2

January 1,  2008

 

DAPITAN SUPAK SA EXPLORATION SA PHILEX

Nagapabiling dakung supak ang kagamhanang local sa dakbayan sa Dapitan sa exploration sa Philex Mining nga maapil ang bukid sa Taguilon. Kini ang giklaro ni Vice Mayor Patri “Jing” Chan human makadawat ug pahibawo ang Dapitan sa plano sa Philex Mining nga nalakip karon sa ilang gi-aplayan nga exploration ang pagpahigayon ug susamang mga kalihukan sulod sa teritoryo sa maong siyudad.

Sa nasayran maoy gitinguha karon sa Philex sa ilang pagbukas ug balik sa operasyon sa mina sa Lalab, Sibutad ang pagmina ug copper gikan sa lungsod sa Rizal hangtud na sa dakbayan sa Dapitan. Matud pa ni Vice Mayor Chan ang nasangpit nga plano sa Philex higpit nilang gibabagan tungod sa kabalaka nga bason u gang tinubdan sa tubig nga nagagikan sa upaw nga bukid sa Taguilon maapektuhan.

Sumala pa niya samot nga wala sila mahi-uyon sa dihang nakadawat sila ug komonikasyon gikan sa DENR ug gipahibawo nga ang siyudad walay labut ug walay gahum sa pagbabag sa exploration sa Philex sulod sa territorial jurisdiction sa Dapitan. (Press Freedom, Vol. XX No. 10)

 

GOV. YEBES NANAWAGAN ALANG SA PAGHIKLING SA POLITIKA PARA IPATIGBABAW ANG PAGSIRBISYO

Paghikling sa politika ug pagpatigbabaw sa pagsirbisyo sa katawhan angayan nga maoy unang sagupon karon sa tanang mga bag-ong napili nga mga opisyales sa barangay.

Kini ang unod sa mensahe sa pasko nga gipalanog ni Governor Rolando Yebes para sa tanang katawhan sa Zamboanga del Norte. Ang gobernador nagkanayon nga maoy iyang gipanghinaut nga sa sunod tuig magtinabangay ang kagamhanang probinsiyal ug mga opisyales sa barangay nga maningkamut nga mapalambo ang kahimtang sa ilang mga katawhan.

Nalakip na sa iyang gipanghinaut nga ang atong mga opisyales gikan sa mga kapitan sa barangay hangtud na sa pinakataas nga opisyal sa probinsiya magkahiusa, magtinbangay ug ihikling una ang politika para makatabang sila sa hingpit sa mga katawhan unsay ilang mga gikinahanglan. Subling gipahibawo sa gobernador nga ang ilang puntirya sa sunod tuig mao ang kabahin panginabuhi sa katawhan kay kini maoy nag-unang problema sa atong lalawigan. (Press Freedom, Vol. XX No. 10)

 

KAMPANYA BATOK SUERTRES SUKDANAN SA KASINSIRO SA PULIS UG MGA MAYOR

Sukdanan sa kasinsiro sa pagpanirbisyo ug pag-alagad sa katawhan ang paglusad sa mga mayor ug pulis sa higpit nga kampanya batok sa illegal gambling. Mao kini ang gipahayag ni Governor Rolando Yebes atubangan sa giluwatan niyang orden ehekotibo nga nagmandu sa tanang 25 ka mayors ug duha ka mayor sa siyudad uban sa Philippine National Police alang na sa paglusad ug higpit nga kampany batok sa illegal gambling ilabi na gayud sa swertres.

Matud pa ni Governor Yebes wala pa siyay nadawat nga report kon unsa nay nahimong resulta sa ilang giluwatang kamanduan sa kampanya batok sa illegal gambling. Sumala pa gipasubay pa niya sa provincial attorney kon aduna na bay nahimong resulta sa ilang kampanya.

Sa pagka karon matud pa ni Governor Yebes wala siyay gihatag nga timetable o quota kay maoy iyang lantawon unsay lihok sa mga mayor ug kapulisan sa kampanya batok sa illegal gambling. Giklaro sa gobernador nga siryoso ang iyang administrasyon sa kampanya batok na sa illegal gambling ug maoy gusto niya nga aduna gayuy makitang agi ang kampanya sa kagamhanan nga molahutay. (Press Freedom, Vol. XX No. 10)

 

PERFORMANCE BONUS PARA SA DIPOLOG GIAPRUBAHAN NA KAGAHAPON

Giaprubahan kagahapon sa balay balauranan sa dakbayan sa Dipolog ang paghatag ug performance bonus ngadto sa mga kawani niini. Kini ang gipahibawo ni Konsehal Peter Co ang majority floorleader sa Sangguniang Panlungsod sa Dipolog human sa pagpahigayon nila ug special session kagahapon sa buntag nga gipatawag ni Mayor Evelyn Uy aron sa pagtuki sa maong punto.

Matud pa ni Konsehal Co ang ilang naaprubahan mao ang paghatag ug P10,000 ka pesos sa mga kawani nga Performance Bonus para magpatas ang tanan sa ilang dawaton nga dugang pinasikuhan gikan sa siyudad. Subay na niini ang Sanggunian miaprubar sa gipadas-og nga lakang ni Mayor Uy sa paggahin ug P11 milyones ka pesos nga pundo para na sa maong katuyuan.

Sa sayu pa ang kagamhanang probinsiyal sa Zamboanga del Norte unang mipagawas sa iyang 14th month bonus nga balor ug usa ka buwan nga suweldo sa mga kawani sa probinsiya. Samtang laing duha ka libu ka pesos ang gimandu usab ni Governor Rolando Yebes nga bonus alang sa mga job orders sa probinsiya. (Press Freedom, Vol. XX No. 10)

 

JUDGE LACAYA MIINHIBIT SA KASO NI KAPITAN PATANGAN

Mipakanaug na sa iyang kamanduan si City Judge Victoriano Lacaya, Jr. sa Municipal Trial Court in Cities ning dakbayan sa Dipolog sa pagpaminaw sa election protest batok kang Kapitan Nathan Patangan sa Barangay Diwan. Kini ang gibutyag ni Atty. Cres Palpagan, Jr. ang legal counsel ni Kapitan Patangan human giduso nila niadtong Lunes ang Motion for Inhibition batok kang Judge Lacaya.

Matud pa ni Atty. Palpagan, mi-inhibit man tuod si Judge Lacaya sa pagpadayon ug paminaw sa maong kaso batok kang Kapitan Patangan apan nasuko daw niya ang huwes tungod sa pagpa-inhibit niini sa kaso. Sa sayu pa gipadas-og nila ni Atty. Palpagan nga nawad-an na ang iyang kleyente ug pagsalig ngadto kang City Judge Lacaya nga maoy mohusay patas sa election protest nga gipasaka ni Letecia Bagarinao batok kang Kapitan Patangan pinasikad sa pipila ka mga hinungdan ug aktuwasyon nga gipakita niini samtang giburuka ang kaso nga daw ang huwes adunay kakuwangon sa kahibawo sa balaod o kaha daw gituyo gayud kini para mahatagan ug pabor ang pikas habig.

Gisaysay ni Atty. Palpagan, nga gikan pa sa sinugdanan ang tanan nilang mga mosyon nga gipadas-og atubangan ni City Judge Lacaya, pulos gibasura niini ug wala hatagi ug paborabling aksiyon atubangan sa klarong wala pagsunod sa mga gimbut-an sa balaod nga maoy angayang subayon ilabi na kabahin sa revision sa mga balota ug sa dihang gipasumitir sila ug briefs. Sa ilang giduso nga Motion for Inhibition duha ka mga isyu ang giisa nila ni Atty. Palpagan batok kang City Judge Lacaya, apan sa tumoy sa ilang giduso nga lakang gipatabanan kini ug istorya nga wala na nila ilakip sa paghisgut ang pipila ka mga unverified suggestion nga hayan ang huwes na pressure sa local politics tungod sa kasuod o kaha sa mga pabor nga nadawat niini kaniadto ug karon o sa posibling ganti nga giandam, apan kini wala na nila hatagi ug gibug-aton. (Press Freedom, Vol. XX No. 10)

                                                                                               

SI NONONG DILI NA GAYUD PRISO –GOV. YEBES

“Si Nonong Jalosjos dili na gayud usa ka piniriso,” mao kini ang giluwatang pahayag ni Governor Rolando Yebes kabahin sa kontrobersiya karon sa paggawas sa kanhi kongresista sa primero distrito sa Zamboanga del Norte.

Sa iyang nakita aduna lamay nahitabong misjudgement sa kabahin sa Department of Justice. Matud pa ni Governor Yebes tapos nang nahatag ang release order para kang Nonong ug kini nga isyu iyang pagadalhon atubangan sa hukmanan daku ang iyang pagtuo nga modaug ang kanhi kongresista sa isyu apan basin unya kini maoy makalangay sa iyang hingpit nga paggawas. Si Governor Yebes midugang sa pagpahayag nga sa sunod tuig sigurado na nga makagawas si Nonong human sa pagpahigayon sa review sa Department of Justice.

Kabahin sa isyu sa computation sa pagpa mubo sa silut ni Nonong, matud pa sa gobernador, tapos na kining gisumada sa Bureau of Corrections ang ahensiya sa kagamhanan nga maoy gitahasan sa balaod sa pagdetirminar kon sakto ba ang pagkwenta o pag-ihap sa commutation. Dili usab motuo ang gobernador nga wala pahibaw-an sa Bureau of Corrections ang Department of Justice kabahin sa release order ni Nonong. Wala usab isalikway ni Governor Yebes ang posibilidad nga adunay politika nga nagpaluyo sa pagka lawgaw sa paggawas karon ni Nonong kay sumala pa niya sa pagka priso lang daan niini tataw na nga adunay mga kamot sa politika nga nagpaluyo bisan sa kahuyang sa ebedensiya gikonbikto gayud ang kanhi kongresista.

