November 8, 2008

 

DILG nahimuot  kalamboan ilang nakita dinhi sa Dipolog

Daku ang pagdayeg ug kahimuot ang gipabati sa representante sa Local Government Academy sa Department of the Interior and Local Government (DILG) nga si Joy Juanite ug Paulie Mora sa League of Cities sa kaulohang Manila, sa dihang nakita nila ang mga malampusong proyekto sa kagamhanang lokal sa Dipolog alayon sa pagpalambo ug kaayuhan sa mga kabataan ug mga batan-on.

Kini atol sa dihang mipahigayon sila ug duha ka adlaw nga evaluation ug monitoring  partikular sa implementasyon sa proyekto sa Millenium Development Goals-Family Based Actions for Children and Their Environs in the Slums (MDG-FACES).

Atol sa evaluation ug monitoring nila ni Juanite ug Mora nga ilang gipahigayon kaniadtong Oktubre 27 ug 28, nakadayeg sila sa hiniusang pakigtambayayong sa kagamhanang lokal sa Dipolog, sa pribadong sektor ug sa mga non-government ug civic organizations tungod kay nakita nila mismo ang nahimong agi sa implementasyon sa nasangpit nga proyekto nga wala nila makita sa ubang dakbayan  o  munisipalidad.

Ang mga tinugyanan sa DILG (itaas) nga sila si Mora (ikaduha gikan sa wala) ug Juanite (ikatulo gikan sa wala) samtang misusi sa kahimtang sa katawhan sa usa sa mga relocation sites sa Dipolog naka- pamatuod sa mga kalam- boan nga napahimutang dinhi ug dayon ilang gipahibalo ang ilang nakita ngadto kang Mayor Belen Uy (lara- wan sa tunga).

Ang duha ka larawan sa ubos mao ang Center for Children with Special Needs nga sa tibuok kapupud-an ang Dipolog mao lamay nagbaton niini sumala sa taga DILG.

Gani, gipahalipayan ug gidayeg  nila ni Juanite ug Mora ang administrasyon ni Mayor Evelyn T. Uy nga nakatukod sa Center for Children with Special Needs, ang nag-inusarang dakbayan sa tibuok nasud nga nakahimo niini nga proyekto.

Gawas niini, daku usab ang ilang gipabati nga pagdayeg sa administrasyon tungod sa pagtubag sa panginahanglanon sa mga resipyente sa FACES project, diin gipahimutang ang hingtungdang mga pamilya  sa Olingan Relocation Site, sa Sto. Niño Village sa Minaog o sa Dicayas Relocation, aron lang sila mahatagan ug disenteng puluy-anan kauban sa ilang pamilya.

Dugang pa niini, nasaksihan usab nila ni Mora ug Juanite ang pagpatuman sa support projects sama sa supplemental feeding ug ang implementasyon sa Solid Waste Management sa ilang tagsa-tagsa ka panimalay.

Kini ug uban pang documented support projects ang nakita sa duha ka evaluators nga nakahatag ug maayong impresiyon alang sa kagamhanang lokal, dili lang sa  punto sa political will sa hepe ehekutibo, apan sa kinatibuk-ang management ug pakigkoordinar sa ubang sector sa katilingban aron lang makab-ot ang tumong ug tinguha sa gi-implementar nga mga proyekto ug programa.

Malaumon ang duha ka representante sa Local Government Academy-DILG ug League of Cities nga mahimong malampuson ang MDG-FACES Project sa Dipolog tungod sa maayong koordinasyon nga nadugtong tali sa kagamhanan ug sa pribadong sector. (cio-prr)          

*

 

TARPAULIN NI LABAD-LABAD DAKONG POLITICAL GIMMICK

Nahimutang nga gimmick lang sa politika ug tinguha nga propaganda lamang sa bagitong congressman ning ikaduhang distrito ning lalawigan ang gimontar niini nga mga higanteng tarpaulin sa kunuhay mga proyekto niini sa mga kabarangayan.

Mao kini ang mitumaw nga impresyon sa mga katawhan ingon man ang pagpanginsusi sa mga sakop sa media kalabot na sa maong mga tarpaulin sa kongresista.

Una mao ang sa barangay Galas ning dakbayan sa Dipolog, kalabot na sa gitukod nga Training Center nga iyaha sa siyudad ug sa TESDA diin kini nagtumong sa pagbansay-bansay sa mga tinun-an aron makabaton ug kahibawo nga magamit sa panarbaho ug panginabuhi.

Matod pa sa panginsusi nahibaw-an nga si Cong. Labad-labad nagmontar ug tarpaulin diha sa Galas Highway diha gayud sa crossing padulong sa Galas Market, diin gianunsiyo niini ang mga kurso nga gilugway sa TESDA alang sa mga tinun-an.

Kahibaw-an nga ang TESDA usa ka nasudnong buhatan ubos sa presidente sa nasod, nga nagtinguha gayud nga momugna ug skills training alang sa mga katawhan, ug sumala pa kini naghimog pagpakigcoordinar sa mga gobyernong local ug mga opisyales niini. Sa maong Tarpaulin, gipahibawo sa congressman nga kini iyang proyekto, nga daw masabot nga nag-awhag lamang siya sa mga estudyante nga mopailawom sa maong programa.

Niadtong mga nakalabay nga buwan, tinubdan diha sa BArangay Galas, nagkanayon nga ang congressman mi-anunsiyo ug nga mogahin siya ug 10 milyones atubangan sa PTCA meeting sa Galas aron igahin nga pundo alang sa mga estudyante sa Skills Training Center aron nga kini molibre sa mga estudyante sa balayranan.

Nahibaw-an nga hangtod karon gipangita ang maong gisaad nga salapi tungod kay hangtod usab karon ang mga tinun-an nga motungha sa maong center, nagbayad man sa ilang kaugalingon nga salapi sa tag 1,500 nga registration fee. Ang maong center adunay talagtag lamang nga tinun-an kay kini aduna may bayad nga gipangayo sa buot motungha niini.

Bisan pa man tuod giangkon sa kagamhanan ning siyudad nga adunay tipik si congressman Labadlabad sa maong proyekto apan ang gisaad niini atubangan sa mga ginikanan ug maestro sa Galas, hangtud karon wala pa mahiabot.

