December 7, 2007

 

P20M gibiling kadaot, 3 mananagat missing 600 KA BALAY GIKUSO-KUSO SA BALUD

Gibanabanang mokabat sa P20 milyones ka pesos ang kinatibuk-ang damyos sa mga kabtangan, propiedad ug umahan samtang mokabat sa 600 ka panimalay nga anaa nanimuyo subay daplin sa kabaybayonan dinhi sa dakbayan sa Dipolog ug dakbayan sa Dapitan ang gikuso-kuso ug giguba samtang ang uban nabanlas sa tubig sa dihang gihampak kini ug mga dagkong balud sa dagat niadtung Martes sa gabii samtang tulo ka mga mananagat hangtud karon wala pa makapauli sa ilang pinuy-anan atubangan sa nagpahilayo na ang mga bagyong Lando ug Mina.

Sa report gikan sa Provincial Disaster Coordinating Council kon PDCC, dinhi sa Dipolog adunay 400 ka panimalay ug sa dakbayan sa Dapitan adunay 200 ka panimalay ang nangaguba samtang nanga-anod ang ilang mga butang dihang kalit lang mihagiyos ang pagtubo sa tubig mga duha ka metros ang gilawomon uban sa makusog nga paghapak sa mga dagkong balud byente metros ngadto sa tryanta metros ang gilay-on gikan sa baybayon.

Sa Barangay Sicayab adunay 200 ka mga pamilya ang naapektohan samtang subra sa 200 ka pamilya sa Surf, Barangay Miputak ug Punta Coro, Central Barangay, Galas ug Olingan parehong nahisakop sa dakbayan sa Dipolog samtang sa dakbayan sa Dapitan aduna usay 200 ka pamilya ang naapektahan sa mga Barangays sa Polo, Sicayab Bucana, San Pedro, Talisay, Bacung, Taguilon ug uban pang coastal barangays sama sa Cawacawa ug Banonong. Gawas sa mga balay nga naguba, ubay-ubay sa mga fishponds sa Polo ug San Pedro ang naupawan sa tubig hinungdan nga nanga-anod ang mga bangus, lokon, sapayan ug seedlings nga miresulta sa minilyon ang damyos.

600 ka panimalay nga anaa nanimuyo subay daplin sa kabaybayonan dinhi sa dakbayan sa Dipolog ug Dapitan ang gikuso-kuso ug giguba samtang ang uban nabanlas sa tubig sa dihang gihampak kini ug mga dagkong balud sa dagat niadtung Martes samtang nagpahilayo na ang mga bagyong Lando ug Mina.

Tungod niini, gimando ni Governor Rolando Yebes ang hinanaling tabang ngadto sa mga pamilyang nga apektado sa maong kalamidad. Ang PDCC nga gilangkoban sa mga buhatan sa Provincial Social Welfare and Development, Community Development Assistance Unit ug Provincial Engineering ang nagtamba-yayong paglugway ug tabang pinaagi sa paghatag ug mga relief goods sama sa bugas, sardinas, kape ug asukal ngadto sa mga apektadong pamilya dinhi sa dabayan sa Dipolog.

Sa Purok Surf sa Barangay Miputak, tulo ka purok ang gi-ayo ug lampurnas sa makusog nga hangin ug balod samtang 35 ka mga pamilya sa Purok Sakayanon, 55 sa Purok Bularan ug 50 sa Purok Makugihon. Sa Punta Coro, Central Barangay 70 ka mga bobong o pamilya ang apektado usab samtang gikolamos sa mga dagkong balud ang ilang balay. Sa Barangay Sicayab partikular nga naigo sa paghapak sa mga dagkong balod mao ang mga nani-muyo sa Purok D’ Beach, Purok Krismos ug Gampis. Matud pa sa mga residente sukad masukad karon pa sila makasinate sa ingon niini ka mga dagkong balud nga mibanblas sa ilang pinuy-anan. Hinoon ang ubang apektadong pamilya igo lamang nalunopan ang ilang balay.

“Wala gyud mi makatulog kay alas nuybe pa sa gabii dagko na kaayo ang balud hinungdan nga hinayhinay nami ug pamakwit.” Walay gikareport nga dunay kinabuhi nga nakalas sa maong kalamidad gawas lamang sa tulo ka mga mananagat nga nanimuyo sa Barangay Canlucani sakop sa dakbayan sa Dapitan ang hangtud karon wala pa makapauli sa ilang pinuy-anan. Ang tulo ka mga mana-nagat giila nga sila si Jaime Balanay, Alfredo Benson ug Elmer Abad, hingkod ang pangidaron ug parehong mga minyo. Sumala pa ang tulo parehong nanagat niadtung Martes sa gabii haduol sa Isla sa Selinog lulan sa pula nga adunay stripe nga puti nga Pumpboat.

Matud ni PSI Glen Dulawan, Chief of Police sa Dapitan PNP nagpadala na siya ug plush alarm sa tanang unit sa PNP sa kalungsoran sa Zamboanga del Norte sa posibli nga pagdagsa o kaha gidangpan sa tulo ka mga mananagat kon ugaling kini buhi o patay sa pagtaho gilayon sa mga katawhan ngadto sa pinakaduol nga hingtungdang otoredad. Ang duha ka mga kagam-hanang lokal sa Dipolog ug Dapitan ang milugway usab sa ilang ayuda ngadto sa mga biktima. Matud pa ni Atty. Alanixon Selda, City Information Officer sa Dipolog nga gimando ni Mayor Evelyn Uy ngadto sa CDCC nga hatagan ug relief goods ang apektadong pamilya.

