2

April 21,  2008

 

POC magtagbo tungod sa abnormal nga sitwasyon sa Dipolog

Gibutyag ni Konsehal James Verduguez, Chairman sa Committee on Peace and Order sa Sangguniang Panglungsod nga nagka estorya na sila ni Mayor Evelyn Uy kalabot na sa bag-ong panghitabo dinhi sa dakabayan nga nakapakogang  na usab sa mga katawhan.sama sa bag-o lamang pag strike sa budol-budol gang nga mibiktima ug duha ka mga babayeng molopyo dinhi nga nakuhaan ug kapin sa milyon ka pesos ug patulis sa laing duha ka mga babayeng biktima nga bag-o lamang naka withdraw ug kuwarta sa First Consolidated Bank nga mokantidad ug P141 mil ka pesos ug ang bag-ong tulis sa tag-iya sa 168 nga si Ching Lu nga usa ka Taiwanese.

Atol sa ilang panag estorya, gisugyot ni konsehal Verduguez nga angayang tigumon na ang mga sakop sa Peace and Order Council aron nga ilang kahimoan ug hustong aksiyon ang nasangpit nga problema ilabi na ang gikaingon ug naobserbahan sa kadaghanan nga nagmantika ug haguka ang mga sakop sa kapolisan dinhi sa dakbayan sa Dipolog sa pagsulbad sa mga krimen.

Malagmit karong semanaha ipatawag ni Mayor Uy ang mga sakop sa Peace and Order Council aron nga ilang kahisgotan ang nasangpit nga ponto ug ila usab nga masayran kung unsa ang mga problema ug kawad-an nga giatubang karon sa mga sakop sa kapolisan nga hangtud karon wala pa makasulbad sa nasangpit nga kaso sama sa nanghitabo sa miaging susama.

Giangkon ni konsehal Verduguez nga sumala sa iyang nahibaw-an dunay kakulangon sa mga personahe ang police office dinhi lakip na ang ilang mga kahimanan diha sa paggukod sa mga masinupakon sa balaod. Apan iyang gitohoan nga ang kalamposan sa kapolisan batok sa mga kriminal nagdepende lamang sa ilang estratehiya inubanan sa suporta sa mga katawhan.

Gitohoan ni Verduguez nga ang mainitong suporta nga ipakita sa mga katawhan ngadto sa kapolisan maoy usa ka dakong factor aron masulbad sa kapolisan ang nahitabong krimen dinhi sa dakbayan.

Giawhag sa chairman sa committee on peace sa Sanguniang Panlungsod ang mga katawhan sa dili pagmakuli ug report dayon sa kapolisan o dili ba sa ilang mga barangay officials, ni bisan kinsang tawo o grupo sa mga tawo nga ilang mamatikdan nga dunay mga daotang kalihukan.

Gitohoan usab hinuon  nga nagmantika ang mga sakop sa kapolisan dinhi sa dakbayan tungod sa matud pa kakulang sa suporta ni Mayor Uy ngadto sa maong buhatan ilabi na gayud sa ilang gikinahanglang gasoline allocation nga maoy nag-unang problema sa maong buhatan.

Pipila ka mga polis misugilon nga ang kakulang sa supporta sa mayor para sa ilang gasolina nakaapektar ug dako sa ilang operasyon gumikan kay halos sa ilang mga lakaw, ila nang personal nga koot sa bulsa ang para tubil sa ilang sakyanan gumikan kay dili paigo ang gasoline allocation para sa ilang inadlaw nga kalihukan nga gihatag gikan sa Provincial Police Office. (The New Nandau, Vol. XVII No.40)




ZaNorte andam nANg mo-host sa MinBizCon –Capili

MASALIGON ug dako si Mr. Edwin Capili,  PCCI Regional Governor for Western Mindanao ug maoy Vice Chairman sa MinBizCon nga dili mahitabo karon ang nahinagbo nga problema kaniadto nga maoy gihimong rason hinungdan nga wala mahinayon ang pagpahigayon sa Mindanao Business Conference dinhi Dipolog tulo na ka tuig ang nakalabay.

Mahinumduman, nakontrobersiyal ang wala mahinayon nga Minbizcon dinhi sa Dipolog kaniadto tungod kay gi-question ang kapasidad niini diha sa pag-akomodar ug mga dagkong conference. Kulang ug mga lawak ang mga hotels ug mga lodging house pag-akomodar sa mga partisipante. Gikan sa Dipolog City Airport bugtong motorcab lang ang nag-unang transportasyon nga maoy masakyan sa mga partisipante paingon sa sentro nga bahin sa siyudad. Apan alang kang Capili, kung itandi sa tulo na ka tuig ang nakalabay andam na sila karon sa pag-host sa maong conference. Una niini gibati niya ang kahadlok diha na sa pagdumala nila karon sa maong dakong kalihukan dinhi sa Zanorte apan dako ang iyang pagsalig nga kini ang magmalampuson tungod kay anaa ang suporta ni Governor Yebes ug ubang mga opisyales sa probinsiya.

Iyang gidugang nga usa kini ka talagsaon kaayo nga higayon nga ikapakita sa atong probinsiya ang mga maayong talan-awon niini. Gidayeg ni Capili ang lederato ni Governor Yebes nga pinaagi sa pagpaningkamot gipakita sa atong probinsiya ngadto sa tibook Pilipinas ang mga maayong programa  aron malangkat sa talaan nga maoy pinaka-pobre nga probinsiya sa tibook nasud ang Zamboanga del Norte. Ang MinBizCon ang sentro kini nga ipahigayon diha sa Zamboanga del Norte Convention and Exhibition Center nga diin gihulagway ni Capilin nga haom alang sa maong kalihukan. Mas ikapasigarbo pa kini kung itandi sa ubang mga venue kung hain gipahigayon ang Mindanao Business Conference.  

Dako usab ang kalipay ni PCCI Regional Governor for Northern Mindanao Elvie Tan nga anhi sa Dipolog, Zamboanga del Norte himoon ang maong conference. Atol sa Mindanao Business Conference niadtong mi-aging tuig didto sa General Santos City na-uyonan sa tanan nga ang Dipolog City Chamber of Commerce and Industry maoy host sa MinBizCon karong tuiga. Dako ang iyang pagsalig uban sa suporta sa provincial government sa Zamboanga del Norte ug sa kagamhanang lokal sa Dipolog ug Dapitan nga mahimo dinhi sa atong dapit ang pagpahigayon sa maong kalihukan. (Southpoint, Vol.1No.15)


PAGDILI PAGKUHA SA LUPOY TUTOKAN ARON PANALIPDAN ANG TULOY, MANGSI

Ang pagdili sa pagpanguha o panagat sa mga lupoy (gagmay pang anak) sa isdang tuloy ug mangsi maoy usa sa mga nag-unang lakang nga nahimong consensus o nasabotan atol sa gipahigayong panagtigum nga gipasiugdahan sa rehiyonal nga buhatan sa Bureau of Fisheries and Aquatic Resources (BFAR) sa Departamento sa Agrikultura sa Rehiyon 9 niadtong tibuok adlaw sa Martes, Abril 15 sa Francisca Hall sa Top Plaza Hotel dinhi sa Dipolog.