Sa samang bahin giila usab ni Governor Yebes nga unfair ang treatment sa mga Manila news nga naghulagway kang Nonong nga child molester o child rapist nga usa ka butang nga layu ra sa iyang kasong statutory rape. (Press Freedom, Vol. XX No. 10)

 

SANGGUNIAN SA DAPITAN WALAY BACKLOG SA MGA REFERRALS

Gidayeg sa presiding officer sa balay balauranan sa dakbayan sa Dapitan ang mga meyembro niining magbabalaod nga naglihok gayud ug nagbuhat sa ilang mga homework.

Kini ang paghulagway nga gihimo ni Vice Mayor Patri “Jing” Chan ngadto sa mga meyembro sa Sangguniang Panlungsod sa dakbayan sa Dapitan. Matud pa ni Vice Mayor Chan ang tanang mga referrals nga madawat sa nagkadaiyang mga komitiba dali nga giaksiyunan sa mga chairman ug meyembro niini diin sa iyang namatikdan sulod sa duha ka semana ang referrals maduso na ngadto sa plenary session para aksiyonan sa balay balauranan sa Dapitan.

Paspas usab ang dagan karon sa ilang session sukwahi sa ilang nasinati sa miaging mga panahon nga maabtan sila ug tagpila ka oras. Sumala pa ni Vice Mayor Chan kini tungod kay ang mga konsehales karon sa Dapitan nagbuhat sa ilang mga homework sa dili pa motambong sa ilang plenary session gitun-an na daan ang ilang mga assignments. Gipasigarbo sa bise mayor sa Dapitan nga wala gayud silay mga pending nga resolutions o ordinansa nga wala malihok sa nagkadaiyang komitiba.

Matud pa ni Vice Mayor Chan ang Sanggunian sa Dapitan nahimo usab nga lig-ong katimbang sa hepe ehekotibo sa nagkadaiyang mga proyekto nga gipadas-og ni Mayor Dominador Jalosjos, Jr. pinaagi na sa pagpanday sa gikinahanglang mga lakang. Samtang nagapadayon karon ang ilang mga nanag-unang proyekto nga giimplementar nila sulod sa pipila ka hugna sibo sa pundo nga ilang mahipos. Usa sa iyang gihisgutan mao ang landing site ni Dr. Jose Rizal sa pag-abot niini sa dakbayan sa Dapitan nga nasugdan nila sa tuig 2006 apan hangtud karon wala pa gayud nila mahuman tungod sa problema sa gikinahanglang pundo.

Lakip usab sa gibutyag sa bise mayor nga proyekto nga nalangay mao ang paghingpit sa Pit-osan Bridge nga unang gihatagan ni Governor Rolando Yebes ug P5 milyones ka pesos sa miagi pang mga tuig. Apan sa ilang nakita karon ang lima ka milyon ka pesos nga pundo nga gihatag sa gobernador kuwangon alang na sa paghingpit sa maong tulay busa nangita sila ug paagi nga makakuha ug dugang pahat para niini nga gihatag ni Presidente Gloria Macapagal-Arroyo nga mokabat sa P20 milyones ka pesos. Samtang ang lima ka milyon ka pesos nga pundo gikan sa gobernador ilang gigamit sa pagtiwas ug konstrak sa dalan nga magdugtong sa dakbayan sa Dapitan ug lungsod sa Sibutad. (Press Freedom, Vol. XX No. 10)

 

DIPOLOG UG DAPITAN MOHATAG SA PERFORMANCE BONUS

Gikonpirmar sa mga meyembro sa Sangguniang Panlungsod sa dakbayan sa Dipolog maoy gitinguha karon nga makahatag ang siyudad ug performance bonus nga P10,000 kada kawani.

Kini ang gikonpirmar ni Konsehal Peter Co, Majority Floor Leader sa Sanggunian sa Dipolog uban ni Konsehal Julius Napigquit. Matud pa ni Konsehal Co karong adlawa si Mayor Evelyn Uy nagpatawag ug special session sa Sanggunian sa Dipolog para matuki ang paghatag sa performance bonus nga tag P10,000 kada kawani.

Sumala pa ni Konsehal Co sa ilang regular session niadtong Martes samtang nagrecess sila gihisgut-hisgutan na nila unsa ang ilang ihatag nga dugang pinaskuhan ang usa ka buwan ba nga suweldo o ang performance bonus nga patas tag P10,000 ang tanan. Ang majority floor leader sa Sanggunian sa Dipolog nagkanayon nga mahibaw-an gayud karong hapon kon unsay mapanday nga lakang alang sa paghatag sa dugang bonus sa mga kawani sa siyudad.

Samtang ang mga kawani sa city hall sa Dipolog sa ilang kabahin mipahayag nga mas gusto nila nga ang ihatag mao ang performance bonus nga tag P10,000 ka pesos kay sigurado na kini. Sumala pa nila nakatilaw sila ug tagam sa miaging tuig nga midawat sila ug dugang usa ka buwan nga additional bonus ug pagka human gipa refund sa Commission on Audit kay walay gipasikaran ang nasangpit nga paghatag.

Sa kabahin sa Sangguniang Panlungsod sa dakbayan sa Dapitan si Vice Mayor Patri “Jing” Chan nagkanayon nga ang ilang gihuwat mao na lamang ang kopya sa circular gikan sa DBM aron aduna silay basihanan. Sa sayu pa ang kagamhanang probinsiyal sa Zamboanga del Norte mipagawas na karong semana sa paghatag sa ilang 14th month bonus sa mga kawani nga balor ug usa ka buwan nga suweldo.

Samtang gimandu usab ni Governor Rolando Yebes ang paghatag ug duha ka libu ka pesos nga bonus para sa tanang mga job orders nga kawani sa probinsiya. (Press Freedom, Vol. XX No. 10)

 

ERECTION SA TOWER SA ERICSSON GIBABAGAN NI KONSEHAL CADANO

Gibabagan ug gipahunong ni Konsehal Arnold Cadano sa Sangguniang Panlungsod sa dakbayan sa Dapitan ang pagkonstrak karon sa tower sa Ericsson sa may Barangay Lawaan duol sa Dapitan City High School.

Matud pa ni Konsehal Cadano ang pagtukod sa maong tower wala gayud magbatun ug tukmang pagtugot gikan sa Sanggunian sa Dapitan. Sa dihang gipresentar nila ni Konsehal Apple Marie Agolong ug Konsehal Hermogenes Balisado ang ilang report kabahin sa pagpatindog sa maong tower iyaha kining gikwestyon kon nakapahigayon na ba ug public hearing.

Sa iyang pagkasayud nga wala pa, higpit niyang gipadas-og nga ihikling una ang maong lakang ug ipahunong ang ilang pagkonstrak sa tower kay wala gayud kini makasunod sa gihan-ay nga proseso. Si Cadano nga maoy chairman sa Committee on Public Utilities mipatin-aw nga ang tanang mga communications tower o cell sites nga ipatindog sulod sa hurisdiksiyon sa dakbayan sa Dapitan kinahanglang moagi gayud sa pagtuki sa Sanggunian ug adunay ipahigayong public hearing kon modawat ba ang mga katawhan nga sikbit niini taliwala sa mga kabalaka kabahin sa radiation.

Gibutyag ni Cadano nga sa miagi ang Sanggunian sa Dapitan nakadawat ug petisyon kabahin na sa pagpatindog ug mga cell sites tungod lagi sa kahadlok kabahin sa radiation. (Press Freedom, Vol. XX No. 10)

 

GOVERNOR MIMANDU FISH SEEDING PROGRAM PASPASAN

Gimandu karon sa gobernador nga paspasan ang pagpahigayon sa fish seeding sa nagkadaiyang mga kasubaan ug kasapaan sulod sa atong lalawigan sa Zamboanga del Norte. Kini ang kamanduan nga gipakanaug ni Governor Rolando Yebes ang kasamtangang pangulo karon sa Office of the Provincial Agriculturist ngadto kang Special Deputy Provincial Agriculturist Vicente Sanchez, Jr. diin napailawom sa iyang hurisdiksiyon ang fishery sector.

Ang gobernador mimandu nga kinahanglang dili undangan ang fish seeding program kay makatabang kini ug daku sa gikinahanglang pagkaun sa atong mga katawhan diha sa kabarangayan ilabi na panahon nga apike ang pangisda sa dagat. Matud pa sa gobernador ang nasangpit nga programa kabahin na sa mga lakang nga gisagup karon sa kagamhanang probinsiyal sa ZaNorte pagtubag sa kagutom sa atong mga katawhan duyog sa gilusad nga Hunger Mitigation Program ni Presidente Gloria Macapagal-Arroyo para sa atong probinsiya.

Sa iyang kabahin si Special Deputy Provincial Agriculturist Vic Sanchez mipahayag nga nagapadayon ang ilang fish seeding program ug wala nila kini undangi. Sa sunod tuig pagtungtong sa buwan sa Enero matud pa ni Sanchez subsob nga fish seeding ang ilang himoon sa nagkadaiyang suba sa lalawigan sa tuyo nga maulian ang fish stocks niini nga naapektuhan sa illegal nga pagpangisda sama sa pagpanghilo ug koryente.

