November 15, 2007

 

Kay nang-blackmail sa iyang amo
Dipolognon gisilotan mabilanggo 20 ka bulan sa Hongkong

USA ka Filipino domestic helper nga taga dakbayan sa Dipolog nga mihimo sa pag-blackmail o pagdaot sa iyang employer niadtong Agosto sa mi-aging tuig ang gisilutan sa miaging semana (Nov. 8, 2007) sa korte sa Hongkong nga mabilanggo sulod sa 20 ka bulan. Sa balita nga migawas sa Daily Tribune ang maong domestic helper giila nga usa ka Elma Elumbaring, 35 anyos taga dakbayan sa Dipolog. Si Elumbaring ang mi-angkon atubangan sa korte nga siya nangayo ug 50,000 Hongkong Dollars ngadto sa iyang amo nga babaye bugti sa dili pagpagawas sa video sa iyang mobile phone ngadto sa iyang bana ug duha ka mga anak

Si Elumbaring ang nakasulod kini ug trabaho didto sa Hongkong sa mao niyang amo niadtong Agosto tuig 2005 apan kini ang natangtang niadtong Hulyo niining tuiga. Gipasabot ni Elumbaring nga ang maong video footage maoy iyang gihimo nga pamaagi aron makabalik siya sa iyang trabaho ngadto sa iyang employer human siya gi-akusahan nga nangawat ug kuwarta nga maoy hinungdan nga natang-tang kini sa iyang trabaho. Makita sa video footage ang iyang employer nga babaye nga adunay kauban nga wala mailhing lalaki nga brief lang ang gisuot sulod mismo sa ilang balay.

Si Hong Kong District Judge Andrew Chan ang mipakanog sa iyang desisyon batok kang Elumbaring nga mabilanggo ug 20 ka bulan nga diin gikonside-rar nga dili usa ka mangilngig nga krimen ang pagpang-blackmail. Sa dihang sa gisubay ning mantalaan kon asa dapit sa Dipolog si Elumbaring aron makuhaan ug pamahayag ang iyang pamilya kay mismo ang lokal nga buhatan sa Department of Labor and Employment kon DOLE nga nagabase dinhi sa Dipolog dili makatabang sa pagsubay sa pamilya ni Elumbaring.

Ang maong kaso ilang gitugyan ngadto sa OWWA pinaagi sa tabang sa NSO (National Statistics Office) ug nasubay sa records nga daghan ang pangalan nga Elma Elumbaring apan walay taga Dipolog. Sumala sa records, dunay Elma Elumbaring nga taga lungsod sa Katipunan. Matud pa nga kasagaran sa mga OFW nga taga Zamboanga del Norte nga atua sa gawas sa nasud ang gamiton ug dalhon nga lugar mao ang dapit nga ilado sama sa Dipolog nga maoy capital city sa ZaNorte

“Bisan taga Katipunan, Manukan o bisan asa nga lungsod nagpuyo kasagaran ilang dad-on nga lugar mao gyud ang Dipolog kay mao may ilado dinhi sa Zamboanga del Norte mao nang lisud kaayo i-locate ang pamilya sa mga OFW nga nagka problema didto sa gawas,” kanayon pa ang taga OWWA. (The New Nandau, Vol. XVII No.19)

*

 

ZaNorte Medical Center walay occupancy permit

Unsa may rason nga nagpaluyo ngano nga hangtud karon ang city hall sa Dipolog wala mohatag sa gipangayong occupancy permit para sa Zamboanga del Norte Medical Center. Kini ang pangutana nga gipalanog kagahapon sa Sangguniang Panlalawigan may kalabutan na sa ZaNorte Medical Center sa dihang gisubay ni Board Member Edgar Baguio kon nagsugod na ba sa iyang operasyon ang bag-ong tambalanan.

Matud pa ni Baguio ang ZaNorte Medical Center usa sa mga economic enterprise sa probinsiya ug interesado siya masayod kon nagsugod na ba kini sa iyang operasyon para ang income niini mamahimong magamit sa pagbayad sa bond floatation nga maoy gigamit sa pagkonstrak sa maong tambalanan. Si Provincial Planning Officer Rosevic Lacaya-Ocampo, maoy mihatag ug katin-awan nga sa kasam-tangan dili pa makasugod sa iyang operasyon sa ZaNorte Medical Center kay hangtud karon gihuwat pa sa kagamhanang probinsiyal ang pag-isyu sa Office of the City Building Officials sa Occupancy Permit nga maoy gikinahanglan.

Ang bag-ong gi-inaugurahan nga ZaNorte Medical Center diin gikatahong wala hatagi ug occupancy permit ning dakbayan sa Dipolog.

Matud pa ni Mrs. Ocampo gisumitir na nila ang tanang gipangayo nga mga doku-mento para sa paglukat sa Occupancy Permit ug sa kasamtangan naghuwat ang kagamhanang probinsiyal sa pagpagawas sa permit. Giklaro sa provincial planning officer nga naningkamut gayud ang kagamhanang probinsiyal nga makakuha sa gikinahanglang permiso kay dugay rang interesado ang probinsiya nga masugdan na ug gamit ang bag-ong ZaNorte Medical Center.

Sumala pa kagahapon lang adlawa gipadalhan na usab sa buhatan sa gobernador ug suwat ang Office of the City Building Officials unsa nay estado sa aplikasyon sa probinsiya alang sa paglukat ug Occupancy Permit sa ZaNorte Medical Center human gituman nila ang tanang mga gipangayong requirements ug dokumento. Matud pa sa provincial planning officer sa ilang nasayran si Engr. Gaudencio Bagolboc makigkita pa kang Mayor Evelyn Uy kabahin sa aplikasyon sa probinsiya alang sa occupancy permit sa bag-ong hospital sa dili pa ang final approval.

Si Ocampo midugang sa pagpatin-aw nga dili usab mapadali ang pag-evaluate sa OBO sa angayang pagasubayon niini busa nakahinagbo ug kalangay. Lakip na sa gisubay sa OBO ang waste disposal sa maong tambalanan kon nakasunod ba sa gimbut-an sa balaod. Gawas sa maong tubag ang mga meyembro sa Local Finance Committee wala na mohatag ug dugang detalye unsay laing rason ngano nga hangtud karon ang city hall sa Dipolog wala mohatag sa maong occupancy permit. Matud pa ni Baguio sa iyang nahibaw-an dugay rang nangayo ang probinsiya sa maong permit sa Dipolog sukad pa sa 2nd quarter karong tuig ug hangtud karon wala pa hatagi ang probinsiya niini.