Ang maong “Consultative Meeting on Sardinella Management Plan” gipatawag ni BFAR Regional Director Virgilio Alforque tungod sa namatikdan karon nga ingon sa inanay nga pagkawala sa tuloy ug mangsi, ilabi na ang nahauna, nga unta abunda man sa maayo kini dinhi sa atong kadagatan atol sa season o panahon sa pagdaghan niini. Ang pagdaghan sa tuloy dinhi anha sa mga bulan sa Abril ug Mayo mao nga kining panagtigum gihimo karon ug dinhi diin kini abunda. Maikagong miapil sa maong panagtigum-konsultasyon ang mga mayor sa dakbayan sa Dipolog ug mga lungsod sa Sindangan ug Jose Dalman, ning lalawigan diin sa kadagatan sa maong mga dapit abunda ilabi na sa tuloy atol sa peak season niini apan nakita nga kasagaran kining maong mga isda usahay mausik lang tungod sa pagtamhang sa mga mangingisda ug mga biyahedor ug usahay wala na ganiy presyo.

Si Director Alforque (itaas wala) samtang mipasabot sa kamahinungdanon karon pagpa- nalipod sa isdang tuloy ug mangsi,  samtang si Mayor Belen Uy (itaas tuo) mipabati sa iyang kabalaka bahin sa mga isdang gamiton sa ‘bottled sardines’ sa Dipolog. Ang mga sektor nga dunay kalabutan aron mapatunhay ang mga matang sa isda nga nahilakip sa sardinella species (ubos) naglakip sa mga hingtungdang ahensiya sa gobiyerno, mga lokal nga ehekutibo, mga tigproseso ug tignegosyo sa isda ug mga pribadong hut-ong nga dunay katuyoan pagpreserbar sa rekursos naturales sama sa mga produkto sa dagat.

Aduna man galiy gipasulay pagpapasar nga usa ka balaodnon o direktiba nga magdili unta sa pagkuha sa maong mga isda sa gitakdang panahon, apan kini gisupakan sa mga mayor ug gamay nga mangisngisda tungod kay kining maong mga gagmay nga isda mao may sagad lamang nilang makuhaan sa kapanginabuhian adlaw-adlaw. Mao nga ang pagdili lang samtang kini anaa pa sa estado nga lupoy o gagmay pa kaayo ug usik pang kuhaon maoy temporaryong nasabutan aron mapanalipdan ang maong matang sa gagmayng isda nga kanunay nga giabusohan. Migula sa maong consultative meeting nga ang Zamboanga Peninsula mao karoy sardine capital sa nasud tungod sa canning factory sa Zamboanga City ug ang Dipolog maoy “bottled sardine capital” sa nasud ug apil na gani sa kalibutan kay dinhi man ang tinubdan sa naila na kaayong binotelyang Spanish Sardine.

Kini maoy usa sa mga hinungdan ngano nga si Dipolog City Mayor Evelyn T. Uy hugtanong naninguha nga kapanalipdan ang tuloy ug mangsi kay kini mao man ang mga isdang gigamit sa paghimo sa Spanish sardine dinhi. Nasayran usab nga ang gitawag nga Sulu Sea Triangle nga naglakip sa mga dapit sa Tawi-Tawi, Sulu, Basilan ug Zamboanga Peninsula ngadto sa Palawan maoy nag-unang tinubdan sa mga isdang himoon nga sardinas o kanang apil sa gitawag nga “sardinella” nga matang sa mga isda. (Dipolog Chronicle, Vol.VII No.43)

Credits: Dipolog Chronicle is published every Saturday and its Editorial Office is located at 059 Lacaya St., Dipolog and can be reached through the following Tel. No.: 212-2255

‘Drop-in Center’
sa ‘libod-suroy’ gisubhan na

Gikatakdang pagasubhan karong Lunes sa hapon, Marso 21 ang bag-ong natukod nga “Drop-in Center” sa pagdumala unya sa buhatan sa  City Social Welfare and Development sa Dipolog nga maoy temporaryong papuy-an sa mga batan-ong mga libod-suroy nga madakpan.

Si City Social Officer Nelson Z. Ladera pinaagi sa CIO mipasabot nga ang maong ‘drop-in-center’ nga nahimutang sulod sa Motorpool compound sa City Engineering Office sa Minaog tuyong gihimo sa kagamhanang lokal ning dakbayan ilawom ning kasamtangang administrasyon, aron mahimong temporaryong puloy-anan sa mga kabataan nga masikop nga naglaroy-laroy nga walay tumong dinhi sa dakbayan o mga nailang “streetchildren”, sa hamubong panahon lamang, samtang pagahikayan pa kini sa mga tukmang papeles una kini itugyan pagbalik ngadto sa ilang mga gigikanang dapit o mga ginikanan.

Dugang nga gipaklaro sa City Social Welfare Officer nga kining maong proyekto nahatagan ug katumanan isip pet project ni City Mayor Evelyn T. Uy tungod sa dakong niining pagpakabana alang sa kaayuhan sa mga kabataan ug kababayen-an nga gihatagan usab karon ug dakong kabug-aton sa atong nasudnong kagamhanan. (CIO-alb)

 

Pinaagi sa ‘Tuloy Festival’
Gagmayng mga mangingisda sa Bucana duyog sa kampanya

Ang kahugpongan sa gagmay nga mga mangingisda sa Sicayab Bucana nga sakop sa “Bucana Small Fishermen Livelihood and Services, Inc.” (BSFLS) dakong uyon ug moduyog sa unsa mang mga kalihokan aron pagpanalipod sa gagmay pang isda nga gitawag ug lupoy (gagmay nga anak) sa tuloy ug mangsi.

Duyog sa maong kampanya, sila mopahigayon sa usa ka “Tuloy Festival” karong umaabot Mayo 22, ante vesperas sa pista sa Bucana, pagpaila sa kamahi- nungdanon sa maong mga isda ilabi na alang kanilang mga gagmay nga mga mangingisda kang kansang panginabuhian mao ang pagpanagat o pagpangisda adlaw-adlaw. Ang BSFLS usa ka panaghiusa sa ginagmay nga mangingisda sa Sicayab Bucana nga mga tag-iya sa pumpboat ug binigiw pangis- daan kinsa apil sa pag-supply sa mga isda sa merkado sa Dipolog ug Dapitan.

