November 29, 2008

 

Babaye ra ang hinungdan!
6 RADIO PERSONALITY GIKIHA

Gumikan sa personal nga away sa usa ka babaye nga nayagyag sa kahanginan, unom ka mga personalidad sa radio ang nag-atubang ug kasong sibil nga mao ang Damages with Application for TRO and Writ of Preliminary Injunction nga gipasaka ni Atty. Kenneth P. Rosal batok sa upat ka announcer ug duha ka station managers sa DXFL-FM ug RPN-DXKD-AM.

Ang mga defendants sa sumbong mao sila si Mr. Franklin Lim, tag-iya ug tagdumala sa DXFL-FM, Mr. Nonoy Sabolboro, program host sa “Weather-Weather lang”, Mr. Japhet Fernandez, program host sa “Budyong”, Board Member Edionar Zamoras, program host sa “Kasayuran”, tanan sa DXFL-FM; Mr. Romeo Sangcap, station manager sa RPN-DXKD ug Mr. Joseph Herrera, program host sa “Slum Dunk” sa DXKD.

Gumikan sa personal nga away sa usa ka babaye nga nayagyag sa kahanginan, unom ka mga personalidad sa radio ang nag-atubang ug kasong sibil nga mao ang Damages with Application for TRO and Writ of Preliminary Injunction nga gipasaka ni Atty. Kenneth P. Rosal batok sa upat ka announcer ug duha ka station managers sa DXFL-FM ug RPN-DXKD-AM.

Ang maong asunto nagsumikad sa dili maayong mga polong nga gibuhian ni Joseph Herrera sa iyang programa sa radio sa DXKD ug sa iyang pagsalmot sa mga programa sa DXFL-FM batok na ni Atty. Kenneth Rosal.

Naamong sa maong kaso ang mga personalidad sa DXFL-FM gumikan kay mismo si Herrera mao man ang miadto sa programa nila ni Sabolboro, Fernandez ug Zamoras nga mipahungaw sa iyang kapongot, kalagot ug ka-aligotgot tungod sa ilang personal nga away ni Rosal gumikan usa ka babaye nga matud pa, nalambigit sa relasyon kani-adto ni Herrera ug karon na-uyab usab ni Rosal.

Ang mga polong nga pagdaut personal nga gibuhian ni Herrera diha sa kahanginan batok kang Rosal maoy nakapatukmod sa naulahe sa gipasaka niining sumbong.

Matud ni Atty. Rosal, naapil ang mga program host ug sa duha ka mga radio station managers gumikan kay gipasagdahan lamang si Herrera nga makapagawas ug maot nga mga polong pagdaut batok kaniya diha sa kahanginan.

Si Atty. Rosal nangayo sa mga defendants ug damages nga mokabat tanan sa P550,000.00. (The New Nandau, Vol. XVIII No.17)

*

 

Driver tulis sa LBC nadakpan

Alas tres sa kahapunon dihang nahitabo ang tulis sa buhatan sa LBC Express sa may dalan Gen. Luna ning dakbayan kaniadtong Nobyembre 21 adlawng Biyernes.

Ang imbestigasyon sa kapolisan ning dakbayan, nahibal-an nga upat ka tao ang mihimo sa maong tulis.

Mokabat sa P100,000.00 ka pesos ang nadala sa mga tulisan gikan sa buhatan sa LBC, lakip na niini ang mga kawani ug mga customers nga naatlan sa maong hitabo. Gilakip pa pagkuha sa mga suspetsado ang mga cellphone sa mga customers ug mga kawani.

Matud pa sa kapolisan ang mga suspetsado ang mga suspetsado nagpakaarun-ingnon nga mga customers aron makasulod sa buhatan sa LBC.  Nangutana pa sila kon asa sila mifill-up sa forma kon sila mopadala ug kwarta.

Mga disente usab kini sila kon lantawon, mga adunahan ang porma, mao nga dili gyod mailhan nga mga tulisan.

Sumala pa sa imbestigasyon sa kapolisan ning dakbayan, daghan ang customers sa maong buhatan sa dihang nakasulod ang mga suspetsado. Gihulat nila nga mogamay na lang customer ayha pa sila mokasiyon.

Dihang upat na lamang ka buok ang customers sa maong buhatan nakakitag higayon, misulod dayon sa counter ang usa ka duspetsado, dungan sa pagdeklarar sa usa ka tulis samtang nagtion kini sa iyang armas ngadto sa mga kawani.

Gipahilum ug gipaduko sa mga suspetsado ang upat ka mga customers ug lakip na ang walo ka mga kawani sa maong buhatan sa LBC.

Ang mga tulisan abtik kining milihok sa pagpanguha sa salaping cash niadtong adlawa, ug hanas kaayo kning nanultol kon asa ang nahimutangan sa mga salapi.

Gipaablihan unta ang vault sa maong guhatan, apan pakyas kini kay ang tanang kawani milimod nga sala sila masayon kon asa gibutang ang yawe sa maong vault.

Nagmalapuson ang maong tulis, ug nahitabo ang ginukdanay tali sa kapolisan ug mga tulisan human mitaho sa buhatan sa kapolisan ang kawani sa maong buhatan.

Sa nahitabong ginukdanay tali sa mga kapolisan ug mga tulisan nadakpan ang usa ka Gregie Tabanao, 26 anyos taga Bliss Project, (Barangay Lawis), Dakbayan sa Ozamiz.