Sa pikas bahin nahimutang nga propaganda lamang usab ang mga tarpaulin sa congressman diha sa mga proyekto nga sumala pa gikan pas kanhi magbabalaod Matoy Barinaga nga bag-o karong giimplementar sa iyang administrasyon, ang nag-una pa ang tarpaulin kay sa pagbarog sa maong proyekto. Usa niini ang covered court sa Sta. Isabel, nga mao pay pagdeliver ug graba ug uban pang materyales, gani wala pa kini masugdi ug trabaho apan una nang gideliver ug montar ang maong tarpaulin nga nag-anunsiyo sa maong proyekto, lakip niini nga susamang propaganda mao usab ang mga proyekto diha sa Minaog river control, tulunghaan nga iya sa Phil Chinese Chamber, tuluhanghaan nga iya sa DEP ED ug uban pang mga proyekto nga mas unang mibarog ang tarpaulin sa congressman kay sa mga proyekto niini.

Naglibog usab ang mga molupyo sa mga barangay diin mahimutang ang maong mga tarpaulin, tungod kay wala pa man silay nakitang edipesyo. Matod pa nila, basin mahimong molupad sa hangin ang maong proyekto ug mauwawan ang congressman, tungod ka yang propaganda maoy giuna niini kay sa katukuran ug implementasyon sa maong mga proyekto.

Sa pikas bahin mismo ang mga kapitan sa Nanginan ug Dicayo sa lungso sa Katipunan nga gituuhang gisugo ni congressman labadlabad ang mipamatuod mismo nga ang maong mga proyekto nga gianunsiyo sa iyang mga tarpaulin wala pa masugdi ug papel pa lamang tungod kay kini SARO pa man lamang ug advice of release, busa kini wala pa gayud magamit, apan gihimoan na ug tarpaulin sa maong magbabalaod.

Ang maong gimmick ug propaganda sa maong congressman ang hinayhinay karon nakapairita sa mga yanong molupyo, tungod kay matod pa wala kini mahisubay sa ensakto. Matod pa nila nga kung mahimo humanon daan ang proyekto ayha kini butangan ug anunsiyo sa tarpaulin tungod kay kini pamaagi nga iya sa usa ka traditional politician, kinsa gisalikway unta sa maong kongresista tungod kay kini nagpatoo man nga usa ka politico nga dili traditional. Matod pa nila mas molutaw nga tradisyonal nga politico ang maong magbabalaod tungod sa iyang mga tarpaulin nga giila nga gimmick ug propaganda lamang.

Samtang usa ka kanhi dakung opisyal sa lalawigan mipasibaw nga unta ang tarpaulin ipahimutang kung asa ang lokasyon sa usa ka proyekto ug dili kay anha ipangbutang daplin sa nasudnong dalan nga layo ra kaayo ang nahimutangan sa proyekto. Iyang namatikdan nga bisan ang proyekto nagkantidad lamang ug 50 mil pesos pero nakabalandra niini ang usa ka bonggang tarpaulin nga kung ayuhon pagsabot wala na magkatukma ang gidak-on ug balor sa proyekto ug sa gipamuyok lamang nga tarpaulin. (Southpoint, Vol.1No.43)

*

 

P1.2 BILLION BUDGET HEARING SUGDAN KARONG NOBYEMBRE 17

Tanang magbabalaod sa hunta probinsyal makaapil ug gisa sa mga pangutana sa budget sa matag opesina. Kini ang gipamahayag ni Board Member Anecito Darunday, Chairman sa Committee on Appropriation and Finance sa Sangguniang Panlalawigan nga ang tanang membro sa hunta probinsyal makaapil ug pangutana sa budget hearing gumikan kay kini gi-refer sa committee of the whole.

Matud ni Darunday, ang committee of the whole naglangkob na sa tanang membro sa komitiba sa Sangguniang Panlalawigan busa ang tanan makaapil gayud ug pangutana kon ngano nga ingon niini kadako ang ilang budget sa matag opesina para sa sunod tuig.

Sumala pa ni Darunday, kasagaran sa pagtuki sa budget sa ubang probinsya kini gi-refer sa committee on appropriation and finance apan dinhi sa probinsya sa Zamboanga del Norte ilang gipaapil ang tanang komi-tiba arun gayud maka-partisipate ang tanang membro.

Ang budget sa probinsya sa sunod tuig mokabat ngadto sa P1.2 bilyones ka pesos.

Gipaneguro ni Darunday nga sa dili pa matapos ang Desyembre niining tuiga mahuman na nila ang budget hearing sa tanang opesina arun sa pagka Enero dos mil nuybe mosugod na ug epekto ang budget alang sa nagkadaiya niining programa ug proyekto.

“All members sa Sangguniang Panlalawigan sa budget hearing sugod sa Nobembre 17 non stop na hangtud ma-aprubahan.”

Angay hibaloan nga gidasunan na sa Sanguniang Panlalawigan ang P169 milyones ka pesos nga 20% Economic Development Fund subay sa giaprubahan nga resolusyon sa mga membro sa Provincial Development Council sa miagi. Ang 20 porsyento EDF maoy ikarga sa 2009 General Fund Appropriation.

Mapasigarbohon usab nga gipahibawo ni Board Member Darunday nga sa tanang local government unit sa Zamboanga del Norte bugtong ang capitolyo probinsyal lamang ang wala makalampas sa personnel services. Kini nagpasabot nga duna pay subra nga salapi nga gastuhon para sweldo ug uban pang benipisyo sa mga kawani.

Ang probinsya dunay total annual income nga P873 Million ug dunay allowable nga 45% nga pangsuweldo sa mga empleyado, benipisyo ug leave mokabat sa P393 Million ka pesos samtang ang budget karon anaa ra sa P370 Million ug duna pay subra nga mokabat byenti tres milyones ka pesos.

“Tanang LGU sa Zamboanga del Norte, tanang lungsod apil ang Dipolog City, Dapitan City nag-exceed nana sa ilang PSCAP.

Nakaproblema na sila karon kay dili na sila maka-create ug bag-ong posisyon, naglisud ug hatag sa mga benipisyo ug salary increase kay subra na kaayo sila sa ilang PSCAP samtang probinsya sa Zamboanga del Norte layo pa kaayo sa PSCAP.”

Kasagaran nga nangpanghitabo sa LGU mao ang paghinubra ug dawat sa mga kaswal ilabi na ang pagtudlo ug regular kay bag-o ang administrasyon kay maoy rekomendasyon sa mga konsehal ug kaabin sa politika. (The New Nandau, Vol. XVIII No.14)

*

 
Opisyal nga representante sa ZaNorte dakong tsansa molusot sa Miss Turismo Pilipina Search

Human sa gihimong pre-activities sa mga opisyal nga kandidata sa Miss Turismo Pilipina Search didto sa kauluhang Manila, nakita karon sa mga beauty experts nga dako ug tsansa molusot isip finalist si Miss ZaNorte 2006 Ana Kristina Zason sa maong indigay sa kaanyag.

