Gawas sa 2nd District
Mayor Uy padayong nakadani sa suporta sa taga 1st, 3rd Dists.

Sa nagkadugay, nagkadaghan usab ang mga mipaabot sa ilang suporta ngadto kang Mayor Roberto Uy sa iyang lakang nga modagan pagka-Gobernador sa lalawigan sa Zamboanga del Norte. Mao kini ang nasinati sa pundok LAKAS-CMD sa ilang pagbisita sa mga kalungsoran ug kabarangayan dili lang sa ikaduhang distrito diin ang Dipolog mahilakip kon dili asta na sa mga kalungsoran ug kabarangayan sa una ug ikatulong distrito.

Mao man gani nga si Mayor Uy gihimo na karong sentro sa atake sa mga tigpamaba ni Yebes tungod tingali kay nakita nilang si Uy nagkakusog subay sa nakuhang pulso sa katilingban. Usab ang mga dili taga Dipolog ingon sa nadani sa nahimong binuhatan ni Mayor Uy sa Dipolog bisan sa hamubo lang niyang pagsulod sa politika ug serbisyo publiko. Kini, matud pa nila mahimo usab ni Uy kon siya mahimong gobernador sa lalawigan kay nakita nilang wala siyay pamolitika panahon sa serbisyo kondili ang pagsunod sa giingong “good governance” nga mao karoy gihinmong baroganan sa ilang pundok politikal ug mao usay gikinahanglan nila ilabi na sa kabarangayan ilabi na kadtong mga nasunog sa saad ug pasalig sa gobernador karon niadto pang milansar pa siya.

Sa iyang adlawan lang, apil ang daghanang barangay kapitan nga dili taga Dipolog ang mianhi ug mipabati sa ilang mainitong panghinaut. Sa Sibutad sa unang distrito, daghan nang barangay kapitan ang mipasalig sa ilang suporta. Sa Sindangan lang, hapit tanang barangay kapitan mipabati sa ilang pagpaluyo kang Uy. Sa Roxas, Jose Dalman ug Siayan mao ra usab ang nanghitabo. Kini sa ikaduhang distrito.

Sa ikatulong distrito, daghan ang nag-ambahan kang Mayor Uy sa iyang pagduaw sa Liloy ug Tampilisan karong bag-o. Tingali kini tungod sa nakita sa katawhan sa binuhatan ni Mayor Uy ug matang sa iyang pagdumala sa kagamhanan nga “ang binuhatan maoy tan-awon, dili ang saad maoy paminawon.” (Dipolog Chronicle, Vol.VI No.29)

Mga Pahimatngon Ning Umaabot Nga Eleksiyon

Ambot kon tinuod ba kadtong akong nasanggab nga balita nga posible gayod nga way eleksiyon karong umaabot Mayo kay kuno way salapi nga igasto tungod lagi kay wala pay napasa nga budget ang Kongreso. Matod pa sa akong amigo nga suhito kaayo didto sa kalihokan political sa kaulohan, posible sab kuno nga usa kini ka maniobra sa kasamtangang administrasyon aron paglikay ning posibleng pagpangdaog unya sa mga kandidato sa oposisyon. Dugang pa niya, posible sab nga gipabaniog ang way eleksiyon karong Mayo aron kuno ma-rattle ang taga oposisyon o kaha aron mokumpiyansa sila ug niana sila masorpresa kon kaliton ang pag-announce nga aduna diay eleksiyon!

Well, ma-aduna may eleksiyon o kaha kini ma-postpone, dili kini maoy atua nga tagaan ug pagtagad karon kondili atong tukion ang mga buhaton ug dili angay buhaton sa mga empleyado sa atong gobiyerno panahon sa eleksiyon. Dili ikalimod nga adunay mga empleyado nga dili mo masabot ang kinaiya ug batasan isip sulugoon sa atong kagamhanan. May anaa diha nga gakos-tuko kaayo sa mga pulitiko nga unta isip civil service nga sulugoon, ginadili man ang pag-apil-apil ning mga kalihokang-pulitikanhon. Kining mga tawhana matawag tang mga lunod-patay, mga tawong hilabihan ra kaayong nasipsip sa pulitiko hinungdan nga inig eleksiyon, kini sila ang mangunay gayod sa pagpangampanya ug mangunay pa ganig pamalit ug boto para sa ilang gidapigang kandidato. Pila na ba ka mga nangaging mga piniliay nga naobserbahan nako nga may mga empleyado sa City Hall ug Provincial Capitol ang nangunay gayod sa paghakot sa mga botante paingon sa presinto ug mao gayoy mo-guide sa mga tawo didto! Aduna say laing matang sa empleyado nga dili man gani plastada kaayong mangampanya apan idlom pod kaayong mangamang sa mga lideres sa pikas kampo ug kasagaran ato kini silang matawag nga mga “bagman.”

Isip empleyado sa atong gobiyerno, dili gyod unta sila mag-apil-apil idlom man o lantaran sa kalihokang-pulitika kay gawas nga supak kini sa gimbut-an sa balaod, mao kini ang hinungdan nga sila ma-initan sa Mayor or Gobernador nga nakadaog batok sa ilang gidapigan. Kinsa ba tuod ang Mayor o Gobernador ang dili maglagot sa usa ka empleyado nga nawonganay gayong nangampanya pabor sa kontra niyang kandidato? Mahitabo pa gayod nga kay notado kana sa imong pagpamolitika, tapos sa eleksiyon morag dili ka na mahimutang sa imong gitrabahoan kay ang imong loyalty katahapan na man. Bisan kon wala ka ray buhaton nga supak sa pamunoan, gamay mo lang sipyat initan ka kay gidudahan nga misabotahe sa mga polisiya sa kasamtangang nangatungdanan.

Kana lang ay, kanang tapos na ang piniliay, atong ma-obserbahan nga may mga chiefs of offices o bisan kasarangan lang nga empleyado nga gibalhin sa lain nga puwesto. Matingala dayon kag ngano man...unsa may hinungdan nga siya giinitan? Dayon mosantop sa imong hunahuna nga... aaaaah....kay sakop man god na siya ni kuan ug ni kuan....maong giinitan! Posible nga siya giinitan apan ngano man? Posible nga siya giinitan kay bagman man ni kuan o runner ni kuan! Sa tinuoray lang, wala may lain nga mabasol kon may mga empleyado nga magka-problema human sa eleksiyon. Maayo lang kon modaog ang ilang gidapigang kandidato, kay kon moparot diha dayon magsugod ang kalbaryo sa iyang pagka-empleyado. Dili man gani tanan apan nubenta-porsinto nga Mayor o Gobernador nga nakadaog may buhaton gayod niadtong mga empleyado nga midikit ug nangampanya sa iyang kontra nga kandidato. Si kinsa ba tuod nga Mayor o Gobernador ang dili magduda sa imong pagka-empleyado ubos sa iyang pamunoan nga patay-lunod ka mang nangampanya sa iyang kontra? Nan, kinsa ba tuod nga loyalty ang dili dudahan nga bisan kon nahuman na ang piniliay ang maong empleyado magpakita pa man gihapon ug mga timailhan nga dili siya makadawat sa kaparotan nga naangkon sa iyahang gidapigan? Tua ay, bisan human na ang eleksiyon nagsige pa gihapon siyag yawyaw kontra sa nakdaog nga mayor o gobernador!

Mao man bitaw nga adunay Civil Service Commission kay kini ang ahensiyang kanunayng nagmata aron masubay-subayan ang mga empleyado nga dili mag-apil-apil sa kalihokan-pampolitika. Ang angay gayod untang buhaton sa empleyado panahon sa eleksiyon nga siya mag-neutral ug dili magpagarpar nga siya may gidapigang Mayor o Gobernador nga kandidato. Aw, dili man ipasabot nga wala na kay kagawasan kon kinsay imong gidapigan. Ang punto mao nga kay may gidapigan ka mang mobandilyo kon kinsay imong kandidato, dili gayod malikayan nga ang kontra sa imong gidapigang kandidato mag-alburoto....ilabi na kon mamatud-an nga daghang mga tawo ang imong nahaylo aron adto mobotar sa imong kandidato. Bisan na gani kon dili ka mangampanya human sa imong pagpaila, inig kadaog sa kandidato sa kontra sa imong gidapigan, dili ka gayod matuhoan nga ang loyalty nimo adto na sab sa bag-ong namunoan! Mahitabo kana kay lagi, ang politika igihan ug hikawan! Pun-an pa sa mga sipsip ug balimbing nga maoy magtalo-talo sa bag-ong namunoan nga ikaw kuno “tawo” sa pikas grupo...kana, mao na gayod ang sinugdanan sa pag-antos nimo didto sa kalbaryo.

