MANGUIRAN MITAWAG NI ERMITA PARA IBALIK SI MACLANG

Dili lang kay mipirma sa usa ka petisyon si Bishop Jose Manguiran sa Diocese of Dipolog para ipabalik ang hepe sa Dipolog Police Office nga nangdagmal ug mga yanung lungsuranon, mitawag pa gayud kini sa buhatan mismo ni Executive Secretary Eduardo Ermita didto sa Malacanang. Kini ang gikonpirmar sa kasaligang tinubdan nga suod sa pamilyang Ermita.

Sa sayu pa gikonpirmar mismo sa Obispo nga nakapirma siya ug usa ka petisyon nga nanawagan alang sa pagpabalik kang Police Chief Inspector Reynaldo Maclang pagka hepe sa Dipolog Police Office. Matud pa sa Obispo ang maong petisyon gipapirmahan kaniya ni Jojoy Leyson nga giilang usa ka suod nga adviser ni Mayor Evelyn Uy ug maoy kasamtangan karong city tourism officer. Sa nasayran si Leyson maoy nakigkita usab sa kapikas sa executive secretary pinasikad sa mandu sa mayora nga ipahangyo gayud ang pagpabalik ni Maclang sa Dipolog.

Ang kasaligang tinubdan mikonpirmar nga mismo si Manguiran mitawag kang Secretary Ermita aron ihangyo nga ang nangdagmal nga hepe sa Dipolog Police ibalik. Sumala pa ang kalihim mitubag nga iyahang tun-an ang maong hangyo sa Obispo. Sa nasayran gipa-insistir gayud ni Mayor Uy sa iyang gisugo nga makigkita sa kapikas sa kalihim nga ibalik si Maclang para ikapatigbabaw ang kalinaw sa Dipolog. Apan ang nasangpit nga hangyo sumala pa nakahinagbo usab ug higpit nga pagbabag sa pipila ka sector sa dakbayan sa Dipolog dili kalinaw ang gidala sa kanhi hepe sa kapulisan kay nasamok man ang yanung katawhan siyudad ug labaw sa tanan nakapasipala kini ug mga yanung lungsuranon.

Sumala pa sa tinubdan nakugang ang kapikas sa executive secretary pagka hibawo sa insidente nga sa panahon sa pagbisita ni Presidente Gloria Macapagal-Arroyo dinhi sa Dipolog niadtong Setyembre 17, 2007 adunay duha ka suspek nga nadakpan ang mga pulis nga armado ug kalibre .45 nga pistola ug duha ka Granada apan yanu rang gipabuhian ni Maclang samtang gipahigpitan ang siguridad sa presidente taliwala sa hulga nga kini likidahon. Daghan usab nga mga parukyano ang natingala sa gipakitang aktuwasyon ni Bishop Manguiran ngano nga atua kini karon milaban sa tawo nga madinagmalon o mapasipad-on sa iyang isig ka-ingon. Nagduda ang pipila ka mga parukyano nga ang Obispo maglisud mobalibad sa mayora sa Dipolog tungod siguro kay dagku kini ug hinatagan nga amot para sa simbahan. (Press Freedom, Vol. XIX No. 53)

KAGAMHANANG LOKAL SA ZANORTE GIPASIDAN-AN SA BIR

Nagpagawas karon ug pasidaan ang Bureau of Internal Revenue District 91 ning dakbayan sa Dipolog sa tanang mga kagamhanang local sa Zamboanga del Norte kabahin na sa non-remittance sa gikolekta nilang withholding taxes. Ang maong pasidaan giluwatan ni BIR Administrative Officer Rudy Suello sa ilang programang “Ikaw ug ang BIR” sa Radyo Ronda-DXKD kagahapong adlawa. Gibutyag ni Mr. Suello nga daghang mga kagamhanang local dinhi sa ZaNorte ang dili tempranong moremitt sa nakolekta nilang mga withholding taxes nga nahasupak sa balaod sa BIR.

Matud pa ni Suello dugay ra nilang gipatawag ang mga mayors, treasurer’s ug accountants kabahin na sa tempranong pagremit sa withholding taxes para dili sila mapahamtangan ug multa. Hinoon wala ibutyag sa BIR unsa kaayo kini nga mga kagamhanang local nga wala maghikutar sa pagremit sa withholding taxes sigun sa gimandu sa balaod.

Ilawom sa balaod matud pa ni Suello ang pahamtangan sa multa dili ang hingtungdang kagamhanang local kon dili ang mga opisyales nga maoy gitahasan sa pagkolekta sa maong buhis o mga withholding agents. (Press Freedom, Vol. XIX No. 53)

PAGBALHIN UG MGA OPISYAL UG KAWANI HIGPIT NGA GIDILI SA COMELEC

Subling gipahinumduman karon sa Commission on Elections nga higpit nga gidili ang pagtransfer sa mga opisyal ug kawani ilawom sa Civil Service lakip na sa mga magtutudlo uban sa mga sakup sa Philippine National Police. Kini nunot sa pagsugod usab sa election period nga miepekto niadtong Setyembre 29, 2007 ug molibkas unya sa Nobyembre 13, 2007. Sa nasayran ang pagka balhin ni Police Chief Inspector Reynaldo Maclang gikan pagka hepe sa Dipolog Police Office ngadto na sa Zamboanga del Norte Provincial Police Office sa Camp Hamac wala pay labut sa election period.

Apan ang gikatahong mobalik si Maclang karong panahuna pagka hepe sa Dipolog, matud pa sa COMELEC dili na kini mahitabo sulod sa election period tungod sa gipatigbabaw nga pagdili. Sa sayu pa ang abogado ni Maclang nga si Atty. Kenneth Rosal nanghinambog sa interview sa radio nga kagahapong adlawa mobalik na paglingkod pagka hepe sa Dipolog Police Office ang iyang kleyente nga Tagalog.

Sa nakita hangtud karon nagapabiling gibitay atubangan sa Dipolog Police Office ang tarpaulin ni Maclang uban ni Mayor Evelyn Uy. Samtang nagbalik-balik usab kagahapon sa pagpakig kita si Mayor Evelyn Uy sa kapikas ni Executive Secretary Eduardo Ermita kay nagpalaban ug giinsistir niini nga ibalik gayud sa pagka hepe sa Dipolog Police si Maclang. Kasaligang tinubdan mibutyag hapit daw makonbinsir ang kapikas sa executive secretary apan sa dihang gisultihan kini unsay gibuhat ni Maclang batok sa mga Dipolognon daw nausab ang huna-huna nga dili na suportahan niini ang tinguha sa mayora.

Angayang kasayran ang isyu kabahin ni Maclang maoy nakapapukaw sa mga Dipolognon sa paghugpong ug pagpanalipod sa ilang mga katungod atubangan sa ilang giingon nga pagdagsang karon sa mga langyaw nga maoy namunuan sa atong kagamhanan ug kapulisan. Para nila mibati ang mayora ngadto kang Maclang kay parehas silang duha dili taga Dipolog kay nagagikan sa Luzon. (Press Freedom, Vol. XIX No. 53)

LA LIBERTAD UG SIBUCO PABILING HOT SPOTS SA BARANGAY UG SK ELECTIONS

Nagapabiling giila nga election hot spots ang lungsod sa La Libertad ug Sibuco may kalabutan na sa eleksiyon sa barangay ug Sangguniang Kabataan karong Oktobre 29, 2007. Kini ang gibutyag ni Atty. Wilfred Jay Balisadok, Provincial Election Supervisor sa Zamboanga del Norte human gipahibawo sa Philippine National Police nga adunay kapin sa upat ka libu ka mga barangay sa tibook nasud ang giila nila nga election hot spot. Matud pa ni Atty. Balisado ang pag-ila sa duha ka mga lungsod sa La Libertad ug Sibuco nga hot spots gipasikad sa mga nagpanghitabong insidente sa nakalabay nga eleksiyon sa Mayo 14, 2007.

Kahinumduman didto sa lungsod sa La Libertad girakrakan ang headquarters sa KAMPI sa mga tawo giilang sakup sa pundok sa oposisyson. Didto usab sa maong lungsod madakpi ang congressional candidate sa Lakas nga si Retired Police General Rene Elumbaring nga nagdala ug tulo ka mga ihalas nga armas. Samtang usa ka barangay kapitan sa La Libertad ang gipusil patay panahon sa kampanya sa eleksiyon didto sa Polo, Dapitan City.

Samtang didto sa lungsod sa Sibuco, panahon sa kampanya sa nakalabay nga eleksiyon sa besperas sa proclamation rally nila ni Governor Rolando Yebes adunay usa ka home made bomb ang miboto kilid sa munisipyo ug laing duha ka bomba nga wala pa ka boto ang nakaplagan usab nga gitanum duol sa balay lungsod. Pero sa kasamtangan wala silay nakita nga mga lihuk nga posibling makapatugaw sa pagpahigayon sa karong (Press Freedom, Vol. XIX No. 53)

DISQUALIFICATION BATOK MAYOR JON-JON JALOSJOS GIDISMISS SA COMELEC

Gitaktak sa COMELEC en banc ang kasong disqualification nga gipasaka batok kang Mayor Romeo “Jon-jon” Jalosjos, Jr. sa lungsod sa Tampilisan, Zamboanga del Norte. Kini ang gipakanaug nga resolution sa COMELEC en banc sa motion for reconsideration nga gipangayo ni Mayor Jon-jon Jalosjos sa nahaunang disisyon sa COMELEC Second Division nga naglugway sa petisyon sa pagdisqualify kaniya tungod sa kakuwang sa iyang residency sa Tampilisan.

