December 14, 2007

 

HUWES GI-ATAKE UG PRISO, SAMDAN

Dili makatuo ang usa ka Huwes sa bulwagan ng Katarungan lakip ang mga empliyado ug mga abogado nga mahimo sa usa ka piniriso ang pag-atake sa usa ka huwes ang maoy nagpahigayon sa pre-trial sa kaso niini.

Niadtong Huwebes Disyembre 6 ning tuiga, alas 9:20 sa buntag dihang gihimo ang pre-trial sa kaso sa usa ka Royro Ajero Y Tan, 25 anyos, molupyo sa Barangay Miputak ning dakbayan sa Branch 9 nga gidumala ni Judge Yolinda C. Bautista sa kasong paghupot ug pagbaligya sa ginadiling druga dihang gihimo sa suspitsado ang pag-atake sa huwes ginamit ang usa ka tinalinsan nga ‘toothbrush’ kolor blue.

Si Judge YOLINDA C. BAUTISTA samdan samtang sa ubos nga hulagway ang talinis nga handle sa ‘toothbrush’ nga maoy gigamit sa suspetsado pag-atake sa huwes.

Matud pa ni Cicel Flores interpreter sa Branch 9, nga nagapadayon ang pag-hearing sa kaso sa suspitsado sa dihang mikalit kini paglayat gikan sa prisoners’ bench latas sa duha ka lamesa diretso sa lamesa ni Judge Bautista dala ang tinalinsan nga ‘toothbrush’ ug miduslak gilayon kini ngadto sa nawong sa huwes, apan nakobtan sa huwes ang kamot ni Royro hinungdan nga wala kini molampos sa iyang dautang tinguha ngadto na sa huwes.

Dugang pa ni Flores nga wala makabantay ang huwes dihang milayat na paingon kaniya ang suspitsado tungod kay nagdungo kini ug didto na lamang nabantayi sa huwes ang suspitsado dihang dool na kini kaniya nga miduslak sa gidalang ‘toothbrush’ nga talinis. Sa maong aktuwasyon, wala usab makalihok ang mga abogado ug ubang empliyado sa korte tungod sa kakalit sa gihimo sa suspitsado kinsa dali kaayong nakalayag gikan sa nahimutangan niini paingon sa lamesa sa huwes.

Sumala pa ni Flores nga mga 5 minutos ayha pa nasanta ang suspitsado tungod kay nakobtan man niya ang huwes ug kini miingon pa “Ayaw mo ug duol kay patay ni,” Maayo na lang kay nasanta kini sa usa ka sheriff nga si Lamberto Cabuguas ug usa ka empliyado ng si Boy Realiza, ilang gikobtan ang suspitsado ug gibira kini palayo sa huwes. Sa maong kahimtang ayha pa mihimo ug aksiyon ang mga sakop sa BJMP kon Bureau of Jail Management and Penology nga maoy nagbantay sa maong piniriso nga mihimo sa pag-atake sa huwes.

Tungod sa maong hitabo nakapangutana ang pipila ka mga katawhan nga nasayud sa maong hitabo ingon man ang mga empliyado sa Bulwagan ng Katarungan kung nganong nakadala ug mahait nga hinagiban ang suspitsado atol sa pre-trial sa kaso niini nga unta gikan man kini sulod sa prisohan ug binantayan pa sa mga sakop sa BJMP.

 

Human sa maong hitabo si Judge Bautista nakaangkon ug samad sa iyang nawong tungod kay naabtan gayud kini sa tinalinsan nga ‘toothbrush’ nga gigamit sa suspitsado. Atol sa maong pre-trial sa kaso sa suspitsado kini gisaksihan sa mga manlalaban nga sila si Board member Atty. Edgar Baguio, Vice Mayor Atty. Senen O. Angeles ug uban pang mga abogado. Ang suspitsado nga si Royro Ajero ang nag-atubang kini sa kasong paghupot ug pagbaligya sa ginadiling drugas kinsa nadakpan sa kapulisan niadtong Oktubre 4 ning tuiga didto sa Boulevard ning dakbayan sa Dipolog.(Press Freedom, Vol. XX No. 8)

*

 

Jalosjos makagawas wala pay pasko

Hayan makagawas na sa dili pa moabot ang adlaw sa pasko si kanhi Congressman Romeo “Nonong” Jalosjos. Sigun sa report sa pamantalaang Philippine Star si Nonong makagawas na karong Desyembre 16, 2007 gikan sa New Bilibid Prisons human gipamub-an ang iyang sentensiya ngadto na lamang sa 16 ka tuig.

Kini ang gibutyag ni New Bilibid Prison Chaplain Father Roberto Olaguer sa usa ka news forum kagahapong adlawa. Matud pa ni Father Olaguer ang orihinal nga silut ni Nonong mao ang double life imprisonment, apan si Presidente Arroyo pinasikad sa rekomendasyon sa Board of Pardons and Parole, gipamub-an niini ang silut ngadto na lamang sa 16 ka tuig sa sayung bahin ning tuiga.

Si Father Olaguer midugang sa pagpahayag nga taposon ni Nonong ang iyang 16 ka tuig nga silut unya pa sa Nobyembre 2008, apan tungod sa gipakita niining maayong gawi mamahimo siyang makapauli ug sayu. Gipatin-aw ni Olaguer nga pinasikad sa atong balaod nga ang silut nga gipahamtang mamahimong mapamub-an ug dugang kon ang konbiktado magpakita ug maayong gawi.

Si Nonong nga bag-o rang nagselebrar sa iyang birthday, matud pa ni Olaguer nakapundo ug daku nga “good conduct time allowance” nga maoy basihan karon sa iyang mas sayu nga paggawas sa prisohan. Apan si Congresswoman Cely Jalosjos-Carreon sa dihang nahinabi kini sa Radyo Ronda-DXKD kini nagkanayon nga gitawagan usab siya kagahapon ni Nonong ug gipahibawo nga ang Desyembre 16 mao ang adlaw nga ipahibawo kanus-a gayud siya makagawas sa prisohan.