Si Miss Zason kinsa maoy opisyal nga representante sa ZaNorte ang mipakita kini sa iyang kahanas diha na sa pagrampa ug pagdala sa kaugalingon niini sa ilang mga nahan-ay nga kalihukan sugod kaniadtong Oktubre 18 hangtud kagahapong adlawa.

Si Miss Zason kauban ang mga kandidata nga nagagikan sa laing probinsya Atol sa ilang Boy and Kris TV guesting.
 

Miss ZaNorte, Ana Kristina Zason kauban si Miss International 2005 Precious Lara Quigaman.

Nahimong usa sa crowd and organizer favorite si Miss Zason gumikan kay nahatagan kini ug daghanang exposure atol sa TV guesting niini sa GMA-7 ug ABS-CBN.

Kahinumduman nga si Miss Zason human nakoronahan isip Miss ZaNorte 2006 nakakuha kini ug daghanang oportunidad gumikan kay nahimo kining modelo sa mga dagkong kompanya sa garments and textile sama sa Mossimo ug uban pang susamang company.

Ang buhatan sa Turismo ning lalawigan pinaagi na ni Provincial Tourism Officer Atty. Ivan Patrick Ang, nag-awhag kini sa katawhan ning lalawigan nga suportahan ang representante sa ZaNorte gumikan kay magdala man kini ug kalambuan sa lalawigan.

Angayang kahibaloan nga sa Administrasyon karon ni Governor Yebes wala lamang kini nagpunting sa usa ka programa nga ikalambo sa probinsya apan gusto niini nga mapalambo ang lalawigan pinaagi na sa paglakip sa mga programa nga makatabang pagpa-uswag ug pagpaila sa ZaNorte.(Roldan, Southpoint, Vol.1No.43)

*

 

Dipolog PNP todo-bantay na karon sa pag-obserbar sa todos-los-santos

Kapolisan dinhi sa dakbayan sa Dipolog ang naghan-ay na karon diha sa hingpit nga pagbantay alang sa pagmintinar sa kahapsay kahusay ug kalinaw sa pag-obserbar sa adlaw sa mga kalag sugod ugmang adlawa.

Sumala pa ni Supt. Gervacio Balmaceda, Chief of Police sa Dipolog Police Station nga ila nang gipangandaman ang pagpahiluna sa mga lugar nga butangan ug polis ilabi na sa mga traffic enforcers arun dili mahi-mong gubot ang agianan o dalan.

Ang mga sam-ang dinhi sa sentro sa Dipolog ug sa Gulayon ang butangan usab ug polis ug gidid-an ang mga katawhan nga magdala ug balisong o mahait nga hinagiban ug sa mga ilimnong makahubog kay ila gayud kining konpiskahon ug masakpan.

Giawhag usab sa kapolisan ang mga katawhan nga motabang ug bantay sa ilang kagalingon ug dili lang pasagdahan ang kapolisan gumikan kay daghang tawo ang ilang giatiman niining maong kasaulogan.

Dugang nilang giawhag nga sa panahon nga managkot, dili maghurot ug adto sa sementero nga mabiyaan ang balay gumikan kay maoy panahon nga mogimok ang mga kawatan sa pagpahimulos sa higayon.

Mao usab kini ang pag-awhag sa kagamhanang lokal ning dakbayan sa Dipolog pinaagi ni City Mayor Evelyn Uy ngadto sa mga katawhan nga dili magpasagad arun malikay sa panghitabo. (The New Nandau, Vol. XVIII No.14)

 
 

Post Harvest Facility ipabarog sa Liloy, Z.N.

GIKATAKDANG ipabarog na diha sa lungsod sa Liloy ang laing minilyon nga kantidad sa post harvest facility alang sa mais.

Usa ka meeting ang gipahigayon tali nila ni Governor Rolando Yebes, 1st District Congresswoman Cely Jalosjos Carreon, 3rd District Congressman Cesar Jalosjos, Liloy Mayor Jaime Lim, Maybel Bustalino sa Provincial Agriculture, taga National Agri-business  Corporation (NABCOR), ug sa taga Department of Agriculture. Sentro nga gihisgutan ang kabahin sa maong proyekto.

Ang lungsod sa Liloy ang naapil kini sa  1st batch nga adunay 15 ka mga post harvest facility ang dungan nga ipabarog sa (NABCOR). Unom niini alang dinhi sa Mindanao.

Mao kini ang Post Harvest Facility nga gipabarog ni Gov. Yebes  sa Lungsod sa Sergio Osmeña, ZN.

Giklaro ni Ma. Jaida Matoralgo, NABCOR Director nga aron makuha nila ang target pagpabarog sa maong post harvest facility karong Disyembre kinahanglan nga matukod na ang warehouse. Anaa na sa 45 porsiento ang nakompleto sa pagtrabaho sa mga equipment ug sug-dan na nila ang pag-instalar.

Gipahayag ni Mayor Lim nga andam na ang luna nga tukoran sa maong post harvest facility. Interesado pag-ayo ang ilang lungsod sa maong proyekto tungod kay maghatag kini ug tabang sa mga mag-uuma ug mismong mga katawhan sa liloy ug sa mga silingan niining lugar.

Tagsa-tagsa usab nga giklaro nila ni Governor Yebes ug Congressman Jalosjos nga andam silang mohatag ug counterpart nga gikinahanglan aron masugdan na ang pagpabarog sa maong post harvest facility.

Ang maong proyekto usa ka joint venture tali sa Local Government ug sa  Department of Agriculture pinaagi sa NABCOR.

Sa naha-unang plano apil ang lungsod sa Rizal ning atong lalawigan nga apil sa tukoran ug post harvest facility apan wala kini mahinayon tungod kay sa nakita dili pa igo ang production sa mais sa maong lungsod. Mao usab kini ang hinungdan kung nganong mi-atras si Congresswoman Carreon. Iyang giklaro nga dili viable sa karon ang lungsod sa Rizal sa maong post harvest facility, ma-usik lang ang gasto sa gobyerno.

Sa samang bahin, atol sa maong meeting kagahapon, prangka nga gipadayag ni Congresswoman Carreon ang kabahin sa operasyon sa 33 milyones pesos nga kantidad sa  post harvest facility nga anaa sa lungsod sa Sergio Osmena. Gusto niyang masayran kung unsa nay kahimtang niini karon human gi-inagurahan  ni DA Sec. Arthur Yap. Gipasabot ni Congresswoman Carreon nga kinahanglan mo-submiter sa iyang report ang plant manager aron mahibaw-an kung mikita ug mi-alkanse ba ang pagdumala sa maong post harvest facility, ug kung adunay problema mahatagan gilayon nila sa igong pagtagad ilabina ang kawad-on sa production sa mais. Gihatagan ug gibug-aton sa kongresista nga taud-taud nang nag-operate ang maong pasilidad apan wala pa siya masayod uban ni Governor Yebes kung unsa nay nahitabo. Ang maong operasyon sa post harvest facility sa Sergio Osmena mao usab kini ang basihan unya sa lungsod sa Liloy hinungdan nga kinahanglan mosubmiter ug report ang plant manager.

