June 3, 2008

 

HUDYAKA NA BAI!

Andam ug plantsado na ang mga kalihukan nga magdala ug kasadya sa pagsaulog sa Hudyaka ZaNorte Festival 2008 nga dungan sa ika-56 nga kasumaran sa pagkahimugso sa lalawigan sa Zamboanga del Norte. Sa unang semana sa dili pa pormal nga pagabuksan ang maong kalihukan sugdan na ang Motocross Challenge nga diin himoon kini karong umaabot Mayo 24 hangtud na sa Mayo 25 diha sa Zamboanga del Norte Sports Complex grounds.

Gituyo pagtanyag ni Governor Rolando Yebes kauban ang buhatan sa Turismo ning lalawigan ug Provincial Tourism Council ang maong talan-awon sa katawhan isip paghatag ug yukbo usab sa kapistahan ni Sr. San Vicente sa dakbayan sa Dipolog. Atol sa pormal nga pagbukas sa Hudyaka karong Mayo 30 himoon ang mabulokong Costume parade, kini dili susama sa gipahigayong costume parade sa nakalabayng Hudyaka gumikan kay karong tuiga “free interpretation” kini. Nagkalain laing konsepto ang gi-adaptar sa matag contingent nga moapil sa maong parade susama na lamang sa flora and fauna, medieval Roman and Egyptian concept ug uban pang mabulokong sapot.

Gikatakdang moapil usab sa parada ang pinasidunggang bisita nga si Senate President Manny Villar. Human sa maong parade sundan gilayon kini sa usa ka grand fireworks display ug Disco ZaNorte, nga diin gidapit ang tanan sa pag-apil sa maong talagsaong programa nga pagapasiugdahan sa mga myembro sa Jaycees ning dakbayan. Aduna usay pagahimoon nga 4-cock derby ug ang Open Basketball tournament atol sa pagbukas sa maong kalihukan. Sa Mayo 31, ipahigayon ang pagbukas sa ZaNorte Mountain Bike Tour, Airsoft wargames, torneyo sa dart ug golf, Beach Volleyball, Sta. Cruzan ug ang Battle of the bands nga gipasiugdahan sa Zamboanga del Norte United Correspondents.

Samtang sa Hunyo 1, padayon gihapong pagahimoon ang mountain bike tour, airsoft wargames, golf, chess, beach volleyball, coca-cola fun day ug ang gikahinaman nga poker challenge diin magsangka ang tanang mga manulaay ug poker dinhi sa lalawigan ug lakip na niini ang mga poker masters sa mga kasilinganang dakbayan ug probinsya sa Zamboanga del Norte. Sa ika-upat nga adlaw sa maong kalihukan ipahigayon ang tennis tournament, unang adlaw sa jobs fair ug sa pagkagabii niini mao na ang giatangan nga panagbayloay sa kinumo, ang boxing challenge nga diha ipahigayon sa Teacher’s Gymnasium samtang sa Agri-tourism Fair padayong mohatag ug kalingawan ang mga clowns, comedians and magicians nga nagagikan sa mga dakbayan sa Sugbo, Davao ug sa kauluhang Manila. Ang maong pasundayag ang libre kining itanyag sa tanan ug wala kini pulta. Samtang sa Hunyo 3, nag-unang kalihukan mao ang drag race nga didto ipahigayon sa dakbayan sa Dipolog Boulevard, ikaduhang adlaw sa tennis tournament, jobs fair ug boxing. Pagahimoon usab ang Zanorte Achievers’ award ug ang 1st ZaNorte Hip-hop dance contest.

Sa Hunyo 4, laing makalingaw nga dula ang ipaila ila sa katawhan, kini mao ang tirador shootfest nga diin kompetisyon kini sa mga hanas mogamit sa tirador. Ikatulong adlaw sa tennis tournament ug unang adlaw sa BMX race. Pagkagabii niini mohatag ug lingaw ang mga grupo sa Lesbians, Gays, Bisexuals and Transgender pinaagi na sa mga nagkalain laing talent niini ug usab ipahigayon ang paghatag ug maayong pag-abi abi sa mga balikbayan ug Expats kinsa miuli gikan sa mga nagkalain laing nasud sa kalibutan aron lamang mosaksi ug moduyog sa kasaulogan sa Hudyaka Zanorte Festival. Samtang sa Hunyo 5, nag-unang kalihukan mao ang Open Sea Swimming, Pistol and rifle shootfest ug ang Dive Safari. Aduna gihapon kini pagahimoon nga mga torneyo sa tennis, beach volleyball, BMX race ug ang Open basketball tournament. Sa pagkagabii niini ipahigayon ang LGU Night, diin ang matag lungsod ug dakbayan sakop ning lalawigan ang mopresenta kini sa mga nagkadaiyang talent pinaagi na sa usa ka indigay sa harana, balak ug sayaw.

Atol sa pormal nga pagbukas sa Hudyaka ZaNorte Festival 2008 diin mabulokong gipahigayon ang colorful nga Costume parade nga miapil sa parada ang pinasidunggang bisita nga si Senate President Manny Villar.

Atol sa adlaw sa pagkahimugso sa lalawigan karong umaabot Hunyo 6, ipahigayon ang Thanksgiving mass ug ang pista sa kapitolyo diin ang matag opisina ang mag andam kini sa mga local delicacies aron iserbe sa mga bisita nga moduyog sa maong okasyon. Ipahigayon usab ang skydiving challenge, regatta, soccer festival, katkat hudyaka, ikaduhang adlaw sa dive safari, pistol and rifle shootfest ug awarding sa mga mananaug sa dulang tennis, lakip usab sa himoon mao ang sugba ta bay, diin adunay ipanghatag nga libreng isda ang buhatan sa Panguma ning lalawigan ug libre usab kining pagasugbahon diha sulod sa Agri-Tourism Fair. Sa pagkagabii niini himoon ang giatangan nga indigay sa pinakamaanyag nga dalaga sa lalawigan nga mao ang Miss Zanorte 2008. Magsangka ang mokabat 18 ka mga kandidata sa mao unyang indigay sa kaanyag. Sa maong okasyon mosaksi ug moduyog usab sila si General Alexander Yano, Ms. Earth organizer Lorraine Schuck ug si US Ambassador Anne Kenney.

Sa adlaw sa pagtak-op sa Hudyaka Zanorte 2008 karong Hunyo 7 himoon ang streetdancing competition libot dinhi sa dakbayan sa Dipolog ug ang showdown sa nagkalain laing festival sa matag lungsod ug dakbayan ning lalawigan. Sa gabii niini, ang banda nga Retrospect ang molingaw kini sa katawhan nga mosud-ong sa pagtak-op sa maong kasaulogan, sunod gilayon niini ang grand fireworks display. Lakip usab sa ipahigayon mao ang disneylando ug ang art lessons para sa mga bata. Aduna usay nagkalain laing Agri-Parlor games matag adlaw sugod sa pagbukas sa Hudyaka lahos na sa pagtak-op niini nga pagapasiugdahan sa Office of the Provincial Agriculture. Adunay nagkadaiyang makalingaw nga dula sama sa piglet catching, handicraft making contest, pinaka contest, Farm family day, farm youth talent contest, cooking contest ug uban pa.

Angayang kahibaloan nga matag gabii sa pagpahigayon unya sa Hudyaka ang aduna usab kini pagahimoon nga nightly concert. Gipabati ni Provincial Tourism Officer Atty. Ivan Patrick Ang nga gituyo nila paglakip ang daghanang mga kalihukan sa pagpahigayon sa Hudyaka 2008 gumikan kay gusto ni Governor Lando Yebes nga mas lingaw ug sadya ang pagpahigayon karong tuiga. Ngani, ang buhatan sa turismo ning lalawigan ang mihimo na kini sa information campaign sa mga kasilinganang mga probinsya sa Visayas ug Mindanao sa tuyo nga mas modagsa pa ang mga katawhan nga gustong mosud-ong sa pagpahigayon sa Hudyaka niining tuiga ug sa mga sunod pa nga pagsaulog niini. Dugang pa ni Ang nga sa subsob nga pagpaningkamot sa lalawigan ubos na sa administrasyon karon ni Governor Rolando Yebes hinay hinay ng naila ang probinsya didto sa kauluhan ingon usab sa mga nasud sa Asya, Europa ug Amerika. “Niining mga programa nga gihimo ni Governor Yebes hinay hinay unyang makita ug mabati sa katawhan sa umaabot nga panahon ang mga nilugdangan sa gihimong pagpaningkamot nga mapalambo ang natad sa Agrikultura ug turismo dinhi sa lalawigan”, panapos nga pamahayag ni Atty. Ang.

