Proyekto padayong ipatuman ning tuiga

Sa pagsulod ning tuig 2006, padayon gihapon ang pagpa- tuman ug pagtrabaho sa tanang mga mehoras dinhi palibot sa dakbayan ilawom sa administrasyon ni City Mayor Roberto Y. Uy, pinaagi na sa City Engineering Office ning dakbayan.

Mao kini ang nakuhang kalamboan sa CIO pinasikad sa Monthly Project Status Report nga gipadala sa naasoy nga buhatan ngadto sa buhatan sa hepe ehekutibo. Dugang nasayran nga ning kasamtangan, mokabat ngadto sa 30 ka mga mehoras ang padayong gitrabaho pinaagi sa buhatan sa City Engineering.

Samtang niadtong nakalabay nga Disyembre 29, 2005 hingpit nga natapos ang pagtukod sa usa ka unit nga 2-classroom nga edipisyo didto sa St. John Elementary School sa Upper Dicayas nga gigahinan ug kapin kon kulang P910,000; samtang niadtong tunga-tungang bahin usab sa miaging Nobiyembre hingpit usab nga natapos ang paghimo sa Line Ditch & Slope Protection didto gihapon sa naasoy nga barangay nga gigahinan ug P300,000 gikan sa 20% Development Fund.

Sa dugang kalamboan,  anaa na usab sa 90% ang pagtrabaho sa concrete drainage canal subay sa dalan Magsaysay, gikan sa dalan Rizal padulong sa dalan Bonifacio; 96.5% usab ang pagtrabaho sa concrete pavement subay sa Turno-Galas Brgy. Road, (porsiyon sa Sta. Isabel ug Sta. Filomena); 95% ang pagtrabaho sa dugang pagpalapad sa concrete pavement didto sa Relocation Site sa Upper Dicayas; samtang anaa na sa 90% ang pagtrabaho sa Gould Riprap didto sa Cogon-Diwan Bridge.

Gawas ning nahisgotang mga pagtrabaho, nasayran usab nga ang ubang mga proyekto dinhi sa dakbayan ang walay hunong nga gipatrabaho sa kagamha nang lokal tungod kay maoy tumong ug tinguha ni City Mayor Roberto Y. Uy nga kahatagan sa mga gikinahang lang proyekto ang dakbayan alang sa katawhang Dipolognon. (Dipolog CIO Press Release, Alb)

Hinabang nga abono sa Dipolog nadawat

Mokabat sa 350 ka mga botelya sa Farm Plus Foliar Fertilizer ang pormal nga gidawat ni Mayor Roberto Y. Uy gikan ni Dante Aleman, ang Chief of Staff ug representante ni 2^nd Congressional District Representative Roseller L. Barinaga, isip ayuda alang sa kagamha- nang lokal sa Dipolog ngadto sa mga mag-uuma ning dakbayan, particular alang sa mga mag-uuma sa basakan.

Nasayran nga ang nasangpit nga ayuda gikan sa Departamento sa Agrikultura, gipang-apod-apod sa mga kagamhanang lokal pinaagi sa mga representante sa ilang congressional district sa tibook nasud. Sumala pa ni OIC City Agriculturist Dionisio Mandawe, ang maong ayuda nga nadawat sa Dipolog tukma gayud tungod kay adunay mga mag-uuma nga naapektahan sa mga pagbaha-baha kaniadtong bulan sa Disyembre sa miaging tuig nga maoy nakahatag ug dakung kadaot sa mga pananum, ilabi na sa mga basakan.

Dugang ni Mandawe, nga ila nang gitakda ang pagpang-apod-apod niini nga liquid fertilizer ngadto sa mga naapektu hang mag-uuma sa sunod semana. Ang paghatag sa maong ayuda ngadto kang Mayor Uy gisaksihan nila ni OIC City Agriculturist Mandawe ug Agricultural Technician Alan Luna. Dugang nahibaloan nga kini nga ayuda maoy ikatulong hugna sa ayuda nga gihatag sa lokal nga kagamhanan  sa Dipolog alang sa  buhatan sa agricukultura gikan sa 2nd congressional district ning probinsiya sa Zamboanga del Norte. (Dipolog CIO Press Release, PRR)

Benepisyo sa namatay nga kapitan nadawat na

Usa ka tseke nga mibalor sa P22,000 bag-ohay lang nga gitunol ni Mayor Roberto Y. Uy  ngadto kang Winefreda Villanos, ang kapikas ni anhing Medardo Villanos, ang Barangay Chairman sa Lugdungan, ning dakbayan sa Dipolog.

Nahibaloan gikan ni City DILG Officer Elpidio Sagario nga ang nasangpit nga hinabang-benepisyo nga pundo mao ang death benefit claim sa kapikas ni namatay nga kapitan. Ang pagtunol sa nasangpit nga death benefit claim ngadto kang Ginang Villanos gisaksihan nila ni DILG Regional Director Loreto T. Bhagwani sa Rehiyon IX, CGLOO Sagario, DILG Asst. Prov’l. Dir. Simplicio Alfanta ug mga kawani sa Dipolog City DILG ug sa buhatan sa City Mayor dinhi sa Dipolog.

Sa iyang kabahin, mipabati si Ginang Villanos sa iyang pasalamat ngadto sa mga personahe sa DILG Rehiyon IX ug sa City DILG tungod sa pagtabang sa ilang pamilya aron  mapaabot ang  nasangpit nga death benefit claim.

