2

Julio 5  2007

Human sa oath-taking
Bag-ong mga opisyales sa siyudad
ipahimutang sa ilang katungdanan

Ang mga bag-ong napiling opisyales sa dakbayan ipahimutang na sa ilang tagsa-tagsa ka mga katungadanan sa City Hall ug sa Sangguniang Panlungsod sa usa ka simple apan makahuloganong seremonyas buntag sa Domingo, Hulyo 1 atol gayud sa pagsaulog sa ika-94 nga kasumaran sa pagkahimugso sa Dipolog. Ang bag-ong mayor nga maoy pinakaunang napiling babayeng mayor sa dakbayan, Mayor Evelyn T. Uy modawat sa yawe ug selyo nga simbolo sa Dipolog gikan sa mogawas na nga Mayor Roberto Y. Uy, ug dayon mohatag sa iyang unang mensahe.

Ang pangbukas nga panalangin pangunahan ni Fr. Greg Canonigo, ang rector sa Holy Rosary Cathedral, opening remarks ni Konsehal Horacio Velasco ug closing remarks ni Konsehal Romulo Soliva. Ang ubang ipahimutang nga mga opisyales mao sila si Vice Mayor Senen Angeles ug mga Konsehales Peter Co, Raul Barbaso, Julius Napigquit, James Verduguez, Horacio Velasco, Romulo Soliva, Kenny Val Ong, Dante Bagarinao, Praxides Rubia and the only lady Marvelita Pinsoy.

Human sa hamubong programa sa plaza, mosunod dayon ang Grand Anniversary Parade gikan sa plaza padulong sa boulevard diin atua ang Trade and Food Fair, mga exhibit ug mga kalingawan nga molungtad sa pagkagabii nga maoy kahulogan sa Adlaw sa Dipolog. (Dipolog Chronicle, Vol.VI1 No.1)

Bagang duot sa mitambong sa oath-taking nagpailang kini malampuson

Sa nalambigit nga kalamboan, nahimong malamposon ang gipahigayong Oath Taking Ceremonies sa mga bag-ong napiling opisylaes sa Dipolog, mga lungsod sa Roxas ug Jose Dalman lakip ug ang bag-ong representante sa ikaduhang distrito sa lalawigan, nga didto gipahigaon sa AB Amatong Civic Center, ning dakbayan niadtong Lunes. Hunyo 25 base sa mabagang duot sa katawhan nga misaksi niini.  

Nanguna sa Dipolog mao ang labing unang babaye nga napili sa dakbayan nga si Mayor Evelyn Tang Uy, sa Jose Dalman  si bag-ong Mayor Russel H. Adaza, sa Roxas si gihapon Mayor Carlito A. Feras, si Kongresista Rosendo Labadlabad sa ikaduhang distrito, Board Member Edgar Baguio ug mga konsehales sa Dipolog. Mikabat sa kapin kun kulang 2,500 ang misaksi sa maong oath-taking ceremonies nga naglangkob sa ilang mga kapamilya, mga supporters, opisyales ug mga kawani sa lokal ug national nga kagamhanan, mga non-government organizations ug mga indibiduwal.

Sa  inaugural message nga gipabati ni bag-ong Mayor Uy, iyang gipasalig nga padayonon niya ang nahimong kaayuhan ug kalamboan sa iyang kapikas nga si Mayor Roberto Yu Uy kinsa iyang gidayeg nga usa ka sinsero nga public servant, mga proyekto sama sa pantalan sa Galas ug ang boulevard. Lakip sa iyang nag-unang mga programa mao ang pagdugang sa mga serbisyo nga nagapunting sa kaayuhan sa mga mga-uuma ug kababayen-an, ilabi na ang livelihood ug skills development sa mga babaye aron mahimong kapahimuslan nila diha sa ilang libreng oras sa panimalay.

Ipahimutang usab niya ang mga kalihokan nga dugang makapalambo sa turismo dinhi nga nakahatag karon ug dakung pag-ila sa Dipolog tungod sa kahapsay ug kalimpiyo sa dakbayan. Dugang gipasabot ni Mayor Uy nga iyang paningkamotan sa tanan niyang mahimo uban ang pagpanalangin sa Kahitas-an nga madugangan ang  kalambuan sa Dipolog, dili lang sa natad sa iyang pisikal nga kahimtang kondili lakip usab ang mga katawhan kinsa maoy nakahatag ug kinabuhi sa siyudad.  (Dipolog CIO Press Release, PRR)

Bansay-BANSAY SA Family Planning gipahigayon

Malamposong gipahigayon ang usa sa mga seryeng bansay-bansay sa Responsible Parenthood ug Natural Family Planning kaniadtong Hunyo 28 didto sa Relocation Site sa Dicayas, dakbayan sa Dipolog. Mikabat sa 12 ka mga magtiayon ang mitambong sa nasangpit nga kalihokan nga nakahatag kanila ug dugang kahibalo kalabot sa Reponsible Parenting, Family Relationship, Home Management and Budgeting, Fertility Awareness, ug ang pagsagop sa Natural Family Planning.

Gani mihatag ang magtiayong Noel ug Mercedita Lacang sa ilang maayong impression sa maong programa tungod kay nakita nila nga daku kini ug ikatabang sa ilang maayong relasyon isip mag-asawa. Mismo si Mayor Roberto Y. Uy ang nanguna sa pagpahigayon sa maong kalihokan tungod kay nakita niya ang kaayuhan nga dulot sa nasangpit nga information and awareness campaign ngadto sa mga magtiayon.

Ang pagpahigayon sa Seminar sa Responsible Parenthood ug Natural Family Planning gitambayongan sa mga ahensiya sa kagamhanang local nga naglangkob sa City Health Office, Population and Development Office, mga Barangay Health Workers ug Midwives, Barangay Council ug Buhatan sa City Mayor ning dakbayan. Dugang nasayran nga ang serye sa seminar motapos sa Agosto 23 pa tumong sa paglukop nila ug paseminar sa ‘12 ka mga barangay dinhi sa Dipolog nga giplanohan nga pahigayonan sa maong matang sa bansay-bansay. (Dipolog CIO Press Release, PRR)

Mining applications higpitan sa ZaNorte

Gimandu karon sa gobernador nga higpitan ang pagmonitor sa tanang mining applications sulod sa Zamboanga del Norte sa mga langyaw ug local nga mga mining companies nga nagtinguha sa pagpahigayon ug mining exploration o exploitation activities. Kini ang nahasulod sa gipakanaug nga Executive Order No. 07-04 ni Governor Rolando Yebes sa sayung bahin ning semanaha nga nag-awhag sa tanang mga municipal mayors, barangay captains, Provincial Environmental and Development Office o PEDO ug tanang mga hingtungdan ning lalawigan nga motabang sa pagpanalipod sa atong environment.

Sa maong orden ehekotibo gihisgutan ni Governor Yebes nga sa namatikdan karon mibaha dinhi sa ZaNorte ang daghang mga mining applications para exploration o exploitation activities gikan sa pipila ka mga mining companies nga langyaw ug local. Gitataw sa gobernador nga kon ang kalihukan sa maong mga mining companies magapadayon nga dili nila masuta ug masubay hayan kini magbilin ug dakung kadaut sa inanay nga nagkahanaw natong ecosystem o kalasangan, kayutaan ug ang pagkatugaw sa pagpuyo sa atong mga lumad nga katawhan dinhi sa lalawigan. Gipahibawo ni Governor Yebes nga ang lederatu sa probinsiya ang komitado sa pagsunod sa kasuguan ilawom sa Local Government Code diha sa pagsagup ug tukmang mga lakang aron kapanalipdan ug kaampingan ang atong mga kayutaan, mineral, marine, forest ug ubang mga resources dinhi sa probinsiya uban sa koordinasyon sa mga sakup niining mga kagamhanang local.

Ilawom sa maong orden ehekotibo gimandu ni Governor Yebes ngadto sa tanang mga municipal mayors nga undangan na nila ang paghatag ug pagtugot sa maong mga mining companies nga nagtinguha sa pagpahigayon ug exploration o exploitation activities dinhi sa atong lalawigan nga walay pagpahibawo una sa lederatu sa probinsiya ug pagpatuman sa higpit sa gipatigbabaw nga environmental safety standards nga gimandu sa atong mga balaod. Gitahasan usab ang PEDO nga maoy mopahigayon sa pagmonitor sa pagsunod sa maong kasuguan sa gobernador.