Si Baguio midugang sa pagpahayag nga mas naintriga na hinoon siya ug samot sa gihatag nga tubag kay kon ang pagkonstrak sa maong mecial center nagsunod sa higpit sa plano ug desinyo niini wala siyay nakitang rason nga ang mga building officials sa ilang pag-inspeksiyon maglisud ug malangay ang paghatag sa occupancy permit. Ang bokal midugang sa pagpahayag nga nagduda na hinoon siya nga hayan aduna pay laing rason nga nagpaluyo sa maong kalangay nga iyang gihulagway nga “unmentionable undertones”. Busa nangutana si Baguio kon aduna bay meyembro sa Local Finance Committee nga nahibawo sa laing rason nga maoy nagpaluyo sa kalangay sa city hall paghatag sa maong permit kon kini tungod ba sa teknikal nga bahin o sa politika. (Press Freedom, Vol. XX No. 4)

*

 

Magtutudlo possibleng  makahinagbo ug problema
DepEd Division Office gikawatan 6 ka CPU

POSIBLING makahinagbo karon ug problema ang mga magtutudlo ilalom sa Department of Education – Zamboanga del Norte Division ilabina niadtong moretiro karong panahona, kini human ang nahitabong pagkawala sa unom ka mga Central Processing Unit (CPU) sa computer sulod mismo sa promotional staff.

Exclusibong nahinabi sa mga miyembro sa Zamboanga del Norte United Correpondents (ZNUC) si Assistant Schools Division Superintendent Dr. Nelfa Acopiado. Sa iyang kabahin, gikaguol niya pag-ayo ang maong hitabo tungod kay ang mga data ug service records sa tanang mga magtutudlo sa probinsiya nga maoy ilang isubmiter ngadto sa Government Service Insurance System (GSIS) ang atua sulod sa usa ka CPU nga apil sa gikawat. Mismo si Acopiado ang nabalaka nga apil siya sa mag-problema tungod kay moretiro na siya.

Samtang giklaro usab ni Dr. Edwin Miranda, Education Supervisor ug maoy in-charge sa nahisgutang mga records nga maglisod gayud ang Division Office paghatag sa data ug records ngadto sa GSIS kung gikinahanglan karong panahona sa usa ka magtutudlo. Apil nga naka-saved ngadto sa maong CPU mao ang mga records sa tanang mga aplikante pagka-magtutudlo ug daghan pa.  Angayang masayran nga niadtong Lunes sa buntag, Nobyembre 5, 2007 nadiskobrehan na lang sa taga Division Office nga nawala na ang pito ka mga CPU sulod mismo sa Promotional Staff Department nga maoy nagsilbing buhatan sa mga supervisors nga diin haduol lamang ang distansiya niini sa buhatan ni Schools Division Superintendent Dr. Habib Adzhar Sarahadil ug Assistant Superintendent Acopiado.

Dili usab makahatag sa iyang komento si Acopiado kung inside job ba ang maong hitabo bisan nga walay nakita sa palibot sa maong lawak nga pugsanon nga giguba aron maoy kasudlan ug kagawsan sa tawo nga maoy responsabli sa maong hitabo. Sa karon ilang gitugyan sa kapolisan ug sa NBI ang maong kaso. Hangtud karon nagpabilin gihapon nga pangutana sa taga Division Office kung kanus-a gayud gikawat ang maong mga CPU ilabina nga niadtong mi-aging semana upat ka adlaw nga walay trabaho, gikan sa Nobyembre 1 ngadto sa Nobyembre 4. Pagka Nobyembre 5 na lang nila nadiskobrihan ang maong hitabo.

Nagkadaiyang reaction ang gipabati sa taga Division Office bisan mismo ang mga security guards kabahin sa maong kaso tungod kay hangtud karon nagpabilin pa gihapon ang pagduda nga inside job ang bulto nga pagkawala sa mga CPU. Sila tanan ang andam nga ipailalom sa inbistigasyon. Apil na ang mga tawo nga maoy nagtrabaho karon sa gihimo nga pag-usab sa linya sa koryente sulod sa Department of Education Zamboanga del Norte Division. Ang bulto nga pagkawala sa maong mga CPU atul nga atua sa laing nasud si Division Superintendent Sarahadil. Dugang nasayran nga apil sa gikawat mao ang mga webcam, keyboard, mouse, speaker ug regulator. (Mindanao Star, Vol.III No.41)

*

 
Election sa ZANECO BOD gitakda karong NobYembre 17

Gikatakda ang pagpa-higayon sa eleksiyon sa Board of Director, District 7 sa Zamboanga del Norte Electric Cooperative kon ZANECO karong Nobembre 17, 2007. Kini ang gipahibawo ni Mrs. Baby Belotendos, Manager Information Services sa kooperatiba nga maoy incharge sa pagpahigayon sa maong piniliay. Ang electric cooperative sa Zamboanga del Norte gibahin siyam ka mga distrito gikan sa mga lungsod sa Rizal paingon na ngadto sa lungsod sa Liloy diin karong tuiga ang eleksiyon pagahi-moon sa District 7, District 8 ug District 9.

Matud ni Mrs. Belotendos, ang District 7 gilangkoban sa mga lungsod sa Katipunan, Roxas, Manukan ug Jose Dalman diin ang eleksiyon ipahigayon na karong Nobembre 17.

Ang makapartisipar sa pagboto kadto lamang membro konsumante sa kooperatiba sa electrisidad diin pagahimoon ang eleksiyon sa gipahimutang voting center diha sa Katipunan Central School sa lungsod sa Katipunan, Roxas Central School sa lungsod sa Roxas, Manukan East Central School sa lungsod sa Manukan ug Jose Dalman Central School sa lungsod sa Jose Dalman.

Ang botasyon magsugod alas otso sa buntag ug motapos sa alas tres sa hapon. Ang deadline sa pagsubmiter sa Certificate of Candidacy alang niadtung interesado nga magpapili pagka Board of Director sa ZANECO kutob na lamang karong adlawa nga diha isubmiter sa main office sa Zaneco dinhi sa dakbayan sa Dipolog. Human sa piniliay sa District 7 karong Nobembre 17, matud ni Belotendos, ipahigayon na usab ang laing hugna sa piniliay karong Desyembre 8 sa Distrito 8 nga manglangkob na sa mga lungsod sa Sindangan, Siayan ug Leon B. Postigo. Pagka Desyembre 15 ang eleksiyon didto na usab ipahigayon sa Distrito 9 nga maglangkob sa mga lungsod sa Salug, Liloy, Labason, Tampilisan, Gutalac, Godod ug Kalawit.