Taga Dipolog DILG director

Dungog na usab ang naani sa mga Dipolognon sa pagsugod pa lang sa bag-ong tuig 2006 sa dihang gitudlo si Director Loreto T. Bhagwani, sa ka Dipolognon, sa puwesto isip bag-ong Regional Director sa Department of Interior and Local Government (DILG) sa Rehiyon IX.

Gipahigayon ang turning over of responsiblilities nila ni Director Quirino M. Libunao, ang miretiro na nga director, ngadto kang bag-ong Director Bhagwani niadtong Enero 3. Si Bhagwani gipahimutang isip DILG regional director ni DILG Asst. Sec. for Field Operations Leonilo B. Lariosa pinaagi sa seremonyas didto sa Pasonanca Convention Center sa Zamboanga City.

Kahibaloan nga si Bhagwani usa ka lumad Dipolognon nga nagsugod sa iyang pag-alagad sa publiko mga 36 na ka tuig ang milabay. Nahimo siyang sekretaryo sa Sangguniang Panlungsod sa lokal nga kagamhanan sa Oroquieta sa usa ka tuig ug  ang 35 ka tuig nga serbisyo publiko iyang gigahin sa buhatan sa DILG hangtud nga siya nahimong Director niini.

Sa iyang kabahin, mipasalig si Dir. Bhagwani nga dili makawang ang pagsalig nga gisangon kaniya isip DILG regional director sa Region IX tungod kay halos katunga sa iyang kinabuhi iya nang gigahin sa pag-alagad sa nasangpit nga buhatan ug sa pag-alagad sa mga katawhan. (Dipolog CIO Press Release, PRR)

  

Yuna Pa
By: Nico L. Balbuena
Unsay “No El”? Pag-Hil...!

Didto sa kaulohan, tunog kaayo kining gikagubtan karon nga kuno sa sunod tuig wala nay election ug kay way election, magpabilin sa ilang katungdanan ang karon nga mga pulitikong nanilbihan sa atong kagamhanan. Ug kon dili man mahinayon ang piniliay, motalidhay sa tumang kalipay ang karon nga nanaghupot sa nagkalain-laing positions. Tiaw mo ba nga dili na man sila makagasto aron magpabilin sa ilang tagsa-tagsa ka mga puwesto?

Ambot madawat ba kaha kining rason nga gipadas-og sa mga pabor ning way election: nga kuno ang election makadugang lang ug haling sa kagubot karon tali sa administrasyon ug oposisyon ug usab gastoso lang kuno kon ipahigayon ang election. Apan ang pangutana: Anus-a man nga dili gastoso ang piniliay nga gipahigayon na sa daghan nang mga tuig nga milabay? Ug dis-a ba nahimong barato ang atong piniliay?

Of course, daghan ang mga alinghuna nga gipasupot ngano nga milutaw kining panawagan nga i-scrap ang piniliay sunod tuig ug usa niini nga kusganong misugyot mao ang Constitutional Commission (ConCom) nga minugna sa administrasyon. Sumala sa gipadas-og sa ConCom, i-extend ang termino sa ilang pagpanirbisyo ug pipila ka tuig samtang ipadis-og ang transistion period gikan sa sistema presidential ngadto sa parliyamentaryong matang sa panggamhanan. Apan daghan ang nagduda sa katuyoan nganong gusto nilang i-scrap ang eleksiyon sunod tuig puhon. Sumala pa sa mga tigpaniid sa politika, kining pag-scrap sa gitakdang piniliay sunod tuig mao lamay pamaagi nga malikayan ni Presidente Gloria Macapagal Arroyo sa posibleng pagpalagpot kaniya sa iya karong gihuptang puwesto.

Kahinumdoman man god nga sa miaging tuig, gitay-og ang administrasyong Arroyo sa gihaon nga impeachment batok kaniya didto sa Kongreso. Kon wala pa lang mga kongresista nga mipabor kaniya pinaagi sa pagpatay sa impeachment, segurong napakanaog na siya gikan sa gihuptan niyang puwesto. Kini karon ang ilang gilikayan nga posibleng mahitabo...kon simbako sa eleksiyon sunod tuig daghan ang modaog nga taga oposisyon nga mga kongresista, mahamutang sa kakuyaw ang kahimtang niya. Segurado nga sa sunod nga impeachment nga ihaon didto sa hawanan sa Kongreso, daghan na unyang kongresista nga moboto pabor sa pagpasaka sa impeachment complaint didto sa Senado ug unya didto maglabad ang ulo ni Presidente Arroyo! Mao nga bisan unsay mahitabo....bahala nag ingnon silag baga ug mga nawong, ipadis-og gayod sa taga administrasyon nga walay eleksiyon sa sunod tuig nga pagahimoon.

Unsa bay mahitabo kon walay eleksiyon sa sunod tuig puhon? Well, una, malipay niini ang mga anaa karon nanaglingkod pa sa ilang tagsa-tagsa ka mga position kay tiaw mo ba nga i-extend ang ilang termino sa pagpanirbisyo ug niini dili na man sila unya makagasto ug daghang salapi aron ipamalit ug mga boto! Ang mag-alboroto, sa laing bahin, mao kadtong may ambisyon nga molansar sa nagkalain-laing position sa ipahigayong eleksiyon. Kon walay eleksiyon, goodbye ang ilang gipundar nga kahago ug salapi nga nagasto ning giingon nga “pamuhun-puhon!”

