2

MARCH 13,  2008

 

Financial Assistance gikan sa nasudnong kagamhanan
P2.9B mitala sa Administrasyong Yebes

Mitala karon ang administrasyong Yebes nga maoy nakadawat sa pinakataas nga financial assistance gikan sa nasudnong kagamhanan lakip na sa mga foreign assisted projects sulod lamang sa upat ka tuig niining paglingkud.

Sa records gikan sa Provincial Planning and Development Office sa Zamboanga del Norte nagpakita nga ilawom sa administrasyon ni Governor Rolando Yebes gikan sa tuig 2004 hangtud sa tuig 2008 ang probinsiya nakadawat ug mokapin sa P2.9 bilyones ka pesos nga balor sa mga proyekto nga giimplementar sa nasudnong kagamhanan.

Uban na niini ang pag-implementar sa mga foreign assisted projects sulod sa maong panahon. Sumala pa sa kasaysayan sa lalawigan sa ZaNorte ang administrasyong Yebes maoy nagmalamposon sa pagkuha sa pinaka daku nga financial assistance gikan sa nasudnong kagamhanan ilawom sa administrasyon ni Presidente Gloria Macapagal-Arroyo nga naglangkub na sa nagkadaiyang mga proyekto.

Samtang gikan sa tuig  1998 hangtud 2004 sa administrasyon ni kanhi Governor Isagani Amatong ang ZaNorte nakadawat lamang ug P648.1 milyones ka pesos nga financial assistance gikan sa nasudnong kagamhanan lakip na sa foreign assisted projects. Pipila sa mga proyekto nga gipatuman karon sa nasudnong kagamhanan sulod sa ZaNorte naglangkub Farm-to-Market Road Projects nga mobalor ug P50 milyones ka pesos, Post Harvest Processing and Trading Project nga mobalor ug P23 milyones ka pesos.

Ang pinaka daku nga financial assistance nga nadawat sa administrasyong Yebes gikan sa Malacañang mao ang P1.3 bilyones ka pesos nga Zamboanga West Coast Road Project gikan sa Sibuco paingon sa Baliguian. Samtang ang konstraksiyon sa Sicayab-Bucana-San Vicente road project gipahatan usab sa presidente ug dugang pundo nga mokabat na sa P33 milyones ka pesos ang nadawat sa probinsiya gikan sa pasiunang P18 milyones ka pesos nga gipagawas sa palasyo.

Para sa Dipolog Airport Improvement Project sa P700 milyones ka pesos nga pahat sa maong proyekto nakapagawas na ang palasyo ug P167 milyones ka pesos sa nagapadayon karong pagtrabaho sa proyekto ug laing P106 milyones ka pesos para Dapitan-Dakak road widening project nga mobalor ug dul-an sa P300 milyones ka pesos. Samtang karong bag-o nahingpit na usab ang pagkonstrak sa P222.9 milyones ka pesos nga Pulauan Port Development Project.

Nalakip na sa nadawat nga ayuda sa probinsiya ilawom sa administrasyong Yebes gikan kang Presidente Arroyo mao ang P30 milyones ka pesos nga CT Scan Machine para sa ZaNorte Medical Center. Angayang kasayran nga sa bag-ong gipagawas nga survey sa National Statistics Coordination Board kabahin sa poverty incidence ang lalawigan sa ZaNorte nalaksi na gikan sa pagka number 1 niadtong tuig 2003. Sa pinakaulahing survey nga gipahigayon sa tuig 2006 nagpakita nga sulod sa duha ka tuig nga paglingkud ni Governor Yebes malampusong napatuman niini ang nagkadaiyang mga interventions nga nakatabang sa pagpa-ubos sa gidaghanon sa mga kabus nga katawhan sa atong lalawigan sulod lamang sa tuig Hulyo 2004 hangtud Hunyo 2006.

Si Provincial Attorney Jes Gal Sarmiento, Jr. nagkanayon nga ang resulta sa pinakaulahing poverty incidence survey diin ang ZaNorte nalaksi gikan sa pagka numero unong pordoy nga probinsiya sa tibook nasud maoy usa ka kongkretong kamatuuran nga ang administrasyon ni Governor Yebes nakamugna ug paglambo sa kahimtang sa pagpuyo sa atong mga katawhan nga napa-ubsan niini ang gidaghanon sa mga kabus sa atong katilingban.

Matud pa ni Atty. Sarmiento ang resulta sa maong survey nagpakita lamang nga miubos ug balig 1.5 porciento ang gidaghanon sa mga kabus sa ZaNorte nga nagpaila nga namonga ug positibong resulta ang Pro-Poor program ni Governor Yebes ilawom sa iyang sumbanan, “Una sa tanan ang Katawhan.” Kahinumduman ilawom sa administrasyong Yebes ang probinsiya nanghatag ug tag usa ka milyon ka pesos nga financial assistance sa tanang mga kalungsuran sa ZaNorte para sa nagkadaiyang mga proyekto samtang laing tag tunga sa milyon ka pesos nga balor usab sa proyekto para sa tanang 691 ka barangay.