Sila nagkahugpong aron sila mismo ang mamaligya sa ilang kuha matag adlaw ug mapana- lipdan sila batok sa mga meddlemen o mga managboay sa merkado kansang puhonan, matud pa, mao lamang ang laway samtang silang mangingisda nga naghago pag-ayo ug usahay walay tulog makaluluoy. Tinguha usab nila nga makakat-on ug mahatagan sa tabang panginabuhian ang ilang mga asawa ug ubang sakop sa pamilya.

Ang “Tuloy Festival” maoy ilang unang pagpaila o salvo sa katilingban sa ilang pagkama- ngingisda diin idalit nila libre sa tanan ang sinugbang tuloy, kinilaw ug uban pang matang sa pagluto sa isda diha sa nag-unang dalan sa Barangay. Tungod niini, ilang gidapit ang tanan, walay pili, nga moduyog o kaha mosalmot sa ilang tuloy festival diin adunay usay laing mga kalingawan nga ilang idalit, sama sa fluvial parade, regatta ug ubang bangga nga salmotan sa mga mangisngisda sa maong dapit ug nagtangag ug dagkong premyo.  (Dipolog Chronicle, Vol.VII No.43)

  


Ang Panahon Lay Agdon

Medyo kusog-kusog ang dagan sa Rural Transit nga nagsubay sa National Highway gikan sa Dipolog padulong na ngadto sa lungsod sa Sindangan. Kay sayo laging buntag ang biyahi, wala kaayoy ma-pick-up nga mga pasahero didto sa kadalanan. Usa sa mga pasahero niadto mao si Lola Onsit nga didto gyod mipahiluna ug lingkod dapit sa may front seat.

Dihang kusog nang nanubay ang sakyanan didto sa National Highway duol na sa Manukan, kalit nga misinggit si Lola Onsit ug samtang ang tuong kamot iyang giwara-wara, mi-ingon siya: “Paraaa...Paraaa...Paraaa!” Kaha nataranta, gikalit ug preno sa drayber ang gimanehong bus ug mi-ikid-ikid kini sa kalsada ug nakasinggit ang ubang mga pasahero nga hilabihang lisanga!

“Ngano man, Lola, mokanaog ka?” sikmat-pangutana sa drayber nga haskang lagota. “Zamboanga pa akong destino, iho, mangihi lang ko,” tubag ni Lola Onist nga mingislit! Apan wala pa gani makatindog si Lola Onsit, kalit siyang nakautot nga ang tunog sa dahunog niini ingon sa nagwandog-wandog banda tumong dito sa salog.

“Ahhh...mangutot ra man lagi...ingon mangihi?” matod sa drayber nga makagiki. “Ay kanimo, Dong,” matod ni Lola Onsit nga sa drayber mikablit. “Kon adunay ulan, duna poy dalogdog!” Bitaw sab no...Ho..Ho..Ho!

#####

Thanks again, Fiscal Rex Ortega, ang atong source ning joke of the week. Ato ning gipanakot sa atong tudling pahaom sa kasaulogan sa Earth Month. Actually, ang kasaulogan nagtuki sa estado sa ato karong kalikopan – ilabi na karon ning nagkausab nga dagan sa atong panahon. Niadto modumdom gayod ang ting-init nga magsugod sa bulan sa Enero hangtod na sa maghinapos ang Mayo. Iniglibkas sa maong bulan, modumdom na sab ang ting-ulan! Dinhi ato na sab nga masinati ang ulan ug kusog nga ubanag dalogdog. Sa laktod, normal kaayo nga tamdon ang lakat sa panahon. Apan sa una ra kadto – karon lahi na ang kinaiya sa atong kalibutan. Nahimo nang sapoton ang panahon – Enero, Marso o kaha Abril – may bagyo nang mohapak  nga unta kining mga bulan dili pa man ting-ulan!

Matod pa sa mga eksperto, tungod kini sa Global Warming. Tungod sa pagkagisi sa atong Ozone Layer, nawiwi ang tabil  sa atong kapunaw-punawan mao nga ang kainit sa adlaw kadali rang molahos sa atong kalibutan. Tungod sa pagpabaya ug pagtungina sa katawhan sa atong kalibutan, migrabe ang kahugaw sa ato karong kalikopan. Ang kanhi presko nga kahanginan nga atong hanggabon, nagkalang-og na kini karon kon imong simhoton. Ang kanhi tin-aw kaayo natong kasubaan ug malinis nga kadagatan, karon di mo na kini malangoy-langoyan kay sa mga kagaw na kini gipangsahogan. Sulay ra god ug tagpisaw karon sa atong kasubaan di ba mamulak ug mga lumot imong lubot!

Earth Month – usa ka matang sa kasaulogan nga gi-obserba karon sa tibuok kalibutan...Kasaulogan nga nagpahinumdom kanato nga ang kinabuhi sa kalibutan may kinutoban.

#####

Maihap na lang sa tudlo makumpleto na ang pagsumpay sa boulevard ning atong siyudad. Sumala sa panahon sa kadaghanan nga nakaanhi dinhi, kon mahuman na ang pagsumpay kining boulevard nato dinhi, kini maoy pinakataas nga boulevard sa tibuok Mindanao – nga bisan ang Davao di pa makalabaw! Unsa kaha no…kon ma-operational na kanang pantalan sa Galas, dako gayod ug posibilidad nga molambo ug maanindot ang atong siyudad – ilabi na kon ipaabot sumpay didto ang gisumpay nga boulevard!

#####

Nahisgotan niadto sa pipila ka mga konsehales ning atong siyudad nga may gipanday na nga ordinansa nga mag-regulate sa pagtukod sa mga balay diha sa atong mga barangay. Yet, hangtod karon wala pay tino kon may ordinansa na bang napanday kay nagpadayon pa man gihapon ang tukuranay ug mga balay diha sa atong silingang mga barangay nga walay paskin nga gibitay nga nagpahibalo sa publiko nga ang pagtukod sa balay ubos na sa ordinansa nga napanday sa atong Sangguniang Panlungsod.

Kini god untang ordinansa maoy maggiya kon asa ang balay tukora. Sa ingon niini, ma-determine ang drainage o kaha mga pagatukoron unyang mga kalsada. Kon dili kini himuon nga paagi, mabalik gihapon ang mga hitabo nga ang dakbayan kanunayng magbago sa pagbayad sa mga balay nga maigo sa dalan nga pagahimuon sa dakbayan. Ug kon walay drainage ang atong tubig, way maayong agianan, maglutaw kita panahon sa ting-ulan.

