October 30, 2008

 

Atty. Abarquez: “Wala ko mi-hit and run”
TIGULANG PATAY NADASMAGAN SAKYANAN NI ATTY. ABARQUEZ

Dili tinuod ang akusasyon nga adunay hit and run nga nahitabo sa dihang nadasmagan ang motorsiklo nga gisakyan ni Jose Alquizar Escuadro, 61 anyos didto sa Disud, Sindangan nga maoy hinungdan sa iyang hinanaling kamatayon.

Kini ang reaksiyon ni Atty. Prime Abarquez sa dihang niadtung miaging adlaw usa ka press conference ang gipatawag didto sa Camila Hotel 1 uban sa kabanay sa biktima nga mitumbok sa kanhi bokal sa segundo distrito nga wala magpakabana sa iyang obligasyon pagtabang sa dihang nakutloan sa iyang kinabuhi ang biktima.

Si Atty. Abarquez nga gisulayan ug kuha sa iyang habig mahitungod sa gipamahayag sa kabanay sa biktima ang wala na mihatag ug dugang komentaryo, gawas lamang sa pagtunol sa official record sa police blotter sa Sindangan Police Station mahitungod sa panghitabo.

Sigun sa police blotter, ang maong vehicular accident nahitabo sa national highway sa Barangay Disud, Sindangan mga ala una kinsi ang takna sa hapon niadtung Oktobre 10 diin ang iyang Nissan Ultra power pick-up nga nakarehistro sa iyang pangalan ug gimaneho sa iyang igsuon nga si Harold Abarquez, dunay driver license ang aksidente kini nga nakahinagbo ug disgrasya sa motorsiklo nga gimaneho ni Escuadro.

Sumala sa imbestigasyon sa kapolisan pinaagi ni Traffic Investigator PO2 Sanny Enojardo Villalas uban ni Operation PNCO SPO2 Najib Bartiana Alip napamatud-an nga si Escuadro nagmaneho nga walay lisensiya ug walay rehistro ang motor nga gimaneho niini.

Kasong “Reckless Imprudence Resulting to Homicide” ang gipasaka batok nila ni Atty. Prime Abarquez ug ni Harold Abarquez.

Matud ni Abarquez miadto siya sa Sindangan kay dunay kaso nga iyang atendihan. Samtang ang iyang sakyanan Nissan Pick-up nagdagan gikan dinhi sa Dipolog padulong sa Sindangan pag-abot sa National Highway sa Barangay Disud aksidente kini nga nakadasmag sa gikatagbo niining motorsiklo kay kalit kini miliko.

Ang Nissan pick-up maayong pagkalumping samtang si Escuardo ang nakaangkon ug grabeng samad sa iyang kalawasan ang gidali sa pagdala sa Sindangan District Hospital apan wala maabte ug dugay nabugtoan sa iyang gininhawa.

“Ang labing tinuod kami man maoy gidasmagan kay wala man gani kaayo matatsa ang iyang motor.”

Walay ray tatsa o samad sa lawas ni Atty. Abarquez ug sa iyang igsuon nga si Harold nga maoy nagmaneho.

Kaniadtong Oktobre 15, napugos ang pamilya sa biktima nga mapasang-at ang kaso gumikan kay matud nila, gibaliwala sa managsuong Abarquez ang ilang obligasyon.

Sa usa ka press conference, gibutyag sa pamilya sa biktima nga dili na unta modako pa ang maong kaso kay dili sila gusto ug samok, apan ang ilang gihangyo sa mga hingtungdan nga nakasala nga mohatag ug financial nga suporta wala man tumana.

Matud pa nila, kon ugaling dunay areglo sa maong kaso andam sila modawat basta lang kon makatarunganon ang ilang makab-ot nga kasabutan.

Sa iyang kabahin gipahayag ni Atty. Abarquez nga dunay mga negosasyon ang gihimo, apan matud pa, subra ra ka dako ang demand sa habig sa biktima kay kini nangayo ug dosyentos singkuwenta mil ka pesos.

Dili tinuod nga iyang gibaliwala ang iyang obligasyon ngadtu sa kabanay sa biktima ilabi na nga nakutloan kini ug usa ka kinabuhi, apan dili pod sabton kay wala siya mituman sa gipangayo nga demanda wala niya sagubanga ang iyang tabang kalooy. “Didto mismo sa Police Station sa Sindangan si Atty. Peter Co, konsehal sa Dipolog, Judge Macias ug uban pang mga abugado atol sa maong hitabo nga dunay gihimo nga negosasyon tali sa pamilya sa biktima.”

Sumala sa batan-ong abugado nga andam siya mohatag kutob sa iyang maabot ug iyang gihanyag ang byenti mil ka pesos isip parsyal apan wala kini dawata kay mangayo gayud ug dakong kantidad hinungdan nga naghulat nalang siya nga mapasaka ang kaso ngadto sa korte kay alang kaniya, dili sala sa iyang driver ang maong akisedente labaw sa tanan ang biktima walay lisensiya sa pagmaneho ug walay rehistro ang motor.

Kasong “Reckless Imprudence Resulting to Homicide” ang gipasaka batok nila ni Atty. Prime Abarquez ug ni Harold Abarquez.

Matud pa ni Atty. Abarquez, “nganong makasohan man ko ug reckless nga dili man ako ang nag-drive. Duha diay manobela nang akong sakyanan?” (The New Nandau, Vol. XVIII No.12)

*

 

Isdang sambagon nga adunay ‘tag’ nakuha sa Sindangan

Usa ka isdang sambagon nga adunay fish tag ang nakuha pinaagi sa kubkuban sa mga mananagat sa lungsod sa Sindangan, niadtong Huwebes, Oktobre 23, niining tuiga.

Sa pagpakighinabi ni Engr. Joseph Florig, ang Provincial Fishery Officer sa Bureau of Aquatic Resources (BFAR) sa Zanorte, nga ang  fish tagging dungan kining gihimo sa nasud sa Pilipinas, Brunei Darussalam, Cambodia, Thailand, Indonesia, Malaysia, Vietnam ug Myanmar sugod niadtong bulan sa Hulyo niining tuiga aron mahibal-an ang punduhanan sa maong mga isda nga lakip sa 5-commercially important species sa South China ug Andaman Seas sulod sa tulo ka tuig hangtud sa tuig 2011.

Ingon man, aron usab masabtan ang ilang lihok sa tibuok Asya, maoy dalan aron maatiman ug mapadaghan ang maong mga isda alang sa sunod nga henerasyon, ug makakuha sa ganti.

Ang maong isdang sambagon nga adunay tag unang higayon nga nakuha dinhi sa Zanorte sukad pagpatuman sa maong programa sa Southeast Asian fisheries Development Council kon (SEAFDC).

Kini gitaho gilayon sa mga mananagat nga nakakuha niini ngadto sa mga personahe sa BFAR sa maong lungsod ug gidala dinhi sa  ilang probinsyal nga buhatan

Ang maong isda adunay gibug-aton nga duha ka kilo ug adunay gitas-on nga 19 ka pulgada.

