Rota sa trapiko gihan-ay alang sa ‘Oplan Kaluluwa’

Pipila ka mga kadalanan ang dili pasudlan sa mga sakyanan ug dunay mga bag-ong rota sa trapiko ang gihan-ay sulod sa Dipolog aron mahapsay ug linaw ang pagsaulog sa umalabot nga kalag-kalag dinhi. Ang gihatagan sa pagtagad mao ang mga sam-ang o sementeryo dinhi ug ang mga kadalanan nga sudlan ug gawasan gikan ning maong mga dapit nga sentro sa pagsaulog sa tinuig nga All Saints Day sa Nobiyembre 1 ug All Souls Day sa Nobiyembre 2.

Kini nahasulod sa aprobadong kopya sa “Oplan Kaluluwa” nga giduso sa lokal nga buhatan sa polis ngadto sa buhatan ni City Mayor Roberto Y. Uy sa miaging semana. Nasayran nga pipila ka mga traffic re-routings ang gihimo sa traffic division sa Dipolog PNP aron sa paglikay sa posibleng paghuot unya sa tanang mga sakyanan.

Atol sa kalag-kalag, gidili ang pag-parking sa bisan unsang sakyanan dinha subay sa dalan Hen. Luna gikan sa M. Del Pilar St. hangtud sa dalan Gonzales aron malikayan ang paghuot unya, ilabi na nga usa kini ka main road paggawas dinhi gikan sa sentro. Lakip sa wala usab gitugot ang pag-parking mao ang subay sa dalan Herrera, gikan sa dalan Luna padulong ngadto sa Capitol avenue.

Samtang temporaryong pagasirad-an ang dalan P. Ramon cor Malvar st., aron magamit sa mga katawhan ug mga motorsiklo isip agianan pagsulod ug paggawas (entrance-exit point); ingon usab ang dalan Herrera ug Malvar Sts, alang sa susamang katuyoan. Samtang ang Capitol Ave. usab haduol sa kanhi Lillian Garage pagasirad-an aron magamit isip agianan pagsulod ug paggawas (entrance-exit point) alang sa mga motorsiklo ug mga katawhan.

Ang tanang de-pasaherong bus nga mogawas gikan sa Integrated Bus Terminal gi-awhag nga mogamit sa dalan Kagatan, dayon liko ngadto Sta. Isabel Brgy. Road, padulong ngadto sa Patangan Road. Nasayran gikan sa traffic division sa Dipolog PNP nga gikinahanglan nila ang hugtanon ug bug-os nga suporta sa tanang mga katawhan dinhi sa dakbayan, pinaagi sa pagsanong sa mga gihan-ay nga plano sa trapiko aron mahimong mahapsay ug malinawon ang  pagsaulog sa kalag-kalag dinhi sa dakbayan. (Dipolog CIO Press Release, Alb)

Ang katawhan gipahimangnoan magbinantayon sa kalag-kalag

Hugtanon karong nagapahi mangno si City Mayor Roberto Y. Uy sa tanang katawhan ning dakbayan sa pagmabinantayon batok sa mga dautang elemento, ilabi na atol sa pagsaulog sa kalag-kalag karong umaabot Nobyem bre 1 ug 2. Kining maong pahimangno giluwatan sa amahan ning dakbayan aron sa pagpahinum dom sa mga katawhang Dipolognon, lakip na ang mga dumuduong sa dili pagpasagad panahon sa kalag-kalag tungod kay posible gayud nga molihok na usab ang mga dautang elemento dinha sa paghimo ug mga “milagro” dinhi sa dakbayan, partikular na ang mga snatchers, akyat-bahay, carnappers ug mga hold-uppers.

Busa gi-awhagan ni Mayor Uy ang Dipolog PNP alang sa paghan-ay ug mga plano nga naglambigit sa trapiko ug seguridad alang sa katawhan ning dakbayan. Hugtanon usab nga gi-awhagan ang mga katawhan sa dili pagdala sa dagkong kantidad sa salapi, o pagsuot ba hinoon sa naghinob rang alahas atol sa ilang pagsimba, o kaha sa pagbisita dinha sa mga sam-ang tungod kay mao kiniy makapadani sa mga snatchers ug hold-uppers.

Lakip gayud sa gipahinumdo man mao ang dili paghurot sa pagpanglakaw nga walay mahibilin sa matag kabalayan aron dili mabiktima sa mga kawatan o akyat-bahay. Ug alang sa mga nanag-iya ug motorsiklo, siguradohon lang nga naka-lock ang mga manibela niini una kini pagabiyaan dinha sa mga parking areas aron malikayan ang carnapping.

Matud pa nga walay laing hingpit nga makapakgang sa bisan unsang matang sa kriminalidad kondili ang mga hingtungdang otoridad, inubanan sa hiniusa ug bug-os nga koordinasyon gikan sa publiko. (Dipolog CIO Press Release, Alb)

Rotary Youth Week
Kabataan gisangonan pagdumala sa kagamhanan sa usa ka semana

Gipahimutang kaniadtong Oktobre 17 ang 32 ka mga Rotary Youth Officials sa ilang tagsa-tagsa ka mga katungdanan isip mga magdumala sa kagamhanang lokal sa Dipolog  sulod sa usa ka semana. Kini molungtad hangtud sa Oktubre 22. Nasayran gikan kang Rotarian Janus Tumulak, ang kasamtangang presidente sa Rotary Club sa Dipolog, nga ang napiling mahimong mga Rotary Youth Officials nagagikan sa mga pangpubliko ug pribadong tulunghaang sekondariya dinhi sa Dipolog.