Hapit na sad matapos ang termino sa atong mga piniling sakop sa konseho ug hangtod karon kining proposed ordinansa wala pa mapagula bisan na lang ang tipik sa iyang anino! Hoy mga Halangdon natong mga konsehal...anus-a pa ba nato mapagula kining maong ordinansaha?

#####

Sa paggula ning atong tudling, nakapanumpa na ang mga opisyales sa Zamboaga del Norte Press Club sa ilang tagsa-tagsa ka katungdanan nga gipangulohan sa nasublian nga pangulo sa maong kapunongan nga si Mrs. Editha Pagente Tomong. Congratulations! Ug nagtuo ko nga ang yearly project nga Campus Journalism Seminar magapadayon sa iyang tinuig nga misyon! (Dipolog Chronicle, Vol.VII No.43)

 

Gatecrasher

By: Jun S. Cariño

Nihit Ba Ang Bugas?

Kun kita motan-aw sa telebisyon, atong makita nga didto sa kaulohan nagpila ang mga katawhan nga mga yano aron lamang sa pagpalit sa bugas nga sa ilang huna-huna ang pinakabarato. Ug kita maghisgut ug barato, ang unang mosantop sa atong ulo mao ang bugas NFA nga iyaa sa gobiyerno 

Tuod man, nagkadaiyang mga rasones ang gipabati sa mga kadagkuan sa kagamhanan kun nganong mahal ug nihit ang mga bugas lakip na sad ang mga produktong lana sama sa gasolina. Ug kun maghisgot na gani ug presyo nga mitubo pag-ayo, diha-diha dayon nga mosunod pagtubo ang mga presyo sa nag-unang palaliton. Makaluluoy na pag-ayo ang mga tawo niining hitaboa.

Busa, atong awhagon ang mga ahensiya sa kagamhanan sa pagsusi kun wala bay pagtago sa mga bugas nga gihimo sa ubang mga negosyante kay basin ug maabot sa punto nga magpatay na lamang, simbako, agi sa kanihit niini.

*****

Adunay nakasulti niniing maglilindog nga ang unang andana o first floor sa  City Hall sa dakbayan kuno karon kamulong gi-renovate o giayo aron kini mas manindot  tan-awon ug mahimong hayag. Daghan ang nakasulti nga maayo kining lakang aron adunay bag-ong dagway usab kining maong edipisyo.

Murag adunay kamatuoran niining maong obserbasyon kay taud-taud na sad nga wala makumpuni ug maatiman ang City Hall nga mao man kini ang balay sa kagamhanan sa dakbayan, busa insakto ra sad nga maayo kini sa panan-aw sa mga katawhan, sa mga dumuduong ug lakip sa tanan sa mga kawani kinsa nag-alagad sa mga katawhan.

Ang nakanindot niini kay wala kuno mikuha ang dakbayan  ug kontraktor kun dili gibuhat kini ‘by administration’ o pinaagi sa mga trabahante sa  City Engineering Office. Kita makaseguro nga walay langan sa oras ug sa mga materyales kay ang mga kawani dili man mag-apas sa ginansiya sukwahi sa mga kontraktor kinsa nag-agad sa mga SOP aron ilang trabahoon ang konstruksiyon.

*****

Daghanang mga katawhan ang nahimuot karon sa pagpadayon sa pagtrabaho sa Phase II sa Dipolog Boulevard. Kini nagpasabot lamang nga mas manindot ang palibot ug taas-taas na sad ang malakwan ug masuroyan sa mga katawhan nga gusto magpalagaylay sa daplin sa dagat.

Sa panahon nga mahuman kini, usa na usab kini sa mga proyekto nga angay ikapasigarbo ni Mayora Evelyn T. Uy kinsa nakaawat sa iyang bana nga magsige lang ug huna-huna unsay maayong ikahatag sa dakbayan bisan pa man sa mga pagsulay nga kanunay ihapak kanila sa ubang mga tawo nga walay laing mabuhat kun dili ang pagpanghilabot bisan ug walay angay ikasaway. (Dipolog Chronicle, Vol.VII No.43)

  

week's guest
Ni: Custodio ‘Spartacus’ Aburido
Strike while the ISSUE is hot: Tambag Ininsik, Maglugaw Ta!

Kining  panahona mao ang turning point nga masugamak kitag grabeng krisis sa tanang butang sa atong kinabuhi. Whew, paita kaayo! Ang tuig 2008 mao ang nahimong marker diha sa labing unang pagsakdop sa labihanayng kalisod sugod sa atong pagkatawo ning kalibotana. Grabe kaayo ang pagsaka sa mga nag-unang palaliton, ilabina gyud ang bugas. 

Kon ang marker sa mga nangatawo sa tuig 1901 mao ang ikaduhang gubat sa tibuok kalibotan diin natagamtam nila ang tumang kapait ug kalisod, ang mga nangatawo usab sa sugod sa tuig 1950 nga wala makatilaw ug ikaduhang gubat sa kalibotan, sama usab ug naagian ug labihanayng gubat. Gubat sa pagkaon! Sukad ko matawo ning kalibotana, wala pa ko makakita ug increase nga subra sa diyes pesos matag palaliton diha sa presyo sa bugas. Ang akong natagamtaman mao ang inanay nga usbaw gikan sa pagkaon ngadto na sa gasolina ug krudo ug uban pang nag-unang galamiton sa katawhan ning kalibotan. Dili parehas karon nga sobra pa sa pulong nga paspas, sutoy hinuon. Ang presyo sa bugas nga kinabaratohan kaniadtong miaging bulan tag P19.50. Gikan sa maong presyo misaka karon ug tag P31.50 ang matag kilo! Grabe, no?

Moabot kaha kita niadtong kalisod sa mga Insik didto sa China sa wala pa si Mao Tse Tung nahimong Chairman sa Republic of China? Nga maoy hinungdan nga naglugaw-lugaw sa pagkaon kay apiki kaayo kon dili sabwan ug daghan ang humay? Busa dili lalim ang gibati sa mga katawhan karon. Kon kaniadto adunay mokaon ug kaduha sa matag adlaw, tingali karon kausa na lamang makatimo. Kon ilang ipaabot ug katolo, linugaw na lang ang ilang salohan sa lamesa. Kana pa gyung hinalanggop. Kadto bang maggukod ang lugas sa bugas diha sa panaksan kay sabaw maoy nagdaghan.

Tambag Ininsik kini! Pastilang paita. Sa kagamhanang Arroyo, Aroy! Kasakit kaayo!

