2

FEBRUARY 14,  2008

 

Lima ka dolphin nakuha sa kubkuban, 2 patay

Gibatig kaluoy ug kasayang ang katawhan kinsa nakasaksi sa gidalang duha ka mga patay nga dolphins sa mga kawani sa Bureau of Fisheries and Aquatic Resources didto atubangan sa Kapitolyo Probinsyal kaniadtong Huwebes, Pebrero 7. Matud pa ni BFAR Provincial Fishery Officer Engr. Joseph Florig, Sr. nga ang maong dolphins ang aksidente kining nakuha sa pukot sa kubkuban nga gipanag-iyahan sa Dipolog School of Fisheries didto sa barangay Olingan.

Sa dihang usa sa mga residente sa nasangpit nga dapit ang mikontak kanila ug nagpahibalo nga adunay nakuhang dolphins midali gilayon pagresponde ang team sa BFAR ning lalawigan didto sa maong dapit.  Gipamahayag ni Engr. Florig nga sa dihang nahidangat sila sa nasangpit nga lugar nahingangha sila nga adunay lima ka mga dolphins ang nasikop sa pukot sa maong kubkuban apan gidali gilayon pagbuhi ang tulo niini gumikan sa pagkahibawo nga buhi pa kini samtang ang duha ang wala kini swerte nga nakabsan na sa ilang kinabuhi.

Naglunang na lamang sa ilang kaugalingong dugo ang duha ka patay nga dolphin human na aksidente kining nakuha sa pukot sa kubkuban sa DSF nga gidala sa Kapitolyo Huwebes sa buntag.

Subay sa pagkahibawo sa hepe sa buhatan sa BFAR nga ang kagamhanang probinsyal karon ubos sa pagpangulo ni Governor Rolando Yebes ang aduna kini gimugna nga Task Force diha na sa pagproteher sa mga endangered species mao nga gidali gilayon pagdala sa maong hepe ang duha ka patay nga dolphins didto sa Kapitolyo Probinsyal aron mahimoan kini sa saktong aksyon.  Ang maong duha ka dolphins ang aduna kini gibana banang mokapin usa ka metro ang gitas-on ug 1 ka tiil ang gilapdon.

Sa pagkakaron ang maong duha ka patay nga dolphin ang gilubong na kini sa mga kawani sa kagamhanang probinsyal. Atubangan niining maong hitabo subling mipahimangno si Engr. Florig sa katawhan ning lalawigan nga ang pagdakop sa mga dolphins ug susamang endangered species ang dako kini nga salaod nga nagdala ug dakong multa.

Mamahimong makasuhan ang usa ka indibidwal nga manikop ug mamaligya sa maong klase sa hayop ug sa panahon nga makonbikto kini pwede kining mabilanggo sulod sa unom hangtud na sa 12 ka tuig ug mapahamtangan sa multang salapi nga nagkantidad usa ka gatos ka libo ka pesos. (Southpoint, Vol.1No.5)

 

Mga wanted nga suspetsado sa Polanco, PIÑAN ARESTADO na

Duha ka suspetsado sa lungsod sa Polanco ug usa usab ka suspetsado didto sa lungsod sa Piñan ning lalawigan ang malampuson kining nasikop sa mga otoridad human mapanaug sa korte ang warrant of arrest alang kanila, karong bag-uhay pa lang. Ang duruha giila sa pangalang Lorenzo Tubat, 53 anyos ug si Fermin Melorin, 46 anyos, parehong mga minyo ug nagpuyo usab sa Barangay San Antonio sakop sa lungsod sa Polanco ning lalawigan.

Si Tubat nag-atubang kini sa kasong Attempted Homicide nga nagdala sa criminal case numero 3049.  Diin ang maong warrant of arrest, giisyu kini ni Honorable Judge Deborah Garcia Nazario sa MTC- Polanco ug adunay piyansa nga girekomendar sa korte nga mobalor sa 12 mil ka pesos. Samtang si Melorin nag-atubang kini sa kasong Oral Defamation nga nagdala sa criminal case numero 2902.  Diin ang maong warrant of arrest giisyu kini ni Honorable Judge Pio Velasco sa MTC sa mao gihapong lungsod ug adunay piyansa usab nga girekomendar sa korte nga mobalor sa 6 mil ka pesos.

