June 19, 2008

 

VILLAR PINASIDUNGGANG BISITA ATUL SA HUDYAKA ‘08

TUMANG pagdayeg ang gipaabot ni Senate President Manny Villar sa Hudyaka Festival karong tuiga.

Kini ang iyang gipalanog atul sa gipahigayon nga programa pagbukas sa siyam ka adlaw nga Hudyaka Festival isip maoy pinasidunggang dinapit.

Wala magdahom si Senator Villar sa kadaghan sa mga tawo nga miduyog sa maong kalihukan kagabii. Iyang nakita ang kanindot sa lalawigan sa Zamboanga del Norte nga aduna nay dakong kausaban. Iyang gidugang nga pinaagi sa pagpaningkamot ni Governor Rolando Yebes, uban nila ni 3rd District Congressman Cesar Jalosjos, 1st District Congresswoman Cely Jalosjos Carreon ug nila ni Dipolog City Mayor Evelyn Uy ug Dapitan City Mayor Dominador Jalosjos ika-hingangha sa tibook Pilipinas ang kalambuan nga nanghitabo karon sa Zanorte.

Wala magdahom si Senator Villar sa kadaghan sa mga tawo nga miduyog sa Hudyaka zAnORTE Festival 2008.

Sa nakita ni Senator Villar, iyang ikapasigarbo mismo sa iyang kaugalingon nga bisan pa man sa kahimtang karon sa nasud wala mahikalimti sa Zanorte ang turismo ug ang kaugalingong kultura niini ug kasaysayan.

Prangka niyang gipadayag nga wala siya magdahom sa kadaghan sa mga tawo nga iyang makita sa pagbukas Hudyaka Festival kagabii. Daghan sa mga tawo sa Manila ug sa pipila ka mga suok dinhi sa nasud ang wala pa masayod sa mga maanindot nga nanghitabo sa Zamboanga del Norte.

Gihulagway ni Senator Villar nga ang Hudyaka Festival ang naghatag kaniya ug dugang paglaum sa nasud nga adunay dakong kahigayunan. Iyang gihiklin ang panglantaw sa uban nga wala nay paglaum ang atong nasud tungod kay sama sa Hudyaka Festival nakahatag kini ug dakong tabang. Alang kaniya kung adunay kakugi ug pagpaningkamot kun “SIPAG AT TIYAGA” adunay  maayong panginabuhi.

Samtang gipahayag usab ni Governor Yebes nga gikan gisugdan ang Hudyaka Festival upat na ka tuig ang nakalabay nakita ang mga kalambuan sa probinsiya. Usa niini ang Strong Republic Nautical Highway nga anaa sa pantalan sa Dapitan nga nakahatag ug maayong serbisyo sa katawhan. Kaniadto adunay kalisod sa pagbaligya ug mais ngadto sa merkado apan karon aduna nay Post Harvest Facility alang sa mais sama sa bag-o lang gi-inagurahan nga anaa sa Sergio Osmeña uban sa taga NABCOR.

Ang mga investors ang interesado na mobubu sa ilang puhonan dinhi sa probinsiya. Gihimong ehemplo ni Governor Yebes ang Food Processing Plant nga anaa gitukod sa PAIC-Irasan, Roxas pinaagi sa POMS venture. Gawas niini ang ethanol production kansang factory ang anaa ipahimutang sa tersiro distrito nga diin sa pagkakaron nagpadayon ang ilang pag-istablisar niini.

Sa hamubo nga panahon sa iyang katungdanan pagka-gobernador daghanan nang mga programa ug proyekto ang gipatuman ug gihingusgan alang sa paghaw-as sa kalisod sa mga katawhan.

Gihingusgan ni Governor Yebes nga ang Hudyaka Festival sa Zanorte ang timaan kini sa kalipay nga  maoy pamaagi sa pagbalik lantaw sa atong gigikanan ug ang pagselebrar sa kamalinawon ug katahom sa atong probinsiya. Ang Hudyaka Festival maoy lugar nga masud-ong nga puno sa kultura ug kasaysayan ang Zanorte ug ang nakabenipisyo niini mao ang mga yanong katawhan tungod sa pagtamod sa panultihon nga “Una sa Tanan ang Katawan”.

Pareho usab nga mipaabot sa ilang mainiton nga pagdayeg sila si 3rd District Congressman Jalosjos, 2nd District Congressman Rosendo Labadlabad ug Dipolog City Mayor Evelyn Uy sa pagpahigayon karon sa Hudyaka Festival sa Zanorte. Alang kang Jalosjos ang maong selebrasyon ang naghatag kini ug kahigayunan sa matag lungsod nga ilang ikapakita ngadto sa mga katawhan ang ilang matag produkto. Iya usab nga gihangyo si Senate President Villar alang sa suporta sa katuyuan sa tersiro distrito nga mahimong usa ka probinsiya. (Southpoint, Vol.1No.23)

*

 

Gen. Yano Outstanding Citizen of ZaNorte ‘08

Duha ka mga manag-kaluhang pasidungog ang gitugyan sa kagamhanang probinsiyal sa Zamboanga del Norte ngadto kang AFP Chief of Staff General Alexander Yano nga gi-panday mismo sa Sanggu-niang Panlalawigan.

Si General Yano gipa-sidunggan isip Most Outstanding Citizen of the Province of Zamboanga del Norte ug gitunolan sa Distinguished Plaque of Recognition for his much promotion as the New Chief of Staff of the Armed Forces of the Philippines.

Ang duha ka mga pasidungog gipasikad mismo sa managkaluhang resolusyon nga gipanday sa Sangguniang Panlalawigan sa ZaNorte diin ang pag-tugyan niini gipangunahan mismo ni Governor Rolando Yebes uban ni Vice Gover-nor Francis Olvis ug mga magbabalaod sama kanila ni Board Member Edgar Baguio, Cedric Adriatico, Ricky Mejorada, Anecito Darunday, Luzviminda Torino, Maria Olga Cande-laria ug uban pa.

Ang nasangpit nga okasyon gisaksihan usab ni Executive Secretary Eduar-do Ermita kinsa mipahibalo nga naaprubahan na sa Commission on Appoint-ments ang pagka four star general ni Yano.

Mitambong usab ang pamilya mismo ni General Yano nga gipangunahan sa iyang inahan nga si Mrs. Gloria Badung Yanu nga lumad nga taga Sindangan ug iyang mga kahigalaan.

