2

FEBRUARY 8,  2008

 

193 has. apektado sa baha

Mokabat sa 193 ka ektaryang umahan ilabi na sa kamaisan ang naapektuhan sa nahitabong flash floods sa lungsod sa Polanco sa nakalabay’ng semana. Mao kini ang gibutyag ni Maybel Bustallino, Agricultural Specialist sa Office of the Provincial Agriculturist dungan sa pagpahibawo nga ang tanang mga apektadong mag-uuma sa nahitabong pagbaha pulos na gihatagan nila sa ayuda gikan sa kagamhanang probinsiyal.

Matud pa ni Bustallino sa naandan ang kagamhanang probinsiyal ilawom sa administrasyon karon ni Governor Rolando Yebes milugway ug libreng mga planting materials o seeds sa Open Pollinated Variety certified seeds sa mais nga maoy gipangita karon sa mga mag-uuma kay ang ilang hybrid karon mao man ang yellow corn. Sa samang bahin gibutyag ni Bustallino nga padayong miani ug suporta gikan sa atong mga mag-uuma ang paggamit sa organic fertilizer nga binuhat sa probinsiya. Sumala pa niya sa tuig 2006 mitala lamang kini dul-an sa P100 mil ka pesos nga income apan sa tuig 2007 mokapin sa P441,000 mil pesos ang nahimo niining kita.

Tungod sa maayong performance sa ilang organic fertilizer mixing plant giplanohan sa gobernador nga magbuhat ug laing planta para sa 1st ug 3rd districts. Matud pa ni Bustallino maoy ilang gitarget karon nga maka produce sila ug 30 tons per quarter sa organic fertilizer mixing plant. (Press Freedom, Vol. XX No. 16)

 

Wala ’mi labot pagpusil ni Rey Yap –Cebedo family

Hingpit nga gipanghimakak sa pamilyang Cebedo ang pagdulahig karon sa ilang pangalan sa nahitabong pagpusil patay kang kanhi Mayor Rey Yap sa Sapang Dalaga, Misamis Occidental didto sa Manila City Hall niadtong Enero 29, 2008.

Kini ang gipalanog ni Architect Prudencio Cebedo sa gipadangat niyang Letter to the Editor sa mga nasudnong pamantalaan. Giklaro ni Engr. Cebedo nga nakugang ang ilang pamilya pagkahibawo gikan sa media nga usa ka wala mailhing lalaki nga armado ang mipusil patay kang Rey Yap kanhi mayor sa Sapang Dalaga kinsa naghuwat sa pagtambong sa paghusay sa iyang kaso atubangan sa Regional Trial Court sa Manila City Hall.

Mismo ang ilang pamilya kusganong nanghimaraut sa maong hitabo ug nanghinaut nga si kinsa man ang nagbuhat niini kini madala atubangan sa hukmanan. Matud pa ni Architect Cebedo pagkabasa nila sa balita nga mikutlo sa pahayag ni Manila Police Director Chief Superintendent Roberto Rosales nga nagkanayon nga, “Aduna nay taas nga bayolinting kasaysayan ang pamilyang Yap ug mga Cebedo nga nagpinatyanay na ang masig ka habig.”  Si Rosales midugang sa pagpahayag nga usa kini sa mga angolo nga ilang gilantaw karon uban sa paghisgut nga possible usa ka political vendetta ang motibo sa pagpatay kang Yap.

Giklaro sa pamilyang Cebedo nga walay kamatuuran ang maong mga espekulasyon. Matud pa sa pamilyang Cebedo dugay ra nilang gidawat nga si Victorio “Boy” Cebedo ug kanhi Mayor Perfecto “Nonoy” Cebedo pulos biktima sa brutal nga pagpatay. Si Boy gipusil patay samtang nangampanya sa eleksiyon niadtong 1992 alang sa pagka mayor sa lungsod sa Rizal, Zamboanga del Norte.

Samtang si kanhi Mayor Nonoy Cebedo nga maoy mipuli sa paglansar kang Boy ug nakadaug nga naka-alagad sa tulo ka termino niining pagka mayor sa Rizal ang gipusil patay usab didto sa Alabang, Muntinlupa diin niadtong tungura nagsirbi siya nga maoy bise mayor sa ilang lungsod. Human sa pipila ka tuig nga pagburuka sa kaso nga miagi na sa nagkadaiyang mga huwes ang managsuong Rey Yap ug Roy Yap ang nakonbikto sa Regional Trial Court sa Manila sa pagpatay kang Boy Cebedo. Apan sa dihang giapilar ang disisyon si Rey Yap na-acquitted.