Kataw-anan apan may mga pulitiko na karon nga gasugod nag muntar sa mga “pamuhon-puhon” ug aduna gani ing nag-organize ug mga tawo isip pangandam sa dakong bugno sa eleksiyon nga lugaynon. Naa nay daghan dinhi ug didto nga nagsuroy-suroy sa mga kabalangayan ug nagsugod nag hatag ug mga donasyon ingon pananglit sa mga bola sa basketball, jetmatic pump ug daghan pang matang sa “pamuhon-punon” preparasyon sa umaabot nga eleksiyon. Mag-unsa na lang kining mga tawhana kon wala unya ing eleksiyon ug mag-unsa na lang kadtong ilang mga donations?

Of course, hugot nga gisupakan kini sa mga taga-oposisyon ug nila pa babagan gayod nila ang bisan unsang lakang sa taga-administrasyon nga ma-scrap ang eleksiyon sunod tuig puhon. Usa niini nga dakong supak mao ang Senado diin mayoriya didto nagtinguha gayod nga mokanaog si Presidente Arroyo gikan sa iyang puwesto. Dako kaayong tutol niini ang mga senador nga i-scrap ang eleksiyon sunod tuig kay nila pa, pamaagi lamang kini ni Presidente Arroyo nga malikayan niya ang posibleng pagsulpot sa lain na sab nga impeachment complaint nga nahimo nang “multo” nga nag-atang kanunay sa iyang luyo!

Ang labing misupak nga i-scrap ang eleksiyon mao ang majority sa mga katawhan nga kanunay nga nagdamgo nga unta kanunay may piniliay kay segurado gayod silang malipay! Tiaw mo bang nawad-an na man sila ug gatasan sa ilang mga panginahanglan. Kinsa na man unya ang ilang tagaan sa ilang mga resita nga gi-issue pa sa doktor niadtong miaging dekada? Kinsa na man unya ang ilang pangayoan ug pang-tuition, pamasahe ug ipamalit ug “lungon?” Sa mga estambay....kinsa pa may mopalit kanila ug tanduay, pangayong ipalit ug sumsuman ug labaw sa tanan, salapi nga ipamuhonan didto sa bulangan?

Bitaw, tinguha karon sa mga anaa karon sa puwesto nga gamiton nila ang giingon nga “Citizen’s Initiative” nga gisitar diha sa atong Batakang Balaod diin ang mga katawhan mismo ang mopadas-og ug mga kausaban sa probisyon sa atong Konstitusyon. Apan mosalir kaha ni nga ang mga tawo man mismo ang dakong supak nga walay ipahigayon nga eleksiyon sunod tuig puhon?

Walay eleksiyon sunod tuig puhon? Ambot lang...moutot bay umang? (Dipolog Chronicle, Vol.V No.29)

Nutrition nangandam alang sa MELLPI

Misugod na karon sa pagpangandam ang City Nutrition Division sa buhatan sa mayor ning dakbayan alang sa umaabot nga pagpahigayon sa lokal nga ebalwasyon alang sa “Monitoring Evaluation on Local Level Plan Implementation” (MELLPI), nga pagapasiugdahan sa Regional Nutrition Council karong umaabot bulan sa Pebrero.

Sumala sa dugang kasayuran nga nakuhan sa City Information Office gikan kang City Nutrition Action Officer Miriam Lacaya, nga subay ning umaabot nga ebalwasyon, ang iyang buhatan karon anaa sa paghipos sa mga outputs o accomplishments nga nahimo niini sa pagpatuman sa tanang mga programa sa nutrisyon sulod sa tibuok tuig 2005 dinhi sa dakbayan sa Dipolog.

Dugang pa ni Lacaya nga gawas sa mga pagpangandam alang sa MELLPI, ang City Nutrition Division mipahigayon usab ug “Operation Timbang” nga mao ang pagpanimbang sa tanang mga kabataan dinha sa atong mga kabaranggayan nga nanag-edad gikan 0 ngadto sa 71 ka bulan, aron sa pagsuta kon kining maong mga kabataan nagbaton ra ba sa ilang tukmang timbang o gibug-aton sibo sa ilang edad ug sa pagsuta usab niadtong mga matawag nga “undernourished” o kulang sa hustong pagkaon.

Kahinumduman nga ang dakbayan sa Dipolog nahimong “CROWN” Awardees sa milabay’ng tuig tungod sa sunod-sunod nga tulo ka tuig niining pagka-“Green Banner Awardee” dinhi sa Rehiyon 9 sa mga tuig 2002, 2003, ug 2004 gumikan sa malamposon niining pagpatuman sa tanang  mga programa sa nutrisyon dinhi sa dakbayan. (Dipolog CIO Press Release, Alb)

City Agriculturist gipaninglan karon sa SP-Dipolog

Modul-an na sa usa ka buwan gikan sa nahitabong flash floods sa dakbayan sa Dipolog apan hangtud karon wala pa makaduso ug report ang city agriculturist office pilay danyos sa maong kalamidad sa sector sa agrikultura ngadto na sa balay balauranan sa dakbayan.

Kagahapon kini ang milutaw sa regular session sa Sangguniang Panlungsod sa dihang gisumitir sa City Social Welfare Office ang ilang final report sa mga naapektuhang lungsura-non sa nahitabong baha ug ang danyos sa ilang mga personal nga mga kabtangan. Si Konsehal Peter Co, mipahayag nga kinahanglan ang city agriculturist sa Dipolog mosumitir usab sa iyang report kon pilay natala nga danyos sa sector sa agrikultura agig resulta sa maong pagbaha sa nakalabay nga Desyembre 23, para sila sa Sanggunian magiyahan usab unsay angayang lakang nga sagupon aron sa pagtabang sa mga apektadong mag-uuma.