Niadtong mi-aging adlaw personal nga gisubay ni Governor Yebes ang maong post harvest facility sa maong lungsod.

Wala na tagad ma-presentar sa plant manager ang iyang report ngadto nila ni Governor Yebes ug Congressman Jalosjos tungod kay tagad na silang nakabiya alang sa laing importanting lakaw. (The New Nandau, Vol. XVIII No.14)

*

 

Mga mananaog sa banggang ‘Gulayan’ sa nutrisyon gipagula

Dakung  garbo karon alang sa mga nanay sa Purok Violeta, Looc, Barangay Estaka, ning dakbayan sa Dipolog human nila makuha ang unang dapit sa kompetisyon   sa “Gulayan Para sa Masa”, usa ka  community-based component project sa Accelerated Hunger Mitigation Program sa Departamento sa Agrikultura.

Ilang nadawat isip ganti sa ilang kadaugan ang premyong cash nga P10,000.

Ang ikaduhang dapit nakuha sa mga pamilya sa Purok Uno, One Heart sa Barangay  Sta. Isabel, ning dakbayan, samtang ang ikatulong dapit nakuha sa mga nanay gikan sa Purok 7, Tolda Uno sa BEC, sa Barangay Cogon.

Kahibaloan nga ang nasangpit nga proyektong “Gulayan Para sa Masa” gimugna sa Departamento sa Agrikultura ilawom sa Accelerated Hunger Mitigation Program, usa ka  landmark program sa Arroyo Administration aron sa pagtubag sa suliran sa kagutom ug malnutrisyon. 

Ilawom niini nga programa, gimugna ang kompetisyon  alang sa pinakamaayong proyekto sa pagpatubo sa mga utanon ug ang pag-alima sa mga manok diin giawhag ang tanang interesadong organisasyon, hut-ong o tulunghaan sa pag-apil niini nga kompetisyon.

Samtang ang mga mananaog sa school-based “Gulayan Para sa Masa” dinhi sa Dipolog City level naglangkob sa Miputak East Central School alang sa unang dapit, Galas Elementary School sa ikaduhang dapit, Sinaman Elementary School sa ikatulong dapit ug Alberto Q. Ubay Memorial Agro-Tech Science School sa ika-upat nga dapit.

Ang pag-ila sa mga manana-ug giatol human sa “State of the Children of Dipolog Address ni Mayor Evelyn T. Uy kaniadtong Oktubre 24 sa hawanan sa Sangguniang Panlungsod ug mismo si Mayor Uy ang mitunol sa mga Certificates of Recognition ngadto sa mga manana-og.   

Ang pagmonitor ug paghimo sa evaluation  gilangkuban sa mga personahe sa Dipolog City Nutrition Council, Nutrition Services Division sa Buhatan sa Hepe Ehekutibo ning dakbayan, City DILG nga gipangunahan nila ni  Ma. Del Pilar Pamlea R. Tarroza, ang regional Nutrition Program coordinator  ug ang iyang assistant nga si Nimfa D. Ekong sa Departamento sa Maayong Panglawas. (cio-prr)    

*

 

Balance Fleet ibutang sa 2nd District

Gimanduan karon sa gobernador si Provincial Engineer Ramon Ochotorena sa pagbutang ug balance fleet para sa 2nd congressional district sa ZaNorte aron maoy moatiman sa pagmintinar sa kadalanan sa probinsiya ug kabarangayan.

Kini ang gipahibawo ni Governor Rolando Yebes sa iyang pagpakigtagbo sa mga barangay kapitan sa Sindangan kagahapong adlawa.

Matud pa sa gobernador ang maong balance fleet mosirbisyo kada lungsod sa 2nd district sulod sa usa ka buwan aron matubag ang hangyo sa mga kabarangayan sa pagkomponi sa ilang mga dalan.

Ang gobernador miapilar usab sa mga barangay officials nga unta ilang ampingan ang mga proyekto nga gihatag sa probinsiya para mapahimuslan kini sa mas taas nga panahon.

Sa samang bahin gipahibawo ni Governor Yebes nga karong sunod tuig maoy higpit niyang ipadas-og ang pagpalagsik sa sector sa agrikultura ug turismo sa probinsiya.

Sa tinguha nga matabangan ang mga mag-uuma sa pagtransportar sa ilang mga produkto paingon sa dagkung merkado, gipahibawo sa gobernador nga magbutang siya ug duha ka trak kada distrito sa ZaNorte nga maoy magamit nila kargahan sa ilang produkto gikan sa ilang umahan hangtud na sa merkado sa Visayas.

Ang pagabayaran sa mga mag-uuma mao ra ang petrolyo, dugang pahayag sa gobernador.

Samtang si Maybel Bustalino, Supervising Agriculturist sa probinsiya mipahayag nga sa ilang ika duhang hugna sa Hi-Green program mao na ang gitawag nila ug Go Negosyo o ang pagtabang sa mga Hi-Green farmers sa pagpangita ug merkado sa ilang mga produkto paingon sa Visayas.

Sa kabahin ni Provincial Engineer Ramon Ochotorena kini miapilar sa mga barangay kapitan nga karong panahuna dili gayud sila motrabaho sa pagkomponi sa mga barangay roads gawas lamang kadtong anaa sa critical nga situwasyon kay maguba lang ug samot ang dalan tungod sa pagpunay ug uwan karong panahuna.

Matud pa ni Engr. Ochotorena mahurot na lang unya ang ilang pundo sa pagbalik-balik sa ilang agi sa gastu sa petrolyo.

Gipasabot sa provincial engineer sa ZaNorte nga karong buwan sa Enero kon mosugod na ug init ang panahon paspasan sa ilang buhatan ang pagkomponi sa nagkadaiyang mga dalan sa barangay nga nagkinahanglan sa pag-atiman.

Samtang gidasig usab ni Engineer Ochotorena ang mga barangay kapitan sa 2nd district sa pagsumitir sa labing sayu sa ilang mga project proposal para farm to market road nga pagapundu-han sa Department of Agriculture karong sunod tuig ni Secretary Arthur Yap. (Press Freedom, Vol. XXI No. 1)

*

 

Tourism Council padayong nagdasig sa mga Local Businessmen nga mobobo puhunan nga magpalambo sa Turismo sa ZaNorte

Subsob ang gihimong paningkamot karon sa buhatan sa Turismo ug Tourism council ning lalawigan nga mahatagan ug katubagan ang mga kinahanglanon sa mga turista ug dumuduong sa ZaNorte.

