2

January 7,  2008

 

NONONG JALOSJOS NAKA FIRST BASE NA SA PETISYONG HABEAS CORPUZ

Naka first base karon si kanhi Congressman Romeo “Nonong” Jalosjos sa gipasakang petisyon para habeas corpus sa Zamboanga City Regional Trial Court nga magapabilin ang kanhi kongresista sa Zamboanga del Norte sa San Ramon Penal Farm Colony hangtud nga maresolbar ang kaso.

Kini ang gipakanaug nga kamanduan ni Judge Jesus Carbon, Jr. sa Regional Trial Court Branch 16 sa gihimong pagpaminaw sa gipasakang petisyon para habeas corpus. Kini ang gibutyag ni Governor Rolando Yebes sa iyang pagpakighinabi sa lead counsel ni Nonong Jalosjos human gipahigayon ang hearing sa petition para habeas corpus.

Ang mga abogado nga maoy nakigkumbati karon sa kaso ni Nonong gipanguluhan ni Atty. Fred Gimenez uban ni Atty. Cres Palpagan, Jr. Ang sa habig sa kagamhanan kini girepresentahan sa Solicitor General nga gimanduan ni Judge Carbon sa pagsumitir sa ilang memorandum sa maong kaso kay sa habig ni Nonong Jalosjos tapos na kining nakasumitir ngadto sa hukmanan. Ang Solicitor General sumala pa gihatagan ug tulo ka adlaw sa pagsumitir sa maong memorandum sa kaso diin gihatagan ug hangtud Enero 2 ang pagduso sa maong dokumento sa dili pa mopakanaug sa disisyon si Judge Carbon.

Sa samang bahin mipagawas usab ug kamanduan si Judge Carbon nga si kanhi Congressman Jalosjos dili mamahimong mabalhin sa bisan asa nga lugar sa atong nasud gawas sa San Ramon Penal Farm Colony. Kahinumduman sa sayu pa si Justice Secretary Raul Gonzales naghisgut nga iyang gimandu nga ibalik si Nonong sa New Bilibid Prison ug kuhaan kini sa tanan niyang mga pribilihiyo. Samtang unang gipakita ni Governor Yebes nga unang nagbangutan ang kagamhanang probinsiyal sa ZaNorte atubangan sa klarong pagyatak sa kalihim sa hustisya sa pagsunod sa mga gimbut-an sa balaod. Niadtong adlaw’ng Meyerkoles, Desyembre 26, 2007 gimandu sa gobernador ang pagbutang ug itom nga laso o black ribbon nga gihikot sa kahoy diha sa Capitol Plaza.

Matud pa ni Governor Yebes ang maong simbolo sa black ribbon nga iyang gipabutang sa Capitol Plaza dili lamang para sa pagpangayo ug hustisya sa gidangatan karon ni Nonong Jalosjos kon dili kini para sa tanang katawhan sa atong nasud kay sa iyang nakita ang katungod sa usa ka lungsuranon sayun ra kaayo nga yatakan pinaagi lamang sa verbal nga mandu sa kalihim sa hustisya pinasikad sa iyang kagustuhan ug kapritso. Sumala pa sa gobernador nga kon kini maoy mopatigbabaw karon siguradong mamatay na ang pagpatigbabaw sa dugukan sa atong mga balaod kay ang masunod mao ra ang mandu sa usa lang ka tawo. Matud pa ni Governor Yebes kon gusto man ni Secretary Gonzales nga ipa-ilawom sa pagreview ang pagkwenta sa pagsirbi ni Nonong sa iyang sentensiya unta kini gipaagi sa mga gimbut-an sa balaod ug dili sa iyang kaugalingong kapritso.

Ang gobernador sa ZaNorte midason nga si Nonong Jalosjos usa na gayud ka gawasnon nga tawo basis a dokumento nga iyang nakita gikan sa Bureau of Corrections. Karon nga ang League of Municipalities-ZaNorte Chapter nakapanday na ug lakang nga nagkondinar sa aktuwasyon ni Gonzales, si Governor Yebes nagkanayon nga mao na usab karon iyang gihagit ang balay balauranan sa probinsiya sa pagbuhat sa susamang aksiyon. Sa nasayran usa ka special session ang gipatawag sa Sangguniang Panlalawigan karong adlawa para sa pagtuki usab sa maong isyu ug pagpakanaug sa baruganan sa probinsiya kabahin sa illegal nga aksiyon nga gibuhat sa kalihim sa hustisya. (Press Freedom, Vol. XX No. 11)

 

ZANORTE MAYORS CONDEMN SECRETARY GONZALES

Gikondinar sa mga municipal mayors sa Zamboanga del Norte si Justice Secretary Raul Gonzales atubangan gimandu niining pagpa-aresto kang kanhi Congressman Romeo “Nonong” Jalosjos nga walay gipasikarang dokumento o arrest order gikan sa korte.

Kini ang gisagup nga lakang sa League of Municipalities-Zamboanga del Norte Chapter sa ilang panagtagbo didto sa dakbayan sa Dapitan kagahapong adlawa. Kini ang gipahibawo ni Mayor Jesus Lim ang presidente sa League of Municipalities-ZaNorte Chapter human sa ilang tigum kagahapong adlawa. Matud pa ni Mayor Lim walay bisan usa sa mga mayor sa ZaNorte ang misupak sa maong lakang.