Matud pa ni Konsehal Co sa pagkakaron kon ang mga meyembro sa Sanggunian sa Dipolog pangutan-on sa katawhan pilay danyos sa agrikultura sa nakalabay nga baha wala gayud silay ikatug-an kay wala usab mosumitir ngadto kanila ang city agriculturist ug report kabahin niini. Sa nasayran ang kasamtangan karong officer-in charge sa city agriculture mao si Mr. Dionesio Mandawe, human gitindakan ni Mayor Roberto Uy si Mrs. Daylinda Ferandos tungod sa pagtug-an sa tinood nga kahimtang sa ilang buhatan atubangan sa Sangguniang Panlungsod.

Ang konsehal nakasaway kon ngano nga nagtagsa-tagsa ang report kabahin sa maong flash floods nga unta angayan nga giusa ra ang tanan sa pagpresentar. Tungod sa kapaltos ni Mandawe sa pagsumitir ug report ngadto sa Sanggunian, matud pa ni Konsehal Co sila sa konseho wala mahibawo kon unsay tabang nga nalugway na sa siyudad ngadto sa mga apektadong mag-uuma, diha ra ba kutob sa paghatag ug pagkaun sigun sa nabutang sa report sa CSWDO. (Press Freedom, Vol. XVIII No. 29)

Bag-ong miembro sa Lando Bibo nanumpa

Sinserong nanumpa atubangan ni Governor Rolando Yebes ang 70 ka mga opisyales sa Lando-BIBO sulod sa lima ka mga Poblacion barangay sa lungsod Sindangan kagahapong adlawa.

Kini nagpaila lamang nga hugtanong gipatuman sa kagamhanang probinsyal ilawom sa Administrasyong Yebes ang mga programa nga naghatag ug dakong pagtagad sa mga labaw’ng nanginahanglan ning lalawigan. Gipasabot sa Gobernador ngadto kanila nga ang Lando-BIBO mao ang tubag sa kapobrehon sa tinguha sa iyang administrasyon nga ibton ang probinsya diha sa listahan sa pinakapobreng probinsya sa nasud.

Dugang pa ni Governor Yebes nga bulahan sila nga nahimong benepisyaryo niini tungod kay makapahimulos sila sa libreng tambal, konsultasyon, ug uban pang serbisyong medikal diha sa Tambalanang probinsyal. Kahinumduman nga aduna nay kinatibuk-ang 39 ka mga kabarangayan sa nahisgutang lungsod ang hingpit nga natukod ug napalig-on sa maong programa nga Lando-BIBO.

Matud pa ni CDAU Unit Head Mr. Roney Pacilan nga kasamtangang nagsugod na karon ang organizing sa Lando-BIBO sa mga lungsod sa Katipunan ug Manukan diin aduna na lamay duha ka barangay sa lungsod sa Siayan ang wala pa nasugdi sa pag-organize niini. Dugang usab nga gisaysay ni Pacilan nga “full swing” na ang implementasyon karon sa Health Care Assistance Program sa probinsya ug aduna na kini daghanang nakabenepisyo niini. (Mindanao Star, Vol. I No.52)

Mananagat nga nawagtang nakit-an na!

Magti-ayon nga nanagat, nawala sulod sa tulo ka adlaw, nadagsa sa Bayawan, Negros Oriental, anaa sa luwas nga kahimtang. Human sa halos tulo ka adlaw nga pagkawala gikan niadtong Enero 6, 2006 ang usa ka magti-ayon didto sa lungsod sa Manukan diin gikahadlokang nabanlas sa dakong balod sa dihang nanagat taliwala sa nasinating maot nga panahon, anaa na ang duha ka biktima sa luwas nga kahimtang karon sa Bayawan, Negros Oriental.

Ang magti-ayon giila nga sila Heremias Redera alias “Dodoy” ug ang asawa niining si Francisca Redera y Tugahan pulos hamtong ang pangidaron ug nanimuyo sa maong lungsod. Nadiskubre-an ang magti-ayon nga nawala sa dihang midangop sa Manukan Municipal Police Station ang inahan ni Heremias Redera nga usa ka Diolita Redera, 58 anyos, nanimuyo sa East Poblacion sa lungsod sa Manukan diin suma pa sa inahan niini nga ang magti-ayon nanagat kaniadto pang Enero 6 sa may alas 4 ang takna sa hapon sakay sa sakyanang panagat niini nga adunay markang 2004 nga bulok pula nagbaton sa 6 horse power nga makina ug wala na mahibalik gikan niadtong tungora.

Apan karong bag-o pa lang, adunay nakuhang kalambuan gikan sa Manukan PNP diin sumala pa ang magti-ayon anaa karon sa luwas nga kahimtang human makatawag ang mga biktima ngadto sa ilang mga kaparyente didto sa Poblacion, Manukan nga anaa sila mingdagsa karon sa Bayawan, Negros Oriental diin gikatakda usab nga mahidangat karong adlawa. (Mindanao Star, Vol. I No.52)

93 ka indigent nakapahimulos sa PHCAP sulod lamang sa Disyembre 2005

Sulod lamang sa Disyembre 2005, nakahitala na ug mokabat 93 ka mga pasyente sa Zamboanga del Norte Integrated Provincial Hospital nga benepisyaryo sa Lando-BIBO ubos sa programang Provincial Health Care Assistance kun PHCAP.

