June 2, 2005

VM Brilliantes mipalanog sa iyang dakung pasalamat sa Probinsya

Naka-ani ug positibong pagdayeg sa besi mayor sa lungsod sa Labason ang gipahigayong flying session sa Sangguniang Panlala-wigan sa ZANORTE. Kini gipalanog ni Vice Mayor Isabel Brilliantes, sa pagtapos sa flying session sa Sangguniang Panlalawigan human madasoni usab ang ilang gipangayo nga proyekto.

Si Vice Mayor Brilliantes, sa interview nagkanayon nga siya nakadayeg sa gisagup nga lakang sa Sangguniang Panlalawigan sa pagpahigayon sa maong flying session aron sa pagbisita sa nagkadaiyang kalungsuran sa atong lalawigan aron sa pagsuhito sa matuod nga situwasyon o kahimtang sa kada lungsod.

Sa samang bahin gipasalamatan usab ni Vice Mayor Brilliantes si Governor Rolando Yebes nga gipamatuod gayud niini ang iyang slogan nga “Una sa tanan ang Katawhan” diha na sa pagdumala sa atong probinsiya nga ang kagamhanang probinsiyal mobisita gayud sa mga kalungsuran. Ang bisi mayor sa Labason, nagpalasamat usab nga sila sa Sangguniang Bayan nakasaksi kon giunsa sa mga meyembro sa balay balauranan sa probinsiya ang pagpahigayon sa ilang session diin sigurado nga makatabang kanila sa pagpalig-on ug dugang sa ilang pagka magbabalaod.

Giila ni Vice Mayor Brilliantes nga nagmabungahon kaayo ang gipahigayong flying session ilabi na nga gihatagan sila sa ilang gipangayo nga usa ka milyon ka pesos nga pundo para sa ilang legislative building. Gipanghinaut ni Vice Mayor Brilliantes nga ipadayon sa probinsiya ang pagpahigayon sa maong kalihukan kay sigurado nga malipay gayud ang mga tawo nga makita nila ang mga opisyal sa gobyerno nga mobisita sa nagkadaiyang munisipyo. (The New Nandau, Vol. XIV No. 53)

Pasulit sa Career Service Professional ug Sub-Professional karong Oktubre 16, ‘05

Ang Probinsiyal nga buhatan sa Civil Service Commission dinhi sa dakbayan ang nagapahibalo karon alang na sa pagpahi-gayon  sa Career Service Professional ug Sub-Professional nga pasulit dinhi sa dakbayan karong umaabot Oktubre 16, ning tuiga. Mao kini ang kasayuran nga nakuha sa City Information Office pinasikad sa usa ka sulat nga nadawat sa buhatan ni City Mayor Roberto Y. Uy, kagahapong adlawa, Mayo 25, 2005, gikan sa gikaasoy’ng buhatan.

Sigun sa dugang kasayu-ran, nga ang pag-apply alang sa pagkuha ning maong pasulit ang bukas ngadto kang bisan kinsa, basta nagpangidaron lang kini ug 18 anyos panahon sa iyang pagkuha ning maong pasulit. Dugang usab nga gipaklaro sa nasangpit nga buhatan nga tungod kay adunay gisitar nga quota alang sa pagdawat ug mga aplikantes alang ning maong pasulit, ang pag-apply niini ang gipaagi sa “First Come-First Serve Basis”, diin aduna kini examination fee nga 350 ka pesos.

Ang mga Application forms ang makuha didto sa Probinsiyal nga buhatan sa Civil Service Commission, ning dakbayan, nga nahimutang didto sa Zambo. Norte Sports Complex, gikan sa Hunyo 6, 2005, samtang ang pag-submiter pagbalik ning maong mga aplikasyon ang paga-dawaton hangtud sa Septembre 16, ning tuiga, Apan sa panahon nga makab-ot na ang gidaghanon sa mga aplikantes sibo sa gisitar nga quota bisan dili pa moabot ang deadline, ang pagpangdawat sa mga aplikasyon ang paga-hunongon na.