Ang giaresto usab sa lungsod sa Piñan giila kini sa pangalang Ester Sagain, 40 anyos, minyo ug nagpuyo sa may Barangay Lapu-Lapu sa naasoy’ng lungsod. Nag-atubang sa kasong qualified theft si Sagain nga nagdala sa criminal case numero 14995 ug 14996. Diin usab ang maong warrant of arrest giisyu kini ni Honorable Judge Hipolito Bael Jr.  Ug adunay piyansa nga girekomendar sa korte nga mobalor sa 24 mil ka pesos alang na sa iyang temporaryong kagawasan. Ang tulo ka mga suspetsado kasamtangan pa kining gitanggong sa bilangguan sa mga nasangpit nga lungsod alang na sa tukmang disposasyon.  (Pedmarc, Southpoint, Vol.1No.5)

  

Kagamhanang probinsyal nagdapit mga kabataan mosalmot
Biyaheng MusikahanMindanao Music Video Composition

Usa ka dakong kahigayonan alang sa mga kabatan-onan nga mahiligon sa awit ug musika, ang kagamhanang probinsyal sa Zamboanga del Norte nagadapit karon sa mga kabataan dinhi sa lalawigan nga molakip sa Biyaheng Musikahan – Mindanao Music Video Competition nga gipasiugdahan sa dakbayan sa Tagum. Kini ang pagahimoon atol sa pagsaulog sa Grand Musikahan sa Tagum karong umaabot Pebrero 28 niining tuiga.

Ang maong indigay naglangkub sa paghimo sa orihinal nga komposisyon sa awit ug pagpakita sa music video nga mag-indorso sa local tourism destinations sa matag syudad ug probinsya sulod sa Mindanao. Ang 5 minuter-music video presentation ang isubmiter kini kauban ang orihinal nga komposisyon sa awit sa dili pa moabot ang Pebrero 23, 2008 pinaagi na sa Musikahan Festival Secretariat sa City Tourism Office sa Tagum.

Angayang kahibaloan nga ang tumong sa pagpahigayon sa maong indigay mao ang paghatag bili sa musika pinaagi na sa mga talagsaong komposisyon sa mga musikero gikan dinhi sa Mindanao. Dugang pa ni Ms. Alma Uy, chairperson sa Musikahan 2008 nga gituyo nila pagmugna ang maong indigay pinaagi sa musika aron mas mapalambo pa ang mga tourism destinations sulod sa nagkalain laing parte sa isla sa Mindanao.

Ang mahimong champion unya sa maong music video presentation magpakadawat kini sa ganting salaping cash nga nagkantidad 50 mil ka pesos samtang ang makakuha sa second ug third prize makadawat kini sa ganting salapi nga nagkantidad 25 mil ug 10 mil ka pesos. Samtang aduna usab kini mga special awards nga ihatag alang na sa Best Composition ug Best Arrangement nga diin makakuha sa ganting salaping cash nga nagkantidad 10 mil ka pesos ug Best Live Performance nga makakuha usab sa 20 mil ka pesos salaping cash.

Alang unya sa mga interesadong mosalmot sa maong Music video competition mahimo kamong mobisita sa Provincial Tourism Office alang sa pagkuha sa dugang detalye o dili ba kaha hinoon mo-log-on sa www.tagumcity.gov.ph. (Southpoint, Vol.1No.5)

 

Bishop Manguiran gihagit pamatud-an ang isyu –Sanches

Andam nga molowat sa iyang katungdanan isip Provincial Veterinarian ug Special Deputy Provincial Agriculturist for 3rd district si Vicente Sanches Jr. kung mapamatud-an ni Bsihop Jose Manguiran ang iyang alegasyon nga matud pa niya adunay dakung panagatan ang Zanorte nga matud pa niya maoy nakaguba sa Marine Environment sa probinsiya.

Si Sanches namahayag sa interview sa ZNUC nga bisan gamay na lamang nga binigiw wala man gani yamo ang probinsiya labaw nang wala kini nagbaton ug usa ka dakung panagatan. Sa sayo pa atol sa santos nga mesa sa Obispo dinhi sa dakbayan sa Dipolog gipamahayag niini nga dunay dakung panagatan nga iya kuno sa Zanorte ug gi-alegar sa Obispo nga kini nakahatag ug kadaot sa atong marine environment.

“Kung mapamatud-an ni Bishop Manguiran ang iyang alegasyon andam kong mobiya sa akong katungdanan sa lokal nga pangagamhanan sa lalawigan” , pmahayag pa ni Sanches. Ang maong hagit ni Sanches iyang gitugpo ngadto sa Obispo aron usab matin-awan ang mga katawhan sa lalawigan may kalabot na sa maong alegasyon. Gipahayag ni Sanches nga daku ang iyang pagtoo nga biktima lamang si Bishop Manguiran sa iyang mga sayop nga impormante nga nagpataka ug tahu sa sayop nga impormasyon.

Gipaklaro ni Sanches nga dili mahitabo nga dunay butang o bisan unsa man nga matang sa kalihukan nga iya sa kagamhanang lokal sa Zanorte nga makahatag ug dili maayong ipikto sa atong kina-iyahan.  Gani mismo si Gov. Lando Yebes ang naningkamot gayud kutob sa iyang mahimo aron lamang kapanalipdan ang atong kina-iyahan, usa na niini ang pagmandu sa gobernador nga ipa-ilawom sa moratorium ang Layawan river tungod kay grabi na ang kadaot nga naangkon niini, lakip na usab ang inisyatibong gihimo sa amahan sa probinsiya ang implimentasyon sa Hi-green program nga nagpasanay sa mga nagkadaiyang matang sa tanum ug gipanghatag sa mga mag-uuma sa kabarangayan.