Kini maoy kasayurang nakuha gikan sa Officer-In-Charge Chief of Hospital sa tambalanang probinsyal nga si Dr. Ma. Chita T. Cunanan diin kining nasangpit nga 93 ka mga benepisyaryo ang nalugwayan sa hinabang ubos sa nasangpit nga programa. Ang maong mga pasyente ug benepisyaryo sa PHCAP sa Lando-BIBO nagagikan sa mga lungsod sa Leon Postigo, Sindangan, Katipunan, Jose Dalman, Piñan, Roxas, Polanco, Sergio Osmeña, Rizal, Siayan ingon man duha ka syudad sa Dipolog ug Dapitan.

Dugang nahibaluan nga sa ilang mga balayronon nga mokabat sa pipila ka mga libo ang uban niini na-discharge nga libreng nakapahimulos sa mga medisina, hospital charge ug doctor’s fee. Samtang ang uban mitunol sa ilang counterpart nga dili molapas sa 1,500 pesos gikan sa kapin 13 mil pesos nilang balayronon diin nagdepende lamang sa maabot sa ilang bulsa.

Kahibaluan nga ang maong programa gidumala sa Community Development Assistance Unit kun CDAU ug gihingusgan ni Gov. Rolando E. Yebes nga matunol ngadto sa mga katawhang kabus kinsa labing nanginahanglan sa pangalagad sa kagamhanang probinsyal. (Mindanao Star, Vol. I No.52)

Yebes suportado in Siasico

“Ang akong mga pagsalig ug suporta, dili kini ibaligya. Kon kinsa ang anaa sa gahum, amo siyang suportahan, kwartahan man siya o dili”.

Mao kini ang gipamahayag in Mayor Abundio Siasico saissuesa Siayan kalabot na sa kontrobersyal nga isyu sa Cha-cha kon charter change human sa gipahigayong Media Tour sa mga proyekto sa KALAHI-CIDSS sa Barangay Seriac ug Barangay Gunyan sa maong isuse, Enero 11.

Dugang pa in Mayor Siasico nga gituutukan nila karon ang dugang pagpalambo saisuse sa Siayan inay makighilambigit sa maong isyu. Gibutyag usab sa last-termer nga mayor nga wala pay desisyon ang grupo kalabot niini bisan pa man bag-o pa lamang silang nagagikan sa usa ka tigum sa grupo in Kanhi Congressman Romeo “Nonong” Jalosjos karong bag-o didto sa kauluhang Manila, isip usa sa mga supporters in Jalosjos karon.

Giangkon in mayor Siasico nga kaniadto usa siya sa mga supporters in Kanhi Governor Isagani isuseapan wala na man sa gahum si Amatong karon kon kinsa ang makatabang sa kalambuan sa ilang isuse, ila gayung suportahan. Dugang pa sa mayor nga dili siya magpakabale kon kontra partido ba ang anaa sa gahum tungod kay wala nila kini gi-huna-huna, ug personal nga interes lamang ang gi-apas. Si Mayor Siasico ang nagkanayon usab nga sa pagkakaron, wala pay mga opisyales nga iyang gihan-ay alang sa sunod nga eleksyon.

Si Mayor Siasico nagserbe na’g pulo ka tuig isip mayor sa maong isuse ug iyang gibutyga nga human unya sa iyang termino karon, wala na siyay plano pa nga molansar sa taas nga posisyon sa politika ug mobalik na siya ngadto sa dakbayan sa Zamboanga diin atua ang iyang pamilya. Sa susamang kalambuan, mipadayag sa ilang issue at ug pagdayeg ang Media Tour Team in Mayor Siasico tungod kay mikuyog gayud siya sa maong grupo uban sa iyang bise mayor ug pipila ka mga hepe sa buhatan sa kagamhanan sa Siayan atul sa pagsusi sa KALAHI-CIDSS projects sa nahisgutang duha ka barangay.

Ang maong grupo isuse sa Seria Water System nga nagkantidad ug P598,567 ug 1 unit 2-classroom building sa kantidad nga P932,132. (Mindanao Star, Vol. I No.52)

P427 milyones nahimong abot gikan sa mga magpapatigayon sa probinsya

Nakaangkon ug dakong abot ang buhatan sa Department of Trade and Industry sa Provincial Chapter sa Zamboanga del Norte human makabaton ug mokabat sa kapin 427.9 milyones pesos gikan sa mga magpapatigayon nga namuhunan sulod sa lalawigan.

Sa nakutlong kasayuran gikan sa buhatan sa DTI Provincial Director nga si Engr. Noel R. Bazan nasayran nga diha sa mga namuhunan nga magpapatigayon diin kasagaran niini mao kadtong mga langyaw nga nakaasawa ug mga lumad nga taga-probinsya nakabaton ug mokabat 427.904 pesos ang nahimong sumada sa abot kutob sa Disyembre 30 sa nakalabay’ng tuig.

Diha usab sa pagpanarbaho adunay nahitalang 4552 ang nalugwayan sa nagkalain-laing buhatan ug establisamento dinhi sa probinsya samtang nakabaton ug 83.48 milyones pesos ang nahimong abot sa pag-export sa mga produkto nga nagagikan sulod sa probinsya ug gibaligya ngadto gawas sa nasud. Samtang sa nahitalang business name registration adunay 950 sa orihinal ug sa renewal adunay 278 ingon man ang repair shop accreditation adunay upat sa orihinal ug 39 sa renewal. 