Mao usab kini ang gipahayag ni Mrs. Elvie Dela Peña-Avila nga gimando ni Mayor Dominador Jalosjos, Jr. sa dakbayan sa Dapitan ang hinanaling aksyon sa CDCC ug milugway na sila ug tabang sa mga biktima sa kalamidad. Didto sa lungsod sa Siocon, pinaagi sa report ni Mr. Senen Ladera, Executive Assistant IV sa buhatan sa gobernador, adunay polo ka mga balay ang naguba samtang subra sa usa ka gatus ka pamilya ang apektado sa Barangay Bucana, upat ka balay naguba sa Barangay Sta. Maria samtang sa Barangay Tibangaw ang ilang mga fishponds ang nalapawan sa tubig nga miresulta sa dakong kadaot. (The New Nandau, Vol. XVII No.21)

*

 

Sa upat ka brgy sa Dipolog
Gob. Lando miayuda naigo sa bagyong Lando ug Mina

Tungod sa paghapak sa makusog nga balod, epekto usab sa nagsunod-sunod nga bagyong Lando ug Mina mokapin sa 400 ka mga pamilya ang apektado niini nga nanimuyo sa Surf, barangay Miputak, Central Barangay, Olingan ug Sicayab. Kaniadtong milabay’ng Martes ang Provincial Disaster Coordinating Council kun PDCC pinaagi sa mando ni Governor Rolando Yebes ang mihimo gilayon ug aksyon bisan ang gobernador ang aduna kini opisyal nga lakaw didto sa probinsya sa Lanao del Norte.

Pinaagi sa buhatan sa Provincial Social Welfare and Development ug Community Development Assistance Unit inabagan sa Provincial Engineering Office ang mihatag kini ug mga relief goods sa mga biktima sama sa bugas, sardinas, kape ug asukal. Didto sa  purok Surf barangay Miputak, 3 ka purok ang giayo ug lampurnas sa makusog nga hangin ug balod diin 35 ka mga pamilya sa purok Sakayanon, 55 sa purok Bularan ug 50 usab sa purok Makugihon. Samtang didto sa Punta Coro sa Central Barangay mokabat usab sa 70 ka mga bubong o pamilya ang naigo sa makusog nga balod.

Sa pakighinabi sa mga miembro sa Zamboanga del Norte United Correspondents kun ZNUC, sa mga pamilya nga naapektuhan sa makusog nga hangin ug balod, maayo gayud nga pagkabanlas sa ubang mga panimalay uban ang ilang mga kabtangan, samtang ang ubang mga pamilya ang nalunupan lamang ug dakong tubig ang ilang mga panimalay tungod sa pagtaas sa tubig sa dagat maoy hinungdan nga wala usab sila makatulog sa dakong kabalaka kaniadtong Martes sa gabii. Tungod sa suporta usab sa mga Lando BIBO presidents ug coordinators sa duha ka mga barangay, mas nadali ang pag-identify kagahapon sa mga angayang tabangan sa gobyerno.

Si Atty Ivan Patrick Ang ug Mr. Noel Bengua nangunay sa paghatag ug mga relief goods sa mga biktima sa bagyong Lando ug Mina sa Surf, Miputak.

Si Atty. Patrick Ang, Provincial Tourism Designate, Noel Bengua sa OPA ug Jay Adraincem mao usab ang nangunay sa distribution sa mga relief goods kagahapon sa Surf ug Punta Coro. Matud pa sa maong mga empleyado sa kapitolyo probinsyal ang maong mga tabang ang kinasing-kasing gayud nga gitunol sa kagamhanang probinsyal pinaagi sa programa ni Gov. Yebes nga TLC kun Tabang ni Lando Sa Comunidad, ug walay bulok sa politika, kay wala gilantaw sa PSWDO ug CDAU  kun misuporta ba ang mga biktima sa kasamtangang administrasyon sa niaging piniliay. Malipayon ug mapasalamaton usab ang mga pamilya ngadto sa kagamhanang probinsyal sa ayuda nga gitunol ngadto kanila.

Sa Sicayab

Mokabat sa 200 ka mga bubong kon pamilya ang naapektuhan ug maayong pagkaguba sa ilang mga pinuy-anan tungod sa paghapak sa dagkong balud didto na sa Barangay Sicayab ning dakbayan sa Dipolog, ang gi-ayudaha’g mga bugas ug mga pagkaon sa kagamhanang probinsyal sa pagpangulo ni Governor Rolando E. Yebes. Partikular nga naigo sa maong dagkong mga balod ang mga panimay nga nagpuyo daplin sa kabaybayonan sa Purok D Beach, Purok Krismos, Gampis, Sicayab diin, mokabat sa 3 ka kilong bugas, mga sardinas, noodles, kamay, kape ug uban pa ang gipanghatag sa kada pamilya nga biktima niini. Suma pa nga mas dako ang damage ug daghanan usab ang nabiktima karon sa maong dapit kompara sa nakalabayng tuig.

Nasayran nga bisan pa man nga wa dinhi ning lalawigan si Governor Yebes tungod sa official nga lakaw niini apan pinaagi sa pagtawag  sa iyang mga sakop sa mga nagkalain-laing ahensya sa kapitolyo, dali gilayong mihatag og ayuda ang kagamhanang probinsyal ngadto na sa mga pamilyang biktima.  Suma pa sa usa ka biktima nga di buot magpabutyag sa iyang pangalan nga human gikuso-kuso sa dagkong balod ang ilang panimay kagabii, ang kagamhanang probinsyal ang mihatag gilayon sa ilang mga hinabang kanila. Apan ilang gisaway ang dakbayan sa Dipolog tungod kay hangtod ning pagbalita, wa pa gayo’y ayuda nga gipada niini.

Midayeg gayod ang mga lumulopyo sa maong dapit ngadto na ni Gov. Yebes ug sa mga sakop niining mi-ayuda sa maong hinabang nga ilang gihatag niini bisan paman napilde ang amahan ning probinsya kaniadtong nakalabayng eleksyon.  Matud pa nga di gayod pilion sa gobernador ang iyang pagtabang sa katawhan ning lalawigan particular na ang dakbayan sa Dipolog.  (Sam Buddy, Mindanao Star, Vol.III No.44)

*

 

Yano, Pacquiao kuyog mibisita sa ZaNorte

Daw sama sa usa ka artista ang paghinadangat dinhi sa Zamboanga del Norte ni Manny Pacquiao ug Lt. Gen. Alexander Yano, Commanding Chief sa Philippine Army kaniadtong Huwebes, Nobyembre 29. Sa wala pa mi-deritso sila si Lt. Gen. Yano ug Pacquiao sa programa sa kagamhanang lokal sa Dipolog nga mao ang pag-adaptar ni Yano isip “Son of Dipolog”, ang duha ka mga inila nga personalidad ang mi-courtesy call kini ngadto sa kagamhanang probinsyal sa pagpangulo ni Gov. Rolando Yebes.

