2

FEBRUARY 28,  2008

 

Panggilabot sa simbahan kabahin sa NBN-ZTE scandal
Dipolognon wala magkahiusa

Kon nagubot ang Metro Manila mahitungod sa laing mitumaw nga ‘wistle-blower’ sa ZTE broad bond deal controversy, natay-ug usab ang mga katawhang Dipolognon sa dihang nalambigit na usab ang simbahang katoliko.

Atul sa tulomanon Kasayuran program sa DXFL, nagkabahin-bahin sa managlahing opinion ang mga katawhang Dipolognon sa isyu sa “The Jun Loazada expose” diin maoy unang gidangpan niini ang La Salle Brothers sa De La Salle University diin anaa nagpuyo ang mga pari ug madre. Unang gituki ang issue kabahin sa pagkalambigit sa simbahang katoliko nga miapil-apil sa maong eskandalo nga wala usab uyoni sa kadaghanan.

Matud sa nagkadaiya nilang pamahayag, dili angayan mabasol ang simbahan nga manggilabot sa expose ni Jun Loazada mahitungod sa gipangayo nga komisyon sa pipila ka mga opisyal sa Malakanyang diin naduhalig ang first family tungod kay ang maong isyu naglambigit sa moralidad. Sumala pa sa opinion sa uban, dili na unta angayan pa nga mag-apil-apil ang simbahang katoliko sa maong kontrobersiya gumikan kay mao lamang kini ang makahaling sa kagubot ug kaguliyang sa mga katawhang pilipinhon ug itugyan nalang kining maong isyu ngadto sa hingtungdang ahensiya sa gobiyerno nga maoy mo-imbestigar ilabi na nga ang senado nagpahigayon na sa ilang senate legislative inquiry.

Matud pa nila, dunay separadong gahum ang simbahan ug estadu, ang simbahan maghatag ug maayong pagtulon-an kaba-hin sa balaod sa labaw’ng makagagahum samtang ang estadu maoy iyang totokan ang mahitungod sa mga programa panggobiyerno diha sa paghatud ug maayong serbisyo sa mga katawhan. Kon dunay motumaw nga isyu sama niini, sumala pa nila, kini angayan lamang itugyan sa mga hingtung-dang ahensiya sa gobiyerno nga maoy mo-imbestigar ug ang mapamatud-an paham-tangan ug tukmang silot.

Ilang gihatagan ug panag-ingnan ang nakalabay’ng people power nga gipangu-nahan sa simbahang katoliko sama sa Edsa Uno, Edsa Dos ug Edsa Tres gikan pa ni Marcos, Aquino, Estrada hangtud naloklok sa puwesto si Gloria apan hangtud karon walay nahitabong kalainan ug kausbanan ang pagpa-dagan sa atong panggo-biyerno kay sa matag karon ug unya, anaa gihapon ang isyu mahitungod sa pangu-rakot ug pagpangawkaw ug salapi sa mga katawhan diin ang nalambigit ang mga opisyal nga anaa sa gahum.

Ang maong opinion gikontra usab sa kadaghanan tungod kay dili mahimong isalikway sa simbahan ang issyu kabahin sa moralidad. Ang pagpangawkaw ug salapi naglambigit kini sa issyu sa moralidad diin ang simbahan nagtudlo sa pagkamatarong. Matud pa nila, kon wala pa ang simbahan manggilabot sa singgit sa kinabag-ang katawhan nga sila gilupigan, hayan hangtud niining panahona wala pay kagawasan ug demokrasya ang maangkon sa atong nasud nga pilipinhon.

Gihimong ehimplo niini mao ang pagpalagpot sa diktadoryang presidente nga si Marcos diin ang simbahan maoy nangulo aron palayason kini sa palasyo hinungdan nga nakab-ot sa mga katawhang pilipinhon ang kagawasan ug demokrasya sa atong nasud. (Press Freedom, Vol. XX No. 19)

 

P1M Assistant sa mga lungsod gamiton arun ipalit ug abono

Gidasig karon sa goberna-dor ang mga municipal mayors sa Zamboanga del Norte nga gamiton nila ang ilang tag usa ka milyon ka pesos nga financial assistance gikan sa probinsiya diha sa pagpalam-bo sa sector sa agrikultura para dugang panginabuhi sa atong katawhan pinaagi sa pagpalit ug abono.

Kini nga panawagan nahimogso atubangan sa gipalanog nga problema sa sector sa agrikultura sa gipahigayong dialogue tali sa mga mag-uuma karong bag-o uban sa tinugyanan sa Department of Agriculture ug Governor Rolando Yebes. Sa maong dialogue maoy milutaw ang problema kabahin na sa abono kay nakita nga padayon nga nagsaka ang presyo niini.

