Pinusilay sa Gloria de Dapitan
FERMINDOZA MIMANDO 'ASAP' SA SIT MOSUBMITER UG FINAL REPORT

Police Provincial Director P/SSpt. Mario Fermindoza mimando "ASAP" (as soon as possible) sa Special Investigating Team nga maka-submiter ug hinanali nga final report kabahin sa nahitabong pinusilay sulod sa Gloria de Dapitan tali nila ni Marine Sgt. Pompeo Tanawan, PO2 Policarpio Icao, Jr ug ang igsoon nga si Jail Inspector Raul Icao nga nahitabo karong bag-o.

Ang maong Special Investigating team ang gilangkuban sa Criminal Investigation Detection Group kun CIDG, Crime Laboratory ug mga kaubang imbistigador gikan sa PNP Provincial Command.

Gipahayag ni P/SSpt. Fermindoza nga ang maong inbistigasyon mamahimong patas bisan nga ang usa sa nalambigit sa maong shoot-out mao ang usa ka miyembro sa Dapitan PNP. Hinoon, giklaro ni Director Fermindoza nga wala niya hatagi ug ultimatum ang maong Special Investigating Team sa pag-submiter sa ilang final report apan gusto niya sa mas madaling panahon aron kon dunay agrabiado sa pikas ug pikas habig nga pamilya, makahimo na sila nga makapasaka ug kaso sa korte.

Hinoon iyang gipasabot nga ang final report sa Special Investigating Team (SIT) kini maoy basihanan diha na sa pag-claim ug mga benipisyo sa pamilya sa hingtungdan. Aduna usay order si Fermindoza nga pasakaan ug kasong kriminal batok niadtong mga tawo nga nalambigit sa maong shoot-out.

Gibutyag ni Fermindoza nga ila unang istoryahon ang abogado depende sa resulta sa imbistigasyon sa Special Investigating Team alang na sa hini-usang pagpasaka sa kaso. Gikompirmar usab sa Provincial Director nga dili tinood nga nakabsan na sa iyang kinabuhi ang napusilan nga si Jail Inspector Raul Icao. (The New Nandau, Vol. XV No. 46)

Pagsulong sa police station dili mahitabo sa Zanorte –Fermindoza

“Sa una tingali posible apan karon aware na ang atong mga kapulisan sa mudos operandi sa mga NPA, di na mahitabo nga sulongon dinhi ang usa ka Police Station” mao kini ang tubag ni Police Senior Superintendent Mario Fermindoza ang Povincial Director sa kapulisan dinhi sa lalawigan kalabot sa pangutana kung luwas ba ang matag Police Station dinhi sa Zanorte batok sa posibleng pag-ataki sa mga walhong pundok.

Si PNP Provincial Director Fermindoza nagkanayon nga iya nang gimando-an ang tanang hepe sa kapulisan sa Zanorte nga andam sa tanang panahon batok sa presinsiya sa mga kaaway. Kini naglangkub sa pagbutang ug usa ka boom o barikada sa usa ka Police Station aron paglikay sa mga sakyanan nga makasulod atbang sa Police Station.

Gimandu-an usab niya ang mga hepe sa kapulisan atol sa iyang pagbisita niini nga usbon ang ruta o agi-anan sa mga sakyanan nga mopaduol sa usa ka Police Station. Gipabutangan usab niya ug mga sand bags ang matag estasyon sa kapulisan aron magsilbing dugang depensa ingon man pagpahimutang sa ilang puwersa sa mas taas nga posisyon aron makabintaha sila batok sa mga kaaway ug uban pang mga taktika nga makapanalipod  kanila.

Iyang gipaklaro nga sigurista ang mga walhong grupo ug di gayud sila mo-ataki basata kanunay nga naka-alerto ang habig sa gobyerno. Gibutyag ni Provincial Director Fermindoza nga naka-Hightened Alert karon ang tibuok puwersa sa kapulisan dinhi sa Zanorte. (Mindanao Star, Vol.II No.15)

VISUAL ART EXHIBIT BUKSAN SA DOMINGO

Sa nalambigit nga kalamboan, gidapit ang publiko pagsaksi sa pagbukas sa Pagsalabuk Visual Art Exhibit, usa sa mga kalihokan nga gihan-ay sa Dipolog Pagsalabuk Festival, nga gikalatid sa adlawng Doming, Mayo 14, sa may alas 4:00 ang takna sa kahapunon.

Ang nasangpit nga Pagsalabuk Visual Art Exhibit didto ipahimutang sa Dipolog Boulevard, kauban sa Agro-Trade and Food Fair tents, ug gikalatid nga adunay lima ka grupo sa mga lokal nga mga artists/pintor ang mopahimutang sa ilang mga buhat ning maong exhibit.

Si kinsa kadtong interesadong mopalit sa mga buhat sa mga artists ang mahimong mopalit usab sa ilang gikahimut-an nga mga butang. (Dipolog Chronicle, Vol.V No.46)

Atol sa World Red Cross Day
Rotaract Club of Dipolog, PNRC nagpahigayon Mass Blood Letting

Nagmalampuson ang mass blood letting activity nga gipahigayon sa Rotaract Club of Dipolog diha sa buhatan sa Philippine National Red Cross ning dakbayan sa Dipolog dungan sa pagsaulog sa World Red Cross ug Red Crescent Day niadtong Mayo 8.

Matod pa ni Joshua Bicoy, presidente sa Rotaract Club of Dipolog, kaabag nila sa maong kalihokan ang Blood Galloners Club of Zamboanga del Norte ug PNRC-Zamboanga del Norte Chapter.

Tumong sa gipahigayong blood letting activity nga makatabang sa pagtigom ug igu-igong pondo sa dugo sa lokal nga buhatan sa Red Cross aron magamit sa panahon sa emerhensiya, ilabi na sa mga lumulupyo sa lalawigan sa Zamboanga del Norte ug duha ka dakbayan sa Dipolog ug Dapitan.