Nalakip na sa midason sa resolusyon sila si Mayor Carlito Feras sa Roxas ug Mayor Russel Adasa sa Jose Dalman nga nailang dili kaalyado sa politika ni Nonong Jalosjos. Sa samang bahin usa ka kaluhang resolusyon ang gipanday sa mga mayors sa ZaNorte ang pagpakayab sa nasudnong bandila sa tanang 25 ka munisipyo nga mag half mast o sa katunga lamang sa flag pole ang pagpakayab niini nga nagpasabot nga nagbangutan ang katawhan sa lalawigan sa pagkamatay sa hustisya sa atong nasud diin sayun na lang sa kalihim sa hustisya ang pagmandu sa pagpadakup ni bisan kinsa nga walay gipasikarang balaod o bisan wala kay giatubang nga kaso.

Gawas niini gikauyunan usab sa mga mayors nga magbutang sila ug itom nga laso o black ribbon sa poste sa mga balay lungsod timaan sa ilang pagbangutan sa pagkamatay sa hustisya. Ang resolusyon gipangamahanan ni Mayor Norbi Edding sa Sibuco ug gidasonan sa tanang mga municipal mayors sa ZaNorte. Matud pa ni Mayor Edding ang gimandu ni Secretary Gonzales nga pag-aresto kang Nonong usa ka illegal ug wala gayud magsunod sa gimbut-an sa balaod. Labaw na nga dakung illegal ang padayong pagdetinir kang Nonong sa San Ramon Penal Farm Colony sa dakbayan sa Zamboanga dili lamang nga kini nakayatak sa tawhanong katungod sa kanhi kongresista labaw sa tanan kini nahasupak sa atong konstitosyon.

Matud pa ni Edding ang pagpasikop ug balik kang Nonong klaro kaayo nga adunay politika nga nagpahipi nga gipaluyuhan ug usa ka dakung politico. Ang ilang resolusyon nga napanday kagahapon gipadangat sa mga mayors sa ZaNorte ngadto sa buhatan ni Presidente Gloria Macapagal-Arroyo, Senate President Manuel Villar, House Speaker Jose De Venecia, Jr. ug sa chairman sa Commission on Appointments. Giklaro sa resolusyon sa mayors league sa ZaNorte nga ang gipanday nilang lakang hugtanong pagbabag sa appointment ni Gonzales pagka kalihim sa hustisya sa atong nasud.

Matud pa ni Mayor Edding ilawom sa atong konstitosyon walay si bisan kinsa nga lungsuranon nga molabaw pa kay sa balaod bisan pa ang presidente sa atong nasud kinahanglan nga mosunod sa gimbut-an sa balaod. Kon ang gibuhat sa kalihim sa hustisya mao sundon siguradong magkabut ang atong nasud kay wala nay motahod sa atong mga balaod. Gitataw ni Mayor Edding ang ilang gipakigbisugan karon mao ang kagawasan sa atong katawhan ang nalambigit. (Press Freedom, Vol. XX No. 11)

 

HEPE SA BUREAU OF CORRECTIONS GIILISAN TUNGOD SA NAHITABONG PAGGAWAS NI JALOSJOS

Gihukasan kagahapon sa iyang katungdanan ang hepe sa Bureau of Corrections nga si Director Ricardo Dapat may kalabutan na sa kontrobersiyal nga pagbuhi kang kanhi Congressman Romeo “Nonong” Jalosjos gikan sa New Bilibid Prison.

Si Justice Secretary Raul Gonzales, nagkanayon nga si Director Dapat gipulihan karon ni kanhi PNP Chief Director General Oscar Calderon nga mao karoy bag-ong pangulo sa Bureau of Corrections. Matud pa ni Secretary Gonzales nga ang nahitabong paglahugay nagpasabot lamang nga adunay halapad nga imbestigasyon nga gipahigayon karon kay dili katuhuan nga ang nahitabo sa miaging semana wala moagi sa hustong pagplano ug pagpakig konsabo.

Si Gonzales midugang sa pagpahayag nga iyang imandu nga ibalik si Jalosjos sa National Bilibid Prison sa higayon nga mahingpit na ang gipasaka niining petition nga habeas corpus sa Regional Trial Court sa dakbayan sa Zamboanga. Si Nonong Jalosjos kasamtangang gibilanggo karon sa San Ramon Penal Farm Colony sa dakbayan sa Zamboanga.

Si Secretary Gonzales miinsistir nga si Jalosjos dili pa usa ka gawasnon nga lungsuranon. Gikatakdang ipagawas usab karong adlawa sa Zamboanga City Regional Trial Court ang disisyon sa gipasakang petition para habeas corpus nga gipasaka sa kampo ni Jalosjos. Ang petisyon mikwestyon karon sa detention ug pag-aresto kang Nonong Jalosjos niadtong Desyembre 23, 2007 didto sa city hall sa dakbayan sa Dapitan. Si Nonong sa iyang kabahin padayong mibarug nga usa na siya ka gawasnon nga lungsuranon.

Si Executive Judge Rainerio Estacio sa dakbayan sa Zamboanga, diha-diha dayon mitiman sa summons nga nagpatawag kang Superintendent Guillermo Ayala ang Penal Colony warden uban na sa iyang deputy. Gidala usab sa mga tinugyanan sa penal colony si Nonong atubangan sa korte taliwala sa higpit nga siguridad. Ang iyang kaso na-raffle sa sala ni Judge Jesus Carbon, Jr. sa Regional Trial Court Branch 16 sa dakbayan sa Zamboanga. Karong buntaga gipaabot nga mopakanaug na sa iyang disisyon si Judge Carbon sa petition ni Nonong Jalosjos. (Press Freedom, Vol. XX No. 11)

 

KATIPUNAN KANUNAY NGA ALERTO KABAHIN NA SA CAPILLARIASIS

Padayong naka alerto karon ang Rural Health Unit sa lungsod sa Katipunan, Zamboanga del Norte may kalabutan na sa Capillariasis. Si Dr. Dondi Samonte, sa RHU Katipunan nagkanayon nga kanunay nga nag-andam ug nagmonitor ang ilang buhatan kabahin na sa Capillariasis sukad nga nasinati kini sa ilang lungsod sa miaging mga tuig nga mikutlo na usab ug pipila ka kinabuhi sa tawo.