Ilawom sa kasamtangan karong administrasyon sa ZaNorte ang mga munisipyo nga mosalmot sa pagpahigayon sa tinuig nga Hudyaka Festival kada Hunyo ang gihatagan sa gobernador ug tag usa ka milyon ka pesos nga financial assistance diin ang munisipyo maoy magbuot unsa nga proyekto ang gusto niyang gastuhan sa maong pundo. Karong tuiga sibo sa iyang programa nga panginabuhian sa katawhan maoy hatagan sa unang pagtagad maoy gusto niya nga ang maong financial assistance gamiton sa mga munisipyo diha sa pagpalit ug abono para makalugway sila ug ayuda sa ilang mga mag-uuma sa tuyo nga mapalambo ang ilang production aron sa pagtubag sa nagtubong demand karon sa pagkaun sa ubang mga lalawigan sa Visayas ug Luzon.

Matud pa ni Governor Yebes mamahimo nga ang financial assistance sa tanang lungsod usahon diha na sa pagpalit ug abono gikan mismo sa gawas sa nasud aron makabaratu kay ilawom sa Agriculture Fisheries Modernization Act ang pagpalit ug mga kagamitan sa agrikultura gikan sa gawas sa nasud exempted sa pagbayad ug buhis. Sumala pa niya karon mosugot siya nga mopalit ang mo-import ang mga mayors ug abono gikan sa gawas sa nasud apan maoy iyang gusto nga sa lahutay mosagup gayud ang mga lungsod diha sa pagamit ug organic fertilizer nga giproduce karon sa kagamhanang probinsiyal.

Kabahin sa pagbatun ug farm tractor kada lungsod sa ZaNorte, matud pa ni Governor Yebes sa ilang pasiunang panag-istorya ni Agriculture Secretary Arthur Yap kini misugot na nga mohatag ang ilang departamento sa gikinahanglang pundo para sa pagpalit sa maong ekipo.

Apan maoy gusto ni Secretary Yap nga mohatag sa katunga sa presyo sa tractor ang lungsod kay ang ilang buhatan igo rang moabaga sa katunga sa presyo niini. Sa kasamtangan ang presyo karon sa usa ka traktura anaa sa P2.5 milyones ka pesos.

Matud pa ni Governor Yebes gipasaligan siya ni Secretary Yap nga kon ang counterpart sa lungsod nga pundo andam na ang P1.250M gikan sa agrikul-tura idownload gilayon para sa pagpalit sa maong ekipo. (Press Freedom, Vol. XX No. 19)

Gov. Yebes miduyog sa ‘noise barrage’

Governor Rolando Yebes miduyog sa panawagan sa Diosesis sa Dipolog alang sa pagahimoon nga ‘noise barrage’ isip maoy timaan sa iyang hugot nga pagsuporta sa lihok protesta batok sa nagpanghitabong ‘corruption’ sa atong nasud, apan dili pasabot nga apil siya sa panawagan nga “Gloria resign” atubangan sa ZTE Broadband scandal. Sa interview sa mga membro sa Zamboanga del Norte United Correspon-dents kon ZNUC, si Governor Yebes mipahayag nga ang gipagawas nga ‘expose’ ni Jun Lozada kabahin sa anomalosong transaksiyon sa National Broadband Network dili mokonektar sa ‘first family’ ilabi na kang Presidente Gloria Macapagal-Arroyo.

Alang sa gobernador, hangtud karon wala pay mga dokumento nga makapa-matuod nga nalambigit sa gikatahong ‘kick back’ sa ZTE scandal ang unang pamilya. Apan tungod ug alang sa maayong panggobiyerno, pabor si Governor Yebes nga kinahanglan tugkaron kon tinuod ba gayud nga dunay nahitabong ‘corruption’ ang maong transaksiyon. “Kinadak-ang problema sa atung nasud mao ang corruption,” angkon pa sa gobernador. “Ang ako ang general principle nga to stop the anomalies in the government and corruption ug moagi unta ug hustong proseso nga legal, dili pinaagi sa proseso nga yama-yama lamang sa mga elitesta.”

Iyang gipanghinaut nga mamalandong ang mga katawhan niining mitumaw nga kaguliyang ug dili dayon magpadala sa emosyon ug kinahanglan lantawon ug maayo unsay mga dokumento ug ebidensiya kon tinuod ba gayud ang gipanulte ni Lozada. Matud niya samtang didto siya sa Manila, telivision lamang makita nga anaa ang demonstrasyon. “Ang nagpadako ani kana ramang mga TV stations.” Alang kaniya lisod kaayo nga mausob ang atong panggobiyerno pinaagi sa pagbansili ug lider nga wala pa matugkad ang lingtunganay sa tinuod nga hitabo. Kabahin sa gisugyot nga ‘snap election’, para sa gobernador ang gobiyerno mogasto ug dakong salapi sulod lamang sa duha ka tuig tungod kay sa pagka dos mil diyes ipahigayon na usab ang eleksiyon. “Mosamot ka ot-ot ang pilipinas kay sa matag eleksiyon ang gobiyerno mogasto ug binilyon ka pesos.”

