2

January 14,  2008

 

PRAYER RALLY NAGMALAMPOSON

Nagpasalamat ang gobernador sa Zamboanga del Norte sa bagang duot sa mga katawhan nga mitambong sa gipahigayong prayer rally bisan pa sa ka mubo sa panahon nga kini gipahibawo ug gihan-ay. Kini ang gipalanog ni Governor Rolando Yebes, human sa ilang prayer rally ug protest march palibot sa siyudad sa Dipolog.

Ang gobernador miangkon nga natandog siya sa gipakitang suporta sa katawhan nga kinasing-kasing nga mipakita sa ilang pagbarug alang na sa pagpanalipod sa atong mga katungod atubangan sa gihimong pagyatak sa kalihim sa hustisya sa atong nasud. Gibutyag usab ni Governor Yebes nga nakahinagbo kagahapon ug disgrasya sa dalan ang sakyanan ni Mayor Rolando Tablezo sa Leon Postigo ang kalihim sa League of Municipalities-ZaNorte Chapter samtang nagpadulong na unta sila dinhi sa Dipolog aron motambong sa prayer rally.

Gipanghinaut ni Governor Yebes nga unta makita sa kalihim sa hustisya ang gipalanog karon sa mga katawhan sa ZaNorte atubangan sa iyang gibuhat nga pagyatak sa katungod sa katawhan. Samtang gipahibawo usab ni Mayor Norbi Edding sa Sibuco nga hangtud dili makagawas si Nonong Jalosjos gikan sa pagka ditinir karon dili usab niya putlan ang iyang bungot agig protesta. (Press Freedom, Vol. XX No. 12)

 

ZANORTE CONDEMNS SECRETARY GONZALES

Kusganong gipanghimaraut sa mga opisyales sa lalawigan sa Zamboanga del Norte ang kasamtangan karong kalihim sa hustisya atubangan sa klaro niining wala pagsunod sa mga gimbut-an sa balaod may kalabutan na sa pagpadakup niini ug balik kang kanhi Congressman Romeo “Nonong” Jalosjos. Kini ang gipalanog sa mga opisyales sa lalawigan sa ZaNorte sa gipasiugdahang prayer rally sa League of Municipalities-ZaNorte Chapter nga gipahigayon sa Capitol Plaza kagahapon sa hapon.

Ang nasangpit nga rally gitambungan sa mga kawani sa kagamhanang probinsiyal uban sa mga opisyales sa barangay ug lungsod gikan sa 25 ka munisipyo sa ZaNorte ug sa dakbayan sa Dapitan. Sa nakita bugtong dakbayan sa Dipolog ang wala mopakita sa ilang pagsuporta sa pagkondinar sa kalihim sa hustisya taliwala sa pagpakita niini atubangan ni Nonong Jalosjos nga gusto siyang makigkauban niini ug balik sa politika.

Sa nasayran gidapit nila ni Mayor Jesus Lim ang presidente sa League of Municipalities si Mayor Evelyn Uy para motambong sa maong prayer rally apan wala kini mopakita kagahapon. Matud pa sa mga mayors nga sakup sa APP o Alliance of Parties for Progress nagpakita lang nga taphaw ra ang pagduol-duol ug balik sa mayor sa Dipolog ngadto kang Nonong ug karong panahuna naila gayud unsa ang matuod niining pagkatawo ug karakter. Matud pa ni Mayor Norbi Edding sa Sibuco ang legal adviser sa liga ang mihatag sa permit para sa maong rally mao ang city budget officer ug dili si Mayor Belen Uy.

Ang tanang 25 ka lungsod sa ZaNorte nagpadala gayud ug mga delegasyon uban sa ilang mga mayors ug barangay officials. Ang nasangpit nga kalihukan gibuksan sa usa ka inter-faith prayer gikan sa mga Muslim, Subanen, Protestante, Adventists gawas sa simbahang katoliko nga sumala pa mibalibad nga dili moapil kay ang maong rally usa ka kalihukang politika. Pipila sa mga mayors ang mipalanog sa ilang pakigpulong diha na sa pagpangayo ug hustisya sa gidangatan ni Nonong Jalosjos.

