January 24, 2009

 

Junkshops gipahinumduman pagtaho dayon kon dunay makitang kinawat

Subli nga gipahinumdoman karong semanaha ang tanang mga junkshop operators dinhi sa dakbayan sa Dipolog nga dili gayud sila malimot ug magpanuko sa pagtaho dayon  ngadto sa mga otoridad sa oras nga aduna silay mabatyagan nga mga butang kinawat nga ibaligya sa ilang shop.

Kini gihimo karon sa kagam- hanang lokal ning dakbayan aron hugot nga mabantayan ug masum- po ang pagbaligya ug kinawat nga mga butang nga kasagaran dinha sa mga junkshops, subay sa pada- yon karong pagsi-aw sa kawat dinhi sa dakbayan.

Kalabot ning maong kalam- boan mao ang pagkarekober sa usa ka 81 mm mortar ammo. nga nakuha gikan sa usa sa atong mga junkshops dinhi sa dakbayan pinaagi sa atong kapolisan ilawom sa pagpanguna ni P/Chief Inspector Reynaldo Mendieta Maclang, tungod sa tawag gikan sa usa ka concerned nga lumulupyo niadtong nakalabay nga Enero 5 sa may kapin kon kulang alas 5:15 ang takna sa kahaponon.

Tungod niini, mapasalamaton ug dako si City Mayor Evelyn T. Uy ngadto sa atong mabuot nga mga katawhan kinsa nagbaton ug dakong pagpakabana ilabi na dinha sa pagpakigbatok sa tanang matang sa krimen, aron sa pagpreserbar sa kahapsay ug kalinaw dinhi palibot sa dakbayan. (CIO-alb)

 

Biktima sa baha mapasalamaton

Mapasalamatong mipabati ang mokabat sa 43 ka mga pamilya lakip ang ilang 264 ka mga sakop nga nahimong biktima sa pagbaha sa tubig sa Barangay Estaka ug Sta. Isabel,  ngadto sa administrasyong Uy gumikan sa pagtubag gilayon niini sa panginahanglanong evacuation center ug food assistance alang kanila.

Gumikan sa nagpadayong pag-ulan-ulan sa ulahing bahin niadtong bulan sa Disyembre 2008 tungod sa low pressure area, pipila ka mga pamilya lakip na ang ilang mga sakop nahimong biktima sa pagbaha sa tubig, ilabi na kadtong anaa nanimuyo sa mga ubos nga mga lugar dinhi sa dakbayan.

Gumikan sa regular nga pagmonitor ni Mayor Evelyn T. Uy uban sa City Disaster Coordinating Council sa Dipolog, gipahimutang gilayon sa Hepe Ehekutibo ang evacuation centers nga nahimutang sa Estaka Covered Court, Miputak Covered Court ug Sta. Isabel Health Center aron sa pagtubag sa mga panginahanglanun sa mga biktima.

Ang pagpang-apod-apod sa mga relief goods nga naglangkob sa bugas, sardinas, noodles, kape ug powdered milk gipangunahan mismo ni Mayor Belen Uy kauban sa mga personahe sa City Social Welfare and Development Office, samtang ang mga personahe sa City Health Office nga gipangunahan usab ni Dr. Cecilio Siglos mihatag sa medical services ug mi-apod-apod sa mga tambal ilabi na sa mga kabataan nga gihilantan.

Mipaabot usab silang mga biktima sa ilang pasalamat sa mga miyembro sa Team DAVID, sa City Disaster Coordinating Council ug sa mga personahe sa City Health tungod sa hiniusa ug hinanaling tabang nga nahatag ngadto kanila. (cio-prr)

 

Pagrehistro sa mga botante padayon na sa Comelec dinhi 

Gipahibalo  na usab sa Buhatan sa City COMELEC sa Dipolog nga gipanguluhan ni Atty. Jossil R. Macute, nga mibukas ug nagapa dayon na usab ang ilang pagpa- tuman sa COMELEC  Resolution No. 8514  o ang Pagpadayon sa Pagrehistro sa mga Botante.

