August 16, 2007

Kay dili makamaong manapi?
Laput gipetisyonan sa hunta direktiba

Ang hunta direktiba sa elektrisidad nagtinguha karon nga mapalagpot sa iyang katungdanan si Adelmo Laput isip General Manager sa Zamboanga del Norte Electric Cooperative kon ZANECO. Ang gitinguha nga mapalagpot si Laput gihimo pinaagi sa usa ka manepisto sa mga membro sa Board of Directors nga miperma sa Statement of Concern kabahin sa ilang gika-alegar nga anomaliya ug iregularerdad nga nangpanghitabo sa ZANECO. Sa siyam ka mga membro sa hunta direktiba, pito niini ang miperma sa petisyon ug sila mao si Levy Lagutin,-President, Aristela Adaza- Vice President, Marcelo Yano- Secretary, Ferdinand Balisado- Treasurer, Calixto Yu, Dolfus Duhaylungsod ug Ivor Zamora mga membro. Ang wala miperma sa petisyon mao sila si Leonardo Tan ug Federico Galon.

Ang statement of concern nga gipermahan sa pito ka mga membro sa board of directors nga nagtinguha nga malagpot si Laput sa iyang katungdanan isip nagdumala sa kooperatiba sa elektri-sidad sa Zamboanga del Norte nagbutyag sa daghanang iregularedad nga nagpanghitabo sa ZANECO sa panahon nga ang kanhi Pari na ang naglingkod komo general manager. Ang maong statement of concern gipakatap sa hunta direktiba atol sa gipatawag nga general membership meeting sa mga membro konsumante niadtung miaging sabado, Agusto 11 didto sa lungsod sa Piñan. Si Aristela “Daylinda” Adasa, bise presidente sa hunta directiba ang mibutyag atol sa programa “Kasayuran” sa DXFL-FM mikonpermar sa statement of concern nga ilang ginama kabahin sa mga rason nganong kinahanglan adunay himoong kausaban sa liderato sa kooperatiba sa elektrisidad.

Iyang gibutyag nga sukad niadtung Septembre 1, 2002 ngadto sa Desyembre 31, 2005, ang kinatibuk-ang Audit nga gihimo sa National Electrification Adminis-tration ang kooperatiba alakanse ug P8.646.281 milyones ka pesos. Ang ZANECO dunay utang sa TransCO nga bayrunon nga lima ka bulan nga mikantidad ug P12 milyones ka pesos. Sayup nga pamaagi sa pagpalit ug kahimanan sa ZANECO gikan sa Minda-nao Leader Cable Supply kay mi-overprice sa kantidad nga P2,663,478. Sa Decembre 31, 2005 dugang ni Adasa, si GM Laput nakakuha ug cash advance balor P190,000.00 nga walay pagtugot gikan sa Board of Directors. Sa kina-tibuk-an ang cash advances ni Laput mikabat na sa P251,313.48, dugang ni Adasa. Tungod sa maong audit findings, ang ZANECO mikunhod gikan sa Category A ngadto sa Category C.  Dugang pa sa Audit Finding, “acting General Manager Adelmo Laput kinahanglan husayon ang mga cash advances ug mahimo nga usa ka role model sa mga empleyado sa ZANECO.”

Gawas sa Audit Findings sa NEA, matud pa ni Adasa dunay gihimo nga Compre-hensive Audit ang indepen-dent auditors nga mao ang QCB and Co. gikan sa Cagayan de Oro City gikan sa tuig 2005 ngadto sa 2006 ug kini maoy nakita nga ang kooperatiba alkanse ug P41.204,218 milyones ka pesos. Ang utang sa kooperatiba ngadto sa NPC niadtung tuig 2005 mokabat ug 41.506,227 milyones ka pesos ug pag-abot sa 2006 mikabat na sa kantidad nga P88,004,365 milyones ka pesos ug ang kanunay nga kalangan bale duha ka bulan nga pagbayad niini sa utang.

Dugang gibutyag ni Adasa ang tagdumala sa ZANECO wala mosubay sa hustong procurement procedures ug sa mga dinagkong cash advances sa mga empleyado ug ang personal nga transaksiyon ni Laput sama sa pag-donate sa iyang jeep Cheeroke sa ZANECO para magamit sa manager aron ang gasolina ug ligid gasto sa kooperatiba.

“Sa kinatibuk-an, kita ra nga mga konsumante ang mag-antos sa mga kalapasan ug kasaypanan sa atong kasamtangan nga General Manager. Kon magpadayon si Adelmo Laput nga maghupot sa maong position, dakung posibilidad nga maputlan ang ZANECO ug supply sa koryente ug kitang mga katawhan ang mag-antus sa kangitngit. “Ang mga miembro sa Board of Directors sa ZANECO gipili sa mga katawhan ug konsumante aron mapanalipdan ang ilang mga katungod. Ang mga miembro sa Board maoy manubag sa katawhan dili si Adelmo Laput. Ang krisis sa ZANECO angay nga tagaan ug dako ug unang pagtagad. Kining tanan question of leadership. Angayan ba nga pakupton si Adelmo Laput sa renda sa ZANECO bisan pa man kon dunay daghang mga anomaly ug questionable nga mga transaktiones sulod sa ZANECO”, maoy pamaha-yag sa pito ka mga membro sa hunta direktiba nga miperma sa maong petisyon. (The New Nandau, Vol. XVII No.7)

Credits: The New Nandau is a member of the Publishers Association of the Philippines (PAPI). Editorial office is located at 076 Quezon Avenue, Dipolog City with Tel. No. (065) 212-3794; Cell No. +639205201041

*

ZaNorte gidugok na sa daghang mga  turista ug mga magpapatigayon

Sukad sa paglingkod ni Governor Rolando Yebes isip amahan ning lalawigan, gidugok na karon sa mga daghanang mga turista ug mga magpapatigayon ang Zamboanga del Norte. Kini nasayran gikan ni Atty. Michael Alan Ranillo ang Regional ug Provincial Tourism Council Chairman atol sa pakighinabi sa Kapihan sa 1948 nga gidumala sa RPN-DXKD ug ZNUC kun Zamboanga del Norte United Correspondents kaniadtong adlawng Sabado, Agosto 11. Tungod sa pagtutok sa kagamhanang probinsyal nga mapalambo ang industriya sa turismo, daghanan na karong mga turista ang mibisita sa lalawigan aron sud-ungon ang mga manindot nga mga tourists destinations sama sa Dakak, Aliguuay Island, Piñahon Island ug Liboton cave nga maoy kanunay nga gibaligya sa mga turista sa package tour kaniadtong tulo ka hugna nga Hudyaka Zanorte Festival.

Nakita usab sa ubang mga magpapatigayon sama sa Cebu Pacific nga kanunay gayud nga fully book ang ilang mga byahe sa ilang abyon gikan sa Manila padung nganhi sa probinsya. Nasayran, nga ang maong kompanya nga maningkamot nga madugangan pa ang ilang mga daily flights aron maserbisyoan ang mga sumasakay sa ilang mga abyon.

Dugang pa ni Atty.Ranillo nga ang Zanorte ang dili lisod ibaligya sa mga turista kay abunda kita sa mga tourist destinations diin iyang paningkamutan usab nga mahilakip ang probinsya sa mga tour packages sa BIMP-EAGA kun Brunei-Indonesia-Malaysia-Pahilippines East Asian Growth Area. Giplanuhan usab karon sa Provincial Tourism Council nga makahimo ug usa ka pumpboat aron magamit kini padulong ngadto sa Aliguay Island tungod kay nakita sa PTC nga maglisod gayud ang mga turista kung asa makakuha ug sakyanang pangdagat patabok ngadto sa maong isla.  Niini, pahatan karon sa maong konseho ang maong plano aron ma-akomodar gayud ang mga turista nga nadani sa kaanindot sa maong tourist destination. Dugang pa ni Atty. Ranillo ang Zamboanga del Norte dili angayang mawad-an ug paglaom nga mapalambo pa ang industriya sa turismo sama sa ubang mga probinsya tungod kay ang kagamhanang probisnyal sa pagpangulo ni Gov. Yebes ang kanunay nga misuporta sa mga maayong plano sa Provincial Tourism Council.

Sa laing bahin, ang kagamhanang probinsyal ang nangandam na usab karon sa WOW Philippines Byahe Na Zampen Regional Showcase nga ipahigayon didto sa probinsya sa Zambo Sur sa dakbayan sa Pagadian karong umaabot Setyembre 17-27 niining tuiga. Ang buhatan karon sa Provincial Tourism ang padayong nangalap ug mga local performers alang sa usa ka nighly show karong Setyembre 23 diin ang kagamhanang probinsyal mopasundayag kini sa usa ka cultural show nga magpakita sa kultura ug tradisyon sa lalawigan sa Zanorte. (Sam Buddy, Mindanao Star, Vol.III No.29)

Komento bahin Omnibus motion sa probinsya
Dipolog nangayo'g extension

Gipangayo karon sa kagamhanang lokal sa Dipolog pinaagi sa ilang abogado nga kahatagan sila ug logway o extention aron ilang ihikyad ang ilang kominto mahitungod sa omnibus motion nga giduso sa kagamhanang probinsiyal pagbasura sa kasong mandamus nga gipasaka sa Dipolog batok sa Zanorte. Ni-adtong Lunes pormal nga gipangayo sa korte sa Dipolog nga hatagan pa sila ug 15 ka adlaw nga extention aron makahatag sila sa ilang arguminto mahitungod sa naha-unang lakang nga gihimo sa probinsiya.

Ang rason nga gisandigan sa dakbayan mao ang paghulat una sa mahimong resulta sa nagapadayong kasabutan sa probinsiya ug sa siyudad mahitungod sa kontrobersiyang milotaw tali sa duha ka local government units may kalabotan na sa pagmina sa graba ug balas sa Layawan River. Kahinumduman nga ni-adtong mi-aging simana sila si Gov. Lando Yebes ug Mayor Evelyn Uy nagtagbo aron husayon ang panagbangi niini mahitungod sa paghakot sa balas ug graba sa Layawan River.

Ang maong panagtagbo maoy gisandigan sa Dipolog diha sa ilang pagpangayo sa nahisgutang extention aron makaduso na sila sa ilang kominto mahitungod sa gidusong omnibus motion sa probinsiya. Sa samang bahin padayong gipadas-og sa kagamhanang probinsiyal pinangulohan ni Gov. Lando Yebes nga protihi-an ang atong kina-iyahan sa tibook lalawigan sa Zamboanga del Norte.  (Mindanao Star, Vol.III No.29)

*

KANHI MAYOR UY GIPANGAYUAN KARON SA OMBUDSMAN UG TUBAG

Gimanduan karon sa Ombudsman Mindanao ang kanhi mayor sa dakbayan sa Dipolog uban sa city engineer ug duha ka driver sa pagsumitir sa ilang tubag ug controverting evidence may kalabutan na sa kaso nga gipasaka sa gobernador sa Zamboanga del Norte. Ang maong kamanduan gipakanaug sa Ombudsman niadtong Hulyo 31, 2007 pinaagi ni Director Rodolfo Elman. Kini may kalabutan na sa gipasakang kaso ni Governor Rolando Yebes batok kang Mayor Roberto Uy, City Engineer Nedelia Magdayao ug ang duha ka driver sa dump truck sa city government sa Dipolog nga nadakpang naghakut ug balas ug graba nga walay hustong permiso.

