August 11, 2005

 Pito NAKADONAR TAG usa ka gallon dugo sa ZN Red Cross Blood Bank

“Nadasig ako sa pagdonar ug dugo susama sa gihimo ni kanhi Presidente Fidel Ramos nga sa matag adlaw niyang natawhan, modonar siya ug dugo ngadto sa Red Cross.” Mao kini ang gipamahayag ni kanhi Vice Mayor Bebs Cheng atul sa pagtak-op sa National Blood Donor’s Month niadtong Hulyo 30 sa Memorabilia Hall, ZN Convention and Exhibition Center ning dakbayan sa Dipolog.

Dugang pa ni Cheng, kinsa usa sa pito nga nahimong galloners niadtong adlawa ug mao usay mamumulong sa maong kalihokan, nga sa matag donar ug dugo, tulo ka butang ang mahitabo: makatabang sa katawhan, mahulipan ang karaang dugo ug ang pagtuman sa sugo sa Ginoo nga angayan manghatag aron  ikaw pagahatagan, diin mao ang kahimsog sa panglawas. Ingon man, si kanhi Vice Governor Cording Adriatico sa iyang pagbukas sa maong programa, kinsa maoy kasamtangang Vice-Chairman sa Philippine National Red Cross (PNRC) Zamboanga del Norte Chapter ang misaysay sa kamahinungdanon sa dugo ilabi na sa panahon sa emerhensiya.

Niini, iyang gidasig ang mga katawhan sa pagdonar kanunay ug dugo ngadto sa buhatan sa Red Cross. Sa maong kalihokan, si PNRC Administrator Parolito Tolin mipaila sa pito ka galloners niadtong adlawa nga sila si Mayor Arthur Tenorio sa lungsod sa Mutia, Edgardo Dalman, Severo Samarinta Jr., Michael Buhian, Rey Villacrucis, Henrieto Salaveria ug Cheng kinsa nakadawat ug galloners’ pins, certificates ug t-shirts nga gitunol ni Adriatico, Board of Directors Benjamin Diaz ug Emma Tapales.

Si Tolin ang nagkanayon nga ang pito ka mga bag-ong galloners lakip na sa 32 ka mga galloners dinhi sa Zamboanga del Norte. Gisunod gilayon ang pagpanumpa sa mga opisyales sa ZN Blood Galloners Club nga gipangulohan ni Macherie Gako atubangan ni Vice-Chairman Adriatico. Si Gako, sa iyang pagtak-op sa maong programa, siya nagpasalamat sa tanan nga misuporta sa maong kalihokan ilabi na ang mga blood donors.

Nasayran nga ang pagtak-op sa Blood Donor’s Month sa Red Cross inabagan usab kini sa Mutia “Siren” Jaycees, Dipolog “Blue Marlin Jaycees, ZN PNP Provincial Command ug Jose Rizal Memorial State College Dipolog Campus. (Dipolog CIO Press Release, sheng)

Kasundalohan mipagula ug pamahayag

Sa sulod sa nakalabay nga duha ka tuig, ang atong armadong kusog sa Pilipinas hilum nga mibuhat sa pagbag-o nga mahimong instrumento ug epektibo alang sa kahusay ug kalinaw, aron magpadayon ang kalamboan. Kining tanan nahimong walay bili kun ang atong organisasyon maapil sa mga butang nga alang lamang sa pangpolitika.

Ang problemang politikanhon nga karon atong nasinati angayan lamang nga maresulba pinasikad sa atong batakang balaod ug pinaagi sa malinawong solusyon. Ang armadong kusog dili moapil sa bisan unsang kalihokan nga supak sa atong konstitusyon. Ang atong armadong kusog usa ka malig-on nga pundok sa atong nasod. Kun kini maghiusa ug dili mapahiran ug politika, kini makahatag ug dugang kusog sa mga institusyon.

Busa, kami nag-awhag sa tanang sector sa atong katilingban nga hunongon na ang paghulhog sa mga sundalo para mosalmot o moapil-apil sa butang pangpolitika. Hinoon, maghiusa kitang tanan sa paglihok para ug alang sa kahusay, kaayuhan ug kalamboan sa atong nasud. Gusto nakong ipaabot kaninyong tanan nga ang armadong kusog nagpabilin nga matinud-anon ug nagtuman sa atong konstitusyon. Dili nako tugotan ang si bisan kinsa nga sakop sa military nga mosupak sa maong balaod. (Dipolog Chronicle, Vol.V No.6)

Mejorada mokiha BATOK RECALL Petitioners

“Kanang mofile diay ka’g sumbong mosulti pa diay ka sa huwes; ‘Your Honor mopasaka ra unya ko’g sumbong nimo ha?” Mao kini ang reaction ni Board Member Uldarico ‘Ric’ Mejorada sa gipagarpar ni Alan Marapao, mga kauban niining mga petitioners ug sa mediatong may labut na sa Recall Petition nga ilang gipadagan batok ni Gov. Rolando E. Yebes ug ni bokal Mejorada.

Nasayran gisalikway sa mga tigpagarpar sa kampo ni Amatong nga dili pa formal Recall Petition ang ilang giduso didto sa Provincial Comelec penetsahan Hulyo 1, 2005 kun dili usa lamang kini ka Notice pagpahibalo nga gisugdan na sa ilang gropo ang pagpangalap sa mga pirma alang sa maong lakang.

Apan ang mao nilang dokumento ang gi-actionan kini ni Provincial Election Supervisor Atty. Borromeo Patangan kinsa ang naulahi mibasura niini tungod sa kakuwangon sa unod ug porma sukwahi sa lagda og balaod may labut ang recall. Apan ang maong argumento sa mga mediatong kusganon usab nga gisalikway ni Mejorada dungan ang pagpaklaro depensa na lamang ang ilang gihimo aron matabunan ang ilang kapalpakan sa pagduso sa maong recall petition.

Pangutana pa sa bokal, “kung dili pa to formal recall petition ilang giduso, nganong mibayad man sila ug 2 mil pesos pagfile niini sa Provincial Comelec?” Sa samang bahin, gipaklaro usab sa bokal nga gitun-an na niya karon ang pagpasaka ug kaso batok sa mga petitioners kang kansang mga pangalan makita sa ilang gidusong kopya sa petition.