Usa sa mibarog didto mao si Mayor Carlito Feras sa lungsod sa Roxas kinsa nagkanayon nga ang ilang lungsod andam mosuporta unsa may mga lakang nga ipadas-og ni Governor Rolando Yebes para matabangan si Nonong Jalosjos. Ang pagdiskorso ni Mayor Feras sa maong rally nakapatingkag sa dawongan sa kadaghanan sanglit sayud ang tanan nga sa nakalabay nga eleksiyon nahimo kining kaatbang sa partido nila ni Governor Yebes ug Nonong Jalosjos. Matud pa ni Mayor Feras ang iyang pagsuporta sa gipahigayong prayer rally maoy bugti sa iyang pagpasalamat ngadto kang Nonong Jalosjos kay kon wala pa kini dili unta siya mamahimong mayor sa lungsod sa Roxas.

Sa samang bahin gipahibawo usab ni Mayor Jesus Lim nga sa miaging semana ang ilang liga mipasar ug usa ka resolusyon nga kusganong mikondinar kang Secretary Raul Gonzales tungod sa gipatuman niining mga lakang nga wala gayud magsunod sa mga gimbut-an sa balaod. Si Vice Mayor Patri “Jing” Chan sa dakbayan sa Dapitan mibutyag nga sila sa ilang kabahin mipanday usab ug resolusyon may kalabutan na sa illegal nga pag-aresto ug balik kang Nonong. Alang sa bise mayor sa dakbayan sa Dapitan ang gibuhat ni Secretary Gonzales usa ka pagbugal-bugal dili sa kinabuhi ni Nonong kon dili sa katawhan sa ZaNorte.

Misalmot usab sa maong prayer rally ang mayor sa lungsod sa Tungawan, Zamboanga Sibugay nga si Mayor Randy Climaco uban sa iyang mga opisyales. Samtang miapas usab si Mayor Eldwin Alibutdan sa lungsod sa Ipil, Zamboanga Sibugay pagka hapon na human mahibawo nga adunay prayer rally nga gipahigayon sa Capitol Plaza kagahapon. Sa iyang kabahin si Governor Rolando Yebes mihulagway kang Secretary Gonzales nga daw nagsakit ug amnesia kay nalimot na kini sa mga dokumento nga tapos na naaprubahan ug karon gibalik niini sa pagkwestyon.

Matud pa sa gobernador imposible nga ang kalihim sa hustisya dili mahibawo unsay gibuhat sa iyang mga tawo. Ang tanang dokumento nga gihuptan ni Nonong may kalabutan na sa iyang paggawas sa prisohan miagi sa normal nga proseso sa burukrasya sa gobyerno ug daghang mga kamot ang gilabyan niini ayha pirmahi sa mga hingtungdang opisyal sa atong kagamhanan. Matud pa ni Governor Yebes dili katuhuan ang istorya ni Gonzales nga ang paggawas ni Nonong wala moagi sa proseso sa gobyerno nga mismo ang mga kawani kon mokobra sa ilang mga suweldo ug benepisyo moagi sa taas nga proseso ayha nadawat ang kuwarta ang pagbuhi pa kaha sa usa ka piniriso. Anaa usab sa balaod nga ang kalihim sa hustisya walay katungod sa pag-usab sa disisyon sa Bureau of Corrections.

Samtang si Mayor Edding sa Sibuco nga maoy mihatag sa pakigpulong sa pagtak-op sa prayer rally mihatag ug mas sakit nga pulong batok kang Secretary Gonzales. Matud pa ni Mayor Edding nga ang gibuhat ni Gonzales nagpakauwaw sa propesyon sa mga abogado. Sumala pa niya si Gonzales isip kalihim sa hustisya maoy maghimong tukma nga ehemplo diha sa pagsunod sa mga gimbut-an sa balaod.