Gipaklaro ni Governor Yebes nga ang iyang pagduyog sa ‘noise barrage’ sa Diosesis sa Dipolog wala magpunting sa usa ka tawo o kaha sa presidente kay kini mao lamang ang pagpa-hungaw sa gibati sa mga katawhan batok sa pagpa-ngawkaw ug salapi sa gobi-yerno nga dunay ‘realidad’ sa tinuod nga nagpanghitabo karon sa atong nasud. Gani gibutyag sa gobernador atol sa ilang panagtagbo sa Governor’s Legue didto sa Camarines Norte ug Cagayan de Oro City bag-ohay pa lamang, ilang nabati ang ‘wire tap secret conversation’ sa telepono tali nila ni Joey De Venicia ug Jun Lozada, wala maghisgot sa presidente ug sa first gentleman, kay ang ilang gihisgutan mao kon pila ang ilang masapi sa maong transaksiyon.

Si Governor Yebes sa iyang pagka batan-on nahimo usab nga aktibista ug student leader nagkanayon nga ang pagdayag sa mga katawhan diha sa pag-adtu sa kadalanan maoy usa sa mga proseso, apan nagade-pendi unsang matanga sa kawsa ang pagasalmotan. Niining nagpanghitabo karon sa atong nasud mga katawhan gipul-an na. Duha na ka people power apan wala gihapoy nakitang kausaban. “Unsa may mahitabo kon pananglitan mag-people power? Maka-tabang ba ang atong mga bag-ong opisyales?” Ma-tured na ang atong mga tawo karon.” Para sa gobernador dili siya motuo sa baruganan sa mga elitesta sa Manila kay nahitabo na sa panahon ni Cory Aquino ug Erap Estrada. “Unsa may nahitabo, sila ra maoy nangadato samtang ang atong katawhan nagapabiling pobre.” (The New Nandau, Vol. XVII No.33)

PGMA mimando sa DOTC:
Himoong Port Management Office ang pantalan sa Dapitan

GIKAN sa kasamtangan nga kahimtang karon nga Terminal Management Office ang pantalan sa Dapitan hayan makonberter na kini ngadto sa pagka Port Management Office nga dili na mag-agad sa iyang ope-rasyon ilalom sa pagdumala sa Port Management Office sa Cagayan De Oro.

Sa pinaka-ulahing kalam-buan, sa gipatawag nga meeting ni Presidente Gloria Macapagal Arroyo ngadto sa mga kadagkuan sa probinsiya  pinaagi nila ni Governor Rolando Yebes, 1st District Congresswoman Cely Jalosjos-Carreon, 3rd District Congressman Cesar Jalosjos uban nila ni Dapitan City Mayor Dominador Jalosjos ug Salug Mayor Jesus Lim nahisgutan ang kabahin sa ilang gihangyo nga mamahimong Port Management Office ang maong pantalan. Gipahayag ni Governor Yebes nga misugot si Presidente Arroyo sa mao nilang hangyo.  Gimanduan gilayon sa presidente pinaagi sa pagtawag niini ngadto kang Secretary Mendoza sa Department of Transportation and Communication (DOTC) alang sa pagluwat ug order ngadto kang manager Sevilla sa PMO-Cagayan aron aprobahan ang pag-konberter niini sa pantalan sa Dapitan gikan sa terminal management office ngadto sa pagka-Port Management Office.

Alang kang Governor Yebes nga pabor na unya kini alang sa tibook probinsiya sa Zamboanga del Norte kung mahimo nang PMO ang pantalan sa Dapitan tungod kay dili na kini mag-agad sa PMO-Cagayan sa iyang operasyon. Aduna na siyay kaugalingong pundo matag tuig. Nakita nga hinay ang paglambo sa maong pantalan tungod sa kasamtangan niining kahimtang. Gusto ni Presidente Arroyo nga malihok gilayon ang mga papel aron madali ang pag-konberter sa maong pantalan. Gipaabot usab ni Governor Yebes ngadto kang Presidente Arroyo ang gikinahanglan nga passenger terminal building sulod sa pantalan sa Dapitan. Gikalipay sa presidente sa dihang iyang nasayran nga aduna nay siyam ka mga roll-on roll-off ug tulo ka depasaheruan nga barko paingon sa Manila ang mogamit sa maong pantalan. Nasurprisa niini ang presidente tungod kay basi sa report sa Philippine Ports Authority ang pantalan sa Dapitan hinay ang paglambo niini kung itandi sa ubang mga Puerto. Nasayran nga mokantidad sa 50 milyones pesos ang gi-proposed nga passenger terminal building ang tukoron sulod sa pantalan sa Dapitan.

Sa samang bahin, tungod sa nakita karon nga paglambo sa Zamboanga del Norte pinaagi sa turismo gipasalig usab ni Secretary Mondoza nga mohatag ang DOTC ug Instrument Landing System (ILS) nga anha ibutang sa Dipolog City Airport. Ang ILS usa ka kahimanan aron mamahimong tugpahan ug abyon ang airport bisan panahon sa kagabhion. (The New Nandau, Vol. XVII No.33)

 

Pagpatay sa 2 ka batan-on sa Dapitan, nasulbad na

Upat ka mga suspetsado sa kasong pagpatay ang gipasakaan karon ug kasong ‘double homicide with robbery’ sa Dapitan PNP human ma-establisar sa gihimong makuting imbes-tigasyon sa kapolisan ug NBI Sub-Office dinhi sa Dipolog ang motibo sa krimen.