Matud niya subay sa balaod sa recall, bugtong basihanan niini mao lamang ang Loss of Confidence, apan sa gidusong petition gidugangan pa kini sa pag-akusar kaniya ug ni Gov. Yebes sa pagpangurakot, pagwaldas sa kuwarta sa probinsiya. “I am not an accountable official. I don’t handle any government funds, no money will pass into my hands just like any other board members. So how can I commit corruption? Binuang man na! So I have to go to court to protect my honor.” Pamahayag pa ni Mejorada.

Dugang pa niya, “Although I submit that we have freedom of expression. But the moment you abuse that freedom/right that becomes your liability. Because there is always a limit to that right.” Sumala pa sa bokal, kadtong tanang namirma sa maong petition maoy target niyang itaral sa hukmana. Apan kun ugaling monegar kini sa ilang partisipasyon sa maong lakang, damay apil na kadtong nagbuhat sa maong Recall Petition. (Mindanao Star, Vol. I No.34)

Recall batok Yebes ug Mejorada dakung idoy

Aron lang mokubit ang katawhan sa gipadagan nga petition pagparecall ni Gov. Rolando Yebes ug bokal Uldarico Mejorada, migamit karon sa hugaw nga taktika, pangilad ang kampo sa mga pildidong politiko gamit ang mga Amatong midnight appointees ug mga mediatongs. Didto sa Katipunan, gibutyag ni ABC President Crisostomo ‘Cris” Eguia Jr., nabulabog ang mga barangay sa ilang lungsod tapos paspas nga gipadagan ang pagpapirma sa maong petition apan dakung binuang ang gihimong rason sa pagpapirma niiini sa katawhan.

Matud niya, inay ang pagpapirma ibase sa unsay katuyu-an niini, apan ang mga nagpapirma miagni sa katawhan nga mopirma tungod kay kuno may eleksiyong mahitabu karong buwan sa Oktubre ug mipasalig pa nga kada botante makadawat ug tagsa ka libo ka pesos. Kini ilang napamatud-an tapos nagtigum ang Association of Barangay Councils niadtong miaging semana ug suma pa duruha na ka barangay kapitan ang misulti kabahin sa maong binuang.

Si Kapitan Rolly Oksing sa barangay Luyuran mipahayag nabalaka na kaayo ang iyang mga katawhan tungod kay ang uban kanila nakapirma na sa maong petition kay na-ilad tungod sa mga pasalig sa mga nagpapirma niini. Sa maong barangay, gawas sa pasalig kuno nga hatagan ug tagsa ka libo ang mopirma, gitumo-tumoan pa ug kampanya nga kuno ang mga proyekto ni Gov. Yebes karon atoa ra kanunay idapat sa mga lagyong barngay busa kinahanglang mopirma ang katawhan aron moabot usab sa ilang barangay ang pagpa-espalto sa ilang kalsada sumpay sa barangay Sinuyak.

Kompirmado pa ni Eguia ang mga nagpadagan sa maong petition mga sakop ni ex-Gob. Isagani Amatong. Duha ka porma sa petition ang gipadagan, usa batok kang Gob. Yebes ug usa batok kang bokal Mejorada. Ngani si Kapitan Teoping Acevedo sa Barangay Daang Lungsod miklaro usab nga dakung idoy gayud ang gihimo sa mga petitioners ug sa nagdala niini tungod kay gawas pasaligang hatagan sa tagsa ka libo ang mopirma, dili gani ipakita ang heading sa dokumento, tabunan ug deritsong iplastar ang blankong pirmahanan.

Sa kabahin ni ABC Pres. Eguia giklaro niini nga kung gitarong pa unta pagpasabot sa mga nagpadagan sa petition kung unsay katuyu-an sa nilang pagpangalap ug pirma sa kabarangayan, nakaseguro kini nga walay bisan usa nga mopirma ug mokubit niini.

 “Klarong binu-ang ilang gihimo, ilang giilad, gi-idoy ang katawhan aron lang ipatuo nga mas daghan ang misuporta sa ilang gipadagan nga Recall Petition.” Sumpay pa ni Eguia. Gibutyag usab niya nga mirebenta na ang mga kapitan sa maong kalaki sa mga pildidong politiko ug sa ilang mga sakop, klarong despiradong lakang ang gihimo hinungdan nga nasabutan sa ilang konseho kung aduna pay ipadagan ug ipalusot nga mga Recall Petition sa ilang tagsa-tagsa ka barangay ila guilayon kining itaho sa buhatan sa Mayor aron ma-aksiyonan. (Mindanao Star, Vol. I No.34)
 

Kapitan sa Sibuco gipusil patay

Usa ka barangay kapitan ang gipusil patay didto sa Barangay Tangarak, lungsod sa Sibuco, ning lalawigan ug samaran usab ang iyang anak. Ang barangay kapitan giila sa ngalan nga usa ka Magdalena Jueto, minyo ug molopyo sa maong dapit. Samtang ang iyang anak giila sa ngalan nga Fe, kinsa gidala sa dakbayan sa Zamboanga ug anaa karon sa malisod nga kahimtang.

Sa pasiunang imbestigasyon nga gihimo sa Sibuco PNP nasayran nga kalit lamang gipa-ulanan ug bala ang mga biktima sa ilang panimalay ngamiresulta sa kamatayon sa barangay ikapitan ug pagkasamad sa iyang anak ug laing usa ka Edito Dura. Sumala pa sa ubang kauban sa biktima sa maong balay kinsa nakahimo sa pag-ikyas, nga ang duha sa mga suspetsado nailhan sa mga ngalan nga sila si Julito Limosnero ug Tony Langkoyan, pulos hingkud ang panuigon ug parehong nanimuy sa maong dapit, kinsa misibat padung ngadto sa kalasangang dapit sa moang barangay.

Sa pagkakaron, ang hiniusang elemento sa Sibuco PNP nga gipanguluhan sa  ilang hepe nga si Police Senior Inspector Reynaldo Tatil ug elemento sa 44th IB sa Philippine Army ang padayon pang mipahigayon ug hot pursuit operations batok sa mga suspetsado ug sa pagtino sa motibo sa maong insidente. (Mindanao Star, Vol. I No.34)

Agosto 15 balhin na tanang priso gikan sa Provincial Jail

Sa tunga-tungang bahin ning buwan sa Agosto hayan hingpit na ang pagbalhin sa tanang mga binilanggo gikan sa kasamtangang Zamboanga del Norte Correctional and Rehabilitation Center kun Provincial Jail sa Barangay Sicayab ning dakbayan sa Dipolog. Mao kini ang gibutyag ni Provincial Warden Fortunato Regañon, Jr. ngadto kang Governor Rolando Yebes atol nga mihimo sa iyang occular inspection ang gobernador kauban ni Provincial Attorney Jess Gal Sarmiento didto sa yuta sa probinsiya sa Don Jose Aguirre, Manukan niadtong miaging adlaw.

