2

May 5,  2008

 

Pagkatudlo ni Dr. Ratificar isip Principal sa ZNNHS gi-kuwestion

TALIWALA SA KALIBOG sa ubang mi-apply sa Zamboanga del Norte National High School nganong migula si Dr. Lilibeth Ratificar nga numero uno sa ranking nga gihimo sa screening committee sa schools division, mipagula karon sa iyang opinyon ang Regional Human Resource Management Officer sa rehiyonal nga buhatan sa edukasyon nga si Maria Limba-Sia nga ang pagkapili ni Dr.Ratificar naglimin ug mga misteryo.

Sa tubag sa gihatag ni Sia ngadto kang Mr. Cecilio Lancian, Secondary School Principal sa Manukan National High School kinsa usa sa mga mi-apply sa pagka principal sa Zam-boanga del Norte National High School nagkanayun nga sumala sa kasayuran nga gipaabot ni Lancian ngadto kaniya, makita nga si Ratificar dili angayan matudlo isip principal sa maong eskuwelahan tungod kay usa siya ka Elementary School Principal sumala sa iyang appointment. Ngani, matud pa ni Sia ang background ni Ratificar pang elementarya lamang tungod kay usa man siya ka kanhi elementary grade teacher hangtud nga nahimo siyang elementary school principal.

Dugang pa ni Sia nga siya usab gibatig kalibug ngano nga migula si Ratificar nga numero uno sa ranking nga ang ubang mi-apply nagbaton man ug labaw pa nga mga kuwalipikasyon. Sama ni Lancian kinsa usa ka Secondary School Principal ug dugay na nga nagdala ug usa ka dakong tunghaan sa sekondarya. Lain nga aplikante mao si Dr. Antonio Liao nga kaniadto usa ka secondary school principal ug karon usa ka education supervisor. “I am at quandary as to why an applicant with that background outranked applicants who are full-fledged secondary school principal and education supervisor with secondary education background and experiences,” nagkanayon si Sia.

Kahinumduman nga si Ratificar naghupot sa posisyon nga elementary school principal sa Gulayon Integrated School. Sa iyang pagdumala sa maong eskwelahan, gikatahong wala siya’y maayong relasyon sa komunidad nga mibunga pa gani ug petisyon nga naghangyo nga papahawa-on siya sa maong tunghaan. Sumala pa sa usa ka ordinaryong molupyo kon ingon ana ang ilang pagpahigayon sa ranking, nahimutang nga dili na ranking kon dili “wrongking.” Ang mga naglangkob sa screening committee sa City Schools Division mao sila si Mrs. Narcisa Ortega isip Chairman, uban nila ni Pergentino Yabres, Benja-min Julian ug Supervisor Ortiz isip mga membro. (The New Nandau, Vol. XVII No.43)

 

“Si Casculan ra ang makatubag” –-Screening Committee, “NO COMMENT’’

Mao kini ang gipahayag ni OIC principal Fatima Acosta sa Zamboanga del Norte National High School kalabot sa mingtumaw nga controversia sa pagkatudlo ni Lilibeth Grape-Ratificar isip full pledged nga principal sa Zamboanga del Norte National High School dinhi sa dakbayan sa Dipolog.

Matud pa ni Acosta nga ang bugtong makahatag sa katin-awan sa pagkatudlo ni Principal Ratificar mao ra gayod si Schools Division Superintendent Teresita Cascullan tungod kay siya maoy dunay katungod o appointing power mahitungod sa mamahimong principal ubos sa iyang hurisdiksiyon. Sa iyang kabahin, si Supervisor Pergentino Yabres, miyembro sa screening committee sa division office kinsa maoy mihashas sa mga application for promotions niadtong mga matud pa, qualified sa position sa pagka principal sa National High School ang pareha ni Acosta nga si Supt. Casculan ra gyod maoy makapatin-aw sa tanan mahitungod sa maong controversia.

Hinoon iyang gipasiuna nga sumala sa individual evaluation sheet nga ilang gisubmitir ngadto kang Division Superintendent Cascullan, si Ratificar maoy nakakuha ug kinatas-ang rating, dayon ang nagsunod kaniya mao si Perong, dayon si Cecilio Lancian, sunod si Dr. Liao ug ang ikalima mao si Caermare. Gituhuan ni Supervisor Yabres nga si Ratificar qualified ra sa iyang position sa pagka principal sa national high school tungod kay siya maoy kanhi principal sa Gulayon Integrated School.