Sa sumbong nga gisang-at ni Governor Yebes atubangan sa Ombudsman Mindanao naglangkub na sa “Theft of Minerals” ilawom sa Philippine Mining Act of 1995, paglapas sa Small Scale Mining Ordinance of Zamboanga del Norte ug ang paglapas sa Anti-Graft and Corrupt Practices Act. Kahinumduman niadtong Hunyo 18, 2007 usa ka ten wheeler dump truck nga gipanag-iyahan sa city government sa Dipolog nga nagdala sa plaka numero CSK 738 gimaneho ni Ruel Rael ang nadakpan sa mga tinugyanan sa PEDO nga nagtransportar ug mga balas ug graba gikan sa Sitio Miase, Barangay Sangkol, Dipolog City nga walay gihuptang permit ug delivery receipt. Sa samang adlaw lain na usab nga ten wheeler dump truck sa Dipolog nga gimaneho ni Wilfredo Bileno ang nadakpan sa mga operatiba sa PEDO didto sa Barangay Minaog samtang nagtransportar sa balas ug graba nga walay permit ug delivery receipt.

Sa affidavit ni Mr. Remelo Damuag, operations officer sa PEDO ang gratuitous permit nga gihuptan sa Dipolog milibkas niadto rang Desyembre 1, 2006 ug wala pa kini marenew atubangan sa giduso usab nga reklamo gikan sa Sangguniang Pambarangay sa Silawe, Polanco kinsa mipalanog sa ilang hugot nga pagsupak nga lugwayan pa ang Dipolog sa Gratuitous Permit sa pagkuha sa balas ug graba sa Layawan River sa utlanan sa Barangay Sangkol, Dipolog ug sa ilang barangay kay nakamugna na kini ug daku nga kadaut sa kayutaan diha sa palibot. Sa sumbong nga gipasaka ni Governor Yebes giklaro niini nga ang gibuhat nila ni Mayor Uy ug mga kaubang opisyales sa Dipolog klaro nga nakalapas sa mga probisyon sa Anti-Graft and Corrupt Practices Act. (Press Freedom, Vol. XIX No. 45)

*

Gibuak ang pagpakahilom ni General Manager Adelmo Laput diha sa mga isyu nga gilabay sa mga membro sa hunta direktiba ngadto kaniya sa dihang iyang gitagsatagsa ug tubag uban sa pagsukip sa mga dokumento pagpamatuod nga polus bakak ug tumotumo ang gipahayag ni Board of Director Aristela Adasa samtang nagpa-interview kini sa programa sa Kasayuran sa DXFL-FM niadtung miaging semana. Sa pagpakighinabe kaniya sa mga membro sa Zamboanga del Norte United Correspondents, si Laput namahayag nga ang wala dayon niya pagtubag sa mga isyu wala magpasabot nga tinuod ang maong mga akusasyon kay nagtuo siya nga dili ang radio maoy hustong forum para niya matubag ang mga isyu nga giakusar batok kaniya.

Niadtung miaging Sabado, Agusto 11, ang kooperatiba sa elektrisidad nagpatawag ug Asembliya didto sa lungsod sa Piñan aron didto matubag ang daghanang mga pangutana sa mga membro konsumante. Mitambong usab sa tigum mao ang representante sa QCB Auditing Firm sa Cagayan de Oro City, external auditor sa ZANECO aron mapadayag ang hustong explenasyon kabahin sa operasyon sa kooperatiba. Si Mrs. Leonora Timtim, ang Finance Manager sa ZANECO mihimakak sa pamahayag ni Board of Director Adasa nga ang ZANECO utangan ngadto GENCO ug P88 milyones ka pesos, kay ang bayrunon sa kooperatiba anaa na lamang sa P49 milyones ka pesos. Ang kadaghanan sa mga iregularedad nga gihisgutan ni Adasa nagpanghitabo gikan niadtung Septembre 1, 2002 ngadto sa Desyembre 31, 2005 kabahin sa Audit Report sa operasyon sa ZANECO nga nag-sentro sa mga pamaagi o proseso diha sa pagpamalit sa mga materyales nga wala masubay sa mga palisiya nga gitakda sa balaod. Matud ni Laput, ang Audit Report nga gihisgutan ni Adasa naglangkob sa tuig 2002 ngadto sa tuig 2005 diin siya nakasulod isip gitudlo nga acting General Manager niadtung Hunyo 14, 2005.

Gihimakak ni Laput ang akusasyon nga siya nagpamihulos sa iyang posisyon pinaagi sa pagpaburot sa iyang kaugalingong bulsa sa panalapi sa ZANECO. “Akong ipahibalo sa tanan nga wala ako magpahimulos sa panalapi sa ZANECO, wala ko magpakadato o magpahimulos sa akong posisyon. Walay kamatuoran ang maong mga akusasyon. We will just see each other in a proper forum, not on the radio, for by doing so; I will be going down to her level.” Mahitungod sa matud pa, anomalosong transaksiyon diha sa pag-donate ni Laput sa iyang kaugalingong sakyanan nga Cherokee apan siya ra usab ang nagamit, gipahayag sa general manager nga personal niya ang maong sakyanan ug kini gigamit ug gipahimudsan alang sa opisyal nga mga lakaw kabahin sa operasyon sa ZANECO.

“Ang maong sakyanan wala gigamit nga service sa akong asawa ug mga anak, kon dili gigamit aron mapasayon ang akong pagpadagan sa operasyon sa ZANECO. Kon dili lang unta molilod ug mamakak si Aristela Adasa, mga Board of Directors, mga opisyales ug empleyado sa ZANECO sila nakasakay ug nakapahimulos sa maong sakyanan sanglit kini ang kanunay nakong ginagamit sa opisyal nakong mga lakaw uban usab kanila, bisan pa sa mga lagyong lugar.” Giangkon ni Laput nga ang ZANECO maoy nagasto sa gasolina apan angayan lamang tungod kay kini gigamit man sa opisyal nga mga lakaw alang sa operasyon sa kooperatiba. “Sayod kita unsay epekto sa wear and tear sa sakyanan kon kini kanunay nga gigamit. Mao man gani nga sa dihang mibuto ang ligid didto sa Cagayan samtang gikan sila sa Davao City mitambong sa AMRECO Meeting, misugyot ang Auditor nga ang kantidad nga P32,000 pesos sa upat ka mga ligid i-charge ngadto sa ZANECO sanglit ZANECO man ang nagamit niini apan sa usa ka kondisyon nga gam-an nalang ug Deed of Donation ang maong sakyanan.”

Matud ni GM Laput wala siyay “hidden agenda” sumala sa giingon sa mga Board of Directors kay ang iyang gihimo mao lamang ang pagtabang sa ZANECO nga dili makapalit ug bag-ong sakyanan tungod sa ka-apiki sa panudlanan. Sumala pa ni Laput kon nagpahimulos pa siya sa iyang posisyon iya na unta gigamit ang sakyanan nga REVO nga kaniadto maoy service sa general manager apan wala kini niya himoa kay sayud siya nga kulang ang sakyanan sa kooperatiba hinungdan nga kini iyang gipagamit sa mga empleyado aron mapasayon ang mga lakaw niini.

Gihiklad usab ni Laput ang braha sa iyang pagkatawo alang sa nakaila kaniya nga sukad siya nahimong pare sulod sa 18 ka tuig ug sa pagdumala niini sa mga parokya, wala siya mahilambigit maski unsa nga isyu kabahin sa kuwarta. “Sukad masukad wala ko mangilad aron lamang makab-ot ang mga personal nga panginahanglan. Dili ang salapi o kabtangan sa ZANECO ang hinungdan sa akong pagsulod kon dili ang panglantaw nga akong mapadayon ang bokasyon o ministro nga akong gibiyaan. Wala kami gitaguan nga maski unsa nga transaksiyon sa opesina nga makadaut sa ZANECO. Ang ako lamang gipaningkamotan nga maputol ug maundang ang mga naandang hiwi nga binuhatan bisan pa kon kini nakahatag ug dakung hulga sa akong pagkatawo ug sa akong pamilya, ilabi na sa mga opisyales ug empleyado nga naapektuhan sa maong kausaban.” (The New Nandau, Vol. XVII No.7)

*

Pamilyang Morrison, Palma mihatag
na medical supplies sa probinysa

Lain na usab nga mga medical supplies ang nadawat sa kagamhanang probinsyal gikan sa pamilyang Morrison gikan sa nasud sa Scottland. Pormal nga gidawat ni Governor Rolando Yebes, Atty. Ivan Patrick Ang, Hospital In-charge ug CDAU Unit Head Mr. Roney Pacilan didto sa Provincial Governor’s Office kagahapon ang mga medical supplies sama sa paracetamol, mefinamic tablets, ug uban pang mga tambal lakip na niini ang mga walkers ug crutches. Gipasalamatan sa gobernador si Mrs. Josephine Morelos-Morrison nga maoy personal nga mitunol sa maong mga medical supplies nga makatabang kaayo sa mga kabus nga mga katawhan nga nanginahanglan ug tabang gikan sa kagamhanang probinsyal sa nagpadayon karong programa ni Gov. Yebes nga TLC kun Tabang ni Lando sa Comunidad ug PHCAP kun Provincial Health Care Program nga wala nagmakuli sa paghatod ug serbisyong medikal ug sosyal.

Angayang masayran, nga ang pamilyang Morrison adunay kini usa ka “Helping Hand Foundation” sa maong nasud nga kanunay naghatag ug tabang sa mga nanginahanglan. Ang pamilyang Morrison ang usa lamang sa mga pilantropo nga mihatag ug ayuda sa lalawigan sa Zamboanga del Norte nga diin liboan ka mga kabus ang nanginahanglan ug ayuda sa gobierno. Nagmando usab ang gobernador ngadto ni Mr. Pacilan nga ang maong medical supplies ang kinahanglan gilayon nga mahatag sa mga kabaranggayan pinaagi sa iyang programa nga Tabang ni Lando sa Communidad. Sa susamang bahin, subay sa subsob nga pagpanghatag ug donasyon alang sa bag-ong tambalanan dinhi sa Zamboanga del Norte, ang kagamhanang probinsyal nakadawat na usab ug medical supplies ug tambal gikan sa usa ka Dipolognon nga atua na nanimuyo sa Estados Unidos.

Gidawat ni Governor Rolando Yebes, Hospital In-charge Atty. Ivan Patrick Ang ug CDAU Unit Head Roney Pacilan ang daghanang gauze nga magamit sa operating room ug libuan nga acetaminophen capsules alang sa sakit sa ulo ug kalawasan gikan sa pamilya ni Aileen Correa-Palma sa California, USA. Kini gitunol sa igsoon ni Palma nga si Redentort ug Carmelita Correa sa buhatan sa gobernador. Sa pagpakighinabi ni Atty. Ang, siya nagpasalamat ug dako sa pamilya ni Palma sa maong donasyon tungod kay dako na kining ikatabang sa mga kabus nga katawhan sa probinsya ug sa bag-ong tambalanan. Gipahibalo usab ni Atty. Ang nga sa sunod semana adunay laing moabot nga 40-footer container van nga medical supplies gikan sa pilantropo nga si Bill Farace, kinsa ang asawa niini usa ka Dipolognon gikan sa pamilyang Martalla.

