2

June 19,  2008

 

Programa sa Agricultura ug Turismo ipadayon- Gov. Yebes

Gikinahanglan palamboon ang mga programa sa agrikultura ug turismo kay mao kini makatabang ug dako nga mouswag ang kahimtang sa panginabuhi sa mga katawhan ug molagsik ang atong ekonomiya.

Kini maoy mensahe nga gipadayag ni Governor Rolando Yebes samtang gitak-op ang ika-upat ka tuig nga pagsaulog sa ZaNorte Hudyaka Festival 2008.

Si Governor Rolando Yebes mipahayag nga pinaagi sa mga programa nga gipatuman sa iyang administrasyon, ang mga katawhan sa nagkalainlaing tribo, kristianos ug muslim nagkahiusa ug nagtinaba-ngay hinungdan nga hinay-hinay milambo ang turismo busa iya kining ipadayon.

“Ang atong gimugna nga mga programa sa agrikul-tura, maayong panglawas ug sa turismo ipadayon gayud aron mas molambo pa ang atong probinsya sa Zambo-anga del Norte.

Sulod na sa upat ka tuig sukad si Yebes milingkod sa katungdanan isip gobernador, matag tuig nga gisaulog ang anibersaryo sa probinsya sa Zamboanga del Norte dungan ang mga kalihukan sa Hudyaka Festival miani ug maayong resulta gumikan sa mga investors nga mibobo sa ilang pohunan dinhi sa atong dapit.

Para ni Governor Yebes sulod lamang sa upat ka tuig nga gihimo ang mga kalihukan sa Hudyaka Festival milambo ang turismo ug ang pinaka-importante ang pagmintinar sa kahusay ug kalinaw nga gitabangan sa tanang mayor ug opisyales aron maila ang atong lugar nga lahi sa ubang probinsya sa western mindanao.

Kabahin sa mga kritiko nga padayong misaway sa mga kalihukan sa Hudyaka Festival kay nag-usik-usik lamang ug salapi, si Governor Yebes mipahayag nga dili tanang tawo mo-dayeg sa iyang adminis-trasyon ilabi na gayud kadtong mga tawo nga iyang kaatbang sa politika. Apan si Governor Yebes mihatag sa iyang mensahe sa mga tawo nga kanunay’ng nagsaway sa iyang gibuhat, “tan-awa lang ninyo ang nahitabo sa atong probinsya, tan-awa ninyo kon unsa na kadaghan sa barko ang modunggo sa atong puwerto, tan-awa ninyo kon unsa ka kadaghan sa eroplano nagbiyahe sa atong probinsya, tan-awa ninyo unsa ka kadaghan sa mga negosyante nga misulod sa atong probinsya, tan-awa ninyo ang atong gibuhat nga hospital, philhealth prog-ram, Lando BIBO, Hi-Green program ug daghanang programa nga nakatabang ug dako sa atong mga katawhan.”

Maoy gitotokan karon sa Yebes administration ang agrikultura ug turismo kay pinaagi niini mouswag ang kahimtang sa panginabuhi sa mga katawhan. Matud pa sa gobernador nga sa pagkakaron, ang Zamboanga del Norte dili pa angayan nga pagatawgon ug agricultural ug industrial province tungod kay nagkulang pa kini sa kahimanan sama sa basic infrastracture development.

Ang kamahal sa bayranan sa kuryenti, tubig, dili maayong serbisyo sa tele-communication system maoy usa sa mga hinungdan nga nagpanagana ang ubang kompaniya ug korporasyon nga mobutang sa ilang pohunan dinhi sa atong probinsya ug kini maoy usa sa mga basic nga kagamitan nga dili pa angayan paga-tawgon ang Zamboanga del Norte nga usa ka industrial province.

Niining maong kahim-tang, gipahayag ni Governor Yebes nga maoy ipunting karon sa iyang pamonuan nga kahatagan ug maayong pagtagad ang nasangpit nga problema aron molambo ang agrikultura ug turismo.

Sigon sa records, gumikan sa mga kalihukan sa Hudyaka, misaka ngadto sa dosyentos porsyento sa mga turista ang nahidangat dinhi sa prbinsya sa Zamboanga del Norte kini gumikan kay namintinar ang kahapsay, kahusay ug kalinaw ug sa pagpalambo sa turismo.

Gipasalamatan ni Governor Yebes ang byenti singko ka mayor sa tanang lungsod ug duha ka siyudad sa Dipolog ug Dapitan sa ilang gihatag nga supporta sa mga kalihukan sa probinsya sa Zamboanga del Norte diin miapil gayud kini sa hataas nga kaayo nga parada sa unang pagbukas sa Hudyaka Festival. Kini maoy timaan lamang nga ang ilang pagsalmot sa maong kalihukan maoy pagpaila nga miduyog sila sa mga kalihukan ug programa sa probinsya sa Zamboanga del Norte.

Atol sa culmination sa Hudyaka Festival, nahidangat dinhi sa dakbayan sa Dipolog sila si Executive Secretary Eduardo Ermita ug AFP Chief of Staff General Alexander Yano kay mitambong sa ika 56th founding anniversary sa Zamboanga del Norte nga gisaulog niadtung Hunyo 6.

Ang duroha ka mga dignitaries gikan sa nasudnong pangagamhanan parehong taga Zamboanga del Norte. Si AFP Chief Of Staff General Alexander Yano lumad nga taga Barangay Disud, sakop sa lungsod sa Sindangan, Zamboanga del Norte samtang si Secretary Ermita gideklarar nga “Adopted Son” sa Zamboanga del Norte kay ang iyang kapikas nga si Mrs. Elvie Ramos taga dakbayan sa Dipolog.

Sila si Yano ug Ermita parehong gihatagan ug achievers award. (The New Nandau, Vol. XVII No.48)

 


Ang  Gikinaehamhlan sa Mga Tawo –Trabaho

Kagahapon   sa udto, mitawag kanako si Mrs. Rosemarie Patangan-Miranda sa telepono.

“Unsa man Inday, ang akong ikaalagad kanimo?” sukot ko.

“Ako lang god kang estoryahan sa akong nasaksihan sa akong gikasakay gahapon didto sa sakyanan sa akong pagpauli gikan sa Dapitan,” matod niya nga miigham.

“Nag-unsa man diay ka sa Dapitan?”

“Duna koy gikuhang importanteng dokumento didto ug sa pag-uli nako lagi, grabe ang akong nasaksihan sa gisakyan kong de-pasaherong jeepney.”

“Kay ngano man diay?”

“Samtang gadagan ang among gisakyan, gasige pod ug halok ang akong gikatupad – mga wala gyoy ulaw bisan daghan ming nagtan-aw!”

“Ahhh. . . naghalok lang diay . . . uso na man na karon ilabi na sa atong mga batan-on,” tubag ko nga wa kapugngi ang pagngisi tungod sa iyang gisulti.