Ang mga suspetsado nga gipasakaan karon ug ‘double homicide with robbery’ giila nga sila si Ronald “Tonton” Fuentez, Regie Dela Cruz, Wengweng Cartajena ug Vincent Dalman. Ang mga suspetsado maoy gitumbok sa mga testigos nga ulahing nakit-an isip katapusang costumer sa Secret Vedio K Bar sa dakbayan sa Dapitan diin pagka-ugma nakapalagan nalang patay ang duha ka mga batan-on nga naglunang na sa ilang kaugalingong dugo. Ang mga biktima polus nakaangkon ug samad pinusilan sa ilang ulo nga maoy hinungdan sa ilang hinanaling kamatayon.

Si Police Chief Inspector Glen Dulawan, Chief of Police sa Dapitan Police Station namahayag nga ang maong kaso ila nang gipasaka sa piskaliya niadtung Martes sa udto human magkatakdo ang resulta sa ilang imbestigasyon sa gihimo usab nga linaing imbestigasyon sa National Bureau of Investigation Sub-Office dinhi sa Dipolog. Matud pa ni Chief of Police Dulawan, ang kasulbaran sa kaso maoy joint effort sa Dapitan PNP ug NBI nga nagpahigayon ug makuting imbestigasyon sa maong krimen.

Gitotokan sa kapolisan ug NBI ang nag-unang motibo sa krimen ug maoy ilang na-establisar ang nahitabo nga pagtulis sa maong Video K Bar diin usa sa biktima nga maoy cashier sa maong establishemento nakuhaan ug kuwarta nga mosubra ug sayes mil ka pesos nga gituhoang gidala sa mga suspetsado. Matud ni Police Chief Inspector Dulawan, wala na silay laing anggulo sa krimen gawas sa nahitabo nga pagpanulis ayha gipatay ang mga biktima.

Warrant of arrest nalang nga pagaluwatan sa korte ang gihulat sa kapolisan ayha nila ipahigayon ang pagsikop sa mga mamumuno. (The New Nandau, Vol. XVII No.33)

 

Dredging project sa NIA dugay ra gipangayuan ug
exemption sa moratorium sa Layawan river –OPA

Giklaro karon sa Office of the Provincial Attorney sa Zamboanga del Norte nga niadto pang unang bahin sa Enero 2008 gipangayo sa probinsya gikan sa Mines and Geosciences Bureau sa DENR nga mahimong ‘exempted’ sa gipatigbabaw nga moratorium sa Layawan River ang dredging projects sa irrigation dams sa National Irrigation Administration subay sa maong suba.

Kini ang unod sa tubag nga gipadangat ni Provincial Atty. Jes Gal Sarmiento, Jr. ngadto sa Dipolog Polanco Irrigators Association atubangan sa gipanday nilang resolusyon niadtung Pebrero 16, 2008 nga naghangyo sa kagamhanang probinsyal pinaagi kang Governor Rolando Yebes nga dili ilabot sa gipatigbabaw karong moratorium sa pagkuha sa balas ug graba sa Layawan River ang nabara nilang irrigation dams.

Si Atty. Sarmiento sa iyang giluwatang tubag miklaro nga niadto pang Enero 16, 2008 ang iyang buhatan nagpadala ug suwat ngadto kang Director Jessica Lucero sa Mines and Geosciences Bureau ug Director Alan de Gala sa Environmental Management Bureau nga naghangyo nga hatagan ug pabor ang application sa National Irrigation Administration nga ma-exempted sa moratorium diha na sa pagkuha sa balas ug graba lakip na sa pagtransportar niini subay sa Layawan River. Angay masayran ang kagamhanang lokal sa Dipolog maoy giduol sa irrigators association ug gidasonan usab sa National Irrigaton Administration nga maoy mopahigayon sa dredging project sa irrigation dams sa suba sa Layawan ilawom sa kondisyon nga ang makuha nga materyales mahimong magamit sa Dipolog diha sa nagkadaiya niining mga proyekto.

Matud pa ni Atty. Sarmiento ang pagpangayo nila ug exemption gipasikad sa dakung panginahanglan nga mapadali ug mapasutoy ang pagrposesso sa NIA sa ilang application. Ang nasangpit nga exemption makatabang usab ug dako alang sa atong mga mag-uuma nga nagsalig sa tubig gikan sa irigasyon nga ilang gikuha sa suba subay sa Layawan. Niadtung Pebrero 16, 2008 ang Dipolog Polanco Irrigators Association mipa-sar ug resolusyon nga nag-hangyo sa gobernador alang na sa paglugway ug exemp-tion sa pagahimoong dred-ging sa ilang irrigation dams gikan sa gipatigbabaw nga moratorium sa Layawan River.