Ang Integrated School matud pa ni Yabres gilangkuban sa secondary ug elementary schools hinungdan nga duha ka level ang gihuptan ni Ratificar sa wala pa siya matudlo sa iyang present nga position isip principal sa National High School. Angayang kahibaw-an nga nahimong controversial  ang pag-asumir ni Ratificar sa iyang position sa pagka karon tungod sa opinyon nga giluwatan sa Regional Resource Management officer sa departamento sa edukasyon sa region nga kini nahibulong ug nalibog sa pagkatudlo ni Ratificar isip principal sa National High School tungod kay siya elementary grades teacher ug dili qualified alang sa secondary grades position. (The New Nandau, Vol. XVII No.43)

 

Dump truck vs. Passenger bus 2 patay, 14 angol

Usa ka dugoon nga disgrasya sa kadalanan ang nahitabo subay sa nasudnong dalan sa barangay Burgos, Dapitan City niadtong Miyerkules sa buntag, Abril 30, 2008 nga mikutlo ug duha ka kinabuhi ug mi-angol sa daghanang pasahero. Ang maong vehicular accident naglambigit sa mini-dump truck ug passenger bus.

Patay ang duha ka driver sa maong sakyanan nga giila nga sila si Camilo Balladares nga maoy nagmaniho sa mini-dump truck ug Salvador Obnimaga nga maoy nagmaniho usab sa passenger bus. Sa inbistigasyon sa kapolisan sa dakbayan sa Dapitan, ang mini dump truck ang nagdagan kini sa maong nasudnong dalan paingon sa dakbayan sa Ozamis, samtang ang bus ang gikan kini sa Sibutad paingon sa dakbayan sa Dipolog.

Sa paghidangat sa maong lugar kalit nga mi-overtake ang passenger bus sa gisundan niining motorcab. Wala makabantay ang driver niini sa gika-engkuwentro nga mini-dump truck nga gikatahong kusog usab ang dagan nga miresulta sa pagkasungag sa duruha ka mga sakyanan ug nabalintong. Ang driver nga si Balladares ang gikatahong patay diha-diha samtang gideklarar usab nga patay na sa pag-abot sa tambalanan ang laing driver nga si Obnimaga.

Basi sa report, adunay 14 ang na-angol sa maong vehicular accident. Giila ang uban nga sila si Porferia Lezarte, Emma Balagot, Rollie Pagasian, Perla Bancal, Jojie Bancal, Peperio Ondong, Iluminada Cuenca, Silvestre Maga, Jevy Boy Tepetulan, Felicidad Balingit, Wilson Baco, Romeo Dizon ug si Edilberto Perio-Perio.

Ang uban kanila ang gipangdala sa mga tambalanan sa Dapitan ug Dipolog. (The New Nandau, Vol. XVII No.43)

 

PROVINCIAL CHICK DISPERSAL PROGRAM PORMAL NGA GILUSAD

Pormal nga gilusad ni Gobernador Rolando E. Yebes ang Provincial Chick Dispersal Program aron kini ang mamahimong tuburan sa dugang pagkaon ug kita sa atong mga katawhan. Niadtong Biernes, Mayo 2, 2008 didto sa Kapitolyo Probinsyal gitunol ni Pro-vincial Administrator Rafael Cabanlit nga mirepresentar sa gobernador ngadto ni Konsehal Jojo Villaester sa lungsud sa Roxas ang usa ka piso sa manok isip simbolo sa pormal nga paglusad niini.

Si Vic Sanchez, Jr., hepe sa Office of the Provincial Veterinarian, misugilon nga andam na ang ilang buhatan sa pag-implementar sa maong programa sa gober-nador. Matud pa ni Sanchez, iyang gisugyot ngadto sa gobernador nga hatagan ug taas nga prayoridad sa chick dispersal ang mga membro sa LANDO-BIBO nga maoy gitutokan karon sa administrasyong Yebes aron mapadali ang pag-angat sa ilang ekonomikanhong estado.

Ang mga piso nga ipanghatag sa gobernador adunay dugo sa Sasso, Kabir, Black Giant, Cornish, Plymouth Rock, Rhode Island Red ug Australorp nga dali ra kaayong mudako ug lamian usab ang karma niini dili sama sa broiler. Sa laing bahin, dako kaayo ang pasalamat ni Mayor Jesus “Seute” Lim sa lungsud sa Salug ngadto ni Gobernador Lando Yebes tungod sa gihimong fish seeding sa Fisheries Division ubos sa Special Project Unit nga gipangu-luhan ni Vic Sanchez, Jr. Niadtong Miercoles, Abril 30, 2008, misurpresa sa pagpanghagbong ang maong division sa 30,000 ka mga buhing semilya sa isdang Tilapia didto sa suba sa Salug.

Ang maong mga semilya ang puede nang paslon tulo ka bulan gikan sa ilang pagpanghagbong ug kini gibanabana nga maka-benepisyo sa daghanang mga mangingisda. (The New Nandau, Vol. XVII No.43)

 

GEN. YANO MIKOMPERMAR BAG-ONG AFP CHIEF

Opisyal nang molingkod sa iyang katungdanan sugod karong Mayo 12, 2008 adlaw nga Lunes si Lt. General Alexander Yano isip bag-ong Chief of Staff sa Armed Forces of the Philippines.