Sumala pa ni Atty. Macute nga ang pagpangrehistro sa ilang buhatan naglangkob sa mga bag-ong botante, pagbalhin sa rehistro sa ilang talaan, pag-usab o pagkoreher sa mga “entries” sa registration record ug ang reactivate sa deactivated voters.

Ang pagrehistro magsugod sa may alas-8:00 ang takna sa kabuntagon ug motak-op sa may alas-5:00 ang takna sa hapon, gikan sa Lunes hangtud sa Biyernes.

Gikinahanglan usab nga ang buot moparehistro magdala sa mga identification documents aron sa pagpamatuod sa ilang pagkatawo.

Ang mosunod maoy gikina- hanglan: ID card nga nagbaton sa pirma sa ilang employer/principal sa tulunghaan o authorized representative may kalabot sa organisasyon diin siya miyembro ug  ilang hulagway (Employee’s ID, Student’s ID, Senior Citizen’s ID, SSS/GSIS ID,       IBP ID, PRC ID O Postal ID); Driver’s License; NBI/PNP Clearance; Passport; Marriage Contract; ug Birth Certificate.

Gipasabot usab ni Atty. Macute nga dili na kinahanglan nga dad-on nila ang tanang gihinganlan nga mga dokumento, bisan asa lang sa gihinganlan nga mga ID’s. 

Alang usab niadtong buot magparehistro nga nagpangidaron gikan sa 18–25 anyos, gikinahanglang nga magdala sila sa ilang Birth Certifcate aron malikayan ang “erroneous entries” atol sa pagrehistro.

Dugang gipasabot ni Macute nga dili dawaton sa ilang buhatan ang “cedula” o “Community Tax Certificate” isip identification document alang sa pagparehistro.

Ang pagpangrehistro sa mga botante molungtad hangtud Disyembre ning tuig 2009 apan giawhag ni Atty. Macute nga dili na kinahanglan nga mohulat pa sila sa deadline aron malikayan ang pagpunsisok unya sa pagrehistro. (cio-prr)

 

Pagpatindog mga barong-barong sa pampublikong luna gidili gayud

Subli na usab nga nag-awhag ang lokal nga buhatan sa Building Official (OBO) sa Dipolog sa mga kaigsoonan kinsa mahiligon sa pagtukod ug mga barong-barong (shanty) sa bisan asang mga pampublikong luna sulod ning dakbayan, sa pag-undang niini tungod kay hugtanon kining gidili sa kagamhanang lokal ning dakbayan.

Kining awhag gipabati sa hingtungdang buhatan ilawom sa pagpanguna ni Engr. Gaudencio Bagolboc, kinsa maoy gitahasan alang sa pagpangguba o demolish niini, isip usab miyembro sa Task Force on Relocation and Resettlement (TFRR) ilawom sa kasamtangang pagdumala ni City Legal Officer Atty. Cyril James O. Ruiz.

Angay mahibaloan nga hangtud karon walay balaod nga nagtugot kang bisan kinsang indibidwal nga motukod ug bisan unsang estraktura dinha sa bisan asang publikong luna, busa ang tanang mohimo niini makalapas sa balaod ug mapahamtangan sa tukmang silot nga gimando usab sa balaod.

Dugang usab nga gipasabot ni Bagolboc nga sa oras nga ang ilang mga personahe makabatyag ug mga barong-barong o bisan unsang estraktura nga ilegal nga gitukod sa bisan asang publikong luna dinhi palibot sa dakbayan, ila gayud nga pagagub-on isip pagpatuman sa nagapdayong kampanya karon sa kagamhanang lokal ning dakbayan ilawom sa liderato ni City Mayor Evelyn T. Uy batok niini..(CIO-alb)   

 

Dunay 10% diskuwento  kun mobayad sa buhis  alang tibuok tuig pingkas

Gi-awhag ug gipahinumduman na usab ang mga taxpayers dinhi sa dakbayan sa Dipolog nga nagapadayon ang paghatag karon sa 10% nga diskuwento alang niadtong makabayad sa ilang pingkasan alang sa tibuok tuig 2009.

