2

April 3,  2008

 

Godod daghang armado

Nabalaka karon ang mga katawhan sa lungsod sa Godod, Zamboanga del Norte sa pagtumaw sa mga armadong mga tawo nga nagbaton ug tag-as nga de kalibre sa armas nga manulis sa mga magpa-patigayon.

Kini ang gipabate sa mga katawhan sa maong lungsod samtang duha na ka biktima sa tulis ang hangtud karon wala masulbad sa kapolisan diin ilang gihulagway ang mga suspetsado dili ordinar-yong grupo kay naghupot kini ug tag-as nga mga armas. Usa usab sa ilang gibasol ang kapolisan sa lungsod ilabi na gayud ang hepe niini nga anaa lamang magyam-pongad sa iyang opesina ug wala mohimo ug mga lakang para mamintinar ang kahap-say, kahusay ug kalinaw gumikan kay wala man nila masanta ang nagpanghi-tabong tulis nga sunodsunod nasinati sa mga katawhan.

Ang ilang gikahadlokan kay ang mga suspetsado nagbaton ug tag-as nga armas nga ilang giila nga dili kini ordinaryo nga grupo nga misulod sa ilang lungsod. Si Mayor Roly Te sa lungsod sa Godod mipaha-yag nga iya na karon gimandoan ang kapolisan nga mohimog aksiyon atubangan sa kabalaka sa mga kataw-han ilabi na nga nagsunod-sunod na ang tulis nga wala pa masulbad.

Matud ni Mayor Te, naproblema usab sila unsaon pagsulbad ang nagpanghi-tabong krimen sa iyang lungsod tungod kay wala poy motumaw nga testigos kay mahadlok sa ma-resbak samtang ang mga suspet-sado polos armado sa tag-as nga armas. Galibog pa sila karon kon unsang grupoha ang mga suspetsado kay dili man ordinaryong gamit ang gipangdala niini.

Gipahayag ni Mayor Roly Te nga ang maong problema iya na kining gipaabot atol sa ilang meeting sa League of Municipalities of the Philipines, Zamboanga del Norte Chapter didto sa lungsod sa Piñan. (The New Nandau, Vol. XVII No.38)

 

Pacman muanhi sa Dipolog karong Hudyaka Festival

Kon walay laing eskeduel sa away, ang bag-ong superstar sa World Boxing Organization sa super feather weigh division nga si Manny “Pacman” Pacquiao ang moanhe dinhi sa Zamboanga del Norte atol sa pag-saulog sa Hudyaka Festival karong bulan sa Hunyo.

 

Kini ang gipahibawo ni Governor Rolando Yebes samtang personal nga misaksi sa away ni Pacquiao batok sa mexicanong boksingero nga si Juan Manuel Marquez niadtung Marso 16 didto sa Mandaly, Las Vegas. Matud ni Governor Yebes, personal sila nga nagka-estoryahanay ni Pacquiao uban ni Congressman Cesar Jalosjos didto sa iyang lawak sa wala pa mahitabo ang ilang away tali ni Marquez aron personal nga itunol niini ang libreng ticket sa pagsulod sa gym.

Ang world super feather weight champion miingon nga dili siya makalimot sa iyang unang pagtunob dinhi sa Zamboanga del Norte kay mainiton siyang gidawat sa mga katawhan hinungdan nga gusto siyang mobalik sa panahon nga iyang makuha ang kampionato sa lang away ni Marquez. “Iya man kong gipatawag sa iyang kuwarto uban ni Congressman Jalosjos ug iya pa ganing giingnan si House Speaker Prospero Nograles nga gipangga siya sa mga katawhan sa Zamboanga del Norte.”

Si Pacman maoy midasig ni Governor Yebes nga magpasiugda ug mga kalihukan sa boxing kay moanhe siya atol sa Hudyaka. Matud ni Governor Yebes, kon walay laing eskeduel si Pacquiao sa iyang away karong bulan sa Hunyo, kini mipasalig nga moanhe kini dinhi sa dakbayan sa Dipolog atol sa Hudyaka Festival aron magpahigayon ug boxing clinic aron kadtong mga kabataan nga dunay potential sa pagpamoksing, madiskobrehan nga hayan magagikan na usab dinhi sa Zamboanga del Norte ang laing kampeon sa tibook kalibutan.

