2

April 14,  2008

 

1 ka kompaniya andam mopalit ug kamunggay tun-an pa sa probinsiya

TUN-AN pa una karon sa kagamhanang probinsiyal sa Zamboanga del Norte ang gitanyag karon sa usa ka kompanya nga nagdasig sa probinsiya pagpanom ug kamunggay nga diin ang maong kompanya maoy mamalit sa mga liso niini alang sa Bio-Diesel.

Niadtong Abril 3 nakighi-mamat kang Governor Rolando Yebes si Danilo Manayaga, Presidente sa Secura International Corpo-ration, usa ka kompanya nga mamalit ug liso sa kamung-gay aron nga itumod usab ngadto sa laing nasud human kini ma-process dinhi alang na sa Bio-Diesel. Ang maong kompanya ang andam nga mobutang ug planta dinhi sa Zanorte kung mo-abot ngadto sa usa ka libo ka ektarya nga gilapdon sa plantasyon sa kamung-gay.

Andam silang motimaan sa usa ka kontra tali sa provincial government alang sa mao nilang katuyuan. Gipasalig ni Manayaga nga makagarantiya siya sa presyo sa ilang pagpalit sa production sa kamunggay sulod sa lima ka tuig. Ang SECURA interna-tional corporation ang mipahimutang na sa ilang operasyon sa Gingoog.

Gipasabot sa maong kompanya nga gawas sa bio-diesel ang liso sa kamunggay ilang i-process alang na sa pagkaon sa mga kahayopan. (The New Nandau, Vol. XVII No.39)

 

SOPA nakatutok sa panginabuhian, turismo, agrikultura, patigayon

Nakatutok sa panginabuhi-an, turismo, agrikultura ug patigayon ang pagpalanog sa State of the Province Address ni Gov. Lando Yebes kinsa iyang gipabati sayu ning simanaha atol sa regular nga session sa mga sakop sa hunta probinsiyal.

Ni-adtong Lunes gipabati ni Gov. Yebes ang iyang minsahe atubangan sa tanang meyembro sa sanguni-an panlalawigan, mgha mayores sa Zanorte, mga hepe sa nagkadaiyang buhatan ug uban pang sector sa katilingban diin gipahayag sa amahan sa probinsiya ang iyang nahimo sa mi-aging tuig sa iyang pagserbisyo u gang iyang mga plano para niining tuiga. Gipahibalo sa gobernaor nga sa mi-aging tuig padayon ang mga programa ug proyekto nga iyang nasugdan nga nagpunting gayud sa mga gikinahanglan sa tawo ilabi na gayud sa health services nga gihikaw kani-adto sa mga pobreng katawhan sa Zanorte nga maoy usa sa gibasihan sa diklarasyon nga ang Zamboanga del Norte pinakapordoy nga probinsiya sa tibook nasud.

Sa paglingkod pa lamang sa gahum ni Gov. Yebes gihimo niya ang programang Lando-Bibo nga maoy direktang nagtabang sa mga pobreng katawhan sa problima sa panglawas. Wala magdugay ug karong bag-o lamang gitimaan ang kapin sa 14 milyones ka pesos nga pundo tali sa probinsiya ug sa Philhealth Insurance Corporation aron madugangan pa ang mga benipisyo nga maangkon sa mga pobreng katawhan lakip na usab ang benepisyo nga maangkon sa mga doctor ug impliyado sa tambalanang probinsiyal.

State of the Province Address ni Gov. Lando Yebes kinsa iyang gipabati sayu ning simanaha atol sa regular nga session sa mga sakop sa hunta probinsiyal.

Dugang gipahibalo sa gobernador nga pinaagi sa paglusad sa Hudyaka Zanorte Festival hinay-hinay nga na-ilhan ang sector sa turismo partikular ang mga maayong talan-awon sa probinsiya ug ang mga nagkadaiyang produkto nga ikapasigarbo nato sa laing dapit. Nagkadaghan na usab ang mga kabarangayan nga napahimutangan sa HI-Green Program sa agrikultura, kini maoy usa ka programa nga direktang nakatabang sa mga mag-uuma sa pagpadaghan sa mga similya nga ilang matanum sa ilang umahan. Padayon usab ang pagdapit sa probinsiya sa mga magpapatigayon aron mohuwad sa ilang puhunan dinhi sa Zanorte.