Gipasabot sa mga irri-gators nga ang pagahimoong dredging sa ilang irrigation dams maglangkob na sa gitas-on nga usa ka kilometro sa ibabaw nga bahin ug laing usa ka kilometro sa ubos nga bahin sa ilang irrigation dam. Ang dredging gikina-hanglan na gayud tungod sa napundo karong balas ug yuta hinungdan nga mitipas na ang agus sa tubig nga naka-apektar sa pagpabuhagay ug tubig paingon sa ilang irrigation canal. Matud sa assosasyon kon magapabilin kini nga dili makuha ang nakabara nga mga materyales hayan maapektohan usab ang pagtanum sa mga mag-uuma nga nagsalig sa tubig sa maong irrigasyon ug hayan maapektohan ang seguridad sa pagkaon sa atong mga katawhan.

Aron sa pagpakita sa gihimong aksiyon ang probinsya, gipataban mismo ni Atty. Sarmiento ang ilang suwat hangyo nga unang gipadangat ngadto sa direc-tors sa Bureau of Mines ug Environmental Management Bureau sa DENR niadtung bulan sa Enero. (The New Nandau, Vol. XVII No.33)

 

PCI Maclang gi-instalar isip COP-Pagadian
Local Media nanghinaut dili mahisama sa Dipolog

NANGHINAOT karon ug dako ang mga sakop sa local media sa dakbayan sa Pagadian nga dili sila mahisama dinhi dakbayan sa Dipolog nga nakatagamtam kaniadto sa mabangis nga palisiya ni Police Chief Reynaldo Maclang sa dihang kini pa ang hepe sa kapolisan dinhi sa Dipolog. Kini maoy gipabati sa mga sakop sa local media sa maong dakbayan subay na sa pag-instalar kang Maclang pagka Chief of Police sa Pagadian City niadtong Pebrero 18, 2008.

Ang paglingkod ni Maclang pagka hepe sa Pagadian PNP maoy pagtugot ni Mayor Sammy Co. Apan nasayran gikan sa kasaligang tinubdan nga matod pa pugsanon nga gihangyo ni Mayor Evelyn Uy ang mayor sa Pagadian nga si Maclang maoy ipuli nga chief of police sa maong dakbayan. Gidugang sa tinubdan nga si Mayor Co ang ig-agaw kini ni kanhi Mayor Berto Uy nga gituhuan nga matod pa apil sa mihangyo kang Mayor Co alang kang Maclang. Angayang masayran nga human napalagpot si Maclang pagka hepe sa kapolisan dinhi sa Dipolog kini ang gibutang nga floating status sa kampo sa Provincial Command nga anaa sa barangay Sicayab. Wala magdugay kini ang gilabay na usab ngadto sa rehiyonal nga buhatan sa Zamboanga.

Sa nahitabong pinusilay sa Sibuco karong bag-o si Maclang maoy nagsilbing team leader sa gipadala nga Regional Mobile Group ngadto sa maong lungsod ayha pa kini napunta sa Pagadian City. Sa paglingkod karon ni Maclang pagka-hepe sa kapolisan sa Pagadian, na-intriga pag-ayo ang mga local media sa maong dakbayan nga wala nila damha nga kini maoy mamahimong chief of police tungod kay wala kini mahi-apil sa mga pangalan nga gihugon-hugon nga mamahimong hepe. Ang ubang mga sakop sa local media sa Pagadian ang nasayod na sa nahitabong kaguliyang dinhi sa Dipolog sa dihang hepe pa kini sa atong kapolisan si Maclang hinungdan nga wala sila makapugong pagsukit-sukit ug pangutana ngadto sa miyembro sa ZNUC nga ilang nahimamat atul sa gihimong RDC meeting niadtong mi-aging adlaw. Sila mismo nasayod sa nahitabong pagsumbag ni Maclang kang Broadcaster Joseph Herrera.

Gipabati sa mga local media sa Pagadian ang ilang panghinaot nga dili sila mahisama sa nahitabo dinhi sa Dipolog ilalom sa mga kamot ni Maclang. (The New Nandau, Vol. XVII No.33)

 

Gov. Yebes midasig sa bag-ong chairperson sa
RDC ipadayon ang iyang nasugdang kalamboan

MIPABATI sa iyang da-kong pagpasalamat si Gov-ernor Rolando Yebes ngadto sa  naglangkub sa Regional Development Council (RDC) sa gipakita niining kooperasyon ug panaghiusa sulod sa tulo ka tuig sa dihang siya pa ang chairman sa RDC. Uban sa pagdasig sa bag-ong chairperson niini nga ipadayon ang kalambuan sa tibook rehiyon. Kini ang iyang gipabati atul sa gipahigayon nga Joint RDC ug Regional Peace and Order Council Meeting didto sa Pagadian niadtong Pebrero 18, 2008.