Sumala pa ni Sanches nga kung nagpangga sa atong kina-iyahan ang ubang sector sa atong katilingban, labaw  na ang atong amahan sa probinsiya tungod kay prayoridad sa iyang mga programa ug prinsipyo sa panggobyerno mao ang pagpangga sa atong kina-iyahan. (Southpoint, Vol.1No.5)

 

Probinsya mobubo 20M Tilapia fingerlings sa Brgy. Diwan

Mokabat sa 20 mil ka mga tilapia fingerlings ang ibubo karong adlawa sa mga tinugyanan sa Fishery Division sa buhatan sa agrikultura ngadto na sa Virginia River sakop sa barangay Diwan ning dakbayan sa Dipolog. Ang pagpasanay sa maong gidaghanon sa tilapia didto sa maong barangay maoy tipik sa nagapadayong fish seeding program sa Zanorte para sa mga kasubaan ug kasapaan aron mahi-uli ang naandang gidaghanon sa mga isda nga makatabang sa panginabuhi-an sa mga katawhan.

Gawas sa fish seeding mohimo usab ang mga tinugyanan sa Provincial Veterinary Office pinangulohan ni OIC Provincial Veterinarian Vic Sanches sa pagpangporga ug pagpamakuna sa mga nagdaiyang hayupan. Himoon na usab karong Biyernes ang susamang kalihukan sa nahisgutang buhatan didto sa lungsod sa Sergio Osmenia atol sa pagbisita ni Department of Agriculture Sec. Arthur Yap dinhi sa probinsiya ug gikatakda ang pagbisita niini didto sa maong lungsod ugmang adlawa.

Matud pa ni Sanches nga mokabat sa 30 mil ka mga tilapia fingerlings ang ilang ibobo ugmang adlawa sa kasubaan sa lungsod sa Sergio Osmenia. Ang maong mga programa maoy kanunay gipatuman sa gobernador sa Zanorte aron mahatagan ug dugang ayuda ang panginabuhi-an sa mga katawhan.

Sumala pa ni Snches nga iyang gi-awhagan ang mga katawhan diha sa kabarangayan nga mohimo sila ug mga communal pond aron buhi-an sa nagkadaiyang matang sa isda partikular na sa heto o catfish kay libreng ipanghatag ang fingerlings niini gikan sa fishery division sa  buhatan sa agrikultura. Kahinumduman nga karrong bag-o mismo si Gov. Lando Yebes ang nangunay sa pagbobo sa mga tilapia fingerlings sa mga kasubaan didto sa lungsod sa Sirawai ning lalawigan. (Southpoint, Vol.1No.5)

 

Katawhan sa Kalawit mapasalamaton sa TLC nga gipahigayon

Mipabati sa dakung pagpasalamat ang tanang mga katawhan kinsa mipahimulos sa gipahigayong Tabang ni Lando sa Communidad kon TLC Medical ug Dental Outreach Mission nga gipahigayon didto sa may Municipal Hall Ground, Barangay Poblacion sa lungsod sa Kalawit ning lalawigan, niadtong Miyerkules, Pebrero 6 ning tuiga.

Kini ang nasayran nga ang tanang mga lumulopyo sa naasoy’ng dapit ug sa mga kasilinganang dapit ang nalugwayan kini sa libreng konsultasyon, tuli, dental services ug libreng tambal nga gihimo sa mga kawani sa kagamhanang probinsyal ubos sa kasamtangang adminsitrasyon ni Governor Rolando Yebes pinaagi usab sa buhatan sa Provincial Health Office sa pagpangulo ni Dra. Carmencita Icao, ang Provincial Health Officer inabagan usab kini sa lokal nga buhatan sa Panglawas sa Kalawit ubos sa pagpangulo ni Mrs. Maricel B. Bermudo, ang Officer-Incharge sa naasoy’ng buhatan.  Diin nga ang maong kalihukan subay usab kini sa tinuig nga kasaulogan sa ilang Araw nga Kalawit.

Niini si Kalawit Mayor Eugencio Baliling Sr mapasalamatong mipadayag ngadto kang  Governor Yebes alang na sa kalampusan sa nasangpit nga Tabang ni Lando sa Communidad kon TLC Medical ug Dental Outreach Mission diin nakahatag kinig dakung tabang sa iyang mga katawhan. (Pedmarc, Southpoint, Vol.1No.5)

 

 

 

NOTE: SEND US YOUR NEWS.  Tell us what's going on in your barangays, clubs, schools, businesses and non profit organization. You can also send notices and announcements.
          

 

    Email to webmaster@dipolognon.com

      
Google
WEB THE DAILY DIPOLOGNON