Samtang kini ang nahimong pahayag ni Congresswoman Carreon, namatikdan usab nga nalinga karon ang Dapitan sa pagpangandam alang na sa pag-abot ni Nonong nga sumala pa mahidangat pagka Desyembre 17. Usa ka opisyal sa Malacanang ang mihimakak nga aduna nay release order si Jalosjos kay sa gihimong pagsubay sa Bureau of Corrections ug sa buhatan ni Executive Secretary Eduardo Ermita walay nakitang mga nakapundo nga papeles o dokumento alang na sa pagpagawas ni Nonong.

Samtang sa laing bahin, wala itago sa kanhi chairman sa Kapisanan ng mga Brodkaster ng Pilipinas o KBP Zamboanga del Norte Chapter ang iyang kalipay nga makagawas na gikan sa bilangguan si kanhi Congressman Romeo “Nonong” Jalosjos nga nahimong kanhi national president sa KBP. Giklaro ni Mrs. Sally Elia o “Auntie Sally” mga ang iyang gipalanog karong kahinangop iyahang personal nga kapasidad ug walay labut ang KBP apan isip kanhi chairman gusto siyang mopalanog sa iyang kalipay human makabati sa balita nga si Nonong hayan makagawas na sa dili pa ang pasko.

Matud pa ni Auntie Sally angayan lang nga sugaton sa tumang kalipay sa mga katawhan ang paghibalik ni Nonong dinhi sa atong lalawigan ilabi na sa dakbayan sa Dapitan tungod kay bisan atua siya sulod sa prisohan nagapadayon ang iyang pagtabang sa katawhan sa iyang distrito ug ubang bahin sa atong lalawigan. Si Auntie Sally nagkanayon nga iyang gikalipay nga si Nonong makapadayon sa iyang pag-alagad sa atong mga katawhan.

Sa sayu pa gipahibawo ni New Bilibid Prison Chaplain Father Roberto Olaguer nga gikatakda nang mogawas si Nonong karong Desyembre 16, 2007 human gipamub-an ang iyang silut ug nadugangan sa maayong gawi niini sulod sa prisohan. Hinoon si Congresswoman Cely Jalosjos-Carreon mipahayag nga ang Desyembre 16 maoy petsa nga gitakda para ipahibawo kanus-a makagawas si Nonong gikan sa New Bilibid Prison.(Press Freedom, Vol. XX No. 8)

*

 

Ulitawo miambak sa punuan sa lubi

Usa ka ulitawo ang naghunos sa iyang kinabuhi, pinaagi sa pag ambak sa punuan sa lubi, didto sa Brgy, Pangalalan, lungsod sa Sindangan. Ang biktima giila lamang sa ngalan nga usa ka Cabasoy Esguera, 25 anyos ug taga Cotabato City ug tempuraryong nanimoyo sa Brgy. Pangalalan.

Matud pa sa kapolisan nga gipanguluhan ni SPO4 Bangon nga ang biktima uban sa iyang mga higala ang nag-inum sa usa ka tindahan. Human niini, sa dihang nahubog na ang biktima, kalit kining miambak sa punuan sa lubi nga miresulta sa iyang kamatayon. Ang patay nga lawas sa biktima gi-turn-over kini ngadto sa iyang pamilya. (Pedmark, Mindanao Star, Vol.III No.45)

8 anyos nga batang babaye nakuryentehan patay

Usa ka 8 anyos nga batang babaye ang nakabsan kini sa iyang kinabuhi human kini nakuryentihan sa usa ka live wire didto sa may Purok Talisay sakop sa Barangay Guinpotlan dakbayan sa Dapitan. Ang maong biktimang bata giila kini sa pangalang Mariel Sumondong, 8 anyos nga anak ni Ricky Sumondong, hin gkod ang panuigon ug nagpuyo sa naasoy’ng dapit.

Sa initial nga imbestigasyon nga gihimo sa Dapitan PNP sa pagpangulo ni SPO2 Alberto Rosal nasayran nga niadtong higayona adunay usa ka main live electrical wire nga gipanag-iyahan kini sa Zamboanga del Norte Electric Cooperative kon ZANECO ang aksidenti kining naputol ug anaa kini napunta sa yuta diin matud pa ang biktimang bata nangita usab kini sa iyang dula-an ug iyang nahikapan ang maong live wire hinungdan nga nakuryentihan gayud ang maong bata.

Si Sumondong gidali kini sa pagdala sa Dr. Jose Rizal Memorial Hospital aron kapatambalan, apan gideklarar na kini sa attending physician nga patay na kini sa paghidangat sa tambalanan. (Pedmark, Mindanao Star, Vol.III No.45)

50 ka kaso nahitala sa Polanco PNP sa Enero-Nobyembre ‘07

Mokabat sa 50 ka mga kaso ang nahitala sa Crime Volume Statistics Report didto na sa buhatan sa kapolisan sa lungsod sa Polanco ning lalawigan sugod niadtong bulan sa Enero hangtud na sa bulan sa Nobyembre ning tuiga.

Mao kini ang nahipos nga taho ning inyong tigsulat gikan na mismo sa naasoy’ng buhatan.  Diin sa 50 ka mga kaso ang Index Crime  niini nga gilangkuban sa mga kaso sama sa physical injuries, frustrated homicide, qualified theft, frustrated murder ug robbery adunay 39 ang nahitala samtang sa Non – Index Crime nga gilangkuban sa mga kaso sa illegal gambling ug illegal logging aduna usa’y 11 niini.

Sa kinatibuk-ang 50 ka mga kaso nga nahitala sa Polanco PNP sugod sa bulan sa Enero hangtud na sa Nobyembe ning tuiga nasayran nga adunay 48 niini ang nahatagan nag igong kasulbaran.  Ug ang duha ka kaso niini ang padayon pa nilang gihimuan sa makuting imbestigasyon apan ilang paningkamutan nga masulbad ra usab kini.