Kini maoy gikompermar mismo ni Gen. Yano kagahapon (Mayo 2, 2008) atul sa 72nd anniversary sa 1st Tabak Division, Philippine Army, Pulakan, Pagadian City. Iyang gipahayag nga bisan ilalom sa iyang lederato magpadayon ang tahas ug responsibilidad sa armadong kusog ug pakigbatok sa insurgency. Giklaro ni Gen. Yano nga mo-asyumer siya pagka chief of staff karong Mayo 12, apan dili pa niya mabutyag sa karon kung unsa ang iyang thrust tungod kay wala pa siya opisyal nga nakalingkod sa maong bag-o niyang katungdanan.

Atul sa turn-over of command, nasayran nga matod pa ang mga opisyales sa tibook probinsiya ang personal nga mosaksi niini aron sa pagpakita sa ilang full support sa pagkatudlo ni Gen. Yano pagka AFP Chief nga lumad nga taga Disud, Sindangan. (The New Nandau, Vol. XVII No.43)

 

10 ordinansa sa SP Dipolog polos ‘TKO’ sa SP ZaNorte

Wala gihapon hatagi ug paborabling aksiyon sa Sangguniang Panlalawigan ang bag-o lamang gipasar nga ordinansa sa Sangguniang Panglungsod ning dakbayan sa Dipolog nga nagtinguha sa pag-regulate sa matud pa, kasaba o noise nga mag gikan sa operation sa mga entertainment establishments ug ubang susamang kalihukan dinhi sa dakbayan ilabi na panahon sa kagabhion.

Sa iyang indorsement nga gipitsahan ug Abril 21, nga gipirmahan ni Sangguniang Panlalawigan Secretary Jose Bantilan, giuli niini ngadto sa opisina ni Vice Mayor Senen Angeles ang kopya sa nasangpit nga ordinansa numero 07-198 nga way paborabling aksiyon. Ang Committee on Laws, Ordinances, Resolutions, Rules and Style sa Sangguniang Panlalawigan hinoon sa iyang rekomendasyon, ang mitambag sa Sangguniang Panglungsod sa paghatag ug hustong definition o pagpasabot sa words nga usual ug normal sound nga maoy basihan sa excessive noise nga magagikan sa operasyon sa bisan asang musical appliances o instrument nga makamugna ug kahasol sa pagdongog sa katawhan o dili na makamugna ug matud pa public disturbance.

Angayang kahibaw-an nga gipangamahanan ni konsehal Horacio Velasco ang nasangpit nga ordinansa tumong nga malikayan ang tumang kasaba sa mga karaoke bars, ug mga entertainment houses ilabi na ang sentro ning dakbayan panahon sa kagabhion aron nga dili kini makamugna ug kahasol ngadto sa maayong pagkatulog o pagpahulay sa mga katawhan. Ang maong ordinansa ni Konsehal Velasco matud pa, maoy ika napolo na sa mga oedinansa nga gipasar sa Sangguniang Panglungsod sa miagi nga ‘posoy’ gihapon kay wala hatagi ug paborabling aksiyon sa mga sakop sa Sangguniang Panlalawigan tapos kini himoi nila ug makuting pagtuon kon review. (The New Nandau, Vol. XVII No.43)

 

PIF sa mga board members dili na gamiton para ikompra ug NFA rice

Dili na kinahanglan gamiton pa ang Provincial Identification Fund kon PIF sa mga board members aron ipangumpra ug NFA rice kay ang ila nalang himoon ang pagtabang sa NFA nga matransportar ang bugas ngadto sa mga lagyong barangay gamit ang libreng sakyanan sa gobiyerno.

Mao kini ang gipahayag ni Vice Governor Francis Olvis dihang iyang na-estorya ang usa ka opisyal sa NFA nga misugilon kaniya dili na kinahanglan mopalit pa sila ug bugas kay ang ilang gikinahanglan mao ang sakyanan. Angay masayran ang probinsya sa Cotabato nangayo ug suporta sa Sanguniang Panlalawigan sa Zamboanga del Norte nga ang mga rice traders nga gikatahong nagtago ug bugas maoy hinungdan sa pagsaka sa presyo, nag-awhag sa mga hingtungdang ahensiya sa gobiyerno nga mohimo ug lakang aron mapasakaan ug kaso.