Napili mao sila si Jayvee B. Gainsan (St. Mary’s Academy) isip city mayor, Lyndie Yap (Dipolog Community School) isipc city vice mayor, Ellen May Ello (Punta Natl. High School) isip city administrator, Constancia G. Realiza (St. Vincent’s College) isip SP majority floor leader, Ma. Dara Mae M. Velasco (Dipolog Medical Center. Coll. Foundation) isip SP minority floor leader; Sheila May Quitong (Dipolog City Institute of Technology), Rudy Vincent  Sambo (Galas Natl. High School), Jelyn O. Bayonas (AQUAMAT High School), June Sun M. Pugoy (Galas natl. High School), Winnelyn C. Dipolog (Sicayab Natl. High School), Jakilou P. Rubin (Punta Natl. High School), Raymund Lyndon S. Roda (Andres Bonifacio College), Essel M. Suan (Jose Rizal Memorial State College), Edlynne Mae Else ( Zambo. Norte Natl. High School) ug Jervie Padrones (St. Mary’s Academy) isip mga SP members; Mary Katherine A. Tan (Dipolog Community School) isip SP secretary, Grant Rainiere O. Young (Dipolog Community School)isip chief of police sa Dipolog, Kristine Acopiado (Sicayab Natl. High School) isip city budget officer, Mirzah Real (Andres Nonifacio College) isip city accountant, Olive Corrine Olvis ( St. Vincent’s College) isip city treasurer, Galilea Balili (Jose Rizal Memorial State College) isip city tourism officer, Phoebe Marabulas (Punta Natl. High School) isip city agriculturist, Mary Grace Sumambod (Dpl.Medical Ctr. Coll. Foundation) isip city auditor, Jean Marie Salvador (AQUAMAT High School) isip city parole & probation officer; Francisco A. Delasala Jr. (AQUAMAT High School) isip city election officer, Rose Meghan Manuel (Andres Bonifacio College) isip city civil registrar, Lorilyn Jan Hamoy (Zambo. Norte Natl. High School) isip city health officer, Mark Anthony Guzman (St. Vincent’s College) isip city register of deeds officer, Beverly Jean Demafeles (Sicayab Natl. High School) isip city schools division supt., Dax Daniel Gador (Jose Rizal Memorial State College) isip city prosecutor, Edina Morandarte (Galas Natl. High School) isip city engineer ug Cindy Elopre (St. Mary’s Academy) isip city assessor.

Sumala pa ni Rotary President Tumulak, kini nga tinuig nga kalihokan gitumong sa paghatag ug kahigayonan sa mga kabataan nga ma-expose sa kalihokan sa pang-gobiyerno tungod kay ang mga kabataan maoy mga umaabot nga mga lideres sa nasud. Ang pagpili sa mga Rotary youth officials gipaagi sa usa ka screening sa mga gi-endorso nga mga ngalan sa mga magtutungha gikan sa ilang tulunghaan ug usa ka interview nga gipahigayon sa Committee sa Rotary Youth Week Activities sa Rotary Club of Dipolog, nga gipangulohan ni Rotarian Past President Uldarico B. Mejorada.

Gipresentar ni Konsehal Ricky Mejorada, ang chairman sa Rotary Youth Week ang mga Rotary Youth leaders ngadto sa mga miyembro sa Sangguniang Panlungsod sa Dipolog kaniadtong Oktobre 18 atol sa gipahigayong regular nga sesyon sa konseho. Sa maong kalihukan, gipaila ang mga batan-ong lideres nga mahatagan sa kahigayunan sulod sa usa ka semana nga maka-obserbar sa pagpadagan sa kagamhanan lakip na diha sa pagpasar ug mga resolusyon ug  ordinansa.

Ang nasangpit nga mga Rotary Youth Officials pormal nga gi-instalar sa ilang tagsa-tagsa ka katungdanan kaniadtong Lunes, Oktobre 17 dungan sa ilang pagpanumpa atubangan ni City Mayor Roberto Y. Uy. Atol usab sa maong kalihukan, si Mayor Uy mipabati sa iyang mensahe ngadto sa mga kabataan ug kini midasig nga kon unsa man ang ilang makat-unan diha sa ilang usa ka semana nga paglingkod sa gihuptang posisyon kini ilang magamit  sa kaulahian labi na sa ilang maayong ugma.

Gidasig usab sila sa mayor nga ilang mapaambit ang kamahinungdanon sa pagpanerbisyo ilabi na nga isip mga public servant kinahanglan taas ang pasensiya ug adunay kasingkasing nga moalagad sa katawhan alang sa kalambuan sa dakbayan. (Dipolog CIO Press Release, ligz/Pinky)

 Yuna Pa
By: Nico L. Balbuena
Mga Panawagan Atol Ning Bulan Sa Mga Kabataan

Nahimuot kong naminaw sa usa ka adunahang biyuda nga akong nahinagbo didto sa Mall kinsa nangugat gayod nga nanghinugilon kanako bahin sa iyang kapungot sa atong Huwes dinhi nga mipagula sa usa ka bata nga iyang gikihag pangawat sa iyang mga alahas didto sa ilang balay mga duha ka bulan na karon ang milabay. Sumala pa sa iyang asoy, gikawatan siya ug usa lamang ka bata ang nadakpan sa mga polis ug kay gilungkab man ang bentana sa iyang kuwarto aron ang mga kawatan lahos makasulod didto, kasong robbery ang iyang gisang-at didto sa husgado. Dako ang piyansa sa dose anyos nga akusado maong wala makapiyansa ang iyang mga ginikanan para sa di dumalayon niyang kagawasan. Apan naunsa bang pagkabutanga, niya pa, nga iyang nakita man ang maong bata nga gawasnon mang naglakaw-lakaw ug ingon man sa wa kini ing babil sa iyang tan-aw. Iyang gisusi didto sa husgado kon nganong nakagawas man ang maong preso ug sa iyang kakurat ug katingala, gikustodiya diay siya sa iyang mga ginikanan samtang sige pang gibista ang iyang kaso didto sa hukmanan. Pangutana niya: Kini na ba diay ang pamaagi karon nga bisan kon dako ang kaso nga giatubang sa akusadong menor de edad, dili mahimo itanggong siya didto sa bilanggoan samtang gihusay pa ang iyang kaso didto sa hukmanan?

