October 30,  2008

 

IBP ZaNorte migulang champion

Ang mga magdudula nga sakop sa Integrated Bar of the Philippines, Zamboanga del Norte Chapter (IBP-ZN) maoy migulang mananaog sa bag-ohay pa lang gipahiga-yong First Mindanao IBP Palaro nga gipasiugdahan kaniadtong Octobre 16-18, 2008 didto sa Dakbayan sa Davao.

Ang mga dulang nadag-an sa IBP-ZN mao kining mosunod: Badminton (men’s single)- Fiscal Jose Rex P. Ortega (first); Badminton (women’s single) – Fiscal Herminia C. Enero (second); badminton (mixed double) – Judge Chandler O. Ruiz ug Fiscal Herminia C. Enero (first) ug Fiscal Jose Rex P. Ortega ug Atty. Jo Anne O. Tayko (second); Badminton (men’s double) – Judge Chandler O. Ruiz ug Fiscal Jose Rex P. Ortega (first); Bowling – Judge Rogelio D. Laguihon, Judge Chandler O. Ruiz, Fiscal Chad M. Paler, Fiscal Lynbert T. Lo, Atty. Jo Anne O. Tayko ug Atty. Rubencio B. Legorio (second runner-up)

Si Atty. Rubencio B. Legorio nakakuha sa highest average score per game, highest score (double), ug highest individual score (single).

Kahinumdoman nga ang First Mindanao IBP Palaro gisalmotan sa IBP Chapters sa Davao City, Sultan Kudarat, General Santos City, Davao del Norte, Davao del Sur, Lanao del Norte, Surigao del Norte, Surigao del Sur, Cagayan de Oro City, Zamboanga del Sur, Zamboanga City-Sulu-Tawi-Tawi ug Zamboanga del Norte.

Angay usab ipasigarbo ang Basketball Team sa IBP-ZN nga gilangkoban sa lima lamang ka magdudula, nga sila si Atty. Pete T. Zamora, Atty. Benigno Omaguing, Atty. Clyde R. Naong, Atty. Felixberto C. Bolando ug Atty. Claver A. Pajaren.

Bisan gibansagan lamang silag D’Finghting Five, napildi nila ang strong team sa Davao del Norte sa dula nga gitawag ug dula nga “way puli-puli”

Ang contingent sa IBP-ZN nagmalampuson sa ilang pagsalmot sa dulang paugnat sa kusog pinaagi usab sa pag-ayuda nila ni Rolieta Elcamel Balo (IBP Legal Aid Secretary), Rey Templa ug Martillano Barrios. (Press Freedom, Vol. XX No. 54)

 

Aide to barangays, nalakip na sa annual  investment plan ‘09 sa probinsya

Ang pag-pakabana sa mga Barangay Officials sa ilang tagsa-tagsa ka nga barangay roads, mao gayud unta angayan nga himuon aron nga ang atong mga kadalanan sa mga kabarangayan dili mahinaykan sa kadaot.  Mao kini ang subli nga pahayag ni Provincial Governor Rolando E. Yebes, karong bag-o, human niya masuta ang grabing kadaot karon sa atong mga kadalanan sa kabarangayan.

Hinoon gumikan usab sa pagpunay og ulan-ulan kini usab ang nakadugang sa kadaot sa atong kadalanan. Apan kon ang atong mga barangay officials mohimo lamang unta sa ilang kaakohan diha sapag- atiman gilayon sa ginagmay nga mga guba sa ilang kadalanan kini dili na mahinaykan sa kadaot.

Misabot ang Gobernador nga limitado lamang ang pundo sa mga barangay diha sapag-mintinar sa ilang mga kadalanan, ingon man limitado usab ang pundo sa mga kalungsuran sa pagmintinar sa mga kadalanan sa ilang lungsud. 

Mao nga ang Probinsiya migahin usab og diyutay nga ayuda sa atong mga kabarangayan.  Ngani matud pa sa atong nasayran nga sa gisubmiter karon nga Annual Investment Plan sa atong Probinsiya alang sa sunod nga tuig 2009, nalakip na niini ang Aide to Barangays. (Nena, Southpoint, Vol.1No.42).

 

Sobra usa ka libo napailawom sa PhilHealth program

KAPIN sa usa ka libo ka mga pobreng katawhan sa lungsod sa Labason ug Liloy ning atong lalawigan sa Zamboanga del Norte gisalbar karon sa probinsiya ang pag-atiman sa ilang panglawas ug pagsalbar sa ilang kinabuhi. Kini human nga nadawat niadtong sabado ang ilang tagsa-tagsa ka mga PhilHealth Card.

Nianang buntag, gihimo ang pag-apud-apud sa maong PhilHealth Card didto sa lungsod sa Labason nga gipangunayan mismo ni Governor Rolando Yebes, mga opisyales sa lungsod sa pagpangulo ni Mayor Balais, Nonoy Meraviles nga nag-representar kang Congressman Cesar Jalosjos ug CDAU – Unit Head Ronie Pacilan.

Matod pa ni Governor Yebes nga iya gayud gihatagan sa igong pagtagad ang pagtabang sa mga katawhan diha sa pag-atiman sa ilang panglawas. Sagad sa nahitabo sa matag pamilya pipila lang ang nagtigom ug kuwarta panagana aron maoy gamiton pag-abot sa panahon nga magsakit. Kadaghanan niini ang wala maghimo sa maong butang. Kini gumikan usab sa kalisod.

Sa maong PhilHealth Program sa probinsiya dili na magkalisod ang pobreng katawhan mangita ug kuwarta aron maoy gamiton sa pagpatambal. Gidugang ni Governor Yebes nga sa maong PhilHealth card siguradong maatiman pag-ayo ang usa ka pasyente nga miyembro niini tungod kay sa maong programa adunay makuha nga bayad usab niini ang doctor.

Gawas sa PhilHealth card nga gikan sa probinsiya, gikatakda usab nga madawat sa maong lungsod ang usa ka modernong ambulansiya. Mas nadugangan ang kalipay sa mga katawhan sa Labason sa dihang gipahibalo ni Governor Yebes nga sa sunod semana maangkon na sa mga katawhan sa lungsod ang dugay na nilang gipangandoy nga tubig ilimnon. Kini ang paga-inugarahan human nga nagkahi-usa ang mga kadagkuan sa probinsiya ug lungsod. Tipik sa maong pundo nagagikan nila ni Congressman Jalosjos ug Governor Yebes.