Ang pagpahigayon sa Hudyaka Festival 2008 ang paga-coveran kini sa Trip na Trip nga programa sa ABS-CBN kinsa host sila si Catherine de Castro, former Pinoy Big Brother housemates nga sila si Uma, Franzen ug Jayson. (Roldan S. Realiza, ZNUC Member)

*

 

CAB DRIVERS APEKTADO PRICE HIKE SA GASOLINA
MAYOR UY UYON SA PAG-USBAW SA PLETEHAN

Kung ugaling walay mahitabong rollback sa presyo sa gasolina hayan mapugos na usab ang mga sakop sa transport sector sa pagpasaka sa singil sa plitihan. Kini ang nahimong reaksiyon sa pipila ka mga driver sa motorcab kinsa maoy direkatang naapiktuhan sa way pu-as nga pagsaka sa presyon sa gasoline. Sumala pa nila kulang na kaayo ang ilang kita para ipasigo sa ilang inadlaw-adlaw nga panginahanglanon pun-an pa sa kalit nga pagsaka sa presyo sa bugas.

Ilang gipahibalo nga kung ang usa ka driver mo-abang ug 130 pesos sa motorcab ug namasahero gikan sa alas 6 sa buntag hangtud sa alas 6 sa gabii kini mo-consume ug gasolina nga upat ka letro sa tag 52 pesos matag letro kini mokabat na ug 208 pesos punba-an pa sa abang nga 130 pesos ang tanan mokabat sa 338 pesos samtang mokita lamang sila ug pinakataas 400 pesos. Ning maong kahimtang mabinlan na lamang ug 62 pesos ang para sa driver nga dili na gayud makabuhi sa iyang pamilya para lamang sa usa ka adlaw nga konsumo sa pagka-on. Sa namatikdan sunod-sunod na ang pagsaka sa presyo sa gasolina nga gikan sa 48 pesos karon mi-abot na ug 52 pesos matag letro.

Sa ambush interview sa mga miyembro sa ZNUC, gipahayag ni Mayor Uy nga dili siya supak nga mangayo ug increase ang mga motorcab drivers sa ilang pletehan sa pagkakaron.

Ug walay mahitabong rollback posibling mangayo na usab ug usbaw ang mga driver sa motorcab ug posebling apil pa gani ang tanang sector sa transportasyon nga mopasaka sa dugang plitihan. Sa pagkakaron ang mga motorcab nga nagbiyahe dinhi sa dakbayan sa Dipolog misingil ug 6 pesos matag pasahero ug kung dili mapugngan ang kanunay pagsaka sa presyo sa gasolina hayan mahitabo gayud nga motaas ang plitihan sa motorcab nga maoy nag-unang matang sa transportasyon nga nagserbisyo dinhi sa siyudad sa Dipolog. Samtang didto sa kaulohan wala usay nakitang kongkretong lakang nga gihimo sa mga opisyales didto para mapugngan ang paspas nga pagsaka sa presyo sa gasolina o kaha adunay mahitabong rollback sa presyo niini.

Nipadayag usab si Mayor Evelyn Uy dinhi sa dakbayan sa Dipolog sa tinguha karon sa mga motorcab drivers nga mopa-usbaw sa ilang pletehan. Sa ambush interview sa mga miyembro sa ZNUC, gipahayag ni Mayor Uy nga dili siya supak nga mangayo ug increase ang mga motorcab drivers sa ilang pletehan sa pagkakaron. Alang kaniya angayan nga hatagan ug pabor ang maong tinguha sa mga drivers tungod kay sa nakita nagsaka kanunay ang presyo sa gasolina ilabina niining kasamtangang presyo nga 52 pesos matag litro. Apilar ni Mayor Uy nga kinahanglan dili usab pasubraan sa mga motorcab drivers ug operators ang ilang pangyuon nga increase tungod kay magsagubang usab niini ang mga riding public.

Hinoon, kung mahaon na sa mga motorcab drivers ug operators ang ilang petition alang sa dugang usbaw sa pletehan mo-agi pa kini sa Sangguniang Panlungsod ug aduna pay himoon nga public hearing. Angayang masayran nga gihingusgan karon sa mga yanong motorcab drivers nga mopa-usbaw sa ilang pletehan tungod kay ning kasamtangan nga kahimtang wala na silay mahimong income tungod kay diha pa lang sa presyo sa gasolina dako na kaayo kini ug epekto kanila dugangan pa operasyon sa habal-habal nga maoy ilang kakompitinsiya ug ang kamahal sa mga palaliton sama sa bugas. (Southpoint, Vol.1No.22)

*

 

Pambato sa Turno P’gsalabuk Queen; Sicayab champion sa Street Dancing

Si Hannah Gae Sorronda mao karoy nahimong P’salabuk Queen sa Dipolog alang ning tuiga human siya gipili sa mga hurado sa gabii sa Biyernes, Mayo 23.

Siya napili nga maoy nagdala sa ngalan sa Barangay Turno gikan sa 12 ka mga maanyag ug maabilidad nga mga kandidata. Ang first runner-up kon ikaduhang puwesto nakuha ni Laurice Arfel Indig sa Central Barangay ug ang 2nd runner-up kon ikatulong puwesto nahiadto kang Kristel Velasco Ocampo sa Barangay Miputak.

Si Mayor Belen Uy samtang mihatag sa tropeyo ngadto sa P’gsalabuk Queen human kini gikoronahan niya inabagan ni Cong. Dodoy Labadlabad (wala). Sa tuo mao ang mga napiling maanyag nga mga hara mao sila ni Hannah Gae Sorronda (tunga) sa Turno isip P’gsalabuk Queen, Laurice Arfel Indig (wala) sa Central Barangay isip 1st runner-up ug Kristel Velasco Ocampo (tuo) sa Miputak isip 2nd runner-up.

Sa sayaw sa P’gsalabuk, ang nahimong champion mao ang delegasyon o pundok sa Barangay Sicayab. Ang “Best in Musicality” ug “Best in Street Dancing” nahiadto sa Central Barangay; ug “Best in Costume” ug “Best in Choreography” sa Barangay Sicayab. Halos tanan nga mga miapil sa street dancing ug showdown naghubit sa panaghiusa ug panagdait sa nagkalain-laing hut-ong nga nahimong haligi sa pagkahimugso sa Dipolog gikan sa pagkabaryo ngadto sa pagkadakbayan niya karon. Kini gipaagi sa P’gsalabuk (sayaw ug kunday tibuok lungsod sa mga Subanon) ug mga paagi sa kulturanhong pagsaulog sa mga Kristiyano, Muslim ug langyaw nga mga Insik.

Ang gilarawan nagsugod sa mga lumad nga Subano nga maoy unang nagtikad ning maong komunidad ug ang paghiabot sa mga dayo nga mga Muslim, Kristiyano ug apil na ang mga negosyanteng Insik. Ang ubang contingents nga misalmot sa maong bangga mao ang Barangay Olingan, Barangay Galas, giusa nga mga Barangay Sta. Filomena ug Sta. Isabel, giusa nga mga Barangay sa Diwan, San Jose, Sinaman, Sangkol ug Cogon, giusa nga mga Barangay sa Dicayas, Punta, Lugdungan ug Gulayon, giusa nga mga Barangay Barra ug Biasong, Barangay Miputak, Barangay Minaog, Bagy. Estaka ug Bgy. Turno. 

 

Nagsangka ang 12 ka mga contingents o pundok sa mananayaw gikan sa mga kabarangayan sa Dipolog didto sa boulevard gikan sa hapon hangtud pagkagabii sa Biyernes, Mayo 23. Samtang gisunod dayon ang indigay sa kaanyag ug kahibalo tali sa mga kandidata sa matag contingent aron mahimong P’gsalbuk Queen 2008. Ang P’gsalabuk Festival nga anaa na sa iyang ika-10 nga pagsaulog gihimo na karong tinuig nga kalihokan sa kagamhanang lokal sa Dipolog ug ginadayo na sa mga bisita gikan sa ubang dapit sa nasud ug mga turista gikan sa gawas.

Ang Street dancing nagsubay sa mga nag-unang kadalanan sa dakbayan ug natapos sa boulevard.