Matud ni Mrs. Belotendos, ang first congressional district nga gilangkoban sa mga lungsod sa Rizal, Lalibterad, Sibutad, Piñan, Polanco, Mutia ug Sergio Osmeña tapos na nakapahigayon sa eleksiyon sa miaging tuig. Dinhi sa Dipolog ang eleksiyon gikatakda nga pagahimoon karong sunod tuig. Sumala pa nga sa matag tuig, tulo ka mga distrito ang magpili ug Board of Director.

Ang mapili nga Board of Director sa Zaneco makaserbisyo lamang sulod sa tulo ka tuig ug puwede nga makapa-re-elect sulod lamang sa duha ka higayon isip katapusan nga termino. Dili sama sa local elective position sa gobiyerno nga ang mga politiko mahimong makapa-re-elect sulod sa tulo ka termino, apan ang Board of Director sa koperatiba gitugot lamang sulod sa duha ka termino.

Alang niadtung nagplano ug nag-interes nga magpapili pagka Board of Director sa kooperatiba sa elekrisidad sa Zamboanga del Norte, ang kualipikasyon ug disqualification sigun sa gimandar sa guidelines, ania si Mrs. Baby Belotendos. Sa nasayran nga tulo ka mga personalidad ang mipadayag sa ilang interes nga magpapili karong Nobembre 17. Sila mao si Incumbent Board of Director Arestela Adasa, Danilo Estrella nga taga Jose Dalman ug Antonio Liao, taga lungsod sa Katipunan. Matud ni Mrs. Belotendos ang kopya sa COC diha kuhaon sa main office sa ZANECO dinhi sa dakbayan sa Dipolog diin ang deadline sa pagsubmiter kutob nalang adlawa. Iyang gipaklaro nga ang COC sa pagka Board of Director dili pareha sa COC sa Comelec. Ang piniliay pagadumala-hon sa mga magtutudlo sa Department of Education. (The New Nandau, Vol. XVII No.19)

*

 

Pagkuha balas ug graba sa Layawan River
Dipolog gitugtan na

Hayan makabalik na ug kuha sa ilang gikinahanglang balas ug graba ang siyudad sa Dipolog alang sa nagkadaiya niining mga proyekto gikan sa Layawan River. Kini ang gibutyag ni Atty. Jes Gal Sarmiento, Jr. ang hepe sa Zamboanga del Norte Environment Management Office o ZANEMO atubangan sa Sangguniang Panlalawigan sa nagapadayon nilang marathon budget hearing.

Matud pa ni Atty. Sarmiento ang National Irrigation Administration nag-apply karon alang sa pagkuha ug gratuitous permit alang na sa pagkuha sa balas ug graba nga anaa na pundo sa duha nila ka mga irrigation dams subay sa Layawan River. Sa sayu pa si Engineer Bonifacio Judilla, Provincial Irrigation Officer sa ZaNorte mipadangat ug suwat ngadto kang Governor Rolando Yebes ug mipahibawo nga ang duha nila ka water dams subay sa Layawan River ang napuno na sa balas ug graba nga gikinahanglan makuha para mamintinar nila ang tukmang supply sa tubig paingon sa mga irrigation system sa Dipolog ug Polanco.

Gipasabot ni Engr. Judilla nga ang ilang buhatan sa NIA wala magbatun ug pundo para na sa pagpahigayon sa dredging sa duha ka water dams subay sa Layawan River. Sa dihang gikonsulta nila kini sa duha ka irrigators association maoy ilang nauyunan ang paghangyo sa siyudad sa Dipolog nga maoy motrabaho sa dredging nga dili na mogastu ang mga mag-uuma nga meyem-bro sa duha ka irigasyon. Sa nasayran ang Dipolog, Polanco Irrigators Association, LASILILEA Irrigators Association ug ang barangay councils sa Lapayanbaja ug Silawe sa Polanco mipanday ug mga managkaluhuang resolusyon nga nag-awhag sa siyudad sa Dipolog nga maoy mokuha sa napundong balas sa duha ka water dams.

Matud pa ni Atty. Sarmiento ang NIA mao karon ang nag-apply sa gratuitous permit ug gitabangan kini karon sa iyang opisina nga makakuha sa ubang mga gikinahanglan sama sa Environmental Compliance Certificate ug pagtugot usab gikan sa Bureau of Mines. Gisaysay dugang ni Sarmiento nga si Governor Yebes ang uyon alang na sa paghatag sa gipangayong gratuitous permit. Gipatin-aw usab sa hepe sa ZANEMO nga ang pag-uyon sa gobernador sa hangyo karon sa NIA walay epekto sa gipatigbabaw niining moratorium nga kasamtangang idili ang pagkuha sa balas ug graba sa Layawan River.

Matud pa ni Atty. Sarmiento ang maong moratorium magapabiling gipatigbabaw diin higpit nga gidili ang pagkuha sa balas ug graba particular na sa Sangkol-Silawe area sa Layawan River diin nahimu-tang ang qarry site sa Dipolog. Ang dredging, gipasabot ni Atty. Sarmiento nga anaa ra sulod sa duha ka water dams sa NIA. Ang dredging sumala pa maglangkub na ug labing minus lima ka ektarya nga maoy kuhaan sa balas ug graba nga gibana-banang mokabat sa 40,000 cubic meters.