Nasayran nga ang galunggong kon round scad, alumahan kon Indian mackerel, hasa-hasa kon Indo-pacific mackerel uban sa tunsoy, tawiles ug matangbaka ang lakip sa 50 porsiento nga sagad makuha sa kadagatan dinhi sa nasud.

Niini, ang gihimong pagtuon sa maong mga nasud nagpakita nga ang small pelagic fishery sa Southeast Asian Region lakip ang Pilipinas ug sa ubang nasud nga haduol sa South China Sea ang anaa na kini sa high levels of exploitation, ilabi na ang gihimo  sa mga purse seiners, ug ilang gilantaw nga hayan magkawala na ang maong mga isda sa kadagatan.       

Sa maong programa, ang SEAFDEC nagtanyag sa ganti nga five dollars, t-shirt ug kalo sa matag tag nga makuha sa mga mananagat.

Matud pa ni Florig nga ang maong maong isdang sambagon nga nakuha dinhi ang ipabutang sa freezer aron kini ma-preserbar ug ipadala ngadto sa National Fisheries Research and Development Institute  aron mahibal-an kon asa nga nasud nagagikan ang maong tag, pinaagi sa code niini.

Busa subay niini, si Engr Florig nag-awhag sa mga katawhan ilabi na sa mga mananagat kon makakuha sa maong mga isda nga adunay tag kolor yellow, itaho gilayon kini sa buhatan sa BFAR aron makuha ang ganti. (Sheng, Southpoint, Vol.1No.42)

*

 

P40M cold storage ibutang sa San Pedro

Nadisidihan na gayud sa kagamhanang probinsiyal sa ZaNorte uban sa Bureau of Fisheries and Aquatic Resources ug kagamhanang local sa Dapitan nga ipahimutang sa Barangay San Pedro sa maong siyudad ang P40 milyones ka pesos nga cold storage facility.

Gipahibawo ni Governor Rolando Yebes nga tapos na nilang gisubay ang lugar didto sa Barangay San Pedro, Dapitan City particular na sa pito ka ektaryang luna nga gipanag-iyahan sa BFAR nga maoy butangan sa maong pasilidad nga sugdan sa pagpatindog sa unang bahin sa tuig 2009.

Sa sayu pa si BFAR National Director Atty. Malcolm Sarmiento, Jr. mipahibawo nga iyaha nang giaprubahan ang pagbutang ug P40 milyones nga cold storage facility nga adunay 60 ka toniladang kapasidad para sa ZaNorte sigun sa gipangayo ni Gov. Yebes.

Maoy gusto ni Sarmiento nga ang maong proyekto masugdan sa pagtrabaho sa pagbukas sa tuig 2009.

Matud pa ni Governor Yebes, nadisidihan nila nga sa San Pedro ibutang ang maong pasilidad tungod kay duol ra kini sa Pulauan Port ang ganghaan paingon sa dagkung merkado sa Visayas ug Luzon pinaagi sa nautical highway.

Gov. Yebes’ area survey for cold storage facility at Barangay San Pedro in the city of Dapitan

Gawas pa niini ang ipatindog nga pasilidad mahimutang daplin sa nasudnong dalan busa sayun ra sa pagtumod sa mga negosyante ug isda ug sa mga mananagat sa ilang mga produkto para ipundo sa maong cold storage.

Matud pa ni Governor Yebes mas baratu usab ang tubig sa dakbayan sa Dapitan kumparar sa Dipolog busa ang produkto niining block ice mabaligya usab sa baratu ngadto sa publiko.

Sa ilang kabahin ang kagamhanang local sa Dapitan maoy moatiman usab sa pagpabalhin sa mga nagpuyo sulod sa nasangpit nga lote sa gobyerno ngadto sa lugar nga tukma nilang kabalhinan.

Sa nasayran ang mokonstrak sa maong pasilidad mao ang kagamhanang probinsiyal sa ZaNorte.

Matud pa ni Governor Yebes ang gihuwat ni BFAR National Director Sarmiento mao ang report sa technical group sa lugar nga ipahimutang ang cold storage facility kay mosunod na niini ang pagtimaan sa kasabutan para ma download sa BFAR ang gikinahanglang pundo ngadto sa probinsiya.

Nagpasalamat usab si Governor Yebes ngadto kang Mayor Dominador Jalosjos, Jr. sa Dapitan nga nanghingusog diha sa pagsulbad sa pagbalhin sa mga settlers sa maong lugar.

Samtnag sa laing bahin gidasig karon sa gobernador sa ZaNorte ang mga mag-uuma sa probinsiya sa pagdugang sa ilang kakugi kay ang probinsiya motabang sa pagpangita ug merkado sa ilang mga produkto lakip na sa pagtransportar niini.

Matud pa ni Governor Rolando Yebes kini maoy rason ngano nga gipahatan ug mas daku nga pundo ang para sa agrikultura sa probinsiya para sa tuig 2009.

Gihulagway sa gobernador sa ZaNorte nga anaa karon sa atong probinsiya ang dakung bintaha komparar sa ubang mga lalawigan diha na produksiyon sa pagkaun para sa dagkung merkado sa Visayas hangtud sa Luzon.

Gihisgutan sa gobernador ang Cebu nga kada adlaw adunay 8 milyones ka katawhan nga manginahanglan ug pagkaun wala pay labut sa pagdagsang sa daghanang mga turista.

Gipasabot ni Governor Yebes nga wala gayuy problema sa merkado sa atong mga produkto sa agrikultura kay ang maong mga lugar nagkinahanglan niini.

Sumala pa sa gobernador kabahin na sa P78 milyones ka pesos para agrikultura sunod tuig ang gamiton para sa paghatud ngadto sa merkado sa mga produkto sa agrikultura sa ZaNorte.

Matud pa sa gobernador maoy gitinguha karon niya nga ang probinsiya mopalit ug truck aron maoy gamiton sa pagtransportar sa nagkadaiyang produkto sa agrikultura sa ZaNorte paingon sa Visayas ug Luzon agi sa nautical highway.

Sumala pa sa gobernador kada distrito iyang butangan ug duha ka truck para kargahan sa rolling cargoes o produkto sa atong mga mag-uuma paingon sa dagkung merkado sa Cebu ug Negros. (Press Freedom, Vol. XX No. 54)

*

 
Pa-interview ug media nakahagit pagpasaka ug kasong kriminal

Tulo ka mga kasong kriminal ang gipasaka karon ni Atty. Prime Abarquez batok sa mga kabanay sa biktima nga sila si Gilbert ug Celirina Caigan ug Jose Alquizar Escuadro. Ang ‘counter’ nga kaso giduso ni Abarquez niadtung Biyernes sa hapon human niya madungog ang mga balita sa radio nga siya gidaut sa pamilya sa biktima nga wala magpakabana sa iyang obligasyon.