Ang nahimong resulta sa naasoy’ng Crime Volume Statistics Report subay kini sa pagpanghingusog ug kampanya batok na sa mga matang sa kriminalidad ug illegal nga kalihukan sulod sa ilang Area of Responsibility ubos sa pagpangulo ni Police Chief Inspector Engracio Orong inabagan usab sa mga elemento sa kapolisan sa lungsod sa Polanco, Zamboanga del Norte. (Pedmark, Mindanao Star, Vol.III No.45)

*

 
Sa fuel allocation sa Dipolog PNP nga giputol sa mayor!
PD Yanga miangal na sa City Hall nagpalaban sa Capitol

Si P/SSupt. Mario Biong Yanga, Provincial Police Director sa Zamboanga del Norte nangayo karon ug pakitabang sa Capitolyo aron katabangan ang operasyon sa kapolisan gumikan kay ang gasoline assistance para sa Dipolog Police Station ang giputol na sa City Hall. Mao kini ang unod sa sulat ni P/SSupt. Yanga nga iyang gipadala kang Governor Rolando Yebes nga nangayo ug pakitabang aron matibawasan ang problema sa nahinagbo nga operasyon sa PNP Provincial Command. Matud ni Yanga, sukad niadtong miaging semana, ang siyu-dad sa Dipolog miputol na sa ilang paghatag ug suporta sa gasoline allowance o fuel allocation ngadto sa Dipolog City Police Station.

Matud niya ang pagpotol sa gasoline allwance sa City Hall maoy nakahatag ug inkonbenyenti sa operasyon sa kapolisan sa Dipolog. Wala gililong ni Yanga nga limitado lamang ang ilang budget para sa Provincial Police Office hinungdan nga mangayo siya ug ayuda sa kagamhanang provincial isip dugang suporta alang sa ilang kalihukan. “I would like to seek your assistance to alleviate the operational problems en-countered by our PNP Pro-vincial Command. A week ago, the City of Dipolog cut is support on gasoline allowance for PNP Dipolog, thus giving more operational inconvenience to our command.

“Aware of the budgetary requirements, I respectfully seek your assistance for additional support on gasoline for this purpose,” nagkana-yon pa ang sulat ni PD Yanga ngadto kang Governor Yebes. Matud sa provinvial director ang pagputol ug suporta sa kagamhanang lokal ngadto sa Dipolog City Police Station usa ka pag-pangabuso sa gahum gumi-kan kay kini timaan nga dili motabang sa operasyon sa kapolisan diha sa pagsumpo sa bisan unsang matang sa kriminalidad. “Mayor Uy’s order to stop providing fuel assis-tance to Dipolog City Police Station its tantamount to ‘abuse of authority’ a ground for revocation of deputation by NAPOLCOM of the au-thority over the local PNP.”

Sumala pa nga operational mandate ilawom sa National Police Commission nga ang local government units gikinahanglan mohatag ug suporta ngadto sa kuwerpo sa kapolisan nga dunay supervising control sa PNP operation diha sa usa ka siyudad ug lungsod diin naka-destino ang police station. Aminado ang Provincial Police Office nga maapek-tahan ang operasyon sa kapolisan dinhi sa dakbayan sa Dipolog diha sa pagmin-tinar sa kahusay ug kalinaw ug pagukod sa bisan unsang matang kriminalidad kon walay ayuda nga ilug-way gikan sa kagamhanang lokal. Sumala pa sa provincial command, limitado lamang ang budget allocation para sa local PNP station busa nag-kinahanglan kini ug ayuda gikan sa local government units.

Sa interview, gipahayag ni Governor Rolando Yebes nga andam siyang motabang sa gipangayo nga assistance sa PNP Provincial Command. Sumala pa niya ang kagamhanang provincial sukad sa iyang paglingkod sa katungdanan padayon nga nagsuporta sa operasyon sa kapolisan ug naghatag sa gikinahanglang gasoline allowance ngadto sa PNP Provincial Command. Matud sa gobernador, dunay programa ang pro-binsya nga mao ang Pulisiya Laban sa Krimen ug kini maoy iyang gitabangan ug gisuportahan.

Ang maong programa gipahatan sa probinsya ug P1 milyon ka pesos ug diha kuhaon ang pundo para ayuda sa kapolisan. Matud ni Governor Yebes nga ang iyang tabang adto niya direkta nga ihatag sa Provincial Police Office ug si P/SSupt. Yanga na ang mohatag ug ayuda ngadto sa Dipolog PNP. (The New Nandau, Vol. XVII No.22)

*

 

P1.2 Billion ZN Budget aprub na sa SP

Gidasonan na sa Sanguniang Panlalawigan ang 2008 executive budget nga mokabat ug P1.2 bilyones ka pesos para sa nagkadaiyang kalihukan sa kagamhanang probinsyal sa Zamboanga del Norte. Ang maong annual budget para sunod tuig gi-aprubahan sa kinatibuk-ang membro sa hunta provincial sa dihang giduso niini ang report sa committee of the whole atol sa ilang regular session niadtung Lunes.

Matud pa ni Vice Governor Francis Olvis ang 2008 Annual Budget sa kagamhanang probinsyal sa wala pa dasoni sa hunta probinsyal miagi pa ug pagisa ug lantugi sa mga membro sa Sanguniang Panlalawigan atubangan sa pagdepensa sa tanang hepe sa nagkadaiyang mga buhatan atol sa serye nga committee hearing niadtung miaging semana. Ang bise gobernador nagkanayon nga ang pagpabotorit o pagpadako sa Budget sa probinsya para sunod tuig gikinahanglan kaayo gumikan sa daghanang mga programa ug proyekto nga ipatuman sa Yebes administration.