Ang uban nga gihatagan ug pasidungog ni Governor Yebes mao usab sila si Fe Zamora isip usa ka nailang journalist ug tigsuwat sa Philippine Daily Inquirer, Marie Razel Eguia ang Miss Philippines Air sa Miss Philippines Earth 2008, Mr. Perri Cebedo ug Dr. Salvador Aves Regional Director sa National Statistics Office.

Gitugyanan usab ug pasidungog sa probinsiya ang mga kanhi opisyal niini sama kanila ni kanhi Board Member Uldarico Mejo-rada, Arasam Ismael, Ferlormino Cabale ug Jimmy Patrick Israel Chan.

Lakip sa gihatagan ug pasidungog sa gobernador ang nagkadaiyang mga tinun-an sa elementary ug high school sa nagkada-iyang tulunghaan sa ZaNorte kinsa nagpa-kadawat ug mga pasidungog sa nagkadaiyang mga competition nga ilang gisalmutan.

Si General Yano sa iyang kabahin nagpasalamat ug daku sa pasidungog nga gitunol ngadto kaniya sa kagamhanang probinsiyal sa ZaNorte.

Gipasalamatan usab niya ang mga tawo nga maoy nakatabang sa iyang pag-kab-ot sa iyang nahimuta-ngan karon diha sa pagpa-nirbisyo sa atong armadong kusog sa nasud ilabi na gayud sa iyang ginikanan nga matud pa niya maoy unang nag-umol kaniya diha sa pagsubay sa tarong nga dalan. (The New Nandau, Vol. XVII No.48)

*

 

Sec. ermita, gov. yebes misubay nfa rice retailers

Si Executive Secretary Eduardo Ermita nga maoy pinasidunggang bisita sa kagamhanang probinsiyal sa Zamboanga del Norte sa ika 65 ka tuig niini nga kasumaran niadtong Biyernes, Hunyo 6 niining tuiga ang wala damha suprisa kining misubay sa mga bugas nga anaa gibaligya sa NFA outlet sulod mismo sa merkado publiko sa dakbayan sa Dipolog.

Ang maong pagsubay ni Sec. Ermita sa NFA rice sulod sa merkado nagsumikad usab kini sa gipaabot nga tinguha ni Governor Rolando Yebes nga motabang sa distribution sa mga baratong bugas ngadto sa mga hilit nga barangay aron direkta kining mapahimuslan sa mga pobreng katawhan.

Personal nga nasaksihan ni Sec. Ermita uban ni Gov. Yebes ang nanaglinya nga mga pobreng katawhan sulod sa merkado publiko aron makapalit sa baratong bugas sa NFA sa presyo nga tag 18.25 pesos matag kilo.

Uban ni NFA Manager Jul Akmad Lawama, sila si Governor Yebes ug Sec. Ermita ang milibot kini sa tanang mga stall nga namaligya ug bugas sa merkado. Ilang nasaksihan ang kamahal sa presyo sa commercial rice. Personal nga nasaksihan ni Sec. Ermita ang nanaglinya nga mga pobreng katawhan sulod sa merkado publiko aron makapalit sa baratong bugas sa NFA sa presyo nga tag 18.25 pesos matag kilo. Adunay usa lamang ka NFA outlet sulod sa Dipolog Public Market nga gi-antusan paglinya sa mga katawhan nga anaa ang subrang kainit ug kaigang.

Gi-presentar ni Governor Yebes ang senaryo ngadto kang Sec. Ermita nga kadaghanan sa mga nanaglinyang katawhan aron mopalit ug NFA rice ang gikan pa kini sa mga lagyong barangay nga mituyo sa paglugsong alang sa maong katuyuan nga mogasto pa ug dakong kantidad.

Sa gipahigayon nga achievers award night, si Sec. Ermita ang misugyot nga ang kabarato sa bugas sa NFA kini ang ibaligya direkta ngadto sa pobreng katawhan nga maoy hatagan sa maong kahigayunan, samtang niadtong kaya ra nga makapalit sa taas-taas nga presyo sa bugas dili na lang kini mopalit ug NFA rice.

Ang maong tinguha ni Governor Yebes ang gi-aprobahan kini diha-diha ni Presidente Gloria Macapagal Arroyo nga gipaagi kang Sec. Ermita uban sa pagmando sa NFA nga dugangan ang allocation sa bugas matag semana diha sa mga kalungsuran ug motabang ang probinsiya sa pag-distribute niini.  (Southpoint, Vol.1No.23)

*

 
ZaNorte mitimaan sa iyang ika-56th ka tuig nga anibersaryo

Ang mga kabus nga lungsuranon maoy kinahanglan nga unahon sa paghatag ug pagbusog sa mga sirbisyo gikan sa gobyerno.

Mao kini ang nahimong mensahe ni Governor Rolando Yebes sa mga kawani ug opisyales sa Zamboanga del Norte sa pagtimaan kagahapon sa ika 56 ka tuig nga anibersaryo sa pagka himogso sa                                                     lalawigan.

Giklaro sa gobernador sa ZaNorte nga gikan sa iyang paglingkud hangtud karon ang iyang sumbanan sa pagpanirbisyo nagapabilin pa gihapon ilawom sa iyang panultihon, “Una sa tanan ang katawhan”.

Nagpasalamat si Governor Yebes nga ang mga kawani sa probinsiya mihatag gayud sa ilang pagsuporta sa nagkadaiya niyang mga programa nga gipadas-og nga maoy rason nga ang ZaNorte miani karon ug daghanang mga kalambuan ug midani ug dugang mga investors para makatabang sa pagsulbad sa pagpanarbaho sa katawhan ug pagpalagsik sa atong ekonomiya ilabi na sa sector sa transportasyon.

Gipahigayon usab ang pormal nga pagtimaan sa usa ka kasabutan tali na sa Private Oil Mills Ventures Corporation alang na sa pagpatindog sa ilang 10,000 tons a day capacity nga tropical fruit processing plant didto sa Provincial Agri-Industrial Center sa Irasan, Roxas.

Si Governor Yebes midugang sa pagpahayag atubangan sa mga opisyales ug kawani sa probinsiya nga ang pagpanirbisyo sa gobyerno dili gayud angayan nga sagulan ug negosyo.

Matud pa niya ang pahiyum ug pagpasalamat gikan sa atong mga katawhan nga maoy makadawat sa tukmang sirbisyo gikan sa gobyerno sigu na kaayo nga bayad diha sa ilang pagpangalagad sa katawhan.

Sa samang bahin, higpit nga gipadas-og sa amahan sa lalawigan sa Zamboanga del Norte nga ipadayon ang panaghiusa ug pagtinabangay sa atong mga katawhan nga maoy nakita karon sa pagtimaan sa ika 56 ka tuig nga anibersaryo sa atong probinsiya karong adlawa, Hunyo 6, 2008.