Human sa Labason, malipayon usab nga gidawat sa mga katawhan sa lungsod sa Liloy ang PhilHealth Card. Sama sa lungsod sa Labason, makadawat usab ang Liloy sa usa ka modernong ambulansiya. Atubangan sa mga katawhan giklaro ni Governor Yebes nga iyang buhaton nga usa ka balaod  ang programa sa probinsiya pagtabang sa mga pobreng katawhan, pag-atiman sa ilang panglawas aron magpabilin ang programa bisan wala na siya sa iyang katungdanan.

Iyang gipaabot ang iyang panawagan nga ipadayon ang pagtabang ug pagsalig ngadto sa mga namunoan sa lungsod ug probinsiya tungod kay ilang gibuhat karon ang tanan alang sa kaayohan sa mga Zanortehanon.

Mapasalamaton kaayo ug dako sila si Mayor Balais ug Mayor Jaime Lim nga gipaabot ni Governor Yebes ang maong programa sa ilang lungsod. (Southpoint, Vol.1No.42)

 

Sayud ka ba... kalambuan sa agrikultura

Sagun sa nahipos nga kasayuran gikan ni Ms. Meriam Villanos, Project In-charge sa Biological Control Lab sa Office of the Provincial Agriculturist, mitaho nga pagka-karon ang iyang buhatan may mokabat sa 5,000 ka Trichograma “EGGCARDS” nga moandam magamit sa mga magooma sa humay ug mais, alang pagsumpo sa mga tul-ay sa mais ug uban pang mga dangan sa kaumahan, pinaagi sa paggamit sa eggcards alang sa mais ug humay. Makadaginot ang mga farmers sa pag gamit  niini ug sa pagkakaron daghan kon (pest) diin midaghan ang ani sa mga magooma ang naka ganasiya pa gayud pinaagi sab sa pagsupervisar sa mga Agricultural technicians sa OPA, PLGU nadistino sa ilang tagsatagsa ka area of coverage, mga kabarangayan ug kalungsuran niini lalawigan uban sa atong mga Hi-Green Technicians, buhatan sa OPAg karon pagdumala ni Supervising Agriculturist, Maybel C. Bustalino. Apan bisan pa nagkadako ang ani sa ubang mga magooma, makadaginot pa gayud taliwala sa kahagip-ot sa panahon karon tungod sa nagkamahal palaliton sama sa mga Agricultural Inputs - Abuno, binhi, ug mga pampatay-dangan, uban,pa.

Samtang pikas nga bahin, ang buhatan karon sa Provincial Agriculture, padayon ang hugtanong kampanya sa Hi-Green Program sa mga kabukiran, samtang ubos sa buhatan ni Gov. Atty. Rolando Yebes maoy sentro karon sa kagamhanang provincial ang panginabuhian sa katawhan - “Livelihood Program” labina sa Agrikultura. Usab pagka karon pinaagi sa “Corn Subsidy” Program sa nasudnon ug lokal nga kagamhanan, alang sa mga farmers available karon ang 83 bags nga white corn seed variety. Gikan sa BIOSEED Coy. Samtang Cash equity sa atong  mga farmers mokabat lang sa P350.00 ka pesos matag sako  nga binhi nga privilihio sa kagamhanan. Samtang mokabat usab sa 200 bags nga “certified seeds nga gedeposit/stock sa OPAG Seed Bodega gikan sa Seed  Local Producer sa Agrikultura, nga matang sa BINHI mao ang NSIC-RC - 138. Kini pinaagi usab sa atong mga Prov’l Coordinators Herberst Solibio, Lucenio Agecia, Generoso Maragguinot mga responsable sab sa Seed Production, Provincial Agriculturist, Maybel C. Bustaliño, uban sab ni Operations Chief, Noli Bhoy Bengua-”Sang.” - By Kuya Woods G. Abanti Danieles. (Southpoint, Vol.1No.42)

 

Prov’l Children’s Congress gisaulog

Dako kaayo ang pagdayeg sa mga misaksi ngadto na sa mga kabataan nga nagtungha pa lang sa Day Care human kini mipadayag sa ilang mga nagkalain-laing talento atol sa pagsaulog sa Provincial Children’s Congress nga gipahigayon tibuok adlaw sa Oktubre 24, 2008 sa Zamboanga del Norte Convention & Exhibition Center ning dakbayan sa Dipolog.

Bisan pa man sa kabatan-on nga nag-edad pa lamang sa tres anyos hangtod sayes anyos ang mga kabataan nga nagtungha sa Day Care gikan na sa nagkalain-laing kalungsuran palibot ning lalawigan sa Zamboanga del Norte, apan nakita niini nga maayo ug lihiro na kaayong mokanta, mosayaw ug maayo nang molitok sa pinulongang English ang naasoyng mga kabataan.

Ang maong kalihukan sa kagamhanang probinsyal sa Zamboanga del Norte sa pagpangulo ni Governor Rolando E. Yebes pinaagi sa Provincial Social Welfare and Development Office (PSWDO) inabagan ni Ms. Grace Marylen B. Sabal, Officer In-Charge sa PSWDO.

Si Sabal namahayag nga ang mga kabataan ning atong katilingban kinahanglan nga hatagan gayod sa maayong pagtagad pinaagi sa pagmatuto, pag-disiplina sa insaktong pamaagi, pagtudlo sa insakto mintras anaa pa kini sa hamubo nga pangedaron ug nga dali ra usab kining matudloan sa angay kon bata pa kini ilabina sa mga Day Care nga mga magtutungha.

Atol usab sa maong kalihukan ang gihimong indigay sa Draw and Tell, Speech Choir ug Singing contest diin, nakita gayod ang mga abilidad sa maong mga kabataan bisan pa man sa kabatan-on pa niini.

Gikahibaloan nga ang maong Provincial Children’s Congress subay kini sa pagsaulog sa tibuok nasud ning Pilipinas nga nagdala sa tema nga “Bright Child: Sa Tamang pag-aaruga, Kinabukasan ay maginhawa. (Southpoint, Vol.1No.42)

 

“Stop Implementation of LTO Order”—Verduguez

Dili angayan ipadayon sa mga traffic enforcers sa kapolisan sa Dipolog ang estriktong implementasyon sa dakung multa sa mga motorista nga dili magsuot ug helmet. Kini ang unod sa resolusyon nga gipangamahanan ni Konsehal James Verdugues atol sa ilang regular session sa Sangguniang Panlungsod ning semanaha.