Human ang koronasyon, gipahigayon dayon ang maanindot nga fireworks display didto ra gihapon sa boulevard.            Sa pagka-Sabado, Mayo 24 mao ang adlaw sa tinuig nga kapistahan ni San Vicente Ferrer, ang patron nga matud pa nadala dinhi sa mga unang nanganhing mga Bol-anon. Hapon sa kapistahan dihay gipahigayon nga karambola sa manok didto gihapon sa boulevard sa may alas 4:00 sa hapon. (Dipolog Chronicle, Vol.VII No.49)

*

 
Bayan Muna nagpahigayon ug forum kabahin sa pagsaka sa presyo sa bugas

Ang labihan nga pagsaka sa presyo sa bugas maoy nag-unang sentro sa hilis-gutanan sa gihimong forum nga gipasi-ugdahan sa Bayan Muna nga gipahi-gayon sa Bambo Garden ning dakbayan sa Dipolog ning semanaha. Ang maong kalihukan gitambongan sa nagkalain-laing representante gikan sa Pagadian, Zamboanga del Sur, Misamis Occidental, Zamboanga Sibugay, Dipo-log, Dapitan, Zamboanga del Norte dinhi sa tibook Peninsula region. Maoy gibasol sa regional convernors sa Bayan Muna ang nasudnong panga-gamhanan nga wala ma-kahimo sa pagpakgang sa kalit nga pagtaas sa presyo sa bugas ug sa kanunay nga pag-angkat ug bugas gikan sa gawas sa nasud nga unta aduna may halapad nga yuta dinhi sa Pilipinas nga angayan hatagan ug dakung pagtagad. Matud pa, gikan pa niadtung 1980 ang pilipinas maoy pinaka-dakong mangangkatay ug bugas.

Gikan sa 1995 hangtod sa 2001 anaa sa kinientos mil metriko tonelada ang giangkat matag tuig. Gikan sa 2002, mokabat na sa usa ka milyon metriko tonelada ang giangkat matag tuig ug karong panahona, gibanabana nga molapas na sa 1.5 milyon metriko tone-lada ang giangkat nga bugas. Gibasol niini ang administrasyong Arroyo gumikan kay gipaundang niini ang paghimo’g systema sa irigasyon. 30% lamang ang himoan ug irrigasyon sa kinatibuk-ang basakan ug sa walay klarong suporta sa mga gagmay’ng mag-uuma. Sumala pa sa Bayan Muna, ang panglahutay nga solusyon sa krisis sa pag-kaon mao ang pagpa-tuman sa usa ka tinuod nga repor-mang agraryo. Kini ang mobukas sa dalan padulong sa nasudnong in-dustri-yalisasyon ug kalamboan.

Ilang giawhag ang katawhan nga magpakabana ug suportahan ang balaud-non 3958 o Rice Industry Development Act of 2008. Si kanhi Congressman Roseller Barinaga kinsa maoy usa sa pinasidunggang mamumulong sa maong forum mipahayag nga gikinahanglan ang mga katawhan magpaka-bata arun dunggon sa gobiyerno ang mga yangongo nga maoy giasagubang karon sa nasud. Matud ni Barinaga, angayan na ang mga katawhan manggilabot sa nasinating kahimtang karong panahona atubangan sa kamahal sa mga nag-unang palaliton ug pagkaon labi na ang bugas nga maoy adlaw-adlaw nga gikina-hanglan. Sumala pa sa kanhi kongresista gikinahanglan ang mga katawhan dili magpakahilom bisan nag-antus sa kapait, mosinggit ug moreklamo na aron madunggan sa nasudnong pangagamhanan. Kini maoy kultura sa pilipino sama sa usa ka bata nga kon gigutom, moiyak aron hatagan ug totoy.

Mihatag sa iyang Input on National Situation si Mr. Elpidio Pulmano, spoke-sperson, Bayan Muna-Western Mindanao. Ang maong forum nagdala sa tema: Bugas alang sa katawhan, Rice Cartel batokan. (The New Nandau, Vol. XVII No.47)

*

 

Mga barangay nakadawat na ug Philhealth Card sa probinsiya

ANAA sa 560 ka mga pobreng katawhan sa pito ka mga barangay dinhi sa dakbayan sa Dipolog ang nakadawat na ug Philhealth Card gikan sa kagamhanang probinsiyal. Kini ang gipangunayan pagtunol ni Governor Yebes niadtong Biyernes atul sa gihimong philhealth card distribution ceremony sa pito ka mga barangay.

Sa gihimong programa, gipahayag ni Governor Yebes nga ang Philhealth program sa probinsiya maoy tubag sa panginahanglanon sa mga pobreng katawhan diha sa pag-atiman sa ilang panglawas. Wala mapa-ngandami sa kadaghanan ang paghipos ug pundo aron maoy magamit pag-abot sa panahon nga kini magsakit tungod kay mas unang gihatagan sa igong pagtagad ang pagkaon ug sapot. Gidu-gang ni Governor Yebes nga magkadiin-diin intawon ug pangita ug kuwarta kung magsakit na ang usa sa miyembro sa pamilya tungod sa kawad-on.

Sa karon migasto ug 20 milyones pesos ang kagam-hanang probinsiyal alang sa Philhealth program niini ug tinguha ni Governor Yebes nga himoon niya kining 30 ngadto sa 40 milyones pesos sa sunod tuig. Iyang gipanghinaut nga kung mahuman na siya sa termino sundon gihapon sa laing gobernador nga molingkod ang maong programa aron magpabilin nga matabangan ang mga pobreng katawhan.

Pabiling gibarugan sa gobernador nga ang pag-dumala sa gobyerno dili negosyo kun dili serbisyo, kung maalkanse ang probin-siya tungod sa gasto ang importanti matod pa ni governor yebes nga nabu-lahan ug nalipay ang mga katawhan sa naangkon niining programa. Ang pag-apud-apud sa mga Philhealth card maoy pagtuman sa saad sa gobernador sama sa iyang unang gisaad nga PHCAP (Provincial Health Care Assistance Program)ug ang pagtukod sa modernong tambalanan nga alang sa mga pobreng katawhan sa probinsiya.

560 ka mga pobreng katawhan sa pito ka mga barangay dinhi sa dakbayan sa Dipolog ang nakadawat na ug Philhealth Card gikan sa kagamhanang probinsiyal diin gipangunayan gyud ug pagtunol ni Governor Yebes niadtong Biyernes atul sa gihimong Philhealth Card Distribution Ceremony.

Human madawat sa mga barangay dinhi sa dakbayan sa Dipolog ang Philhealth Card gikan sa kagamhanang probinsiyal niadtong Biyernes, laing 11 na usab ka mga barangay sa lungsod sa Sindangan nga gilangkuban sa dul-an dos mil ka mga benefeciaries ang nahatagan ug Philhealth Card. Si Governor Rolando Yebes human nga gi-interview sa ABS-CBN Northern Mindanao sa programang Pamahaw Espisyal uban ni Provincial Tourism Officer Atty. Ivan Patrick Ang midaritso kini paingon sa lungsod sa Sindangan agi sa mga lungsod sa Molave, Josefena ug Dumingag nga sakop sa Zamboanga del Sur dayon guho sa lungsod sa Siayan, Zamboanga del Norte.

Sa gihimong programa, subling gihatagan ug gibug-aton ni Governor Yebes nga alang kaniya ang pang-gobyerno dili kini negsosyo kun dili serbisyo alang sa katawhan. Ang pag-gasto sa probinsiya alang sa maong Philhealth wala maglantaw ug ginansiya, wala usab mag-gasto ang mga nakapahimulos niini, alang sa gobernador dako na niyang kalipay ang maki-tang pahiyom ug pasalamat sa mga pobreng katawhan ngadto sa mga opisyales sa probinsiya. Iyang gipasalig nga magpabilin ug palam-buon ang maong programa hangtud mahuman siya sa iyang termino.

Gihangyo usab ni Mr. Ronilo Pacilan, Community Development Assistance Unit Head ang mga nakapahimulos sa maong Philhealth Program sa pro-binsiya nga kinahanglang ampingan ang maong Philhealth card. Mas labaw pa gayud nga matabangan diha sa ilang pagpatambal sa hospital nga iyaa sa pro-binsiya kung miyembro na kini daan sa Lando-BIBO tungod kay nahisulod kini Provincial Health Care Assistance Program (PHCAP). Gihatagan ug gibug-aton ni Pacilan nga ang panglawas maoy gisan-digan sa atong panginabuhi. Wala usab gililong sa mga tawo nga nakadawat sa maong Philhealth Card ang ilang tumang kalipay nga pinaagi sa tabang sa probinsiya gipangandaman na nila ang dili mahibaw-an nga panahon nga sila ang magsakit.

Ang pag-apud-apud sa mga Philhealth Card ngadto sa onse ka mga barangay sa Sindangan kagahapon ang gipangunayan ni Governor Yebes inubanan usab sa mga kadagkuan sa lungsod sa pagpanguna ni Mayor Bert Macias, mga kadagkuan sa Philhealth ug CDAU. Gikatakda usab nga itunol ang Philhealth card sa mga barangay sa lungsod sa Jose Dalman. Walay hunong na usab karon ang pag-apud-apud ug mga Philhealth Identifi-cation Card ngadto sa mga nahimong miyembro niini nga mga kabus nga katawhan sa Zanorte ilalom sa Philhealth program sa probinsiya.