“Ang nakaparat kay gihubo man sa lalaki ang iyang sanina ug dayon gilahos paghubo niya ang iyang pantalon;  kita god iyang batuta,” matod ni Rosemarie nga nagkatawa.

“Mao ba?” miubay ko kaniyag katawa.

“Pisot pa ra ba,” mibahakhak na gyod siyag katawa.

“Klaro gyod nimong nakita nga pisot . . wa gyoy tuli?” matod ko nga sa bentana sa among opisina milili.

“Kita ba gyod nako , , , pisot lagi . . . tupad god mi,” mipakisi si Rosemarie. “Bata pa ra ba ang babaye . . . mga edad beinte siete.”

“Ang laki . . . pilay pangidaron?”

“Mas bata ang lalaki . . .mga usa ka tuig pa tingali.”

N G E E E E E E E! Heh Heh Heh…!

#####

Mao gyod ni si Rosemarie . . .mahilig sa suspense! Nganong wala na lang niya klaroha nga ang batang lalaki anak kaha sa maong babaye. Sus kanimo, Rosemarie… nangabitin mi! Heh Heh Heh . . . !

By the way, speaking of Rosemarie Patangan-Miranda, siya karon ang atong Local Civil Registrar sa Dakbayan sa Dipolog . . . siya ang “guardian” sa mga record sa nangatawo,  gipangkasal ug atua sa iyang opisina ang talaan sa mga tawo nga nangamatay na!

Apan nahibalo ba kamo nga bisan sa mga kampanya sa ilang opisina nga iparehistro sa tukmang panahon ang pagkataawo sa mga kabataan, daghan pa gihapon nga mga ginikanan ang wala makatuman niini ug daghang ginikanan ning atong dakbayan ug bisan na gani sa mga ginikanan nga nanimuyo sa atong lalawigan. May uban diha nga hapit na maulitawo o madalaga ang ilang mga anak diha pa nila maalinggiti nga wala diay nila marehistro ang pagkatawo sa ilang mga anak! Gipang-ahak!

Sa pagkakaron, kinahanglan gayod nga sa pagkatawo sa inyong mga anak iparehistro dayon ninyo ang ilang pagkatawo, ug usab dili ninyo hikalimtan nga sa didto na mo unya sa maong buhatan, klarohon ninyo ang spelling, tukma nga petsa sa pagkatawo, tukma nga pangalan sa ginikanan ug uban pang mga detalye kay kon may sipyat gani sa mga entries ang birth record sa inyong mga anak . . .segurado gyod nga daghang salapi gikan sa imong bulsa mataktak! Sa laktod, sa di pa kamo mobiya sa opisina ni Ms. Rosemarie Patangan-Miranda klaroha ninyo nga wala bay nahamisik o nakulang sa mga entries sa record sa pagkatawo sa inyong mga anak kay kon bisan usa lang ka letra ang makulangan, na, goodbye Mr. Bond!

Tama ba, Ms. Miranda?

#####

Layo ang akong naabot nga biyahe niadtong bulan sa Mayo karong tuiga. Mi-attend mig komperensiya sa IBP Legal Aid didto sa Saranggani ug sa katapusang semana sa Mayo, didto pod mi sa Baguio. Ay nag pangutana kon gaunsa mi didto sa Baguio . . ang mahinungdanon mao nga duna koy i-share ninyo nga naobserbahan nako sa akong biyahe nga wa ko gyod makita dinhi.

Sa pag-adto namo sa Saranggani, among namatikdan nga wala kami makakita ug mga estambay sa kadalanan nga among naagian. Sabado kadto apan wala mi nakita nga nag-inuman sa mga tindahan o kaha, nagdulag basketball o bilyar daplin sa kadalanan. Ang amo lamang namatikdan nga may mga lalaki ug babaye naglakaw subay sa dalan bitbit ang mga kahimanan sa panguma o galamiton sa pabrika. Matod pa sa kauban kong manlalaban nga si Atty. Claver Pajaren, busy kaha gyod ang mga tawo didto bisan adlaw nga Sabado. Niya pa, dinhi sa atua, Lunes pa, makita mo na ang mga tawo nga nanag-estambay sa mga katindahanan nga nag-inoman.

Mao sab kini ang akong naobserbahan pag-adto nako sa Baguio. Sa mga dalan nga imong naagian, wala ka say nakita nga mga tawo nga way gihimo o kaha nag-estambay didto sa mga katindahanan.

Kini ang misantop sa akong hunahuna: Nga ang mga tawo didto may mga trabaho. Ug sa akong panginsusi, dihang mihunong kami aron mangape, daghang mga proyekto ang gobiyerno didto nga ang mga tawo makatrabaho. Kon sa natad sa pang-uma o kaha sa negosyo, suportado ang ilang mga tawo didto sa ilang local nga pang-gobiyerno. Lahi dinhi sa atua . . . wala kitay nakita nga mga proyekto ang atong local nga panggobiyerno nga sarang matrabahoan sa atong mga tawo. Hangtod karon, ang mga tawo hapit halos tanan nanag-ambisyon nga makatrabaho diha sa atong City Hall o kaha sa Kapitolyo.

Ug kini maoy resulta sa matang sa pamolitika dinhi sa atua nga panahon sa kampanya, ang atong mga kandidato mosaad ug mga trabaho nga ihatag sa mga tawo panahon sa ilang mga diskurso. Mao nga human sa eleksiyon, dumogon sa mga tawo ang buhatan sa Mayor o Gobernador kay buot nilang panilngon ang gisaad nga trabaho nga ilang gisaad panahon sa ilang pagdiskurso. Ug kay wala may tino nga dagkong proyekto ang ipundar sa mga local nga panggobiyerno, ang ilang mga tawo pulos nag-ambisyon nga sa local nga buhatan ma-empleyo. Ug mao kini karon ang nahitabo . . .may mga nanarbaho nga gihatagan sa local nato nga pangagamhanan ug trabaho balig usa ka bulan. PASTILANAN!

#####

Natingala pod ko . . . ngano ba nga daghan didtong mga pabrika kon ikompara dinhi sa atua? May pabrika didto sa mga sapatos, tela ug bisan nag unsa apan dinhi, ang pabrika nga way paglubad mao ra gyod ang pabrika sa paghimo ug mga bata!

Tingali, kini ang tutukan sa atong mga opisyales . . . ilabi na sa atong mga Kongresista. Maningkamot ang atong mga opisyales nga makumbinsir ang mga magpapatigayon nga mo-invest dinhi sa atua ilabi na kay maayo kaayo ang peace and order situation dinhi sa atong dapit. Kon nahimo kining tanan didto sa ubang dapit nga akong nalabyan, ngano ba nga dili kini mahimo dinhi sa atong lalawigan? Imagine, may naagian kami didto nga pabrika sa paghimo ug suka, doormat, paypay, tighimo ug mga silhig, tsinelas ug uban pa nga mamahimo sab nga mapundar dinhi sa atua. Aduna man gani dinhi sa atua ang pabrika sa paghimog mga sardines, yet, dili kaayo kini dako nga maka-empleyo ug daghang mga tawo. Kaha, panaghap ko lang, kulang sa suporta niini ang atong local nga pangagamhanan.