Iyang gipasabot nga gipadak-an nila ang budget sa probinsya para sa sunod tuig gikan sa P974 milyon ngadto sa P1.2 Bilyones ka pesos nagsumikad sa walay puas nga pagsaka sa presyo sa mga palaliton sama gasolina, piyesa sa sakyanan, office supplies, semento, kabilya ug uban pa. “I think this is so…because of the escalating prices.” Gipahatan ug dakong pundo sa 2008 Annual Budget sa probinsya ang livelihood program para sa mga kabus nga katawhan.  Kini subay na sa programa nga gihan-ay ni Governor Lando Yebes nga sa iyang ikaduhang termino, gawas sa mga infrastructure projects nga iyang ihatag sa mga lungsod ug barangay, hatagan niya ug dakong pagtagad ang pananginabuhi sa mga katawhan pinaagi sa paglugway ug serbisyo sosyal sama sa livelihood program sa matag barangay.

Matud ni Governor Yebes, sama sa iyang gisaad sa iyang unang termino nga mohatag siya ug labing minos tunga sa milyon nga kantidad sa proyekto ngadto sa barangay, karon sa ilang ikaduhang termino maoy totokan sa iyang pamunoan ang programa sa panginabuhian sa mga katawhan. Sumala pa ni Bise Gober-nador Olvis nagkasabot na sila sa gobernador nga sa sunod tuig ilang totokan ang livelihood projects para sa mga katawhan sa barangay nga mokantidad ug labing minus syento singkuwenta mil ka pesos. (The New Nandau, Vol. XVII No.22)

 
 

Una sa tanan ang katawhan ang pagserbisyo-Gov Yebes sa tanang opisyales sa Sibuco

ANG pagserbisyo nga “Una sa tanan ang Katawhan” maoy gitugpo nga hagit ni Governor Rolando Yebes ngadto ngadto sa tanang mga barangay ug Sk officials sa lungsod sa Sibuco atul sa ilang gihimong mass oath taking.

Gihatagan ug gibug-aton sa gobernador nga sa opisyales nga paglingkod karon sa mga opisyales sa barangay dili na kini maghuna-huna pa ug partido ug personal nga interest. Ipakita niini ang serbisyo nga Una sa tanang ang Katawhan. Alang kang Governor Yebes nga human sa tulo ka termino ang mga katawhan sa barangay ang siguradong maningil sa nahimong agi sa mga opisyales sa matag barangay. Iya usab kini nga gipahinumduman nga kung kuyog kinahanglang kauban, dili lang kutob sa kuyog nga nag-apas ug proyekto.

Ang pagserbisyo nga “Una sa tanan ang Katawhan” maoy gitugpo nga hagit ni Governor Rolando Yebes ngadto ngadto sa tanang mga barangay ug Sk officials sa lungsod sa Sibuco atul sa ilang gihimong mass oath taking

Gidayeg usab ni Governor Yebes ang mga katawhan sa Sibuco ilabina sa mga opisyales sa lungsod sa pagpanguna ni Mayor Norbie Edding sa pagbarog karon sa ilang maanindot nga gymnasium nga diin gipahigayon ang mass oath taking sa mga opisyales sa barangay.  Ang pagtukod sa maong proyekto ang natuman pinaagi sa gipakitang kakugi nga nagsugod sa damgo sama sa nahitabo karon sa probinsiya nga nakahimo ug modernong hospital nga nagsugod usab sa damgo ni Governor Yebes. Sa dihang nakita ni Governor Yebes ang kahimtang sa karsada gikan sa Lintangan paingon sa poblasyon sa Sibuco, derikta nga gitawag gilayon sa gobernador si Provincial Engr. Ramon Ochotorena aron ipaabot ang maong problema.

Atul sa gihimong programa gihagit ni Governor Yebes ang tanang mga kapitan ilabina gikan sa Lintangan paingon sa Santo Niño nga sa ilang paglingkod karon sa katungdanan mopasar gilayon kini ug resolution address ngadto sa probinsiya aron matabangan kini parasa pagpalambo sa maong karsada nga diin sa karon ilalom kini sa barangay alang sa maong road maintenance. Gikan sa Santo Nino paingon sa poblasyon ang iyaa na kini sa probinsiya.

Gidugang ni Governor Yebes nga iya usab karon nga pangitaan ug kuwarta nga maoy gamiton aron mapalambo ang karsada gikan sa poblasyon-Lunday paingon sa Curuan sakop sa dakbayan sa Dapitan. Importante kaayo ang karsada sa Sibuco tungod kay anaa ang daghang produkto nga ilang itumod ngadto sa Zamboanga City nga maoy pinakadakong merkado sulod sa atong rehiyon. Iyang giklaro nga sa iyang kanunay nga pagbisita sa Sibuco timaan kini nga wala gayud niya hikalimti sama sa gihimo ni 3rd District Congressman Cesar Jalosjos.

Sa karon adunay usa ka balance fleet ang anaa gibutang sa probinsiya sa Sibuco nga gilangkuban sa bulldozer, grader, pizon, payloader ug dumptruck. Gawas sa oath taking sa mga opisyales sa barangay sa sibuco gihimo usab nila ang inauguration sa ilang bag-o ug manindot nga gym nga ilang gitawag  ug HATIB TAMSILANI LAPILA EDDING GYMNASIUM ug pagturn-over sa mga yawe timaan sa pagturn-over sa mga proyekto gikan sa probinsiya ngadto sa kagamhanang lokal sa Sibuco.