Ang mga interesadong aplikantes ang gi-awhagan sa pagdala uban kaniya sa: A) 4 ka kopya sa bag-ong hulagway (1 ½” x 2”), adunay name tag nga nagapatik sa Apelyido; Pangalan; ug Middle Initial. (Ang mga hulagway nga gi-scanned, gi-photocopy, o gipaagi sa computer ang dili pagadawaton); ug B) Identification Card (original ang xerox copy).

Dugang usab nga gipaklaro ning maong buhatan nga walay “third party” ang pagatugotan nga mohimo sa pag-apply alang sa hingtungdang examinee, ug hugtanon usab niini nga gi-discouraged ang pag-submiter sa mga aplikasyon pinaagi sa koreo. (Dipolog CIO Press Release, Alb)

P1.1M Proyekto ang gibilin sa SP Province para sa Labason

Mokabat sa P1.1 milyones ka pesos nga balor sa proyekto ang gibilin sa Sangguniang Panlalawigan sa Zamboanga del Norte sa ilang flying session kagahapong adlawa didto sa lungsod sa Labason. Ang nasangpit nga pundo gikuha gikan sa Provincial Identification Fund sa vice governor ug mga board members.

Kini maoy tubag sa duha ka buwag nga resolusyon nga gipadas-og sa Sangguniang Bayan sa Labason nga naghangyo sa balay balauranan sa probinsiya sa pagpahat sa gikinahanglan nilang pundo para sa pagkonstrak ug ilang kaugalingong legislative building ingon man pagpalit sa ilang computer system sa konseho. Sa kabahin ni Vice Governor Francis Olvis kini mihatag ug P300 mil pesos sa iyang PIF para sa pagkonstrak sa legislative building sa Labason.

Samtang ang lima ka mga board members nga gikan sa 3rd legislative district sa lalawigan sama kanila ni Board Member Joseph Brendo Ajero, Norbideiri Edding, Anecito Darunday, Felormino Cabale ug Board Member Ismael Arasam minggahin ug tag P100,000.00 kada usa kanila sa ilang PIF para sa maong proyekto. Ang ubang mga board members gikan sa 1st ug 2nd legislative district ang ming-chip-in ug tag P50,000.00 sama kanila ni Board Member Uldarico Mejorada, Edgar Baguio, Beda Bonga Hamoy, Florentino Dulang, Cedric Adriatico ug Edionar Zamoras.

Kini wala pay labut sa gikomitir nga pundo sa mga bokal para sa nagkadaiyang proyekto sa mga barangay sa Labason. Hinoon wala mapahigayon dungan sa flying session ang consultative-dialogue ni Governor Rolando Yebes kay mitambong kini sa usa ka hinanaling tigum didto sa Malacanang.

Ang gobernador gikatakdang makigtagbo sa mga barangay ug local officials sa Labason alang sa iyang consultative-dialogue sa unang semana sa buwan sa Hunyo. Wala makatambong sa maong flying session mao sila si Board Member Patrick Israel Chan ug Felixberto Bolando, apan gipasalig ni Board Member Mejorada nga ang duruha andam usab mopahat ug pundo sa ilang PIF para sa nasangpit nga proyekto sa Sangguniang Bayan sa Labason.

Si Vice Governor Olvis sa iyang kabahin mipasalig nga kon unsa man ugaling ang kuwang sa pundo para sa paghingpit proyekto kini iyahang pagatubagon ilawom sa iyang pundo. (The New Nandau, Vol. XIV No. 53)

REKOMENDASYON BATOK BAGALANON IPAGAWAS NA SUNOD SEMANA

Gipahibawo sa chairman sa committee on human rights and good government sa Sangguniang Panlalawigan sa ZANORTE nga ipagawas na nila karong semanaha ang ilang report kabahin sa kwesyonabling aktuwasyon sa kanhi provincial accountant. Kini ang gipahibawo ni Board Member Anecito Darunday, human mapakyas sa pagtuman si Teonilo Bagalanon kanhi officer-in charge sa Provincial Accountants Office, sa pagtuman sa iyang gikasaad nga mangayo ug public apology atubangan sa Sangguniang Panlalawigan.