Ang nasangpit nga kasuguan ni Governor Yebes gidasonan usab sa mga municipal mayors pinaagi sa pagtagik sa ilang tagsa-tagsa ka pirma diha sa maong orden ehekotibo. Ang mga mayors nga mipirma mao sila si Mayor Jesus Lim sa Salug ang presidente sa Liga sa mga mayor sa probinsiya uban sa iyang mga kaubang mayors nga sila si Mayor Pachito Eguia sa Katipunan, Mayor Gani Esmali sa Baliguian, Mayor Wilfredo Balais sa Labason, Mayor Erlinda Te sa Godod, Mayor Bert Macias sa Sindangan, Mayor Agustines Magsalay sa Sergio Osmena, Mayor Anacleto Olvis, Jr. sa Polanco, Mayor Lolita Tolentino sa Sibutad, Mayor Norbi Edding sa Sibuco, Mayor Abundio Siasico, Jr. sa Siayan, Mayor Olviros Dalman sa Jose Dalman ug Mayor Ricardo Sabandal sa lungsod sa Pinan. (Press Freedom, Vol. XIX No. 38)

Mga opisyales sa ZN dili magpagasto sa  gobyerno sa ilang pagpanumpa

Gikan sa kaugalingong bulsa sa mga napiling mga opisyales sa lalawigan sa Zamboanga del Norte ang ilang gastuhon para sa ilang oath taking ceremony karong Hunyo 30, 2007. Si Board Member Joseph Brendo Ajero, mitataw nga silang mga board members nagkasabot nga mag-amotanay ug tag P15,000 kada usa ka kanila para sa maong okasyon. Kon dili man kuwarta ang ihatag mamahimo nga usa ka daku nga baka ang iamot para sasalu-salu nga ilang idalit ngadto sa mga katawhan nga gustong mosaksi sa ilang pagpanumpa karong Sabado.

Giklaro ni Board Member Ajero nga walay kuwarta sa gobyerno nga malambigit sa paggastu alang sa ilang oath taking ceremony sa probinsiya. Kini gidasonan usab ni Vice Governor Francis Olvis, kinsa nagkanayon nga ang kagamhanang probinsiyal dili mogastu bisan usa ka sentimo sa ilang oath taking ceremony, ilaha pa hinoong pakan-un ang tanang mga empleyado sa probinsiya nga libre. Sa iyang kabahin si Vice Governor Olvis wala na motug-an pila ang amot nga ihatag nila ni Governor Lando Yebes sa maong oath taking ceremony apan ilang gipaningkamutan nga makakaun gayud tanan.

Ang bisi gobernador mipahayag nga mamahimo nga ilang ipakang sa gobyerno ang tanang galastuhan sa maong kalihukan, apan matud pa niya tungod sa delicadeza naglikay sila nga paggastuhon ug apil ang gobyerno sa maong okasyon. Alang kaniya angayan lang nga sila ang mogastu kay sila may midaug sa nakalabay nga eleksiyon. Samtang kagahapon sigun sa nahan-ay nga programa sa dakbayan sa Dipolog sa mga kalihukan alang na sa pagtimaan sa adlawan niini nanumpa usab ang mga napiling opisyales sa siyudad sa nakalabay nga eleksiyon. Apan sukwahi sa probinsiya, ang oath taking ceremony sa mga opisyales sa Dipolog sumala pa gigastuhan sa panudlanan sa kagamhanang local sa siyudad nga mokabat sa P340 mil ka pesos. (Press Freedom, Vol. XIX No. 38)

Mejorada nanamilit sa SP

Nanamilit na sa ilang katapusang regular session ang majority floorleader sa Sangguniang Panlalawigan sa Zamboanga del Norte human motangkod ang iyang tulo ka termino sulod sa siyam ka tuig pagka magbabalaod sa lalawigan. Kagahapon human sa ilang regular session gisunod gilayon ang pagpahigayon sa Testimonial Dinner nga gipasidungog para nila ni Board Member Uldarico Mejorda isip majority floorleader ug ingon man ni Board Member Florentino Dulang nga nagrepresentar sa 1st district.

Unang mipabati sa iyang mensahe si Board Member Edgar Baguio nga maoy nangamahan sa duha ka managkaluhang resolusyon nga maoy nagaila sa mga natampo nila ni Mejorada ug Dulang sa mga panahon nga sila nahimong magbabalaod sa probinsiya. Matud pa ni Baguio sa iyang lantaw layu pa sa panahon nga angayang moretiro si Board Member Mejorada ug angayan unta nga mosaka kini sa ang-ang sa politika sama sa pagka kongresista. Sa iyang kabahin si Board Member Mejorada sa iyang valedictory speech mitataw nga sulod sa taas nga panahon siya nangandam alang na sa paglansar pagka kongresista, apan wala lamang bulugi sa panahon.  Sa iyang pakigpulong giklaro ni Mejorada nga ang pasindungog nga iyang nadawat karon mas labing makahuluganon kay ang nangamahan sa resolusyon nga nagpasalamat kaniya mao mismo ang minority leader sa Sangguniang Panlalawigan nga si Board Member Edgar Baguio.

Gipasalamatan niya ang tanang mga kauban niya sa Sangguniang Panlalawigan sa gilugway nilang kooperasyon sa panahon nga siya ang nahimong majority floorleader. Uban usab sa gipasalamatan sa bokal mao ang tanang kawani sa balay balauranan sa probinsiya. Apan sa iyang pagpanamilit kini mipalabtik usab sa pag-ingon nga sa Hulyo 1 mobalik na siya sa pagka pribadong lungsu-ranon gawas lamang ug hatagan siya ni Governor Lando Yebes ug kahigayu-nan nga makapadayon sa pagpanirbisyo sa lalawigan. Gitataw usab ni Board Member Mejorada nga wala usab magpasabot nga siya modeklarar na nga mobiya sa politika kay mobalik ra siya sa sunod panahon. Sa iyang kabahin si Gov. ebes nakadayeg kang Board Member Mejorada sa gipakita niining loyalty ngadto sa ilang grupo ug partido nga wala gayud moaksiyon ug lubad gikan pa sa una hangtud karon.

Sumala pa sa gobernador kini nga mithi maoy nakapatandog kaniya kay talagsaon na kaayo kini nga batasan makita tali sa mga politico karon kay sa namatikdan sayun ra kaayo magtabok-tabok ug grupo ang ubang mga politico. Matud pa ni Governor Yebes ang gipakita ni Board Member Mejorada sa iyang pagka meyembro sa balay balauranan sa probinsiya mao ang daku niyang gugma sa pag-alagad sa katawhan busa angayan lamang usab nga kini bawosan ug gugma. Gihisgutan ni Governor Yebes ang dakung natampo ni Board Member Mejorada sa ilang grupo ug sa iyang kandidatura sa una niyang pag lansar pagka gobernador ug labaw sa tanan sa mga napadas-og niining mga lakang diha sa hawanan sa balay balauranan nga nakatampo ug daku diha sa pagpalambo sa atong probin-siya para mapalambo ang paglugway sa sirbisyo ngadto sa tanang katawhan sa ZaNorte.

Samtang si Vice Governor Francis Olvis miila sa mahinungdanong papel nga gihuptan ni Mejorada sa Sangguniang Panlalawigan. Apan matud pa ni Vice Governor Olvis, mokanaug man sa balay balauranan si Board Member Mejorada, gibinlan usab sila ug puli niini nga sa iyang lantaw maan-tigo usab pinaagi kang Board Member-elect Ricky Mejo-rada kinsa sa nakalabay nga eleksiyon nahimong number one sa mga napiling bokal sa 2nd legislative district sa ZaNorte.

Sa iyang pakigpulong gihisgutan usab ni Vice Governor Olvis nga mopasilung na sa ilang grupo si Board Member Baguio. (Press Freedom, Vol. XIX No. 38)

13 ka tawo gikasohan ug illegal logging sa DENR

Mokabat sa 13 ka mga tawo ang gikasohan karon sa Department of Environment and Natural Resources tungod sa pagkalambigit sa illegal nga pagpamutol ug kahoy nga gibana-banang mobalor ug P11,320,826.40. Lima ka managkabuwag nga mga kaso ang gipasaka sa Community Environment and Natural Resources Officer Salahuddin Kaing sa CENRO Siocon atubangan sa Regional Trial Court sa didto sa Siocon, Zamboanga del Norte tungod sa paglapas sa Presidential Decree No. 705 ang Forestry Code of the Philippines.