Kabahin sa pagpatay kang Nonoy Cebedo, ang mga otoridad hangtud karon napakyas sa pag-ila si kinsa ang mga tawo nga maoy responsable sa maong krimen. Matud pa sa pamilyang Cebedo nga samtang wala nay makapabanhaw ug balik sa kinabuhi nila ni Boy ug Nonoy, sila nagpadayon sa pagpangita sa kalig-on kon unsa may nahibilin kanila. Nakat-on usab sila sa pagpagpadayon sa pagpuyo sa ilang kinabuhi pinasikad sa kristohanong pagtuo ug gugma.

Giklaro ni Achetict Cebedo nga ang ilang krusada sa pagpangita ug hustisya gipasubay gayud nila sa legal nga paagi. Wala usab mahitabo nga mitipas sila sa pagtuman sa mga gimbut-an sa atong balaod. Labaw sa tanan wala na sila mag-apil-apil sa politika sukad nga namatay si Nonoy Cebedo. Giklaro usab sa pamilyang Cebedo nga wala sa ilang batasan ug kinaiya nga magpalandong sa kultura sa kasamok o violence lakip na sa mga pagpanimawos o vendetta. (Press Freedom, Vol. XX No. 16)

 

Maclang madugay pa sa ZN

Hayan matanggong pa sa taas nga panahon ang pag-istar sa napalagpot nga hepe sa kapulisan sa dakbayan sa Dipolog nga dili mamahimong mahatagan ug bag-ong assignments sa ubang bahin sa atong nasud may kalabutan na sa giatubang niining kaso nga administratiba.

Kini ang nahimong sangputanan kagahapon sa gikatakdang pagpahigayon ug summary hearing sa kasong administratiba ang “Grave Misconduct” batok kang Police Chief Inspector Reynaldo Maclang may kalabutan na sa nahitabong pagsumbag niya kang kanhi konsehal Joseph Herrera sa nakalabay’ng Setyembre 25, 2007 diha mismo sa ganghaan sa city hall annex building ning dakbayan sa Dipolog.

Ang kaso gipasaka ni Herrera atubangan sa Provincial Internal Affairs Service sa PNP sa Camp Hamac ning dakbayan sa Dipolog apan ang pagpatawag sa unang paghusay niini didto na sa regional office sa Camp Batalla sa dakbayan sa Zamboanga. Nalakip sa maong complainant mao ang mga meyembro sa Zamboanga del Norte United Correspondents nga nagpadala ug petisyon ngadto kang Presidente Gloria Macapagal-Arroyo alang na sa pagpalagpot kang Maclang sa Dipolog Police ug si Engr. Franklin “Acao” Lim.

Si Herrera uban sa mga meyembro sa ZNUC migikan ug sayu niadtong Lunes, Enero 28, 2008 aron makaabot gayud sa gitakdang oras sa summary hearing nga alas 9:00 ang takna sa buntag. Si Herrera uban sa mga meyembro sa ZNUC ug ilang legal counsel nga sila si Atty. Joseph Lester Patay ug Atty. Rose Broce miabot sa Regional Internal Affairs Service Office untop alas 9:00 ang takna sa kabuntagon ug gihimamat gilayon niini si Police Senior Superintendent Aquilino Garate ang Internal Affairs Service regional director ug maoy mimandu sa ilang hearing officer nga sugdan na ang paghusay sa kaso ug gitanyag mismo niya nga kini himoon sulod mismo sa iyang opisina.

Samtang ang mga complainant nga gikan pa dinhi sa ZaNorte naningkamut nga makaabot ug sayu sa maong summary hearing sa tukmang takna si Maclang nakita sa mga meyembro sa ZNUC nga didto ra sa gawas sa kilid sa opisina sa Internal Affairs Service sa Camp Batalla nagbarug-barug nga naka shorts lamang ug nag polo shirt. Naabtan pa ug 30 minutos ayha misulod si Maclang nga naka uniporme na sa dihang gipaadtuan pa siya ug sakup sa Internal Affairs Service nga magsugod ug husay sa iyang administratiba ang kaso kay miabot na ang iyang mga complainant.