Napahigayon usab sa administrasyong Yebes ang pagbutang sa mga proyektong pang-imprastraktura sa tanang barangay sa Zanorte sa kantidad nga tunga sa milyon ka pesos. Ang pagpabarug ug hingpit nga pag-operate sa bag-ong Zanorte Medical Center maoy usa sa pinakadakung proyekto nga nahimo sa pagdumala ni Gov. Lando Yebes diin iya gayud nga gihatagan ug dakung pagtagad ang kinabuhi sa atong mga katawhan pinaagi sa pagtukod sa maong tambalanan. Tungod sa maong mga kalampusan nga nahimo sa gobernador iyang gidawat ang pasidungog gikan sa pangulo ang Presidential Gawad Lingkod Bayan Award 2007 nga nagpamatuod sa kasinsiro ug didikadong pag-alagad ni Gov. Yebes sa mga katawhan sa Zanorte nga iyang gi-alagaran.

Mibunga usab ug maayong resulta ang maong paningkamot sa gobernador human kita miirog ngadto sa numero dos gikan sa numero unong pinakapordoy sa nasud sigun sa katapusang survey nga gihimo sa National Statistics Coordination Board NSCB nga gibase sa tuiga 2003 hangtud sa 2006. Karong tuiga ug niining ikaduhang termino sa gobernador iyang tutukan ang panginabuhi-an sa katawhan diin katimbang niya ang mga sakop sa sangunian panlalawigan pinaagi sa ilang mga PIF, Provincial Identification Fund. Gipahayag usab ni Vice Gov. Francis  Olvis nga andam silang mosuporta sa tanang lakang ni Gov. Yebes para sa mga maayong programa ug proyekto nga ihatag sa mga katawhan sa Zanorte nga maong ilang gi-alagaran.

Mapasigarbohon usab nga gipahayag sa gobernador nga nagbaton karon ug saving ang panudlanan sa Zanorte nga mibalor ug 98 milyones ka pesos nga maoy iyang gamiton para sa pagpabarug sa usa ka bag-ong Cultural Center nga diha gihapon ipatindog sa nahimutangan sa gigubang Cultural Center kani-adto. Sa kanunay ang prinsipyo ug baruganan sa pangobyerno ni Gov. Lando Yebes “UNA SA TANAN ANG KATAWHAN”. (Southpoint, Vol.1No.14)

 

Agri files
by Hisyl S. Palma

Mango growers sa probinsya aduna nay local buyer

Nahatagan na gayud ug katumanan sulod sa pipila kahigayon ang gipangandoy sa mga nanag-iya ug manga dinhi sulod sa probinsya nga adunay nay merkado nga mopalit sa ilang mga manga gikan sa pagharvest niini.

Pinaagi sa buhatan sa Provincial Agriculture gipahigayon ang kalihukan may kalabot sa REVIVAL: The Zamboanga del Norte Mango Industry didto sa Provincial Agri-Industrial Center sa Upper Irasan sakop sa lungsod sa Roxas kaniadtong Marso 28 ning tuiga diin didto nagkatigum tali sa mga mango growers, sprayman ug contructors gikan sa  1st district hangtud sa 3rd district ning probinsya aron  ma-ila sa mga nanag-iya ug manga ang pagmaniho  sa bag-ong merkado nga misulod dinhi sa probinsya nga gitawag ug Private Oil Mills Corporation kon POMS Ventures Corporation kansang mopalit sa toniladas nga manga sulod dinhi sa lalawigan.

Si Estrilla T. Nervades ang Treasurer sa POMS Venture Corporation ang namahayag nga ang maong korporasyon ang gipanag-iyahan sa Southern Island Oil Mills kon SIOM diha sa Nabilid Roxas ning lalawigan ug nagasugod kini kaniadtong tuig 1980’s diin adunay lain sangang buhatan didto sa Misamis Occidental. Dugang pa ni Nervades nga tungod sa  laing nahibalag nga negosyo  nahimugso ang maong korporasyon nga diin ang  industriya sa Manga ang ilang nauyonan ug daku ang ilang pagtuo nga ang Zamboanga del Norte ang makabastar pag-ayo sa ilang mamahimong produkto nga maoy gihimong export ug import nga diin diha iproseso ang ilang produkto sa lungsod sa Roxas.