Si Lt.Gen. Yano, Gov. Yebes ug international boxing sensation Manny Pacquiao

Atol sa paghidangat ni Yano ug Pacquiao sa kapitolyo, gisugat kini sa mga empleyado, mga estudyante ug mga katawhan ning syudad. Sa mensahe ni Manny Pacquiao didto sa Capitol Plaza, iyang gipasalamatan si Gov. Yebes ug mga katawhan sa Dipolog sa mainitong pagdawat kaniya isip inila na nga world champion sa boxing.

Dugang pa ni Pacquiao nga mao kadto ang iyang una nga pagbisita sa Dipolog ug lalawigan sa Zamboanga del Norte human sila ni Lt. Gen. Yano ug Pacquiao ang nag-kaila ug nahimong suod nga amigo sugod kaniadtong 1999, maoy rason nga gidala usab siya ni Yano dinhi sa lalawigan. Gisaad usab ni Pacquiao, nga siya mobalik pag-usab dinhi sa Dipolog human sa iyang fight nila ni Morales karong Marso 15 sunod tuig. (Sam Buddy, Mindanao Star, Vol.III No.44)

*

 
Mrs. Ocampo gitudlo nga Acting Hospital
Administrator sa Zanorte Medical Center

Mrs. Rosevic Lacaya-Ocampo, Provincial Planning and Development Officer mao karon ang gitudlo ni Governor Rolando E. Yebes isip Acting Hospital Administrator sa bag-ong gitukod nga Zamboanga del Norte Medical Center sa Sicayab ning dakbayan sa Dipolog.

Kini ang unod sa Office Order nga gipermahan ni Governor Yebes. Matud pa sa gobernador, alang sa maayong tinguha diha sa pagserbisyo sa publiko, si Mrs. Ocampo mao ang Acting Administrator sa bag-ong tambalanan.

Si Mrs. Rosevic Lacaya-Ocampo, Provincial Planning and Development Officer mao karon ang gitudlo ni Governor Rolando E. Yebes isip Acting Hospital Administrator sa bag-ong gitukod nga Zamboanga del Norte Medical Center sa Sicayab ning dakbayan sa Dipolog.

Matud sa gobernador, makaseguro siya sa ka epektibo, episyente ug mahanoy nga operasyon sa maong tambalanan ug gipahimangnuan sa Ocampo nga limitado lamang ang iyang otoredad gumikan kay ug gikinahanglan, mokonsulta kini kaniya o kaha sa provincial administrator mahitungod sa mga butang nga angay ikonsulta ngadto kaniya. Gipaninguha sa kagamhanang probinsyal nga sa dili pa matapos kining tuiga mabalhin na ang karaang tambalanan ug makasugod na sa iyang operasyon ang Zanorte Medical Center. (The New Nandau, Vol. XVII No.21)

*

 

City govt ga usik-usik kwarta sa katawhan
Galas Feeder Port maayong pagkaguba!

Tungod sa paghapak sa kusog nga hangin ug dagkong balud, epekto usab sa bagyong Lando ug Mina, maayong pagkaguba karon ang Galas Feeder Port, ning dakbayan sa Dipolog. Kaniadtong Martes sa gabii, Nobyembre 20, gibanlas ang mga 100 metros nga extention sa maong pantalan tungod sa paghapak sa higanteng balud nga nakahatag usab ug dakong kadaot sa mga residente diha sa mga kabaybayunan.

Maayong pagkaguba karon ang Galas Feeder Port, ning dakbayan sa Dipolog tungod sa paghapak sa kusog nga hangin ug dagkong balud, epekto usab sa bagyong Lando ug Mina.

Niini, daw gi-usik-usikan lang gayud ang mga Dipolognon sa dakong kadaot sa maong walay kahumanan nga proyekto sa kagamhanang lokal ning syudad. Kahibaloan nga ang kagamhanang lokal sa Dipolog sa administrasyon ni kanhi Mayor Roberto U yang migahin kini ug mokapin na sa 100 milyones ka pesos alang sa maong proyekto, apan wala kini kahumanan ug sa makadaghan na nabanlas sa dagkong balud ang mga gipangtambak nga bato ug ang paghimo niini ug break water.

Sa simple nga analisar sa mga katawhan ug sa mga magbubuhis dinhi sa Dipolog, dili gayud maghimpos ang maong plano aron humanon ang pantalan tungod an gang Galas usa man ka open sea o sa matag adunay bagyo ug kusog nga pagtubo sa tubig sa kadagatan ang maong lugar maapektuhan gayud sa kadaot. (Sam Buddy, Mindanao Star, Vol.III No.44)

 
 

SIAYAN GIPAILAWOM SA STATE OF CALAMITY 60 NA ANG PATAY SA EPEDEMIC OUTBREAK

Gipailawom karon sa State of Calamity ang lungsod sa Siayan atubangan sa nahitabong paglamay sa sakit nga Capillariasis nga mikutlo na ug ubay-ubay nga kinabuhi sa mga katawhan ilabi na ang mga nanimuyo sa hilit nga barangay nga anaa nagpuyo duol ug mga suba o sapa. Mayor Wilfredo Siasico namahayag nga sa bulan pa sa Hulyo niining tuiga may gihimo nang aksiyon o intervention ang kagamhanang lokal sa mitumaw nga problema sa mga katawhan sa Barangay Moyo sa dihang nagsunod-sunod ang kamatay sa maong barangay.

Matud ni Mayor Siasico dihang miabot sa iyang buhatan ang report kabahin sa nasinating balatian sa mga katawhan sa Barangay Moyo nagpahigayon gilayon sila ug pagpamurga pinaagi sa iyang Rural Health Physi-cian. Nanghatag sila ug tam-bal nga Avendasol batok sa Capillariasis apan ang uban nga nagkompiyansa sa ilang gihambin nga balatian wala na gayud nila matabang. Matud ni Barangay Kagawad Josenelson Denlauso sa Barangay Moyo, mokabat na sa 60 ka mga tawo ang namatay sukad mitakboy ang maong balatian sa miaging tuig.