Ang maong kalihukan ang gisaksihan mismo sa taga DILG gikan sa rehiyonal nga buhatan. Didto usab ang mga Board Members sa tersiro distrito nga sila si Bukal Joseph Brendo Ajero, Bong Edding, Felixberto Bulando, Anecito Darunday, ABC President Arasam Ismael. Kahinumduman nga niadtong nakalabay nga semana gihimo usab ang pag-energized sa linya sa koryente sa lima ka mga barangay sa Sibuco uban ni Congressman Jalosjos. (Mindanao Star, Vol.III No.45)

*

 

ZNMC wala pay occupancy permit

Hangtud karon nagpa-biling wala pa makapagawas sa iyang Occupancy Permit ang dakbayan sa Dipolog para sa Zamboanga del Norte Medical Center (ZNMC). Sa unang bahin karong semanaha ang Vice Presidente for Operations sa Metropolis Construction Incorporated nagpadala ug suwat ngadto kang Mayor Evelyn Uy aron sa pagsubay unsa nay status sa ilang giaplayang Occupancy Permit para sa ZaNorte Medical Center karon nga gituman na nila ang dugang requirements nga gipangayo sa siyudad.

Sa nasayran gisumitir na sa kontraktor ang gipangayong dugang requirements sa Dipolog niadtong Nobyembre 26, 2007 para mapagawas na ang Occupancy Permit nga maoy gihisgutan sa panagtagbo sa nakalabay’ng Nobyembre 22, 2007 uban sa Legal Officer, City Administrator, City Engineers ug ubang mga personalidad sa city hall ug mga meyembro sa media. Sa nahibaw-an si Mayor Evelyn Uy miuban sa pagpahigayon ug inspection sa Sewage Treatment Plant sa ZaNorte Medical Center niadtong Lunes.

Ang ZaNorte Medical Center (ZNMC) nga hangtud karun wala pay ‘occupancy permit’

Sa nasayran hangtud karon ang buhatan sa mayor sa Dipolog pabiling wala pa gihapon mopagawas sa Occupancy Permit bisan ug gituman na sa kontraktor ang gipangayo nilang requirements. Sa sayu pa gipahibawo ni Governor Rolando Yebes nga kon dili gayud mohatag ang city hall sa Occupancy Permit magbutang na lang siya ug daku nga tarpaulin atubangan sa ZaNorte Medical Center para ipahi-bawo sa tanang katawhan ngano nga hangtud karon dili pa sila mamahimong makapahimulos sa sirbisyo sa usa ka bag-ong tambalanan.

Matud pa sa gobernador iya usab nga ibutang sa maong tarpaulin pila na ka lungsuranon ang nakabsan sa kinabuhi tungod kay nahikawan sa pagpahimulos sa sirbisyo sa usa ka modernong hospital. Sa nakita karon gilangay-langay gayud ni Mayor Uy para ang nasangpit nga tambalanan dili makasirbisyo ngadto sa mga katawhan pinaagi sa pagdumili paghatag sa Occupancy Permit.(Press Freedom, Vol. XX No. 8)

*

 

ZNUC mopili ug singing idol

Isip paghatag ug dugang kalingawan sa mga katawhan, ang Zamboanga del Norte United Correspondents (ZNUC) mupahigayon ug Search for ZNUC Singing Idol karong Desyembre 15, adlaw’ng Sabado, sa Capitol Plaza ning syudad, inabagan sa kagamhanang probinsyal. Matud pa ni ZNUC President Leo Cimafranca nga ang maong singing competition bukas kini sa tanang Zanorteans, nga nagpangidaron ug 15 ngadto sa 25 anyos, ug mopa-ilawom sa audition uban sa Zanorte Band diha sa poolside Convention Center, sugod karong adlawa hangtod sa Desyembre 13.

Ang Search for ZNUC Singing Idol nga gipahigayon sa Capitol Plaza ning syudad sa Dipolog, inabagan sa kagamhanang probinsyal.

Aduna lamay 10 ka mga finalist ang gikalatid nga maka-apil ug magtige atul sa Desyembre 15, nga adunay dagkong premyo ang naghulat. Ang mosalmot kinahanglan mag-andam og usa ka Original Pilipino Music kon (OPM) ug English songs, alang na sa duha ka hugna sa maong kalihukan. Nasayran nga ang ZNUC naila na kini nga tig-umol sa mga batan-ong talento sa lalawigan, kinsa mipahigayon kaniadto ug Search for a Singing Star sa makaduha ka higayon, diin ang nahimong kampeyon mao sila si Glenn Diniay, taga dakbayan sa Dapitan niadtong tuig 2005, ug Jenny Bantilan sa lungsod sa Katipunan niadtong tuig 2006, atul sa Hudyaka Zanorte.

Samtang niining tuiga, ang ZNUC mipahigayon ug Battle of the Bands, diin ang nahimong kampeyon mao ang Palomares Band. Niini, si Cimafranca ang nag-awhag sa mga batan-on nga adunay Search for ZNUC Singing Idol 2007 ug magpa-audition na sugod karong adlawa. Alang sa dugang kasayuran, bisitaha lamang ang Provincial Information Center, 2nd floor, ZN Convention and Exhibition Center ug pangitaa lamang si Sheng ug si Buddy. (Mindanao Star, Vol.III No.45)

*

 

Capitol mohatag 14th month nga bonus

Gikatakdang mohatag ug 14th month bonus ang kagamhanang probinsiyal sa Zamboanga del Norte ngadto sa mga kawani niini sa dili pa ang adlaw sa pasko. Kini ang gikonpirmar ni Governor Rolando Yebes, human usab gipahibawo ni Vice Governor Francis Olvis nga ang Sangguniang Panlalawigan andam mopahigayon ug special session taliwala sa ilang pagdeklarar ug recess aron matuki ang ipadas-og nga 14th month bonus sa gobernador.

Matud pa ni Governor Yebes iyaha pang gipasubay karon sa Local Finance Committee kon aduna bay igong pundo ang panudlanan sa lalawigan para sa pagha-tag sa dugang pinaskuhan alang sa mga kawani.

Sa samang bahin nangayo usab siya karon ug pagtugot gikan sa Commission on Audit para sa paghatag sa 14th month bonus.