Ang nangulo sa maong operasyon mao si Chief Gervacio Balmaceda sa PNP dipolog ug gilangkoban usab kini nila ni PI Ajerico Bocar, PI Victoriano De Castro, SPO4 Elizer Zamoras ug ubang sakop sa kapolisan ning dakbayan. (Press Freedom, Vol. XXI No.4)

*

 

GSIS-Dipolog wala na makahatag tukmang serbisyo sa mga mIYembro

Wala na kaayo’y tawo o kliyente nga makita sa Sub-Regional Office sa Government Service Insurance System kung GSIS dinhi sa dakbayan sa Dipolog. Tagsa na lang ang magtikaw-tikaw ug mingaw na ang nasangpit nga buhatan dili parehas sa unang panahon nga nagsugwak sa maong buhatan sa iyang mga miyembro gumikan sa kadaghan nga mo apply ug loan ug ubang transaksiyon.

Mao kini ang obserbasyon nga gipahayag sa pipila ka miyembro sa GSIS nga moadto sa maong buhatan aron manginsayod kung mahimo na ba silang mo-apply ug salary policy o dili ba consolidated loan sa nasangpit nga buhatan.

Apan kadaghanan kanila ang napalaw tungod kay sagad nga tubag sa computer machines mao man nga nagpadayon pa kini sa pag-upgrade sa ilang sistema hinungdan nga dili pa kini makatubag sa panginahanglan sa mga miyembro.

Ang maong computer system hinoon mangayo usab ug dispensa sama sa pag-ingon nga “sorry for the inconvenience.”

Sa iyang kabahin, si Miss Cherry Ann Gonzales, Information Division Chief sa GSIS ang ming-awhag sa tanang mga GSIS members nga dili lamang mawad-an ug paglaom tungod kay gihimo na ang tanan sa ilang Manila office aron matapos na ang maong systems upgrading ug pagposting sa mga records sa minilyon ka mga miyembro niini sa tibook nasud.

Gituhuan ni Gonzales nga sa dili madugay matapos na ang maong trabaho aron nga ang mga GSIS members dinhi makapahimus na usab sa ilang mga benepisyo.

Gipasabot ni Gonzales nga sila mismo sa maong buhatan busy kaayo sa ilang gisangon nga gimbuhaton aron nga makompleto ang tanang gikinahanglan sa ilang Manila Office.

Wala magtoo si Gonzales sa gipakatay nga taho nga bangkaruta na ang GSIS o wala na kini’y kuwarta gumikan sa mga palpak nga Investment nga gihimo niini sa mga negosyo sa nasud ug ingon man ilabina sa gawas sa nasud.

Gitohuan ni Gonzales nga ang GSIS makatubag pa gihapon sa mga gikinahanglan benefits sa iyang mga miyembro sa umaabot nga mga adlaw.

Iyang gi-awhag ang mga GSIS members dinhi nga gustong magpahimus sa nagkalain-laing loaning program sa pagbalik-balik lamang sa nasangpit nga buhatan hangtod nga sila matubag sa ilang mga tuyo.

Angayang mahibaw-an nga ang GSIS Office dinhi sa dakbayan sa Dipolog nagserbisyo sa iyang mga miyembro dili lamang ang mga taga Zamboanga del Norte kung dili hangtod usab sa Misamis Occidental.

Naobserbahan nga modol-an na karon sa usa ka tuig nga nag sige gihapon sa iyang system upgrading ang nasangpit nga buhatan sa GSIS hinungdan nga taod-taod na usab ang pagpaabot sa iyang mga miyembro kung kanus-a kini maka-lugway sa iyag hustong serbisyo ilabina na sa loaning program. (Mar Uy, The New Nandau, Vol. XVIII No.17)

*

 
DOLE mi-alarma illegal recruiter

Aron dili mahimong makawang ang mga paningkamot ug pangandoy para niadtong manimpalad nga moadto sa abroad. Subli nga gipahimatngonan sa Department of Labor and Employment kun DOLE ang publiko dili magpasagad ug magpadala dayon sa mga nagsuroysoroy nga recruiter nga mangdani ug mangampanya sa ilang biktimahon aron pasaligan palargahon sa abroad.

Kini ang kusganong pahinumdom sa buhatan sa DOLE pinaagi ni mrs. Judith Benedicto ang Labor Officer 3 isip reaksyon may kalabot sa nabalita sayo ning simanaha nga nangabiktima sa illegal recruiter.

Si mrs. Benedicto nag-awhag sa katawhan nga dili gayod magpataka ug sulod ug magpadani sa mga recruiter kun dili mo-agi sa ilang buhatan aron malikayan ang unsa man nga problema nga mahinagbo ka yang mahimong biktima imbis mangyawat nga dali ra nga makasulod sa sayon nga pamaagi masulod na hino-on sa la-ang sa problema ang mahimong sampotan niini. matod pa nga kasagaran mahimong biktima niining maong mga  illegal recruiter makahatag na ug salapi sa nag-recruit kanila tungod sa mga pasalig ug maayong opportunidad nga ihanyag ngadto sa ilang mahimong biktima nga nangandoy usab nga maka-adto sa abroad. Ang makapait niini kay kasagaran sa mahimong biktima gibaligya o kaha gi-prenda ang ilang kabtangan aron lang makab-ot ang ilang tinguha nga makagawas ug makapanarbaho gawas sa nasud tungod sa kalisod karon sa panginabuhi ug panarbaho dinhi.