Kahinumduman si Governor Yebes ug Mayor Evelyn Uy sa sayu pa mitimaan sa usa ka kasabutan nga nagdason sa gipatigbabaw nga moratorium sa pagkuha sa balas ug graba subay sa Layaway River sa quarry site sa Dipolog sa Brgy. Sangkol. Ilawom sa maong kasabutan miuyon usab ang gobernador nga tabangan niini ang Dipolog sa pagpangita ug laing tinubdan nga makuhaan niini sa balas ug graba nga gamiton para sa ilang mga proyekto sa gobyerno. Matud pa ni Atty. Sar-miento kabahin na kini sa gitiman-ang kasabutan tali ni Governor Yebes ug Mayor Uy sa Dipolog. (Press Freedom, Vol. XX No. 4)

 
 

9 napiling brgy. kapitan sa Jose Dalman nanumpa atubangan ni Yebes

NANUMPA kaniadtong Nobyembre 5 atubangan ni Governor Rolando Yebes ang siyam ka mga bag-ong napili nga barangay kapitan sa lungsod sa Jose Dalman. Kini mao sila si barangay Kapitan Edgar Lituan sa barangay Lipay, William Ellis sa barangay Lopero, Faustino Macion sa Labakid, Renerio Cuenca sa Lumaping, Arsenio Cabiara sa Litalip, Dionesio Daque sa Marupay, Jose Dalman III sa barangay Tamil, Fulgencio Lerin sa Tabon ug Celso Bael sa barangay Bitoon.

Gawas sa maong siyam ka mga bag-ong barangay kapitan, nanumpa usab ang uban nga bag-ong napili nga barangay kagawad nga sila si Leoncio Gumilola sa barangay Lipay ug Josephine Ontolan sa barangay Dinasan nga parehong presidente sa Lando-BIBO sa ilang barangay.

Ang siyam ka mga bag-ong napiling barangay kapitan sa lungsod sa Jose Dalman

Ang ilang pagpanumpa kagahapon ngadto kang Governor Yebes kini timaan sa ilang mainiton nga suporta sa lederato karon sa probinsiya nga walay laing tumong mao ang “Una sa tanan ang Katawhan”. Gipadayag sa maong mga barangay officials nga sa ilang paglansar sa nakalabay nga Barangay ug SK Election nagpabilin gihapon ang pagsalig sa mga katawhan ngadto kanila bisan nga namalit na ug boto ang ilang matag kaatbang atul sa piniliay. Ilang nakita nga mga proyekto ug programa gayud ang gikinahanglan sa mga katawhan nga maoy ilang gisaad atul sa adlaw sa pagpangampanya.

Hugtanon usab nga gipasalig ni Governor Yebes nga andam siyang motabang sa nahisgutan nga mga barangay sa gikinahanglan niining proyekto ilabina ang infrastructure ug ang livelihood program nga hingpit ipatuman sa sunod tuig. Sa sunod semana, dungan usab nga manumpa ni Governor Yebes ang napili nga mga barangay officials sa lungsod sa Roxas. (Mindanao Star, Vol.III No.41)

*

 

Bagarinao mipasaka’g protesta batok
KADAUGAN NI Patangan pagka kapitan sa Brgy. Diwan

Pormal nang miduso ug judicial recount si Letecia Gurdiel-Bagarinao batok sa kadaugan ni Nathaniel “Natan” Patangan pagka Barangay Kapitan sa Barangay Diwan ning dakbayan sa Dipolog tungod sa matud pa, gihimo niining pagpamintaha ug pagpanikas panahon sa eleksiyon sa barangay niadtung Oktobre 29. Kini ang gibutyag ni Mrs. Bagarinao, napildi nga kandidato pagka barangay kapitan sa Barangay Diwan samtang ning semanaha iya nang giduso ang election protest ngadto sa hukmanan.

Si Mrs. Bagarinao nga nabiya lamang ug duha ka boto batok ni Patangan nahinabi sa usa sa mga radio station mipahayag nga atol sa kampanya, gitaba-ngan siya sa taga Kapitolyo pinaagi sa pagbutang niini ug daghang kaswal ug pagamit niini ug mga military jeep ug dumptruck gikan sa Provincial Engineering Office. Ang maong mga sakyanan gikan sa Kapitolyo maoy gigamit sa paghakot sa mga botante nga tataw na kaayong usa ka pagpamintaha ug labaw sa tanan, usa ka illegal nga binuhatan gumikan kay mismo ang sakyanan sa gobiyerno gigamit panahon sa eleksiyon.

Hinoon giangkon ni Mrs. Bagarinao nga ang mga JO gikan sa Kapitolyo nga didto gi-assign sa Diwan aron motabang ni Patangan wala maghimo ug kasamok panahon sa eleksiyon. Gibutyag usab ni Mrs. Bagarinao nga nianang besperas sa eleksiyon si Governor Lando Yebes didto sa Diwan ug miadto sa balay sa ginikanan ni Natan Patangan ug siya nagtuo nga gibugahan kini ug daghang kuwarta aron magamit panahon sa eleksiyon. Ang maong tilimad-on para ni Mrs. Bagarinao, usa ka dakong pagpamintaha batok sa iyang kandidatura tungod kay ang eleksiyon sa barangay usa man ka “none partisan” nga dili angayan manghilabot ang mga tag-as nga opisyal.

Aminado si Mrs. Bagarinao nga wala siyay laraw nga mopasaka pa ug protesta, apan gumikan sa hulhog sa iyang mga supporters napugos siya sa pagduso ug reklamo ilabi na nga duha lamang ka boto ang ilang deperensiya batok ni Patangan. Sumala pa niya, daghang inbalido sa boto nga pabor unta kaniya gumikan kay ang iyang ngalan didto nasulat sa ibabaw nga bahin sa balota. Matud ni Mrs. Bagarinao ang iyang pagpasaka ug judicial recount maoy pagpanaghap lamang basin kon molabaw pa siya sa pag-utro ug ihap sa mga balota nga siya ang mogawas nga mananaug niadtung nakalabay’ng eleksiyon. (The New Nandau, Vol. XVII No.19)

*

 

Mrs. Bagarinao maoy namintaha panahon sa eleksiyon –Patangan

Kon duna may namintaha panahon sa eleksiyon, kini mao si Mrs. Letecia “Lety” Bagarinao. Kini usab ang reaksiyon ni Natan Patangan, midaug nga kapitan sa Barangay Diwan ning dakbayan sa Dipolog atubangan sa gipasaka nga election protest ni Mrs. Letecia Gurdiel-Bagarinao. Si Patangan nga giakusar ni Mrs. Bagarinao nga namintaha panahon sa eleksiyon ang namahayag nga kon maoy pagduda sa iya mismong ayaan atubangan sa iyang gipasaka nga protesta, andam kini niyang atubangon.