Matud pa ni Mayor Edding kini maoy rason ngano nga ang mga mayors sa ZaNorte mipasar ug resolusyon nga nag-awhag sa presidente sa senado ug chairman sa Commission on Appointments sa pagbasura sa appointment ni Gonzales pagka kalihim sa hustisya kay nagpaka-uwaw siya sa ilang propisyon sa mga abogado. Gituhuan nga mokabat sa kapin sa tulo ka libu ka mga katawhan gikan sa mga kalungsuran ang miduyog sa prayer rally. (Press Freedom, Vol. XX No. 12)

 

SHIPPING LINES GIPALAYAS NA SA PPA SA PANTALAN

Gisaway karon ang Philippine Ports Authority sa gipatuman niining polisiya nga nagmandu sa tanang mga shipping lines nga mogawas sila sa compound sa Pulauan Port sa dakbayan sa Dapitan sa pagpahimutang sa ilang mga ticketing office. Mismo si Governor Rolando Yebes nakasaway sa nasangpit nga patakaran sa PPA nga matud pa niya dili masabtan unsay logic sa pagpalayas sa ticketing office sa mga shipping lines pagawas sa pantalan.

Sa nasayran ang nagkadaiyang mga shipping lines nagpadangat karon ug suwat ngadto sa buhatan sa gobernador nga nagpatabang sa ilang kahimtang nga dili sila papahawaon sulod sa pantalan sa pagbutang sa ilang mga ticketing office. Sumala pa ang nagmandu niini mao mismo ang Port Management Office sa PPA sa Cagayan de Oro City diin ang Pulauan Port sa Dapitan ilawom sa ilang hurisdiksiyon. Ang gobernador sa dihang gipangutana kabahin niini mipalanog sa iyang kalibog ngano nga misagup sa maong polisiya ang PPA. Kini nagpasabot nga ang mga pasahero sa barko kinahanglang moari pa sa dakbayan sa Dipolog aron sa paglukat ug ticket kay gibawalan na ang pagbatun ug ticketing office sulod sa pantalan. 

Sa samang bahin si Governor Yebes mipahayag nga wala na siya mahimoot sa kalangay sa proyekto sa PPA sa paghingpit sa gikonstrak niining dugang pasilidad sa pantalan sa Pulauan kay wala gani kini mopahibawo sa buhatan sa gobernador unsa nay status niini samtang gibahaan na sa daghang pangutana ang buhatan niya kabahin sa pagpalambo sa pasilidad sa maong pantalan sa Dapitan. Kahinumduman sa dihang nagtigum ang Mindanao Economic Development Council sa dakbayan sa Dapitan gilabhan sa kasaba sa gobernador ang tinugyanan sa PPA kabahin sa kaluya sa ilang lihok paghingpit sa gikonstrak niining pantalan.

Matud pa sa gobernador wala pa siya sa puesto gikonstrak na ang maong pantalan apan hangtud karon anaa na siya sa iyang ikaduhang termino nagapabiling wala pa gihapon mahuman ang maong proyekto ug wala usab magpahibawo ang PPA unsa nay status niini ngadto sa buhatan sa gobernador para makatabang ang probinsiya kon unsa may gikinahanglan. Matud pa niya kon pabiling dili pa gihapon mahingpit ang maong pantalan iyaha na kining isumbong ngadto sa Malacanang para kahimuan sa tukmang lakang si kinsa ang responsable sa kalangay niini.

Gibutyag usab sa gobernador tungod kay ang Pulauan Port ilawom na sa pantalan sa Cagayan de Oro City kini maoy rason ngano nga hangtud karon wala gayud kini mahatagi ug tukmang pagtagad para mapalambo iyang pasilidad kay maoy giuna nila sa pagpalambo ang ilang kaugalingong pantalan. (Press Freedom, Vol. XX No. 12)

 

LESENSIYA NA LANG SA DOH ANG GIHUWAT PARA
MOSUGOD NA SA OPERASYON ANG MEDICAL CENTER

Lesensiya na lang gikan sa Department of Health ang gihuwat para makasugod na sa iyang operasyon ang Zamboanga del Norte Medical Center. Kini ang gipahibawo ni Governor Rolando Yebes, kinsa nagkanayon nga ilawom sa bag-ong gabayan nga gipagawas karon sa Department of Health wala na kinahanglana ang pagbatun sa mga local permits para mahatagan ug lesensiya ang usa ka tambalanan aron makasugod sa iyang operasyon.

Kahinumduman hangtud karon wala gayud gihatag ni Mayor Evelyn Uy ang Occupancy Permit ngadto sa Metropolis Construction ang kontraktor sa ZaNorte Medical Center nga maoy nakalangay sa pagtugyan sa maong proyekto ngadto na sa kagamhanang probinsiyal para kasugdan na ang operasyon niini aron makaalagad sa katawhan sa Dipolog ug lalawigan. Motapos na lang ang tuig 2007 pabiling nagmagahi si Mayor Belen Uy sa paghatag sa permit sa tuyo nga masabotahe niini ang pagbukas sa Medical Center.