Matud pa ni Atty. Ang nga ang maong container van maoy ika-lima na nga donasyon nga bulto diin lakip sa sulod niini mao ang 40 ka hospital beds, wheelchair, walker ug crutches. Niini, si Atty. Ang nagpasalamat ug dako sa mihatag ug donasyon ug sa nagplano pa nga mohatag alang sa Zamboanga del Norte. Kahibaloan nga si Governor Yebes ang tuyo gayud miadto sa Estados Unidos sa miaging tuig aron sa pagpangita ug donasyon alang na sa medical supplies and equipment gikan sa taga Zanorte nga atua na nanimuyo didto alang unya sa bag-ong tambalanan ug sa mga kabus nga katawhan, sibo sa iyang panultihon nga “Una sa Tanan ang Katawhan.” (Sheng, Mindanao Star, Vol.III No.29)

HUNTA SA ZANECO GIMAYMAYAN SA NEA NGANONG ATAT SILA SA GIGOL’S

Nakadawat ug pagmaymay ang mga meyembro sa hunta direktiba sa Zamboanga del Norte Electric Cooperative gikan sa National Electrification Administration may kalabutan na pagpahigayon ug bidding sa gikinahanglan nilang mga supplies. Kini ang unod sa suwat gikan ni Engr. Jose Seguban, Jr. ang Officer-in-Charge sa NEA Engineering Department nga maoy nagreview sa resolusyon sa ZANECO nga nangayo ug rekonsiderasyon sa pagbabag niini sa ilang gusto nga maoy padag-on sa bidding ang highest bidder alang na sa pagsupply ug kwentador. Ang mga meyembro sa hunta sa ZANECO gilangkuban na nila ni Levy Lagutin ang presidente, Aristela Adaza ang vice president, Marcelo Yano ang Secretary, Leonardo Tan ang treasurer ug mga members nga sila si Ferdinand Balisado, Dolfuss Duhaylungsod, Ivor Zamora ug Federico Galon.

Si Engr. Seguban sa iyang tubag sa duha ka mga resolusyon sa hunta sa ZANECO kabahin na sa pag-award sa bidding sa kwentador, mitambag sa mga directors niini nga kinahanglang higpit nilang subayon sa pagpahigayon ug mga bidding ang gipatigbabaw nga mga prinsipyo sama sa transparency, accountability, equity, efficiency and economy diha sa pagpalit sa ilang mga gikinahanglang supplies aron mawagtang ang bisan unsa nga mga pagduda diha na sa pag-award sa mga kontrata. Ang nasangpit nga pagmaymay gikan sa NEA migawas atubangan sa kwestyonabling aktuwasyon nga gipakita sa mga meyembro sa hunta sa ZANECO nga daw adunay gipaborang supplier nga maoy giinsistir nila nga padag-on sa gipahigayong bidding sa pagpalit ug mga kwentador samtang kini ang pinaka mahal ug presyo.

Kini may kalabutan na sa pagpalit sa ZANECO ug 3,600 ka kwentador niadtong Marso 21, 2006 diin nagpahigayon sila ug usa ka open bidding. Ang mga suppliers nga miapil sa maong bidding mao kining mosunod sigun sa nabutang sa Abstract of Bids mao ang Megawatt, Budget Bilders, Twin Summit, GIGOL’s, Meter King, Quiambao, ITMC, Cebu Tri-Star, Rhenza, Unifield ug Ever Electric. Sigun sa records nagpakita nga ang Quiambao maoy lowest bidder sa presyo nga P648.00 ang ilang kwentador samtang ang highest bidder mao ang GIGOL’s nga nagabasi dinhi sa Dipolog City gipanag-iyahan sa kanhi kawani sa ZANECO nga si Marlon Amorado. Ang hunta sa ZANECO sa ilang special meeting nga gipahigayon didto sa Jose Dalman sa nakalabay nga Abril 21, 2006 mipanday sa Resolution No. 042 diin giaprubahan niini ang pag-award sa pagsupply sa 3,100 ka kwh meters-Metrix Brand ug 500 ka buok kwh meters-Tri-Tech Bran ngadto sa Gigol’s Electrical ug Twin Summit.

Apan pag-abot sa maong resolution ngadto sa NEA kini wala dasoni sa rason nga ang Gigol’s ug Twin Summit dili mao ang lowest bidders sa 11 ka mga suppliers nga miapil sa bidding. Gitataw sa NEA nga ang accuracy sa kwh meters dili ra maoy bugtong basihanan kay mamahimo mang ma-adjust ang kwentador. Tungod sa maong rason ang NEA mipadas-og sa ilang pagbabag sa resolusyon sa ZANECO. Apan wala pa gayud matagbaw ang mga meyembro sa hunta sa ZANECO nagpahigayon na usab kini ug special meeting niadtong Mayo 26, 2006 ug mipanday sa Resolution No. 054 nga naghangyo sa National Electrification Administration sa pag reconsider sa unang resolusyon sa hunta sa ZANECO.

Niining tungura ang board of directors sa ZANECO mihatag sa ilang rason ngano nga angayang padag-on sa bidding ang Gigol’s ug Twin Summit bisan ang duruha dili mao ang lowest bidders sa 11 ka mga suppliers. Ang mga director sa ZANECO nanalipod sa Gigol’s Electrical nga bisan tuod ug dili kini ang lowest bidder apan kini maoy nahimong first priority supplier nga girekomendar sigun sa nabutang sa evaluation report nga gisumitir sa System Loss Reduction Division nga gipirmahan ni Efren Bunao ang hepe sa SLRD. Samtang ang board of directors sa ZANECO mirason nga sa ilang pagdisisyon sa pag-award sa bidding gipasikad sa kaugalingon niining kabubut-on, independence ug pagpahigayon ug hingpit nga imbestigasyon aron sa pagdeterminar sa kalidad sa mga ekipos nga nagbatun ug maayong kalidad ug nasuwayan na nga molungtad ug taas nga panahon ang pagsirbisyo niini.

Ang mga directors sa ZANECO midugang sa pagpahayag nga nasuta na nila nga ang Metrix Branc dugay nang gigamit sa ZANECO sa nanglabay’ng katuigan ug nakapalit na sila sa una ug kapin sa unom ka libu ka kwentador sa maong brand ug nakita nga lig-on kini ug maayo ang agi. Samtang ang Tri-Tech brand ilang gikonsiderar kay suwayan ug kini girekomendar usab sa SLRD. Giingon pa sa resolusyon sa hunta sa ZANECO nga ang lowest bidder napakyas sa pagkab-ot sa maximum specification nga gitakda aron sa pagsiguro sa kalidad ug durability niini nga molungtad ug dugay. Ang resolusyon mihisgut pa nga nahimo nang kasinatian sa miaging mga panahon nga ang mga baratung ekipo ug materyales wala magbatun ug maximum specification ug mobu ra ang kinabuhi sa pagsirbisyo niini busa maghatag lang ug dugang galastuhan sa kooperatiba.

Apan si Engr. Seguban sa NEA mitubag nga sigun sa gisumitir nga mga dokumento nagpakita nga adunay upat ka klase sa kwh meters o kwentador ang mipasar sa technical evaluation ug girekomendar sa SLRD. Ang kwentador nga gitanyag sa Quiambao nga maoy lowest bidder nalakip sa nakapasar sa technical evaluation. Si Engr. Seguban sa iyang tubag nagkanayon nga ang giingon sa resolusyon sa hunta sa ZANECO sukwahi sa gisulti sa technical evaluation. Ang paggamit sa rason nga sulod sa taas nga panahon nagamit ang ZANECO sa Metrix Brand, matud pa sa NEA dili kini angayan nga maoy himoong basihanan diha sa pag-award sa kontrata. Sa ika duhang higayon gisalikway sa NEA ang gipangayong reconsideration sa mga directors sa ZANECO nga ang Gigols maoy hatagan sa kontrata.

Sa nasayran tungod kay wala man makuha sa GIGOL’s ang unang transaksiyon ang mga directors sa ZANECO mipanday ug resolusyon alang sa pagpahigayon ug laing bidding alang sa pagpalit ug laing 3,600 ka kwentador diin gihisgutan na ang brand nga ang paliton mao gayud ang Metrix nga kwentador nga maoy brand nga gidala sa Gigol’s. Miapil gihapon ang GIGOL’s apan migawas sa Abstract of Bids nga kini maoy ika duha gihapon sa pinaka mahal ug presyo bisan ug gipaubsan na niini ang una nilang presyo nga tag P1,080.00 ngadto na lamang sa tag P950.00 kada kwentador busa wala lang gihapon makadaug.

Karong bag-o ang hunta nagpahigayon na usab ug laing bidding sa pagpalit ug laing 3,600 ka kwentador nga ang bidding gipahigayon niadtong Hunyo 26, 2007. Sa Abstract of Bids migawas nga ang Gigol’s minaug sa laing higayon sa ilang presyo sa tag P738.00 kada kwentador migawas gihapon ang ika duha gihapon silang pinaka mahal sa pito ka mga suppliers nga miapil sa bidding. Kini nga aktuwasyon sa mga board of directors sa ZANECO maoy nakapatingkag sa dawongan sa mga member consumers kon unsay laing rason nagpaluyo nga giduphan man gayud nila ang Gigol’s nga maoy padag-on sa bidding sa pagpalit ug mga kwentador. (Press Freedom, Vol. XIX No. 45)

*

Panapi maoy nagpahipi

Panapi maoy nagpahipi nga hinungdan ngano nga miulbo ang panagbingkil tali sa tagdumala sa ZANECO ug sa mayoriyang membro sa hunta direktiba. Kini ang gibulgar ni General Manager Adelmo Laput nga ang sinugdanan sa kasuko sa ubang membro sa Board of Directors tungod sa wala niya pagsunod sa kagustohan nga i-award ang 3,600 ka mga metro ngadto sa GIGOLS, usa ka supplier nga taga dinhi sa dakbayan sa Dipolog. Matud ni Laput niadtung Marso 21, 2006, ang ZANECO naghimo ug open-bidding alang sa tinguha niini nga pagpalit sa mokabat 3,600 ka buok metro. Subay sa palisiya sa National Electrification Administration kon NEA, walay brand nga nahimutang niini, kon dili “specifications” lamang sa klase sa metro ang gikinahanglan. Sa maong bidding, ang AMQ maoy midaug sa bidding kay kini mi-bid man sa kantidad nga P648 pesos samtang ang GIGOLS mi-bid ug tag 1,080 pesos matag metro. Sigun sa pagsubay sa kalidad sa mga metro nga gihimo ni Engr. Efren Bunao, SLRD Chief, apil sa mipasar sa kalibre sa mga metro ang iya sa AMQ.