Matud pa ni Dr. Samonte nasinati nila ang problema kabahin sa Capillariasis sa mga barangay sa Katipunan nga duol ug mga suba diin ang unang kaso natala gikan sa Barangay Miatam. Sukad niadtong hangtud karon matag karon ug unya ang ilang buhatan makadawat ug mga report kabahin na sa kaso sa Capillariasis gikan sa ubang mga barangay sa lungsod sa Katipunan ilabi na kadtong mga duol ug suba. Sumala pa niya dugay ra silang nagpasidaan sa mga katawhan nga likayan ang pagkilaw sa mga uwang ug isda gikan sa suba para malikay usab sila sa pagtakboy sa Capillariasis.

Apan aminado si Dr. Samonte nga bisan giunsa pa nila sa pagpasabot ang mga katawhan sa bukid mobalik gayud kini sa ilang naandang batasan nga mokilaw gayud sa uwang ug isda gikan sa suba. Kahinumduman nga nahimong usa ka dakung isyu ang kabahin na sa Capillariasis sa dihang miabot sa atensiyon sa national media ang maong problema didto sa Barangay Moyo sa lungsod sa Siayan, Zamboanga del Norte human gikataho nga daghan nang nangamatay. Nasuta nga sama sa ubang mga lugar sa ZaNorte nga mitala sa kaso kabahin sa Capillariasis nga adunay nakabsan sa kinabuhi nga naglat-ang lat-ang sulod sa taas nga panahon.

Sa kabahin sa Katipunan, matud pa ni Dr. Samonte dili na gayud mawad-an sila sa tambal nga Avendasol nga maoy tambal batok sa Capillariasis. (Press Freedom, Vol. XX No. 11)

 

LIVELIHOOD PRAYORIDAD SA PIF SA MGA BOKAL SA 2008

Sibu sa gipadas-og karon sa gobernador nga ang proyekto para sa tiyan sa tawo maoy hatagan karon sa unang pagtagad, susamang prayoridad ang gihan-ay usab sa mga meyembro sa Sangguniang Panlalawigan sa Zamboanga del Norte para sa ilang Project Identification Fund sa tuig 2008.

Si Board Member Cedric Adriatico, mibutyag nga ang ilang PIF para sa sunod tuig ilawom sa napanday nga budget anaa sa tag P1.2 milyones ka pesos kada board member. Matud pa ni Board Member Adriatico padayon nga gihatagan ug unod ni Governor Rolando Yebes ilawom sa 2008 budget ang iyang sumbanan sa pangagamhanan ang “Una sa tanan and katawhan.” Kabahin sa implementasyon sa ilang PIF si Adriatico mibutyag nga sulod sa 2007 ilang nakita nga nagsutoy ang pagpagawas niini nga wala na makahinagbo ug kalangay.

Gihisgutan usab niya nga hayan madugangan ang ilang pundo sa PIF sa sunod tuig kay sa dihang mihangyo sila karon ang gobernador mitubag nga kini unya na sa 2008. Sumala pa ni Adriatico kadtong mga hangyo sa mga barangay nga nasumitir karon nang hinapos nga bahin sa tuig adto na kini mapahatan ug pundo sa PIF sa 2008.

Sa iyang kabahin si Adriatico nagkanayon nga wala siya makapanghatag ug takuri ug kaldero ilawom sa iyang PIF kay kasagaran sa gihangyo sa mga barangay mao ang mga makinilya, computer, aircon, public address system ug mga kagamitan sa opisina sa barangay. (Press Freedom, Vol. XX No. 11)

 

PROVET ANDAM NA SA KANDING DISPERSAL

Andam na ang Provincial Veterinarian sa iyang dispersal program para sa kanding ug manuk para sa pagpasutoy ug dugang sa livelihood program ni Governor Rolando Yebes.

Mao kini ang gipahibawo ni Mr. Vicente “Vic” Sanchez, Jr. Special Deputy Provincial Agriculturist samtang nangandam usab ang ilang buhatan sa Provincial Veterinarian sa ilang programa sibu sa gipadas-og karong livelihood program ni Governor Yebes. Hinoon gipahibawo ni Mr. Sanchez nga kasamtangang gisuspenso nila ang ilang swine dispersal kay ilang gipailawom kini sa kasamtangang pagreview atubangan sa nahinagbo niining problema sa pamaagi ug teknikal.

Sumala pa ni Mr. Sanchez sa swine dispersal program adunay mga lungsuranon nga nakadawat ug nakabenepisyo sa maong programa apan wala motunong sigun na sa gikasabutan tali sa ilang buhatan nga sa higayon nga manganak na ang baboy nga gipa-alimahan nila ila lamang kining bayaran sa anak niining baktin. Apan ang nahitabo gibaligya ang baktin nga anak sa gialimahan niining baboy nga high breed ug giulian ang gobyerno sa bisaya nga baboy nga maoy ilang gipalit.