Sa sayu pa mipasaka ug petisyon si kanhi Mayor Angeles Carloto II batok sa residency ni Mayor Jon-jon Jalosjos sa Tampilisan kay kini anaa ra nagpuyo sa lungsod sa Liloy. Sa motion for reconsideration nga giduso ni Mayor Jalosjos gitataw sa iyang abogado nga sukwahi sa nakita sa gipakanaug nga resolusyon niadtong Hulyo 2, 2007 sa COMELEC Second Division, ang intensiyon ni Jon-jon nga mopuyo sa Tampilisan napakita niya sa pag-apply niini ug pa balhin sa iyang voter’s registration gikan sa Liloy paingon sa Tampilisan, labaw sa tanan human sa maong pag-aplay giaprubahan kini sa Election Registration Board sa komisyon.

Giklaro sa abogado ni Jon-jon nga sa pag-aprubar lang daan sa application nga mobalhin sa iyang voter’s registration usa na ka lig-ong basihanan kay pinasikad sa balaod ang pagbalhin sa voter’s registration dili unta maaprubahan kon wala ma-establisar nga pagpuyo sa aplikante diha sa lungsod sa Tampilisan sa wala pa kini moaplay ug transfer. Labaw sa tanan ang pagpartisipar ni Mayor Jon-jon Jalosjos sa bag-ong gitapos nga eleksiyon sa lungsod sa Tampilisan diin midaug siya sa pagka mayor maoy nakapapa sa tanang mga pagduda sa iyang residency sa maong lungsod.

Ang nasangpit nga argumento sa motion for reconsideration ni Jalosjos gidasonan sa COMELEC en banc. Ang COMELEC en banc resolution naghisgut nga natataw nga si Jon-jon nagpuyo sa una sa lungsod sa Liloy, apan napakita usab niini pinasikad sa iyang Application for Transfer nga siya nagpuyo usab sa lungsod sa Tampilisan sulod sa nakalabay’ng napulo ka buwan sa wala pa niya ibalhin ang iyang voter’s registration ug nalambigit sa agri-business ug micro-financing.

Ang komisyon midugang sa pagsaysay sa iyang resolusyon nga kon ang ebedinsiya nga nagkuwang sa residence qualification ang usa ka kandidatu sa usa ka elective position kon kini makita nga huyang ug walay klaro gimandu sa balaod nga panalipdan ang katungod sa mananaug ug maoy tahuron ang gipakanaug nga hukom sa mga katawhan nga mibotar kaniya. Giklaro sa COMELEC nga ang katuyuan sa balaod piniliay mao ang pagpatuman o pagpa-epekto sa gipakanaug nga hukom sa katawhan ug dili ang pagsalikway niini.

Pinasikad niini gidasonan sa COMELEC en banc ang motion for reconsideration ni Mayor Jon-jon Jalosjos ug gihikling ang nahaunang resolusyon sa Second Division sa komisyon. Sa sayu pa gidasonan usab sa COMELEC en banc ang pagdaug ni Governor Rolando Yebes pagka gobernador sa Zamboanga del Norte sa bag-ong gitapos nga eleksiyon atubangan sa petisyon nga gipasaka usab ni kanhi Mayor Roberto Uy sa dakbayan sa Dipolog.

Sa resolusyon nga gipakanaug sa COMELEC gilecturan ug gikasab-an niini ang abogado sa mayor sa Dipolog kon unsay petition to annul proclamation ug unsa usab ang pagdeklarar ug failure of election kay ang duruha dili managkaparehas. Sa nasayran ang abogado ni kanhi Mayor Angeles Carloto II ug kanhi Mayor Roberto Uy mao ra si Atty. Kenneth Rosal nga maoy abogado usab karon ni Police Chief Inspector Reynaldo Maclang batok kang kanhi Konsehal Joseph Herrera. (Press Freedom, Vol. XIX No. 53)

COMMITTEE ON LAWS UG TOURISM MIREKOMENDAR NA PAGMUGNA SA PROVINCIAL TOURISM OFFICE

Girekomendar na sa duha ka mga komitiba sa Sangguniang Panlalawigan sa Zamboanga del Norte ang pagpanday ug usa ka ordinansa alang na sa pagmugna sa bag-ong Provincial Tourism Office. Kini human napailawom sa pagtuon sa Committee on Laws, Ordinances, Resolutions and Style nga gipanguluhan ni Board Member Ricky Mejorada ug Committee on Tourism nga gipanguluhan usab ni Board Member Seth Frederick “Bullet” Jalosjos ang gipadas-og nga balaodnon alang na sa katukuran sa Provincial Tourism Office sa ZaNorte.

Sa kasamtangan ang buhatan sa turismo usa lang ka gaway sa buhatan sa gobernador nga walay kaugalingong opisina. Si Provincial Tourism Officer Atty. Ivan Patrick Ang nagtuo nga ang nasangpit nga lakang madasonan sa plenary session sa Sangguniang Panlalawigan. Sa samang bahin gipasalamatan ni Atty. Ang ang mga meyembro sa duha ka komitiba sa pagdason sa nasangpit nga lakang. Ang provincial tourism officer sa ZaNorte midugang sa pagpahayag sa higayon mahingpit na pagka mugna ang Provincial Tourism Office mamahimo nang makapasulod sila ug mga technical personnel nga adunay tukmang kahibawo sa turismo para mapadas-og ang pagpalambo sa industriya sa turismo sa atong probinsiya.

Sa kasamtangan gipahibawo ni Atty. Ang agresibo sila karon sa kampanya sa pagbaligya sa atong probinsiya ngadto sa kabisay-an sa tuyo nga ang modagsang nga turista sa Cebu ug Bohol molakbit sa pagbisita sa atong mga tourist spots sa ZaNorte. (Press Freedom, Vol. XIX No. 53)

PAGPIKAS-PIKAS SA OPA UG PROVET GIPATUN-AN NA

Gipatun-an karon sa provincial administrator sa Zamboanga del Norte ang pagbahin-bahin sa Office ot the Provincial Agriculturist ug Provincial Veterinarian’s Office ngadto sa mga district office nga ikatag sa nagkadaiyang distrito sa lalawigan. Matud pa ni Governor Rolando Yebes gimanduan na niya si Provincial Administrator Atty. Rafael Cabanlit diin ilawom sa duha ka mga buhatan adunay upat ka mga deputy provincial agriculturist nga ipahimutang sa 1st, 2nd, 3rd ug sa Triple S-B.

Giklaro ni Governor Yebes nga siya karon ang mag-acting provincial agriculturist ug si Atty. Cabanlit maoy iyang alter-ego kon aduna siyay lakaw sa gawas sa probinsiya. Gipasabot sa gobernador nga ang upat ka mga deputy provincial agriculturist kinahanglang mopakita ug resulta sa ilang mga ipatumang programa sulod sa ilang tagsa-tagsa ka distrito. Matud pa ni Governor Yebes gusto niya nga makompetensiya sila sa ilang mga performance aron molutaw si kinsa ang angayang itudlo niyang sunod nga provincial agriculturist sa ZaNorte.

Sa balita nga adunay power struggle sa buhatan sa agrikultura sa probinsiya ang gobernador igo rang mikatawa ug miingon walay mahitabong power struggle kay siya karon ang magsilbing provincial agriculturist. (Press Freedom, Vol. XIX No. 53)

P1.022B BUDGET PARA ZANORTE SA TUIG 2008

Mokabat na sa P1.022 bilyones ka pesos ang ipadas-og nga executive budget sa kagamhanang probinsiyal sa Zamboanga del Norte para sa tuig 2008. Kini ang gibutyag ni Governor Rolando Yebes samtang giandam na sa Local Finance Committee ang pagsumitir sa iyang executive budget para sunod tuig ngadto sa Sangguniang Panlalawigan. Apan kon itandi kini sa budget karong 2007 nagpakita nga gamay ra ang umento sa executive budget para sa sunod tuig.

Para sa sunod tuig, matud pa ni Governor Yebes ang gipahatan ug daku nga pundo sa iyang executive budget mao ang para sa ilang livelihood program nga mokabat sa P140 milyones ka pesos. Matud pa ni Governor Yebes gamay ra ang umento nga gidugang sa 2008 executive budget kay gusto niya nga mamintinar ang solvency sa probinsiya. Iyang gihisgutan ang report sa COA nga sulod na sa duha ka tuig nga ang lalawigan sa ZaNorte nahimong ika duha sa nagbatun ug pinaka daku nga assets ug kuwarta nga pundo diha sa bangko.

Matud pa niya kini maoy resulta sa gipatuman niyang fiscal management sa probinsiya samtang paspas usab ang pagpatuman sa nagkadaiyang mga proyekto sa probinsiya. Sa iyang kabahin mokabat na sa 2,500 ka mga proyekto ang napatuman sa kada barangay ug nagkuwang na lang siya ug usa ka gatus ka barangay para sa tag tunga sa milyon ka pesos nga proyekto alang sa 691 ka barangay sa tibook ZaNorte.

Gawas niini padayong gilugway usab sa probinsiya ang gikinahanglang social services para sa mga meyembro sa LANDO BIBO. Samtang napadas-og usab niini ang programa sa turismo hinungdan nga ang ZaNorte naila na sa ubang bahin sa atong nasud nga usa sa mga tourist destination. (Press Freedom, Vol. XIX No. 53)

DIPOLOG WALA NAY BAKANTING LUBNGANAN PARA SA MGA KABUS

Wala na karoy bakante para lubnganan sa mga kabus nga katawhan ning dakbayan sa Dipolog kay okopado na tanan. Kini ang gibutyag ni Mr. Ronilo Pacilan, ang hepe sa Community Development Assistance Unit human wala hatagi sa city hall sa Dipolog ug Burial Permit ang usa ka meyembro sa LANDO BIBO nga taga Sta. Isabel nga namatay ug gikatakdang ilubong karong Oktobre 12, 2007. Sa sayu pa si Kapitan Pacifico Agustin nagdumili sa pag-isyu ug certificate nga ang namatay usa ka indigent tungod sa rason nga kini meyembro sa Lando BIBO nga naghikog nga si Noriebert Ocampo.