Mao kini ang giluwatang mensahe ni Governor Rolando Yebes subay sa pagtimaan karong adlawa sa pagka himogso sa ZaNorte pagka probinsiya mga 56 na ka tuig ang nakalabay.

Gipahibalo usab ni Governor Yebes usa ka special non-working holiday sa tibook sa ZaNorte human gideklarar sa Malacanang nga gipirmahan mismo ni Executive Secretary Eduardo Ermita sa ngalan ni Presidente Arroyo.

Si Governor Yebes nagkanayon nga kinahanglang ipadayon kining maong maayong mga buhat ug programa ilabi na agrikultura, turismo ug panglawas para mas molambo pa ang ZaNorte.

Sumala pa niya sa upat pa lamang ka tuig nga gipahigayon ang Hudyaka Festival nakita ug nasinati na ang dakung kalambuan sa ZaNorte ilabi na diha sa pagdani ug mga investors.

Labaw sa tanan ang gipakita nga panaghiusa sa mga local officials sa ZaNorte alang kaniya mahinungdanon kaayo para mas moabante pa ang atong probinsiya.

Sa samang bahin gihagit sa gobernador ang mga kritiko sa iyang mga programa nga unta ilang lantawon unsay nabuhat sa probinsiya sa nakalabay’ng mga tuig sa pagpahigayon sa Hudyaka Festival atubangan sa pagpunay nila ug saway sa maong programa.

Matud pa ni Governor Yebes unta ilang lantawon ayha sila manaway, ang mga kalambuan nga nabatunan sa probinsiya tungod sa pagpahigayon sa Hudyaka Festival gikan sa paglambo sa sector sa transportasyon sa kawanangan ug kadagatan uban sa pagsulod karon sa mga investors ug ang mga programa nga gipadas-og sa probinsiya sama sa pagpa-enroll sa PHILHEALTH sa mga kabus nga katawhan, LANDO BIBO, ZaNorte Medical Center, Hi-Green Program ug uban pa.

Turismo ug agrikultura magapabiling maoy higpit nga ipadas-og sa kagamhanang probinsiyal sa tuyo nga mapalambo niini ang panginabuhi sa katawhan ug molihok ang atong ekonomiya.

Matud pa ni Governor Yebes sa iyang nakita anaa sa duha ka mga sector ang hayag nga kaugmaon sa atong mga katawhan sa ZaNorte kay layu ra kaayo nga makakompetensiya ang probinsiya sa pagdani ug mga industrial investors tungod kay kulang pa ang gibatunan natong mga support infrastructure.

Sa sector sa turismo ang gobernador nagkanayon nga ang probinsiya motabang sa mga lungsod sa pagpalambo sa ilang mga potential tourist attraction pinaagi sa pagpahiluna sa mga gikinahanglang inprastraktura niini.

Nagpasalamat usab ang gobernador sa tanang mga mayores sa ZaNorte nga misalmot sa Hudyaka Festival nga nagpakita sa ilang pagpakighiusa sa programa sa probinsiya ilabi na sa duha ka mga siyudad sa Dipolog ug Dapitan.

Iyang gikalipay nga ang mga mayores miapil gayud sa nagkadaiyang mga kalihukan sa Hudyaka Festival gikan sa pagpahigayon sa parade sa pagbukas niini hangtud na ubang kalihukan nga maoy naghatag ug kasadya sa selebrasyon sa anibersaryo sa probinsiya.

Ang gobernador nalipay usab nga mismo ang iyang mga kritiko mituo sa iyang programa ug mga paningkamut ilabi na sa pagpahigayon sa Hudyaka Festival tungod kay mipakita sila sa ilang aktibong pagsalmot sa nagkadaiyang kalihukan niini.

Kini usab ang nahimong pahayag ni Governor Yebes kabahin na sa aktibong pag-apil sa usa sa kritiko sa iyang administrasyon nga si Elmer Elmedulan nga misalmot sa gipahigayong chess tournament.

Matud pa ni Governor Yebes kini usa lamang ka pagpamatuod nga mismo ang mga kritiko sa iyang programa miduyog karon sa probinsiya.

Matud pa ni Governor Yebes ang usa sa pinaka mahinungdanong kalihukan ang paghatag sa probinsiya ug pasidungog sa mga tawo nga maoy naghatag ug garbo ug dungog sa ZaNorte.

Nag-una sa hatagan ug pasidungog sa gobernador mao si General Alexander Yano ang bag-ong hepe sa armadong kusog sa nasud uban na ni Executive Secretary Ermita nga nahimong adopted son sa ZaNorte.

Samtang pagatiman-an usab ang usa ka kasabutan tali sa POMS Venture alang na sa pagpatindog sa ilang tropical fruits processing plant. (The New Nandau, Vol. XVII No.48)

*

 

HUDYAKA THE BIGGEST ECONOMIC DRIVE SA ZANORTE –BULLET JALOSJOS

Ang Hudyaka Festival maoy pinakadaku karong economic drive nga nabatunan sa atong lalawigan sa Zamboanga del Norte nga maoy naghatag ug oportunidad sa atong mga katawhan para maka panginabuhi, makatrabaho ug modani sa mga investors.

Kini ang gipahayag ni Board Member Bullet Jalosjos, ang chairman sa committee on tourism sa Sangguniang Panlalawigan sa ZaNorte.

Matud pa ni Board Mem-ber Jalosjos ang Hudyaka Festival sa kada tuig nagkadaku ug nagkadaghan usab ang mga tawo nga mi-saksi niini nga nagpasabot nga dugang mga turista ang misulod karon sa atong probinsiya busa dugang income usab para sa atong mga katawhan.

Sa pagbukas pa lamang sa Hudyaka makita na nga kini usa ka dakung kalam-pusan kay gidugok sa ba-gang duot sa mga katawhan.

Samtang ang misalmot sa nagkadaiyang mga duwa nga gihan-ay sulod sa siyam ka adlaw’ng selebrasyon sa Hudyaka Festival nagka-daghan usab nga nagpasabot nga miani na kini ug pag-suporta hangtud sa ubang mga probinsiya.

Ang chairman sa com-mittee on tourism sa Za-Norte midugang sa pagpa-hayag nga ang Hudyaka Festival gipahigayon para makamugna kini ug dugang kahigayunan sa pagpanarba-ho sa atong mga katawhan, pagpalambo sa atong indus-triya sa turismo ug pagpa-lagsik sa atong ekonomiya.