Sa mensahe ni Governor Yebes, iyang gipahayag nga sulod sa tulo ka tuig niya nga pagkupot sa maong posisyon iyang nakita ang panaghiusa sa mga regional directors, Local Government Unit, Chief of Offices ug Private Sector sa tibook rehiyon 9. Nahimo ang daghanang kaayohan. Ang RDC-9 ang nabutang sa mapa sa kalam-buan sa nasud hinungdan nga ang mga programa ni Presidente Gloria Macapa-gal Arroyo ang nagatotok dinhi sa atong rehiyon. “Thank you for your cooperation and unity sulod sa tulo ka tuig”, nagkanayon ang gobernador. Gidugang ni Governor Yebes nga ang bag-ong chairperson karon sa RDC nga si Governor Auring Cerilles sa Zamboanga Del Sur ang dili bag-o sa public service. Siya ang nanghinaot nga ang gihatag nga kooperasyon  ug panaghi-usa sa nakalabay nga tulo ka tuig mao usab kini ang ipakita sa mga miyembro sa maong konseho ngadto kang Governor Cerilles. Iyang gidasig ang bag-ong pangulo sa RDC nga ipadayon ang maayong panglantaw ug ipakita sa nasud nga ang rehiyon 9  maoy paglaum sa nasudnong kagamhanan. Mas magmalambuon pa sama sa paglambo sa ubang rehiyon pinaagi sa tabang sa presidente sa nasud.

Mapasalamaton ug dako si Governor Yebes sa higayon nga gihatag ug pagsalig sa mga miyembro sa konseho ngadto kaniya pagsulbad sa mga problema alang sa kalambuan sa tibook region 9. (The New Nandau, Vol. XVII No.33)

 

Mga negosyante posibling maapektuhan sa itukod nga Brgy. Bagsakan

Sindangan, ZN - Posibling naapektuhan ang mga namaligya diha sulod sa merkado publiko sa lungsod sa Sindangan kung mahinayon ang pagtukod sa Barangay Bagsakan diha sa Brgy. Guleo na naasoy’ng lungsod. Mao kini ang nakuha nga inpormasyon gikan ni Rodavarg T. Gravador ang Brgy Transaction Officer sa LGU Sindangan suma pa nga posibling maapektuhan ang namaligya diha sa merkado publiko tungod kay didto na mopalit ang mga konsumante sa Brgy Bagsakan ug posibling magkahinay ang dagan sa ilang negosyo niini.

Matag adlaw ang Brgy Bagsakan ang mag-operate kini  tungod kay aduna nay kaplastaran sa mga produkto gikan sa mga-uuma ug posibling one stop shop ang makita sa mga konsumante sa ilang mga palitunon diha sulod sa Brgy. Bagsakan. Dugan pa ni Gravador nga diha sa Brgy Guleo kasamtasang gipahimutang ang  Murio-murio kon tabu matag Domingo diin didto magkatapok ang mga mag-uuma dala sa nagkadaiyang produkto gikan sa hilit-hilit nga mga barangay ug mga lungsod ug didto itumod sa ilang produkto 

Kahibaluan nga ang bag-ong proyekto sa DA kabag-ohay lang gilusad kini didto sa lungsod sa Ipil Zamboanga Sibugay ug kompleto nadawat sa naasoy’ng lungsod ang gipanghatag nga mga pasilidad sama sa cold storage, chiller, chest freezer, timbangan, plastic crates ug uban pa. Suma pa ni Gravador  nga interesado nga moangkon ang ilang lungsod sa maong proyekto gikan sa DA tungod kay usa kini ka sinyales nga malambo ilabina nga ang industriya sa agrikultura sulod sa ilang lungsod ug mapaila usab kini sa mga katawhan dinhi sa Zanorte. (Southpoint, Vol.1No.8)

 

Magtext, buhisan na?
Rey Anthony Chui, PIA reprint

KONG ganahan ka'ng magsige og text, hala cge padayon samtang makaya pa. Kay kon matuman ang laraw sa kagamhanan, dili na halayo ang adlaw nga sa matag text message nga imong ipadala, pagabuhisan ka na. Kasamtangang gitun-an karon sa kagamhanan ang pagpataw og dugang pang buhis, ilabi na sa texting ilabi na kon kini makapugong sa bisyo ug walay hinungdang kalihokan sa katawhan.

Kahinumduman nga una na nga misugyot ang Philippine Chamber of Commerce and Industry (PCCI) sa pagpataw sa dugang buhis sa ilimnong makahubog, sigarilyo o tabako ug sa short messaging system (SMS o texting). Matud sa kahugpungan sa mga negosyante, ang kita niini idugang sa katakus sa kagamhanan nga paga-anon ug kubsan ang epekto sa taas nga presyo sa lana.

Mibutyag usab si Trade and Industry Secretary Peter Favila nga suportahan sa kagamhanan ang laraw sa pagpataw pa og dugang buhis aron dugang pang kapun-an ang katakus niini sa pagtukod og mga obras publikas alang sa iyang katawhan. Ang pahayag ni Favila migawas human una nga gisugyot ang pagtangtang una sa EVAT aron kubsan ang kalisod nga dala sa mahal nga presyo sa lana.

Kini nga sugyot gibatokan sa mga ekonomista sanglit kapin sa P54B ang mawala sa matag pagsuspinde sa EVAT. Matud sa Malakanyang, ang ilimnong makahubog ug ang panigarilyo simple nga bisyo ug mahimong kabuhisan samtang ang laraw sa pagpabuhis sa text mahimong magpugong sa katawhan sa pagpadala og mga walay hinungdang mga mensahe ug libak nga makabungkag na hinuon sa maayong relasyon. (PIA)

 

Capillariasis nikaylap 10 ka lungsod sa ZaNorte

Ang National Epidemiology Center (NEC) sa Department Of Health, mihimo na karon og makuting imbestigasyon may kalabutan na sa sakit nga capillariasis nga mitakboy sa napu ka mga lungsod palibot ning lalawigan sa Zamboanga del Norte lakip na ang dakbayan sa Dipolog.