Mao kini ang resolusyon sa Sanguniang Panlalawigan sa Cotabato kinsa nangayo ug suporta sa ilang resolusyon sa hunta probinsyal nga naghangyo kang Presidente Gloria Macapagal-Arroyo nga tahasan ang nagkadaiyang hingtungdang government agencies nga mopasaka ug kaso sa mga “hoarders of rice” gikan sa National Food Authority. Alang kang Board Member Baguio, dili sila angayan mosuporta sa resolusyon sa Cotabato gumikan kay ang maong katuyoan para lamang sa maong probinsya ug walay labot ang Zamboanga del Norte.

Matud niya, wala pa siya sukad makadawat ug supesyenting report nga dunay mga rice traders dinhi sa atong dapit ang nagtago ug bugas ilabi na gikan sa NFA. Si Board Member Ricky Mejorada nagkanayon nga angayan lamang ang hingtungdang buhatan dinhi sa probinsya mohimog lakang atubangan sa iyang nadawat nga “unconfirmed reports” nga may pipila ka mga dagkong bodega dinhi ang nagpundo ug daghang bugas nga maoy nakapa-artificial sa iyang presyo. Alang kang Mejorada ang pagtapig ug bugas maka-apektar kaayo sa presyo ug kini maoy angayan subayon pag-ayo sa mga hingtungdang buhatan.

Matud niya ang gihimo sa committee on agriculture nga gipangulohan ni Board Member Fernando Cabigon nga nagsugyot gamiton ilang Provincial Identification Fund kon PIF aron ipalit ug NFA rice para ibaligya sa mga lagyong barangay usa ka maayong lakang aron ang mga katawhan ilabi na sa mga kabus makatagamtam sa baratong presyo sa bugas. Si Vice Governor Francis Olvis mipahayag nga dili na kinahanglan ang ilang PIF gamiton para ikompra ug bugas sa NFA kay ang ilang himoon mao nalang ang pagtabang sa National Food Authority pinaagi sa ilang sakyanan aron mahatud ang bugas ngadto sa mga lagyong lungsod ug barangay dinhi sa probinsya.

Matud ni Vice Governor Olvis, iyang na-estorya ang usa sa mga kawani sa NFA ug kini misugyot nga dili na kinahanglan gamiton ang PIF sa mga board members kay ang ilang gikinahanglan mao lang ang sakyanan nga motabang ug transportar sa bugas ngadto sa layong barangay para mabaligya sa mga katawhan. (The New Nandau, Vol. XVII No.43)

 

Rural transit mi-donar 7 skeleton buses, pagahimoong fish sanctuary

MAINITON nga milugway karon sa ilang tabang ang Rural Transit of Mindanao Inc. (RTMI) ngadto sa kagamhanang probinsiyal sa Zamboanga del Norte aron mapanalipdan ang kadagatan ug mapalambo ang industriya sa panagat pinaagi sa pagdonar ug mga chassis sa bus sa RTMI.

Kaniadtong Abril 28, gihimo ang simpli nga pagtugyan sa pito ka mga body sa bus sa maong kompanya sa ilang grahianan nga anaa sa barangay Minaog pinaagi ni Anselmo Ambos, Jr., Dipolog Branch Manager sa RTMI ngadto kang Governor Rolando Yebes nga diin gisaksihan usab kini nila ni Provincial Tourism Officer Atty. Ivan Patrick Ang, Jay Adraincem sa Provincial Information Center ug Engr. Dennis Tenorio sa Provincial Engineering Office.

Gipasabot ni Governor Yebes nga ang maong mga kaha sa sakyanan ang gamiton kini pinaagi sa pag-istablisar ug fish sanctuary diha sa mga kadagatan paingon ngadto sa tersiro distrito. Kini ang ipanghagbong diha sa mga kadagatan aron maoy kapuy-an ug itloganan sa mga isda. Matod pa sa gobernador nga kabahin kini sa programa sa probinsya aron mapalambo ang industriya sa panagat ug mapanalipdan ang kadagatan sa probinsiya ilabina sa illegal nga pagpanagat sa mga purse seiners dinhi sa atong dapit.

Mahinumduman, personal nga nahimamat ni Governor Yebes ang tag-iya mismo sa RTMI nga si Ricardo Yanson atul nga mibisita kini dinhi sa Zanorte kuyog sa grupo nga gitawag ug Sunshine Boys nga gilangkuban sa mga dagkong negosyante nga gikan sa Bacolod ug probinsiya sa Negros. Gipaabot sa gobernador ang kabahin sa iyang plano nga butangan ug mga biya nga kaha sa sakyanan ang mga kadagatan sa probinsiya silbing fish sanctuary. Kaniadtong Lunes, nadawat na sa probinsiya ang maong pito ka mga biya nga kaha sa bus sa RTMI aron maoy gamiton alang sa maong nasangpit nga katuyuan. (Southpoint, Vol.1No.18)

 

Labason
38 anyos gitulis, gipusil patay

Usa ka 38 anyos nga lalaki ang gitulis ug gipatay sa wala mailhing suspetsado sulod mismo sa iyang tindahan didto sa may Barangay Usokan sakop sa lungsod sa Labason ning lalawigan, karong bag-uhay pa lamang.