Sumala pa ni Rebecca Naquila, ang kasamtangang division chief sa Land Tax Division sa Buhatan sa Tresorero, nga ang maong pribilihiyo ilang gilugway niadtong taxpayers nga mobayad ug advance payment sa ilang mga pingkasan sulod ning tuig 2009.

Dugang ni Naquila nga ang paglugway sa 10% nga diskuwento sa balayronon sa pingkasan alang lang niadtong pingkasan nga walay amoroso.

Giawhag usab ni Naquila ang mga nanag-iya sa mga propriedad nga adunay amoroso sa balayronon sa ilang pingkasan sa paghatag ug panahon sa pagbayad sa ilang amoroso aron malikayan ang silot o penalties nga ipahamtang unya sa ilang pingkasan, o dili ba mobisita sa Buhatan sa Tresorero aron malikayan ang dili pagsinabtanay. (cio-prr)

 

Paghatag financial assistant dugang requirements gipangayo sa SP-ZN

Giuyunan sa mga meyem-bro sa balay balauranan sa ZaNorte ang pagpangayo karon sa kompletong mga dokumento ilabi na tukmang plano sa mga proyekto nga maoy dapatan sa gipanga-yong mga financial assistance.

Kini ang nakab-ot sa dihang gituki sa Sangguniang Panlalawigan ang hangyo sa Gutalac nga financial assistance nga mokabat sa P2 milyones ka pesos alang sa pagkonstrak ug bag-ong legislative building.

Ang nasangpit nga hangyo gipadangat ngadto sa buhatan sa gobernador apan giduso kini sa hepe ehekotibo ngadto sa Sanggunian aron ang gipangayong financial assistance mapahatan sa pundo ilawom sa Provincial Identification Fund sa mga board members ug besi gobernador.

Sa iyang kabahin si Board Member Anecito Darunday mipahayag nga andam siyang mogahin ug pundo ilawom sa iyang PIF para sa gipangayo sa Gutalac.

Apan ang hangyo sa Gutalac daghang kuwang dili sama sa Sibuco nga nahatagan usab nila ug financial assistance sa miagi nga gipatabanan gayud sa kompletong mga dokumento ilabi na sa plano unsay gastuhan sa pundo.

Sumala pa ni Darunday sayud siya nga maoy gitinguha gayud sa mga meyembro sa Sangguniang Bayan sa Gutalac nga makabatun sila ug bag-ong legislative building apan wala gayud siya mahibawo unsay mamahimong panagway sa giplanong legislative building sa maong lungsod kay walay gipataban nga plano.

Ang gibuhat sa Gutalac matud pa ni Darunday wala gayud masubay sa hustong practice nga mag-una gayud ang pagbuhat sa program of works ayha mangita sa gikinahanglang pundo.

Matud pa sa bokal kini nahitabo usab sa ubang mga barangay sa ilang pagpa-ngayo ug financial assistance sa ilawom sa PIF nga kuwang sa mga dokumento ilabi na gayud sa plano asa gamiton ang pundo.

Tungod niini gipadas-og ni Darunday nga patun-an una ang hangyo sa Gutalac sam-tang wala pa kini makasu-mitir sa mga dokumento.

Samtang si Board Member Ricky Mejorada mipa-das-og nga angayan matun-an una nila sa hingpit ang hangyo sa Gutalac sa dili pa sila mohatag sa gipangayong financial assistance kay sa ilang gipadangat daan nga suwat hangyo duna na siyay pagduda nga dili lang ang probinsiya posibling gipanga-yuan nila ug pundo para pagkonstrak ug legislative building kay adunay dakung posibilidad nga nangayo usab ang lungsod ug tabang sa ubang ahensiya sa gobyerno sama sa mga senador o kaha sa Malacanang.

Sumala pa ni Mejorada sa iyang namatikdan sa maong suwat nagpakita nga daw kini gipadala usab sa Gutalac ngadto sa usa ka senador diin nangayo usab sila ug financial assistance para sa ilang legislative building.