Kini nakaapektar sa ilang programa kay imbes maoy ilang gipadas-og nga mapalambo ang kalidad sa dugo sa atong mga baboy giilisan na man hinoon ug baboy nga tag-as ug simod gikan sa bukid. Matud pa ni Sanchez maoy gipangandaman karon nila ang dispersal na sa kanding ingon man sa manuk. Mokabat sa P3 milyones ka pesos ang pundo nga gipahat ilawom sa ilang buhatan para na sa livelihood program, dugang pahayag ni Sanchez.

Uban na sa ilang dispersal program mao ang pagpakatap sa semilya sa nagkadaiyang mga isda sa tab-ang nga tubig. Alang sa kanding ug manuk, matud pa ni Sanchez ang ilang buhatan mao nay mangunay sa pagpasanay niini ayha ihatag ngadto sa interesadong meyembro sa Lando BIBO kay natagam sila sa swine dispersal program aron sa pagsiguro nga ang mapakatap maayo nga kalidad sa kanding. Para sa sunod tuig nakaprograma sa ilang buhatan ang pag-apod-apod sa 300 ngadto sa 350 ka mga kanding diin ang Community Development Assistance Unit o CDAU mao moila sa makadawat sa maong livelihood program.

Ang counterpart sa beneficiary sa maong livelihood program mao ra ang pagkonstrak sa gikinahanglang pasilunganan sa maong mga kanding ug manuk. Ang nasangpit nga mga kanding matud pa ni Sanchez anaa na karon gipahimutang nila sa Zoo-Tech Tourism Park sa Irasan, Roxas ning lalawigan. Giklaro usab ni Mr. Sanchez nga ang maong mga kanding dili para baligya kay kini gamiton sa dispersal para sa mga interesadong meyembro sa LANDO BIBO alang na sa livelihood component sa indigency program ni Governor Yebes. (Press Freedom, Vol. XX No. 11)

 

KATIPUNAN ROLL-ON ROLL-OFF PORT GIPAHATAN NA SA DOTC

May pahat na nga pundo ang pagkonstrak sa Katipunan Roll-on Roll-off Port ilawom sa budget sa Department of Transportation and Communications. Kini ang gibutyag ni Governor Rolando Yebes, atubangan sa padayong pagpadas-og niini nga madugangan ang mga pasilidad sa Zamboanga del Norte nga makaakomodar ug mga roll-on, roll-off nga barko aron maoy mahimong tulay paingon sa dagkung merkado sa Visayas ug Luzon.

Matud pa ni Governor Yebes sa kasamtangan ang Strong Republic Nautical Highway sa Pulauan Port sa dakbayan sa Dapitan naglisud sa pag-akomodar sa nagkadaghang mga sakyanan nga interesado moagi niini tabuk paingon sa Visayas lahos na ngadto sa Luzon tungod kay kuwang pa gihapon ang pasilidad niini. Sumala pa niya sa pagka karon aduna nay siyam ka biyahe sa roll-on, roll-off nga barko nga nagbalik-balik Dapitan paingon sa Dumaguete sugod sa ala una ang takna sa kaadlawon, apan dili pa gihapon maapas niini ang nagtubong trapiko sa mga sakyanan nga moagi sa Nautical Highway.

Matud pa ni Governor Yebes ang management sa Ceres Bus Liner mipahibawo ngadto kaniya nga ang ilang kompaniya aduna nay giandam nga 20 ka biyahe sa ilang mga passenger bus kada adlaw nga magtabok-tabok sa atong lalawigan paingon sa Visayas ug Luzon apan kasamtangang nahikling kini tungod sa ka kuwang sa barko nga maoy masakyan sa maong mga passenger bus. Gipasabot sa gobernador nga ang pagbukas sa Katipunan Roll-on, Roll-off port nakatabang sa pagtubag sa maong kakuwangon ilabi na nga mas mobo ang oras sa biyahe gikan sa lungsod sa Katipunan tabuk sa Mabinay sa Negros Oriental kay molungtad lamang sa duha ka oras kumparar karon sa kasamtangang rota Dapitan-Dumaguete nga mokabat sa tulo ngadto sa upat ka oras ang paglawig.

Ang gobernador midugang sa pagpahayag nga ang pagbukas ug dugang rota nga modugtong sa ZaNorte ngadto sa Negros makatabang sa pagpasutoy sa atong ekonomiya kay paspas na ang pagbiyahe sa atong mga katawhan lakip na ang pagdala sa ilang mga produktong agrikultura paingon sa dagkung merkado sa Visayas hangtud sa Luzon. (Press Freedom, Vol. XX No. 11)

 

FLYING SESSION IBALIK SUNOD TUIG

Gikatakdang ipadayon sa balay balauranan sa Zamboanga del Norte ang ilang naandan nga flying session nga nahunong sa nakalabay nga duha ka tuig.

Kini ang gibutyag ni Board Member Cedric Adriatico, usa sa nangamahan sa lakang sa pagpadas-og nga ang Sangguniang Panlalawigan magpahigayon ug flying session sa tanang kalungsuran sa ZaNorte. Matud pa ni Board Member Adriatico particular nga ilang tiwason ang pagpahigayon sa flying session sa mga lungsod nga sakup sa 3rd congressional district kay daghan pang munisipyo nga wala sila makapahigayon niini.