“Gibati sa mga tawo ang kalibanga ug daghan ang nangamatay,” nagkanayon si Kagawad Denlauso. Gihulagway ni Mayor Siasico ang mga katawhan sa Moyo wala mokooperar sa paningkamot sa kagamhanang lokal sa pagsalbar sa ilang kinabuhi kay bisan kon gihatagan na ug tambal nga giresita para kanila kini dili man motumar. Sa gihimong pagsubay ang pagtumar sa Avendasol sulod sa 20 ka adlaw apan ang uban dili motiwas sa pag-inum ilabi na kon sa ilang paminaw mipiskay na ug balik ang ilang panglawas. Kini maoy hinungdan ngano nga milamay ang maong sakit nga misamot na kabangis ang kagaw nga mitakboy sa ilang lawas.

Sukad niadtung miaging tuig ug hangtud karon mikutlo na ug 60 ka mga kinabuhi sa tawo ang nakalas sa pipila ka mga barangay sa lungsod sa Siayan sa dihang mihugpa ang kagaw dala sa sakit nga Capillariasis.

Sumala pa ni Mayor Siasico sukad sa iyang paglingkod sa katungdanan niadtung Hulyo 2, maoy iyang na-obserbahan nga adunay nagsunod nga nangayo kaniya ug lungon gikan sa Moyo busa sa ikatulo ka higayon iya nang nasayran nga ang hinungdan sa kamatayon nagsumikad sa pagsuol sa tiyan dayon kalibanga busa iyang gipa-alarma ang ilang Rural Health Unit pinaagi ni Dr. Raymund Nadela alang na sa paghimog imbestigasyon para mapahibawo usab ang probinsya ug rehiyonal nga buhatan sa Health aron magpatabang pagsubay unsay hinungdan sa ilang mga nasinati karong balatian.

Sa ilang records sa lungsod adunay 28 ang natala nga namatay sukad lang sa bulan sa Hulyo niining tuiga nga milingkod pagka mayor si Siasico wala pay labot sa miaging tuig nga duna nay daghang nanga-matay apan wala na tagad matala sa buhatan sa Municipal Social Welfare kay gilubong na deretso sa mga tagtungod. Kini usab ang gikon-permar ni Dr. Nadela nga dunay daghang nangamatay dala sa maong balatian ang wala na ma-record sa ilang buhatan. “Sa bukid god ug dunay mamatay i-deretso nana nila ug lubong.” Sumala sa mga residente sa Moyo, sukad pa sa miaging tuig ang ilang barangay lakip na sa kasikbit niini nga barangay ang natakboyan usab sa maong balatian samtang ang uban hinay-hinay nag kamatay.

Si Dr. Raymund Nadela, Rural Health Physician sa lungsod sa Siayan mipa-hayag nga ang nahinaykan sa paglipang sa sakit nga Capillariasis mao ang Barangay Moyo ug naapek-tahan usab ang kasikbit niining barangay sama sa Paranglumba, Balok ug Denoyan diin kining mga dapita parehong duol sa suba ug sapa. Hingpit nga gipang-himakak ni Mayor Siasico ang puwerting pasiatab nga komentaryo sa DXAA-FM nga wala sila mihimog aksiyon sa maong hitabo nga epedemia samtang iyang gibiyaan ang iyang mga katawhan nga nagkasakit kay miadto siya sa Cebu aron sa pagtambong sa ilang tigum sa League of Municipalities of the Philipines. Sumala pa niya, sukad sa iyang pag-asumer sa katung-danan niadtung Hulyo, wala na siya makabiya sa lungsod sa Siayan gawas lamang sa pagtambong sa mga gipatawag nga tigum dinhi sa dakbayan sa Dipolog.

Niadtung miaging semana gihimo ang SOT operation sa militar ug mokapin sa 200 ka mga pamilya gikan sa Barangay Moyo ang ilang gibakwit ug gidala sa poblacion sa Siayan. Sa maong gidaghanon adunay 21 niini ang natauran ug dextrose ug gidala ngadto sa Sindangan District Hospital.  Sa ulahing report nga nahipos, unom ka mga pasyente ang nakabalik na karon sa ilang pinuy-anan kay miarang-arang na ang ilang kahimtang. Sa gihimong imbestigas-yon sa Rural Health Unit uban sa mga tinugyanan sa probinsya nasuta nga ang tinubdan sa bitok mao ang pagkaon sa mga isda ug ulang gikan sa suba nga hilaw kay ila lamang gikilaw.

Matud pa sa mga magtu-tudlo sa Moyo Elementary School, apektado ang pagtungha sa mga kabataan kay dunay ilang mga pupils ang wala na maka-eskuwela kay ang ilang ginikanan natakboyan sa maong balatian. Hinoon wala ra silay tinun-an nga nakabsan sa kinabuhi, gawas lamang sa usa ka pupil nga nakaundang sa pagtungha kay miborot ang tiyan apan karon miarang-arang na ang kahimtang. Matud ni Mayor Siasico nga gawas sa probinsya nga milugway ug tabang sa paghiling ug paghatag sa gikinahanglang tambal ngadto sa mga positibo sa Capillariasis mihatag usab sa iyang ayuda si 2nd District Congressman Rosendo “Dodoy” Labadlabad. (The New Nandau, Vol. XVII No.21)

*

 

Major committees sa SB-Roxas gi-kudeta sa oposisyon

Gihimolbolan ug gihukasan sa ilang kaakohan ang mga konsehal nga kaalyado sa administrasyon sa lungsod sa Roxas sa dihang ang oposition block mihimog kudeta aron ilogon ang mga major committees atol sa ilang regular session niadtung Lunes. Pinangunahan ni Presiding Officer-Vice Mayor Cyrus “Boy” Agatep, giilog sa oposition councilors ang mga dagkong komitiba nga maoy gihuptan sa administration councilors human kini gilupig sa gidaghanon sa boto.

Ang mga major committees nga gilangkat sa oposisyon gikan sa paghupot sa kaalyado sa adminis-trasyon mao ang Committee on Appropriation and Finan-ce, Committee on Laws, Committee on Agriculture, Committee on Police, Com-mittee on Education, Com-mittee on Health ug uban pa. Angay masayran sa miaging Mayo 14 eleksiyon nagkuyog sila si Vice Mayor Boy Agatep ug Mayor Carlito Feras apan takulahaw nabugto ang ilang panag-alyansa human mabikil sa piniliay sa Sangguniang Kabataan atubangan sa managlahi nilang gisuportahan.