Wala makombinsir si Konsehal Verduguez sa gipahayag ni LTO Chief Ismael Yusop nga gisuspender nang daan sa Land Transportation Office ang pagpasul-ob sa matod pa prescribed helmet sumala sa gipatuman sa kontrobersyal nga LTO Administrative Order as 2008-015 alang sa mga motorista nga maoy hinungdan nga gitogutan sa LTO ang pag sul-ob sa mga motorista sa mga nagkalain-laing matang sa helmet.

Matod pa ni Konsehal Verdoguez nga kinsa maoy chairman sa committee on peace and order and safety sa konseho nga wala niya matuhog kung unsay gipasabot ni LTO Chief Yusop tungod kay kung gisuspender pa ang pagpatuman sa pag sul-ob sa gisitar nga prescribed helmet angayang gisus-pender usab unta sa LTO ang pag implementar sa maong kontrobersyal nga order administratibo nga gilu-watan sa miaging Sept-yembre 30 ni Asst. Secretary Alberto Suansing sa Department of Trans-portation and Commu-nication kung DOTIC sa kaulohan.

Angayang kahinum-duman atol sa regular nga session sa konseho ning dakabayan sa Dipolog gipangamahanan ni Konsehal Verdoguez ang usa ka resolusyon nga nag-awhag sa LTO ug mga Traffic Enforcerment Officer dinhi sa dakbayan sa Dipolog nga hunungon una ang pagpatuman sa kontobrsyal nga order administartibo tungod kay wala ma define ug maayo sa LTO ang provision mahitungod sa matod pa prescribed helmet nga hinugpong untang isitar sa LTO ug Department of Trade and Industry kung DTI.

Matod pa ni Konsehal Verdoguez nga gumikan niini nalibog karon ang mga motorista samtang ilang gireklamo usab og gisaway ang kadako sa multang silot nga ipahamtang niadtong masakpan nga wala magsul-ob ug helmet, ma rider man o back rider nga modagan sa mil kenyentos ka pesos.

Pahamtangan usab sa hustong multang silot ang mga motorista nga wala magbaton sa hustong side mirror,signal lights, horn nga giilang vital parts sa motor ug dili mga accessories ug niadtung dili magsapatos. (Mar Uy, The New Nandau, Vol. XVIII No.12)

 

ZaNorte Medical Center mopa-umento sa bayranan

Gikonpirmar administrative officer sa ZaNorte Medical Center nga naghan-ay sila karon ug plano para sa pagpa-umento sa singil sa mga balayronon sa sirbisyo sa maong hospital.

Si Mr. Gil Muncada, mipahayag nga ang giumol nila karong proposal sa pagpa-umento sa singil sa nagkadaiyang sirbisyo sa ZaNorte Medical Center lakip na sa room rates ang ubos pa kay sa kasamtangang gisingil sa mga pribadong hospital ug ubang health facilities dinhi sa atong lokalidad.

Matud pa ni Muncada ang ilang gipadas-og nga umento sa taripa sa singil sa sirbisyo sa hospital gamay ra gayud kay dili usab sila gusto nga madak-an sa balayranan ang mga pasiente.

Gipasabot sa administrative officer sa ZaNorte Medical Center ang gitinguhang pagpa-umento sa singil sa mga balayronon gisibo ra usab sa pagbatun karon ug modernong mga kahimanan ug pasilidad sa nag-unang tambalanan sa lalawigan.

Ilawom sa gipadas-og nilang lakang, matud pa ni Muncada ang mga kabus nga dili gayud makabayad pagatabangan sa kagamhanan ilawom sa programa ni Governor Rolando Yebes, apan kadtong mga katawhan nga adunay kaya mosingil gayud ang tambalanan sa bayad aron dunay ikalahutay sa pagsirbisyo ang hospital.

Sumala pa niya ang ilang gipadas-og nga taripa susama ra sa gisingil usab sa ubang health facilities dinhi sa atong localidad o mas ubos pa gani niini tungod kay gobyerno man ang tambalanan. (The New Nandau, Vol. XVIII No.12)

 

Curfew sa Labason higpit nang gipatuman

Higpit karong gipatigbabaw sa tanang bahin sa lungsod sa Labason, Zamboanga del Norte ang curfew gikan sa hamtung hangtud sa mga kabataan gikan sa alas 10:00 ang takna sa gabii hang-tud sa alas 4:00 sa kaadlawon.

Si Mayor Wilfredo Balais sa Labason, mipahayag nga sukad nila gipatigbabaw ang curfew miubos usab ang nagpanghitabong krimen sa ilang lungsod ilabi na sa mga lungkab ug kawat.

Matud pa ni Mayor Balais human sa tigum sa Provincial Peace and Order Council didto sa lungsod sa Sindangan diin gituki ang kabahin sa nahitabong pagpang-atake sa MILF batok sa mga kalungsuran sa Lanao del Norte, North Cotabato ug Sarangani Province sa dihang gikasabutan ang pagpatig-babaw sa curfew diha-diha dayon kini gipatuman sa ilang lungsod.

Sumala pa ni Balais sukad nila gipatigbabaw ang curfew sa Labason daghan na ang nadakpan kay nakalapas niini ug ubay-ubay na usab ang nakabayad sa multa nga P200.00.

Samtang gipalagsik usab ang pagpatrolya sa mga barangay tanods sa nagka-daiyang barangay sa Labason lakip na sa mga tanods nga gibatunan sa munisipyo nga mokabat sa 30 ka meyembro nga maoy mitabang sa pagpatrolya sa ilang kapulisan.

Sa nakita pipila ka mga tanods sa barangay sa Labason ang nagbatun ug kaugalingong mga armas ilabi na sa mga shotgun.

Samtang gibutyag usab ni Mayor Balais nga ang muni-sipyo naglaraw sa pagpalit ug 30 usab ka mga shotguns para sa ilang tanods sa munisipyo.

Sa nasayran ang ubang mga kalungsuran sa 3rd congressional district nag-batun usab sa ilang curfew apan ang uban wala kaayo motinood sa pagpatuman niini. (The New Nandau, Vol. XVIII No.12)

 

Estudyante gitabangan ug kulata sulod sa room sa amahan ug pag-umangkon

Maayong pagka mamo ang usa ka batan-ong estudyante sa tulonghaan sa Langatian National High School sa lungsod sa Roxas sa dihang kini gitabangan ug kulata sa amahan ug pag-umangkon.