Sa nakita sa 1st district duha na lang ka munisipyo ang wala mapahigayuni sa flying session samtang nahingpit na sa 2nd district gawas sa dakbayan sa Dipolog. Matud pa ni Adriatico maoy laraw ni Vice Governor Francis Olvis nga mahingpit gayud nila ug libud ang tanang mga munisipyo sa ZaNorte sa iyang flying session. Sa nakita ang pagpahigayon sa Sangguniang Panlalawigan ug flying session sa mga kalungsuran nakatabang sa pagpasutoy sa pag-implementar sa mga gikinahanglang proyekto matag lungsod uban sa ilang mga kabarangayan. Kahinumduman nga sa matag flying session ang besi gobernador uban sa mga bokal magbilin ug dili moubos sa usa ka milyon ka pesos nga balor sa proyekto sa kada lungsod wala pay labut sa proyekto nga ihatag gikan sa gobernador. (Press Freedom, Vol. XX No. 11)

 

P6M MARICULTURE PARK IPAHIMUTANG SA ZANORTE

Gikatakdang ipahimutang sa lalawigan sa Zamboanga del Norte ang usa ka Mariculture Park nga mobalor ug P6 milyones ka pesos. Kini ang gibutyag ni Mr. Vicente Sanchez, Jr. Special Deputy Provincial Agriculturist sa ZaNorte human sa pagpakig tagbo niini sa mga tinugyanan sa Bureau of Fisheries and Aquatic Resources sa reheyon.

Sa samang bahin matud pa ni Mr. Sanchez gipagawas na ni BFAR Regional Director Dodong Alforque ang dugang P1.4 milyones ka pesos nga pundo para sa ZaNorte-BFAR Freshwater Multi-Specie Hatchery. Kabahin sa Mariculture Park unang giplanohan nga ibutang kini sa dakbayan sa Dapitan sa may Taguilon Cove apan wala madayon human makita nga si Mayor Dominador Jalosjos, Jr. adunay gipahimutang usab nga proyekto sa maong lugar nga dili usab nila gusto nga masapawan.

Busa nadisidihan nga ibutang kini sa Murcielagos Bay sa lungsod sa Rizal. Matud pa ni Mr. Sanchez nga nalakip na sa ilang gitinguha nga madevelop sa maong Mariculture Park ang pagpasanay sa kinhason nga Sa-ang, para sa isda ug uban pang mga produkto sa dagat nga anaa sa maong lugar. Hayan masugdan sa pagtrabaho ang maong proyekto karong buwan sa Enero o Pebrero sunod tuig. (Press Freedom, Vol. XX No. 11)

 

STATISTICS SA BAS BONGA SA SCIENCE OF MORE OR LESS

Gikwestyon karon Special Deputy Provincial Agriculturist sa Zamboanga del Norte ang report sa Bureau of Agricultural Statistics nga mitidlom ang production o kuha nga isda gikan sa kadagatan sa atong lalawigan.

Si Mr. Vicente “Vic” Sanchez, Jr. and Special Deputy Provincial Agriculturist sa ZaNorte, mitataw nga dili gayud madawat sa ilang buhatan ang gipagawas nga report sa BAS nga sa mga buwan sa Oktobre hangtud karong Desyembre mitidlom ang production sa isda dinhi sa atong lalawigan. Matud pa niya wala siyay reklamo batok sa mga tinugyanan sa BAS apan gikwestyon niya ang pamaagi nga gisagup nila diha sa paghipos sa gikinahanglang data nga misangpot sa report nga mitidlum ang kuhang isda gikan sa atong lalawigan.

Sumala pa ni Mr. Sanchez iyang nasuta nga ang gibasihan sa BAS mao ang madala nga kuhang isda sa mga commercial fishing boats nga idiskarga sa Sindangan ug dakbayan sa Dipolog. Matud pa niya dili kini accurate nga figure kay adunay ubang mga commercial fishing vessels nga nanagat sulod sa kadagatan sa ZaNorte apan ang ilang kuha nga isda adto ikawas sa dakbayan sa Zamboanga kay atua didto nahimutang ang mga canning factories ug sa maong siyudad i-credit ang figure ug dili sa probinsiya.

Si Mr. Sanchez midugang sa pagpahayag nga nalakip na sa iyang gikwestyon mao ang report sa BAS sa na harvest nga agar-agar sa ZaNorte gikan sa Oktobre hangtud sa Desyembre. Sa report sa BAS nakabutang nga mokabat lamang sa tulo ka toniladang agar-agar ang naharvest sa ZaNorte sulod sa nahisgutang panahon. Apan sa records sa Bureau of Fisheries and Aquatic Resources nagpakita nga mokabat na sa 106 metriko toniladas ang na harvest nga agar-agar sa ZaNorte. Kon ang report sa BAS maoy lantawon mitidlum ug balig 96 porciento ang production sa agar-agar sa ZaNorte sulod sa nahisgutang panahon.

Nagtuo si Mr. Sanchez nga sa dihang nagpahigayon ug random survey ang mga enumerators sa BAS hayan natunong kini sa panahon nga walay production sa agar-agar kay dili pa panahon sa pagharvest. Susamang report ang gikwestyon usab kabahin na sa production sa palay dinhi sa atong lalawigan. Matud pa ni Sanchez nga kon magapadayon kini nga reporting nga sayup namiligro ang mga policy makers sa gobyerno nga dili magiyahan sa husto. Sa iyang kabahin si Board Member Cedric Adriatico, nabalaka nga kon walay pagkoriher nga pagahimoon sa official recorder sa gobyerno kabahin na sa agricultural production hayan silang mga magbabalaod uban sa mga hepe ehekotibo mahatagan ug sayup nga data busa makamugna usab sila ug dili tukma o husto nga mga lakang. (Press Freedom, Vol. XX No. 11)

 

NONONG JALOSJOS GIARESTO UG BALIK PINAAGI RA SA TEXT MESSAGE

Human sa pipila ka oras nga paghibalik sa dakbayan sa Dapitan si kanhi Congressman Romeo “Nonong” Jalosjos ang giaresto ug balik sa Philippine National Police pinasikad sa usa ka text message nga kamanduan gikan sa chief PNP ug kalihim sa hustisya. Ang pag-aresto gipa-epekto mismo ni Police Regional Director General Jaime Caringal nga maoy nangunay sa pagkuha kang Nonong sa dakbayan sa Dapitan sa kaadlawon sa adlaw’ng Domingo, Desyebre 23, 2007.