Matud pa niya dili layu ang posibilidad nga hayan ang nasangpit nga hangyo nga nadawat usab sa probinsiya usa ka palupad nga hangyo nga daghan ang gipadalhan.

Gihisgutan niya ang nahimo niyang kasinatian sa dihang meyembro pa siya sa Sanggunian sa Dipolog nga nakahimo usab sila sa susa-mang lakang nga magpadala ug daghang suwat hangyo sa nagkadaiyang ahensiya ug opisyal sa kagamhanan para sa usa ka proyekto.

Sa iyang nakita dili lamang sila ang gipangayuan sa Gutalac ug pundo para sa ilang proyekto kon dili aduna pay ubang mga opisyal ug ahensiya sa gobyerno nga gipadalhan usab niini ug susamang suwat hangyo.

Tungod niini midason si Mejorada sa lakang ni Darunday nga angayang ipailawom una sa pagtuon ang hangyo sa Gutalac aron masuta nila kon sa husto ang gipangayong assistance ilabi na sa pagsumitir usab sa mga gikinahanglang dokumento. (Press Freedom, Vol. XXI No.11)

 

Copper mining sa TVI nakamugna ug soil erosion

Makamugna karon ug massive soil erosion ang copper mining operation sa TVI sa Canatuan, Siocon nga nakaapektar ug daku sa Lumot Creek.

Kini ang gibutyag ni Atty. Jes Gal Sarmiento, Jr. ang hepe sa ZaNorte Environment and Management Office sigun sa unod sa report sa Multipartite Monitoring Team para sa TVI Canatuan Project sa gihimo nilang pagsubay sa buwan sa Desyembre 2008 sa Copper Plant Production sa nahisgutang kompaniya.

Matud pa ni Atty. Sarmiento gawas sa massive soil erosion nga nakita sa minahan sa TVI ang waste dam niini nakita nga nagbatun na ug daku nga pagka kankan.

Samtang nagkuha usab ug water samples ang monitoring team sa sulod ug palibot sa minahan sa TVI aron sa pagsuta kabahin sa cyanide, heavy metals analysis ug Total Suspended Solids analysis nga gipailawom sa laboratory test.

Mao girekomendar sa monitoring team ang pag-implementar sa TVI sa hinanaling rehabilitation para masanta ang massive soil erosion para ka protihian ang mga lugar sa palibot sa maong minahan. (Press Freedom, Vol. XXI No.11)

 

Dapitan miapelar sa DOJ  pag-konpermar sa colonist status ni Romeo Jalosjos

Mga opisyal sa dakbayan sa Dapitan ug sa mga katawhan niini ang nanawagan karon ngadto sa Department of Justice nga aprubahan na ang colonist status ni Romeo Jalosjos sumala sa hugtanong rekomendasyon ug representasyon sa NBP Classification Board nga giduso sa maong departamento sa miaging bulan sa Desyembre.

Ang maong apelasyon maoy susama sa panawagan sa mga opisyal sa probinsya sa Zamboanga del Norte nga gipangulohan ni Governor Rolando Yebes ug sa mga mayores niini niadtung miaging tuig human migawas sa bilangguan ug nakauli sa dakbayan sa Dapitan si Jalosjos, apan gibalik ug dakop sa Regional PNP Command ug gidala sa San Ramon sa Zamboanga human gimando ni Justice Secretary Raul Gonzales gumikan kay matud pa, wala pa mahuman ang sentensiya sa kanhi kongresista.

City Councilor Apple Marie Agolong mipahayag nga sila sa dakbayan sa Dapitan miapelar ngadto sa DOJ nga ihatag na ang pribilihiyo nga naangkon sa kanhi kongresista sumala sa rekomendasyon sa Bureau of Corrections sa pagkibra sa tuig human niini maserbisyoe ang sentensiya sulod sa bilangguan.

Niadtung Disyembre 28, 2007, ang Sangguniang Panlungsod sa dakbayan sa Dapitan ang mipasar ug resolusyon miapelar kang Presidente Gloria Macapagal-Arroyo alang sa implementasyon sa Release Order sa Bureau of Corrections pabor kang Jalosjos.