Sumala pa niya, katungod sa iyang ayaan ang pagdangop sa hukmanan o kaha sa comelec alang sa legal nga aksiyon batok sa iyang kadaugan apan kon sa gikaingon nga siya namintaha o kaha nanikas panahon sa eleksiyon, kini wala gayud niya buhata. Matud ni Patangan, kon maoy tuyo ni Mrs. Bagarinao nga mo-protesta aron modaug pagka kapitan, mas maayo pa nga motabang nalang kini kaniya para sa kaayohan sa Barangay Diwan. Kay sumala pa sa iyang obserbasyon, mas siya ang gibintahaan gumikan kay dunay tulo ka mga dumptruck gikan sa siyudad sa Dipolog maoy gigamit panahon sa eleksiyon.

Gani paghuman ug botar sa mga katawhan, ang mga balot boxes gikarga sa dumptruck sa siyudad ug gidala paingon sa Sinuyak sa lungsod sa Katipunan ayha gibalik sa Barangay Diwan. Giangkon ni Natan Patangan nga dunay military jeep nga iyang gigamit apan iyang hinulaman gikan sa iyang mga amigo kay wala man siyay kaugalingon nga sakyanan nga magamit panahon sa eleksiyon.

Giangkon usab ni Patangan nga nianang besperas sa eleksiyon mibisita kaniya si Governor Yebes didto sa Diwan gumikan kay mipakita usab kini ug moral nga suporta isip sila paryente. Apan kon ang presensiya sa gobernador maoy gireklamohan sa iyang ayaan, gipahayag ni Patangan nga mas labaw pa siyang magduda gumikan kay mismo si Mayor Evelyn Uy ug sa iyang bana nga si kanhi Mayor Roberto Uy gabalikbalik sa Diwan ug didto sa panimalay ni Mrs. Bagarinao. Gawas sa dagkong personalidad sa dakbayan sa Dipolog nga nagsuporta kang Mrs. Bagarinao, didto usab si 2nd District Congressman Rosendo “Dodoy” Labadlabad nga nagsuporta sa iyang ayaan.

Kon serbisyo man ang tuyo nga maoy hinungdan nga milansar sila sa piniliay sa barangay, si Natan Patangan nanawagan sa iya mismong ayaan nga si Mrs. Lety Gurdiel-Bagarinao nga kalimtan na nila ang milabay nga piniliay ug maoy ilang himoon ang panaghiusa alang sa kalamboan ug kauswagan sa mga katawhan sa Barangay Diwan. (The New Nandau, Vol. XVII No.19)

*

 

BARANGAY ELECTION SA DIPOLOG  GILIMINAN DAGHANANG IRIGULARIDAD

Giliminan sa daghanang irigularidad ang bag-ong gitapos nga eleksiyon sa barangay dinhi sa dakbayan sa Dipolog. Kini karon ang inanay nga milutaw nga hulagway sa bag-ong gitapos nga eleksiyon sa barangay sa Dipolog samtang nag-anam-anam usab ug katakdo ang pipila ka mga insidente nga naglimin sa maong piniliay nga nakitang abnormal nga mga aktuwasyon nga nahasukwahi sa usa ka limpyo nga pagpahigayon sa eleksiyon.

Sa nakita ug namatikdan aduna gayuy tinguha sa pagtikas sa mamahimong resulta sa maong eleksiyon nga gipasiugdahan sa kasamtangan karong administrasyon sa Dipolog uban sa pagpakigkonsabo sa mga tinugyanan sa Commission on Elections, opisyales sa Department of Education ug sa Philippine National Police aron sa pagsiguro nga ang tanang mga kandidatu nga gipaluyuhan sa administrasyon mao gayuy mogawas nga mananaug.

Giliminan sa daghanang irigularidad ang bag-ong gitapos nga eleksiyon sa barangay dinhi sa dakbayan sa Dipolog.

Dili ika limod sa city hall nga gigamit gayud niini ang iyang mga resources pabor sa mga kandidatu sa administrasyon sa nagkadaiyang barangay sa siyudad ilawom sa pasumangil nga ang ilang mga gibuhat nga operasyon pinasikad sa pagmandu sa COMELEC. Sa adlaw sa piniliay walay pu-as nga nagbahis-bahis ang mga sakyanan sa city government sa nagkadaiyang mga barangay diin pipila niini may mga sakay nga PNP ug dayag gayud mohapit sa panimalay sa mga kandidatu pagka kapitan nga gipaluyuhan sa administrasyon. Uban na sa namatikdan ang mga tinugyanan mismo sa COMELEC.

Gawas niini adunay pipila ka barangay ang misaysay nga ubay-ubay sa ilang mga botante ang wala maka botar sa hinungdan nga ang ilang mga pangalan nga gibutang diha sa pultahan sa mga voting precincts nawagtang apan sa dihang nangayo sila ug kopya sa voters lists nga gihuptan sa mga Board of Election Tellers milutaw nga anaa ra ang ilang mga pangalan. Si Barangay Chairman-elect Nathan Patangan sa Barangay Diwan, mikonpirmar nga kini ilaha mismong nakita ug nasaksihan sa adlaw sa eleksiyon diin mga tinugyanan sa COMELEC ug PNP atua sa iyang kaatbang mokaun ug mohapit apan nungka nga mihapit usab kini sa ilang headquarters aron sa pagpakita nga patas ang ilang pagtratar sa mga kandidatu.

Labaw nga gikatingalahan nila ni Kapitan Patangan mao ang paglibot sa ballot box gikan sa Sitio Cayasan nga gitabok pa sa Barangay Sinuyak, Katipunan paingon sa Barangay Punta, Dipolog dayon gibalik ug saka paingon sa Cogon ug Diwan nga unta aduna na may dalan nga nagkonektar sa maong sitio paingon sa sentro sa Diwan nga mokapin ra sa dos kilometros nga maagian ug sakyanan. Tungod niini wala gayud niya pabiyai sa iyang tawo ang sakyanan sa city government nga maoy gikargahan sa ballot box gikan sa Cayasan kay nagtuo siya nga kon wala pa kini makuyugi hayan aduna gayuy mahitabong pag-usab sa resulta ilabi na nga duha ra ka botos ang iyang labaw ug gidag-an.