Angay kahibaloan nga ang Zamboanga del Norte Boxing Federation kon ZBF sobsob karon ang mga paningkamot aron magpahigayon ug boxing competition ilabi na karong umalabot nga Hudyaka Festival subay na sa pagsalig nga gihatag sa Provincial Tourism Council nga maoy modumala sa maong kalihukan.

Ang ZBF nga gilangkoban sa mga boxing stables sa Zamboanga del Norte nagsugod na ug han-ay sa maong kalihukan ug nagpreparar na sa mga boksingero pinaagi sa mga boxing stables sa tibook Zamboanga del Norte. Ang tanang mga boksingero nga gusto moapil, modangop lang sa gitudlo nga boxing stables sama sa permero distrito si Board Member Bullet Jalosjos ug Mayor Noli Sulit. Sa segundo distrito, dinhi sa Dipolog sila si Nonot Campomanes, Boy Bajade ug Engr. Demetrio Nalzaro, lungsod sa Katipunan, Roxas, Manukan si Mayor Cris Eguia ug Vice Mayor Patchi Eguia, sa lungsod sa Sindangan ug Siayan sa kanhi konsehal Nilo Boy Sy, samtang sa tersero distrito sila si Mayor Jesus Lim sa Salug ug Mayor Roly Te sa lungsod sa Godod.

Matud pa sa tagdumala sa ZBF, kini gi-cluster kay limitado lamang ang panahon sa maong competition ug gikinahanglan kadtong mosalmot sa maong boksing nakaagi na sa hustong ensayo gikan sa mga stables sa nasangpit sa unahan. (The New Nandau, Vol. XVII No.38)

 

Dugang 5 ka Post Harvest Facility dinhi
sa ZaNorte tukuron karong Agosto

POSIBLING mapabarog na karong bulan sa Agosto niining tuiga ang dugang lima ka mga Post Harvest Facility sa mais alang dinhi sa Zam-boanga del Norte nga sama sa bag-uhay pa lamang giina-gurahan ni Department Of Agriculture Secretary Arthur Yap sa lungsod sa Sergio Osmeńa.

Mahinumduman nga gisaad ni DA Sec. Yap ang dugang lima ka post harvest facility alang sa atong probin-siya atol sa iyang paghi-dangat dinhi. Usa ka meeting ang gipa-higayon sulod mismo sa buhatan ni Governor Yebes uban nila ni DA Regional Director Oscar Parawan ug NABCOR (National Agri Business Corporation) President Alan Javellana nga naghisgut kabahin sa maong Post Harvest Facility.

Sa gihimong interview, gipahayag ni Governor Yebes nga iya nang gikon-sulta ang mga mayor kung interesado ba kini nga mohatag ug luna sa ilang lungsod ug counterpart alang sa pagpabarog sa maong pasilidad. Kung kaya niini sa mga mayor sa lungsod sa Rizal, Sindangan, Liloy ug Katipunan posibling masug-dan ang pagpatindog sa lima ka mga Post Harvest Faci-lity. Gipasabot sa gobernador nga magdepende ang gidak-on sa pundo nga gikinahang-lan kung gusto nga palapdan niini ang production.

Alang kang Governor Yebes nga kung walay ika-counterpart ang lungsod pwedi kini nilang i-utang alang sa maong katuyuan tungod kay “self liquidating” kini nga project nga diin tipik gihapon ang lungsod sa kita o abot sa maong pasilidad. Andam usab nga moha-tag ang probinsiya sa gikina-hanglan nga counterpart. Hinoon, kini ang mobalik ra usab ngadto sa probinsiya paghuman sa lima ngadto sa unom ka tuig. Nasayran nga pweding mo-apil ang mga pribadong grupo o mga co-operatives nga maoy mosa-gubang sa gikinahanglang counterpart kung dili kaya sa lungsod nga mohatag sa maong pundo. (The New Nandau, Vol. XVII No.38)

 

Customer sa TOP Diner mokiha human
makakaon ug sabon nasagol sa halo-halo

Mag-atubang ug asunto ang tag-iya ug tagdumala sa Top Diner human usa sa ilang costumer mireklamo nga naka-kaon ug halo-halo nga may sagol sabon.

