rolando Yebes naghangyo ngadto sa opesina sa presidente nga ang ubang regional offices ibalhin nganhi sa dakbayan sa Dipolog. Matud niya kon ilang su-portahan ang lakang sa Zamboanga, nagpasabot nga ilang giabandonar ang naha-unang hangyo sa gobernador nga ang ubang regional offi-ces ibalhin nganhi sa dakba-yan sa Dipolog ug Dapitan, Zamboanga del Norte.

Si Board Member Edgar Baguio mipahayag nga sa panahon pa ni kanhi Presidente Corazon Aquino giluwatan ang executive order nga ang regional center nga sa pagkakaron anaa na-establisar sa Zamboanga City ibalhin ngadto sa Pagadian City ang ilang gisupakan kaniadto. Kini tungod sa sugyot nga ang kanait niining probinsya sama sa Basilan, Sulo, Tawi-tawi ang nahisakop kini sa Autonomous Region in Muslim Mindanao hinungdan nga ang Zamboanga City wala na malangkob sa Zamboanga Pinensula dinhi sa rehiyon nuybe.

Sumala ni Baguio nakahinumdom siya nga sa iyang unang termino sila sa Sangguniang Panlalawigan mipadas-ug ug resolusyon nga nagpadayag sa ilang pagsupak nga ang regional center ibalhin ngadto sa Pagadian City kay dunay lakang nga ang Misamis Occidental ug Lanao Del Norte ipasakop sa rehiyon nuybe. Ila hinoon gitanyag sa opesina sa presidente nga ang regional center sa Zamboanga City ibalhin nganhi sa Zamboanga del Norte pinaagi sa paghanyag niini ug gobernong luna diha sa nahimutangan karon sa Provincial Mobile Group nga kaniadto maoy nahimutangan sa Philipine Constabulary sa Sicayab nga maoy butangan sa regional offices apan ang mao nilang hangyo wala matuman.

Si Board Member Ricky Mejorada mipahayag nga wala silay igong rason nga ilang suportahan ang lakang sa Zamboanga City nga supakan ang pagbalhin sa regional center ngadto sa Pagadian tungod kay wala man gani gibutang sa maong resolusyon unsay nagpahipi nga mga hinungdan ngano nga ilang suportahan ang maong lakang. (The New Nandau, Vol. XVII No.17)

 

Barangay Turno mihimakak nga wala sila mihatag ug indigency certification para malubong ang patay nga taga SItio Lubas

Kusganong gihimakak ni Bebe Baes, Secretary sa Barangay Turno nga wala mo-isyu ug indigency certification si Barangay Kapitan Dodong Sorronda para dili malubong sa pampublikong sementeryo ang patay’ng lawas ni Teopelo Pormento nga membro sa Lando BIBO.  Kini ang gipatin-aw ni Bebe Baes sa interview sa balita sa tingpaniudto sa DXFL atubangan sa nahaunang report nga gibalebaran sa kagamhanang lokal sa Dipolog ang paglubong ni Pormento sa sam-ang sa Gulayon gumikan kay kini membro sa Lando BIBO.

Matud ni Baes, niadto pang Sabado si Kapitan Sorronda mi-isyu ug indigency certification apan kon misango man kini sa City Hall, kana wala na silay labot kay dili na nila kini kontrol. Gipaklaro ni Baes nga sila sa Turno, kontra ug dili sa politika nagkahiusa ug walay gipihig diha sa pagserbisyo, dili pareha sa ubang bara-ngay nga dunay pagdumot.

Kon wala tuguti sa kagamhanang lokal sa Dipolog ang paglubong sa patay’ng lawas ni Pormento didto sa pampublikong sam-ang sa Gulayon, sigon sa iyang nahibaw-an nga wala nay bakante. Kon duna may bakante, Matud ni Baes kini gireserba para sa pito ka mga peneriso. Wala hinoon hinganle ni Baes kinsa kining pito ka mga peneriso nga gi-reserbahan sa siyudad sa maong lubnganan nga matud pa sa mga katawhan, bisan ug buhi pa, daw gitunglo naman sa siyudad.