Gipasalig usab sa ilang korporsyon nga ang mamahimong merkado makatabang kini sa mga katawhan nga nanag-iya ug manga ug dili na angayan alang kanila ang pagbiyahe sa ilang manga padulong ngadto sa Cebu ug Manila aron didto kini pangitaan ug buyer sa ilang manga sanglit mohatag kini sila ug priority price alang sa ilang mga kustomers. Suma pa ni Nervades nga  matabangan usab ang mga katawhan sa paghatag ug kapanginabuhian o trabaho tungod kay  ang ilang  korporasyon ang nanginahanglan man niini  aron maoy proseso sa ilang produkto.

Subay sa maong kalihukan sa Ms.Rosa Lim ang presidenti sa Rural Bank of Roxas atol sa iyang mensahe ug suma pa, nga kaniadto ang nanag-iya ug manga ang magkaduhito sa pagpangita ug buyer tungod usab sa kadaghang manga nga diin  tibuok ang zanorte ang nagtanum niini sa dihang kalit lamang kini nangaluya kay ang buyer man ang  mosubay diha sa ilang farm. Gipasalamatan ni Lim ang pag-abot sa bag-ong merkado tungod kay para kanila dili mausik ang ilang salapi sa pagpadala sa ilang manga ngadto sa lain-laing mga lugar sanglit ang korporasyon ang moserbisyo man kini dinhi sa Zanorte. Sa kabahin ni Modesto Vista kinsa adunay plantasyon sa manga didto sa lungsod sa Gutalac iya usab nga gikalipay ang pag-abot sa bag-ong merkado tungod kay iya usab kining gihandum nga matukuran ang probinsya ug insaktong merkado para sa manga ug sumasa sa ubang negosyante nga minus-minus ang ilang gasto sa diha sa pagbayahe sa ilang manga.

Sanglit usa kini sa pag-uswag sa ekonomiya dili lamang diha sa industriya sa manga lakip na ang mapalambo sa produkto dinhi sa Zanorte. (Southpoint, Vol.1No.14)

 

Agri files
by Hisyl S. Palma

PCA mitunol checke sa 7 ka mag-uuma

Pito ka mga mag-uuma ang nakadawat ug cheke nga mokantidad sa 750 ka pesos pinaagi sa program sa Philippines Coconut Authority isip pagsanong sa program nga gitawag ug Participatory Coconut Planting Project atol sa usa ka adlaw nga 3rd Share Holders General Assembly sa Salug Small Coconut Farmers Multi-purpose Cooperative kon SASCOFAMCO didto sa Livelihood MP Building sa Brgy Canawan sakop sa lungsod sa Salug bag-uhay pa lang.

Mao kini ang nasayran nga inpormasyon pinaagi ni Ms. Maybel C. Bustaliño  ang hepe sa Planning Division sa buhatan sa Agrikultura. Saysay pa ni Bustaliño nga adunay lain 87 ka mag-uuma ang mahatagan ug lain cheke sigun sa nasubay sa buhatan sa PCA kinsa ang misanong sa program ug sumala pa usa kini sa giawhag sa naasoy’ng  buhatan nga magtanum ug seednut diha sa ilang kaugalingon Nursery ug bayran kini sa PCA  sa tag 5.00 pesos nga diin nasubay nga diha gitanum sa seedbed ug gikan sa pagtubo sa seedling sa lubi hatagan na usab ug  lain tag 5.00 pesos samtang gikan sa pagtanum 5 hangtud sa 6 ka bulan  bayran kini sa tag 20 ka pesos.

Si Mr. Antonio Bal F. Faustino ang Regional Manager ang mitunol sa maong cheke kauban sa mga dagkong opisyal sa LGU  Salug  sila si Vice Mayor Elias Baguio, Hon Rodrigo D.Mondenido Barangay Capitan, PCA Provincial Manager Mr. Ralph S. Hamoy, BM Anicito Darunday ang mipresentar ni Governor Rolando Yebes, Ms. Maybel C. Bustaliño sa Provincial Agriculture Office ug  mga bisita kinsa ang mitambong sa maong kalihukan.