Apan si Governor Yebes nagkanayon nga giandam na nila ang hinay-hinay nga pagbalhin sa karaang Provincial Hospital ngadto sa Medical Center. Matud pa ni Governor Yebes maoy unang ibalhin sa Medical Center ang Out-Patient Department nga ablihan karong buwan sa Enero 2008. Magsunod niini ang dialysis department diin mokabat sa 15 ka dialysis machines ang ipahimutang sa Medical Center. Ang mga dialysis machines dili na paliton sa probinsiya sanglit adunay usa ka pribadong kompaniya nga interesado mobutang niini ug maoy mopadagan sa pagmintinar ug mangayo lamang ug porciento sa kitaon niini.

Matud pa sa gobernador dili maka babag ang siyudad sa Dipolog sa operasyon sa Medical Center bisan ug dili sila moisyu ug occupancy permit gawas lamang sa pagsingil ug multa. Ang gobernador sa ZaNorte mipahayag nga nag-andam na siya ug P20,000 para ibayad sa multa ngadto sa siyudad sa Dipolog. Matud pa sa gobernador ang P30 milyones nga CT-Scan machine nga gisaad ni Presidente Gloria Macapagal-Arroyo anaa nakarga sa 2008 budget.

Sa samang bahin aduna nay mga bidders nga interesado nga maoy mo-operate sa diagnostic center o laboratory sa Medical Center nga sila maoy mopahimutang sa gikinahanglang mga kahimanan ug igo lamang mokuha sila ug porciento sa kita niini. Samtang ang security ug janitorial services sa bag-ong Medical Center gusto sa gobernador nga ipakontrata sa pribado kay sa nakita niya lahi ra ang lihok sa mga empleyado sa pribadong janitorial services kay sa kaugalingong job order sa probinsiya. Ang bag-ong hospital nagbatun usab ug mga lugar para clinic sa mga visiting doctors nga mga specialists. (Press Freedom, Vol. XX No. 12)

 

HEPE SA PROVET GIHAGIT SA GOBERNADOR NGA MAGKUGI

Atubangan sa daghanang mga proyekto nga gipabaha karon sa Bureau of Fisheries and Aquatic Resources dinhi sa Zamboanga del Norte ang kakugi ra gayud sa hepe sa Provincial Veterinarian mao gikinahanglan nga itampo sa probinsiya aron magmalamposon ang maong mga proyekto. Mao kini ang giluwatang pahayag ni Governor Rolando Yebes human pormal nga gitunol ni BFAR Regional Director Virgilio Alforque ang dugang P1.4 milyones ka pesos nga tseke para sa nagapadayong gikonstrak nga ZaNorte-BFAR Multi-Species Fresh Water Hatchery project sa Irasan, Roxas.

Gawas niini matud pa ni Governor Yebes gipahibawo usab siya ni Director Alforque nga ang ZaNorte magpakadawat usab sa ilang Mariculture Zone Project diin una kining ipatuman didto sa lungsod sa Rizal sa may Murcielagos Bay. Sa sayu pa gibutyag ni Director Alforque sa interview sa mga meyembro sa ZNUC nga ang nasangpit nga proyekto pasiuna nilang gipahatan ug P2.5 milyones ka pesos ug sugdan na nila sa pagpatuman sa pagbukas sa tuig 2008.

Matud pa ni Director Alforque ang mariculture project sa BFAR gitinguha nila nga makatag sa nagkadaiyang mga coastal municipalities sa ZaNorte aron madasig ang mga mag-uuma sa dagat sa pagpasanay ug mga isda ingon man kinhason nga adunay dakung merkado ngadto sa kauluhan ug sa gawas sa nasud. Samtang si Governor Yebes nagkanayon nga kini nalakip na sa gipadas-og niyang karong livelihood projects nga maoy hatagan sa prayoridad sa iyang ikaduhang termino. (Press Freedom, Vol. XX No. 12)

 

GOVERNOR DISMAYADO SA PERFORMANCE SA AGRICULTURE SA 2007

Wala itago sa gobernador sa Zamboanga del Norte ang iyang pagka dismaya sa performance sa agrikultura sa lalawigan sulod sa tuig 2007. Kini ang gipalanog ni Governor Rolando Yebes sa programang Kapihan sa 1948 Cafeteria sa dihang gipangayuan siya sa nahimong performance sa nagkadaiyang buhatan sa probinsiya sulod tuig 2007.