Sa inisyal nga imbestigasyon nga gihimo sa Labason PNP nasayran nga si Calumba anaa kini sa nasangpit nga dapit sa nahisgutan sa unahan diin usab ang wa mailhing suspetsado nagpakaaron-inong kostomer.  Ug sa dihang nakahigyon ang suspek nga himuon na niya ang iyang dautang laraw mihimo gilayon kini sa pagtion sa gidala niining 45 kalibre nga pistula ngadto sa biktima.

Ang suspek mihimo sa pagkuha sa usa ka kwentas, bracelet ug wa usab matino nga mga halin sa tindahan sa biktima.  Dugang pa niini, human sa pagkuha sa suspek sa mga nasoy’ng butang, mihimo pa kini sa pagpusil sa biktima tunong gayud sa ulo niini nga mao usa’y hinungdan sa hinanaling kamatayon sa biktima.

Atul sa crime scene, narekober sa mga mingresponding polis sa lungsod ang usa ka basiyo sa 45 kalibre ng pistula nga anaa karon gidiposito sa maong buhatan aron maoy pagagamiton sa pagahimuong hearing sa korte. Dugang pang imbestigasyon ang padayon pa kining gihimo sa mga elemento sa kapolisan sa lungsod sa Labason sa nasoy’ng krimen. Pedmark, Southpoint, Vol.1No.18)

 

Sindangan
43 anyos gipusil patay

Patay na nga nahidangat sa tambalanan ang usa ka 43 anyos nga lalaki human kini gipusil sa wa mailhing suspetsado didto sa ilang panimalay sa may Barangay Lawis sakop sa lungsod sa Sindangan ning lalawigan, karong bag-uhay pa lang. Ang maong biktima giila sa pangalang Enerio Pitogo, 43 anyos, minyo ug nagpuyo sa naasoy’ng dapit.

Sa inisyal nga imbestigasyon nga gihimo sa Sindangan PNP, nasayran nga si Pitogo niadtong higayuna anaa kini sulod sa ilang panimalay nga nag-inusara diin usab kini nalingaw og tan-aw sa mga salida sa telebisyon.  Ug matud pa adunay usa ka wa mailhing suspetsado anaa sa main door sa ilang panimalay nga nagpahipi niini nga diin ang maong biktima wala usab makabantay. Si Pitogo nakaangkon gayud kinig usa ka samad-pinusilan sa luyong bahin sa li-og niini.  Ug gidali kini sa pagdala sa Sindangan District Hospital aron kapatambalanan. Apan gideklara kini sa attending physician niini nga ang maong biktima patay na kini sa paghidangat sa tambalanan.

Dugang nasayran nga human sa pagpusil- patay sa suspek ngadto sa biktima dali gilayon kining mipalayo sa lugar sa nahitabuan sa wala usab masayring direksyon. Police manhunt operation ang padayon pa kining gihimo sa mga elemento sa kapolisan sa lungsod sa Sindangan alang na sa posibling pag-ila ug pag-aresto sa suspetsado. (PEDMARK, Southpoint, Vol.1No.18)

 

3,803 nakapahimulos sa TLC sa 1st quarter

Mokabat sa 3,803 ka mga katawhan sa nagkalain-laing lungsod ning lalawigan sa Zamboanga del Norte ang nakapahimulos sa programang Tabang ni Lando sa Communidad kon TLC Medical and Dental Outreach Mission nga gilusad ubos sa kasamtangang administrasyon ni Governor Rolando E. Yebes sulod sa unang kwarter ning tuiga.

Basi sa Accomplishment Report nga nahipos sa buhatan sa Community Development Assistance Unit kon CDAU pinaagi ni Mrs. Edmarie Baes – Kwong, ang TLC Field Officer ug kini usab nagabasi sa Zamboanga del Norte Provincial Health Office sa pagpangulo ni Dra. Carmencita Icao, ang Provincial Health Officer nasayran nga ang maong programa gilangkuban kini sama sa tuli adunay 181 ka mga kabataan ang nakapahimulos niini, sa ibot sa ngipon adunay 492, sa nagpakonsulta adunay 3, 110 ug aduna usa’y 20 niini alang sa uban pang serbisyo nga ilang natunol ngadto sa mga katawhan.