Usa sa gihimo sa konseho sa turismo mao ang pagdasig sa mga local businessmen sa probinsya nga mobobo diha na sa ilang puhunan nga maghatag ayuda sa turismo sa lalawigan.

Sa maong paagi mas makakabig ug daghanan nga local tourist ingon usab mga turista nga nagagikan sa laing nasud gumikan kay ang paglambo sa industriya sa negosyo ug turismo sa usa ka komunidad timaan kini nga hapsay ug malinawon ang maong dapit.

Kaniadtong miaging adlaw hingpit ng gibuksan ang bag-ong beach resort sa isla sa Aliguay nga mao ang Casa Alleana nga diin gipanag-iyahan kini sa pamilyang Ranillo. Ang maong Resort ang nahimutang kini sa maayong lokasyon sa maong isla gumikan kay nag-atubang kini dinhi sa dakbayan sa Dipolog.

Serene and pristine white-island of Aliguay in the city of Dapitan.

Gitambongan ang pagbukas sa maong resort sa mga local businessmen ug young professionals dinhi sa ZaNorte.

Ngani isip suporta sa pag-invest sa maong negosyo misaksi sila si Provincial Tourism Council Chairman ug Vice-Chairman Atty. Alan Ranillo ug Atty. Flint Concha ingon usab si Provincial Tourism Officer Atty. Ivan Patrick Ang, kinsa maoy mirepresentar ni Governor Rolando Yebes.

Matud pa ni Atty. Ang nga ang pagtukod sa maong resort sa isla sa Aliguay usa kini ka welcome development sa probinsya gumikan kay aduna na unyay mamahimong alternatibong balay bakasyonan ang mga turista nga mobisita dinhi sa lalawigan.

Dugang pa ni Ang nga ang Aliguay usa kini ka maanindot nga isla nga ang kalidad ug ang kaputi sa balas ang ikatandi kini sa naila na kaayo nga Beach Resort nga mao ang Boracay.

“Kung ang Visayas aduna kini Boracay, aduna usab kita’y mini-Boracay nga mao ang Aliguay”, maoy panapos nga pamahayag ni Atty. Ang. (Roldan, Southpoint, Vol.1No.43)

*

 
Sa Jose Dalman
Mga Subano mapasalamaton PHILHEALTH, LANDO-BIBO program sa gobernador

Dako ang nahimong kalipay nga gibati sa mga kadagkoan sa pundok lumad sa lungsod sa Jose Dalman ning lalawigan, diha sa programa sa maayong panglawas sa mga katawhan sa kagamhanang probinsiyal nga gipatuman ni Gobernador Rolando E. Yebes nga gipatuman, gipalig-on ug gikultibar sa Community Development Assistance Unit, nga gipanguluhan ni Mr. Rony Pacilan.

Si Dioleto ‘Joyboy” Tigon, ang Timoay Labi sa maong lungsod sa iyang suwat nga gipadangat sa buhatan sa CDAU ang malipayon kining mipahibawo sa dakong pagsalig ug kahimuot sa pundok lumad sa maong lungsod, human nila madawat ilang mga PHILHEALTH family cards gikan sa LANDO-BIBO program sa probinsiya.

Matod pa ni Tigon nga kapin sa libo ka mga pamilya gikan sa 18 ka mga barangay sa Jose Dalman ang nakadawat sa maong benepisyo nga kasagaran niini ilang mga kaubang subano. Matod pa ni Tigon nga gi-agni siya sa iyang mga kauban nga mosulat gayud ngadto sa gobernador aron nga ipaabot ang ilang dako kaayo nga pasalamat ngadto sa gobernador.

Dugang pa ni Tigon nga sa dihang iyang gitagik ang maong sulat, naatol usab nga nahiabot ang CDAU unit head nga si Mr. Rony Pacilan diha sa iyang karenderaia sa poblacion Jose Dalman mao nga iya kining personal nga gipasalamatan sa maong programa nga gipatuman ilawom sa buhatan sa gobernador nga mao ang CDAU.

Matod pa usab ni Tigon nga gidasig siya sa maong opisyal nga ipadangat diretso sa gobernador ang maong pasalamat tungod ka yang gobernador man ang mipatuman niining tanan.

Si Tigon malipayon usab nga mipahibawo sa CDAU nga daghan karong mga sakop sa lumad nga wala pa mahiabti sa maong programa ang miduol kaniya aron nga sila mapailawom usab sa maong serbisyo nga gilugway sa probinsiya dili lamang sa mga lumad kung dili sa tanang mga katawhang kabos ning lalawigan.

Kahinumduman nga ang maong programa nga BIBO ang usa sa mga nag-unang hinungdan nga nadawat sa gobernador ang pinakataas nga pasidungog nga Lingkod Bayan Award niadtong miaging tuig 2007 nga gihatag sa Civil Service Commission alang sa lider nga nakamugna ug talagsaong programa nga nakahatag ug dakong impact sa mga kinabuhi sa katawhan nga iyang nasakupan, nga hayan angayan nga sundogon sa ubang lalawigan. (PIC)

 
 

LANDO-BIBO mas milig-on, midako ug mikuyanap 

Giawhagan karon sa buhatan sa gobernador, diha sa Community Development Assistance Unit kon CDAU pinaagi sa hepe niini nga si Mr. Rony Pacilan ang tanang mga miyembro sa LANDO-BIBO ilabi na kadtong gipailawom sa Provincial Health Care Assistance Program ingon man sa PHILHEALTH ang bag-ong gipatuman nga direktiba sa kagamhanang provincial ilawom sa Indigency Program niini, nga mao ang status classification diha sa mga tambalanan nga gipanag-iyahan sa provincial, lakip na ang Zanorte Medical Center.

Matod pa ni Pacilan, ilawom sa Status Classification, ang mga miyembro ang ipasulod diha sa classification nga giluwatan sa buhatan sa gobernador. Iyang gipasabot nga kadtong mga miyembro nga ilhon nga C-1 kini makaangkon ug 25% nga diskwento sa total hospital bill, ang C-2 adunay 50% nga discount sa total hospital bill, samtang ang C-3 ipailawom sa 75% nga discount.