-o0o-

Tinuod gyud nga ang mga katawhang Pilipino bisan ug puwerte na gyung lisora, magpahiyom gihapon. Kay ang akong kumpare bisan kon nagsugilon nga wala na silay ipanihapon unya mamaylo lang una ug bugas, mapahiyomon gihapong nag-estorya. Kana maoy tawo, dili dibdibon ang problema.

 

Unya kay ako may iyang giistoryahan bahin sa kawad-on, ako lang sab siyang giingnan nga dili makawang ang iyang gihangyo, magkuyog ming duha kay mangitag kabaylohan ug bugas. Parehas diay ming walay ipanihapon. Pahiyom lang gihapon!

-o0o-

Kamong suki namong magbabasa, sa inyong hunahuna, unsa kahay sulbad ning tanan? Ug unsa pod kahay hinungdan nga ang tanang nag-unang palaliton man gyud, labi na ang bugas, maoy taas kaayo ug lupad kon presyo nay hisgotan! Nagdungan!

Kaniadto kon momahal ang gasolina, oil, moingon dayon kitag Hesus, kay basin ug moapil ug layat ang presyo sa bugas. Kay unsa may kargahan sa bugas nga ilalin man sa laing lugar. Magpangulba kanunay. Tuod momahal ang bugas senintabos ra, ping-it apan walay mahimo, sige lang kay sentabos ra bitaw.

Karon bugas na gyud ang mimahal ug taas pa gyud kaayo ang  presyo! Misamot ug ping-it sa kasakit kay kinsa may atong kasumbongan, si Presidente Arroyo? Ambut ninyo! Gikatulo na gani ug bola ang sugal matag adlaw, siyarog dili mo makaatik nga gituok kitag hinay-hinay. Pusta pa sa ilang numero, tan-awon tag kinsay mangapordoy ug samot!

Ang atong mga tinugyanan sa kagamhanan nga direktang tudloon sa katawhan mao ang National Food Authority (NFA) tungod kay sila may gitugyanan sa kagamhanan sa pagmonitor sa stock sa bugas kon aduna bay nag-hoarding nga negosyante. Nagdrama dayon sila, aw, nagdrawing dayon sila ug unsaon nila sa pagsalakay kay ilang isurpresa ang mga bodega sa mga negosyante dinhi aron mahibaw-an kon wala bay gipangtagoan nga bugas.

Human sa mga bodega nga ilang gitumbok nga gibutangan sa sinakong bugas nga ilang gipaablihan ug gisusi, wala gyud silay nakitang nag-hoard, sa ato pa, walay unscrupulous nga mga negosyante. Maoy buot ipasabot kay wala man silay nadakpan nga nag-hoard ug sinakong bugas.

Salamat.

Apan ngano kaha nga adunay tsika-tsika sa mga katawhan nga gipangbalhin nga mga sinakong bugas nga daghan kaayo, aron kaha kadto dili makita sa nag-raid? Unya kay ang mga nagpas-an kuno sa mga sinako mga pordoy man sab nga tawo, busa nanug-an sa mga silingan nga ang bugas nga sinako ilang gipangtagoan!

Kini angay nga tan-awon sa NFA dili lamang ang pipila ka mga bodega kondili tanang mga bodega nga ilang makita sa tibuok lalawigan sa Zamboanga del Norte kay basin unya kon tinuod kini, gutom ra ba kaayo ang mga tawo. NFA susiha kuno ni aron walay lalis nga aduna ra sad moy pinalabi. (Dipolog Chronicle, Vol.VII No.43)

 

Taliwala sa pagsaka sa presyo: Price Control Council gipatawag sa mayor

Sa pagpatawag ni City Mayor Evelyn T. Uy, napahigayon ang panagtigum sa Local Price Coordinating Council sa Dipolog sa buhatan niini niadtong Huwebes sa hapon, Abril 17 pagmugna ug mga lakang taliwala niining karong pagsaka sa presyo sa mga nanag-unang palaliton, ilabi sa bugas.

Ang maong panagtigum gitambongan sa nagkalain-laing ahensiya sa kagamhanan, NGO’s ug sa sektor sa magpapatigayon dinhi sa dakbayan nga tuyong gipatawag sa hepe ehekutibo aron sa paghimo ug tukmang mga lakang nunot sa padayong pagtumaw sa mga nagkalain-laing sulirang ekonomikanhon dinhi sa nasud, lakip na dinhi sa atong dapit.

Ang mga mitambong sa maong panagtigum mao ang mga tinugyanan sa mga buhatan sama sa DTI, NFA, City Agriculture, DILG, City CENRO, GRECON-Dipolog, CESCOD, City Treasurer ug  representante gikan sa Vallecer’s Supermart, tanan ning dakbayan. Atol sa maong panagtigum, mahinungdanong mga ponto nga naglambigit sa ekonomikanhong kalihokan dinhi sa atong lokalidad ang gituki, partikular sa Briefing on Price Act ug Report on the Price of Prime and Basic Commodities pinaagi sa DTI, Report on the Price and Supply of Rice pinaagi sa NFA, Report of Rice Production pinaagi sa City Agriculture ug Report of Weights and Measures pinaagi sa buhatan sa mamahandi.

Lakip sa lakang nga pagapahugtan sa Local Price Coordinating Council ning dakbayan mao ang paghimo sa hugot nga pagmonitor sa presyo sa nanag-unang mga palaliton dinhi sa merkado pinaagi sa hiniusang hut-ong nga gilangkoban sa nagakalain-laing buhatan aron mapakgang kadtong mga mapahimuslanong magpa- patigayon kinsa misakay usab sa pagpasaka sa presyo sa ilang mga baligya, partikular ang bugas bisan pa man nga ang atong lokalidad nagbaton sa igong supply sa bugas, sigun sa gibutyag sa NFA atol sa maong panagtigum. Lakip usab sa hugot nga pagabantayan sa maong grupo mao ang dili makatarunganong pagpasaka sa mga presyo sa mga palaliton (basic commodities), walay tukmang price tag sa mga baligya ug labaw sa tanan, ang “hoarding” sa bugas, harina, asukal ug uban pa, nga nahilakip sa mga nanag-unang palaliton.(CIO-alb) 

 

Suspetsado tigpayuhot sa droga nasikop

Usa ka tigpayuhot sa ginadiling droga ang naaresto sa mga miyembro sa Dipolog police sa pagpangulo ni P/Insp. Timothy Balao-ed Aniway Jr., ang OIC chief sa Dipolog PNP.