 Ang biktima usa ka First Year High School student sa maong tunghaan. Matud sa report, samtang ang batan-ong biktima anaa sulod sa class room sa gihimo nga klase sa ilang magtutudlo, kalit lamang nabungkag ang klase uban sa laing room gumikan kay nagubot agi sa pagpanghasi.

Kini nahitabo mga alas 11:30 sa udto sa room ni Mrs. Josephine Marabulas. Matud pa nga namugos gayud sa pagsulod sa room ang amahan sa gika-away sa biktima ug pag-umangkon niini arun kulatahon ang batan-ong estudyante.

Ang biktima mao si Carl Nazareno, kinsi anyos, usa ka First Year High Student sa Langatian National High School. Ang gitumbok nga gakulata sa batan-ong estudyante mao sila si Mario Miniao alyas Dondon ug Ayong Torres.

Matud sa report, ang biktima ug anak ni Miniao nga si Marvin parehong klasmit sa First Year ang nagkalalis gumikan kay gi-silian ang baba sa anak sa suspetsado maoy hinungdan nga misumbong usab kini sa iyang amahan ug misulong sa eskuwelahan.

Ang maong hitabo ang gipablotter na kini sa kapolisan sa lungsod sa Roxas Police Station alang sa tukang kaso nga ipasaka batok kanila.

Ang mga ginikanan sa maong tunghaan nanawagan kang Schools Div. Supt. Sharif Adhzar Sarahadil lakip sa PTCA president nga magpakabana sa maong hitabo alang sa pagprotiher sa mga estudyante ug magtutudlo kay sama sa maong nahitabo, daw sayon ra nga giyano-yano ug sulod sa maong mga suspetsado ang class rom nga mimugna ug kaguliyang.

Ilang gipanawagan nga kon mahimo ma-imbestigahan ang maong panghitabo gumikan kay dunay gisuweldohan nga security guard ang wala kini makabadlong sa maong hitabo. (The New Nandau, Vol. XVIII No.12)

 

Gasto sa mga seminars maoy naka-itos kwarta sa lungsod

Mireklamo na si Mayor Noli Sulit sa lungsod sa La Libertad batok sa daghang mga konpe-rensiya ug seminars nga gipata-wag nga mahal ang mga registration fee kay maoy nakaitos sa kuwarta sa lungsod.

Kini ang gipalanog ni Mayor Sulit sa panagtagbo sa Provincial Development Council kay gusto niya nga ang kagamhanang probinsiyal maoy mogahin ug pundo nga maoy kuhaan para sa registration sa ipatawag nga mga seminars ug konperensiya sa nagkadaiyang mga buhatan sa kagamhanan.

Gihulagway sa mayor sa La Libertad nga gihimong gatasan sa nagkadaiyang kapunungan sa mga kawani sa gobyerno ang panudla-nan sa kagamhanan kay maoy gikuhaan sa ilang mga registration fees.

Sumala pa ni Mayor Sulit hapdos gayud paminawon nga mogastu ang lungsod ug tag P1,200 ang adlaw para sa pagtambong sa ilang kawani sa usa ka konperensiya.

Si Governor Rolando Yebes mipahayag nga ang mga tigum nga iyang gipata-wag kini tigum sa mga nasudnong ahensiya sama sa DILG. Ang gobernador midu-gang sa pagpatin-aw nga anaa ra sa mga mayors kon ang ilang mga ginsaku-pan sa munisipyo ila bang ipadala sa mga tigum o dili.

Sumala pa sa gobernador ang mga tigum nga ipatawag iyaha sa nagkadaiyang kapunungan sa mga kawani sa gobyerno alang kaniya kini voluntary ra.

Apan kon ang tigum ipatawag sa mga nasudnong ahensiya mopadala gayud siya ug representante nga motambong niini.

Samtang si Mayor Sulit midugang sa pagpahayag nga sigun sa iyang nabatian ang nagkadaiyang kapunu-ngan sa mga kawani sa kagamhanan pagtapos tuig magbahin sa nahimong sobra sa ilang mga regis-tration fees sa gipahigayong mga seminars, meetings ug ubang panagtagbo.

Sa iyang kabahin si OIC Provincial Treasurer Jessie Concepcion mipatin-aw nga dili ang kagamhanang pro-binsiyal maoy nag-patawag sa miting kon dili ang asosasyon sa mga treasurers ug assessor’s.

Si Concepcion mipa-hayag nga sa giingong magbahin ang ilang asosasyon pagtapos tuig sa sobra sa gibayad nga mga registration fees sa ilang mga seminars ug konpe-rensiya iyang giklaro nga wala na siyay kalibutan kabahin niini. (The New Nandau, Vol. XVIII No.12)

 

Cong. Labadlabad gidayeg sa TESDA

Ang bag-ong natukod nga edipsyo ug bag-ong napalapdan nga karaang building sa Provincial Training Center sa TESDA sa Sindangan nagpasabot nga adunay mas lapad ug hamugaway karon nga bansayan ang mga schoolar. Pinaagi niini mas mahimo usab nga epektibo ang ilang pagkat-on sa nagkada-iyang vocational ug technical training nga gitanyag sa TESDA. Mao kini ang giluwatan ni Technical Education and Skills Development Authority Director-general Augosto Buboy Syjuco pinaagi sa usa ka video message nga gipaha-om sa pagsubo sa bag-ong edipisyo ug pagdugang sa laing andana sa naha-unang building sa TESDA.

Ang maong mehoras gigastuhan sa PDAF ni Congressman Dodoy Labadlabad nga mikostar ug tag singko milyones ka pesos. Midugang sa pag-ingon si Syjuco nga dako ang kalipay nga gibati sa ilang ahensya nga nakakita karon ug kaabin sa kongreso pinaagi kang Cong. Dodoy Labadlabad kinsa nakasabot pag-ayo sa tahas ug paglantaw sa TESDA diha sa pag-umol sa katawhan ilabina na sa kabataan nga mamahimong takus sa pagbaton ug kahanas nga maghatod kanila sa maayong panarbaho, dili lamang dinhi sa nasud kon dili ilabina sa ubang kanasuran nga nanginahanglan karon ug skilled workers.