Apan sa wala pa kini mosulod nanawag pa si Maclang ngadto mismo sa hearing officer mga pasado alas 9:30 sa buntag ug gisultihan ug balik nga magsugod na ug husay sa iyang kaso kay ang mga complainants andam na. Si Maclang sa iyang pagsulod sa buhatan ni Col. Garate diin gipahigayon ang summary hearing misipat gilayon ang mga mata niini ngadto sa mga meyembro sa ZNUC ug kang Herrera. Gihulagway nila ni Buddy Cagbabanua ug Roldan Realiza mga meyembro sa ZNUC nga si Maclang sa dihang misulod ug nakalingkod na nagpakita sa iyang maldita nga batasan sa nilihukan niini tinubagan ug sa iyang inistoryahan nga sama sa usa ka tawo nga ang iyang feeling siya maoy hari sa tanan.

Si Maclang misuway pa unta ug kwestyon sa pagkuha ug picture ni Genesis Ajero sa ZNUC gipahigayong paghusay apan wala siya paminawa ug tagda sa hearing officer. Unang gipatin-aw sa hearing officer sa Internal Affairs Service nga ang kaso ilang nadisidihan nga husayon didto sa Camp Batalla tungod kay kuwang sila ug tawo sa Camp Hamac nga maoy mopahigayon sa summary hearing. Ang nasangpit nga lakang sa Internal Affairs Service sa PNP higpit nga gibabagan sa legal counsel ni Herrera ug ZNUC tungod kay sa ilang nakita nahasupak kini sa gimbut-an mismo sa balaod nga naghisgut kon asa gipasaka ang kaso adto gayud kini pagahusayon gawas lamang kon ang mga complainants mohangyo o mopadas-og alang sa pagbalhin niini.

Matud pa ni Atty. Patay wala gayud mahinumdum si Herrera nga mihangyo sila nga dalhon sa regional office ang paghusay sa maong kaso. Tungod niini higpit nga gipadas-og ni Atty. Patay ang pagbalik sa paghusay sa maong kaso sa Camp Hamac ning dakbayan sa Dipolog. Ang hearing officer sa Internal Affairs Service misuway unta sa pagtintal sa mga complainants nga ipadayon na ang paghusay sa kaso didto sa Camp Batalla kay kon moangkon si Maclang nga nanumbag siya ipakanaug gilayon ang pagpahamtang ug disciplinary action batok sa maong police officer apan kon dili moangkon magsugod gilayon ang paghusay sa kaso didto sa reheyonal nga buhatan sa kapulisan.

Si Maclang sa iyang kabahin nagyango-yango usab ug mipadas-og nga sa reheyonal nga buhatan sa RIAS ipahigayon ang paghusay sa iyang kaso. Sa nasayran si Maclang gikan sa Zamboanga del Norte Police Provincial Office ang gibalhin karon didto sa PNP Regional Office sa Camp Batalla ug sumala pa maoy aide de camp ni Police Regional Director General Jaime Caringal. Apan gitataw sa hearing officer sa Internal Affiars Service nga hangtud dili pa mahuman ang kasong administratiba nga giatubang ni Maclang dili usab siya mamahimong mahatagan ug bag-ong assignments. Matud pa ang status karon ni Maclang didto sa Camp Batalla nahulog nga ilawom siya sa camp arrest o protective custody ilawom sa police regional office hangtud dili pa matapos ang kasong administratiba batok kaniya.

Si Atty. Patay higpit nga mibarug sa pagpabalik sa paghusay sa maong kaso sa Camp Hamac tungod sa rason nga kini nahasupak mismo sa ilang kaugalingong balaod kabahin na sa paghusay ug mga administratibong kaso batok sa mga meyembro sa PNP ug labaw sa tanan ang kaperwesyo nga masinati sa mga complainants sa pagbalik-balik sa dakbayan sa Zamboanga. Tungod niini gimandu sa hearing officer sa Internal Affairs Service ang pagsumitir ug memorandum sulod sa mosunod nga lima ka adlaw ug sa paghatag usab ug higayon ni Maclang sa pagduso sa ilang tubag nga ibalik ang paghusay dinhi sa Dipolog.