Para ni Board Member Jalosjos ang Hudyaka Festi-val maoy pinaka daku nga economic drive sa atong probinsiya busa angayan lang nga kini pagasupor-tahan. (The New Nandau, Vol. XVII No.48)

 
 

Kinahanglang libro sa mga tulunghaang gipanghatag

Ang mga libreng libro nga gipanghatag alang sa mga tulunghaang publiko sa dibisyon sa Dipolog gihatag sa The Children International-Philippines Housing Foundation, Inc. (CIPHFI) nga girepresentahan ni Rebecca Fuellos, dili kay gikan sa Rotary Club of Dipolog.

Mao kini ang giusab pagpasabot sa City Information Office sa dakbayan. Ang Rotary miabag lamang sa pagpang-apod-apod sa maong mga libro.

Ang mga librong hinatag sa CIPHFI gikuha gikan sa usa ka temporaryong hinulamang bodega aron ipanghatag sa mga tulunghaang publiko sa siyudad. 

Gisugdan karon sa City Schools Division sa Dipolog ang pagpang-apod-apod sa nagkalain-laing matang sa mga schoolbooks ngadto sa mga tulunghaan dinhi palibot sa dakbayan.

Kining maong pagpang-apod-apod gihimo didto sa buhatan sa DepEd pinaagi ni Belen T. Cabale, ang kasamtangang supply officer sa City School Division, uban nila ni Ronilo Yarag ug Pergentino Yabres, isip mga education supervisors sa maong buhatan.

Ang unang tulo ka mga tulunghaan nga nakadawat sa nahisgotang mga libro mao ang Cogon National Highschool, Dipolog Pilot Demonstration School ug Tubod Elementatry School sa Barangay Galas.

Kining maong mga librong gipang-apod-apod sa mga nagkalain-laing tulunghaan dinhi sa dakbayan nagagikan sa The Children International-Phil. Housing Foundation Inc. nga girepresentahan ni Rebecca Fuellos, isip donasyon alang ning dakbayan nga gidawat sa Dipolog City Schools Division isip maoy resipiyente ilawom usab sa pag-abag sa Rotary Club of Dipolog niadtong nakalabay nga semana.

Gikalipay ug dako ni City Mayor Evelyn T. Uy tungod kay kining nasangpit nga mga libro nga gihatag sa maong foundation makatabang kaaayo ug dako ngadto sa atong mga tulunghaan nga magasilbing instrumento ngadto sa dugang kalamboan alang sa tanang mga kabataang magtutungha, dinhi sa dakbayan.

Gawas sa nahaunang tulo ka mga tulunghaang nakadawat na sa maong mga libro, gilauman nga ang uban niini ang magpakadawat usab ning susamang mga libro sa dili pa mobukas ang klase karong sunod nga semana.(CIO-alb)

*

 

Mga kritiko sa Hudyaka mubo ra ug panglantaw

Bisan pa man sa kabatan-on sa Hudyaka Festival sa ZaNorte nakahimo na kini ug dakung pag-abante alang na sa pagpalambo sa lalawigan sa Zamboanga del Norte.

Kini ang gihimong paghulagway ni Governor Rolando Yebes sa pagbukas sa 4th Hudyaka Festival subay sa pagsaulog sa ika 56 ka tuig nga kasumaran sa pagka himogso sa ZaNorte pagka lalawigan.

Gisaysay sa gobernador nga bisan pa sa kalinghod sa Hudyaka Festival kini nakadani na ug mga investors nga maoy naghatag sa atong mga katawhan sa kahigayunan nga makapanarbaho ug makapanginabuhi.

Gipatin-aw ni Governor Yebes nga ang unang katuyuan sa Hudyaka Festival mao ang paghiusa sa tanang katawhan sa tibook lalawigan sa ZaNorte uban na sa nagkadaiyang mga lideres.

Ikaduha ang Hudyaka maoy gihimong behikulo nga maoy mopalawig sa pagpalambo sa atong probinsiya.

Sumala pa sa gobernador aduna pa gayuy pipila ka mga politiko nga hangtud karon wala gayud makatugkad ug makakita sa nahimong mga kalambuan sa Hudyaka Festival ug miinsistir nga unahon sa paghatag ug pagtagad ang problema kabahin sa bugas.

Giklaro ni Governor Yebes nga kabahin sa problema sa kamahal sa presyo sa bugas karong panahuna dugay na kining gihatagan ug aksiyon sa iyang administrasyon nga gutiki panahon sa duha ka managkabuwag nga tigum sa Provincial Peace and Order Council ug sa bag-ong gipahigayong Pro-vincial Development Council.

Matud pa sa gobernador bisan pa sa kalinghod sa Hudyaka Festival nga upat pa lang ka tuig nakahimo na kini sa pagdani ug dugang biyahe sa abyon para sa Dipolog.

Sugod usab karong buwan sa Hunyo dugang biyahe sa abyon ang motugpa sa Dipolog para Cebu.

Samtang ang biyahe sa kabarkuhan karon kaniadto duha lamang ka kompaniya sa barko ang nagbiyahe sa atong pantalan karon lima na ka shipping companies ang nagtabok-tabok gikan sa Dapitan paingon sa Visayas dala ang atong mga produkto sa agrikultura.

Matud pa ni Governor Yebes mismo ang iyang mga kaatbang sa politika mitam-bong sa pagbukas sa Hudyaka Festival kay nakita nila ang kamaayo sa gipahigayon karong programa para sa atong mga katawhan.

Tungod sa pagsaba-saba sa Hudyaka Festival ang ZaNorte gidugok karon ug mga investors diin usa na niini ang gipatindog karong fruit processing plant ni Businessman Eduardo “Danding” Cojuangco ug ang umaabot nga operasyon sa ethanol plant sa Zambo Norte Bio-Energy Corporation.

Si Governor Yebes nagkanayon nga bisan ug giunsa pa nila sa pagdaut ang Hudyaka gikan sa sinugdanan niini hangtud karon apan wala kini makapakgang sa pagbaha sa mga kalambuan para sa katawhan sa ZaNorte.

Sa iyang lantaw ang mga nanaway sa Hudyaka bonga lamang sa ilang kasina sa dakung nahimo karon sa kasamtangang adminis-trasyon sa probinsiya.

Sa namatikdan ang kusog nanaway karon sa administrasyong Yebes mao ang mga kanhi opisyal sa ZaNorte nga maoy hinungdan nga nadeklarar ang probinsiya kaniadto nga maoy numero unong pobre nga lalawigan sa tibook nasud sa tuig 2003.