Eleksiyon na usab ug usag-usa kanato may kaugalingong kandidato nga dapigan ug botahan. Of course, atong katungod ang kinsay atong kandidato ug kinsay atong iboto. Apan dili pod tingali supak sa tawhanong katungod kon kita magpakahilom na lang kon kinsay atong mga kandidato nga iboto. Di naman tingali gikinahanglan pa nga atong ibandilyo kon si kinsay atong mga kandidato. Sa giingon ko na, way magbuot kanato kon si kinsay atong dapigan ug botahan. Apan mas maayo na lang gyod tong mag-pakahilom na lang ang maong empleyado aron dili siya madudahan sa sinahan ug hikawan nga mga mata sa pulitika. After all, ang mga pulitiko dili magpermanente sa ilang mga puwesto. They just come and go apan ang mga empleyado permanente nga naa magtrabaho sa atong gobiyerno. Kay di man gyod malikayan sa matang sa politika dinhi sa atua nga ang mga pulitiko hakog, hikawan, sinahan ug madudahon, dako kaayo ang bentaha kon ang maong mga empleyado magpabiling neutral ug magpakahilom. Wala man tingali ing mawala nato kon kana maoy atong himoon!  (Dipolog Chronicle, Vol.VI No.29)

Dinhi ipahigayon sa Dipolog
Alay Lakad Council nangandam alang  sa ‘Live Band Concert’ sa taga Amerika

Subsob na karon ang pagpangandam sa mga miyembro sa Alay Lakad Council sa Dipolog alang sa pagpahigayon ug “live band concert” sa pundok taga Amerika nga gikatakdang ipahigayon dinhi karong umaabot bulan sa Pebrero.

Kahibaloan nga kining maong kalihokan gidasunan sa mga miyembro sa Alay Lakad Council sa dihang mipahibalo sa ilang tinguha ang bandang “Liquid Blue” nga mopahigayon ug “live concert” dinhi sa Dipolog nga libre sa ilang talent fee ug wala nay hunahunaon bahin sa ilang plete gikan sa America padulong nganhi ug pagbalik, gawas lang sailang pagpuyo dinhi, pagkaon ug incidental expenses nga mahitabo atol sa ilang pagpahigayon ug concert dinhi sa Dipolog.

Nahibalo-an nga ang nasangpit nga “live concert” sa Liquid Blue maoy pinaka-unang live band concert sa usa ka foreign band nga ipahigayon dinhi sa Dipolog. Ang Liquid Blue maoy nahimong America’s “Best  Dance Band, World’s Most Traveled Band” ug “America’s Best Independent Artist.” Naila ang maong banda sa ilang top 10 single sa USA pinaagi sa ilang music video nga “Real.”

Sa pagkakaron, gihan-ay na sa Alay Lakad Council sa Dipolog ang nagkalain-laing komitiba nga maoy molihok atol sa pagpangandam ug pagpahigayon sa maong live band concert ug ang budgetary requirements alang sa galastuhan sa pagpromote sa maong kalihokan aron makaani kini ug dakung suporta gikan sa mga katawhan ug mga supporters sa Alay Lakad. (Dipolog CIO Press Release, Dipolog Chronicle, Vol.VI No.29)

Tigum gipatawag sa Comelec pagpangadam sa eleksiyon

Gitawag niadtong Biyernes sa buntag, Enero 12 ang mga sakop sa Election Registration Board ug mga opisyales o representante sa mga political parties nga nia sa dakbayan sa Dipolog sa usa ka panagtigum didto sa buhatan sa City Election Registrar aron sila mapahibalo ug mahatagan sa mga katin-awan mahitungod sa mga lagda ug talamdan sa Comelec alang ning umaabot nga eleksiyon sa Mayo.

Ang maong tigum gipatawag ni Acting City Election Officer Rogel Q. Bengua aron pagtuki kabahin sa mga aplikasyon alang sa rehistro; aplikasyon sa pagbalhin sa rehistro gikan sa mga siyudad ug munisipalidad; reactivation sa aplikasyon sa pagbalhin sa rehistro gikan sa mga siyudad ug munisipalidad; aplikasyon sa pagbalhin sa rehistro sa susamang dakbayan ug ang reactivation niini; aplikasyon sa correction of erroneous entry sa voters’ registration record; aplikasyon sa change of surname  o civil status sa rason sa kaminyu-on; ug  aplikasyon alang sa reactivation nga gi-file sa buhatan sa City Election Officer.

Dugang ni Bengua nga hatagan usab ug pagtagad sa Election Registration Board ang pagkanselar sa sa registration records niadtong mga botante nga mitaliwan na atol sa mao gihapong adlaw. Kining kalihokan maoy usa sa pagpangandam sa Buhatan sa COMELEC sa tibuok nasud alang sa umaabot nga bugnong lugaynon nga gitakda karong umaabot Mayo 14. (Dipolog CIO Press Release, Dipolog Chronicle, Vol.VI No.29)

Deadline Enero 22\
Pagbag-o sa lisensiya, permit sa mga negosyo nagapadayon

Nagapadayon karon ang kagamhanang lokal ning dakbayan sa Dipolog sa pagpang-renew sa tanang mga lisensiya sa patigayon dinhi palibot sa dakbayan alang ning tuig 2007. Sigun sa gipahibalo ni License Officer Lourdes Pabilona sa buhatan sa Mayor, nga sugod niadtong Enero 2 ug hangtud karon, nagapadayon sa pagpang-renew sa tanang mga lisensiya sa patigayon ang ilang buhatan duyog sa ubang mga hingtungdang ahensiya alang ning maong katuyoan.

Dugang ni Pabilona nga sama sa nakalabayng tuig, ang ilang buhatan mipahimutang gihapon sa “One-Stop-Shop” dinha sa City Hall Lobby nga gilangkoban sa mga buhatan sa City Architect, Building Official, Bureau of Fire Protection, Police, City Health, City Planning ug uban pang hingtungdang buhatan, aron dili na mahasol pa ang mga magpapa tigayon nga moanha aron magpa-renew sa ilang mga business permits.

Gipahiblo sa License Officer nga kining maong business permits renewal hangtud lamang sa Enero 20. Si kinsa kadtong magpapatiga yon nga mapakyas sa pagpa-renew sa ilang mga lisensiya sulod sa gitakdang panahon hayan nga mapahamtangan sa tukmang multa sigun sa gitakda sa balaod. (Dipolog CIO Press Release, Dipolog Chronicle, Vol.VI No.29)

P15.5 gipahat alang sa pagpadayon sa proyektong pang-imprastraktura

Mikabat sa kapin sa P15.5-milyon balor ang napahatan sa 20% Development Fund sa kagamhanang lokal sa Dipolog aron sa pagpadayon sa mga nagkalain-laing proyektong imprastruktura dinhi sa dakbayan, partikular ang pagkonkreto sa mga kadalanan dili lang dinhi sa mismo sa sentro sa siyudad kondili lakip usab sa mga kabarangayan.

Kini nagtumong sa pagpalapad sa mga si-ot nga kadalanan nga sagad maoy makahatag sa problema sa trapiko sa mga sakyanan, ang pagpahimutang ug septic tanks sa relocation site sa Olingan, pagtukod ug dugang nga core houses sa Laoy Relocation Site, alang sa rehabilitasiyon sa mga barangay health centers, pagpalambo ug rehabilitasyon sa mga pampublikong propriedad ug mga pampublikong tulunghaan ilawom sa city divison sa DepEd ug ang pagpalambo usab sa mga multi-purpose halls sa kabarangayan.