Sa ilang resolusyon niadtung Enero 1, 2008, ang DOJ mipaklaro sa legal nga rason ngano nga si kanhi Congressman Romeo Jalosjos dili pa buhian gikan sa bilangguan tungod kay niadtung panahon nga migawas siya sa New Bilibid Prison ug miule sa dakbayan sa Dapitan base sa rekomendasyon sa kanhi Corrections Director, wala gisukip sa dokumento ang commuted sentence nga girekomendar sa NBP Classification Board.

“Kadto raman maoy kulang makagawas na gyud unta si Sir Nonong.”

Niining bag-ong kalam-boan, si Konsehal Agolong nagkanayon nga si Mayor Dominador Jalosjos, Jr. hugtanon miapela sa presidente ug Department of Justice nga sigun sa hugta-nong rekomendasyon sa Bureau of Corrections pina-sikad sa gisunod nga proceedings sa National Bureau of Prison Classification Board nga dasunan na sa kalihim sa hustisiya ang pagka colonist status ni Jalosjos aron maoy legal nga basihanan ang computation sa Good Conduct Time Allowance nga mo-kompleto sa tuig ang iyang pagserbisyo sa bilangguan. (Press Freedom, Vol. XXI No.11)

 

DOH mihatag P6.5 M sa Sindangan Dist. Hospital

SA tuyo nga mas molambo pa ang programa alang sa pag-atiman sa panglawas sa mga katawhan dinhi sa Zamboanga del Norte ug matotokan kini pag-ayo sa kagamhanang probinsiyal, usa ka Memorandum of Agreement ang gipirmahan tali sa provincial government pinaagi ni Governor Rolando Yebes ug sa Department of Health arun ikahatag ang pahat nga salapi para sa maong tambalanan.

Unod sa maong kasabutan mao ang pagtugyan ngadto sa probinsiya diha na sa pagpatuman sa proyekto nga nagkantidad ug 6.5 milyon pesos alang sa pagpalambo sa Sindangan District Hospital.

Kini maoy resulta sa gihimong pagpaningkamot ni Governor Yebes nga mahatagan gayud sa igong pundo ang atong lalawigan  gikan sa maong departamento duyog sa gihingusgan nga programa sa gobernador alang sa pag-atiman sa panglawas sa katawhan. Kini subay usab sa Formula 1 sa Provincial Investment Plan for Health sa Zamboanga del Norte.

Samtang giklaro ni Governor Yebes nga ang lungsod sa Sindangan ang apil kini sa makadawat sa modernong ambulansiya nga hinatag gikan sa nasud sa Japan. Niadtong mi-aging bulan nadawat na sa atong probinsiya ang tulo ka mga ambulansiya gikan sa maong nasud.

Mahinumduman nga ang 6.5 milyon pesos nga pundo alang sa Sindangan District Hospital ang matod pa gisulayan kini pag-angkon ni 2nd District Congressman Dodoy Labadlabad ug gipasiatab nga pinaagi sa iyang lederato napagawas ang maong pundo. Apan sa nasayran gikan sa DOH na-released ang maong pundo tungod sa representasyon ni Governor Yebes. Nakita sa nasudnong kagamhanan nga determinado ang probinsiya pagpatuman sa mga programa alang sa pag-atiman sa panglawas sa mga katawhan sama sa gipabarog nga Zanorte Medical Center. (Joel Ello,Press Freedom, Vol. XXI No.11)

 

Lumad gihatagan sa Emergency  Employment Program sa ZN

Gipahibawo sa buhatan ni Governor Rolando Yebes nga ang makatilaw sa ipatumang Emergency Employment Program karong tuiga mao kadtong mga lumad sa ZaNorte nga naglangkub na sa mga Subanen, Muslim ug Kalibugan.

Matud pa ni Atty. Uldarico Mejorada maoy gitinguha ni Governor Yebes nga matabangan ang mga sakup sa indigenous people dinhi sa atong probinsiya atubangan sa pagsarasay karon sa ekonomiya sa mga sapiang kanasuran.