Particular nga gusto nga mapahigayonan sa fish seeding sa gobernador ang mga suba sulod sa 2nd district kay iyang nakita nga anaa ang bagang duot sa katawhan nga nag-atubang sa kagutom tungod sa rason nga kasagaran sa mga bukid sakup sa maong distrito wala nay tanum nga mga kahoy nga nakaapektar sa ilang pagpanguma. (Press Freedom, Vol. XX No. 10)

 DAPITANON NAHUGNO NGA GIBABAGAN ANG PAGGAWAS NI NONONG

Anaa sa kasubo ug kaluya ang gibati karon sa mga katawhang Dapitanon human wala mahinayon ang pagpauli ni kanhi Congressman Romeo “Nonong” Jalosjos karong semanaha human gikwestyon ang adlaw sa iyang paggawas sa New Bilibid Prison human gipamub-an ang iyang sentensiya.

Si vice Mayor Patri “Jing” Chan, nagkanayon nga ang mga supporters ug kaalyado ni Nonong nahugno sa balita nga dili mahinayon ang pagpauli niini sa dakbayan sa Dapitan karong Desyembre 20. Samtang niadtong Lunes si Nonong sa interview sa media mideklarar nga usa na siya ka gawasnon nga lungsuranon.

Apan tungod sa maong interview ang Department of Justice mipakanaug karon ug kamanduan nga did-an ang mga inmates nga mainterview sa media gawas lamang ug adunay pagtugot gikan kanila. Si Justice Raul Gonzales miinsistir nga ang pagawas ni Nonong kasamtangan pang gipailawom sa pagreview sa Department of Justice ug wala pay order alang na sa gawas niini.

Samtang si Mayor Dominador Jalosjos, Jr. sa dakbayan sa Dapitan sa interview sa ANC Channel sa Manila mibutyag nga mga preparasyon alang sa pagpauli ni Nonong ang nahan-ay na. Sa samang bahin mipalanog usab ni Mayor Jun Jalosjos sa iyang dakung pagsalig nga makagawas ra gayud si Nonong. Si Vice Mayor Chan sa interview sa ZNUC kagahapong adlawa misaysay nga sa gabii sa Sabado, Desyembre 15, nagpahigayon na sila ug misa pasalamat alang sa paggawas ni Nonong ug nagpulaw sila hangtud na sa paghagtok sa alas dose sa tungang gabii diin alas 12:01 sa kaadlawon mitawag kanila nga nakagawas na siya sa New Bilibid Prison.

Apan ang maong kalipay hamubo lamang sa dihang pagka buntag migawas ang balita nga gikwestyon sa kalihim sa hustisya ang paggawas ni Nonong. Sila sa pagka karon matud pa ni Vice Mayor Chan naghuwat usab sila sama sa ubang mga supporters ug kaalyado ni Nonong unsay lakat karon sa paggawas niini kay wala usab silay kalibutan unsa gayuy hinungdan sa pagka pakgang sa paggawas niini. Wala isalikway sa bise mayor sa Dapitan nga politika ang nagpaluyo sa pagka priso ug pagbabag sa paggawas ni Nonong karon.

Natandi usab ni Vice Mayor Chan ang paghatag sa ubang mga konbiktado nga mas bug-at pa ug mga giatubang nga kaso nga nakapatay gayud ug tawo, apan gipasaylo komparar sa kaso ni Nonong nga Staturory Rape. Sumala pa ni Vice Mayor Chan si Nonong mao na unta ang ilang pinasidungang bisita sa ilang Christmas party ugmang adlawa kon nahinayon pa ang pagpauli niini. Samtang si Konsehal Apple Marie Agolong sa dakbayan sa Dapitan nakasaway sa mga balita nga gipagawas sa mga nasudnong pamantalaan ug sa television nga para kaniya dili usab mao ang gihimo nilang paghulagway kang Nonong. Matud pa ni Konsehal Agolong unfair nga si Nonong ilang tawgon nga child rapist ug child molester sanglit ang kaso niini usa lamang ka statutory rape nga walay puersahan nga pagpanglugos nga nahitabo. (Press Freedom, Vol. XX No. 10)

 

CITY JUDGE LACAYA GIPA-INHIBIT SA KASO NI KAPITAN PATANGAN

Gikatakdang paminawon karong adlawa ang giduso nga Motion for Inhibition ni Kapitan Nathan Patangan sa Barangay Diwan ning dakbayan sa Dipolog batok kang City Judge Victoriano Lacaya, Jr. sa Municipal Trial Court in Cities Branch 2 ning dakbayan sa Dipolog may kalabutan na sa election protest nga gipasaka ni Leticia Bagarinao.

Niadtong Lunes, Desyembre 10, 2007 giduso sa legal counsel ni Kapitan Patangan nga si Atty. Cres Palpagan, Jr. ang Motion for Inhibition batok kang City Judge Lacaya pinasikad sa pipila ka mga kapasikaran. Unang kapasikaran nga gihisgutan sa Motion for Inhibition batok kang City Judge Lacaya mao ang nahitabo sa gipahigayong Preliminary Conference nga gipadangat ngadto sa duha ka mga habig.

Ang notisya gipagawas sa Branch Clerk of Court pinasikad sa mandu ni City Judge Lacaya diin nabutang sa maong notisya sa duha ka katapusang parapo nga nagkanayon, “Failure to file briefs or to comply with its required content shall the same effect as failure to appear for preliminary conference.” Sa samang notisya nakabutan nga ang duha ka mga habig uban sa ilang mga abogado gipahinumduman nga ang kapakyas sa protestant nga si Bagarinao o sa iyang abogado nga motambong sa preliminary conference maoy kapasikaran sa pagdismiss sa kaso ug susama usab ang epekto para sa counter-protest sa protestee nga si Kapitan Patangan sigun sa gimbut-an sa Section 4, sa Rule 4 of the Rules diin ang korte mamahimong motugot kang Bagarinao sa pag presentar ug mga ebedensiya nga maoy mahimong basihanan sa ipakanaug nga hukom.

Gisaysay ni Atty. Palpagan nga niadtong Nobyembre 17, 2007 mga alas 10:17 sa kabuntagon nga protestee nga si Patangan mifile atubangan sa hukmanan sa gipangayo nga brief sigun sa gimandu sa balaod.        Apan sila si Bagarinao mifile sa ilang brief sa adlaw na nga gipatawag ang Preliminary Conference sa Nobyembre 19, 2007 mga alas 856 sa buntag. Atubangan sa klarong paglapas sa gimbut-an sa balaod gipadas-og nila ni Kapitan Patangan ang pagdismis sa protesta pinasikad sa sanctions nga nahasulod sa Notice of Preliminary Conference nga gipadala sa korte sigum sa gimbut-an sa Rules of Procedures.

Apan taliwala sa klarong paglapas sa balaod sa kapakyas nilang Bagarinao sa pagduso sa ilang brief sulod sa tukmang panahon nga gimandu sa balaod si Judge Lacaya, matud pa ni Atty. Palpagan, otomatik nga misalikway sa ilang motion ug mimandu nga ipadayon ang paghusay sa kaso. Matud pa ni Atty. Palpagan ang gibuhat ni City Judge Lacaya wala na lantawa niini ug hatagi ug gibug-aton ang ubang probisyon sa balaod nga maoy mamahimong kapasikaran alang na sa pagdismis sa protesta. Matud pa ang gilantaw ni City Judge Lacaya kutob lamang sa pipila ka mga probisyon sa balaod ug wala na mopadayon sa paghisgut sa ubang bahin sa balaod diin natataw ang paglapas nila ni Bagarinao.

Giklaro nila ni Kapitan Patangan sa ilang gidusong Motion for Inhibition nga ang gipakanaug nga ruling ni City Judge Lacaya klaro kaayo nga kini nahasukwahi sa klarong probisyon sa balaod ug sa katuyuan niini. Apan bisan pa sa kimpang nga ruling nga gipakanaug ni City Judge Lacaya niadtong Nobyembre 19, 2007 si Kapitan Patangan padayong mihatag sa iyang pagsalig ug kompeyansa sa hudikatura sa mahinungdanon kaayo nga panaw alang sa pagkab-ot sa hustisya pinaagi sa pagdawat na lamang sa ruling nga gipakanaug sa korte pinaagi sa pagpartisipar sa revision sa mga balota. Matud pa ni Atty. Palpagan ang chief revisor ni Kapitan Patangan nga si Atty. Jose Cabato, Jr. sa wala pa sugdi ang pagpahigayon sa revision mipadas-og atubangan sa hukmanan nga maoy ilang sundon ang kasugan sa balaod ang mandatory provision sa Section 8, Rule 10 sa Rules of Court nga kinahanglang subayon una nila ang mga security markings ug ubang mga vital information sa mga balota.

Ang nasangpit nga probisyon sa balaod naghisgut nga kon adunay mandu nga ipahigayon ang revision of ballots aron mahiyahan ang mga rrevisors ang korte kinahanglang mosubay una sa security markings sa balota ug mga election documents gikan mismo sa Chairman sa Commission on Elections nga maoy moobligar nga moila sa maong mga markings ug ubang mahinungdanong inpormasyon nga maoy moayuda sa korte sa pagdetirminar kon ang balota ug ubang election documents dili ba peke diin ang duha ka mga habig pahibaw-on usab sa mamahimong resulta niini. Ang chief revisor ni Kapitan Patangan mipadas-og atubangan sa hukmanan nga sa dili pa nila ipadayon ang revsion ilaha unang sundon ang gimbut-an sa balaod.

Apan taliwala sa pag-insistir ni Atty. Cabato atubangan ni Judge Lacaya nga ilang sundon ang gimbut-an sa balaod, ang huwes mimandu nga ipadayon ang revision uban sa pag-ingon nga kon unsa may ilang mga objection nila ni Patangan itala lamang kini diha sa prescribed forms ug ang hukaman  na unya ang modetirminar kon peke ba ang balota o dili. Sa ilang motion nga giduso karon giklaro ni Atty. Palpagan nga ang ruling nga gipakanaug ni City Judge Lacaya wala makatubag sa motion sa revision representative ni Kapitan Patangan ug alang kanila kini sama sa usa ka buta nga kamanduan alang na sa pagpahigayon sa revision.