Sa monthly project status report nga gisumitir sa Buhatan sa City Engineer ngadto sa Buhatan sa Hepe Ehekutibo alang sa bulan sa Disyembre 2006,  mikabat sa kinatibuk-ang P32.5-milyon ang napahat nga mga proyekto sa nagkalain-laing barangay dinhi sa Dipolog aron sa pagpalambo ug pag-ayum-ayom  sa imprastrak- tura, mga pampublikong propriedad ug tulunghaan, ug paghatag ug pagtagad sa flood control program sa dakbayan ilabi na karong dautan ang panahon sa ting-ulan nga nagsugod sa sayong bahin sa Enero. Sa kinatibuk-ang P32.5-milyon, P15.5-milyon niini ang pahat nga nagagikan sa 20% Development Fund ug ang kapin sa P3.1-milyon niini gikan sa Flood Control Program. Ug gikan usab niini nga pahat, mokapin usab sa P3.4-milyon ang balor sa mga proyektong nakompleto na. 

Sa gihapon, nagapadayon ang pag-implementar sa mga dagkung proyekto sama sa construction  sa Virginia-Linay Road sa Barangay Diwan, pagkonkreto sa Miputak-Estaka-Turno Road sa Barangay Miputak, pagtukod sa 11 ka mga lawak tulunghaan nga adunay pansayan sa Sicayab Elementary School, pagtukod sa parking shed sa Dipolog Land Transport Terminal sa Miputak, pagpadayon sa pagtukod sa perimeter fence sa Dipolog City National High School sa Barra ug   ang pag-ayom-ayom ug pagtukod sa farm-to-market roads sa kabarangayan dinhi sa dakbayan. (Dipolog CIO Press Release, Dipolog Chronicle, Vol.VI No.29)

BAG-ONG TUIG GISUGAT UG DAGHANG KAWAT

Mipalanog karong semanaha ang pipila ka mga yanung lungsuranon sa daku nilang kalabaka sa pagsulbong karon kawat. Sigun sa ilang pag-asoy ang nakapabalaka kanila mao ang punto nga sulod lamang sa usa ka gabii halos silang tanang mga silingan dungan nga gipangkawatan ug mga butang sa ilang mga sakyanan.

Matud pa sa usa ka magpapatigayon ang iyang sakyanang multicab gikawatan ug baterya, samtang ang iyang silingan ang gikawat mao usab ang yanta sa sakyanan, samtang sa ilang atbang ang taklob usab sa tangke sa gasoline ang gikuha samtang gisuwayan usab ug abri ang pultahan sa usa ka kotse nga wala mahinayon. Sumala pa nila daku sila ug kompeyansa nga mapalig-on na sa siyudad sa Dipolog ang kampanya niini batok kriminalidad ilabi na nga nagbatun na ug support group ang Dipolog Police pinaagi sa Team DAVID.

Tungod sa maong hitabo pipila kanila nakapangutana ug giunsa man diay ni Mayor Roberto Uy paggamit ang iyang intelligence fund nga mokabat kapin sa P10 milyones ka pesos. Sa nakita karon ang Team DAVID dili na support group sa Dipolog Police kay mao nay gihimong escort sa mayor sa iyang mga lakaw ug sa namatikdan anaa ra kini kanunay nagpundo tungod sa ilang panimalay. Sigun sa gipanday nga ordinansa sa Sangguniang Panlungsod sa Dipolog alang sa pagmugna sa Team DAVID wala malakip sa trabaho niini ang VIP escort service, kay ang tahas nila mao ang pagtabang panahon sa kalamidad ug emerhensiya ug ang pagtabang sa Dipolog Police sa kampanya batok krimen.

Sa nakita karon ang pamilya ra sa mayor maoy gibantayan sa Team DAVID para sa ilang siguridad ug dili ang mga magbubuhis nga katawhan sa Dipolog. (Press Freedom, Vol. XIXNo. 15)

DONASYON PARA HOSPITAL SA PROBINSIYA PADAYONG NAGTUBOD

Padayong nagtubod ang donasyon alang na sa mga kagamitan para sa hospital gikan sa mga donors niini sa gawas sa nasud. Gibutyag ni Atty. Ivan Patrick Ang nga sa katapusang bahin karong buwan sa Enero 2006 adunay laing moabot nga 40 footer container van gikan sa Renewed Life in Jesus Christ sa Amerika pinaagi sa kang Mr. William Raymund Bill Farace, ang executive director nga naminyo ug Dipolognon nga si Guadalupe Martalla.

Matud pa ni Atty. Ang ikatulo na kini nga shipment sa mga gamit sa tambalanan nga nadawat sa kagamhanang probinsiyal. Giklaro ni Atty. Ang ang nasangpit nga donasyon walay obligasyon ang kagamhanang probinsiyal gikan sa pagtransportar niini sa Amerika paingon sa pantalan sa Cagayan de Oro. Ang bugtong magastu sa probinsiya mao ra ang paghakut niini gikan sa Cagayan de Oro City paingon dinhi sa Dipolog.

Ang sulod niini susama ra sa sulod sa miabot nga 20 footer nga container van niadtong Desyembre nga adunay mga medical supplies nga gikinahanglan gayud sa atong mga tambalanan sa probinsiya.          Ang umaabot nga shipment, matud pa ni Ang gilangkuban sa 37 ka hospital beds, examination table, stress test machine nga gamitonon sa pagdiagnos ug mga cardial disorders. Gitataw usab ni Atty. Ang nga ang madawat karong donasyon dili pa gayud mao ang katapusan kay paghuman niini lain na usab nga 40 footer container van ang ipadala nga kargahan gihapon sa dugang pang mga ekipo sa tambalanan.

Ang ubang una nga miabot, matud pa ni Atty. Ang gigamit na karon sa Zamboanga del Norte Integrated Provincial Hospital, samtang ang ubang giandam alang na sa operasyon sa bag-ong provincial hospital. Bisan tuod ug mga secondhand ang gihatag nga mga ekipo apan gibana-bana ni Atty. Ang nga dili moubos sa lima ka milyon ka pesos ang balor niini. (Press Freedom, Vol. XIXNo. 15)

UNANG GINANG SA DIPOLOG NANGILAD GIGAMIT PANGALAN SA GOBERNADOR

Gitumbok ang unang ginang sa dakbayan sa Dipolog nga maoy utok sa pag-ilad sa ubay-ubay nga katawhan sa barangay Turno niadtong Enero 6, 2007 nga gipatapok sa iyang presidente sa womens organization ang mga hingtungdan didto sa Turno Elementary School kay kuno manghatag ug pinaskuhan si Governor Lando Yebes. Mokapin sa 20 ka representante sa pamilya ang naghuwat-huwat ug napalaw kay walay gobernador nga mipakita kanila ug nanghatag ug pinaskuhan sigun na sa gikapahibawo ngadto kanila.

Si Barangay Kagawad Maya Gumela sa Turno, mikonpirmar sa maong insidente kay siya mismo nakadawat ug text message kon tinood ba gayud nga manghatag ang gobernador ug pinaskuhan niadtong nakalabay’ng Sabado kay gitagsa-tagsa sila ug pahibawo sa ilang mga pinuy-anan nga paadtoon sa barangay hall o kaha sa Turno Elementary School kay didto manghatag sa pinaskuhan. Si Kagawad Gumela mitataw nga walay sugo o magpahibawo kaniya si Governor Yebes nga tapokon ang katawhan sa ilang barangay kay manghatag siya ug pinaskuhan niadtong adlawa. Kahinumduman nga sa samang adlaw nagtapok sa Bamboo Garden ang mokapin sa 400 ka mga purok coordinators sa LANDO BIBO gikan sa 21 ka barangay sa Dipolog nga nanumpa nga magpasakop sa partido ni Presidente Gloria Macapagal-Arroyo ang Kabalikat sa Mamamayang Pilipino o KAMPI.

Gituhuan nga ang nahitabo sa Turno gituyo aron sa pagbulabog sa gikatakdang panagtapok sa tanang purok coordinators sa LANDO BIBO sa maong adlaw. Si Kagawad Gumela midugang sa pagpahayag nga sa gihimo niyang pagsubay milutaw ang pangalan ni Myrna Abalora ang presidente sa womens organization ni Mrs. Evelyn Uy ang unang ginang sa Dipolog diha sa Barangay Turno. Sigun sa istorya sa mga napalaw nga mga molopyo sa Turno, matud pa ni Gumela ang pangalan ni Abalora maoy migawas nga nagpahibawo kanila nga ang gobernador manghatag ug pinaskuhan busa magtapok didto sa eskwelahan.