Sa kabahin ni Bustaliño iyang gipasabot nga ang maong program sa PCA ang nakatabang kini sa mga gagmay mag-uuma ug aron ilang mapadaghan sa mga lubi diha sa ilang lungsod  ug madasig ang ubang mag-uuma sa pagtanum sa lubi sanglit ang mag-uuma man ang makabinipisyo sa maong program sa PCA. Ang 7  ka mga mag-uum nga nilangkuban nila ni Perfecta Broba din nakadawat sa kantidad nga 750 pesos atol sa Ceremonial Giving sa maong cheke kauban ni Ed Bangcuan, Romulo Abrenaga, Sotico Pañales, Editha Pañales, Rolando Pañales ug Emerciana Nugas pulos resendenti sa Salug ning lalawigan sa Zanorte. (Southpoint, Vol.1No.14)

 

Anti rabies vaccine kantidad tunga sa milyon gidawat sa probinsya

NADAWAT na sa kagamhanang probinsiyal sa Zamboanga del Norte ang tunga sa milyon ka pesos nga kantidad sa anti-rabies vaccine nga hinatag gikan sa Bureau of Animal Industry.

Kagahapon opisyal nga gi-turn-over ni Provincial Veterinarian Vicente “Vic” Sanchez uban ni Joseph Wilson Jatico ang usa ka libo ka vials sa anti-rabies vaccine ngadto kang Governor Rolando Yebes. Misaksi usab si Mayor Chris Eguia sa lungsod sa Katipunan.

Sa nasayran, personal gayud nga gikuha ni Sanchez didto sa kaulohan ang maong mga tambal niadtong Lunes nga wala usab gihikaw ni Director Davenio Catbagan sa Bureau of Animal Industry sa dihang gihangyo kini ni Governor Yebes human na-alarma sa nahitabo sa usa ka magtutudlo sa lungsod sa Katipunan nga namatay human napaakan ug iro niadtong mi-aging bulan. Matod pa ni Sanchez nga sa gidaghanon sa maong mga anti-rabies vaccine nga nadawat sa probinsiya mahimong mabakonahan ang pulo ka libo ka mga iro. Sa maong kalambuan hayan makahatag na kini ug dakong tabang sa mga katawhan sa probinsiya ilabina nga daghanan nang mga kaso dinhi sa atong dapit ang napa-akan ug iro nga maoy hinungdan sa ilang kamatayon. (Southpoint, Vol.1No.14)

  

Pagproseso sa papeles sa gustong mosulod sa summer job padayon

Padayon karong nagproseso sa gikinahanglang mga dokumento sa mga aplikantes alang sa summer job ang buhatan sa PESO sa dakbayan sa Dipolog.

Giawhag ang tanang mga naka-apply alang sa summer job sa pagsubmiter sa ilang mga mahinungdanong dokumento ngadto sa buhatan sa PESO sa dakbayan sa dili pa molapas ang Abril 15 aron hingpit nila kining ma-proseso.

Sigun kang PESO Manager Lourdes E. Pabilona, nga ang ilang buhatan padayon karong nagadawat ug nagproseso sa tanang mga aplikasyon alang sa summer job gikan sa nga nagkalain-laing barangay sulod ning dakbayan. Dugang pa niya nga ang paglugway sa mga summer job alang sa mga estudyante panahon sa bakasyon maoy usa ka nasudnong programa sa kagamhanan nga nagatumong sa pagtabang kanila nga mokita pinaagi sa pagtrabaho sa hamubo nga higayon aron aduna silay dugang ikagasto alang sa ilang pagtungha pagbukas sa tuig ting-tungha.

Gipaklaro ni Pabilona nga ang tanang mga pag-apply alang sa summer job adto lamang pagahimoon  sa matag barangay diin ang aplikante nagpuyo, sanglit ang mga application forms atua man didto pagakuhaon, dayon isubmiter kini ngadto sa iyang buhatan aron ilang pagaprosesohon. Matud pa nga dinhi sa dakbayan, adunay duha ka mga hut-ong nga gilangkoban sa mga aplikantes alang ning maong katuyoan: ang unang hut-ong mosugod sa pagtrabaho karong umaabot Abril 21, samtang ang ikaduhang hut-ong mosugod sa pagtrabaho sa Mayo 2. (CIO-alb)

 


Honesty...Aduna Pa Ba Kita Niini Dinhi?

Buntag  sa adlaw Lunes, nagklase si Mrs. Maribel Martinez dihang miabot ang naghangos niyang pupil nga si Moises. “Nganong na-late man ka…alas diyes na man ron?” sukot sa maestra nga masuk-anon.