Samtang sa laing bahin si Dr. Teodoro S. Sanico, TESDA Executive Director on Technology Institution kinsa mitambong sa turn-over ceremony sa bag-ong nahuman nga mga proyekto nagkanayon nga taliwala sa kamatuoran nga ang Departamento sa Edukasyon maoy dunay pinakadaku nga pahat sa gahin sa nasudnong pangagamhanan apan sa tulo ka mga sanga niini nga mao ang DepEd, TESDA ug CHED, ang TESDA nakakuha lamang ug 2.6% sa kinatibuk-ang pundo alang sa edukasyon. Tungod niining gipakitang kasibut ni Cong. Dodoy Labadlabad diha sa pag-abag sa TESDA, iya kining gihulagway nga usa sa ilang pinakadaku nga tigpaluyo. Sa iyang pakigpulong gidayeg usab ni TESDA Regional Director Zeus Ampuyas ang hugot nga pagduyog sa representante sa segundo distrito sa ilang ahensya. (Ting Carreon, The New Nandau, Vol. XVIII No.12)

 

Siocon ZN-Kaso sa malaria nagkadaghan

Girekomendar karon ni Provincial Health Officer Dr. Carmencita Icao ang pagpahigayon ug house-to-house spraying sa tanang kabalayan sa Barangay Balagonan, Siocon batok sa malaria.

Matud pa ni Dra. Icao nagkadaghan karon ang natakbuyan sa malaria sa nasangpit nga lugar busa gikinahanglan gayud ang pagpahigayon sa house-to-house spraying batok sa lamok.

Samtang si Mayor Cesar Soriano, mipahayag nga ang Siocon nahimo nang malaria free sa miagi busa wala gayud sila magdahum nga adunay masinating outbreak sa ilang lungsod.

Gisaysay ni Mayor Soriano nga sa gihimong imbestigasyon sa ilang Rural Heatlh Unit milutaw nga ang malaria dala sa mga sakup ni Professor Nur Misuari gikan sa Sulu nga mibisita sa Barangay Balagunan nga gibisita karong bag-o ni Misuari.

Matud pa ni Mayor Soriano gisubay na nilang Dra. Icao ang lugar aron sa pagpahigayon ug dugang pagsuta pila ang apektado sa malaria nga unang gikatahong adunay pito nga positibo.

Karon miabot na sa 12 ang konpirmadong nagbatun ug malaria sa Balagunan ug gituhuang mosaka pa ang gidaghanon niini.

Gihulagway ni Mayor Soriano nga ang Balagunan maoy pinakalayu nga coastal barangay sa Siocon diin anaa usab mahimutang sa maong lugar MNLF Provincial Headquarters ug kampo sa MILF.

Matud pa ni Mayor Soriano bisan ug ang Balagunan maoy nahimutangan sa kampo sa MNLF ug MILF apan gawasnon nga nakapahigayon sa ilang pag-imbestigar ang grupo nila ni Dra. Icao uban sa ilang Rural Health Unit sa Siocon kay sa tanang higayon gipatigbabaw gayud nila ang ceasefire agreement.

Sumala pa niya ilang gikasabutan nga sa mga higayon nga adunay problema kabahin sa panglawas ang mahitabo sa ilang lugar kinahanglang proteksiyonan ang mga health personnel para makapahigayon kini sa ilang mga gimbuluhaton.

Gawas pa mikooperar usab ang mga meyembro sa MNLF ug MILF sanglit lakip na sa maepektuhan ang ilang pamilya ug mga paryente kon pasagdan lang ang pagkaylap sa malaria sa ilang lugar. (The New Nandau, Vol. XVIII No.12)

 

Lt. Suelto: “Dipolog is ideal city vs. terRorists”

“Dipolog City is a template of progressive governance particularly in the areas of delivery of basic services to its constituents and in the area of security.”

Mao kini ang gipabati nga komento sa mga miyembro sa Special Operations Team-White Area sa Philippine Army nga gipanguluhan ni 2nd Lt. Franco Salvador Suelto, atol sa ilang pagbiya sa dak-bayan alang sa laing misyon.

Sumala pa sa mga miyembro sa SOT-WA nga ang dakbayan sa Dipolog usa ka ideal city alang sa pagbatok sa mga terorista, komunista o insurgency tungod kay kontento ang mga residente sa gihimo sa pagrenda sa ilang mga opisyal sa kagamhanang lokal ilawom sa sa liderato ni Mayor Evelyn T. Uy.

Dugang sa mga miyembro sa SOT-WA, nga gumikan sa kompletong paghatag sa pampublikong serbisyo ug good gover-nance sa mga opisyal sa lokal nga kagamhanan sa Dipolog, walay rason nga ang mga katawhan niini ma-exploit o mahatagan ug higayon ang ana-a sa administrasyon sa city government nga mama-himong corrupt tungod kay ilang na-obserbahan nga wala natulog ang mga opisyales sa pag-responde sa sa panginahanglanon sa mga katawhan niini ilabina sa panahon sa krisis, kalami-dad, o simpleng implemen-tasyon sa mga programa sa kaayuhan niini. Ila usab gidayeg ang pag-organisar ug pag-ila sa kagamhanang lokal sa mga anti-crime organizations tungod kay nakatabang kini sa pag-mintinar sa kahapsay ug kalinaw nga makanunayong gitagamtaman sa mga katawhan niini.

Sa kinatibuk-an ilang gipaabot ngadto sa tanang mga katawhan sa Dipolo ang ilang dakung pasalamat ug pagdayeg ngadto sa ilang gilugway nga suporta sa SOT-WA nga bisan pa sa hamubo nga panahon nga ilang giserbisyuhan, dako ang ilang nahimong agi. (The New Nandau, Vol. XVIII No.12)

 

MARO sa Tampilisan ilisan

Higpit nga gipadas-og ni Mayor Romeo “Jan-jan” Jalosjos sa Tampilisan, Zamboanga del Norte nga ilisan ang ilang municipal agrarian reform officer kay wala gayud kini makigkoordinar sa iyang opisina unsay mga programa nga gipadas-og sa DAR para sa ilang lungsod.

Kini ang gipalanog ni Mayor Jalosjos sa dihang gipresentar ni Provincial Agrarian Reform Officer Virgilio Alcomendras ang nagkadaiyang proyekto nga gipadas-og karon sa Department of Agrarian Reform para sa ZaNorte nga nagkinahanglan ug pagdason gikan sa Provincial Development Council.

Sa sayu pa unang gipangutana ni Mayor Jalosjos ngano nga wala malakip ang ilang lungsod sa Tampilisan sa mga proyekto nga gipadas-og sa DAR nga unta ang tibook lungsod giila sa maong ahensiya nga Agrarian Reform Community.