Sa sayu pa sa dihang gipahigayon sa komitiba ni Darunday ang imbestigasyon sa kwestyonabling aktuwasyon ni Bagalanon, kini misaad nga mangayo na lamang siya ug public apology atubangan sa mga meyembro sa balay balauranan sa probinsiya. Angayang kahinumduman si Bagalanon napunting sa imbestigasyon sa Sangguniang Panlalawigan human gipadas-og ni Board Member Uldarico Mejorada ang usa ka resolusyon nga mingkwestyon sa gihimo niining pagbasura sa vouchers sa gobernador ug bisi gobernador diha na sa paglugway ug financial assistance alang sa National Movement of Young Legislators o NMYL.

Sumala pa walay opisyal nga tubag nga gihimo si Bagalanon sa gihimo niyang aksiyon kon unsay rason sa pagbasura sa request sa gobernador ug bisi gobernador, nga alang kang Mejorada usa ka klarong paglapas sa probisyon sa balaod sa Ehtical Standards for Public Officials and Employees. Sa gipahigayong imbestigasyon, gikasabutan nga dili na lang ipadayon ang pagpadas-og ug lakang batok kang Bagalanon kay mangayo kini ug public apology atubangan sa Sanggunian. Apan milabay na lang ang pipila ka regular session sa Sangguniang Panlalawigan wala mopakita si Bagalanon aron sa pagtuman sa nahauna niyang pasalig atubangan sa committee on good government.

Gawas sa maong aktuwasyon ni Bagalanon, gireklamo usab kini ni Board Member Norbidiere Edding nga giingnan siya ug “yawa” diha sa ilang panag-istorya sa telepono. Matud pa ni Darunday ang report sa iyang komitiba gihikling una tungod sa hangyo ni Bagalanon nga mangayo ug public apology. (The New Nandau, Vol. XIV No. 53)

ZN POLICE MIPAHIGPIT SA SIGURIDAD

Gipahigpitan karon sa Zamboanga del Norte Provincial Police Office ang siguridad sa ZANORTE atubangan sa mga hulga sa terorismo ug mga kriminalidad. Kini ang gipahibawo ni Police Senior Superintendent Jufel Adriatico, Provincial Police Director sa ZANORTE diin sa miaging duha ka semana ang mga operators, drivers ug kundoktor sa mga public utility vehicles ang gipa-ilawom sa usa ka seminar diha na sa pagtabang sa mga otoridad sa pag-ila sa mga posibling hulga sa atong siguridad.

Matud pa ni Superintendent Adriatico kini nga lakang sa kapolisan sa lalawigan susama usab sa gihimo sa kapolisan sa Misamis Occidental sa pagpangulo ni Police Senior Superintendent Mariano Yanga. Si Adriatico midugang sa pagpahayag nga kini maoy rason kon ngano nga nabulabog ang paglusot sa tulo ka mga hostage takers sa Rural Tours Bus No. 166 tungod kay wala nila damha nga sa lungsod sa Sapang Dalaga, Misamis Occidental may inspection nga pagahimoon ang mga otoridad sa tanang mga sakyanan nga mogawas ug mosulod sa ilang lalawigan.

Ang provincial police director midugang sa pagpahayag nga gihatagan na niya ug higpit nga kamanduan ang tanang mga stationary checkpoints nga mopahigayon gayud sa higpit nga inspection bisan ug malangay ang pagbiyahe sa mga pasahero ug ubang motorista aron sa pagsiguro nga walay mga dautang elemento ang makasulod sa probinsiya. Ilabi na gayud ang mga checkpoints sa Barangay Tolon, Rizal ug Gatas sa Kalawit nga maoy nagsilbing entry ug exit sa tanang mosulod ug mogawas sa ZANORTE. 

Kahinumduman mga tulo na ka semana ang nakalabay usa ka bus sa Rural Transit of Mindanao ang gisakyan ug tulo ka mga hold-uppers nga mingbiktima sa ilang mga pasahero ug dinhi sa Dipolog mikawas. Sa miaging semana laing bus sa Rural Transit ang gihold-up na usab diin mga pasahero ang nahimong biktima ug didto kini mahitabo sa lungsod sa Bonifacio.