Sa tinuoray lang, daghan gayod karon ang matingala kon ngano nga bisan dako na ang kaso nga giatubang sa batang-akusado, dili man mahimong itanggong kini o ipreso. Sa akong pagpaniksik, akong nahibaloan nga sa lingtunganay walay balaod nga nagdili nga prisohon ang menor de edad nga akusado. Ugaling lang adunay dili maayong epekto kon itanggong sila tipon sa mga kriminal nga anaa sulod sa atob (presohan) kay sa ilang lapyo pang kaisipan madali silang ma-impluwensiya sa hamtong nang preso kabahin sa ilang mga kriminal nga eksperensiya. Sumala sa gisitar sa balaod, aduna gayod untay esklusibo nga atob ang mga akusado mga menor de edad nga ang nag-akatar niini dili mga sakop sa BJMP o armadong mga polis kondili mga social workers kinsa mga eksperensiyado na sila sa mga pamaagi sa pagpitol ug pag-amuma sa mga kabataan nga nag-atubang ug mga kaso didto sa mga hukmanan.

Ang nakaparat lang kay tungod sa kurakot natong mga nagdumala karon sa atong kagamhanan, wala matuman kining kasugoan sa balaod kay sumala sa report, dili ka-afford ang kagamhanan nga mobutang o motukod ug mga kaugalingong atob sa nagkalain-laing dapit sa atong kapupud-an. Kini ang hinungdan nga sa higayon nga may menor de edad nga mag-atubang ug kasong kriminal didto sa atong mga husgado, itanggong siya tipon sa mga tang-an na kaayong mga hamtong nga mga priso. Didto magsugod ang devil kay sa lapyo pa kaayong pangisip sa bata dali ra kining matun-an sa mga tang-ang priso nga iyang ikauban didto. Chances are, mosamot ang kaburingog niining bataa kon makagula na siya kay insakto na man siya sa mga dautang impluwensiya!

Kini ang hinungdan ngano nga ang kagamhanan nangita ug mga pamaagi aron matagaan ug sulbad kining tataw nga kadautan kon ipadayon ug tanggong ang maong menor de edad nga akusado tipon sa mga tang-an nang mga priso. I-release sila ngadto sa mga ginikanan niini kinsa sila maoy gihimong jailers sa ilang mga anak nga akusado ug sila maoy manubag niini didto sa husgado kon ang ilang mga anak nga gi-kustidya molayas ba o dili makatungha didto sa husgado panahon sa ilang bista.

Simple lang ang tubag ngano nga gihimo kini sa atong gobiyerno nga gitagaan mag dakong pribilihiyo ang mga menor de edad natong akusado. Sumala pa, ang tawo dili lihitimo nga maldidto ug sa lapyo pang kaisipan sa bata, dako pa ang purohan nga mausab ang  nahiwi nilang batasan. Dili lamang mga ginikinan kondili apil na atong kagamhanan ang maningkamot nga maganoy ang atong mga kabataan sa husto o tukma nga dalan aron mamahimo silang malampusong elemento sa atong katilingban. Matod pa sa atong nasodnong bayani nga si Dr. Jose P. Rizal ang atong kabataan maoy paglaom sa atong nasodnong yutang natawhan. Sila ang umaabot natong henerasyon nga maoy mosunod nga modumala sa atong nasod.

Sumala sa survey nga gihimo sa DSWD, hapit mga 30 ngadto sa 40 porsinto sa atong mga kabataang akusado nga anaa karon gitanggong tipon sa tang-an natong mga priso sa nagkalain-laing bilanggoan sa atong kaulohan ug sa tibuok kapupud-an. Gibana-bana nga kon dili kini matagaan ug sulbad, may kahigayonan nga inigkagula na niining mga kabataan nga natanggong ug dugay sa atong mga bilanggoan mga kriminal na silang tang-an ug kukhan.

Karon ang kasaulogan ning gitawag ug Children’s Month. Ug tukma ug ubay sa maong kasaulogan, gipahigayon karon ang nagkalain-laing program sa seminar ug simposyom nga nagtuki sa kaugmaran ug kaayohan sa atong mga kabataan. Dinhi manumbalik na sab ang panawagan nga unta ang atong kagamhanan maningkamot unta nga makabutang ug  eksklusibong atob alang lamang sa atong kabataan nga nahisalaag sa dalan nga gisitar sa atong katilingban.

Dinhi sa atong dakbayan gipadayon ang panawagan sa lokal nga panggamhanan nga unta makabuhat na kita ug balay-dangpanan, dili lamang sa mga batang babaye nga biktima sa pang-abuso sa ilang pagkatawo kondili apil na niadto nga babayeng  may kaso didto sa atong mga husgado. Usab, kinahanglan gayod nga may kaugalingong atob ang atong mga lalaking kabataan nga may mga kasong kriminal nga giatubang didto sa atong mga hukmaan. Sa pagkakaron, aduna lang kitay usa ka balay dangpanan nga anaa karon sa Sta. Isabel nga nag-serbisyo sa tibuok lalawigan pero alang lamang kini sa mga babayeng kabataan.

Ang atong duhang dakbayan sa Dipolog ug Dapitan ug sa tibuok lalawigan adunay mga adunahan nga dili magpanuko nga mo-donate sa ilang salapi aron mapatukod kining gidamgo nga balay-dangpanan sa mga kabataan nga nahisalaag sa dalan sa atong katilingban. Aduna kita dinhi ing mga non-governmental organizations sama sa Jaycees, Rotary, Knights of Columbus, Fraternities ug Sorotities ug kini makatabang usab sa pagpangita ug mga pondo alang ning maong dungganong proyekto. Ngano bang dili kini mahimo?

Once again, manawagan kita sa mga opisyal ning atong lokal nga mga kagamhanan...tagaan nato ug igong pagtagad ang kaugmaon sa atong mga kabataan ug dili nato sila pasagdan ug biyaan. Hinumduman nato nga dili kita ang paglaom sa umaabot pang mga katuigan sa atong pagpakabuhi ning kalibutan kondili ang atong mga kabataan. (Dipolog Chronicle, Vol.V No.17)

Bgy. Baybay Liloy mipasalamat sa Dipolog sa tabang bk. dengue

Mipaabot sa ilang kinasing-kasing nga pasalamat ang Sangguniang Pambarangay sa Baybay, Liloy tungod sa tabang nga gilugway sa kagamhanan sa Dipolog ngadto sa ilang barangay aron pagsumpo sa dengue outbreak sa maong dapit. Ang maong pasalamat gipaabot ngadto kang City Mayor Roberto Uy sa mga miyembro ug opisyales sa maong barangay pinangulohan ni Kapitan Rosalio Caperida.