Matud pa ni Kapitan Patangan samtang kamulo panghagpat sa balot ug ihap sa botos namatikdan usab sa ilang watcher nga ang balota tapos nang gibasa sa maestra diha ra sa iyang tungod pil-on ug ipundo imbes ihulog ngadto sa ballot box. Sumala pa gipa-insistir gayud sa iyang mga watchers nga ang tanang balota nga tapos nang nabasa ug naihap ang botos ihulog sa ballot box. Gisugo usab niya iyang mga watchers nga dili na maglista-lista sa resulta kon dili tutukan gayud sa higpit ang mga balota nga basohon sa mga Board of Election Tellers lakip na ang entry diha sa election returns aron dili gayud sila malipat.

Matud pa ni Kapitan Natan kini nga mga pagpangandam ug lihuk sa adlaw sa eleksiyon iyaha gayud nga gihimo tungod kay usa sa iyang suod nga higala nakatambong sa usa ka tigum nga gipatawag ni Mayor Evelyn Uy niadtong buwan sa Agosto diin mitambong ang mga tinugyanan sa COMELEC, DepEd, PNP ug tanang mga kandidatu pagka kapitan nga gisuportahan sa administrasyon diin ang gihisgutan mao gayud ang mga sistima unsaon sa pagtikas ang mamahimong resulta sa eleksiyon pabor kanila. Sa resulta sa eleksiyon sa barangay sa Dipolog sa 21 ka barangay usa ra ka kandidatu sa administrasyon ang wala makadaug ang sa Barangay Diwan. (Press Freedom, Vol. XX No. 4)

*

 
7 contractors midawat na sa Coastal Road Project sa Triple SB

ADUNA nay pito ka mga contractors ang midawat alang sa pagpatuman sa coatal road project sa triple SB. Lima niini maoy gitahasan pag-abri ug mga bag-ong dalan ug ang duha alang sa concreting. Kini maoy kalambuan nga gipahibalo ni 3rd District Congressman Cesar Jalosjos nga nahinabi sa mga miyembro sa Zamboanga del Norte United Correspondents (ZNUC).

Gibutyag ni Congressman Jalosjos nga usa sa portion sa pagsemento sa karsada kini ang anaa na sa 80 porsiento ang nahimong agi. Iyang gidugang nga sa tibook 380 milyon pesos nga gitagana nga pundo alang niining tuig 2007 na-bid ug na-award na sa pito ka mga contractors. Sa karon gipangandam na nila ang 450 milyon pesos budget sa sunod tuig nga gikatakdang i-bidding karong bulan sa Disyembre. Gipaninguha nga sa tunga-tunga sa tuig 2008 makomplito ang pagtrabaho sa portion sa maong proyekto tungod kay paningkamutan nga makuha ang 490 pesos budget sa 2009 nga magamit kini sa 2008.

Ang maong lima ka mga opening sections sa bag-ong karsada kini magagikan sa Lintangan paingon sa Sibuco ug Sibuco paingon sa Sirawai. Sa karon walay kalangan nga nahinagbo ang pagtrabaho sa maong proyekto, apan adunay mga contractors ang nakadawat ug extortion letter. Matod pa ni Congressman Jalosjos kini ang gihatagan na ug igong pagtagad pinaagi sa tabang sa 1st Tabak Division sa Philippine Army nga mapanalipdan ang mga contractors. Sa nasayran ang pagtrabaho sa proyekto gikan sa Lintangan paingon sa Sibuco kini ang gitugyan ngadto sa Engineering Brigade nga anaa sa 5 kilometers ang gilay-on gikan sa poblasyon sa Sibuco.  (Mindanao Star, Vol.III No.41)

 
 

 HULAGWAY BALITA

 

 

*

 

Election Officers Zanorte mihimo’g manifesto batok sa Comelec Manila

Kon nadismayar ang mga magtutudlo sa nahimong kausaban sa honorarium nga ilang madawat kay migamay, wala usab mahimoot ang mga election officers sa Zamboanga del Norte sa nadawat nilang memorandum nga nagpahibalo sa dakong kausaban sa nahunang kasabutan sa madawat nga suhol sa mga membro sa Board of Election Tellers.

Si Atty. Jay Balisado, Provincial Election Supervisor sa Comelec, Zamboanga del Norte mipahayag nga nahingangha sila sa dihang nadawat nila ang Memorandum gikan sa ilang Finance Services Department sa Commission on Election sa kaulohang Manila nga nagpahibalo kanila nga ang sohol nga honorarum nga ihatag sa matag membro sa Board of Election Tellers mokabat lamang ug tag usa ka libo ka pesos sigun sa Department of Budget and Management kon DBM SARO/NCA. Ang mga membro sa BET nga midumala usab sa Sanguniang Kabataan precincts ang pagadungagan ug kinientos ka pesos. Dugang kinientos ka pesos sa matag BET member alang sa transportation allowance.

Ang maong memorandum gipermahan ni Eduardo Mejos, Director IV, Finance Services Department sa Comelec Manila ug gi-parubahan ni Resurrection Borra, Acting Chairman sa Commission on Election. Matud ni Atty. Balisado, mismo ang mga election officers sa mga kalungsoran ug duha ka siyudad sa Dipolog ug Dapitan wala gayud mahimoot sa kalit nga kausaban sa honorarium nga madawat sa mga membro sa Board of Election Tellers. “Gisabotan na gud sa DepEd ug Comelec nga ang mga magtutudlo nga moserbe sa eleksiyon isip membro sa Board of Election Tellers makadawat ug tag dos tres mil ka pesos, unya karon nahimo naman hinoong usa ka libo,” reaksiyon sa mga election officers.

Tungod niini, gipahayag ni Provincial Election Supervisor Balisado nga ang tanang election officers sa Zamboanga del Norte ang mohimo ug manifesto ug ipadala sa ilang ulohang buhatan aron i-konsiderar ang nakabutang sa Memorandum gikan sa Finance Services Department nga tumanon gayud unsa man ang nahaunang kasabotan tali sa DepEd ug sa Commission. “Kon ang mga maestra wala malipay, kami sad sa field wala mahimoot sa gibuhat sa among ulohang buhatan, nagkanayon si Balisado.

Nagtuo si Atty. Balisado nga ang mga election officers maoy mahasngan sa kasuko sa mga magtutudlo, apan iyang giklaro nga dili sala ug sayop sa mga election officers nga mikupos ang ilang madawat nga honorarium kay kini maoy pagbuot sa ilang finance department. Angay masayran nga ang budget para honorarium sa mga magtutudlo ug uban pang galastohan gikaltas gikan sa Internal Revenue Allotment kon IRA sa Barangay hinungdan nga naglibog sila kon ngano nga gikapnan pa sa Comelec, Manila ang suhol sa mga membro sa Board of Election Tellers.