Dili matugkad ang gibating kalipay sa mga katawhan sa 18 ka barangay sa lungsod Jose Dalman sa dihang nadawat na nila ang Philhealth ID Card. Kini ang gipangunayan mismo pagtunol ni Gover-nor Rolando Yebes, uban nila ni CDAU Unit Head Ronie Pacilan, Provincial ug Municipal Social Welfare and Development Office, Philhealth mga barangay kapitan nga miduyog sa programa sa Yebes administration ug si Board Member Cedric Adriatico nga maoy chairman sa Committee on Health sa Sangguniang Panlalawigan. Sa pagtunol sa maong Philhealth Card ngadto sa mga beneficiaries gihangyo ni Governor Yebes ang tanan alang sa panaghi-usa. Ang iyang pagserbisyo wala maglantaw ug ginansiya ug bugti alang sa iyang personal nga interest. Ang iyaa lamang nga mabati ug makita ang mga katawhan sa Zanorte nga anaa ang pahiyom ug nagpasalamat sa mga programa sa probinsiya nga nakatabang kanila.

Sa Philhealth programa karon sa probinsiya migasto kini ug 20 milyones pesos. Tinguha ni Governor Yebes nga iya kining dugangan ug laing 20 milyones pesos sa sunod tuig tungod kay dili niya itugot nga ang tanang mga katawhan sa Zanorte ang magkadiin-diin intawon ug pangita ug kuwarta aron gamiton pagpatambal panahon nga magsakit. Gipaabot sa gobernador ang iyang hangyo nga kinahanglan ampingan ang maong Philhealth Card kay sama ra kini sa card sa Lando BIBO nga mahimong e-presentar kung mangayo kini ug tabang sa probinsiya ilabina sa livelihood prog-ram nga maoy  gihingusgan karon ni Governor Yebes alang niining tuiga.

Samtang gipaambit usab ni Board Member Adriatico ang usa ka istorya sa tawo nga anaa napadpad sa usa ka isla nga dugay nga wala matabangi. Iyang gibasol ang ginoo sa dihang nasunog ang iyang balay nga iyang gibiyaan paingon siya nanagat. Apan ang maong aso sa nasunog niyang balay maoy nag-giya sa mga tawo nga nangita kaniya hinungdan nga siya ang na-rescue. Gihulagway ni Board Member Adriatico nga ang maong asu maoy kahimtang sa mga katawhan karon sa Jose Dalman ug maoy nakita ni Governor Yebes uban sa mga miyembro sa Sangguniang Panlalawigan ug uban pang mga opisyales sa probinsiya aron  matabangan ang mga katawhan sa maong lungsod.

Sa wala pa gipang-apud-apud ang maong Philhealth card gihimo una ang orientation sa taga Philhealth aron masabtan pag-ayo sa mga miyembrong kabus nga katawhan kung unsay benepisyo nga makuha sa maong programa. (The New Nandau, Vol. XVII No.47)

 
 

LUXURY CAR GIKARNAP, GIHILOM SA KAPOLISAN?

Posibling daghan nang nakasulod nga dagkong syndikato nga nag-operate dinhi sa Dipolog gumikan ang naga-panghitabo sa Metro Manila nasinati na karon dinhi sa dakbayan. Sa dihang usa ka negusyante ang na-biktima sa karnapping sa dihang gikawat ang iyang service pick-up samtang gi-parking silong sa ilang panimalay sa Central Brgy. Sayo ning bulana. Sa exclusibong nahipos nga report ning pamantalaan, giila ang biktima nga si Webon Co usa ka magpapatigayon sa cpra buyer nga nahimutang sa dalang Malvar Corner Arellano sa Central Brgy ning dakbayan.

Sumala sa nahibaw-an nga ang maong pick-up color green Mitsubishi Estrada ang gi parking sa silong sa panimalay ni Mr. Co. sa Kharlas Copra Buyer sa nasangpit nga dapit kaniadtong May 6 sa miaging semana, mga alas onse sa gabii. Apan sumala pa mga alas 12 ngadto sa ala una sa kadlawon ang gikatahong gikawat kini saw ala mailhing suspetsado. Mga gitohoang ginamit ang mga improvised nga yawe pag-abli ug pagpaandar sa sakyanan sa dihang nawala na sa parkingan ang pick-up wala panumbalinga sa anak sa pagtoo nga gisakyan sa iyang ginikanan. Apan pagka buntag nadiskobrihan nga nawagtang ug gikawat human ang managti-ayong biktima nangatulog sa ilang lawak. Ang pamilyang co midangop usab dayon sa buhatan sa traffic management group TMG anang pagka-alas 6 sa buntag mayo 6, 2008 sa opisina ni SPO4 Demetrio Lanipa ang hepe sa Traffic Management Group nagbase sabrgy Minaog, apan nasayran nga hangtod ning pagbalita wala pay kasulbaran ang maong reklamo ug wala masayri kun hain na gidala sa mga carnapper ang maong carnap nga Estrada Mitsubishi. Sa kabahin usab ni TMG Chief Lanipa gipahayag niini nga possibling nakalusot na ang mga karnapper sabay sa kinawat nga sakyanan sa kagabhion sa ilang pagkawat sa mga dapit nga gitohoang giagian tungod kay awahi na sila nakadawat sa reklamo ug nag-wire sa mga TMG didto sa Molave, Pagadian ug Aurora, Misamis Occidental nga gituhoan didto gi-travel ang maong Mitsubishi Estrada lahos didto sa Lanao ug Marawi City nga maoy taguanan sa mga sindikato sa mga hot cars ur karnap vehicles hinungdan nga wala na ma-intercept pa sa mga checkpoint sa TMG ug kapolisan hangtud karon.   Gituhoan ni TMG chief Lanipa nga nakalusot na ang maong karnapper sa mga dapit nga gipatuman ang higpit nga implementasyon sa Republic Act 4136 sa Traffic Code of the Philippines.

Angayang masayran nga mokabat lamang sa upat ngadto sa lima ka oras ang biyahe sa landtrip padung sa Lanao ug Marawi, nga mo-agi sa lungsod sa Sergio Osmeña lagbas sa Molave padulong sa Pagadian ug lahus sa Aurora ug lusot na sa bag-ong shortcut nga dalan sa Garomatan Highway, Lanao ug Lagbas na didto sa Marawi City nga mao ang delikado nga dapit ug lisod ang pagpangita pa niini, hinoon dunay posibilidad nga hayan ang maong karnap Mitsubishi Estrada gitagoan sa mga dapit sa Ipil Sibugay Province nga sayon lutsan sa mga karnapper. Sa pagka karon ang pamilyang Co nangunay na sa pagdangop sa TMG sa Misamis Occidental ug ni Congressman Clarete apan hangtud ning pagbalita wala pa mahatagi ug kalamboan ang maong kaso para sa dinaliang kasulbaran, ang magpapatigayong Co maoy ikaduha nga Dipolognong biktima sa karnap sa luxury car dinhi sa dakbayan nga kasagaran mahitabo lamang sa Metro Manila.

Ang unang insidente sa karnap luxury car dinhi sa Dipolog nahitabo pa niadtong tuig 2005-2006 diin usa ka Pajero nga gipanagiyahan sa usa usab ka magpapatigayon samtang giparking atbang sa Dipolog Cathedral ang gi-karnap apan na-recover ang maong Pajero human gi-abandonar sa mga karnapper didto sa lungsod sa Jimenez, Misamis Occidental apan ang mga karnapper wala gihapon madakpi. (Southpoint, Vol.1No.22)

*

 

Tuloy nagbaha atul sa First Tuloy Festival sa Sicayab-Bucana
By: ALFREDO “PEDOY” OGOC, MARK “TISOY” TAN & JOEUE SACOL-RAMIREZ

Nagabaha gayud sa isdang tuloy atul sa gipahigayong 1st Tuloy Festival didto sa Barangay Sicayab Bucana sakop sa dakbayan sa Dapitan kaniadtong adlaw’ng Huwebes, Mayo 22 ning tuiga.

Sa nasaksihan sa mga sakop sa Zamboanga del Norte United Correspondents kon ZNUC nasayran nga pormal nga gibuksan ang maong kalihukan pinaagi na sa usa ka motorkada palibot sa siyudad sa Dapitan ug sa Dipolog ug gisundan gilayon kini sa usa ka streetdancing nga gihimo sa mga kabatan-onan sa naasoy’ng barangay sa Tribu Sakayanon nga gi-choreograph ni Mr. Dodoy “Candy” Daymiel. Ug gisundan usab kini sa usa ka hamubong programa.

Diha sa maong kalihukan ang komitiba ni Konsehala Apple Marie Agolong ang mipahigayon kinig Feeding Program kon libreng pagpakaon sa masustansiyadong arrozcaldo ngadto sa mga kabataan didtong dapita. Diin ang nasangpit nga feeding program gipaluyuhan usab kini ni Vice-Governor Francis Olvis, Dapitan City Mayor Jun Jalosjos ug ingon man ni Bise- Mayor Jing Chan. Labot pa niini aduna usa’y gihimo nga pa-contest sama sa Best in Booth Display ug Cooking Contest.