Matud pa ni Mayor Jalosjos daghan nang mga resolusyon ang ilang gipanday ug gipadangat sa DAR apan naglibog ang batan-ong mayor sa Tampilisan ngano nga bisan usa sa gipadas-og nga proyekto sa DAR wala gayud sila maapil.

Sa iyang tubag si PARO Alcomendras mipahayag nga mas daghan nga proyekto ang gipadas-og nila para sa Tampilisan kay nalakip kini sa Mindanao Sustainable Settlement Area Development o MINSSAD 2 Project nga usa ka foreign assisted project.

Ilawom sa MINSSAD 2 Project kini naglangkub na sa infrastructure development, agricultural and environmental development ug institutional development, dugang pahayag ni PARO Alcomendras.

Gipasaligan usab ni PARO Alcomendras si Mayor Jalosjos nga kon aduna pa kiniy dugang proyekto nga gustong ipadas-og ilang buhatan kini ug bag-ong rekomendasyon ug idugang sa mga proyekto nga ilang gipadas-og karon nga madasonan sa PDC.

Matud pa ni Mayor Jalosjos wala gani siya makakita unsay panagway sa MARO sa Tampilisan nga si Mr. Fernando Orilla kay wala sukad kini miadto sa iyang buhatan gikan sa ilang paglingkud hangtud karon.

Daku ang pagtuo ni Mayor Jalosjos nga ang kapakyas nga malakip ang Tampilisan sa mga proyekto sa DAR nagsumikad sa ilang MARO nga wala makigkoordinar sa iyang opisina kabahin na sa paglista ug mga gikinahanglang mga proyekto sa ilang lungsod.

Tungod niini gipalanog sa mayor sa Tampilisan nga pailisan ang MARO nga nadistino sa ilang lungsod kay wala kiniy hustong koordinasyon sa kagamhanang local. (The New Nandau, Vol. XVIII No.12)

 

Kontrobersyal nga MOA-AD wala nay higayon nga mabanhaw o makabaton ug kaluha

Daku ang pagsalig ni Governor Rolando Yebes nga wala nay kahigayunan nga mabanhaw pa ug balik ang kontrobersiyal nga Memorandum of Agreement on Ancestral Domain o kaha makabatun ug kaluhang kasabutan karon nga mipakanaug na sa iyang disisyon ang korte suprema sa nasud.

Mao kini ang gipahayag ni Governor Yebes human giluwatan sa korte suprema ang disisyon sa gipasakang petisyon batok sa maong kasabutan nga gideklarar nga unconstitutional.

Kahinumduman ang lalawigan sa ZaNorte usa sa mga mipasaka ug petisyon batok sa maong kasabutan nga gikatakdang pagatiman-an na unta tali sa GRP panel ug sa MILF didto sa Malaysia apan napakgang sa dihang mipakanaug ug temporary restraining order ang labaw’ng hukmanan.

Ang pagpasaka sa ZaNorte ug petisyon gipa-ngunahan mismo ni Governor Yebes, uban nila ni Congresswoman Cely Jalosjos-Carreon ug Cong-ressman Cesar Jalosjos, vice Governor Francis Olvis ug mga meyembro sa Sangguniang Panlalawigan ug ang 27 ka mayors sa lalawigan.

Matud pa ni Governor Yebes sa pagpasaka pa lang daan nila sa petisyon daku siya ug kompeyansa nga siguradong madeklarar gayud nga unconstitutional ang nasangpit nga kasabutan tungod kay klaro kaayong nakalapas sa mga gimbut-an sa atong batakang balaod.

Ang iyang gikalipay kay ang labaw’ng hukmanan sa nasud mipakanaug gayud sa iyang disisyon kabahin sa maong isyu nga maoy mahimong basihanan sa umaabot nga mga kasabutan alang sa pagpatigbabaw sa malungtarong kalinaw sa Mindanao.

Sa disisyon nga gipa-kanaug sa korte suprema gihan-ay usab niini ang mga sumbanan nga maoy angayang pagasundon sa umaabot nga mga kasabutan tali sa gobyerno ug sa MILF.

Si Governor Yebes midugang sa pagpahayag nga karon aduna na gayuy klarong gabayan ang atong gobyerno sa panahon nga makignegosasyon kini ug balik sa MILF para sa pagpatigbabaw sa kalinaw dinhi sa Mindanao.

Matud pa sa gobernador kon aduna may bag-ong negosasyon nga pagahimoon kini mosubay na sa bag-ong sumbanan nga gihan-ay ni Presidente Arroyo ilawom sa iyang gitawag ug DDR kon demobilization, disarma-ment and rehabilitation.

Alang kaniya kinahang-lang sundon gayud sa higpit ang demobilization sa mga armadong grupo sa dili pa ipahigayon ang negosasyon alang sa kalinaw.

Kabahin sa hulga sa chief negotiator sa MILF nga hayan ang disisyon sa korte suprema maoy mahimong pabilo sa dugang kasamok sa Mindanao, ang goberna-dor mipahayag nga nagapa-biling alerto karon ang atong military ug kapulisan aron sa pagbantay sa lihok sa mga armadong grupo.

Mahitungod sa pag-pamalit sa mga lungsod sa ilang kaugalingong mga armas para sa ilang mga barangay tanods ang gobernador mibutyag nga ubay-ubay na nga lungsod sa ZaNorte ang nakapalit diin nahisgutan niya ang lungsod sa Kalawit samtang ang lungsod sa Siocon nagbansay-bansay karon sa ilang special CAFGU.

Sa long distance interview sa Radyo Ronda-DXKD kang Governor Yebes didto sa kauluhan kini mipalanog sa iyang dakung pagpasalamat sa tanang katawhan sa ZaNorte lakip na sa mga opisyales nga nakighiusa gayud sa probin-siya diha sa pagkwestyon sa kontrobersiyal nga kasabutan.

Sa iyang kabahin si Provincial Attorney Jes Gal Sarmiento, Jr. nga maoy legal counsel sa probinsiya sa maong petisyon nalipay sa giluwatang disisyon sa korte suprema nga wala gayud masayang ug mausik ang mga paningkamut nga gihimo sa mga opisyales sa lalawigan nga mapana-lipdan niini ang teroritoryo nga matipakan.

Sama sa gobernador ang provincial attorney nalipay nga mipakanaug gayud ug disisyon ang korte suprema sa gipasakang petisyon nga higpit nagasupak nga malakip sa Bangsamoro Juridical Entity ang walo ka mga lungsod sa ZaNorte uban sa 179 ka barangay.