Matud pa ni Pacilan ang certificate nga gipangayo sa mga tagtungod ngadto kang Kapitan Agustin gikinahanglan para sa paglukat ug Burial Permit gikan buhatan sa mayor sa Dipolog. Gusto sa tagtungod nga ilubong ang ilang patay sa public cemetery nga gipanag-iyahan sa siyudad nga nahimutang didto sa Barangay Gulayon. Sa ilang kabahin sa CDAU matud pa ni Pacilan sigun sa naandam ang tanang meyembro sa LANDO BIBO ilahang tabangan unsa may gikinahanglan niini busa siya mismo maoy nanawagan sa pipila ka buhatan sa city hall.

Sa sayu pa mitawag siya sa city health office ug nahinabi niini ang usa ka kawani sa pangalan nga Lani ug gitambagan siya dili mohatag ug certification ang ilang buhatan para sa medico legal kon dili moagi tanan sa pagsala una sa buhatan sa mayor. Gisultihan si Pacilan nga maoy tawagon si Mrs. Lourdes Pabilona sa buhatan sa mayor kabahin niini. Matud pa niya sa dihang gisultihan niya si Pabilona kabahin sa problema sa burial permit siya gisultihan nga sirado na ang public cemetery sa Dipolog kay puno na kini.

Sumala pa si Pabilona nagkanayon nga bisan pa ug hatagan sa kapitan ug certification nga kabus ang namatay dili gihapon kini makalukat ug burial permit para ilubong sa public cemetery sa Dipolog kay wala nay bakanting luna. Sa nasayran ang tagtungod andam mobayad pilay abangan sa lubnganan sa ilang patay sa public cemetery sa Dipolog didto sa Gulayon, apan gipangayuan sila sa buhatan sa mayor ug certificate nga sila indigent. Sa dihang nangayo sila niini ngadto ni Kapitan Agustin sila gibalibaran sa rason nga ang namatay meyembro sa Lando BIBO.

Matud pa ni Pacilan sa dihang gisubay niya kini sa city health ngano nga daghang gipangayo nga mga requirement siya gisultihan nga aduna gayuy direktiba ang city administrator nga si Mrs. Pabilona. Sa iyang nadunggan gikan sa mga tagtungod nga kon dili gayud mohatag ug burial permit ang buhatan sa mayor kay meyembro sa Lando BIBO ang namatay naglaraw sila nga ilang ibutang ang haya diha sa barangay hall sa Sta. Isabel isip pagprotesta. Sa ilang nakita karon matud pa ni Pacilan ang Dipolog adunay problema sa ilang public cemetery busa ug dunay kabus nga mamatay karon maglisud gayud malubong.

ZANORTE NAG-UNA KARON SA KAMPANYA SA TURISMO SA ZAMPEN

Padayon karon nga miabante ang Zamboanga del Norte diha na sa kampanya sa turismo dinhi sa Zamboanga Peninsula Region. Matud pa ni Atty. Alan Ranillo, chairman sa tourism council sa ZaNorte ug ZamPen, mibutyag nga padayong gidugok karon ug mga turista gikan sa ubang mga lugar ang nagkadaiyang mga tourist attraction sa lalawigan nga nahimong kabahin sa tour packages nga ilang gitanyag panahon sa Hudyaka Festival. Kini ang gibutyag ni Atty. Ranillo human sa malamposong pagsalmot sa ZaNorte sa Wow Philippines ZamPen Showcase didto sa dakbayan sa Pagadian.

Sa kasamtangan maoy ilang gipangandaman karon ang pagpahigayon sa susamang kalihukan didto sa Zamboanga Sibugay karong buwan sa Pebrero 2008. Matud pa ni Ranillo napakita gayud sa reheyon nga nagbatun kini ug daghang mga lugar para mamahimong tourist destinations. Alang sa ZaNorte matud pa ni Ranillo, mao ilang gilihok karon nga aduna silay makutay nga dugtong sa pipila ka mga hotels ug travel tours para mabaligya gayud ang mga tourist destinations dinhi sa probinsiya sama sa Aliguay Island, Pinahon Island, Libuton Cave ug Situbo Falls nga padayong gidugok ug mga turista hangtud karong panahuna.

Ang chairman sa provincial tourism council sa ZaNorte, nagkanayon nga sa ilang nakita ang industriya sa turismo sa probinsiya naglihuk gayud diin daghang mga tawo ang naikag nga mosuroy sa atong lalawigan. Sa tibook reheyon, matud pa ni Ranillo ang ZaNorte ra maoy naglihok ang industriya sa turismo diin maoy gipuntirya nila karon nga makakutay sa merkado sa turismo sa Brunie, Indonesia ug Malaysia. Apan matud pa niya ilaha sang lig-onon ug una ang domestic market ayha sila mobaligya sa national ug international market. (Press Freedom, Vol. XIX No. 53)

METROPOLIS MIHATAG NA UG NOTICE OF COMPLETION SA ZANORTE MEDICAL CENTER

Mihatag na karon sa ilang Notice of Completion ang kontraktor sa Zamboanga del Norte Medical Center ngadto sa kagamhanang probinsiyal para pormal nang itugyan ang bag-ong natapos nga hospital. Matud pa ni Atty. Ivan Patrick Ang, sa kabahin sa kagamhanang probinsiyal nagmugna sila karon ug inspectorate team aron sa pagsubay sa trabaho sa Metropolis Construction kon natuman ba niini ang gihan-ay nga specifications alang sa maong tambalanan.

Sumala pa ni Atty. Ang sa ilang pasiunang nakita aduna lamay pipila ka ginagmay nga usbonon sa kontraktor nga maoy ilang gitrabaho karon para hingpit nang matugyan ang maong hospital ngadto sa probinsiya. Gipatin-aw ni Atty. Ang nga ang pagtugyan sa Metropolis sa maong proyekto ngadto sa probinsiya dungan usab unya sa opisyal nga pagbukas sa maong tambalanan alang na sa pagsugod niini ug operasyon. Sumala pa niya gihuwat na lang nila ang pagtunol sa Permit to Transfer ug Certificate of Occupancy para makasugod na usab ang probinsiya sa pagpahiluna sa mga kagamitan ug kahimanan niini para makasugod na kini sa iyang operasyon.

Gibutyag usab ni Atty. Ang nga karon lang bag-o ang licensing team sa Department of Health nagpahigayon na ug pasiunang pagsubay sa bag-ong ZaNorte Medical Center. Sumala pa ang DOH Licensing Team mibutyag nga sa ilang pagsubay maoy ilang nakita nga ang ZaNorte Medical Center maoy pinaka maayo nga hospital nga ilang nakita sa tibook Zamboanga Peninsula Region. Kabahin sa mamahimong sirbisyo unya niini ngadto sa katawhan, gipahayag ni Atty. Ang gipaningkamutan gayud karon sa administrasyon ni Governor Rolando Yebes nga ang sirbisyo nga ilugway niini ngadto sa katawhan sibu usab sa kaguapo sa edipisyo niini.

Sumala pa daghan nang mga batid nga mga doctor gikan sa mga dagkung siyudad ug ubang probinsiya ang nanawag ug nagpahibawo nga interesado sila nga mosirbisyo sa ZaNorte Medical Center. (Press Freedom, Vol. XIX No. 53)

MACLANG SAMA SA USA KA TIME BOMB

Gihulagway karon nga sama sa usa ka time bomb ang kanhi hepe sa Dipolog Police nga naghuwat na lang kanus-a moboto aron makapasipala o makadagmal ug Dipolognon atubangan sa gipakita niining taras diha sa pagpatuman sa balaod. Kini ang gihimong paghulagway ni Atty. Joseph Lester Patay, legal counsel sa duha ka mga suspek sa kawat nga biktima sa pagpang upaw ni Police Chief Inspector Reynaldo Maclang samtang sila nahimong detention prisoner sa Dipolog Police Office.

Matud pa ni Atty. Patay, ang nahi-aguman sa iyang duha ka kleyente nga nasuspek sa kawat maoy usa lamang sa mga kwestyonabling aktuwasyon nga gibuhat sa kanhi hepe sa Dipolog Police ilawom sa kampanya niini nga nagpatuman sa balaod batok krimen diin daghang mga tawhanong katungod ang nayatakan. Gipatin-aw ni Atty. Patay nga ang nasangpit nga isyu nga nahinagbo sa iyang kleyente iyang gidala ngadto sa Sangguniang Panlungsod sa Dipolog sa tuyo nga ang balay balauranan sa siyudad makapanday o lakang para dili na masubli ang susamang hitabo nga aduna pay laing lungsuranon nga mahimong biktima sa police brutality ug aron ang mosunod nga hepe sa Dipolog Police magmatngon na diha sa pagtahod sa tawhanong katungod sa mga lungsuranon nga mahimong suspek sa usa ka krimen.

Sa nasayran girekomendar karon sa komitiba sa Sanggunian nga nag-imbestigar sa maong kaso nga mangayo sila ug gabayan sa Commission on Human Rights ug sa Bureau of Jail Management ang Penology kabahin na sa pagtratar sa mga detention prisoner kon ang pagsablig sa tubig ug pag-upaw gitugutan ba. Apan si Atty. Patay mikwestyon sa aktuwasyon sa Sanggunian sa Dipolog nga bisan ug kanunay nga giisnab sa kanhi hepe sa Dipolog ang ilang imbetasyon para motambong sa gipatawag nga committee hearing gibaliwala lamang niini ang nasangpit nga aktuwasyon.