In the meantime, padayon ang larawan sa atong duha ka dakbayan ug tibuok lalawigan . . . mga tawong Lunes pa gani, atua na nag-estambay ug nanag-inom sa mga katindahanan daplin sa atong mga kadalanan. Mga buhi kini nga mga larawan nga dinhi sa atua makita sa pagpangligid na sa mga adlaw . . mga larawan nga sulaw na kaayo sa atong mga panan-aw!

#####

Sa paggula ning maong tudling, nahuman na ang Hudyaka Festival nga maoy sentro sa kasaulogan sa pagkatawo sa atong lalawigan. Sa nakita lang nato, successful ang kalihokan ug niini, atong pahalipayan ang mga opisyales ning lalawigan pinangulohan ni Governor Lando Yebes. Congratulations for a job well done!

Sa laing bahin, human sa maong kalihokan sa lalawigan, ato na sab nga atubangon ang kasaulogan sa pagkatawo sa atong dakbayan. Segurado nga daghan na sab nga mga talaan sa kalihokan nga gilatid ang atong Mayor nga si Ms. Evelyn Uy aron mahimong mabulokon ang umaabot nga okasyon.

Ug human dinhi sa atong dakbayan, ato na sab paabuton ang laing dakong kalihokan sa Dapitan . . . ang Kinabayo Festival. Sa ato nang nahibaw-an, haskan nang pangandam ang katawhan didto sa Dapitan alang ning umaabot nilang kasaulogan.

Abangan. (Dipolog Chronicle, Vol.VII No.50)

 

4 drug pusher nasakote sa polis

Wala maka-eskapo ang upat ka mga suspetsado nga tigpayuhot ug gina-diling druga human gi-ronda sa inipong puwersa sa mga otoredad ang ilang ‘hideout’ sa Malvar St. Central Barangay ning dakbayan sa Dipolog mga alas kuatro sa hapon niadtung Huwebes, Hunyo 5.

Ang upat giila sa kapolisan nga sila si Edgar Cabangisan y Cabilbil alias Dodong, 49 anyos, Rey Villaverde y Cabilbil alias Tata, 38 anyos, Alex Cabangisan y Cabilbil, 37 anyos ug parehong nagpuyo sa Malvar Street ug Grace Arcamo y Tan, 38 anyos, taga lungsod sa Calamba, Misamis Occidental.

Ang team sa intelligence operatives ug membro sa Philipine Drugs Enforcement Agency kon PDEA sa Dipolog PNP nga gipangulohan ni Police Inspector Ajerico Bocar, OIC-Chief of Police maoy milampos sa pagronda sa pugaran sa giilang mga drug pusher.

Nakuha sa kapolisan sa hideout sa mga suspetsado ang unom ka putos sa drugang shabu ug mga paraphernallias, duha ka Nokia 7360 ug 6600 cellular phone, marked money ug cash nga kuwarta nga gituhoang maoy halin sa ilang pagpamaligya.

Ang managsoong Cabangisan, Villaverde ug Arcamo anaa karon gibalhog sa detention cell sa Dipolog PNP ug gipasakaan na ug kasong paglapas sa R.A 9165 nga mao ang Comprehensive Dangerous Drugs Act of 2005. (Popong Capin, The New Nandau, Vol. XVII No.48)

 

Sekyu sa Vallercer gitabangan ug kulata,  nabawian pa ug armas kay wala ka boto

Wala makadepensa ang Security Guard sa Valle-cer Education Supply sa dihang gi-ataki ug unom ka wala mailhing lalaki sa dihang wala maka-boto ang iyang service firearm hinungdan nga kini gikulata ug gibawe ang armas niadtung pasado alas dose sa kaadlawon niadtung Huwebes.

Si Jonnyboy Gumobas y Gumason, 20 anyos, taga lungsod sa Mutia, Zamboanga del Norte ug membro sa Dalmatan Security Agency nadestino sa Vallecer Warehouse sa Burgos St. Central Barangay mitaho sa kapolisan nga samtang siya nag-duty unom ka mga lalaki ang misulong kaniya ug gilamok siya’g kulata ug gibawean siya ug armas.

“Mosukol unta ko apan wala makaboto akong pusil,”

Si Gumobas gi-isyuhan sa iyang security agency ug Shotgun apan matud niya, wala kini moboto sa dihang iya unta kining gipusil hinungdan nga nakapabor ang mga suspetsado sa pagkulata kaniya. “Daghan sila kaayo ila kong gitabangan ug kulata ug gibawe nila akong armas dayon nila ug dagan.”

Sa gihimong follow-up operation sa kapolisan, ang Shotgun nga nabawe gikan sa kamot ni Gumobas na-recover didto sa Thelma Food Hauz sa Ranillo St. tapos gi-abandonar sa wala mailhing mga suspetsado.

Dunay mga pagduda nga ang ‘alibi’ nga gipa-blotter sa security guard posibling dili katohuan kay depensa lamang sa iyang pagpanarbaho human masuta sa medico legal nga walay nahitabong tatsa ang iyang panglawas.

“Kon tinuod nga gikulata siya, daghan unta siyang bun-og sa lawas apan wala man siyay tatsa.”

Duda ang kapolisan nga nahinanok lang ang security guard sa iyang katulogon hinungdan nga gikuha ang iyang armas nga wala siya makabantay. (Popong Capin, The New Nandau, Vol. XVII No.48)

 

Suspetsado sa RCBC robbery sa Laguna ug pagpatay sa mga empleyado, taga Dipolog!

Ang nabaniog pag-ayo nga pagpanulis ug pag-patay sa mga empleyado sa RCBC didto sa Laguna, usa sa mga responsabli niini gitumbok nga taga dakbayan sa Dipolog.

Mao kini nasayran ning pamantalaan sa dihang gisikop sa inipong puwersa sa mga otoredad gikan sa kaulohang Manila ug dinhi sa Dipolog ang usa sa mga suspetsado nga gitumbok maoy responsabli sa linoog nga krimen.

Si Ricardo Gomolon, lomolopyo sa Barangay Galas ning dakbayan sa Dipolog ang gisikop sa kapolisan sa miaging semana.

Si Gomolon maoy gitumbok sa mga nakasaksi nga kaalyado sa unom pa ka laing tulisan nga mitulis sa bangko sa RCBC ug mipatay sa tanang mga empleyado didto sa Laguna.

Si Gomolon atua na karon gibilanggo sa Laguna samtang gipasaka na ang kaso batok kaniya. (The New Nandau, Vol. XVII No.48)

 

Hospital walay dokumento sukad sa pag devolved sa 1992

Mokabat na sa napulo ug unom ka tuig ang nakalabay sukad nga na devolved sa kagamhanang probinsiyal sa Zamboanga del Norte ang napulo ug usa ka tamba-lanan gikan sa Department of Health apan hangtud karon wala pa gayud kini makabatun ug dokumento nga ang mga propriedad nga gitindugan niini uban sa napatindog nga pasilidad magpamatuod nga kini gipanag-iyahan na sa kagamhanang probinsiyal.