Matud ni Abarquez, wala unta siyay tuyo nga kasohan ang kabanay sa biktima kay ang iyang laraw nga tubagon lang ang kaso nga ipasaka batok kaniya. Apan napugos siya sa pagduso ug sumbong dihang daghan na ang mga text messages nga iyang nadawat gikan sa iyang mga kaila ug kaubang abogado human kini mabalita sa radio.

Para ni Atty. Abarquez, ang pagpa-interview sa lokal media sa habig sa kabanay sa biktima usa ka disperado nga lakang arun lamang siya dauton nga unta dili naman siya politiko.

Pareha sa kaso ni Board Member Edionar Zamoras nga migamit ug sakyanan sa gobiyerno nakaligis ug tawo sa Irazan, Roxas patay, didto man siya misurender sa Manukan Police Station “wala may gipatawag nga press conference ang capitol”, reaksyon sa mga higala ni Abarquez.

Ang kanhi bokal sa segundo distrito nagkanayon nga dili na siya mohatag ug dugang komentaryo sa giluwatan nga pamahayag sa kabanay sa biktima kay ang tanan niyang gusto ipalanog uban sa pagduso ug mga ebedensiya ang adto na niya pagahimoon sa korte. (Popong Capin, The New Nandau, Vol. XVIII No.12)

*

 

Pasilidad sa jamboree site nagkulang
Ginikanan mireklamo

Mipabate karon sa ilang reklamo ang mga ginikanan ug estudyante nga anaa karon nagpahimutang sa ilang kampo sa Zamboanga del Norte del Norte Sports Complex ning dakbayan sa Dipolog sa pagpahigayon sa Urban Scout ZaNorte Jamboree tungod sa kakulang sa pasilidad ilabi na ang pansayan nga maoy kapahungawan sa ilang hugaw.

Kini ang reklamo sa mga ginikanan nga midangop sa DxFL Headline Balita human nila masuta nga wala kaayo mapreparahe ang gikinahanglang pasilidad sa ilang pag-estar sulod sa usa ka semana.

Kagabii human mibundak ang makusog nga ulan, pipila ka kampo sa mga boy scout ug sa ilang mga butang ang nahumod tungod kay nalanaban ug tubig gumikan kay walay hustong kanal hinungdan nga ang mga ginikanan nagpahina sa pagkalot sa yuta aron maoy kaagian sa mibanaw nga tubig.

Ang nahinaykan sa pagsaway ang kampo sa mga boy scout sa Dipolog nga ilang gihulagway nagkulang ug suporta sa kagamhanang lokal tungod kay anaa kini nahimutang sa sook nga gilupig pa sa kaanindot sa ubang kampo sa mga lagyong lungsod.

Ang labaw nilang gireklamo ang walay pansayan hinungdan nga hatud-kuha ang mga ginikanan sa ilang mga anak aron makadalikyat ug “oh oh”. Matud pa, dunay gipahimutang nilang tabil-tabil apan para lamang kaliguanan ug dili para labayanan sa ilang hugaw.

Atty. Ivan Patrick Ang, Provincial Tourism Officer ug maoy Camp Director mipasabot nga gitugotan ang tanang kampo nga mobutang sa ilang kaugalingong pansayan nga pwede nilang kaligoan ug kapahungawan sa ilang hugaw. Apan matud niya, ang scouting usa ka training sa mga bata nga makahimo ug kaugalingong inisyatiba. “Basin ang ginikanan ra maoy mireklamo. Wala sila kahibalo nga na-enjoy diay kaayo ang ilang mga anak.”

Angay hibaloan nga mosubra sa tres mil ka mga partisepante nga boy scout lakip na sa ilang mga magtutudlo sa nagkadaiyang tunghaan sa tibook probinsya sa Zamboanga del Norte ang misalmot sa 9th Urban Scout Jamboree nga anaa karon nagpahimutang ug campsite sa dakung hawanan sa ZaNorte Sports Complex nga motapos karong Oktobre 27. (Press Freedom, Vol. XX No. 54)

 
 

Provincial Urban Jamboree panaghiusa maoy hinungdan –Gov. Yebes

Panaghiusa maoy nakitang hinungdan sa pag-apil sa liboan ka mga kabataan nga nagagikan sa nagkalain-laing tulunghaan sa elementarya ug sekondarya ning lalawigan sa gihimong 9th ZaNorte Urban Scout Jamboree dinhi sa Dipolog, kini maoy pamahayag ni Governor Rolando Yebes atol sa pagbukas sa maong kalihukan kagahapong adlawa didto sa Zamboanga del Norte Sports Complex.

Gibutyag ni Governor Yebes nga padayong nagpakabana ang mga Commissioners sa matag distrito ning lalawigan gumikan kay matag tuig nagkataas ang gidaghanon sa mosalmot sa maong Provincial Jamboree.

Ngani karong tuiga mokapin sa 3 mil ka mga delegado ang opisyal nga nagparehistro sa gihimong Provincial Jamboree.

Gihagit usab ni Governor Yebes ang mga kabataan nga ipatunhay ug padayong batonan niini ang gipanumpaan diha na sa maong organisasyon.

Gov. Yebes and Col. Bambao, commanding officer 101st brigade, guest speakers to the opening ceremony of the 9th ZaNorte Urban Scout Jamboree.

Gipahayag ni Region IX Dep-Ed Center for Students and Co-Curricular Affairs Executive Director Earl Saavedra nga padayon karong nag-una ang konseho sa Zamboanga del Norte-Dipolog ug Dapitan diha na sa programa sa Boy Scout gumikan sa walay puas nga pagsuporta sa Regional Chairman niini nga si Governor Rolando Yebes.

Ngani gipasalamatan ug dako ni Saavedra nga nahimong aktibo usab ang mga opisyal sa lalawigan sa pag-alayon sa mga kalihukan niini dili lamang naghatag kalambuan sa Zamboanga del Norte lakip usab sa kinatibuk-ang ginsakpan sa Regional Council.

Samtang sa mensahe usab nga gipaabot sa dinapit nga mamumulong nga mao si 101st Infantry Brigade Philippine Army Commander Col. Romulo M. Bambao kini mipasabot sa kamahinungdanon sa Boy Scout dili lamang sa kaugalingong kalambuan niini apan lakip na ang paghatag uswag sa isig kaingon ug labaw sa tanan sa komunidad.

Giasoy usab ni Col. Bambao nga sukad natukod ang Boy Scout of the Philippines daghanan ng mga Pilipino ang nahatagan ug kalambuan pinaagi sa pagplano sa tinguha sa kinabuhi niini, paghimog aksyon sa mga emerhensya ingon usab ang pag-uswag sa kaugalingon gumikan kay nakasentro man niini ang disiplina, kakugi ug paningkamot.

Ngani gibutyag ni Col. Bambao nga mismo ang AFP Chief of Staff Gen. Alexander Yano nga lumad nga taga Zamboanga del Norte miagi usab sa pagbansay bansay sa Boy Scout sa dihang nagtungha pa kini sa Sindangan Pilot Demonstration School ug hangtud karon padayon pang gibatonan niini ang mga prinsipyo nga nakuha gikan sa Boy Scout.