Nasayran nga gisanong gilayon ni Mayor Uy ang hangyo sa mga opisyales sa Baybay, Liloy may kalabut sa ilang tinguha pagsumpo sa pagkuyanap sa sakit nga dengue sa ilang barangay. Sila gihatagan gilayon ni Mayor Uy sa tabang pinaagi sa paghatag ug tambal para sa spray sa mga lamok  lakip na ang pagpagamit sa fogging machine sa dakbayan uban ang operator niini.

Ang gihimo ni Mayor Uy maoy pagtabang lamang sa silingang LGU nga nanginahanlang ug ayuda gikan sa dakbayan ug isip usa usab ka paagi nga masumpo ang pagkuyanap sa sakit nga dengue sa mga silingang lungsod nga naglibot niini lakip na dinhi sa Dipolog. (Dipolog Chronicle, Vol.V No.17)

CPAG giplanong tukoron dinhi pagsumpo sa krimen

Tungod sa tinguha sa kagamhanang lokal sa Dipolog ug sa Sangguniang Panlungsod nga masumpo ug masulbad ang mga nagkalain-laing  krimen nga nagapanghitabo dinhi sa dakbayan, gihatagan gilayon karong bag-o sa pagtagad ang suhestiyon sa mga  negosyante nga magtukod  ug usa ka grupo nga pagalambigitan sa kapolisan ug mga sibilyan aron madugangan ang puwersa sa kapolisan.

Pinasubay niini, usa ka resolusyon ang gipadas-ug ni Konsehal Ricky Mejorada, chairman sa Committee on Peace and Order, niadtong Oktobre 18  atol sa gipahigayong regular nga sesyon sa konseho nga naghangyo kang City Mayor Roberto sa pagtukod sa Citizen Police Auxiliary Group (CPAG) aron makatabang sa operasyon sa kapolisan sa dakbayan.

Nasayran nga kining lakang mao usab ang gitinguha sa amahan ning dakbayan ilabi na nga sa pagkakaron kulang kaayo ang puwersa sa kapolisan diha sa pakigbatok sa kriminalidad. Hinoon, sa giluwatang pamahayag sa mayor  sa gipahigayong consultative meeting sa Peace and Order Council sa dakbayan dili pa lamang dugay nga ang kagamhanan wala magpasagad sa katawhan ug naningkamot gayud nga madakpan ang mga dautang elemento pinaagi sa kapolisan sa Dipolog. (Dipolog CIO Press Release, lbt)

GSP Nat’l Jamboree gitakda sa Alano Farm October 23-27

“All Systems Go.” Mao kini ang panigurong giluwatan ni Letecia Cruz, facilitator sa Girl Scout of the Philippines, Zamboanga del Norte Chapter, may kalabutan sa ipahigayong 33rd National GSP Encampment sa Alano Farms, Katipunan, Zamboanga del Norte sugod karong Dominggo, Oktubre 23 hangtud sa Oktubre 27.

Matud pa ni Cruz, nga ang delegasyon nga nagagikan sa nagkalainlaing bahin sa nasud nagsugod na sa pagpangabot dinhi sa atong dapit. Gibanabana ng adunay mga 8,000 ngadto sa 10,000 ka mga partisipantes ang mosalmot niining maong kalihokan. Mag kalabutan niini, gipasalig ni 101st Brigade Commander Col. Nestor Corcha ang siguridad sa mga partisipantes sa 33rd GSP National Encampment.

Matud pa ni Col. Corcha, nakaplastar na ang mga elemento sa iyang Brigada sa sulod ug palibot sa encampment site uban sa mga sakop sa Zamboanga del Norte aron masiguro nga magmalampuson ug magmalinawon ang maong kalihokan. (ATRUDA, Dipolog Chronicle, Vol.V No.17)

Ord. No. 123 daghan gihapong nakalapas?

Mikabat sa 142 ka mga kaso sa pagpanglapas sa Ordinance 123 ang gitaho sa mga sanitation officers ning dakbayan sa Dipolog ngadto sa sanitation division sa City Health Office alang sa miaging bulan sa Septiyembre. Nahibaloan nga gikan sa kinatibuk-ang 142 ka mga kalapasan, 68.31% niini ang natala nga kalapasan sa pagpangihi sa pampublikong lugar, samtang ang ikaduhang nagsunod nga gidaghanon nga kalapasan mao ang pagsinagbot nga mitala ug 19.01% sa kinatibuk-ang taho sa mga kalapasan.

Sa gihapon, ang mga kalalakin-an ang nanag-unang minglapas sa probisiyon sa sanitation code ilabi sa pagpangihi sa pampublikong lugar, ug kalagmitan nagpanghitabo ang mga kalapasan sa Barangay Biasong, Central, ug Miputak. Gitaho usab nga ang kalagmitang nakalapas sa ordinansa mao ang mga dumuduong gikan sa silingang munisipalidad dinhi sa probinsiya, samtang ang nataho nga nakalapas sa sanitation code nga taga Dipolog nagagikan sa Barangay Galas.

Naobserbahan usab nga ang mga kababayen-an nga gitaho nga nakalapas sa ordinansa mao ang mga asawa nga maoy sagad mahabilin sa panimalay tungod kay ang na-isyuhan sa citation ticket mao man ang kalapasan sa walay pansayan o hugaw ug pansayan sa ilang panimalay, ug ang pagbaton ug tangkal sa baboy nga nakahatag ug puwerhisyo sa mga silingang rasidente. (Dipolog Chronicle, Vol.V No.17)

Mango congress ipahigayon sa Zamboanga

Sa tuyo nga mas molambo pa ug dugang ang produksiyon sa mga mangga dinhi sa dakbayan sa Dipolog ug sa tibuok Zamboanga Peninsula, gitakda nga ipahigayon ang 7th National Mango Congress karong umaabot Nobiyembre 24 ngadto sa 26 didto sa dakbayan sa Zamboanga.

Alayon niini, giawhag ang tanang mga mango growers dinhi ning dakbayan ug sa tibuok probinsiya sa pagsalmot niini nga kalihukan tungod kay gimugna kini aron katabangan ang mga nanag-iya ug manggahan nga molambo ang ilang ani ug kita.