Apan walay gikapakita nga warrant of arrest o written order gikan sa hukmanan nga gihuptan si General Caringal sa iyang pag-aresto kang Nonong gawas lamang sa text message nga iyang nadawat gikan ni Chief PNP Director General Avelino Razon, Jr. Paghidangat ni Nonong didto sa dakbayan sa Zamboanga miderecho sila sa San Ramon Penal Colony kay maoy mandu ni General Caringal nga adto siya ipahimutang apan sa pag-abot nila sa colony wala modawat ang mga tinugyanan kay walay papeles o commitment order nga mandu nga ipailawom sa ilang custody si Nonong. Tungod niini mibalik sila paingon sa buhatan ni Caringal sa Camp Batalla ug didto nagpaabot sa sunod nga lakang nga ilang pagabuhaton.

Pagka ala una ang takna sa hapon kagahapon si Nonong gidala ug balik sa penal colony apan pabiling wala ibalhog sa selda tungod sa kakuwang sa commitment order gikan sa korte.          Didto sa dakbayan sa Zamboanga si Nonong nga nakuhaan ug pahayag mitataw nga padayong giyatakan sa kapulisan ang iyang katungod atubangan sa gihimong pagdakop kaniya nga walay dokumento nga gipasikaran gikan sa hukmanan. Karong adlawa ang mga abogado ni Nonong gikatakdang mopasaka ug kasong habeas corpus. Samtang laing kaso ang giplanohang ipasaka usab ni Nonong batok kang Caringal, Razon ug Secretary Gonzales.

Giklaro ni kanhi Congressman Jalosjos nga miuban na lang siya kang Caringal sa Zamboanga kay iyang gilikayan nga adunay mahitabong kasamok tali sa iyang mga supporters ug sa kapulisan.         Gibutyag sa kanhi kongresista sa ZaNorte nga may giduso na nga lakang ang iyang abogado alang na sa pagpagawas ug kamanduan sa pagbuhi ug balik kaniya. Samtang si Justice Secretary Gonzales mipahayag nga iya nang gipaimbestigar ngano nga nakagawas sa Muntinlupa si Jalosjos. Si Atty. Flavio Cordero usa sa abogado ni Nonong Jalosjos mipahayag nga illegal ang gihimong pag-aresto sa kapulisan kay wala silay gipasikarang dokumento.

Matud pa ni Atty. Cordero mopasaka sila ug kaso batok sa mga personalidad nga nalambigit sa illegal nga pag-aresto kang Nonong. (Press Freedom, Vol. XX No. 11)

 

I AM A FREE MAN –NONONG JALOSJOS

Gideklarar ni kanhi Congressman Romeo “Nonong” Jalosjos nga usa na siya karon ka gawasnon nga lungsuranon.

Kini ang gipalanog ni Nonong Jalosjos sa exclusive interview sa mga sakup sa Zamboanga del Norte United Correspondents didto sa city hall sa dakbayan sa Dapitan sa Sabado sa gabii Desyembre 22, 2007 atubangan sa kalit nga pagpauli niini balik sa Zamboanga del Norte human mahingpit niya sa pagsirbi ang iyang commuted sentence niadtong Desyembre 16, 2007. Usa ka suprisa sa taga Dapitan ug mga katawhan sa ZaNorte ang kalit nga pagpauli ni Nonong nga wala gayud magpahibawo ni bisan kinsa.

Kauban ni Nonong sa iyang pagpauli mao si Mayor Dominador Jalosjos, Jr. luwan sa usa ka pribadong eroplano nga iyang gi-charter gikan sa Manila paingon sa Dipolog Airport. Mitugpa sila sa Dipolog Airport mga pasado ala una ang takna sa hapon sa Sabado ug gitagbo ni Congressman Cesar Jalosjos ug miderecho na sa Dakak Park and Beach Resort sa dakbayan sa Dapitan.         Pagka hapon si Nonong mipundo sa Dapitan city hall diin didto siya nakighimamat sa iyang mga supporters ug kaalyado sa politika sa probinsiya.

Walay hunong ang bul-og sa mga tawo nga gustong makiglamanu kang Nonong diin pipila kanila ang mipatulo ug mga luha sa ilang kalipay nga nahibalik na ang ilang pinalanggang lider. Midagsang usab ang mga kaalyado ni Nonong sa politika gikan sa tulo ka mga congressional district sa ZaNorte hangtud na sa kaadlawon sa Domingo pagka hibawo nga miabot na sa Dapitan si Nonong. Mga alas 8:00 ang takna sa kagabhion si Nonong sa unang higayon gikan sa pagka bilanggo sulod sa 11 ka tuig ang miatubang sa nagkatapok nga mga katawhan atubangan sa city hall sa Dapitan.