Gipahibawo usab ni Atty. Patay nga ang iyang kleyente naglaraw sa pagpasaka ug sumbong may kalabutan na sa maong insidente batok sa kanhi hepe sa Dipolog Police nga alang kaniya usa ka tataw nga pagpangyatak sa tawhanong katungod. Kabahin sa pagpanday sa Sanggunian ug resolusyon nga nanawagan alang na sa pagpabalik kang Maclang pagka hepe sa Dipolog Police Office, si Atty. Patay nagkanayon nga ang gibuhat sa mga konsehal usa ka pagluib sa pagsalig nga gisangon ngadto kanila sa mga katawhan imbes ilang panalipdan ang mga katungod sa katawhang Dipolognon ilaha na man hinoong itugyan ang katawhan nga makatilaw pa sa dugang pagdagmal.

Para niya si Maclang sama sa usa ka time bomb nga naghuwat na lang kanus-a moboto o mobusikad sama sa gipangbuhat niini samtang nahimong hepe sa Dipolog Police diin ang pinaka ulahing hitabo mao ang pagsumbag ug pagkulata kang kanhi konsehal Joseph Herrera diha mismo sa city hall ug sulod sa buhatan sa kapulisan. (Press Freedom, Vol. XIX No. 53)

Bishop Manguiran mipirma sa petition pagpabalik kang Maclang

MITUMAW karon ang dakong pangutana kung unsa ang baruganan sa Simbahang Katoliko dinhi sa Zamboanga del Norte kung molaban ba kini sa mga gipangdagmalan o malaban ba sa mga madinagmalon? Human gipalagpot niadtong mi-aging semana ang hepe sa Dipolog PNP ang Sangguniang Panlungsod ug pipila ka mga barangay Kapitan nga kaalyado sa administrasyong Uy kini ang mipadas-og ug usa ka petition nga nanawagan sa pagpabalik kang Police Chief Inspector Reynaldo Maclang pagka hepe sa Dipolog PNP. Nakompermar nga apil sa mipirma sa maong petition mao mismo si Bishop Jose Manguiran.

Ekslusibong nahinabi sa mga sakop sa Zamboanga del Norte United Correspondents si Bishop Manguiran. Kini ang mi-angkon nga mipirma siya sa maong petition nga iyang nadawat nga gidala gikan sa usa ka Jojo Leyson. Gipasabot ni Bishop Manguiran nga ang iyang pagpirma sa maong petition kini tungod sa maayong performance nga iyang nakita. Apan wala magpasabot nga iyang gikonsinti ang dili maayong binuhatan sa hepe sa kapolisan ngadto sa mga yanong Dipolognon sama sa pagkulata kang kanhi City Councilor Joseph Herera. Siya ang aminado nga wala gayud siya masayod sa kinatibuk-ang hitabo kung nganong gi-relieved si Maclang

Sa pangutana kung dili ba makapatay-og sa simbahang katoliko ang paghatag kaniya ug pabor kang Maclang bisan sa iyang pagdagmal sa mga yanong katawhan, alang kang bishop Manguiran wala niya labani si Maclang ug wala usab niya gikonsinti sa iyang maot nga binuhatan, ang iyang pagpirma sa petition nagbasi lamang kini sa iyang nakita diha na sa maayong performance sa hepe sama pagminus sa kawat ug tulis. Gihatagan usab ug gibug-aton ni Bishop Manguiran nga wala siya ma-impluwensiyahe sa mayor sa Dipolog ilabina nga nagpakita kini nga usa ka relihiyoso nga opisyal subay sa pagtuo usab karon sa kadaghanan nga matod pa gigamit lamang si Bishop Manguiran sa grupo karon sa mayor aron matuman ang panawagan niini nga ibalik dinhi sa Dipolog si Maclang. (Mindanao Star, Vol.III No.37)

Bisan patay biktima gihapon SA POLITIKA SA DIPOLOG?

Kahi-ubos ug katingala ang gibati sa mga tagtungod sa usa ka patay lawas sa tawo kung nganong wala sila hatagi ug kahigayunan sa lokal nga pangagamhanan sa Dipolog nga malubong ang ilang mahal sa kinabuhi nga mitaliwan na sa laing kalibutan sa sementeryo dinhi sa siyudad. Mao kini ang gipahayag ni Delia Azucenas, lomolopyo sa barangay Santa Isabel ning dakbayan ug iyaan sa namatay nga si Noriebert Ocampo dihang gibalibaran sila sa kagamhanang lokal sa Dipolog nga makapangayo ug permit aron malubong ang iyang pag-umangkon.

Sa interview sa ZNUC siya nagkanayon nga nahi-ubos kaayo sila nganong wala sila toguti nga malubong sa sementeryo dinhi sa Dipolog o kaha sa Gulayon ang iyang pag-umangkon nga mitaliwan ni-adtong Octubre 3 ning tuiga. Matud pa niya nga kalima sila nag-balik balik sa City Hall aron makuha ang burial permit apan mi-insester gayud kini nga mangayo una sila ug indigency permit sa ilang barangay Kapitan nga si Pacifico Agustin apan wala usab siya hatagi sa ilang kapitan. Mirason pa si kapitan Agustin nga mapreso siya kung moperma siya sa indigency permit, busa mibalik sila City Hall apan giingnan na hinoon sila nga wala na kunoy bakanti ang duha ka sementeryo sa Dipolog.

Siya midugang nga gumikan sa maong hitabo nakahukom na lamang sila nga adto sa lungsod sa Sapangdalaga sakop sa Misamiz Occidental nila ilubong ang iyang pag-umangkon tungod kay iyang nakita nga wala na gayud silay mahimo nga malubong dinhi sa Dipolog ang patay’ng lawas sa iyang pag-umangkon. “Kami nga tagtungod gusto kaayo nga dinhi ra sa dool malubong ang akong pag-umangkon,apan wala na mi mahimo kay under man sa City ang sementeryo, nahi-ubos kaayo mi nga dili siya malubong dinhi”, dugang pahayag ni Delia Azucenas. Matud pa niya nga andam man unta sila mobayad sa tanang gisitar nga balayronon apan ngano man nga gibalibaran gayud sila.

Gumikan sa maong aktuwasyon sa lokal nga pangagamhanan sa Dipolog ug sa ilang barangay natingala gayud ang mga tagtungod sa minatay nganong wala sila tuguti nga diri ra malubong ang ilang mahal sa kinabuhi. Tungod niini, githo-an nga biktima sa politika sa Dipolog si Delia Azucenas kay Purok Coordinator man kini sa Lando-BIBO, usa ka lihitimong programa ni Gov. Yebes nga nagtabang sa mga kabus nga katawhan. Gitakda na ang pagdala sa patay’ng lawas  ni Noriebert Ocampo karong Biyernes didto sa lungsod sa Sapangdalaga ug dili na kini ilubong human gibalibaran sa dakbayan sa Dipolog ang tagtungod niini nga diri ra malubong ang patay’ng lawas niini.

Gi-angkon usab ni Delia Azucenas nga human nila ikalubong ang iyang pag-umangkon magmonitor siya sa sementeryo sa Dipolog ug kung iyang mapatud-an nga duna pa kini’y bakante naglaraw siya nga iyang pasakaan ug sumbong ang ilang kapitan ug ang duha ka impliyado sa City nga maoy nagbalibad kanila nga dili malubong dinhi sa Dipolog ang iyang pag-umangkon. (Mindanao Star, Vol.III No.37)

Kagamhang lokal sa Dipolog walay interes motabang og lubong sa pobreng minatay

NAGPAKITA nga dili gayud interesado karon ang kagamhanang lokal sa Dipolog pagtabang sa mga pobre bisan kung kini ang patay na.. Naghambi karon sa dakong problema ang pamilyang Ocampo sa barangay Sta. Isabel, gawas nga kini ang nagbangutan tungod sa nahitabo sa usa sa miyembro sa ilang pamilya nga namatay niadtong Oktobre 3, 2007 nag-problema usab kini karon kung hain kini ilubong.

Sa nasayran, ang pamilyang Ocampo ug mismo ang namatay nga si Noriebert Ocampo ang miyembro kini sa Lando-BIBO sa kagamhanang probinsiyal ug gikatakda kini nga ilubong karong Oktobre 12, adlaw nga Biyernes. Ang maong pamilya ang midangop ngadto sa buhatan sa Community Development Assistance Unit (CDAU) aron sa pagpangayo ug tabang sa nahinagbo nila karong problema. Gibutyag sa pamilyang Ocampo nga nagdumili si Kapitan Pacifico Agustin sa Sta. Isabel nga mohatag ug certification nga nagpaila nga pobre kaayo ang namatay, ang maong certification maoy usa sa gikinahanglang requirements aron nga mohatag usab ug burial permit ang kagamhanang lokal sa Dipolog.

Ang gikatingad-an sa tagtungod kung nganong gikinahanglan pa nga mangayo ug Certificate of Indegency nga andam man unta silang mobayad kung adunay balayrunon sa sementeryo paglubong sa patay. Sa gihimong interview, gipahayag ni Ronie Pacilan, Unit Head sa CDAU nga sa iyang pagsubay sa City Hall aron sa pagklaro kabahin sa maong palisiya sa siyudad iyang nasayran nga mao kini ang direktiba gikan sa City Administrator nga si Lordes Pabilona, gusto lang sutaon ni Pacilan kung hain motabang ang probinsiya alang sa tagtungod.