Nadakpan ang maong suspetsado atol sa gipahigayon nga drug-buy-bust operation sa nakalabay nga Domingo sa kaadlawon, April 12 sa Martinez Village, Barangay Turno ning dakbayan. Ang suspetsado giila sa kapolisan nga usa ka Roseller Abrea Y Jarmin, alyas “Tata Abrea,” 39 anyos, minyo ug,residente sa Purok Bougainvilla sa Barangay Sta.Filomena.

Nakuha gikan sa paghupot sa suspetsado mao ang tulo ka dagkong transparent plastic sachet nga  adunay sulod nga white crystalline granules nga gituohang shabu, tulo ka gagmayng transparent plastic sachet na adunay sulod nga white crystalline granules nga gituohang shabu, duha ka buok nga tag P100 bills nga gihimong marked money, usa ka pitaka color brown, usa ka buok nga smart buddy sim card ug usa ka improvised packing tape bag. Pagkahuman sa drug-buy-bust operation, giturn-over sa confidential informant(CI) ang usa ka gagmayng transparent plastic sachet nga adunay sulod nga shabu sa mga operating team nga gihimong evidence batok sa suspetsado.

Misaksi sa gihimong operation si Hon.Maynard Baes, Brgy.Chairman sa Turno, Publio Alesna kinsa maoy representante sa Department of Justice ug ang kining tigbalita. Sa pagsulat ning balita, ang suspetsado anaa gibalhog sa selda sa Dipolog PNP alang sa tukmang disposisyon. (ZORAYDA EVA MUSTARIL, Dipolog Chronicle, Vol.VII No.43)

 

Libreng bugas ibalik sa ting-eskuwela

Dili magsalig ang mga ginikanan sa libreng tagsa ka kilong bugas nga ihatag sa NFA ngadto sa mga kabataang estudyante sa mga pampublikong tulonghaan gumikan kay ang maong programa para lamang sa panahon sa ting-eskuwela.

Mao kini ang gipaklaro sa tinugyanan sa National Food Authority samtang may mga ginikanan ang mipaabot sa ilang pagbagolbol batok sa maong buhatan ug sa Department of Education nga hangtud karon wala pa sila makadawat ug libreng bugas. Matud pa sa ilang mulo ug reklamo, gipili lang sa taga Dep-Ed ang mga barangay nga mahatagan ug libreng bugas samtang duna pay daghang uban ang wala makatilaw sa maong programa nga nakapasilo kanila.

Sa interview sa taga NFA, ilang gipahayag nga dili angay moreklamo ang mga ginikanan nga wala sila maabte ug libreng tagsa ka kilong bugas karong panahona gumikan kay kini kutob lamang niadtung pag-sera sa eskuwela. Karon kay bakasyon dugang pasabot sa taga Dep-ed, kasamtangan una nilang gihunong ang pagpag-apod-apod sa libreng bugas para sa mga kabataan nga nagtungha sa mga pampub-likong eskuwelahan. Matud pa nga inig balik sa klase, ayha na usab sila mobalik sa maong free food for school program para sa mga kabataan.

Angay masayran sa miaging semana, sa dihang mibisita sa Kapitolyo ang tinugyanan sa nagdala sa Hungger Mitigation Program gikan sa kaulohan, nalabhan ni Governor Lando Yebes sa iyang pagsaway ang nag-implementar sa maong programa dinhi sa Zamboanga del Norte nga walay koordinas-yon sa iyang buhatan hinung-dan nga nalangay ang pag-apod-apod sa libreng bugas. Matud pa sa gobernador, ulahi na siyang masayud nga aduna diay libreng bugas nga ipanghatag sa mga kabataan sa dihang nangayo na kini ug pakitabang sama sa paghulam ug sakyanan aron paghatod ug sinakong bugas ngadtu sa kabukiran.

Sumala pa sa gobernador, kon duna pay hustong koor-dinasyon ang NFA ug Dep-Ed sa pagpatuman sa maong programa hayan hapsay ang tanan ug maapod-apod sa husto ang libreng pagkaon para sa mga kabataan ilabi na sa kabukiran. (The New Nandau, Vol. XVII No.40)

 

NEGOSYANTE SA BRUNEI NANGINAHANGLAN UG KANDING UG BUHING ITLOG SA MANOK

Usa ka grupo sa mga negosyante gikan sa nasud sa Brunei ang nahidangat niadtong Abril 9, 2008 dinhi sa lalawigan sa Zamboanga del Norte aron sa paghan-yag sa atong mga lokal nga negosyante dinhi sa pag-prodyusir ug daghanang bu-hing itlog sa  manok ug kanding aron ilang paliton ug dalhon sa Brunei. Kini ang nahipus nga kasuyuran ning pamantalaan gikan ni Mr. Vicente “Vic” B. Sanchez, Jr, hepe sa buhatan sa Provincial Veterinarian ning lalawigan.

Matud pa ni Sanchez, ang grupo sa negosyanting taga Brunei, human sa ilang courtesy call ngadto ni Gobernador Rolando E. Yebes didto sa Kapitolyo, nakighimamat gilayon sa mga local nga negosyante nga namuhiay ug mga ma-nok ug kanding dinhi sa dak-bayan sa Dipolog aron sa paghangyo sa naulahi sa pagsuplay kanila ug 500,000 ka mga buhing itlog sa manok ug 2,000 ka mga kanding kada bulan. Ang maong hanyag ang nakita ni Sanchez nga usa ka dakong ekonomikanhong kahigayunan, dili lang sa atong lalawigan kon dili sa iyaha usab nga katawhan. Kini ang maghatag unya ug dugang abot ug dugang trabaho sa atong mga katawhan. Usa sa mga problema nga nakita sa grupo sa mga negosyanting taga Brunei mao ang sakyanan unya nga mukuha-dala sa maong mga produkto gikan dinhi sa lalawigan ngadto sa nasud sa Brunei. Apan naglaom sila nga pinaagi sa sensirong tabang ni Gobernador Rolando E. Yebes ning lalawigan, napa-establisar unya sa madaling panahon ang direktang rota, mabarko man o ma-abyon, gikan sa  atong lalawigan ngadto sa ilang nasud sa Brunei aron sa pagtransportar sa ilang gikinahanglang produkto.

Ang nasud sa Brunei maoy sentro karon sa pag-kaon nga gitawag sa ka-musliman ug halal. Ang ma-ong produkto nga ilang gikinahanglan pagapro-sisuhon kini pinaagi sa prosisong halal aron kini usab ang ilang ibaligya ngadto sa mga nasud sa kamusliman sama sa Saudi Arabia, Libya, Ehipto, ug uban pa. (Nap U. Cabisio, The New Nandau, Vol. XVII No.40)

 

Biotechnology gi-introduce sa DA

Dili lamang ang Zamboanga del Norte kong dili ang tibouk Zamboanga Peninsula ang mabubu-an ug makapahimulos sa bag-ong teknologya ang gipaila ug gipasiugda sa buhatan sa Department of Agriculture pinaagi usab sa pagsuporta sa Provincial Agriculture Office diin gipahigayon ang duha ka adlaw nga Seminar Workshop on Biotechnology Economic Opportunities for Zamboanga Peninsula kaniadtong April 3 ug 4 didto sa Mibang Holtel ning dakbayan.