Matod pa sa maong opisyal lakip sa makaangkon sa maong benepisyo mao ang mga LANDO-BIBO Philhealth, kinsa adunay mga excess nga balayronon human kuhaan ang ilan total hospital bill sa PHILHEALTH deductions. Matod pa ni Pacilan nga kini subay sa gi-adaptar karon nga bag-ong palisiya sa kagamhanan.

Matod pa niya nga mas klaro karon ug mas dako ang madawat nga benepisyo sa mga katawhan diha sa health care program ubos sa LANDO-BIBO initiative nga gipatuman sa provincial government sulod na sa upat ka tuig karon.

Ang LANDO-BIBO ang gimugna ug gipalig-on sa gobernador ubos sa Community Development Assistance Unit nga gipanguluhan ni Mr. Rony Pacilan sukad pa niadtong tuig 2004 human milingkod ang gobernador sa iyang katungdanan.

Ang PHCAP mao ang health care intervention program alang sa LANDO-BIBO beneficiaries nga gipaligon na karon sa tibuok lalawigan.

Dugang pa ni Pacilan nga uban sa kausaban sa pagdawat sa PHCAP mao ang higayon nga pagahatagan ug validation forms ang mga miyembro nga malandig sa tambalanan. Kini matod pa niya diha gayod sa panahon nga I admit na kini. Busa iyang gi-awhag ang mga BIBO nga kinahanglan mohapit una sila sa BIBO center sulod sa mga tambalanan sa probinsiya ug mangayo ug validation form aron nga ilang maangkon ang maong benepisyo.

Dugang pa niya nga dugang information advocacy ang gipahigayon karon sa iyang buhatan ngadto na sa mga BIBO barangays sa tibuok lalawigan aron nga mahibaw-an sa mga katawhan ang maong kausaban, nga iyang giila nga mas makahatag ug klaro ug mas dako nga benipesyo alang sa mga miyembro sa maong kapunungan.

Dugang pa usab sa maong opisyal dungan sa pagpahigayon sa maong information advocacy mao ang expansion of membership nga dugay na kaayo ng gipaabot sa uban nga wala pa mahisulod sa maong programa.

Dugang pa niya nga gisugdan karon sa iyang mga field facilitators ang registration and enrollment program diha karon sa mga kabarangayan aron ang wala pa mahisulod sa maong programa ang mahatagan usab ug kahigayonan nga mahisulod ug makaangkon sa maong mga benepisyo.(PIO)

*

 

GSP Jamboree mibanos  human Urban Boy Scouting

Midagsang ang liboan ka mga Girl Scouters ning semanaha didto sa Zamboanga del Norte Sports Complex nga maoy mihulip sa 6 ka adlaw nga bag-o lang gitapos nga Urban Boy Scouts Jamboree nga gipaluyuhan ug gidumala sa kagamhanang probinsyal.

Ang maong mga scouters nagagikan sa 25 ka mga lungsod ning probinsya ug duha ka mga dakbayan sa Dipolog og Dapitan, gikan sa mga elementary ug mga tulunghaan sa sekondarya.

Ang maong kalihukan ubos karon sa GSP Council diin ang probinsyal nga buhatan sa Department of Education mao karon ang nagpahigayon sa mga nagkadaiyang kalihukan ubos sa paglugway gihapon sa ayuda gikan sa ZaNorte.

Si Gobernador Rolando E. Yebes ang mipasibaw sa iyang dako nga suporta sa maong kalihukan subay sa hangyo usab nga gipadas-og sa Department of Education ngadto na sa iyang buhatan.

Ang maong sunod-sunod nga kalihukan sa scouting jamboree ang nakahatag dili lamang sa kalamboan sa kalidad ug liderato sa mga kabataan nga mingsalmot niini, kung dili kini nakahatag usab kalagsik sa patigayon ning dakbayan sa Dipolog.

Si Gobernador Rolando E. Yebes ang mipasibaw sa iyang dako nga suporta sa maong kalihukan subay sa hangyo usab nga gipadas-og sa Department of Education ngadto na sa iyang buhatan.

Midagsang ang liboan ka mga Girl Scouters ning semanaha didto sa Zamboanga del Norte Sports Complex nga maoy mihulip sa 6 ka adlaw nga bag-o lang gitapos nga Urban Boy Scouts Jamboree nga gipaluyuhan ug gidumala sa kagamhanang probinsyal.

Sa pikas nga bahin ang gobernador miesplikar sa ayuda sa gobyerno nga kini mahimong malamposon nga kalihukan, dili lamang sa pagpalagsik sa patigayon kon dili aron  maila nga ang lalawigan malinawon taliwala sa dinagko nga mga kalihukan nga gipahigayon dinhi sa dakbayan.

Matud pa niya nga ang mga kalihukan sama sa Hudyaka, Minbizcon, Jaycess convention ug karon ang jamboree maoy mga kalihukan nga magpahimutang nga ang  lalawigan malinawon ug adunay katakos nga mopahigayon ning maong kalihukan nga usab magdala sa balita sa kalinaw ning atong probinsya.

Ang maong mga kalihukan nga nahinganlan pulos gisuportahan ug gihatagan ug dakong ayuda ug pagtagad sa provincial government ubos sa direktiba sa gobernador. (The New Nandau, Vol. XVIII No.14)

*

 

Pulso Sa Katilingban
Cicer M. Binghay
Walay katapusang ‘corruption’

Halloween Oct. 31, the last day of the year in the Old Celtic Calendar, and the nights of all the witches; All Saints’ Day, 1st of Nov. day on which there is a general celebration of all Christian saints; All Souls’ Day, 2nd of Nov., day on which prayers are offered for the souls of all the faithful deceased.  Mao kini ang panahon nga kalag-kalagon atong mga kandila, gasa ug mga bulak sa genuine kalag sa atong kamentaryohan.

-oo0oo-

Naapiktahan atong mga OFW’s sa global financial crisis.  Dimalas kadtong ang mga naatlan nga nahinayak paglarga, nga wala makasulod trabaho.  Dakong suliran ang pagbawi sa gastos, lukat sa giprendang kabtangan ug sa gibilin pamilya.  Kini sila nagkaguliyang asa mopaingon ug unsay buhaton.  Samot nga walay kasikas kon unsay ika alagad sa Malakanyang, niining mga palpak OFW nga “zero remittance?”

-oo0oo-

Gisugdan pagpanguha sa mga patay’ng pasahero sulod sa nakulob Princess of the Star.  Gibanabana subra sa 500 ang siksikon.  Problema kaayo kay gisiguro nga sa maong gidugayon, lagmit nangabungkag ang mga patay’ng lawas nga kaha gikaon sa nagkalain-laing isda o sa kalihokan sa dagat.  Hinoon mga nagmahal kanila, dako pag paglaom nga kumpleto pa ilang mga kadugo nga maila nga kahatagan sa naandang paglubong.