Matud pa ni Warden Regañon, sa pagkakaron  86 na lamang  ka mga binilanggo ang nahibilin sa Provincial Jail sa Sicayab tapos ang  unang gibalhin didto sa Misok,. Sindangan ang unang hugna sa maong transfer sa mga binilanggo. Didto sa Misok, Sindangan pasi-unang gibalhin ang dili mominus 190 ka mga priso.

Nasayran ang Misok, Sindangan ug Don Jose, Aguirre Manukan maoy napiling dapit sa kagamhanan nga maoy balhinan sa mga priso sa Provincial Jail tapos nadesisyunan ni Gob. Yebes ang maong dapit maoy tukoran sa Modernong Provincial Hospital. Gipasalig ni Warden Reganon karong petsa 15 hingpit na ang maong transfer sanglit naka-andam na ang tanan alang sa maong katuyu-an.

Ang maong 86 ka nahibiling priso adto kini ipahimutang sa Don Jose Aguirre diin sa inspection halus siento por siento na nga andam ang mga selda nga gikinananglan. Hinuon gipaklaro ni Waden Regañon ngadto sa gobernador ang gitrabahong selda karon sa maong dapit kaniadto bunk house pa temporaryo pa lamang. Ang orihinal nga prison cell subay sa plano atoa sa ibabaw nga bahin sa maong yuta.

Sa samang bahin gipaklaro sa provincial warden, ang mga priso nga ipahimutang sa Don Jose Aguirre makapahimus kini sa mga livelihood programs nga ipatuman sa ilang buhatan inagagan sa kagamhanang probinsiyal. Subay sa plano, matud ni Reganon sa maong dapit ipahimutang ang hollow blocks making, furniture making ingon man tugutan ang mga priso nga makapananom kansang abot unya ilang mapahimudsan selbing ilang kita sa ilang pagtrabaho.

Dugang gibutyag sa provincial warden ngadto sa gobernador, sulbad na ang problema sa tubig didto sa biblanggoan sa Misok, Sindangan tapos na-ayom na ang generator nga maoy mobomba sa tubig nga gikinahanglan sa mga binilanggo. Iya na usab nga nahangyo ang Zaneco nga unta madugangan ang load capacity sa kuryente sa maong dapit tapos nakasinati kini sa ubos nga boltahe hinungdan nga usahay madiskaril ang pagpasiga sa mga suga ug pagpa-andar sa generator. (Zamboanga del Norte Provincial Information Center)

Credits: The Zamboanga del Norte Provincial Information Center is housed together with the National Broadcasting Network at the ZN Exhibition and Convention Center in Barangay Estaka, Dipolog City with Tel. No. (065) 212-7472

P3.5 M Balor sa mga proyektong gisubhan ni Gov. Yebes didto sa Sindangan, Roxas ug Jose Dalman

Dul-an sa 1.5 milyones ka pesos nga balor sa mga proyekto ang sunod-sunod nga giturn-over niadtong Martes Agosto 2, 2005 sa pagpangulo ni Governor Rolando Yebes didto sa lungsod sa Sindangan. Unang gisubhan sa gobernador mao ang bag-ong Barangay Hall didto sa Barangay Dicoyong sa kantidad 150 mil ka pesos.

Sa nasayran, ang unang barangay hall sa barangaya Dicoyong kauban sa ilang health center ang naka-angkon kini sa hingpit nga kadaut tapos naigu sa usa ka landslide niadtong Agusto 11, 2001. Dihang nagdulong ang election sa 2004, ang konseho sa barangay sa pagpangulo ni kapitan Orlando Dumahel mihangyo ang kini sa kanhi administrasyon sa panabang aron mapabarug ang bag-o nilang barangay hall.

Tuod man pasi-unang gihatud ang mga meteryales para niini apan dihang napilde si Amatong si Gob Yebes sa election, napalong ang ilang paglaum nga matrabaho ang maong proyekto. Aminado ang mga opisyal sa barangay sa nakalabayng election, didto sila misuporta sa naparot nga gobernador, demudo wala na maglaum pa nga sa bag-ong administrasyon ni Gob Yebes matibawas ang pagtrabaho sa ilang proyekto.

Si konsehal Quillano Barazon mibutyag atubangan sa mga misaksi sa maong turn over ceremony, wala sila magdahum nga bisan sa upat ka buwan pa lamang paglingkod sa Yebes administration malihuk ba diay ang maong proyekto. Sa gihimong paborabling pagtagad sa kasamtangang l.iderato sa probinsiya ngado sa ilang problema taliwala sa kamatuoran nga didto sila milaban sa nakalabayng pamunoan, gi-angkon niini nga nasayup sila sa ilang pagtuo ngadto sa bag-ong gobernador.

Si Governor Yebes sa iyangpakigpulong mipasalamat usab sa mga opisyal ug katawhan sa barangay Dicoyong nga bisan wala kini mitabang kaniya sa nakalabayng election, apan sa ilang gipakitang kasibot nahatagan sa katuman ang ilang gipangandoyng mehuras gikan sa probinsiya.

Niini iyang gipasabot sa mga opisyales ug katawhan sa barangay nga daku ang kalainan sa iyang pamunoan itande sa nakalabay nga pangagamhanan.

Ngani malipayong gipahibalo sa gobernador sud lamang sa usa ka tuig ug usa ka buwan sa iyang paglingkod sa kapitolyo, kapin sa 300 na ka mga proyekto ang iyang napadapat sa nagkalain-laing barangay sa tibuok probinsiya. Kini iyang gipatuman ki bali na kun unsay bolok sa politika, ang mahinungdanon karon mapadapat lamang ang mga proyekto nga maoy gikinahanglan sa katawhan.

Sa samang bahin, sunod nga gisubhan sa gobernador mao ang bag-ong 1 unit 2 classroom pre-fabricated school building didto sa Sidangan Pilot Demonstration School. Ang naasoyng proyekto mikantidad kini sa 930 mil ka pesos. Ika tulong naturn-over mao ang balor 27 mil ka pesos nga pagrepair sa Day Care Center sa Barangay Pangalalan. Samtang ang katapusan mao ang pormal nga pagtugyan ngadto sa barangay Bago ug sa mga magtutudlo sa Bago Elementary School ang 1 unit class room sa kantidad 255 mil ka pesos.