Unang gikasohan mao ang usa ka Jun-jun Suyat diin niadtong Marso 15, 2007 sa Sitio Macot, Barangay Tabayo, siocon ang akusado namutol ug 83 ka punuan sa mga kahoy nga mokabat sa 135.50 cubic meters nga gibana-banang mobalor ug P1.4 milyones ka pesos nga walay pagtugot ug permiso gikan sa DENR. Gawas sa pagputol ug mga kahoy si Suyat gisilaban usab niini ang kapin sa upat ka ektaryang forest land nga walay pagtugot gikan sa mga otoridad.

Ang ika duhang grupo nga gikasohan ni CENRO Kaing sa Siocon mao sila si Venancio Madali, Joel Antogon, Alex Puson, Ricky Mangubat ug Danilo Tecson nga nasakpan sa DENR niadtong Pebrero 13, 2007 sa Sitio Tanman, Barangay Kilalaban sa lungsod sa Baliguian nga namutol ug labing minus 138 ka mga kahoy nga mokabat sa 147.05 cubic meters nga mobalor ug P1.5 milyones ka pesos nga walay pagtugot gikan sa otoridad uban sa pagsilab sa labing minus lima ka ektaryang kalasangan. Ang ikatulong kaso gipasaka batok nila ni Elino Sumatra, Bobong Timas, Noli Timas ug Tata Timas tungod sa paglapas sa Forestry Code of the Philippines human sila masakpi nga namutol ug kapin sa 355 ka kahoy sulod sa kalasangan Sitio Kilometro Otso, Barangay Kilalaban, Baliguian niadtong Marso 13, 2007 nga mobalor ug P2.5 milyones ka pesos ug ang pagsilab sa lasang nga mokabat sa 6.2 ektaryas.

Laing gikasohan sa CENRO Siocon mao sila si Nilo Gumapit ug Boy Andares diin niadtong Marso 16, 2007 mga alas 10:00 ang takna sa kabuntagon sa Sitio Lower Jawa, Barangay Kilalaban, Baliguian ang duruha nasakpan nga namutol ug 157 ka dagkung kahoy nga gibana-banang mobalor ug P4.2 milyones ka pesos sulod sa 2.8 ektaryas nga lasang nga ilang gikaingin.

Samtang laing kaso ang gipasaka usab batok ni Claudio Empil tungod sa paglapas sa forestry code diin nasakpan kini niadtong Marso 15, 2007 sa Sitio Macot, Barangay Tabayo, Siocon nga namutol ug 83 ka kahoy sulod sa kalasangan nga mobalor ug P1.4 milyones ka pesos sulod sa 2.9 ektaryas nga kaingin.

Kahinumduman unang mipalanog sa ilang nakitang pagka ingin sa mga kalasangan sa 3rd congressional district ang mga opisyales sa REACT Space Group ning dakbayan sa Dipolog sa dihang nabisita sila sa maong lugar sa sayung bahin ning tuiga didto sa lungsod sa Siocon. Ang ilang naobsirbahan nga pagkaingin ilang gipadangat ngadto sa Bantay Kalikasan ingon man sa buhatan sa DENR ug sa buhatan sa gobernador sa ZaNorte. Pinasikad sa maong report ang CENRO Siocon sa pagpangulo ni CENRO Salahuddin Kaing mimugna ug grupo nga maoy miimbestigar sa gikareport nga pagkaingin nga misang-pot sa pagkasikop sa nahis-gutang mga akusado nga nag-atubang karon ug kaso atubangan sa hukmanan. (Press Freedom, Vol. XIX No. 38)

Tax collection sa sand and gravel miusbaw

Gilupig karon sa performance administrasyong Yebes sa tax collection particular na sa sand and gravel and other quarry products ang kanhi gobernador nga nagpa-ilang usa ka ekomonista. Kini ang milutaw sa gipagawas nga comparative report ni Provincial Treasurer Orlando Patangan ug Provincial Environment and Development Office kabahin sa nahipos nga buhis sa probinsiya gikan sa sand and gravel and other quarry products.

Gibutyag sa report ni Provincial Treasurer Patangan nga sulod sa tulo ka tuig sa unang termino ni Governor Lando Yebes gikan sa Hulyo 2004 hangtud sa Hunyo 15, 2007 mitala na ug P9.5 milyones ka pesos ang nakolektang buhis gikan sa sand and gravel.

Sa dihang gilantaw ang records ni kanhi Governor Isagani Amatong sa koleksiyon sa buhis sa sand and gravel sulod sa pito ka tuig gikan sa 1998 hangtud sa Hunyo 2004 nagpakita nga ang probinsiya naka kolekta lamang ug P6.1 milyones ka pesos. Bisan pa ug isibog hangtud sa administrasyon ni kanhi Governor Roldan “Brogs” Dalman itipon sa nakolekta ni Amatong motala nga nakahipos lamang ang probinsiya ug P7.4 milyones ka pesos sa sand and gravel tax nga dili pa gihapon makalabaw sa nakolekta sa tulo ka tuig nga paglingkod ni Governor Yebes sa kapitolyo nga mokabat sa P9,528,430.21. (Press Freedom, Vol. XIX No. 38)  

MAYOR SA DIPOLOG GISAWAY NAG-PAKLARO NGA
DILI GAYUD MAANTIGONG MOTAHOD UG BALAOD

Nakaani karon ug pagsaway gikan sa pipila ka sector sa atong katilingban sa Zamboanga del Norte ang gipakitang aktuwasyon sa mokanaug nga mayor sa dakbayan sa Dipolog nga nagpaklaro nga wala gayud siyay tinguha nga mosunod unsay gimbut-an sa balaod. Kini ang nahimo nilang reaksiyon sa pinakaulahing suwat nga gipadangat ni Mayor Roberto Uy sa Dipolog ngadto kang Governor Rolando Yebes nga pinetsahan ug Hunyo 27, 2007 nga alang kanila nagkuwang sa tukmang kortesiya ug pamatasan sibu sa usa ka hepe ehekotibo nga walay diplomasya.

Sa iyang suwat daw nagmandu si Mayor Uy ug iyang subordinate nga tawo nga kinahanglang ipadali-dali dayon ang gipangayo niyang aksiyon. Sa maong suwat gipangayo sa mayor sa Dipolog nga buhian ang duha ka nadakpan niining dump truck tungod sa paghakot ug graba nga wala magbatun sa tukmang dokumento. Ika duhang gipangayo ni Mayor Uy ngadto sa gobernador nga diha-diha dayon sa samang adlaw pagdawat sa suwat ipagawas gilayon ang gipangayo nilang gratuitous permit. Walay gikutlo nga balaod ang mayor sa Dipolog ngano nga angayang buhian sa probinsiya ang dinakpan nilang dump trucks ug ngano nga ipadali sa gobernador ang paghatag sa gratuitous permit.

Bugtong gihatag nga rason sa mayor sa Dipolog nga malangay daw ang implementasyon sa nagkadaiya nilang mga proyekto tungod kay dili sila karon ka hakot ug mga balas. Sa maong suwat milutaw nga daw mura ug gi-inato lamang sa mayor ang mga nagpanghitabo sa walay pagpakabana sa mga gimbut-an sa balaod. Hinoon gipakita niini ang iyang kakuwang sa pagbatun sa tukmang pamatasan sibu sa usa ka hepe ehekotibo kay sa nakita daw wala kini kalibutan unsay diplomasya.