Ang maong pmahayag giluwatan sa buhatan DOLE tapos migawas sa balita nga adunay  siyam ka mga biktima nagreklamo ug midangop sa kapolisan human ma-recruit ug makahatag ug kwarta nga tag- P38,000.00 mil ka pesos para paglarga sa abroad ug sa pagahimo-on nga training nga mahitabo. Apan nadiskobre sa mga biktima human sila masurikbot sa gikaaligar nga illegal recruiter giilang si Teresita R. Misaki alias Teresita M. Rodas taga dakbayan sa Dapitan, wala na nila igkita pa ug sa ilang pagsubay wala kini pagtugot sa lokal nga buhatan sa DOLE nga makapang-recruit dinhi sa atong dapit. Gawas niini ang gipasi-atab sa gika-ingong recruiter nga ilang opisina sa may 2nd floor sa Top Pension sa dalan Malvar corner Quezon Ave. nasuta nga giserad-an na ug missing na usab ang maong recruiter.

Ang siyam ka mga biktima illegal nga na-recruit kaniadtong bulan sa oktobre ning tuiga ug nadiskobrihan na lamang sa mga biktima sa dihang mo-undergo na unta kini sa usa ka French Language training nga himo-on sa gikaaligar nga opisina nahimotang sa may Top Pension ning dakbayan. Aron ayha kini palargahon sa abroad. Matod ni mrs. Benedicto kun ang usa ka recruitment Agency nga dili mo-agi sa ilang buhatan ug walay pagtugot sa buhatan sa DOLE ingon man sa POEA  kini usa gyud ka illegal kay walay may bisan kinsa nga recruitment Agency nga gitugutan nga makapang-recruit kun dili mo-agi gayud sa ilang opisina kay nagbase man kini kun unsa ang description sa Job Hiring nga ilang gi-aplayan ayha kini makapangita ug trabahante dinhi sa atong dapit.

Gi-awhagan sa buhatan sa DOLE ang kawtahan nga adunay laraw nga panimpalad sa pagpanarbaho sa abroad gikinahanglan nga mosusi sa ilang buhatan para dili mabiktima sa illegal recruiter. Hino-on kun ugaling adunay mga modangop sa ilang buhatan nga nahimong biktima sa illegal recruiter andam sila motabang pinaagi sa pag-ayuda sa National Bureau of Investigation kun NBI. (Southpoint, Vol.1No.45)

*

 

“It’s show time” for Adraincem

Panahon na para mopasundayag ang ZaNorte ug kinatibuk-ang Zamboanga Peninsula Region sa dakung potential niini sa industriya sa turismo.

Mao kini ang unang mga pahayag nga giluwatan ni Tourism Regional Director Elridge Adraincem human nanumpa kagahapon sa hapon atubangan ni Tourism Secretary Ace Durano nga gisaksihan nila ni Governor Rolando Yebes, Provincial Tourism Officer Atty. Ivan Patrick Ang, Provincial Attorney Jes Gal Sarmiento, Jr. ug mga kauban.

Si Director Adraincem gitudlo ni Presidente Gloria Macapagal-Arroyo sa pagka regional director sa tourism sa Zamboanga Peninsula Region niadtong Oktobre 20, 2008.

Sa Kapihan sa Hotel Camila 2 si Governor Yebes nagkanayon nga ang pagkatudlo ni Director Adraincem sa turismo sa atong reheyon makatabang gayud ug daku sa pagpadas-og sa dakung potential sa turismo sa ZaNorte ug sa atong reheyon sa kinatibuk-an.

Apan maoy gusto niya nga si Director Adraincem nga ang ilang buhatan sa turismo sa Dapitan City maoy himoong regional office ug ang buhatan niini sa dakbayan sa Zamboanga himoon na lamang satellite office.

Gipasalamatan usab ni Governor Yebes sila si Congresswoman Cely Jalosjos-Carreon ug Congressman Cesar Jalosjos sa ilang pagsuporta para matudlo gayud ni Presidente Arroyo si Adraincem pagka regional director sa DOT sa atong reheyon. (Press Freedom, Vol. XXI No.4)

 
 

R-IX adunay bag-ong tourism director

Si Eldrige Adraincem ang bag-ong natudlo nga bag-ong Tourism Director sa Regiona IX, nanumpa atubangan ni Department of Tourism (DOT) Secretary Ace Durano kaniadtong Nobyembre 18 didto mismo sa Malacañang Palace.

Lumad nga taga Dipolog si Adraincem ug kanhi manager sa bangko ug nahimo usab kini nga presidente sa Dipolog City Banker’s Club.

Si Eldrige Adraincem ang bag-ong natudlo nga bag-ong Tourism Director sa Regiona IX, nanumpa atubangan ni Department of Tourism (DOT) Secretary Ace Durano kaniadtong Nobyembre 18 didto mismo sa Malacañang Palace.

Kahinumdoman nga tungod sa iyang gihuptang katakos ug kwalipikasyon maoy hinungdan nga gipirmahan gayod mismo ni PGMA ang iyang appointment isip bag-ong Tourism Director sa Region IX.

Pinaagi unya sa bag-ong Tourism Director basin kon mapalambo pa unya ang nagkalambo nang daan nga turismo dinhi sa lalawigan. (Press Freedom, Vol. XXI No.4)

*

 

Sipulan Land Deal ipaimbestigar

Nanawagan karon ang gobernador sa ZaNorte ngadto sa Commission on Audit sa pagpahigayon sa ilang buwag nga imbestigasyon kabahin sa kwestyonabling Sipulan land deal kay mao kiniy tahas nila ang pagsuta sa nagkadaiyang transaksiyon sa gobyerno kon nahasubay ba sa gipatigbabaw nga balaod.