Gihagit usab ni Col. Bambao ang mga kabatan-onan nga isip maoy pag-asa sa nasud nga diha panahon sa krisis nga atong natagamtaman batonan sige niini ang paghigugma sa nasud, kakugi, kaisog ug kamahinungdanon sa komunidad.

Angayang kahibaloan nga sagad sa mga kabatan-onan nga miagi sa training ug nahimong Boy Scout dako kinig naabot sa kinabuhi ug maayong lider sa katilingban. (Roldan, Southpoint, Vol.1No.42)

*

 

Farmer’s training center gitugyan ngadto sa mga mag-uuma sa Polanco

MOKABAT sa 10 milyones pesos nga balor sa Farmers Training Center ang gitugyan na kagahapong adlawa ngadto sa mga mag-uuma sa lungsod sa Polanco.

Ang pagtugyan sa maong proyekto gipangunayan mismo sa mga opisyales sa probinsiya ug sa lungsod nga gilangkuban nila ni Governor Rolando Yebes, 1st District Congresswoman Cely Jalosjos Carreon, Vice Governor Francis Olvis, Mayor Anacleto Olvis ug Board Member Jun Cabigon.

Sa gihimong programa, gipahayag ni Governor Yebes nga sa sunod tuig adunay dako nga pundo ang iyang gigahin alang sa programa sa agrikultura dinhi sa lalawigan. Iyang nakita nga karong panahona ang Zamboanga del Norte ang adunay dakong kahigayonan nga maka-supply ug mga pagkaon paingon ngadto sa mga lugar sa Visayas.  Dako kaayo ang kaugmaon sa atong probinsiya kung totokan ang agrikultura.

Turn-over of the Farmers Training Center in the Municilaity of Polanco.

Gihagit sa gobernador ang mga mag-uuma sa Polanco nga dugang kakugi ang buhaton. Aduna nay dakong merkado nga adto mahatud ang mga produkto sa agrikultura dinhi sa atong dapit. Ang kagamhanang probinsiyal ang nanglimbasog karon nga maayudahan ang mga mag-uuma sa ilang gikinahanglan aron mahaw-as gikan sa kalisod.

Mapasalamaton usab ug dako si Congresswoman Cely Jalosjos Carreon sa katukoran sa maong training center. Ang maong proyekto ang gikinahanglan kini pag-ayo sa mga mag-uuma dili lamang sa lungsod sa Polanco apil na sa tibook distrito. Hangyo sa kongresista nga kinahanglan ampingan ang maong proyekto ug molungtad bisan wala na sila sa ilang katungdanan. Iya usab gihangyo ang Department of Agriculture nga dili ihikaw ang unsa may gihangyo sa mga mag-uuma alang sa ilang kaayohan.

Susama usab ang gipaabot nga pagpasalamat nila ni Vice Governor Olvis ug Mayor Olvis sa Polanco sa suporta nga gilugway nila ni Governor Yebes ug Congresswoman Carreon alang sa pagtukod sa maong training center.

Angayang masayran nga ang Farmers Training Center nga anaa sa lungsod sa Polanco kini ang migasto ug dul-an 10 milyones pesos.  Ang 6 milyones ug 250 mil pesos gikan sa pundo sa kagamhanang probinsiyal sa Zamboanga del Norte, ang 1.5 milyones pesos gikan sa CDF,  usa ka milyon ka pesos gikan sa kagamhanang lokal sa Polanco ug 897 mil pesos gikan sa Department of Agriculture.

Mitambong sa pagtugyan sa maong proyekto mao ang taga Department of Agriculture, DAR, mga opisyales sa lungsod, mga mag-uuma, mga barangay officials ug si kanhi Dapitan City Mayor Rodol Carreon. (Nena, Southpoint, Vol.1No.42).

*

 

Tagae mi ug representasyon sa Sangunian –Mga Lumad

Nawagan karon ang lider sa tribung subanen ngadto sa kadagkoang opisyal sa dakbayan sa Dipolog ug Zamboanga del Norte nga kahatagan ug lingkoranan ang grupo sa lumad nga maoy mo-representar diha sa Sangunian Panlungsod ug Panlalawigan.

Kini ang gipaabot nga pamahayag ni Datu Roger Gumanas sa tribung subanen samtang nakasinati sila sa paghuro-huro sa siyudad atubangan sa ilang giangkon nga yuta nga maoy kabilin sa ilang mga ginikanan diha sa may porsyon sa Barangay Sta. Isabel ug Miputak

Matud ni Gumanas, tungod kay walay representasyon ang lumad diha sa Sangunian, wala hatagi ug higayon ug katungod ang tribu sa ilang gipuy-an nga lugar sa Dipag ug Miputak.

Ilawom sa balaod matud ni Gumanas, gimandar niini ang pagbutang ug representante sa lumad-subanen isip ex-officio member diha sa Sanguniang Panlungsod ug Sanguniang Panlalawigan apan bisan pa niini kini gihikawan sa ilang katungod kay wala gayud mahitabo.

Sumala pa, sila nga mga lumad-subanen gisugba na pag-ayo sa siyudad sa Dipolog diha sa ilang kahimtang kay gihinginlan sa pagpuyo sa ilang yutang kabilin. “Tinuod gyud diay nga kami gihikawan sa among katungod kay bisan gani ang among representasyon diha sa sanguniang wala pa gihatag kanamo.”

Si Gumanas nanawagan kang Governor Yebes nga ihatag na niini ang representasyon sa mga lumad aron duna silay tingog diha sa Sanguniang Panlalawigan. (Press Freedom, Vol. XX No. 54)

*

 

Gov. Yebes mipadas-og duha ka resolusyon atol sa MSRIM

ADUNAY duha ka mga resolution ang gipadas-og ni Governor Rolando Yebes atol sa Mindanao Super Region Inter-Agency Meeting (MSRIM) didto sa Tandag City, Surigao del Sur. Kini mao ang kabahin sa passenger terminal building sa Dipolog City Airport ug sa PPA.

Gipahayag ni Governor Yebes nga dunay private sector ang mipadayag karon silang interest nga magtukod ug terminal building sulod sa Dipolog City Airport ug maoy modumala. Alang kang Governor Yebes dili problema ang income, ang importanti ang interest sa private sector nga mi-alayon sa gobyerno atubangan sa kawad-on sa pundo sa Department of Transportation and Communication.

Gihimong ehemplo sa gobernador mao ang nahitabo sa Philippine Ports Authority nga adunay mga terminal building gipanag-iyahan ug gidumala sa private sector.

Alang kang Under Secretary Virgilio Leyretana, Chairman sa MEDCO nga kinahanglan subayon kini sa hingtungdang ahensiya ang maong sugyot ni Governor Yebes tungod kay ang tinguha sa private sector maghatag kini ug kahamugaway sa operasyon sa maong pasilidad.