Mao kini ang reklamo nga gipabate ni Mr. Clifford Moyet y Tacuhan, lomolopyo sa Barangay Dohinob sakop sa lungsod sa Roxas, Zamboanga del Norte nga samtang siya uban sa iyang anak nga mi-isnak sa Top Diner niadtung Lunes, ang halo-halo nga ilang giabayran ug gikaon, nanimahong sabon, ug sa ilang pag-ukay, mao nalang ilang nakita ang sabon nga nasagol sa halo-halo.

Matud ni Clifford, ulahi na nilang namatikdan nga dunay sagol sabon ang halo-halo samtang ubay-ubay na ang ilang nakaon uban sa iyang anak. “Nanimaho man gyong sabon. Sus sa akong pagtan-aw, sabon nga hilis mura ka dak-a sa posporo.” Tungod niini, gireklamo gilayon ni Clifford ngadto sa supervisor sa maong establishement ang ilang nakaon nga halo-halo nga may sagol sabon, ug kini matud pa, nangatarungan nga posibli ang maong sabon nasagol sa ice nga ilang gipalit sa gawas.

“Wala diay silay quality control kay namalit sila ug ice sa gawas kay nahutdan kuno sila wala man nila seguroa nga limpyo ang ice nga ilang gipalit.” Matud ni Clifford iyang pasakaan ug kaso ang tagdumala sa Top Dinner.

Angay masayran nga ang Top Diner gipanag-iyahan sa pamilya ni Mayor Evelyn ug Roberto Uy dinhi sa dakbayan sa Dipolog. (The New Nandau, Vol. XVII No.38)

 

Pagpahigayon ug paugnat sa kusog makahatag
dugang pagpalagsik sa ekonomiya –Gov. Yebes

17 na ka tuig ang milabay sukad ang Zamboanga del Norte mi-host ug Regional Athletic Association Meet niadtung 1991 dinhi sa dak-bayan sa Dipolog, karon gibangon ug balik aron ang esperito sa paugnat sa kusog makapadasig sa mga kaba-taan ilabi na sa mga kataw-han dinhi sa siyudad nga gimingaw sa susama niining kalihukan.

Matud pa ni Governor Rolando Yebes, karong tuiga, dili unta ang Zamboanga del Norte maoy host sa ZPRAA Meet kay kini didto man gi-eskeduel sa Bayog, Zamboanga de Sur human naka-host ang lungsod sa Siocon sa miaging tuig, apan gumikan kay ang LGU-Bayog mibalibad gumikan sa problema pinansiyal ug kulang ang ilang preparasyon hinungdan nga dinhi kini napunta sa ZaNorte ug dinhi gipahigayon sa dakbayan sa Dipolog isip maoy capital city sa probinsya.

Sumala sa gobernador, sukad niadtung 1991 nga wala na maka-host ang Zamboanga del Norte ug susama niining kalihukan, wala siya magmakule sa pagdawat sa maong kahiga-yonan bisan paman kon makagasto ug dako probin-sya gumikan kay para raman usab kini sa kaayohan sa mga kabataan ilabi na gayud sa mga katawhan ug sa mga mag-uuma nga makapama-ligya sa ilang mga produkto. Matud niya, ang susama niining kalihukan makapa-lagsik sa ekonomiya tungod kay ang mga produkto sa atong mga mag-uuma seguradong mahalin sa kamerkadohan gumikan sa pagdagsa sa daghanang mga atleta gikan sa mga silingan nga probinsya ug siyudad sa rehiyon.