Karong semanaha mao ang nahitabong hostage taking, sa dihang tulo ka mga armadong pasahero ang nababoy sa ilang gisakyan nga Rural Tours Bus No. 166 sa dihang gipahunong kini sa checkpoint didto sa Sapang Dalaga. Tungod sa ilang pagdumili sa pagsurender gihimong hostage sa tulo ka armado ang nahibiling mga pasahero nga wala maka kanaug sa bus sa dihang gipahunong sila sa checkpoint. (The New Nandau, Vol. XIV No. 53)                

LANDO BIBO GILUSAD SA LUNGSOD SA LEON POSTIGO

Pormal nga gilusad usab didto sa lungsod sa Leon Postigo, Zamboanga del Norte ang Barangay Indigent Beneficiaries Organization kon Lando BIBO. Kini gipahigayon didto sa Barangay Tiogan kagahapong adlawa dungan sa paghatag sa hinabang nga pagkaun ug ang provincial health card alang na sa unang 121 ka mga meyembro sa Lando BIBO.

Si Mayor Rolando Tabliso, sa iyang pakigpulong mipalanog sa dakung pagpasalamat sa gihatud nga sirbisyo sa kagamhanang probinsiyal atubangan sa kalisud nga giatubang sa katawhan. Gipasabot ni Mayor Tabliso nga ang kalisud dili lamang sa ilang lungsod gisinati kon dili lakip na sa ubang mga lugar sa atong probinsiya.

Si Mayor Tabliso midugang sa pagpahayag nga bisan tuod unsa ka gamay sa tabang nga nalugway sa probinsiya para sa ilang lungsod, apan kini usa ka maayo nga timailhan nga nasugdan ug iyang gipanghinaut nga mapun-an sa umaabot nga mga panahon. Sa samang bahin kini nagpasalamat ngadto kang Governor Rolando Yebes nga wala gayud hikalimti niini ang pagtabang sa naglisud nga mga katawhan.

Si Board Member Joseph Brendo Ajero nga maoy mirepresentar kang Governor Yebes sa maong okasyon, nagkanayon nga makalaum ang mga kabus nga katawhan nga sila karon ang prayoridad sa kagamhanang probinsiyal nga sirbisyohan. Samtang si Board Member Norbidieri Edding maoy mipapanumpa sa mga opisyales sa Lando BIBO sa Barangay Tiogan, Leon Postigo.

Pipila sa mga meyembro sa Lando Bibo, nagpasalamat usab sa gilugway nga sirbisyo sa kagamhanang probinsiyal nga sumala pa nila karon pa nila sukad matilawi. (The New Nandau, Vol. XIV No. 53)

KAPITOLYO NANGHATAG KARON UG HINABANG

Wala na maghuwat ang kagamhanang probinsiyal sa ZANORTE nga pangayuan ug tabang, diin sa kaugalingon niining lakang milusad ug relief operations sa mga barangay nga nakitang maoy grabing naapektuhan sa nakalabay nga ting-init. Kini gidungan sa kagamhanang probinsiyal sa paglusad usab sa Barangay Indigent Beneficiaries Organization kon Lando BIBO.

Ang unang relief operations gipahigayon didto sa lungsod sa Jose Dalman diin upat ka mga hilit nga barangay niini maoy unang nakadawat sa tabang sa probinsiya nga naglangkub na sa bugas, delatang pagkaun, libreng planting materials ug ang provincial health cards. Kini gisundan sa pagpahigayon didto sa lungsod sa Katipunan sa lagyo niining barangay sa Fimagas ug Bulawan ug sa miaging adlaw didto sa Barangay Patagan ug Meses sa lungsod sa Manukan.

Ang kalihukan gipangunayan gayud ug tambong ni Governor Rolando Yebes, dungan sa pagpasabot ngadto sa katawhan nga ang gihimo karon sa probinsiya mao ang pagtuman lamang sa iyang sumbanan nga “Una sa tanan ang katawhan”. Gipasabot sa gobernador nga ilawom sa maong slogan ang mga katawhan dili na maperwesyo pa sa pag-adto sa kapitolyo aron sa pagpangayo ug tabang ingon man sa gikinahanglang sirbisyo, kay ang probinsiya na karon maoy moduol kanila.