Si kapitan Antonio Mohametano sa Barangay Bago mi-angkon atubangan ni Gob Yebes, sama sa ubang mga barangay sa Sindangan, siya wala magdahum nga tiwason ba diay sa Yebes Administration ang mga proyekto nga gibiyaan sa nakalabayng administrasyon. Aminado kini nga sa 2004 elections, didto kini misuporta sa naparot sa gobernador demudo nagpanuko kini nga moduol sa bag-ong administrasyon tungod sa maong situasyon. Apan sa nahitabu karon, gipakita lamang nga bisan diay nga managlahi ang bolok sa politika, kini dili nagselbing babag alang sa katumanan sa proyekto sa iyang barangay tungod sa lahi nga pamolitika sa Yebes administration.

Dugang gibutyag ni kapitan Mohamentano, lahi gayud diay ang kasamtangang administrasyon sa pagkakaron. Ngani matud niya, kaniadto nakabaton sila ug proyekto nga 1 unit 2 classroom building gikan sa nakalabayng administrasyon ni Amatong apan ang nakapait, giinday-inday ang pagtrabaho niini ug nahuman sa 2 ka tuig. Lahi karon sa bag-ong liderato sa probinsiya ubos ni Yebes nga gikompleto pagtrabaho ang iyang proyekto sud lamang sa pipila ka buwan.

Niini mipasalig ang kapitan tungod sa gipakitang kaayo sa administrasyong yebes ngadto sa sama kanila nga nahimong nakontra sa politika, sa sunod malauman sa gobernador ang way puas nga suporta ngadto kaniya. Samtang laing 2.1 milyones ka pesos nga balor sa laing proyekto ang pormal usab nga giturn-over ni Gov. Yebes kauban si Vice Gov. Baby Olvis ug mga miembro sa Sanguniang Panlalawigan sa mga lungsod sa Roxas ug Jose Dalman niadtong Biernes Agosto 5 ning tuiga.

Kini naglakip na sa construction sa Lower Irasan-Tanayan road project  sa kantidad 250 mil ka pesos ingon man ang gipahimutang nga 1 unit 2 classroom pre-fabricated school building sa Lower Irasan Elementary School sa lungsod sa Roxas. Ang maong inagurasyon gitambongan usab ni Mayor Carlito Feras, Kapitan Josechu Aseniero sa Irasan ug sa mga magtutudlo ug PTCA officials sa maong tunghaan.

Samtang didto sa Manawan, Jose Dalman laing 1 unit 2 classroom pre-fabricated school building nga nagkantidad usab sa 930 mil ka pesos ang gi-inagurahan sa gobernador ug bise gobernador uban sa pagduyog ni Mayor Oliveros “Nonoy” Dalman ug ni Kapitan Yolando Atay sa nasangpit nga barangay. Sa ilang pamahayag, giingon nila ni bokal Cedric Adriatico ug Atty. Edgar Baguio kinsa nahi-uban sa maong okasyon tuyo nila nga duyogan ang kasamtangang administrasyon dinha sa iyang mga paningkamut mahatud sa katawhan sa kabarangayan ang mga gikinahanglan nilang proyekto gikan sa probinsiya.

Matud sa duruha ka bokal sa segundo distrito nga ang ilang pag-uban sa gobernador sa iyang mga lakaw ilabi na sa mga samang okasyon pagturn-over sa mga proyekto pagpakita lamang sa katawhan nga sila sa ehekutibo ug lehislatura sa kagamhanang probinsiyal nagkahi-usa sa bugtong katuyoan, serbisyo ihatag sa mga nanginahanglan.

Sa kabahin sa gobernador, sa mga pagbiyahe niini palibot sa tibuok probinsiya dayag kaayo nga uhaw gayud ang katawhan sa mga serbisyo demudo bisan sa kahagip-ot sa panahon, iya gayung buhaton ang tanan matagbaw lamang ang katawhan sa ilang itunol ngadto kanila. Subling gihatagan ug gibug aton ni Gov. Yebes ang iyang mga proyektong gidapat karon sa nagkalain-laing barangay sa tibuok probinsiya nagbaton sa tukmang gabayan, kana ang gitawag niyang “culture of quality”, mga proyektong mao gayud ang tinuod nga gipangayo ug gikinahanglan sa barangay ug katawhan niini. (Mindanao Star, Vol. I No.34)

PCA mipahigayon ug training paghimo ug mga produkto gikan sa lubi 

Gisugdan na sa pagpahigayon kagahapong adlawa, Agosto 4 hangtud petsa 5, ang duha ka adlaw nga pagbansay-bansay kabahin sa paghimo sa mga produktong virgin oil, asukal ug uban pang produkto nga ginama gikan sa lubi. Mao kini ang nasayran gikan ni Regional Manager Antonio Val Faustino sa buhatan sa Philippine Coconut Authority nga nagabase sa dakbayan sa Zamboanga diin ang pagpahigayon sa training nagtinguha aron matabangan ang mga mag-uuma kinsa nagsalig lamang sa abot sa kopra nga maoy gigamit sa ilang inadlaw-adalw nga panginabuhi.

Niya pa nga tungod sa pagpailawom sa mga mag-uuma ug uban pang mga pangulo sa Philippine Coconut Authority diha sa ubang kalungsuran makakat-on ang mga partisipante sa kaalaman nga dili lamang kopra maoy bugtong produkto nga makuha gikan sa lubi apan daghanan pa ug garantisadong makakab-ot ug dinagkong kita kun interesado usab sila nga himoon ang ilang nakat-onan.

Gibutyag usab ni Regional Manager Lornito Orillaneda sa buhatan sa PCA nga nagabase sa dakbayan sa Davao nga sa produktong virgin coconut oil nga napamatud-an nga maayong produkto alang sa beauty care ug daghanang matambalan sanglit ginama kini sa natural nga pamaagi ug walay laing kemikal nga sagol.

Diha usab makuha sa tuba ang tinubdan sa coco sugar, mga ginamang papel gikan sa bunot, sapal ug uban pang materyales sa lubi. Nagpasalamat ug dako ang mga Regional Manager sa mga dakbayan sa Zamboanga, Davao ug Cagayan de Oro ngadto sa Department of Agriculture ingon man ngadto kang Gov. Rolando Yebes kinsa hugtanong mingpaluyo sa kalampusan sa gipahigayong pagbansay-bansay bisan pa man sa unang adlaw nga pagpahigayon niini.