Apan kini nga lakang pagadisidihan ni Internal Affairs Service Regional Director Senior Superintendent Garate. Sa nakita ug ug namatikdan sa grupo adunay laraw nga dalion ang pagresolbar sa kaso kay kini maoy nakababag ni Maclang nga matudlo ug bag-ong assignment sama sa pagka hepe ug balik sa Dipolog Police. Gituhuan nga sa maong higayon andam nang angkonon ni Maclang ang iyang sala nga nanumbag ug meyembro sa media dinhi sa ZaNorte para mapakanaug gilayon ang disciplinary action ug pagka human malimpyo na ang iyang pangalan kay madeklarar na nga wala na siyay giatubang nga kasong administratiba busa wala nay babag ang pagbalik niya sa Dipolog Police.

Kini nadasonan may kalabutan na sa pagsuway ug hangyo kang Herrera nga isibog ang kaso samtang nagkaduol ang adlaw sa pagpahigayon sa summary hearing. Gikonpirmar ni Herrera nga sa miaging mga semana gibalik-balikan siya ug tawag ni Mr. Lorenzo Aseniero ang kanhi information officer sa Dipolog aron sa paghangyo nga isibog kaso batok Maclang ug gipaadtuan sa iyang suod nga higala nga si Rey Lee para gihapon sa susamang katuyuan. Sa nahibaw-an si Regional Police Director Caringal nakaluwat ug mga pulong sa iyang pagpanawag sa usa ka opisyal sa lalawigan kon si Herrera “talagang matigas ba daw ang ulo” kay nagmagahi sa pagsibog sa kaso batok ni Maclang.

Samtang maoy gisugo usab ni Mayor Evelyn Uy si Konsehal James Verduguez nga maoy maniid sa mga lihok sa meyembro sa ZNUC. (Press Freedom, Vol. XX No. 16)

 

Libreng sakay sa produkto napahimuslan sa taga Brgy. Suguilon

Padayon karon nga napahimuslan sa nagkugi nga katawhan sa Brgy. Suguilon, Siayan ang programang Libreng Sakay sa Produkto nga gipasi-ugdahan ni Cong. Dodoy Labadlabad. Kini gitumong aron dili na makagasto pa ang nagkugi nga mga taga Suguilon sa pagtumod sa unsa man nga mga produkto nga ilang pagadad-on sa lungsod sa Sindangan aron ibaligya. Angayang mahibaw-an hinapus nga bahin sa miaging tuig gisugdan ang nasangpit nga programa sa kauban sa kauswagan nga si Cong. Dodoy Labadlabad sa tinguha nga madasig ang katawhan sa nasangpit nga dapit sa pagpahigayon ug dugang panlimbasog aron kadugangan ang ilang kinitaan.

Pipil sa mga produkto nga gitumod sa makugihon nga mga taga Brgy. Suguilon mao ang binangan nga mga kahoy sugnuron, guod ug nilipak nga mga kawayan, ingon man sawali. Lima ka primero pang mipahimulos sa maong Libreng Sakay sa Produkto ni Cong. Dodoy Labadlabad niadtong Domingo, Enero 27 nga sila si Elizabeth Gumandam, Reynaldo Dangcawon, Ingracio Quino, Petrus Maladia ug Melissa Sungco nagkanayon nga naaghat sila sa pagpangita ug dugang paagi sa panginabuhi sanglit dili na man makagasto pa sa pletihan sa ilang makahoy nga sugnuron sa pagdala niini ngadto sa Sindangan. Dihang gipangutana kon daan na ba sila nga nagpangahuyan, sila nagkanayon nga wala sila mopahigayon sa maong kalihukan sa wala pa ang maong programa tungod kay daku ang ilang magasto sa pagdala niini ngadto sa Sindangan. Samtang kon komprahon usab ang ilang sugnod didto sa ilang dapit, dyutay lamang ang ilang kita-on nga dili hapit makabawi sa ilang kahago. Hinoon tungod sa ilang nakita nga resulta sa nauna kanila pagpahimulos sa maong proyekto maoy hinungdan nga nadasig usab sila sa pagpangitag ulternatibong kapanginabuhian gawas sa ilang pagpanguma o pagbaul.