Matud ni Baes usa sa problema sa siyudad nga nagkulang ug pantiyon ang pampublikong sam-ang sa Gulayon tungod sa pagma-gahe sa Kapitolyo nga mo-isyu ug sand and gravel permit hinungdan nga wala silay materyales nga magamit para sa pagpahimo ug pantiyon. Nasayran si Pormento gilubong nalang sa sam-ang katoliko ning dakbayan sa Dipolog. (The New Nandau, Vol. XVII No.17)

 

DILG motabang seguridad sa probinsya

Gipasalig karon sa buhatan sa Department of the Interior and Local Government (DILG) ang ilang higpit nga pagbantay sa kalinaw ug seguridad ning lalawigan sa Zamboanga del Norte karong taliabot na ang bugnong lugaynon sa Barangay ug Sangguniang Kabataan.

Si Mr. Jaime Paler, Provincial Director sa DILG nga nahinabi sa Zamboanga del Norte United Correspondents (ZNUC) nagkanayon nga gitahasan usab sila sa pagbantay sa mga panghitabo may kalabutan na sa bugnong lugaynon ug pagtabang kon pag-assist sa Commission On Election (COMELEC) aron sa ingon niana makab-ot ning atong lalawigan sa Zamboanga del Norte ang hapsay, malinawon, ug limpyo nga piniliay.

Subay niini, mapasigarbuhon si Mr. Pales nga pagkakaron wa pa’y nahitala nga mga panghitabo kalambigit sa Barangay ug Sangguniang Kabataan election. (Mindanao Star, Vol.III No.39)

 

FILOMENO ZAMORAS mi-withdraw pagka-Kapitan sa Galas

Aron mawala ang dakong kalibog sa mga botante sa barangay Galas ning syudad, mi-sumite  sa iyang Affidavit of Withdrawal ngadto sa buhatan sa COMELEC si Filomeno Zamoras nga midagan unta pagka-kapitan  sa maong barangay alang sa umaabot nga piniliay karong Octobre 29, adlawng Lunes. Kahibaloan nga si Filomino Zamoras ang mi-sumite na unta sa iyang Certificate of Candidacy ngadto sa COMELEC kaniadtong Oktubre 18, aron magpapili unta pagka-punong barangay sa Galas ug nahimong usa ka dakong kontroberyal human nga duha ka ZAMORAS ang midagan pagka-kapitan usa na  si Esteban “Teban” Zamoras nga kanhi  kapitan ug uyuan mismo ni Filomeno.

Sa pakighinabi sa mga miembro sa Zamboanga del Norte United Correspondents ngadto kang Felomino Zamoras, nga iyang nalantaw ang dako unyang epekto sa ilang pamilya ug sa tibuok nilang banay sa mga Zamoras kung siya magpadayon sa iyang kandidatora nga mao ang dakong rason nga siya mi-sibog sa iyang laraw nga magpapili pagka-kapitan sa Galas.

Sa gihimo karong pag-withdraw ni Filomeno Zamoras hayan ang mga katawhan ug mga botante sa barangay Galas, ning syudad, dili na maglibog kung kinsa ang angayan nilang pili-on nga mangulo sa ilang barangay karong adlawng Lunes kay duha na lamang ka mga opisyal nga kandidato ang ilang pilian nga mao sila si Esteban “Teban’ Zamoras ug Eustiquio “Tikyo” Carpitanos. (Sam Buddy, Mindanao Star, Vol.III No.39)

 

Zampen productivity & competitiveness council tukoron alang na sa kalamboan sa katawhan sa Rehiyon IX

Subay sa pagsaulog sa National Productivity Month karong Oktubre, ang Regional Tripartite Wages & Productivity Board (RTWPB) – IX mopahigayo’g usa ka adlaw nga workshop sa Productivity and Competitiveness karong umaabot Oktubre 31, 2007 sa Lantaka Hotel dakbayan sa Zamboanga.