Wala usab mabutang sa balaod nga naghisgut ug Prescribeb Forms para sa revision nga maoy maghatag sa korte ug exemption sa pagsunod sa mandu sa balaod. Matud pa ni Atty. Palpagan milutaw nga ang huwes naglibog kon unsaon niini sa pagtubag ang punto nga giisa ni Atty. Cabato nga unta igo ra mang nangutana sa hukmanan kon nakatuman ba ang korte sa kasuguan sa balaod. Ang kalibog sa korte misamot sa dihang si Judge Lacaya mipakanaug ug ruling nga naghatag kang Atty. Cabato ug option nga mapresentar niya ang COMELEC isip testigos. Apan bisan ug giunsa pa ug padas-og ni Atty. Cabato nga maoy ilang sundon ang mga gimbut-an sa balaod si City Judge Lacaya mimandu nga ipadayon ang revision.

Gitataw ni Atty. Palpagan sa iyang Motion for Inhibition nga si City Judge Lacaya nagpasagad lamang ug pakanaug sa pasiunang hukom nga ang mga balota valid. Matud pa ni Palpagan walay balaod o procedure sa korte nga naghisgut kabahin sa presumption sa validity sa mga balota nga ipailawom sa revision. Sumala pa kini maoy rason kon ngano nga ang Korte Suprema mimandu nga kinahanglang subayon una sa hukmanan pinaagi sa COMELEC ang security markings niini sa dili pa ipahigayon ang revision. Gipadas-og ni Palpagan nga ang gipakitang aktuwasyon ni City Judge Lacaya nagpakita nga daw ang huwes ignorante kabahin sa balaod o kaha mikiling kini sa pagpabor sa pikas habig. Tungod niini hingpit nga nawagtang ang pagsalig sa protestee sa independence, integrity and cold neutrality ni City Judge Lacaya diha na sa paghusay sa maong kaso.

Sumala pa ang Benchbook para sa mga Trial Court Judges alang sa ilang ethical rules of judicial conduct nga ang huwes kinahanglan nga siya competent nga nahibawo sa mga balaod ug rules and procedures. Busa gikinahanglan nga ang usa ka huwes magapadayon gayud sa pagtuon kabahin na sa balaod ug mga jurisprudence lakip na sa mga bag-ong disisyon nga luwatan sa korte suprema kay ilawom sa panultihon nga “Ignorance of the law, excuses no one-apil na niini ang mga huwes.” Gawas nga ang huwes kinahanglan nga suhito sa mga balaod kinahanglan nga kini magapabiling putli ug iyang ipahamtang ang balaod bisan unsa pa ang iyang personal nga opinion kabahin sa merits niini ug ipatuman sa walay kukahadlok ug pagpabor-pabor ug isaklikway ang bisan unsa mang mga pagsuway ug inplowensiya sa kagamhanan, partido politika o kaha interference sa ilang mga personal nga pagtuo.

Gihisgutan usab ni Atty. Palpagan sa ilang motion nga opinion sa korte suprema nga nagkanayon nga sa una pa lamang nga tima-ilhan nagkuwang ug pagsalig sa aktuwasyon sa huwes aduna may lig-ong basihanan o wala ang huwes walay laing kapilian gawas sa pag-inhibit sa iyang kaugalingon nga mopadayon sa paghusay sa maong kaso. Sa ilang motion, si Atty. Palpagan nagkanayon nga wala na nila gani hatagi ug pagtagad ang mga sugyot nga ilakip sa paghisgut nga ang city judge sa Dipolog gipressure karon sa local politics tungod sa suod nga panaghigala, pag-akomodar sa mga hangyo ug pabor kaniadto ug karon o kaha sa pasalig nga adunay ihatag nga ganti ug uban pa gawas sa klarong mga kapasikaran nga ilang gipresentar karon. Kahinumduman nahuman na ang gipahigayong revision ug nagpakita nga si Kapitan Patangan milabaw diay ug 18 botos batok kang Bagarinao ug dili lamang dos botos.

Wala isalikway sa habig nila ni Patangan nga basin piyungan sa huwes ang pagpakanaug sa disisyon nga pabor sa pikas taliwala sa klaro kaayong kadaugan nga naangkon niya sa nakalabay nga eleksiyon sa ilang barangay. Karong buntaga gitakda ni City Judge Lacaya ang pagpaminaw sa maong Motion for Inhibition nga giduso batok kaniya. Sumala pa kasagaran sa mga huwes nga makadawat niini derecho na nga moinhibit sa ilang kaugalingon sa pagpadayon sa pagpaminaw sa maong kaso para maprotihian usab ang intigridad ug kridibilidad sa hudikatura.(Press Freedom, Vol. XX No. 10)

 

HANDOG PAMASKONG REGALO NI GMA GILUSAD SA PIñAN UG POLANCO

Pormal nga gilusad kagahapong adlawa sa lungsod sa Polanco ug Pinan ang Handog Pamaskong Regalo ni GMA. Gipahibawo ni National Food Authority Provincial Manager Omar Mohamad, Sr. sa NFA Dipolog.

Matud pa ni Manager Mohamad napulo lamang ka probinsiya ang gihatagan sa programang Handog Pamaskong Regalo ni GMA diin nag-una niini ang lalawigan sa Zamboanga del Norte. Sa alokasyon milutaw nga sa napulo ka probinsiya ang ZaNorte maoy pinaka daghan nga mokabat sa 21,800 ang target beneficiaries nga maoy magpakadawat sa supot nga adunay duha ka kilong bugas, asukar, kape, noodles, canned goods ug uban pa nga mobalor ug P250.00 kada plastic bag.

Ang moila sa mga beneficiaries niini mao ang Provincial Social Welfare and Development Office sa ZaNorte. (Press Freedom, Vol. XX No. 10)

 

GOV. YEBES GIPASANGINLAN NI MAYOR UY MAOY
NAGPUTOL SA RASYON SA GASOLINA SA DIPOLOG POLICE

Si Governor Rolando Yebes ang gipasanginlan karon sa mayor sa dakbayan sa Dipolog atubangan kang Executive Secretary Eduardo Ermita nga maoy nagputol sa rasyon sa petrolyo para sa Dipolog Police Office.

Ang maong pasangil ni Mayor Evelyn Uy gikonpirmar mismo ni Governor Yebes sa iyang paghibalik kagahapon gikan sa kauluhan. Matud pa sa gobernador gitawagan siya mismo sa kapikas ni Executive Secretary Ermita ug gikomprontasi ngano nga iyang giputol ang rasyon sa petrolyo para sa Dipolog Police.

Matud pa sa gobernaor giprangkahan niya ang kapikas sa executive secretary nga walay kalambigitan ang kagamhanang probinsiyal sa ZaNorte sa nahtiabong pagka putol sa rasyon sa petrolyo sa Dipolog Police sa hinapos nga bahin sa buwan sa Nobyembre. Kahinumduman gimandu ni Mayor Uy sa hinapos nga bahin sa Nobyembre ang pagputol sa rasyon sa petrolyo para sa Dipolog Police.

Girason sa buhatan sa mayor sa Dipolog nga naitos na ang pundo nga gigahin para sa gasoline ug krudo ilawom sa buhatan sa mayor nga anaa sa Non-Office Budget. Apan sa gihimong pagpasubay sa City Budget Office milutaw nga ang pundo para gasoline ug krudo sa buhatan sa Mayor ilawom sa Non-Office budget aduna pay P791,402.00 nga pundo ang nahibilin hangtud niadtong Desyembre 10, 2007.

Ang pagkaputol sa rasyon sa petrolyo para Dipolog Police gipakanaug ni Mayor Uy human usab siya balibari sa iyang hangyo sa chief PNP nga ibalik pagka hepe ang iyang paboritong police officer. Samtang sa pikas nga bahin nakahinagbo ug disgrasya ang bag-ong pick-up patrol car sa Dipolog Police didto sa lungsod sa Salug niadtong Byernes sa gabii, Desyembre 14, 2007. Gihulagway sa Salug Police nga hingpit gayud nga nagguba ang service pick-up sa Dipolog Police sa dihang aduna kiniy gikasungag nga laing sakyanan.

Sa nasayran ang service pick-up sa Dipolog Police nagagikan sa dakbayan sa Zamboanga kay adunay gikuha nga usa ka detention prisoner nga giilang sakup sa Kuratong Baleleng Gang. Hinoon gikataho nga walay nakalas nga kinabuhi o kaha naangol sa maong insidente sanglit nakagamit tanan sa ilang safety seatbelts ang sakay niini. Sigun sa report sa Salug Police mibaliwliw sulod sa pipila ka higayon ang service pick-up sa Dipolog Police tungod sa kakusog sa dagan niini samtang nagbunok usab ang makusog nga uwan. (Press Freedom, Vol. XX No. 10)

 

NONONG JALOSJOS NAKAGAWAS NA

Human sa 14 ka tuig nga pagka bilanggo nahimo na karong gawasnon si kanhi Congressman Romeo “Nonong” Jalosjos human gipagawas ang iyang release order sa New Bilibid Prison kagahapon Desyembre 16, 2007.

Sa nasayran pasado alas dose sa kaadlaw sa Desyembre 16, 2007 adlaw’ng Domingo nga migawas si Nonong gikan sa Bilibid Prison. Gipakita usab kagahapong adlawa ang mga video footage nga si Nonong uban sa iyang pamilya mitambong sa unang adlaw sa pagsugod sa Misa de Gallo.