“Dihang nagpadulong na ko nganhi, mam, may tawong nawad-an ug kinyentos pesos didto sa dalan nga akong giagian,” matod ni Moises nga mipahiluna didto sa iyang lingkoranan. “Ahhh…gitabangan mog pangita ang tawo sa iyang nawala nga kuwarta, mao ba? Buotan ka gyong bata ka!” dako kaayog katawa ang maestra.

“Wala man nako siya tabangi,” tubag ni Moises nga hilawng mingisi. “Unya…nganong na-late man ka?” matod sa maestra nga mikalit ug kasiga ang budlaton na niining mga mata.

“Kuan man god, ako mang nakit-an ang iyang kuwarta sa dalan nga akong giagian, mam,” matod ni Moises nga miigham, “mao nga ako kining gitumban hangtod na sa alas diyes dihang mibiya siya duol sa akong gitindogan!” Pastilannnnn!

— oo000oo —

Dugay na kadto apan hangtod karon wa pa koy nadunggan sa karadyohan ni nabasa sa mga lokal nga pahayagan nga duna kanatoy kaigsuonan ning atong dakbayan nga gibalitang miuli sa iyang nakaplagan nga kuwarta o alahas ngadto sa  tag-iya.

Niadto lang may gikatahong nawad-an ug cellphone nga mahalon sa iyang gisakyang motorcab apan hapit na lang mag-usa ka bulan wala pa gayod kini mauli sa driver didto sa buhatan sa kapolisan. Sa una pa – daghan na kitang nadunggan nga may nawad-an ug bag, ariyos nga lubos bulawan, ug daghan pang kabtangan apan wala gayod kini mahauli ngadto sa mga tag-iyang hingtungdan. Sa laktod, kon ikaw mawad-an ug bisan unsa na lang nga imong kabtangan ay na lang ug laom ni pangaliya ngadto sa Ginoo, dili na gayod na mahauli pa kanimo!

— oo000oo —

Niadto sa among kapanahonan, kanunay gayod ang among ginikanan nga isilsil sa among mga alimpatakan ang pagbaton sa kinaiyang katarong ug pagkamatinud-anon. Ang mithi sa panulitihong Iningles nga “honesty is the best policy” kanunay gayong gipamatuto kanamong mga kabataan. Mao man gani nga bisan usa ka dako (one centavo) nga among mapunitan niadto, amo gayong i-turn over ngadto sa among maestra o kaha maestro. Gisilsil sa among alimpatakan nga ang pagtipig ug pag-angkon sa butang nga dili amoa ug gipanag-iya sa laing tawo, dakong sala kana batok sa atong Ginoo ug maoy makapabanlod kanato ngadto sa bung-aw sa impiyerno.

Talagsa mo nang makita kining mga bata karon nga nagbaton ning kinaiya nga mahadlokon ug matinud-anon. Lahi na…”maro” na ang kadaghanan sa atong kabataan nga dili na gani morespeto sa ilang mga ginikanan!

— oo000oo —

Hapit na sab ang Adlaw sa Dipolog ug ambot aduna ba kaha kitay madungog nga usa ka Dipolognon nga pagapasidunggan tungod sa iyang mga maayong binuhatan ning atong dakbayan nga may kalabutan sa katarong ug kamatinud-anon nga iyang gihuptan. Apan aduna pa kaha kitay madawdaw sa bisan asang dapita ning atong dakbayan nga bisan unsaon natog siksik sa hapit tanang suok ning atong dakbayan, daghan man gyong mga tikasan? Palit ug bugas sa mga tindahan di ba gawas nga kibhang kaayo ang timbang sa bugas humay, ila pa gyong gisahugan sa bugas nga bahay! Sulayi ug palit ug isda sa merkado…tan-aw mo pulos presko ang isdang lagaw nga usa ka kilo, apan kuydawo ka kay gilamogan nag isdang dubok na! Kini lang nga pagnihit karon sa bugas linugdangan kini sa di “honest” natong mga opisyal sa kagamhanan kinsa, mipatuo ug mipabilib nga abunda kitag supply sa bugas. Apan namakak ra kaayo kining mga “ungas” nga mga pag-umangkon ni Hudas ug mga ig-agaw ni Barabas! Honesty…aduna pa ba kita niini dinhi?