Nahimogso usab ilawom sa unang termino ni Yebes ang Barangay Indigent Beneficiaries Program o LANDO BIBO human sa gipahigayong poverty mapping sa probinsiya diin ang mga meyembro niini otomatik nga gipa-ilawom sa Provincial Health Care Assistance Program nga libre sila karon sa hospitalization ug maoy otomatik nga beneficiary sa livelihood program sa probinsiya.

Sa pagkakaron sigun sa gipahibawo sa gobernador ang mga meyembro sa LANDO BIBO ipa-ilawom sa PHILHEALTH para dugang benepisyo ang madawat sa mga meyembro atubangan sa pagsugod karon sa iyang operasyon sa ZaNorte Medical Center nga pagabuksan na karong Abril 2, 2008.

Gituhuan usab nga nakatabang ug daku sa pagpalambo sa sector sa edukasyon ang paglusad sa gobernador ug mga proyekto nga magkonstrak ug mga eskwelahan sulod sa tanang mga munisipyo ug sa nagkadaiyang mga barangay uban na sa paghatud sa medical ug social services hangtud sa pinakalayu nga barangay sa ZaNorte ilawom sa programang Tabang ni Lando sa Communidad. (The New Nandau, Vol. XVII No.35)

Review sa mga Appropriation Ordinance
pahigpitan na sa Sangguniang Panlalawigan

Gipadas-og karon sa mga meyembro sa Sangguniang Panlalawigan sa Zamboanga del Norte nga higpitan nila ang pagahimoong pagreview sa mga appropriation ordinance gikan sa mga lungsod ug duha ka mga siyudad sa Dipolog ug Dapitan kon wala ba kini makalapas sa gimbut-an sa balaod ilabi na kabahin sa gitakdang limitasyon para budget alang sa Personal Services.

Kini ang ilang nahisgutan samtang gibatbat ni chairman sa Committee on Finance and Appropriation sa Sangguniang Panlalawigan ang iyang report sa gireview nga mga appropriation ordinance gikan sa mga lungsod ug duha ka mga siyudad diin nakita halos tanan pulos nakalapas sa Personal Services limitation.Sa iyang report gibutyag ni Board Member Anecito Darunday nga ang tanang mga kagamhanang local sa ZaNorte gawas sa kagamhanang probinsiyal pulos nakalapas sa Personal Services limitation.

Si Board Member Edgar Baguio, mipadas-og nga kinahanglan sa ilang pag-review iklaro gayud kon ang maong appropriation ordi-nance wala ba makalapas sa mga gimbut-an sa balaod sigun sa gibatunan nilang review power nga nabutang sa Local Government Code of 1991. Gisaysay ni Baguio nga sa miagi ang kanhi budget officer sa probinsiya moklaro gayud kon ang usa ka appropriation ordinance gikan sa lungsod angayang bang aprubahan o dili.

Usa na sa misango mao ang Appropriation Ordinance No. 07-11 sa dakbayan sa Dipolog nga naglambigit sa kantidad nga P11.4 milyones ka pesos nga supplemental budget nga napanday sa miagi pang tuig 2007 nga gipa-ilawom sa pagreview. Sa report ni Darunday nga gidasonan sa plenary session sa balay balauranan sa probinsiya karong semanaha gitataw niini nga kinahanglan ang maong appropriation ordinance sa Dipolog paga usbon aron mosibo sa gimbut-an sa Local Budget Circular 75 kabahin na sa Personal Services Limitation kay milapas sila ug balig P18.6 milyones ka pesos.

Matud pa ni Darunday ang Dipolog sukad pa sa tuig 2003 mitala na ug paglapas sa ilang Personal Services limitation nga mokabat sa P27.1 milyones ka pesos. Pag-abot sa tuig 2004 milapas gihapon ang Dipolog ug P21.4 milyones ka pesos; 2005 mokabat sa P18 milyones ka pesos ug sa 2006 P15 milyones ka pesos ang labaw sa gitakdang limit sa Personal Services.

Sa interview sa Radyo Ronda-DXKD si Board Member Darunday mitataw nga kon ang usa ka kagamhanang local minglapas sa ilang Personal Services limitation aduna kiniy dakung epekto. Sumala pa kini nagpasabot nga kon molapas sa limitasyon ang usa ka kagamhanang local nagpasabot nga nanobra ang gipahat niining pundo para sa suweldo sa ilang mga empleyado.

Sa kabahin sa siyudad sa Dipolog si Darunday nagtuo nga ang paglapas sa Personal Services limitation nagsumikad sa rason nga naghinobra ang gidaghanon sa mga kaswal ug job orders nga gibatunan sa siyudad busa angayang ipang lay-off kini sa trabaho. Sumala pa niya ang nahitabo ang gihatag nga suweldo sa mga kawani dili takdo sa ilang classification kay ang taripa sa class A nga LGU ang ilang gisunod ug kugi usab magmugna ug bag-ong mga posisyon ang mga mayors.