Gumikan sa maong kalambuan, paningkamutan sa nahisgutang  buhatan nga makakab-ot karong tuiga sa susamang kalampusan nga nahimo niadtong tuig 2005 aron makatabang usab sa pagpalambo sa probinsya sa Zamboanga del Norte ingon man ilugway ang mga trabaho ngadto sa mga unemployed nga katawhan ning probinsya. (Mindanao Star, Vol. I No.52)

Katipunan mapasalamaton sa KALAHI-CIDSS

Mipabati sa ilang dakong kalipay ug  pasalamat ang mga opisyales ug residente sa pipila ka mga kabarangayan sa lungsod sa Katipunan kinsa nakapahimulos sa programang Kapit Bisig Laban sa Kahirapan-Comprehensive and Integrated Delivery of Social Services kon KALAHI-CIDSS sa Department of Social Welfare and Development kon DSWD.

Mao kini ang nasayran atul sa gipahigayong Media Tour sa rehiyonal nga buhatan sa DSWD sa ilang mga KALAHI-CIDSS projects dinhi sa rehiyon 9 ilabi na sa mga kalungsuran sa Katipunan ug Siayan ning lalawigan ug Dumingag, Zamboanga del Sur, sugod niadtong Enero 9 ngadto sa Enero 13, niining tuiga. Ang maong grupo gilangkuban nila ni Emelita Acedo, regional coordinator, Fe de la Cruz, Regional Information Officer, Honey Alipio, Regional Social Marketing Officer, ug Jesus Abelle, area coordinator ug mga community facilitators sa KALAHI-CIDSS sa maong lungsod ug Municipal Engr. Zosimo Pasco ug mga sakop sa media sa dakbayan sa  Dipolog ug Zamboanga.

Sa paghidangat sa maong grupo sa may alas 12 ang takna sa udto,nag-courtesy call gilayon ni Mayor Patchito Eguia. Si Mayor Eguia ang nagpasalamat sa mga kawani sa KALAHI-CIDSS kinsa mipahimutang ug mga proyekto sulod sa 30 ka mga barangay sa maong lungsod ug hingpit nga nakatabang sa mga katawhan sa Katipunan. Ang Media Tour Team milahos gilayon sa Barangay Nanginan aron sa pagsusi sa water system nga gilugway sa KALAHI-CIDSS, Barangay Seres sa proyektong multi-purpose hall ug sa Barangay Dos, Poblacion sa proyektong armor blocks isip shoreline protection.

Niadtong Martes, Enero 10, ang maong grupo mibisita usab sa Balay Dangpanan sa Kabataan sa DSWD ning dakbayan sa Dipolog ug Regional Rehabilitation Center for Youth kon RRCY sa lungsod sa Polanco. Nasayran nga ang KALAHI-CIDSS nga proyekto usa ka dugang programa pinaagi sa mauswagon ug maayong pagpatuman sa DSWD. (Mindanao Star, Vol. I No.52)

NBN-11 aerial televiewers giawhagan pagbutang ug antenna para sa mas tin-aw nga signal

Gi-awhag karon ni NBN-11 Dipolog Manager Roney Pacilan ang mga aerial  televiewers nga magbutang sa ilang mga antenna diha sa telebisyon aron mas moklaro pa ang hulagway sa mga ipagawas nga programa sa local television network sa NBN11 dinhi sa probinsya sa Zamboanga del Norte.

Matud pa ni Mr. Pacilan nga pipila ka mga kabalayan nga nagbaton ug telebisyon dinhi sulod sa probinsya nga wala nag-subscribe ug cable ang mahimong makasunod sa mga programa sa NBN 11 pinaagi na sa pagbutang ug mga aerial antenna diha sa ilang telebisyon. Nakat-on gikan sa gihimong survey nga gawas dinhi sa sulod sa sentro sa dakbayan sa Dipolog maabot ang NBN 11 sa barangay Olingan, Obay Polanco, sa lungsod sa Roxas ug pipila ka portion sa lungsod sa Katipunan.

Niini bu-ot ipahibalo sa management sa NBN 11 ilabina kadtong mahiligon sa lotto nga adunay programa sa pagpagawas sa resulta sa lotto gikan sa kaulohang Manila sa matag-alas 9 ang takna sa kagabhion gikan sa adlaw’ng Lunes hangtud Dominggo nga makita sa local television network. (Mindanao Star, Vol. I No.52)

23^rd ZANACMA mobile conference gipahigayon sa lungsod sa Roxas

Tuyo sa Zamboanga del Norte Association of City and Municipal Agriculturists kon ZANACMA mao ang pagmugna unya ug mga proyekto nga mapahimuslan sa katawhan dinhi sa lalawigan sa Zanorte, mao ang dakong hunungdan nga namugna ang maong mobile conference nga gitambungan sa mga city ug municipal agriculturists gikan sa 25 ka mga lungsod ug duha ka dakbayan ning lalawigan nga gipahigayon didto sa Agricultural Training Institute sa may Barangay Irasan, lungsod sa Roxas kagahapong adlawa.