Samtang sa iyang kabahin, si Eddie Agdala nagkanayon nga ikaduha na ka higayon nga nakatumod siya sa iyang mga guod ug lipak nga kawayan sa lungsod sa Sindangan pinaagi sa Libreng Sakay sa Produkto nga gitanyag ni Cong. Labadlabad ug karon aduna na man gani siyay nahimong suki nga kahandusan sa iyang mga produkto sa maong lungsod. Nagkahiusa ang mga nakapahimulos sa programang libreng sakay sa produkto sa pagpabati sa ilang pagdayeg ug pasalamat ngadto kang Cong. Labadlabad tungod kay wala niini hikalimti ang katawhan sa ilang dapit pinaagi na sa maong programa. Ang ilang panahom gidasunan mismo sa barangay kapitan sa Suguilon nga si Hon. Filomeno Gumandam kinsa miingon nga iyang nakita nga dakug gikatabang ang libreng sakay sa produkto sa Kongresista sa iyang mga katagi-barangay nga motumod sa ilang hinaguan ngadto sa Sindangan. Midugang pa siya nga pagkahibalo sa mga tawo sa ilang dapit nga mopasiugda sa maong programa si Cong. Labadlabad wala usab mag-usik ug panahon sa pagpangitag laing paagi nga makakita ug dugang kapanginabuhian. Sa iyang kabahin, si Kagawad Sungco nga kapikas ni Melissa mipabati usab sa iyang pasalamat ug nagkanayon nga ang programa sa batan-ong magbabalaod iyang nakita nga tinud-anay ug walay pili ang pagpahigayon niini. Angayang masayran nga ang lungsod sa Siayan maoy giila nga pinaka kabus nga lungsod dinhi sa probinsya sa Zamboanga del Norte maoy hinungdan nga mipahigayon si Cong. Labadlabad sa mga programa nga sarang makatabang sa mga taga didto diha sa ilang panginabuhi. (Ting Carreon, Press Freedom, Vol. XX No. 16)

 

Bakbakan sa Brgy. Villaramos

Gihugupan sa mabagang duot sa katawhan ang gipahigayon nga amateur boxing bouts sa barangay Villaramos, Manukan atol sa besperas niini niadtong Byernes. Ang maong kalihukan pinaagi sa programang Bakbakan ni Congressman Dodoy Labadlabad. Mipakita sa ilang katakus ibabaw sa luna ang 19 ka paresan sa nagtinguhang mamahimong sumusunod sa lakang ni Manny Pacquiao. Pinakagaan nga timbang sa mga bata nga nagsambunot mao ang 23 kilos tali kanila ni Mark Cabrera sa Villaramos batok kang Monchitte Enriquez sa Brgy. Lipras. Si Cabrera nga nagpangidaron ug nuybe anyos maoy nahimong manana-ug sa maong sangka.

Samtang nakahatag ug tumang kalingawan sa mga misaksi sa Bakbakan ni Congressman ang misunod pa nga 18 ka mga paresan diin ang pinakabug-at nga timbang nga 53 kilos gipahigayon tali kang Jay Cariora batok Norman Salazar nga pulos mga taga Villaramos. Si Cariora maoy nagmadaugon sa ilang panagsangka. Angayang masayran nga tungod sa panlantaw sa kauban sa kauswagan nga si Cong. Dodoy Labadlabad ngadto sa kabataan aron mahilikay kini sa mga bisyo mipahigayon kini ug seminar sa amateur boxing officiating nga gisalmutan sa mga interesadong mamahimong boxing officials sa Segundo distrito. Gawas niini mipahimo usab si Cong. Dodoy Labadlabad sa usa ka standard nga boksingan uban na sa mga himan nga proteksyon sa kabataan sa ilang pagboksing aron mahilikay sila sa kadaut.

Ang pagpahigayon sa boksing didto sa Brgy. Villaramos nahimong possible pinaagi na sa hini-usang aksyon nga gipahigayon sa kadagkuan sa maong barangay pinangulohan ni Hon. Miguelita Biolango, punong barangay, uban sa iyang konseho ug kang SK Chairman, Hon. Jerald Agustin. Sa iyang mensahe nga gipabati sa pagsugod sa kalihukan mipabati sa iyang dakung pasalamat si Kapitana Biolango ngadto kang Cong. Labadlabad tungod kay wala kini magmakuli sa pagpadala sa iyang boksingan sa ilang barangay, dili lamang aron makahatag ug kalingawan sa katawhan, apan aron makangkon ug kahigayunan ang ilang kabataan nga makapakita sa ilang abilidad sa maong natad sa pa-ugnat sa kusog.