ZaNorte Gov. Rolando Enriquez Yebes at the 11th Mindanao Super Region Inter - Agency Meeting in the city of Tandag of Surigao del Sur

Gihatagan ug gibug-aton ni Governor Yebes nga kung dili man gani ang private sector nga motukod sa maong terminal building interesado niini ang provincial government sa Zamboanga del Norte aron mas mapalambo pa ang atong lalawigan ilabina sa natad sa torismo.

Subay niini, gipadas-og ang resolution nga nagpahibalo sa mga hingtungdang ahensiya sa gobyerno sa pagsubay sa posiblidad nga mag-tugot sa private sector o dili ba local government unit nga makatukod ug maoy modumala sa passenger terminal building sulod sa ilang jurisdiction.

Laing resolution ang gipadas-og sa MEDCO mao ang paghangyo sa PPA ug uban pang hingtungdang ahensiya sa gobyerno sa pagpahibalo sa matag Local Government Unit nga magpahibalo sa panahon kung adunay programa nga ipatuman alang sa expansion ug pagtukod ug bag-ong pantalan sa usa ka lugar. Kini maoy na-umol human nahisgutan ang kahimtang sa mga Puerto dinhi sa Mindanao nga gikahibulong sa mga mayor ug gobernador kabahin sa programa alang sa expansion ug pagpalambo sa ilang matag Puerto nga alang kanila wala silay igong kasayuran sa dagan sa maong programa sa PPA.

Atol sa Mindanao Super Region Inter-Agency Meeting gipahibalo sa taga PPA nga hingpit nang nakonberter karon ang Port Management Office ang pantalan sa Dapitan. Subay niini, adunay gi-proposed nga tulo ka andana nga terminal building apan duha pa una ka andana ang unang ipabarog karon sa PPA.

Malipayon kaayo ug dako si Governor Yebes sa maong kalambuan nga dugay nang gidamgo sa probinsiya nga mahimong PMO ang pantalan sa Dapitan. Ang operasyon sa maong pantalan ang dili na mag-agad sa PPA sa Ozamis City ug Cagayan de Oro City. (Southpoint, Vol.1No.42)

*

 
Atty. Ruiz: Dili TANANG LUMAD apil sa desisyon
sa NCIP sa pag-angkon sa yuta sa Sta. Isabel

Usa lamang ka tawo ang hatagan ug pagtagad nga saboton sa siyudad sa Dipolog kabahin sa negosasyon sa yuta sa Sta. Isabel human mipagawas ug paborabling resolusyon ang NCIP, kini mao si Roger Gumanas ra ug wala nay labot ang ubang lumad-subanen nga kinsa miangkon nga lakip sila sa claimant sa gipasaka nga kaso batok sa City Government.

Kini ang gipamahayag ni Atty. Cyril Ruiz, City Legal Officer sa kagamhanang lokal sa dakbayan sa Dipolog subay sa pag-angkon sa mga lumad-subanen nga nanimuyo sa Barangay Sta. Isabel nga ang yuta nga ilang gipuy-an maoy kabilin sa ilang katingulangan maoy hinungdan nga nagmagahi kini sa paghawa sa maong dapit atubangan sa ilang kadaugan sa kaso nga gipasaka sa National Commission on Indigenous People kon NCIP.

Apan taliwala sa daghanang miangkon nga mga lumad subanen nga apil sila sa kadaugan sa tulo ka hugna nga desisyyon sa kaso nga nasang-at sa NCIP, usa lamang ka tawo ang gihatagan ug pagtagad sa siyudad sa Dipolog nga maoy ilang i-negotiate, kini mao si Datu Roger Gumanas ra, kay ang uban dili apil isip claimant sa maong lote.

Alang kang Atty. Ruiz, ang resolusyon sa kaso nga gipakanug sa NCIP usa lamang ka temporaryo nga paghatag ug kahigayunan kang Gumanas nga dili ma-demolish ang iyang balay diha sa Sta. Isabel atubangan sa proyekto nga tukoron sa siyudad sa Dipolog. “In fact we could have apeal, but because of humanitarian reason wala nalang namo gihimo.”

Ning semanaha usa ka panagtagbo ang gihimo tali kang Gumanas ug representante sa NCIP didto sa buhatan ni Mayor Evelyn Uy arun sabotan unsay makab-ot nga negosasyon, apan ang nalambigit niini usa lamang ka tawo kay mao lamang anaa nakabutang sa maong kaso. “Kon duna may laing miapil-apil niini nga mga lumad, kini wala nay labot”, nagkanayon si Ruiz. “Nganong moapil man sila (lumad) sa mo-claim nga sa resolusyon ang ngalan raman ni Gumanas ang nakabutang.”

Gani dugang pa ni Ruiz, ang nakabutang sa desisyon ‘its only preliminary declaration’ para lamang sa kang Gumanas kay duna pay deliberasyon para sa ancestral domain. “The city government will see to it nga niana unyang ilang administrative deliveration sa ilang gipangayo nga ‘ancestral domain’ basin sa entero Dipolog, the city government will intervene kay ang prosesso is very complicated.”  Wala magpasabot nga gideklarar sa NCIP para kang Gumanas, ang entero nga gipangayo nilang yuta as ancestral domain.”

Gipaklaro sa City Legal Officer nga ila gayud proteksiyonan ang interest ug katungod sa kagamhanang lokal sa dakbayan sa Dipolog ilabi na sa maong dapit nga giangkon sa mga lumad nga maoy kabilin sa ilang katigulangan tungod kay kini nga porsyon sa maong lote ilang tukoran ug proyekto sama sa paghimo ug opesina sa DTI ug DOST.

Lakip sa giangkon sa grupo ni Gumanas ang lote sa Satelite Terminal sa Miputak, DPWH, NBI ug ang kanhi gitukod nga opesina sa Department of Agriculture.

“Ang gobiyerno motabang sa tanang katawhan pero dili pod nato ingnon nga kon dunay gihatag nga pabor gusto pod hakpon na ang tanan.”

“We respect the rights of the minority, we respect the rights of small group but defenitely we will also protect and respect the rigths of the larger majority.”

Matud ni Ruiz sa una nahimo siyang konsehal sa dakbayan sa Dipolog ug maoy chairman sa Committee on Minority. “In my capacity as chairman of the cultural community nakatabang man pod ko sa atong mga igsuong lumad.

Sa samang bahin gihimakak ni Atty. Ruiz ang report nga ilang gi-siging-siging ug gidaugdaug ang mga lumad subanen nga nanimuyo sa Sta. Isabel tungod kay wala gayud kini sukad nila himoa gumikan kay ang ilang gihimo mao lamang ang pag-negotiate sa tawo nga nalambigit niini atubangan sa ilang pagatukoron nga proyekto sa gobiyerno.

Matud niya, kon giangkon sa mga lumad subanen nga ‘ancestral domain’, ang maong dapit, dili lamang subano ang nanimuyo sa maong dapit kay lakip na niini ang mga kristianos ug muslim.

