Gov. Yebes Outstanding Personnel Administrator

Lain na usab nga pasidungog ang gidawat ni Governor Rolando Yebes gikan sa Civil Service Commission (CSC) rehiyon 9 niadtong Setyembre 28, niining tuiga didto sa dakbayan sa Zamboanga gumikan sa iyang ligdong, sinsiro ug maayong pagdumala sa mga personahe sa kagamhanang probinsyal. Ang gobernador gipasidunggan sa maong ahensya sa gobyerno isip Outstanding Personnel Administrator sa tibuok rehiyon 9, samtang si Mrs. Aurelia Barrios ang Human Resource Management Officer sa kagamhanang probinsyal napili usab nga Outstanding Human Resource Management Officer sa rehiyon.

Matud pa ni Barrios nga ilang nadawat ang maong pasidungog gumikan sa mga programa sa Civil Service Commission nga hingpit nga gipatuman sa kagamhanang probinsyal ilabi na ang paghatag sa mga benepisyo sa mga kawani sugod sa iyang paglingkod sa unang termino isip amahan sa lalawigan nga gihikaw sa miaging administrasyon. Nasayran nga karong bag-o gipatuman gilayon sa gobernador ang 10% increase sa mga suhulan alang sa regular ug casual nga mga kawani sa kapitolyo, ug kini ilang gikalipay ug dako. Dugang pa ni Barrios nga ang pagpatuman usab sa qualification standards sa pagpili ug pagtudlo sa mga personahe, nga mao usay gihingusgan karon sa CSC, usa usab sa gibasihan sa maong pasidunog ug uban pang programa sa maong ahensya nga wala nagmakuli ang kagahamnang probinsyal sa pagpatuman niini.

Niadtong Setyembre 28, adlaw’ng Biyernes gidawat ni Governor Yebes ug Mrs. Barrios ang maong mga pasidungog didto sa City Health Office conference Hall, Petit Barracks, dakbayan sa Zamboanga. Kahibaluan nga sa miaging semana gidawat usab sa gobernador ang Presidential Gawad Lingkod Bayan Award gikan usab sa Civil Service Commission. Ang mga pasidungog nga gipanghatag sa maong ahensya subay kini sa ika-107 nga kasumaran sa Civil Service Commission niining tuiga uban sa tema nga “Itaguyod ang Kasarinlan ng Career Service”. (Sheng, Mindanao Star, Vol.III No.35)

Mga sakop Lando BIBO hatagan ug insurance

Gipatun-an karon sa gobernador ang posibilidad nga hatagan ug insurance ang tanang meyembro sa LANDO BIBO para sa ilang hospitalization gawas sa pagrehistro nila karon sa PHILHEALTH. Matud pa ni Governor Rolando Yebes, iyaha gayud nga hingusgan ang maong programa sa pagtabang sa mga kabus pinaagi sa paghatag kanila ug dugang pang benepisyo. Sa pagka karon gisugdan na niya sa pagpa meyembro sa PHILHEALTH ang mga meyembro sa LANDO BIBO diin mokostar kini ug P18 milyones ka pesos.

Sa samang bahin iyang gipatun-an karon kon mahimo ba ang kagam-hanang probinsiyal makaba-tun ug kaugalingon niining in-house insurance system para sa umaabot nga panahon ang mga meyembro sa LANDO BIBO hatagan niini. Ilawom sa iyang giplano-han nga insurance ang usa ka meyembro sa LANDO BIBO hatagan sa probinsiya ug insurance para sa libreng pagpahospital nga mobalor ug P50,000 ngadto na sa P100,000.

Sumala pa niya sa averaging sa mga insurance company nagpakita nga sa pipila lamang ka porsiento sa mga meyembro ang magpa hospital sulod sa usa ka tuig busa nakadaginot sa pundo ang probinsiya komparar sa PHILHEALTH nga mag-lambigit ug dakung kantidad. Apan gusto niyang patun-an kini aron ang mga doctor sa mga government hospital aduna usay mahimo sama sa PHILHEALTH karon aron ganado usab kini molugway ug sirbisyo. (Press Freedom, Vol. XIX No. 51)

Aron madali pagkahuman
Coastal Road Project gidugangan contractor

Gipahibawo ni Congressman Cesar Jalosjos sa 3rd congressional district sa Zamboanga del Norte nga iyang irekomendar karon ang pagsuhol ug dugang pribadong kontraktor para maoy motrabaho sa Sibuco-Sirawai-Siocon-Baliguian Coastal Road Project nga gipahatan ug P1.3 bilyones ka pesos. Matud pa ni Congressman Jalosjos portion lamang sa maong road project particular na sa Sirawai ang iyang irekomendar ngadto kang DPWH Secretary Hermogenes Ebdane nga iyahang kitaon karong umaabot Martes sunod semana nga maoy ipatrabaho sa Engineering Brigade sa Armed Forces of the Philippines ug magdugang sila ug lima ka mga kontraktor nga magdu-ngan sa pagtrabaho sa maong proyekto para mosutoy ang paghingpit niini.

Si Congressman Jalosjos mibutyag nga sa kasamtangan aduna nay tulo ka mga kontraktor ang nagtrabaho sa maong proyekto sa nagkadaiyang bahin sa maong coastal road project ang ika duhang SONA project ni Presidente Arroyo dinhi sa ZaNorte.

Sa sayu pa gimandu ni Presidente Arroyo nga ipatrabaho sa Engineering Brigade ang pagkonstrak sa maong dalan atubangan sa kahadlok sa ubang mga kontraktor tungod sa mga pagpangilkil sa pipila ka mga armadong grupo ngadto sa ilang mga kompaniya. Gibutyag ni Congressman Jalosjos nga ang naka-hinagbo ug problema sa extortion ang kontraktor sa lungsod ra sa Sirawai. Matud pa sa kongressman ang maong bahin sa proyekto maoy ihatag ngadto sa Engineering Brigade samtang ang ubang portion sa coastal road project padayon nga ipatrabaho sa mga pribadong kontraktor.

Sa samang bahin gipahibawo ni Congressman Jalosjos nga nagka istorya na sila si General Pajarito sa 1st Tabak Division nga ipakatap niini ang puersa sa 44th Infantry Battalion subay na sa coastal road project aron maoy magsilbing mohatag ug siguridad sa mga pribadong kontraktor.

Gitinguha sa kongresista nga mapasutoy ang pagtrabaho sa maong proyekto kay kon makita nga adunay dakung accomplishment ang mga kontraktor sa ilang trabaho andam nang ipagawas ang gigahin nga pundo sa maong proyekto para sa tuig 2008 hangtud na sa 2009. Usa sa mga kontraktor ang hapit na mahuman sa ilang concreting diin gituhuan nga mahingpit ilang trabaho mga duha ka semana gikan karon, dugang pahayag ni Jalosjos. (Press Freedom, Vol. XIX No. 51)

Petisyon batok Lando gisalikway sa Comelec

Gisalikway sa Commission on Elections ang petisyon nga gipasaka ni kanhi Mayor Roberto Uy sa dakbayan sa Dipolog nga nagtinguha sa pagdeklarar nga adunay failure of election sa nakalabay’ng piniliay sa Mayo 14, 2007 partikular na alang sa pagka gobernador sa lalawigan sa Zamboanga del Norte o kaha pag-anular sa proklamasyon ni Governor Rolando Yebes. Sa resolution nga gipakanaug sa COMELEC Second Division niadtong Setyembre 11, 2007 gitataw ni Presiding Commissioner Florentino Tuason, Jr. nga ang gipasakang petisyon ni Berto dili mamahimong matratar isip pre-proclamation controversy ug sa samang bahin petition para sa pagdeklarar ug failure of election tungod kay ang duruha dili managsama.

Sa gihimong pagtuon sa petisyon ni Berto nakita sa COMELEC nga ang gitinguha niini mao ang pag-anular sa proklamasyon ni Governor Yebes. Sa resolution sa komisyon gitataw niini nga wala silay nakita sa petisyon ni Berto nga makasuporta alang na sa pagdeklarar ug failure of elections. Giklaro ni Commissioner Tuason nga sa petisyon nga giduso ni Berto ang tulo ka mga kapasikaran alang sa pagdeklarar ug failure of election wala mapakita niini. Kabahin sa isyu nga ianular ang proklamasyon ni Governor Yebes, giklaro sa resolution ni Commissioner Tuason nga ang proklamasyon sa midaug nga kandidatu mamahimong ma-anular pinasikad sa mga rason nga nahisgutan ilawom sa Section 243 sa Omnibus Election Code.

Ang mga alegasyon sa petisyon nga giduso ni Berto ngano nga ianular ang proklamasyon ni Lando, napakyas sa pagkonbinsir sa komisyon. Ang COMELEC 2nd Division mitataw nga sa alegasyon nga ang proklamasyon illegal kay nakalapas kini sa order nga giluwatan sa First Division niadtong Mayo 10, 2007 kini giila sa komisyon nga nagkuwang sa merito. Gialigar ni Berto nga ang pagproklamasyon ni Lando gipasikad sa incomplete canvass tungod sa pagdumili sa Provincial Board of Canvassers sa paghingpit ug ihap sa tanang mga stray votes ug nga kini nakalapas sa gipakanaug nga kamanduan sa First Division nga isuspenso ang proklamasyon sa modaug nga kandidto sa pagka gobernador samtang wala pa mahimong final ang disisyon sa disqualification case nga gipasaka ni Mayor Uy batok kang Roberto Yang Uy.

Sa resolusyon ni Commission Tuason gitataw niini nga ang presididng commission sa First Division mipagawas ug clarificatory order nga maoy naghatag ug katin-awan sa nahaunang kamanduan nga giluwatan niini. Giklaro sa resolution nga ang presiding commissioner ilawom sa COMELEC Rules of Procedure ang gihatagan ug gahum diha na sa pagdischarge sa mga kaso nga nakapending sa ilang Division. Si Commissioner Tuason midugang sa pagpasabot nga bisan pa ug walay giluwatang clarificatory order ang proklamasyon mamahimo gihapong ikapadayon sigun sa gimandu sa COMELEC Resolution No. 8062 nga gipakanaug niadtong Mayo 18, 2007 nga nagkanayon nga walay suspension of proclamation sa tanang mga winning candidates bisan pa ug adunay pending disqualification nga kaso. Tungod niini nakita sa Commission 2nd Division nga angayang isalikway ang petisyon ni Berto nga nangayo ug pag-anular sa proklamasyon batok kang Governor Yebes kay nagkuwang kini sa merit. (Press Freedom, Vol. XIX No. 51)

Marching Order gihatag sa OPA

Gihatagan karon ug marching order sa gobernador ang mga opisyal ug kawani sa Office of the Provincial Agriculturist diha na sa pagpakita ug resulta sa ilang mga lihuk ug programa. Kini nga kamanduan giluwatan ni Governor Rolando Yebes sa iyang pakigpulong sa dihang miretiro na si Atty. Bernardo Concha sa pagka provincial agriculturist sa Zamboanga del Norte. Gitataw ni Governor Yebes nga sa tanang mga programa ug proyekto nga gipatuman sa buhatan sa agrikultura ang programa ra sa Hi-Green ang nakapasar sa iyang sukdanan sa performance. Gusto sa gobernador nga ang ubang mga proyekto ug programa sa agrikultura makapakita na ug resulta sa labing dali nga panahon.