Si Governor Yebes nagkanayon nga nalipay kaayo siya sa agi sa Provincial Engineering Office nga nakahuman na kini ug kapin sa 2,500 ka mga proyekto sa tibook probinsiya. Lakip na sa gihisgutan sa gobernador nga nakapasar sa iyang passing mark sa performance karong tuig 2007 mao ang Integrated Provincial Health Office nga gipanguluhan ni Dra. Carmencita Icao ug Provincial Social Welfare and Development Office nga kasamtangang gipanguluhan ni Mrs. Marylen Grace Sabal.

Bugtong buhatan sa agrikultura sa probinsiya maoy iyang nahisgutan nga wala gayud makapakita ug resulta sa ilang mga programa. Matud pa ni Governor Yebes sa iyang nakita usa ra ka programa sa buhatan sa agrikultura ang naglihok ang kabahin sa Hi-Green apan gawas niini wala na siyay laing nakita nga kongkretong nahimo sa maong buhatan nga klarong nakatabang sa atong mga katawhan ilabi na sa pagpalambo sa ilang panginabuhi. Sumala pa sa gobernador napulos na lang plano ang iyang nabati gikan sa maong buhatan apan walay nakita nga aksiyon.

Gusto ipasuhid sa gobernador ang gibuhat karon ni Mayor Agustines Magsalay sa Sergio Osmena sa ilang gipahimutang nga swine and poultry farm nga walay daghang mga arte kabahin sa tubig ug lawog apan nagpakita nga nagmalambuon ang ilang pagpadagan nga aduna gayuy produkto nga makita sa tawo. Ang gobernador nakapahayag nga napuno sa mga tawo ang buhatan sa agrikultura sa probinsiya apan wala siyay nakitang agi. Gipahibawo niya nga sa unang adlaw sa tingtrabaho sa tuig 2008 maoy una niyang ipatawag sa tigum ang mga kawani sa agrikultura kay iyang paninglan unsay ilang natampo para sa pagpalambo sa atong katawhan sa lalawigan sulod sa tuig 2007.

Gawas niini ipa-epekto na usab niya ang pagbu-ak sa maong buhatan ngadto sa upat ka mga district office nga pagadumalahon sa upat ka mga special deputy provincial agriculturist. Ang 1st ug 2nd district adunay tagsa ka district office sa agrikultura sa probinsiya samtang duruha sa 3rd district kay gusto niya nga patutukan sa higpit sa usa ka special deputy provincial agriculturist ang mga lungsod sa Gutalac, Baliguian, Siocon, Sirawai ug Sibuco.

Gipahibawo usab sa gobernador nga bukas karon ang iyang buhatan sa pagdawat ug mga interesadong agriculturist bisan ug bag-o pang graduate basta andam motrabaho ug molihok nga adunay ikapakita nga agi iyaha kining itudlo nga provincial agriculturist sa ZaNorte. Samtang iyang ipahimutang ang pagdumala sa mga farm tractors sa agrikultura sa probinsiya ilawom sa usa ka buwag nga division.

Kini aron makalihok ang ubang programa sa agrikultura nga nakalimtan na sama sa Plow Now Pay Later. Gipatin-aw sa gobernador nga iyang gituyo nga buwagon ug buak-buakon ang agrikultura sa probinsiya aron makita gayud si kinsa sa mga special deputy provincial agriculturist ang naglihok ug makapakita ug agi. Giklaro ni Governor Yebes hangtud karon wala gayud siya malipay sa agrikultura. (Press Freedom, Vol. XX No. 12)

 

 

 

NOTE: SEND US YOUR NEWS.  Tell us what's going on in your barangays, clubs, schools, businesses and non profit organization. You can also send notices and announcements.
          

 

    Email to webmaster@dipolognon.com

      
Google
WEB THE DAILY DIPOLOGNON