Gikahibaluan nga ang nasangpit nga TLC Medical and Dental Outreach Mission usa kini sa mga nanag-unang programa ni Governor Yebes sa iyang pagpangalagad sa katawhan nga diin walay gipili o walay gipihig ingon man ang pagtunol niini walay bulok sa politika kon patas ang tanan. (PEDMARC ANTONIO, Southpoint, Vol.1No.18)

 

Pagpananum ilawom sa kalubihan makatabang pagpadaghan sa bunga sa lubi –-PCA

Gi-awhag karon sa Philippine Coconut Athority kon PCA ang tanang mga mag-uuma sa lubi nga mas makatabang para sa pagpadaghan sa bunga sa lubi kung tamnan sa mga nagkadaiyang tanum ang ilawom sa kalubihan.

Si Mr. Ralph Hamoy sa PCA mipahayag nga kung himoon ang pagpananum ilawom sa kalubihan kini daku ug poruhan nga modaghan ang bunga sa lubi komparar ni-adtong wala matikad. Iyang gipahibalo nga gawas nga modaghan ang bunga sa lubi mapun-an pa gayud ang kita sa mga mag-uuma tungod kay aduna may dugang tanom nga ilang maani ilawom sa ilang kalubihan.

Sa na-obserbahan dinhi sa Zanorte pipila lamang ang adunay tanom ilawom sa kalubihan ug mas halapad gayud ang bakanti ug matikad. Kung ikomparar kani-adto ug karon daku kaayo ang pagkonhud sa bunga sa lubi dinhi sa Zanorte. Usa ka mag-uuma ug lubi sa lungsod sa Polanco ning lalawigan ang mipahayag nga kani-adto ang iyang komprason nga pito ka iktarya mohugno ug 3mil ngadto sa 4mil ka book lubi, apan karon maayo na lang ug mo-abot ug usa ka libo kabook lubi ang iyang makopras.

Gipahibalo usab sa buhatan sa PCA pinaagi ni Mr. Ralph Hamoy ang mga mag-uuma sa lubi nga mobisita sa ilang buhatan dinhi sa dakbayan aron mahatagan pa kini ug dugang pamaagi para pagpadaghan sa bunga sa lubi. Hinoon gipaklaro ni Hamoy nga usa gayud ang pagpanaum ilawom sa kalubihan nga makahatag ug dugang bung sa lubi. (Southpoint, Vol.1No.18)

 

Libreng 4-year course alang sa disabled gitanyag sa DMC

Mahatagan na gayud ug kahigayunan ang mga kabatan-onan o ni bisan kinsa nga adunay mga depekto sa ilang panglawas nga buot usab nga nagtinguha nga mamahimong kining degree holder. Gibutyag ni Dr. Gerald T. Concha, ang AVP Adminstration sa Dipolog Medical Center College Foundation Incorporated nga niining pagbukas sa tuig ting-tungha kon First Semester alang sa school year 2008-2009 diin ilang gitanyag ang upat ka tuig nga kurso sa naasoy’ng tulunghaan nga libre kini ug alang lamang sa mga kabatan-onan o ni bisan kinsa nga adunay depekto sa ilang panglawas kon disabled person.

Asoy pa ni Concha nga ang makapahimulos niini kadto lamang mga disabled person nga nakahuman na sa pag- eskwela sa sekondarya nga adunay general avearage sa card rating nga 85 % ug no age limit kon walay gipili ang pangedaron niini. Maka-enrol gayud ang mga kwalipikadong disabled person sa upat ka tuig nga kurso sama sa Bachelor of Science in Information Technology ug Bachelor of Science in Computer Science.  Ug kini walay ilang mabayran bisan gamay kabahin na sa tuition fees ug miscellaneous fees tungod kay ang tanang libre lamang kini ug ingon man usab limitado lamang ang makapahimulos niini.

Dugang pang asoy ni Concha nga tumong ug tinguha sa DMC College Foundation’s Person with Disability Scholarship Program aron mahatagan ug higayon ang mga kabatan-onan o ni bisan kinsa nga adunay depekto sa ilang panglawas nga nagtinguha sa ilang kalampusan nga mamahimong degree holder ug ilabina gayud ang mga kabus niini nga walay ikagasto sa pagtungha.

Buot usab ipaabot ni Concha nga bisan pa man nga usa sila ka mga disabled person apan hatagan usab sila sa igong pagtagad ug angay usab sila pagahatagan sa saktong edukasyon ingon man patas ang pagtratar niini  sa susama sa usa ka normal nga pagkatawo. Ug alang sa mga interesado niini nga bout mopahimulos sa maong talagsaong kahigayunan makigkita lang kang Mrs. Mary Rose Buzon, ang Special Project didto na sa nasangpit nga tulunghaan alang usab sa dugang pang impormasyon. (Pedoy Ogoc & Mark “Tisoy” Tan, Southpoint, Vol.1No.18)

 

Malaria sa Siayan takod gikan Zambo Sur - Dra. Icao

Giila karon ni Dra. Carmencita Icao ang hepe sa Integrated Provincial Health Office IPHO sa kagamhanang lokal sa Zanorte nga takod gikan sa silingang lalawigan sa Zamboanga del Sur ang pagsaka sa kaso sa malaria nga natala sa lungsod sa Siayan.