Ang maong kalihukan gitambongan sa mga mag-uuma, kadagkuan sa Philippine Coconut Authority sa mga nagkadaiyang kalungsuran dinhi sa probinsya, lecturers gikan sa dakbayan sa Davao, Zamboanga ug Cagayan de Oro, mga kawani sa CDAU, Department of Agrarian Reform ug Provincial Agriculture. (Tzai J, Mindanao Star, Vol. I No.34)

Pag-abot sa teknolohiya sa paghimo sa coco sugar ug coconut virgin oil, suportado ni Gov. Yebes

Gipadangat karon ni Governor Rolando Yebes ang dakong suporta sa kadagkuan ug mga kawani sa Rehiyonal nga buhatan sa Philippine Coconut Authority nga nahidangat ning lalawigan aron sa pag-paila sa bag-ong teknolohiya sa paghimo sa coco sugar ug coconut virgin oil. Matud pa ni Governor Yebes nga dugay na kini niyang gipangayo sa nasangpit nga buhatan aron sa pagpaila sa maong kahimanan sa tuyo nga matudluan usab ang mga gagmay’ng mag-uuma sa lubi ning lalawigan.

Dugang pamahayag sa Gobernador nga ang coconut virgin oil ang napamatud-an na kining epektibo sa UP Los Baños Research Center ug gani gi-export na nila kini sa ubang kanasuran  sa Asya ug Europa. Gisaysay usab ni Governor Yebes ang kamahinungdanon sa punuan nga lubi gikan sa gamot padung na sa pal-ak niini ilabi na nga karon taas ang porsyento nga mapatuman ang paghimo sa alternative fuel gikan sa tanum nga lubi.

Sa maong kalambuan, gusto ni Governor Yebes nga mahibaloan ang paghimo sa susamang produkto aron usab katabangan ang mga gagmayng mag-uuma sulod ning probinsya. Kahibaloan nga ang Zamboanga del Norte ang abunda kini sa tanum nga lubi mao nga gipuntirya sa Gobernador ang paghatag ug igong pagtagad sa kamahinungdanon niiini.

Dugang gipahibalo ni Governor Yebes ang paghatag ni Presidente Gloria Macapagal –Arroyo sa 100,000 nga seednuts aron itanum ug pasanayon kini dinhi sa probinsya isip paghatag sa dugang ayuda sa mga gagmayng mag-uuma sa lubi ning lalawigan. Kahibaloan nga gisugdan sa pagpahigayon kagahapong adlawa, Agosto 4 ang duha ka adlaw nga pagbansay-bansay kabahin sa paghimo sa mga produktong coconut virgin oil, asukal ug uban pang produkto nga ginama gikan sa lubi.

Dugang gipaasabot ni Yebes nga sa iyang administrasyon, nakigkoordinar kini kanunay sa mga ahensiya sa gobiyerno sama sa Phil. Coconut Authority sa ingon masayran unsay ilang mga bag-ong programa nga gipatuman. Kini mahinungdanon kaayo aron maplantsa usab sa kagamhanang probinsiyal ang mga gikinahanglang plano ug mga lakang nga sagopon dinha sa pagpalambo sa panginabuhi sa katawhan ilabi na sa sektor agrikultural ug kadtong mga mag-uuma sa lubi aron mas madasig pa uban sa kaseguruhan nga adunay mas dakung merkado sa ilang mga produkto. (Mindanao Star, Vol. I No.34)

Alternative Governance gipasiugda sa mga Mindanawon

Kalinaw ug Kalamboan sa Kamindanawan karon! Maoy mga panawagan nga gipalanog sa mga lideres sa nagkadaiyang probinsya sa Mindanao, kaniadtong Hulyo 22, 2005. Ang maong panawagan maoy hugtanon nga gibarogan sa mga nagpasiugda sa Mindanao Convention on Alternative Governance, didto sa Kaamulan Theater, Provincial Capitol, Malaybalay City, Bukidnon.

Sa tuyo nga kahatagan ug pagtagad ang mga pagpasabot sa maong kalihukan, si Board Member Cedric “Adre” L. Adriatico ang personal gayud nga mibulontaryo sa pagtambong niini aron mahimamat usab ang mga planong pangkalamboan nga buot  ipadangat sa mga lideres sa Mindanao. Adunay kapin kon kulang 600 (sais siyentos) ka mga delegado, lakip na ang mga gobernador ug mga mayores sa mga nagkadaiyang probinsya sa Mindanao, ang mitambong sa maong Convention uban usab sa mga lideres sa mga NGOs ug mga sector nga MIndanawon.

Matud pa ni Bokal Adriatico, nga diha sa usa ka-adlaw nga panaghiusa sa mga lideres nga Muslim, Kristiyano ug Lumad nga Mindanawon, gihisgutan ang mga alternatibong pangagamhanan aron mahatagan ug patas nga pagtagad ang mga lumolupyo sa Mindanao kinsa nahikawan sa mga programang pangkalamboan nga nakasentro lamang sa Central Luzon.

Ang mga nahiagumang kapit-os sa mga Mindanawon ug ang walay igong pagtagad sa pangagamahanan dinhi sa atong Isla, maoy usa sa daghanang mga rason diin gipalanog ang mga panginahanglan sa pag-usab sa konstitusyon sa nasud. Sa maong kalihukan ang tulo ka alternatibong pangagamhanan kinsa gilauman nga makahatag ug pag-ila aron molambo ang mga Mindanawon. Una niini mao ang “Parliamentary Governance Option nga gipresentar ni Governor Pedro P. Rumualdo sa probinsya sa Camiguin, ang “Federal Parliamentary” nga gipasiugdahan  ni Dr. Jose V. Abueva sa Citizens Movement for a Federal Philippines ug ang “One People Mindanao” option kon OPM pinaagi usab ni Mr. Pantaleon  Alvarez, ang spokesperson sa One People Mindanaw Movement. Dugang pa ni Bokal Adre Adriatico, nga human sa maong presentasyon gipadangat usab ang mga reaksyon sa mga delegado, may kalabot na sa maong tinguha sa pag-usab sa konstitusyon sa Pilipinas. Ang Indigenous People’s nagasuporta sa bisan unsa sa tulo ka mga opsyon nga madasonan diha sa asembliya, apan ilang gipalanog nga bisan asa sa maong sistema kinahanglan gayud mohatag ug pag-ila sa mga Lumad sa Mindanao.