Sa nasangpit nga kalihokan, gikatahong miabot ngadto sa 4,950cc sa nagkalain-laing tipo o klase sa dugo ang nadonar sa 11 ka mga blood donors nga boluntaryong nagpakuha sa ilang dugo.

Gumikan sa naangkong kalampusan, kinasing-kasing nga gipasalamatan sa mga pangulo sa duha ka kahugpu ngan nga sila si Joshua Bicoy ug Marichie Gako ang tanang miduyog ug nagdonar ug dugo sa nasangpit nga okasyon. (PIA, Dipolog Chronicle, Vol.V No.46)

Manigsaca: Normal ang Rizal, di lang kompyansa

“Sa higayon nga normal ang sitwasyon di gyud ta mokompyansa, one step ahead gyud ta,” mao kini ang gipahayag ni Mayor Roseller Manigsaca sa lungsod sa Rizal atubangan sa mga tahu nga sulungon ang Rizal sama sa nahitabong pagsulong sa tapad  nga lungsod niini sa Sapangdalaga Misamis Occidental pipila ka adlaw na ang nakalabay.

Matud pa ni Mayor Manigsaca nga peaceful ug normal ang ilang lungsod apan di lang mokompiyansa. Para kaniya nga bisan pa man ug dunay hulga o normal ang sitwasyon sa usa ka dapit gikinahanglan gayud nga magbantay kanunay sama sa usa ka boy scout nga kanunay’ng andam.

Iyang gipaklaro nga kung aduna may mga istorya nga dunay alarma sa lungsod sa Rizal apan para kaniya siya nagpasalamat sa Ginoo nga nagpabiling malinawon ang ilang dapit. Si Mayor Manigsaca nagkanayon nga isip ang ilang lungsod maoy unang parte ug agi-anan pasulod sa lalawigan sa Zanorte ug kung adunay mga tawo nga naglaraw sa pagguba ug molumpag sa maayong imahin sa ilang lungsod ug dinhi sa lalawigan daku gyud ug katarungan nga unhon ang lungsod sa Rizal

Apan sigun sa iyang nasayran si Mayor Manigsaca nagkanayon nga walay mga tawo nga naglaraw ug dautan sa ilang lungsod.

Hinoon gi-angkon sa mayor nga na-apektuhan gamay ang ilang ekonomiya ug sa natad sa turismo ang nahitabong pag-ataki sa mga armadong tawo didto sa lungsod sa Sapangdalaga. Matud pa niya nga tungod sa kaduol sa Sapangdalaga sa ilang lungsod natural usab nga maalarma sila apan iyang gipaniguro nga nagpabiling normal ug under control ang ilang sitwasyon apan wala sila mokompiyansa sa bisan unsang matang sa hulga sa ilang dapit.

Gipaklaro usab ni Mayor Manigsaca nga alerto ang ilang lungsod sa tanang panahon batok sa kahadlok ug sa tanang matang sa hulga sama sa terorismo, kasakit ug kagutom. (Mindanao Star, Vol.II No.15)

17 anyos lalaki gipusil sulod sa Arcade

Gipusil sa wala pa mailhing tawo ang usa ka 17 anyos nga lalaki sulod mismo sa Festival Shopping Arcade niadtong Huwebes sa gabii.

Ang biktima giila nga usa ka Ruel Benaglis, 17 anyos taga barangay Gupot sa lungsod sa Manukan ning atong lalawigan sa Zamboanga del Norte. Kasamtangang nanimuyo sa barangay Barra ug usa ka fishing boat operator sa Mitos Fishing Boat. Sa gihimong inisyal nga inbistigasyon sa mga otoridad, nasayran nga samtang ang biktima ang nag-inom-inom kini kauban sa iyang higala nga usa ka Randy Capungan sulod mismo sa Video-K bar sa Festival Shopping Arcade wala mailhing tawo ang kalit nga mipusil ngadto sa biktimang si Benaglis.

Ang biktima ang na-igo kini sa iyang walang abaga ug gidali kini pagdala sa Zamboanga Del Norte Integrated Provincial Hospital Samtang ang tawo nga mipusil sa biktima ang daling mipalayo dayon sa lugar human sa hitabo.

Sa pagrespondi sa mga otoridad gibasol pa niini ang mga sibilyan tungod sa kapakyas sa paghatag ug impormasyon ilabina niadtong nakasaksi sa hitabo hinungdan nga wala na tagad pa nila magukod ang mamumuno sa pagsibat niini. Gituhu-an nga personal nga domot ang hinungdan. (Mindanao Star, Vol.II No.15)

Walay angayang kabalak-an, bisan gisulong sa mga rebildi ang silingan niining lungsod
Rizal apil sa package tour sa Hudyaka Festival

Bisan nga apil sa nakadawat ug hulga sa seguridad ang lungsod sa Rizal ning atong lalawigan sa Zamboanga Del Norte human nga gi-sulong sa mga miyembro sa NPA ang Police Station sa silingan nga lungsod niini nga mao ang Sapang Dalaga, Misamis Occidental dili gihapon angayang mabalaka ang mga katawhan. Kini maoy giklaro ni Dr. Jose Mante, Municipal Tourism Designate sa lungsod sa Rizal, Zamboanga del Norte

Gipahayag ni Dr. Mante nga dili angayang mabalaka ang mga torista nga mobisita sa maong lungsod tungod kay ila na kining gipangandaman ilabina ang paghatag ug igong seguridad pinaagi sa tabang sa 101st brigade Philippine Army.

Ang lungsod sa Rizal ang apil kini sa package tour sa Discover Zamboanga del Norte sa Hudyaka Festival. Anaa sa maong lungsod ang giilang tourist spot nga mao ang Maniway Peak and Highland Resort ug ang Bayanihan Island. Mitumaw ang kahadlok sa mga katawhan sa lungsod sa Rizal human nga gisulong sa mga miyembro sa NPA karong bag-o ang kuwerpo sa kapolisan sa Sapang Dalaga sa pagtuo nga ang lungsod sa Rizal na usab ang sunod nga sulongon subay sa mga nanggawas nga mga hulungihong.