Mokabat sa pipila ka libu ka katawhan ang dali nga nagkatapok atubangan sa city hall nga miduyog sa pagsugat kang Nonong kinsa mipalanog sa iyang unang pagdiskorso sa publiko human makagawas gikan sa prisohan. Sa iyang pakigpulong gitataw sa kanhi kongresista sa primero distrito sa ZaNorte nga ang nahimo niyang giya sa iyang pagpuyo sa prisohan mao ang Ginoo kay ang kahitas-an maoy mitubag sa tanang pabor nga iyang gipangayo lakip na sa iyang pagpauli karon balik sa Dapitan.

Gidasig usab ni Nonong ang mga katawhan nga pasalamtan si Presidente Gloria Macapagal-Arroyo sa iyang gihimong pagpamubo sa iyang sentensiya hinungdan nga nakapauli na siya karong panahon sa pasko. Sa exclusive interview sa mga meyembro sa Zamboanga del Norte United Correspondents gipresentar ni kanhi Congressman Jalosjos ang mga dokumento nga gibasihan sa iyang paggawas sa bilangguan sama sa Certificate of Discharge from Prison nga nakabutang nga gawasnon na kini gikan sa Desyembre 16, 2007 human mahingpit niini sa pagsirbi ang iyang sentensiya nga gipakanaug sa hukmanan with good conduct time allowance nga gipirmahan ni Superintendent Juanito Leopando alang sa pangalan sa director sa Bureau of Corrections.

Sa interview ang kanhi kongresista sa primero distrito sa ZaNorte mipalanog sa iyang dakung kalipay nga nakapauli na human makalabay ang napulo ug usa ka tuig ug nakita ang panagway sa iyang mga supporters nga maoy naghatag kaniya ug dugang kusog ug kadasig. Sa samang bahin si Justice Secretary Raul Gonzales mipagawas ug pahayag sa media nga may giluwatan siyang kamanduan alang sa pag-aresto kang Jalosjos. Si Nonong mitataw nga andam niyang atubangon unsa may mamahimong sangputanan sa iyang pagpauli karon ug balik sa Dapitan. Higpit niyang gibarugan nga ang iyang paggawas sa bilangguan gipasikad sa mga legal nga kamanduan nga hangtud karon nagapabiling wala ma revoke o kaha ma-anular.

Matud pa niya kon ugaling nagpagawas man si Secretary Gonzales ug arrest order batok kaniya kini usa ka illegal nga order kay ang adunay gahum nga makapagawas ug kasuguan alang na sa pag-aresto kaniya mao ra ang hukmanan. Giklaro usab ni Nonong nga kon si Police Regional Director Caringal makapresentar ug mga legal orders andam siyang motahod niini. Matud pa niya wala siyay gilapas nga balaod sa iyang pagpauli ug balik sa Dapitan kay usa na siya karon ka gawasnon nga lungsuranon human mahingpit niya sa pagsirbi ang iyang sentensiya.

Sumala pa niya kon ugaling adunay bikil sa iyang release paper                nan dalhon kini ni Gonzales atubangan sa hukmanan aron masuta kon tinood ba ang order o dili. Hingpit usab niyang gisalikway ang pasangil nga siya karon usa ka pugante, kay didto mismo sa Metro Manila gawasnon siyang makalakaw-lakaw hinungdan nga miadto pa siya sa usa ka pribadong kompaniya aron sa pag charter ug eroplano sa iyang pagpauli balik sa ZaNorte. Wala isalikway ni Congressman Jalosjos ang punto nga adunay politika nga nagpaluyo sa paglawgaw karon sa iyang paggawas. Kini mipalanog usab sa iyang katingala sa gipakita karong aktuwasyon ni Secretary Gonzales hinoon wala na siya mohatag ug dugang detalye kay sumala pa niya bason ug malibel pa siya unya niini.

Matud pa ni Jalosjos nagdala ug daghang misteryo ang gipakita karong lihok ni Gonzales atubangan sa ilang binilanggo gikan sa Muntinlupa nga kadungan niyang migawas karon nga ang gipasikaran mao ra ang release order gikan sa Bureau of Corrections nga wala na ipaagi sa pagreview sa DOJ. Wala usab siya makakita ug laing dokumento o papeles nga nag-anular o kaha nag revoke sa iyang release order hangtud karon gawas lamang sa mga pahayag nga giluwatan ni Gonzales diha sa media. Gikonpirmar ni Jalosjos nga interesado nga mokuyog unta niya sa Dapitan si kanhi Governor Chavit Singson nga mitanyag pa sa pagpagamit sa personal niining abyon apan iyang gibalibaran kay dili siya gusto nga maduhigan na usab sa bolok sa politika ang iyang pagpauli sa Dapitan.

Matud pa niya kon adunay may sayup sa pagkwenta sa iyang commutation dili na kini sala niya kay mga tinugyanan mismo sa Bureau of Corrections maoy nagsumada niini busa ang angayang ikwestyon ni Gonzales mao ang nagbuhat sa computation. Kini midugang sa pagpahayag nga daghan nang mga piniriso nga nakagawas kay nahingpit na nila ang pagsirbi sa ilang sentensiya nga wala sukit-sukit sa DOJ apan sa iyang kabahin gilisud-lisud siya karon.