Matud pa ni Governor Yebes kon mohatag lang ang COA sa ilang pagtugot makahatag gayud siya sa 14th month bonus sanglit himsog ang panudlanan sa lalawigan. Gitinguha nila nga mahatag kini sa dili pa sila magpahigayon sa ilang Christmas party sa kapitolyo karong Disyembre 14. Kabahin sa mga job orders matud pa sa gobernador sama sa miaging tuig mohatag gihapon siya ug bonus para kanila apan dili daku ug pupareha ra nga kantidad sa nakalabay nga tuig.(Press Freedom, Vol. XX No. 8)

*

 
Gob. Yebes mimando giyera batok illegal sugal

Gimandu karon                 ni Gov.  Lando Yebes ning lalawigan sa Zamboanga del Norte ang pagkigira batok sa tanang matang sa sugal dinhi sa lalawigan. Sa usa ka order ihikutibo nga gipagawas sa gobernador kini nag-awhag sa tanang mga hingtungdang opisyal sa tibook probinsiya alang na sa hingpit nga kampanya batok sa mga illegal nga sugal ilabi na ang kuyanap na kaayong suertres.

Ang maong kamandu-an sa gobernador dirikta usab nga gipadangat ngadto sa mga mayores sa 25 ka mga lungsod ug duha ka dakbayan ingon man sa buhatan sa kapulisan sa lalawigan pinaagi kang PNP Provincial Director Mario Biong Yanga  alang na sa pagpadulot sa bala-od nga maoy hingpit nga magpakgang sa mga ginadiling sugal sa Zanorte. Gipasabot sa maong kamandu-an nga ang sugal maoy nakapa-ot ot ug samot sa panginabuhi sa mga katawhan kay bisan mao-maong salapi ila pa kining itaya sa sugal.

Gumikan sa sugal modaghan usab ang kremin sa pagpangawat busa angayan lamang kining hatagan sa tukmang aksiyon pinaagi na sa pagsumpo niini ingon man pagsikop sa mga tawong nalambigit sa ginadiling sugal nga suertres ilabi na ang mga bangkero niini. Kahinumduman nga dugay nang mikuyanap ang illegal nga sugal nga suertres dinhi sa lalawigan ug panahon na parar magkahi-usa ang mga opisyal sa probinsiya ug mga sakop sa kapulisan aron hingpit kining batukan. Ang maong kamandu-an sa gobernador gipitsahan ug Desyembre 4, 2007 ug hingpit gilayon kining ipatuman sa tibook 25 ka mga lungsod ug duha ka dakbayan ning lalawigan. (Mindanao Star, Vol.III No.45)

 
 

 HULAGWAY BALITA

 

*

 

MLGOO Roxas mitabang ug ‘hostage’ sa usa ka kapitan atol sa ABC Meeting

Ang Municipal Local Government Operation Officer sa lungsod sa Roxas gitumbok nga mitabang ug ‘hostage’ sa usa ka barangay kapitan atol sa ilang ABC meeting niadtung Miyerkules. Kini ang gibutyag sa mga kapitanes nga gihilasan sa gipakitang “bias” ni MLGO Officer Fe Secosana, nadestinong DILG Officer sa lungsod sa Roxas sa dihang mitabang kini ug tago sa iya mismong opesina ni Kapitana Guillerma Generoso sa Barangay Canibongan atol sa gipatawag nga meeting sa Association of Barangay Captains didto sa SK building sa maong lungsod.

Angay mahibaloan mga duha na ka semana, ang mga kapitan sa lungsod sa Roxas ang gihipos na ni Kapitan Melodencio Maguinsay ubos sa mando ug pagtabang ni Mayor Carlito Feras. Sila didto gitaguan sa Oaklahoma Beach Resort sa Baliangao, Misamis Occidental. Tungod sa walay saktong pagpananghid sa nahibiling pamilya, mga asawa ug bana sa kapitan nga gitagoan sa mayor ang miduso na sa ilang reklamo, apan wala kini mahimo gumikan kay guwardiyado ug armadong mga tawo ang lugar nga gipundohan sa maong mga kapitan.

Gani niadtung miaging adlaw, bisan pa kon nahospital ang bana ni Kapitan Generoso wala gayud kini tugote sa mayor nga makabisita sa iyang bana nga anaa nahilanding sa Provincal Hospital dinhi sa dakbayan sa Dipolog. Sa miaging semana sa dihang gipatawag sa DILG ang tanang kapitan alang sa pinaka-unang panagtagbo isip usab sa ilang pagpangandam sa umalabot nga ABC Federaton election karong Desyembre 11, si Kapitana Generoso wala patambonga sa maong meeting ug didto kini gitaguan sa sulod sa opesina ni Secosana.

Matud pa ni Kapitan Harry Pialago ug Kapitan Joel Calubag, gikan sa pagsugod ug nahuman nalang ang ilang meeting, wala gayud makagawas si Kapitan Generoso kay didto kini gi-hostage sulod sa opesina sa Municipal Local Government Operation Officer hinungdan nga sa pag-roll call sa tanang membro, gi-absenan nalang ni Kapitan Perper Montemayor, ang secretary sa maong assosasyon. Ang gihilasan sa mga kapitan nga naka-obserbar sa maong meeting kay gipa-guwardiyahan ug armadong polis ang atubangan ug kilid sa SK building ug walay si bisan kinsang makasulod ug makapaminaw sa maong tigum.

Mismo si Kapitan Harry Pialago nga naulahi sa maong meeting ang halos dili na pasudlon kay gipugngan ug duha ka polis nga anaa nagbantay sa pultahan. Ila usab nabantayan nga nagbahas-bahas ang mga sakyanan nga galibot-libot sa lungsod ug didto sa ilang nahimutangan. Paghuman sa meeting, ayha pa gipagawas si Kapitana Generoso gikan sa sulod sa opesina sa DILG nga tinabonan ug panapton ang nawong ug gihaweran ang duha ka mga kamot sa pikas ug pikas sa duha ka mga tawo samtang lain pa ang nagsunod nga wala gayoy makaduol ug diretso kining gipasakay sa nag-atang na daang Van sa baba mismo sa SK building diin anaa usab nahimutang ang opesina sa DILG.