Matud pa sa provincial attorney ang mga argumento sa ZaNorte gihatagan gayud ug gibug-aton sa labaw’ng hukmanan nga ang gihi-mong kasabutan nakalapas sa daghanang mga gimbut-an sa balaod gikan sa atong konstitosyon hangtud na sa Local Government Code of 1991.

Labi na gayud sa punto nga walay gihimong konsultasyon ang peace panel sa mga sector nga maapektuhan sa nasangpit nga kasabutan.

Matud pa sa provincial attorney sa ZaNorte wala gayud masayang ang mga paningkamut nga gihimo sa mga opisyales sa probinsiya nga nagpasaka ug petisyon batok sa maong kasabutan.

Apan nanawagan si Sarmiento sa mga opisyales sa probinsiya nga taliwala sa kadaugan nga ilang naangkon karon dili gayud sila mokompeyansa kina-hanglang padayon ang pagbantay ug pagpaniid sa palibot.

Nagpasalamat usab siya nga ang iyang opisina maoy gitahasan sa pagbuhat sa maong petisyon. (The New Nandau, Vol. XVIII No.12)

 

PDC miindorsar sa upat ka mga project proposals sa DAR para sa ZaNorte

Gidasonan sa Provincial Development Council sa Zamboanga del Norte ang upat ka mga programa sa Department of Agrarian Reform nga nagtinguha sa pagpakatag sa nagkada-iyang mga proyekto sulod sa mga agrarian reform communities sa probinsiya.

Unang gipadas-og ni Provincial Agrarian Reform Officer Virgilio Alcomen-dras ang pagdason sa 13 ka proposed Tulay ng Pangulo Para sa Kaunlarang Pang-Agraryo.

Matud pa ni Alcomen-dras ang 13 ka mga Tulay ng Pangulo tapos nang giapru-bahan sa Investment Coor-dinating Committee-Tech-nical Board niadtong Hunyo 18, 2008 apan sa dili pa kini isumitir ngadto sa gabinite para mapahatan ug pundo ug maimplementar kina-hanglang moani kini ug pag-dason sa PDC ug sa Regio-nal Development Council.

Ang maong mga Tulay ng Pangulo ipahimutang sa Alvenda, Mutia; Desoy Bridge subay sa Pinan-New Libangon-Polanco road; Dinasan sa Jose Dalman; El Paraiso-Sta. Catalina sa La Libertad; Mintal sa Sirawai; Teresita Bridge sa Disoy river sa Pinan; Wilben sa Sergio Osmena; Lomogon sa Godod; Dinuan-Calucap sa Salug; Bucana-Osukan-Antonio sa Labason; Dicuyong sa Sindangan; Piao sa Sindangan ug Sinuyak sa Katipunan.

Ang ika duhang proyekto nga gidasonan sa development council sa ZaNorte mao ang Agrarian Reform Infrastructure Support Project nga paga punduhan sa Japan Bank for International Cooperation.

Matud pa ni PARO Alcomendras ang maong proyekto naglangkub na sa pagkonstrak ug pagkomponi sa mga communal irrigation, pagbutang ug post harvest facilities, pagkonstrak ug dugang dalan, pagbutang ug water system sa mga agra-rian reform commu-nities, institutional develop-ment ug agricultural develop-ment.

Kini nga proyekto ipatuman sa mga agrarian reform communities sa lungsod sa Pinan, Jose Dalman ug Siocon.

Ang ika tulong proyekto mao ang Solar Power Technology Support III o SPOTS III nga ipahimutang sa agrarian reform commu-nities sa Sergio Osmena, Godod ug Polanco.

Ang ika upat nga proyekto sa DAR para ZaNorte nga gidasonan sa Provincial Development Council mao ang Mindanao Sustainable Settlement Area Development o MINSSAD Project 2.

Matud pa ni PARO Alcomendras ilawom sa maong programa ang proyekto para sa infras-tructure development, agricultural and environ-mental development ug institutional development.

Kini pagapunduhan sa Japan Bank for International Cooperation ug ipatuman sa tanang agrarian reform communities sulod sa ZaNorte. (The New Nandau, Vol. XVIII No.12)

 

First phase sa Siocon hospital andam nang ipailalom sa bidding

Gipahibalo ni Mayor Cesar Soriano nga andam ang ipailawom sa bidding sa DPWH ang first phase sa ipatindog nilang Siocon Hospital.

Matud pa ni Mayor Soriano gikatakda na untang ipailawom sa bidding niadtong Setyembre 30 apan naoktaba tungod kay adunay sa gikinahanglang dokumento.

Ang program of work ug plano tapos nang naapru-bahan lakip na sa deed of donation sa yuta nga maoy tindugan sa maong hospital.

Kini maoy pinaka unang hospital nga gipanag-iyahan sa usa ka lungsod sa tibook Zamboanga Peninsula Region.

Ang pagkonstrak niini, matud pa ni Soriano, himoon sa upat ka hugna diin ang first phase gastuhan sa P5 milyones nga gigahin ni Congressman Cesar Jalosjos sa iyang congressional fund karong tuiga.

Matud pa sa mayor sa Siocon human sa unang hugna sundan kini sa dugang P5 milyones gikan gihapon sa pundo ni Congressman Jalosjos.

Kon mapahiluna na ang P10 milyones nga pundo ni Congressman Jalosjos mosunod niini ang counterpart gikan sa kagamhanang local sa Siocon para sa phase 2 ug ang phase 3 ang pundo magagikan na sa Department of Health.

Ang ilang ipatindog duha ka building sigun sa gihatag nga pagtugot sa DOH ug sa higayon mahingpit ang unang building gitugtan usab sila nga makasugod na sa ilang operasyon samtang padayon nga ipatindog ang ika duhang edipisyo.

Kining tanan, matud pa ni Mayor Soriano gibana-banang mokostar ug P40.6 milyones ka pesos.

Gituhuan ni Soriano nga makasugod gayud sila sa ilang operasyon sa pinaka unang hospital nga gipanag-iyahan sa lungsod sa tibook reheyon sa ulahing bahin sunod tuig sa higayon mahingpit na ang pag-konstrak sa unang building.

Sa kabahin sa kagamhanang probinsiyal sa ZaNorte gibutyag ni Mayor Soriano nga usa ka memorandum of agreement ang gitiman-an niya ug ni Governor Rolando Yebes diin ang probinsiya mikomitir sa paghatag sa gikinahanglang personahe sa hospital sa Siocon lakip na sa medisina.