Giklaro ni Governor Yebes nga dili siya gusto sa mga tawo nga magsige lang ug unya-unya sa ilang mga trabaho. Matud pa sa gobernador maoy iyang gipangita kadtong mga kawani sa gobyerno nga paspas motrabaho aron dali ra usab makita ang resulta. Sumala pa kini maoy rason ngano nga wala pa siyay gipahibawo nga ipuli kang Concha sa puesto kay gusto pa niyang lantawon ang lihok sa mga nag-ambisyon mangulo sa nasangpit nga buhatan kon makapasar ba sa iyang sukdanan sa pagpanarbaho diha sa pagsirbisyo sa mga katawhan. Kahinumduman gipahibawo ni Governor Yebes nga iyaha nang ipasirado ang mga nurseries sa probinsiya nga anaa daplin sa mga highway kay pakitang tawo ra kini ug wala makahatag sa tukmang sirbisyo.

Maoy iyang gusto nga ang mga nurseries sa probinsiya ibutang gayud diha sa barangay diin anaa usab diha ang mga katawhan nga nagkinahanglan sa ilang tabang ilabi na sa mga igtalanom. Giklaro usab ni Governor Yebes nga ilawom sa iyang administrasyon ang mga planting materials o seedlings nga ma produce sa Office of the Provincial Agriculturist libre nga ihatag ngadto sa mga interesadong mag-uuma dili sama sa miaging administrasyon nga gihimo kining negosyo hinungdan nga wala mahalin ug nanurok na lang ang semilya diha sa mga nurseries. (Press Freedom, Vol. XIX No. 51)

32ND Anniversary saulogon sa Chevy Center
Plant the planet program ilusad

Samtang ang ubang mga kompaniya napunting sa reklamo kabahin sa nahimo nilang kadaut sa atong kinaiyahan ang uban naikag usab sa pagpadas-og ug mga programa aron sa pagtubag sa giatubang karong problema sa tibook kalibutan ang climate change. Ang Chevy Centre ning dakbayan sa Dipolog dungan sa pagpahigayon sa ilang 32nd Anniversary Celebration karong Oktobre 2, 2007 molusad sa ilang Plant the Planet Program usa ka environmental campaign pinaagi sa pagtanum ug mga kahoy ug pagtudlo sa mga katawhan kabahin na sa nagpanghitabong pagka usab karon sa lakat sa klima sa tibook kalibutan. Matud pa ni Engr. Rolando Soliva sa Chevy Centre ang project site nahimutang sa Barangay Alvenda, Mutia, Zamboanga del Norte.

Gipatin-aw ni Engr. Soliva nga kini kabahin na sa ilang corporate social responsibility sa ilang kompaniya ilabi na nga ang negosyo sa Chevy Centre mao ang pagpamaligya ug mga sakyanan nga adunay direktang negatibong epekto sa environment sa emissions niini o ibugwak nga aso particular na sa carbon dioxide. Gituhuan sa ilang kompaniya nga ang pinaka maayo nga paagi nga limpyohan ang atong palibot sa makalanag nga hangin sama sa carbon emissions mao ang pagtanum ug mga kahoy nga maoy moproseso sa mga carbon ngadto balik sa limpyong hangin ang oxygen. Matud pa ni Engr. Soliva ang environmental conservation nahimo nang kabahin sa mga mithi nga gisunod sa ilang kompaniya sukad nga kini nahimogso niadtong 1975.

Ang Plant the Planet Program opisyal na gayud nila karong gihimong kabahin sa ilang negosyo aron maoy magsilbing ehemplo sa ubang mga balay patigayon dinhi sa Zamboanga del Norte ug duha ka siyudad sa Dipolog ug Dapitan nga magpa-kabana usab kabahin na sa atong environment atuba-ngan sa dakung problema nga giatubang karon sa tibook kalibutan ang kabahin sa climate change. Sa laing kalamboan, gipahiobalo daan ni Governor Rolando Yebes ang gusto niyang mosunod nga provincial agriculturist sa Zamboanga del Norte karon nga nabakante na ang posisyon sa pagretiro ni Atty. Bernardo Concha kagahapong adlawa. Sa farewell party nga gidalit sa miretirong provincial agriculturist gitataw daan ni Governor Yebes nga daghan ang naghuwat si kinsa ang iyang itudlo nga sunod nga molingkod sa maong puesto.

Matud pa ni Governor Yebes hangtud karon wala pa siya makapili kon si kinsa ang mosunod nga provincial agriculturist sa ZaNorte. Sa iyang pakigpulong giyagyag sa gobernador ang gipangita niyang mga requirements o kuwalipikasyon alang na sa usa ka provincial agriculturist. Sa kasamtangan si karon ang mopadagan sa Office of the Provincial Agriculturist sama sa miagi sa dihang si Atty. Concha milarga sa Amerika. Unang gipangita niya sa usa ka provincial agriculturist nga usa ka tawo nga makasabot sa iyang panghuna-huna, pro-active o advance ang panghuna-huna kabahin na sa mga programa sa agrikultura ug maoy magsilbing catalyst sa maong buhatan aron kini aktibo ug malamboon. Nangita siya ug tawo nga makadisisyon sa iyang kaugalingon nga dili na maghuwat pa ug disisyon sa gobernador, innovative ug makahatag ug mga ideya unsaon sa pagpasutoy ug dugang sa sector sa agrikultura.  Labaw sa tanan kadtong kugihan nga dali rang makapakita dayon ug resulta sa ilang mga gipatumang programa. (Press Freedom, Vol. XIX No. 51)

PANGE MAHIMO NANG KINADATUANG BARANGAY SA PILIPINAS

Daku ang pagsalig ni Mayor Wilfredo Siasico sa lungsod sa Siayan, Zamboanga del Norte nga mahimong pinaka datu nga barangay ang Pange sa tibook nasud sa umaabot nga panahon. Nakadayeg ug daku si Mayor Siasico ngadto kang Governor Rolando Yebes uban sa iyang mga opisyales sa probinsiya nga nag-antos gayud sa paglakaw mabisita lamang ang Barangay Pange nga nadeklarar sa tuig 2003 nga maoy pinaka pobre nga barangay sa tibook nasud. Matud pa ni Mayor Siasico wala gayud siyay duda nga tinud-on gayud sa gobernador ang iyang saad nga mobisita sa Barangay Pange uban sa mga opisyales niini bisan ug nagkalisud-lisud sila sa ilang pagbaktas tungod sa makusog nga pagbunok sa ulan ug ka dangog sa dalan diin ang uban napursigir sa pagkatulog sa usa ka gamay nga payag sa ilang pagpamauli kay nagabhian ug peligro na ang pagpadayon sa ilang pagbaktas balik Barangay Macasing hangtud na sa Poblacion sa Siayan.

Pipila sa mga proyekto nga gikatakdang ipatuman sa gobernador para sa Pange mao ang pagkomponi ug dugang sa bag-ong nabuslot niining dalan gikan sa Barangay Macasing, pagkonstrak ug bag-ong barangay hall, health center, daycare center ug uban pa. Daku usab ang iyang pagsalig nga mapatindog gayud ang maong mga mejoras didto sa Pange kay sa iyang nakita gitinood sa gobernador unsa may iyang gipangsulti diin sulod sa tulo ka tuig niining paglingkud daghan siyang nahimo. Sa kabahin sa kagamhanang local sa Siayan gipahibawo ni Mayor Siasico nga maoy tutukan nila ang paghatag ug livelihood sa mga katawhan sa Pange ug tanang barangay sa ilang lungsod diha na sa pagpananum ug guma.

Maoy ilang target nga kada pamilya adunay usa ka ektaryang gumahan diin ang munisipyo maoy mohatag sa planting materials sa tag 500 ka polybags sa seedlings kada pamilya sibo itanum sa usa ka ektarya. Sa samang bahin gibutyag ni Mayor nga anaa nahimutang sa Barangay Pange ang pinaka daku nga deposito sa minerals nga iron. Sumala pa mao kiniy karoy giplanohan sa mga investors nga ilahang taakon kay sa gihimong pagsubay nakita nga halapad ang iron deposit sa maong barangay. Matud pa ni Mayor Siasico makasunod lamang sa higpit ang mga mining companies sa mga gimbut-an sa balaod alang sa usa ka responsible mining wala siyay pagsupak niini. (Press Freedom, Vol. XIX No. 51)

ZANORTE NO. 2 SA MGA LGU’s NGA MAY
SUBSTANTIAL AMOUNT OF CASH IN BANK UG CURRENT ASSETS

Nagapabiling himsog ang panalapi sa lalawigan sa Zamboanga del Norte taliwala sa daghanang mga proyekto nga gipatuman niini lakip na sa pagpatindog sa P300 million ZaNorte Medical Center. Kini ang gibutyag ni Governor Rolando Yebes kagahapon sa gipahigayong testimonial dinner uban ni Philippine Army Chief Lt. General Alexander Yano, basi sa gipagawas nga financial report sa Commission on Audit sa tanang kagamhanang local sa nasud nga napatik sa Philippine Daily Inquirer kagahapong adlawa. Matud pa ni Governor Yebes sigun sa report sa COA para sa tuig 2006 ang lalawigan sa ZaNorte nalakip sa top ten Provinces, Cities and Municipalities Based on Current Assets nga maoy nalukluk sa ika duhang puesto sunod sa lalawigan sa Cebu.

Si Governor Yebes midugang sa pagpahibawo nga ang ZaNorte lakip usab sa top ten sa mga kagamhanang local sa tibook nasud nga nagbatun ug dakung pundo nga cash nga anaa sa bangko. Sa report sa COA nagpakita nga ang nag-una mao ang Cebu nga adunay P1.015 bilyones ka pesos nga cash diha sa bangko ug nagsunod niini ang Zamboanga del Norte nga adunay P833.58 milyones ka pesos nga cash diha sa bangko. Si Governor Yebes sa iyang pakigpulong kagabii nagkanayon nga kini pagpamatuod lamang nga ang panudlanan sa lalawigan ilawom sa iyang administrasyon nagapabiling himsog taliwala sa gipatuman niining mga proyekto ug gilugway nga sirbisyo ngadto sa mga katawhan.