Kini ang gibutyag ni Board Member Cedric Adriatico, chairman sa committee on health sa Sangguniang Panlalawigan sa ZaNorte may kalabutan na sa gipadas-og niyang lakang para mahatagan si Governor Rolando Yebes ug gahum nga makatimaan ug usa ka kasabutan tali na kang Health Secretary Francisco Duque, III sa pagpamatuod nga ang yuta nga gitindogan karon sa nagkadaiyang mga hospital sa probinsiya gikan lungsod sa Sibuco hangtud na sa karaang Provincial Hospital sa Biasong ning dakbayan sa Dipolog uban sa mga pasi-lidad niini iyaha na gayud sa probinsiya sa ZaNorte.

Matud pa ni Board Member Adriatico kini maoy ilang nakita karon nga problema sa tanang mga hospital sa probinsiya nga na devolved gikan sa DOH nga walay tukmang mga papeles sa dihang gisugdan na nila ug tuki unsa buhaton sa karaang provincial hospital karon nga nagsugod na sa iyang operasyon sa ZaNorte Medical Center didto sa Sicayab.

Sumala pa niya maoy nakita sa buhatan sa gobernador nga wala diay magbatun ug mga papeles ang maong mga tambalanan sa gobyerno sa gitindugan niining lote sukad na devolved nga wala usab lihuka sa mga kanhi admi-nistrasyon sa probinsiya ang mga dokumento niini.

Sa session sa Sanggu-niang Panlalawigan karong semanaha gipasar ang usa ka resolusyon nga naghatag ug gahum kang Governor Yebes sa pagtimaan sa kasabutan tali kang Health Secretary Duque alang na sa maong katuyuan. (The New Nandau, Vol. XVII No.48)

 

Sec. Ermita miapilar NFA rice itagana alang sa pinaka kabus

Nanawagan karon si Executive Secretary Eduardo Ermita nga ang NFA rice nga pabiling gibaligya sa tag P18.25 ang kilo nga unta kini adto ihatag ngadto sa pinaka kabus nga lungsuranon nga naglisud sa pagpalit sa ilang pagkaun.

Kini ang gipalanog ni Secretary Ermita sa iyang pakigpulong sa ZaNorte Achiever’s Award ceremony sa pagtimaan sa 56th Founding Anniversary sa Zamboanga del Norte kaniadtong Hunyo 6, 2008.

Si Secretary Ermita nga usa ka adopted son sa ZaNorte tungod sa iyang pagka minyo ug Dipolognon nga si Mrs. Elvie Ramos Ermita pagtugpa sa dakbayan milibot gilayon sulod sa Dipolog Central Public Market uban ni Governor Rolando Yebes aron sa pagsubay sa supply sa bugas ilabi na sa presyo niini atubangan sa mga balita nga pipila ka bahin sa Mindanao ang presyo sa bugas humay mokabat na sa P50.00 ang kilo.

Sa samang bahin gidasonan usab ni Secretary Ermita ang hangyo ni Governor Yebes nga dugangan ang 20 ka sakung alokasyon sa NFA rice nga iapod-apod sa nagkadaiyang mga kalungsuran kada semana.

Si Secretary Ermita sa iyang pakigpulong miapilar sa mga katawhan nga aduna ray kuwarta nga ikapalit ug commercial rice nga unta ang NFA rice ihatag na lang nila ngadto sa mga lung-suranon nga kabus nga naglisud sa pagpalit ug bugas. Matud pa ni Ermita daku na kini ug tabang para sa atong mga katawhan nga nagkalisud karong panahona.

Ang executive secretary miapilar sa mga lungsuranon nga aduna ray ikapalit ug bugas nga commercial rice nga unta kini maoy ilang itampo sa pagsulbad sa kalisud karon sa pagkaun tungod sa kamahal sa presyo sa mga palaliton.

Sa samang bahin gipahibalo ni Secretary Ermita nga ang ZaNorte aduna gayuy espesyal nga pagtagad gikan mismo ni Presidente Gloria Macapagal-Arroyo. (The New Nandau, Vol. XVII No.48)

 

Director Parawan midayeg sa Zanorte kabahin sa food production

Dugang proyekto ang mapaabot sa lalawigan sa Zamboanga del Norte sa mosunod nga mga buwan.

Mao kini ang gipasalig ni Regional Director Oscar Parawan sa Department of Agriculture nga maoy nahimong pinasidungang bisita sa graduation sa mga mag-uuma nga mipailawom sa Unibersidad ni Lando sa Kahanginan.

Matud pa ni Director Parawan karon dungan nila nga paga-inugurahan ang duha ka managkabuwag nga mga farm to market road projects dinhi sa ZaNorte nga gipunduhan sa Depart-ment of Agriculture nga gipahimutang sa lungsod sa Katipunan ug Salug.

Sa dili madugay motindog na usab ang dugang corn post harvest processing and trading center didto sa lungsod sa Liloy, dugang pahayag ni Director Parawan.

Gidayeg sa departmento sa agrikultura ang administrasyong Yebes sa paghatag ug dakung pagtagad diha sa food production kay kini makatabang ug daku sa pagtubag sa panginahanglan sa pagkaun sa mga katawhan dili lamang sa lalawigan sa ZaNorte kon dili sa kinatibuk-ang bahin sa atong rehiyon. (The New Nandau, Vol. XVII No.48)

 

BALIKBAYANS gipasalamatan sa ZaNorte

Sama sa naandan na kada pahigayon sa Hudyaka Festival gipasalamatan sa kagamhanang probinsiyal sa Zamboanga del Norte ang mga balikbayans ug mga langyaw nga ania na sa probinsiya mipuyo tungod sa daku nilang natampo diha na sa pagpadagan sa atong ekonomiya.

Si Governor Rolando Yebes nagkanayon nga angayan lang nga pasalamatan sa probinsiya ang mga lungsuranon nga taga ZaNorte nga atua na sa gawas sa nasud nanginabuhi sanglit daku sila ug natampo diha na sa pagpadagan sa atong ekonomiya sa probinsiya tungod sa ilang dollar remittances nga modagan ug minilyon ka pesos kada bulan.

Si Engr. Max Tolin, usa sa mga balikbayan nga mitambong sa gidalit nga dinner sa probinsiya para kanila nakadayeg ug daku sa gibuhat nga initiative sa gobernador sa pagpahigayon sa Hudyaka Festival nga nakita niyang usa ka epektibong makinarya diha na sa pagpalagsik sa atong ekonomiya diin daghang mga katawhan ang nahatagan ug kahigayunan nga makapanginabuhi nga nakatabang ug daku sa pag-atubang sa kalisud karong panahuna.

Gikan sa pagbukas sa Hudyaka Festival sa Mayo 30, 2008 kanunay nga nagdasok ang mga tawo nga misaksi sa nagkadaiyang mga kalingawan nga gihan-ay kada gabii hangtud na sa food court niini nga kanunay’ng mabuntagan sa pag-atiman ug mga costumers.