Sa isyu nga padayong gilakag ni Yebes si Berto tungod sa politika, sumala pa nila wala silay nakita nga bug-at nga rason nga hangtud karon humana ang eleksiyon lakgon pa gihapon sa gobernador ang napilde niyang kontra nga iyang gibiyaan ug kapin sa 72 mil botos diin bisan usa ka lungsod sa Zamboanga del Norte walay gidag-an gawas lamang dinhi sa dakbayan sa Dipolog. Sumala pa nila kon ang usa ka politico manglakag sa iyang kontra, kadtong mga politico nga napilde sa nakalabay nga eleksiyon diin lisud-lisuron ang umaabot nga administrasyon susama sa gibuhat ni kanhi Governor Isagani Amatong sa dihang giparot siya ni Governor Yebes. (Press Freedom, Vol. XIX No. 38)

APPLICATION SA DIPOLOG SA SAND AND GRAVEL
BABAGAN SA PEDO ATUBANGAN SA PMRB

Gipahibawo sa Provincial Environment and Development Office o PEDO nga ilang babagan ang application sa dakbayan sa Dipolog para renewal sa ilang gratuitous permit diha na sa pagkuha sa balas ug graba. Kini ang gibutyag ni Atty. Jes Gal Sarmiento, Jr. ang hepe sa PEDO human madawat sa buhatan sa gobernador ang bag-ong suwat ni Mayor Roberto Uy nga nagmandar sa amahan sa probinsiya nga buhian na ang duha nila ka nadakpang dump truck ug ipagawas na niini ang gipangayo nilang gratuitous permit para sa pagkuha ug balas ug graba.

Sa suwat ni Mayor Uy ngadto kang Governor Yebes nakabutang sa unang pahina ang mga pulong nga, “For Extremely Urgent Action”. Sa ulahing bahin sa suwat ni Mayor Uy ngadto kang Governor Yebes nga pinetsahan ug Hunyo 27, 2007 giingnan niini ang gobernador nga mas labing maayo nga ang pagbuhi sa duha ka dinakpang dump truck sa Dipolog ug paghatag sa gratuitous permit alang sa pagkuha sa balas ug graba ihatag gilayon diha-diha dayon sa gobernador kay giingon man nga kon mahimo mahatag kini sa samang adlaw nga nadawat ang suwat. Matud pa ni Atty. Sarmiento kinsa nakadawat usab ug kopya sa suwat ni Mayor Uy, kon siya maoy pasidihon iyang irekomendar nga isalikway gihapon ang hangyo ni Mayor Uy sa rason nga ang concession area niini sa Layawan River tali sa Barangay Sangcol sa Dipolog ug Barangay Silawe sa Polanco nakamugna na ug dakung kadaut sa palibot niining environment.

Gibasa usab ni Atty. Sarmiento ang gisumitir nga report ni Mr. Remelo Damuag kabahin sa nadakpang dump truck sa Dipolog. Girekomendar sa report ni Damuag nga kasohan sila si Mayor Roberto Uy, City Engineer Nedelia Magdayao ug ubang personahe sa Dipolog nga nalambigit sa pagpangawat ug mineral resources. Sa samang bahin ang report ni Damuag naghisgut nga babagan sa PEDO ang application sa Dipolog sa gipangayo niining renewal sa ilang permit para sa pagkuha ug balas ug graba.

Kini pinasikad sa gisang-at nga pagsupak sa Sangguniang Pambarangay sa Silawe, Polanco nga niadto pang buwan sa Enero nga naghangyo sa buhatan sa gobernador nga ipahunong na ang pagkuha sa balas ug graba sa dakbayan sa Dipolog sa Layawan River atbang sa ilang barangay kay nadistroso na ang ilang mga kayutaan tungod sa nasinating pagka inas o pagkankan sa daplin sa suba. Gitataw usab sa provincial attorney sa ZaNorte nga ang Dipolog sa ilang application para renewal sa gratuitous permit wala gayud makakuha ug paborabling rekomendasyon gikan sa Provincial Mining and Regulatory Board o PMRB nga gipanguluhan sa regional director sa Bureau of Mines and Geo-Sciences sa DENR. (Press Freedom, Vol. XIX No. 38)

GOVERNOR YEBES MOUNDANG NA SA POLITIKA

Gipahibawo daan sa gobernador sa Zamboanga del Norte karong sayu pa nga moundang na siya sa politika. Si Governor Lando Yebes sa interview sa Kapihan sa 1948 Cafeteria, nagkanayon nga wala siyay laraw nga magpa-ugat ug hawid sa politika hangtud sa hangtud nga iyahang hakpon ang tanang panahon. Karon pa lang giplano na niya ang pag-undang sa politika apan sa higayon nga matuman na niya ang iyang mga gidamgo para sa mga katawhan sa ZaNorte o paghuman sa tanan niyang mga programa para sa lalawigan.

Kini matud pa niya taposon gayud niya ang iyang katapusan ug ikatulong termino kon ugaling buligan pa gihapon sa mga katawhan sa ZaNorte ug hatagan ug bendisyon sa Ginoo. Kini nga pahayag giluwatan ni Governor Yebes sa dihang gikuhaan siya ug reaksiyon sa gisulti ni Mayor Dominador Jalosjos, Jr. nga dili layu sa posibilidad nga si kanhi Congressman Romeo “Nonong” Jalosjos mokandidatu pagka gobernador sa probinsiya karon nga gikatakda na kining makagawas gikan sa prisohan karong sunod tuig.

Para niya kini panghuna-huna lamang ug layu ra sa kamatuuran kay hangtud karon maayo nilang panag-alyansa sa ilang grupo ug nagkasinabot sila sa ilang mga buhaton. (Press Freedom, Vol. XIX No. 38)

MAYOR SA DIPOLOG UG IGSOON  GIKASOHAN UG KAWAT SA MINERAL RESOURCES

Pormal nang gikasohan sa kagamhanang probinsiyal sa Zamboanga del Norte ang mayor sa dakbayan sa Dipolog uban sa igsoon niining kontraktor tungod sa pagpangawat ug mineral resources nga walay tukmang pagtugot gikan sa kagamhanan. Mao kini ang gibutyag ni Mr. Remelo Damuag, sa Provincial Environment and Development Office may kalabutan na sa duha ka dump truck sa city government sa Dipolog nga nagtransportar ug graba nga walay tukmang permiso gikan sa buhatan sa gobernador.

Samtang laing dump truck nga gipanag-iyahan sa igsoon sa mayor nga si Mr. Oligario “Kimpu” Uy ang nadakpan usab nga naghakot ug balas nga walay delivery receipt nga gika pakita. Matud pa ni Mr. Damuag ilang gikasohan ang city government sa Dipolog nga girepresentahan ni Mayor Roberto Uy lakip na sa tag-iya sa truk sa kabahin ni KImpu Uy. Sa kabahin sa dump truck ni Mr. Kimpu Uy, matud pa ni Damuag apil na sa gikasohan niya ang tag-iya niini tungod sa rason nga ang gihakot niining graba nagagikan sa usa ka concession area kansang permit milibkas na. Sa pangutana kon ang dump truck sa Dipolog mamahimo na bang ika release, si Damuag mipahayag nga dili pa siya makatubag niini kay moagi pa kini ug proseso.

Matud pa ni Damuag sa miagi ang city government sa Dipolog nagbatun ug concession area sa Barangay Sangkol apan ang gratuitous permit nga giisyu sa gobernador dugay rang mi-expire hinungdan nga nag-apply ug bag-o ang city hall. Sigun sa records sa PEDO ang renewal sa Dipolog gisalikway sa probinsiya atubangan sa petisyon nga giduso sa Barangay Silawi, Polanco diin nahimutang sa atbang ang concession area sa city government sa Dipolog. Gibutyag ni Mr. Damuag nga dili usab sila makaisyu ug gratuitous permi tungod sa higpit nga pagbabag sa Barangay Silawe, Polanco atubangan sa nasinating environmental destruct sa mga nanag-iya ug yuta nga daplin sa suba. Sumala pa ni Damuag sigun sa instruction ni Governor Yebes nalakip na sa higpitan sa pagbantay mao ang pagpreserbar sa atong environment. (Press Freedom, Vol. XIX No. 38)

Programang LANDO-BIBO 25,650 ang  naka-benepisyo sa tibuok lalawigan 

Mokabat sa 25,650 ka mga katawhan ang naka-benipesyo sa programa ni Gov. Rolando E. Yebes nga Lando-Bibo sukad sa bulan sa Enero hangtod Hunyo ning tuiga. Mao kini ang nakuhang impormasyon gikan na ni Mr. Ronilo P. Pacilan, Unit Head sa Community Development Assistance Unit (CDAU). Matud pa nga 10,574 ka mga pasyente ang nahatagan og tambal, 14,088 ang nahatagan og certification ug 988 ka mga pasyente ang naka-benipesyo kini gilangkuban sa blood transfusion, paupers burial, transportation, assessment evaluation, diagnostic test examination, crutches, disaster relief assistance, food assistance ug wheel chair assistance.