Sa dihang ang Abstract of Bids gipasa na ngadto sa Board alang sa ilang konpermasyon, bisan pa sa kamahal sa gi-bid sa GIGOLS, ang hunta direktiba mipasar ug Resolution No. 042 niadtung Abril 21, 2006 nga mi-award sa GIGOLS balig 3,100 ka metro nga maoy ikaduha sa pinakamahal nga presyo sa kantidad nga tag P1,080 matag metro ug 500 ka book metro ngadtu sa Twin Summit nga 4th lowest bidder ug dili sa AMQ nga tag P648 matag metro. Sa dihang gipasa sa NEA ang maong resolusyon, kini gi-deny sa rason nga ang GIGOLS dili lowest bidder, pinaagi sa sulat ni Engr. Jose H. Seguban, Jr. pinitsahan ug Mayo 12, 2006. Ang board wala makontento sa pagsupak sa NEA, kini mipasar na usab ug ikaduhang Resolution No. 050 niadtung Mayo 26, 2006 nga naghangyo sa NEA nga i-rekonsiderar ang ilang pagsupak ug samang bahin kini mihangyo nga ang maong metro i-award sa GIGOLS ang 3,100 ka book metro ug 500 ka book ngadto sa Twin Summit, apan sa samang bahin kini diretsong gibalibaran sa maong buhatan. Matud pa sa ikaduhang sulat ni Engr. Seguban pinitsahan ug Hunyo 15, 2006 ngadto sa hunta direktiba, wala gitugot sa NEA ang pag-award sa mga metro ngadto sa GIGOLS ug Twin Summit. Subay niini ang PBAC mipagawas ug Notice of Award kaniadtung Hulyo 10, 2006 ngadto sa AMQ alang sa 3,600 ka buok metro sa kantidad nga tag P648 pesos.

Matud pa ni GM Laput, pinaagi sa maong transaksiyon ang ZANECO nakadaginot sa kantidad nga P1.5 milyones ka pesos. Human sa Notice of Award gihimo gilayon ang purchase order niadtung Hulyo 12, 2006. Pagka Agusto 8, 2006 gihimo ang contract to purchase and supply taliwala sa AMQ ug ZANECO ug gi-deliver ang maong mga metro. Matud ni GM Laput kining maong mga metro gipanghatag libre ngadto sa mga konsumante sumala sa gikatakda sa EPIRA Law. Apan pagka Septembre 22, 2006, mihimo ang hunta direktiba ug Resolution No. 078 nga nagsugo kang GM Laput sa pag-uli sa maong mga metro ngadto sa AMQ sa rason nga ang mga board of directors gi by-pass sa tagdumala sa kooperatiba. Matud ni Laput wala tagai ug bili sa mga board of directors ang ‘denial’ sa NEA ug ang mando niini nga subayon ang mga palisiya ug ang pag-award niini ngadto sa lowest bidder ug dili sa highest bidder sama sa GIGOLS.

Dugang ni Laput, tungod kay nahasubay man sa insakto nga lagda ang bidding nga gihimo ug usab pinasubay sa mga sulat nga pagsupak sa NEA, iyang gipadayon ang transaksiyon sa AMQ bisan pa sa taliwala sa dakong pagspak sa board ug ang mga hulga sa iyang kinabuhi ug sa iyang pamilya, ilabi na sa status sa iyang panarbaho isip Acting General Manager. “Kini wala nako igsapayan tungod ug alang sa kaayohan sa ZANECO ug pagprotektar sa panalapi niini ug sa interes sa mga konsumante.” Sigon sa nasayran ni GM Laput, ang 3,600 ka book metro gipalit na daan sa GIGOLS bisan pa kon kini wala pa ma-award ngadto sa supplier niini nga gipanag-iyahan ni Marlon Amorado, kanhi kawani sa ZANECO.  Tungod kay wala makalusot ang unang transaksiyon niini, ang board mipasa na usab ug laing resolusyon sa pagpalit ug laing 3,600 ka book metro nga Metrix Brand bisan supak sa palisiya sa NEA nga nagdili sa pagbutang sa brand sa mga materyales nga pamaliton.

Subay sa maong resolusyon, gihimo ang pag-bidding sa 3,600 ka book metro nga Metrix Brand. Ang GIGOLS nga kanhi mi bid ug tag P1,080 matag metro, minaug na ngadtu sa tag P950 pesos na lamang matag metro. Apan dili ang GIGOLS ang migawas nga lowest bidder kon dili lain nga bidder nga tag P895 pesos kada metro. Kini makita sa Abstract of Bids sa bidding nga gihimo kaniadtong Marso 20, 2007. Wala gihapon makontento ang hunta direktiba nga dili makadaog ang GIGOLS, kini mihimo na usab ug bag-ong resolusyon sa pagpalit ug laing 3,600 ka book metro ug gihimo ang bidding kaniadtong Hunyo 26, 2007. Niining panahona, ang GIGOLS minaug na usab ug P738 pesos na lamang matag metro, Metrix Brand, susamang brand sa miaging duha ka mga biddings sa susamang gidaghanon nga giapilan niini.

Ang pinakaulahing bidding wala pa gi-rekomendar sa PBAC sa rason nga gisubay pa ang kalibre sa mga metro niini. Apan nasayran nga pinaagi sa Abstract of Bids sa maong bidding, ang GIGOLS ikaduha pa gihapon sa pinaka mahal sa pito ka mga suppliers nga miapil sa bidding bisan pa sa dakong pag-os-os sa iyang presyo gikan sa iyang orhinal nga bidding price nga P1,080 pesos matag metro ngadto sa P950 pesos ug niini karon nga P738 pesos  na lamang matag metro. Gipasabot ni Laput nga ministerial lamang ang parte sa manager sanglit ang pagtan-aw sa proseso ug pamaagi sa pag-bidding iya man sa PBAC hangtud sa pag-rekomendar sa modaug niini. “Igo na lamang ako magatan-aw nga ang tanang pamaagi nahisubay sa mga palisiya ug balaod sa pagpamalit ug mga materyales.”

Gihimakak usab sa general manager ang isyu kabahin sa categorization sa ZANECO kay sa iyang pagsulod niadtung 2006, ang Memorandum sa NEA mibutyag nga ang kooperatiba anaa sa Category C, apan sulod sa iyang pagdumala ang ZANECO nahimo nang Category A. Para ni Laput ang gihimo ni Aristela Adasa ug sa ubang membro sa board nga miperma sa petisyon aron siya palagpoton mao ang personal ug pure harassment aron siya mosunod sa tanan nilang mga gusto labi na sa pagpili sa ilang gustong supplier.  “Kini dili pag-akusar but, Records will tell,” kanayon pa si Laput. Laing issyu nga gusto usab tubagon ni GM Laput kabahin sa concrete poles nga gipalit sa ZANECO. “Alang sa kasayuran sa tanan, ang among isyu nahumana sa dihang akong gitubag ang ilang Resolution No. 035. Ang gihimo sa management igo lamang pagtuman sa Resolution No. 080 pinitsahan ug Septembre 22, 2006 nga nag-authorize sa management sa pagpamalit sa maong mga poste.

“Gusto lang nako ipaklaro nga kon performance nako ang hisgutan, nganong iapel paman ang pamilya. Dili nalang unta iapel-apel ang walay labut sa isyu ilabi na sa akong mga anak. “Kaninyong tanan mga konsumante ug mga katawhan let this be my first and final statement. Kining tanan akong gihimo dili aron pagprotektar sa akong dignidad ug pagkatawo kon dili aron mapadayag ngadtu sa tanang mga konsumante ang tinuod nga panghitabo ug tinubdan sa maong panagbingkil. To borrow the words of President Gloria Macapagal-Arroyo, “I’d rather be right than popular,” panapos nga pamahayag tubag ni Acting General Manager Adelmo Laput mahitungod sa mga akusasyon nga gibato batok kaniya sa pito ka mga membro sa hunta direktiba sa ZANECO. (The New Nandau, Vol. XVII No.7)

*

ZANECO mipasuga sa 114 ka barangay sa ZN

Gitugyan na ngadto sa Zamboanga del Norte Electric Cooperative (ZANECO) ang na-implementar na nga mga electrification project diha sa mga kabarangayan. Kini human nga gihimo ang signing sa Memorandum of Agreement tali kang Governor Rolando Yebes, ZANECO General Manager Adelmo Laput ug Board of Director President Levi Lagutin. Unod sa maong MOA, anaa na sa ZANECO ang tahas alang sa maintenance sa 114 ka mga barangay nga nakutayan ug linya sa koryente pinaagi sa kuwarta sa probinsiya ilalom sa Yebes Administration. Kini ang silbing gihatag ngadto sa ZANECO nga libre bisan nakagasto na ang atong lalawigan ug 50 milyon pesos kapin kun kulang.

Gipahayag ni Governor Yebes nga ang pagtugyan sa maong proyekto ngadto sa maong kooperatiba ang naglantaw kini ug kaayohan alang sa taga Zamboanga del Norte tungod kay dili madali  sa ZANECO ang pagpasuga sa mga kabarangayan sulod sa atong probinsiya gumikan usab sa kadako sa gasto. Gidugang sa gobernador nga dako kaayo ug ikatampo sa kalambuan ang elektrisidad. Ang koryente maoy nag-unang kinahanglanon karong panahona apan lisod kini maangkon tungod sa kadako sa gasto. Ang koryente mao usa sa problema kung nganong maglisod ang atong probinsiya ug kombinser sa mga investors nga mosulod sa atong dapit tungod sa kamahal sa atong koryente.

Si Governor Yebes ang nanawagan sa tanan alang suporta sa atong kooperatiba aron mas molambo pa niini ang paghatud sa serbisyo ngadto sa tanang mga katawhan sa Zamboanga del Norte. Masaligon usab GM Laput nga ilang maatiman ug mahatagan sa igong maintenance ang nahisgutang proyekto nga gihatag gikan sa probinsiya. Ang signing sa nahisgutang MOA gihimo atul sa Annual Membership Meeting nga gipahigayon karong bag-o didto sa Piñan ZANECO Sub Station. (Mindanao Star, Vol.III No.29)

*

“P56 M project para sa Sindangan-Siayan Road mubo rag agi sa  trabaho apan kuwarta hurot na”
Dodoy gidapit ni Matoy alang sa “friendly talk”

Human mitumaw ang isyu kabahin sa P56 million projects para sa Sindangan ngadto sa Siayan national raod nga sumala pa nahanaw na ang kuwarta apan mubo ra ang agi sa trabaho, gihagit ni kanhi Congressman Roseller “Matoy” Barinaga si incumbent Congressman Rosendo “Dodoy” Labadlabad alang sa usa ka matod pa “friendly talk” sa bisan asang radio stations dinhi sa Dipolog aron iyang mapasabot sa husto ang mitumaw nga kontrobersiya mahitungod sa pagkongkreto sa dalan gikan sa lungsod sa Siayan padolong na sa lungsod sa Sindangan ning lalawigan. Si Barinaga nga nakatapos sa iyang tulo ka termino isip representante sa segundo distrito ang mipasabot nga siya andam motubag sa bisan unsang pangutana nga ipasopot ni Congressman Labadlabad mahitungod sa maong pro-yekto nga nakamugna karon ug pagduda sa alimpatakan sa mga katwhan.

Hinoon pasiunang gipasabot ni Barinaga nga ang nasangpit nga proyekto gigahinan ug pundo gikan sa National Government sa kantidad nga 200 milyones ka pesos ug kini giaprobahan na ni Presidente Gloria Macapagal-Arroyo. Apan sanglit nga siya anaa na man sa iyang katapusang termino isip kongresista sa ikaduhang distrito siya pasiunang gipagol-an lamang ni Presidente Arroyo ug 56 milyones ka pesos para sa maong proyekto. Ang maong proyekto dili na gayud makompleto ubos sa iyang administrasyon matod pa ni Barinaga kay dili naman siya kongresista karon ug usab naparot sa miaging eleksyon sa iyang pagbalik ug lansar pagka-mayor ning dakbayan sa Dipolog. Hinoon dugang pa ni Barinaga kung palu-apon ni Labadlabad ang maong proyekto ngadto sa Malacanang mahimong motugot si Presidente Arroyo nga ipagula ang balance niining 144 milyones ka pesos aron nga ikompleto sa nasangpit nga proyekto.