Sa sayu pa kanunay nga giakusar sa iyang mga kaatbang sa politika ang administrasyong Yebes nga gilimasan na niini ang panudlanan sa probinsiya kay giwaldas pag gastu ang kuwarta sa lalawigan. Angayan usab nga kasayran nga ilawom sa administrasyon karon ni Governor Yebes gikan sa tuig 2004 hangtud karon padayon kini nga nagalugway ug financial assistance ngadto sa mga munisipyo lakip sa duha ka siyudad sa tag usa ka milyon ka pesos ug laing tagtunga milyon ka pesos nga balor sa mga proyekto. Angayang kahinumduman nakuha usab ni Governor Lando Yebes ang 2007 Presidential Lingkod Bayan Award. (Press Freedom, Vol. XIX No. 51)

MAYOR UY NAGDUMILI SA PAGHATAG UG
PAHAYAG SA PAGSUMBAG NI MACLANG KANG JOSEPH

Nagdumili sa pagluwat ug pahayag ang mayor sa dakbayan sa Dipolog may kalabutan na sa pagpanumbag ni Police Chief Inspector Reynaldo Maclang ang hepe sa Dipolog Police batok sa usa ka media practitioner nga si kanhi konsehal Joseph Herrera.

Bisan gamay na lang nga pahayag nagdumili gayud ang mayor sa paglitok ug pipila ka pulong sa dihang giinterbyu siya sa mga meyembro sa Zamboanga del Norte United Correspondents kagabii atol sa testimonial dinner ni Lt. General Alexander Yano sa Provincial Convention Center. Sa samang bahin kini nagkanayon nga wala usab siya makadawat ug kamanduan alang na sa pagrelibo kang Maclang pagka hepe sa Dipolog Police.

Taliwala sa mga pagbatikos nga gipalanog karon sa mga Dipolognon si Mayor Evelyn Uy mitataw nga nagapabilin ang iyang 100% nga pagsalig ngadto kang Maclang pagka hepe sa Dipolog. Giklaro ni Mayor Uy nga hatagan gihapon niya si Maclang sa iyang hingpit nga pagsuporta. (Press Freedom, Vol. XIX No. 51)

BOARD MEMBER JALOSJOS NAKASAWAY NI
MACLANG SA AROGANTE NIINI NGA BATASAN

Padayong miani ug pagsaway ang bag-ong hepe sa Dipolog Police may kalabutan na sa gipakita niining arogante nga pamatasan atubangan sa publiko. Si Board Member Seth Frederick “Bullet” Jalosjos, sa 1st district sa Zamboanga del Norte misaysay nga siya mismo personal nga nakasaksi niini sa miaging semana sa wala pa mahitabo ang pagpangluta ni Police Chief Inspector Reynaldo Maclang ngadto kang kanhi konsehal Joseph Herrera atubangan sa city hall sa Dipolog niadtong Martes, Setyembre 25, 2007. Matud pa ni Board Member Jalosjos kini nahitabo sulod sa Fat Cat Resto Bar sa dalan Herrera niadtong Byernes, Setyembre 21, 2007 pasado mga alas 11:00 ang takna sa kagabhion diin si Police Chief Inspector Maclang kalit lamang mibutho dala sa iyang mga fully armed escorts ug nanghuro-huro sa mga customers ug management kay kuno adunay nanawag nga adunay kasamok sa maong lugar.

Si Board Member Jalosjos mihulagway nga walay kasamok nga nahitabo sa Fat Cat niadtong mga orasa diin tanang mga customers naglingaw-lingaw sa pagpaminaw ug music ug nakig istorya sa ilang mga higala sa dihang kalit lang mibutho si Maclang ug gipapawong ang music, gipasiga ang suga ug gipahunong ang negosyo sa resto bar ug gitagsa-tagsa ug sita sa hepe ang mga customers. Matud pa sa bokal nagpahipi ra siya sa daplin samtang si Maclang nagsige ug pangutana kon si kinsa ang nagsamok-samok sa resto bar kay adunay mitawag kanila sa telepono.

Ang hepe sa Dipolog nangutana usab si kinsay tag-iya sa color red nga motorsiklo nga nakaparada sa silung sa Fat Cat kay kini maoy gitaho nga nanghasi ug nagsamok-samok sa resto bar. Sa dihang walay mitubag si Maclang mikanaug ug gimandu gilayon niini ang pagkarga sa color red nga motorsiklo sa dala nilang pick-up ug gidala ngadto sa Dipolog Police Office. Matud pa sa bokal iyang nahibaw-an nga ang tag-iya sa motorsiklo nga gikuha ni Maclang ug gidala ngadto sa kapulisan usa ka babaying buhat ug layu ra sa tinood nga kini maoy nagmugna ug kasamok sa Fat Cat. Si Board Member Jalosjos, mipahayag nga sa iyang nakita dili gayud husto ang gibuhat sa hepe sa Dipolog Police nga wala gayud masubay sa gimbut-an sa balaod ug hustong pamatasan. (Press Freedom, Vol. XIX No. 51)

HERRERA GIPLANOHAN KARONG LIT-AGON NI MACLANG

Gipahibawo daan ni kanhi konsehal Joseph Herrera ang nasagap niyang inpormasyon nga aduna karoy laraw ang hepe sa Dipolog Police nga lit-agon siya sa usa ka kaso aron dili ipadayon niini ang pagpasaka sa iyang sumbong batok sa nanumbag nga hepe. Matud pa ni Joseph nga adunay pipila ka meyembro sa Dipolog Police ang mitawag kaniya kagahapong adlawa ug maoy nagpahibawo sa maong laraw nga lit-agon siya sa usa ka situwasyon aron makasohan. Ang kanhi konsehal sa Dipolog nagpasalamat nga aduna ray mga meyembro sa kapulisan sa dakbayan nga nagpakabana kaniya ilabi na kadtong mga natabangan panahon sa pagka mayor sa iyang amahan.

Sumala pa niya pipila sa scenario nga giplanohan karon sa lederatu sa Dipolog Police nga rondahon siya sa iyang panimalay ug tamnan ug illegal drugs para makasohan. Laing gilaraw nga lit-ag matud pa ni Joseph mao ang pagpaon ug babaye ug pagka human kasohan siya ug rape. Matud pa niya sama sa nahitabo kaniya niadtong Martes, Setyembre 25, 2007 nga gisumbag ug gikulata siya ni Police Chief Inspector Reynaldo Maclang, kini kabahin na sa giumol nga plano sa administrasyon ni Mayor Evelyn Uy diha na sa pagpanimawos sa mga kritiko sa iyang administrasyon. Sigun sa inpormasyon gikan sa Dipolog Police nadisisyonan nga dasmagan siya ni Maclang kon adunay higayon kay gituhuan nila nga barumbado siya ug batasan nga dili magpautang ug magpadaug busa mosukol ug sinumbagay sa hepe sa kapulisan para maaresto ug mapasakaan gayud ug kaso.

Sumala pa unang giplanohan nga dakpon nila si Joseph sa paglapas sa balaod sa trapiko sa higayon nga magmaneho kini sa iyang sakyanan nga walay rehistro. Ang ika duhang laraw mao nga unhan siya ug sumbag ni Maclang ug hagiton nga mosukol para kasohan dayon ug direct assault against person in authority. Matud pa ni Joseph kining tanan gilantaw na niya daan nga maoy buhaton karon sa administrasyon ni Mayor Evelyn Uy para pahilumon siya sa iyang programa sa radio nga critical sa administrasyon sa city hall. Si Joseph mipahayag nga naka-alimadmad siya nga aduna gayuy gihikay nga dautang laraw ang administrasyon sa dihang gituyuan gayud ug dakup si Engr. Franklin “Acao” Lim tungod sa paglapas sa balaod sa trapiko diin gimandu ni Maclang nga ipatang-tang ang plate number sa sakyanan para gayud masuko si Acao batok sa hepe.

Sa iyang nasayran matud pa ni Joseph sunod nga pabirahan ni Mayor Evelyn Uy pinaagi ni Maclang mao sila si kanhi Konsehal Marcelo “Boy” Digal ug kanhi Vice Mayor Anecito “Baby” Young. Sumala pa ni Joseph ang gihimong pagkulata kaniya sa hepe sa Dipolog Police nakamugna karon ug public outrage sa usa ka barbaric act nga gibuhat ni Maclang ngadto sa usa ka lumad nga Dipolognon nga diha pa gayud nahitabo sa city hall ang uyukan sa kagamhanang local sa siyudad. Sa samang bahin wala itago ni Joseph ang iyang pagka dismaya ngadto kang Police Senior Superintendent Mario Yanga nga iyang paryente ug nahulog nga pag-umangkon kay walay gihimong aksiyon sa gihimong pagpanumbag sa iyang hepe sa Dipolog kay milarga man hinoon ngadto sa kauluhan. Gibutyag usab ni Joseph nga mismo sa text message nga iyang nadawat gikan kang Yanga kini nagpasabot dili na lang siya mopasaka ug kaso batok kang Maclang ug resolbahon ang maong insidente sa malinawon nga paagi.

Matud pa ni Joseph sa iyang nakita si Yanga kabahin na sa sindikatu sa mayor sa Dipolog ug wala niya isalikway ang posibilidad nga kini nabayran kay bugnaw kaayo ang iyang mga aktuwasyon sa usa ka salawayong buhat sa hepe sa Dipolog Police. Gibutyag ni Herrera nga sa dihang gipadalhan si Yanga ug text message sa gobernador kabahin sa insidente kini mitubag nga iyang hangyoon ang regional director sa kapulisan nga mohimo sila ug aksiyon batok kang Maclang. Matud pa ni Joseph klaro kaayo ang aktuwasyon ni Yanga nga mahadlok ug dili kini makapahamtang ug disciplinary action batok sa barumbadong hepe sa Dipolog Police. Kining tanan matud pa ni Herrera mosangko sa politika diin ang tanang mga kontra karon ni Evelyn gisugdan na sa pagterorrize samtang nagtanum usab ang administrasyon karon ug kahadlok ngadto sa mga katawhan aron sila malisang. (Press Freedom, Vol. XIX No. 51)

HEPE SA DIPOLOG POLICE ADUNAY VIOLENT TEMPER

Kusganong gikondinar ug gipanghimaraut sa mga lumad nga Dipolog ang gipakita karong taras ug aktuwasyon sa hepe sa Dipolog Police nga nagbatun ug violent temper. Kini ang ilang gipalanog nga reaksiyon kagahapong adlawa human gayud mapagya sa tibook siyudad nga gisumbag lang ug kalit ni Police Chief Inspector Reynaldo Maclang si kanhi konsehal Joseph Herrera samtang nakig-istorya sa pipila ka kawani sa city hall sa may entrance sa City Hall Annex Building mga alas 10:40 ang takna sa kabuntagon, Setyembre 25, 2007.