Sa pag-asumer sa bag-ong set-up sa Sanguniang Bayan, tulo lamang ang mga konsehal nga nagagikan sa oposisyon nga kaalyado sa APP, kini sila mao si SB Members Leonor Alberto, Edgar Ceriales ug Jojo Villaester, tulo sa independent nga sila si SB Members Roselyn Narzabal, Helen Laput-Bruce ug Reden Pialago samtang duha nagagikan sa administrasyon nga sila si SB Members Jhony Mondol ug Saneber “Emong” Feras. Apan sila si Narzabal ug Bruce mi-aksiyon ug sapiid sa administrasyon dungagan pa sa duha ka mga ex-officio members sa ABC ug SK hinungdan nga nahimo silang majority.

Apan sa miaging semana, sila si Konsehal Reden Pialago ug SK Federation President Ina Cabiara misurender kang Governor Lando Yebes ug nagpasilong sa APP hinungdan nga nahimo nang lima ang oposition block nga maoy nakapahimong majority sa gidaghanon tungod kay matud pa, si Konsehal Bruce nagpa-ilin-ilin lamang kini sa pikas ug pikas. Si Agatep nga opisyal nang mibulag sa administrasyon ang mitipon na usab sa oposisyon.

Gumikan kay majority na ang oposition block sa Sangguniang Bayan, kagahapon atol sa ilang regular session, si Vice Mayor Agatep ang mikanaog kini isip presiding officer aron maoy manguna sa kudeta para hukasan ang tanang konsehal sa administrasyon nga maoy nagkubot ug mga dagkong komitiba. Ang lima sa administrasyon nahimo nalang tulo ka boto kay mikanaog man si Agatep ug mitudlo kang Konsehal Narzabal isip hulip kaniya nga mo-preside.

Si Agatep ang mi-deliver sa iyang privilige speech nga nagtumbok sa karapalan nga pagbaligya ni Mayor Carling Feras sa lungsod sa Roxas pinaagi sa minilyon nga loan sa bangko gamit ang iyang kaalyado sa Sangguniang Bayan hinungdan matud niya, alang sa interes sa publiko, kini ang miduso ug resolusyon pagdeklarar nga i-bakante ang tanang standing committees ug ihatag kaniya ang otoredad ug pagbuot kinsa ang iyang itudlo nga mokupot sa nagkadaiyang komitiba. Matud pa ni Konsehal Villaester, wala makabantay ang administrasyon nga maoy ilang pagabuhaton hinungdan nga wala kini makalihok. Sa dihang giduso ang maong resolusyon, gisulayan unta pagbabag sa administrasyon pinaagi sa ilang pagpakig-lantugi apan wala silay mahimo gumikan kay gamay nalang sila samtang si Konsehal Bruce wala mi-segunda sa ilang pagsupak. (The New Nandau, Vol. XVII No.21)

*

 

Yebes sa mga scouters: Ayaw kalimti ang inyong gigikanan

“ANG taong hindi lumilingon sa pinangalingan ay hindi makakarating sa paroroonan” (Ang tawo nga dili molantaw sa iyang gigikanan ang dili makaabot sa iyang padulngan). Kini maoy mensahe nga mainitong gipaambit ni Governor Rolando Yebes dala ang pagpahinumdom ngadto sa tanang mga boy scouts nga misalmot sa gipahigayon nga Western Mindanao Regional Jamboree didto sa Tubod, Lanao del Norte sa miaging semana.

Si Governor Yebes nga maoy elected Regional Chairman sa Boy Scout ang namahayag nga dili gayud hikalimtan sa mga scouters ang ilang gigikanan. Maabot ang panahon nga ang uban kanila ang mahimong mga elected officials sama sa gobernador sa probinsiya ug presidente sa nasud, dili angayang hikalimtan ug ibutang sa kasing-kasing nga ang Boy Scout of the Philippines ang maoy naghatag ug moral ug disiplina sa matag kaugalingon.

Ang tawo nga dili molantaw sa iyang gigikanan ang dili makaabot sa iyang padulngan,” mensahe nga mainitong gipaambit ni Governor Rolando Yebes dala ang pagpahinumdom ngadto sa tanang mga boy scouts nga misalmot sa gipahigayon nga Western Mindanao Regional Jamboree didto sa Tubod, Lanao del Norte

Iya usab nga gipasalamatan ang matag ginikanan nga mainitong misuporta sa jamboree pinaagi sa pagtugot sa ilang anak nga mosalmot sa maong kalihukan. Iyang gipaambit ang iyang kasinatian kaniadto sa jamboree nga daghan siyang nakat-unan nga maoy nag-umol kaniya kung unsa ang iyang kahimtang karon. Gipahibalo sa gobernador nga sa sunod nga jamboree dinhi sa Zamboanga del Norte kini ipahigayon. Iyang gipasalig nga iyang himoon ang tanan alang sa maong katuyuan.

Gikalipay ug dakong garbo sa gobernador nga iyang na-atubang ang tanang mga misalmot sa maong jamboree nga gilangkuban sa mga boy scouts nga gikan sa Ozamis, Zamboanga City, Iligan, Marawi, Pagadian ug ZANDIDAP (Zamboanga del Norte-Dipolog-Dapitan) boy scout council. Bisan sa kaapeke sa oras sa mga opisyal nga lakaw sa gobernador migahin gayud kini ug panahon aron makasaksi sa maong kalihukan. Gikan sa Manila via Cagayan De Oro City, si Governor Yebes ang midaritso kini sa Tubod, Lanao Del Norte nga didto gipahigayon ang 5th Western Mindanao Regional Jamboree.