Angayang kahibaw-an nga karong bag-o gi-kwestyon ni Labadlabad ang maong proyekto tungod kay matud pa sa bag-ong napili nga kongresista, sa 56 milyones ka pesos nga pundong salapi nga napagula mokabat lamang sa 3.1 ka kilometros ang natrabaho sa maong dalan. Dugang ni Labadlabad nga kung siya pa ang nakagunit sa maong salapi mahimong mas taas pang kilometrahe ang iyang natukod. Nahibaw-an nga ang maong proyekto gitrabaho ubos sa pagdumala sa rehiyonal nga buhatan sa Department of Public Works and Highways. Ang mga kadagkuan sa DPWH sa rehiyon ug sa distritong buhatan niini sa Dipolog ang gikatahong misuway usab ug pasabot ni Congressman Labadlabad mahitungod sa maong proyekto sa nakalabay nga semana apan si Labadlabad gikatahong wala makonbinsir sa ilang eksplikasyon. (The New Nandau, Vol. XVII No.7)

*

Nagpakahilum ako sa miaging mga adlaw taliwala sa mga akusasyon nga gibato kanako ni Aristela Adaza sa mga estasyon sa radyo dinhi sa atong syudad, ilabina sa Kasayuran Program ni Board Member Edionar Zamoras. Ang akong pagpakahilum wala magpasabut nga tinuod ang iyang mga hustong lugar alang sa maong mga isyu. Hinoon, akong gi-awhag sa miaging semana ang mga konsumante sa pagtambong gayud sa Assembliya nga matubag ang tanang mga isyus. Mao man gani nga mituyo sa pag-anhi ang mga representante sa QCB Auditing Firm sa Cagayan de Oro City, ang external auditor sa ZANECO aron mapadayag ang hustong explanasyon kabahin sa operasyon sa ZANECO. Klaro, tin-aw ug hapsay ang presentasyon sa mga Auditors kabahin na sa accumulated losses sa ZANECO ug sa uban pang aspeto pinansyal. Kon wala nila masabti ang maong pagpadayag, kini ila unta nga gipangutana sa maong mga Auditors.Gawas pa niana, ang mga Board of Directors gi-explenan na sa auditor sa QCB Auditing Firm sa ilang meeting nga gihimo sa ZANECO, ugaling lang wala si ARISTELA ADAZA sa maong panahon, kay kini anaa man sa dxAA nagpa-interbyu kabahin niini.

Sa maong asembliya, gipadayag usab ni Mrs. LEONORA TIMTIM, ang Finance Manager sa ZANECO nga ang tinuod nga bayronon ngadto sa GENCO 49 milyones na lamang ug dili 88 milyones. Ang tanang mga isyus kabahin sa panalapi sa ZANECO pagatubagon sa mga hingtungdan nga opisyales sa ZANECO nga mas suheto sa tanang aspeto niini. Ang mga isyu nga akong pagatubagon karon mao lamang kadtong nakasentro sa akong pagkatawo. Si ARISTELA ADAZA naga-akusar kanako nga daghan kunong mga iregularidad nga gihimo. Ang iregularidad nga gihisgutan sa Audit Report sa operasyon sa ZANECO gikan SEPTEMBRE 1, 2002 ngadto sa DECEMBRE 31, 2005, nagatumong sa mga pamaagi o mga proseso sa pagpamalit niini pinaagi sa mga palisiya nga gitakda sa balaod, ug dili iregularidad nga personal nako ang gihimo alang sa personal nga kayutaan o kaayohan. Angay ninyong mahibaloan nga ang maong Audit Report nagalangkob sa mga tuig 2002 ngadto sa tuig 2005, ug ako nahasulod Hunyo 14, 2005 na.

Daghang mga pagdaot ug pagyatak sa akong katungod ug pagkatawo nga gihimo si ARISTELA ADAZA diha sa mga radyo ilabina sa Kasayuran Program sa DxFL. Akong ipaklaro sa tanan nga wala ako magpahimulos sa panalapi sa ZANECO, wala ko magpakadato o magpahimulos sa akong posisyon. Walay kamatuoran ang maong mga akusasyon ug dili na anko tubagon ang matag punto sa maong pagdaot, pagyatak ug pagpanamastamas sa akong pagkatawo ug akong pamilya. We will just see each other in a proper forum, not on the radio, for by doing so, I will be going down to her level. Gihisgutan ni ARISTELA ADAZA nga anomalous transaction kuno ang ako untang pagahimoon nga pag donate ngadto sa ZANECO sa akong kaugalingong Cherokee. Alang sa kasayuran sa tanan, personal nako ang maong sakyanan apan kini gigamit ug  gipahimuslan alang sa opisyal nga mga lakaw kabahin na sa operasyon sa ZANECO. Ang maong sakyanan wala gigamit nga service sa akong asawa ug mga anak, kon dili gigamit aron mapasayon ang akong pagpadagan sa operasyon sa ZANECO. Kon dili lang molimod ug mamakak si ARISTELA ADAZA mga Board of Directors, mga opisyales ug empleyado sa ZANECO, sila nakasakay ug nakapahimulos sa maong sakyanan sanglit kini ang kanunay nakong ginagamit sa opisyal ankong mga lakaw uban usab kanila, bisan pa sa lagyong mga lugar, sama sa Zamboanga City, Cagayan de Oro City, ug Davao City. Tinuod sa ZANECO ang gasolina nga gigamit niini, apan angayan lamang tungod kay kini gigamit man sa opisyal nga mga lakaw alang sa operasyon sa ZANECO. Apan sayud kita unsay epekto sa wear and tear sa sakyanan kon kini kanunay nga gigamit. Mao man gani nga sa dihang mibuto ang ligid sa maong sakyanan diha sa Cagayan de Oro City, samtang kami gikan sa Davao City mitambong sa AMRECO Meeting, misugyot ang Auditor nga ang kantidad nga 32,000 pesos sa upat ka ligid i-charge ngadto sa ZANECO sanglit ZANECO man ang naggamit niini apan sa usa ka kondisyon nga gam-an nalang ug Deed of Donation ang maong sakyanan. Wala ako'y "hidden agenda" sumala sa giingon sa mga Board of Directors kon dili aron lamang matabangan ang ZANECO nga dili makapalit ug bag-ong sakyanan sumala sa gisugyot sa maong Board of Directors tungod kay akong nakita nga apiki pa ang panudlanan sa ZANECO. Kon ako nagpahimulos sa panalapi ug kabtangan sa ZANECO, ako na unta nga gigamit ang REVO nga kanhi service sa Manager, apan tungod kay akong nakita nga kulang ang sakyanan sa ZANECO ug aron mapadali ug mapahapsay ang operasyon sa ZANECO, akong gitugyan ang paggamit sa REVO sa ubang mga lakaw sa ZANECO ug akong gigamit ang akong kaugalingong sakyanan "FREE OF CHARGE" aron mapadali ang pagtubag sa mga panginahanglan sa trabaho. Salamat na lamang sa pagsupak sa Board of Directors nga wala madayon ang pag donate sa maong sakyanan tungod kay ako nahigmata sa kamatuoran nga dili na parokya o simbahan ang akong gidumala nga libre ang katawhan nga makagamit niini, kondili usa ka hut-ong sa katilingban nga gilangkuban sa mga katawhan nga adunay nagkadaiyang mga interes.

Sa tanang nasayud ug nakaila kanako, ni masukad sulod sa akong 18 ka tuig nga pagkapari ug pagdumala sa mga parokya, wala ako mahilambigit sa maski unsang isyu kabahin sa kwarta. Sukad masukad wala ko mangilad aron lamang makab-ot ang mga personal nga panginahanglan. Dili ang salapi o kabtangan sa ZANECO ang hinungdan sa akong pagsulod niini kon dili ang panglantaw nga akong mapadayon ang bokasyon o ministro nga akong gibiyaan. Wala kami'y gitaguan nga maski unsa nga transaksyon sa opisina nga makadaut sa ZANECO. ANg ako lamang gipaningkamotan nga maputol ug maundang ang mga naandang hiwi nga binuhatan bisan pa kon kini nakahatag ug dakung hulga sa akong pagkatawo ug sa akong pamilya, ilabina sa mga opisyales ug empleyado nga naapektuhan sa maong kausaban.

Tinuod ang nahisgutan ni ARISTELA ADAZA nga ang sinugdanan ning among panagbingkil mao ang wala nako pagsunod sa kagustuhan sa Board nga I-award ang 3,600 ka mga metro ngadto sa GIGOLS, usa ka supplier nga taga Dipolog. Ang tanan nagasugod sa dihang naghimo ang ZANECO ug usa ka open bidding kaniadtong March 21, 2006 alang sa pagpalit sa 3,600 ka buok metro. Subay sa palisiya sa NEA, walay brand nga nahimutang niini kondili "specifications" lamang sa klase sa metro nga gikinahanglan. Sa maong bidding, ang AMQ ang midaug sa kantidad nga tag 648 pesos matag metro, samtang ang GIGOLS tag 1,080 pesos matag metro. Sumala sa pagsubay sa kalidad sa mga metro nga gihimo ni Engr. Efren Bunao, ang SLRD Chief, apil sa mipasar sa kalibre sa mga metro ang iya sa AMQ. sa dihang ang Abstract of Bids (Annex "A") gipasa na ngadto sa Board alang sa ilang confirmation, mihimo ang BOard ug Resolution No. 042 kaniadtong ABril 21, 2006 (Annex "B") nga nag-award sa 3,100 ka metro ngadto sa GIGOLS nga ikaduha sa pinakamahal nga presyo sa kantidad nga tag 1,080 pesos matag metro ug 500 kabuok ngadto sa Twin Summit nga 4rth lowest bidder ug dili sa AMQ nga tag 648 pesos lamang matag metro. Sa dihang gipasa sa NEA ang maong resolution, kini gi-deny sa rason nga dili lowest bidder pinaagi sa sulat ni Engr. Jose H. Seguban, Jr. penetsahan Mayo 12, 2006 (Annex "C"). Wala makuntento sa objection sa NEA, ang BOard mipasa ug Resolution No. 050 kaniadtong Mayo 26, 2006 (Annex "D") nga naghangyo sa NEA sa pag "reconsider" sa ilang objection ug nagahangyo nga ang maong mga metro i-award sa GIGOLS ang 3,100 ka buok metro ug 500 kabuok ngadto sa GIGOLS ug Twin Summit. Pinaagi sa sulat ni Engr. Seguban penetsahan Hunyo 10, 2006 (Annex "E"), wala gayud gitugot sa NEA ang pag-award sa mga metro ngadto sa mga basihan ug mga talamdan sa paghimo ug mga bidding. Subay niini, ang PBAC mipagawas sa Notice of Award kaniadtong HUlyo 10, 2006 (Annex "F") ngadto sa AMQ alang sa 3,600 kabuok metro sa kantidad nga tag 648 pesos lamang matag metro. Pinaagi sa maong transaksyon, ang ZANECO nakadaginot sa kantidad nga 1.5 milyon pesos. Human sa Notice of Award, gihimo dayon ang Purchase Order kaniadtong Hulyo 12, 2006 (Annex"G"). Pagka Agosto 8, 2006, gihimo ang Contract to Purchase ang Supply (Annex "H") taliwala sa AMQ ug ZANECO ug gi deliver ang maong mga metro. Kining maong mga metro gipanghatag libre sa mga konsumante sumala sa gitakda sa EPIRA Law. Apan pagka Septembre 22, 2006, mihimo ang Board ug Resolution No. 078 (Annex "I") nga nagsugo kanako sa pag-uli sa maong mga metro ngadto sa AMQ sa rason nga sila kuno akong gi by-pass. Wala tagai ug bili sa Board ang denial sa NEA ug ang mando niini subayon ang mga palisiya ug ang pag-award niini ngadto sa lowest bidder ug dili sa highest bidder sama sa GIGOLS. Tungod kay nahasubay man sa sakto nga lagda ang bidding nga gihimo, ug usab pinasubay sa mga sulat pagsupak sa Board ug ang mga hulga sa akong kinabuhi ug sa akong pamilya, ilabina sa akong status sa panarbaho isip Acting General Manager. Kini wala nako igsapayan tungod ug alang sa kaayohan sa ZANECO ug pagprotektar sa panalapi niini ug sa interes sa mga konsumante.