Si Nonong gikatakdang mopauli sa dakbayan sa Dapitan karong Desyembre 20, 2007. Sumala pa pipila ka mga kanhi kauban ni Nonong sa kongreso sama nila ni kanhi Governor Chavit Singson ang mokuyog sa iyang pagpauli karong petsa 20.          Samtang si Justice Secretary Raul Gonzales miluwat usab ug pahayag nga kinahanglan pang ipailawom sa pagreview sa Department of Justice ang release order ni Jalosjos.

Angayang kasayran nga ang silut nga gipahamtang batok kang Nonong gipamub-an pinasikad sa rekomendasyon sa Parole and Pardons Board nga giaprubahan usab ni Presidente Gloria Macapagal-Arroyo tungod sa good behavior nga gipakita niini sulod sa New Bilibid Prison. Samtang sa mga balita karong buntag giklaro ni Justice Secretary Gonzales nga si Nonong Jalosjos pabilin pang nakaditiner sa New Bilibid Prison. (Press Freedom, Vol. XX No. 10)

 

NFA ZANORTE NAGPASALAMAT SA PROBINSIYA SA
TABANG NGA GILUGWAY PARA SA FOOD FOR SCHOOL PROGRAM

Gipasalamatan sa National Food Autohority ang kagamhanang probinsiyal sa Zamboanga del Norte sa gilugway niining suporta alang na sa pagpasutoy sa Food for School Program.

Kini ang gipalanog ni NFA Manager Omar Mohamad, Sr. sa programang Kapihan sa 1948 Cafeteria atubangan sa kalangay nga nahinagbo sa Food for School Program. Matud pa ni Manager Mohamad ang ilang problema nahulog sa pagtransportar sa bugas paingon sa nagkadaiyang mga tulunghaan sulod sa atong lalawigan.

Sa hinapos nga bahin sa nakalabay nga semana gimandu ni Governor Rolando Yebes ang paglugway sa probinsiya sa iyang mga pasilidad sama sa dump truck para magamit sa pagtransportar sa bugas. Sa samang bahin gipahibawo ni Governor Yebes ang nagkadaiyang mga municipal mayors sa ZaNorte nga kinahanglang ilang sugaton diha sa ilang tagsa-tagsa ka munisipyo ang bugas uban sa mga tinugyanan sa Department of Education para nahatag gayud kini sa mga hingtungdang pangpublikong eskwelahan.

Sumala pa niya anaa na sila karon sa 40 porciento nga accomplishment sa Food for School Program dungan sa pagpasalamat nga ang ilang paghatud sa bugas sa nagkadaiyang mga pangpublikong tulunghaan nahatagan karon ug sulbad atubangan tabang nga gilugway sa kagamhanang probinsiyal. Daku ang pagsalig sa manager sa NFA nga sa dili pa motapos ang tuig mahingpit na nila ug pagdeliver sa gikinahanglang bugas ang nagkadaiyang mga public schools alang sa 19 days feeding program.

Matud pa niya ilang gipaningkamutan nga mahingpit na nila ang paghatud sa bugas sa dili pa motapos ang tuig ngadto sa nagkadaiyang mga munisipyo kay adunay nagsunod nga laing 36 days Food for School Program nga ipatuman nga pagasundan sa 120 days program. Ang nasangpit nga programa para sa tanang mga tinun-an sa mga public elementary schools ug walay gipili ka yang tuyo ug tumong niini nga madasig ang mga kabataan nga motungha gayud kada adlaw.

Giangkon ni NFA Manager Mohamad nga nakahinagbo ug kalangay ang implementasyon sa Food for School Program dinhi sa ZaNorte gumikan sa rason nga sa 21 ka mga probinsiya sa tibook Pilipinas nga gipailawom karon sa maong programa nag-una ang atong lalawigan sa pinakadaghan ug beneficiaries. Matud pa ni Manager Mohamad para sa ZaNorte mokabat sa tulo ka milyon ka kilong bugas para sa mga kabataan nga nagtungha sa nagkadaiyang mga public schools lakip sa duha ka siyudad sa Dipolog ug Dapitan ang beneficiaries sa maong programa para lang sa 19 days.

Ilawom sa gitiman-ang kasabutan ang pagdeliver sa bugas kinahanglang door-to-door ug ang nakalangay niini mao ang mga eskwelahan nga dili gayud maabot sa ilang truck ug ang pagpunay ug uwan-uwan sa atong panahon. Tungod sa maong problema gimandu ni Governor Yebes nga ang probinsiya maoy motabang sa paghakot sa maong mga bugas paingon sa mga munisipyo. (Press Freedom, Vol. XX No. 10)

  

Patay’ng lawas sa OFW mahiuli pa kaha?

Hangtud karon nagapabilin pa gihapon nga blangko kon walay kasigurohan nga mahibalik pa ba sa ilang pinuy-anan ang patay’ng lawas sa usa ka OFW nga taga Barangay Minaog ning dakbayan sa Dipolog, kinsa namatay didto sa nasud sa Riyadh, Saudi Arabia.

Sa pagpakighinabi ning inyong tigsulat ngadto sa inahan sa biktima nga si Ginang Charita Tagod Vda de Bayubay mibutyag nga wala pa siya’y nadawat sa mga hustong impormasyon mahitungod na kun asa ug naunsa na usab ang patay’ng lawas sa iyang anak nga giila sa pangalang Liza Tagod Bayubay, 33 anyos, usa ka single parent nga nagpuyo sa may Purok Cacao, Barangay Minaog ning dakbayan kinsa nangimpleyo isip usa ka domestic helper sa naasoy’ng nasud.

Gikahibaluan nga si Liza Bayubay gikatahong namatay kini didto sa usa ka tambalanan sa nasud sa Riyadh, Saude Arabia niadto pang bulan sa Agosto 11 ning tuiga ug hangtud karon hapit na lang matapos ang tuig 2007 wala pa gihapon masayod ang mga tag-tungod niini ilabina sa inahan sa biktima kun mahibalik pa ba ang patay’ng lawas sa iyang anak ngadto sa ilang pinuy-anan. Mahinumduman usab nga si Liza Bayubay nakita kini sa usa ka telebisyon nga patay na kini nga gikatahong adunay mga bun-og ug samad sa nagkadaiyang parte sa kalawasan sa biktima.  Ug gituohan kini nga usa sa mga hinungdan sa kamatayon sa maong biktima mao ang pagpanamastamas sa pagkababaye ug pagtorture sa agalon sa biktima.

Dugang pa nasayran nga si Liza Bayubay nakalarga kini sa Riyadh, Saude Arabia niadtong bulan sa Septyembre tuig 2005.  Ug matud pa sa asoy sa inahan sa biktima makaduha lamang kini makapadala og kwarta sukad sa paglarga sa maong biktima u gang ilang komunikasyon ang biktimang si Liza maoy manawag sa iyang inahan ug niadtong bulan sa Pebrero ning tuiga maoy katapusan nilang paghinabi niini.  U g gikataho nga ang nagrecruit sa biktima mao si Mr, Abelino Amerrudin, hingkod ang panuigon, usa ka balo, kinsa usab usa ka magtutudlo sa elementarya ubos sa Departamento sa Edukasyon sa Siocon District.  Si Amerrudin matud pa konektado kini sa Alkah Lady Agency. Nasayran usab nga ang maong biktima sa wala pa kini migawas sa naasoy’ng nasud, usa kini ka saleslady sa Jerry’s Shopping Center nga karon Lyndsey Emporium dakbayan sa Dipolog.

Atong nahinabi usab si Mr. Vicente Sumalpong, ang hepe sa buhatan sa DOLE kon Department of Labor and Employment dakbayan sa Dipolog mibutyag nga wala usab sila’y nadawat nga mga bag-ong kalambuan o impormasyon gikan sa OWA mahitungod na sa naasoy’ng hitabo ngadto kang Liza. Busa hugtanong nanawagan ug nagpakiluoy ang inahan sa biktima ngadto na sa mga kadagkuang opisyales sa dakbayan sa Dipolog o ni bisan kinsa nga mga personahe nga andam motabang kaniya sa paghiuli sa patay’ng lawas sa iyang anak.

Ang maong gipatay nga OFW nga si Liza Bayubay, ang walay bana ug nagbilin sa iyang inahan sa duha ka anak nga nagpangedaron 11 anyos ug 3 anyos. (Mindanao Star, Vol.III No.48)

 

Sindangan ika-71 ka tuig kasumaran

ANG lungsod sa Sindangan ning atong lalawigan sa Zamboanga del Norte ang nagsaulog kron sa ilang ika-71 ka tuiga nga kasumaran sa pagkahimugso sa lungsod. Kini ang ilang gibuksan sa niining semana pinaagi sa dakong parade palibot sa mga nanag-unang kadalanan sa lungsod sa Sindangan.

Sa gipahigayon nga programa, gipahayag ni Governor Rolando Yebes nga maoy pinasidunggang bisita nga iyang gikalipay ug dako ang pagsaulog karon sa Linggo ng Sindangan nga nag 71 ka tuig ang maong lungsod. Angayan na kining himoon nga siyudad karong panahona. Iyang gihagit ang kongresista sa Segundo distrito nga mopadas-og ug balaodnon nga himoong siyudad ang lungsod sa Sindangan aron mas daghan pang makuha nga kaayohan sama sa pagdako sa internal revenue allotment. Wala usab gililong sa gobernador ang iyang na-obserbahan kagahapon nga pipila lang ka mga barangay kapitan ang nagpakita sa ilang kooperasyon nga maoy timaan sa panaghi-usa. Iyang gihatagan ug gibug-aton nga unsaon paglambo ang lungsod kung ang mismong mga leder sa barangay ang dili mo-kooperar sa lungsod tungod kay anaa pa gihapon sa ilang huna-huna ang politika. Alang kang governor Yebes isip adopted son sa sindangan dili siya makabiya sa maong lungsod, iyang gipaningkamutan nga molambo kini.