Matod pa ni Dr. Mante tumang pagpangandam ang ilang gihimo gani sa pinaka-ulahi nga meeting sa tourism council sentrong nahisugtan ang kabahin sa peace and order. Hangtud karon nagpabilin pa gihapon nga red alert ang lungsod sa Rizal apan gipasalig ni Dr. Mante nga kinsa kadtong mobisita sa ilang lungsod walay angayang kabalak-an.

Sa susamang bahin andam na karon ang lungsod sa Rizal sa pagsalmot sa Hudyaka Festival. Nasayran kang Dr. Mante nga gipahatan gayud nila ug igong pundo ang pagpangandam alang sa pagsalmot sa maong dakong kalihukan sa probinsiya. Apil sa ilang gipangandaman mao ang matag gabii nga pasundayag ug ang street dancing competition.

Giingon ni Dr. Mante nga mas nindot ang ilang presentation karong tuiga kung ikomparar sa mi-aging tuig. Nasayran nga ang trainor sa Prutas Festival sa Rizal kini ang gikan sa Tangub City. (Mindanao Star, Vol.II No.15)

OPA preparado na para sa Hudyaka,
DA Sec. Panaganiban mahidangat

Preparado na ang buhatan sa Provincial Agriculture Office alang na sa pagsugat sa ika-52 anyos nga kasaulogan sa Zamboanga del Norte isip pagkahimugso niini nga probinsya karong umabot Mayo 30 hangtud na sa petsa 10 sa bulan sa hunyo ning tuiga.

Sa nasayran gikan ni Atty. Bernardo P. Concha ang hepe sa buhatan sa Agrikultura nga sumala pa andam na ang mga klasi-klasing seedlings sa mga kahoy ug prutas nga ipang –baligya  unya alang na sa pagahimoong Agri-Industrial Fair sulod sa maong kalihukan.

Nakahan-ay na usab ang mga talamdan nga pagamugna-on nga seminar ngadto sa interesado nga mga mag-uuma o kadtong buot nga makahibalo sa mga pamaagi diha na sa natad sa pang-agrikultura.

Gibutyag pa ni Concha nga aduna nay pipila ka mga kalungsuran ang misumite sa ilang confirmation alang na sa pag-angkon unya ug Industrial Booth nga maoy kabutangan sa ilang mga produkto.

Gilauman usab ni Concha nga magmabulokon ug mas sadya ang pagsaulog sa Hudyaka Zanorte Festival 2006. Sa susamang kalamboan, mahidangat dinhi sa dakbayan sa Dipolog si Sec. Domingo “Den” Panganiban ang sekretario sa Department of Agriculture karong umaabot Hunyo 7 ning tuiga isip maoy pinasidunggang bisita ug mamumulong alang na sa ipahigayong paglusad sa programa nga HI-GREEN Program ug ang Organic Fertilizer nga gimugna sa Provincial Agriculture.

Duyog sa pagsaulog sa Balik Hudyaka Zanorte Festival 2006 karong petsa 30 sa bulan sa Mayo hangtud na sa petsa 10 sa bulan sa Hunyo ang maong kalihukan sa buhatan sa Provincial Agriculture nagtumong kini sa pag-promoter sa programa n Governor Rolando Yebes ug sa kagamhanang probinsyal alang na unya sa paghatud ug dugang serbisyong pang-agrikultura sa mga kalungsuran dinhi sa probinsya.

Sumala pa ni Atty. Bernardo Concha ang Provincial Agriculturist nga personal niyang gi-imbitar si Sec. Den Panganiban aron masaksihan sa nasyunal nga buhatan ang kamatinud-anon ug paningkamot nga makab-ot ang priority nga programa sa kagamhanang probinsyal pinaagi na sa naasoy’ng buhatan

Kini basi sa na-implementar nga programa sa amahan sa probinsya nga mahatagan ug dakung pagtagad ang mga nanga-upaw nga kabukiran. (Mindanao Star, Vol.II No.15)

ZANORTE Fishing Assoc. mopahigayon Fishing Tournament

Gikatakda nga mopahigayon ug Fishing Tournament ang Zanorte Fishing Association ning dakbayan sa Dipolog.

Kini pagahimuon karong Mayo 21 ning tuiga diha sa Break Water ning siyudad. Ang mananaug sa maong torneyo makadawat sa ganting salapi nga usa ka libo ka pesos lakip na ang usa ka reel alang sa unang ganti ug 500 ka pesos usab alang sa ikaduhang dapit lakip ang usa ka reel.

Ang ika-tulo ngadto sa ika-pitong puwesto magpakadawat usab ug tagsa ka reel. Subay niini ang Zanorte Fishing Association nagdapit sa mga mahiligon sa pagpamasol sa pagsalmot sa maong torneyo.

Sa mga gustong mosalmot, adunay rehistrasyon nga 130 pesos libre na ang pani-udto. Sugdan ang nahisgutang torneyo alas 7:00 sa buntag ug motapos pagka-alas 5:00 sa kahapunon.

Alang sa dugang inpormasyon mahimong kontakon sila si Ike Gamalinda ug Central Barangay Captain Kenny Ong. (Mindanao Star, Vol.II No.15)  

Costume Parade Competition karong Mayo 30 na

Isip paghatag ug dugang bulok sa pagbukas sa Hudyaka ZaNorte 2006 Festival karong Mayo 30, ang kagamhanang probinsyal magpahigayon sa Costume Parade Competition diin ang mga sumasalmutay mao ang ZaNorte Provincial Government Offices, National Government Agencies, nagkadaiyang Local Government Units ug Non-Governmental Organization.

Ang maong mga partisipante magasul-ob sa nagkalain-laing sapot sa tribo sama sa subanen, Kalibugan, Intsik, Bol-anon, Siquijodnon, bisaya, Tausog/Maranaw/Samal/Kalibugan, Negrense ug Illongo alang sa category A ingon man mga tribo nga i-representar sa mga lokal nga pangagamhanan sa category B ug Non-Governmental Organizations sa category C.Pagasalmutan ang maong parada sa mga contingent sa WOW Philippines Regional Road show samtang ang probinsya usab magpakita sa nagkadaiyang tribal ethnic roots sa ZaNorte.