Samtang sa kabahin usab ni Board Member Cedric Adriatico, kini nanawagan sa tanang meyembro sa Lando Bibo nga kinahanglang tugbangan usab nila ang gipakita karong lihok sa kagamahanang probinsiyal sa ilang mga pagkugi para makab-ot ang gitinguha nga kalambuan. Matud pa ni Board Member Adriatico naara sa pangayo sa ilang grupo nga BIBO nga sa pinulungang Latin kini nagpasabot nga “buhi” busa gikinahanglan ang ilang dugang kakugi para magpabiling buhi.

Kini nga kalihukan gipangunahan sa buhatan sa gobernador uban na sa Community Development Assistance Unit nga maoy unang nagpahigayon sa Indigent Mapping Survey sa tibook probinsiya. Uban usab sa misabak niini ang Provincial Social Welfare and Development Office nga gipanguluhan karon ni Mrs. Grace Sabal ug sa Office of the Provincial Agriculturist nga gipanguluhan ni Atty. Bernardo Concha. (The New Nandau, Vol. XIV No. 53)

MATOY SUPAK SA CHARTER CHANGE

Gipadayag karon pa lamang ni Congressman Roseller Barinaga sa 2nd Congressional District sa Zamboanga del Norte ang iyang pagsupak nga amendahan ang atong 1987 Constitution. Kini ang giklaro ni Congressman Barinaga sa programang Kapihan sa RPN sa 1948 Cafeteria, atubangan sa gipadas-og karong lakang didto sa ubos balay balauranan alang na sa pag-amendar sa atong batakang balaod sa nasud.

Matud pa ni Congressman Barinaga dili maayo para sa atong nasud nga magsige ta ug usab-usab sa atong konstitosyon wala pa gani nato hingpit nga mamapatuman ang tanang unod sa atong kasamtangang batakang balaod, ato na usab kini pulihan. Ang kongresista sa Segundo distrito nagkanayon nga angayang suwayan una sa pagpatuman ang unod sa atong 1987 Constitution, sa dili pa ta moambak sa lain na usab nga konstitosyon.

Gipasabot sa kongresista nga anaa pay daghang mga probisyon sa atong konstitosyon nga hangtud karon wala pa mahatagi ug katumanan. Usa na niini mao ang dynasty provision sa atong konstitosyon nga kanunay lamang gipadas-og sa balay balauranan sa nasud apan pabiling wala maaprubahi hangtud karon.

Para ni Congressman Barinaga ang gitinguhang pag-uswag sa atong nasud ilawom sa bag-ong konstitosyon dili lang gihapon makab-ot kon ang mga kasamtangan karon natong lideres sa gobyerno mao rang mga tawhana ang pabiling modumala sa atong kagamhanan. (The New Nandau, Vol. XIV No. 53)
 

Tulay sa pangulo DACON ray nakapahimulos

Ang DACON ra maoy nahimaya sa proyektong “Tulay sa Pangulo”, samtang nahikawan ang ubang mga barangay sa Zamboanga del Norte nga maoy labing gikinahanglan sa iyang mga katawhan. Gibutyag ni Governor Rolando Yebes, nga mokabat sa tulo ka mga tulay ilawom sa programang “Tulay sa Pangulo” ang gibutang sa kanhi gobernador sulod sa lugar sa DACON diin ang mga sakyanan ug trak sa maong kompaniya maoy makapahimolos.

Angayang kasayran ang mga yanung magbubuhis sa lalawigan lakip na sa mga opisyales niini dili makapasagad ug agi sa mga dalan nga iyaha sa DACON kon kini dili makapananghid daan sa management. Kini nasinati mismo sa mga opisyales sa lalawigan sa pipila ka mga higayon nga sila gusto moagi sa dalan gikan sa Sirawai lahos sa dakbayan sa Zamboanga diin motadlas sa concession area sa DACON sa lungsod sa Sirawai. Ang nasangpit nga tulo ka tulay gihatag sa kanhi gobernador para magamit lang sa usa ka pribadong kompaniya.