-oo0oo-

Naay mga produkto pagkaon Made in China nga mga negatibo sa melamine nga gitaho sa BFAD.  Apan nagpabilin nga ilang gipadayon ang pagpahimangno, nga taman sa mahimo, maglikay nga mamalit sa mga produkto nga Made in China.  Kay labing ulahi nga balita gikan sa Main Chain laing tig produkto pagkaon nga gisambugan melamine ang gipang dakop gipasakaan ug sumbong.

-oo0oo-

Likayan na lang gyod, kay dinhi sa atoa, clever pa sa tanan ang mga Pilipinhon nga nakahanayak pagpangumpra nianang mga gatas nga walay titik o tinod-anay nga credential nga ialng gipang repacked dayon gilabelan bisan unsa.

-oo0oo-

Dili matabang sa taga NFA pagpitol, ang pag sitsiritas sa bugas nga tag P25.00 ang kilo gihimong 27, 28 hangtod 30 ang kilo sa bugasan.  Dili ikatingala, naa sa ahensiya ang nabaniog nagabukal ang graft and corruption.

-oo0oo-

Walay nalipay sa gibalita nga miabot na si Jocjoc Bolanti ang Undersekretaryo sa Agrikultura nga giingong responsabli sa pagtahoy kabo sa binilyon salapi alang ipamalit fertilizer sa mag-uoma.  Kinsay malipay.  Ang salapi nahurot sa miaging piniliay matod pa.  Ang paningkamot nga mataral kining Bolanti sa hustisya, giipitan nga magpabilin “untouchable” sa mga hingtungdang otoridad nga mga manageable instrumento sa Malakanyang.

-oo0oo-

Klaro daan trampas ang giingon ni PNP Chief Verzosa nga ang salapi nadala ni Ret. Gen. De La Paz, Director sa PNP, Comptroller o “controller of accounts,” intelligence fund sa PNP.  Nag usik-usik lang ang gastos paghimog imbestigasyon ang taga senado batok “stainless pader sa Malakanyang.” (Press Freedom, Vol. XXI No. 1)

 
Credits: Press Freedom is published every Saturday and entered as 3rd class mail matter in Dipolog City. Printed by Young Printing Press with Editorial Office located at Upper Turno, Dipolog City. Tel. No. (065) 212-4343 or 212-6665

 


Tanum ta ug paliya

 

Sa tanang dapit sa nasud sa Pilipinas mabuhi ang tanum nga paliya. May duha ka matang ang paliya mao ang puti ug berde nga klasi ug kasagaran natong gitanom. Uban pang naila kaayo nga matang mao, ang Sta. Rita ug Karela nga matang ug Makiling.

Nia ang bansayan pagtanum:
1. Andamon ang yuta ug luna tamnanan, maayong pagkahilo, ug libre na sa mga liso sa sagbut moturok, maoy mokompetensiya sa mga elementong pagkaon sa tanum.

2.Pili-a ang liso nga imong paturokon gikan sa mahimsog ug maayong binhi.
3. Patudka ang piniling himsug liso nga imong patudkon sa Plastic bags, o kahon binutangan sa compost soils.

4. Human motorok ang liso gisimilya sa kahon o plastic bags, paabuta gikan sa 3-4 ka himsog nga dahon sulod sa duha ka semana ug andam na kini ibalhin nimo tanum sa gi-andam nga tamnanan. May duha lang hangtud sa tulo ka tanum ang matag bundo.
      Ang giladmom pagtanom - 3 ka sentimetro
      Gintang matag laray - 50 ka sentimetro
      Gilay-on sa tudling - 1 1/2-2 ka metros
      And gidugayon gikan pagtanum hantud pag-ani - 75-90 ka adlaw.

5. Himo-a dayon ang paga-paga sa kawayan para katayan sa balagon paliya-andam sa pagbulak-pagbunga.

6. Gamiti ug compost nga abuno sama sa BIO-N, vermi cast o natural nga abuno gikan sa nawong sa yuta.

7.Gamiti ug rekomendadong pampatay-dangan, ang mga “fruit fly” ug “fruit worms”. Ang kasagaran usab nga sakit mao ang “white rootknot”, ug “Anthracnose.” Puston nimo ang bunga sa Paliya sa bisan unsang papel nga dali rang musohop ang tubig.

8. Kinahanglan ang dugang kakugi - kinahanglang imong ibanos-banos ang pagtanum sa lain sab nga matang. Usa sa mga pamaagi nga masumpo ang sakit, ug kinahanglan limpyo kanunay ang tamnanan aron maangkon nato ang dakong ani kon abot.
(Southpoint, Vol.1No.43)

 
 


Where Were You  When We Needed You?

Adlaw   karon sa mga patay apan si Francisca nagkadusingot didto sa sa ilang kusina nga nagluto ug biko ug bibingka. Kinahanglan nga maluto niya ang gipang-order nga usa ka kaldero nga biko ug duha ka dosena nga bibingka kay matod pa sa nag-order niini, ila kining dal-on ug ihalad  didto sa sementeryo nianang pagkagabii.

Milabhag sa panagway ni Francisca ang matagbawong pahiyom. Doble ang iyang ginansiya karong adlawa,  human niyag luto sa biko ug bibingka, iya na sang lutoon ang gi-order nga binubod sa iyang silingan nga nakabanag  diborsiyadong German.

Doble-kayod ang gihimo karon ni Francisca kay siya na man god lang usara ang nangita ug nagbuhi sa ilang pamilya. Ang iyang bana nga si Victorino mga tulo na ka tuig kining  naparalitiko ug katulo na kining giatakeg high blood ug sa ikatulo nga atake nilahos na kinig ka-grabe. Dili na kini makasulti ug ang tambal nga gi-maintain niini dako na kaayog  tibhang sa iyang kitaon nga nakaapektar na kaayo sa ilang inadlaw-adlaw nga panginahanglanon. Sa paminaw ni Francisca morag dili  na niya maagwanta ang iyang pag-antos sa tumang kakabos.

Taudtaod, misulod sa kosina ang iyang anak dalagita nga iyang gisugo ug palit ug yeast nga alang itimpla sa giluto niyang bibingka.

“Nay,” matod sa dalagita. “Sa wala pa mo naminyo ni tatay niadto, pilay imong trato?”

Ingog natuk-an si Fracisca nga miatubang sa iyang anak-dalagita:  “Gawas sa imong tatay Victorio, wala gyod koy laing natrato.”

“Buot nimong ipasabot, Nay, first love nimo si tatay?” sukot sa dalagita nga nanagko ang mga mata.