Gikalipay ni Mayor Carlito Feras sa maong lungsod nga maoy host sa maong panagtigum ang paghidangat sa mga agriculturist ug ni Regional Assistant Director sa Department of Agriculture nga si Ernani Obalo tungod sa maayong plano niini aron mapalambo ang natad sa agrikultura sa mga lungsod nga mao unya ang makahatag ug dugang paninabuhian sa mga katawhan.

Gaipalanog usab ni Provincial Agriculturist Atty. Bernado Concha nga angayan gayod maghiusa ang mga agricuturists ning lalawigan sa pagmugna ug mga lakang alang na mga proyekto nga ipabuhagay sa mga lungsod ilabi na sa hilit nga kabaranggayan sama sa pagtutok sa mga mag-uuma ug mangingisda aron mahatagan kini ug dugang ayuda gikan sa kagamhanang probinsyal sa pagpangulo ni Governor Lando Yebes nga naglantaw karon sa panginabuhian sa nagkalisod nga katawhan.

Dugang pa ni PA Concha nga dako gayod ang papel sa mga agriculturists ning lalawigan nga maoy angayan mangulo sa mga proyekto sa gobierno aron mas madali ang pag-implementar niini ngadto sa mga kalungsuran ug kabarangayan. Ang buhatan sa Provincial Veterinarian sa pagpangulo ni Mr. Vic Sanchez Jr ang Deputy Provincial Agriculturist for Special Projects ang mipaila usab sa produkto sa probinsya nga BioGrow Abono ni Lando usa ka organic Fertilizer nga gikan sa sabaw sa lubi nga mao unya ang makatabang sa pagpatubo sa mais. Ang maong abono makatabang unya kini sa mga corn farmers tungod kay barato kini ug epektibo kompara sa abono nga gibaligya sa merkado.

Ang maong mobile conference gitambungan usab sa mga miembro sa Sangguniang bayan sa lungsod sa Roxas sama ni Konsehal Rumar Legara ug The Power Nick Carbonel. (Mindanao Star, Vol. I No.52)

Krimen sa Dipolog mingkunhod sa tuig 2005

Adunay nahitabong pagkunhod sa nahitalang krimen niadtong tuig sa 2005 dinhi sa dakbayan sa Dipolog diin mokabat sa 245 ka mga kaso ang malampusong napasaka kumpara sa tuig 2004 nga adunay 254.

Base sa nakutlong impormasyon sa buhatan sa Dipolog PNP nasayran nga gikan sa bulan sa Enero hangtud Disyembre sulod sa tuig 2005 mokabat sa 245 ang mga napasakang kaso batok sa mga malapason sa balaod diin ang 176 niini ang nahilangkob sa index crime ug ang 69 niini mao ang non-index crime.

Naglangkob sa 176 ubos sa index crime mao ang siyam sa kasong pagpatay/murder, napulo sa homicide, 54 sa physical injuries, pito sa rape, 67 sa kasong pagpangawat/theft ug 29 sa kasong robbery. Nakaangkon usab ug 96 porceinto nga kalampusan diha sa kasulbaran sa mga kasong napasang-at diin kumpara niadtong tuig sa 2004 adunay 93 porceinto.

Subay niini, ang buhatan sa Dipolog PNP sa pagpangulo ni Psupt. Tomas Mina Hizon ang hepe sa kapolisan kanunay nga nagtukaw diha sa paglibot-suroy sulod sa ilang area of responsibility (AOR) aron mapamatud-an sa katawhan ning syudad nga ilang gituman ang gipanumpaang serbisyo nga mao ang pagproteher sa katawhan. (Mindanao Star, Vol. I No.52)

BFAR mohatag 3 mil ka kilo nga Agar-agar sa Jose Dalman ug Dapitan

Mohatag karon ug ayuda ang rehiyunal nga buhatan ang Bureau of Fisheries and Aquatic Resources kon BFAR pinaagi na ni Regional Director Virgelio Alforque ug tag  3 mil ka kilo sa Agar-agar alang na didto  sa dakbayan sa Dapitan ug sa lungsod sa Jose Dalman ning lalawigan.

Mao kini ang inpormasyon nga nahipos gikan ni Atty. Bernardo P. Concha ang hepe sa buhatan sa Provincial Agriculture nga ang nasangpit nga mga lugar ang pagahatagan kini sa tag 3 mil ka kilo sa agar-agar alang na unya dugang pagpalambo gawas sa ilang nasugdan nga proyekto. Gibutyag pa ni Concha nga kini isip tubag sa gihangyo gikan sa ilang buhatan basi usab sa nadawat nga tahu nga ang mga nasangpit nga lugar maoy usa sa naapektuhan sa dakung baha niadtong bulan sa Decembre sa nakalabay’ng tuig.

Ngani adunay mga kawani gikan sa National Office sa Department of Agriculture ug ang Regional Office sa Zamboanga City ang hangtud karon nagapadayon sa ilang pagsusi ngadto sa mga kalungsuran ug kabarangayan dinhi sa probinsya nga maoy labing naapektuhan sa kalamidad ug masuta ang nahimong damyos sa matag kaumahan. Sanglit ang pagdawat sa mga agar-agar  gikan sa Regional Office sa BFAR nag-agad lamang sa maayong dagan sa panahon tungod usab kay kong adunay maot ang pagsaka sa tubig diha sa kadagatan usa kini nga makahatag ug sakit sa igtalanum nga agar-agar. (Mindanao Star, Vol. I No.52)

Suspetsado gi-aresto sa kasong Acts of Lasciviousness

Malampusong gi-aresto karong bag-o pa lamang ang usa ka suspetsado nga nag-atubang karon sa kasong “Acts of Lasciviousness” didto sa lungsod sa Manukan. Ang suspetsado usa ka John Gorero y Gantalao alias “Bulldog” 21 anyos, ulitawo ug temporaryong nanimuyo sa barangay Saluyong sa nahisgutang lungsod.