Sa karon ang Western Mindanao Boy Scout Council ang anaa na kini sa ika-upat nga puwesto sa tibook pilipinas ug gipanghinaot ni Governor Yebes nga mamahimo kining numero uno sa tibook nasud. Samtang si Governor Yebes ang atua kini sa Tubod, Lanao Del Norte dali kining mimando ngadto sa Provincial Disaster Coordinating Council pinaagi kang Engr. Dennis Tenorio ug sa Provincial Social Welfare and Development Office sa paghatag ug ayuda, bugas ug pagkaon ngadto sa mga apektadong residente dinhi sa dakbayan sa Dipolog kansang panimalay ang gipangbanlas sa mga dagkong balod. Kini human niya madawat ang report kabahin sa maong hitabo. (Mindanao Star, Vol.III No.44)

*

 

Provincial Convention of Daycare Workers gipahigayon!

Mokabat sa 500 ka mga partisipanti ang mi salmot sa gipahigayong Prvincial Convention of Daycare Workers kagahapon, Disyember 4. didto sa Plenary Hall, ZN Convention & Exhibition Center.

Ang maong kalihokan ang gipasiugdahan kini sa kagamhanang probinsyal pinaagi sa Provincial Social Welfare and Development Officers of the Philippines, Inc. ug sa Federation of Daycare Workers Association ning lalawigan.

Ang mga partisipante ang gilangkuban kini sa mga daycare workers gikan  sa 25 ka mga lungsod ug duha ka syudad diin sila ang gihatagan gayud ug pagtagad sa kagamhanang probinsyal pinaagi ni Gov. Rolando Yebes pinaagi sa mga paghatag sa ginagmay nga honorarium ug uban pang mga benepisyo.

Atol sa maong kalihokan si Mr. Florentino Daarol, maoy representante ni Gov. Yebes. Siya namahayag nga ang tabang nga gitunol karon sa gobernador sa mga daycare workers ang ipadayon kini sa kagamhanang probinsyal ug bout pa kini nga dugangan kung adunay pundo nga pagakuhaan sa umaabot nga panahon.

Sa kabahin usab ni Ms. Sabal, wala siya maglisod sa pag-implementar sa programa karon sa iyang buhatan tungod kay si Gov.Yebes ang wala kini magmakuli sa iyang suporta sa tanang mga programa sa PSWDO.

Ang mga daycare workers ang nagpakadawat usab ug mga nagkalain-laing mga libro alang sa mga kabataan.

Ang PSWDO ang midapat usab ug mga resource speakers alang sa mga lectures lakip na niini ang pagpasabot sa programang Bright Child diin ang  mga daycare workers ang adunay dakong papel niini sa pag-agak sa mga kabataan aron mahimo kining bright child pinaagi sa ilang kinasing-kasing nga pagtudlo sa mga kabataan.

Ang federation sa daycare workers ang mipahigayon usab ud pagpili sa ilang mga bag-ong mga opisyales alang na sa tuig 2008.

Gitak-op ang maong kalihokan kagabii pinaagi sa usa ka Fellowship Night ug Search for Instant Mutya ng Daycare Worker 2007. (Sam Buddy, ZaNorte PIC/NBN-11)

*

 
Mga SK chairman wala na makauli, mga ginikanan nagpatabang sa PNP
Roxas nabulabog!

NAGKAGULIYANG kagahapon ang mga ginikanan sa lungsod sa Roxas ning atong lalawigan sa Zamboanga del Norte tungod sa ilang gibating kabalaka nga tulo na ka adlaw ang ilang mga anak nga SK Chairman ang wala na makauli sa ilang panimalay.

Kagabii, naatlan sa mga miyembro sa ZNUC ang usa ka magti-ayon nga nangayo ug tabang sa atong kapolisan. Sila si Erlinda ug Bernardo Malandia ang nag-alipasa nga anaa ang tumang kabalaka ang midangop sa kapolisan ning dakbayan tungod kay ang ilang anak nga SK chairman sa barangay Moliton sa lungsod sa Roxas ang wala na makauli tulo na ka adlaw.

Matod pa ni Bernardo Malandia nga ang ilang anak ang gikuha sa usa ka Emong Feras tungod kay patambongon kini sa seminar. Gumikan niini misugot ra usab silang magtiayon tungod sa pagtuo nga makauli ra ang ilang anak pagka-ugma. Apan hangtud kagahapon magtulo na ka adlaw wala pa maka-uli ang ilang anak, busa nabalaka na pag-ayo ang maong magtiayon kung unsa nay kahimtang sa ilang anak nga SK chairman. Sa dihang ilang nahibaw-an nga matod pa gitapigan ang ilang anak nga anaa sa usa ka travelers in subay sa dalan Tomas Claudio nakadesisyon sila kagabii nga ilang e-rescue hinungdan nga nangayo kini ug tabang sa atong kapolisan.

Mga alas 10 pasado ang takna kagabii, uban sa mga miyembro sa Dipolog PNP nabulabog ang maong travelers In sa dihang nakompermar nga anaa ang anak sa magtiayong Malandia. Wala magdugay kalit nga mibutho si SB member Emong Feras ang igsoon ni Mayor Carlito Feras. Gipaningkamutan sa mga miyembro sa ZNUC nga mahinabi si Feras apan kini ang masuk-anon nga mi-atubang tungod sa iyang rason nga matod pa sila ra sa ginikanan sa SK Chairman ang mag-istorya. Gipangitaan pa ug warrant of arrest ang mga miyembro sa ZNUC.

Gawas sa magtiayong Malandia, didto usab ang laing ayaan sa usa ka SK chairman sa lungsod sa roxas nga apil ang ilang pag-umangkon nga matod pa gitaguan. Nasayran nga ang maong mga SK chairman nga anaa gitapok sa FSA travelers In sa festival shopping arcade 3 ang wala na kini makatungha sulod sa tulo ka adlaw ug mismo ang ilang mga magtutudlo ang nahibulong usab nga tulo na ka adlaw silang absent.  Usa sa nanag-iya sa FSA travelers In mao si kanhi Governor Isagani Amatong nga maoy kaalyado usab ni Mayor Feras sa Roxas. (Mindanao Star, Vol.III No.44)

 
 

 HULAGWAY BALITA

 

 

*

 

City Hall misanong nga MOHATAG AREA clearance, ECC
sa pagkuha ug balas ug graba sa Kapitolyo

Gikasabutan karon sa kagamhanang lokal sa Dipolog ug kagamhanang probinsyal na kinahanglan makumpleto ang area clearance ug environmental compliance certificate kon ECC sa aplikasyon sa NIA alang na sa pag-angkon sa gratuitous permit gikan sa kagamhanang probinsyal aron makuha sa kagamhanang lokal sa Dipolog ang balas ug graba  nga nakabara sa duha ka water dams sa Layawan River.