Atul sa gihimong hamubong programa mipabati sa ilang mga mensahi sila si Konsehal Viz Olario sa ngalan ni Mayor Jun Jalosjos; Mr. Hernane Ovalo, ang Regional Technical Director sa buhatan sa Departamento sa Agrikultura sa Rehiyon 9; Regional Director Virgilio A. Alforque sa buhatan sa BFAR sa Rehiyon 9; Vice- Governor Francis Olvis ug si Atty. Patrick Ivan Ang, ang Provincial Tourism Officer.

Dugang nasayran nga mokabat sa 31 ka mga fisherfolk kon mga beneficiaries ang nahatagan sa libreng fishing gears kon mga gamit sa pagpanagat gikan gayud sa buhatan sa BFAR sa Rehiyon 9. Gawas usab niini ang maong buhatan mihatag usab kini ug pasidungog kon Certificate of Awards alang na ngadto ni Governor Rolando E. Yebes kay matud pa ang amahan sa probinsya hugot gayud kining misuporta sa naasoy’ng Tuloy Festival ug kini gidawat ang maong pasidungog ni Vice-Governor Francis Olvis. Miduyog usab sa kalihukan sila si Mr. Gomer dela Rama, ang Regional Fisherfolk Chairman; Mr. Calvin Hamac, ang National Farm-C sa Rehiyon 9; Mr. Jonathan Dickson, ang Chief sa Fishing Gears and Capture Division, BFAR Central Office; Mr. Ahadulla S. Sajili, Al – Haj, ang Chief sa FRMD Division, BFAR 9;  Mr. Rene J. Mangona, ang State Auditor III sa BFAR 9; 1st District Board Member Jun Cabigon; Mrs. Ma. Teresa de Jesus, ang DDPKRM Project Manager, Engr. Joseph Florig, Chief sa BFAR dakbayan sa Dipolog; Atty. Jes Gal Sarmeinto, ang Provincial Attorney; Mr. Jay Adraincem, ang Executive Assistant IV ug PIO Designate ug uban pang mga kawani sa nagkalain-laing ahensiya sa goberno ingon man sa Non-governmental Organizations kon NGO’s. (Southpoint, Vol.1No.22)

*

 

DMC mopahigayon Disneylando sa Hudyaka

Ang Dipolog Medical Center Pre School mopahigayon kinig mga nagkadaiyang kalihukan kon Disneylando atul sa pagsaulog sa Hudyaka Zanorte Festival 2008. Sa nasayran nga ang maong Disneylando molungtad kini sulod sa 9 ka adlaw nga mga kalihukan nga gilangkuban sama sa unang adlaw kon Mayo 29 mao ang Dance Party with Jollibee diin ang mga kabataan nga nagpangedaron gikan sa 4 anyos ngadto na sa 10 anyos ug ilang makat-unan ang mga paborito nilang sayaw nga hip-hop ug pop tracks uban sa Jollibee Mascot ug sa mga Zanorte Teen Dancers, ug aduna pa’y Free Jollibee Snacks sa 50 ka mga rehistradong partisipanting kabataan; sa pagka Mayo 30 mao ang Arts and Crafts – Face Painting nga aduna sila’y guests mao si Hello Kitty ug Clowns nga diin alang lamang kini sa mga kabataan nga nagpangedaron gikan sa 2 anyos ngadto na sa 12 anyos ug ilang makat-unan ang mga nagkalain-laing pintora sa  nawong ug adunay Free Face Painting sa 50 ka mga rehistradong partisipanting kabataan.

Nianang pagka-Mayo 31 mao ang Back To School Fashion Show nga gipasiugdahan sa Mennen’s Gift Mart ug adunay guests nga mao si Dora ug Clowns lakip usab niini ilang ipresentar ang mga bag-ong klase sa Barbie ug Hotwheels; sa pagka-Hunyo 1 mao ang Kiddie Talent Show diin himuon ang Group Dance Contest ug aduna pa sila’y guests nga mao si Spongebob ug Clowns diin kini alang lamang sa mga kabataan nga nagpangedaron gikan sa 3 anyos ngadto na sa 10 anyos. Gikinahanglan usab nga ang matag grupo ang kini dili moubos sa lima ug dili usab molapas sa napulo ka mga mananayaw’ng kabataan ug gikatakda usab nga ang deadline sa pagsumiti sa entry kutob lamang karong Mayo 29 ning tuiga.  Labot pa niini aduna usa’y pa- premyong salaping cash ug uban pa alang sa mga palarang mananaug.

Sa pagka-Hunyo 2 mao ang Arts and Crafts – Stone Painting nga aduna sila’y guests nga mao si Pooh Bear ug Clowns diin ilang makat-unan ang mga pamaagi kon estelo sa pagpintora diha na sa usa ka bato. Ug kini alang lamang sa mga kabataan nga nagpangedaron gikan sa 5 anyos ngadto na sa 12 anyos ug Free Art Materials pa gyud sa 50 ka mga rehistradong partisipanting kabataan; sa pagka-Hunyo 3 mao ang Storytime with Pooh Bear diin adunay story telling session ang himuon sa mga Pre School Teacher gikan sa DMC; sa pagka-Hunyo 4 mao ang Arts and Crafts – Bottle Painting nga aduna sila’y guests nga mao si Hello Kitty ug Clowns ug kini alang lamang sa mga kabataan nga nagpangedaron gikan sa 4 anyos ngadto na sa 12 anyos ug adunay Free Art Materials usab ang ipanghatag sa 50 ka mga rehistradong partisipanting kabataan ug ilang makat-unan ang mga pamaagi usab sa pagpintora diha na sa botelya; sa pagka-Hunyo 5 mao ang Arts and Crafts – Clay Pot Painting nga aduna pa sila’y guests nga mao si Spongebob ug Clowns ug kini alang lamang sa mga kabataan nga nagpangedaron gikan sa 5 anyos ngadto na sa 12 anyos nga diin ilang makat-unan ang mga pamaagi o estelo usab sa pagpintora diha sa kolon. Ug aduna pa’y Free Art Materials sulod sa 50 ka mga rehistradong partisipanting kabataan.

Ug pagka-Hunyo 6 mao ang Exhibit ug Judging sa ilang nagama nga mga paintings sa nahisgutan sa unahan ug magapili usab alang na sa mga mamahimong Best in Clay Pot Painting, Best in Stone Painting ug Best in Bottle Painting.  Ug nianang adlawa usab adunay ipasundayag nga Spiderman Movie Showing uban sa Spiderman Mascot. Dugang nasayran nga si Mrs. Ivy Gamalinda – Asprer maoy ilang Art Teacher sa mga kabataan atul sa himuong Bottle Painting, Stone Painting ug Clay Pot Painting.  Ug alang sa mga interesadong ginikanan makisayod lang kang Mrs. Nadelle Icalina-Gaylan didto na sa nahisgutang buhatan alang na sa dugang impormasyon.

Gikahibaluan usab nga ang mga nahisgutang kalihukan ang kini libre lamang sa buot magparehistro. Niini, ang DMC Pre School hugtanong nagadapit  sa tanang mga ginikanan nga adunay mga anak sa nahisgutang pangedaron sa paglantaw ug pagsaksi gayud sa naasoy’ng Disneylando nga himuon kini sa matag alas 4:30 ang takna sa hapon dinha sa atubangan sa Provincial Capitol dakbayan sa Dipolog. (Pedoy Ogoc & Mark “Tisoy” Tan)

*

 

1st Summer youth camp sa Libay malampuson

Malampusong napahigayon ang 1st Summer Youth Camp 2008 nga gipasiugdahan sa Sangguniang Kabataan Council sa Barangay Libay sakop sa lungsod sa Sibutad ning lalawigan ug inabagan usab kini sa Hugpong Kabataan para sa Kalambuan, karong bag-uhay pa lamang. Ang maong kalihukan milungtad kini sa tulo ka adlaw sa pagpahigayon niini ug gisalmutan kini sa mga kabataan nga nagagikan sa nagkalain-laing barangay sa lungsod sa Sibutad sama sa Libay 1, Libay 2, Kanim, Sinipay, Minlasag, Sipalok ug Poblacion. Ug didto kini gihimo sa Libay Elementary School.

Sa gihimong proper session, ilang gituki ug ila usab nga nakat-unan ang mga maayong gimbuhaton alang na sa ilang kaugmaon mahitungod usab sa abortion, pre-marital sex, prostitution ug drug addiction. Diha sa maong kalihukan, mipabati sa ilang mensahi sila si Ms. Rosevic Ocampo, ang Provincial Planning Coordinator ug mao usa’y Hospital Administrator kinsa usab mirepresentar sa ngalan ni Governor Rolando Yebes ug ingon man ang amahan sa lungsod nga si Mayor Roger Dizon.