“Aw, maingon-ingon gyod ana, Inday,” tubag ni Francisca nga miukab sa gitak-ang  kaldero nga gilutoan sa bibingka.

“Nay, tinuod ba nang panultihon sa Iningles nga “First Love Never Dies?” sukot sa dalagita nga misandig sa kilid sa lamesa.

“Tinuod na, Anak,” matod ni Francisca nga sa iyang mga ngabil nagpamaak. “Tan-awa nang imong tatay, katulo na atakeha ang inatay apan hangtod karon wala pa gihapon siya mamatay!”

Ayayaaaaaay!

#####

Thanks ngadto kang Ms. Mary Ann Magtuba nga maoy nagpadala niining sugilagming nga atong gipanakot karon ning tudling.

Ato kining gi-feature pahaom ning adlaw sa mga kalag nga gisaulog sa tibuok Pilipinhon nga Kristohanon. Ug sama sa miaging tuig nga kasaulogan sa adlaw sa mga patay, husay ra unta gihapon ang kasaulogan didto sa atong mga sam-ang . . . ma-pribado man o ma-publiko. Wala na untay magpabuto ug mga rebentador o kaha magdala didto ug mga ilimnong makahubog aron ang mga manuaw didto sa mga lubong sa ilang minahal sa kinabuhi dili unta  mabulabog!

#####

Pahinumdom lang sa mga igsoon nato nga dili sila maghurot ug duaw didto sa sementeryo ug biniyaan ang ilang mga balay nga walay tawo. Niadto bayang miaging tuig sa maong kasaulogan, daghang gipangkawatan nga kabalayan kay lagi way mga tawo nga gibilin didto. Usab, nagsiot karon ang atong mga sementeryo ug pagbantay sa inyong mga bulsa o kaha mga pitaka kay karon sab ang adlaw nga kasaulogan sa mga tawong kiriwan. Mga tawong may mga kamot nga mahilig ug kugihan kaayong manguot sa bulsa sa uban!

#####

Nalingaw kong nagtan-aw sa lima ka mga obispo nga gipangulohan ni Monsinyor Lagdameo nga nag-presscon kagahapon sa hapon. Sa tonada sa ilang panawagan, buot nilang agnihon ang katawhan nga molihok na ug mag-people power batok sa kasamtangan natong kagamhanan nga nila pa, naputos na sa daghang mga anomaliya nga maoy naka ut-ot sa atong nasodnong ekonomiya.

Naglibog ko sa mga obispo. Niadto nga milutaw ang Hello Garci Scandal nagpabiling tak-om ang ilang mga ngabil ug wala sila mosanong sa mga panawagan nga mag-people power na batok sa kasamtangang kagamhanan. Dihang milutaw ang pagpanghatag ug suborno sa atong mga kadagkoan sa gobiyerno didto mismo sa nataran sa palasyo ug gani, usa sa gitagaan sa suborno mao si Fr. Panlilio, walay timik ang kadagkoan sa kahugpongan sa atong mga obispo. Dihang milugwa ang eskandalo nga naglambigit kang Comelec Chairman Benjamin Abalos nga haskang klaroha na man niadto nga may kalambigitan ang atong Pangulo (kuno) walay timik gihapon ang atong  kahugpongan sa mga obispo.

Apan karon, nalain ang tono sa pipila sa atong mga obispo pinaagi sa pagpangulo ni Bishop Lagdameo. Open na sila sa ilang baroganan batok sa kasamtangang namunoan. Hinoon, nila pa, ang ilang panawagan wala magdala sa ilang kapunongan kondili personal lamang nilang baroganan. What for? Nganong karon pa man nga pipila na ka ihap sa tudlo mapulihan na man nang nanimuyo karon didto sa palasyo! Karon nga way tataw nga seryoso ug kontrobersiyal nga mga issue  karon pa manawagan ang maong mga obispo nga mag-people power  kitang mga tawo batok sa kasamtangang namunoan sa ato karong gobiyerno?

Ulahi man tingali ning buot ipabuhat sa maong mga obispo sa  mga tawo nga mag-people power batok sa atong kasamtangang namunoan sa gobiyerno. Sa ilang pamahayag nga ila lamang kadtong personal nga baruganan ug dili kadto baruganan sa ila gayong kahugpongan makaingon kita nga morag dunay lain nga tumong ang gipanghimo sa maong mga obispo. Ang ila karong gipanghimo angay natong tubagon nga “Where were you when we needed you?”

#####

Bag-o lang kaming nahiadto sa Dakbayan sa  Davao aron pagsalmot sa 1st Mindanao IBP Palaro. Mibuliskad ang akong dughan nga nagpaminaw sa mga manlalaban nga halos pulos dayeg sa ilang mga pangutana kanato kabahin sa kauswagan karon sa atong dakbayan. Nila pa, gawas nga malinis ang atong kalikopan, malinawon kaayo ang atong dakbayan.Daghan ng mga investors nga namuhunan sa ilang negosyo dinhi sa atua ug kana nagpaila nga excellent daw ang peace and order dinhi sa atong dapit.

Didto ko makurati kay kadaghanan sa mga IBP Presidents didto nga mitambong sa maong tigi sa paugnat sa kusog, unanimous silang anhi dinhi sa atuang dakbayan pagahimoon ang 2nd Mindanao IBP Palaro. Wala pa hinooy final nga kasabutan tali kanamong mga Pangulo sa IBP apan sa tonada sa ilang sinultihan buot gayod sila nga anhi dinhi sa atua pagahimoon ang sunod nga Palaro!

Well, kinsa bay hadlokon kon dinhi sa atong dapit ang 2nd Mindanao Palaro ipahigayon?Aduna na kitay mga facilities ug dili kita kapos sa mga hotels. Labaw sa tanan, ang ato diring mga kadagkoan sa Lokal nga kagamhanan dili mga hikawan.

Fight . . . sa sunod namong tigom kun buot sa mga Mindanao IBP Chapters nga dinhi sa atong dakbayan pagahimooon ang 2nd Mindanao IBP Palaro ipahigayon, ang tanyag akong dawaton!

So, layo pa gani ang maong kalihokan, mag-practice na ang atong mga mandudulang manlalaban aron makuptan nato gihapon ang tropeyo sa pagka-champion! (Dipolog Chronicle, Vol.VIII No.18)

*

MORE NEWS NGA BINISAYA

 

 

NOTE: SEND US YOUR NEWS.  Tell us what's going on in your barangays, clubs, schools, businesses and non profit organization. You can also send notices and announcements.
          

 

    Email to webmaster@dipolognon.com

      
Google
WEB THE DAILY DIPOLOGNON