Kadtong mga interesadong mopailalum niining tulo ka adlaw nga bansay-bansay giawhag sa pakig-coordinate sa buhatan sa agrikultura sa probinsiya  o kaha sa buhatan sa DTI (Department of Trade and Industry) alang sa mga gabayan ning maong kalihukan ug sa dugang impormasyon.  (Dipolog CIO Press Release, lbt)

EDUCATIONAL ASSISTANCE FOR IN-SCHOOL YOUTH GILUGWAY SA KAPITOLYO

Gawas sa dul-an sa usa ka milyon ka pesos nga pre-fabricated school building nga gipanghatag sa kagamhanang probinsiyal sa tanang kalungsuran ug duha ka siyudad, gilusad usab karon sa Provincial Social Welfare and Development Office ang Educational Assistance for In-School Youth. Si Mrs. Grace Sabal, OIC Provincial Welfare Officer, mibutyag nga ang maong educational assistance ilang gilugway sa matag pahigayon sa Tabang ni Lando sa Communidad kon TLC diha sa kabarangayan.

Kagahapon ang Tabang ni Lando sa Communidad gipahigayon didto sa Barangay Serungan, Manukan diin mokabat sa 654 ka meyembro sa Lando BIBO o Barangay Indigent Beneficiary Organization ang nakapahimolos sa libreng sirbisyo gikan sa nagkadaiyang buhatan sa kagamhanang probinsiyal sa ZaNorte. Kini naglangkub na sa mga meyembro sa Lando BIBO gikan sa Barangay Mate, Libuton, Pangandao ug Serungan pulos sakop sa lungsod sa Manukan.

Gipatin-aw ni Mrs. Sabal nga ang gihatagan nila sa maong educational assistance mao ang tanang mga Grade V ug Grade VI pupils ug kon adunay high school ang barangay diin gipahigayon ang TLC ilaha usab nga hatagan kadtong tanang estudyante sa 3rd ug 4th year high school. Ang nasangpit nga assistance naglangkub na sa mga gikinahanglang galamiton sa usa ka tinun-an, papel, notebook, ballpen ug uban pa.

Kini una nilang nasugdan didto sa Barangay Marupay sa lungsod sa Roxas ug nasundan didto sa Barangay Titik sa lungsod sa Sindangan. Sumala pa ni Mrs. Sabal ang maong educational assistance puede usab nga financial assistance kada estudyante. Sa samang bahin nang-apod-apod usab ug relief goods ang buhatan sa social welfare ngadto sa 654 ka meyembro sa Lando BIBO gikan sa upat ka nahisgutang barangay sa Manukan.

Sa pikas bahin ang Office of the Provincial Agriculturist higpit usab nga mipadas-og karon sa pagtanum ug mga bongang kahoy diin nanghatag usab sila ug libreng mga similya sa Nangka, Marang ug mga saha sa Saging. Sa nakita nadasig karon ang mga katawhan nga mananum ug mga bongang kahoy kay sa pagtanum ug commercial trees sama sa Mahogany ug Gmelina. Si Wilbur Sayre, sa Office of the Provincial Agriculturist, nga ang gihatag nilang mga planting materials nga mga bongang kahoy maoy gamiton sa pagpasanay sa maong mga prutas sa nasangpit nga mga barangay.

Samtang karong adlawa ang Provincial Veterinarians Office mopahigayon sa Veterians Outreach Mission didto sa Serungan para sa kahayupan sa mga mag-uuma. Samtang ang Integrated Provincial Health Office nga gipangunahan ni Dra. Carmencita Icao mipahigayon usab sa medical-dental outreach mission nga maoy nakita nga gipunsisukan sa daghanang katawhan nga gusting mopahimulos sa libreng sirbisyo nga gilugway karon sa probinsiya.

Sa ilang kabahin si Mr. Rizalito Suasula, ang presidente sa Lando BIBO Serungan Chapter, nagkanayon mipalanog sa iyang dakung pagpasalamat sa ayuda ug sirbisyo nga nadawat karon sa mga katawhan gikan sa relief ug educational assistance hangtud na sa medical-dental outreach mission ug gihatag libre nga mga planting materials. Matud pa ni Mr. Suasula, sukad-sukad karon pa sila katilaw ug hinabang nga gikan sa probinsiya susama sa ilang nasinati karon nga nalakip na sa gihatagan ug hinabang ang mga estudyante sa high school ug elementary.

Para ni Mr. Suasula, ang mga gihatag nga igtalanom sa probinsiya kon magkugi lamang ang mga katawhan, kini makatabang gayud nila ug daku sa ilang panginabuhi. Ang presidente sa Lando BIBO Serungan Chapter, mipahayag nga ang gihimo karong lakang ni Governor Lando Yebes, sigurado gayud nga makatabang sa mga yanung katawhan kay sa ilang organization karon nga gimugna kini gipanguluhan gayud sa mga ordinaryong tawo ug walay opisyales sa barangay nga nalamog nga nangulo sa grupo.

Sigun na sa gipasabot kanila sa Community Development Assistance Unit kon CDAU, kon unsa may tabang ug ayuda nga ilugway sa kagamhanang probinsiyal para sa mga meyembro niini kini dili na moagi sa ilang mga opisyales sa barangay kon dili sa ila mismong kapungan sa Lando BIBO ang direktang magpakadawat niini ug maoy moapod-apod sa iyang mga meyembro. Samtang si Atty. Jes Gal Sarmiento, Jr. ang mirepresentar ni Governor Lando Yebes sa gipahigayong TLC sa Barangay Serungan, Manukan, mipahayag nga maoy tinguha karon sa bag-ong administrasyon nga ang sirbisyo sa nagkadaiyang ahensiya sa probinsiya lakip na sa nasudnong kagamhanan madala hangtud na sa pinaka layu nga barangay sa atong probinsiya.

Nanumpa usab atubangan ni Atty. Sarmiento ang mga opisyales sa Lando BIBO gikan sa upat ka nahisgutang barangay sa Manukan. Sa samang bahin gipasabot usab sa representante sa gobernador nga ang ihatag nga Provincial Health Card sa matag meyembro sa BIBO, magamit sa tanang meyembro uban sa ilang mga sakop sa pamilya diha sa pagpahimulos sa libreng sirbisyo sa nagkadaiyang tambalanan sa kagamhanan sa atong lalawigan lakip na sa provincial hospital.