Suma pa ni Mr. Pacilan nga wa gayod sila magmakuli sa pagtabang sa  mga tawong moduol kanila nga tabangunon bisan pa man nahibaw-an kini nilang wa misuporta ni Gov. Yebes panahon sa eleksyon. Giklaro ni Pacilan nga kon unsa ka matinabangon ang amahan ning probinsya, mao usab silang mga sakop niini ngadto na sa katawhan ning lalawigan.

Sa kabahin ni Gov. Yebes kini namahayag nga wad-on na ang pamolitika ning panahona diin, si kinsa kadtong angayang tabangan suportahan gayod kay tumong sa gobernador nga molambo ang lalawigan ug di na maglisod ang katawhan sa  ZaNorte. (Mindanao Star, Vol.III No.22)
 

Timoay labis sa Zanorte miduyog sa  oath taking ceremony ni Gov. Yebes

Biente otso (28) ka mga Timoay Labi dinhi sa Zamboanga del Norte ang muduyog unya sa Oath taking ceremony ni Governor Rolando Yebes karong adlawng Sabado Hunyo 30. Tungod kay ang gobernador aduna may dugong subanen, naghugop usab karon ang mga nagkalain-laing tribo ning lalawigan aron magsandurot sa iyang kadaugan diha iyang ikaduhang termino diin gibuligan siya sa katawhan aron mopadayon sa iyang serbisyo isip gobernador. Ang mga timoay labi ang magrepresentar kini sa mga lungsod sa una hangtod sa ikatulong distrito ning lalawigan diin giila usab kini sila sa National Council for Indigenous Peoples kun NCIP.

Kahimumdoman nga si Gov. Yebes ang aktibo usab kini sa pagsuporta sa mga lumad nga Subanen ning lalawigan diha na sa pagbubo ug daghanang mga proyekto sa mga kabaranggayan ug ang paghatag niini ug dakong bili sa ilang mga kultura ug tradisyon. Kaniadtong niaging bulan sa Abril, gikalipay sa mga lumad ang paghatag ni Gov. Yebes ug pinansyal nga suporta sa ilang pagpahigayon sa unang Buklog Festival didto sa barangay Mandih lungsod sa Sindangan diin nabati gayod sa mga nagkalain-laing tribo ang pakigmaya ug pakigsandurot sa gobernador ngadto sa mga Subanen.

Gawas niini, ang opisyal nga pagpanumpa unya ni Gov. Yebes karong Sabado, pagatambungan kini ni Vice Governor Francis Olvis, tulo ka mga kongresista, mga bokal, mga mayor, mga kapitan ug mga katawhan nga mipasubli kaniya pagka-gobernador ning lalawigan. (Sam Buddy, Mindanao Star, Vol.III No.22)

Laborers sa Nabilid Port mialma gustong paphaon ni Mayor Feras

Mi-alma karon ang kapin sa usa ka gatus ka mga laborers sa pantalan sa Barangay Nabilid sakop sa lungsod sa Roxas tungod sa dayag nga plano ni Mayor Carlito Feras nga kulban sila sa ilang kaldero. Gipahayag sa mga membro ug opisyales sa Nabilid Dockhandlers Multipurpose Association, ang kapunongan sa mga kargador sa maong pantalan nga wala silay laing nakita nga hinungdan kon dili mao ang politika ngano sila ug ang ilang panginabuhi ang giinitan ni Feras tungod sa nahimong resulta sa eleksiyon niadtung Mayo 14.

Nasayran sa nakalabay’ng eleksiyon napilde si Mayor Feras sa Barangay Nabilid sa kapin usa ka gatus botos batok kang Konsehal Nick Carbonel. Ang mas gikasuk-an sa mayor kay usa sa mga presinto sa maong barangay “zero” siya. Ang Nabilid usa sa pinakadako nga barangay sa lungsod sa Roxas nga nagbaton ug subra 800 ka mga reistradong botante. Si Kapitan Gilberto Lagutin nagkanayon nga walay katarungan nga mosuporta ang iyang katawhan sa liderato ni Mayor Carling Feras niadtong nakalabay’ng eleksiyon tungod sa mga rason nga walay bahin nga naangkon ang iyang barangay gikan sa lokal nga pangagamhanan gikan sa operasyon sa pantalan bisan paman nga ubos sa lagda sa local government code of 1991 obligado ang LGU mopahat sa bahin sa abot niini ngadto sa barangay diin nahimutang ang maong economic enterprise. Matud pa taudtaud nang gidumala sa kagamhanang lokal ang operasyon sa Nabilid Port.

Ikaduhang rason ni Kapitan Lagutin gikan sa income sa lungsod ang Real Property Tax collection tungod sa presensiya sa kanhi Southern Oil Mill kon SIOM nga karon mao ang POMS Ventures Incorporated dugay kaayo nga ihatag sa LGU ngadto sa kagamhanang pambarangay. Ikatulo ang ilang barangay maoy nagbago sa pagbayad sa binulan nga kunsomo sa kuryenti sa gimintinar nga Nabilid Police Box nga nagkantidad ug labing minus usa ka libo ka pesos matag bulan bisan paman kon ang lungsod maoy nagpahimutang niini. Bisan paman sa nagpusot-pusot nilang hangyo ni Mayor Feras kini kanunay gisalikway ug kutob lang sa tandotando. Matud ni Lagutin sukad siya nahimong kapitan si Mayor Feras nga naglingkod nga mayor, ang ilang barangay wala gayud makadawat bisan usa ka kongkretong proyekto gikan sa lungsod. Bisan na ang programa sa panginabuhian sa mga katawhan selbing alternatibo gikan sa pagpanagat ug pagkargador sa pantalan walay gilugway nga programa para kanila.  Kini maoy mga rason nganong nagdumili ang mga katawhan sa pagsuporta kang Feras niadtung nakalabay’ng eleksiyon.

Kon nahitabo nga napilde si Feras sa Barangay Nabilid, ang mga katawhan igu lamang nagpahungaw kon unsa ilang syentimento batok sa ilang mayor, kanayon pa si Lagutin. Sa nahitabong kaguliyang sa mga kargador sa pantalan, gipahayag ni Kapitan Lagutin nga dili makiangayon ang gibuhat ni Feras tungod kay panginabuhi na sa mga katawhan ang buot bungkagon ug paundangon nga dayag na kaayong panimalos ang gibuhat niini gumikan sa politika. Si Lorenzo Balenzuela, Presidente sa Nabilid Dockhandlers Multipurpose Association mipahayag nga siya mismo gikombensir sa mayor pinaagi ni P/Inspector Rulie D. Tingcang nga bahinon ang pagtrabaho sa mga laborers sa adlaw ug gabii. Apan kini hugot nilang gisupakan sa rason nga apiki ang ilang sitwasyon tungod sa kagamay sa ilang kita. Sa usa ka bulan duha ngadto sa tulo ka barko magdunggoan sa pantalan ug mokita lamang sila ug 300 ngadto sa 500 pesos matag dunggo. Kon duna pay kompetensiya nga motrabaho sama ra nga gihinay-hinay ug patay ang ilang pamilya.

Matud ni Balezuela tungod sa iyang kahadlok nga gidala siya sa police station gipugos siya ni Tingcang ug paperma sa usa ka MOA nga bahinon ang ilang pagtrabaho. Niadtung naghinapos nga buwan sa Mayo nahitabu gayud ang ilang gikabalak-an tapos si Vice Mayor Boy Agatep ang nangusog nga papolihan sila sa pagdiskarga sa semento gikan sa barko. Gimando ni Agatep nga ang iyang dalang tawo nga sakop ni Mayor Feras maoy patrabahuon apan tungod sa hugtanong pagsupak ug pagbabag sa mga laborers diryot magkarambola ang duha ka grupo. Ilang gisaway ang gipakitang aktuwasyon sa ilang bise mayor nga inay unta maoy magpataliwala aron hiloton ang kasamok mao na hinoon ang nagsugnod sa kaguliyang uban sa pagbuhi ug pulong, “gusto mong motrabaho, hala pagpatay mo diha.”