Sumala sa akong nahibaloan, ang 3,600 kabuok metro gipalit na daan sa GIGOLS bisan pa kon kini wala pa ma award kaniya. Tungod kay wala man makalusot ang unang transaksyon niini, ang Board mipasa ug laing resolution sa pagpalit ug laing 3,600 ka mga metro nga Metrix Brand bisan supak sa palisiya sa NEA nga nadgili sa pagbutang sa brand sa mga materials nga pamaliton. Subay sa maong resolution, gihimo ang pag bidding sa 3,600 ka buok metro nga Metrix Brand. Ang GIGOLS nga kanhi mi-bid ug tag 1,080 pesos matag metro, minaug na ngadto sa tag 950 pesos na lamang matag metro. Apan dili ang GIGOLS ang migawas nga lowest bidder kon dili lain nga bidder nga tag 895 pesos kada metro. Kini makita sa Abstract of Bids sa bidding nga gihimo kaniadtong Marso 20, 2007 (Annex “J”).

Bag-ohay pa lamang, ang Board mihimo na usab ug laing resolution sa pagpalit ug laing 3,600 kabuok metro ug gihimo ang bidding kaniadtong Hunyo 26, 2007. Niining panahona ang GIGOLS minaug na ug 738 pesos na lamang matag metro, Metrix Brand, susamang brand sa miaging duha ka mga biddings sa susamang gidaghanon usab. Kining maong bidding wala pa girekomendar sa PBAC sa rason nga gisubay pa ang kalibre sa mga metro niini. Apan angay masayran nga pinaagi sa Abstract of Bids samaong bidding (Annex “K”), ang GIGOLS ikaduha pa gihapon sa pinakamahal sa 7 ka mga suppliers nga miapil sa bidding bisan pa sa dakung pag-us-os sa presyo niini gikan sa 1,080 pesos matag metro, ngadto sa 950 pesos, ug niini karon nga tag 738 pesos na lamang matag metro. Angay ninyo nga masayran nga ministerial lamang ang parte sa Manager sanglit ang pagtan-aw sa proceso ug pamaagi sa pag bidding iya man sa PBAC hangtud sa pag rekomendar sa modaug sa maong bidding. Igo lamang nga ako magatan-aw nga ang tanang pamaagi nahisubay sa mga palisiya ug balaod sa pagpamalit ug mga materiales.

Lain usab nga gihisgutan ni ARISTELA ADAZA mao ang categorization sa ZANECO sa akong pagsulod ug sa 2006. Klaro kaayo sa Memorandum sa NEA (Annex “L”) nga ang ZANECO Category “C” sa akong pagsulod. Ila usab nga gipanghimakak nga ang ZANECO Category “A” sa miaging tuig sa 2006. Apan klaro ug dili tinumotumo ang Memorandum sa NEA (Annex “M”) nga ang ZANECO sa miaging tuig Category “A” na. Kini nagpaila lamang nga ang gihimo ni ARISTELA ADAZA ug sa ubang Board of Directors nga mipirma sa ilang Petisyon pagpalagpot kanako, personal ug “pure harassment” aron ako mosunod sa tanang nilang mga gusto ilabina diha sa pagpili sa ilang gusto nga supplier. Kini dili pag-akusar but “records will tell.”

Laing isyu nga gusto nakong tubagon mao ang kabahin sa concrete poles nga gipalit sa ZANECO. Alang sa kasayuran sa tanan ang maong isyu nahuman na sa dihang sa ZANECO. Alang sa kasayuran sa tanan ang maong isyu nahuman na sa dihang akong gitubag ang ilang Resolution No. 035. Ang gihimo sa management igo lamang pagtuman sa Resolution No. 080 dated September 22, 2006 nga nag-authorize sa management sa pagpamalit sa maong mga poste. Ang tanang punto sa maong isyu akong natubag pinaagi sa akong sulat ngadto sa Board kaniadtong Hunyo 13, 2007 (Annex “N”). Gusto lang nako nga ipaklaro nga kon performance nako ang hisgutan nganong iapil pa man ang pamilya. Dili nalang unta iapil-apil ang walay labot sa isyu ilabina sa akong mga anak. Kaninyong tanan nga mga konsumante ug mga katawhan let this be my first and final statement. Kining tanan akong gihimo dili aron pagprotektar sa akong dignidad o pagkatawo kon dili aron mapadayag ngadto sa tanang mga konsumante ang tinuod nga panghitabo ug tinubdan sa maong panagbingkil. To borrow the words of President Gloria Macapagal Arroyo, “I’D RATHER BE RIGHT THAN POPULAR.” (Mindanao Star, Vol.III No.29)

GM LAPUT MIHATAG SA IYANG TUBAG

Human sa pagpakahilum sa general manager sa Zamboanga del Norte Electric Cooperative sa mga akusasyon nga gibato batok kaniya ni Director Aristela “Daylinda” Adaza, kagahapon mipagawas na siya sa iyang tubag dala ang pagpresentar sa mga dokumento sa nagkadaiyang transaksiyon sa kooperatiba nga gihisgutan sa akusasyon. Gitataw daan ni Acting General Manager Adelmo Laput sa giluwatan niyang tubag nga wala gayud siya magpahimulos sa panalapi sa ZANECO, wala magpakadato o magpahimulos sa iyang posisyon. Matud pa ni Manager Laput tanan walay kamatuuran ang mga akusasyon nga gipalanog ni Daylinda Adaza ug wala siyay laraw nga iyaha kining tubagon punto por punto ang mga pagpangdaut, pagyatak ug pagpanamastamas sa iyang pagkatawo ug sa iyang pamilya.

Matud pa ni Manager Laput mag-abot ra unya sila sa proper forum ug dili sa radio. Gipresentar ni Laput ang mga dokumento kabahin sa nagkadaiyang mga transaksiyon sa kooperatiba lakip na sa mga suwat gikan sa National Electrification Administration kabahin na sa objection niini sa resolusyon nga gipanday sa hunta sa ZANECO nga nagpabor sa usa ka supplier nga maoy padag-on sa gipalit nga kwentador bisan mahal ang gihatag niining presyo kon itandi sa ubang mga suppliers.

Matud pa ni Laput maoy giinsistir sa hunta nga ang padag-on mao ang Gigols Electrical Supply nga gipanag-iyahan sa kanhi kawani sa ZANECO. Gitataw usab ni Laput nga ang iyang pagpagawas sa tubag gitumong para malamdagan ang mga konsumante sa ZANECO sa gihisgutang mga isyu ni Director Adaza. (Press Freedom, Vol. XIX No. 45)

*

1 samaran sa dihang nakigpinosilay sa polis
3 ka snatcher nadakpan

Usa ka snatcher ang samaran sa dihang misukol kini ug pinosilay sa mga membro sa kapolisan samtang nahitabo ang ginukdanay human madawat ang report nga nakabiktima sa pagpanglabne ug cellphone niadtung miaging gabii didto sa Velasco Compound, Barangay Miputak ning dakbayan sa Dipolog, samtang pipila ka oras milabay laing duha niini ka mga kauban ang nasikop ra usab. Ang suspetsado giila nga si Manolito Alampangan y Diayon, 23 anyos, ulitawo ug kasamtangan nga nagpuyo sa Sta. Felomina ning dakbayan sa Dipolog nga nakaangkon ug usa ka samad pinosilan sa iyang lawas nga anaa karon gipatambalanan sa Zamboanga del Norte Integrated Provincial Hospital.

PO2 Meyrick Manginsay, SWAT member sa Dipolog PNP mipahayag nga samtang mihimo sila ug routinary roving patrol pag-abot nila sa may Gillamac Marketing nga anaa mahimutang sa Malvar St., Central Barangay nakadungog siya ug siyaget/singgit ug sa iyang pagsubay dunay kagubot nga nahitabo. Usa sa mga biktima niini ang misumbong nga siya gilabnehan ug cellphone hinungdan nga gihimo ang hot pursuit operation batok sa tulo ka mga suspetsado nga gitumbok sa biktima. Matud pa sa kapolisan ang tulo ka mga suspetsado ilang gigukod samtang nagsakay ug motorsiklo ug pinaagi sa tabang sa mga membro sa Team DAVID ilang naabtan ug na-corner sa dapit atubangan sa may Velasco Compound, Velasco St. Barangay Miputak apan duha niini ang abtik nga nakaambak ug misutoy ug dagan samtang ang usa nga armado sa kalibre .38 nga pistola ang miposil kini ngadto kang PO2 Manginsay hinungdan nga napugos kini ug balos pagposil isip depensa sa iyang kaugalingon. Ang suspetsado naigo sa walang bahin sa iyang batiis hinungdan nga naglisod na kinig dagan hangtud nga kini naapsan ug nadakpan.

Si Alampangan nakuha sa iyang posisyon ang usa ka kalibre .38 rovolver pistol uban sa upat ka mga buhing bala ug usa ka baseho nga gituhuang maoy iyang gigamit pagposil sa polis. Gumikan kay duna pay duha ka mga kauban si Alampangan nga nakaipsot sa ginukdanay, gihimo na usab sa kapolisan ang followup operation ug didto nila naapse ug nasikop sa may Vanyard iya sa Sulpecio Lines, nga anaa mahimutang sa national highway sa Sta. Felomina. Nakuha sa posisyon sa mga suspetsado ang motorcab (Kawasaki CT-100) nga walay plate number nga maoy ilang gisakyan sa pagpanglabne nga gimaneho sa usa ka Giovani Booc, usa ka security guard sa Ivanjo Security Agency nga na-detailed sa nasangpit nga Vanyard sa Sulpecio. Lakip sa gikuha sa mga polis ang usa ka Yamaha Motorcycle nga nagdala sa plate number JW-1506 nga gipanag-iyahan gihapon sa maong security guard. Lakip sa gidakop ug gidala sa presento sa kapolisan ang laing duha ka mga lalaki atol nga atua sa maong compound alang sa dugang imbestigasyon apan kini gipagawas ra usab. Nagtuo ang kapolisan nga si Giovane Booc apil sa syndikato sa kawat ug pagpanglabne ug cellphone nga kon dunay makuha kini adtu tagoan sa Vanyard samtang kini magduty isip security guard. (The New Nandau, Vol. XVII No.7)

*

Pulso Sa Katilingban
Cicer M. Binghay
“Untouchables”

Automatic inig malabyan o ma sentro sa bag-yo ang nasod palaliton pagkaon sama sa isda, utanon ug bugas makapatakag pataas sa ilang prisyo. Kini dili ikatingala. Ang katawhan akseptado, sinati ni pag-taas o pagkubos sa mga prisyo sa palaliton. Unsay gibaligya nga gikinahanglan sa adlaw’ng tanan sa katawhan, nag-agad gimbut-an sa panahon. Ang gasolina, krudo ug LPG kay kontrolado sa OPEC, kanang kapunongan sa kanasuran nga tinubdan sa lana. Silay magbuot sa prisyo sa ilang mga produkto. Kontrolado usab ang ilang paghabwa sa lana sa maong organisasyon nga sitado gidaghanon nga dili mudahan ang giingon nga “over supply” nga mahitabo.