Ang gipakitang aksiyon sa DILG ug ni Mayor Feras maoy nakapa-alarma sa mga kapitanes unsa ka bangis ang administrasyon sa lungsod sa Roxas diha sa pag-tratar sa usa ka kapitan nga ilang gi-hostage. Matud pa sa mga kapitan, si Secosana nga nagpagawongt sa mayor namahayag pa uban sa “konuhay” pagpula sa iyang mga mata nga ibalhin siya sa laing lugar kay ang iyang gihimo “bias” diha sa paglaban sa administrasyon. Si Secosana mihimakak nga duna siyay gipaboran.

Apan gihilasan ug samot ang mga kapitan nga naka-obserbar kay mismo si Secosana nga nagpaluoy-luoy atubangan sa mga kapitan nga wala siyay gipaboran, migawas si Kapitan Generoso gikan mismo sa iyang opesina nga gipurongan ug gitabonan ang nawong ug diretsong gipasakay sa naghulat nga Van. Gikatahong si Secosana ilabay sa triple SB. (The New Nandau, Vol. XVII No.22)

*

 

Pulso Sa Katilingban
Cicer M. Binghay
“Deported”

Kaniadto pa, baybayon sa Zamboanga del Norte dangpanan sa hangin nga habagat. Kon molabay ang bagyo, mamogna ang magkuso-kuso nga hangin nga mopahamtang daghang kabtangan. Nagpasabot nga dili mutogot ang kinaiyahan tukoran pantalan ang plantadang baybayon. Ang natukod Dipolog Rock Causeway Jetty nga migugol dakong kantidad, nagpabilin handumanan diin minilyon salapi gibanlas lamang sa panumdoman. Karon gitukod ang Galas Feeder Port…Laing hagit sa leksiyon sa unang natukod sa Punta Coro, pero ang maong leksiyon dili na panumbalingon niining panahona, because we don’t believe in the good old warnings anymore.

Gipasulabi sa namunoan karon ang pagpangitag mga kalihokan nga maka pahat salapi itukod prohekto. Ang tuyo ug tumong nga ang ipahat salapi ma “justified” sa ipuhonan. Apan klaro dinhi publiko nga bisan dili na kinahanglan ang pagtibawas sa walay mapuslan gitukod Galas Feeder Port sigon sa makitang kapalpakan, ang gisiguro dinhi nga mapadayon ang “fundings” nga walay bugto-bugto. Ugod masayon ang pagpangutang sa kagamhanan ubos ni bisan kinsa nga administrasyon. Hibaloan nga kon sila dili na ang namunoan ang sumusunod mapugos pagbayad kon unsay obligasyones sa lungsod. Ang nauso nga kinaiya sa namunoan karon, ingon niini…nga dili nila usikan ang panahon paugmaan, what you can do it until. Matod pang P.T. Barnum, “Money is a terrible master but an excellent servant”.

Nakanindot lamang niining atong nasod kay bisan kinsang magkarabanit sa tumang kalisod ug kagutom ang katawhan, atong namunoan kanunay nga makagahin “special fundings Christmas advance cash gifts” sa mga napiling katawhan. Naupawan ang tumang kapit-os human sa katalagman gidalit sa Lando-Mina bagyo. Gipaila pag-ayo sa namunoan, nga bisan taliwala sa kapit-os sa katawhan, naay daghang salapi ang Malacanyang gipang premyo. Gipalagaylay ang 20 ka mga kongresista uban kaniya sa ubang nasod gasto sa salapi sa katawhan. Nakapasiunag pang apod-apod cash gifts samtang naghingak sa kagutom ang katawhan. Mao na kaha kini ang hampak sa nabalit-ad panahon?

“A president must be as strong as she must be…” Dinhi kanunay akong mahinumdoman kang Michael Jordan NBA star nga miingon, I’ve never been afraid to fail. That’s something you have to deal with in reality. I think, I’m strong enough as a person to accept failing. But I can’t accept not trying. Si PGMA nakasugakod sa daghang problema persona sa iyang daghang bikil nga diha-diha iyang gipang atubang pagbaliwala. Akseptado siya nga molantaw sa kamatuoran, pero iyang katig-a dili mutogot bisan magpungasi ang kaparotang palibot. Magpabilin iyang pagbuot. Karon dihay gipamulong si Pres. George Bush nga siya nagpabilin nagpaluyo sa kagamahanan ni PGMA. Magpabilin ang Military Aid sa U.S.A. sa Pilipinas. Dili malalis angayan hatagan dako nga pagtagad ang nasod sa Pilipinas sa U.S.A. kay bisan kinsa sa kagamay niini nagapabilin nagamalampuson pagmintinar sa pang gobiyerno demokrasya nga milungtad sa dugay nga panahon dinhi sa Asia.