Gawas pa niini dugang pa ni Governor Yebes, gusto usab niya nga masubhan pinaagi sa paugnat sa kusog sa mga kabataan ang bag-ong napalit nga lote sa oval sa Zamboanga del Norte National High Schoool nga mao karon ang gipahimu-tangan sa ZaNorte Sports Complex. Ang maong luna nga gipasagdahan sa unang nangaging namunoan taud-taud nga gipahimudsan ug gamit sa probinsya apan karon lang bag-o kini napalit sa kagamhanang probinsyal sa ZaNorte gikan sa mga sumosunod sa pamilyang Martines, ug maoy gusto sa gobernador nga kini mapahi-mudsan ug magamit sa mga kabataan alang sa pagpa-lambo sa paugnat sa kusog.

Ang probinsya sa Zambo-anga del Norte migasto ug dos milyones ka pesos alang sa pagkompone sa mga gikinahanglang pasilidad sulod sa Zamboanga del Norte Sports Complex ug laing kuatro milyones ka pesos gikan sa Department of Education diin ang pundong salapi gikan ra usab sa Provincial School Board Fund. Para sa gobernador, gamay ra kaayo kini nga kantidad kon itande sa maani nga maayong pagtagad ug pag-resibe sa mga bisita. Gani dugang pa niya, ang Zamboanga del Norte mo-host ug Palarong Pambansa aron maila sa tibook nasud ang atong probinsya ug duha ka mga siyudad sa Dipolog ug Dapitan gumikan kay ang turismo sa pagkakaron maoy nag-unang negosyo sa tibook pilipinas.

Matud ni Governor Yebes wala siya mangayo bisan gamay nga ayuda gikan sa mga LGU’s dinhi sa probin-sya ug bisan na gikan sa duha ka mga schools division sa probinsya ug siyudad sa Dipolog tungod kay ang pundong salapi nga gigasto sa pagkompone sa mga kahi-manan ug pasilidad sa Za-Norte Sports Complex naga-gikan sa iyang kaugalingong panudlanan sa lalawigan. (The New Nandau, Vol. XVII No.38)
 

Dulang Volleybal:
Isabela pildi sa Zanorte 

GIKALIPAY ug gikahi-muot pag-ayo nila ni Gover-nor Rolando Yebes ug Dr. Habib Adzhar Sarahadil, Schools Division Superinten-dent, DepEd Zamboanga del Norte Division ang dulang volleyball sa lalaki secondary division nga nagsangka ang team sa Zanorte ug Isabela City.

Sila si Governor Yebes ug Sarahadil ang personal nga milantaw sa maong dula. Ilang  nakita ang abilidad sa mga volleyball player sa Zanorte. Mismo si Governor Yebes ang nahingangha sa dinulaan sa team sa Zanorte, seryoso kining naningkamot alang sa ilang kadaugan.

Gipildi sa Zanorte ang team sa Isabela nga kutob lamang sa second set. Subay niini wala pay pildi  ang team sa Zanorte sa dulang volleyball sa lalaki secondary division. Gilantaw nga posibling mag-abot sa championship game ang team sa Dipolog kontra sa Zanorte. (The New Nandau, Vol. XVII No.38)

 

 1,000 KA VIALS SA ANTI-RABIES VACCINE IDONAR SA BAI NGADTO NI GOBERNADOR YEBES

Tungod sa nahitabong trahedya sa Lungsod sa Katipunan diin usa niini ka maestra ang nabiktima sa sakit sa rabies, ang Bureau of Animal Industry kon BAI ang magpadala ug 1,000 ka vials sa anti-rabies vaccine ngadto ni Gobernador Rolando E. Yebes pinaagi sa Office of the Provincial Veterinarian ubos sa pagdumala ni Vicente “Vic” Sanchez, Jr., hepe sa maong buhatan. Kini ang nahipus nga kasayuran ning pamantalaan gikan ni Joseph Wilson Jatico, kasamtangang Chief of Operations sa maong buhatan.