Si Mejorada nga maoy tigpamaba sa gobernador mipahayag nga gihatagan gayud ug dakung luna sa probinsiya karon ang pagtabang sa mga lumad nga katawhan nga makabatun ug hustong panginabuhian nga sulod sa taas nga panahon sila nahikawan.

Gawas sa Emergency Employment Program nga ipatuman sa probinsiya una nang gisugdan ni Governor Yebes ang pagpa-ilawom sa pagbansay-bansay sa mga meyembro sa tribung Subanen para mamahimong meyembro sa CAFGU.

Matud pa ni Mejorada gihangyo mismo ni Governor Yebes si AFP Chief of Staff General Alexander Yano nga hatagan ug kahigayunan ang mga meyembro sa indigenous people nga mamahimong meyembro sa CAFGU ug hangtud na sa armadong kusog aron makatabang usab kini sa ilang panginabuhi.

Ilawom sa Emergency Employment Program ang mga lumad maoy kuhaon sa trabaho sa mga proyekto nga ipatuman sa kagamhanan diha sa barangay.

Kini maoy usa sa mga paningkamut karon nga gihimo ni Governor Yebes aron ang atong mga katawhan diha sa kabarangayan dili mahinaykan sa mamahimong epekto sa krisis nga nasinati karon sa tibook kalibutan. (Press Freedom, Vol. XXI No.11)

 

PNP Chief sa ZaNorte mihimo ug New Years Call kang Gov. Yebes

SA pinaka-unang higayon sa kasaysayan sa Philippine National Police dinhi sa Zamboanga del Norte gihimo  ang New Years Call ngadto kang Governor Rolando Yebes kagahapong adlawa.

Sa pagpangulo ni Police Senior Superintendent Atty. Cristito Gozalodo, Police Provincial Director, nakig-atubang kini sa gobernador sulod mismo sa iyang buhatan sa kapitolyo uban sa mga chief of police sa lungsod ug siyudad, mga police nga miyembro sa nagkadaiyang unit sa kapolisan ug mga ginsakpan sa municipal ug city police stations.

Sa mensahe nga gipaabot sa gobernador atol sa gipahigayon nga programa, iyang gipasalamatan ug gipasidunggan ang tanang kapolisan tungod sa gihimo niini nga nagpabiling malinawon ang probinsiya sa mi-aging tuig taliwala sa kasamok nga nahitabo sa ubang mga probinsiya dinhi sa Mindanao gumikan sa kontrobersiyal nga Memorandum of Agreement on Ancestral Domain. Ang Triple SB nga maoy iyang gikabalak-an nga samokon sa mga bandidong grupo kini ang nagpabilin nga malinawon.

Gipaambit ni Governor Yebes ang iyang kasinatian isip usa  miyembro sa PNP Maritime kaniadto sulod sa pito ka tuig ayha kini na-promote pagka regional customs collector. Iyang gihimo ang tanan isip usa ka police, pagtubag sa obligasyon nga gisangon kaniya. Gihatagan ug gibug-aton sa gobernador nga mao usab kini ang ipakita sa atong kapolisan. Kinahanglan motubag kini sa mga tahas ug obligasyon nga gisangon kanila alang sa atong nasud. Ipakita sa katawhan nga aduna gayuy authority ang police. Ang uniform sa kapolisan nag-representar kini sa nasud ug dili sa gobernador ug sa mayor. Busa dako kaayo ug obligasyon ang kapolisan ngadto sa katawhan.

Gikalipay pag-ayo ni Governor Yebes ang pasalig nga giluwatan sa mga hepe sa kapolisan sa suporta alang sa mga programa sa probinsiya ilabina sa Lando-BIBO. Masaligon usab ang gobernador nga mohatag ug suporta sa unsa may gikinahanglan sa kapolisan. Iyang nabati kung unsa ang ilang kahimtang tungod sa kawad-on sa suporta gikan sa nasudnong kagamhanan.