Base sa resolusyon sa Comelec, ang honorarium nga madawat sa mga membro sa Board of Election Tellers tag tres mil ka pesos ug dugang kinientos pesos isip transportation allowance base sa Memorandum of Agreement tali sa Comelec ug Department of Education. Si Atty. Balisado nanawagan sa mga magtutudlo nga miserbe sa nakalabay’ng piniliay sa barangay ug saguniang kabataan isip membro sa Board of Election Tellers nga dili lang sila maoy basolon kay dili kini maoy ilang pagbuot. Gani tungod niini, sila mismo ang nadismaya hinungdan nga naghimo sila karon ug manifesto aron kon unsa ang nahaunang nasabutan nga tag tres mil mao gayud ang ihatag ngadto sa mga magtutudlo. (The New Nandau, Vol. XVII No.19)

*

 

Pulso Sa Katilingban
Cicer M. Binghay
Hello Garci ug Martial Law

46 ka mga adlaw gikan karon saulogon ang Pasko. Christmas Day, matod pa sa Great Encyclopedic Dictionary: “Festival of nativity of Christ, kept on 25th day of December, observed as time of festivity and rejoicing. Ting general alert sa mga maninoy ug maninay. Ang mga permaninting mga utangan tilngonon matag Pasko. Bulahan dinhi ang mga opisyales ug mga regular kawani sa kagamhanan ug sa ubang mga pribadong establisamento nga mahatagan nianang naandan karon nga Christmas bonus nga dunay mga pakapin. Sa mga casual nga tal J. O’s wa jamoy makumkom. Nga kon mahimo ipang atol pa gyod sila nga ipang laid off sa panahon nga kasadya ug kalipaay alang sa tanan, tibook kalibotan sa mga kristiyanos.

Usab alang sa mga pensionado ubos sa GSIS walay timik nga makadawat silag Christmas bonus o tubo 10% sa ilang binolan pension. Pero diha sa mga pensionado ubos sa SSS nagpamaka ilang kasadiya kay gawas daitan sa Christmas bonus gipatuboan 10% pa gyod ilang pension nga sayong ihatag sa dili pa ang pasko. Dili gyod mahanaw kanang depekto nga motambayayong sa daghang diperensiya sa kalihokan ug paagi. Pero makalolooy karon diha sa nasod sa Pakistan nga ubos karon sa Martial Law. Ang General nga namonuan mi “justify” pag deklarar sa Emergency Power” gumikan sa pag grabi sa kaguliyang ug kasamok sa kalinaw..nga maoy naka gusbat sa ekonomikanhong kahimtang sa Pakistan sa dugay nga panahon. Labing importanting agenda nga gihatagan gibug-aton sa pag deklarar sa Martial Law mao ang hilabihang graft & corruption. Terrorista ug pag sulbong sa daghang “suicide bombing” nga nakakalas daghang kinabuhi.

Si PGMA gilayon mihatag mahigpit abiso sa atong embahador nga mahatagan seguridad ang atong mga Pilipino OFW’s nga nagtrabaho sa Pakistan. Silang tanan karon gipanghimang-noan dili magsaya-saya sa kadalanan sa urban areas sa Pakistan pag “safety” sa ilang kinabuhi sa dili pa sila makapaoli dinhi sa Pilipinas. Atong mga OFW’s nga nakasabwag halos tibook kalibotan, maoy kanunay’ng gihatagan pagtagad ni PGMA kay gumikan sa ilang mga hinagoang salapi dolyares gikan sa gawas maoy nakahatag dugang bili sa atong pesos batok dolyares. Nagpabilin karon ang atong OFW maoy No. 1 nga tal tawo, lawas ug kalag Pilipinhon nga maoy nakahatag kabaskog sa atong ekonomikanhong kahimtang sukad paglingkod ni PGMA.

Sukad sa kasaysayan sa atong nasod si PGMA lamang ang bugtong presidenti nga nakapakitag daghang kauswagan. Inanay kaha ang inaginod apan daghang mga inprakstakturang napuslan karon sa tibook nasod nga naka pahiusa sa tanang local governments nga nakig teamwork kaniya in nation building. Bisan sa daghang mga pasungit nga mga rallies ug protesta gihimo sa opposition sukad ug hangtod karon walay naka pilas matod pa sa mga Ilongo. Bagrong gid si PGMA batok sa daghang unos nga miabot sa iyang administrasyon.

“I will not stand idly. A president is always strong as she wants to be. “ matod pa ni PGMA ug kini dili nato karon malalis. Atong nakita unsa kalig-on karon si PGMA. Apan bisan pa, wala siya mahasi sa daghang mga akusasyon batok sa iyang administrasyon. Hibalo siya nga dili madali malumpag iyang kalig-on ug pangandam. Wala usab siyay gipakitang mga tilimad-on nga ang gihimo karon ni Gen. Musharaf sa Pkistan iyang sundogon. Dili siya gusto nga magpakatawo ang laing Marcos Regime mokaylap sa nasod. Kitang tanan nahibalo nga kon dunay pangandoy si PGMA pag pakanaog Martial Law sa nasod dugay ra ang maong panahon nga gihasi iyang pamunoan pagbutho sa Garci Hello o Hello Garci diin nakonis-konis iyang administrasyon sa daghang mga pagtamihid. Thanks to God nagpabilin ang pasensiya ni PGMA nga matibawas iyang termino sa 2010 nga walay daghang mag maitom anino nga nagpabilin nga makahimi, makapa muritsing sa mga kadugong Macapagal ug Arroyo ugma. (Press Freedom, Vol. XX No. 4)

 
Credits: Press Freedom is published every Saturday and entered as 3rd class mail matter in Dipolog City. Printed by Young Printing Press with Editorial Office located at Upper Turno, Dipolog City. Tel. No. (065) 212-4343 or 212-6665

 

Installation sa Rotary Youth Provincial Officials gihimo

 

Aron makakat-on ang mga kabataan unsa ang mga nagkalain-laing mga trabaho pang-gobiyerno diha sa kapitolyo probinsyal, gihimo kagahapong adlawa ang pormal nga installation sa Roatary Youth Provincial Officials atol sa flag ceremony didto sa Capitol Plaza ning dakbayan.