Ang maong programa gitanyag sa naasoy’ng  buhatan may kalabot sa bag-ong pamaagi diha sa pag-ugmad sa pang-agrikultura nga maoy usa sa mag prioridad nga programa nga gitutukan ni Governor Rolando Yebes aron mapalambo ang nagkadaiyang panginabuhian sa mga katawhan ilabina ang industriya sa pang-agrikultura

Ms. Alicia Ilaga, Director sa DA for Biotechnology Program nagkanayon adunay 13 ka mga rehiyon ang ilang nasabwagan sa maong impormasyon aron masayran sa mga pobring mag-uuma ug masayud sa bag-ong teknologiya ug pamaagi diha sa paglambo sa ilang panginabuhian ug usa na niini ang Zamboanga Peninsula. Matud niya ang Biotechnology usa ka buhing organismo nga maoy magsilbing mohatag ug modernong tecknologiya gamit ang Biotechnology diha sa pagpa-baskug sa mga livelihood product nga maoy gigamit karon sa mga katawhan.

Usa na niini  ang gitanyag ngadto sa mag-uuma ang Boitech Network diin ang mamahimong produkto pinaagi sa Argicultural Biotechnology nga maoy gi-ugmad sa maong mag-uuma nga adunay nay mamahimong merkado alang sa ilang produkto pinaagi sa pag-umol ug kasabutan tali sa mag-uuma, negosyante ug ang Local nga pangangahanan. Atol sa maong kalihukan mitambong ang mga partisipante gikan sa Zamboanga del Sur,  Zamboanga Sibugay, Zamboanga City, ZaNorte, Municipal Agriculturist, TLDC, DTI, PENRO. (Shily, The New Nandau, Vol. XVII No.40)

  

250 summer job nakasulod sa Capitol

Dul-an sa 250 ka magtu-tungha ang nakapahimulos Special Program for the Employment of Students kon SPES pinaagi sa ayuda sa buhatan sa Department of Labor and Employment kon DOLE sa pagpangulo sa hepe niini nga si Mr. Vicente B. Sumalpong ug sa pagsuporta sa kagamhanang probinsyal ubos sa kasamta-ngang administrasyon ni Governor Rolando E. Yebes aron matabangan ang mga magtutungha dinhi sa lalawigan nga mapadayon ang ilang pagtuon.

Ang SPES program usa ka component sa Kabataan 2000 ug dili lamang kini usa ka programa nga gipasiugda sa DOLE kon dili usa kini ka balaudnon ubos sa Republic Act # 7323 nagahisgot kalambigitan na sa mga  magtutungha nga interasado mapadayon sa ilang pagtuon ilabi na sa mga kabus nga mga kabataan nga dili makaya sa paggasto sa ilang ginikanan. Ang kwalipikado nga edad gikan 15 anyos hangtud na sa 25 anyos ang makapahimulos niini.

Si  Mr. Jose Rey  Hamoy ang Focal Person sa SPES program namahayag nga ang maong programa ang namugna kini tungod kay nakita sa gobiyerno ang kahimtang sa mga ginikanan nga ang ilang abot igo-igo ra sa ilang adlaw-adlaw nga panginahanglanon ug isip pagtabang pinaagi sa Natio-nal Government ug sa kagamhanang probinsyal nagkahi-usa sa pag-implementar sa nasangpit nga SPES. Pinaagi sa buhatan sa Public Employment Service Office kon PESO ubos sa pagpangulo ni Mr. Senen Ladera, ang PESO manager ang mihatag sa bag-ong tahas ngadto sa 250 ka mga estudyante diin kon asa sila ma-assign sa ilang trabaho diha sulod sa probinsyal Capitol ingon man usab ang maong  buhatan ang mosusi sa matag trabahante kun  epektibo ba kini sa ilang mga tahas. (Shily, The New Nandau, Vol. XVII No.40)

 

Seguridad dapat pahugtan –mga negosyante ngadto sa Dipolog PNP

MIPALANOG karon sa ilang hangyo ang mga negosyante dinhi sa dakbayan sa Dipolog pinaagi sa Dipolog Chamber of Commerce and Industry (DCCI) pinaagi sa ilang presidente nga si Mr. Edgar Bagarinao nga pahugtan ang seguridad sa siyudad tungod sa sunod-sunod nga nahitabong tulis.

Kini maoy usa sa ilang hangyo nga gipaabot karon ngadto sa atong kapolisan ug sa mga hepe ehekutibo sa matag local government unit subay na sa gikatakdang pagpahigayon sa Mindanao Business Conference karong Agosto 27-28 niining tuiga dinhi sa Dipolog, Zamboanga del Norte.

Kagahapon sa gihimong interview human sa signing sa MOA tali sa kagamhanang probinsiyal ug sa DCCI ug Philippine Chamber of Commerce and Industry (PCCI), gipahayag ni Bagarinao nga moduol sila ngadto kang Police Provincial Director Police Sr. Superintendent Mario Yanga aron sa paghangyo nga sulod sa mga panahon nga gipahigayon ang MinBizCon dinhi sa atong dapit ipatuman ang hugot nga seguridad o manglimpiyo. Mao usab ang ilang hangyo ngadto na sa 101st Brigade, Philippine Army nga anaa sa Del Pilar, Piñan.

Gidugang ni Bagarinao nga kinahanglan mohimo ug mga security measures ang atong mga otoridad ilabina sa mga lugar ug karsada nga posibling ma-agian sa mga negosyante nga maoy maglangkub sa mga delegado sa maong conference nga gikan sa mga nagkalain-laing lugar dinhi sa Mindanao. Alang kang Bagarinao nga ang paghatag ug hugot nga seguridad sa atong dapit dili lamang sa mga adlaw nga ipahigayon ang Mindanao Business Conference, kinahanglan nga ipatuman kini sa mas sayo nga panahon. Iyang gipasabot nga igo lang silang nagpahinumdom ngadto sa atong kapolisan tungod kay ila kining trabaho ang pagpatunhay sa kahusay sa lugar. Gihatagan ug gibug-aton ni Bagarinao nga dili sila gusto nga maulawan ang atong dapit tungod lang sa mga binuhatan sa mga dautang tawo.  