Usa sa mga lumilihok ni Cong. Labadlabad nga maoy mi-uban sa maong kalihukan ang mipasabut nga si kinsa kadtong interesado nga mapahigayon ang Bakbakan ni Congressman sa ilang lugar, uban na sa serbisyo sa mga opisyal sa boksing mopadangat lamang sa ilang tinguha sa mga buhatan sa Kongresista nga nahimutang sa lungsod sa Sindangan ug dakbayan sa Dipolog. Kini aron nga ma-eskedyol ang maong kalihukan. Midugang usab kini sa pagpaklaro nga tungod kay libre ang pagpagamit sa mga pasilidad apil na ang pagtransportar ug sa pag-officiate niini, ang naghangyo na sa pagpahigayon sa maong kalihukan ang mo-abaga sa premyo sa mga mangapil sa Bakbakan ni Congressman. (Ting Carreon, Press Freedom, Vol. XX No. 16)

 

1 sibilyan patay, 3 polis samaran sa ilang engkuwentro vs. MILF

Sibuco, Zamboanga del Norte- Nagka-engkwentro ang tropa sa kapolisan ug MILF Lost Command didto sa Barangay Lakiki sakop sa lungsod sa Sibuco, Zamboanga del Norte nga mikutlo ug usa ka kinabuhi nga sibilyan samtang tulo ka mga polis ang samaran sa dihang gipaulanan kini ug mga bala atol sa ilang foot patrol operation niadtung Miyerkules sa buntag.

Sumala pa ni P/Inspector Charisse Bajelot Yabo, tigpamaba sa Provincial Police Office, tulo ka team sa Sibuco PNP nga gipangulohan ni Police Senior Inspector Parson Juljani Asadil, Chief of Police sa Sibuco Police Station nagpahigayon ug foot and visibility patrol aron ipatuman ang arrest order sa mga wanted personalities nga gituhuang atua nagtago sa Barangay Lakiki. Samtang ang tropa sa gobiyerno gadulong palang sa maong dapit, pag-abot nila sa Setio Kakawan sakop sa Barangay Lakiki, gipaulanan na sila ug mga bala gikan sa mga armadong rebeldi nga maoy hinungdan nga mibalos usab ang mga polis ug nahitabo ang pinosilay.

Atol sa maong engku-wentro, samaran si Police Senior Inspector Juljani Asadil sa dihang naigo kini sa luyo nga bahin sa iyang abaga, samtang duha sa iyang mga ginsakpan nga nailhang sila si PO1 Rajal Maindam ug PO1 Nur-aden Ibrahim ang samaran usab ug gikatahong anaa sa kritikal nga kondisyon. Sa pagresponde sa militar, sila si POI Maindam ug POI Ibrahim ang gidala kini sa Zamboanga City sakay sa helikopter samtang sa pagkahapon, gisunod usab ug dala sa Zamboanga City alang sa medical treatment si Chief of Police Asadil. Ulahing nadala sa Zamboanga City si Asadil tungod kay wala dayon kini mikanaog gikan sa bukid kay padayon kining migukod sa mga rebelde.

Usa ka ginang nga nailhan sa iyang apelyedo Langgal, inahan sa usa ka polis nga membro sa Sibuco PNP ang nakutloan sa iyang kinabuhi sa dihang naigo kini sa nagkuros-kuros nga mga bala. Matud pa sa tinubdan, si Ginang Langgal migawas gikan sa sulod sa iyang panimalay sa dihang nakadungog kinig botboto sa armas ug naigo. Mga elemento sa Charlie Company sa 44th Infantry Batallion, Philipine Army maoy mi-reinforce sa tropa sa kapolisan ug mihimo ug hot pursuit operations batok sa mga armadong rebelde.