Sa karon gilangkuban sa 800 kapin ka mga personahe sa kapolisan ang Zamboanga del Norte ilalom sa lederato ni Police Provincial Director Atty. Gonzalodo. Gusto ni Governor Yebes nga magpabilin ug mapalambo ang nahibiling moral ascendancy sa atong kapolisan diha sa katilingban. Dismayado si Governor Yebes nga  nanghitabo karon sa atong palibot nga wala nay pag-respito ang katawhan sa mga ginsakpan sa PNP. Busa kini maoy gusto niyang mausob. Hugtanon nga nanawagan si Governor Yebes  sa kapolisan nga ipabilin ang dignidad ug moral ascendancy aron magpabilin ang kalinaw sa atong lalawigan. Maisogon nga motubag sa matag obligasyon ug tahas niini pag-panalipud sa katawhan.

Samtang mapasalamaton usab ug dako si Police Provincial Director Atty. Gonzalodo sa supporta nga gihatag ni Governor Yebes sa kapolisan sa wala pagpakyas niini sa ilang hangyo nga ma-repair ang  nangaguba na nga mga service vehicle, pag-palambo sa headquarters ug ang pagpahimutang ug empleyado sa kapitolyo ngadto sa PNP Provincial Command aron ang ubang mga police  magamit diha sa ubang mga lungsod. (Joel Ello, The New Nandau, Vol. XVIII No.24)

 

Lando maoy bugtong gobernador nakabisita sa Barangay Calubian

LAING barangay na usab dinhi sa Zamboanga del Norte ang nahatagan karon ug kasaysayan sa gobernador sa probinsiya.

Daw sa nahipatik na karon sa kasaysayan sa barangay Calubian sakop sa lungsod sa Sindangan nga sulod sa 31 ka tuig gikan pagkatawo sa ilang barangay  pa sila personal nga gibisitahan ug gobernador sa probinsiya.

Uban ni Municipal Administrator kanhi Judge Mariano Macias nga maoy nag-representar kang Mayor Bert Macias, si Governor Rolando Yebes ang didto kini sa barangay Calubian atol sa ilang pagsaulog sa Araw ng Barangay.

Atubangan sa  daghang mga tawo mainiton nga gipadayag ni kapitan Edmar Ontal ang ilang dakong kalipay ug pagpasalamat nga wala nila damha maabot sa ilang barangay si Governor Yebes bisan sa kalayo sa ilang barangay nga kinahanglan pang  motabok  sa dako ug lalom kaayo nga suba. Sulod sa 31 ka tuig karon pa sila nabisitahan ug gobernador sa probinsiya.

Gipasabot sa gobernador nga ang iyang pagbisita diha sa mga kabarangayan kini aron personal niyang masayran kung unsay kahimtang sa mga katawhan ug unsay ikatabang sa probinsiya. Sama sa iyang pagbisita sa ubang mga barangay ang karsada maoy usa sa iyang mga prayoridad nga mahatagan sa igong pagtagad. Hinungdan nga kagahapon nakita ang pagtrabaho sa taga Provincial Engineering Office pag-ayo sa dalan paingon sa Calubian.

Gusto nga ipakita ni Governor Yebes nga masud-ong sa mga katawhan diha sa barangay nga adunay gobyerno ang naningkamot karon alang sa kaayohan sa tanan hinungdan nga kanunay gayud niyang bisitahon ang mga hilit nga barangay.

Hugtanon nga gidasig ni Governor Yebes ang mga barangay officials sa Calubian nga kinahanglan magasentro ang ilang barangay sa pagpananom ug sibuyas dahonan.

Kini maoy iyang pagdasig  sa dihang gi-presentar ni Kapitan Ontal ang kaabunda sa ilang sibuyas dahonan.

Mas labaw usab nga nadasig pag-ayo ang gobernador nga kinahanglang kanunay nga ayohon ang dalan paingon sa maong barangay aron mas sayon ug dali ang pagtumod sa maong produkto ngadto sa merkado sa Sindangan.

Ang sibuyas dahonan sa Calubian maoy usa sa gilantaw karon ni Governor Yebes nga maapil sa mga produkto nga itumod ngadto sa mga dagkong merkado sa Visayas diha na sa Go Negosyo ilalom sa Hi-Green Program sa probinsiya.