Suma pa  nga ang napu ka mga lungsod nga positibo sa capillaria mao ang Pinan, Polanco, Katipunan, Roxas, Manukan, Jose Dalman, Siayan, Sindangan, Sergio Osmena, Rizal ug ang dakbayan sa Dipolog. Gikahibaloan nga ang naasoyng mga dapit ang gihimoan na kini’g pasiunang imbestigasyon ug treatment sa maong kasong capillariasis. Nasayran gikan na ni Dra. Carmencita P. Icao, Provincial Health Officer Integrated Provincial Hospital nga kaniadtong tuig 2007 sa lungsod sa Polanco, adunay 22 ka mga biktima sa sakit nga capillariasis ug duha kabuok karong bulan sa Pebrero ning tuiga.

Didto sa lungsod sa Jose Dalman partikular na sa barangay Balatakan, 124 ka mga biktima ang natakbuyan  sa maong sakit sa bulan sa Enero 2008 ug laing 48 ka mga tawo ang positibo usab sa sakit nga capillariasis karong bulan sa Pebrero ning tuiga samtang laing taga-barangay Lumaping, Jose Dalman ang matud pa adunay duha ka mga biktima niini kaniadtong nakalabay’ng semana nga daling gidala sa Manukan Community Hospital tungod kay na-dehydrate na usab kini diin, nasuta usab sa medical team nga nagdala sa mga biktima sa maong tambalanan nga adunay 10 anyos nga batang lalaki ang namatay sa capillaria mga minutos ang nakalabay sa wala pa sila nahidangat sa Manukan Community Hospital.

Karong semanaha, ang buhatan sa maayong panglawas ning lalawigan nilangkoban sa National Epidemiology Center ug pipila pa niining  team ang padayong mi-imbestigar, mass stool examination, mihatag og health education,treatment sa barangay Balatakan ug Lumaping, Jose Dalman. Subay niini, usa ka exit conference ang pagahimoon sa kagamhang probinsyal sa pamunoan ni Gov. Rolando E. Yebes, rehiyonal ug uban pang mga ahensya aron mahisgutan, mahatagan og kasulbaran ang problema sa capillariasis ning probinsya sa Zamboanga del Norte. (Southpoint, Vol.1No.8)

 

Security threats sa Sibuco gitutukan,
pag-deploy sa mga pulis gihangyo ni EdDing

ANG pag-deploy ug usa ka platoon sa mga pulis alang sa lungsod sa Sibuco, Zamboanga del Norte maoy hangyo ni Mayor Norbe Edding nga iyang gipadangat atul sa gipahigayon nga joint Regional Development Council ug Regional Peace and Order Council Meeting didto sa dakbayan sa Pagadian niadtong February 18, 2008.

Gi-presentar ni Mayor Edding atul sa maong RDC ug RPOC meeting ang nahitabo sa ilang lungsod niadtong Enero 30, 2008 nga maoy nakapatandog sa ilang seguridad sa dihang nahitabo ang pinusilay tali na sa giilang mga miyembro sa criminal syndicate ug sa Sibuco PNP didto sa barangay Lakiki. Iyang gihatagan ug gibug-aton nga kung dili gayud hatagan sa igong pagtagad ang problema sa ilang lungsod batok na sa grupo ni kumander Mulong nga gika-engkuwentro sa mga pulis makakuha kini ug simpatiya sa MILF ug mas mokuyanap pa ang problema sa tibook Zamboanga Peninsula.

Giklaro ni Mayor Edding nga usa ka lihitimo nga pulis operation ang sinugdanan sa maong hitabo nga e-serbe unta ang warrant of arrest batok sa pito ka mga tawo sa pagpanguna sa usa ka kumander mulong, apan kalit lamang gipa-ulanan ug mga bala ang grupo sa mga pulis. Nahimong problema usab karon ang gihangyo nga augmentation gikan sa militar tungod kay matod pa maka-apekto kini sa peace negotiation  tali sa gobyerno ug sa MILF.