Kini ang nahimong reaksiyon ni Governor Rolando Yebes human mahibawo nga ang buhatan sa provincial auditor sa ZaNorte walay gihimong imbestigasyon kabahin sa nasangpit nga transaksiyonn nga nahitabo niadtong Hunyo 2003 atubangan sa klaro kaayong mga kalapasan sa balaod nga nahitabo panahon sa kanhi administrasyon.

Sa sayu pa sa dihang miatubang sa pagpanalipod sa ilang budget para sunod tuig si Provincial Auditor Mrs. Mryna Lubaton usa sa isyu nga gituki sa mga meyembro sa Sangguniang Panlalawigan mao ang kabahin sa transaksiyon sa pagpalit ug yuta sa probinsiya sa Barangay Don Jose Aguirre sa Manukan nga gitawag karon ug Sipulan land deal kay kon unsa nay aksiyon nga gibuhat sa COA atubangan sa klaro kaayong paglapas sa mga balaod sa nahisgutang transaksiyon nga nahitabo sa kanhi administrasyon.

Si Lubaton sa iyang giluwatang pahayag nagkanayon nga wala silay gihimong aksiyon sa nasangpit nga transaksiyon kay ilang gitugyan ngadto sa buhatan sa Provincial Attorney ang pag-imbestigar niini kay interesado ang probinsiya.

Matud pa niya sila sa COA ang ilang gitinguha nga mapatituluhan lang sa probinsiya ang maong yuta.

Si Lubaton miangkon nga wala na gani niya subaya kon ang nasundan niyang auditor aduna bay gihimong audit memorandum kabahin na sa nasangpit nga transaksiyon.

Gibutyag usab sa provincial auditor sa ZaNorte nga hangtud karon wala pa silay giisyu nga disallowance sa gihimong pagbayad sa probinsiya nga mokabat sa P1.8 milyones ka pesos ngadto sa yuta nga hangtud karon wala pa mabalhin sa probinsiya ang pangalan sa titulo.

Kini nagpaklaro lamang nga ang COA sa ZaNorte walay gihimong post audit sa nasangpit nga transaksiyon.

Sa sayu pa si Governor Yebes mipalanog sa iyang pagka dismaya sa kakuwang sa COA sa pagbuhat sa tukmang aksiyon ilabi na sa pag-imbestigar sa nasangpit nga transaksiyon kon kini nahasubay ba sigun sa gimbut-an sa atong balaod.

Sa interview kagahapon ni Governor Yebes sa Radyo Ronda-DXKD, kini mitataw nga sila sa probinsiya nagsalig sa COA nga maoy moimbestigar sa maong transaksiyon sanglit nahulog kini sa ilang hurisdiksiyon samtang ang probinsiya maningkamut usab nga makabatun na ug titulo ang maong yuta.

Matud pa sa gobernador kinahanglan imbestigahon gayud kini sa COA ka yang maong transaksiyon giliminan sa daghanang mga depekto nga wala gayud mosubay sa gimbut-an sa balaod.

Dili makatuo ang gobernador nga ang nasangpit nga transaksiyon sa kanhi administrasyon nga anomaloso wala imbestigaha sa COA samtang kada tuig magpagawas ang nasangpit nga buhatan ug mga findings sa ilang pag-audit kabahin sa nagkadaiyang transaksiyon sa gobyerno.

Gipasabot ni Governor Yebes nga ang gipahigayong imbestigasyon sa Provincial Attorney kabahin sa maong yuta lahi unta ang taga COA mopahigayon usab ug buwag nga imbestigasyon sama sa ilang gibuhat sa ubang mga transaksiyon sa gobyerno nga nakitang depektoso nga gibuhatan gayud nila ug report.

 Sa samang bahin gitataw sa gobernador nga ilawom sa iyang administrasyon wala mahitabo nga ang probinsiya mipalit ug yuta bisan wala pa mabalhin sa pangalan sa ZaNorte ang titulo niini.

Samtang gusto usab ni Governor Yebes nga lakip sa imbestigahon sa provincial auditor sa ZaNorte ang P5 milyones ka pesos nga abono kay ang pangalan sa kanhi gobernador nabutang sa talaan sa mga opisyal sa kagamhanan nga nagpakadawat usab sa maong pundo niadtong 2004.

Matud pa ni Governor Yebes sa iyang paglingkud sa 2004 wala gayud siyay nasundan nga programa sa kanhi gobernador nga nanghatag ug abono ngadto sa mga mag-uuma kay wala man kini pormal nga turn-over sa gahum sa dihang misaka siya sa kapitolyo. (Press Freedom, Vol. XXI No.4)

*

 

Lungkab sa Dipolog nagkakusog

Migara karon ang lungkab sa kabalayan ug tindahan dinhi sa dakbayan sa Dipolog diin gitumbok nga mga minor de edad nga gisugo sa mga dagko nilang agalon ang naghimo niini.

Kini ang gibutyag ni P/Supt. Gervacio Balmaceda, Chief of Police sa Dipolog Police Station samtang ubay-ubay na sa mga establisemento ang nahimong biktima sa lungkab. Gituhoan nga ang sunodsunod nga lungkab may kalabotan sa nagsingabot nga pagsaulog sa pasko diin ubay-ubay sa mga tindahan ang nagbaton ug ilang stocks sa baligya.

Dili angay magkumpiyansa. Kinahanglan magbinantayon sa kanunay ilabi na ning nagsingabot nga pagsaulog sa pasko. Mao kini ang awhag nga gipabati ni P/Supt. Balmaceda atubangan sa mitumaw karong sunodsunod nga insedente sa kawat ug lungkab.