Alang sa mahimong mananaug makaangkon sa ganting premyo ug plaque alang sa most Enthusiastic, Colorful ug Popular Non-Government Organization delegate. (Mindanao Star, Vol.II No.15)

PCI Macapaz nangandam mgadagkong kalihukan sa Dipolog

Naghimo na ug pagpangandam ang buhatan sa kapolisan alang sa umalabot nga mga kalihukan sa Pagsalabuk Festival sa Dipolog ug Hudyaka Festival sa ZaNorte nga sugdan sa maghinapos nga petsa niining bulan sa Mayo hangtud Hunyo, kini maoy pamahayag ni PCI Romeo Macapaz hepe sa Dipolog City Police Station.

Matud pa ni PCI Macapaz nga nakigdugtong na siya karon sa buhatan sa Police Provincial Command pinaagi na ni Provincial Director PSSupt. Mario Sardon Fermindoza para sa augmentation sa pwersa sa 9th Regional Mobile Group nga gidispatsar karon dinhi sa probinsya. Kini tungod sa nagdulong nga kasaulogan sa  Pagsalabuk pinasubay sa kapistahan ni Sr. San Vicente Ferrer ang patron sa syudad karong Mayo 27 ingon man ang selebrasyon sa probinsya diha sa Hudya-ka ZaNorte nga magsugod karong Mayo 30 ug molung-tad hangtud sa Hunyo 10.

Pinasikad sa maong mga kalihukan diin seguradong dugukan sa daghanang katawhang dumuduong ug mga balikbayan nga taga-lalawigan, gipatas-an pa karon ni Chief Macapaz ang pag-alerto sa mga ginsakpan tungod sa gituhuang pagsugwak unya sa katawhan ingon man ang mga dautang elemento sa katilingban nga mopahimulos sa maong kahigayonan.

"Dili lang pud unta magkumpyansa ang mga katawhan sa pagdala-dala sa ilang mga mahalong butang aron dili usab kini makadani sa mga dautang tawo nga naghulat lamang sa higayon nga makabiktima", dugang pa ni Macapaz.

Nasayran usab nga duha lamang ka mga kaso ang wala mahatagi ug kasulbaran sa iyang buhatan diin kini mao ang tulis nga nagpanghitabo kaniadtong bulan sa Abril didto sa barangay Barra ingon man ang Chiong murder case nga wala pa masayri kun kinsa ang minghimo sa maong linuog nga krimen. (The New Nandau, Vol. XV No. 46)

Plate # sa mga sakyanan nagkulang –LTO

Dili lamang problema dinhi sa Dipolog ug probinsya sa Zamboanga del Norte ang kakulangon sa plaka sa mga sakyanan ilabi na sa mga motorsiklo kay kini sa una pa nga nasinati. Gipaklaro ni LTO District Office Chief Yusoph Ismael nga ang problema nga kanunay nilang masinati mao ang padayon nga pagsaka sa bayranan sa rehistrasyon sa mga sakyanan ilabi na sa mga motorsiklo.

Mao usab kini ang giangkon ni Supply Officer Edmund Bilang sa rehiyonal nga buhatan sa Land Transportation Office IX. Matud ni Bilang, nationwide ang problema sa kakuwangon sa mga plaka sa mga sakyanan sanglit ilang giangkon nga ang bugtong planta sa kaulohang Manila dili makatubag sa demand sa mga vehicle plates nga iapod-apod sa tibuok pilipinas.

Ngani matud niya, sa pagkakaron ang LTO regional office nakabaton ug tres mil ka mga vehicle plates nga ilang gikuha gikan sa Ilocos sa Region II. Para dinhi sa Dipolog ug Zamboanga del Norte, may gigahin sila nga mokabat sa kinientos ka mga plaka nga posibling iyang ipadala sa LTO district office karong semanaha.

Aminado si Bilang nga dili gyud makabastar ang ilang buhatan sa pag-release sa mga vehicle plates atubangan sa nagkasaka nga demand matag tuig. Ngani karong tuiga misaka ngadto sa 80% ang rehistrasyon sa mga motorsiklo sa tibuok rehiyon nuybe kon itande sa nakalabay'ng tuig. Kini tungod usab sa ilang obserbasyon nga ang mga motorsiklo maoy gigamit karon sibling de pasaheru-ang sakyanan nga naila nang gitawag ug habalhabal. Gawas pa, nagkadaghan ang motor gumikan kay mas makadaginot ug gasolina ang mga katawhan atubangan sa walay puas nga pagsaka sa presyo sa lana. (The New Nandau, Vol. XV No. 46)

The New Nandau Police Reports:
Olvis nadakpan tungod sa drugs

Prisohan maoy nadulngan sa pag-umangkon ni Vice Governor Francis Olvis human madakpan sa mga polis nga nagtiner ug illegal drugs atol sa gipahigayong drug buy bust operation sa miaging gabii.

Ang Drugs Special Operation Task Force Operatives misikop kang Bob Dangcalan Olvis, Jr. alyas Tata Budlat, 35 anyos nagpuyo sa balay sa iyang ugangan sa General St. Estaka ning dakbayan sa Dipolog. Atol sa pagronda sa balay sa suspetsado ang kapolisan nagdala ug search warrant nga gipermahan ni Hon. Judge Yolanda Bautista sa Regional Trial Court Branch 9 tungod sa paglapas sa Republic Act 9165.

Nakuha gikan sa posisyon ni Olvis ang dagkong pinotos nga shabu, duha ka cellphone ercison ug sony ericson, 300 pesos nga marked money ug laing 270 nga iyang halin. Matud sa kapolisan, ila na daan natiktikan si Olvis nga namaligya ug shabu apan karon pa gayud nila masakpi sa akto human malamposon nilang gihimo ang drug buy bust operation.