Gusto sa gobernador nga sama sa maong okasyon nga nagsaulog sa iyang kasumaran ang lungsod makita unta ang tanang barangay kapitan sa Sindangan. Siya ang nanawagan nga wad-on na ang politika tungod kay humana ang election ug lantawon kung unsaon nga molambo ang lungsod ug barangay. Iyang gipalanog ang iyang hangyo ngadto sa mga barangay kapitan nga sugdan na ang pagtrabaho alang sa kalambuan sa Sindangan ug undangon na ang pamolitika. Gipasalamatan ni Governor Yebes ang tanang mga opisyales sa lungsod sa gipakita niining panaghi-usa, nga wala maglantaw sa bolok sa politika.

Mipabati usab sa iyang pagpasalamt si Mayor Bert Macias ngadto kang Governor Yebes sa walay puas nga suporta ug tabang niini nga gihatag alang sa kalambuan sa lungsod sa Sindangan. (Mindanao Star, Vol.III No.48)

 

pamaskong hanDog ni pgma napahimusdan na sa zanorte

Bisan pa man sa kahamubo sa panahon sa pag-desisyon, malampusong napahigayon ang unang “PGMA Pamaskong Handog Under the Accelerated Hunger Mitigation Program” kaniadtong Disyembre 16, Dominnggo didto na sa lungsod sa Pinan ug Polanco ning lalawigan.

Mokabat sa 675 ka mga pamilyang beneficiaries ang makapahimulos sa maong programa ni Presidente Gloria Macapagal  Arroyo didto na sa lungsod sa Pinan samtang usa ka libo kapin usab ka pamilya ang sa lungsod sa Polanco.  Apan si (National Food Authority) NFA Provincial Manager Omar S. Mohamad Sr. namahayag nga wa nila mahatagi ang tanang mga beneficiaries sa maong kalungsoran tungod kay naapikhan sila sa pag-packing sa mga gipanghatag niini tungod lagi sa kahamubo sa panahon sa ilang paghimo niini. Gikahibaloan nga ang NFA maoy gitahasan sa pag-pack sa Pamaskong Handog nga adunay bugas, asukar, kape, sardinas, noodles ug uban pa samtang ang Municapal Social Welfare & Development Office (MSWDO) usab ang gitahasan sa paglista sa mga pamilyang maka-benepisyo sa maong programa.

Nasayran nga mokabat sa 250 ka mga pamilya sa lungsod sa Pinan ug 150 usab ka mga pamilya sa lungsod sa Polanco ang unang nahatagan sa PGMA Pamaskong Handog apan gipasalig sa NFA nga sa dili matapos ning tuiga ilang paningkamotan nga ang tanang beneficiaries sa maong mga kalungsoran ang mahatagan. Subay niini, ang buhatan sa TESDA ang nanghatag usab og mga gamit pamasahe kon massage, mga ekipo sa mekaniko, giapil usab nga gihatag ang certificate sa mga libreng nakakuha sa Training For Work Scholarship sa Caregiver.

Atol sa maong pagpang-apod-apod sa Pamaskong Handog mitambong si Dr. Graciano P. Yumul nga maoy Undersecretary sa Department Of Science and Technology (DOST), Director Brenda Nazareth-Manzano Regional Director sa DOST, Ms. Consejo H. Usman Chief Operation Division, DSWD FO Region IX, Director Zeus Ampuyas TESDA IX Regional Director, Mr. Rolly Maravilla NFA Assistant Director, Pinan Mayor Ricardo R. Sabandal, Polanco Mayor Anacleto H. Olvis Jr. ug si Ms. Grace Marylen Sabal sa Provincial Social Welfare Development Office (PSWDO) nga maoy representante ni Governor Rolando E. Yebes.

Si Ms. Sabal sa iyang paghatag og mensahe kini namahayag nga ang maong programa ni Presidente Arroyo ang una pang na-implementar kon napahimudsan dinhi ning lalawigan sa Zamboanga del Norte diin,una kining gipahimudsan didto na sa lungsod sa Pinan ug Polanco. Apan tinguha gayod ning probinsya sa pamunoan ni Gov. Yebes nga ang tibuok lalawigan sa Zanorte nga mao ang  25 ka mga lungsod lakip na  ang duha ka dakbayan sa Dipolog ug Dapitan ang mahatagan ra unya sa PGMA Pamaskong Handog aron mahalikay na unya sa kagutom ang mga katawhan ning probinsya. (Mindanao Star, Vol.III No.48)

 

Yebes miayuda mga mananagat sa Sicayab

Gipadayag karon ni Gov. Lando Yebes ang iyang suporta para sa mga kalihukan sa mga gagmay’ng mananagat didto sa barangay Bucana, Sicayab sakop sa dakbayan sa Dapitan.

Personal nga gibisita sa gobernador ang kahugpungan sa mga mananagat didto sa maong dapit aron ipahibalo ang iyang programang panginabuhi-an nga maoy target sa gobernador niining iyang ikaduhang termino ang pagka-on para sa tiyan sa mga katawhan. Atul sa panagtigum sa mga meyembro sa Bucana Small Fisherman Livelihood Projects and Services Incorporated, gipahayag ni Gov. Yebes nga andam niyang suportahan ang mga sugyot ug plano sa mga mananagat ilabi na gayud sa usa ka organisasyon diin mas mapadali ang ayuda nga iyang mahatag para ikadugang sa panginabuhi-an sa mga meyembro niini sibo sa iyang livelihood projects sa iyang ikaduhang termino.

Ang Bucana Small Fisherman Livelihood Projects and Services Incorporated usa ka private organization sa mga mananagat nga mihimo ug contest alang sa mga mananagat nga makasunod sa mga gabayan nga gisitar sa maong kahugpungan. Upat ka mga makina para sa panagat ang naghulat sa swerting mananagat nga maoy modaug sa nasangpit nga contest gikan sa una ganti, ikaduha, ikatulo ug ika-upat nga ganti. Sa samang bahin gidasig sa gobernador ang mga mananagat nga mohimo kini sa mga gikinahanglang rekisitos aron mahatag niya ang ayuda gikan sa kagamhanang probinsiyal ngadto na sa mga kahugpungan sa mga mananagat.

Dugang pahayag sa amahan sa probinsiya nga magtinabangay kitang tanan para sa kaayuhan ug bisan ginagmay nga butang lamang ang iyang maayuda apan kini daku na kaayo ug ikatabang para sa pagka-on sa tiyan sa mga katawhan. Samtang si Felipe Labisores, 53 anyos, usa ka mananagat sa maong dapit kinsa nahinabi sa mga sakop ZNUC mipahayag nga sukad-sukad karon pa mahitabo nga sila personal nga gibisita sa usa ka gobernador nga nagdala ug maayong balita para kanila ug gihimamat silang mga gagmay’ng mananagat. Matud pa niya nga maayo ang gihimo sa gobernador ug nindot pamati-on ang mga pulong nga gilitok niini nga nakahatag ug tabang sa mga katawhan.

Alang kaniya bintaha ra gayud nga adunay usa ka gobernador nga makatabang sa ilang kalisud ilabi na karong panahuna nga apiki ang ilang pagpanagat. (Mindanao Star, Vol.III No.48)

 

KAMPANYA batok illegal nga sugal sa sindangan mas gipahugtan pa

Human gipagawas sa gobernador ning lalalwigan sa Zanorte ang usa ka executive order nga nagmandu sa tanang mga mayores nga mas pahugtan pa ang kampanya sa ginadiling sugal, ang lungsod sa Sindangan ang padayon kining mipatuman sa maong kamandu-an.

Si Mayor Bert Macias namahayag sa interview nga human niya nadawat ang maong kamandu-an iya gilayong gitahasan ang ilang kapulisan pinaagi sa hepe niini nga ipadulot ang maong kamandu-an sa gobernador. Matud pa niya nga daku ug ikatabang ang moang executive order sa amahan sa probinsiya tungod kay kini maoy nagpakita sa kasinsiridad niini sa pagsumpo sa tanang ginadiling sugal ilabi na gayud ang suertres nga gikabo-angan ug taya karon sa daghanang mga katawhan dinhi sa probinsiya. Gi-angkon sa mayor nga padayon karong misikop ang mga sakop sa kapulisan sa iyang lungsod sa illegal number games nga suertres sa mga nagdumala sa pagpataya niini.

Kahinumduman nga karong bag-o nagpagawas si Gov. Lando Yebes ug usa ka executive order nga nagmandu sa tanang mga mayors sa duha ka dakbayan sa Dipolog ug Dapitan ug 25 ka mga lungsod nga pahugtan ang kampanya batok sa illegal nga sugal ilabi na gayud ang suertres. Kini nakab-ot sa gobernador gumikan sa nagkadaku na nga problema sa sugal ug kini usa sa nakaapikto sa panginabuhi sa mga kabus nga katawhan nga kanunay’ng mitaya ug suertres. Tipik usab kini sa programa sa gobernador nga batukan ang tanang illegal nga kalihukan sulod sa probinsiya dili lamang ang sugal kung lakip na ang tanang nakalapas sa atong bala-od. (Mindanao Star, Vol.III No.48)

 

Mag-uuma naghikog patay

Dead on Arrival na sa tambalanan didto sa lungsod sa Liloy ning lalawigan ang usa ka 30 anyos nga lalaki human kini miambak sa gikat-katan niining punuan sa lubi, karong bag-uhay pa lamang.

Ang maong biktima giila sa pangalang Rene Ombao Florencio, 30 anyos, minyo, usa ka mag-uuma ug nagpuyo sa may Barangay Mucas sakop sa lungsod sa Salug ning lalawigan. Sa initial nga imbestigasyon nga gihimo sa Salug PNP, nasayran nga ang maong biktima niadtong higayuna mikatkat kini sa usa ka punuang lubi.