Mao kini ang nakab-ot nga desisyon sa duha ka local government units atul sa panagtigum sa hapon nga gipahigayon sa buhatan sa National Irrigation Administration kon NIA uban ni NIA OIC Provincial Irrigation Officer Engr Bonifacio Judilla, Provincial Irrigation Officer Engr. Fabius Ramayrat, Irrigators Association President Martin Pulmaran, ug Mr. Ildefonso Jimenez, ang presidente sa Dipolog Polanco Irrigators Association, Inc.

Ang kagahamhanag probinsyal nga gi-representahan ni Provincial Attorney Jes Gal Sarmiento Jr., ug Mr. Remelo Damuag sa Preovincial Environment and Development Office kon PEDO ang nagkanayon nga ipakumpleto ang maong mga rekisitos sa dili pa nila makuha ang maong permit.  Samtang ang dakbayan sa Dipolog gi-representahan kini ni Vice Mayor Senen Angeles, City Legal Officer Cyril Ruiz ug City Engineer Nedilla Magdayao ang misanong usab sa gimando sa probinsya ug mipasalig nga ilang makumpleto ang maong mga rekisitos nga kinahanglan sa probinsya.

Kahibaloan nga niadtong Setyembre 11, niining tuiga, ang LASILELA Irrigators Association Inc., ang miduso ug resolusyon nga nag-awhag sa kagahamhanang lokal sa Dipolog pinaagi ni Mayor Evelyn Uy sa pagkuha sa balas ug graba nga nakabara sa maong water dams nga anaa nahimutang sa Dapdap, lungsod sa Polanco diin maoy hinungdan sa paghinay sa supply sa tubig alang na sa mga mag-uuma sa lungsod sa Polanco.

Sanglit walay igong pundo ang NIA alang niini, si Engr. Judilla ang mihangyo kini sa probinsya sa pagtugot sa Dipolog sa pagkuha sa maong mga balas ug graba diin ilang magamit usab kini alang sa mga proyekto nga ilang ipatuman. Gituhuan ni Provincial Atty. Jes Gal Sarmiento Jr., nga dili na interesado ang dakbayan sa Dipolog sa pagkuha sa balas ug graba sa duha ka water dams sa lungsod sa Polanco tungod kay wala kini miduso sa kinahanglan nga mga rekisitos alang niini human nila giduso ang government gratuitous permit application sa NIA aron sa pagkuha sa 45,000 cubic meters sa balas ug graba.

Mao kini ang gipadayag ni Atty. Sarmiento atul sa gihimong panagtigum tali na sa dakbayan sa Dipolog ug sa probinsya. Si Vice Mayor Senen Angeles ang mipasabot nga interesado gihapon sila sa maong lakang apan ila usab gihuna-huna nga ikumpleto una ang maong mga rekisitos tungod kay gawas sa makadaginot sila, dekalidad usab ang matang sa maong mga balas ug graba. Niini, mitumaw na dayon ang isyu sa occupancy permit sa Zanorte Medical Center nga hangtud karon wala pa gihatag sa dakbayan sa Dipolog unta dili buot iapil ni Vice Mayor Angeles tungod kay lahi ang gihisgutan sa maong meeting kagahapon.

Apan si Atty. Sarmiento namahayag nga dili malikayan ang sentimento sa kapitolyo nga gi-ipit ug maayo sa city hall mahitungod sa occupancy permit sa Zanorte Medical Center tungod kay bisan pa man gituman na sa Metropolis Construction Inc. ang mga rekisitos nga ilang gipangayo, gilisud-lisud gihapon sila. (Mindanao Star, Vol.III No.44)

*

 

Pulso Sa Katilingban
Cicer M. Binghay
Asa na. . . ang dalunggan ug mata!

“In 2004, we had a roadmap. Today, we have results. More importantly Dapitan again has the confidence to dream big dreams”. Xxx “We shall always remember that the very key to our success has been our ability to preserve our values by making change work for us rather than against us”.

 Dili malalis ang dakbayan sa Dapitan usa na ka malamboong dapit sa  lalawigan sukad makalingkod ang mga Jalosjos. Kaha nagpabilin hangtod niining tungora ang pagka antiquited o ang dagway sa kanhiay nga nagpabiling tal dapitanon apan inanay nga misal-ot pagtigbabaw ang pag moderno sa tanang mga kalihokan nga nasuyop gumikan sa daghang mga pag-uswag sa panginabuhi sa katawhan ilabi na diha sa torismo.

Namatikdan na sa nagkalain-laing dumudoong sa nasod ang maong mga manindot talan-awon nga giubanan sa pagka malinawon sa palibot. Dili mahitabo nga ang makabisitag Dakak Beach Resort dili makahapit sa Dapitan pagtultol sa pagka Shrine City niini sa tibook nasod.

 Ang dakong accomplishment nakapa usab sa Dapitan karon kanang daghang prohekto nga nakapauswag sa kanhi ug karon Dapitan Boulevard. Pagtukod sa daghang mga Beach Resort nga naglaray sa maong Boulevard. Ang daghang gitukod stablisamento daplin sa baybayon. Mao baya nga giawhag hingusog ni Mayor Dominador Jalosjos ang katawhan.: “I ask all Dapitanons to support our projects and help keep our heritage in faithful preservation so that the generations of the 21st century can see for themselves the images and works that are the old and continuing glory of Dapitan that has continued to rise through every challenge, a people who have always come together and found wisdom and strength to widen the circle opportunity”.

Mao gayod ang gikinahanglan sa katawhan gikan sa atong namunoan nga kon unsay mga prohekto nga gikinahanglan alang sa kalamboan sa katawhan nga makatabang sa ilang mga panginabuhi kinahanglan ihatag. Nga kon dunay kahigayonan paninguhaon pag una ang gikinahanglan sa lungsod ug lungsoranon…dili ang pagbutirik sa kaugalingon. Gamiton ang kahigayonan nga ikatababang kanato. Nga dili hulaton ang ugma…dili unahon ang kaugalingon pamawi sa gastos sa piniliay. Unahon ang paghatag sa gitakdang mga serbisyo ug mga bulohaton for public interest.