Sa samang bahin nakapanghinaway usab sila ngadto kang Mayor Evelyn Uy ngano nga nagdala ug nag-import pa siya ug hepe sa Dipolog Police nga maoy nakapatugaw sa malinawong pagpuyo sa mga Dipolognon tungod sa gipatuman niining mga patakaran nga nakita nga wala magsubay sa gimbut-an sa balaod. Sa ilang pagbasol batok kang Mayor Uy, ang mga lumad nga Dipolognon nagkanayon nga ang gibuhat ni Maclang mao na hinooy nakamugna ug kasamok ug kaguliyang imbes siya maoy ahente sa pagpatigbabaw sa kahapsay ug kalinaw. Wala usab nila isalikway ang dakung posibilidad nga hayan sunod kang Joseph Herrera ang bag-ong hepe sa Dipolog Police makapusil na gayud hinoon ug usa ka lungsuranon tungod sa gipakita niining violent temper.

Si Joseph sa iyang giasoy sa Radyo Ronda-DXKD kagahapon sa udto nagkanayon nga gisumbag siya ni Maclang tungod kay nadutlan kini sa iyang mga komentaryo ngano daw nga gipasanginlan siya nga maoy protector sa mga illegal nga kalihukan sa mayor. Matud pa ni Joseph wala gayud siya makabantay nga nagpadulong na diay sa iyang nahimutangan si Police Chief Inspector Maclang ug sa iyang paglingi mao gayuy misugat ang kinomo sa hepe sa Dipolog Police nga diha motugpa sa tuong bahin sa iyang mata. Magise usab ang nawong ni Joseph ug iyang gituhuan nga naigo kini sa singsing ni Maclang. Sumala pa pagtugpa sa kinomo ni Maclang sa iyang nawong nalagpot usab ang iyang sunglass busa iya kining gipunit ug maoy iyang nakita nga mihana na usab ang hepe sa pagsipa o pagtadyak kaniya busa siya nakalikay ug naigo diha sa may tiyan apan dili ra tantong kusog.

Si Maclang human makasumbag mihagit ngadto kang Joseph nga pasukulon kini ug sinumbagay ug dayong lakaw paingon sa Dipolog Police Office. Matud pa ni Joseph misunod siya ni Maclang apan dili aron makig sinumbagay kon dili moreport sa kapulisan aron ipa blotter niya ang ilang hepe nga nanumbag. Sumala pa nakig-istorya na siya sa desk officer aron ipablotter si Maclang sa dihang mikalit lamang ug sulod ang hepe ug sulod sa duha ka higayon gisipa na usab siya hangtud na naduot si Joseph sa rehas sa detention cell ug mihurar sa iyang mga kamot nga dili lagi siya mosukol.

Si Joseph midugang sa pag-asoy misuway unta siya sa pagtawag sa telepono sa ila apan maoy iyang nakita nga giaksiyunan na usab siya ug sumbag ni Maclang busa misibog na lang siya ug milakaw nga wala tagad maka pa blotter. Matud pa ni Joseph migawas mismo sa baba ni Maclang ngano nga gipasanginlan siya sa mga komentaryo niini sa iyang programa sa DXKD ang Slam Dunk nga siya maoy protector sa mga illegal nga negosyo sa mayor. Tungod sa iyang kapakyas pagpa blotter sa Dipolog Police Office sa pagpanumbag ni Maclang didto na lang siya misumbong sa NBI diin giklaro ni Joseph nga pasakaan gayud niya ug kaso ang hepe sa kapulisan. (Press Freedom, Vol. XIX No. 51)

ACAO MIHIMAKAK NGA NANGHULGA KANG MACLANG

Hingpit nga gipanghimakak ni Engr. Franklin “Acao” Lim nga nanghulga siya nga ipasalibay ang bag-ong hepe sa Dipolog Police sa dihang gidakop siya tungod sa paglapas sa balaod sa trapiko. Kini ang gitataw ni Akao atubangan sa migawas nga balita nga nadakpan siya ug nanghulga nga ipasalibay ang bag-ong hepe sa Dipolog Police. Giklaro ni Engr. Lim nga sa dihang gipahibawo siya sa ilang security guard sa Jollibee nga gidakop iyang sakyanan kay nakalapas sa balaod sa trapiko siya migawas ug mitunol gilayon sa iyang lesensiya ngadto sa traffic enforcer nga walay bahad o dugang istorya nga giluwatan. Wala usab sila magka istoke ni Police Chief Inspector Reynaldo Maclang kay sa dihang gidakop ang iyang sakyanan nga nakaparada atubangan sa Jollibee ang hepe sa kapulisan didto sa atbang nagsige ug yawyaw nga namalikas ug nagsiyagit-siyagit nga “Putang Ina ninyo, wala kayong respeto sa mga pulis.

Matud pa ni Akao kadto ra nga mga pulong nga giluwatan ni Maclang maoy iyang nabatian apan gisultihan siya sa mga sidewalk vendors nga sa sayu pa ang hepe sa Dipolog Police nagkanayon nga, “wala akong sinasanto kahit na mayaman”. Sumala pa gisultihan siya sa usa sa mga traffic enforcer human siya gidakop nga paadtoon ni Maclang sa iyang opisina, apan si Acao mipahayag nga iyaha kining gibalibaran kay dili siya gusto nga maka utang ug kabubut-on busa gitunol niya iyang lesensiya ug nangayo siya sa Temporary Operators Permit. Hinoon wala isalikway ni Akao ang posibilidad nga ang nahitabo kaniya mao nay pagpanimawos sa kasamtangan karong mayor sa Dipolog nga asawa sa iyang ig-agaw tungod kay sa nakalabay nga eleksiyon wala siya mosuporta niini. Para niya ang gibuhat sa siyudad usa ka paghuro-huro ug mga investors dinhi sa Dipolog. 

Ang nasangpit nga kabalaka ni Akao dili layu sa tinood kay nahitabo na kini sa igsoon ni kanhi Vice Mayor Edelburgo Cheng nga kontra sa politika sa mga Uy nga adunay dressing plant sa manuk sa Galas nga gilisud-lisud sa administrasyon ni kanhi Mayor Berto Uy hangtud nga nasirado ang nasangpit nga planta. Sa nakita usab ang mga balay patigayon nga gipanag-iyahan sa pamilya sa mayor particular sa Top Plaza Hotel gihimong parking area niini ang duha ka kilid sa dalan Echavez apan walay dakup nga gihimo si Maclang. Sumala pa kini tungod kay si Malang hinatagan ni Mayor Evelyn Uy ug service vehicle nga iyang magamit personal sa iyang pagka hepe karon dinhi sa Dipolog. (Press Freedom, Vol. XIX No. 51)

POVERTY MAPPING PROGRAM SA ZANORTE MORE THAN THE USUAL –PACILAN

Ang kalahi sa programa nga gipatuman karon sa administrasyong Yebes maoy nakasiparar sa Zamboanga del Norte sa ubang mga probinsiya diha na sa pagpatuman sa naandang mga programa sa gobyerno sama sa social services, health care program, infrastructe, agriculture, tourism ug anti-poverty program hinungdan nga migilak kini kon itandi sa ubang mga lalawigan sa atong nasud ug maoy gihatagan sa Presidential Lingkod Bayan Award.Kini ang gipahayag ni Mr. Ronilo Pacilan, ang hepe sa Community Development Assistance Unit o CDAU nga maoy gitahasan ni Governor Rolando Yebes sa paglusad sa Poverty Mapping Program ug mopadagan sa Barangay Indigent Beneficiaries Organization o LANDO BIBO.

Sa citation sa Presidential Lingkod Bayan Award gitataw nga ang pagbatun ni Governor Yebes sa iyang Poverty Mapping Program ilawom sa iyang tumbanan sa pangagamhanan “Una sa tanan ang katawhan” nga nagatutuk sa paghatag sa gipangitang sirbisyo sa mga kabus nga katawhan sa probinsiya maoy gihatagan ug gibug-aton sa gitunol nga pasidungog ngadto sa gobernador. Matud pa ni Mr. Pacilan ang nahitabo karon sa ZaNorte ilawom sa administrasyon ni Governor Yebes lahi kay sa naandan ang paghatud sa gikinahanglang sirbisyo para sa katawhan revolutionary diha sa paghatud sa social ug basic services. Ang nasangpit nga sirbisyo anaa usab kini sa ubang mga probinsiya apan ang nakalahi sa ZaNorte diha sa pagpatuman sa maong programa kay gihatagan kini ug dugang pagtagad sa gobernador pinaagi sa pagpatuman sa iyang kaugalingong indigency program ug health care program.

Matud pa ni Pacilan sa kabahin sa ZaNorte ang administrasyong Yebes wala maghuwat nga ang mga kabus maoy moduol sa probinsiya aron mangayo ug ayuda o hinabang. Ang gibuhat ni Governor Yebes ang programa sa gobyerno maoy gipaduol ngadto sa katawhan para itunol ang gipangita nila nga sirbisyo. Ilawom sa programa ni Governor Yebes, matud pa ni Pacilan giputol ang naandang burukrasya sa gobyerno para mapasutoy ang paghatud sa sirbisyo diin giwagtang ilawom sa LANDO BIBO ang pagperwesyo sa mga katawhan nga imbestigahon pa kon tinood ba gayud silang kabus ayha tunulan sa ayuda ug tabang sa gobyerno. Matud pa ni Pacilan ang kapitolyo maoy misaka sa bukid aron ihatud sa katawhan ang gipangayo nilang sirbisyo sama sa gibuhat ni Governor Yebes didto sa Barangay Pange, Siayan sa miaging semana diin gidala niini ang Expanded Tabang ni Lando sa Communidad ang nag-unang outreach program karon sa probinsiya. (Press Freedom, Vol. XIX No. 51)

MISSION ORDERS MAKAHATAG MAO RA ANG CHIEF PNP UG AFP CHIEF

Ang pag-isyu ug mission orders para makadala ug armas ang usa ka ahente sa pulis ug military nga sibilyan mao ra ang chief PNP ug hepe sa armadong kusog sa nasud. Matud pa ni Konsehal Peter Co sa dugay na niyang pagpanglaban pagka abogado sa nagkadaiyang mga kaso nga gihusay diha sa hukmanan ilabi na ug naglambigit sa mga armas ang tuhuan sa korte ug dawaton mao ra ang mission order gikan sa chief PNP ug hepe sa armadong kusog sa nasud. Matud pa ni Konsehal Co diha sa balaod wala gibutang nga ang pag-isyu ug mission order gidelegar ngadto sa mga regional directors o provincial directors sa kapulisan o kaha sa mga brigade commander sa military.