Puno sa kasadya ug aligre gayud ang mga kabataan kinsa misalmot sa naasoy’ng summer camp gumikan kay ang ilang talagsaong gilas o katakus ug kahanas diha na sa natad sa pampaugnat sa kusog kon ballgames ang kini ilang gipakita. Sa gihimong Musical Competition migulang kampyeon ang Barangay Poblacion alang sa Modern Dance ug sa Song Impersonation.  Samtang migulang kampyeon usab ang Barangay Libay 1 alang sa Vocal Solo ug Duet.  Ug alang usab sa indigay sa kaanyag kon Miss Summer Youth Camp 2008 diin ang nakaangkon sa titulo ug korona mao si Miss Salim Dahonan Malicay nga nagrepresentar sa Barangay Poblacion.  Ug iya usab naangkon ang mga minor awards sama sa Best in Production Number, Best in Fun Wear, Best in Talent ug Best in Improvised Gown. Si Miss Betzabie Abila nga nagrepresentar sa Barangay Libay 1 maoy nahimong First Runner-up ug si Miss Charmine Cabodbod nga nagrepresentar sa Barangay Sipalok nga maoy napiling Second Runner-up.

Ang mga Board of Judges mao sila si Mr. Jonathan Ogoc, Mr. Jonathan Peligrino Uy - mga miyembro ug si Mr. Roger TaboTabo - ang Chairman sa Musical Competition samtang sila si Mr. Barbie Guillermo Banagua, Mr. Alfredo Ogoc - mga miyembro ug si Mr. Gain Paul B. De Barras, ang Officer-In-Charge sa buhatan sa Philippine National Red Cross – Zamboanga del Norte Chapter nga maoy Chariman sa Beauty and Brain Contest kon Miss Summer Youth Camp 2008.

Ang nasangpit nga kalihukan hugot usab kini gisuportahan sa mga Barangay Opisyales sa Libay ubos sa pagpangulo ni Kapitana Lilia Lagudas. Si Libay SK Chairman Charive Paul Banglos ang mainitong mipabati sa dakung pagpasalamat ngadto sa tanang mga kabataan kinsa misalmot sa naasoy’ng 1st Summer Youth Camp 2008 nga diin kini hapsay ug nagmalinawon ra usab sa pagpahigayon niini. (Pedoy Ogoc & Mark “Tisoy” Tan)

*

 
Sa matag adlaw
100 Sako mahurot sa Bigasan Ng Bayan; 150 ka tawo magpunsisok sa NFA

Syetinta ngadto sa 100 ka sakong bugas matag adlaw ang mahurot ug baligya sa National Food Authority (NFA) pinaagi sa ilang Bigasang Bayan nga anaa sa barangay Gulayon ning dakbayan sa Dipolog ngadto sa mga katawhan. Kini maoy nasayran gikan mismo kang NFA Manager Jul Akmad Lawama ngga nahinabi sa mga miyembro sa ZNUC kagahapon uban sa mga miyembro sa national media.

Iyang gipahayag nga sa nanglabay nga semana, gikan sa tag tulo ka kilo nga bugas nga  ilang ibaligya ngadto sa mga nanaglumbay  nga katawhan, kini ang ilang gihimo nga tag 12 ka kilo matag tawo apan kini ang ilang gihunong tungod kay nakita nga nanghinubra ang ilang distribution sa bugas. Sa karon gihimong tag lima ka kilo na lang matag tawo. Nakita sa NFA nga alkanse ang usa ka tawo kung tag tulo ka kilo ra ang ilang mapalit matag adlaw diha sa Bigasang Bayan.

Syetinta ngadto sa 100 ka sakong bugas matag adlaw ang mahurot ug baligya sa National Food Authority (NFA) pinaagi sa ilang Bigasang Bayan nga anaa sa barangay Gulayon ning dakbayan sa Dipolog ngadto sa mga katawhan.

Gibana-bana nga dili mominos sa 150 ka mga tawo matag adlaw ang magpunsisok sa NFA sa tuyo nga makapalit sa baratong bugas. Kadaghanan kanila ang nagagikan pa sa mga lungsod ug sa mga lagyong barangay dinhi sa dakbayan sa Dipolog. Gibutyag ni Manager Lawama nga sulod ning semana laing 30 mil ka sakong bugas na usab ang mahidangat alang dinhi sa Zamboanga del Norte. Anaa sa singko mil ka sakong bugas ang makonsumo matag adlaw sa tibook probinsiya.

Sa kabahin sa hangyo sa mga mayor nga ilang gipalanog atul sa Provincial Peace and Order Council Meeting alang sa dugang allocation sa mga sinakong bugas diha sa mga kalungsuran ug ang pagtabang nila ug distribute sa NFA rice, gipasabot ni Manager Lawama nga gikinahanglan pa ang pagtugot gikan sa ilang rehiyonal nga buhatan alang sa dugang allocation sa bugas. Apan kini ang magdepende usab sa gidaghanon sa stock sa NFA rice.

Hinoon, sa karon aduna nay mga lungsod ang mitabang na sa pag-distribute sa maong baratong bugas sama sa lungsod sa Katipunan ug Manukan. (Southpoint, Vol.1No.22)

 
 

 HULAGWAY BALITA

 

Ang Central Barangay maoy “Best in Musicality” ug “Best in Street Dancing”.
 

Gov. Lando Yebes ug mga kauban mitan-aw sa bag-ong gamit sulod sa bag-ong ambulance diin bag-ong abot gikan sa Japan.
 

Usa sa tulo ka modernong ambulansya nga naangkon sa probinsya pinaagi sa pagpaningkamot ni Governor Lando Yebes subay sa iyang programa nga mapalambo ug maatiman ang panglawas sa mga katawhan sa ZaNorte.
 

Governor

LANDO ming apod-apod 26,000 ID cards sa mga iembro sa LANDO-BIBO - “Ang saad gituman...katawhan giakatahan, panglawas gialimahan!”

*

 

PAGPANINGKAMOT NI GOV. Lando Yebes NAGBUNGA NA

NAGBUNGA na karon ang gihimong pagpaningkamot sa mga kadagkuan sa probinsiya aron makonberter ang pantalan nga anaa sa dakbayan sa Dapitan gikan sa pagka Port Terminal ngadto sa pagka Port Management Office. Mahinumduman nga niadtong Lunes gikompermar mismo ni Undersecretary Len Bautista sa Department of Transportation and Communication (DOTC) nga gipirmahan na ni Presidente Gloria Macapagal Arroyo ang papel nga nagmando sa Department of Budget and Management sa pag-gahin ug pundo ngadto sa Philippine Ports Authority alang sa posisyon nga Port Manager, Clerk ug Utility. Kini maoy usa sa timaan nga aprobado na sa Presidente ang pagkonberter sa maong pantalan.

Gov. Rolando Yebes milantaw sa bag-ong Ambulance naabot gikan sa Japan para sa ZaNorte Medical Center. (Sa wala) Atty. Ivan Ang, Provincial Tourism Officer ug Senen Ladera.

Angayang masayran gikan sa paglingkod sa iyang katungdanan, gihingusgan ni Governor Rolando Yebes ngadto sa nasudnong kagamhanan uban usab nila ni 1st District Congresswoman Cely Jalosjos Carreon ug 3rd District Congressman Cesar Jalosjos nga mapalambo ang maong pantalan sa Dapitan. Nag-unang nakita nga solusyon sa gobernador mao ang pagkonberter niini ngadto na sa pagka Port Management Office aron aduna na kini kaugalingong pundo ug ang kaugalingon nga pagdumala sa iyang operasyon.

Sa interview, gipahayag ni Governor Yebes nga human nakonberter na karon ang maong pantalan sa Dapitan iya na usab nga hingusgan ang pagtukod ug bag-ong passenger terminal building sulod sa area sa maong pantalan ug ang paghuman sa expansion. Iya usab nga gidasig ang usa ka pribado nga sector pinaagi sa managsoong Aseniero nga taga dakbayan sa Dapitan sa pagsugod na sa ilang proyekto nga magtukod ug laing pantalan kilid sa Pulawan Port. Samtang hangyuon na usab karon ni Governor Yebes si Presidente Arroyo alang sa dugang pundo nga gamiton sa pagpalapad sa karsada paingon sa maong pantalan ug ang pagtapos sa provincial road gikan sa Sicayab-Bucana guho ngadto sa pantalan sa Dapitan.