Sumala pa nga si Olvis usa ka drug usher, taudtaud nang mipahulay sa pagpamaligya ug shabu. Apan karon, bisan pa kon empleyado kini sa Capitolyo ubos sa opesina sa bise gobernador nga iyang "uncle", sigi kining makit-an nga moadto sa Sapang Dalaga ug Ozamis. Wala pa hinoon makuhae sa iyang reaksiyon si Vice Governor Francis Olvis kabahin sa pipila niya ka mga kawani ilabi na sa iyang pag-umangkon nga nadakpan nga sumala pa sa tinubdan, bisan oras ting-opesina siging eskapo kay dunay illegal nga transaksiyon sa gawas apan siging nagdawat ug suweldo sa gobiyerno. (The New Nandau, Vol. XV No. 46)

Tulis na pod! P62 nadala sa tulisan

Sa pikas bahin, taliwala sa paningkamot sa PNP pagpakgang sa mga nagpanghitabonbg tulis dinhi sa dakbayan sa Dipolog, lain na usab nga biktima sa hold-up sa Purok 2 sa Barangay Sta. Isabel samtang ang biktima gikan nag-withdraw ug kuwarta sa bangko.

Ang biktima nailhan nga si Elvira Pasuit Bagundol, 43 anyos, minyo lumolopyo sa Sta. Isabel ug maoy tag-iya sa E.P Bagundol Junk Buyer. Matud sa kapolisan, sa wala pa mahitabo ang tulis, ang managtiayong Edwin ug Elvira nagwithdraw ug kuwarta sa Allied Bank sa may Rizal Avenue. Pag-abot sa ilang balay, ang bana nagpahiluna pagparking sa ilang motorisklo nga gisakyan samtang ang asawa nagtindogtindog pabilin pa sa gawas.

Duha ka lalaki sakay sa motorsiklo kalit nga mibutho armado sa pistola diritso nga mition ni Elvira ug mideklarar nga hold-up ug milabne sa iyang gidalang bag nga may sulod, P62 mil ka pesos. Lakip sa nadala sulod sa bag ang 3510 Nokia cellphone ug mga importanting papeles.

Ang mga suspetsado misakay sa usa ka Honda Wave color itom, walay plate number paspas nga misibat sa wala masayreng direksiyon. (PongsCap, The New Nandau, Vol. XV No. 46)

Kampanya sa kapolisan batok illegal suportado sa kagamhanang probinsyal

Tungod sa paningkamot nga maminusan ug hingpit gayud nga masumpo ang mga illegal nga kalihukan sa lalawigan hugot karon nga gisuportahan sa kagamhanang probinsiyal ang kampanya sa kapulisan batok sa bisan unsang matang sa illegal nga kalihukan nga nagapanghitabo dinhi sa Zanorte.

Si Police Senior Superintendent Mario Fermindoza ang Provincial Director sa kapulisan dinhi sa Zanorte nagpasalamat sa suporta nga gihatag sa kagamhanang probinsiyal pinanguluhan ni Gov. Lando Yebes diha sa ilang kampanya batok sa illegal nga kalihukan.

Siya midugang nga gumikan sa maong suporta nga gihatag sa kagamhanang probinsiyal kini nakatabang ug daku diha sa pagkunhod sa mga illegal nga kalihukan dinhi sa atong dapit. Iyang gipklaro nga  sa tanang mga kampanya nga ilang gipahigayon kini gisuportahan gayud sa lokal nga pangagamhan sa probin-siya ug mga kalungsuran.

Para kaniya nga nakatabang gayud sa ilang mga nahimong kalampusan ang suportang gihatag sa kagamhanang probinsiyal diha sa ilang pagpakgang sa mga illegal nga kalihukan nga nagapanghitabo dinhi sa Zanorte.

Gibutyag ni Provincial Director Fermindoza nga gihimo karon sa kapulisan sa iyang pagpangulo ang ilang tahas diha sa pagsulbad sa mga krimen ug pagpatuman sa balaod. Malipayon usab niyang gipahibalo nga atol sa ilang komperinsiya tali sa mga hepe sa kapulisan sa matag lungsod ug duha ka siyudad dinhi sa Zanorte karong bag-o nagpakita ug halos siento porsiento ang kalampusan nga naangkon sa kapulisan diha sa pagpakigbatok sa mga nagkadaiyang krimen. (The New Nandau, Vol. XV No. 46)

Population growth goes down

The National Statistical Coordination Board (NSBD) has reported this week that the country’s annual population growth went down to a rate of 1.95 percent last year from 2.1 percent in the previous five years.

Economic authorities saw the deceleration as a positive indicator for the economic burdens of Filipino families to ease, paving the way for more opportunities and for better food, education and health. Government officials were also optimistic that the country’s poverty-reduction goal could be achieved.

The Philippines, which is the world’s twelfth most populous country, has for its medium-term target a growth rate of 1.94 percent, which the latest population growth rate was nearing such a goal.

Statistics from the population office of the provincial government has also shown that Zamboanga del Norte’s annual population growth rate in 1995 – 2000 was 1.42 percent, compared to 2.46 percent in 1990 – 1995 and to 2.68 percent in 1980 to 1990. The office has no data yet on the province’s population growth rate for the period, 2000 – 2005.

But a population program officer at the provincial population office was positive that the annual population growth rate of the province these recent years would not be greater than 1.42 percent.

This population program officer believed that for economic reasons most of the people today would prefer small families.

“With the high cost of living nowadays, it’s not a joke to raise children who need to be fed, clothed and educated,” the population officer stressed. (PIA, The New Nandau, Vol. XV No. 46)

Sibutad andam na alang sa Hudyaka' 06

"Tanang activities sa Hudyaka among apilan," mao kini ang gipahayag ni Mayor Lolita Tolentino sa lungsod sa Sibutad ning lalawigan kalabot sa ilang pagpangandam alang sa nagsingabot nga HUDYAKA Festival sa ZaNorte.

Matud pa sa Mayor nga andam na sila sa mga kalihukan sa Hudyaka. Siya midugang nga ang mga kalihukan nga ilang gipangandaman naglangkob sa street dancing competition, Miss Zanorte ug mga produkto sa agrikultura.