Sama ra kini sa pag-angkon sa mga igsuong muslim sa Memorandum of Agreement on Ancestral Domain nga ilang angkunon ang tibook yuta sa isla sa Mindanao kay sila maoy adunay katungod nga mopadagan niini.

Apan matud ni Ruiz, sila sa siyudad sa Dipolog andam mosunod ug mo-respeto sa balaod ilabi na sa Indiginous People’s Act, apan dili pod mahimo nga ibaliwala ang interest sa kinabag-ang katawhan (general welfare) sa dakbayan sa Dipolog ilabi na sa pagatukoron niining proyekto.

Sa pikas bahin, kusga-nong gihimakak ni Atty. Cyril Ruiz ang reklamo nga iyang gihinginlan ug gisinggitan ang mga lumad-subanen atul sa ilang panagtagbo sa City Hall niadtung miaging adlaw.

Kini subay na sa sulat-reklamo sa mga lumad nga lomolopyo sa Sta. Isabel nga gipadangat sa tulomanon Kasauran sa DXFL nga sila gisalikway sa city legal officer diha sa pag-apil sa negosasyon nga unta ang ilang pag-adto sa City Hall mao ang pagkuyog sa ilang leader nga si Datu Roger Gumanas tungod sa hulga niini sa kinabuhi.

Matud pa ni Atty. Ruiz, wala niya singgiti ang kuyog ni Gumanas. Kini igo lamang niya giingnan nga dili moapil ug sulod sa opesina kay wala silay labot sa dialogo.

Alang kaniya, layo ra kaayo sa tinuod nga si Gumanas dunay hulga sa iyang kinabuhi kon ang city hall man maoy ilang gipasanginlan. (The New Nandau, Vol. XVIII No.12)

 
 

Supplier sa ZANECO misibog
Kagubaon sa dalan nakalangan sa pagpadali sa electrification projects 

 

Ang pagsibog sa ubang supplier sa mga materyales ug sa kagubaon sa mga dalan maoy usa sa mga problema nga nalangan ang pagpadali sa implemen-tasyon sa pagkutay ug sugang dagitab sa pipila ka mga barangay sa Zambo-anga del Norte nga nagbaton na ug pundo nga gihatag sa Department of Energy ug National Electrification Administration.

Zaneco General Manager Adelmo Laput mibutyag nga adunay byenti syte ka mga barangay sa probinsya ang aduna nay budget para sa pagpatuman sa electrification project gikan sa NEA ug DOE ang karon maoy giimplementar sa mga personahe sa Zamboanga del Norte Electric Coope-rative kon ZANECO.

Ang ubang proyekto anaa na sa singkuwenta pors-yento sa ilang accomplish-ment diha sa pagkutay sa iyang linya. Apan ang ubang barangay nalangan diha sa implementasyon gumikan sa nahinagboang problema sa dalan nga lisud sudlan ug sakyanan labaw sa tanan ang gisagubang usab nga problema sa implementasyon mao ang ubang supplier ang mibalibad sa pagpadayon ug supply sa mga materyal gumikan sa nagkasaka nga presyo karong panahona.

Matud ni General Manager Laput ang NEA ug DOE mihatag ug deadline sa paghuman sa maong proyekto kutob sa Desyembre 31 nga makompleto na tanan ang pag-energise sa byenti syete ka mga barangays nga gibutangan ug pundo.

Ang byenti syeti ka mga barangay nga gikutayan karon ug linya sa elektrisidad mao ang Moro, Leon Postigo, Banwagan ug San Pedro Godod, Bacung, Imaculada Conception, Map, New Dapitan, Pitawe ug Mallan sa Gutalac, Sto. Niño, Bitoon ug Labakid sa Jose Dalman, Tugob sa Kalawit, Balubo, Cape ug Gubat sa Roxas, Antonino, Don Heleno, Mabuhay, Nueva Bista ug Pidagan sa Sergio Osmeña, Dumogok, Gibo ug Seriac Siayan, Bato, Mawal ug Kalubihan sa Sindangan. Kini maoy byenti syete ka mga bara-ngay nga gihatagan ug budget sa NEA ug DOE niadtung dos mil syeti ug karong tuiga gipatuman sa ZANECO.

Atubangan sa nahinag-boang problema, gipahayag ni GM Laput nga ila gayud paningkamotan nga mahu-man ang pagkutay sa linya sa dili pa motapos ang tuig dos mil otso kay sa pagka dos mil nuybe lain na usab nga budget sa electrification projects ang ilang ipatuman sa mga barangay nga wala pa maabte ug linya sa sugang dagitabnon.

Subay niini, si Laput nag-awhag sa mga barangay kapitan nga motabang sa paghakot sa mga materyales gikan sa ubos ngadto sa ilang barangay arun ma-padali ang implementasyon sa maong proyekto.

Sa pikas bahin, ang kalit nga pagkapalong sa sugang dagitabnon nga walay abiso sa ZANECO ngadto sa publiko dili tinuyo kay dili mataligam-an ANG pagkahulog sa sanga o palwa nga moigo sa linya.

Kini ang pagpasabot ni GM Laput mahitungod reklamo sa publiko sa kalit nga pagkapalong sa eletrisidad bisan ug maayo ang panahon.

Matud ni Laput, siya mismo mabiktima sa pagka palong sa sugang dagitab gumikan kay dunay linya nga mahagbongan ug palwa sa lobi hinungdan nga padayon sila karon nga nag-clearing sa mga dalan.

 Mahitungod sa gikusgon sa kuryenti sa may Quezon Avenue diin nahimutang ang Lee Plaza nga gibuksan na kagahapon, gipahayag ni Laput nga andam na kini para sa operasyon sa maong establishemento gumikan kay humana nila gipakusog ang linya nga maoy ilang gikuha gikan sa Obay Polanco samtang ang ubang supply sa linya nagagikan sa dakbayan sa Dapitan. (The New Nandau, Vol. XVIII No.12)

*

 

Wala pa sukad gihimo sa among barangay
By: Woodibouy G. Abante Danieles

Wala pa sukad gihimo dinhi sa barangay “Galukso”, Roxas, Zamboanga del Norte bisan pa sa nanglabayng katuigan ug administrasyon sa kagamhanan sa provincial. Kon dili karon pa lamang sa pagdumala ni Atty. Rolando E. Yebes isip Gobernador nga gihatagan gayud ug dakong pagtagad ang panginabuhi-an sa mga katawhan dinhi ilabi na kining HI-GREEN Program nga gilusad karon pinaagi sa Agrikultura nga gidumala ni Supervising Agriculturist, Maybel C. Bustaliño, ubos sa buhatan sa Gobernador ning lalawigan nga diin nalipay kaayo kaming mga katawhan dinhi sa barangay GALUKSO ug dako gayud among pasalamat ni Gov. Lando E. Yebes sa kahimsug ug maayong pagdumala sa Provincia, matud pa ni “LANDO BIBO” Chairman, ug Farmers’ Association President, Mamerto J. Mamert Piang.