Matud ni Balmaceda, nagsingabot palang gani ang kapaskohan, misaka na ang insedente sa kawat ug lungkab dinhi sa dakbayan sa Dipolog.

Sigun sa record sa kapolisan, mokabat na sa pito ka insedente sa lungkab ang nahiagum sa mga establisemento dinhi sa dakbayan diin kasagaran nga nahitabo, gihimo sa gabii.

Gitumbok sa police chief nga mga minor de edad ang naghimo sa nagpanghitabong lungkab dinhi sa dakbayan sa Dipolog. Ang mga minor de edad dugang sa police chief nga gigamit lamang o gisugo sa mga dagko aron maoy manglungkab sa mga tindahan ug kabalayan.

Kabahin sa pagpalusot ug fake money, gipahayag ni Balmaceda nga wala kaayo mikuyanap dinhi sa dakbayan sa Dipolog, dili sama sa nagpanghitabo sa dakbayan sa Dapitan.

Si Balmaceda nag-awhag usab sa mga katawhan ilabi na sa mga establisemento nga kon dunay mamatikdan sa pagpalusot ug piki nga kuwarta, isumbong gilayon sa kapolisan aron mahatagan nila ug tukmang aksiyon. (Press Freedom, Vol. XXI No.4)

*

 

Social preperations training gipahigayon

SINDANGAN, ZAMBOANGA DEL NORTE – Gipahigayon ang sunod-sunod nga Social Preparations training alang sa 9 ka mga priority barangays, isip rekisito sa pag-angkon sa mga livelihood projects gikan sa provincial government ubos sa Lando-BIBO initiative. Mao kini ang gibutyag ni Rony Pacilan, unit head sa Community Development Assistance Unit kon CDAU.

Ang maong mga barangay giila nga mao ang Maras, Mandih, Pangalalan, Disod, La Conception, Misok, Binuangan, Ramon Magsaysay ug Calatunan.

Matod usab ni Jun Quitong, ang chief facilitator sa CDAU sa lungsod sa Sindangan, kini ipahigayon isip tubag sa rekisitos nga ipailawom sa social preparations ang tanang mga BIBO chapters nga ipailawom sa livelihood program sa Zanorte Livelihood Assistance Program.

Ang naasoy nga mga barangay mao ang pasiuna nga mga barangay BIBO chapters nga mahatagan ug mga livelihood projects sa probinsiya.

Si Pacilan nagkanayon nga ang iyang buhatan ang subsob karon nga nagpahigayon sa maong pagbansaybansay, diin nakatapos na sa 16 ka mga kabarangayan sa Katipunan, Roxas ug Jose Dalman.

Dugang pa niya nga human sa lungsod sa Sindangan ipahigayon usab dayon karong sunod semana ang 5 ka mga barangay sa Siayan ug ang lungsod sa Manukan

Gilaoman nga maumol sa maong pagbansaybansay mao ang pag-ila sa mga priority livelihood projects sa mga barangay benefeciaries aron mahimoan ug mga project proposals nga ipasaka gilayon sa ZNLAP.

Gilaoman usab nga sa dili pa matapos ning tuiga, 40 ka mga bibo chapters ang matagaan na sa ilang mga livelihood programs, diin maoy gitinguha karon sa kagamhanang probinsiyal aron nga mahatagan ug dugang panginabuhian ang mga katawhan.

Si Pacilan mibutyag usab nga ang gobernador ang mimando kaniya nga dalion ug humanon gayod karong tuiga ang target barangays nga 40 ka buok, aron sa mosunod nga tuig, gatusan ka mga kabarangayan ang gikalatid nga pagahatagan usab ug susamang mga proyekto.

Si Gobernador Lando Yebes, ang naghingosog nga ipatuman ang maong proyekto tungod kay siya nagtoo kini maoy mahimong sinugdanan sa paglambo sa produktibidad sa mga kabu-kiran nga hayan makahatag ug ekonomikanhong kalam-boan sa lalawigan.

Sa pikas bahin, gisugdan na karon ang mokabat sa 60 milyones ka pesos nga proyekto ubos INFRES kon Infrastructure for Rural Productivity Enhancement Sector nga gipatuman ubos sa Department of Agriulture nga gipondohan sa JICA sa nasod sa Japan nga makabenepisyo sa mga barangay sa Talinga, DAgohoy ug Tinaplan.

Matod pa ni Mayor Bert Macias gikalipay sa iyang lungsod ang pagpatuman na ning maong proyekto, samtang gipasalamatan niya  si Governor Lando Yebes tungod sa paningkamot niini nga mapatuman na gayod ang maong proyekto nga nagtinguha nga mopahimu-tang ug dalan ingon man livelihood programs.

Mokabat sa 21 kilometros nga dalan ang gitumong nga mabuslotan gikan sa Barangay Talinga lahos ngadto sa Tinaplan lungsod sa Sindangan.

Ang maong proyekto gidawat sa mga katawhan ug suportado karon sa mga opisyales sa maong mga barangay kini taliwala sa mga politikanhong kontrobersiya nga gipatumaw sa pipila ka mga komentarista sa lokal radio sa maong lungsod.

Si Mrs. Rosebel De la Cruz, project monitoring in charge sa maong proyekto mipahayag nga  nahisubay ra tanan sa program specifications sigon sa naaprobahan sa kontrata.