Nasayran nga tumong niini ang pagmugna sa roadmap sa Zamboanga Peninsula (ZAMPEN) productivity and competitiveness action agenda alang na sa tuig 2008-2009; paghatag og dakong kahulogan sa panagtigum aron adunay makuhang mga nagkalain-laing ideya gikan na sa mga government agencies, industriyang mga lideres, labour groups ug sa mga Non-Government Organizations; ug labaw sa tanan ang paghatag og kasayuran sa mga partisepante niini kon unsa ka importante ang productivity and competitiveness isip maoy nagmaneho sa kalamboan sa ekonomiya ug kaayuhan sa katawhan sa Rehiyon IX ug ang pagmugna sa ZAMPEN Productivity and Competitiveness Council (ZPCC).

Matud pa nga ang tema sa maong kalihukan “Zamboanga Peninsula (ZAMPEN) Productivity and Competitiveness: Crafting a Regional Roadmap.” (Mindanao Star, Vol.III No.39)

 

Pagkunhod sa ani sa mag-uuma sa ZaNorte gitutokan sa DA-IX

Aron masubay  ang  angayan  hatagan ug  pagtagad ilabina  sa industrisya sa agrikultura dinhi sa Zanorte gihimo sa rehiyonal  nga  buhatan sa Department of Agriculture ang LGU Consultalive Meeting ug 3rd Quarter Agricultural Data Review niadtong Biyernes Octubre 19.

Ang maong panagtigom tali na sa mga Agriculture Technologist gikan sa 3 ka mga distrito dinhi sa probinsya lakip na  ang buhatan sa Provincial Agriculture aron masusi ug nasayran ang nagkadaiyang problem nga nasinati sa matag lungsod dinhi sa probinsya. Sa pakighinabi ni Wenifreda P. Jose ang Rice Banner Coordinator ug Chief Crops Section nga matud pa ang Zamboanga del Norte ang nakahinagbo kini ug pagkunhud sa ani sa humay sukhawi sa Zamboanga del Sur, Zamboanga Sibugay ug Zamboanga City nga diin basi sa report gikan sa Bureau of Agriculture Statistic Data nga maoy official report sa evaluation sa matag probisyal level ning tuiga nga diin ang Zanorte ang naka-angkon kini sa 2.10 rice program rate sukwani niadtong nakalabay tuig.

Pinaagi sa proyekto karon nga gipagawas sa buhatan sa DA ubos sa kamanduan sa Presidente sa pilipinas nga ipatuman ang GMA BANNER PROGRAM diin ang GMA Rice, GMA Corn, GMA Fisheries, GMA Livestock ug GMA Hi-Value Craft Production nga maoy sulbad sa nahiaguman nga problema sa pang-uma ug pinaagi niini ma-rehabilated ang mga nadaot nga humay ug nahatagan sa patubig gikan sa National Irrigation Administration kinsa maoy gitahasan sa buhatan sa DA. Samtang ang kagamhanang probinsyal pinaagi sa Office of the Provincial Agriculturist ang mihimo na karon ug mga lakang aron matutokan ang mga mag-uuma nga nakahiagom ug pagkunhod sa ilang ani gumikan usab sa kakulangon sa mga irrigation projects sa mga kalungsuran.

Sa kabahin ni Gov. Lando Yebes, iya nang gipahingitaan ug mga donasyon gikan sa national fund ang pagpalambo sa natad sa agrikultura ning lalawigan diin aprobado na sa Provincial Development Council (PDC) ang pahat alang sa programang panginabuhian nga matagamtam unya sa mga mag-uuma ug tanang kabus nga katawhan. Gilauman usab sa DA-9 ang kooperasyon usab sa mga local government units ning lalawigan aron ma-monitor ang mga nag-unang problema sa mga local farmers sa ilang dapit aron niini mahatagan kini ug ayuda gikan sa maong buhatan. (Mindanao Star, Vol.III No.39)

 

 

 

NOTE: SEND US YOUR NEWS.  Tell us what's going on in your barangays, clubs, schools, businesses and non profit organization. You can also send notices and announcements.
          

 

    Email to webmaster@dipolognon.com

      
Google
WEB THE DAILY DIPOLOGNON