— oo000oo —

May mi-react sa atong tudling sa miaging issue ning pamantalaan bahin ning nangabiktima sa “budolbudol” karon pa lang bag-o. Matod pa sa mitawag kanako sa telepono, nanghitabo kini tungod kay hinay kaayo ug panimhot ang atong kapolisan kon kinsa kining maong mangingilad nga nag-operate karon sa atong siyudad. Niya pa, possible gani kunong kasabwat niini ang pipila ka sakop sa kapolisan ning dakbayan kay ngano man kunong dili man kini nila madakpan!

Well, dili nato kaayo ma-blame ang mga pulis kay kini ugod nga mangingilad mohimo sa ilang mga operasyon nga dili tira-pasagad! Kita mismo ang mabasol ngano nga magpadala pa gayod kita ning maong mga tawo nga nagpatuo-tuo nga sila mao kana-mao kadto. Natunog na kaayo kining operayson sa “budolbudol” yet, daghan pa man gayod sa atong kaigsuonan ang malutsan ning mga kanahan!

Lagi…sa namatay ko pang apohan…”tungod sa atong kahakog ra sa kuwarta, dili gayod layo nga maigo ug manga-ilad ta!” (Dipolog Chronicle, Vol.VII No.42)

 

week's guest
Ni: Custodio ‘Spartacus’ Aburido
Strike while the ISSUE is hot: Long Live The Philippines!

Atong nabasa sa mga dyaryo kaniadto ang bahin sa mga krisis nga modam-ag sa nasud partikular na dinhi sa Dipolog, Zamboanga del Norte kaniadto ug karon nindot na nga dakbayan sa Dipolog. Kaniadtong 1969 labihanay na gyung muloa sa mga katawhan kay matud pa nila puwerti nang mahala sa bugas ug sa karne nga halos dili na makab-ot sa atong mga katawhan. Gimarkahan nila ang maong tuig nga krisis nga tuig. Nasayud ba mog tag-pila ang gantang sa bugas humay ning tuiga nga giingon sa atong katawhan sa Dipolog nga mahal na kaayo ang palaliton?

Bugas humay: Uno-otsenta ang GANTANG.
Karneng Baka: Kuwatro pesos ang kilo.
Pansit: Otsenta sentabos ang kilo.
Usa ka bakid lugas mais: Otso pesos ang sako.
Nagsiyagit na ang mga katawhang Dipolognon tungod kay puwerti nang mahala sa palaliton!

-o0o-

Sa akong pagka-bata kaniadto nakamatikod ko ug usa ka tawo nga adunay prinsipyo. Akong gipangutana kon kanus-a siya magminyo kay baynte na god ka tuig siya kaniadto.

Iyang tubag: “Unya nag mobarato ang palaliton, dong.”
Hantud karon mangkoy siya gihapon.
Di prinsipyo gyud.

Kay wala pa may history nga mibarato ang atong palaliton, sa ato pa wala sab siya magminyo.

-o0o-

Sige pa gyud tang rewind sa history.

Dihay nasakpan sa mga otoridad kaniadto nga nagpayuhot ug Union nga sigarilyo ug kay alisto nasakpan ang mga ismagler. Nagpahulagway dayon sa mga maniniyot ang mga PC ug ubang otoridad ug gi-display kadtong usa ka trak nga six-by-six nga puno sa sigarilyong Union gikan sa Zamboanga. Daghan gyud ang kinarton nga sigarilyo ug kita kaayo nga nagsapaw-sapaw ang mga kahon.

Klik! Mao kini ang nadakpan nila.

Ang mga otoridad kaniadto dili tihik sa posing tungod kay dinagko gyud ang masakpan nga magpayuhot sa bisan unsang maismagol nga butang gikan kaniadto sa Zamboanga.

Apan karon, nahibalo ba mog unsay kalainan?

Estorya na pod ta.

Dihay usa ka trak load sa mga kahoy nga nasakpan diha sa unahan. Daghan ang nakasaksi nga puno gyud kaayo ang dinakpan. Apan dihang gitan-aw sa record sa buhatan, ambot kon unsa kadtong buhatana, ayay pipila na man lang ka tablon ang nakarga!

Unsa kaha kadto, nahagbong ang ubang kahoy o kaha nahilis mao nang ang nakaabot gamay na lang.

Nayatis na. Lahi gyud sa kaniadto.