Tungod sa maong situwasyon gimando pa sa bise mayor nga ipaundang ang pagdiskarga sa nahibiling kapin sa syenti mil ka sako sa semento ug gimandoan ang taga barko nga pasirad-an ug paundangan ang pagdiskarga sa ilang kargamento hinungdan nga naundang ang trabaho. Mibiya ang barko sa pantalan nga wala tagad mahuman ug diskarga ang mga semento. Gumikan sa gibuhat ni Agatep, ang management sa shipping company naningil karon sa kagamhanang lokal sa lungsod sa Roxas ug syento byenti mil ka pesos nga demorahi resulta sa kapakyas sa pagdiskarga sa kargamento. Ang Nabilid Dockhandlers Multipurpose Association naghangyo karon sa mga kadagkoang ahensiya sa gobiyerno nga ibalik nalang ang pagdumala sa pantalan sa Nabilid ngadto sa PPA kay sa kagamhanang lokal sa lungsod sa Roxas nga ang ilang suweldo maabtan pag pila ka bulan ayha nila makobra nga siging ka-pasmo ang ilang pamilya. Matud nila mas maayo pa ang PPA ug private arastre ang magdumala kanila kaysa LGU nga polos pamolitika ra gihapon ang motigbabaw diha sa pagpanarbaho sa pantalan. (Mindanao Star, Vol.III No.22)

BFAR mohatag ug pukot sa 18 coastal areas sa probinsya

Ipang apod-apod karon sa buhatan sa Bureau of Fishery and Aquatic Resources kon BFAR ang 450 ka mga Bottom Set Gill Nets kon Pukot alang sa mga mangingisda sulod sa 18 ka mga coastal area dinhi sa lalawigan sa Zamboanga del Norte. Mao kini ang nasayran  gikan kang Mr. Joseph Florig Sr. ang Provincial Fishery Officer sa BFAR ug matud pa nga adunay 450 ka mga Pukot nga gipang sulod sa sako diin ana-a diha sa ilang buhatan ug andam na kining ipang apod-apod sa mga mangingisda.

Ang maong pukot adunay gitas-on nga 200 ka metros ug lakip na ang mga gamit niini. Dugan pa ni Mr. Florig Sr. nga gihulat pa una sa ilang buhatan Sec. Arthur Sy. Yap sa BFAR sa Zamboanga City ug maturn-over kining proyekto ngadto kang Gov. Rolando E. Yebes ang amahan sa probinsya aron iya kining maapod-apod ngadto sa 18 ka mga mayores lakip na ang duha ka mga dakbayan.

Gilauman ni Mr. Florig Sr. si Sec. Arthur Yap karong bulan sa Hulyo ang iyang paghidangat dinhi sa lalawigan aron hayan magamit ang maong pukot ug libre kining mapahimuslan sa mga mangingisda dinhi sa probinsya. (Mindanao Star, Vol.III No.22)

Mindanao Star Police Round-up

29 Anyos nga lalaki gipusil, giluba patay

Usa ka 29 anyos nga lalaki ang gipusil ug giluba patay sa mga wa mailhing suspetsado didto sa may Sitio Manganese sakop sa Barangay Calupong lungsod sa Gutalac ning lalawigan, karong bag-uhay pa lang. Ang maong biktima giila sa pangalang Romy Alimba, 29 anyos, ulitawo ug nagpuyo sa naasoy’ng dapit.

Sa initial nga imbestigasyon nga gihimo sa Gutalac PNP, nasayran nga ang biktimang si Alimba samtang mipauli kini sa ilang panimalay matud pa kalit lang ang wa mailhing suspetsado mipusil sa tiil sa biktima ginamit ang wa usab masayring kalibre nga armas.  Gawas sa pagpusil sa suspek ngadto sa biktima, mihimo pa kinig dunggab sa li-og niini sa biktima nga maoy hinungdan sa hinanaling kamatayon ni Alimba.

Sa pagkakaron, ang mga elemento sa kapolisan sa lungsod sa Gutalac padayon pa kining mihimo sa dugang pang imbestigasyon aron sa posibling pag-ila ug pag-aresto sa suspetsado ingon man usab sa pagtino sa motibo sa pagpusil ug pagdunggab patay sa biktimang si Alimba.  (pedmark, Mindanao Star, Vol.III No.22)

35 Marian Scholars nakadawat ug  ayuda gikan sa Kagamhanang Probinsyal

Dili matukib ang gibating kalipay sa 35 ka mga Marian Scholars human kini makadawat sa school bags ug school supplies nga gitunol sa kagamhanang probinsyal kagahapong adlawa didto sa gymnasium sa St. Mary’s Academy ning dakbayan. Gipang-apod apod nila ni Provincial Atty. JesGal Sarmiento, Assistant Provincial Social Welfare Officer Grace Marylen Sabal ug Mrs. Elsa Oyanib kauban ang mga kadagkuan sa maong tulunghaan ang maong butang isip ayuda sa mga estudyante nga kabus apan adunay kalantip sa huna-huna nga nagtungha sa maong eskwelahan. Gipamahayag ni Atty. JesGal Sarmiento nga ang gobernador misanong gilayon sa hangyo sa maong tulunghaan human kini makadawat sa sulat nga gikan mismo sa principal sa St. Mary’s nga si Sister Maria Erlinda C. Cabilin nga naghangyo sa kagamhanang probinsyal nga mohatag usab ug ayuda sa mga Marian Scholars.

Dugang pa ni Atty. Sarmiento nga ang gobernador base sa sumbanan niini sa pagpangalagad sa katawhan ning lalawigan wala kini magpili kinsa ang hatagan ug tabang. Gumikan kay ang mga magtutungha sa nasangpit nga tulunghaan ang nalakip man kini sa Educational Service Contracting sa gobyerno nga diin usa sa mga programa sa Department of Education mao nga giapil usab kini paghatag ug ayuda sa gobernador. Angayang kahibaloan nga mao kini ang pinakaunang pribadong tulunghaan dinhi sa lalawigan nga nahatagan ug ayuda sa kagamhanang probinsyal pinaagi na sa mga school supplies nga gitunol sa mga magtutungha gikan sa buhatan sa Provincial Social Welfare.

Tubag usab ni Mrs. Maria Rita Joy Pastor Rubillos, community extension service coordinator ug usab scholarship in-charge kini namahayag nga gikalipay nila’g dako ang ayuda nga gihatag sa kagamhanang probinsyal ug wala sila nagtoo nga daling gihatagan ug aksyon ang hangyo niini ni Governor Rolando Yebes. Si Rubillos nagdasig sa mga nakabenepisyo sa maong ayuda nga ampingan ang mga nadawat niini gumikan kay usa kini ka handumanan ug bililhong regalo nga gihatag kanila sa kagamhanang probinsyal timaan sa ilang kalantip sa huna-huna. (Mindanao Star, Vol.III No.22)

Lungsod sa Liloy mopailawon ug
pagbansay-bansay sa pagpamiso pinaagi sa TLDC

Dili lamang dinhi sa dakabayan sa Dipolog ang mipahigayon ug  pagbansay-bansay alang sa Basis Acupressure Training kon dili ang lungsod sa Liloy ang mopailawon usab ug pagbansay-basay sa pagpamiso  pinaagi sa buhatan sa Technology and Livelihood Development Center kon TLDC karong petsa 17 ug 18 ning bulan sa Hulyo. Matud pa ni Mr. James Montijar ang hepe sa maong buhatan nga adunay duha ka mga beneficiary nga mosabak sa maong programa diin ang Liloy Multi Sectoral Coalition ug ang Liloy Peoples Integarted Cooperative ang interesadong mopailwon sa maong pagbansay-bansay.

Dugan pa ni Montijar nga ang ilang buhatan maoy modala ug mga trainor sa pagpamiso ug libre na nga mga Handbook aron masayran kon asa pagahiluton ang mga balatian ug mahatagan ug certificate nga magpamatuod nga miagi sa maong pagbansay-basay.

Gipasabot ni Montijar nga ang pagpamiso gikinanghanglang matutukan sa igong pagtuon gawas nga kini makahatag sa dugan panginabuhian gikinahanglang masubay ang bag-ong pamaagi ug bag-ong ideya nga ilang makat-onan. (Mindanao Star, Vol.III No.22)

Dagkung premyo ipanghatag sa
Kinabayo Street dancing festival sa Dapitan

Ipahigayon na usab sa kagamhanang lokal sa dakbayan sa Dapitan ang Kinabayo Festival Streetdancing ug Mardi Gras Competition karong umalabot sa kapistahan sa mahal nga patron Senior San Santiago kon Hulyo 25 ning tuiga. Gibutyag ni Konsehala Apple Marie Agolong, ang Chairman sa Komitiba sa Torismo sa dakbayan diin ang naasoy’ng streetdancing aduna kini duha ka kategoriya nga mao ang Invitational Level ug City Wide Level.