Natandi usab ang Pagsalabuk Festival sa dakbayan sa Dipolog diin sulod na sa napulo ka tuig kining giselebrar sa siyudad apan gilupig sa kalambuan nga nahatag sa upat pa lamang ka tuig nga Hudyaka Festival.

Sa samang bahin gihulagway sa gobernador kadtong mga kritiko sa Hudyaka Festival nga mga tawo nga bolok o mubo ang panglantaw busa dili makatuhog.

Samtang si Atty. Ivan Patrick Ang, Provincial Tourism Officer sa ZaNorte, nagkanayon nga ang usa sa dakung nahimo sa Hudyaka Festival mao ang pagbura o pagpapa sa pagtuo sa uban nga nalakip sa kasamok ang atong lalawigan sa ubang bahin sa Mindanao atubangan sa pagsulod karon sa mga investors.

Matud pa ni Atty. Ang gawas niini ang Hudyaka nakahatag ug garbo sa matag lungsuranon sa ZaNorte tungod kay miani na ug pagdayeg gikan sa nasudnong kagamhanan ug ubang bahin sa atong nasud nga ang atong lalawigan nakapahigayon sa sama ka daku nga festival.

Sukwahi usab sa Pagsalabuk Festival sa Dipolog nga adunay mga barangay officials nga nagbagolbol sa kadaku sa ilang gastu sa street dancing nga walay mabalik ngadto kanila sa kabahin sa Hudyaka Festival ang mga municipal mayors tanan mipadayag sa ilang pagsuporta.

Si Mayor Cris Eguia sa lungsod sa Katipunan mihulagway nga sa kada tuig nga pagpahigayon sa Hudyaka Festival nagkadaghan ang tawo ang misaksi niini timailhan nga kini miani sa pagsuporta gikan sa katawhan.

Subling gipahibawo ni Governor Yebes nga ang tanang kagamhanang local nga misalmut sa Hudyaka Festival 2008 magpakadawat ug kapin sa usa ka milyon ka pesos nga financial assistance gikan sa kagamhanang probinsiyal nga mao nay nahimong naandan gikan sa pagsugod niini sa tuig 2005. (The New Nandau, Vol. XVII No.48)

*

 

Sa Job Fair, Mobile passporting
800 makatarbaho, 600 naka-proseso passport

Hingpit nga nagpasalamat ang ma katawhan sa Zanorte ug sa mga silingang probinsya kinsa nakapahimulos sa mobile passporting ug job fair nga gipahigayon niadtong Hunyo 2 ug 3, atul sa pagsaulog sa Hudyaka Zanorte Festival niining tuiga.

Mao kini ang gipabati sa pipila ka mga katawhan nga nakapahimulos sa maong serbisyo dinhi sa lalawigan.

Dul-an sa 800 ang nakapahimulos sa job fair ug dul-an sa 600 ang nakaproseso sa mobile passporting sulod sa kapin sa usa ka libo nga mga aplikante niini.

Matud pa ni Mr.Senen Ladera, ang Public Employment Services Office kon PESO Manager nga dul-an sa 800 ang nakapahimulos sa job fair ug dul-an sa 600 ang nakaproseso sa mobile passporting sulod sa kapin sa usa ka libo nga mga aplikante niini.

Ang team sa Department of Affairs (DFA) sa dakbayan sa Zamboanga gilangkuban nila ni Mohammad Charlemagne Salam, Marieta Malnis, Janice Handa, Minda Mae Bahjin, Katherine Samson ug John Paul Anañes. Samtang ang jobfair adunay 20 ka nagkalain-laing agency ang miidawat ug mga aplikante alang na sa laing nasud.

Gibutyag usab ni Tabing Patangan sa PESO, nga dili na kinahanglan mobalik pa ang taga DFA dinhu aron sa pag-release ug ang mga katawhan nga nagproseso sa ilang pasaporte gumikan kay ipadala lamang kini sa usa ka cargo forwarder direkta sa ilang panimalay, diin lakip na sa ilang gibayaran atul sa ilang pag-proseso.

Kahibaloan nga ang job fair ug mobile passporting matag tuig kining gilugway sa kagamahanang probinsyal diin tipik sa mga kalihukan sa Hudyaka Zanorte Festival. (Sheng, Southpoint, Vol.1No.23)

*

 

‘Test of Power’ gidugokan

Daw makapanglimbawot ang kabaga sa katawhan nga misaksi sa bahog-bahog sa kimono atol sa duha ka gabii na Zanorte vs. Northern Mindanao “Test of Power” amateur and professional boxing tournament nga gipahigayon sa Zanorte festival sulod sa ZN sports complex.

Ang nagsangka mao ang nagkalain boksidor gikan sa nagkalain-lain stable dinhi sa provincial batok sa mga boksidor sa Iligan City. Mapasalamton kaayo ug dako ang Presidente sa Zamoanga del Norte Boxing Federation si Nick Carbonel sa gipakitang katakos sa mga boksidor nga maoy nakapalingaw sa katawhan nga misaksi  sa maong paugnat sa kusog.

Gikan sa supporting Main Event sa mga pinili nga boksidor gikan sa Boy Stable sa Sindangan, BM Bullet Jalosjos sa Dapitan City, Mayor Noli Sulit Stable sa La-Libertad, Mayor Cris ug Patchi Eguia Stable sa Katipunan, batok na sa Iligan Ccity, nangharos ang mga boksidor sa taga Zamboanga Del Norte,

Sa unang gabii ang mga lokal nga boksidor mao ang nagsangka diin ang migawas nga mananaog sila si Don Verosanto midaog sa Retirement Desisyon, Dodoy Quintero Win by Mandatory 10 Counts sa 3 rounds human misurrender ang iyang kontra tungod sa shoulder injuries. Si Rene Elcamel midaog usab sa Retirment Desisyon, samtang sila si Rey Gooc, Antonio Quizon, Rolando Valencia, Reymark Capin, Parjan Jalani Jr, Fill Villanueva, Michael Acevedo, Nino Tubigon ug Michael Bastasa ang midaog sa Unanimous Desisyon, samtang sila si Belmor Acabo Vs. Jefrey Cabasag Draw sa ilang Fight.