Ang kasadya sa Hudyaka Festival mitakod ug mi-awas hangtud na sa gawas diin mga balay kalingawan ug kan-anan sa ubang bahin sa dakbayan sa Dipolog nga gidugok usab ug mga tawo. (The New Nandau, Vol. XVII No.48)

 

Proposed MOA sa Zanorte ug POMS Venture Anti-Investor –Baguio

Nakahinagbo ug higpit nga pagkwestyon sa kaugalingong mga magbabalaod sa probinsiya sa Zamboanga del Norte ang gipadas-og nga lakang sa gobernador alang na sa pagtimaan sa usa ka kasabutan tali sa Private Oil Mills Venture Corporation para sa pagpatindog ug fruit processing plant sa Irasan, Roxas kay lugi ilawom sa terms and condition ang pribadong kompaniya.

Kini ang nasinati sa gipadas-og nga lakang ni Governor Rolando Yebes nga nangayo ug gahum sa Sangguniang Panlalawigan alang na sa pagtimaan sa usa ka Memorandum of Agreement tali sa POMS Venture Corporation nga moabang sa yuta sa probinsiya sulod sa ZaNorte Provincial agri-Industrial Center sa Roxas nga maoy tindugan sa ilang fruit processing plant.

Higpit nga gisukit-sukit ug gikwestyon ni Board Member Edgar Baguio ang gipadas-og nga proposed Memorandum of Agreement gikan sa Provincial Attorney’s Office kay daghan siyang nakita nga bikil sa mga probisyon niini.

Sa sinugdanan giklaro ni Baguio nga daku siyang pabor sa tinguha sa gobernador apan sa iyang nakita daghang bikil ang nasangpit nga kasabutan nga gikinahanglang paga-usbon.

Una niyang gipangutana kon ang nasangpit nga kasabutan nauyunan na ba daan tali sa probinsiya ug sa POMS Venture ilabi na ang nabutang nga terms and conditions niini.

Si Assistant Provincial Attorney Rafael Osabel, Jr. mipahayag nga ang tanang nabutang sa maong kasa-butan tapos nang gikau-yunan tali sa probinsiya ug sa mga tinugyanan sa POMS Venture hinungdan nga nangayo karon si Governor Yebes ug pagdason sa nasangpit nga lakang sa Sanggunian.

Unang probinsiyon nga gikwestyon ni Baguio mao ang punto sa maong kasa-butan kabahin na pagkons-trak ug building sa investor para sa ilang tropical fruit processing plant.

Si Baguio mihulagway nga ang nasangpit nga probinsiyon nagkuwang kay wala maghisgut nga nalakip na sa gitugot mao ang pag-instalar ug mga makinaryas para sa operasyon sa maong planta.

Gipadas-og sa bokal nga kinahanglang ibutang gayud sa maong kasabutan nga ang investor gawas nga tugutan sa pagkonstrak sa ilang building tugutan usab nga maka-instalar ug mga ma-kinaryas ug uban pa nga gikinahanglan sa ilang operasyon.

Kini matud pa sa magbabalaod sa probinsiya para ang investor walay angayang kabalak-an sa pagatiman-ang kasabutan aron modani pa ug dugang investors.

Si Board Member Baguio midugang sa pagpahayag nga laing probisyon sa maong kasabutan nga makabugaw ug investors kay ang probinsiya gitu-gutan nga maka terminate sa kontrata sa bisan unsa nga panahon.

Para niya alkansi sa maong kasabutan ang POMS Venture kay kon siya pa ang nabutang sa kabahin sa investor dili gayud siya mouyon sa maong kasabutan.

Si Assistant Provincial Atty. Osabel midugang sa pagpahayag nga ang maong kondisyon gipresentar atu-bangan sa POMS Venture ug ilang giuyonan kini.

Apan si Baguio nagtuo nga hayan sa panahon sa gihimong pagsabot-sabot tali sa kadagkuan sa probinsiya ang POMS Venture wala representahe ug hustong legal counsel kay daku ang iyang pagtuo nga kon aduna pay abogado nga nakapaminaw ang nasangpit nga kondisyon sa kasabutan dili gayud mauyunan.

Para kaniya ang giduso nga proposed memorandum of agreement ni Governor Yebes dili makadani ug dugang investors tungod sa maong bikil nga kondisyon.

Si Atty. Osabel mitataw nga ang ilang opisina sa Provincial Attorney gitahasan sa pagsiguro nga maprotihian ang interest sa kagamhanang probinsiyal.

Apan si Baguio dili gusto nga ang lantawon sa legal office mao ra ang interest para sa probinsiya kon dili lakip na sa interest sa mga investors kay maoy tinguha karon sa lalawigan nga molambo ang atong natad sa ekonomiya pinaagi sa pagdapit ug mga investors.

Kini nga obserbasyon ni Baguio gidasonan usab ni Board Member Anecito Darunday nga maoy mipadas-og sa lakang nga hatagan ug gahum ang gobernador, nagkanayon nga uyon siya nga kinahanglang usbon ang nasangpit nga kondisyon sulod sa maong kasabutan.

Matud pa ni Darunday nalamdagan siya sa mga punto nga giisa ni Baguio.

Sa iyang kabahin si Provincial Attorney Jes Gal Sarmiento, Jr. nagkanayon nga iyaha nang napatin-aw ang mga punto ngadto sa mga miyembro sa Sanggunian nga ang tinguha sa gobernador mao gayud ang pagdapit ug mga investors diin usa na niini ang POMS Venture.

Matud pa ni Atty. Sarmiento nga ang punto nga gikwestyon sa mga bokal mao ang kabahin sa pagkonstrak ug building diin nakabutang sa kondisyon nga kon moundang sila nga dili pa moabot ang lima ka tuig sa paglibkas sa kontrata o kaha makabuhat ug kalapasan sa kontrata ang istraktura paga panag-iyahan na sa probinsiya.

Kabahin sa kondisyon nga mahimong makansilar ang kontrata sa bisan unsa nga higayon, ang provincial attorney nagkanayon nga aduna lamay clerical error kay ang kondisyon naghisgut nga hatagan ang investor ug unom ka buwan nga pasiunang notisya sa dili pa kansilahon ang kontrata aron mahatagan usab sila ug igong panahon.

Sa samang bahin giklaro usab ni Atty. Sarmiento nga ang unod sa kasabutan sa wala pa nila kini iduso ngadto sa Sanggunian gipakita ug gipresentar nila sa investor diin adunay mga nahimong kausaban sa wala pa nila iduso sa balay balauranan.