Dugang pagpasabot sa siyudad nga sa karon ang menteryo nga anaa nahimutang sa barangay Gulayon kini ang wala nay bakanti ug sa Municipal Cemetery kinahanglan nga mangita usab ang tagtungod ug mityo nga mamahimong ugkalon aron adto i-ipon ang bag-ong ilubong. Tungod sa maong nagkadaiyang rason sa kagamhanang lokal sa Dipolog migawas na usab karon ang pagduda nga matod pa dili gayud interesado ang kasamtangan karon nga namunuan sa siyudad pagtabang sa mga pobre ilabina sa mga miyembro sa Lando-BIBO bisan ug kini ang patay na. Sa kabahin usab ni Pacilan, nakita nga adunay problema karon ang Dipolog sa Public Cemetery nga wala nay lugar alang sa mga patay bisan nga adunay tulo ka menteryo ang Dipolog. Tambag pa ni Pacilan nga kung pobre ka karon ayaw sa ug kamatay. (Mindanao Star, Vol.III No.37)

10 ka lalaking may filariasis operahan sa Roxas: Dr. Icao

Gipasalig ni Dra. Carmencita P. Icao, ZN-Provincial Health Officer sa IPHO nga ma-operahan ang mokabat sa 10 ka mga lalaking may sakit nga filariasis sa Barangay Tantingon, Roxas ning lalawigan karong umaabot Oktubre 17, 2007.

Matud pa ni Dra. Icao nga nahinabi sa Zamboanga del Norte United Correspondents (ZNUC) nga napu ka mga lalaki kinsa midagko ang mga itlog kon lagay niini ang ilang operahan nga libre sa tanan.  Dugang pa ni Dra. Icao nga iyang nahinabi si Kapitan Santiago sa maong barangay nga pagkakaron adunay 10 ka mga lalaki ang nagpalista sa maong libreng operasyon.

Nasayran nga gawas sa maong libre nga operasyon sa mga may sakit nga philariasis, adunay ipahigayon nga Tabang ni Lando sa Comunidad (TLC) medical & dental outreach sa Tantingon, Roxas diin, adunay libreng pagpangonsulta, hatag og tambal, tuli ug ibot sa ngipon ang ipahigayon usab niini. Subay niin, mapasalamaton ug midayeg si Dra. Icao sa pagsuporta ni Gov. Rolando Yebes nga misubay gayod kini sa iyang panultihon nga “Una sa tanan, ang katawhan.” (Mindanao Star, Vol.III No.37)              

Pag knock-out sa tigdas GILUSAD SA PROBINSYA

Sugod Oktubre 15 ning tuiga gilusad ang bag-ong program subay sa gipakanaog nga Memorandum # 0171 gikan sa Department of Health kon DOH alang sa “KNOCK OUT TIGDAS” diin ang tibuok nasud sa Pilipinas ang magsaulog niini bulan sa Oktubre. Ang buhatan sa Provincial Health pinanguluhan ni Dr. Carmencita P. Icao ang hepe sa maong buhatan ang molusad duyog sa maong kompanya ang “PROVINCIAL WIDE KNOWCK OUT TIGDAS” diha sa Capitol Plaza Gen. Luna St. ning dakbayan sa Dipolog karong adlawa Oktubre 15.

Sa pagkighinabi ni Dr. Carmencita P. Icao nga ila gayud kini gipangandaman ug gituman aron mamahimong Measles Free ang probinsya ug kinahanglan mapahimuslan ang maong serbisyo nga gihatag sa DOH tungod kay libre kini alang sa mga kabataan nga nag edad gikan sa 9 ka bulan ug 4 ka tuig ug dal-ong nila ang ilang mga anak diha sa pinakaduol nga Health Center aron mabakunahan kontra sa tipdas ug lakip nila gipanghatag ang Vitamin A drops ug pang-porga alang sa mga kabataan.

Saysay pa ni Dr. Icao nga diin ang tibuok ZaNorte ang mohimo kini sa maong programa ug mapahimuslan ang serbisyo tungod kay matud pa ni Dr. Icao nga nahatud na ang mga tambal ug bakuna sa matag lungsod ug diin gimanduan sa maong Dr. ang mga Health Workers sa pagtuman hangtud nga mahuman ang campaign taman sa bulan sa Nobyembre 15 ning tuiga. Gipasalamatan usab ni Dr. Icao si Governor Rolando Yebes tungod kay nahatagan diha sulod sa iyang administrasyon ang paghimo sa insaktong lakang ilabina sa gikinahanglang medisina alang sa kabataan ug mga katawhan dinhi sa ZaNorte. (Psalm, Mindanao Star, Vol.III No.37)

 Mindanao Star Police Round-up
Pastor nanghipo ug 13-anyos, gisikop sa Sibutad PNP

Temporaryong gidetiner sa Sibutad Municipal Police Station ang usa ka 44 anyos nga Pastor human gikataho nga mihikap sa pribadong parte sa lawas ngadto sa 13 anyos nga batang babaye. Suspetsado giila nga usa ka Roseller Perez Y Amorado, minyo, usa ka Pastor sa Pentecostal nga simbahan, lumulupyo sa Bolicon Turno ning dakbayan sa Dipolog samtang biktima nga gitago sa pangalang Nene lumulupyo sa barangay Libay, Sibutad, Zamboanga del Norte.

Sa pasiunang imbestigasyon sa Sibutad PNP nga sa may 7:30 sa kagabhion sa panimay sa usa ka Joel Ontoy sa naasoyng barangay, gikataho nga mimando ang naasoyng suspetsado ngadto sa biktima sa pagsulod sa kuwarto aron kini pahigayonan og healing prayer. Dugang pa nga kalit lang mimando ang suspetsado ngadto na sa menor de edad paghubo sa sinina niini ug gikatahong mihipo kon mihikap sa pribadong parte sa lawas sa biktima.

Ang nasangpit nga suspetsado temporaryong gidetiner alang na sa dugang imbestigasyon ug tukmang kaso ang andam nang ipasaka batok niini. (joeace, Mindanao Star, Vol.III No.37)              

Kalagot peki ang kwarta, kano nag-wild sulod sa beerhouse

Bilanggoan ang gikatulgan sa usa ka langyaw tungod sa pag-wild sa sulod sa imnanan didto sa barangay Estaka ning dakbayan sa Dipolog. Tungod sa kasuko human madiskobrehan nga ang iyang kwartang gibayad sa gi-inom niini nadiskobrehang fake money. Ang mobile patrol sa Dipolog PNP pinaagi nila ni PO3 Pilare, PO3 Malacat nga naka-respondi sa crime scene milampos sa pagsikop sa usa ka American National giilang si James Robertson hingkod ang panuigon, temporaryong nanimuyo sa Sta. Cruz Central Barangay ning dakbayan.

Sa nasayran ning pamantalaan nga ang maong langyaw gipadakop sa management sa Cool-J Bar nga gipanag-iyahan sa usa ka Jose Miguel Daymiel. Sa dihang ang gibayad nga papel nga usa ka libo sa giinom niining mokabat sa P300.00 nadiskobreng fake money.  Suma sa report sa dihang gisukna ang maong Amerkano sa maong peki nga salapi, nasuko kini ug nag-wild ang maong langyaw ug gipang-sipa ang mga bangko ug gipangbunalan og botelya ang nag-parking nga motorsiklo ug sakyanan nga pajero nga gi-parking sa maong establisemento.

Matud pa nga si Robertson gidala sa buhatan sa kapulisan alang na sa dugang imbestigasyon apan gikatahong gi-released ra usab sa kustodiya sa Dipolog PNP ug tukmang kaso andam ipasaka batok niini. (Mindanao Star, Vol.III No.37)              

lalaki nanglugos arestado

Usa ka 22 anyos nga lalaki ang malampuson kining naaresto sa mga elemento sa kapolisan sa lungsod sa Polanco ning lalawigan human kini gikatahong nanglugos sa usa ka 16 anyos nga dalaga. Ang maong suspetsado giila sa pangalang Rodel Verances, 22 anyos, ulitawo ug nagpuyo sa may Barangay Lingasad sakop sa naasoy’ng lungsod.

Si Verances gikatahong nanglugos kini sa usa ka 16 anyos nga dalaga nga taguon ta lang sa pangalang Marimar, usa ka magtutungha sa Lingasad National High School.  Diin ang suspetsadong si Verances matud pa mipanamastamas sa pagkababaye ni Marimar didto sa may waiting shed sulod sa school campus.

Human sa gireklamo sa biktima sa iyang nahitabo, daling mingrespondi gilayon ang mga elemento sa Polanco PNP ubos sa pagpangulo ni SPO4 Manuel Acabal ug naaresto ra usab ang maong suspetsado.  Si Verances anaa karon gitanggong sa bilangguan sa Polanco Municipal Police Station alang na sa tukmang disposasyon ug gihikay usab ang tukmang kaso nga ipasaka sa korte batok kaniya. (pedmark, Mindanao Star, Vol.III No.37)              

Gov. Yebes mihagit sa bag-ong miyembro
1008TH Phil. Coast guard auxiliary gi-activate 

DAKO ang paglaum sa gobernador sa probinsiya nga pinaagi sa mga bag-ong miyembro sa 1008th Philippine Coast Guard Auxiliary (PCGA) ang dako kini ug matabang sa tibook probinsiya diha na sa pag-protehir sa atong kadagatan batok na sa pagpanamastamas niini. Kini maoy gipalanog ni Governor Rolando Yebes niadtong Sabado atul sa induction ug activation sa 1008th PCGA sa lungsod sa Liloy. Iya usab nga gihagit ang mga miyembro nga ang motabang sa pag-mintinar sa safety ug kaayohan sa tanang mga pasahero sa barko.

Sentro nga gihagit ni Governor Yebes ang duha ka mga board members sa tersiro distrito nga sila si Commander Joseph Brendo Ajero ug commander Anecito Darunday nga nga mopadas-og kini ug balaod diha na sa hawanan sa Sangguniang Panlalawigan sa pag-protehir sa mga marine sanctuaries sa atong probinsiya isip tipik sa ilang trabaho nga mga miyembro sa PCGA. Gipahayag sa gobernador nga pinaagi sa pagka-mabinantayon sa PCGA dako kini ug ikatabang ilabina sa umaabot nga mga adlaw nga aduna nay mga dagkong barko ang mobiyahe dinhi sa atong dapit, ang atong mga pantalan ang aduna nay maayong serbisyo. Kinahanglan nga sentro nga lantawon sa mga miyembro sa PCGA ang ilang tahas ug obligasyon aron nga magpabilin nga luwas ang tanang mga pasahero sa barko.