Kini ang katin-awan nga giluwatan sa konsehal sa Dipolog sa dihang gikuhaan ug reaksiyon sa gihimong pagbuhi ni Police Chief Inspector Reynaldo Maclang sa duha ka mga suspek nga nadakpan sa miaging semana nga armado sa tag-as nga kalibreng armas ug duha ka Granada. Si Maclang sa iyang giluwatang pahayag ngadto sa publiko nagkanayon nga ang gidalang armas ug duha ka Granada sa nadakpan nilang suspek nga sila si Wilson Dagpin ug Alexander Bugnawon pulos adunay dokumento o mission order.

Sa nasayran ang nag-isyu sa mission order nagagikan ra sa 101st Infantry Brigade sa Philippine Army apan ang gitug-an ni Maclang ang nag-isyu mao ang usa ka Col. Emmanuel Mendoza sa 9th Regional Community Defense Command sa dakbayan sa Pagadian. Matud pa ni Konsehal Co sa iyang kasinatian sa pagka abogado dili gayud dawaton sa korte ang nag-isyu sa mga mission orders gikan sa police provincial directors kay tataw kaayo sa balaod kon si kinsa ang angayang maka-isyu sa mission orders. (Press Freedom, Vol. XIX No. 51)

MACLANG NAGPABUHAT UG BLUE PRINT SA
ILANG CRIME PREVENTION CAMPAIGN APAN SINUHID

Gibutyag karon sa usa ka kasaligang tinubdan nga ang bag-ong hepe sa Dipolog Police nagbuhat ug blue print sa ilang crime prevention campaign nga gilakip gayud ang tanang barangay sa siyudad. Apan sumala pa kini gimandu ni Police Chief Inspector Reynaldo Maclang human sultihi nga adunay usa karon ka law enforcement agency nga nagpabuhat niini. Gimandu ni Maclang nga suhiron ang maong blue print ug gipalapdan lang niya pinaagi sa paglakip sa tanang mga barangay sa Dipolog. Kahinumduman sa sayu pa si Konsehal Peter Co, naghisgut nga hangtud karon wala gayud sila makakita ug blue print sa crime prevention campaign sa Dipolog Police nga dugay ra nilang gipangayo sa Sangguniang Panlungsod.

Hinoon gitataw ni Konsehal Co nga ilawom sa bag-ong hut-ong sa Sanggunian sa Dipolog wala pa silay gipanday nga lakang nga nangayo ug balik sa maong blue print. Matud pa niya sila sa Sanggunian mag-agad sa hingtungdang chairman sa committee on peace and order unsay mga lakang nga sagupon niini taliwala sa mga nagpanghitabo karong mga krimen dinhi sa Dipolog ilabi na sa mga tulis nga hangtud karon nagapabiling wala gayud masulbad sa kapulisan. Sumala pa sa konsehal kon mamatikdan sa ubang meyembro sa Sanggunian nga walay gihimo nga aksiyon ang chairman sa committee on peace and order si bisan kinsa nila nga sakup sa balay balauranan ang mamahimong makapadas-og ug lakang diha na sa pagsingil sa Dipolog Police sa ilang crime prevention campaign.

Sa pangutana kon ang balay balauranan sa Dipolog gihatagan bas a Dipolog Police ug update sa mga nagpanghitabong krimen ilabi na sa tulis kon unsa nay lakat sa gihimo niining imbestigasyon, si Konsehal Co mitubag nga wala gayud sila makadawat ug wala usab silay kasayuran unsay dagan sa imbestigasyon sa kapulisan sa maong mga tulis. (Press Freedom, Vol. XIX No. 51)

KONSEHAL CO NAGHINAM-HINAM PAGLITSON NI MACLANG SA SANGGUNIAN

Naghinam-hinam na ang majority floor leader sa Sangguniang Panlungsod sa dakbayan sa Dipolog sa pagsukit-sukit sa bag-ong hepe sa Dipolog Police atubangan sa gipatigbabaw niining mga patakaran nga wala sukad mahitabo sa dakbayan ug wala usab mabutang diha sa balaod. Si Konsehal Peter Co, sa programang Kapihan sa 1948 Cafeteria sa Ospital ng Kabataan ng Dipolog, Incorporated, nagkanayon nga gipatawag na unta nila sa komitiba si Police Chief Inspector Reynaldo Maclang aron patubagon sa sumbong nga giduso ni Atty. Joseph Lester Patay kabahin sa gihimong pagpa-upaw sa iyang duha ka kleyente nga nadakpan ug gikasohan sa pagpangawat, apan milakaw kini ug sayu kay gipatawag ni Police Senior Superintendent Mario Yanga, ZaNorte Provincial Police Director sa usa ka tigum.

Matud pa ni Konsehal Co gusto gayud niya nga ilang mapangutana si Maclang sa gipatigbabaw niini karong polisiya sa Dipolog Police sama sa pagpa-upaw sa mga detention prisoner sa kapulisan. Si Konsehal Co nagkanayon dili pa gayud matubag karon kon ang gibuhat ni Maclang nga upawan ang mga detention prisoners sa Dipolog Police matawag ba nga usa ka silut taliwala sa gipatigbabaw sa atong balaod nga ang tawo nga usa ka akusado nagapabiling inosente hangtud nga mapamatud-an sa korte nga sad-an ug makonbikto ayha ipatuman ang silut.

Ang konsehal nga usa usab ka abogado nagkanayon nga sa iyang pagpanglaban wala gayud siya makahinagbo ug balaod nga nagtugot nga ang mga detention prisoner kinahanglang upawan. Sumala pa niya mismo sulod sa Dipolog City Jail ug sa Zamboanga del Norte Provincial Correctional and Rehabilitation Center wala siyay nakit-an nga detention prisoner nga gipang-upawan tungod kay nag-atubang ug mga kaso. (Press Freedom, Vol. XIX No. 51)

Herrera gikulata ni PSI Maclang

Kon walay gisanto ang bag-ong hepe sa kapolisan dinhi sa dakbayan sa Dipolog diha sa estriktong pagpatu-man sa balaod sa trapiko batok sa ginagmay’ng panginabuhi sa mga habal-habal, pag-impound sa mga motorsiklo nga walay plaka ug uban pang promininting tawo nga nahimong biktima, wala ilha ang kanhi PBA Star ug kanhi konsehal sa dak-bayan sa Dipolog sa iyang kaisog, kini iyang gisumbag ug gikolata atubangan sa daghang mga tawo ug kawani sa City Hall ning dakbayan sa Dipolog. Kini ang nahiaguman ni Joseph Herera sa dihang nakatilaw ug kulata ni PSI Reynaldo Maclang niadtung lunes sa buntag didto mismo sa city hall.

Si Joseph Herera nga anak ni kanhi mayor Okong Herera, nahimong inila nga basketbolista ug miagi usab nga konsehal sa dakbayan sa Dipolog nagisi ang pikas aping dapit sa iyang mata human sa kalit lamang gisuntok ni Chief of Police Reynaldo Maclang. Sa iyang asoy, gipahayag ni Herera nga samtang didto siya sa may pultahan sa bag-ong building sa city hall nakig-estorya sa iyang mga higala, kalit lamang miha-guros ang makusog nga komo nga mitugpa sa iyang nawong ug sa iyang paglingi, si Maclang na diay nga daw leon masuk-anon nga mikonprontase kaniya. Wala pa matagbaw si Maclang, iya pang gi-usban ug sumbag dayon sipa si Herara. Ang masuk-anon nga hepe mipugos ug agda ni Herera nga adto sila magtiwas ug estorya sa iyang opesina sa police station. “Putang ina ka… ano bang pinagsasabi mo! halika…halika…halika” dayon lakaw sa hepe balik sa police station nga anaa lamang nahimutang tapad sa City Hall. Misunod si Herera dili aron makig-estorya ni Maclang kay tuyo niya nga magpa-blotter, apan minaug si Maclang gikan sa iyang opesina ug gipaluparan na usab siya ug suntok hinungdan si Herera miatras hangtud napiot sa rehas midupa iyang duha ka mga kamot timaan nga dili mosokol.

“Dili gyud ko mosukol kay wala koy dag-anan… police gud siya ako sibilyan.” Matud ni Herera, “unsa man ko bali nga hinan-aw man kog sene”. Iyang gipasabot nga kon mosukol siya niadtong higayona segurado gyud siya nga ibartolina kay i-charge man siya ug direct assualt. Matud ni Herera, kadto pang panahona sa tibook niyang kinabuhi nakakita ug daghang aninipot sa dihang nakatilaw siyag sontok ni Maclang. Gisi ang ubos nga bahin sa iyang mata sa nawong ug uban pang bun-og sa iyang kalawasan. Matud ni Herera bisan pa sa kagamay ni Maclang nga adtong panahona para kaniya, kaya niyang wakingon, apan wala gayud siya misukol kay misampot sa iyang panumdoman nga gawas nga duna kini posil, wala siyay dag-ananan kay ma-charge siya ug direct assault isip police officer nga mao unya ang makapa-priso kaniya. Nagduda si Herera nga ang gibuhat ni Maclang dunay kalambigitan sa iyang trabaho isip media preacti-tioner sa dihang duna siyay mga komentaryo sa radio batok sa wala maka-angaye nga binuhatan sa maong hepe. (The New Nandau, Vol. XVII No.13)

Lt. General Alexander Yano gipasidunggan sa
gihimo nga Testimonial Dinner sa ZNCC

Isip paghatag ug pasidu-ngog atubangan sa dakong kalamposan sa nakab-ot niyang posisyon, gipasidunggan sa mga kadagkoang opisyal isip anak sa Zamboanga del Norte si Lt. General Alexander Badong Yano, Commanding General, Philipine Army atol sa gipahi-gayong testimonial dinner didto sa Zamboanga del Norte Convention and Exhibition Center ning dakbayan sa Dipolog. Si Yano lumad taga lungsod sa Sindangan maoy anak sa Zamboanga del Norte ug maoy pinaka-unang Zanortean nga nakakuha ug pinakataas nga ranggo sa Philipine Army. Matud pa ni Governor Rolando Yebes, dakong dungog alang sa probinsya sa Zamboanga del Norte nga kaniadto nakaangkon lamang ug hinolaman nga heneral kay naka-asawa ug Dipolognon, apan karon, bugtong na gayud nga anak sa Zamboanga del Norte nga nakakuha ug three star ug gipanghinaot sa mosunod nga mga adlaw, madungagan pa ug laing usa pa ka star aron mapas-an na sa abaga ang four star, ni Lt. General Alexander Yano.