Samtang ang gihatag ni Governor Yebes nga usa ka milyon ka pesos gigamit na nila sa pagtambak sa lugar diin ipatindog ang Siocon Hospital.

Sanglit secondary level hospital ang ilang gibatunan nga lesensiya kini adunay 35 bed capacity nga mosirbisyo sa mga pasiente gikan sa sikbit nga mga lungsod sama sa Sibuco, Sirawai ug Baliguian. (The New Nandau, Vol. XVIII No.12)

 

MV Dipolog Princess gibaradero

Padayon pang gibaradero ang MV Dipolog Princess. Mao kini ang gibutyag ni kanhi Bise Mayor Edelburgo Cheng kinsa maoy agency manager sa Sulpicio Lines dinhi sa dakbayan sa Dipolog sa dihang gipangutana kung unsay bag-ong kalamboan sa nasangpit nga barko.

Hinoon gipasabot ni Cheng nga tapos sa pagpabaradero sa MV Dipolog Princess kini mahimong himoan dayon ug inspection sa mga otoridad sa marina kung Maritime Industry Authority ug kung makita nga ‘sea worthy’ pa gihapon ang maong barko mahimong makabalik na kini sa pagserbisyo sa iyang rota gikan sa Manila padulong sa dakbayan sa Tagbilaran, Dipolog ug Iligan City.

Gipanghinaut ni Cheng nga karong tapus sa bulan makompleto na ang tanan ug mahibalik na ang Dipolog Princess sa iyang rota.

Sa pagka karon nahibaw-an usab gikan kang Cheng nga ang mga barko sa Sulpicio Lines nga gitogutan sa pagbiyahe ang atua midunggo sa mga pantalan sa Zamboanga City, Cagayan de Oro, Davao og Ozamis City.

Kini tungod kay dagko ang volume sa mga karga-mento nga ilang makuha sa nasangpit nga mga pantalan kung itande dinhi sa dakbayan sa Dipolog nga gamay ra nga mahimong logi ang ilang operasyon.

Hinoon ang mga kargamento sa Dipolog matod pa ni Cheng mahimo pang ipadala o dili ba kuhaon sa sa pantalan sa Ozamis nga dili ra usab halayo sa dakbayan.

Gipasalig ni kanhi Vice Mayor Cheng nga kung mahibalik na ang serbisyo sa MV Dipolog Princess kini iyang ipahibalo dayon ngadto sa tanan sa radyo og prensa. (Mar Uy, The New Nandau, Vol. XVIII No.12)

 

Atty. Ranillo nagpasalamat sa dakung kalamposan sa JCI Nat’l Convention

Gumikan sa dakong kalampusan nga nasinati atol sa pagpahigayon sa 60th Junior Chamber National Convention kaniadtong Oktubre 8-11, 2008 mipaabot karon si JCI Senator Michael Alan Z. Ranillo ang National Director sa JCI Convention, ngadto sa mga residente sa dakbayan sa Dipolog ug Dapitan ug sa tibook probinsya sa iyang dakong pasalamat ug pagdayeg tungod sa gipakitang warm welcome, friendly atmosphere, ug hospitality nga ilang gipaabot sa mga bisitang Jaycees sa tibook nasud nga nag-abot dinhi sa Dipolog alang sa usa ka natioanl Convention.

Gov. Yebes (left), PCI National President Fulbert Woo (middle) and Sen. Escudero during the 60th Junior Chamber National Convention held here in the cities of Dipolog and Dapitan.

Dugang gipaabot ni JCI Senator Ranillo ang iyang pasalamat sa mga lokal chapters sa JCI nga nagabase dinhi sa dakbayan ug sa probinsya ilabina gayud sa JCI Mutia Siren kinsa maoy nangunay sa pagpahigayon sa 9th JCI Presidents Academy, 60th JCI NatCon Exhibit, National Board Meeting ug ang Planning Session sa mga Incoming Presidents sa tanang local chapters sa JCI sa tibook nasud.

Gipasalamatan usab ni Ranillo ang mga lokal nga kagamhanan sa Dipolog, Dapitan ug sa probinsya tungod sa suporta nga ila usab nga gipaambit aron lang magmalampuson sa 60th JCI National Convention dinhi sa Dipolog. (The New Nandau, Vol. XVIII No.12)

 

 

 

NOTE: SEND US YOUR NEWS.  Tell us what's going on in your barangays, clubs, schools, businesses and non profit organization. You can also send notices and announcements.
          

 

    Email to webmaster@dipolognon.com

      
Google
WEB THE DAILY DIPOLOGNON
 

THE DAILY DIPOLOGNON
DIPOLOG CITY, PROVINCE OF ZAMBOANGA DEL NORTE PHILIPPINES
www.dipolognon.com www.dipolognon.net  www.dipolognon.org  Keyword: dipolognon
www.dipologcity.com  www.dipologcity.net  www.dipologcity.org  www.dipolognon.com  www.dipolognon.net  www.dipolognon.org    www.dipolog.org  www.dapitan.com   www.eartajo.com  www.cagayandeoro.us 
www.artajo.us www.artajo.info www.eddie.artajo.name www.zamboangadelnorte.com  www.zambonorth.com  www.pagsalabuk.com  www.dipolog.biz www.artajo.biz  www.plasticextrusion.us www.cebu.org
www.davao.us  www.tagum.com  www.giscard.us  www.pagadiancity.com www.malaybalay.net  www.ozamis.com  www.tangub.com  www.oroquieta.net
 www.nabunturan.com www.znuc.org www.znch.ph
www.gingoog.com  www.ozamiz.us www.general-santos.com  www.surigao.net  www.kidapawan.com  www.iligan.us www.raelene.us  www.cagayan-de-oro.com   www.mutyasadipolog.com
 
www.zamboanga.net   www.palmbeachgardens.us   www.islandgarden.net  www.cotabato.net  www.tacurong.com  www.butuan.us  www.pagadian.com  www.dipolog.us
www.zamnai.com
www.dipologhotels.com
   www.dipologpress.com  www.dipologsardines.com   www.extrusion.us www.ozamizcity.com  www.marawi.net www.dipologchamber.com

Copyright©2008 by The Daily Dipolognon All Rights Reserved  PRIVACY POLICY & DISCLAIMER
Email : webmaster@dipolognon.com  Since October 18, 2000