Gawas nga kini magamit sa ilang pagpatambal sa mga government hospitals nga libre kini usab ang mamahimong yawe diha sa pagdawat sa nagkadaiyang livelihood projects nga ipadas-og ni Governor Yebes, dugang sa pahayag ni Atty. Sarmiento. (Press Freedom, Vol. XVIII No. 17)

PROBINSIYA MAMALIT RA UG SURPLUS NGA SAKYANAN

Subling gipaklaro sa gobernador nga mga surplus ra nga mga sakyanan maoy paliton sa probinsiya nga gamiton sa nagkadaiyang mga opisina ug dili ang mga luho nga sakyanan nga maoy giambisyunan sa ubang mga opisyal. Kini, sumala pa kabahin na sa pagdaginot sa kuwarta sa probinsiya ug labaw sa tanan dili usab maayo lantawon nga ang probinsiya luho ug nindot kaayo ug gibatunang mga sakyanan samtang labyan lang niini ang mga kabus natong mga katawhan nga nagkalisud sa ilang panginabuhi.

Gawas nga mahal ang mga bag-ong sakyanan kini dili usab magamit sa mga lakaw paingon sa bukid, susama sa nahimong kasinatian sa Barangay Titik, Sindangan diin ang nakalusod nga sakyanan mao ra ang mga surplus military jeep. Matud pa ni Governor Lando Yebes mismo siya wala pay sakyanan nga kaugalingon kay ang iyang gigamit karon personal niyang sakyanan nga maoy gigamit sa iyang mga lakaw.

Sa sayu pa sa budget meeting nga gipatawag alang na sa 2006 executive budget, gisultihan na daan si Engr. Ramon Ochotorena, OIC Provincial Engineer nga ang palitong sakyanan sa ilang opisina kana rang surplus military jeep para siguradong makasaka ug bukid. (Press Freedom, Vol. XVIII No. 17)

POVERTY MAPPING SA ZN NAKAANI UG PAGDAYEG SA ADB

Nakaani ug pagdayeg gikan sa consultant sa Asian Development Bank ang kaugalingong initiative sa kagamhanan sa Zamboanga del Norte nga nagpahigayon sa iyang kaugalingong poverty mapping survey. Si Atty. Jes Gal Sarmiento, Jr. ang kasamtangang hepe sa Community Development Assistance Unit o CDAU, nga nabilib ang mga consultants sa ADB sa gihimong lakang sa lalawigan nga ming-ila kinsa ang mga kabus sa atong katilingban nga angayang unang hatagan ug hinabang ug sirbisyo sa kagamhanan.

Matud pa ni Atty. Sarmiento nakita sa mga consultants sa ADB nga advanced kaayo ang programa nga gipadas-og karon ni Governor Lando Yebes diha na sa pagsuhito sa kahimtang sa katawhan sa lalawigan. Tungod sa indigent program karon sa ZaNorte, ang mga consultants sa ADB mipahibawo nga hayan ilakip nila ang lalawigan sa ilang programa, dugang pahayag ni Atty. Sarmiento.

Gipahibawo sa taga ADB nga ang ZaNorte maoy usa sa pinaka unang lalawigan nga nagbatun ug kaugalingong poverty mapping program. Matud pa ni Atty. Sarmiento, agig resulta sa indigent mapping survey sa lalawigan ang mga beneficiaries nagbatun na karon ug provincial health card ni Governor Yebes nga maoy ilang magamit panahon sa pagpatambal sa bisan asa nga government hospital sa lalawigan.

Gawas pa ang maong card maoy naghatag kanila ug pabor nga sila ang unang magpakadawat sa mga livelihood program nga gipadas-og karon sa probinsiya. Si Governor Lando Yebes, sa iyang kabahin mipahayag nga sa panahon pa daan sa kampanya sa nakalabay nga eleksiyon iyaha nang gipahibawo daan nga molusad gayud siya ug poverty mapping survey tungod sa nakita niyang kalisud sa atong katawhan hinungdan nga ang Zamboanga del Norte naila nga usa sa kabus nga probinsiya sa tibook nasud.

Gipahibawo sa gobernador nga mokabat na sa 24 mil ka mga member beneficiaries ilawom sa Lando BIBO kon Barangay Indigent Beneficiaries Organization nga nakatag sa tibook probinsiya. Sumala pa niya ang mga meyembro sa Lando BIBO kon magpatambal sa mga government hospital dili na kinahanglang nga mangita pa sila ug politico kay pinaagi sa ilang health card otomatik nga hatagan sila sa libre nga sirbisyo.

Ang mga meyembro sa Lando BIBO maoy prayoridad usab sa livelihood program sa probinsiya. Matud pa ni Governor Yebes karon nga naila na sa probinsiya ang mga angayang hatagan sa unang tabang sa kagamhanan masiguro na gayud nga madawat na sa labing nagkinahanglan ang ayuda gikan sa gobyerno, dili sama kaniadto nga ang unang makapahimolos mao ra kadtong suod sa mayor, kapitan ug mga kawani sa gobyerno.

Matud pa sa gobernador kini maoy rason kon ngano nga sa iyang pagsubay karon sa dispersal program sa kagamhanan sa miagi wala gayuy makita nga agi ug resulta diin wala na mahibaw-i sa mipaingon ang mga hayup nga gipasanay sa gobyerno. Gipasabot niya nga kini karon maoy giuna sa iyang administrasyon kay tungod sa maong sector ang atong lalawigan nadeklarar nga usa sa pinaka kabus.

Ang pagpili sa mamahimong meyembro sa indigent program, walay bolok sa politika bisan pa ug kini giila nga nahimong lider o naglihok sa pikas partido sa nakalabay nga eleksiyon o kaha kontra sa administrasyon kon makita nga angayan kini masakop sa Lando BIBO kay nakita nga naglisud ang kahimtang kini magpakadawat gayud sa maong hinabang.