Mapasigarbohon gipaha-yag ni Governor Yebes nga pareho sila ni General Yano nga nagagikan sa tulungha-ang St. Vincents College sa panahon sa ilang high school days pagtungha dinhi sa Dipolog uban ni Vice Governor Francis Olvis ug uban pang mayores nga nahimong produkto sa maong tunghaan. Gikalipay sa gobernador ang pagtambong sa testi-monial dinner sa honoree’s family, mga opisyal ug higala gikan sa lungsod sa Sinda-ngan, magtutudlo gikan sa honoree’s alma mater sa Sinda-ngan ug Saint Vicent’s College uban na sa mga kaubang opisyal sa militar.

Gibutyag usab sa gober-nador ang dugang niyang kalipay sumala sa napatik sa Philipine Daily Inquirer gula niadtong Septembre 27, 2007 nga nagpamatuod sa himsog nga panudlanan sa probinsya. Gideklarar sa Commission on Audit ang probinsya adunay assets nga subra sa usa ka bilyon nga maoy nakapa-himong exclusive Top Ten Provinces Based on Curent Assets. Ang Zambo-anga del Norte maoy ika-duha nga Topnotcher sa probinsya sa Cebu atuba-ngan sa report sa COA nga ang atong lalawigan nalakip sa pinaka adunahan nga listahan sa Top Ten LGU’s nga adunay Cash in Bank nga mokabat ug subra sa otso syentos milyones ka pesos. Matud ni Governor Yebes, bisan paman sa daghanan niyang mga proyekto nga gipanghatag sa halos tanang barangay sa tibook probinsya ug paghimo ug multi-million state of the art nga Zambo-anga del Norte Medical Center apan nagapabiling adunahan ang probinsya ug sa kahimsog sa iyang panudlanan.

“Still on a happy note, may I refer to the Philipine Daily Inquirer, September 27, 2007 issue, which proves our sound financial management. In the Inquierer report, the Com-mission on Audit (COA) declared that our province has posted assets ammounting to One Billion Forty-Three Million Seven Hundred Forty Thousand Pesos (P1, 043.74 M). Thus, we are being inclu-ded in the exclusive Top Ten Provinces Based on Current Assets. We ranked second to the Topnotcher Province of Cebu. Similarly, the COA reported that our province has been included in the elite list of Top Ten LGUS with Cash in Bank, with cash ammounting to P833.58M.”   Sumala pa sa gobernador nga sa nangaging mga katuigan nasaksihan ang mga tunob nga gi-again ni General Yano gikan sa iyang panahon sa PMA ug sa sunodsunod nga promosyon ug awards nga nadawat hangtud nakab-ot niya ang kalamposan diha sa iyang panlimbasog.

Kahinumdoman nga niad-tung nakalabay nga Hunyo 5, 2005 atol sa 53rd Founding Anniversary Celebration sa probinsya sa Zamboanga del Norte, gihatagan ug pasidungog isip Plaque of Recognition si General Yano kinsa niadtong panahona mao pa ang Chief of Staff, Philipine Army. Tungod sa iyang top position sa armadong kusog sa pilipinas, nahimo siyang instrumento sa estabilidad alang sa kalinaw nga kahimtang sa nasud, hinungdan nga gihatagan siya ug honor sa probinsya ug sa iyang provincemates. “Adding another feather to Gen. Yano’s cap was his ap-pointment as the Commanding General of the Philipine Army.” Matud sa gobernador, garbo alang sa probinsya ang bag-ong promosyon ni General Yano tungod kay mao pa kini ang pinaka-unang anak sa Zamboanga del Norte nga nakakuha sa top positionsa Philipine Army nga pinaagi sa iyang nakab-ot nga excellence, dili kadudahan sa umalabot nga panahon, si General Yano mao na ang mosunod nga AFP Chief of Staff sa armadong kusog sa Pilipinas sa dili pa moretero sa iyang serbisyo.

“In my travel to other parts of our country and in the conferences and discussions with officials in the corridors of power, Gen. Yano’s profes-sionalism has been well recognized. Throughout his carrer, he has demonstrated his patriotic consciousness, as well as respect for people’s rigths in the performance of his duty. He has always insulated himself from politics.”  “In sum, he has proved himself to be a true Officer and a Gentleman,” kanayon pa si Governor Yebes. Mihatag usab sa ilang testimoniya sila si Atty. Rafael Cabanlit, Provincial Adminis-rator nga kaniadto nahimong maestro ni General Yano didto sa lungsod sa Sindangan ug Mayor Nonoy Siasico sa Siayan nga kaniadto maoy kababata sa heneral.  Si Retired General Muños nga ang asawa Dipolognon nagdahum nga aduna pay ikaduhang testimonial dinner nga pagahimoon diin nianang mga panahona si Lt. General Yano mao na ang AFP Chief of Staff. Sa nasayran nga si General Oscar Calderon nga mao karon ang kasamtangan nga Chief of Staff moretero na sa iyang katungdanan karong Pebrero sunod tuig.

Gipasalamatan ni Lt. General Alexander Yano ang host province nga gipangulohan ni Governor Rolando Yebes nga mihimo sa iyang testimonial dinner ug paghatag kaniya ug pasidungog. Mitambong sa maong kalihukan ang iyang inahan nga si Gloria uban sa duha niya ka mga igsuon ug sa ilang tagsatagsa ka mga pamilya, iyang magtutudlo ug class-mates sa elementarya ug high schools sa maong okasyon. Didto usab sila si Congressman Cesar Jalosjos sa 3rd Cong-ressional District, Congress-man Rosendo Labadlabad sa 2nd Congressional District, Mayor Evelyn Uy sa Dipo-log, board members ug mga mayores sa nagkalain-laing kalungsoran sa lalawigan. Si Lt. General Alexander Yano maoy ika 49 Comman-ding General, Philipine Army niadtung nakalabay nga Agusto 24, 2007 human ang iyang designation giperma-han ni Presidente Gloria Macapagal-Arroyo semana ang nakalabay sa wala pa ang pormal turn-over didto sa Fort Bonifacio. (The New Nandau, Vol. XVII No.13)

ZNUC mikondenar

Gikondenar sa mga active media practioners dinhi sa Dipolog ug Zamboanga del Norte ang gipakitang kalaksot sa kinaiya ni PSI Reynaldo Maclang diha sa iyang pagkolata ngadto kang kanhi konsehal Joseph Herera nga usa ka media practitioner. Usa ka sulat reklamo sa mga opisyal ug membro sa Zamboanga del Norte Uni-ted Correspondents ang gipadangat ngadto kang Presidente Gloria Macapa-gal-Arroyo, Generel Oscar Castelo Calderon, PNP Chief ug P/Ssupt. Mario Yanga, PNP Provincial Dir-ector mahitungod sa iyang gibuhat nga pagsuntok sa na-wong ni Herera didto mismo sa City Hall atubangan sa daghang mga kawani. Sa usa ka sulat/kondenar pinermahan sa tanang membro sa ZNUC, niadtong nakalabay’ng semana, Sptembre 17, 2007 dinhi sa dakbayan sa Dipolog mibisita si Presidente Gloria Macapagal-Arroyo. Milabay lamang ang walo ka adlaw, si Chief Maclang mipamatuod sa iyang kaugalingon isip hepe nga nahimong major problem dinhi sa dakbayan.

“Only last 17 September 2007, Dipolog City graciously played host to Her Excellency President Gloria Macapagal Arroyo. I a matter of eight (8) days, our PNP Chief has proved himself to be chief and major problem of Dipolog.” Sukad sa iyang assign-ment dinhi sa Dipolog isip hepe sa kapolisan, pipila lamang ka semana ang milabay, si Major Maclang nakahimo na ug dili makata-runganon ug makiangayon sukwahi sa legal nga pagpatuman sa balaod nga maoy nakapatandog sa malinawon nga pagpuyo sa mga katawhan. “Since his assignment in Diplog City, Chief of Police, a few weeks ago, Major Maclang has introduced measures adverse to legal norm, and disruptive to the peaceful way of life of our people.” Atubangan sa halawom nga pagbatikos nga iyang gihimo, Major Maclang wala maka-agwanta, nasuko sa mga jornalista kinsa mitaho sa pamantalaan ug radio batok sa iyang gibuhat sa mga katawhan.

Niadtung lunes si Herera nga dunay comentary prog-ram sa DXKD ang naatlan sa kasuko ni Maclang ang nakatilaw ug kulata. Aron ka-proteksiyonan ang iyang katungod, si Herera napugos nalang pagkuha ug serbisyo sa National Bureau of Investi-gation inay sa kapolisan pinaagi unta sa pagpa-blotter ‘for record pruposes’ kay gibale man sa hepe ang tinuod nga hitabo. Gikondenar sa mga membro sa ZNUC ang gibuhat ni Maclang. Isip PNP Chief of Police, si Major Maclang dili unta angayan mobuhat sa ingon. Matud pa nga gibuhat sa maong hepe maoy pagamit sa puwersa aron pahilomon ang mga membro sa media sa iyang hiwi nga binuhatan sa malinawon nga pagpuyo sa mga katawhan dinhi sa Dipolog. Tungod sa iyang gipakita nga kinaiya, si Major Maclang nakahatag ug dishonour ngadto sa PNP, nga unta mohimo kinig maayong binuhatan uban sa mga responsabling lumo-lopyo aron makab-ot ug magapabilin ang malinawon nga pagpuyo sa mga kataw-han uban na sa negosyante.

“We condemn Major Maclang’s act. As PNP Chief, Major Maclang should not be allowed, condoned or encouraged to use brute force, in his vain attempt to silence the members of the Fourth Estate from reporting his acts inimical to the good people of Dipolog City. By his use of brute force, Major Maclang has brought dishonor to the PNP, which is, after all, is supposed to be working with a responsive community towards the attainment of a safe place to live, work, invest and do business with.”  Major Maclang wala makahimo sa iyang mission sa PNP, ang pagpreserbar ug pagpanalipod sa katungod ug propoiedad sa mga katawhan. “Major Maclang has lost sight of the mission of the PNP: to serve and protect the people; to ensure public safety and security with the active support of the community.”