Ikaduha dako ang mga pangandoy sa atong mga himalatyon o nangahanaw nga mga beteranos sa ikaduhang gubat nga matipakan sa kumpleto nga benepisyo sa mga U.S. veterans nga nagpahimulos sa dagkong pension bisan tuod diha na lamang sa mga nahabiling kaliwat. Usab kitang mga Pilipinhong nangandoy nga mapasar ang balaodon sa immigration sa labing madaling panahon aron ang minilyon natong mga kaigsoonan dili tagad mapaoli sigon sa itakdang balaodon. Matod pa mukabat minilyon ka mga pilipinhong markado ma “deported”. (Press Freedom, Vol. XX No. 8)

 
Credits: Press Freedom is published every Saturday and entered as 3rd class mail matter in Dipolog City. Printed by Young Printing Press with Editorial Office located at Upper Turno, Dipolog City. Tel. No. (065) 212-4343 or 212-6665

 

Alang sa sakit sa lubi
Task Force Brontispa Longissima gitukod sa OPA

 

Nanawagan karon ang buhatan sa Provincial Agriculture pinaagi ni Maybel C. Bustaliño ang Supervising Agriculturist nga matud pa nga adunay mibutho nga sakit sa lubi nga gitawag ug “BRONTISPA LONGISSIMA” nga diin kabag-ohay pa lamang mikaylap ang maong sakit sa lubi didto sa Zamboanga City nga haduol dinhi sa probinsiya. Ang buhatan sa Provincial Agriculture ang mipahigayon ug Task Force BRONTISPA LONGISSIMA dinhi sa Zanorte sa dili pa mokaylap ang maong sakit sa lubi nga maoy gikagul-an usab pag-ayo sa ubang probinsiya sa Luzon.

Nanawagan karon ang buhatan sa Provincial Agriculture may kalabot na sa mibutho nga sakit sa lubi nga gitawag ug “BRONTISPA LONGISSIMA” nga diin kabag-ohay pa lamang mikaylap ang maong sakit sa lubi didto sa Zamboanga City nga haduol dinhi sa probinsiya.

Ang maong brontipa Longissima usa ka Leaf Beetle nga mosupsop ug mopuyosa udlot sa lubi diin dili madali makita ang klase sa peste nga mokaon niini dili lamang ang lubi nga ilang mapuy-an lakip na ang tanum nga palmera nga ilang atakihon sa maong peste. Sa pakighinabi ni Maybel C. Bustaliño nga matud pa kinahanglan magpakabana ang mga lungsuranon tungud ka yang industriya sa lubi dinhi sa probinsiya maoy dakong produkto nga gipasigarbo karon sa Zanorte.

Sibo sa gipakanaog nga memorandum order # 664 pinaagi sa kamanduan ni Pres. Gloria Macapagal Arroyo ang presidente sa Pilipinas nga iyang gimanduan ang Department of Agriculture lakip ang naasoy’ng buhatan nga mobahat ug EMERGENCY MEASURE alang sa pagwagtang sa sakit sa lubi mga maoy mikatap karon dinhi sa nasud ug magmugna ug Quarantine Checkpoints alang sa pagdili ug pagtransportar sa tanum ilabina ang palmera. Giawhagan ni Mrs. Bustaliño ang mga katawhan sa pagbantay ug pagsusi sa ilang tinanum nga lubi nga kung adunay namatikdan, itaho lamang sa ilang buhatan sa Provincial Agriculture Office ug sa Philippine Coconut Authority aron mabuhatan ug igong lakang. (Mindanao Star, Vol.III No.45)

 
Credits: Mindanao Star is published once a week and is circulated to the 25 Municipalites and 2 Cities of the province of Zamboanga del Norte. Mindanao Star Editorial Office: #096 C.M. Montaño Building, Gen. Luna Street, Dipolog City; Phone/Fax No. (065) 212-2576; Email: mindanaostar@zamboangadelnorte.com
 
 

Gov. Yebes mohatag ug 25 milyones pagbukas dalan sa
Diwan padulong sa Katipunan ug Sergio Osmeña

Gipasalig ni Governor Rolando Yebes nga iyang buksan ang dalan gikan sa Barangay Diwan sakop sa Dipolog paingon na sa lungsod sa Katipunan ug Sergio Osmeña. Atol sa Kapihan sa 1948 Cafeteria nga gipasiugdahan sa mga miembro sa Zamboanga del Norte United Correspondents kun ZNUC, si Gov. Rolando Yebes misaad atubangan ni Barangay Captain Nataniel Patangan nga siya mogahin ug salapi alang na sa pagbukas ug bag-ong dalan gikan sa iyang barangay aron mokonektar kini sa duha ka mga lungsod nga maoy kasikbit niini.

Mokabat sa P25 milyones ka pesos alang na sa pagahimuong road opening gikan sa Barangay Diwan paingon na sa haduol nga mga lungsod sama sa Kati-punan ug Sergio Osmeña. Gilantaw sa gobernador nga mas dako unya ug ikata-bang kon mabuksan ang maong dalan sa mga kataw-han sa maong barangay ilabi na sa mga mag-uuma nga maglisod sa paghatod sa ilang mga produkto ngadto sa kamerkaduhan.

Matud pa sa gobernador nga bisan bag-o pa lang napili si Patangan isip maoy punong barangay sa Diwan iyang nakita ang katakus niini sa pagpangalagad sa iyang mga katawhan mao nga andam siyang mopabaha ug mga proyekto sa maong barangay. Kahibaloan nga bugtong ang Diwan lamang ang adunay kapitan nga kaal-yado sa APP ang milusot sa niaging barangay ug SK election ug ang ubang mga 20 ka mga kapitan ang anaa karon mipasilong sa pamilyang Uy.

Bisan pa man sa maong mga panghitabo, ang gober-nador ang naglantaw giha-pon sa mga panginahang-lanon sa mga katawhan ning syudad sa Dipolog diin iya usab nga gimanduan ang tanang mga bokal sa una hangtod tersiro distrito ning lalawigan sa pagtipak sa ilang PIF aron katabangan ang mga barangay nga na-nginahanglan sa ilang ayuda. (The New Nandau, Vol. XVII No.22)
 

Credits: The New Nandau is a member of the Publishers Association of the Philippines (PAPI). Editorial office is located at 076 Quezon Avenue, Dipolog City with Tel. No. (065) 212-3794; Cell No. +639205201041

*

MORE NEWS NGA BINISAYA

 

 

NOTE: SEND US YOUR NEWS.  Tell us what's going on in your barangays, clubs, schools, businesses and non profit organization. You can also send notices and announcements.
          

 

    Email to webmaster@dipolognon.com

      
Google
WEB THE DAILY DIPOLOGNON