Samtang ang mga Business Excutives andam usab mopakita sa ilang suporta kung unsa ang mamahimong desisyon unya diha sa ipahigayong asembliya. Sa panapos nga pamahayag ni Bokal Adre Adriatico iyang gipasabot, nga bisan hain sa tulo ka mga plano sa pag-usab sa konstitusyon sa Pilipinas kon kini angayan ug makahatag sa mga kaayohan nga gipangandoy sa mga Mindanawon,  usa kini ka maayong tinguha nga mapalambo ang atong yuta sa Mindanaw. (japhetfernandez, Mindanao Star, Vol. I No.34)

Pamahayag ni Heneral Abu alang sa nasud

Sa sulod sa nakalabayng duha ka tui, ang atong armadong kusog sa Pilipinas hilum nga mibuhat sa pag bag-o nga mahimong instrumento ug epektibo alang sa kahusay ug kalinaw, arong magpadayon ang kalambuan.  Kining tanan nahimong walay bili kung ang atong organisasyon maapil sa mga butang nga alang lamang sa pangpulitika.

Ang problemang politikanhon nga aron atong nasinati angayan lamang nga maresolba pinasikad sa atong batakang balaod ug pinaagi sa malinawong solusyon.  Ang armadong kusog dili mo apil sa bisan unsang kalihukan nga supak sa atong konstitusyon. Ang atong armadong kusog usa ka malig-on nga pundok sa atong nasod, kung kini maghiusa ug dili mapahiran ug politika, kini makahatag ug dugang kusog sa mga institusyon.

Busa, kami nag-awhag sa tanang sektong sa atong katilingban nga hunongon na ang paghulhog sa mga sundalo para mosalmot o moapil-apil sa butang pangpulitika.  Hinoon, maghiusa kitang tanan sa paglihok para ug alang sa kahusay, kaayuhan ug kalambuan sa atong nasud. Gusto naku ipaabot sa inyong tanan nga ang armadong kusog, nagpabilin nga matinud-anon ug nagtuman sa atong konstitusyon.  Dili nako tugotan ang si bisan kinsa nga sakop sa militar nga mo supak sa maong balaod. (Mindanao Star, Vol. I No.34)

32 ka krimen napasakaan na ug kaso sa Dipolog PNP

Adunay nahitalang 32 ka mga krimen ang malampusong napasaka sa mga tinugyanan sa kapolisan sa dakbayan sa Dipolog didto sa buhatan sa hukmanan sulod niadtong petsa 19 sa Hunyo hangtud petsa 19 sa Hulyo ning tuig 2005. Mao kini ang kasayurang nakutlo gikan kang PO3 Roel Lumanta Talaid, Investigator sa buhatan sa Dipolog PNP diin ang 32 ka mga krimen gilangkuban sa beinte cuatro sa index crime ug laing walo sa non-index crime.

Ang 24 nga index crime naglangkob sa upat ka kaso sa frustrated murder, tulo sa frustrated homicide, duha sa physical injuries, unom sa grave threat, tulo sa robbery, upat sa simple theft ug duha sa swindling o estafa samtang adunay laing walo ka mga kaso sa non-index crime.

Nahatagan usab kini ug 91 porciento nga kasulbaran sa kapolisan diin nasayran nga makanunayon usab ang gihimong paglihok sa tanang mga personahe sa Dipolog PNP sa pagpangulo ni P/Supt. Tomas Mina Hizon aron mapatunhay ang kahapsay ug kalinaw sa tibuok syudad. (Tsai, (Mindanao Star, Vol. I No.34)

121 ka mag-uuma nakapahimus programang agrikultural sa WMCIP

Mokabat sa 121 ka mga mag-uuma sa 24 ka barangay sulod sa 6 ka lungsod ning lalawigan sa Zamboanga del Norte ang nakapahimulos karon sa programang pang-agrikultura nga gi-ayuda sa (WMCIP) Western Mindanao Community Initiative Project. Kini adunay 7.9 milyones ka pesos nga pahat nga nagagikan sa (IFAD) International Fund for Agricultural Development sa WMCIP.

Mao kini nasayran gikan ni Maybelle Cruz-Bustaliño, sa Office of the Provincial Agriculturist kinsa maoy Project Coordinator sa maong programa. Kini inabagan usab sa (DAR) Department of Agrarian Reform, (PLGU) Provincial Local Government Unit ug (MLGU) Municipal Local Government Unit. Dugang pa ni Bustaliño nga ang 6 ka mga lungsod nga nakapahimulos sa maong proyekto mao ang Katipunan, Roxas, Sindangan, Siayan, Godod ug Leon Postigo diin hingpit nga giila sa DAR nga adunay pinakakabus nga barangay nga angayan makadawat sa maong ayuda.

Si Bustaliño ang nagkanayon usab nga kini adunay 3 ka farming systems nga naglangkub sa integrated upland farming system, poultry production center ug goat production center. Niini, unang gipatuman ang Mais Binhian sa integrated upland farming system diin gikalatid nga anihon sulod niining bulana. Nasayran nga ang maong programang pang-agrikultura lakip usab sa gitutukan sa administrasyon ni Governor Rolando Yebes ilabi na ngadto sa mga hilit nga mga barangay ning lalawigan.

Sa maong kalambuan, si Efren Bubutan, ang agri-cultural community development worker sa lungsod sa Roxas, ang nagkanayon nga ang mga mag-uuma nga nakaangkon sa maong proyekto nadasig ug nalipay niini. Sa pagpakighinabi usab bi River Tabada, ang Monitoring and Evaluation Point Person sa WMCIP nga ang maong buhatan nagsugod kini sa pagpatuman sa mga programa alang sa mga mag-uuma ug mananagat dili lamang dinhi sa Zamboanga del Norte kon dili lakip na usab sa Zamboanga del Sur, Basilan ug Zamboanga Sibugay. (Sheng, Mindanao Star, Vol. I No.34)

PROVET gitahasan pagpalambo pa sa industriya sa kahayopan

“Nabulit na sa tibuok probinsya ang mga proyekto karon nga gitutukan sa kagamhanang probinsyal pinaagi ni Governor Rolando E. Yebes aron mapahimuslan sa mga katawhan sa probinsya ang gikinahanglan niini”. Mao kini ang pamahayag ni Mr. Vicente Vic Sanchez Jr. ang officer In-charge sa Provincial Veterenary Office kinsa gitahasan sa pagpalambo ilabina sa industriya sa kahayupan.