Ang lungsod sa Sibutad na-ila na nga abunda sa mga nagkada-iyang pagka-ong dagat sama sa mga kinhason diin ang sa-ang maoy inila na kaayo sa maong dapit. Si Mayor Tolentino nagkanayon nga ang ilang pagsalmot karon sa hudyaka susama sa nakalabay'ng tuig kini magdala sa pangalang KINHASON FESTIVAL.

Matud pa sa mayor nga nag-andam na sila ug mga tipaka sa mga nagkada-iyang kinhason nga magsilbing dayan-dayan sa ilang sapot alang sa pagsalmot nila sa street dancing competition. Kahinumduman nga sa naklabay'ng Hudyaka napa-ila na ang mga nagkada-iyang produkto sa lungsod sa Sibutad diin ang kinhason gayud maoy ilang nag-unang produkto.

Ang HUDYAKA Festival sa ZaNorte hingpit na nga pagasugdan karong Mayo 30 ug molungtad sa Hunyo 10 ning tuiga. (The New Nandau, Vol. XV No. 46)

Achievers Award guidelines sa ZANORTE gipagawas na

Mipagawas na karon ug guidelines ang komitiba sa Achievers Awards sa Zanorte alang na sa nominasyon ug pagpili niini alang karong tuiga. Subay sa guidelines nga gipagawas adunay 14 ka mga kategoriya nga naglangkub sa Local Governance alang sa Local Chief Executive, Business, Education, Agriculture, Arts and Entertainment, Medicine, Law, Peace and Order, Environment, Science/Technology/Engineering, Sports, Tourism, Media ug Employment Generation.

Aron nga mamahimong ma-qualify alang sa award, sa local Chief executive kinahanglan nga kini ang incumbent, nakatampo diha na sa kalambuan sa lugar nga maoy iyang gi-serbisyohan pinaagi sa epektibong pagpatuman sa mga programa ug proyekto.

Sa individuals, kinahanglan kini ang Filipino citizen, lumad nga taga sa Zamboanga del Norte, nakatampo sa kalambuan sa probinsiya pinaagi sa epiktibong pagpatuman sa programa, gawas pa nakahatag kini ug dugang garbo ug dungog sa atong lalawigan.

Alang sa organisasyon o grupo, kinahanglan nga ang opisina ang nagabasi gayud kini sa Zamboanga del Norte, nakatampo sa kalambuan sa atong lalawigan pinaagi sa gipatuman niining programa ug nakahatag ug dugang garbo ug dungog sa atong probinsiya.

Sa rules and technical requirements nga gipagawas sa komitiba ang nominasyon bukas ngadto sa individual o organisasyon. Bisan kinsa nga tawo o organisasyon mahimong maka-nominate ug usa apan dili mosubra sa tulo sa matag kategoriya diha sa individial o organisasyon. Sa nomination forms kinahanglan nga ang mo-fill-up mao kadtong nag-nominate nga walay relasyon sa iyang gi-nominar ug ang porma ang ipa-notaryo.

Ang wards committee ang maoy mosala sa tanang nominasyon sa dili pa ang makuting pagpili sa mga finalist nga himoon pinaagi sa Panel of Jurors.

Ang deadline sa pag-submiter sa nominasyon kutob lamang sa alas dose sa tungang gabii karong Mayo 12, 2006 adlaw nga biyernes ug ang Awarding Ceremony himoon karong Hunyo 2 ning kasamtangang tuig.

Ang nomination form mahimong makuha ug e-submiter ngadto sa buhatan sa Provincial Attorney, Peronnel Division sa buhatan sa Gobernador ug sa Provincial Planning and Development Office.

Ang Achievers Award kini ang gipaha-om subay na sa ika 54 ka tuig nga Founding Anniversary sa Zamboanga del Norte ilalom sa Yebes Administration. (The New Nandau, Vol. XV No. 46)

P1.5M projects gisubhan sa 3 ka barangay sa La Libertad

Nakomparar sa tulo ka mga kapitanes sa lungsod sa La Libertad ning lalawigan ang gipakitang mga kalampusan ni Governor Rolando Yebes sa iyang pamunuan karon sa probinsya atol sa gipahigayong inagurasyon sa mga proyekto kagahapon Mayo 9, 2006 sa mga barangay nga sakop sa maong lungsod nga mokapin sa 1.5 milyones ka pesos ang kinatibuk-ang kantidad nga napahat sa kagamhanang probinsyal inabagan usab kini sa Sannguniang Panlalawigan ug Congresswoman Cecilia Jalosjos Carreon sa unang distrito ning lalawigan.

Si Barangay Captain Rene Guiritan sa La Victoria ang namahayag nga sulod sa 15 ka tuig niya nga opisyal wala gayod sila katilaw ug proyekto bisan pa sa kanhi namunuan sa probinsya. Dako nilang pagpasalamat sa usa ka pre-fabricated multi-purpose building nga mingkatidad ug 505 mil ka pesos.

Si Mayor Manuel Solit sa maong lungsod ang nakakomparar usab sa kalampusan tali na sa pamunuan sa kanhi gaobernador aug ni Gov. Yebes sulod sa usa ka tuig ug walo ka bulan niini nga paglingkod isip amahan sa lalawigan

Si Barangay Captain Erix Jabon sa Sta. Catalina ang namahayag ug nagpa-salamat usab sa gobernador sa proyekto nga gitunol ngadto sa ilang barangay nga karon pa lamang sila nakadawat ug dinagkong mehoras gikan sa probinsya nga usa ka pre-fab nga barangay hall nga mokostar ug 505 mil ka pesos.

Sa barangay Sta. Cruz, tunga usab ka milyon nga concreting of barangay road ang nasubhan sa mga katawhan sa maong barangay. Si Kapitan Elpidio Japos Sr.. ang wala gayod magdahom sa maong proyekto tungod kay wala sila sukad makadawat ug kaayuhan sa kanhi gobernador.