Sa kasamtangan ang usa sa mga nakalangan sa pagtapos niini mao ang pagtaas sa presyo sa krudo ingon man sa kondisyon sa panahon ilabi na sa panahon nga sigi ug ulan. (Press Freedom, Vol. XXI No.4)

*

 
’09 Exec. budget sa ZaNorte

Usa ka conservative budget ang pagabatunan sa lalawigan sa ZaNorte sa tuig 2009.

Mao kini ang gipahayag ni Provincial Accountant Marivic Carpitanos karon nga gisugdan na sa Sangguniang Panlalawigan ang pagtuki sa budget para sa sunod tuig.

Matud pa ni Carpitanos kon ugaling aduna may pag-umento nga gipadas-og nila sa estimated income para sa sunod tuig kini dili molabaw sa 10 porciento.

Iyang gihulagway nga ang mamahimo nilang budget para sa sunod tuig matawag nga conservative sanglit nag-andam usab sila sa laing 10 porciento nga umento sa suweldo sa mga kawani sa gobyerno nga posibling imandu ni Presidente Arroyo sama sa gibuhat niini sa nakalabay’ng duha ka tuig.

Kini nga katin-awan sa provincial accountant iyang giluwatan atubangan sa pangutana ni Board Member Anecito Darunday kon ang gipadas-og nga umento sa budget para sa sunod tuig makab-ot ba sa probinsiya.

Matud pa ni Carpitanos kon ikumparar ang ilang income estimate nga gipadas-og karon sa 2009 wala moabot sa P100M mark ilabi na para sa contracting ug motorpool services sukwahi sa gibuhat sa kanhi administrasyon nga dagku kaayo ang ilang income estimates.

Kini pagpakita lamang nga ang budget sa ZaNorte para sa 2009 conservative ug realistic, dugang pahayag sa provincial accountant. (Press Freedom, Vol. XXI No.4)

 
 

 HULAGWAY BALITA

 

GOV YEBES UG MAYOR CRIS EGUIA sakay sa speed o patrol boat ni 3rd district congressman Cesar Jalosjos. Hini-usang mipabati sa ilang dakong pagpasalamat ang mga barangay kapitan sa lungsod sa Katipunan ning atong lalawigan sa Zamboanga del Norte ngadto sa administrasyon ni Governor Yebes tungod sa mga proyekto ug programa niini nga gipatuman nga naghatag ug kaayohan sa matag barangay. Sa 30 ka mga barangay sa maong lungsod 27 niini ang mitambong sa consultative dialogue nga gipatawag sa atong gobernador uban ni Mayor Cris Eguia ug pipila ka mga konsehal sa lungsod nga gipahigayon sa Isla sa Aliguay. Sila tanan ang mainiton nga mipaabot sa ilang dakong pagpasalamat ngadto sa atong gobernador. Angayang masayran nga adunay tulo na lang ka mga barangay sa Katipunan wala pa mahuman ang pagtrabaho sa tag tunga sa milyon nga kantidad sa proyekto.

*

 

Engkwentro tali sa Dapitan ug Dipolog Chess players

Tungod sa paningkamot ni 2nd District BM Bullet Jalosjos ug kanhi Bise Mayor Bebs Cheng, nahitabo ang pinakaunang engkwentro sa dula sa Chess tali sa mga magdudula sa taga Dapitan ug Dipolog niadtong Nobyembre 16, 2008 sulod sa 77B & B, Sunset Boulevard, Dapitan City.

Ang maong unang panaghigalaay nga engkwentro gimugna aron sa paghatag ug duhang kadasig, pagbansaybansay sa paggamit sa chess clock. Human sa duha ka dula, ang migawas nga mananaug mao ang mga chess players guikan sa Dipolog nga mitali ug 10 pontos batok 4 pontos sa taga Dapitan.

Nahitabo ang pinakaunang engkwentro sa dula sa Chess tali sa mga magdudula sa taga Dapitan ug Dipolog niadtong Nobyembre 16, 2008 sulod sa 77B & B, Sunset Boulevard, Dapitan City.

Ang mosunod maoy ilang mga pontos:

Dipolog Players: 1. Marlon Divinagracia -2pts.; 2. Fretz Balacy- 2pts.; 3. Danny Icao – 2 pts.; 4. Cesar Marabulas – 2 pts.; 5. Jerwin Empass-1 pts.; 6. Merell Empass- 0; 7. Reynaldo Albano – 1pt.; Total = 10 points.

Dapitan Players: 1. Teddy Adaza-0; 2. Francis Empeynado – 0; 3. Kokoy Ababon-0; 4. Victor Jauculan – 0; 5. Lerio Borbon – 1pt.; 6. Rey Dampayla – 2pts.; 7. Rodney Acojedo-1pt. Total = 4 points.

Angay kahinumduman nga ang ulahi nga nahimong Pinoy Super Chess World Grandmaster mao si Wesley So sa pangidaron nga 14 anyos. Ug siya usa sa miembro sa Philippine National Chess Team tua karon sa Dresden, Germany nga misalmot sa 2008 World Chess Olympiad. (Cheng, Press Freedom, Vol. XXI No.4)

 

Yebes mipaklaro: Magpabiling ubos ang bayronon sa ZMC 

 

MAGPABILIN nga ubos ra ang balayrunon bisan sa bag-ong pamaagi nga sagupon sa probinsiya sa serbisyo nga ilugway sa Zanorte Medical Center kung itandi sa mga pribado nga hospital.

Kini maoy ikagarantiya ni Governor Rolando Yebes ngadto sa mga katawhan atubangan sa pagsagop karon ug bag-ong pamaagi aron magpabilin ang maayong serbisyo sa bag-ong hospital sa probinsiya human na-aprobahan sa Sangguniang Panlalawigan kagahapong adlawa sa ilang session ang duha ka mga kontrata.