Dugang pa niini lain na usab nga gipahalapad nga proyekto karon ang gitutukan sa maong buhatan may kalabot na sa pag-alima ug dugang kahayupan sama sa pagpamuhi ug itik diin gikinahanglan ang 300 ka itik aron paghimoong foundation stock didto sa Provincial Veterenary Office. Lakip sa gilaraw ni Sanches ang pagbuhi ug Gansa, Pabu ug kanding aron mapalapad ang dagan sa ilang kadasig ug mahatagan ug laing alternatibong panginabuhian ang mga katawhan kinsa ana-a sa industriya sa kahayupan nanginabuhi.

Sa laing bahin gibutyag usab ni Sanchez nga adunay mga special projects ang amahan sa probinsya may kalabot na pagpananum ug Cassava dinhi sa lalawigan, sumala pa nga adunay gisaad ang San Miguel Corporation nga atu-a naga-basi sa bukidnon nga mohatag ug 20 ngadto na sa 80 ka mga dumptrucks nga kargado sa cassava root crops ang ipanghatag dinhi sa probinsya karon bulan sa Septembre ning tuiga.

Kini ang gitutukan pag-ayu sa maong buhatan aron mahatagan usab ug dugang kaikag sa pagpananum ang mga katawhan ilabina didto sa kabukiran tungod kay gibasihan ni Sanchez nga ang Cassava maoy Crops of All Season ang maong tanum tungod kay mabuhi kini sa ting-init ug ting-ulan ug kinahanglan nga mapahimuslan ug matanum unya kining mga cassava tungud kay kini usab ang laing tuburan sa pagkaon nga dali nga makuha sa mga katawhan diha sa kabukiran. (Ps@lm, Mindanao Star, Vol. I No.34)

Pakig-away batok kagutom angayan paninguhaon –Concha

Nanawagan karon si Provincial Agriculturist-Atty. Bernardo P. Concha nadto sa mga nanaglihok sa agrikultura nga angayan gayud nga paninguhaon niini sa kanunay ang hingpit nga pakig-away batok sa kalisud ug kagutom isip sinumpaan nga trabaho sa pag-alagad sa mga katawhan ilabi na ang mga kabus nga mga mag-uuma sa tinuok lalawigan sa Zamboanga del Norte.

Gipahinumduman sa provincial agriculturist ang iyang mga ginsakopan sa tiniuray nga pag serbisyo isip tahas ngadto sa mga katawhan sa walay pagpihig ug sa walay pagdumli sa pagdawat sa tagsatagsa ka responsibilidad niini. “We have to be more effective in the performance of our respective duties and responsibilities in orde to answer to the needs of our people,” nagkanayon si Concha atubangan sa mga kawani sa provincial agriculturist atol sa gipahigayon nga binulan nga tigum sa mga buhatan.

Isip amahan nga naggiya sa iyang banay aron mapalambo ang mga panimalay, iyang gihangyo sa mga kawani nga nagpakadawat sa redployment ug reassignment order gikan ni Governor Rolando E. Yebes nga dawaton lamang ang maong kasugoan sanglit tinguha sa gobernador nga maserbisyoan usab ang mga lagyo ug hilit nga mga kalungsoran ning lalawigan.

“Stop blaming, stop bickering each other.  Magtinabangay kitang tanan ug mosubay kita sa usa ka direksyon nga maoy makahatag ug kalamboan diha sa agrikultura sa atong mga katawhan,” matud pa sa provincial agriculturist. Sa maong tigum nasabutan sa mga project leaders nga magkahiusa ug mosubay sa mga programa nga gisagop sa naasoy nga buhatan ilabi na kay kini usab gipunting sa panultihon sa gobernador nga,” Una sa Tanan ang Katawhan.”

Nanag-una niini ang pagpananum sa mga liso sa klase-klaseng prutas sa mga nursery sa OPAg duyog sa panawagan sa gobernador nga matamnan ang mga nangaupaw nga kabukiran dinhi sa lalawigan ug makahatag sa dugang abot sa panginabuhi sa mga katawhan. (OPA-EMPT, Mindanao Star, Vol. I No.34)

Pletehan sa sikad-sikad aprobado na tag P3.00

Giaprobahan diha sa committee level ang hangyong usbaw sa pletehan sa sikad-sikad nga nagbiyahian dinhi ning dakbayan pinasikad sa hangyo sa mga sakop sa Dipolog City Operators Association (DIPPOA). Sa gipahigayong committee hearing  sa Sangguniang Panlungsod niadtong, Agosto 5, gipadas-ug  ang usa ka ordinansa  nga mag-amendar sa Ordinance no. 57 series of 1986- “Regulating  the Operation of Pedicabs, Requiring Pedicab Operators to Register and Pedicab Drivers to Possess  License in the City of Dipolog” particular  ang Section 17- Fare Rates of Pedicab.

Alayon niini, giaprobahan alang sa unang pagbasa ang nasangpit nga ordinansa  maykalabut na sa pagsaka sa pletehan sa mga sikad-sikad gikan sa P1.50 nga nahipatik diha sa karaang ordinansa ngadto na sa P3.00. Samtang gitakda usab ang pagpatawag ug public hearing mahitungod niini nga hilisgutanan aron masayran ang reaksiyon sa katawhang sumasakay.  (Dipolog CIO Press Release, ligz)

Nabutaan sa mga proyekto ni Yebes

Ang dili makadawat sa kaparotan dili makakita ug kamatuoran. Pamahayag ni Governor Rolando Yebes atol sa turn-over ceremony sa barangay road ug 2-classroom building didto sa Lower Irasan, sakop sa lungsod sa Roxas kagahapong adlawa. Halos matag adlaw gaturn-over ug mga proyekto si Governor Yebes apan ang iyang mga kritiko sa media ni Amatong padayon nagbatikos sa iyang administrasyon nga walay nahimo.

Matud pa ni Governor Yebes, wala gayud siya makasabot unsay tumong sa iyang kontra sa politika nga gasiging daut kaniya bisan ug layo pa ang eleksiyon. Nagkanayon si Yebes niadtong mikandidato siya pagka gobernador iyang gisaad nga moserbisyo gayud siya sa katawhan. “Dili ko politiko..ang akong gusto, moserbisyo ko sa katawhan  sa Zamboanga del Norte ug mao ni akong gibuhat karon,” pamahayag pa sa gobernador nga mipasabot sa iyang gipangturn-over nga mga proyekto.