Bisan pa man sa kaapiki sa panahon ni Gov. Yebes tungod sa preparasyon sa umaabot Hudyaka Festival, walay hunong gihapon ang iyang pagbisita sa mga kabaranggayan ning lalawigan aron mahatod ang mga proyekto ngadto sa tanang katawhan. (The New Nandau, Vol. XV No. 46)

RTC meeting malampuson

Malampusong napahigayon sa miaging semana ang paghimo sa Regional Tourism Council meeting didto sa Top Plaza Hotel ning dakbayan nga gitambongan sa mga nagkadaiyang Tourism Officers sa tibuok Rehiyon IX.

Gituki sa maong tigum ang umaabot paghimo sa Regional WOW Zampen showcase nga dungan usab sa mabulokong kasaulogan sa Hudyaka Zanorte dinhi sa dakbayan.

Lakip usab sa nasabutan sa maong konseho mao ang pagsalmot sa rehiyon IX sa himoong Philippine Travel Mart karong umaabot Septyembre 8-10 didto sa SM Mandaluyong City nga diin magtagbo ang tanang exhibitors gikan sa mga nagkalain laing probinsya dinhi sa nasud.

Samtang sa laing bahin, gihiusahan sa tanang myembro sa nasangpit nga konseho nga pagasuportahan ang himoong Hudyaka Festival ning lalawigan nga dungan sa paghimo sa Regional Wow Showcase dinhi sa probinsya. 

Matud pa ni Regional Tourism Director Ricardo San Juan nga nalipay siya nga dinhi ipahigayon sa Zamboanga del Norte ang Regional WoW Zampen karong tuiga tungod kay ang mga opisyales sa kagamhanang probinsyal niini adunay panaghiusa aron malambo ang turismo ning lalawigan. (The New Nandau, Vol. XV No. 46)

Mga hotel sa Dipolog nagsugwak

Halos puno na ang tanan nga mga rooms sa mga dagkong hotels dinhi sa dakbayan sa Dipolog sugod karong panahona taman sa tunga-tungang bahin sa bulan sa Hunyo.

Sa gihimong pakisusi nasuta daghan na ang mga bisita nga nag-pareserba sa mga hotels dinhi sa dak-bayan sugod ning semanaha. Usa sa nakitang hinung-dan niini mao ang nagsi-ngabot nga mga dagkong kalihukan nga mao ang Pagsalabuk Festival sa Dipolog ug Hudyaka Festival sa Zanorte nga magsugod karong Mayo 30 hangtud sa Hunyo 10.

Dugang nasayran nga kadaghan sa mga nag-pareserba kini ang lokal ug langyaw nga mga torista nga diin ang uban niini gidapit sa ilang matag kapikas nga lumad taga dinhi sa atong lalawigan nga atua na nanimpalad sa laing nasud.

Angayang masayran nga tipik sa programa sa probinsiya diha na sa pagpalambo sa natad sa torismo mao ang Balik Zanorte nga maoy tema karong tuiga sa Hudyaka Festival. Ang balik Zanorte mao ang pagdapit sa atong mga kaigsoonan nga taga Zanorte nga atua na karon nanginabuhi sa laing nasud sa pag-uli dinhi sa atong lalawigan ug kini ang nakita karon nga adunay positibong resulta. Kini dugang nakatampo sa ekonomiya sa atong probinsiya. (The New Nandau, Vol. XV No. 46)

Adventure Race ug Mountain Bike Tour gimugna sa Tourism Council –Atty. Ranillo

Gituyo karon sa pag-mugna sa Tourism Council ang mga bag-ong ideya sa mga nagkadaiyang kalihu-kan nga makahatag ug dugang bulok sa selebras-yon sa Hudyaka ZaNorte 2006", kini maoy gibutyag ni Atty. Michael Alan Ranillo Regional Tourism Chairman.

Duha ka mga dula niini mao ang 24-hour Adventure Race ug 2 days Mountain Bike Tour diin seguradong makahatag ug dugang kalingawan ingon man pag-aghat usab sa ubang mga probinsya ug dakbayan sa kasikbit ning probinsya nga mosalmot sa nahisgutang torneo.

Nagkanayon si Atty. Ranillo nga ang 24-hour Adventure Race gimugna sa grupo ni Basil Gonzales sa Dipolog Outdoor Society nga pagasalmutan kini sa nagkadaiyang team gikan sa mga dakbayan sa Zambo-anga, Dumaguete ug Ozamis nga mingkumpirma na sa ilang partisipasyon.

Kini mao ang 3-man race pinaagi sa pagsakay sa mountain bike, lakaw o dagan nga mag-agi sa mga trails gikan sa rotang Dipolog-Katipunan-Polanco-Piñan-Dapitan. Sa susamang kalambuan, gimugna usab ang 2 days ZaNorte Mountain Bike Tour nga pagasalmutan sa mga bikers sulod ning lalawigan.

Ang ilang rota alang sa unang adlaw nga pagkig-lumba magagikan sa mga kalungsuran sa Lioy -Leon Postigo – Salug - Sindangan padulong na sa syudad sa Dipolog samtang sa ikadu-hang adlaw ang rota mao Dipolog - Sergio Osmeña – Mutia – Piñan – Rizal – Sibutad – Dapitan - Polanco ug mosangko sa Zamboanga del Norte Sports Complex.

Matud pa ni RT Chairman Ranillo nga sa matag-lungsod nga agi-an sa mga bikers makadawat ang unang mahidangat sa usa ka libo ka pesos nga itunol sa mga hingtungdang mayores.

Niini, gilauman sa Tourism Council ug kagamha-nang probinsyal nga maka-aghat sa daghanang mga dumuduong ang umalabot nga mga kalihukan sa Hud-yaka Zanorte 2006 nga pa-gabuksan karong Mayo 30. (The New Nandau, Vol. XV No. 46)

Titulo sa Yebes property nabalhin sa Zanorte

Hingpit nang nabalhin sa pangalan sa lalawigan sa Zamboanga del Norte ang titulo sa katunga sa yuta ni Patricia Yebes nga nagpaila nga gipanag-iyahan na sa kagamhanang probinsiyal ang katunga sa maong propriedad.