Ang maong kontrata maoy timaan sa pag-alayon sa pribado nga sector nga diin sa Dialysis Unit ug Laboratory adunay pribado nga kompanya ang motabang.

Gipasabot ni Governor Yebes nga usa kini ka bag-ong pamaagi sa pagdumala sa hospital. Ilalom sa maong kontrata ang pribado nga kompanya maoy mopalit ug ekipo nga gikinahanglan sa Zanorte Medical Center, sila maoy mopahimutang ug momintinar samtang ang probinsiya ang igo na lang mogamit sa maong kahimanan. Ang modumala niini mao mismo ang Zanorte Medical center.

Gidugang ni Governor Yebes nga mas maayo ang pribado nga kompanya ang mopalit sa mga bag-o ug modernong kahimanan sa hospital tungod kay dako ug gasto kung ang probinsiya ang mopalit niini.

Giklaro sa gobernador nga dili magbago ang mga katawhan pagbayad sa ilang balayrunon sa panahon nga mogamit sila sa maong kahimanan. Gusto niya nga magpabilin nga mas gamay ang balayrunon kung itandi sa mga pribado nga hospital.

Ilalom sa maong kontrata tumanon gayud sa usa ka pribado nga kompanya nga mo-ilis ug ekipo sa panahon nga adunay laing modernong kahimanan. Iyang giklaro nga walay kuwarta nga mogawas sa probinsiya sa maong katuyuan.

Sa hinay-hinay nga pamaagi hayan makabaton na ug Diagnostic Center sulod sa Zanorte Medical Center. (Southpoint, Vol.1No.45)

*

 

Pulso Sa Katilingban
Cicer M. Binghay
Pamugaong sa kongresista

Mayoriyang katawhan botantis sa U.S.A. nag-amot-amot ginagmay dolyares gitampo sa funding ni Sen. Barack Obama ang napili presidenti sa U.S.A.  Bisan atol sa financial crisis nga naapiktahan ang katawhan, nga kadaghanan naapil pa sa pag pag kunhod sa trabaho wala nila panumbalinga.  Gibarogan sa katawhan ang “change we need” nga maoy gihimong tema sa kampanya ni Obama.

Senadores Obama ug McCain, idiya-idya paglahotay sa daghang proceso pagpili pagka presidenti sa U.S.A. nga walay gipangdungog si McCain nga kaabig sa administrasyon ubos ni Pres. Bush nalambigit bikil o anomaliya sama sa paggamit salapi sa kagamhanan nga ipaagi paggamit ekipos, pondar magpungasi prohekto, gamit sa “for official” sakyanan sama sa ayropolano ug mga four wheels ug uban pa.  Ilang kalihokan ubos sa kalagdaan sa partido nga polisiya ug prinsipyo, nga malinis ilang baroganan.

Dinhi sa atoa, halos tanan nga nagtuo dunay pundok katawhan mokandidato pagka presidenti sa nagkalain-laing bulanting partido nga pulos “brand new”.  Dayon ang naa sa administrasyon, gamit taman sa ginhawa sa salapi sa katawhan.  Giluto ang katawhan sa kaugalingong mantika nga gipanakotan pa sa pagpanghulga sa militar ug PNP dayon sa ngilngig “Hello Garci”.

Matod pa sa taga Zaboanguita:  “Kon naa ka sa gahom Pre, makoptan lang, buhian bugnaw”.  Dili pa ganahan ang namunoan manaog sa katungdanan bisan maputos sa pangurakot.  Unya kon mapildi sa piniliay magdumot hangtod ikamatay nga nagtuo kanunay sid-ya ang mananaog.

Layo pa ang piniliay.  Pero ang District 2 sa lalawigan ubos karon ni Rep. Dodoy Labadlabad, inanay nag Top Tune.  The ligislators’ task, and never forget it, is to make laws.  No more no less.  American Legislators as we all informed, are castigated for not passing more useful laws.

Atong mga legislators’ hingusog sa “intense partisanship diverting them from their assigned task of passing useful laws and has done severe harm to the institution.  Our representatives who are congressman-negosyanti-politiko is indeed a pity and grossly unfair to boot.

Nakasabot sa pobring hunahuna sa katawhan karon, kining frunkos-klaros nga sila gipamalit sama sa mga tabliya ug salmon sa sari-sari store karon, paghimog solidong depensa of the countless ills that beset the country.  Pagkakaron mahinumdoman sa tanan nga gigamit atong mga “silent nights” kongresista pag depensa walag-tuo kang PGMA sa tanang mga bikil nga nahimo sa iyang administrasyon, nga kanunay nakaranggo kalibotanon as the most corrupt nation.

Little do we realized that the legislators task is to make laws good laws, practical, useful laws.  Dili kanang ma top tune kita kanunay nga nag kongresista paghatag konbenyenti ug pagsilidadis sa imong daghang salapi nga gikapital sa negosyo.

It irks people no end to hear some of our congressmen, “who do nothing but pang negosyo lamang”. Hinoon, their constituents flock to their congressmen’s homes or offices, to seek their favor or recommendations or to “utang” money or fertilizer, and never forget it, only to the politko-negosyo congressman.