Sa maong kalambuan, gikalipay ug dako ni Governor Yebes ang pag-aprobar ni Presidente Arroyo pagkonberter sa maong pantalan tungod kay nagbunga ang ilang pagpaningkamot sa baruganan nga “Una sa Tanan ang Katawhan”. (Southpoint, Vol.1No.22)

 

 

 

P100,000 PREMYO SA SICAYAB ISIP KAMPIYON SA P’GSALABUK STREET DANCING SHOWDOWN

Dakung kalampusan ang naangkon gihapon sa kagamhanang lokal sa Dipolog human gipahigayon ang P’gsalabuk Streetdancing ug Showdown kaniadtong Mayo 23.

Ang gihukman nga kampiyon sa 2008 P’gsalabuk Street Dancing and Showdown mao ang contingent gikan sa Barangay Sicayab nga nakadawat sa premyong cash nga P100,000.

Ang contingent sa Sicayab nga maoy migulang kinatibuk-ang champion sa gipahigayon nga sayaw sa P’gsalabuk. Ang Sicayab mao gihapon ang “Best in Costume” ug “Best in Choreography”.

Tanan-tanan, dihay 12 ka mga contingent ang misalmot sa nasangpit nga kompetisyon ug   ang nagpakadawat sa special awards nakuha sa mosunod nga contingents: Best in Musicality - Cen-tral Barangay; Best in Costume - Barangay Sicayab; Best in Choreography   - Barangay Sicayab; ug Best in Streetdancing - Central Barangay.

Ang nakakuha sa trono isip P’gsalabuk Festival Queen 2008 mao si Miss Hannah Gae F. Sorronda gikan sa Barangay Turno contingent, samtang ang iyang kauban sa iyang korte mao sila ni Miss Laurice Arfel L. Indig sa Central Barangay, isip first runner-up ug Miss Kristel Velasco Ocampo sa Barangay Miputak, isip 2nd runner-up.

Sa wala pa gipahibalo ang desisyon sa mga Board of Judges, gipahigayon usab ang display of fireworks nga gikahimut-an kaayo sa mga katawhan ilabi na sa mga bata. Gibana-bana nga mikabat sa dul-an duha ka libo nga mga katawhan lakip ang mga langyaw ug lokal nga mga dumuduong ang misaksi sa mga kalihokan niadtong milabayng Mayo 23 sa Dipolog Boulevard.

Ug gumikan sa dakung kalampusan sa mga kalihokan sa P’gsalabuk Festival 2008, gipasalamatan ni Mayor Evelyn T. Uy  ang tanang milambigit sa mga kalihokan ilabi na sa mga major ug minor sponsors, mga opisyales sa 21 ka mga barangay ning dakbayan, mga opisyales ug kawani sa kagamhanang lokal, mga individual benefactors sa P’gsalabuk, mga awtoridad sa Dipolog PNP, 901st Mobile Group, Team DAVID, mga sanitation officers ug mga supporters ilabi na niadtong mga tawong milihok “behind the scenes.”

Labaw sa tanan, ang mga katawhan ug mga dumuduong nga maoy nahimong dakung hinungdan sa dakung kalampusan sa P’gsalabuk Festival. (cio-prr)

*

 

Pulso Sa Katilingban
Cicer M. Binghay
NFA nagdugang ug labad sa ulo

Top tune singgit sa katawhan karon ang kapalpakan sa taga NFA pag baligiya sa ilang bugas sa katawhan. No. 1 dinhi kanang siging gibalita daghan ang bugas. No. 2 asa man kana mapalit nga katindahanan sa ka merkadohan. No. 3 wala magkadimao ang pag baligiya sa gidaghanon unya pangitaon kanunay. Naghatag dugang ladad-ulo sa katawhan. Wala pul-I maminaw taga NFA hangtod karon?

Tungod niini nagpadayon ang pagduda sa katawhan nga ang NFA maoy gihatagan dakong kotrobersiya pag “divert” sa katawhan sa nagpangusi nilang kayogot sa nagpadayon pangurakot sa atong pangagamhanan. Gani kadaghanan sa atong nahibaloan nangabahaw na lang gilangaw nga walay kasulbaran day bugtian depensa nga hilaw kaayo sama niining pagkalit misaka sa prisyo sa bugas nga unta magkaunsa dili matandog bisan nag-uminto sa prisyo ang gasolina ug krudo.

Midako pa ang pagduda sa katawhan nga ang NFA bugas tua tanan inig abot dinhi sa ato mayoriya sa mga dagkong negosyanti nga ikapahat kanila aron kini ma konbertir pagka commercial rice nga mao nay gipang stock sa mga dagkong negosyanti aron maoy ipang apod-apod whole sale sa mga retailer nga ipang display commercial rice sa ialng katindahanan.

Kini napasagdan kanhiay pa. Tuod walay katarongan nga mga dagkong negosyanti mamalit pa sa atong kaugalingon abot dinhi sa ato nga mahal ang prisyo gumikan sa abuno ug gastoso pa pag proceso. Samtang kon anha sa NGA nila mapalit ang bugas dayon ipanulod laing sudlanan dayon iapod-apod sa whole sale sa mga manindahay..mas dako silag mapop-hong ginansiya. Iakduha wala nay daghang mga kuti-koti ang pag dispatsar sa NGA kay sa mag rasyon napulo lamang ka sako sa mga retailer nga gumikan sa daghan ang atimanon.

Kon magpadayon kining mga matanga sa kalihokan sa atong NFA kinahanglan ang lokal pangagamhanan molihok kon unsay kasulbaran kay klaro kaayo dunay mga bikil ug transaksiyon nga katingad-an niining pagka palpak sa kalihokan ug tuyo sa NFA alang sa katawhan nga maoy gitumong katabangan panahon sa crisis sa bugas.

Sa laing bahin gitug-an sa ubang Senador nga dako ang salapi gikagugol sa Senado alang sa mga testigos ilabi na kang Jun Lozada. Kanang minilyon gastos karon matod pa ni Sen. Enrile madungagan pa kon magpadayon ang imbestigasyon sa ZTE – NBN Deal lamang kon kapun-an laing bag-ong kaplag testigos.

Matod pa sa kadaghanan nganong magpadayon ang maong imbestigasyon nga ang maong prohekto gi kanselar dugay ra. Ikaduha ang iatubang nianang bag-ong testigo mga hulagway lamang sa magtiayon sa Malacañang nga nagdula sa golf sa China. Walay may mga kalihokan makita sa maong mga hulagway nga si PGMA miatindar meeting sa mga taga ZTE opisyales ug wala usab ing mga dokumentos ikapakita sigon sa alegasyon.

Ikaduha unsa may mawala sa taga Senado kon adunay kalingawan o pasunding nga ikapakita sa katawhan nga sila nagalihok, dunay gihimo sa ilang paglingkod pagka Senadores. Unsay kapusalanan tuod sa usa ka ahensiya sama sa senado balay balaoranan kon walay mahimong accomplishment matag haon sa tuig?

Hinoon kon kining atong mga senadores manuroy-soroy pa unta sa mga lalawigan. Magpakita balik sa katawhan sama sa ilang pagduol-hangop panahon sa piniliay dayon pang obserbar kon unsay mga maayong mapuslan buhatong balaodon nga makatabang sa atong kahimtang ilabi na ning panahon sa crisis..dayon makagasto..,walay katawhan agrabyado sa ilang pagka pili.

Pero lita nakabantay nga human atong mga senadores nangapili walay usa kanila nagpakita balik sa ilang agi aron pagpasalamat sa katawhan dayon pagpangutana sa atong katawhan unsay ikaalagad sa lungsod ug lungoranon. Karon nakita nato nga dili na magpakita atong gipamili nga mga senador. Natakdan usab dinhi atong mga konsehales sa kalungsoran, dakbayan ug mga board members nga tingtugnaw lamang silang makit-an sa usa ka suok sa gawas. Magtago-tago kay mahadlok pangayoan. (Press Freedom, Vol. XX No. 33)

 

Mga pasunding nga walay ‘ending’

Sukad paglingkod ni PGMA atong senado nahimong “fully entertainment” nga buhatan sa tulo ka mga sanga sa pangagamhanan sa Pilipinas. Tanang mga gihimong inbestigasyon sa nagkalain-laing bulok sa anomaliya nga nabulgar . . . nahimong pasunding ug pasundayag nga walay, ending. Gikan sa sinugdan hangtod katapusan nga gipalabas publiko nga bikil sa administrasyon puno sa kulba-kahinam hangtud sa tumoy, “suspense.” Dayon maundang.

Karon misaad si Joe De Venecia nga mubarog pagkatestigos . . . isumpay siya sa thrilling iksena sa ZTE scum. Pero walay kasegurohan ni Sen. Cayetano kon madayon ba dinhi si De Venecia pagbarog batok sa iyang nahibaloan. Siya karon si De Venecia ang i-vetsen sa maong gitakda nga walay klarong sumpay sa maong anomaliya.