Wala pay report kon duna bay samaran sa habig sa mga membro sa MILF Lost Command nga gika-engkuwentro sa tropa sa gobiyerno.  Ang Barangay Lakiki aduna lamay lima ka kilometro ang distansiya gikan sa poblacion sa lungsod sa Sibuco. Sumala sa tinubdan, kasagaran sa mga rebelde nga gika-engkuwentro sa militar ug kapolisan taga lungsod sa Sirawai. Pito ka mga wanted persons maoy tuyo sa kapolisan aron i-serbe ang warrant of arrest sa dihang gi-ambusan kini sa mga armadong grupo. Ang pito ka mga wanted persons nga nalambigit sa kasong pagpatay ug extortion gipangulohan ni Abdulmajid Abdulhaman alyas Kumander Mollong, . Matud pa nga si Kumander Mollong maoy nag-lider sa MILF Lost Command nga nag-operate sa kabukiran sa lungsod sa Sirawai, Sibuco, Baliguian ug Siocon kinsa nag-atubang ug kasong pagpatay ug extortion. Ang maong kaso dugay-dugay na nga giatubang ni Mollong uban sa iyang mga kauban hinungdan nga sa dihang may naka-timbre nga atua kini nag loblob sa Barangay Lakiki, ang tropa sa Sibuco PNP wala magpalabay sa panahon pag-adto sa dapit aron i-serbe ang arrest order gikan sa korte, apan nakahinagbo ug engkuwentro kay sa wala pa sila maabot sa ilang destinasyon, kini gi-ambusan naman sa mga armadong grupo.

Gipasabot sa kapolisan nga wala sila makalapas sa on going peace negotiations tali sa MILF ug sa gobiyerno sa pagtaak sa dapit nga maoy matud pa, gikampohan sa mga armado tungod kay ang pag-imposar sa warrant of arrest aron dakpon ang mga wanted persons nagsumikad kini sa gi-atubang nga mga kaso. Sa pinakaulahing report nga nahipos, si General Jaime Caringal, PNP Regional Director mipadala karon ug tropa gikan sa Regional Mobile Group nga gipangulohan ni P/SSupt.. Lurimer Deltran ug Police Chief Inspector Reynaldo Maclang gikan sa PNP Regional Command aron magpahigayon ug hot prusuit operation sa Barangay Lakiki sa lungsod sa Sibuco human molibkas ang tulo ka adlaw nga tagal nga mobakwit ang mga residente sa maong dapit. (The New Nandau, Vol. XVII No.30)

 

19 anyos gipusil patay sa Brgy. Misok, Sindangan

Sayo nga nakabsan sa iyang kinabuhi ang usa ka 19 anyos nga ulitawo human kini pusila sa usa ka minyo, didto sa may National Highway sa Barangay Misok sakop sa lungsod sa Sindangan, karong bag-uhay pa lang.

Ang biktima giila sa ngalan nga usa ka Mohamad Balaganon, 19 anyos, walay trabaho ug molopyo sa maong dapit.  Samtang ang suspetsado gitumbok sa kapolisan nga usa ka Marvin Rasonable, 25 anyos nga nagpuyo usab sa susamang dapit. Sa initial nga imbesti-gasyon nga gihimo sa Sindangan PNP, nasayran nga samtang nagtindog ang biktima sa maong dalan, ang suspetsado kalit nga miduol kaniya sa likod ug sa walay daghang langan, gipusil niya ang biktima ug misibat human sa maong insidenti.

Si Bagalanon naka-angkon kini ug samad pinusilan sa iyang ulo ug dali pa kining gidala sa Sindangan District Hospital aron kapatambalanan apan damtan ug pipila ka minutos nakabsan kini sa iyang kinabuhi sumala pa sa doctor nga miatiman niini.  Kasong pagpatay gipasaka na kini sa kapolisan ngadto sa korte batok na sa suspetsado.  (SHENG&BUDZ, The New Nandau, Vol. XVII No.30)

 

Mga residente duol sa drainage outlet nagmulo

KUNG gipasigarbo sa kagamhanang lokal sa Dipolog diha sa ilang nahimong agi estriktong agpatuman sa Sanitation Ordinance 123, kini usa lamang ka paglingla sa mga katawhan sa tinood nga kahimtang sa atong siyudad.

Ang nakitang kalimpiyo palibot sa siyudad kini maoy dili tinood nga hitsura, tungod kay ang mismong kagamhanang lokal sa Dipolog ang wala magpakabana sa kalimpiyo. Pabiling gireklamo karon sa mga lomolopyo sa barangay Estaka, Barra ug Miputak nga anaa haduol sa drainage outlet sa Dipolog ang kabaho ug kahugaw nga daritso ambak ngadto sa suba ug sa dagat.