Daku ang pagduda nga si Abalora gisugo sa asawa sa mayor nga interesado mokandidatu pagka mayor karong eleksiyon sa Mayo dinhi sa Dipolog aron sa paglawgaw sa gikatakdang panagtapok sa mga purok coordinators sa LANDO BIBO ug aron sa pagdaut sa pangalan ni Governor Lando Yebes kay maoy kaatbang sa iyang bana karong umaabot eleksiyon. Si Gumela mipahayag nga iyaha gayud nga gitinguha nga masukna si Abalora kon unsa ka tinood nga siya ang nagsugo sa mga katawhan sa ilang barangay nga magtapok kang manghatag ug pinaskuhan ang gobernador. (Press Freedom, Vol. XIXNo. 15)

PEO TOP PERFORMER SA MGA ECONOMIC ENTERPRISE SA ZANORTE

Ang Provincial Engineering maoy top performer sa nagkadaiyang economic enterprise nga gibatunan sa kagamhanang probinsiyal sa Zamboanga del Norte. Kini ang gipahayag ni Provincial Accountant Marivic Carpitanos, may kalabutan na sa performance sa mga economic enterprise sa probinsiya sa tuig 2006. Matud pa sa provincial accountant hangtud karon nagapadayon nga giimplementar nila ang contracting services nga unang gisagup sa panahon ni kanhi Governor Isagani Amatong.

Mismo ang mga government hospitals sa probinsiya mitala usab ug pag-umento sa ilang income sukwahi sa pagtuo nga natilok ang ilang resources tungod sa pag-implementar sa Provincial Health Care Assistance Program ni Governor Lando Yebes ilawom sa Barangay Indigent Beneficiaries Organization kon LANDO BIBO. Gipatin-aw ni Carpitanos nga ang tanang mga tambal ug libreng sirbisyo nga libreng gilugway sa kagamhanang probinsiyal ngadto sa mga meyembro sa Lando BIBO gibayran sa budget gikan sa mga hingtungdang buhatan sa probinsiya sama sa buhatan sa gobernador.

Sumala pa niya kada tambal ug sirbisyo nga gihatag libre sa probinsiya ngadto sa mga kabus nga katawhan kini gibayaran sa pundo ilawom sa buhatan sa gobernador alang na sa maong programa. Ang nahitabo igo rang nagbalhin-balhin sa pikas bulsa ang kuwarta sa probinsiya nga mosangko ra gihapon diha sa panudlanan sa lalawigan. (Press Freedom, Vol. XIXNo. 15)

ELUMBARING UG NOBLE DILI NA MOPADAYON

Duha ka gisaligang kandidatu sa oposisyon sa Zamboanga del Norte ang gikatahong dili na mopadayon sa ilang laraw nga motugpo sa ilang mga kawo sa politika karong eleksiyon sa Mayo 14, 2007. Sa sayu pa unang gibutyag ni Governor Lando Yebes nga si retired Police General Rene Elumbaring, dili na mopadayon sa iyang plano nga mokandidatu pagka kongresista sa primero distrito batok kang Congresswoman Cely Jalosjos-Carreon.

Matud pa ni Governor Yebes ang bag-ong pangalan nga milutaw karon nga mokandidatu sa oposisyon pagka kongresista sa primero distrito mao ang kapikas ni kanhi Congressman Artemio Adasa nga si Che Adasa. Samtang didto sa 3rd congressional district, gikataho nga si retired Police General Prospero Noble ang midisidir usab nga dili na mopadayon kay gitanyagan ug posisyon sa gawas sa nasud. Matud pa ni Governor Yebes, sa iyang pagpakig hinabi uban ni Congressman Iggy Arroyo, gipahayag niini nga wala dawata sa KAMPI ang aplikasyon ni Noble nga mopasilong sa partido.

Samtang nagapabiling intact ang mga sakup sa Alliance of Parties for Progress nga walay bisan usa niini ang mipalag ug mitabok sa pundok sa oposisyon atubangan sa gipanghinambog niini nga mopauwan sila ug kuwarta karong umaabot nga eleksiyon. Sa nakita naglisud sila karon sa pagpangita ug kandidatu sa pagka mayor sa mga kalungsuran atubangan sa ilang tanyag nga sila ang mogastu tanan sa ilang mga kampanya. (Press Freedom, Vol. XIXNo. 15)

MAYOR UY UG EVELYN SAMA SA KUGITA GIHAWIRAN TANANG NEGOSYO SA DIPOLOG

Dakung kalisud ang masinati sa katawhan sa Zamboanga del Norte kon ang mamahimong amahan sa probinsiya negosyo ra maoy nag-una sa iyang agenda ilabi na ug mag-apil-apil ang asawa.        Kini ang gipamulong ni Governor Lando Yebes, sa dihang nanumpa ug mipasilong sa partido ni Presidente Gloria Macapagal-Arroyo ang KAMPI ang kapin sa 400 ka mga barangay leaders gikan sa 21 ka barangay sa Dipolog niadtong Enero 6, 2007.

Matud pa ni Governor Yebes kinahanglan hinumduman sa atong katawhan ang nahitabo panahon ni Marcos diin ang asawa nag-apil-apil usab sa politika misamot ug kaut-ut ang atong nasud ug naglisud ang atong mga katawhan ilawom sa ilang conjugal dictatorship. Matud pa ni Governor Yebes possible kini mahitabo kon sila si Mayor Roberto Uy ug Mrs. Evelyn Uy maoy magkubot sa rinda sa pangagamhanan sa probinsiya ug dinhi sa Dipolog sigurado ang mga katawhan maoy mahimong makaluluoy kay lahi ang ilang batasan.

Gihagit sa gobernador ang mga Dipolognon nga mosuway sa pagpangayo ug tabang sa balay sa mayor kay iyang nasiguro nga ang usa ka lungsuranon diha ra gayud kutob sa ilang opisina o kaha sa timbangan sa kopras ug dili makasaka sa ilang taas o kaha atubangon personal sa managtiayon. Matud pa ni Governor Yebes suhito siya niini kay nahimo siyang suod nila ni Berto ug Evelyn kinsa mahadlok mopasaka ug Pinoy sa ilang balay kay sa ilang panlangtaw ang Pinoy tapulan, kawatan ug dili kasaligan.

Sumala pa niya sulod sa siyam ka tuig nga pagdumala ni Berto sa Dipolog maoy milutaw nga nahimong kugita ang iyang pamilya diin halos tanang negosyo na maoy gisudlan ug gihawiran sa ilang mga galaway gikan sa pagpamaligya ug semento ug kabiliya, gasoline ug lubricants, ligid, lending, catering, pagmonopoliya sa presyo sa kopra, mais ug humay hangtud na sa pagbatun karon ug printing press. Matud pa sa gobernador matandi karon unsa nga matang sa proyekto ang gipatuman ni Berto ug sa probinsiya.

Alang sa Dipolog ang proyekto ni Berto pulos ra semento, samtang ang programa ug proyekto karon sa probinsiya nagtumong sa pagtubag sa panginahanglan sa katawhan sama sa Provincial Health Care Assistance Program sa LANDO BIBO, Hi-Green sa agrikultura samtang mipakatap ang mga infrastructure projects diha sa kabarangayan. Matud pa sa gobernador nahagit siya sa pagyagyag niini kay gisugdan usab ug daut ni Berto ang iyang programa sa probinsiya ilabi na sa LANDO BIBO nga sumala pa walay nahimo.

Gitataw ni Governor Yebes ang iyang programa nga LANDO BIBO nakatabang sa daghanang kabus nga katawhan sa probinsiya, apan ang programa mao ang Berto Semento diin sila ray nadatu. Sa samang bahin gibutyag ni Governor Yebes nga ipahibawo na nila karong Sabado, Enero 13, 2006 ang tanang mga pilionon sa tibook probinsiya sa partido sa administrasyon ang KAMPI. Hinoon nagdumili sa pagbutyag ang gobernador si kinsa ang ilang kandidatu pagka kongresista sa 2nd district.