Matud pa ni Atty. Sarmiento ang maong kasabutan gipadala sa POMS Venture sa ilang main office didto sa Makati City ug gipatun-an usab sa ilang mga abogado ang terms and condition niini nga nabutang sa kasabutan nga ilahang giuyunan. (The New Nandau, Vol. XVII No.48)

 

Illegal  land conversion gipa-imbestigar sa DAR

Gipa-imbestigar na karon sa Department of Agrarian Reform ang gikatahong mga illegal land conversion sa pipila ka barangay dinhi sa dakbayan sa Dipolog nga mga basakan apan gipang-tambakan na karon ug yuta.

Kini ang gibutyag sa buhatan sa DAR may kala-butan na sa status sa land conversion dinhi sa lalawi-gan sa Zamboanga del Norte.

Matud pa sa DAR gikan sa tuig 2000 hangtud sa 2007 ang ilang buhatan nakadawat ug walo ka applications para land conversion nga giaprubahan sa ilang regional director ug sa buhatan sa ilang kalihim.

Kadaghanan sa mga aplikante sa land conversion mga relihiyosong grupo, kagamhanang local ug low cost housing developers.

Kasagaran sa mga yuta nga gi-aplayan ug conver-sion kasagbutan ug adunay talagtag nga tanum nga lubi.

Sa records sa DAR nagpakita nga wala pay aplikante para conversion nga naglambigit ug mga basakan o mga yuta nga gidili sa balaod ang pagkonbirtir niini.

Matud pa sa agrarian adunay mga report nga nadawat sa ilang buhatan nga adunay pipila ka mga basakan dinhi sa dakbayan sa Dipolog sa mga Barangay Sicayab, Turno ug Galas ang gipangtambakan na sa ilang mga tag-iya nga wala mo-sunod sa gimbut-an sa balaod.

Gipahibalo sa DAR nga ang tanan nilang mga Municipal Agrarian Reform Officers ang gimanduan na sa pagmonitor ug pag-imbestigar sa tanang mga illegal conversion alang na sa pagpasaka ug tukmang kaso atubangan sa hukmanan.

Sa kasamtangan aduna nay upat ka mga kaso sa illegal conversion sa yuta ang ilang napasaka atuba-ngan sa buhatan sa piskaliya.

Sa nakalabay nga Abril 15, 2008 ang kalihim sa DAR mipakanaug usab ug memorandum nga nag-imposar ug moratorium o pagsuspenso sa pagprocess ug pag-aprubar sa tanang mga land use conversion applications.

Gipasabot sa DAR nga ilawom sa Republic Act 8435 ang bisan unsa nga mga kalihukan nga mosangpit sa pagka usab sa physical characteristics sa mga agricultural lands nga mosangpot nga dili na kini mosibo para sa agrikultura kon walay approved order sa conversion ang pagasilutan.

Gihisgutan usab sa DAR nga ilawom usab sa balaod ang bisan unsa nga beneficiaries sa Operation Land Transfer o CARP kon masuta nga gipabayaan ang yuta o kaha gigamit sa laing katuyuan ang pagahukasan sa iyang katungod nga mamahimong beneficiary. (The New Nandau, Vol. XVII No.48)

 

7 electric coop sa Mindanao napagngan ug kuryenti

Gibanabana nga anaa sa pito ka mga kooperatiba sa elektrisidad sa Mindanao maoy napagngan ug sugang dagitabnon sa miaging semana human ang tinubdan sa kuryente didto sa Iligan ang gibom-bahan sa mga rebeldi.

ZANECO General Manager Adelmo Laput nagkanayon nga ang kalit nga pagkapalong sa kuryenti sa nangaging adlaw ang ‘fault’ nagagikan sa Iligan City, ang tinubdan sa linya sa elektrisidad nga nagkutay dinhi sa Zamboanga del Norte.

Nasayran gikan sa TransCo Aurora nga nag-emergency shutdown ang planta sa Agosto 5 kay ilang gipatindog ang tower 63. Matud ni GM Laput nga ang maong tower maoy bag-ong gihulip sa TransCo sa dihang gibombahan kini sa mga rebeldi sa miaging semana. (The New Nandau, Vol. XVII No.48)

 

TVI apike na?

Gibiyaan na sa iyang mga investors didto sa Canada ang TVI may kalabutan na sa ilang mining operations sa Siocon, Zamboanga del Norte.

Sumala pa kini maoy rason ngano nga ang TVI karon nangita ug mga local investors para mobutang ug dugang puhunan para sa operasyon sa ilang kompa-niya aron makapa-dayon sa ilang pagmina sulod sa Canatuan Gold Project sa Siocon.

Ang tinubdan nagka-nayon nga ubay-ubay sa mga investors niini didto sa Canada ang misibog tungod kay napakyas ang nasangpit nga kompaniya sa pagpatuman sa nauyonan nilang mga patakaran sa operasyon niini.

Sumala pa ang nasangpit nga kompaniya nangam-panya karon sa mga mayo-res nga mobutang ug puhu-nan sa ilang kompaniya tungod kay nakahinagbo kini ug kalisud sa giba-tunang pundo para na sa pagsugod sa ilang operas-yon sa ilang copper sulphides.

Sa sayu pa ang Atlas Consolidated Mining Development Corporation na-ingganyo sa pagbutang ug puhunan sa copper mining project sa TVI diin mihatag kini ug pasiunang P42 milyones ka pesos.

Apan human masubay ang project sa TVI sa Siocon ang Atlas misibog sa ilang intensiyon nga makigsosyo sa nasangpit nga kompaniya. (The New Nandau, Vol. XVII No.48)

 =

Proyekto ni Dodoy pulos infrastructure ug
military jeep walay pagkaon sa katawhan

Naningil karon ang mga katawhan sa 2nd congressional district sa Zamboanga del Norte sa proyekto sa ilang representante subay sa Hunger Mitigation Program ni Presidente Gloria Macapagal-Arroyo.

Kini ilang gipalanog human masuta nga ang mga proyekto nga gipadas-og karon ni Congressman Rosendo Labadlabad napulos inprastraktura ug pagpanghatag sa military jeep ngadto sa mga barangay kapitan diin siya nakadaug sa nakalabay nga eleksiyon.

Sa sayu pa gihagit sa pangulo sa Community Development Assistance Unit o CDAU nga si Mr. Ronilo Pacilan si Congressman Labadlabad sa pagpakita usab sa iyang programa para sa Hunger Mitigation Program sa presidente atubangan sa pagpanaway niini sa programa sa probinsiya.

Matud pa ni Pacilan sa administrasyon ni Governor Rolando Yebes gikan sa paglingkud niini sa tuig 2004 diin wala pay nasinating krisis sa pagkaun ang gobernador milusad na sa iyang programa para sa pagbuntog sa kawad-on nga giatubang sa katawhan.

Sumala pa sa kalinghod pa ni Labadlabad sa politika nagpakita na siya ug taras sa usa ka traditional politician diin diha sa iyang paglugway ug sirbisyo gipili ra kadtong mga lugar diin siya nakadaug maoy gihatagan sa proyekto.

Matud pa ang nasangpit nga taras nga gipakita karon ni Labadlabad susama ra sa batasan sa kanhi gobernador sa ZaNorte nga si Amatong nga ang mga barangay diin siya napilde wala hatagi ug proyekto.