Dihay puno kaayo nga nagkarga ug pibols gikan gihapon sa unahan ug nasakpan dayon kay abtik god ang tinugyanan nato. Apan dihang gisubay kon asa kaha ang dinakpan nga pibols, kay interesado pod kaayo ang ubang pipols kon naunsa na, pastilan bisan kon giunsa gyud ug subay, wala na gyuy trace kon hain ang kargang pibols ug hasta usab ang gikargahan sa pibols nawala na! Wala maabot sa kapit-utols ang pibols!

Nahurot ug kahagbong? Nahurot ug ka-hilis?

Lahi gyud sa kaniadto, di ba?

-o0o-

Kining miabot karon nga krisis sa kagamhanan ni Gloria Macapagal-Arroyo dili lalim tungod kay nagsunod-sunod ang dinagkong kuwarta nga gipasangil sa administrasyong Arroyo nga gisurikbot sa iyang mga tawo! Aw, giapil diay siyag pasangil nga nakabulsa pod! The burden of proof niini tua sa mipasangil, ug wala sa gipasanginlan, di ba torney?

Ning hitaboa, matud pa nila nga kon si Erap kuno gihapon ang giimbistigar, priso kuno gihapon kay klarex man kono kaayo ang anomaliya. Unya ang nakaparat kuno ni Erap kay motug-an man pod sa tinuod, nan di masakpan gyud.

Tingali pod nuon, nga kini si Erap dili ra tantong bakakon ug naa ra poy nahabilin nga konsiyensiya, maong nakalaboso siya.

Kadto bitawng Jose Velarde nga kaso, primero miingon siya nga wala siya moperma. Sa sunod na pod nga imbestigasyon miingon pod siya nga iyang gipermahan, pero dili para niya, sakpan nuon.

Apan si Gloria Arroyo paspas pod ang denial, unya paspas pod ug release sa mga papogi points. Usbon ko nga ang burden of proof tua sa accuser. Busa kay gi-deny, problema na kana sa accuser. Pun-an pa ug paspas panghatag ug bugas sa mga eskuylahan para sa mga nagtungha sa elementarya, motuo pa kaha ang mga ginikanan nga nangurakot si Gloria?

Perma na pod siyag increase ngadto sa mga veteran pensioners gikan sa Kinyentos ngadto sa singko mil pesos, motuo kaha ang mga katigulangan nga napiskan sa himaya pagka-veteran?

Ug daghan pa kaayong action nga ang Presidente makita gyud nato nga naay sulod ang utok. Kana maoy Presidente!

Anyway, usbon ko gihapon nga we deserved the kind of government we have today.

Long live the Philippines! (Dipolog Chronicle, Vol.VII No.42)

 

Kay bakasyon karon CHO mopahigayon libreng pagpanuli sa kabarangayan

Usa ka libreng pagpanuli (circumcession) ang ipahigayon sa Buhatan sa Maayong Panglawas  o CHO sa kabarangayan  sa Dipolog sa mga nagkalain-laing gitakda nga mga adlaw.

Ang gipangtakda nga petsa ug barangay o dapit mao kining mosunod: Abril 9 - San Alfonso ug Sangkol; Abril 17 - Minaog; Abril 24 - Estaka South (haduol sa Governor’s Village); ug Abril 29 – Miputak. Sumala pa ni Dr. Cecilio P. Siglos, ang kasamtangang City Health Officer ning dakbayan, nga giawhag kadtong mga ginikanan nga adunay mga anak nga kwalipikadong mopa-ilawom ning “operation tuli” ang moadto lang sa ilang Barangay Health Center sa gitakdang mga adlaw sa gihisgutang barangay ug dal-on nila ang ilang mga anak alang ning maong katuyoan.

Ang nasangpit nga “operation tuli” libre nga gipangunahan sa kagamhanang lokal sa Dipolog pinaagi sa Buhatan sa Maayong Panglawas. Ang “operation tuli” team gipangunahan mismo ni Dr. Siglos kinsa usa usab ka surgeon. (cio-prr)

 

 

 

NOTE: SEND US YOUR NEWS.  Tell us what's going on in your barangays, clubs, schools, businesses and non profit organization. You can also send notices and announcements.
          

 

    Email to webmaster@dipolognon.com

      
Google
WEB THE DAILY DIPOLOGNON