Sumala pa sa gobernador sa dihang suod pa sila ni Berto, gisultihan siya niini nga ang iyang panlantaw sa mga kawani sa city hall iyahang mga ulipon nga kinahanglang motuman ug mosunod unsay gusto ipabuhat sa amo. Kini nagpamatuod lamang nga ang ilang panlangtaw sa atong mga katawhan ubos ra kanila. Samtang aduna pa silay panginahanglan diha kanimo pinangga ka, hinatagan sa tanan nimong pangayuon, apan wala na kiniy panginahanglan sa Pinoy dili na kini managad. Samtang nagtubo usab ang gidaghanon sa mga paryente ni Mayor Uy nga midayag sa ilang pagsuporta sa kandidatura ni Governor Yebes sa eleksiyon karong Mayo 2007. (Press Freedom, Vol. XIXNo. 15)

BERTO GITAY-OG NI LANDO SA IYANG KAUGALINGONG TERITORYO, 400 KA PUROK LEADERS MIPASILONG SA KAMPI

Mokabat sa 400 ka mga purok leaders sa 21 ka barangay sa dakbayan sa Dipolog ang opisyal nga nanumpa sa ilang pagpa sakup sa partido ni Presidente Gloria Macapagal-Arroyo ang Kabalikat sa Mamayang Pilipino o KAMPI. Sila nanumpa atubangan mismo ni Governor Lando Yebes ang provincial chairman sa KAMPI dinhi sa Zamboanga del Norte.

Sa nasayran ang mga bag-ong meyembro sa KAMPI mga purok coordinators sa Barangay Indigent Beneficiaries Organization o LANDO BIBO gikan sa 21 ka barangay sa dakbayan sa Dipolog kinsa mipalanog sa ilang dakung interest nga mopasilong ilawom sa partido ni Presidente Arroyo. Matud pa ang nasangpit nga pagpanumpa sa mga purok leaders nga nagpasakop sa KAMPI nakapatay-og sa grupo ni Mayor Roberto Uy kinsa nagpadali-dali ug pahakot usab ug mga tawo sa pipila ka mga barangay sa Dipolog nga gidala sa wala pa mahibaw-ing lugar niadtong Sabado sa buntag Enero 6, 2007.

Samtang nagsaboy-saboy usab ang mga meyembro sa PISAC ni Berto sa palibot sa Bamboo Garden diin gipahigayon ang oath taking ceremony sa kapin sa 400 ka mga purok leaders nga nagpasakup sa KAMPI aron sa pagpaniid si kinsa kaayo ang mitambong. Nalakip na sa mitambong mao ang pipila ka mga kawani mismo sa city hall sa Dipolog, kinsa nangatawa na daan nga karong adlawa Lunes hayan adto na sila isalibay ni Mayor Uy sa Diwan o kaha sa Linabo tungod sa ilang pagpasilong karon sa KAMPI ilabi na nga nakita sila sa mga PISAC sa mayor.  Apan kini wala makapabalaka kanila kay sumala pa naanad na sila sa harassment nga gihimo sa administrasyong Uy sulod sa siyam ka tuig niining pagdumala sa city hall.

Pipila sa mga purok leaders nga misulti nagkanayon nga dili nila ibaylo ang tag usa ka libu ka pesos nga ipalit ni Berto karong eleksiyon sa benepisyo nga ilang nadawat karon ilawom sa LANDO BIBO. Samtang sa iyang kabahin si Vice Governor Francis Olvis sa iyang pakigpulong mitataw nga ang Dipolog dili maangkon ni Mayor Uy nga iyahang bailiwick kon maoy lantawon ang nahimong resulta sa eleksiyon sa 2001 ug 2004 diin nagpakita nga siya igo lamang molabaw sa mamahimo niyang kaatbang ug lima ka libu ka botos.

Matud pa ni Vice Governor Olvis, siya pa hinoon maka-angkon nga ilahang bailiwick ang lungsod sa Polanco kay napakita na nila sa nanglabay’ng eleksiyon nga gipatuman nila ang straight voting sa ilang lungsod nga maoy migawas sa piniliay. Sumala pa ni Vice Governor Olvis ilawom sa KAMPI sila magtinabangay gayud sama sa saud nga magbawos-bawos. (Press Freedom, Vol. XIXNo. 15)

Konsehal Mejorada mibiya na ni Mayor Uy, mipasilong sa landong sa APP

Pinaka-unang higayon gideklarar ni Konsehal Atty. Ricky Mejorada dinhi sa Dipolog ang iyang pagbiya ni Mayor Berto Uy ug pagpasilong sa landong ni Governor Rolando Yebes sa umaabot nga election.

Kini maoy opisyal nga gideklarar ni Mejorada atol sa gihimong meeting sa 200 kapin ka mga political leaders didto sa lungsod sa Roxas, Zamboanga del Norte sa pagpanguna sa 28 ka mga barangay kapitan nga mitambong. Sa maong meeting dungan usab silang nanumpa timaan sa ilang pagpasilong sa KAMPI atubangan sa provincial chairman niini nga si Governor Rolando Yebes. Gipahayag ni Mejorada nga motapos unta siya sa iyang ikatulong termino isip city councilor sa Dipolog apan gumikan sa mga kakulian nga dili malikayan ug sa mga panghitabo nga wala niya damha hinungdan nga nakadesisyon kini nga dili na siya mopadayon sa iyang ikatulo nga termino dinhi sa Dipolog ug ipadayon ang iyang pagserbisyo sa tibuok segundo distrito.

Gipadangat ni Mejorada atubangan sa mga katawhan nga mitambong sa maong panagtagbo ang iyang pinaka-unang pagdeklarar nga suporta kang Governor Yebes. Kung mahinumduman, niadtong miaging semana nahinabi sa mga sakop sa ZNUC ang last termer nga bukal sa segundo distrito Board Member Atty. Ricky Mejorada ug miklaro nga board member ang lansaran sa iyang anak nga si Atty. Ricky Mejorada. Gipasabot ni Atty. Ricky Mejorada nga kadaghanan sa mga katawhan ang nasayod nga kauban sila ni Mayor Uy dinhi sa Dipolog apan kinahanglan gayod lantawon ang gitawag nga KAUBAN.

Sa nasayran biktima usab si Mejorada sa maot nga batasan ni Mayor Uy. Si Mayor Uy ang mi-traydor kaniadto ni Amatong ug sa grupo sa APP. (Mindanao Star, Vol.II No.52)

Nalimot sa proyekto iyang gidawat sa probinsya
KAPITAN BASTASA SA GALAS GI ANGO-ANGO NA!

Mahulagway nga gi-ango-ango na ang kapitan sa barangay Galas ning dakbayan sa Dipolog nga si kapitan Bartolome “Oming” Bastasa diha na sa iyang pagpanghimakak nga walay nahatag nga proyekto ang Yebes administration alang sa ilang barangay subay na sa gipasalig niini ni Governor Yebes.

Angayang masayran nga subay sa nakuha nga video file sa PIC/NBN-11 nakompermar nga niadtong Hunyo 6 niining tuiga atul sa Hudyaka mismo si Kapitan Bastasang maoy midawat sa proyekto gikan sa probinsiya nga mao ang pagsemento sa karsada phase I sa sitio Banicap. Gani kini ang nagpasalamat pa ug dako kang Governor Yebes sa paghatag sa maong proyekto tungod kay dili sama kaniadto sa nanglabay nga administrasyon gihikaw ang mga proyekto diha sa mga kabarangayan.

Apil sa midawat sa pag-turn-over sa maong proyekto mao usab si City Administrator Romeo Reyes. Aron sa pagkompermar niini ania ang pamahayag ni kapitan Bastasa atul sa gihimong turn-over sa maong proyekto. (Mindanao Star, Vol.II No.52)

Buhatan sa Red Cross nabalhin sa Fishport?

Imbes kay serbisyohan ug alagaran sa buhatan sa Red Cross ang mga katawhan nga nanginahanglan sa ilang serbisyo sama sa dugo ila na man hinoon kining itugyan sa mga blood sucker nga anaa gipatipok sa fishport ning dakbayan sa Dipolog.

Si Roney Pacilan ang Unit Head sa Community Development Assistance Unit kon CDAU nagkanayon nga daghan sa mga myembro sa LANDO-BIBO ang mireklamo ngadto kaniya kon nganong itugpo sila sa Red Cross ngadto sa mga tawong nagbaligya ug dugo nga anaa gitapok sa Quarter sa Team David diha sa fishport. Ang mga myembro sa LANDO-BIBO nakapangutana kon nganong itugpo sila sa fishport nga unta kini dunggo-anan ug tapokanan raman sa mga mananagat dala ang ilang isda.