Si Pacilan midugang sa pagpahayag nga mas labing maayo nga mopakita ug lihok si Labadlabad subay sa Hunger Mitigation Program sa presidente ilabi na nga sakup sa iyang distrito ang pinaka pobre nga barangay sa tibook nasud nga mao ang Barangay Pange sa lungsod sa Siayan ug anaa usab sulod sa 2nd district ang mas daghang katawhan nga nagkalisud sa ilang pagpuyo.

Ang hepe sa CDAU midugang sa pagpahayag nga kini maoy rason ngano nga maoy unang gipatutukan ni Governor Yebes sa iyang anti-poverty program ang 2nd district.

Matud pa ni Pacilan ang gibuhat karon sa gobernador dili lamang kutob diha sa paghatag ug kahigayunan sa mga katawhan sa kabarangayan nga makabatun ug tarung nga panginabuhi ilawom sa iyang Hi-Green Program nalakip na usab niini ang pagpa-enroll sa mokapin sa 26,000 ka kabus nga pamilya sa ZaNorte sa National Health Insurance Program pinaagi sa PHILHEALTH uban na sa kaugalingong programa sa gobernador ang Provincial Health Care Assistance Program.

Sa nasayran si Labadlabad walay programa para sa PHILHEALTH sa Masa samtang sila si Congresswoman Cely Jalosjos-Carreon ug Congressman Cesar Jalosjos nagbatun sa ilang tagsa tagsa ka programa sa health care insurance.

Samtang si Mr. Fortunato Recentes sa CDAU mibutyag nga gawas sa probinsiya nga nanghatag ug PHILHEALTH sa mga kabus nga katawhan sa kabarangayan adunay pipila ka mga munisipyo ang nagbatun usab ug susamang programa apan limitado.

Matud pa ni Recentes sa gihimo nilang pagsubay walay programa si Labadlabad para sa PHILHEALTH sa Masa sulod sa iyang distrito.

 Sumala pa nila ang kongresista sa 2nd district samtang nagpuyo sa luho nga kinabuhi kay sapian gilibutan usab siya ug daghang lungsuranon nga wala makadawat sa iyang tabang para pagtubag sa ilang kawad-on.

Sa samang bahin, gihagit karon ang representante sa 2nd congressional district sa Zamboanga del Norte asa na ang iyang Hunger Mitigation Program atubangan sa giluwatang kamanduan ni House Speaker Prospero Nograles sa paggamit sa ilang pork barrel sa nasangpit nga katuyuan.

Kini ang gipalanog sa pangulo sa Community Development Assistance Unit o CDAU nga si Mr. Ronilo Pacilan isip reaksiyon sa pahayag ni Congressman Rosendo Labadlabad sa iyang pakigpulong sa pagbukas sa Hudyaka Festival diin gipitkan sa kongresista si Governor Rolando Yebes ngano mogastu ug daku ang probinsiya taliwala sa kamahal karon sa pagkaun ug petrolyo nga maoy giatubang sa katawhan.

Matud pa ni Pacilan sa kabahin sa kagamhanang probinsiyal sa paglingkud pa lang sa unang termino ni Governor Yebes sa tuig 2004 gisugdan gilayon sa paglusad niini ang pagpakig gubat batok sa kawad-on sa atong mga katawhan diin unang gipahigayon ang poverty mapping survey ug misunod sa pagka himogso ang Barangay Indigent Beneficiaries Organization nga karon maoy magpakadawat sa mga livelihood programs sa probinsiya ilabi na ilawom sa Hi-Green Program sa buhatan sa agrikultura.

Kabahin sa Hudyaka Festival matud pa ni Pacilan usa sa programa sa gobernador nga nagtinguha nga makamugna ug economic activity para atong mga katawhan makasapi ug adunay kuwarta nga ikapalit ug pagkaun.

Panahon sa Hudyaka Festival ang mga buhing hayup sa atong mga mag-uuma paspas ug kahalin kay adunay dakung demand sa pagkaun busa adunay kuwarta ang atong mga katawhan nga magamit nila sa pagpalit usab ug pagkaun para sa ilang pamilya kay sa ang gobyerno mamalit ug NFA rice para ipanghatag nga dili usab maapod tanan kay limitado man, dugang sa pahayag ni Pacilan.

Sumala pa niya sulod na sa nakalabay’ng tulo ka tuig nga gipahigayon ang Hudyaka Festival napama-tud-an na nga kini usa ka epektibong makinaryas nga mopadagan sa atong ekonomiya sa ZaNorte.

Gipasabot sa hepe sa CDAU nga sa prinsipyo nga gisubay karon ni Governor Yebes maoy gusto niini nga madasig ang atong ekonomiya para mahagit usab ang atong mga mag-uuma sa pagpalapad sa ilang production sa pagkaun ug ang gagmay nga negosyante mahatagan ug higayon nga makapatigayon.

Matud pa ni Pacilan, si Labadlabad kay kongresista na man unta ang angayan niyang hisgutan unsay iyang gibatunang programa karon batok sa kapobrihon nga iyang gipatuman sulod sa 2nd congressional district sa ZaNorte kay sa iyang tandugon ug hilabtan ang Hudyaka nga nahitabo wala pay food crisis ug kini gipadayon tungod kay nakita nga kini naghatag ug kahigayonan sa atong mga yanung katawhan nga makapatigayon.

Ang hepe sa CDAU nagkanayon nga sa ilang monitoring sulod sa 2nd district wala gayud silay nakita nga programa nga gibuhat si Labadlabad batok sa kagutom kay sa ilang pagbisita sa nagkadaiyang barangay wala sila makamatikod ug makabati niini.

Karon nga usa siya ka opisyal sa gobyerno kinahanglang molihok usab ang kongresista sa 2nd district sa pagtubag sa kagutom sa katawhan ilabi na nga si Speaker Nograles mimandu kanila sa paggamit sa ilang pork barrel para sa Hunger Mitigation Program sa presidente.

Gihagit usab ni Pacilan si Labadlabad nga unta iyang ipadayon ang iyang paglugway ug pahuwam ngadto sa mga mag-uuma sama sa iyang gibuhat sa panahon nga dili pa siya usa ka opisyal sa gobyerno para ang mga katawhan makatanum pinaagi sa iyang pautang apan kinahanglan nga ipaagi na sa gobyerno ang programa para dili maputos sa utang ang mga katawhan diin ang iyang pribado rang kompaniya maoy mabulahan.

Sa samang bahin mipalanog sa iyang paghagit si Pacilan sa mga lideres sa simbahan nga magpakita usab ug lihok diha sa pagtabang sa ilang mga parukyano atubangan sa nasinati karong kalisud sa atong katawhan.

Matud pa niya ang simbahan adunay respon-sibilidad sa pagtabang sa iyang kaugalingong mga parukyano ug dili lamang kini solo nga tulubagon sa gobyerno.