 Dagkung premyo usab ang ilang maangkon alang sa mga magpakadaug nga contingent sama sa 75 mil ka pesos sa first prize, 65 mil ka pesos sa second prize ug 55 mil ka pesos sa third prize.  Ug adunay tag 20 mil ka pesos isip consolation prize.  Labot pa niini, aduna usa’y mga special awards nga maangkon usab sa mga contingent nga mapiling Best in Streetdancing nga mobalor sa 20 mil ka pesos, Best in Senior San Santiago Horse Mascot alang sa lamang kini sa Category B kon City Wide Level sa 15 mil ka pesos, Best in Costume 20 mil ka pesos, Best Choreographer 10 mil ka pesos ug 5 mil ka peos usab sa mapiling Mardi Gras Queen alang lamang kini sa Category B kon City Wide Level.

Busa giawhag gayud ni Konsehala Agolong kadtong mga interesado nga mga kahugpungan gawas sa Dapitan ingon man sa mga kahugpungan, mga kabarangayan sulod sa 50 ka mga barangay sa maong dakbayan sa dili pagpakyas sa pagsalmot gayud sa naasoy’ng Invitational ug City Wide Level sa Kinabayo Festival Streetdancing ug Mardi Gras Competition o dili ba kaha makigkita lang kang Engr. Rodiolan Porlas sa City Tourism Office sa Dapitan alang na sa dugang impormasyon. (pedmark, Mindanao Star, Vol.III No.22)

PSWDO walay hunong pag-implementar sa mga programang pangkalambuan

Walay puas ang buhatan sa Social Welfare ning probinsya sa pag-implementar sa mga programang pangkalambuan sa tanang sektor ning lalawigan, kini ang subay sa mando ni Governor Yebes nga hatagan ug pagtagad dili lamang ang mga hamtong apan lakip usab ang mga kabatan-onan nga maoy maghatag ug kusog sa katilingban. Subay niini gipangandaman na karon sa nasangpit nga buhatan duyog sa Departamento sa Edukasyon ning lalawigan ang pagpahigayon sa tinuig nga Population Quiz Bee nga gikalatid nga pagahimoon karong sunod bulan.

Kahibaloan nga ang tumong sa maong kalihukan mao ang paghatag ug impormasyon ug pag-edukar sa mga kabatan-onan may kalabot na sa saktong pagkontrol sa nagkataas nga populasyon sa nasud. Dugang pa, maghasa usab kini sa mga kabatan-onan sa ilang talagsaong kahibalo sa mga lokal nga mga panghitabo ug lakip usab ang mga nagpanghitabo sa kalibutan niining bag-ong panahon. Gipamahayag ni Mrs. Elsa Oyanib, Social Welfare Officer III ning lalawigan nga diha sa pagpahigayon sa maong indigay sa kahibalo dako kaayog gihatag ug ayuda ang provincial government ilabi na sa administrasyon karon ni Governor Yebes nga andam mohatag sa tanan makab-ot lamang ang kalambuan sa katawhan ning probinsya.

Ngani sa nakalabayng tulo ka katuigan ubos sa iyang administrasyon wala gayud kini magmakulang sa paghatag ug suporta sa pagpahigayon sa maong kalihukan nga gituyo paghimo sa Population Commission. Angayang kahibaloan nga ang lalawigan sa Zamboanga del Norte ang nakaangkon na kini ug pinaka-unang national champion nga nakuha ni January Faith Santiago gikan sa Sergio Osmeña National High School. Pinaagi sa maong pasidungog nga naangkon gi-doble karon sa nasangpit nga buhatan ang paningkamot niini nga makakuha na usab ang lalawigan sa Zamboanga del Norte ug laing National Champion. (Mindanao Star, Vol.III No.22)

Mejorada, Dulang gipasidunggan atol sa ilang testimonial dinner

Duha ka mga magbaba-laod nga membro sa hunta probinsyal sa Zamboanga del Norte ang gihatagan ug pasidungog sa gipahigayon nga Testimonial Dinner atol sa ilang pag-atender sa katapusang regular session sa Sanguniang Panlalawigan niadtung lunes. Sila si Board Member Uldarico Mejorada nga nagrepresentar sa segundo distrito ug Board Member Florintino Dulang sa permero distrito ang gihatagan ug Commendation ug Recognition pinaagi sa usa ka resolution nga giaprobahan sa Sanguniang Panlalawigan gumikan sa ilang napaambit nga mga kaayohan ug kalamboan sa ilang pagserbisyo isip magbabalaod sa lalawigan sa Zamboanga del Norte.

Ang pinaka-una nga Testimonial Dinner gipahigayon sa Sanguniang Panlalawigan maoy isip paghatag ug dungog ug honor nila ni Meorada isip last termer board member nga naka-graduate sa iyang ikatulong termino ug Dulang sa iyang ikaduhang termino. Si Board Member Florintino Dulang wala na makaabot alang sa iyang ikatulo nga termino tungod kay wala na kini makalansar sa miaging eleksiyon gumikan sa iyang gihambin nga balatian apan sa samang bahin kini gihatagan gihapon ug pasidungog. Si Mejorada maoy midawat sa plaque of Commendation ang Recoginition samtang si Vice Mayor-elect Dodoy Dulang sa lungsod sa Mutia nga anak ni Board Member Florintino Dulang maoy midawat sa pasidungog sa iyang amahan gumikan kay ang bokal wala makatambong sa maong okasyon sa dihang kini gitunol nila ni Governor Rolando Yebes ug Vice Governor Francis Olvis.

Gipasalamatan nila ni Board Members Mejorada ug Dulang ang ilang mga kauban sa Sanguniang Panlalawigan nga gipangulohan ni Vice Governor ug Presiding Officer Francis Olvis sa pasidungog nga ilang nadawat ug kini ilang giisip nga handumanan sa tibuok nilang kinabuhi. Ang Testimonial Dinner gitambongan sa mga membro sa Sanguniang Panlalawigan uban sa bag-ong napili niini nga sila si Ist District Board Member Bullet Pal-Jalosjos ug Atty. Ricky Mejorada II, dinapit nga mga bisita ug sa mga kawani sa Sanguniang Panlalawigan ug sa kagamhanang probinsyal. (The New Nandau, Vol. XVI No.53)

“Kinahanglan loyal sa Yebes administration”
Mejorada mi-awhag sa mga kawani

Samtang mokanaug na alang sa iyang katapusang termino si Board Member Uldarico “Ricky” Mejorada, kini nagpabilin ug mensahe sa iyang mga kauban ug sa mga kawani sa kagamhanang probinsyal nga gikinahanglan loyal kini sa ilang gialagaran nga administrasyon karon. Kini ang tipik sa mensahi nga gipadangat ni Mejorada atol sa Testimonial Dinner sa Sangguniang Panlalawigan nga matud niya, sukad siya nahimong politiko pabilin nga wala matarug ang iyang baruganan ug prinsipyo kay siya sa kanunay nahimong loyal sa grupo ug sa administrasyon nga iyang gialagaran.

Matud niya, ang ilang paningkamot sa una sa panahon sa administrasyon ni Gani Amatong uban sa iyang kanhi kauban sa Sanguniang Panlalawigan nga sila si Fancracio Ajero ug Florentino Daarol nakahinagbo ug kalisod sa ilang pagserbisyo gumikan kay sa dihang ilang nababagan ang supplemental budget nga mokabat ug P135 milyones ka pesos gihurot ug tang-tang ang ilang legislative staff. Bisan pa niadto, ang ilang kalisod nga natagamtaman nabugtian ug maayong resulta gumikan sa kadaugan ni Governor Lando Yebes sa iyang unang paglansar niadtung 2004 eleksiyon.

Si Mejorada nga maoy majority floor leader sa Sangguniang Panlalawigan namahayag nga sukad nga si Governor Yebes maoy nag-lingkod sa kagamhanang probinsyal wala niya putla ang iyang loyalty ngadto sa gobernador gumikan kay sa iyang nalantaw ang adminis-trasyon karon sensiro nga nag-alagad sa mga kataw-han sa tibuok probinsya. Giawhag ni Mejorada ang mga kawani sa kagamhanang probinsyal nga sa dili pa siya mokanaug sa iyang opesina (Sangguniang Panlalawigan) kinahanglan loyal kini ngadto sa liderato diin sila nag-alagad sa gobiyerno karon. Gipasabot ni Mejorada nga dili buot pagasabton nga gisakripisyo ang kagawasan sa mga kawani apan gikinahanglan usab i-recognize ang lider nga naghimo ug maayo alang sa iyang katawhan.