Sa Main Event midaog si Oscar Baño batok ni Bert Pamor sa Retirement Desisyon sa dihang misurrender si Pamor sa ilang Fight tungod sa dili makaya nga kusog nga kinumo ni Baño

Sa ika-duha gabii nga mao ang Highlight sa Zanorte Vs. Northern Mindanao “test of Power’ sa Amateur and Professional Boxing Tournamnet  nangharos ang boksidor taga Zanorte, usa lamang ang taga Iligan City sa Bernave Baguio Stable ang nakalusot ug midaog pinaagi sa Unanimous Desisyon sa ilang 4 rounds of Boxing.

Ang miagas nga mananaog sa Supporting Main Event sa 3 rounds of Boxing sila si Jecjec Quintero, Aldrin Martalla sa ZBF talent Parjan Jalani Jr. Engr. Ed Yebes Stable ug Jan Monreal sa Power House Gym ni BM Bullet Jalosjos pulos mi-ani sa kadaogan pinaagi sa Unanimous Desisyon.

Sa 4 Rounds of Boxing migawas nga mananaog sila si Loyd Enderez, Harry Gutana, Rey Ferez, Reymarc Perez pulos taga longsod sa Sindangan ilawom sa Boy Sy Stable. Samtang gipildi ni Gardy Daygon sa Bernave Baguio Stable ang usa ka boksidor nga si Jocel Gamalo sa Boy Sy Stable. Usa ka boksidor gikan sa ZBF nga si Gerad Tuyor ang midaog human misurrender ang boksingero sa Iligan City gumikan sa injuries.

Sa 5 Rounds midaog si Godwin Tubigon sa Mayor Eguia Stable batok ni Rey Enoc sa Iligan City, samtang si Alex Tubigon sa Mayor Eguia Stable tabla batok ni Yolly Ocledina sa Bernave Baguio Stable sa Iligan City, sa dihang gipahunong ang away tungod san a-angkon nga head bat injury ni Tubigon sa iyang kilay sa ika-duha ka round sa ilang fight.

Samtang sa supporting Main Event sa 6 Rounds of Boxing. Midaog si John Flores sa Mayor Eguia Stable sa Katipunan Zn. gipildi ni Flores si Crisanto Arizo sa Bernave Baguio Stable Iligan city sa Retirement Desisyon human gitumba ni Flores sa iyang right hook nga mitama sa apapangig ni Arizo hinongdan sa pagka-down ug gipa-surrender tungod sa na-angkon injuries. Sila si Reynato Maghuyop gikan sa Mayor Noli Sulit Stable sa La-Libertad Draw batok ni Ferdenand Patiño sa Iligan City tungod sa sinokli-an sa ilang kinomo nga walay na-alkansi hangtod nahuman ang unom ka round nga meresulta sa Draw Desisyon.

Sa Highlights sa maong turniyo mao ang Championship bout tali nila ni Joel Dela Cruz batok Dondon Lapus sa Super Featherweight sa Main Event daw makapanglimbawot ang ilang away gikan sa sinogdananhangtod natapos ang napulo ka rounds sa ilang fight gumikan sa ilang sinokli-ay sa makusog nga kinomo. Ultimo ang misaksi ug nanglantaw nakulbaan kun kinsa nila ni Dela Cruz ug Lapus ang matumba. Apan ang duha ka boksingero pulos milahutay hangtod sa napulo ka round ug walay natumba. Diin sa fight nila ni Dela Cruz ug Lapus miresulta sa Draw Desisyon  sa dihang usa sa tulo ka mga hurado mipagawas sa iyang Draw Desisyon sa maong fight hinongdan nga natabla.

Ang fight nila ni Dela Cruz ug Lapus gidumala sa Games and Ammusement Board kon GAB pinaagi ni Promoter Bernard Yu inabagan sa Zamboanga Del Norte Boxing Federation pinaagi ni ZBF President Mr. Nick Uy Carbonel ug gisaksihan mismo ni Governor Rolando E. Yebes

Si Carbonel mapasalamaton kaayo ug dako sa supporta nga gihatag nila ni Atty. Ivan Patrick Ang Provincial Tourism Officer, Atty Michael Allan Ranillo Provincial Tourism Council Chairman, Atty Flint Concha, labi sa tanan ni Governor Rolando E. Yebes sa hugot nga supoorta sa pinaka-unang nahitabo nga Zanorte Vs. Northern Mindanao “Test of Power” Amateur Boxing Tournament sa duha ka adlaw gipahigayon sa Hudyaka Festival 2008 sulod sa Zn, Sports Complex. ang gipakitang hugot nga supporta sa mga opisyal karon sa probensya maoy nakahatag karon ug kadasig sa mga batan-on nga boksidor para pagkab-ot sa ilang pangandoy nga mahimong usa ka Professional Boxers sa umalabot nga panahon matod pa ni ZBF President Carbonel. (Southpoint, Vol.1No.23)

*

 
YEBES MASALIGON NGA IPALAMBO ANG BOXING SA ZANORTE

SA tinguha nga madiskobrihan ang mga maayong boksidor dinhi sa Zanorte gipasalig karon ni Governor Rolando Yebes nga iya kining palambuon gikan sa barangay level paingon ngadto sa lungsod ug probinsiya.

Sa mensahe nga giluwatan sa gobernador kagabii, sa wala pa ang main event sa gipahigayon nga dulang Boxing Test of Power Zanorte VS. Northern Mindanao nga diin ang main event mao sila si Joel Dela Cruz ug Dondon Lapus, iyang gipahayag nga uban sa mga miyembro sa Sangguniang Panlalawigan ilang gitinguha karon nga ang boxing ang himoon kini kada barangay paingon sa lungsod. Kung kinsa ang mamahimong champion mag-abot kini sa provincial  level.

Sa nakita ni Governor Yebes nga nanaghuot ang mga katawhan nga misaksi sa maong dulang boxing kagabii ug niadtong mi-aging gabii alang kaniya kini nagpasabot nga buhi ang maong natad sa paugnat sa kusod dinhi sa atong probinsiya ug gusto niya nga kini magpadayon.

Iyang gilauman nga ang maong mga boxers nga mipakita sa ilang abilidad makita kini sa pipila ka mga panahon nga anaa na mi-away sa mga dakong competition sulod ug gawas sa nasud.

Sa away nila ni Dela Cruz ug Lapus kagabii nga maoy event nahimong draw kun tabla ang desisyon sa ilang dula. Daw sa nalingaw pag-ayo ang mga katawhan sa mao nilang away nga makita ang panagsinukliay sa mga makusog nga kinumo.