Imbes ipabilin ang intig-redad ug maayong relasyon sa kapolisan ngadto sa mga sibilyang katawhan, sa iya palang hamubo nga assign-ment dinhi sa Dipolog iya nang gi-tererorista ang mga katawhan, ug gi-personal ang iyang kasuko batok kang Herera. “Instead of upholding the tenets of the PNP to be civilian in character and to be community and service oriented agency, Major Maclang, in his so short stint in Dipolog City, has truly terrorized the people, as personified by his acts against Herrera. “Through this letter, we hold Major Maclang ac-countable and respectfully request of your good offices that he be permanently relieved as Dipolog City PNP Chief, and never again be allowed to set foot on the peacefull soil of Dipolog City,” nagkanayon ang sulat/condenar sa Zamboanga del Norte United Correspondents. (The New Nandau, Vol. XVII No.13)

Leadership by Example and Integrity –Gen. Yano

Dili malimtan ang kaubos nga sinugdanan sa kahimtang nga na-agian ni Lt. General Alexander Yano samtang didto pa siya nagtubo, nagdako ug nagtungha sa elementarya sa iyang kanhi pinuy-anan, ang lungsod sa Sindangan, Zamboanga del Norte nga maoy iyang yutang natawhan. Kini ang gipamahayag ni General Yano isip maoy iyang response sa mga mensahe ug testimoniya sa nagkalainlaing speaker atol sa testimonial dinner nga gipahigayon sa Zamboanga del Norte Convention Center. Matud ni Yano ang iyang assignments maoy nakapadala kaniya sa bisan asa nga dapit sa mga sook-sook nga lugar ug higpit lang kaayo ang iyang panahon nga makapauli sa iyang yutang natawhan, ang lungsod sa Sindangan.

Sumala pa ni Yano ang iyang nakab-ot nga pinakataas nga ang-ang sa posisyon isip “number one army soldier sa nasud” miagi ug risgo sa iyang kinabuhi ug hagit sa panahon dili sayon tungod sa daghanang pagsulay. “My journey to the top as the number 1 Army soldier of the land has been characterized by many risks, challenges and occasional twists and turns along the way. The path has not been rosy and smooth all the way. Obstacles seemed insurmountable, and challenges daunting.” Isip usa ka PROMDI, kon gikan sa bisiya nga probinsya maoy samot nga nakapadasig kaniya sa maong hagit. Matud niya, kon daghan pa siyang kaila sa taas ug daghang politiko nga mi-back-up kaniya, hayan dili niya makuha ang nakab-ot niyang posisyon karon kay magsalig raman siya sa masayon nga pamaagi. Maong mapasigarbohon niyang gipahayag nga usa ka blessing ang nakab-ot niyang posisyon karon nga walay mitabang kaniya gikan sa mga dagkong politiko o kaha sa military aron mogiya kaniya.

“Being a ‘Promdi’ with no prominent lifelines to turn to was both a blessing and an added challenge. Gipahayag ni Yano nga ang nakuha niyang ranggo karon miagi ug tumang kalisod atubangan sa iyang mga assignments sa nagkadiin-diin nga lugar nga maoy gi-isip niyang pohunan nga sa hinay-hinay nakab-ot niya ang taas nga posisyon. “This handicap forced me to accept difficult and farflung assignments-looked at each duty as an investment and stepping stone to higher posistions.” Matud ni Yano sa iyang pagdumala gikan sa nagkalainlain assignments, patas ang iyang pagtratar gikan sa taas ug pinaka-ubos nga ranggo sa mga sundalo.

“Along the way, I looked at my dealings with superiors, peers and subordinates with equal importance. “Sa pagtingin ko sa lahat ng tao ay wala akong tinititigan. Lahat sila ay pantay-pantay.”

“Humility was always a virtue I practiced…rank is only worn on my shoulders, never reaching the head, “kini maoy iyang pagpahinumdom sa ubang opisyal nga anaa na karon naghupot ug taas nga posisyon. Kay alang kaniya, kini usa lamang ka temporaryo nga higayon ug dili permaninti kay inig ka-retero sa katungdanan mobalik man sila sa pagka sibilyan. “Ranks are temporary adornments. I give more importance to the duties and responsibilities rather than the power, perks, benefits and priviliges that go with it.” Dugang pa ni Yano ang prinsipyo, intigredad ug pamatasan maoy importanting butang nga iyang gibatonan isip usa ka lider. Para kaniya, dunay mga importanting desisyon ilabi na kon ang mabangga mga tag-as nga opisyal apan dili kini maoy makapatarog sa iyang desisyon. Matud niya ang iyang pagdumala isip ehemplo nga lider maoy nakapadugay kaniya sa serbisyo hangtud nakab-ot ang pinakataas nga posisyon.

“Leadership by example is a time-tested principle I have religiously embraced in my long career…I do what I preach. I walk miles with my men and share the risks, hardship and sacrifices with them.” Leadership by example transcends the physical and material realm and moves higher to the moral and ethical planes where leaders serve as example.” Gipahayag usab ni Yano nga preparado na siyang daan sa wala pa niya gidawat ang posisyon nga gitagana alang kaniya. Matud niya ang opurtunidad usa lang ka factor, “but you must be prepared when that opportunity knocks…Timing is also very important.” “After all these, you establish a service reputation within the organization – This is true even in civilian service. They saye your reputation precedes you – sum total of how you are known or regarded within the organization. It can either be negative or positive reputation.”

“Carrer long reputation – investment in service and sacrifices that spanned over 3 decades…it can’t be done overnight…it’s more of marathon than a century dash in athletics.” “Culture of excellence and meritocracy worked in my case…The system proved to be fair and just if you are willing to invest in terms of excellent, dedicated, professional and competent service.” Gipahayag sa heneral nga ang iyang pagka probinsyano maoy nagtukmod kaniya sa kalamposan nga maoy iyang nakab-ot karon. “But still, I look back and trace my humble beginnings in this province (Zamboanga del Norte) where I was initially reared to the greater challenges in a much bigger world.”

Gilauman ni Gen. Yano nga ang kalisod nga iyang na-again maoy mamahimong inspirasyon sa mga kabatan-onan karon. “It is my hope that this difficult but fulfilling journey of a simple boy will serve as a source of strength and inspiration to the many among our youth in remote towns and barangays. That there is always hope when we give our best, focus our energies and work seroiusly to attain our dreams and plans in life.” Gipasalamatan ug dako ni General Yano ang mga kadagkoang opisyal sa probinsya sa Zamboanga del Norte nga mihatag kaniya ug pasidungog uban sa iyang pamilya ug sa kinatibuk-ang institusyon sa kasundalohan sa nasud diin siya nagrepresentar.

“Again my deepest gratitude and that of my family for this distinct recognition and honor you have bestowed on me. Certainly, the honor equally goes to the institution and the 80,000 strong Army soldiers whom I represent,” panapos nga pamahayag ni Lt. Gen. Alexander Yano, Commanding General, Philipine Army. Sa maong programa, si Gen. Yano gihatagan ug special plaque of recoginition gikan ni Governor Rolando Yebes, Vice Governor Francis Olvis ug sa resolusyon nga gipatik sa plaque gikan sa Sanguniang Panlalawigan. (The New Nandau, Vol. XVII No.13)

Concha: “Miscommunication lang”
DMC Medical Mission sa Taga wala sakye ni Rep. Labadlabad

Gipanghimakak sa kampo ni Congressman Rosendo “Dodoy” Labadlabad ang taho nga gisakyan ang pribadong kalihukan sa Dipolog Medical Center kalabot sa gipahigayon niining Medical Outreach Mission didto sa may San Antonio, Taga, sakop sa lungsod sa Katipunan, Zamboanga del Norte niadtung miaging semana. Kini ang pagpaklaro sa kampo sa kongresista atubangan sa maot nga impression migawas sa kahanginan uban sa dili maong komentaryo sa radio nga gidaot pa ang mga doktor nga didto sa maong kalihukan. Sa sayo pa gipahayag ni Atty. Flint Concha, ang maong kalihukan iya sa mga estudyante sa Dipolog Medical Center apan nabo-labog tungod kay ang mga doctor nga mga estudyante ug nursing wala makaangay sa pagbutang ug dakong streamer ni Congressman Labadlabad hinungdan sa ilang pag-walk-out.

Kasagaran sa mga doctor nga didto sa maong medical outreach anaa nagtrabaho sa Zamboanga del Norte Integrated Provincial Hospital. Matud pa ni Dra. Carmencita Icao, Provincial Health Officer, walay koor-dinasyon sa iyang buhatan ang maong kalihukan ug wala usab siya mihatag ug authority sa mga doctor nga moadto sa maong kalihukan. Sumala pa ni Dra. Icao, ulahi na siyang nasayod nga aduna diay gipahigayon nga medical outreach mission nga giapilan sa mga doctor sa hospital human kini masibya sa radio. Matud niya, ang regular procedure, bisan kinsang hingtungdan nga mohangyo sa ilang serbisyo, kini mopadala ug sulat sa gobernador ug mo-refer sa iyang buhatan alang sa maong kalihokan ug dili sila mobalibad si bisan kinsa. Gipaklaro ni Dra. Icao nga mas malipay sila nga dunay mga tawo o politiko nga motabang kanila sa maong kalihukan kay kini para man sa mga katawhan nga nagkinahanglan sa ilang pagserbisyo.

Gidepensaan ni Atty. Flint Concha sa ngalan sa Dipolog Medical Center ang maot nga komentaryo sa DXAA nga naghingalan sa mga doctor nga mga “tambalos-los” tungod sa pag-walk-out niini sa maong kalihukan. Matud ni Atty. Concha, ang maong kalihukan didto sa San Antonio Kattipunan ilang gipahigayon tungod kay ang maong barangay adopted barangay sa DMC. Iyang gipaklaro nga ang maong medical outreach mission usa ka pribadong kalihukan nga gihimo sa mga estudyanteng nursing sa maong tunghaan. Matud ni Concha, nahi-tabo nga nag-walk-out ang mga doctor tungod kay miabot ang usa ka sakyanan iya kang Congressman Labadlabad dala ang mga tambal, nagbutang ug streamer, nagkodak-kodak nga maoy gikalainan sa mga doctor. Sa iyang kabahin, gipanghimakak sa kampo ni Congressman Labadlabad nga walay koordinasyon sa iyang buhatan ang maong kalihukan.