Matud niya, wala siya makasabot kon ngano nga duna pay mga tawo nga nagdagandagan sa bukid nga nagpaperma ug recall petition kay kuno, wala siyay nabuhat nga proyekto, nawad-an nag pagsalig ang mga katawhan sa probinsya (lost of confidence) ug mikuyanap ang graft and corruption sa iyang administrasyon. “Seguro nabutaan sila...seguro nabungol na sila kay wala nila makita ang mga proyekto nga akong gipang-hatag sa kada municipyo ug kada barangay sa atong probinsya.”

Sama sa gibuhat sa Ginoo, si Governor Yebes nangayo ug pasaylo sa mga katawhan para sa iyang mga kaatbang sa politika nga siging pangdaut sa iyang administrasyon kay alang kaniya, nagpuot pa kaayo ang ilang dughan tungod sa ilang kaparotan sa miaging eleksiyon. Para sa gobernador, usa ka pagtamhang ug pagsabotahe sa Zamboanga del Norte ang gibuhat sa iyang mga kaatbang sa politika kay samtang naningkamot ang mga lideres para mapalambo ang probinsya kini ila mang pagadauton.

Si Yebes mibuwelta pagsaway sa kanhi namonuan nga sa kadugayon niining paghari sa Capitolyo sulod sa kinsi anyos, wala maka-apod-apod ug hatag sa mga proyekto sa tanang barangay. “Wala nila tan-awa sa unang panahon nga ang atong barangay walay proyekto.” Matud niya, sa 695 ka barangays sa tibuok probinsya, kada barangay iyang hatagan ug proyekto gikan sa tubig, suga, dalan, eskuwelahan ug bisan unsa nalang nga gikinahanglan sa katawhan. Mokabat na sa 300 ka mga proyekto ang natapos sa usa palang ka tuig nga paglingkod ni Governor Yebes, nagkanayon si Provincial Engineer Ramon Ochotorena.

Matud ni Yebes, humanon niya pag-apod-apod ang mga proyekto sa tanang barangay sa tibuok probinsya sa dili pa matapos ang iyang termino. Aminado ang gobernador nga nasakitan siya sa subrang pataka ug pasangil sa iyang mga kaatbang sa politika pinaagi sa ilang binayrang media gamit ang ilang kahimanan sa radio ug pamantalaan. “Deed’s is speak louder than words,” maoy pagpamatuod nga ang iyang gibuhat nga mga proyekto sa kabarangayan makita sa mga katawhan.

Matud ni Yebes, wala siya mangilad sa mga tawo nga mosaad apan walay gibuhat kay kini napamatud-an na sumala sa mga turn-over of projects nga iyang gihimo halos matag adlaw. Iya usab gipahayag nga ang iyang administrasyon wala mangasaba ug yanong tawo ug dili maduol. Matud niya bisan unsang orasa, bisag asa siya puwedi siyang maduol sa mga tawo ug moyangongo sa ilang problema kay kon kaya sa probinsya iyang pagahatagan ug aksiyon.

Mejorada: Tuis na ang recall

Kahago, personal nga gasto sa salapi ug paglaum nga makabalik ug trabaho sa Capitolyo maoy pipila lamang sa mapait nga kapalaran sa mga midnight appointees sa kanhi gobernador nga gitahasan sa pagpaperma sa recall kay wala nay kahigayonan nga magbonga ang ilang mga paningkamot human gibasura sa Provincial Comelec kay dili porma ug susbtansiya ug nagkulang sa mga gikinahanglang requirements ang ilang giuna-unang gi-file nga petition for recall. Kini ang gipaklaro ni Board Member Uldarico Mejorada samtang kanunay gipropaganda sa radio ni Ex-Governor Isagani Amatong ang makalanag nga impormasyon aron mabuhi ang dugo sa ilang mga supporters sa politika.

Matud ni Mejorada, si Provincial Election Supervisor Atty. Borromeo Patangan humana mipagawas ug desisyon nga ang petition nga gipasaka sa grupong LAYAS movement nga gimugna sa kampo ni Amatong dili “form and substance” dili na puwedi nga pagasundan pa ug laing susamang petition. Reaksiyon sa bokal samtang gibutyag sa magsisibya sa Amatong media nga kadtong ilang giduso sa Comelec nga gi-dismiss ni Patangan, dili pa kadto mao ang petition for recall kay usa lamang kadto ka notice isip pagpahibalo sa commission nga may iduso silang petisyon batok nila ni Governor Rolando Yebes ug Board Member Mejorada.

Matud ni Mejorada, mahimo man silang makaduso ug utro ug petition apan paaboton pa nila ang balig usa ka tuig gikan karon kay sa balaod dili puwedi nga sa usa ka tuig mahimong moduso ug ika duha kon gibasura ang una. Iyang gipasabot nga ilawom sa balaod, kon ang petition for recall gidismiss sa Comelec, dili na mahimo nga pasundan pa ug ikaduha sulod sa susamang tuig. Maghulat pa nga moabot na usab ang takdo usa ka tuig gikan gi-dismiss ang petition ayha na usab mahimo nga ma-file ang petition.

Sa kabahin sa gihimong diskarte sa usa ka komentarista sa radio ni Amatong nga ang maong gi-dismiss nga petition dili pa maoy tinuod nga sumbong kay usa palang kadto ka notice nga nagpahibalo sa Comelec nga duna silay ipasaka nga petition for recall, gipahayag ni Mejorada nga kinulasaw ug binolakbol ang maong opinion. Si Mejorada nga hataas na kaayo ug kasinatian sa pagpangabogar wala sukad makahinomdom nga mananghid usa sa huwes ang gustong mosumbong nga duna siyay ipasaka nga kaso. “Ug mopasaka diay kag kaso, moingon pa diay ka sa huwes nga “judge duna baya koy kaso nga akong ipasaka nimo,” nahimoot nga tubag ni Mejorada.

Matud niya, kon moduso ug kaso or petition, kinahanglang kompleto na tanang ebidensiya dili kay magpadaladala pa ug notice, “kay aron pahibaw-on ang huwes?” Ang gidismiss nga recall ni Patangan dili kadto notice. Matud ni Mejorada, gipasaka gayud kadto nga usa ka petition for recall nga gipermahan ug napulo ka mga petitioners. Kay nagkulang sa porma ug substansiya maoy hinungdan nga gi-dismiss, “Atty. Patangan is correct,” nagkanayon si Mejorada. (The New Nandau, Vol. XV No. 6)