Angayang masayran nga ang pagbanhaw sa dulang boxing dinhi sa Zanorte kini pinaagi usab sa pagpaningkamot sa Zanorte Boxing Federation pinaagi sa ilang presidente nga si Nick Carbonel. (Southpoint, Vol.1No.23)

 
 

 HULAGWAY BALITA

 

 

*

 

Pulauan Port Manager masaligon nga mobaha pa  ang dugang kalambuan sa puerto sa ZaNorte

Daku ang pagsalig sa port manager sa Pulauan Port sa dakbayan sa Dapitan nga mas mosutoy karon ang dugang pang kalambuan alang na sa nagkadaiyang pantalan sulod sa Zamboanga del Norte karon nga nahimo na silang Port Management Office.

Mao kini ang gipahayag ni Atty. Roger Asprer, Pulauan Port Manager kinsa mipahayag nga tapos nang gipirmahan ni Presidente Gloria Macapagal-Arroyo ug gidasonan usab sa ilang boardt sa Philippine Ports Authority ang pagkonbirtir sa pantalan sa Dapitan gikan sa pagka Port Terminal Office ngadto na sa pagka Port Management Office.

Matud pa ni Atty. Asprer kini maoy nahimong sangputanan sa hangyo ni Governor Rolando Yebes ngadto kang Presidente Arroyo nga mahimong PMO ang pantalan sa Dapitan.

Gipatin-aw ni Atty. Asprer nga karon nga PMO na ang Pulauan Port ang tanang pantalan sulod sa ZaNorte gikan sa Dipolog, Katipunan, Roxas, Sindangan, Liloy ug Siocon ang ilawom na karon sa ilang hurisdiksiyon.

Matud pa ni Atty. Asprer karon nga PMO na ang Pulauan sayun na kining makapadas-og sa gikinahanglan niining mga kalambuan sa iyang pasilidad kay ang mamahimo nilang kita sa operasyon sa pantalan otomatik nga ilang magamit para na sa maong katuyuan.

Gibutyag usab sa port manager nga sa pagkakaron ang Pulauan Port misaka ug balig 200 percent ang volume sa traffic sa kargamento ug pasahero.

Matud pa niya sa pagsugod sa Strong Republic Nautical  Highway ang ilang data nagpakita nga sulod sa usa ka tuig nga operasyon mokabat lamang sa 474 nga mga rolling cargoes ang miagi sa Pulauan Port.

Apan karon mitala na sila ug kapin sa 14,700 plus nga rolling cargoes nga miagi sa Pulauan Port.

Kabahin sa pagbutang usab ug roll-on roll-off port sa lungsod sa Katipunan si Atty. Asprer nagkanayon nga kini makatabang ug daku sa mamahimong income sa Pulauan Port kay kini usa man ka complimentary port sibu sa plano ni Governor Yebes nga maduol-duol ang biyahe patabok paingon sa Negros Oriental gikan sa atong probinsiya.

Samtang si Mayor Cris Eguia sa Katipunan mibutyag nga padayon nang giproseso karon ang ilang gitinguhang loan para kasugdan na ang pagkonstrak sa ilang pantalan.

Gipahibalo usab ni Mayor Eguia nga gisultihan siya sa PPA Central Office nga ang pundo nga gipahat para sa pagkonstrak sa ilang pantalan hayan mapagawas na kay naresolbar na ang problema sa maong buhatan didto sa pantalan sa Batangas.

Sa kabahin ni Governor Yebes gipahibalo daan niini nga iyang tabangan si Atty. Asprer nga magpabilin nga maoy port manager sa Dapitan.

Sa samang bahin gipatin-aw sa gobernador ngano nga gipangayo gayud niya kang Presidente Arroyo uban nila ni Congresswoman Cely Jalosjos-Carreon ug Congressman Cesar Jalosjos nga mahimong PMO ang Pulauan Port makalihok na sa iyang kaugalingon nga dili na mananghid pa didto sa Cagayan de Oro City.

Gipahayag usab ni Atty. Asprer nga nakatabang ug daku sa pagpalagsik sa trapiko sa mga kargamento ug pasahero Pulauan Port ang Hudyaka Festival ilabi na sa paghidangat sa mga turista gikan sa Luzon ug Visayas.

Dugang roll-on roll-off ramp ang gikinahanglan karon sa Pulauan Port para sa pag-akomodar sa dugang pang mga barko ilabi na karon nga adunay walo ka barko ang naggamit niini.

Matud pa ni Atty. Asprer magpatabang na usab siya ni Governor Yebes niini para na sa dugang pasilidad lakip na sa pagkonstrak sa bag-ong passenger terminal building. (The New Nandau, Vol. XVII No.48)

*

 

Pulso Sa Katilingban
Cicer M. Binghay
“Money is a horror. . .”

KINSA KAHA ANG SUNOD NGA PRESIDENTI? KARONG 2010? Matod pa sa atong batakang balaod, ang masunod gihatag mao kining mga provisionis:

“No person may be elected President unless he is a natural born citizen of the Philippines, a registered voter, able to read and write, at least forty years of age on the day of the election and a resident of the Philippines for at least ten years immediately preceding such election.” (Art.VII, Sec 2.)

“The President and the Vice-President shall be elected by direct vote of the people for a term of six year… The president shall not be eligible for any reelection..” (Sec. 4)

“The returns of every election of the President and Vice-President, duly certified by the board of canvassers of such province or city shall be transmitted to the congress..Upon receipt of the certificates of canvass, the President of the Senate shall not later than thirty days after the date of election, open all the certificates in the presence of the Senate and the House of Representatives in joint session, and the Congress, upon determination of the authenticity and the execution thereof in the manner prescribed by law, canvass the votes.

“The person having the highest number of votes shall be proclaimed elected..” (Sec. 4, para. 4 and 5)

Sabotabol kaayo nga si bisan kanato nga maka basa o makasulat kon makakaya maka kandidato pagka presidenti sa nasod. Basta masubay sa kumpleto tanang gipasunod “requirements.”

Wala hisgoti kon unsay imong abilidad, gikinahanglang mga kwalipikasyones sa edukasyon, profesyon o bisan unsa na lang basta igo na nga makabasa ug makasulat.

Sa panahon ni Erap Estrada nahimugso ang kampanaya nga pulos palakaw sa pagka popularidad. If the parties make the process of selecting nominees for the highest offices in the government a mere comedy, party choices become  less than genuine and democratic process is subverted. The pre-convention campaign becomes a contest for popularity, and those who happen to be in the public eye for other reasons than competence in the public service are tempted to enter presidential politics.