Ning puntoha ang mga sakop sa Lando Bibo nagkanayon nga nabalhin na di-ay ang buhatan sa Red Cross ngadto sa fishport kay didto man sila paadtoon ug sa dili pa sila makapalit ug dugo doktrinahon una sila sa politika ayha makapalit ug dugo. Sa iyang kabahin ang Unit Head sa CDAU nagkanayon nga ang Red Cross mao man ang ahensiya nga dangpanan panahon nga manginahanglan kita ug dugo ug dili unta mabalhin sa laing dapit ang ilang serbisyo sama sa nahitabo karon nga didto na sa fishport modangop ang mga tawong nagkinahanglan ug dugo.

Ning maong sitwasyon daku ang pagtoo sa mga sakop sa LANDO-BIBO nga gigamit sa politika ang mga tawong namaligya ug dugo nga anaa gitapok diha sa fishport nga gidumala sa mga sakop sa Team David, usa ka grupo nga iya sa Mayor ning dakbayan sa Dipolog kinsa mideklarar na nga makigsangka kang Gov. Lando Yebes karong eleksyon. Ang LANDO-BIBO maoy usa ka programa sa kagamhanang probinsiyal nga naghatag ug ayuda sa mga pobreng katawhan sa higayon nga makahinagbo sila ug problema sa panglawas. (Mindanao Star, Vol.II No.52)

Sindangan Football Club kampyon sa Hofer Football Cup sa Ipil, Sibugay

Dungog usab sa mga katawhan Zamboanga del Norte and naangkon sa mga kabatan-unan gikan sa lungsod sa Sindangan  ning lalawigan sa ilang kadaugan nga nakuha isip kampyon human mi tapos ang  1st Dr. Dulce Ann K. Hofer Football Cup nga gipahigayon didto na sa Ipil Grandstand, Lungsod sa Ipil, probinsya sa Sibugay niadtong Nov. 26 – Dec. 29, 2006.

Ang maong torneyo nga gi partisipahan sa mga teams : Sindangan FC, Ipil FC,  GRH Hofer, IFC United,  Kabasalan Team B, Kabasalan Team A, AMMC FC,  WMSU-Tampilisan, Univ. de Zamboanga ug ang Alicia FC. Nahimong nagkasangka ang Sindangan FC tali na sa Alicia FC sa championship match nga mi resulta sa punto o goals nga 2-1 pabor sa Sindangan FC nga maoy nakaangkon sa kadaugan.

Ang Sindangan FC nga natukod sa mga kabatan-unan aron makahatag dugang kalambuan sa natad na sa paugnat sa kusog nga kini gi panguluhan ni Mr.  Antonio Buca isip Presidente ug Trainor ug Mr. Khenn Hamac isip Coach sa Club. (Mindanao Star, Vol.II No.52)

YES Football Tournament-Lando Yebes Cup ipahigayon sa Sindangan

Gumikan kay nasayran ni Gov. Lando E. Yebes sa kaaktibo sa  mga kabatan-unan sa Sindangan diha na sa paugnat sa kusog sa dula nga Football, iyang gipasilong kini sa programang Youth Enhancement Support program kun (YES) sa pangagamhanang probinsyal aron mahatagan ug dugang suporta sa ilang pagpadayon ug ugmad.

Ang YES usa ka lihitimong programa nga initiatibo sa gobernador nga makahatag kalambuan sa kabatanunan nga nagtangag ug daghanang benepisyo dili lamang sa paugnat sa kusog kun dili lakip na sa tanang aspeto sa kinabuhi sa mga batan-on. Gumikan sa ilang na aangkon sa kadaugan sa nakalabayng torneyo sa Ipil, Sibuguay, si Gov. Lando E. Yebes nagpasiugda gilayon sa YES FOOTBALL TOURNAMENT-LANDO E. YEBES CUP nga kini paga salmutan sa mga lokal nga mga football clubs sa Sindangan karong Enero 13, matag adlawng Sabado nga ang dula didto na sa Sindangan Pilot Demonstration School Football Field sa maong lungsod.

Ang torneyo nga nagtangag ug dakong ganti ug mga tropeyo alang na sa mga mahimong mananaug. Matod pa ni Gob. Yebes nga kining pag padula sa mga kabataan usa ka maayong estratehiya sa pangagamhanan aron paglikay sa mga kabataan sa maot nga mga pagsulay sa ilang adlaw adlawng kalihukan. (Mindanao Star, Vol.II No.52)

Mindanao Star Police Round-Up

Tinikbasay sa Brgy. Cogon, usa ka kinabuhi nakalas

Usa ka madugong wala damhang insidente niadtong Hwebes sa gabii diin, usa ka kinabuhi ang nakalas, samtang laing usa ang samaran nga igsoon ra usab sa biktima human sa nahitabong tinikbasay, sa dihang nagaka-engkwentro human ang anak sa suspetsado giyab-an ug tuba sa biktima.

Sa spot report nga atong nahipos karong gikan sa Dipolog PNP, giila ang biktima nga usa ka Jude Pontanar y Alaban, 23 anyos, ulitawo, taga purok 7 sa Sitio Gusawan sakop sa Brgy. Cogon ang biktima maoy nakalas ang kinabuhi human maka-angkon sa mga laglom kaayong samad dinonggaban ug tinikbasan sa parte sa iyang lawas diin gikatahong dead on arrival sa tambalanan. 

Sa initial nga imbistigasyong nga gihimo ni Police Investigator Ruel Talaid sa Dipolog PNP nasayran nga mga alas siete pasado ang bikitima nga si Jude Pontanar nag-inom kauban sa iyang mga barkada sa tindahan sa usa ka Paulina Montefalcon sa nasangpit nga dapit. Apan sa halawom na nilang panag-inom ang biktima mitanyag sa pag-inom ug tuba sa usa ka Rey Gayawon silingan sa biktima apan gibalibaran kini, hinungdan nga nasuko ang biktima ug iyang gisabligan ug tuba si Rey Gayawon.  Sigon sa report human sa maong incedente si Gayawon mitug-an sa iyang amahan nga si Marcelino Gayawon kalambigit sa maong incidente.

Sa nasayran human makabalo ang amahan nga si Marcelino mipauli kini’g dali dali ug mikuha’g sundang, dayog balik, walay daghang langas, gitikbas ug giluba-luba ang biktima sa makadaghang higayon hangtod natumba, samtang ang igsoon sa bniktima nga usa ka Lito Pontanar misulay untag pakgang apan gitikbas usab sa suspetsado naka-angkon usab ug tinikbasan sa iyang bokton hinongdan nga misibog.

Human sa incedente ang mga biktima gipangdala sa tambalanang probinsyal apan si Jude Pontanar dead on arrival.  Samtang sa pinaka-uwahing report nga nahipos ang suspetsadong si Gayawon misurrender usab dayon ngadto ni PO3 Ruel Talaid sa Dipolog PNP ug gitanggong na karon sa selda para sa tukmang pagpatay.  Na-recover usab sa otoridad ang dose polgadas nga sundang nga nabulit sa dugo sa mga biktima. (Mindanao Star, Vol.II No.52)

Lando-Bibo dakong ayuda sa katawhan

Gipabati ni Mrs. Hermesilla Taruc sa barangay Silinog sa dakbayan sa Dapitan ang iyang dakong pagdayeg sa programang LANDO-BIBO sa lalawigan tungod kay matud pa sa ginang nga dako kining ayuda sa mga labaw nga nanginahanglang katawhan dinhi sa probinsya.

Tungod niini, naaghat sa pagpa-miyembro ang maong ginang kagahapong adlawa didto sa opisina sa Community Development and Assistance Unit tungod usab sa tuyo niini nga matabangan ang iyang pamilya panahon nga adunay problema sa panglawas nga mabati niini.

Ngani gibutyag ni Mrs. Taruc nga ang iyang mga kaparyentehan sa lungsod sa Katipunan ang dugay na kining nahimong benepisyaryo sa maong programa ug kini mingtestimonya nga ang LANDO-BIBO dili diay usa ka bakak kun dili usa kini ka programa sa gobyerno nga dako ug tabang nga mahatag sa mga pobreng katawhan ning lalawigan. Sa susamang bahin, dako usab ang pasalamat ni Rek Perry Hibalay usa ka residente sa barangay Miputak human kini makakuha sa PHCAP card ug nahimong benepisyaryo sa Lando-Bibo.