Iya usab nga gipaambit ang iyang kasinatian sa dihang anaa pa sa custome si Governor Yebes kung unsa ka importante ang PCGA. Iyang gihagatan ug gibug-aton nga sa pagsul-ob sa uniporme karon isip mga miyembro sa PCGA kini maglantaw alang sa kaayohan sa atong tibook probinsiya. Dako usab ang paglaum ni District Commander Congressman Cesar Jalosjos nga dinhi sa Dipolog ug Dapitan ma-activate usab ang PCGA. Ang PCGA sa tersiro distrito ang dako na kaayo gikatampo alang sa kaayohan sa atong kadagatan ilabina na ang pag-protehir sa mga marine sactuaries. Ang maong activation sa PCGA kini ang tinambungan sa mga kadagkuan sa philippine coast guard. Nahimong guest speaker si Commander Edgardo De Vera, District Commander Northern Mindanao. (Mindanao Star, Vol.III No.37)               

Gidudahang swertress financier gironda!
Olvis ug laing 26 kauban gisikop

Gironda sa mga membro sa Dipolog PNP ang balay sa gidudahang swertres financier sa may Upper Turno ning dakbayan niadtung Huwebes sa gabii ug nakuha sa kapolisan sulod sa balay ang mga kagamitan sa maong sugal, kuwarta, armas ug pagkasikop sa 26 niini ka mga empleyado.

Pinangulohan ni OIC Chief of Police PSI Isidro Sasuman uban sa armadong membro sa kapolisan mipatuman sa search warant nga giluwatan ni RTC Presiding Judge Chandler O. Ruiz sa Branch 10 ning dakbayan mironda sa panimalay ni Ricky Opolintisima Olvis, gidudahang swertres financier atubangan sa paglapas sa PD 1602 ilawom sa R.A 9287 nga mao ang anti illegal gambling law. Gisikop sa kapolisan si Ricky, 44 anyos, minyo, lumolopyo sa Turno ning dakbayan sa Dipolog gitumbok nga swertres financier uban sa iyang mga tally sheet checker/controller sa illegal number game nga sila si Zosimo Lobino, Rodel Suan, Nerio Balansag, Nilo Bagsican, Vicente Quezon, Joel Maluto, Allan Velasco, Rogelio Mirafuentes, Julieto Maglayas,  Elias Olvis, Edwin Dionsay, Jovie Villacrosis, Gilboy Bacatan,  Julious Punay Bagaipo, Flor Subido-Gurdiel, Yamie Tabudlong-Albus, Amy Tangaro-Aniñon, Emma Supapo-Abilido, Delia Agacan-Lorillo, Neomi Fernandez-Cardinas, Gina Tabudlong-Villegas,  Ruby Abrea-Manlosa, Rosebelle Barte-Barbaso, Mae Cajucon-Manayon ug Dahlia Atayan-Isaw.

Ang mga suspetsado nasikop sa kapolisan sa dihang akto kining naabtan nga nagpahigayon ug checking/controlling sa swertres lotto tally sheets sa extension nga estraktura, sa kusina ug grahe sa balay ni Olvis. Gikatahong ubay-ubay nga mga collectors ang nakadagan ug nakaipsot hinungdan nga nakaikyas atol sa maong pagpangronda.

Nakonpiskar sa mga polis sulod sa balay ang daghanang kagamitan nga mga swertres paraphernalias sama niining mosunod; (stracture No. 4) 1 unit printing machine/ manual type, 2 bundles blank swertres lotto tally tips, 8 solar calculators, 1 unit stappler, 3 pcs. Ballpen, 1 bundle nga swertres lotto tally sheets; (stracture No. 3) 2 units electronic adding machines, 5 units casio solar calculator, 5 pcs. Stappler, 2 plastic cellophane nga may sulod karaan ug bag-ong tally sheets, 1 sako nga tally sheets, 5 pcs. Stabilo Boss, 4 pcs. assorted solar operated calculator, 1 pc. Stappler, 8 unit assorted model Nokia cellular phones, cash nga P5,000 ug coins nga balid P2,000, 1 Allied Banking Corporation Savings Account Passbook nga gipanag-iyahan ni Ricky nga dunay nakabutang deposito P1.2 Million; (stracture No. 2) nasakpan gihapon ang mga swertres paraphernalias ug lakip sa nakonpiskar ang mga armas sama sa usa ka Caliber 45 pistol, 1 Smith & Wisson Cal. 9MM Pistol, 1 unit Fax Machine ug 14 ka mga motorsiklo nga gituhoang maoy gigamit sa illegal number game operation.

Ang tanang nakonpiskar ug narecover nga mga paraphernalias sa illegal number game lakip na ang 14 ka mga motorisklo ang gidiposito sa korte para exhibits samtang ang nangadakpan kasamtangang gibalhog sa bilangguan samtang pormal ipasaka ang kaso ngadto sa hukmanan. Giangkon sa kapolisan nga atol sa maong pagpangronda, sila mipabuto sa ilang armas tungod kay ang mga riders/collectors nangabungkag ug nag-iya-iya ug dagan lukso/layat sa paril hinungdan nga ila kining gipasalbahan. Gani usa sa ginsakpan sa raiding team ang napangos tungod sa nahitabong ginukdanay.

Atol sa maong pagpangronda gisaksihan nila ni Barangay Kagawad Robinson Pampilo ug Romanito G. Barbaso, Jr. parehong mga barangay konsehal sa Turno. Niadtung Huwebes si Ricky Olvis ang gibuhian ra usab sa kapolisan human gimando sa korte sa dihang kini nakabutang ug piyansa. Uban sa gibuhian sa kapolisan mao ang tulo ka mga suspetsado human masayre nga parehong minor de edad. (The New Nandau, Vol. XVII No.15)

Reklamo batok Maclang giimbestigar na sa PIAS

Anaa na karon sa mga kamot sa Provincial Internal Affairs Service kon PIAS sa PNP Provincial Police Office, Camp Hamac, Sicayab ning dakbayan sa Dipolog ang gihimong imbestigasyon kabahin sa administratibong sumbong nga gipasaka batok kang Police Chief Inspector Reynaldo Maclang. Kini ang gipamahayag ni Deputy Police Provincial Director P/Supt. Jose Carilla subay na sa sumbong gipasaka ni kanhi Konsehal Joseph Herera ngadto sa NBI-Sub Office dinhi sa Dipolog diin ang samang reklamo giimbestigar usab sa PIAS kabahin sa pagkolata ni Maclang ngadto sa sibilyan.

Ang imbestigasyon sa kaso gihimo ni SPO3 Jose Madera. Matud ni Carilla, kamulo pa ug evaluate ang PIAS kon duna bay probable cause ang maong sumbong ayha kini mopagawas ug desisyon. Sumala pa nga kon makita sa imbestigador nga dunay nahimong kalapasan si Maclang, ang PIAS mokuha ug hearing officer aron maoy mohusay sa kaso. Ang PIAS mopadala ug notisya ngadto sa kanhi hepe aron patubagon sa sumbong gipasaka ni Herrera.

“Kamulo pa ang evalua-tion. Kon makita sa imbes-tigasyon nga dili na kina-hanglan patubagon si Maclang magkuha sila ug hearing officer usa magsugod ang proper investigation with their respective legal councel.” Matud ni Carilla kon unsa man ang resulta sa imbes-tigasyon ang PIAS maoy mo-rekomendar kon unsa nga kaso ang ipasaka batok sa respondent. “Nakasabot na si Maclang nga ingon gayud niini nga normal na sa polis nga mag-atubang usa-hay ug kaso kon dunay mga katawhan nga wala maka-angay ug mo-complain.”

Kabahin sa pangutana kon ang resulta sa imbestigasyon mao bay basehanan kon makabalik ug dili sa iyang assignment sa Dipolog Police Station si Maclang, si P/Supt. Carilla mipahayag nga wala na sa iyang posisyon ang paghatag ug katubagan kay anaa na kini sa mga kamot ni P/Ssupt. Yanga ang desisyon. Gipanghimakak ni P/Supt. Carilla nga walay due process ang iyang pagluwat ug temporarry relieve order ngadto kang PCI Reynaldo Maclang gumikan kay igo lamang siya mituman sa mando gikan sa iyang labaw.

Matud niya, niadtong panahona, si PNP Provincial Director P/SSUpt. Mario Yanga atua sa Manila mitambong sa usa ka convention mitawag kaniya atubangan sa mando gikan sa PNP Regional Command nga mohimo ug relieve order aron sa kasamtangan ibalhin sa iyang assignment si Maclang ngadto sa kampo hamac, Sicayab. “During the time nga si PD didto sa Manila, I was issued an OIC order in his absence.” Matud ni Carilla atol sa hitabo dunay nagpahibalo ni Yanga, “dili nato mabasa kon unsay misantop sa iyang hunahuna nga ipa-relieve si Maclang sa iyang posisyon isip OIC Chief of Police sa Dipolog PNP.

Sumala pa ni Carilla nga sa wala pa gimando ni PD Yanga nga i-relieve si Maclang kini nangayo pa ug legal opinion didto sa NAPOLCOM ug didto sa PNP Regonal Command.