Gipaklaro sa kampo sa kongresista nga wala niya sakye ang medical outreach mission sa Dipolog Medical Center tungod kay ang mga magtutudlo mismo maoy mihangyo alang sa medisina. Si Labadlabad misugot tungod kay ang medical mission adto ipahigayon sa San Antonio nga silingan sa iyang bodega. Ang iyang medical team miabot mga alas nuybe sa buntag dala ang polo ka mga boxes sa tambal. Gihimakak usab nila nga daghang streamers ang ilang gibutang tungod kay usa lamang niini ang gibitay didto sa sook nga bahin sa lugar nga gipahiga-yonan sa maong mission. Matud pa nga ang maong kalihukan gikan sa sinug-danan hapsay, nabolabog lamang sa dihang ulahing naabot si Dra. Cherry Mata nga maoy nakaagni sa iyang mga kaubang doktor nga mo-walk-out sa maong kalihukan. Gipahayag ni Atty. Concha nga ulahi na siyang nasayud nga may mga magtutudlo sa DMC nga nag-solicit kang Congress-man Labadlabad para sa maong medical mission. “Miscommunication lang ang nahitabo.” Gikatahong nagkasabot sila si Concha sa ngalan sa DMC ug Congressman Labadlabad nga mohimo ug laing medical mission sa umalabot nga mga adlaw. (The New Nandau, Vol. XVII No.13)

No parking sa Jolibee apan double parking sa Top Plaza

Mipabati karon ug pagsaway ang gagmay’ng negosyante dinhi sa dakba-yan sa Dipolog atubangan sa dili makiangayon ug estriktong  pagpatuman sa balaod sa trapiko kay ang naka-benipisyo sa maong balaod mao ra ang pamilya sa dakong opisyal sa Dipolog nga may dagko usab nga negosyo sa pagkaon ug hotel.  Sayo sa miaging semana human gidakop si magpapatigayon Akao Lim sa kalapasan sa balaod sa trapiko, gibutangan dayon ug No Parking sign ang kilid sa Jolibee sa may Rizal Avenue.

Ang mga gagmay’ng magpapatigayon sulod sa merkado publiko ang mipabate sa ilang pagsaway sa higpit nga pagpatuman sa Traffic ordinance nga dili maki-angayon alang kanila gumikan kay samtang ang palibot sa Dipolog Central Market sa Rizal Avenue, Quezon Avenue ug Bonifacio St. dagko ug luag nga dalan apan wala gitugot nga may makaparking sakyanan. Apan ang gamay nga dalan sa Top Plaza Hotel gibutangan ug one lane parking area. Matud pa sa naka-obserbar nga dunay daghang higayon ilabi na ug dunay mga kalihukan sa Top Plaza ginapraktis ang double parking sa mga sakyanan apan wala badlonga sa kapolisan.  Ilang gipahayag nga ang traffic ordinance sa Dipolog usa lamang ang dunay interest ug nakabenipisyo.

Ang Rizal Avenue nga halapad kaayo ang dalan diin anaa nahimutang ang CL nga gipanag-iyahan sa pamilya ni kanhi Vice Mayor Edilburgo Cheng ug Jolibee nga gipanag-iyahan ni Mr. Akao Lim siging dakop kay dili paparkingan ug sakyanan. “Kini tungod kay pareho silang kontra partido sa nakalabay’ng eleksiyon sa mayor sa Dipolog?,” pangutana pa nila. Mga magpapatigayon dinhi sa Dipolog mireklamo na sa maong estriktong pagpatuman sa balaod sa trapiko kay sila maoy naapektahan samtang ang Top Plaza nga gamay ang dalan nag-two lane parking pa ang wala badlonga sa kapolisan. (The New Nandau, Vol. XVII No.13)

Para mouswag ang kahimtang sa panginabuhi sa mga katawhan
Barangay Pange, tabangan ni Governor Yebes

Ang barangay Pange sakop sa lungsod sa Siayan, Zamboanga del Norte ang tabangan sa probinsya para mo-uswag ang kahimtang sa panginabuhi sa mga residente sa maong dapit. Kini ang gipamahayag ni Governor Rolando Yebes samtang didto niya gisaulog ang iyang adlaw’ng nataw-han niadtung Biyernes.

Ang Barangay Pange, kinatumyang barangay sa lungsod sa Siayan giila sa NSCB nga pinaka pobre nga barangay sa tibook pilipinas.  Matud ni Governor Yebes, iya nang gipagam-an ug dalan ang maong barangay ug gani bisan ug lisod kaayo ang maong dapit tungod sa kabungtod apan may dalan na ug kini iya pa gyud nga ayohon aron masayon na unya ang paghatud sa mga produkto sa uma ngadto sa merkado.

Matud ni Governor Yebes, iyang nakita sa maong barangay nga lisod kaayo ang kahimtang sa mga katawhan busa nagtinguha siya nga iyang butangan ug livelihood program ang maong barangay. (The New Nandau, Vol. XVII No.13)

Sawa nakaplagan sa Brgy. Sta. Filomena

Usa ka dakung sawa ang nakaplagan didto sa usa ka panimalay sa may National Highway sa Barangay Sta. Filomena dakbayan sa Dipolog, karong bag-uhay pa lang. Ang maong panimalay gipanag-iyahan kini sa usa ka Roland Ebillo, hingkod ang panuigon, ulitawo, usa ka Clinical Instructor sa Nursing Department ug kinsa usab usa ka Army Reserve sa Tactical NCO sa Dipolog Medical Center College Foundation, Inc. ingon man usa sa mga sakop sa 902nd Zamboanga del Norte Community Defense Center, 9th  Regional CDC Arescom sa Camp Domingo Sagario, Punta Blanca sa lungsod sa Manunkan.

Sa pagpakighinabi ning inyong tigsulat ngadto ni Ebillo, iyang giasoy nga sa dihang anaa siya sa may kusinang bahin sa ilang panimalay nahikurat na lamang siya sa iyang nakita nga usa ka dakung sawa diin kini nahuot sa usa ka sandayong. Ug gumikan sa iyang nakita mikuha gilayon kinig pistola nga 9 mm ug iyang gipusil sa makausa ka higayon.  Napatay gayud ang maong sawa ug naigo kini sa may sentro sa agtang.  Iyang gipusil ang maong sawa sa tumong nga makapaak na unya kinig tawo.

Gikahibaluan nga ang maong sawa adunay gitas-ong 14 ka tiil ug 7 ka pulgadas (14 feet and 7 inches).  Ug ang iyang gilapdon sa hawak niini adunay 35 centimeters (equivalent to 13 inches).  Ug kon sa klase kini sa halas usa kini ka python. Dugang asoy ni Ebillo, nga makatulo na higayon nga aduna siya’y makita nga sawa didto sa kusina sa ilang panimalay ug kasagaran niini ang mga sawa nga iyang makit-an mopaingon kini sa usa ka paril sa may bodegang bahin sa 2GO sa National Highway sa Barangay Sta. Filomena dakbayan sa Dipolog. Nasayran usab nga ang maong dakung sawa, ang kini gikarne kon kaonon sa iyang mga silingan. (Pedmark, Mindanao Star, Vol.III No.35)

Mindanao Star Police Round-up

8 anyos batang lalaki nakaplagang patay

Usa ka patay’ng lawas sa 8 anyos nga batang lalaki ang nakaplagan kini didto sa may Barangay Carang dakbayan sa Dapitan, karong bag-uhay pa lang. Ang maong patay’ng lawas giila kini sa kapolisan sa pangalang Rosalio Cayongcong, 8 anyos ug nagpuyo sa naasoy’n dapit. Sa initial nga imbestigasyon nga gihimo sa Dapitan PNP uban usab ni Dr. Rolito Cataluña, ang City Health Officer sa dakbayan matud pa ang biktima nakaplagan na kini nga patay na ug adunay samad dinunggaban sa iyang tuong dughan ug aduna usa’y mga bun-og sa iyang agtang nga mao usa’y gituhoan sa iyang hinanaling kamatayon. 

Ila usab nga gituhoan nga duha o tulo na kaadlaw nga wala na’y kinabuhi ang maong biktima ayha na kini nila nakit-an. Diha sa crime scene narekober usab sa kapolisan ang usa ka hunting knife nga aduna pa’y nagpabiling dugo niini nga ilang gituhoang nga maoy gigamit sa wa mailhing suspetsado sa pagdunggab – patay ngadto sa biktima.

Hinuon, ang mga elemento sa kapolisan sa dakbayan sa Dapitan ang padayon pa kining mihimo sa dugang pang imbestigasyon sa naasoy’ng insidenti alang na sa pagtino sa motibo niini ug ingon man aron usab sa posibling pag-ila ug pag-aresto sa suspetsado. (Pedmark, Mindanao Star, Vol.III No.35)

ZaNorte nangharos sa Reg’l Pop Quiz 2007

Nangharos karon ang mga tinun-an sa Zamboanga del Norte sa gipahigayong Regional Pop Quiz 2007 didto sa Molave Vocational Technical School, Molave, Zamboanga del Sur. Nasayran gikan kang Mrs. Grace Marylen Sabal, ang OIC sa Provincial Population Office ug sa Provincial Social Welfare and Development Office nga ang nahimong champion mao si Charmagne Francisco uban sa iyang coach nga si Mr. Joselito Tizon sa Punta National High School ning dakbayan sa Dipolog. Ang ikaduhang dapit nakuha ni Chet Datano, uban sa iyang coach nga si Eudila Hechanova sa Bacong National High School sa lungsod sa Salug.

Samtang ang ikatulo nga dapit naangkon ni Dee Ann Ozaraga uban usab sa coach niini nga si Charlen Tomogsok sa Dapitan City National High School. Dugang pa ni Mrs. Sabal nga ang mga tinun-an sa Zamboanga del Norte kanunay kining nangharos sa maong kalihukan sulod na sa tulo ka tuig. Kahibaloan nga niadtong 2002 ngadto na sa 2004, ang tinun-an sa Sergio Osmeña National High School mao usay nahimong champion sa regional pop quiz. Samtang niadtong tuig 2003, si January Faith Santiago nga nag-representar sa rehiyon 9 nga gikan sa dinhi sa probinsya maoy nahimong National Champion atul sa maong kalihukan uban sa iyang coach nga si Tizon.

Ingon man, niadtong tuig 2005 hangtud niining tuiga ang tinun-an gikan sa Bacong National High School maoy kanunay modaug sa Provincial Pop Quiz uban ni Eudila Hechanova. Ang regional pop quiz sa lungsod sa Molave gitambungan nila ni Mrs. Sabal, Mrs. Elsa Oyanib, ang Population Program Focal Person, Lucille Adasa sa Dapitan City Population Management Office ug Mr. Leonilo Dalmacio sa Dipolog Population Office. (Sheng, Mindanao Star, Vol.III No.35)