Gipahayag ni Hibalay nga ang iyang pagpa-myembro sa Lando-Bibo positibo kining makatabang sa iyang pamilya tungod kay sa nasayran niini pinaagi sa mga silingan nga nakapahimulos na sa maong programa dako gayud kining tabang ilabi na panahon nga malandig sila sa tambalanan. Kahinumduman nga sugod sa pagmugna sa programang Lando-Bibo dul-an sa napulo ka libo na ka mga pasyente ang natabangan niini diha sa Provincial Hospital.

Gihatag nga ayuda sa maong programa ang pagpanghatag sa libreng tambal ug pagkaltas sa balayranan niini panahon nga kini ma-admit diha sa Tambalanang Probinsyal. Angayng’ mahibaloan nga ang programang Lando-Bibo dili lamang kini nagsentro sa pagpanghatag ug tambal ug ayudang pangmedikal diha sa tambalanang probinsyal apan nang-apod apod usab kini sa mga programang kapangi-nabuhian sa katawhan ilabi na sa mga lagyong kabarangayan ning lalawigan. (Mindanao Star, Vol.II No.52)

Grupo sa LGBT ug kagamhanang probinsyal mopahigayon ug Dance for a Cause

Human sa malampusong pag-organisa sa mga lesbian ug gay community dinhi sa lalawigan milaum karon ang mga myembro sa LGBT (Lesbian, Gay, Bisexual and Transgender) nga mohimo sa usa ka fund raising activity uban sa pagduyog sa Kagamhanang Probinsyal.

Ang nasangpit nga kalihukan ang gikatakda kining ipahigayon karong bulan sa Pebrero diha sa Hudyaka Village sa karaang nahimutangan sa Zamboanga del Norte Cultural and Sports Center. Ang maong fund raising activity ang maglangkub kini sa indigay sa mga nagkadaiyang matang sa sayaw, sayaw sama sa dancesports, modern dance ug uban pang susamang kalingawan.

Adunay dagkong mga ganti ang ihatag unya sa mamahimong mananaug sa maong pakontes. Ang maong kalihukan ang bukas kini sa tanang gusto mosalmot. Alang unya sa dugang detalye sa maong indigay makigkita lamang sa youth coordinator sa Youth Enhancement Support sa opisina sa Community Development Assistance Unit ning lalawigan o dili ba kaha hinoon makigkita lamang kang Mr. Jet Recentes ug Roger Tabotabo. (Mindanao Star, Vol.II No.52)

Barangay Council sa Punta mibabag sa proyekto gikan sa kapitolyo

Imbes kay maglantaw ang mayoriyang sakop sa barangay council sa Barangay Punta ning dakbayan sa Dipolog para sa dugang pang proyekto para sa kaayuhan sa mga katawhan sa ilang barangay apan mibabag na man hinoon kini sa proyekto nga ihatag sa kagamhanang probinsiyal. Atol sa ilang regular nga sisyon sa konseho sa maong barangay wala madasoni ang usa ka resulosyon nga gipangamahanan ni Konsehal Reynaldo Tampon nga maoy gikinahanglan aron mabutangan ug atop ug bangko ang ilang basketball Court para ikomberter unta kini ngadto sa usa ka mini-gym.

Imbis suportahan sa mayoriyang sakop sa konsiho sa barangay ang maong resulosyon ni konsehal Tampon gibabagan na hinoon kini ug mipasar sa laing resulosyon nga mag-imbistigar sa nagapadayong proyekto ni Gov. Lando Yebes sa maong barangay nga water system.

Si konsehal Tampon dihang nahinabi sa Zamboanga del Norte United Correspondents ZNUC nagkanayon nga dili unta ipatunhay sa iyang mga kauban sa konsiho ang bulok sa Politika tungod kay wala pa may campaign period. Matud pa niya nga unta lantawon sa iyang mga kauban ang kaayuhan nga ihatag sa kagamhanang probinsiyal para sa kaayuhan sa mga katawhan sa ilang barangay. Sumala pa ni konsehal Tampon nga sa tibook konseho sa barangay Punta duha lamang sa iyang mga kauban ang misuporta sa iyang gipangamahanang resolusyon kini gilangkuban nila ni Konsehal Ildefonso Jimenez ug SK Chairman Rainer Saile.

Tungod sa maong kahimtang wala gayud makalabang ang resolusyon ni konsehal Tampon ug laing resolusyon na hinoon ang gipasar sa mayoriyang sakop sa konsiho sa maong barangay nga nagpunting sa pag-imbistigar sa nagapadayong proyektong patubig ni Gov. Yebes tungod kay matud pa ni Konsehal Ildefonso Jimenes nasapawan ang proyektong patubig ni Mayor Berto uy dinhi sa Dipolog ug boot sa iyang mga kauban nga kaalyado sa mayor nga ipatang-tang ang billboard nga gibutang dool sa proyekto ni Mayor. Matud pa ni konsihal Jimenez nga siya maoy naningkamot nga mapatuman ang maong proyektong patubig sa ilang barangay sa Punta tungod kay kulang ang susamang proyekto ni Mayor Uy nga patubig usab para i-apod apod sa mga kabalayan.

Matud pa niya nga ang maong proyekto nga tipik sa tag-tunga sa milyon ka pesos nga proyekto ni Gov. Yebes nagapadayon na karon ug iyang paninguha-on nga mahuman na kini karong bulana. Sumala pa ni konsihal Jimenez nga andam siyang mo-atubang sa iyang mga kauban nga magpa-inbistigar sa nagapadayong proyektong patubig sa gobernador didto sa ilang barangay. Sila si konsihal Jimenez ug konsihal Tampon mi-awhag sa ilang mga kauban nga unta ang kaayuhan para sa ilang barangay maoy ilang lantawon ug dili sagulan sa bulok sa poltika. Kahinumduman nga si Mayor Uy midiklarar na nga modagan pagkagobernador sa probinsiya kong mahinayon ang election karong bulan sa Mayo ning tuiga. (Mindanao Star, Vol.II No.52)

Mayor Uy siguradong langawon sa umaabot election, Noble ug Elumbaring di na modayon paglansar

Mahitabo nga langawon ang kandidato pagka-gobernador sa Lakas NUCD-UMDP Zamboanga del Norte Chapter sa umaabot nga election, gumikan kay adunay mga miyembro kanila ang dili na modayon sa paglansar sa posisyon nga ila untang lansaran.

Sa pinaka-ulahing kamada sa politika sa maong grupo, nasayran nga sa unang distrito hingpit nang gisalikway ni retired General Elumbaring ang offer sa Lakas nga maoy himoong manok pagka-kongresista sa 1st district. Subay niini hayan mahitabo ang rematch nila ni incumbent congresswoman Cely Jalosjos-Carreon ug Che-Che Adaza. Sila si Carreon ug Adaza ang nagka-engkuwentro kini niadtong 2001 nga piniliay.

Samtang sa ikatulo nga distrito dili na usab mopadayon sa paglansar pagka-kongresista si retired General Prospero Noble. Posibli nga gidawat ni Noble ang bag-ong posisyon niini sa gobyerno pagka-ambassador. Sa maong kausaban sa grupo sa Lakas, natay-og karon ang kampo ni Mayor Berto Uy tungod kay siguradong langawon kini sa umaabot nga election nga diin walay mga tawo nga modala kaniya sa nahisgutan nga mga distrito.

Usa sa posibling nakatampo sa desisyon nila ni Noble, Elumbaring ug Labadlabad mao ang gipahibalo sa Lakas-NUCD National Chapter nga angayan gayud nga tumanon ug respitohan ang unsa may naumol niini nga kasabutan tali sa KAMPI nga kung adunay molansar diha sa local sa unsa mang posisyon kansang  kandidato incumbent ilalom sa KAMPI dili mahitabo nga atbangan kini ug kandidato nga gikan sa LAKAS, ipatigbabaw niini ang equity of the incumbent. Ug kung ipamugos nga aduna gayuy mo-atbanga nga kandidato nga gikan sa Lakas dili kini suportahan sa ilang National Chapter sama sa nahitabo karon ni Mayor Uy.