Matud pa ni Jatico, niadtong milabay’ng semana, magpadala ug situationer report si Vic Sanchez Jr ngadto sa Bureau of Animal Industry sa Manila bahin sa nahitabong rabies scare sa lungsod sa Katipunan diin ang mga lumulupyo niini ang nangahadlok nga matakbuyan sa sakit sa rabies tungod sa pagkamatay sa usa ka magtutudlo sa Katipunan National High School nga gipaak sa iyang irong gi-rabies. Ang maong situationer report nga gidala ni Dra. Alicia Argana sa Manila ang gipataban usab ni Sanchez ug usa ka hangyo ngadto sa BAI sa pagdonar ngadto sa lalawigan ug 1,000 ka mga anti-rabies vaccine vials aron sa paglusad sa ilang buhatan sa hinanaling pagbakuna sa gibanabanang 20,000 ka mga iro dinhi sa lalawigan. Kini usab nga hangyo ang gidasunan usab ni Gobernador Yebes.

Gihangyo ni Gobernador Yebes ang mga mayors dinhi sa atong lalawigan sa pagcoordinar sa buhatan sa Provincial Veterenarian aron sa pag-schedule sa ilang tagsatagsa ka kalungsuran para sa pagpangbakuna sa ilang mga iro batok sa rabies. Matud ni Jatico, ang sakit nga rabies dili gyud kakom-piyansaan. Kini ang hatagan gayud ug igong pagtagad pinaagi sa pagpangbakuna sa mga iro, ilabi na kadtong mga irong layaw.

Ang maong anti-rabies vaccine vials mukostar ug P500,000 nga libring gihatag sa Bureau of Animal Industry-Manila ni Gobernador Lando Yebes. (The New Nandau, Vol. XVII No.38)

 

ZPRAAM ‘08 malinawon –RMG

Gibutyag karon sa hepe sa Regional Mobile Group nga gidistino dinhi sa Zanorte nga hapsay ug malinawon ang pagphigayon sa ZPRAA Meet. Sila maoy gitahasan sa pagpatuman sa kahapsay ug kalinaw samtang gipahigayon ang Zamboanga Peninsula Regional Athletic Association Meet 2008 dinhi sa dakbayan sa Dipolog nga gbuksan ni-adtong Lunes.

Si Police Senior Inspector Mohammad Zainul Abidin Ilupa hepe sa RMG namahayag nga sukad ni-adtong lunes walay mga dinagkong panghitabo nga nakatugaw sa nagpadayong Regional Meet dinhi sa dakbayan. Sumala pa niya nga sigun sa ilang pagmonitor hapsay ug malinawon ang maong kalihukan gawas lamang sa mga ginagmay nga panghitabo sama sa kawat sa Cellphone diin usa ka training official ang nabiktima niini ug adunay mga atleta nga nawad-an sa ilang uniporme.

Iyang gi-angkon nga human nila nadawat ang maong report ila dayon kining gipa-blotter sa buhatan sa kapulisan sa Dipolog aron mahimo-an ug aksiyon ug ilang gipahimangno-an ang tanang mga delegado nga magbantay gayud kanunay sa ilang mga butang. Samtang gipaabot usab ni Police Inspector Ilupa ang iyang pagpasalamat kang Gov. Lando Yebes sa suporta nga gihatag niini ngadto kanilang ilabi na sa ilang mga panginahanglanon samtang ilang gipatunhay ang kahapsay ug kalinaw sa Regional Meet.

Gidayeg usab sa opisyal ang pagphigayon sa ZPRAA Meet 2008 dinhi sa Zanorte ug nanghina-ot usab siya nga unta mapahigayon usab dinhi ang Palarong Pambansa. Ang mga sakop sa PNP Regional Mobile Group sa papgnauglo ni PSI Ilupa nahidangat dinhi sa dakbayan sa Dipolog ni-adtong Marso 19, 20087, unom ka adlaw sa wala pa magsugud ang Regional Meet ug gikatakda ang ilang pagbiya human ang tanang delegado makapauli na sa ilang tagsa-tagsa ka mga dapit. (Southpoint, Vol.1No.13)

 

 

 

Mga Mayor sa ZN solid ni PGMA

Padayong nagpaluyo ni Presidente Gloria Macapagal-Arroyo ang mga municipal mayors sa Zamboanga del Norte atubangan sa mga panawagan nga mokanaug kini sa gahum. Kini ang nahasulod sa ilang gipanday nga resolusyon kagahapong adlawa sa ilang tigum sa League of Municipalities of the Philippines Zamboanga del Norte Chapter nga gipahigayon sa lungsod sa Pinan sa congressional district office ni 1st District Congresswoman Cely Jalosjos-Carreon.