Atol sa press conference uban sa mga tinugyanan sa Global Fund, usa ka non governmental organization nga gipundohan gikan sa lain-laing kanasuran kinsa mihimo sa libreng ayuda sa Zanorte para sa pagsumpo sa sakit nga malaria gipahayag ni Dra. Icao nga sa dihang mihimo ug pagpang-spray ang mga lungsod sa Buog ug Bayug sakop sa Zamboanga del Sur ang mga lamok nga nagdala ug kagaw nga malaria ang mikagiw kini padulong sa lungsod sa Siayan ilabi na sa mga barangay Pange, Moyo, Guibo ug Diongan tungod kay kini dool lamang kaayo sa duha ka lungsod sa Zamboanga del Sur.

Sigun sa talaan sa tibook parte sa Zanorte ang lungsod sa Siayan maoy adunay pinakadaghang kaso sa malaria diin mitala kini ug 114 ka mga kaso. Hinoon gipahayag sa hepe sa IPHO nga ang tanang kaso sa malaria nga mitumaw sa maong lungsod ang natambalan na ug wala na kini angayang kabalak-an. Gi-angkon usab ni Mayor Wilfredo Siasico sa lungsod sa Siayan nga kalit gayud ang pagsaka sa kaso sa malaria sa nahisgutang upat ka mga barangay sa ilang lungosd human mihimo ug pagpanambal ang duha ka lungsod sa Zamboanga del Sur nga kasikbit sa lungsod sa Siayan. Gumikan sa kadaghan sa kaso sa sakit nga malaria nga natala sa lungsod sa Siayan ang Global Fund uban sa IPHO ang mohimo kini sa libreng pagpanghatag sa mga moskitiro nga aduna nay nakatapot nga tambal para dili makadool ang lamok, mga tambal para sa malaria ug uban pang kahimanan nga makatabang sa pag-ila kung ang usa ka pasyente nataptan ba sa sakit nga malaria.

Ang maong kalihukan gikatakdang himoon karong Abril 25 ning tuiga sa lungsod sa Siayan diin adto kini unang ipahigayon gumikan sa rason nga ang maong lungsod maoy adunay pinakadaghang natala nga sakit nga malaria. Ang malaria usa ka kagaw nga gikan sa lamok nga mahimong makapatay sa tawo kung dili matambalan, hinoon gipaklaro ni Dra. Icao nga sulod lamang sa upat ka adlaw ang pagtumar sa tulo ka klaseng tambal aron hingpit nga mamatay ang kagaw nga malaria. (Southpoint, Vol.1No.18)

 

Proyektong patubig gitotokan, misagop sa kinaraang pamaagi

GITOTOKAN karon sa kagamhanang probinsiyal sa Zamboanga del Norte pinaagi ni Governor Rolando Yebes nga mahatagan sa igong supply sa tubig ilimnon ang mga lagyong barangay dinhi sa probinsiya nga gamay lang ug gasto ug minos ang maintenance.

Niadtong mi-aging adlaw, mipahigayon sa ilang educational tour ang mga barangay kapitan sa lungsod sa Roxas ug Jose Dalman didto sa lungsod sa Salug nga maoy pagdasig ni Governor Yebes aron personal nga makita sa mga kapitan ang water supply system nga gitawag ug Ram Pump nga anaa sa barangay Liguac, Salug. Kini usa ka kinaraan nga pamaagi nga diin ang tinubdan sa tubig ang gikan sa tubod nga maoy nag-supply ngadto sa mga kabalayan, apan wala na kini migamit ug koryente ug uban pang makina. Ang gikusgon sa tubig sa tubod maoy gigamit nga pressure aron ang tubig mopaingon ngadto sa mga kabalayan.

Alang kang Governor Yebes nga kini usa ka kinaraan nga pamaagi apan epektibo kini karong panahona ilabina diha sa mga lagyong barangay. Busa gusto niya kining ma-implimintar sa ubang mga barangay dinhi sa probinsiya. Masaligon ang mga barangay kapitan nga andam silang mohatag ug counterpart aron gamiton sa pagpatuman sa maong proyekto nga diin advantage alang kanila ang pagsagop sa maong sistema sa paghatag ug tubig ngadto sa mga katawhan tungod kay dili dako ug gasto ug dili na mogamit pa ug koryente.