Kini ang gibutyag ni Provincial Attorney Jes Gal Sarmiento, Jr. human nahingpit kagahapong adlawa ang nasangpit nga transaksiyon tali na sa mga sumosunod ni Patricia Yebes nga girepresentahan ni Belinda Bastillada nga maoy nanag-iya sa katunga sa maong yuta.

Sulod lamang sa usa ug tunga sa tuig nahimo sa administrasyon ni Governor Lando Yebes ang paghingpit sa transaksiyon nga mapalit ang nasangpit nga yuta ug mabutang sa pangalan sa probinsiya sa ZaNorte ang titulo niini nga gilingkuran lamang sulod sa 15 ka tuig sa panahon ni kanhi Governor Isagani Amatong.

Ang nasangpit nga transaksiyon naglambigit ug P11 milyones ka pesos nga palit sa maong property. Ang katunga karon sa maong yuta gipanag-iyahan sa managtiayong Dr. Eusebio Benemirito.

Ang nasangpit nga yuta ni Patricia Yebes maoy gitindugan sa pipila ka mga edipisyo sa probinsiya nga naglakip na sa swimming pool, convention center, social welfare office, executive building, grandstand A, teachers gym, tipik sa sports complex ug uban pa.

Ang maong yuta gigamit sa kagamhanang probinsiyal sulod sa taas na nga panahon nga wala gayud magbayad ug abangan ngadto sa mga tag-iya niini. Nahulog nga ang kagamhanang probinsiyal sa iyang paggamit sa maong yuta nahimong usa ka land grabber ug wala maghatag ug pakabana sa katungod sa mga nanag-iya niini.

Sa 15 ka tuig nga paglingkod ni Amatong pagka gobernador sa probinsiya ang bugtong nabuhat niini mao ra ang pagmandu sa buhatan sa Provincial Attorney nga makignegosasyon nila ni Bastillada. Sigun sa records sa kapitolyo nagpakita nga aduna nay giduso nga rekomendasyon ang kanhi provincial attorney sa ZaNorte ngadto kang Amatong nga paliton ang maong yuta sa presyo nga P800 matag kuwadrado metros nga giuyunan usab nila ni Bastillada.

Apan ang rekomendasyon sa kanhi provincial attorney gilingkuran lamang ni Amatong hangtud nga mingkanaug na lang kini sa kapitolyo pagka pilde sa eleksiyon sa 2004. Tungod sa pagligid sa tuig misaka ang presyo sa maong lote diin sa gihimong negosasyon sa administrasyong Yebes mao nay girekomendar sa special appraisal committee sa probinsiya nga ang tukmang presyo karon sa maong yuta nabutang na sa tag P1,600 matag kuwadrado metros.

Samtang giproseso na usab karon ang pagbalhin sa pangalan sa titulo sa laing lote nga gipalit sa probinsiya ang naila nga Martinez property nga nabutang sa tunga sa ZaNorte Sports Complex. Kahinumduman nga giaprubahan na sa Sangguniang Panlalawigan ang rekomendasyon ni Governor Yebes nga paliton ang maong lote sa presyo nga P12 milyones ka pesos.

Sa sayu pa gibutyag ni Mr. Edgar Ramoran ang tigpamaba sa mga sumosunod sa Martinez property nga sukad pa sa tuig 1992 sa administrasyon ni Amatong sila nakignegosasyon para paliton na ang maong property sa probinsiya. Sumala pa ni Ramoran gipasaligan sila ni Amatong nga bayran sa probinsiya ang Martinez property apan kinahanglan nga ipaagi sa korte ang negosasyon.

Apan sa dihang gisumitir na ang gikasabutang presyo sa palit sa maong property ngadto sa buhatan ni Amatong nga nasabutan ug nauyunan didto sa hukmanan, kini igo lang gilingkuran sa kanhi gobernador diin hangtud nga mingkanaug kini sa gahum nga walay nabuhat sa paghingpit sa pag-angkon sa probinsiya sa Martinez property.

Imbes sulbahon ug una sa kanhi gobernador ang mga yuta nga giukupahan sa probinsiya kansang titulo wala pa mabalhin sa pangalan sa ZaNorte apan dugay nang gigamit sa kagamhanan, ang gibuhat niini mao na hinoon ang pagpalit sa 18 ektaryas nga yuta didto sa Don Jose Aguirre sa Manukan nga mobalor ug P18 milyones ka pesos.

Sigun sa records sa kapitolyo nagpakita nga ang maong yuta sa Don Jose Aguirre hingpit nang gibayran sa panahon ni Amatong bisan ug wala pa mabalhin sa pangalan sa Zamboanga del Norte ang titulo niini. Kini karon ang problema nga gibilin sa kanhi gobernador nga gipaningkamutan nga matul-id para mabalhin na sa pangalan sa probinsiya ang titulo sa maong yuta.

Sa nasayran gipalit sa probinsiya ang maong yuta bisan ug sayud na sila daan nga adunay nag-okopar nga mga saup nga nakabatun na ug titulo sa maong yuta hinungdan nga hangtud karon wala pa mabalhin sa probinsiya ang pangalan sa titulo. Nahibaw-an usab ug gikonpirmar sa usa sa tag-iya sa maong yuta nga adunay upat ka ektaryas nga sikbit sa yuta nga napalit sa probinsiya nga gihatag ngadto sa kanhi opisyal sa lalawigan.

Giingon nga ang upat ka ektarya nga naangkon sa kanhi opisyal sa lalawigan gipalit, apan ang ubang sumosunod sa maong yuta mibutyag nga wala sila makadawat sa bahin sa halin niini kon ugaling gipalit man ang maong property. Hinungdan nga minglugwa ang pagtuo nga ang kuwatro ektaryas maoy komisyon nga gihatag ngadto sa opisyal sa lalawigan busa gidali-dali ang pagbayad niini bisan wala pa mabalhin sa pangalan sa probinsiya ang titulo sa yuta. (Press Freedom, Vol. XVIII No. 46)