Matud pa ni Mayor Rolando Tablezo sa Leon Postigo ang kalihim sa Liga sa mga mayor sa ZaNorte silang tanang 25 ka municipal mayors mipaluyo sa maong lakang. Sumala pa niya silang mga mayors sa ZaNorte nagapabilin nga adunay kompeyansa ug pagsalig sa administrasyon ni Presidente Arroyo.

Matud pa ni Mayor Tablezo ang ilang padayong pagpaluyo sa administrasyon ni Presidente Arroyo gipasikad sa rason nga wala pasagdi sa presidente ang mga kalungsuran karon diin padayong nagpadawat sa nagkadaiya niining mga programa nga nakatabang ug daku diha sa ilang mga katawhan. Sumala pa ni Mayor Tablezo ang mga municipal mayors sa ZaNorte walay nakita nga bug-at nga rason nga angayan si Presidente Arroyo mokanaug sa iyang gahum nga wala pa gani mahingpit ang iyang termino. (Press Freedom, Vol. XX No. 24)

 

 

Buhis alang sa brgy. gikolekta sa City Hall

Nakita nga daw apike gayud ang panudlanan karon sa siyudad sa Dipolog atubangan sa gibatunan niining P27 milyones ka pesos nga deficit sa tuig 2007 kay misapaw na kini sa mga barangay diha sa pagpangolekta ug buhis sa mga tabuan nga kaniadto gihatag ang pagkolekta sa barangay para aduna silay mahimong income.

Usa sa mireklamo niini karon mao ang Barangay Barra tungod kay gisapawan sila sa ilang pagkolekta ug buhis sa mga mamaligyaay ug tabo kada Byernes nga gipahimutang pagawas na sa Dipolog City Fish Port Complex. Giklaro sa mga opisyales sa Barangay Barra nga kabahin sa pagkolekta ug buhis sa mga mamaligyaay sa tabo sulod sa Fish Port Complex wala gayud sila manghilabot kay kini iyaha sa siyudad.

Sumala pa aduna mismoy ordinansa ang Barra nga nagdeklarar kada Byernes nga tabo sa barangay nga gipahigayon sa gawas sa fish port hangtud na sa pagka adlaw’ng Sabado. Tungod sa maong tabo ang panudlanan sa Barra makakolekta ug dul-an sa duha ka libu nga nakatabang ug daku sa income sa ilang barangay. Apan sa nakalabay nga tabo natingala na lang sila nga ang ilang koleksiyon wala na gani moabot ug lima ka gatus ka pesos tungod kay ang city hall maoy nangolekta gipaubanan pa ug pulis ang collector aron dili gayud makapalag ang namaligya sa tabo sa pagbayad sa buhis.

Samtang nagbagolbol usab ang mga namaligya sa tabo tungod sa kalit nga pagsaka sa ilang balayronon ngadto sa city hall diin giparehas ang tanan dinagku man nga mga pagpaninda hangtud sa namaligya ug sugnod gipaninglan sa siyudad ug P30.00 nga buhis kada usa kanila. Ang barangay sa ilang kabahin mibutyag nga sa ilang pagsingil ug buhis sa mga mamaligya sa tabo kini ilang ibasi sa gidak-on ug gidaghanon sa baligya diin ang mga ukay-ukay maoy ilang gipaninglan ug tag P20.00 samtang sa mga namaligya ug utanon, lagutmon ug sugnod nga kahoy gikan sa P5.00 ngadto sa P10.00.