Human sa Calubian, didto usab ang gobernador sa probinsiya sa barangay Labakid, Sindangan nga nagsaulog usab sa ilang Araw ng Labakid.

Saksi sa BIBO program

USA ang barangay Calubian sa mga barangay sa lungsod sa Sindangan ning atong lalawigan sa Zamboanga del Norte kansang mga lomolopyo niiini maoy mga buhing saksi sa gihatag nga kaayohan sa Lando-BIBO (Barangay Indigent Beneficiaries Organization) nga maoy usa sa nag-unang programa sa Yebes administration.

Sa pakighinabi kang Dionesio Dediman , Lando-BIBO president, iyang giklaro nga dako kaayo ug gikatabang kanila ang maong programa ni Governor Yebes ilabina sa pag-atiman sa ilang panglawas. Sa karon kapin sa usa ka libo ka mga pobreng katawhan sa Calubian ang nahimong miyembro sa maong organisasyon.

Tanang mga lomolopyo sa ilang barangay ang natabangan ilabina panahon nga magpatambal kini sa hospital.

Gihatagan ug gibug-aton ni Dediman nga ang isyu nga padayon karong nang-gawas batok  sa programa sa gobernador ilabina sa Lando-BIBO kini ang pagdaot lang.

Sila mismo sa Calubian ang buhing saksi sa maong programa. Kaniadto maglisud sila sa pagpatambal, gani aduna pay makabsan intawon sa ilang kinabuhi tungod sa ilang kawad-on.

Gidugang ni Dediman nga bisan unsa pa ang gihimong pagbatikos sa giilang mga kritiko sa gobernador wala kini makapatandog kanila nga nakakita sa kaayohan sa mga programa nga gipatuman sa probinsiya. (Joel Ello, The New Nandau, Vol. XVIII No.24)

 

 

 

NOTE: SEND US YOUR NEWS.  Tell us what's going on in your barangays, clubs, schools, businesses and non profit organization. You can also send notices and announcements.
          

 

    Email to webmaster@dipolognon.com

      
Google
WEB THE DAILY DIPOLOGNON
 

THE DAILY DIPOLOGNON
DIPOLOG CITY, PROVINCE OF ZAMBOANGA DEL NORTE PHILIPPINES
www.dipolognon.com www.dipolognon.net  www.dipolognon.org  Keyword: dipolognon
www.dipologcity.com  www.dipologcity.net  www.dipologcity.org  www.dipolognon.com  www.dipolognon.net  www.dipolognon.org    www.dipolog.org  www.dapitan.com   www.eartajo.com  www.cagayandeoro.us 
www.artajo.us www.artajo.info www.eddie.artajo.name www.zamboangadelnorte.com  www.zambonorth.com  www.pagsalabuk.com  www.dipolog.biz www.artajo.biz  www.plasticextrusion.us www.cebu.org
www.davao.us  www.tagum.com  www.giscard.us  www.pagadiancity.com www.malaybalay.net  www.ozamis.com  www.tangub.com  www.oroquieta.net
 www.nabunturan.com www.znuc.org www.znch.ph
www.gingoog.com  www.ozamiz.us www.general-santos.com  www.surigao.net  www.kidapawan.com  www.iligan.us www.raelene.us  www.cagayan-de-oro.com   www.mutyasadipolog.com   www.twinzel.com
 
www.zamboanga.net   www.palmbeachgardens.us   www.islandgarden.net  www.cotabato.net  www.tacurong.com  www.butuan.us  www.pagadian.com  www.dipolog.us
www.zamnai.com
www.dipologhotels.com
   www.dipologpress.com  www.dipologsardines.com   www.extrusion.us www.ozamizcity.com  www.marawi.net www.dipologchamber.com   www.twinzeldipolog.com

Copyright©2008 by The Daily Dipolognon All Rights Reserved  PRIVACY POLICY & DISCLAIMER
Email : webmaster@dipolognon.com  Since October 18, 2000