Angayang masayran nga ang tanang hugaw sa drainage canal ang anha kini ambak sa mga suba sa Estaka, Barra ug Miputak. Gihulagway sa mga residente haduol sa maong dapit nga nahinabi nga nagkadaiyang lang ang mga hugaw nga mo-ambak ngadto sa suba ug sa dagat. Kanunay nga manglisbo ang kabaho niini.

Gibutyag sa usa ka residente haduol sa suba sa barangay Estaka nga ang drainage outlet nga anaa sa ilang dapit kini ang taud-taud na nilang gireklamo ngadto sa siyudad. Apan kini ang wala gayud hatagi sa igong pagtagad. Iyang gitandi nga kaniadto ang maong suba sa Estaka ang anha pa sila mangaligo tungod sa kalimpiyo, apan karon ilang nakita ang kahugaw na niini. Ilang gihatagan ug gibug-aton nga mismo ang kagamhanang lokal sa Dipolog ang wala misanong sa ilang kampanya pagmintinar sa kalimpiyo. Sugyot sa maong nagreklamong mga residente nga mo-agi unta ug treatment ang tanang mga hugaw nga anaa sa drainage canal ayha kini mogawas paingon ngadto sa suba ug sa dagat aron mamintinar ang kalimpyo niini. Ilang gi-angkon nga normal gayud ang maong sitwasyon nga diha sa suba ug dagat paingon ang tanang hugaw apan kinahanglan unta himoan ug pamaagi aron magpabilin ang kalimpiyo niini.

Sa gihimong pagsubay, bisan ang mga hugaw sa Dipolog City Fish Port ang direkta kining mopaingon ngadto sa suba nga anaa ra kilid sa nahimutangan sa maong fish port. Aminado usab si City Veterinarian Dr. Russel Ganub nga ang tanang mga hugaw sa slaughter house ang paingon gihapon kini ngadto sa sapa nga anaa luyo sa slaughter house sa barangay Dicayas. Ang kasamtangan usab nga gihimo karon sa slaughter house mao ang pagkalot ug buho haduol sa sapa aron adto ilabay ang ubang mga hugaw gikan  sa hayop.

Ang sistema sa pag-disposed ug hugaw gikan sa slaughter house ang wala kini mi-agi ug Sewerage Treatment Plant (STP). (By Joel Ello, The New Nandau, Vol. XVII No.30)

 

USA KA 25 ANYOS NGA LALAKI NGA TIGPAYUHOT SA
GINADILING DRUGAS ARESTADO SA DAPITAN PNP…

Usa ka 25 anyos nga lalaki ang arestado kini sa kapolisan sa dakbayan sa Dapitan human kini nakuhaan sa ginadiling drugas kon nailang shabu, karong bag-uhay pa lang.

Ang maong suspek giila sa pangalang Wilfred Daguinotas, alyas Mamot, ulitawo nga nagpuyo sa may Mi Ultimo Adios Street, Barangay Banonong dakbayan sa Dapitan. Nakuha sa iyang posisyon ang usa ka gamay’ng transparent plastic sachet nga adunay sulod nga white crystalline granules kon gituhoang shabu nga motimbang usab kini sa 0.20 gramus ug tulo ka tag one hundred peso bills nga adunay serial numbers nga mao usa’y gigamit isip marked money.  Kansang ang maong mga butang ang gidiposito na kini sa buhatan sa kapolisan aron himuong ebedensiya sa pagahimuong hearing sa korte.  Ang pagsikop sa suspek pinasubay kini sa usa ka buy bust operation nga gihimo sa mga elemento sa Dapitan PNP ubos sa pagpangulo ni SPO4 Ronnie Quizo.

Ang suspetsadong si Daguinotas kasamtangan pa kining giditinir sa bilangguan sa Dapitan City Police Station alang na sa dugang pang imbestigasyon ug gihikay usab ang tukmang kaso nga ipasaka sa korte batok kaniya. (PEDMARC, The New Nandau, Vol. XVII No.30)

 

 

 

NOTE: SEND US YOUR NEWS.  Tell us what's going on in your barangays, clubs, schools, businesses and non profit organization. You can also send notices and announcements.
          

 

    Email to webmaster@dipolognon.com

      
Google
WEB THE DAILY DIPOLOGNON