Subling gitataw ni Darunday nga bugtong ang kagamhanang probinsiyal lamang sa ZaNorte ang wala makalapas sa Personal Services limitation kay sa gibatunan niining budget karon para niini layu pa sila sa gitakdang limit nga gihisgutan sa balaod. Gipatin-aw ni Darunday kon mogawas sa gihimo nilang pagreview nga milapas sa limitasyon ang usa ka lungsod o siyudad sa gipahat niining budget para sa Personal Services kon dili nila korihian ang ilang sayup mosangpot kini sa disallowance unya sa paghatag sa maong mga benepisyo ngadto sa mga kawani.

Sumala pa niya kasa-garan sa mahitabo morefund sa ilang gidawat nga benepisyo ang mga kawani sa usa ka kagamhanang local kon ugaling makita nga milipas sila sa Personal Services limitation nga pabiling walay koreksiyon nga gipahigayon. (The New Nandau, Vol. XVII No.35)

 

Kakugi lang ang bugti makapahumpay
Sa kalisod sa mga katawhan -Sanchez

Kakugi lang ang bugti makapahumpay na sa kapobrehon nga nasinati sa mga katawhan nga karon nakatagamtam ug kalisod atubangan sa kamahal sa mga nang-unang palaliton ilabi na ang pagkaon. Mao kini ang gipama-hayag ni Mr. Vicente Sanchez, Jr, nga maoy gisangonan sa Fisheries Division sa buhatan sa Provincial Agriculture ilawom sa iyang pagdumala sa PROVET samtang miping-it na karon sa kali-sod ang mga konsumedor diha sa kamahal sa mga palaliton ilabi na ang mga pagkaon.

Matud ni Sanchez, ubos sa iyang buhatan sa PROVET nga ilawom sa iyang supervision ang Fisheries Division, available sa iyang buhatan ang daghang mga fingerlings sa tilapia ug african heto nga sarang na kaayong makatabang sa mga katawhan nga magkugi ug butang ug fish pond likod sa ilang balay. Sumala ni Sanchez, kanunay siyang nag-awhag sa mga barangay officials nga mohimog mga lakang diha sa pagmugna ug programa pinaagi sa communnal fish pond kay kini makatabang kaayo sa iya mismong katawhan sa barangay.

Gawas nga makakaon kini ug lab-as nga isda, masinati usab ang kabarato niini. Matud niya, kakugi lang gayud ang bugti nga pagabuhaton sa mga katawhan, makatagamtam sila ug alibyo sa ilang kahimtang. Sa pagkakaron gipadayon usab sa PROVET ang fish seeding operation sa mga kasubaan sa mga kalungsoran. Pagkakaron gisulayan sa mga personahe sa fisheries division ug hagbong ug mga fingerlings sa telapia ang suba Siocon aron masuta kon tinuod ba gayud ang report nga ang maong suba poisonous na kaayo nga dili mabuhi ang mga isda tungod sa mining operation sa TVI. (The New Nandau, Vol. XVII No.35)

 

Gov. Yebes dili mosuporta mga senador wala maglantaw ug kaayohan sa nasud

Governor Rolando Yebes mipahayag nga dili siya mosuporta sa mga senador nga nakahatag lamang ug kaguliyang sa atong nasud sa panahon nga mangayo kini kaniya ug tabang nga suportahan sa umalabot nga eleksiyon.

Atol sa interview sa Boses sa NBN National Television Network, gibatikos ni Governor Yebes ang mga senador nga mi-imbestigar sa ZTE controversy nga milambigit sa first family ug sa presidente bisan kon tataw kaayo nga walay igong ebedensiya nga makapamatuod sa maong eskandalo. Matud ni Governor Yebes, walay luna sa iyang kasingkasing kining klaseha sa mga opisyal nga ang gilantaw mao lamang ang ilang kaugalingong interes.

Gawas nga nakahatag lang kini ug kaguliyang sa atong nasud, gipahayag usab sa gobernador ang iyang kahinawaing tungod kay maayo lang kini mangayo ug tabang suporta sa eleksiyon apan inig makadaug na, dili na gani molingi sa paglugway ug proyekto dinhi sa atong probinsya.

Human niadtung nakalabay’ng election, maihap ra ka senador ang mipadayag sa ilang pagtabang sa atong probinsya, busa sa umalabot nga piniliay, dili na siya mosuporta pa niining klaseha sa mga senador nga dili makamaong molantaw alang sa kaayohan sa mga katawhan. (The New Nandau, Vol. XVII No.35)

 

 

 

 

NOTE: SEND US YOUR NEWS.  Tell us what's going on in your barangays, clubs, schools, businesses and non profit organization. You can also send notices and announcements.
          

 

    Email to webmaster@dipolognon.com

      
Google
WEB THE DAILY DIPOLOGNON