Ug sa dihang anaa na kini sa kinatumyang bahin sa naasoy’ng punuan kalit lang kining miambak. Gidali sa pagdala sa Liloy District Hospital si Florencio aron kapatambalanan apan gideklarar kini sa attending physician nga patay na kini sa paghidangat sa maong tambalanan... (Pedmarc, Mindanao Star, Vol.III No.48) 

 

Pamilyang Jalosjos nadismaya sa DOJ

Nadismayar ang pamilyang Jalosjos sa pagbabag sa Department of Justice sa kagawasan ni kanhi Congressman Romeo “Nonong” Jalosjos. Kini ang nahimong reaksiyon ni Ist District Congresswoman Cely Jalosjos-Carreon sa dihang migawas ang balita sa national TV station nga gibabagan ni Justice Secretary Raul Gonzales ang kagawasan sa iyang igsuon.

Si Congresswoman Carreon namahayag nga dunay kasipyatan ang Board of Parole and Pardon nga maoy mipakanaug sa release order ni Nonong tungod kay wala mananghid sa Justice Department nga maoy labaw nilang buhatan. Alang sa kongresista, dapat unta ang New Bilibid Prison nga ilawom sa supervisar ug control sa Department of Justice ang nagpahibawo ngadto kang Secretary Gonsales ilabi na ngadto kang Presidente Gloria Macapagal-Arroyo aron wala na untay babag sa pagpagawas sa iyang maguwang.

Matud ni Congress-woman Carreon wala siya masayud kon asa sa duha ka departamento ang nasipyat sa ilang commutation sa sentensiya ni Nonong kay kon basehan ang nahaunang computation, si Nonong adto pa makagawas sa Nobembre sa dos mil nuybe, apan gumikan sa iyang maayong gawi nga gipakita sulod sa bilangguan, nakapundo kini ug “good conduct time allowance” nga maoy makapasayu kaniya ug gawas sa prisohan.

Usa usab sa gibasehan sa maong commutation mao ang edad ni Nonong nga adto pa mag 70 anyos sa 2009. Pagkakaron gipahayag ni Congresswoman Carreon nga maghulat nalang sila sa desisyon sa presidente kon pagawson ba ug sayu si Nonong Jalosjos. (The New Nandau, Vol. XVII No.25)

 

P138T money order, packages hurot ug kawat
post office gilungkab

ANAA sa 138 mil pesos ang balor sa mga money order o blank check ang apil sa gidala sa mga wala pa mailhing tawo nga mi-ransack sa Post Office dinhi sa Dipolog niadtong miaging gabii (Dec. 18, 2007)

Niadtung Miyerkules sa buntag, nadiskobrihan na lang sa mga kawani sa Post Office nga nangabungkag na ang mga butang sulod sa maong buhatan. Ang lawak nga anaa gibutang ang mga kinahon nga package nga nadawat sa Post Office-Dipolog gikan sa mga laing nasud giguba ang kandado niini. Sa gihimong follow-up sa mga miyembro sa ZNUC, gibutyag ni Mrs. Lez Letran Bato, in-charge sa money order nga abri na ang iyang drawer sa pag-abot niya sa maong buhatan. Ang 139 ka mga blank checks ang nahurot na ug kawala nga mokantidad sa P138 mil pesos.

Gituhuan nga suheto ang nagkuha sa maong mga money order tungod kay gi-apil usab niini pagkawat ang para tamla sa cheke nga maoy usa sa pinaka-importanti aron kini ang ma in cash. Tungod sa maong hitabo kasamtangan gihunong ang transaction pag-process ug money order. Nasayran gikan kang Justino Sorronda incharge sa mga package, nga adunay foreign ug domestic package ang gipugos pag-tabas ang carton ug gipanghiling ang sulod samtang adunay usa ka carton nga gikan sa Amerika gihurot ug kuha ang sulod niini. Iyang gibutyag nga aduna nay susama nga panghitabo kaniadto ang nasinati sa post office dinhi sa Dipolog apan kini ang nasulbad ra. Iyang gituhuan nga dili lang usa ka tawo ang naglungkab.

Matod pa usab ni Rey Dela Cruz, Postal District Manager nga ila pa usab karon nga subayon kung aduna bay mga sulat nga apil sa gikawat. Nasayran nga adunay usa ka sulat ang gigisi sa pagtuo nga adunay gilukip niini nga kuwarta. Gawas pa, ila usab nga subayon kung naka-insured ba ang mga gipadala nga butang nga apil sa gikuha sa mga kawatan. Tungod sa pagdaginot sa gasto ang Post office dinhi sa Dipolog ang taud-taud na nga wala mag-hire ug security guard hinungdan nga sayon ra kaayo sa mga kawatan ang pagsulod. Ang post office ang nagsalig lamang sa seguridad sa terminal nga anaa ra sa luyo. Sa maong sitwasyon gilantaw nga wala gayoy kasigurohan nga luwas ang gipadala nga mga butang nga gipaagi sa post office Dipolog. (Joel Ello, The New Nandau, Vol. XVII No.25)

 

Mis-judgement sa Bureau of Corrections walay protocol sa DOJ –Governor Yebes

Kon dunay angay basolon nga napakgang ang gikatakdang sayo nga paglaya ni Nonong Jalosjos kini mao ang Bureau of Corrections kay wala mananghid sa ilang labaw’ng buhatan nga mao ang Department of Justice diha sa giluwatan nga release order.

Si Governor Rolando Yebes nga mihatag sa iyang reaction sa kahimtang ni Jalosjos mipahayag nga dunay ‘mis judgement’ sa kabahin sa Bureau of Corrections nga wala mosunod ug protocol ngadto sa Justice Department. “It was just a mis judgement not to follow the ussual protocol sa Depart-ment of Justice.”

Apan matud pa sa gobernador, “for all intention purposes” sa iyang pagtuo si Jalosjos dili na gayud piniriso karong panahona tungod kay nahatag naman ang release order para sa iyang kagawa-san gikan sa bilanggoan. Apan gumikan sa pagbabag sa Department of Justice maoy nakalangan sa pagawas ni Nonong, si Governor Yebes mipahayag nga kon si Jalosjos modangop ug korte kini magmadaugon apan posibli hinoon nga makapasamot ug kalangan.

Nagtuo si Governor Yebes nga dili gayud madugay makagawas si Nonong. Matud niya human ma-review ang iyang compu-tation hayan sa sunod tuig makagawas na siya, “there is no other recourse to let him totally free.” Mahitungod sa managlahi nga interpretasyon sa computation sa sentensiya, gipahayag ni Governor Yebes nga sa wala pa nabolabog ang sayo nga paglaya ni Nonong duna nay computation gipagawas ang Bureau of Corrections nga insakto ang ilang pag-ihap. “There is no body who can determine the truthfulness kon insakto ba ug dili except ang bureau nga maoy ginikanan sa problema.”

Sa kaso ni Jalosjos nga statutory rape nga maoy nakapakonbikto kaniya, si Governor Yebes nagkanayon nga politicaly motivated. Para sa gobernador dili kaayo bug-at ang kaso nga giatubang ni Jalosjos, apan tungod kay dunay nagpahiping tawo nga interesado sa kaso hinungdan sa iyang nadangatan. Gani hangtud karon nagapabilin pang tanghaga ang tinuod nga edad sa biktima tungod kay wala kini ma-establisar atubangan sa gipakanug nga desisyon sa korte.

Hangtud karon nga hapit nang mogawas si Nonong, ang nagpatuong menor de edad niadtung panahona nga misumbong nga siya gilugos, wala magpakita sa publiko. “Remember nga dunay kuwestion sa edad sa bata. Ang natural parents sa bata gasulte pilay iyang edad, ang abugada sa bata gasulte pod sa iyang edad, so dunay kuwestion sa iyang edad kay walay dokumento nga nagpakita kon pila gyoy edad sa bata which is the basis of the conviction.”

Alang kang Governor Yebes ang biktima nga maoy nagsumbong kang Nonong mopakita sa publiko ug motug-an sa tinood pila iyang edad niadtung panahon nga siya giamong-amongan, “kay kadtong pagka konbikto ni Nonong it was done through a technical conviction because the birth certificate which is the real birth certificate was not admitted as an evidence.” Pero unsaon taman nga duna may mga political behind niadtung mga panahona. Mahitungod sa tratamento sa ubang media personalities nga nagkondenar ni Jalosjos ug mihingalan nga siya convicted rapist ug child mullester, para ni Governor Yebes dili angayan nga buhaton sa tinuod nga manunulat ug magsisibya. Matud niya, lisod kaayo depensaan ang honor sa usa ka tawo nga ikondenar sa ubang kritiko nga wala masayud sa tinuod nga hitabo. Para sa gobernador, dili gayud angayan gamiton ang maong terminolohiya diha sa mga komentaryo ug pagsulat sa balita kay ang angay gamiton ang statutory sa balaod. (The New Nandau, Vol. XVII No.25)

 

Gov. Yebes sa iyang mensahe sa pasko: Maghiusa ug walaon ang pamolitika

Maghiusa ang tanang katawhan ilabia na ang mga opisyal sa probinsya, lungsod ug barangay ug walaon na ang pamolitika ug maoy totokan ang pagserbisyo alang sa kaayohan sa mga katawhan. Kini maoy men-sahe nga gipabate ni Gover-nor Lando Yebes niining pagsaulog sa pasko uban sa iyang panawagan sa tanang mga opisyal sa probinsya, lungsod ug barangay nga magkahiusa sila diha sa pagtambayayong alang sa kaayohan ug kalamboan sa mga katawhan.