“I was given the blessing to affix my signature nga it will be released (relieve order) in the afternoon of September 27.” Gipasabot ni Carilla nga ang order para kang PCI Maclang usa lamang ka temporary relieve gikan sa Dipolog City Police Station as officer-in-charge ug adto mo-report sa PNP Provincial Police Office, Camp Hamac, Sicayab. “PSI Isidro Sasuman is temporarily designated as officer-in-charge,” pagpasabot ni Carilla sa unod sa iyang gipermahan nga relieve order kang Maclang. (The New Nandau, Vol. XVII No.15)

Agustin pasakaan ug kaso sa tagtungod sa namatay

Mag-atubang ug administratibong kaso si Kapitan Pacifico Agustin sa Barangay Sta. Isabel tungod sa iyang pagmagahi pag-isyu ug Indigency Certification para burial permit sa paglubong sa pampublikong sementaryo sa patay’ng lawas ni Noriebert Ocampo. Kini ang bahad sa naglungot-lungot nga pamilya sa mga Ocampo batok ni Barangay Chairman Agustin sa Sta. Isabel ning dakbayan sa Dipolog atubangan sa gikatakdang eskedual sa lubong nga ipahigayon unta niadtung biyernes sa sam-ang katoliko ning dakbayan sa Dipolog.

Si Leria Asucenas, ayaan sa namatay kusganong mipang-himakak sa pamahayag ni Kapitan Agustin nga ang iyang pag-umangkon nga si Noriebert dili tinuod nga lumolopyo sa Sta. Isabel. Isip pagpamatuod nga si Kapitan Agustin namakak atubangan sa publiko, gipakita ni Mrs. Asucenas ang sedula pinitisahan ug Pebrero 10, 2006 ug Bara-ngay Clearance nga pare-hong gi-isyu ug gipermahan sa ngalan ni Barangay Captain Pacifico Agustin nga nagpamatuod nga ang namatay nga si Noriebert Ocampo lumolopyo sa Barangay Sta. Isabel, ning dakbayan sa Dipolog.

Si Mrs. Asucenas, coordinator sa Lando BIBO ug purok officer sa Purok 7, sa Barangay Sta. Isabel ning dakbayan sa Dipolog mipahayag nga ang iyang pag-umangkon nagpuyo sa Sta. Isabel sulod na sa unom ka tuig. Hinoon iyang giangkon nga kini wala magpermanenti ug pundo sa maong barangay kay duna man kini ka-live-in partner nga taga Pagadian, Zamboanga del Sur. Tungod niini, ang iyang pag-umangkon nagkadiin-diin ug puyo, miabot sa Galas ug hangtud niadtung panahona mibalik na usab ug puyo sa Purok 5, Sta. Isabel sa dihang nahitabo ang insidente.

Nahimong babag ang pag-isyu ug burial permit sa City Hall para malubong sa public cemetery dinhi sa Dipolog ang patay’ng lawas ni Ocampo gumikan sa pagmagahi ni Kapitan Agustin sa pag-isyu ug certification of indigency. Matud ni Asucenas, nahurot na nila ug suroy ang tanang opesina nga maoy kapadulngan sa pagproseso sa papeles gikan sa City Health ug DSWD apan gibalibaran gihapon sila sa City Administrators Office kon walay certification gikan sa kapitan.

Nagtuo si Mrs. Asucenas nga wala sila hatagi ug Indigency Certification ni Kapitan Agustin para burial permit sa iyang pag-umangkon nga namatay tungod kay nasuko kini kay siya membro sa Lando BIBO. “Ang labing tinuod, kana si Kapitan Agustin nasuko na nako kay coordinator man ko sa Lando BIBO.” Duha ang option nga giplanohan karon sa pamilyang Ocampo aron ipakita sa katawhang publiko nga dili na makatawhanon ang pagtratar sa administrasyon sa Dipolog. Ilang giplanohan nga ibilin ang haya ngadto sa barangay hall sa Sta. Isabel, sa dalan, sa balay sa mayor, sa top plaza, ug kaha sa city hall apan gumikan kay dili na sila gusto ug samok, adto nalang nila dad-on sa Sapang Dalaga, Misamis Odcci-dental aron sa pagtumod sa iyang kapahulayang dayon.

Giplanohan karon sa kabanay’ng Ocampo nga mopasaka ug kaso batok ni Kapitan Pacifico Agustin tungod sa dili makata-runganon nga pagtratar sa iyang mga katawhan ug pagamit sa iyang gahum isip kapitan nga padayon nag-dumot sa ilang kontra sa politika. Gipaklaro ni Mrs. Asucenas nga siya isip opisyal sa ilang purok, wala siyay gisipyat subay sa pagtuman sa barangay ordinance nga mag-amotay sila kon dunay mamatay. Apan karon nga siya na ang nahimong tagtungod, ang barangay wala na gayud mitabang kaniya tungod lang sa rason nga atua siya sa pikas milaban sa miaging eleksiyon. Usa sa gihimong basehan ni Mrs. Asucenas ang usa ka patay nga klarong taga bukid nga dili tinuod lumolopyo sa Sta. Isabel apan gihatagan ug mutuary ni Kapitan Agustin, kini ang iapil sa iyang ipasaka nga sumbong.

Iresponsable, dili makatawhanon ug labaw sa tanan, dili makataronganon ang giluwatan nga pamahayag ni Barangay Kapitan Pacifico Agustin sa Sta. Isabel sa dihang gi-interview kini sa balita sa Ting Paniudto ni Mariano Uy sa DXFL-FM. Kini ang gipahungaw sa mga lumolopyo sa Barangay Sta. Isabel ning dakbayan sa Dipolog nga nasagmuyo sa gipabate nga pamahayag ni Agustin nga ilang nakita nga bisan kon kini tigulang na, apan walay luna sa iyang kasingkasing ang ilang kontra sa politika bisan kon kini patay na. Gipahayag sa mga kabanay nga iresponsable kaayo ang giluwatan nga pamahayag ni Kapitan Agustin isip siya maoy modelo sa barangay nga iyang gi-alagaran, siya na hinoon ang nagmugna ug pabilo sa kasamok hangtud magapabilin ang pagdumot.

Sumala pa nila, kon wala sila misoporta sa politiko nga gipaboran ni Agustin sa miaging eleksiyon, kana tungod kay duna silay katungod sa demokrasya sa pagpili. “Tungod balang kay managlahi ang gilabanan sa eleksiyon, i-angin nalang ang patay?” Matud pa nila, kon subayon ang kagikan ni Kapitan Agustin, dili man pod kini tinuod lumad nga taga Sta. Isabel ning dakbayan sa Dipolog. Kay kini taga Dohinob, sakop sa lungsod sa Roxas. Apan naglibog sila nga parehong dili lumad taga Dipolog kay igo lamang mibutho aron mopuyo sa maong barangay para dinhi manginabuhi sa siyudad, ingon man niini ang gipakita nga kinaiya ug taras sa kapitan.

Matud pa ni Kapitan Agustin, dili siya mo-isyu ug indigency certificate kay si Ocampo dili lomolopyo sa Sta. Isabel, apan kini gipanghimakak sa tagtungod atubangan sa iyang gi-isyu ug gipermahan nga sedula ug barangay clearance isip pagpamatood nga ang namatay lomolopyo sa maong barangay. Ilang gipamahayag nga si Kapitan Agustin nagpasu-labi lamang sa iyang pamo-litika nga hayan maoy makapapokan kaniya ning taliabot nga piniliay sa barangay. (The New Nandau, Vol. XVII No.15)

Capt. Agustin dili mohatag ug certification!
Bahalag mabaho ang patay

Bahala ug mabaho pa ang patay dili gayud mohatag ug certification si Sta. Isabel Barangay Kapitan Pacifico Agustin tungod kay walay luna sa iyang kasingkasing ang kaluoy aron malubong ang patay nga lawas ni Noriebert Ocampo nga gihaya sa maong barangay. Nagpabilin ang baruganan sa kapitan nga dili gayud mohatag ug certificate of indigency nga maoy gikinahanglan aron mahatagan ang tagtungod ug burial permit gikan sa kagamhanang lokal sa Dipolog aron kini malubong sa mga public cemetery dinhi sa Dipolog.

Sa gihimong interview sa Zamboanga del Norte United Correspondents (ZNUC) ngadto kang Kapitan Agustin, iyang gihingusgan nga dili gayud siya mohatag sa maong certification sa rason nga ang patay nga si Noriebert Ocampo ang dili kini taga Sta. Isabel. Dili siya magpataka ug hatag o pirma sa certification tungod kay wala siya makaila kang Ocampo ug kung kini ang iyang hatagan siya maoy mabasol. Gidugang sa kapitan nga ang pamilyang Azucenas nga maoy ayaan ni Ocampo nga anaa gihaya sa ilang panimalay ang patay nga lawas kini ang dili indigent.

Dugang rason ni Kapitan Agustin nga si Ocampo ang dili gayud kini taga barangay Sta. Isabel gumikan kay wala kini sa census nga gihimo sa barangay ug wala kini marehistro isip botante. “Dili gyud ko mohatag ug certification kay una, wala ko makaila kaniya kay dili siya residente sa Sta. Isabel.” Hugtanong usab gipanghimakak ni Kapitan Agustin nga tungod kay miyembro sa Lando BIBO ang tagtungod hinungdan nga iya kining gidumtan ug labaw sa tanan wala kini kalambigitan sa politika.

Tungod sa pagmagahi ni Agustin ang tagtungod nakahukom nga adto nalang nila dal-on ang patay’ng lawas ni Ocampo sa Sapang Dalaga, Misamis Occidental aron adto kini ilubong tungod kay hangtud niadtung biyernes nagpabilin ang baruganan sa kapitan nga dili gayud mohatag sa maong certification. Ang kagamhanang probinsiyal sa Zamboanga del Norte pinaagi sa Community Development Assistance Unit (CDAU) ang maoy mi-tabang karon aron madala ngadto sa Sapang Dalaga ang patay nga lawas ni Ocampo. (The New Nandau, Vol. XVII No.15)

Alay Lakad Scholars sa mga out-of-school youth Wala gisulo sa City Hall –CIO

Kusganong gihimakak sa kagamhanang lokal sa dakbayan sa Dipolog ang taho nga ubay-ubay sa mga contributors sa Alay Lakad ang nangluod gumikan kay ang ilang gitunol nga tabang para scholarship sa mga out- of-school-youth gisulo lamang sa hepe ehikutibo sa siyudad. Kini ang gipamahayag ni Pinky Rabino sa City Information Office atubangan sa gipahungaw nga pagpangluod sa pipila ka mga contributors samtang nangandam na ang Alay Lakad Council sa pagpahigayon sa kalihukan karong tuiga.