Ngil-ad lamang sa ato karon… kanang nang-hungaw ang kalihokan sa atong baligya sa NFA bugas humay ug mais. Pila ka mga adlaw ug kanhiay pa, ang katawhan kanunay gibusog sa maong ahensiya pagtaho nga wala kitay gikabalak-an nga mahutdan supply bugas kay naay daghang bugas sa NFA nga ikabaligya sa kaniadto 16 pesos ang kilo nga karon 18, giumintohan. Ilang bandilyo.., nga naa sa katindahanan atong mapalit ang maong bugas. Diha tuod mga duha o tulo ka adlaw nagbusilak nga panahon… nangahanaw o nahurot kahalin ang maong bugas tungod sa kabarato nga maabot sa tanan. Walay makatingog si bisan kinsa nga dali nga mahanaw ang NFA bugas sa katindahanan gumikan sa kabarato. Akseptado kita niini. Pero nangil-ad lagi, dihang nadungog nga bugas sa NFA gisagol sa komersiyal nga gibaligya sa tag 26 hangtod 28 pesos ang kilo. Nabani-og sa publiko ang tihinabi sa katawhang pumapalit bugas sa NFA. Mireklamo usab si bisan kinsa nga makapalit sa commercial rice nga nanimahong NFA. Dili malikayan maatikan, mahibaloan sa katawhan kining pagsagol-sagol o sa sinagolang baligiyang bugas kay dunay lahi nga matang sa “perfume” ang NFA nga dili matabonan sa baho sa commercial rice bisan giduha o gitulo ang kadaghan sa commercial rice sagolan sa usa sa NFA.

Nangil-ad pagsamot ang balita dihang nangatarongan ang NFA nga ang ilang pagbaligya apod-apod sa katindahanan patas sa prisyo ug kalidad ug gidaghanon. Kon unsay ilang gihimong maniobra sa NFA nga ilang napalit sa maong ahensiya wala na sila manggilabot. Ikaduha dili madahan sa ilang mga personahi ang pag hikutar sa maong iksposiya sa daghang nabiktima sa commercial rice gisagolan NFA. Nakasalikwaot samot ka ngil-ad dinhi kay walay mogunok dinhi ni manumbaling ang taga NFA sa paghimog makuti nga pagsugid kon unsa ka tinuod ang sumbong sa katawhan. Mao man gani nagpabilin nagbitay ang pangutana…konsabo sa maniobra ang NFA sa tigpamaligya bugas? Dinhi makaingon kitang tanan nga naay nagkadaiyang mino maniobra diha sa maong ahensiya. Mao baya nga maayong buhaton sa NFA aron maolian ang salawayong pagduda sa magi-magic sa bugas sa maong ahensiya gikinahanglan nga magtinir silag tinubdan bugas NFA sa bisan asa nga dapit nga makaalagad sa katawhan patas sa prisyo sigon sa ilang gisitar. Nga makita ang NFA rice adlaw sa tanan nga naay nagkadaiyang mino maniobra diha sa maong ahensiya.

Sa ingon maklaro sa katawhan nga malisod makalusot ang sagol NFA ug commercial rice ma display kay naay atong madumdom NFA Rice sa hustong gisitar prisyo sa balaod sa maong ahensiya. Ikaduha dili tagad mahuom pagtinir ang NFA rice sa ilang bodega kon matag adlaw mahukad kini mabaligya sa publiko. Ikatulo mahatagan “justification” ang pagtago sa bugas nga bag-ong nangabot, dayon, ang gibaligya ang natinir sa dugay nga panahon kay lagi, kaha, wala mahurot o dili ihurot ang bugas nga giandam paliton ipangsagol commercial rice sa mga suking mga cliyenti. Daghan niuyon katawhan karon nga ang NFA diha itugyan sa Local pangagamhanan. Kontrolado sa atong gobernador ug mga mayor nga ibaligiya sa kamerkadohan dirikta sa katawhan aron dili mahilabtan sa mga kukhang personahi sa NFA nga mga “untouchables.” (Press Freedom, Vol. XIX No. 45)

Nagkadaiyang fishing paraphernalia nadawat sa probinsiya gikan sa BFAR

Pormal na nga nadawat sa kagamhanang probinsiyal ang nagkadaiyang mga kahimanan sa panagat nga gihatag sa Bureau of Fisheries ang Aquatic Resources (BFAR). Kini ang personal nga gitunol ni BFAR Regional Director Virgelio Alforque. Sa gihimong programa, gipahayag ni Director Alforque nga ang maong mga fishing pharaphernalia nga gihatag sa BFAR ngadto sa probinsiya mao kini ang usa sa gipangayo ni Governor Rolando Yebes isip pagtabag sa atong mga mangingisda. Iyang gipasabot nga tungod sa kakulangon ug kawad-on sa pundo dili nila ma-implimintar pag-ayo ang mga programa ilalom sa maong ahensiya. Gihulagway nga ang BFAR sa karon nag-operate lamang kini pinaagi sa skeletal force nga mi-resulta diha na sa paggamit sa ubang mga personahe nga iyaa sa lungsod, siyudad ug probinsiya tungod kay nakita nga nagkulang ug tawo ang BFAR. Mipalanog sa iyang pagpasalamat si Director Alforque ngadto kang Governor Yebes sa gihatag usab niing tabang diha na sa pagpakabana sa mga programa kansang tahas iyaa sa BFAR. Gumikan niini hinay-hinay nga milihok ang BFAR dinhi sa Zamboanga del Norte.

Isip pag-hatag usab ug tabang sa BFAR ngadto sa probinsiya, libre nga gihatag sa maong ahensiya ang nagkadaiyang mga kahimanan sa panagat sama sa pukot nga magamit sa mga gagmay nga mangingisda. Matod pa ni Director Alforque nga daghan pang mga proyekto ang ihatag sa BFAR alang dinhi sa Zamboanga del Norte, usa niini ang gitawag ug LAMBAKLAD, pag-istablisar ug mariculture park sa mga lugar sa 1st ug 2nd district ug pag-tukod ug cold storage. Gikalipay usab pag-ayo sa kagamhanang probinsiyal ilalom sa Yebes administration ang maong nadawat nga mga fishing paraphernalia. Gipahayag ni Governor Yebes nga ang mga kabukiran sulod sa atong lalawigan ang nahatagan na sa igong pagtagad apan ang atong kabaybayonan wala na matagad sa dugay nga panahon pinaagi sa pagtabang sa atong mga kaigsoonang mangingisda. Wala masipyat ang gobernador sa pag-bulag sa Provincial Veterinarian dungan sa paghatag niini ug tahas nga ang isda ug hayop ang maoy sentro gayud nga atimanon.

Gusto sa gobernador nga mintras siya pa ang nagdumala karon sa renda sa pangagamhanan iya gayud nga buhaton ang tanan niyang mabuhat aron nga mapalambo ang panginabuhi sa mga katawhan. Angayang masayran nga sila si Regional Director Alforque ug National Director Malcolm Sarmiento sa BFAR ang lumad kini nga taga Zamboanga del Norte. Hinungdan nga dili magpanuko ang BFAR sa paghatag ug mga kaayohan alang sa atong lalawigan. Ang pag-turn-over kagahapon sa mga fishing pharaphernalia kini ang gisaksihan mismo nila ni Provincial Veterinarian Vic Sanches, Engr. Joseph Floreg sa BFAR-Zamboanga del Norte, Provincial Attorney Jes Gal Sarmiento ug ang mga organisadong mangingisda. (Mindanao Star, Vol.III No.29)

Sta. Felomina residence supak tukoron ang cellular antenna

Giduso karon sa kapin 20 ka mga molopyo sa Bara-ngay Sta. Felomina ang ilang protesta batok sa pag instalar ug cellular antenna sulod sa propiedad nga gipanag-iyahan sa usa ka Deogracias Regencia tungod sa ilang gikabalak-an nga ang maong antenna makaapektar ug dako sa ilang maayong panglawas. Sa ilang suwat petition nga gipadangat ngadto sa Sangguniang Panglungsod ang mga molopyo sa maong barangay ang mipahayag nga ang Sun Cellular nagti-nguha karon sa pagtukod ug cellular antenna sa propiedad ni Regencia tapos nga ang ilang proposed site sa miagi nga nahimutang sa dos syen-tos ka kilometros sa habaga-tang bahin sa ilang bag-ong site ang mainitong gisupakan sa mga molopyo usab sa maong dapit.

Ang ilang mainitong protesta matod pa sa molopyo ilang gibasi ngadto sa resulta sa siyentipikong pagtoon nga ang mobile o antenna radiation naghatag og seryosong kakuyaw sa panglawas sa mga magpoyo duol niini nga mahimong magsakit sa cancer, brain tumors, ug brain hemmor-rage, moprobokar ug matod pa kalit nga pagkalipong , pagkaluya sa lawas, loss of memory, kalit nga pagsaka sa blood pressure, maka-mugna ug deformity sa mga bag-ong nangatawong bata , maka interfere sa matod pa sa pinitik sa kasing-kasing ug ilabina kadtong gitauran nag pacemakers ug uban pa nga naglakip na sa pagkamenos sa sperm cells count sa tawo.

Kini ilang gibasi ngadto sa nahimong desisyon sa High Court of Justice o Federal Court sa nasud sa Australia diin usa ka Wulf Dietrich Rose experto sa mobile communications ang midaog sa iyang kaso sa ikatulong higayon batok sa Max Mobile ang sangay nga kompaniya sa Telecom sa Germany. Tungod sa pagda-og sa mga kaso ni Rose ang mga mobile stations kung antennas nga natukod na sa mga residential areas didto sa Australia lakip na sa Switzerland ug Germany ang gipangdismantle ug gibalhin na karon ngadto sa mga dapit nga way nagpuyo o dapit nga halayo sa sentro sa population .