Karong buntaga ipasaka na sa iyang abogado ang kaso sa pag-awhag sa korte nga tahoron sa DOJ ang iyang release order. Pagka pasado alas dose sa sayung bahin sa kaadlawon sa Domingo, Desyembre 23, 2007 miabot si General Caringal ug miderecho kini sa Dapitan City Resort Hotel diin didto gipahigayon ang negosasyon tali nila ni Congressman Cesar Jalosjos, Mayor Dominador Jalosjos, Jr. ug mga abogado ni Nonong nga sila si Atty. Cres Palpagan, Alan Ranillo, Ruben Legorio ug Atty. Flavio Cordero. Ang negosasyon milungtad ug kapin sa usa ka oras diin unang migawas si Mayor Jun Jalosjos ug nagkanayon nga wala gayuy napresentar nga dokumento si Caringal para dalhon ug balik si Nonong. Alang kaniya dili siya mosugot nga madala ni Caringal si Nonong sa Zamboanga City.

Samtang si Atty. Ranillo mikonpirmar sa kakuwang sa mga papeles nga gisaligan ni Caringal sa pagdala kang Nonong. Matud pa ni Atty. Ranillo karon pa kini mahitabo nga ang usa ka lungsuranon dakpon sa pulis nga pinasikad lamang sa usa ka text message. Gipahayag ni Ranillo nga kini nga butang ilang dalhon atubangan sa hukmanan. Sa dihang nakuhaan usab ug pahayag si General Caringal kini igo rang mitubag nga gihatagan nila ug igong panahon ang mga Jalosjos sa pagsunod sa ilang hangyo nga madala si Nonong sa Zamboanga.

Pasado alas 4:00 sa kaadlawon si Nonong mao nay midisidir nga mouban ni Caringal sa Zamboanga City sa kabalaka nga aduna unyay kasamok nga mahitabo. (Press Freedom, Vol. XX No. 11)

 

RTC Zamboanga City mimando Jalosjos pabilin sa San Ramon

Gimando sa Regional Trial Court sa Zamboanga City nga ipabilin sa costudiya sa San Ramon Penal Colony si kanhi Congressman Romeo Jalosjos.

Sa pagpaminaw sa petition for Writ of Habeas Corpus nga gipasaka sa kampo ni Jalosjos, miluwat ug desisyon si Executive Judge Jesus Carbon, Jr. nga dili una ibalik sa National Bilibid Prison sa Muntinlupa ang kanhi kongresista samtang dili pa siya makapagawas ug desisyon kon gawasnon naba ug dili si Nonong. Matud ni Justice Secretary Raul Gonzales, ilang respetoan ang court order. Ang mas importante matud niya, nagapabilin pang nabilanggu si Jalosjos sa Zamboanga o kaha sa Muntinlupa.

Apan para sa legal team ni Jalosjos, ang kamandoan sa hukmanan nga dili ibalhin sa laing bilangguan ang kanhi kongresista usa na ka timailhan sa hataas nga porsyento sa ilang kadaugan. Nasayran gikan kang Atty. Cres Palpagan nga gihatagan sila karon ug tulo ka adlaw ni Judge Carbon sa pagsubmiter ug “simultaneous memorandum” ayha mopagawas ug desisyon ang korte. (The New Nandau, Vol. XVII No.25)

 

BFAR MITUNOL P1.2M NGADTO NI GOB. LANDO YEBES

Ang Bureau of Fisheries and Aquatic Resources-Region IX nga nagabasi sa Dakbayan sa Zamboanga ang mitunol sa P1.2 milyones ngadto ni Gob. Rolando E. Yebes niad-tong Deciembra 27, ning tuig aron sa pagtiwas sa on-going nga proyekto, ang BFAR – ZaNorte Multi-Species Fresh Water Fish Hatchery, nga gikalatid nga humanon sa dili pa mulabay ang bulan sa Marso, sunod tuig. Kini ang nahipus nga kasa-yuran ning mantalaan gikan ni Special Deputy Provincial Agriculturist Vicente B. Sanchez, Jr.

Matud pa ni Sanchez, ang maong mga tseke nga nagkantidad ug P1.2 milrones ang gihatud-tunol mismo ni Regional Director Virgilio A. Alforque didto sa Dapitan City sa maong adlaw ngadto sa gobernador kinsa niad-tong tungora nakighi-mamat usab sa maong mayores sa atong lalawigan. Si Gobernador Yebes ang nagpasalamat sa Bureau of Fisheries and Aquatic Resources kinsa nagpakita sa iyang dakong suporta ngadto sa iyang administrasyon kinsa paninguha nga matabangan ang mga kabus nga mamahimong haruhay ug mawagtang sa walog sa kapubrehon.

Sa kabahin ni RD Alforque, kini misugilon nga sa sunod tuig, panaagi sa hangyo sa gobernador, iyang ipahimutang ang usa ka Mariculture Park didto sa Lungsod sa Rizal. Ang maong Parke nga magkostar ug P2.0 milyones butangan ug mga mahalon ug bilihong mga isda sa dagat, sama sa talkitok, lapulapu, kitong, ug uban pa. Tungod kay nakita niini ang kasinsero ni Gob. Yebes sa pag-implementar sa mga programa ug proyekto may kalambigitan ang pangisda, misaad si Alfoque nga buhusan niyang ug daghan pa nga mga proyekto kalabot sa kapanginabuhian sa pangisda ang lalawigan sa Zamboanga del Norte diin usa usab siya nga lumulupyong lumad niini. (The New Nandau, Vol. XVII No.25)

 

 

 

NOTE: SEND US YOUR NEWS.  Tell us what's going on in your barangays, clubs, schools, businesses and non profit organization. You can also send notices and announcements.
          

 

    Email to webmaster@dipolognon.com

      
Google
WEB THE DAILY DIPOLOGNON