Angayang masayran si Mayor Uy ilalom kini sa partido nga Lakas apan nakig-sangka kini ni Governor Yebes nga maoy provincial chairman sa KAMPI.Sa karon tumang pagpaningkamot usab ang gihimo sa kampo ni Rosendo Labadlabad aron nga makapasilong kini sa grupo sa APP. (Mindanao Star, Vol.II No.52)

Gov. Yebes gihinay-hinay na ug guba
sa iyang kaatbang pinaagi sa maot nga pamaagi

Gihinay-hinay na ug guba karon si Gov. Rolando Yebes sa mga kabaranggayan dinhi sa Dipolog nga gituhoan nga hinimo sa iyang kaatbang pinaagi sa pagamit sa iyang pangalan. Usa sa biktima niini mao ang mga katawhan sa Bolicon, Turno ning dakbayan sa Dipolog. Niadtong Sabado adunay tawo nga mipalakaw ug istorya sa maong barangay nga adunay ihatag nga pinaskohan si Governor Yebes alang sa mga residente sa Bolicon Turno.  Sa pagkapagya sa maong storya ang residente sa nahisgutang lugar kini ang unang nagkatapok sa barangay hall ug mibalhin kini ngadto sa Turno Elementary School sa pagtuo nga didto naghulat si Governor Yebes.

Human sa pipila ka oras nilang hinulat ila na lang nahibaw-an nga dili gayod tinuod nga nagpatapok ug mga tawo si Governor Yebes sa dihang mismo si Konsehal Maya Maghinay Gumela ang maoy mpasabot sa mga tawo nga dili tinood ang gipalakaw nga storya, kini ang iyang gihimo sa dihang ubay-ubay na ang nangutana kaniya kong unsa ka tinood nga manghatag ug regalo ang gobernador. Sa maong hitabo migawas ang pangalan sa usa ka Myrna Balora, miyembro sa women’s group ni Evelyn Uy nga matod pa maoy nagpahibalo sa mga katawhan sa Bolicon, Turno nga si Governor Ybese ang magpatapok ug tawo aron nga manghatag ug regalo.

Hinoon, giklaro ni konsehal Gumela nga wala pa gayod niya ma-storya si Balora kung unsa ka tinood nga siya maoy nagpahibalo sa mga katawhan sa Turno. (Mindanao Star, Vol.II No.52)
 

TLC ming abot na sa Sibuco

Mga katawhan sa Barangay Poblacion sakop sa lungsod sa Sibuco mipadayag sa ilang dakung pasalamat ngadto ni Governor Yebes alang sa programang TLC nga ilang natagamtaman. Mokabat sa 780 ka mga katawhan ang nakapahimulos sa gipahigayong Tabang ni Lando sa Comunidad kon TLC Medical and Dental Outreach Mission didto sa Barangay Poblacion sakop sa lungsod sa Sibuco ning lalawigan niadtong adlaw’ng Miyerkules, Enero 10 ning tuiga.

Mao kini ang nasayran ning maong mantalaan nga natagamtaman na gayud ang maong programa nga gitunol sa kasamtangang administrasyon ni Governor Rolando Yebes pinaagi sa mga kawani sa Zamboanga del Norte Integrated Provincial Health Office ubos pagpangulo ni Dra. Carmencita Icao. Sa kinatibuk-ang 780 niini ang nakapahimulos gilangkuban kini sama sa konsultasyon adunay 535, sa dental adunay 191 ug aduna usa’y 54 ka mga kabataan ang nakapahimulos sa tuli. Ug gipang-apod – aporan usab kini sa mga libreng tambal. Miduyog usab ang mga kawani sa Local Government Unit sa Sibuco ubos sa liderato ni Mayor Norbi Edding ug ingon man usab ang mga kawani ni 3rd District Congressman Cesar Jalosjos kinsa mihatag og dugang ayuda sa mga tambal.

Mapasalamaton mipadayag si Kapitan Hadji Samer Naing sa naasoy’ng barangay nga wala gayud gihikaw ni Governor Yebes ang maong programa bisan pa man nga ang maong lungsod usa man kini sa kinatumyang bahin sa lalawigan sa Zamboanga del Norte diin natunol gayud sa iyang mga katawhan. Dugang nasayran nga ang maong Tabang ni Lando sa Comunidad adto na usab kini itunol sa mga katawhan sa lungsod sa Sirawai ning lalawigan. Sa laing bahin,Gidayeg ni Dr. Elmer Landingin, ang OIC Chief of Hospital sa lungsod sa Sibuco ang programang Tabang ni Lando sa Comunidad (TLC) ni Governor Rolando Yebes nga nahidangat na usab sa maong lungsod niadtong Enero 10-11, niining tuiga atul usab sa kasaulogan sa adlaw’ng natawhan ni Mayor Norbi Edding.

Mao kini ang gipamahayag ni Dr. Landingin atul sa pagpakighinabi ning mantalaan didto sa maong lungsod, tungod kay matud pa niya dako kini nga ikatabang sa katawhan sa maong lungsod ilabi na igo lamang silang magsalig sa tambal nga libre gumikan sa kakabus. Dugang pa sa maong doktor nga kapin na sa napulo ka barangay sa maong lungsod ang nakapahimulos sa maong programa diin hiniusang gihimo nila ni 3rd District Congressman Cesar Jalosjos ug Mayor Edding.

Sa laing kalambuan, si Dr. Landingin ang namahayag nga hayan mahatagan na ug solusyon ang problema sa hitsura  sa ilang tambalanan nga karaan ug gubaon na kaayo human na-aprubahan ang budget niini subay usab sa gipasalig ni Governor Yebes. Kon kahibaluan nga ang Sibuco Municipal Hospital maoy pinaka gubaon nga tambalanan sa tibuok probinsya ug dili luwas alang sa mga pasyente. Matud pa ni Dr. Landingin nga gitutukan gayud sa adiministrasyon ni Governor Yebes ug Congressman Jalosjos ang kalambuan sa maong lungsod ug wala silay hunong sa pagbubo ug mga proyekto sa maong lungsod bisan sa kalayo niini, tungod kay ang Sibuco maoy katapusang lungsod sa Zamboanga del Norte.

Samtang sa programa ni Dr. Landingin niining tuiga, iyang gitutukan ang paglugway ug dekalidad nga serbisyo sa maayong panglawas sa katawhan sa Sibuco ingon man ang pag-ayum-ayum sa ilang tambalanan  ug pag-angkon ug dugang ekipo niini aron makatabang sa mga pasyente nga mahilandig sa maong tambalanan.(Pedmark, Mindanao Star, Vol.II No.52)

SP Sec.: BM Mejorada 100% attendance

Malampuson nga nahatagan ug pagtagad ang mga resolusyon ug ordinansa nga gitratar sa Sangguniang Panlalawigan sa Zamboanga del Norte sa miaging tuig dos mil sayes. Kini gipahibawo ni Majority Floor Leader Uldarico Mejorada samtang malampuson nilang napadas-ug sa ubos balay balaoranan sa probinsya ang mga balaodnon nga gipanday sa mga Sanguniang Bayan sa kalungsoran ug sa ilang mga programa nga gihan-ay sa buhatan sa gobernador para sa mga katawhan.

Matud ni Mejorada, bisan tuod kon managlalis sila diha sa Sanguniang Panlalawigan atol sa ilang diskusyon, apan ang tanan nilang mga hilisgutanan ila gayud nahatagan ug pagtagad. Ang panaglantugi matud pa sa majority floor leader natural lang kini sa usa ka demokrasya tungod kay bukas ang tanan nga mopadayag sa ilang opinion, apan sa kinatibuk-an ang tanang referrals sa nagkadaiyang komitiba ilabi na sa committee on laws ug apropriation nahatagan gayud ug pagtagad nga walay gitrampas.

Sa laing bahin, SP Secretary Jose Bantilan ug gipermahan ni Vice Governor Francis Olvis mipagawas ug certification nga si Majority Floor Leader Uldarico Mejorada adunay syento por syento attendance. Nagpasabot nga bisan ka usa ka higayon wala kini mapalta sa ilang mga regular sessions taliwala sa iyang ka bisi sa trabaho isip usa ka banggiitang abugado nga daghang kliyente. Matud pa ni SP Sec. Bantilan, si Mejorada wala sukad mo-absent sa mga regular sessions, mi bakasyon o kaha sick leave of absence sukad sa iyang paglingkod gikan niadtung Hunyo 30, 2004 hangtud karon.

Niining certification sa SP secretary nagpakita nga si last termer Board Member Mejorada anaa pa ang kalig-on ug kahimsog sa panglawas bisan na sa iyang pangidaron. (The New Nandau, Vol. XVI No.28)