Pero ang labing maot, makapurdoy samot sa usa ka kongresista kanang daghang mga prohekto natikad, nagpungasi, gihalad sa daghang kabarangayan, nga gipang tukod, nga ang mga salapi gigahin niini daan nang gipungotan.  Ang maong prohekto, kaha natukod, naay makita nga mibarog, apan nagpabilin halos kadaghanan mga kalag tanan nga igo lang gihaligi-an, bungbongan, aptan o salugan kon tulonghaan ug kon farm to market road agi lamang sa buldozer ang gibilin nga gipulbosan sa nipis graba ug balas.  Nga pag ulan, ang diha kaniadto, nawala na.  Kini ang maingon nato nga pamugaong sa kongresista. (Press Freedom, Vol. XXI No.4)

 
Credits: Press Freedom is published every Saturday and entered as 3rd class mail matter in Dipolog City. Printed by Young Printing Press with Editorial Office located at Upper Turno, Dipolog City. Tel. No. (065) 212-4343 or 212-6665

 

Gov. Yebes naghangyo sa mga barangay kapitan motabang pagmintinar sa provincial ug barangay road

 

KUSGANON nga naghangyo karon si Governor Rolando Yebes ngadto sa mga barangay kapitan nga motabang sa pagmintinar sa mga kadalanan nga anaa sa ilang matag barangay. Kini maoy iyang gipaabot ngadto sa tanang kapitan sa lungsod sa Katipunan atol sa ilang consultative dialogue nga gipahigayon didto sa isla sa Aliguay kagahapong adlawa.

Gipasabot ni Governor Yebes nga sa sunod tuig panahon sa ting-init una niyang himoon ang pag-ayo sa tanang mga karsada, provincial ug barangay road. Sa karon gihunong una sa Provincial Engineering Office ang pag-ayo sa mga dalan gumikan kay ma-usik lamang ang gasto, maguba ra gihapon ang dalan tungod sa pagpunay ug ulan.

Mga Barangay Kapitan sa Katipunan sa ilang pag-abot sa isla sa Aliguay.

Apan giklaro sa gobernador nga kung ma-ayo na ang mga dalan diha sa barangay kinahanglan nga motabang sa pagmintinar ang mga kapitan. Nakita nga adunay gipang-ayo nga mga barangay road nga migasto ug dako ang probinsiya apan wala magdugay kini ang naguba ra usab tungod kay bisan lukay sa lubi nga nakabara sa karsada ug sa canal niini wala kuhaa maoy hinungdan sa pagkaguba sa dalan bisan hinay ra ang ulan.

Dugang pagpasabot ni Governor Yebes nga dili mahimo ang probinsiya maoy kanunay nga magsagubang sa pagmintinar sa dalan tungod sa kadako sa gasto. Iyang gihangyo ang mga kapitan sa pagtinabangay. Sugyot sa gobernador nga kinahanglan adunay mugnaon nga grupo ang barangay kansang trabaho mao ang paglimpiyo sa mga canal kilid sa karsada..

Sa samang bahin, usa sa gisagop nga pamaagi karon sa probinsiya mao ang pagtugyan ngadto sa barangay ang pagmintinar sa provincial road. Ihatag niini ang kontrata, ang barangay na ang mangita ug tawo ug maoy motrabaho alang sa pagmintinar sa maong dalan ug bayran kini sa probinsiya.

Samtang gipahibalo usab sa gobernador nga sa sunod tuig ibalik sa provincial government ang infrastructure project diha sa matag barangay, apan sa sayo pa iyang gipasabot nga gikinahanglan na usab ang counterpart.

Sa karon walay gasto ang barangay sa tag-tunga sa milyon nga kantidad sa proyekto nga gihatag sa probinsiya.

 
 

Tanang hepe sa kapolisan gihatagan ug ultimatum sa bag-ong PPD sa ZaNorte

“Tanang illegal nga sugal dakpon”, mao kini ang pamahayag ni Col. Cristeto D. Gonzalodo ang bag-ong natudlo nga Police Provincial Director (PD) ning lalawigan atol sa turn-over of responsibility didto sa Camp Hamac ning dakbayan.

Ang bag-ong PD nagkanayon nga una sa iyang kampanya mao ang pagpitol sa tanang illegal nga sugal, druga, kawat, hold-up nga kasagaran na nga panghitabo dinhi sa dakbayan sa Dipolog ingon ma sa lalawigan sa Zamboanga del Norte.

Ang bag-ong Police Director sa PNP sa iyang pagdawat sa Turn-over of Command sa Zamboanga del Norte.

Tungod niini ang bag-ong PD mimando sa hepe sa dakbayan sa Dipolog ug Dapitan ug tanang kalungsuran nga sakop ning lalawigan nga dakpon gayod ug pahamtangan sa tukmang silot ang kinsa man nga mahilambigit sa dautang kalihokan apil na usab ang illegal swertres nga sugal.

Daku kini nga responsibilidad matud pa sa bag-ong PD, apan akong paningkamotan nga masumpo kini samtang ako pa ang naghawid sa renda sa pamalaod ning lalawigan sa Zamboanga del Norte.

Dugang pa ni PD Gonzalodo, dili lamang kutob sa pagpatuman sa balaod ang pagahimoon sa iyang ginsakopan kondili lakip na usab niini uban usab ang pagbansay-bansay isip mga idolo sa katawhan.  Kini iyang pagabuhaton aron makita gayud sa katawhan ang mga pulis sa publiko. (Press Freedom, Vol. XXI No.4)

*

MORE NEWS NGA BINISAYA

 

 

NOTE: SEND US YOUR NEWS.  Tell us what's going on in your barangays, clubs, schools, businesses and non profit organization. You can also send notices and announcements.
          

 

    Email to webmaster@dipolognon.com

      
Google
WEB THE DAILY DIPOLOGNON