Samtang ang ubang mga barangay sa lalawigan nga dugay rang nanginahanglan sa nasangpit nga pasilidad wala hatagi ug pagtagad sa kanhi administrasyon. Usa na sa gihatag nga ehemplo ni Governor Yebes mao ang panginahanglan sa pagbutang ug tulay paingon sa Barangay Bulawan, Malasay ug Fimagas sa lungsod sa Katipunan tabok sa daku nga Dicayo River. Matud pa ni Governor Yebes, wala siya mahimoot sa nahitabo nga ang tulo ka tulay nga iyaha sa “Tulay sa Pangulo” gihatag lamang ngadto sa pribadong kompaniya ug kini iyaha nang gisulti ngadto kang Presidente Gloria Macapagal-Arroyo kinsa mipalanog usab sa iyang kapungot.

Tungod niini ang gobernador miapilar sa mga kalungsuran nga nangayo ug tulay nga maghuwat-huwat lamang kay aduna na siyay 15 ka bag-ong tulay ilawom sa nasangpit nga programa sa presidente. Nalakip na niini ang pagtiwas sa tulay sa Minaog nga maoy mokonektar sa Biasong ning dakbayan sa Dipolog. (Press Freedom, Vol. XVII No. 47)

Provincial Mining Ordinance pasado ikaduhang pagbasa

Naaprubahan na sa ika duhang pagbasa ang provincial mining ordinance sa gipahigayong flying session sa Sangguniang Panlalawigan sa ZANORTE didto sa lungsod sa Labason kagahapong adlawa. Kini human gipadas-og sa committee on environment and natural resources nga gipanguluhan ni Board Member Norbidiere Edding ang report human mapahigayon ang public hearing may kalabutan na sa pagpa-umento sa extraction fee sa sand and gravel ug pebbles extraction.

Hinoon kini nakaangkon ug pagbabag gikan ni Board Member Edgar Baguio kinsa mipadas-og nga sa sunod na nila nga regular session dasonan sa ika duhang pagbasa ang maong ordinansa kay sa iyang nakita aduna pay daghanang mga depekto niini nga angayang maamendahan para malikayan ang paghinagbo nila ug problema sa higayon nga ipatuman na ang maong balaodnon. Daghang mga punto nga giisa si Baguio nga para niya angayang amendahan sa dili pa nila aprubahan sa ika duhang pagbasa ang maong mining ordinance.

Ilawom sa gipadas-og karong lakang ang gisingil nga extraction fee giumentuhan lamang ug balig 10 porciento gikan sa orihinal nga taripa sa buhis nga tag P15.00/kerosene can ngadto na sa tag P16.50/kerosene can. Ang umento nga gipadas-og sa komitiba ni Edding ubos ra kay sa unang proposal nga gipadas-og sa Provincial Environment and Development Office o PEDO nga P75.00/kerosene can.

Matud pa ni Board Member Edding nga balig 10 porciento lamang ang ilang gidasonan nga umento sanglit mao ra kini ang gitugot usab sa balaod nga dili molapas sa maong gitas-on ang ipatuman nga umento. Si Baguio mitataw nga wala siyay pagsupak sa ordinansa, kay ang ipadas-og niyang amendment constructive ug makahatag ug dugang ngipon sa maong balaodnon.

Apan sa kabahin ni Board Member Uldarico Mejorada, ang gipangayo nga karyo ni Baguio dili na mahimo kay ang ilang internal rules naghisgut nga makausa ra mapa-ilawom sa second reading ang usa ka balaodnon. Tungod niini gibutang sa botasyon ang nasangpit nga isyu atubangan sa pagsupak ni Baguio.

Apan nakurat ang ubang meyembro sa mayorya sa dihang si Board Member Beda Bonga Hamoy, didto mibotar pabor kang Baguio nga dili una nila dali-dalion ang pagpanday sa ordinansa ug ibutang una ang pipila ka mga mahinungdanong amendment. Si Board Member Hamoy nagkanayon nga siya kombinsido lamang sa baruganan ni Baguio nga kinahanglang tun-an sa ug dugang ang maong balaod-non sa dili pa pandayon sa ika duhang pagbasa.

Samtang si Baguio mipahayag usab nga wala siyay laing tuyo kon dili ang pagkoriher lamang sa pipila ka depekto nga iyang nakita sa maong balaodnon. (Press Freedom, Vol. XVII No. 47)