Sa samang bahin gidayeg usab ni Governor Yebes ang mga personahe sa CDAU nga nagpakita sa ilang kakugi sa trabaho nga mitaak gayud sa mga lagyong barangay sa lalawigan aron lang sa pagsubay sa kahimtang sa atong mga katawhan sa bukid. Samtang si Mr. Joven Balbosa, consultant sa ADB mipahayag sa Radyo Ronda-DXKD nga iyang gilakip karon ang Zamboanga del Norte sa ilang programa nga nagalugway ug grant para sa poverty monitoring program niini. (Press Freedom, Vol. XVIII No. 17)

SCHOOL BUILDING PROJECT MAGAPADAYON SA 2006

Gipasalig sa gobernador nga ipadayon sa kagamhanang probinsiyal sa Zamboanga del Norte ang pagkonstrak ug dugang mga 1 unit two classroom pre-fabricated school buildings karong 2006 sa mga kabarangayan. Kini ang giluwatan nga pasalig sa kagamhanang probinsiyal sa ZaNorte atubangan sa gipagawas nga report sa Department of Education nga 75 porciento sa mograduwar sa elementarya sa tibook nasud dili maantigong mobasa tungod sa mga rason nga kuwang ug magtutudlo, libro ug lawak saringan.

Si Governor Lando Yebes mipahayag nga kini nga initiative karon sa probinsiya nga manghatag ug eskwelahan sa tanang kalungsuran sa lalawigan ipadayon nila sa pagpatuman kay maoy tinguha nila nga matabangan sa DepEd sa ilang kakuwangon ug labaw sa tanan nasubo usab sila naglantaw sa kahimtang sa mga kabataan nga magklase anaa ra ilawom sa punuan sa mangga. Usa na sa iyang gihimong ehemplo mao ang nakita niya didto sa Barangay Titik, Sindangan diin ang mga bata anaa ra magklase sa gawas.

Sa nasayran ang school building nga gihatag kaniadto ni Congressman Ernesto Amatong, hingpit nang naguba ug peligro na nga klasehan pa sa mga bata kay basin ug mahugno. Ang nagpabilin didtong nagbarug nga school building mao ang tulo ka lawak saringan nga gihatag ni Congressman Roseller “Matoy” Barinaga.

Karong 2005 ang kagamhanang probinsiyal nanghatag ug mga pre-fabricated school buildings kada lungsod alang na sa 25 ka munisipyo ug duha ka siyudad. Sumala pa niya kon ang probinsiya aduna lay kuwarta padayon niyang ipadas-og ang maong programa para makatabang siya sa mga estudyante.

Gipatin-aw sa gobernador nga nadasig siya sa paglusad sa maong programa tungod sa iyang personal nga kasinatian nga produkto sa usa ka public school, diin sa kanunay pait ang kahimtang sa mga pasilidad. Kini nga kakuwangon makapaluya usab sa mga magtutudlo sa pagtudlo sa atong mga kabataan kay sila mismo kuwang sa gana. (Press Freedom, Vol. XVIII No. 17)

BSP ug LGU Officials gihagit ni Yebes maghi-usa

“Hangtud karon pabilin pang nagkabahin-bahin ang mga lideres sa Mindanao busa dili pa ulahi ang tanan, panahon na karon alang sa kahi-usahan sa mga kadagkuan dinhi sa isla.” Mao kini ang pahayag ni Gov. Rolando E. Yebes atol sa Mayor’s Night nga gidalit ni Iligan City Mayor Lawrence LL. Cruz  alang sa tanang mga opisyales sa Boy Scout of the Philippines Western Mindanao Region niadtong Domingo Oktubre 23, 2005 didto sa Buhanginan Hills, Pala-o, Iligan City.

Si Yebes kinsa maoy Regional Chairman sa BSP Western Mindanao miklaro nga sa pagpahigayun sa 4th Western Mindanao Regional Scout Jamboree sa Iligan, kini usa na ka dakung kahigayunan alang sa pagpakita sa hingpit nga kooperasyon ug panaghi-usa sa mga lideres sa Mindanao ilabi na kanila gikan dinhi sa Rehiyun sa ingon mahimo kining sundugon sa mga sama kanilang mga opisyal sa kagamhanang lokal.

Matud niya, ang pagpahigayun sa maong Jamboree magselbi unta nga sinugdanan sa lakang alang sa maong gipangitang kooperasyon kanilang mga lideres dinhi sa Mindanao nga base sa mga obserbasyon, hangtud karon nagkbahin-bahin tungod sa pipila ka mga konsiderasyon. Hagit sa BSP Regional Chairman  kinahanglang sugdan na ang paningkamut alang sa kahi-usahan sa tanan, nga nagpasabot nga ang kooperasyon nga gikinahanglan para sa padayung kalamboan sa mga probinsiya, mga dakbayan ug kalungsuran dinhi sa isla.

Gibutyag pa ni Yebes usa siya sa mga lideres dinhi sa Mindanao nga naningkamut aron matawo ang dakung panagtagbo sa mga lideres dinhi sa Isla didto sa Davao City karong bag-o pa lamang.

Nasayran katuyuan sa maong tigum nga nahitabu niadtong buwan sa Septiyembre mao nga plantsahon ang gipangandoyng kahi-usahan sa mga lideres dinhi sa Mindanao ug sa pagpanday sa hini-usang baruganan niini mahitungod na sa krisis-politikal nga nasinati sa nasud. “Usa ako sa mga gobernador dinhi sa Mindanao nga naningkamut matawo ang maong tigum sa tumong nga kab-uton ang hini-usang baruganan sa mga issue nga nanghitabu karon sa nasud ug usab aron hingpit mapadayag ang kinatibuk-ang sentimento sa katawhan sa Mindanao may labut na sa posibling kausaban sa systema sa atong kagamhanan gikan sa kasamtangang Presidential ngadto sa Federalismo, Parliamentaryo ug mga sama niini” pahayag pa sa gobernador.