Sa ilang gipahungaw nga obserbasyon, sulod na sa pipila ka mga katuigan sa panahon ni kanhi Mayor Roberto Uy dinagko nga kantidad ang ilang natampo sa pundo sa Alay Lakad Council apan gisulo ra sa pag-angkon sa buhatan sa hepe ehikutibo ang kredito ngadto sa publiko ilabi na ang mga scholars nga gipatungha pinaagi sa natigum nga pundo. Ilang gipahayag nga ang acknowledgement sa ilang natampo diha ra kutob sa programa sa pagpahigayon sa Alay Lakad.

Si Pinky Rabino sa City Informaton Office mipahayag nga dili tinuod ang maong obserbasyon kay ang maong programa sa Alay Lakad ug sa natigum niining pundo intack sa buhatan sa mamahandi ug bukas sa publiko. Matud niya, ang mga programa sa Alay Lakad dili sulo sa buhatan sa mayor ug sa city hall kay kini iya nga kalihukan sa mga katawhan ilabi na sa nagkadaiyang sektor nga mitampo ug salapi para pundo magamit sa mga scholars. Giangkon hinoon ni Rabino nga sukad paglingkod sa pamunoan ni kanhi Mayor Roberto Uy kini gi-reorganized ug kasagaran sa mga membro sa Alay Lakad Council mga opisyal sa City Hall ug gamay lamang nagrepresentar gikan sa NGO kay sa panahon sa mga kalihukan sa Alay Lakad ang mga opisyal raman sa Dipolog ang magkadupas-dupas para sa paghan-ay sa maong programa. Hinungdan matud pa ni Rabino nauyonan nga mas maayo nalang nga majority sa mga membro sa konseho taga city hall.

Karon sa panahon ni Mayor Evelyn Uy gipasabot ni Rabino nga ang Alay Lakad Council gi-reorganisar na usab apan majority sa mga membro opisyal gihapon sa dakbayan sa Dipolog. Hinoon gipasabot sa city information office nga wala sila magkahinagbo ug problema ug gihimakak usab niini nga daghang misibog sa ilang pagsuporta sa mga kalihukan sa Alay Lakad karong tuiga kay gani daghan mang mi-pledge nga motampo sila para scholars sa mga out of school youth. Usa niini mao si Congressman Rosendo “Dodoy” Labadlabad kinsa misaad nga motampo siya ug usa ka gatus ka libo ka pesos gikan sa iyang personal nga koot sa bulsa alang sa kalihukan sa Alay Lakad Council dinhi sa Dipolog. (The New Nandau, Vol. XVII No.15)

6 bills gipadas-ug sa Kongreso gisuportahan sa SP- Zanorte

Unom ka mga balaodnon gipanday gikan sa nagkalain-laing probinsya gipadas-ug ngadto sa ubos balay balaoranan gisuportahan sa Sanguniang Panlalawigan, Zamboanga del Norte. Ang maong mga resolus-yon nga nangayo ug suporta sa hunta probinsyal sa Zamboanga del Norte para mopalig-on sa gipadas-ug nga balaodnon ngadto sa kongreso kabahin sa pagdili ug pagpahamtang ug silot niadtung mga opisyal sa usa ka local government unit sa paghingalan sa mga government property ug programa sa naglingkod nga public officials o kaha sa iyang duol nga paryente.

Ang maong resolusyon maoy gipadas-ug sa Sanguniang Panlalawigan sa Quezon subay na sa namatikdan nga dunay mga incumbent officials nga maghingalan sa ilang kaugalingong pangalan kon duna kini proyekto o government property o programa nga pagahimoon. Laing resolusyon sa Quezon nga gipadas-ug ngadto sa kongreso mao ang paghangyo sa National Inter-Agency Coordinating and Monitoring Board pinaagi ni Kalihim Esperanza Cabral sa DSWD nga tahasan ang mga medical establishment sa nasud nga mopahohigayon ug Schedule sa Diagnostic and Laboratory Fees para sa mga senior citizens alang sa ilang impormasyon.

Lakip na niini ang balaodnon nga wagtangon ang buhis sa tambal ug uban pang serbisyo sa maayong panglawas sa mga senior citizens sa nasud aron maka-avail kini sa barato nga medisina. Ang Sangguniang Panlalawigan sa Tarlac mipadas-ug usab ug resolusyon nga gisuportahan sa hunta probinsyal sa Zamboanga del Norte ang may kalaotan na sa paghang-yo sa ubos balay balaoranan nga mopanday ug balaodnon nga dili na i-apel ang senior citizens diha sa coverage sa Reformed Value Added Tax (RVAT) Law.

Sa samang bahin, laing resolusyon sa Tarlac naghangyo sa senado ug sa kongreso nga mopanday ug balaodnon aron ang mga barangay opisyales mo-qualify isip membro o beneficiaries sa Government Service Insruance System kon GSIS. Gitahasan usab ang GSIS nga mohimo ug makuting pagtuon sa posibling gamiton nga formula nga ang mga barangay opisyales mamahimong membro ug beneficiaries sa GSIS. Ang maong mga resolusyon nga nangayo ug suporta sa Sanguniang Panlalawigan para maoy mopalig-on sa gipadas-ug nga balaodnon sa kongreso ang gidasonan sa hunta probinsyal atol sa ilang regular session niadtung Lunes. (The New Nandau, Vol. XVII No.15)

Capitol mopagamit ug luna sa IPHO sa 12M Registry of Deeds Complex

Kagamhanang probinsyal sa Zamboanga del Norte mitagana ug luna sa may porsyon sa karaang probinsyal hospital para pagatukoron ang 12 million Registry of Deeds Complex Office. Ang katumanan sa maong edipisyo naumol human misanong ang provincial board sa hangyo ni Governor Rolando Yebes nga kahatagan siya ug otoredad sa ngalan sa Zamboanga del Norte sa Deed of Usufruct tali na sa Land Registration Authority.

Atol sa regular session sa Sanguniang Panlalawigan niadtung lunes, gipadas-ug ang resolusyon nga naghatag ug gahum kang Provincial Governor Rolando Yebes sa ngalan sa probinsya sa Zamboanga del Norte nga i-pagamit ang luna pinaagi sa Deed of Usufruct nga balig 500 square meter nga anaa mahimutang sa Barangay Biasong diin kini maoy porsyon sa nahimutangan karon sa Provincial Hospital. Si Board Member Edgar Baguio mipabate sa iyang obserbasyon kabahin sa Deed of Usufruct tali sa Land Registration Authority diin wala makabutang ang probisyon kon pila ka tuig ang pagamit sa luna sa Registry of Deeds.

Sa interview, si Provincial Atty. Jes Gal Sarmiento mipahayag nga ang kontrata sa Deed of Usufruct molungtad ug balig singkuwenta ka tuig. Matud niya, dugay na kining maong proposal sa panahon pa sa nakalabay’ng administrasyon apan wala mahinayon hangtud ila nalang kining gi-utro karon. Gipaklaro ni Atty. Sarmiento nga walay gasto bisan gamay ang kagamhanang probinsyal sa mokostar 12 million Registry of Deeds Complex Office kay kini nga pundo gikan sa nasudnong kagamhanan. Ang mahimong counterpart sa probinsya mao lamang ang pagpahulam sa maong luna diha sa Barangay Biasong.

Dugang pa sa provincial attorney nga ang karaang edipisyo nga probinsyal hospital sa panahon nga mabalhin na ang serbisyo niini ngadto sa Zamboanga del Norte Medical Center maoy gamiton sa ubang mga regional offices nga mabalhin dinhi sa atong probinsiya. (The New Nandau, Vol. XVII No.15)

NHI walay supak sa pag-usab sa pangalan sa
bag-ong gitukod nga Zanorte Medical Center

Ang National Historical Institute walay supak sa pag-usab sa pangalan gikan sa Zamboanga del Norte Integrated Provincial Hospital ngadto sa Zamboanga del Norte Medical Center. Kini ang gipabate ni Ms. Ambeth R. Ocampo, Chairman, National Historical Institute sa iyang gipadala nga sulat ngadto sa Sangguniang Panlalawigan subay na sa gipadas-og niining resolusyon nga sa sayo pa, mikonsulta sa maong buhatan subay sa gimbut-an sa local government code.

Si Ms. Ocampo mipahibawo sa mga membro sa hunta probinsyal nga ang institute walay pagsupak sa pagbansili sa pangalan sa Zamboanga del Norte Provincial Hospital ngadto na sa Zamboanga del Norte Medical Center alang na sa bag-ong gitukod nga tambalanan diha sa may National Highway sa Sicayab. Sa samang bahin, gipahibawo usab ni Ms. Lolita Tuliao, Manager, Philipine Health Insurance Corporation kon Philhealth sa iyang gipadala nga sulat ngadto kang Dr. Nelia D. Tanio, Manager, Accreditation Department sa Philhealth diha sa pag-usab sa ngalan gikan sa Zamboanga del Norte Provincial Hospital ngadto sa Zamboanga del Norte Medical Center para sa pag-update sa accreditation database kabahin na sa Accredited Health Care program.

Kini pinasubay na sa tinguha sa kagamhanang probinsyal alang sa mga membro sa Lando BIBO nga maoy beneficiaries sa maong programa nga maka-avail sa Philhealth. (The New Nandau, Vol. XVII No.15)