Apan alang kang Atty. Allan Ranillo, Provincial Chairman sa Tourism Council nga ang nanghitabo nga sunod-sunod nga tulis ug budol-budol dinhi sa atong dapit kini usa lang ka talagsaon nga panghitabo tungod kay dili sama sa ubang mga lugar nga kada-adlaw na adunay mabiktima. Busa iyang ikapasigarbo nga malinawon ang atong dapit bisan sa maong mga panghitabo kung itandi sa ubang mga lugar sama sa Metro Manila. Samtang gipahayag usab ni Governor Rolando Yebes nga andam ang kagamhanang probinsiyal sa Zamboanga del Norte nga motabang sa kapolisan aron mahatagan ug seguridad ang mga negosyante dinhi sa Mindanao nga mag-abot dinhi sa Dipolog karong Agosto 27-28 niining tuiga. Usa ka task force ang tukoron ni Governor Yebes nga motabang sa intelligence gathering sa atong kapolisan.

Angayang masayran nga sa mga nanghitabong tulis dinhi sa Dipolog gikan kaniadto ug hangtud sa pinaka-ulahing biktima niadtong mi-aging adlaw wala pay bisan usa ka mga tulisan ang nasikop sa mga polis. Gikatakda nga mahidangat dinhi sa Dipolog sulod ning bulana si PNP Chief Gen. Avelino Razon. Mahinumduman nga nahimong biktima karong bag-o ang usa ka miyembro sa prominenting pamilya dinhi sa Dipolog sa budol-budol nga diin nailad kini ug usa ka milyon ka pesos. Ang biktima ang nagpatabang kini kang Executive Secretary Ermita hinungdan nga ang atong kapolisan ang gimanduan kini sa pagsulbad sa maong kaso. (Southpoint, Vol.1No.15)


 

P6M for Roxas barangays

Who says there’s a political gap widening between Gov. Rolando yebes and Roxas Mayor Carlito Feras?

Although seen by political observers as a politics strategy, as the provincial governor experienced two losses already in this town, Gov. Yebes recently extended different projects to nine barangays, amounting to P6M.

The projects included the following: asphalting of barangay road in Dohinob (879T), asphalting of Pamologon road (2.2178M), construction of Nabilid outdoor stage (P500T) construction of water system in Piao (P420T), pre-fab classroom building in Upper Irasa (P505T), pre-fab classroom building in Banbanan (P505T), pre-fab multi-purpose building in Capas (P505T), multi-purpose building and stage in Marupay (P580T) and construction, improvement of Tantingon road (P500T).

Gov. Yebes disclosed that of all the barangays in Roxas, only five were not able to receive the projects they were dreaming to have. Explaining that the projects were part of his promise to give P.5M to all the 691 barangays in the province during his incumbency.

He also disclosed that at present only 110 projects were left not completed. (Press Freedom, Vol. XX No. 26)

 

55th Engineering Brigade to help Cong. Labadlabad

Armed Forces Chief of Staff Alexander Yano recently ordered the 55th Engineering Brigade to send immediately the different equipment that Cong. Rosendo ‘Dodoy’ Labadlabad needed for his construction and rehabilitation projects in Congressional District II.

It was learned that the needed equipment shall be arriving this week and work shall start as soon as possible as the brigade gave the congressman only two weeks to use said equipment. The equipment shall  include 2 bulldozers, 2 graders, 2 dumptrucks, and one backhoe.

Source disclosed that Cong. Labdlabad shall use his P2M travel allowance for the fuel of the equipment.

He opted to seek the help of the military, source disclosed because the Department of Public Works and Highways do not have the needed equipment. The congressman has reportedly appropriated P40M for the construction of farm to market roads, rehabilitation of abandoned roads, and supported some municipalities in their market project. (Press Freedom, Vol. XX No. 26)

 

NFA declares sufficient supply of rice

Contrary to what their counterparts were experiencing in Manila,  consumers in ZN did not take the pain of lining up just to get three kilos of NFA rice.

An official of national Food Authority here denied speculations that it could not supply the needed rice in the market, these days. NFA  disclosed that with Dipolog warehouse 35,000 bags of rice, Liloy’s 15,000 bags and Siocon’s 10,000 bags, it cannot say that the province is in short supply of the grains.

In fact, he added, NFA Cebu wanted to send 40,000 bags more but NFA here refused the supply for now since there are no more space in their warehouses to hold them. Meanwhile, the office warned the public that NFA rice is sold at P18.25 only and disclosed that some retailers’s  licenses were revoked after finding our that they were overpricing. (Press Freedom, Vol. XX No. 26)

 

Armed men rob bizman

Five days after two women victims fell prey to four motorcycle-riding holduppers after withdrawing money from First Consolidated Bank, a Dipolog businessman fell victim again to holduppers.

Police investigators identified the victim as Anthony Cheng Lu, owner of 168 enterprises situated at Rizal Avenue, Central Barangay this city. The victime disclosed to investigators that he was on his way to Metrobank on April 8 at 11:20 AM to deposit his cash money and some checks.

However, he said, before he reached the bank, four men blocked his way, pointed a gun at him and forced him to surrender his cellophane bag that contained the money. The victime did not disclose the amount he lost to the holduppers.

The suspects boarded a black motorcycle and zoomed their way towards an unknown direction. (Press Freedom, Vol. XX No. 26)

 

Dipolog Chronicle Editorial

Por Seiner: Menace of small fishermen

All fishermen, bigtime or small time, are given equal protection of the law, thus giving them equal chances to make a living. Unfortunately, some who may have all the advantages and none of the disadvantages, take advantage of the weaker ones.

Our fishery laws are such that not one take advantage of the other. But the bigger ones always have the edge over the smaller ones. Our fishery laws also set specific areas where each type and classification of fishing gears should ply their trade: the bigger ones in the deeper sea areas far from the shore (about 15 kilometers away from the shoreline) in order to give chances to the smaller fishing gears to fish in the shallow areas near the shore.

But again, reports had it that big fishing outfits did their fishing including in the areas supposedly for the small fishermen. Thus, the por seiners who are supposed to fish in the deeper and farther areas have encroached and become the menace of the hook-and-line fishers.

At this time of crisis, concerned government entities are called upon to take immediate action, lest the brute nature of a hungry and angry man takes the best of him. (Dipolog Chronicle, Vol.VII No.43)

 

 

 

NOTE: SEND US YOUR NEWS.  Tell us what's going on in your barangays, clubs, schools, businesses and non profit organization. You can also send notices and announcements.
          

 

    Email to webmaster@dipolognon.com

      
Google
WEB THE DAILY DIPOLOGNON