Dugang pa ni Piang, uban sa mga katawhan sa maong barangay, ila gayud palambuon ang maong prohekto, tungod kay kini nakita nila nga sinugdanan pa lamang niini, mikita ug nakatigum na ang “LANDO BIBO” nga mao ang mga Farmers, kon mag-uuma sa Galukso sa kantidad nga mokabat sa dose mil ka pesos (P12,000.00), alang usab unya pagpadagan ug pagpalapad sunodsunod operacion sa maong prohekto sa barangay.

Matud pa usab sa FA President nga ilang barangay karon usa na sa 162 ka barangays sa entero provincial nga nakadawat sa maong prohekto sa HI-GREEN ug Livelihood Program ni Gobernador Lando Yebes. Nga diin nag langkob kini sa mga Brgy. Murseries, Gulayan, Inland Fishpond.

Ang paglusad sa HI-GREEN Program kaniadtong October 16, 2008, wala gayud pakyasa pagtambong ni Gobernador Yebes nga kansa gikan pa gayud sa kauluhang Manila tungod sa importanting katuyo-an alang sa atong lalawigan ug mga katawhan uban sa mga opeciales sa Provincia; ang Bise Gobernador, Vice Mayor Pachie Eguia lungsod sa Katipunan, ubang pang mga konsehales, silingang mga barangays, mga farmers and fisherfolks, mga Hi-Green Focal Persons, Agri-Technicians ug mga Agriculturist buhatan sa Agrikultura, mga kabatan-onan, kanaa nakigtambayayong sa kalihukan sa Hi-Green.

Dugang pa sa maong kalihukan, ang buhatan sa OPAG ubos buhatan sa Gobernador; mi-apod-apod sa mga Farm Inputs ug mga Farm implements sama sa mga Vermie Cast, Bio-organikong abuno, mga binhi sa utanon, binhi sa Humay, Lakip ang mga Farm implements; Wheel borrow, Hole Diggers, Sprinkler ug daghan pang uban.

Samtang matud pa sa mainitong pakigpulong sa Gobernador, Atty. Rolando Yebes, nga ang iyaha dili pamolitika, sama sa kanunay giyawyaw sa iyang mga kaatbang sa politika, pagguba sa iyang maayong binuhatan, kay layo pa kaayo ang pinili-ay. Ang iyang tuyo mao nga katabangan ang mga katawhan ug labina kabus tang kaigsoonan, sa kalisud alang sa maayong panginabuhi-an, daghan ang pagkaon, ug maka pa escuela pa sa ilang mga anak. Matud pa ni Gobernador Yebes gusto niyang tumanon iyang gisa-ad sa katawhan ang sencerong pangalagad, nga diin “UNA SA TANAN ANG KATAWHAN” Abanti ZaNorte . . . (The New Nandau, Vol. XVIII No.12)

*

 

Pulso Sa Katilingban
Cicer M. Binghay
 

Salamat sa ‘melamine’ nahigmata ang dugay nang nahinanok

Balita nga makagusbat sa pulso sa katilingban: Dir. De la Paz napalgan sa otoridad sa Airport sa Russia nagdala salapi Euro ng mokantidad sa atong Pesos dul-an 7 milyones.  Nasurprisa ang taga Russia.  Pero kita wala na matingala.  Si De la Paz PNP Comptroller o “controller of accounts.”  Naapil niya pagbalon ang salapi sa PNP pag adto niya sa Russia kuyog sa aswa.

-oo0oo-

Samot makagusbat sa hunahuna sa lungsod ug lungsoranon dihang gipangutana si PNP Chief Gen Verzosa kabahin sa hitabo.  Diskarti tubag ni Verzosa klaro nagsalimuang, yabag lumang tugtugin.

-oo0oo-

Tungod sa salawayong balita kang Dir. De la Paz nahulagway pag “review” karon ang matuod kahimtang sa halos tanan nga mga PNP headquarters tibook nasod.  Gipakita mga video footage sa mga PNP headquarters nga mantinir sa hinolaman nga luna.  Sa ilang buhatan nga walay hustong office & supplies ug ekipos.  Ang sakyanan nga walay maintenance ug ang gihatag gasolina igo lamang ikadagan sa lima ka kilometro.  Sa kahimtang nga kanunay’ng lupig surahay atong PNP batok badlongon sa katilingban.

-oo0oo-

Atong nahibaloan nga ang Pilipinas No. 32 pagka labing kurakot nasod sa tibook kalilbutan.  Samot nga dili nato ikalimod ang maong ranggo ning atong Perlas sa Orienti nga nakapuntos internationally sa usa ka PNP Director nga nagbahag-bahag dagkong kantidan uban sa asawa, nga nagpalagaylay gawas sa nasod.  Matod pa ni Sen. Roxas: “PGMA” government fails corruption standard.”

-oo0oo-

Laing enkwentro MILF ug Militar nahitabo sa Sariff Kabunsuan,  Cotabato.  Kasundalohan nagpang gukod karon sa mi-ambush nag escort sa Pari sa Basilan.  PGMA mitunol sa iyang naandang military honor sa mga sundalo nga nangamatay sa enkwentro.

-oo0oo-

Gov. Rolando E. Yebes mitaho dunay igo panalipod ang lalawigan batok hulga sa MILF o MNLF ug uban pang mga gihimong pagpanghasi sa mga pundok naningkamot mapadas-og ang tinguha sa Bangsa Moro Juridical Entity.  Mga kalungsoran sa habagatang dapit nga dunay kabarangayan giapil sa 69 ipasakop sa juridical entity nakapamalit ug armas nga giapod-apod karon sa gibansay-bansay mga CAFGU.

-oo0oo-

Atong ipang hinaot nga mapitol dungan dinhi ang kanhiay pang suliran sa atong kabokiran kabahin sa mga rebelding NPA nga hangtod karon maoy nakaut-ot sa hut-ong katawhan mag-uoma.  Na dispanta ilang pag atiman sa umahan sa hulga ug kahadlok nga dili makabuhis sa aninong pangagamhanan sa NPA.

-oo0oo-

Salamat sa pagbutho sa mga produktong pagkaon sa China nga gisambugan ug “milamine” nga nadiskobrehan.  Nahigmata na ang BFAD, DTI, ug Bureau of Customs.  Mihigpit ang Custom pagbantay sa mga substandard produkto; DTI naghingusog pag inspection sa mga label sa mga produkto gibaligya sa publiko; ug BFAD mitagsa-tagsa hiling sa laing mga produktong makaon kon wala bay milamine bisan ang dili Made in China.  So, salamat sa melamine, bisan ulahi na sa katawhan ang pagpanapo nga makakaon sa produktong sinambogan, nahigmata na ang mga ahensiya nga kanhiay nagkatulog ug nagtanga-tanga lamang. (Press Freedom, Vol. XX No. 54)

 
Credits: Press Freedom is published every Saturday and entered as 3rd class mail matter in Dipolog City. Printed by Young Printing Press with Editorial Office located at Upper Turno, Dipolog City. Tel. No. (065) 212-4343 or 212-6665

 

42 bag sa dugo nadonar sa ZMC

 

Mokabat sa 42 ka bag sa dugo ang nadonar sa Zamboanga del Norte Medical Center atol sa pinaka unang blood letting program nga mismo ang mga opisyal sa probinsya maoy nanguna niini.