Si Gorero ang gisikop pinasikad sa warrant of arrest ubos sa criminal case # 3047 sa salaod nga “Acts of Lasciviousness” nga gi-isyu ni Honorable Judge Ric S. Bastasa sa Municipal Trial Court sa lungsod sa Manukan.

Ang maong suspetsado temporaryo karong gi-detain sa selda sa Manukan PNP samtang naghulat sa pagpatawag ngadto sa korte ug sa tukmang disposasyon. (Mindanao Star, Vol. I No.52)

Zanorte Hornbills gisagop nga maoy official basketball team sa lalawigan

Usa ka resolution ang bag-ohay lamang napagawas gikan sa Sangguniang Panlalawigan nga mao ang pagsagop sa ZaNorte Hornbills nga maoy official basketball team sa probinsya sa Zamboanga del Norte.

Ang maong resolusyon numero 60 mao ang pagsagop sa nasangpit nga basketball team sa probinsya nga ZaNorte Hornbills kinsa nakisangka na sa mga banggi-itang basketball team sa nagkalain-laing lugar dinhi sa nasud.

Kining nahisgutang resolusyon ang gi-aprobahan kaniadtong Enero 2, 2006 didto sa Sangguniang Panlalawigan session hall atubangan sa mga membro sa mga bokal dinhi sa lalawigan sa pagpangulo ni Vice-Governor Francis Olvis. (Mindanao Star, Vol. I No.52)

POLANCO Adam na PASALAMAT FESTIVAL 2006

Adam na ang lokal nga pangagamhanan sa lungsod sa Polanco alang na sa ipahigayon nga PASALAMAT FESTIVAL 2006 SINULOG SA POLANCO karong umalabot Enero 29 ning tuiga.

Mao kini ang nasayran nga nahipos gikan ni Sangguniang Bayan Member Hon. Evan Hope “Boyet” Olvis ang chairman sa Committee on Tourism and Social Services sa maong lungsod nga adunay 8 ka mga contingents ang mosalmot sa maong sinulog.

Gilauman nga mosalmot ang lungsod sa Manukan, Tudela Misamis Occidental, Ozamiz City, Tangub City, Victoria Country Homes, Dipolog City, lungsod sa Liloy ug uban pa nga mosalmot unya sa maong kalihukan.

Dugang pa ni Konsehal Olvis nga pagasugdan sa usa ka santos nga misa diha sa simbahang katoliko sa maong lungsod sa may alas 6 ang takna sa kabuntagon ug  isunod gilayon ang street dancing gikan sa Poblacion South padung sa Polanco Central School alang na sa final showdown.

Gibutyag usab ni Konsehal Olvis nga ang 1^st prize mokantidad sa P50 mil, P30 mil alang sa second prize, ug ang 3rd prize P20 mil ug tag P5 mil alang na sa consolation prizes matag contingent.

Si Olvis ang nagkanayon usab nga ang maong kalihukan hugtanong gisuportahan sa mga residente sa Polanco nga atua na sa Estados Unidos ug nila ni Governor Rolando Yebes, Vice Governor Francis Olvis, Congressman Cecilia Jalosjos-Carreon.

Kini sibo usab sa pagsaulog sa kapistahan sa patron ni Sr. Santo Nino sa tinuig nga kalihukan sa Sinulog sa  dakbayan sa Sugbo. (Ps@lm, Mindanao Star, Vol. I No.52)

Daghan lalake nga mga hugawan kay sa babaye
Paglapas sa Ordinance 123 sa miaging tuig!

Milutaw karon nga mas daghang lalake nga mga hugawan kay sa mga babaye base annual report sa City Health Office kalabot sa pagpatuman sa City Ordinance 123 dinhi sa dakbayan sa Dipolog.

Sa tuig 2005, misaka ngadto sa 33% ang gidaghanon sa mga nakalapas sa maong balaod kon itande sa tuig 2004. Sumala sa accomplishment report nga gisubmiter sa buhatan ni Mayor Roberto Uy subay sa higpit nga pag-implementar sa ordinance 123, miabot ngadto sa 1,704 ka buok violators niining tuiga, kon ikompara sa 2004 nga adunay 1,124 nga nakalapas sa samang balaod.

Sa monthly status report, kasagaran sa mga nakalapas sa ord. 123 mao ang mga lalaki kay bisan asa lang mangihi, mangluwa ug pagsinagbot sa mga pampublikong lugar nga wala gitugot sa balaod.

Kasagaran sa nangasakpan dili taga Dipolog, mga dumoduong lamang nga nagagikan sa mga silingan nga lungsod sa Zamboanga del Norte nga mianhe dinhi sa dakbayan sa Dipolog.

Subay niini, subling giawhag karon sa kagamhanang lokal ang tanang mga katawhan nga magmatngon sa kanunay, dili maghugawhugaw sa palibot sa sentro sa siyudad, mosanong sa gipatuman nga Ordinance 123 ug likayan ang paghimo sa kalapasan aron malikay sa multa ug posibling silot nga gimando sa balaod depende sa ipahamtang sa hukmanan. (The New Nandau, Vol. XV No. 29)