Sa kabahin ni Governor Yebes andam siyang mohatag ug pundo, gani iya nang gimanduan ang taga Provincial Engineering Office alang sa maong katuyuan. Iyang gihangyo ang mga kapitan nga mangita ug kusog nga tubod sa tubig aron ma-survey kini sa mga engineer sa probinsiya. (Southpoint, Vol.1No.18)

 

5-M kantidad sa proyekto gi-turnover sa Polanco

TUMANG kalipay ang gibati sa mga opisyales ug mga lomolopyo sa upat ka mga barangay sakop sa lungsod Polanco ning atong lalawigan sa Zamboanga del Norte nga parehong nakadawat ug mga proyekto gikan sa probinsiya nga nagkantidad sa kinatibuk-an 5 milyones pesos kapin.

Laing mga proyekto ang gi-turn-over sa kagamhanang probinsiyal pinaagi ni Governor Rolando Yebes nga gilangkuban sa rehabilitation sa hanging foot bridge sa barangay Linabo nga nagkantidad ug 700 mil pesos, construction sa Day Care center sa San Pedro sa kantidad nga tunga sa milyon ka pesos, asphalting sa dalan gikan sa Malala ngadto sa Milad nga anaa sa usa ka kilometro ang gilay-on. Kini nagkantidad sa P 3, 349,593.50 ug construction sa Home Economics Building sa New Sicayab Elem. School sa kantidad nga tunga sa milyon ka pesos.

Masaligon sila si Kapitan Rogelio Elopre sa barangay Linabo, Kapitan James Imperial sa San Pedro, Leonilo Zulueta sa barangay Milad ug kapitan Marianito Paalisbo sa New Sicayab nga ilang ampingan ang maong proyekto nga ilang nadawat. Ilang gipahayag nga karon pa lang nakatilaw ug proyekto ang ilang barangay gikan sa probinsiya. Busa ilang gikalipay kini ug dako nga nadawat nila ang maong proyekto nga maoy gisaad ni Governor Yebes.

Gipahayag ni kapitan Elopre sa Linabo nga ang pag-ayo sa hanging bridge sa ilang barangay kini ang importanti kaayo tungod kay mao kini ang agi-anan sa mga katawhan pasulod ug pagawas sa ilang barangay. Malaumon ang maong mga opisyales sa barangay nga magpabilin ang paghatag ug proyekto ni Governor Yebes diha sa mga kabarangayan.

Angayang masayran nga pipila na lang ka mga barangay sa tibook probinsiya sa Zanorte ang wala pa makadawat ug mga proyekto nga nagkantidad ug tunga sa milyon ka pesos gikan sa probinsiya. Sa kinatibuk-an anaa na karon sa dos mil ka mga proyekto ang hingpit nang na-implimintar ilalom sa administrasyon ni Governor Yebes. Ang pag-turn-over sa maong mga proyekto kini ang inubanan usab nila ni Mayor Anacleto Olvis uban ni 1st District Board Member Jun Cabigon ug sa taga Provincial Engineering Office. (Southpoint, Vol.1No.18)

 

 

 

NOTE: SEND US YOUR NEWS.  Tell us what's going on in your barangays, clubs, schools, businesses and non profit organization. You can also send notices and announcements.
          

 

    Email to webmaster@dipolognon.com

      
Google
WEB THE DAILY DIPOLOGNON
 

THE DAILY DIPOLOGNON
DIPOLOG CITY, PROVINCE OF ZAMBOANGA DEL NORTE PHILIPPINES
www.dipolognon.com www.dipolognon.net  www.dipolognon.org  Keyword: dipolognon
www.dipologcity.com  www.dipologcity.net  www.dipologcity.org  www.dipolognon.com  www.dipolognon.net  www.dipolognon.org    www.dipolog.org  www.dapitan.com   www.eartajo.com  www.cagayandeoro.us 
www.artajo.us www.artajo.info www.eddie.artajo.name www.zamboangadelnorte.com  www.zambonorth.com  www.pagsalabuk.com  www.dipolog.biz www.artajo.biz  www.plasticextrusion.us www.cebu.org
www.davao.us  www.tagum.com  www.giscard.us  www.pagadiancity.com www.malaybalay.net  www.ozamis.com  www.tangub.com  www.oroquieta.net
 www.nabunturan.com www.znuc.org www.znch.ph
www.gingoog.com  www.ozamiz.us www.general-santos.com  www.surigao.net  www.kidapawan.com  www.iligan.us www.raelene.us  www.cagayan-de-oro.com   www.mutyasadipolog.com
 
www.zamboanga.net   www.palmbeachgardens.us   www.islandgarden.net  www.cotabato.net  www.tacurong.com  www.butuan.us  www.pagadian.com  www.dipolog.us
www.zamnai.com
www.dipologhotels.com
   www.dipologpress.com  www.dipologsardines.com   www.extrusion.us www.ozamizcity.com  www.marawi.net www.dipologchamber.com

Copyright©2008 by The Daily Dipolognon All Rights Reserved  PRIVACY POLICY & DISCLAIMER
Email : webmaster@dipolognon.com  Since October 18, 2000