Sama kang Gov. Yebes nahibalo nga mahinungdanon kaayo nga bulohaton kon unahon ang gikinahanglan sa lungsod nga iyang silbihan. Dili siya makahulat sa ugma. Gusto niya ang karon maoy hingpit tulomanon sa usa ka mapiling mamunoan sa lungsod. Kay kang Yebes ang ugma dili garantiya nga dunay laing kahigayonan nga makatabang siya sa nagkinahanglang katawhan. Hibalo siya nga circumstances change. Ang tawo mamatay o napili ka karon…nga ugma walay garantiya nga malungtad gihapon nga ikaw mapili pagka gobernador kon biyaan nimo ang responsibilidad alang sa tanan kay giuna ang kaugalingon.

Apan bisan unsaon, dili na matabang nga ang mga napili gumikan sa salapi magpangita gyod bugti sa gastos. Bisan diha sa mga opisyales sa barangay nga nangapili…ilang gipangagpas karon mao ang daghang mga kahigayonan nga makapatuyang sila sa ilang magkalain-laing patigayon. Gihimo ang katungdanan opisyal pribadong lisensiya paghimog pagpa butirik sa kaugalingon. Ilabi na niining panahona nga namingaw pa sa tirana nga wala na magpatim-aw, magpakitag kalihokan ang taga Commission on Audit ning atong dakbayan ug gani hangtod tibook lalawigan. Hain kaha ang atong mga eyes and ears sa kagamhanan ianod, niining daghang anomaliya pangawkaw sa salapi sa kagamhanan. (Press Freedom, Vol. XX No. 7)

 
Credits: Press Freedom is published every Saturday and entered as 3rd class mail matter in Dipolog City. Printed by Young Printing Press with Editorial Office located at Upper Turno, Dipolog City. Tel. No. (065) 212-4343 or 212-6665

 

 

Good day Philippines and Hello ZaNorte! 22 days before Christmas!!!! Christmas carols are heard everywhere!!! We can see girls and boys selling lanterns on the streets. Others are singing Christmas carols even they don’t memorize the lyrics of the song. So funny that we hear these lines.“JINGGOM BELS, JINGGOM BELS, JINGGOM ALL THE WE” Ms. Blayn Item is coming to town!

Ø Ano ba itetch? Mga job order employees under ni Mr. D. naay mga chuva-chuva ek-ek? Hala oi.. Kainan na yan!!! Ms. Wah stop na ha? Ayaw ko palagota!

Ø What happen now to Galas Feeder Port? It is very clear that the city government of Dipolog is wasting millions of peoples’ money. Ohh yeah! If I where you, STOP it na. Hindi kayo si LASTIKMAN aron mapugngan ninyo ang dagkong BALOD. Open sea lage na diha!!! Understand?

Ø After Gov. Lando has received the Presidential Award of Recognition given by the committee on awards from the Philippine Hospital Association, Mr. HUBOGS IMPERADOR bombarded negative criticisms against the governor. Kay ngano, nasuya na pod ka kay ikaw mismo wala sukad makadawat ug award bisan Outstanding Barangay Tanod sa imong barangay? Bwahahahaha. Ka klaro ana, nga deserving sad si LANDO modawat kay daghan siyang nahimo sa probinsya. Ayuha ug paminsar dodong!!

Ø What happen to the Moyo, Siayan outbreak? Sige man unta ug pahimangno ang IPHO sa mga katawhan nga dili ipa-kilaw ang mga isda sa kasubaan. This issue is very alarming!!! I think, IPHO has taken actions and solutions on this matter.

Ø The issue on Certificate of Occupancy still unsolved? Ano ba ito? What’s wrong ba ateh? ZaNorteans keep on asking when is the operation of the ZN Medical Center. I know that the provincial government doesn’t want to delay the services for the constituents of this province, pero naa man gud poy mga SWAPANG sa syudad nga dili kabalo molantaw ug kaayuhan sa katawhan. DiVa tama ako sister?

Ø The regular and casual employees of the provincial government are so appreciative to the good Governor. Kay? Nakadawat namu ug bonus? Hehehe. Pasalamat mo no nga OK si Lando. WOW. Pinaskuhan nako bi. Ang mga empleyado kaha sa syudad, nanghatag ba kaha si Madam? Kung mayaman lang ako, ako nalang unta hatag ninyo ug bonus. Jejejejejejejejejejejejejeje.

Ø According to my BUTTERFLY AGENT taray pod daw ni si Dr. N? Ayyy, juice ko, biasong juice!!!! Gikapoy na ko anang taga ospital!! I will just pray over these docs to be GOOD. The acting Hospital Admin will take actions on these undying ISSUES. It’s time to decide.

Ø I just want to greet Happy Birthday to my friend JAY ANDERSON of San Francisco who’s having his vacation for a week here in ZaNorte. Lingawa namu ug suroy-suroy sa mga tourist destinations nganhi oi. Gravehhh.

Ø Pagka-DAKO biya sa nahimong damage sa bagyong Mina no? Thanks to the ZN Provincial Disaster Coordinating Council for the actions you have taken. Let’s join hands together to help and offer donations for the victims.

Ø Magpa-hilot sa kos akong likod kay na-slide ko pag-visit namo sa LIBUTON CAVE last Friday. Arayyyyyyyyy. Hinay-hinay lang mother!!! I’ll see you around. Sige BYE.! (Mindanao Star, Vol.III No.44)

 
Credits: Mindanao Star is published once a week and is circulated to the 25 Municipalites and 2 Cities of the province of Zamboanga del Norte. Mindanao Star Editorial Office: #096 C.M. Montaño Building, Gen. Luna Street, Dipolog City; Phone/Fax No. (065) 212-2576; Email: mindanaostar@zamboangadelnorte.com

*

MORE NEWS NGA BINISAYA

 

 

NOTE: SEND US YOUR NEWS.  Tell us what's going on in your barangays, clubs, schools, businesses and non profit organization. You can also send notices and announcements.
          

 

    Email to webmaster@dipolognon.com

      
Google
WEB THE DAILY DIPOLOGNON