Sa kabahin sa probinsiya matud pa ni Pacilan si Governor Yebes sa miagi pang mga tuig sa paglingkud niini makigbugno na sa kawad-on sa atong mga katawhan bisan wala pa mahitabo ang food crisis tungod kay nasunod niini ang pagka deklarar sa ZaNorte nga maoy pinaka pobre nga lalawigan sa tuig 2003 sa panahon ni Amatong.

Samtang adunay mga report nga napuno karon sa bugas ug palay ang dakung bodega ni Labadlabad diha sa Taga, Katipunan nga daw maoy naghoarding karon sa bugas dinhi sa atong lugar.

Ang kongresista sa Segundo distrito gihagit nga unta kini iyang ipagawas ug ibaligya nga baratu ngadto sa mga katawhan para makatabang siya sa nasinati karong kalisud sa pagkaun kay sa iyaha ra kini taguan diha sa iyang dakung bodega ug ibaligya nga magpadaku ug ginansiya. (The New Nandau, Vol. XVII No.48)

 

Rotary Club of Dipolog
wala mahimuot sa walay  kooperasyon sa City DepEd

Kapin kon kulang 17 mil ka mga nagkalain-laing libro sa mathematics, English, science ug uban pang gene-ral references ang malam-pusong gitunol sa Children International Philippines and Housing Foundation Inc., pinaagi ni Mrs. Re-becca Fuellos ug sa Rotary Club of Dipolog kaniadtong adlawng Biyernes, Mayo 31, 2008 ngadto na sa City Government of Dipolog ug sa Department of Education, Dipolog City Division.

Dakong kalipay sa Mayor ning dakbayan human kini mahibalo sa pag-abot ning maong mga libro nga gikan pa gayud sa mga katawhan sa United States. Mahibaluan nga ang dakbayan sa Dipolog migahin ug P36,000.00 alang suporta sa pag transport ning mga libro gikan sa kauluhang Maynila. Bisan pa man sa nagkadaghang aktibidadis sa Mayor, naningkamot kini nga makaabot gyud sa maong turn-over ceremony.

Apan dakong kasilo sa donor ning maong mga libro ug sa Rotary Club of Dipolog, human ang Department of Education ning dakbayan, mao pa mismo ang mipakita ug kawalay interest sa maong gipanghatag nga mga libro.

Hibaluan usab nga ang City Government of Dipolog, Department of Education – Dipolog City Division, ang Rotary Club of Dipolog, ug Children International Philippines and Housing Foundation Inc., mipirma ug usa ka Memorandum of Agreement nga nistipulate sa mga responsibilidad sa kada party ning maong kasulatan, nga milakip sa paghatag unta ug bisan manpower man lang kon mga teachers sa maong ahensiya. Apan, doul lamang sa pito ka mga teachers ang miadto sa pagsegregate sa 17 mil ka mga libro, nga nakapadugay usab sa paglihok sa mga segregation, maayo na man lang gani, nga adunay giandam ang Rotary ug Rotaract Club of Dipolog nga mga miyembro niini, nga maoy milihok ug nanguna gyud sa pagsegregate sa mga libro.

Mag alas dos na sa hapon ayha pa miabot ang Schools Division Superintendent sa maong ahensiya ug daling mipadungag ug dugang mga tawo nga mutabang ug arrange sa maong mga donations, apan, dakong pagka “disappoint” sa Children Foundation, human, naglumba ug panguli ang mga staffs ug empleyado sa DepEd Dipolog tungod kay hapit na ang oras sa alas singko. Tungod ba kini kay wala nay bayad ang ilang kahago sa paglapas sa oras alas singko? Ang maong MOA nga gipirmahan sa 4 ka agensiya, dugay nang gihatag sa DepEd Dipolog, apan makitang wala pangandami ang pag-abot ning maong mga libro, gani, last hour na ayha nakapirma ang Division Superin-tendent tungod kay pila ka semanang, wala kini mipakita o mususi man lang gani sa iyang opisina.

Hibaluan usab, nga ang dakbayan sa Oroquieta, malampusong natagaan ug kapin 11 ka container vans nga adunay kapin kon kulang 17 mil ka bag-ong mga libro ang nadawat na niini o mukabat sa duol, 187 mil nga nagkalain-laing libro, nga pwede pud untang madawat sa DepEd Dipolog ug siyudad. Apan sa gipakitang kapabayaan ug kawalay interest sa maong agensiya subo ug labo na gayung mautro pa ang maong klase sa pag-panghatag.

Gapasabot ba kini nga ang gihimong pagpanabang sa mga Civic Organizations, International donors, ug bisan man lang sa mga estudyante o ginikanan, sa panahon sa gimugnang Brigada Eskwela sa DepEd wala usab gitagaan ug Bili? O Katapulan na sa mga empleyado sa gobyerno ang mitukar kay gustong dawat limpyo na lang? O tungod ba kini sa kawalay tarong superbisyon ug pagpabaya sa atoang schools division superintendent? (The New Nandau, Vol. XVII No.48)

 

 

 

NOTE: SEND US YOUR NEWS.  Tell us what's going on in your barangays, clubs, schools, businesses and non profit organization. You can also send notices and announcements.
          

 

    Email to webmaster@dipolognon.com

      
Google
WEB THE DAILY DIPOLOGNON
 

THE DAILY DIPOLOGNON
DIPOLOG CITY, PROVINCE OF ZAMBOANGA DEL NORTE PHILIPPINES
www.dipolognon.com www.dipolognon.net  www.dipolognon.org  Keyword: dipolognon
www.dipologcity.com  www.dipologcity.net  www.dipologcity.org  www.dipolognon.com  www.dipolognon.net  www.dipolognon.org    www.dipolog.org  www.dapitan.com   www.eartajo.com  www.cagayandeoro.us 
www.artajo.us www.artajo.info www.eddie.artajo.name www.zamboangadelnorte.com  www.zambonorth.com  www.pagsalabuk.com  www.dipolog.biz www.artajo.biz  www.plasticextrusion.us www.cebu.org
www.davao.us  www.tagum.com  www.giscard.us  www.pagadiancity.com www.malaybalay.net  www.ozamis.com  www.tangub.com  www.oroquieta.net
 www.nabunturan.com www.znuc.org www.znch.ph
www.gingoog.com  www.ozamiz.us www.general-santos.com  www.surigao.net  www.kidapawan.com  www.iligan.us www.raelene.us  www.cagayan-de-oro.com   www.mutyasadipolog.com
 
www.zamboanga.net   www.palmbeachgardens.us   www.islandgarden.net  www.cotabato.net  www.tacurong.com  www.butuan.us  www.pagadian.com  www.dipolog.us
www.zamnai.com
www.dipologhotels.com
   www.dipologpress.com  www.dipologsardines.com   www.extrusion.us www.ozamizcity.com  www.marawi.net www.dipologchamber.com

Copyright©2008 by The Daily Dipolognon All Rights Reserved  PRIVACY POLICY & DISCLAIMER
Email : webmaster@dipolognon.com  Since October 18, 2000