Gituhuan nga ang paghigpit karon sa Dipolog sa pagkolekta ug buhis nagtinguha sa pagtapak sa dakung deficit nga naangkon sa ilang panudlanan nga mokabat sa P27 milyones ka pesos. Nalakip na sa gipahigpitan karon nga kampanya mao ang pagpatuman sa mga probisyon sa Traffic Code of Dipolog diin bisan panahon sa Sabado Santo ang Dipolog Police uban sa mga traffic aide higpit nga miimposar sa mga probisyon sa traffic code batok sa mga motorcab nga wala makarenew o magbatun ug mga prangkisa nga nagdala ug daku nga multa.

Pipila sa mga lungsuranon nga nakamatikod niini nga lihok karon sa siyudad sa Dipolog nagtuo nga kini bonga na sa dakung deficit nga natala sa panudlanan niini sa miaging tuig nga gipaningkamutan karon sa city hall nga matapakan. (Press Freedom, Vol. XX No. 24)

 

TVI maayo lang sa papel

Pulos ra pang hinambog diha sa mga pamantalaan ang gibuhat sa TVI Resource Development Inc. ang operator sa Canatuan Gold Project sa lungsod sa Siocon, Zamboanga del Norte aron mosaka ang balor ilang sosyo sa stock exchange didto sa Canada ug makadani ug dugang investors.

Mao kini ang pagtuo ni Governor Rolando Yebes sa nasangpit nga kompaniya nga nagpunay lang ug panghi-nambog sa mga balita diha sa mantalaan kabahin na sa nahimong kita nila sa pagmina ug bulawan sa Canatuan Gold Project. Matud pa sa gobernador nga samtang nanggawas sa mga balita sa nasudnong mga mantalaan nga mitala ug dakung kita ang TVI sa ilang operasyon sa Siocon, gamay ra ug nabahin nga buhis ang probinsiya gikan sa ilang pagmina.

Gibutyag sa gobernador nga sa miaging tuig ang ZaNorte nakabahin lamang ug buhis gikan sa national wealth nga mokapin sa usa ka milyon ka pesos nga wala motakdo sa gipanghinambog sa maong langyaw nga kompaniya nga mitala sila ug dakung kita sa ilang pagmina ug bulawan. Nagduda ang gobernador sa ZaNorte nga kini ang gibuhat sa maong kompaniya aron mosaka ang ilang sosyo sa stock exchange didto sa Canada ug sa samang bahin makadani sila ug dugang mga investors sa ilang kompaniya nga sa iyang nakita daw nagka-apiki karon sa panalapi.

Sa nasayran ubay-ubay nga mga local contractor sa TVI ang wala mabayri sa ilang mga kontrata may kalabutan na sa pagkonstrak sa ilang suphide dam para sa operasyon sa ilang copper mine nga mokabat ug pipila ka milyon ka pesos. Sa nakita karon nagka diin-diin na ang TVI sa pagpangita ug kasosyo sa ilang pagmina sa Canatuan tungod sa kaapike sa ilang panalapi. Karong bag-o misuway sa pagkonbinsir ang TVI sa Atlas Consolidated Mining Development Corporation nga magsosyo sila sa pagmina ug copper sa Canatuan apan misibog ang Atlas bisan pa ug nakahatag na sila ug pasiuna nga P42 milyones ka pesos ngadto sa langyaw’ng kompaniya.

Dili pa lang dugay gibutyag mismo sa TVI nga nangutang sila ug dugang pundo didto sa Hongkong para gamiton sa operasyon sa ilang copper mine sa Canatuan. Mismo ang nasangpit nga kompaniya miangkon nga gisibog nila ang pagsugod sa operasyon sa ilang copper mine tungod sa problema nila sa panalapi alang sa maong operasyon. (Press Freedom, Vol. XX No. 24)

 

 

 

NOTE: SEND US YOUR NEWS.  Tell us what's going on in your barangays, clubs, schools, businesses and non profit organization. You can also send notices and announcements.
          

 

    Email to webmaster@dipolognon.com

      
Google
WEB THE DAILY DIPOLOGNON