Si Governor Yebes nanghinaut nga magtina-bangay ang tanan sa sunod tuig. Ang mga katawhan nga anaa sa kabukiran maning-kamot aron mamaayo ang ilang panginabuhi pinaagi sa tabang sa mga opisyales sa probinsya. Gipanghinaot sa gober-nador sa sunod tuig ang mga opisyales sa probinsya ilabi na ang mga kapitan magka-hiusa ug magtinabangay. “Kalimtan sa nato nang pamolitika aron gyud nga makatabang ta sa atong mga katawhan.”

Kini maoy hangyo sa gobernador tungod sa iyang nakita karon nga duna pay mga opisyal sa probinsya, lungsod ug barangay ang padayon nga namolitika ug nasakripisyo ang mga ka-tawhan nga ilang gialagaran. Alang kaniya, dili angayan karong panahona mamolitika ang ubang opisyal kay layo pa kaayo ang eleksiyon. Matud niya, ang angay buhaton mao ang ilang panaghiusa alang sa kauswagan ug kabolahanan sa tanang mga katawhan sa probinsya sa Zamboanga del Norte tungod kay sa sunod tuig ang iyang ‘focus of governance’ mao ang livelihood program. Matud niya ang nag-unang problema karon sa probinsya mao ang gakutoy sa tiyan sa mga katawhan.

“Sa atong mga kapitan, undangi nang pamolitika. Dili ko moadto sa meeting kay kontra nako ang mayor kay naa ko sa congressman. Dili ko moadto sa meeting sa governor kay kontra nako ang governor, ayaw na. Ang ato unsay atong mabuhat para sa atong katawhan sa Zamboanga del Norte.” (The New Nandau, Vol. XVII No.25)

 

DILG maghulat kanus-a ma-resolbar sa korte ang TRO ayha ikapahigayon
ang eleksiyon sa ABC sa Sindangan

Ang desisyon sa korte kon kanus-a maresolbar ang Temporary Restraining Order ayha pa sila mo-eskeduel sa pagpahigayon ug eleksiyon Liga ng mga Barangay Municipal Federaton Official sa lungsod sa Sindangan.

Kini ang gipahayag ni Provincial DILG Officer Jaime Paler sa dihang wala mahinayon ang piniliay sa Association of Barangay Captatin municipal federation sa lungsod sa Sindangan nga gitakda unta niadtung Desyembre 11, sa dihang ang Regional Trial Court mikapanaug ug TRO atubangan sa gipasakang petisyon ni Kapitan Klint Macias nga nag-kuwestion sa pag-conven sa reorganizational meeting sa maong adlaw. Matud ni Paler, dili sila makapataka sa DILG ug buot-buot ug ila samtang dunay desisyon sa korte nga dili ipadayon ang piniliay.

Sumala pa niya, maghulat sila kon kanus-a maresolbar sa korte ang maong petisyon kay ilang respetoan ang desisyon sa hukmanan ug ilang hulaton kon kanus-a mahuman. (The New Nandau, Vol. XVII No.25)

 

Pagbabag sayong kagasawan ni Nonong dunay nagpaluyong impluwensiya tungod sa politika

Nagtuo ang mga opisyal sa dakbayan sa Dapitan nga ang pagpogong alang sa sayo nga kagawasan ni Nonong Jalosjos gipaluyohan ug impluwensiyadong tawo tungod sa politika.

Matud ni Vice Mayor Chan dunay nagpahiping dakong hinungdan nga nabilanggo ang kanhi kongresista.

Sumala pa niya, politika ang nag-unang hinungdan nga na-ingon niini si Jalosjos. Dakong tawo ug impluwen-siyado sa Malacañang ang ilang gituhuan nga pugngan ang sayo nga paglaya ni Nonong. Wala hinoon magtuo si Chan nga taga dakbayan sa Dapitan ug permero distrito ang nag-impluwensiya sa Malakanyang para mabi-langgo si Jalosjos. (The New Nandau, Vol. XVII No.25)

 

Tower sa Ericson gi-kuwestion sa Dapitan City SP

Gikuwestion karon sa mga membro sa Sangguniang Panlungsod sa dakbayan sa Dapitan ang gitukod nga Tower para cell site nga gipanag-iyahan sa Ericson company gumikan kay wala kini makasubmiter ug gikinahanglang mga requirements. 

Mao kini ang gibutyag ni Konsehal Arnold Cadano, Chairman sa Committee on Public Utilities sa Sangguniang Panlungsod sa dakbayan sa Dapitan. Matud ni Konsehal Cadano, niadtung miaging semana atol sa ilang regular session ang joint committee nga naglangkob sa committee on rules ug committee on tourism misubmiter sa ilang report nga naghatag pagtugot sa maong kompaniya sa pagtukod sa maong Tower.

Apan sumala pa ni Cadano, isip chairman sa committee on public utilities maoy iyang naandan nga kon dunay magtukod ug ingon niini nga establishemento iya gayud subayon pag-ayo kon nakatuman ba kini sa tanang gikinahanglang rekesitos. Atol sa deliveration, gi-withdraw sa duha ka mga komitiba ang mosyon nga nagtugot sa Ericson sa pagtukod ug Tower sa Banonong, dakbayan sa Dapitan ug gihangyo ni Cadano nga pagahimoon ang laing committee ug public hearing.

Matud ni Konsehal Cadano, niadto dunay petition sa duha ka mga doctor kabahin sa pagtukod ug Tower gumikan sa radiation nga maka-apektar sa mga estudyante nga duol sa City High School. Sumala pa ni Cadano, ang Ericson nagpataka lang ug tukod sa ilang Tower bisan kon wala kini maka-comply sa gikinahanglang rekisitos sama sa resolusyon gikan sa barangay ug pagtugot gikan sa Sanguniang Panlungsod. Para ni Cadano, i-comply una sa Ericson company ang tanang gikinahanglang requirements ayha sila tugotan nga magapadayon pagtukod ug cell site Tower sa dakbayan sa Dapitan. (The New Nandau, Vol. XVII No.25)

 

Ikaduhang EO ni Gov. YEBES BATOK sa illegal gambling wala pay epekto

Wala pa makabate ang buhatan sa gobernador ug gipadulot ba ang ngipon sa balaod sa mga mayores uban sa kapolisan atubangan sa iyang ikaduhang executive order nga lutoson ang tanang matang illegal gambling nga karon naghitak dinhi sa atong dapit.

Si Governor Rolando Yebes namahayag nga hangtud karon magtulo na ka semana ang nakalabay wala pa siya makadawat ug report gikan kang PNP Provincial Director P/SSupt. Mario Biong Yanga unsa nay resulta sa seryoso nga kampanya sa liderato sa probinsya kabahin sa illegal nga pasugal ilabi na ang suwertres. Matud ni Governor Yebes, iyang gimandoan si Provincial Attorney Jes Gal Sarmiento nga mohimo ug memorandum para sa provincial director kon unsa na ang ilang gihimo diha sa kampanya batok sa tanang matang sa illegal gambling.

Sumala pa sa gobernador iya nang na-estorya ang pipila ka mayor nga mohimo ug mga lakang, ug naghulat nalang siya ug report gikan sa Provincial Police Office kon gipatuman ba niini ang balaod. Matud ni Governor Yebes, kon unsa man ang unod sa report sa kapolisan, kon makita niini nga naghaguka diha sa kampanya batok sa illegal gambling iya kining isumbong ngadto sa pinakataas nga buhatan sa kagamhanan. Si Governor Yebes nga makaduha na ka higayon nga miluwat ug Executive Order nga nagmando sa mga mayores ug kapolisan aron batokan ang tanang matang illegal gambling nga nag-operate dinhi sa Zamboanga del Norte ang miila nga maayo lang sa sinugdanan diha sa pagpatuman sa balaod.

Iyang gipasabot nga human siya mi-isyu ug unang executive order, kugi ang kapolisan sa pagpatuman sa balaod, apan iyang nakita nga maayo lang sa sinugda-nan kay sa kadugayan hinayhinay ug kalurang ang kampanya hinungdan nga miluwat na usab siya ug laing orden ehekutibo isip pagpahinomdom sa mga otoredad nga ang probinsya padayon nga mogukod batok sa tanang illegal nga pasugal ilabi na ang suwertres. Matud sa gobernador kon padayon nga maghaguka ang kapolisan diha sa pagpatuman sa balaod hayan pagahimoon ang pag-revemp sa mga chief of police ug sa iyang ginsakpan nga ilabay sa layong lugar ug iyang ireport ngadto sa Chief PNP sa nasud aron magkinto ang kapolisan. Mahitungod sa report nga dunay mga chief of police ug mayores sa nagkalainlaing lungsod ang nagdawat ug payola gikan sa mga financiers hinungdan nga gibaliwala lamang ang orden ehekutibo, ang gobernador nagkanayon nga naka-dungog siya ug mga hulongihong apan wala pa niya opisyal nga makon-permar.

Gipaklaro ni Governor Yebes nga seryoso ang iyang kampanya batok sa tanang matang illegal gambling. Matud niya, ang iyang liderato sa probinsya padayon nga molakag batok sa mga responsible nga nagpasugal hangtud nga duna pay balaod nga ilang ipatuman kay maoy ilang kaakohan ang pag-emposar sa tanang balaod sa nasud. “Mintras dunay balaod ako gyud nang ipatuman because that is our duty to enforce the law of the land.” (The New Nandau, Vol. XVII No.25)

 

 

 

NOTE: SEND US YOUR NEWS.  Tell us what's going on in your barangays, clubs, schools, businesses and non profit organization. You can also send notices and announcements.
          

 

    Email to webmaster@dipolognon.com

      
Google
WEB THE DAILY DIPOLOGNON