Sa pagpangulo ni Governor Rolando Yebes, nga maoy ni-administer sa Oath Taking ceremony, nanumpa ang mga nanahimong mga opisyales nga nagrepresentar sa mga nagka-lain-laing mga tulunghaan ning lalawigan sa ilang mga katungdanan isip tipik sa Rotary Youth Week activities nga naghatag ug kahigayunan sa mga kabataan nga makalingkod diha sa kapitolyo probinsyal uban ang mga hepe sa mga opisina aron ilang makat-unan ang mga importanteng butang pang-gobiyerno.

Si Angelica J. Carreon magtutungha sa Saint Mary’s Academy ang gitudlo nga Rotary Youth Provincial Governor, namahayag nga ang ilang partisipasyon karon sa mga kalihokan sa Rotary of Dipolog ang makahatag kini nila ug kasinatian unsaon pagkupot ug mga dagkong posisyon sa gobiyerno ug unsaon paghatod sa maayong serbisyo ngadto sa mga katawhan. Mapasigarbuhon usab si former Dapitan City Mayor Rodol Carreon ug 1st District Congresswoman Cecilia Jalosjos-Carreon ang mga ginikanan ni Angelica Carreon nga maoy personal nga mitaud sa Sash niini, uban ang iyang school principal ug si Gov. Yebes.

Gov. Yebes administered the Oath Taking of the newly appointed Rotary Youth Provincial Officials

Natudlo usab nga Rotary Youth Provincial Vice Governor si Chessa Kaye Lozada gikan sa ZN National High School.  Si Vice Governor Francis Olvis, school principal ug ginikanan ni Ms. Lozada ang mitaud sa iyang sash isip maoy molingkod usab sa hawanan sa Sangguniang Panlalawigan sulod sa usa ka semana nga kalihokan. Matud pa sa maong batan-on nga iyang gustong makat-unan ang pagpangday ug mga ordinansa aron iya kining magamit sa iyang pagbalik sa iyang tulunghaan kay siya mao usab ang presidente sa Supreme Student Government.

Sa pamahayag ni Board Member Uldarico Mejorada II, nga mao usab ang Chairman sa Rotary Youth Activities Week sa Rotary of Dipolog, siya mapasalamaton sa mainitong pagdawat sa kagamhanang probinsyal sa pagpangulo ni Gov. Yebes ug Vice Gov. Olvis ngadto sa mga kabataan nga makasinati sa mga trabaho sa mga hepe diha sa kapitolyo probinsyal aron ila kini nga magamit ugma damlag kung sila gusto unya nga mo-trabaho sa gobiyerno.

Sa kabahin ni Gov. Yebes, dili gayud siya magmakuli sa paghatag ug atensyon sa mga kabataan ning lalawigan tungod kay sila mao unya ang musunod nga mangulo sa atong dapit. Ang maong kalihokan ang pinasikad kini sa Proclamation # 07-01, ang pagdeklarar sa November 5-8, 2007 nga Rotary Youth Activities Week pinirmahan mismo ni Gov. Yebes kaniadtong Oktubre 30 niining tuiga. (Sam Buddy, Mindanao Star, Vol.III No.41)

 
Credits: Mindanao Star is published once a week and is circulated to the 25 Municipalites and 2 Cities of the province of Zamboanga del Norte. Mindanao Star Editorial Office: #096 C.M. Montaño Building, Gen. Luna Street, Dipolog City; Phone/Fax No. (065) 212-2576; Email: mindanaostar@zamboangadelnorte.com
 
 

Andres-andres export quality

Gipadas-og karon atubangan sa hawanan sa Sangguniang Panlalawigan sa Zamboanga del Norte ang usa ka balaodonon nga nagtinguha sa pagregulate sa pagkuha sa kinhasong Andres-Andres. Kini ang lakang nga gipadas-og ni Board Member Fernando Cabigon, Jr. ang chairman sa Committee on Agriculture sa Sanggunian.

Matud pa ni Board Member Cabigon adunay panginahanglan nga maregulate ang pagharvest sa maong matang sa kinhason diha sa atong kadagatan ilabi na sa mga lungsod sa Katipunan, Roxas, Manukan, Jose Dalman, Leon Postigo ug Baliguian. Gibutyag ni Board Member Cabigon nga ang maong kinhason nagkamahal na karon dinhi sa atong merkado tungod sa daku niining demand ngadto sa Taiwan ug Hongkong.

Gipadas-og karon ni Board Member Fernando Cabigon, Jr. ang chairman sa Committee on Agriculture sa Sangguniang Panlalawigan ang usa ka balaodonon nga nagtinguha sa pagregulate sa pagkuha sa kinhasong Andres-Andres.

Sa gihimo niyang pagsubay ang Andres-Andres gikompra lamang sa tag P15.00 ang kilo ug gikarga sa eroplano para na ibaligya buhi didto sa Taiwan ug Hongkong sa mas taas na nga presyo kay ang tipaka niini giprocess ngadto sa mahal na nga shellcrafts. Tungod sa dakung demand sa maong kinhason, matud pa ni Cabigon, nadasig usab ang mga mananagat sa pagpanalum niini diin gibana-bana nga mokabat sa usa ngadto sa duha ka toniladang Andres-Andres ang makuha kada adlaw.

Matud pa ni Cabigon kon magapabiling dili maregulate ang pagkuha sa maong kinhason moabot ang panahon nga maitos ra gayud kini diha sa atong kadagatan. Ilawom sa gipadas-og niyang ordinansa higpit nga gidili ang paggamit ug mga gadgets sama sa compressor para sa pagkuha sa maong mga kinhason.

Higpit usab nga idili ang pagkuha sa mga gagmay’ng Andres-Andres diin kon maapil kini sa pagkinhas kinahanglang ibalik ngadto sa dagat. Ang tanang manginhasay ug Andres-Andres kinahanglang molukat ug permit gikan sa hingtungdang kagamhanang local diin sila manginhas. Ang gipadas-og nga ordinansa ni Cabigon nagdala usab ug silut ingon man multa batok niadtong makalapas niini. (Press Freedom, Vol. XX No. 4)

*

MORE NEWS NGA BINISAYA

 

 

NOTE: SEND US YOUR NEWS.  Tell us what's going on in your barangays, clubs, schools, businesses and non profit organization. You can also send notices and announcements.
          

 

    Email to webmaster@dipolognon.com

      
Google
WEB THE DAILY DIPOLOGNON