Karon, kaniadto bag-ohay pa ang nahibaloan natong mga kandidato ang mga aktor ug mga aktres, mga iladong tawo sa puting tabil nga kaya nila ang pag “entertain” sa mga pasunding ug pasundayag sa atubangan sa mga botanting katawhan, with their startling vocabularies and emoting abilities, and people who may be good vote getters but evidently illiterate in public affairs.

Kon personal popularity is ultimately to become the winning qualification for the presidency we shall never live down our classification as the basket case of  Southeast Asia.

Mao ni karon, politics is getting to be an area where the wise and sober may soon shy away, giving way to the entertainers and emoters.

Pero sa panahon ni PGMA nakatumba-libanta sa popularidad napukan “till kingdom come” sa “Hello Garci” sa piniliay presidential sa 2004. Diin nalubag dayon napinkaw ang pagka bug-at unta pagka popular ni aktor Fernando Poe, Jr. ginamit ang tinumpi salapi. Mao lagi balikon nato, “money is a horror but it can do fantastic things.” Ang salapi karon maoy mokaparang ni bisan kinsa nga popular tibook kalibotan.

Mao man gani dili ikatingala nga si Villar presidente sa Senado nakauna karon sa tanang mga presidentiables nga gibaniog. Wala ig-sapayan ni Villar ang paggasto bisan pila paguna-una gumikan sa kadaghan sa iyang salapi. Sa ato pa ang mahimong presidenti karong 2010 kadto lamang dunay mga tinagingting nga makabungol sa kadaghan wala na dinhi ang popularidad.. “passe” na o laing kanhiay na lamang. (Press Freedom, Vol. XX No. 34)

 
Credits: Press Freedom is published every Saturday and entered as 3rd class mail matter in Dipolog City. Printed by Young Printing Press with Editorial Office located at Upper Turno, Dipolog City. Tel. No. (065) 212-4343 or 212-6665

 

Gatecrasher
By: Jun S. Cariño
KLASE NA USAB

 

Sugod  na usab ang pagbukas sa mga tulunghaan alang sa lain na usab nga tuig tingtungha. Apan sigun sa atong nakuha nga mga taho, daghan ang dili makapadayon sa ilang pagtungha tungod kay pit-os kaayo ang panginabuhi, mahal kaayo ang bugas, gasolina ug ubang nag-unang mga palaliton mao nga dili na makatungha si Inday ug si Undo bisan pa man unta nga gusto nila nga makatapos sa ilang pagtungha.

Mao kini ang mapait nga talan-awon dinhi sa kapupud-an lakip na ang lalawigan nga atong natawhan. Kalagmitan sa mga kabataan ang napugos na lamang sa pagpanarbaho ug pag-uma aron lamang ilang kasudlan ang nagkutoy nga tiyan kay kun sa ila lamang nga ginikanan sila magsalig, hayan nga silang tanan mag-ilaid sa tumang kauyamot.

Busa, kadtong mga kabataan nga suwerte pang makatungha, ayaw kamo pagtinapulan aron inyong makab-ut ang inyong damgo ugma damlag.

*****

Naunsa na man intawon kining dakbayan nga puros na man nagkadaghan ang mga tulisan, mangingilad ug hold-upper? Unsa man diay gibuhat aning mga kapolisan? Nganong  dili man sila makadakop nga unta wala man sila pasaadi sa taga pamunuan sa dakbayan?

Gani, sila gitabangan dili lang sa gasolina kun di apil na sa bayad sa kuryente ug tubig, lakip na ang mga gamit sa opisina, asta mga sakyanan? Unya ra ba dayon, moingon nga sila gipasagdan aron lang makarason nganong wala makabuhat sa ilang katungdanan.

Pastilan kini silang mga tawhana.Makaduda na man pag-ayo.Mura na man ug kining mga pulis adunay kalambigitan sa mga kriminal. Tinuod ba kini, Provincial Director Yanga?

*****

Atong pahalipayan si Mayora Evelyn Uy sa iyang walay puas nga pagtabang ug pag-ayuda aron mahimong malampuson ang mga kalihukan sa probinsiya bisan tuod ug sa mga daghang mga higayon siya sige ra intawon nga yam-iran ug dili tagaan sa igong pagtamud isip maoy mayora sa dakbayan.

Kun kahinumduman, ag sa miaging Regional Meet wala man gani siya tagai sa higayon nga makasulti bisan na lang sa pag-welcome nga unta ang maong dula diri man gihimo sa Dipolog. Pastilan kining mga tawhana, mahadlok nga malupigan sa “billing” ni Mayora Uy. Mao na kaha kini ang timailhan sa mga tawo nga KSP o kulang sa pansin? (Dipolog Chronicle, Vol.VII No.50)

 
 

week's guest
Ni: Custodio ‘Spartacus’ Aburido

Strike while the Issue is Hot:
Kon Papahawaon Ang Mga Kurakot, Maapil Kaha si Gloria?

Balita sa kaulohan nagkanayon nga adunay ihatag nga emergency power ngadto ni PGMA aron matubag ang kasulbaran sa mahal nga palaliton dinhi sa nasud.

Maayo unta kon ang maong emergency power, kon mahatag man gani ngadto ni PGMA, gamiton sa pagsulbad sa atong kalisud karon. Nahadlok man god kita nga ang emergency power gipasakay lamang sa atong krisis karon unya gamiton sa personal nga katuyoan.

Dili kaha hatagan sa emergency power si PGMA aron masakote gyud ang MERALCO? Maghupot sa emergency power aron makahipos ug ubay-ubay nga kuwarta aron magamit sa election sa 2010?

O kaha emergency power aron pagbusog sa kaugalingong ambisyon nga dili mapahawa diha sa iyang puwesto!

Atong tan-aw, dili tingali emergency power ang tubag sa krisis nato karong panahona. Bastante na tingali nga ang mga kurakot papahawaon sa puwesto. Kay ang kuwartang nasakote sa pangurakot diha sa panudlanan sa atong nasud bastante nang makatabang sa atong kalisud.

Aw, tuod no, kon papahawaon nato ang kurakot, maapil kaha si Gloria?

Your answer is as good as mine

-o0o-

Balita: Usa ka pari miambak gikan sa ayroplano, naa nuon siyay parakyot!

Laing Balita: Hudyaka tambal sa gutom! Kay adunay libreng kaon! (Dipolog Chronicle, Vol.VII No.50)

*

MORE NEWS NGA BINISAYA

 

 

NOTE: SEND US YOUR NEWS.  Tell us what's going on in your barangays, clubs, schools, businesses and non profit organization. You can also send notices and announcements.
          

 

    Email to webmaster@dipolognon.com

      
Google
WEB THE DAILY DIPOLOGNON