Ang mga molopyo sa Barangay Sta. felomina ang miingon nga kung gisalikway ug gibabagan sa mga nanimuyo ang pagtukod sa maong antenna sa ilang previous proposed site way rason kon ngano nga kini aprobahan sa siyudad tungod kay kini maghatag man gyud ug kakuyaw sa panglawas sa mga katwhan ilabi na ang magpuyo duol niini. Subay niini ilang gihangyo sa konseho ning dakbayan sa Dipolog nga dili gyud mohatag ug pagtugot o permit o bisan unsang paborableng endorsement nga tugotan ang nasangpit nga installation sa cellular antenna diha sa Barangay Sta. felomina. Ila usab nga gihangyo ang mga sakop sa barangay council sa Sta. felomina nga dili mohatag ug pagtugot ngadto sa Sun Cellular. Hinuon silang mga molopyo dakong uyon nga e-instalar ang maong antenna basta adto sa dapit nga way nagpuyo. (The New Nandau, Vol. XVII No.7)

bombardiyo!
Brownout sa ZANECO sabotahe?

Gihatagan ug positibong aksiyon ni Atty. Ivan Ang, Officer-In-Charge sa ZNIPH ug Dr. Conchita Cunanan ang atong lindog sa miaging semana kabahin sa atong obserbasyon ang kahugaw diha sa atong gobiyernong tambalanan. Matud sa atong info nga nahipos, gipalimpyohan sa tagdumala ang hospital nga gi-agop-opan na sa kahugaw, abog, agit-it ug nangumpayot nga mga lawalawa sa dingding. Angayan lang jud kining pagabuhaton sa atong mga kawani diha sa atong gobiyernong tambalanan kay mga pasyenti kanang anaa dinha nagpuyo. Hinaut ta nga mabatnan sa kanunay ang kalimpyo diha sa atong hospital bisan tuod ug daan na kaayo kanang edepisyoha ug sa kadaghang pasyenti nga anaa nagponsisok dinha apan kinahanglan gayud imintinar ang kahasway sa sulod ug gawas nga palibot aron dili mahatagan ug higayon ang kagaw nga makatakod ug laing sakit sa mga pasyenti nga naghambin na daan sa balatian. Salamat sa inyong aksiyon!!!

— oo000oo —

Talk of the town karon ang isyu kabahin sa init nga panagbangi sa mga dagkong kugtong opisyal sa atong bugtong kooperatiba sa electrisidad dinhi sa atong probinsya nga mao ang ZANECO. Unang gipakauwawan ni BOD Daylinda Adasa si GM Adelmo Laput nga kuno dunay nagpanghitabo nga irregularities, mismanagement, corruption, dakong utang sa TRANSCO, GENCO ug kapakyas pagkuha sa posisyon aron mamahimong full pledge General Manager sa kooperatiba. Kon tinuod man nga walay personal interes si Mrs. Adasa nga nagmaisugon sa iyang pagbulgar/latus sa kahiwian nga nagpanghitabo diha sa ZANECO dapat lang nga magpasalamat ta kaniya. Kay ang ZANECO iya kana sa mga tawo konsumante nga membro sa kooperatiba. Ang tinuod nga tag-iya sa ZANECO mao ang mga member consumers dili si Laput, Adasa ug mga board of directors. Maong angayan ang katawhan manggilabot kon naunsa na ang atong electric cooperative kay apektado ang tanan kon dunay mga opisyal ug kawani nga mosabotahe sa pagpadagan sa kooperatiba.

— oo000oo —

Kanang dakong utang sa ZANECO nagmana kana sa panahon pa ni Trans Daarol, Boy Lee, Ben Palma ug karon nasundan ni Adelmo Laput. Explinasyon kaniadto ni Palma ngano nga walay ginansiya ang kooperatiba hinungdan wala mabayre ang utang sa NPC gumikan sa systems loss. Daghang kawat sa kuryenti ug uban pang teknikal nga problema dungagan pa sa SOP panapi sa mga opisyal sa pagpamalit ug poste, metro ug uban pa samot nga dili jud mabayran ang utang kay imbes ang ginansiya sa koleksiyon mapunta sa NPC ug GENCO adto naman mahipos sa kaugalingong bulsa niining mga dagkong kugtong nga mga kurakot. Dili ingon nga pagdaut…tan-awa god nang nang-retire nga mga general manager sa ZANECO ug wala ba miburot ilang nawong sa kadaghang kuwarta!..ug dili man gani ilhon nato nga datu apan milyonaryo? Kon buot nimo kuwentahon pila ramay suweldo anang pagka general manager aber! pero susssss…ang konsumante maoy nagbago ug bayad sa utang sa daghang gidugang patong sa atong monthly billing samtang nagpasulabi ug pabotirik sa mga danagkong transaksiyon ug gisopsop ang suyod ang dakong ginansiya aning mga karahong dagko!!!                                                                                            

— oo000oo —

Ang pagyaba-yaba aning Daylinda nga nagpatuong nagdala sa ilang kawsa sa mayoriyang membro sa Board of Directors alang konuhay sa kausaban sa pagpadagan sa ZANECO sila ra usab nakuryentihan karon dihang gisuklan sila ni Laput. Si Laput nga gi-interview sa atong lokal media dinhi sa Dipolog mibutyag sa personal nga katuyoan sa mga membro sa hunta direktiba ngano nga siya papahawaon. Kon nipis palang unta ug nawong kini si Aristela aka Daylinda dili na siya angayan pa motagawtaw sa radio kadto nalang papel nga konuhay “statement of concern” sa BOD mao nalang ilang gipakatap ug giapod-apod ngadto sa mga konsumante. Agi sa ka hangal aning direktora nabulgar na hinoon ang halawom nga hinungdan pinaagi sa mga dokumento nga atong nahipos nga wala sila makauyon sa pagdumala ni Laput kay dili makamaong manapi…Mirisiiiiii…!!! Tiaw mo ba nga kining mga membro sa hunta direktiba nga miperma sa petisyon aron mapalayas si Laput duna man diay interes nga maka-kurakot sa pagpalit sa 3,600 ka book metro! Pastilan pagka way tinae kining mga demongkog! Kay si Laput nga kanhi nag-alagad sa simbahan isip Pari dili makatulon sa ilang gusto gipetisyonan dayon aron palagpoton. Ang ZANECO man god nagplano nga mopalit ug balig 3,600 ka book metro hinungdan nga gi-open ang public bidding niadtung interesadong suppliers. Miapil sa bidding ang GIGOLS, Twin Summit ug AMQ. Ang GIGOLS mi-bidd ug P1,080 samtang ang AMQ mi-bidd lamang ug P640 nga maoy pinaka lowest bidder sa tulo. Apan unsa bay nakaon aning mga gago duna seguro sila CASH-sabutan, ang board of director mipasar ug resolusyon nga nagpadayag sa ilang pagsupak nga ang AMQ maoy padag-on sa bidding kay mas gusto nila nga i-award ngadto sa GIGOLS. Kaduha gayud sila nangayog karyo sa NEA (National Electrification Administration) pinaagi sa ilang gipangayo nga rekonsiderasyon kay ang ilang unang resolusyon gibabagan man usab sa NEA. Makatulo napahigayon ang bidding tungod sa hugtanon nga pagsupak sa hunta direktiba nga ang AMQ maoy padag-on hangtud nga ang GIGOLS minaug sa ilang bidding price gikan sa P1,080, ikaduhang bidd P950 ngadto sa tag P738.00 matag metro mas taas pa gihapon sa AMQ nga tag P648 nga pareho ra nga pasado sa iyang standard o kalibre maski managlahi ang brand. Kon imong kuwentahon pag-ayo pila man ang masapi aning mga dagkong kugtong kon misanong pa si Laput nga ang GIGOLS maoy padag-on? Tiaw ma ba sa 3,600 ka book metro sa tag P1,080 sa GIGOLS kompara sa P648 sa AMQ pila may ilang masorikbot kuwarta gikan sa mga member consumers sa kooperatiba? Ayaw tag ingna nga walay CASH-sabutan kining mga karahong dagko tali sa supplier nga mao ang GIGOLS nganong nag-interes man nga kining GAGO este…GIGOLS mao jud ang padag-on sa bidding? Ka maayo ba ninyong pa kuryentihan!

— oo000oo —

Kining gibuhat ni Mrs. Adasa maayo unta kon wala pay nagpahipi nga mga personal interes. Apan sa nakita sa mga dokumento sa ilang gipasar nga resolusyon nga gusto jud sila sa GIGOLS kay tingale dako kaayo ang SOP mao nang haskang lagota nila ni Laput kay wala matuman ang nag-GIGIL nilang paghiklad sa palad nga madawat ang dakong sapi! Undangi nanang inyong katarantadohan diha oi…malouy intawon mo sa mga konsumante nga maoy nagpas-an sa dakong bayronon sa elektrisidad!!!

— oo000oo —

Mga electric consumers maoy napagan nianing power struggle karon diha sa ZANECO. Duna tay nasagap nga ang hinungdan sa kanunay nga pagpalong-palong sa kuryenti maoy buhat SABOTAHE sa pipila ka mga kawani nga wala maka-angay nga si Laput maoy ilang agalon. Kini ugod si Laput dili mani taga sulod o kawani sa ZANECO kay usa man lang kini ka membro sa board. Sa dihang miretero si Engr. Ben Palma isip general manager ang iyang assistant general manager nga si Engr. Castor mao jud unta ang mopuli. Apan gumikan sa higpit nga kompetesyon labaw sa tanan political intervention sa mga dagkong haligi sa politika gilupig si Castor ug sinip-sipay didto sa NEA ug si Adelmo maoy gitudlo nga OIC samtang wala pa ma-full pledge ang iyang pagka general manager. Duna man god talamdan nga obserbahan pa sa NEA ang pagdumala komo general manager sulod sa unom hangtud sa usa ka tuig. Ang grupo ni Castor nga wala makaayon nga si Laput ang mahimo nilang GM ang uban niini mi-resign nalang gayud sa serbisyo. Sukad paglingkod ni Laput kon imong mamatikdan maoy hilabihan kadaghan ang nasinati nga brownout ug kalit nga pagka pid-ok-pid-ok sa sugang dagitab. Gihimong rason ni Laput nga tungod kay tiguwang na ang linya, ang mga poste ug ransformer sa Gulayon hinungdan nga angay na jud ilisdan. Walay problema sir kon ilisdan ug bag-o…apan subaya una kon wala baka gi-sabotahe sa imong mga kawani tungod sa sot-sot niining imong mga kontra ang nag-interes nga mga membro sa board of director! Pilahay ra gud pagbikil sa circuit breaker sa transformer ug sa nagtinapol nimong kawani nga na-asign sa clearing section nga dili limpyohan ang mga sanga sa kahoy nga gi-umbawan sa linya aron kon matagakan bisan dahon mopid-ok dayon ang kuryenti! Angay na kang mag-mata ani Mr. Manager kay dili parokya sa simbahan ang imong gi-alagaran! Ipakita ang imong kaisog sa hustong pamaagi sa pagdumala. Isog gani ka kaniadto nga Pari paka nga nag-alagad sa Dios apan siging ka hubog, manumbag ug manion ug posil kani pa kaha nga dili na simbahan ang imong giserbisyoan? Kining mga membro karon sa hunta direktiba nga nagpaka-aron ingnon nga nagpakabana konuhay sa interes sa mga membro konsumante duna may eleksiyon karong Nobembre dili angay botahan kay labaw pa diay kini sila ka-tambalosi…ka maayo ba ninyong hiktan ug pisi igaid sa dakong baliti aron kamo manga bigti!!!

— oo000oo —

Flavor of the week: Kanding sa PROVET nanganak ug Minik?! C U next . . . bye! (The New Nandau, Vol. XVII No.7)
 

*

MORE NEWS NGA BINISAYA