Una nang gihangyo ni Mayor Edding si Police Provincial Director Mario Yanga alang sa dugang pulis para sa lungsod sa Sibuco. Mahimong aprobahan unta ni Police Regional Director Jaime Caringal apan kinahanglan nga mo-coordinate ngadto sa AFP Western Mindanao Command tungod kay nalambigit niini ang peace negotiation sa MILF. Nagtuo ug nanghinaot si Mayor Edding nga mopaluyo unta ang militar sa mga pulis pagsulbad sa problema. Hugtanon nga gihangyo ni Mayor Edding si Deputy Police Sr. Superintendent Soledad nga maoy nag-representar kang Director Caringal sa maong meeting alang sa dinalian nga action sa gihangyo niini nga pag-dispatch ug usa ka platoon sa Regional Mobile Group alang sa Sibuco ug e-establisar usab ang Community Polis Action Center (COMPAC)

Gipahayag ni Police Senior Superintendent Soledad nga sulod ning bulan sa Pebrero adunay augmentation nga ipadala ang PNP alang sa Sibuco, apan alang kang Governor Rolando Yebes nga dili mahimong maghulat ug dugay ang mga katawhan sa maong lungsod. Iyang gihangyo ang PNP ug militar sa pagsanong sa hangyo ni Mayor Edding sa mas sayo nga panahon. Mas maayo nga sulod lamang sa usa ka semana adunay augmentation force ang ipadala ngadto sa lungsod sa Sibuco. (Southpoint, Vol.1No.8)

 

Diarrhea nag-unang sakit sa mga pasyente sa Probinsyal Hospital

Diarrhea kon kalibanga ang nag-unang nahitala nga sagad maoy gibati sa mga pasyenteng nahilandig sa tanang tambalanan palibot ning lalawigan sa Zamboanga del Norte. Mao kini ang nasayran gikan na ni Dra. Carmencita P. Icao, Provincial Health Officer sa Integrated Provincial Hospital base sa accomplishment report nga nahimo niini sa maong buhatan sa tibuok  tuig 2007.

Matud pa ni Dra. Icao nga sa ilang talaan adunay napulo ka mga nanag-unang sakit sa mga tawong nahilandig sa tanang tambalanan palibot ning probinsya diin, ang sakit nga diarrhea ang nag-una,ikaduha ang UTI kon Urinary Tract Infection, ikatulo ang Pneumonia, ikaupat ang samad/pangos,bun-og kon mga aksidente, misunod gilayon ang hubak, URTI, gastritis, high blood, dengue ug ang ikanapulo mao ang sakit nga ameobiasis.  Sa samang bahin adunay napulo usab  ka mga nanag-unang sakit sa mga pasyenteng nagpa-konsulta sa tanang tambalanan ning probinsya, nag-una ang Respiratory Tract Infection, samad/bun-og, hubak, UTI, pagtaas sa dugo kon hypertension, diarrhea, gastritis, pneumonia, peptic ulcer ug ang katapusan mao ang tonsillitis.

Diin, kaniadtong nakalabay’ng  tuig 2007 mokabat sa singko-mil ka mga pasyente ang nahitala nga nahilandig sa tanang tambalanan palibot ning lalawigan samtang 9 mil usab ka mga pasyente ang nagpa-konsulta lamang sa mga tambalanan nga may gibating respiratory tract infection. Hinuon, subay niini ang buhatan sa IPHO ang sa kanunay nag-awhag sa tanang ahensya sa maayong panglawas, mga kalungsoran ug mga kabarangayan palibot ning lalawigan sa Zamboanga del Norte ang mihimo na ug aksyon aron malikayan na unya  ang maong mga sakit nga sagad daling motakboy sa lawas sa tawo. (Southpoint, Vol.1No.8)

 

Most wanted sa Salug, napusilan, arestado!

Kritikal ang kondisyon sa kinabuhi sa usa ka lalaki nga gidala sa mga elemento sa Salug PNP human mapusilan ang suspetsado sa dihang dakpon unta sa ilang panimalay didto sa lungsod sa Salug. Sa exclusibong nahipos nga report ning pamantalaan, giila ang biktima nga si Andy Danggod, 32 anyos minyo taga Brgy. Pocay sa lungsod sa Salug ning lalawigan.

Sigon sa report si Danggod naka-angkon kini sa tulo ka mga gun shot wounds sa may kilid nga bahin sa iyang tiyan, dapi-dapi sa likod nga bahin sa iyang lawas sa dihang gipusil kini sa mga miarestong mga pulis sa Salug. Human gikaaligar, midagan sa dihang dakpon unta didto sa ilang panimalay sa Brgy. Pocay lungsod sa Salug mga alas 3:30 sa kadlawon niadtong Pebrero 21.

Human sa insidente si Danggod nga duna pay kinabuhi ang gi-rescue usab sa team sa kapulisan ug gisakay sa ambulansya ug gidala sa tambalanang probinsyal nga kritikal ang kahimtang tungod sa tulo ka mga samad nga na-angkon niini. Sa nasayran nga si Danggod dugay nang gipangita sa otoridad sa lungsod sa Salug, human maglayas-layas tungod sa gikalambigitang kasong pagpangluba sa iyang silingan niadtong eleksyon sa Mayo tuig 2007.

Samtang, ang kabanay sa biktima nga si Medelina Danggod ang nangayo’g medical assistance sa Community Development Assistance Unit kon CDAU para sa pagsalbar sa kinabuhi niini. (Southpoint, Vol.1No.8)

 

 

 

 

NOTE: SEND US YOUR NEWS.  Tell us what's going on in your barangays, clubs, schools, businesses and non profit organization. You can also send notices and announcements.
          

 

    Email to webmaster@dipolognon.com

      
Google
WEB THE DAILY DIPOLOGNON