“In my case, I assure Governor Yebes that as long as I live and as long as he is in politics ill be with him up to the very age of this earth.” Lakip sa gipasaligan ni Mejorada si Vice Governor Francis Olvis nga andam niyang suportahan unsa man ang mga plano niini, “kon dunay pay mahibiling kinabuhi kining ubos ninyong higala.” Si Mejorada nagkanayon nga daghan nang gobernador iyang naagian ug nakauban sa trabaho apan karon pa siya nahimong loyal gumikan kay (Gov. Yebes) mahimong maduol ug maestorya sa bisan unsang panahon. Gidayeg usab ni Mejorada si Board Member Edgar Baguio nga bisan tuod kon kini anaa sa oposisyon isip minority floor leader apan mao kini ang nangamahan sa resolusyon aron sila ni Dulang kahatagan ug commendation ug recognition.

Matud niya, si Baguio kanunay niyang mahibalag sa usa ka mainit nga debati ug diskusyon sa hawanan sa hunta probinsyal apan sila nagapabilin nga higala ug walay personalay ang ilang kanunay nga panaglantugi gumikan kay kini ilang gihimo alang raman usab sa kabulahanan sa kinabag-ang katawhan. Sa wala pa motapos sa iyang mensahi, si Mejorada mitunol sa iyang dakong pagpasalamat sa iyang staff sa Sanguniang Panlalawigan tungod kay bisan sa kadaghan niyang gimbuhaton gumikan sa mga dagkong komitiba iyang gihaweran apan nahimong gaan ang iyang trabaho tungod sa competent ug didicated sa iyang mga kawani nga mialagad kaniya. Si Mejorada mipasum-bingay ngadto sa gobernador nga andam niya ipadayon ang pag-alagad sa iyang administrasyon kon hatagan kini ug puwesto sa Capitolyo. (The New Nandau, Vol. XVI No.53)

Gov. Yebes midayeg katakos ni Mejorada

Gidayeg ni Governor Lando Yebes ang katakos ni last term Board Member Uldarico Mejorada diha sa iyang pag-alagad sa mga katawhan isip nahimong membro nga magbabalaod sa hunta probinsyal. Kini ang gipadayag ni Governor Lando Yebes atol sa Testimonial Dinner niadtung Lunes nga si Mejorada dako kaayo ug gikatabang sa iyang unang administrasyon gumikan sa mga balaodnon nga napasar sa Sangguniang Panlala-wigan nga nakahatag ug dakong kaayohan sa mga katawhan. Iya usab giila si Mejorada nga nakatabang sa iyang kadaugan sa permero niyang paglansar sa 2004 election ug nakatabang ug dako sa iyang unang pamonuan.

“One person who I admire most, whose loyalty is beyond question,” nagkanayon si Governor Yebes ngadto kang Mejorada. Sumala pa sa gobernador karong panahona maglisod na siya kay wala nay tingog (Mejorada) nga madungog sa hawanan sa Sangguniang Panlalawigan, “but I have friends all over, I have the board members with me and I have my heart to served the people of Zamboanga del Norte.”   Matud ni Governor Yebes usik kaayo nga si Mejorada mawala na sa hawanan sa Sangguniang Panlalawigan gumikan sa kalantip sa panghuna-huna nga iyang napaambit para sa kalamboan sa probinsya. “Ang gugma nga gihatag kanako ni Board Member Uldarico Mejorada ako usab balosan ug gugma ug pagrespeto.”

Matud ni Governor Yebes dili lang kutob dinhi ang iyang paglantaw ug utang kabobot-on sa tawo nga dako ug gikatabang sa probinsya ug sa iyang pagkubot sa renda panggobiyerno. “Sa umalaabot nga mga adlaw, kanang iyang (Mejorada) nabuhat kanako dili nako hikalimtan. Usa ako ka tawo nga motan-aw ug utang kabobot-on hangtud sa akong kamatayon.” Si Vice Governor Francis Olvis, presiding officer sa Sanguniang Panlalawigan sa iyang kabahin namahayag nga bisan tuod kon mokanaug na sa iyang puwesto si Mejorada senior, apan dili kabalak-an kay dunay laing Mejorada nga mohulip kaniya, kini mao ang iyang anak nga si number one Board Member-elect Atty. Ricky Mejorada II.

Apan si Vice Governor Olvis nagkanayon nga ang siyam ka tuig ni Mejorada kulang ra kaayo kay gikinahanglan pa ang iyang pagserbisyo sa Sanguniang Panlalawigan. Gani giangkon sa bise gobernador nga sa bag-o pa siya sa katungdanan si Mejorada maoy iyang konsultahon unsay buhaton kay hataas kini ug kasinatian ug hibangkaagan diha sa hunta probinsyal. Sayang man ang pagka-wala ni Mejorada sa hawa-nan sa Sangguniang Panlala-wigan apan nagtuo si Vice Governor Olvis nga ang na-buhat sa bokal ilang hinum-doman ug maoy magahatag kanila ug dugang giya sam-tang magapadayon sila sa pag-alagad sa mga kataw-han sa tibuok probinsya. (The New Nandau, Vol. XVI No.53)

Pagpanghatag sa utanon ug abono nakatabang sa mag-uuma –Concha

Ang subsob nga pagpanghatag sa mga liso sa utanon kon vegetable seeds lakip na ang vermicast, usa ka klase sa abono nga nagagikan sa hugaw sa wate, nakatabang karon sa dakung hinabang  sa mga kabus nga mag-uuma dinhi sa tibuok probinsiya. Kini mao ang gipagawas nga pamahayag ni Provincial Agriculturist-Atty. Bernardo P. Concha human makahinabi ang mga hingtungdan nga mga mag-uuma nga nagpakadawat sa maong mga ayuda sa panginabuhi nga gituyo sa gayud sa pagmugna ni Governor Rolando E. Yebes ilawom usab sa programa nga Tabang ni Lando sa Communidad kon TLC ug ingon man sa Lando Bibo.

Sumala sa pinakaulahi nga kasayuran gikan kang Lucenio Agecia, Agricultural Technician ug In-Charge sa Seeds Distribution sa OPAg nga mokabat na sa 840 vegetable seeds, 1,035 opv UG 765 vermicast fertilizer ang gipanghatag sa mga mag-uuma sa probinsiya atol sa gipahigayon nga Hudyaka Festival 2007 kaniadtong Hunyo 1-9, 2007. Ang nakapahimulos  sa libre nga open pollinated variety (OPV) corn seeds, vermicast fertilizer ug ilabi na ang mga vegetable seeds sama sa kangkong, mustard, pechay, raddish, sweet corn ug glutenous corn nakapasalamat sa mga ayuda gikan sa probinsiya tungod kay makapananum na kini sa mga utanon diha sa tagsatagsa ka panimalay.

Nasayran usab nga ang vermicast fertilizer gigama diha sa Zamboanga del Norte Bio-Fertilizer and Mixing Plant ilawom sa pagdumala ni Lolita Bagatua, Agriculturist I sa Office of the Provincial Agriculturist (OPAg) nga nahimutang sa barangay Mibang ning dakbayan sa Dipolog.

Dugang pa ni Concha nga kung ang mga katawhan sa probinsiya sa ZaNorte magkugi sa kanunay dili mapasmo ang pamilya, mahimsog ang panglawas niini ug dili na usab maila nga pobre ang nanimuyo dinhi. Nasayran usab nga diha sa TLC adunay 7,425 assorted vegetable seeds, 4,065 corn seeds, 7,235 vermicast ug 112 mahogany seedlings ang napahimuslan karon sa mga pobre nga katawhan sa tibuok lalawigan sukad kini mamugna ilawom sa pamunoan ni Governor Yebes. Kini gipaningkamutan nga mapatuman ubos usab sa kamanduan sa provincial agriculturist ug panabang ni Chona Quitong, sakop sa Seeds Distribution Committee sa maong mga programa. (The New Nandau, Vol. XVI No.53)