Gipahayag pa sa gobernador nga sa maong kapakyas sa panaghi-usa sa mga lideres dinhi sa Isla hangtud karon wala pay bisan usa ka nga Mindanaoan nga nahimong Pamuno-nasud. Dungan niini subli niyang gihagit ang mga opisyales sa BSP ug mga opisyales sa kagamhanang lokal nga mitambong sa maong kalihukan, sugdan na ang mga lakang sa panaghi-usa ug motrabaho alang sa kahingpitan sa maong damgo. Atol usab sa maong okasyon, gidawat sa gobernador ang pasidungog kaniya sa BSP Western Mindanao Regional Executive Council selbing pag-ila sa dakung suporta, tabang ug ayuda nga gilugway ni Yebes isip BSP Regional Chairman ngadto sa Scouting Movement dinhi sa rehiyun. (Mindanao Star, Vol. I No.44)

Signature campaign gilusad sa LPP isip suporta ni GMA

Pormal nang gilusad karon sa mga miembro sa League of Provinces of the Philippines kun LPP ang usa ka signature campaign nga nagtinguha hiposon ang 10 milyones ka pirma sa tibuok nasud. Katuyuan sa paglusad sa maong signature campaign mao ang pagpadayag sa hini-usang sentimento sa mga katawhan dinhi sa nasud sa pagsuporta sa atong konstitusyon ug mismo kang Presidente Gloria Macapagal Arroyo.

Sa iyang sulat gibutyag ni Gov. Erico B. Aumentado, LPP National President ang maong lakang bunga kini sa gisagop nga resolusyon sa LPP National Executive Board atol sa ilang ika upat nga panagtagbo niadtong Septiyembre 30 ning tuiga. Nahisabak usab niini ang laing resolusyon nga gisagop sa Union of Local Authorities of the Philippines nga napanday atol sa ika 14 ka tuig nga anibersaryo sa pagkahimugso sa Local Government Code of 1991 kun ang RA 7160.

Dugang gibutyag sa LPP National President ang pagkalap sa gikinahanglang 10 milyones ka pirma kinahanglang mahitabu sulod lamang sa 30 diyas sa tumong nga ipresentar ang way-puas nga suporta sa katawhang pilipino ngadto sa atong batakang balaod, sa demokrasya, sa lagda sa balaod ug kang PGMA. Gihatagan pa ug gibug-aton niini human nga gibasura sa kongreso ang impeachment complaint batok sa presidenten panahon na nga ipakita sa katawhan ang kinatibuk-ang suporta ngadto sa pangulo aron hingpit niining matubag ang mga nag-unang problemang giatubang sa nasud karon ilabi na sa nasinating oil crisis.

Dungan niini nanawagan ang LPP National President sa tanang mga gobernadores nga tabangan ug makiglambigit sa maong katuyuan aron hingpit nang mapahunong ang mga away-politikal nga maoy nagselbing babag sa pagpatuman sa mga programang pangkalamboan para sa nasud ug katawhan. (Mindanao Star, Vol. I No.44)

P2.5M project giturn-over ni Cong. Barinaga

Sa unang turn-over gipahigayon kini sa Barangay San Jose ning dakbayan sa Dipolog, si Congressman Roseller Barinaga, sa Segundo Distrito migahin sa mokabat nga 1 milyones ka pesos ngadto sa mga mag-uuma sa barangay San Jose pina-agi sa San Jose Rice and Corn Farmers Association ubos sa pagdumala sa Department of Labor. Sumala pa sa asoy sa Provincial Director nga si Ms. Franz Corpuz sa maong ahensiya, ang maong kantidad pagabahin-bahinon kini para ika tukod ug usa ka warehouse diin maoy magamit sa mga mag-uuma, pag palambo sa hybrid vegetable ug rice production ug pag-palit ug usa ka hauling truck diin maoy magamit sa pag transport sa ilang mga produkto.

Dako ang kalipay sa mga mag-uuma nga gipanguluhan sa ilang President nga si Avencio Obnimaga sa pagdawat sa among proyekto kay dako kini ug ikatabang sa kalambuan sa mga mag-uuma sa ilang barangay. Mapasalamaton sila ug dako ngadto kang Cong. Barinaga nga maoy naningkamut para makuha ang maong proyekto. Sa laing bahin, lain usab nga proyekto ang gi-turn-over sa kongresista sa maong adlaw didto sa Barangay Tamil Elementary School sa Jose Dalman diin gakantidad kini ug 1.1 milyones ka pesos para sa pagtukod ug usa ka balay tulunghaan ug pag-paayo sa mga nangaguba na nga mga school buildings.

Sa usa ka simply nga seremonya nga gipahigayon sa maong tulunghaan diin gitambungan usab kini ni Mayor Oliveros “ Nonoy” Dalman, gikalipay kini ug dako sa mga magtutudlo ug uban usab sa mga opisyales sa maong barangay nga gipanguluhan ni Baangay Captain Mayormita nga wala gayud makalimti ni Cong. Barinaga ang ilang tulunghaan sa pagahin ug pundo sa maong proyekto. Susama usab nia-na ang reaksyon sa mga magtutudlo sa Villahermosa Elementary School sa lungsod sa Roxas sa dihang gi-turn-over usab ni Cong. Barinaga kanila sa maong adlaw ang usa ka bag-ong proyekto ng anahuman nga gakantidad ug 400,000.  Ang maong proyekto nga balay tulunghaan kumpleto ug kini gi implementer sa Department of Public Works and Highways nga gipanguluhan ni District Engineer Arturo O. Miñao.

Si Kapitan Kapitan Espiritu Quintero sa Brgy. Villahermosa nagkanayon nga taliwala sa kadaghan nga gi-atiman ni Congressman Barinaga sa iyang distrito wala gyud kini hikalimti sa maong Kongresista sa paghatag ug proyekto sa ilang barangay.  Ang kapitan nagkanayon nga wala makawang anf ilang dakong suporta kang Cong. Barinaga tungud kay kanunay kining galantaw sa kaayohan sa iyang distrito nga iyang gi representar labi na gayud sa ilang lungsod sa Roxas ug labaw sa tanan sa iyang barangay. Ang maong turn-over sa nagkada-iyang proyekto ni Cong. Barinaga tinambungan kini sa mga opisyales sa Department of Public Works and Highways, nga gipanguluhan ni Engr. Miñao, Section Chief Roseller Morallo, Resident Engineers, Lorie Rusiana ug Alen Matabalan, Ms. Fe Sumaylo nga maoy ni representar sa Departamento sa Edukasyon, opisyales sa mga barangays, ginikanan sa mga magtutungha ug mga residente sa barangay. (Mindanao Star, Vol. I No.44)