Unang midonar sa iyang dugo si Governor Lando Yebes, Atty. Jes Gal Sarmiento Jr., Board Member Norbediri Edding ug Board Member Cedric “Adre” Adriatico ingon man ang mga kawani sa kagamhanang probinsyal ug mga ROTC Unit sa Saints Vincent’s College ug Jose Rizal Memorial State College.

Ms. Rosevic Lacaya-Ocampo, Provincial Planning and Development Officer ug maoy Hospital Administartor sa Zanorte Medical Center mipahayag nga sulod lamang sa duha ka semana nila gi-organisar ang maong plano ug mapasalamaton kaayo siya nga nagmalampuson ang pinaka-unang blood letting program.

Usa sa mga unang midonar sa iyang dugo mao si Governor Lando Yebes sa Zamboanga del Norte Medical Center atol sa pinaka unang blood letting program nga mismo ang mga opisyal sa probinsya maoy nanguna niini.

“Kaugalingong inisyatibo ni Gov. Yebes ang pagpahigayon sa maong programa tungod kay gusto niya nga matubag ang panginahanglanon sa dugo sa bag-ong hospital, dili man tanan, pero naabagan dugo og ang Zanorte Medical Center gumikan sa maong blood letting program” pamahayag ni Ocampo.

Sumala pa niya nga sa imbitasyon 148 ka mga individual ang mihanyag sa boluntaryong paghatag ug dugo apan 96 lamang ang naiksamin ug 41 ka bag sa dugo ang kinatibuk-an nga nadonar sa hospital.

Iyang gipahibalo nga wala makuha-e ang tanang miboluntaryo gumikan sa edad tungod kay ang ideal gyud nga kuhaan ug dugo kadtong nagpangidaron 18 ngadto sa 39 ug katong 40 hangtud 60 ipaagi pa sa taas nga iksamin ayha makuhaan ug dugo.

Sentro sa maong programa mao ang pag-abag sa kakulangon sa dugo diha sa hospital ug maoy giplanohan karon nga makapahimutang ug usa ka blood bank ang Zanorte Medical Center.

Nanghinaot si Ocampo sa gipahigayon nga laing hugna sa blood letting dungan ang pagpasalamat sa tanang mibulontaryo ug hatag sa ilang dugo para sa mga pasyenteng nanginahanglan niini diha sa bag-ong tambalanan.

Plano usab nila nga himoon ang maong programa matag 3 ka bulan para madugangan pa ang unang 42 ka bag sa dugo nga anaa na karon sa bag-ong hospital. (Rene Buaya, The New Nandau, Vol. XVIII No.12)

 
 

Yebes bugtong gobernador sa Mindanao mitambong sa MSRIM

BISAN sa kalisod sa karsada, critical nga mga lugar nga maagian ug kalayo, wala gihapon kini maghatag ug babag sa atong gobernador sa probinsiya sa Zamboanga del Norte nga mahidangat sa dakbayan sa Tandag sakop sa Surigao del Sur aron ipaabot ang sentimento ug masayran ang unsa mang kalambuan alang dinhi sa atong dapit.

Wala pakyasa ni Governor Rolando Yebes ang pagtambong sa Mindanao Super Region Inter-Agency Meeting pinaagi sa Mindanao Economic Development Council (MEDCO) niadtong Martes.

Atol sa maong panagtagbo gipaabot ni Governor Yebes ang sentimento sa mga katawhan dinhi sa Western Mindanao ilabina sa mga Zanortehanon nga nahikalimtan ug wala mahi-apil sa mga proyekto ug programa nga nagdala ug kalambuan dinhi sa Mindanao. Sa nakita sa gobernador dako na kaayo ug kausaban karon ang mga lugar paingon sa Surigao kung itandi kaniadto.  Apan iya usab nga mapasigarbohong  gipahibalo nga usa na usab ka malambuon nga probinsiya ang Zamboanga del Norte.

Gipaabot ni Governor Yebes sa maong meeting ang pangutana kung nganong wala mahi-apil ang Western Mindanao sa feasibility study sa Railway System project.  Ang maong proyekto ang kutob lamang sa dakbayan sa Iligan. Busa nagpabilin gihapon nga nahikalimtan ang atong rehiyon sa mga kalambuan alang dinhi sa Mindanao.

Yebes bugtong gobernador sa Mindanao mitambong sa MSRIM.

Gipabati ni Governor Yebes ang iyang dakong pagpasalamat ngadto kang Presidente Arroyo sa gihatag niining kalambuan dinhi sa atong probinsiya. Sama sa coastal road project paingon ngadto sa sibuco lahos sa dakbayan sa Zambaonga, expansion sa Dipolog airport ug pantalan sa dakbayan sa Dapitan.

Gipasabot usab ni Under Secretary Virgilio Leyretana, MEDCO Chairman nga igo ra sila nagsubay sa naha-unang plano sa Railway System Project. Posibli nga adunay kausaban niini karon sa maong proyekto. Ila usab nga gidawat ang hangyo ni Governor Yebes nga malahos dinhi sa atong rehiyon ilabina dinhi sa atong probinsiya ang Mindanao Railway System.

Angayang masayran nga gikan dinhi sa dakbayan sa Dipolog 15 ka oras ang biyahe paingon ngadto sa Tandag City. Alas dose sa tungang gabii niadtong Lunes nahidangat si Governor Yebes sa maong dakbayan nga gi-abi-abi usab pag-ayo ni Surigao Del Sur Governor Vicente Pimentel. Bugtong si Governor Yebes lang ang gobernador sa Mindanao nga mitambong sa maong meeting.

Mapasalamaton usab ug dako si Governor Pimentel  sa lederato karon ni President Arroyo tungod sa gihatag niining proyekto nga 2 bilyon pesos nga concreting sa national highway nga nahisulod sa ilang probinsiya. Giila nilang legacy sa Arroyo administration alang sa surigao ang maong proyekto. Alang kanilang mga surigaonons si Presidente Arroyo maoy pinaka maayong presidente sa nasud.

Gikan sa Tandag City, midaritso si Governor Yebes sa Davao aron adto manukad paingon sa Manila alang sa pagtambong sa meeting sa supreme court sa mga probinsya nga nahi-apil sa MOA-AD. Ug kini ang mobalik karong adlawa alang sa pagbukas sa Provincial Jamboree. (Southpoint, Vol.1No.42)

*

MORE NEWS NGA BINISAYA

 

 

NOTE: SEND US YOUR NEWS.  Tell us what's going on in your barangays, clubs, schools, businesses and non profit organization. You can also send notices and announcements.
          

 

    Email to webmaster@dipolognon.com

      
Google
WEB THE DAILY DIPOLOGNON