Samtang si PGMA nagliso-liso karon pagpamingwit nga mabali ang hangin pinaagi sa pagmani-obra sa kahigayunan nga “soaring cost of fuel and other prices of commodities affected the nation. That she is busy doing mga “panagang” aron ang katawhan dili madala sa sulog sa tinguha sa opposition nga magdugang ang kayugot nila sa administrasyon nga gumikan sa ilang pagpasulabi sa pangurakot samot nga purdoy ang katawhan.

Hinoon dili matabang ang pag-usbaw sa gasoline halos matag semana. Gani dunay gibana-bana nga moabot pa dinhi tag P100.00 ang litro. Mukoyog usab dinhi ang LPG. Gani LPG bag-ohay pang gipatuboan P3.00 matag kilo. Tungod niini ang pasahero ug sakiyanan de pasahero pulos naalang-alang pag-usab sa ilang pletehan ug mga pasahero halos dili makatingog nga nasayod sa matuod pagtubo sa prisyo sa gasolina. Balantayan lamang dinhi nga ipatas-patas lamang ang pletihan bisan mag-uban-uban kinig tubo paglihok sa pagtubo sa prisyo.

Daghang mga migamit sa LPG karon nga wala na migamit niini. Balik kadaghanan karon sa dapogan sugnoran sa kahoy. Ugaling naa pay migamit sa LPG gihimo ang kombinasyon. Himoong lutoanan emerhensiya ang LPG pagdaginot dayon adto sa dapogan maglung-ag o maglatag sud-an nga nagkinahanglan ug hataas panahon lutoon. Dinhi na usab maalaot atong mga kakahoyan. Dinhi kita makakitag mga baligyang mga sugnod kahoy nga kinuha sa nagkadaiyang tanom sama na sa orchard farm gitam-nan sa mga prutas. Gani gidaginot na dinhi ang mga kahoy nga dili lingion kaniadto kay lugos mosiga, walay mamalit. Karon saksak-sagol ang mga baligiyang kahoy. Dili usab lalim ang kataas sa prisyo sa mga maayong mga kahoy nga sugnod gibaligya karon.

Karon linghod putot sa lubi nga kinutkotan sa mga ilaga bugha-on na ibulad sulod sa tulo ka semana nga maoy himoong sugnod. Dili madugay ang mga punoan sa kalatsutsi, kamunggay, kapayas o bisan unsa na lang matilok karon sa kasuokan sa kabukiran. Maalaot dinhi atong mga inalimahang mga prutas nga bisan adunay purohan makabunga pa, mapuslan ang kahoy niini himoong lumber adto na idispatsar sa tigpamalit sugnod kahoy. Bisan asa karon dili na katagyaman bisan unsa nga mahimong sugnod, hasta tukon sa hayhayan, mga bangko, nga mahabilin sa gawas sa panimalay takulahaw mga wala. Kadto gihimong sugnod sa hinalali.

Koral kahoy sa lubi nga humok na langkaton daginoton pagpangawat hinay-hinay magabii. Lagi gumikan sa paningkamot nga dunay ikasugnod karon sa dapogan, ilabi nag mating-ulan. Mga tag-iya sa kalubihan karon dili na paulahi mangahoy sa mga mahulog palwa ilabi na ang pulak sa lubi. Kawatanay sa pulak lubi karon dili mapugngan. . . lisod mamatikdan. Gani sakayan o bangka panagatan, kawaton ang gidut-olan niini paghandos sa sakayan. Kon mahikalimtan ang bugsay, goodbye hasta ikalabog tubig sa sakayan. Hangtud niining panahona nagdugang ang pagbaga sa dag-om timailhan gipasabot ang pagtubo sa prisyo sa palaliton permaninti pagpadayon. (Press Freedom, Vol. XX No. 33)

 
Credits: Press Freedom is published every Saturday and entered as 3rd class mail matter in Dipolog City. Printed by Young Printing Press with Editorial Office located at Upper Turno, Dipolog City. Tel. No. (065) 212-4343 or 212-6665

 


PhilHealth ID distribution gipalapdan

 

Jose Dalman, ZaNorte – Dili matugkad ang gibating kalipay sa mga katawhan sa 18 ka barangay sa lungsod Jose Dalman sa dihang nadawat na nila ang Philhealth ID Card. Kini ang gipangunayan mismo pagtunol ni Governor Rolando Yebes, uban nila ni CDAU Unit Head Ronie Pacilan, Provincial ug Municipal Social Welfare and Development Office, Philhealth mga barangay kapitan nga miduyog sa programa sa Yebes administration ug si Board Member Cedric Adriatico nga maoy chairman sa Committee on Health sa Sangguniang Panlalawigan.

CDAU head Roney Pacilan

Sa pagtunol sa maong Philhealth Card ngadto sa mga beneficiaries gihangyo ni Governor Yebes ang tanan alang sa panaghi-usa. Ang iyang pagserbisyo wala maglantaw ug ginansiya ug bugti alang sa iyang personal nga interest. Ang iyaa lamang nga mabati ug makita ang mga katawhan sa Zanorte nga anaa ang pahiyom ug nagpasalamat sa mga programa sa probinsiya nga nakatabang kanila.

Sa Philhealth programa karon sa probinsiya migasto kini ug 20 milyones pesos. Tinguha ni Governor Yebes nga iya kining dugangan ug laing 20 milyones pesos sa sunod tuig tungod kay dili niya itugot nga ang tanang mga katawhan sa Zanorte ang magkadiin-diin intawon ug pangita ug kuwarta aron gamiton pagpatambal panahon nga magsakit. Gipaabot sa gobernador ang iyang hangyo nga kinahanglan ampingan ang maong Philhealth Card kay sama ra kini sa card sa Lando BIBO nga mahimong e-presentar kung mangayo kini ug tabang sa probinsiya ilabina sa livelihood program nga maoy  gihingusgan karon ni Governor Yebes alang niining tuiga.

Samtang gipaambit usab ni Board Member Adriatico ang usa ka istorya sa tawo nga anaa napadpad sa usa ka isla nga dugay nga wala matabangi. Iyang gibasol ang ginoo sa dihang nasunog ang iyang balay nga iyang gibiyaan paingon siya nanagat. Apan ang maong aso sa nasunog niyang balay maoy nag-giya sa mga tawo nga nangita kaniya hinungdan nga siya ang na-rescue. Gihulagway ni Board Member Adriatico nga ang maong asu maoy kahimtang sa mga katawhan karon sa Jose Dalman ug maoy nakita ni Governor Yebes uban sa mga miyembro sa Sangguniang Panlalawigan ug uban pang mga opisyales sa probinsiya aron  matabangan ang mga katawhan sa maong lungsod.

Sa wala pa gipang-apud-apud ang maong Philhealth card gihimo una ang orientation sa taga Philhealth aron masabtan pag-ayo sa mga miyembrong kabus nga katawhan kung unsay benepisyo nga makuha sa maong programa.

 
 


Tabangan Ang Nahisalaag Nga Mga Kabataan

Sayong buntag ning adlawng Martes, nagpunsisok ang mga tawo didto sulod sa Kapilya nga mitambong sa gipahigayong Misa ni  Fr. Levi Sagrada. Pista man god sa maong barangay maong daghan kaayo ang manimbahay.

“Ang ako lang gikahibudngan, akong kaigsuonan, nga dinhi sa atong barangay nindot man ang atong bulangan apan haskan man sab gubaa ang atop sa atong kapilya,” matod ni Padre Sagrada nga hinayng mikatawa . “Di ko mosugot nga sa sunod natong pista, magmisa ko dinhi sa atong Kapilya nga haskan gihapong gubaa.” Naghunghongay ang mga manimbahay samtang nagpaabot pa sila sa dugang iwali ni Padre Sagrada. “Usa lamang ka paagi nga matagaan nato ug sulbad kining problema karon nga giatubang sa atong Kapilya,” matod ni  Padre Sagrada. “Áron makatigom kita ug dakong pundo, mohatag ug amot ang atong mga tawo.Mosugot ba kamo?”

Miyango-yango ang mga manimbahay nga pulos mapahiyomon timaan sa ilang pag-uyon. “Maayo…maayo…maayo,” matod ni Padre Sagrada nga mikuha sa iyang antipara. “Karon, ang interesado nga mohatag ug amot motindog inigtokar sa organo. Okay ba kamo?” “Okay kaaaayooooo!” suliyaw sa mga tawo. Miatubang si Padre Sagrada ngadto sa organista:”Hala tokar na!”

“Unsa may tukaron nako, Padre?” sukot sa organista nga gisahogan ang galamhan sa tumang katingala. “Pambansang Awit!” Hik…hik…hik…!

#####

Kapistahan karon sa atong dakbayan ug sama sa naandan, maganayan ang atong katawhan didto sa atong Simbahan aron pagtambong sa mga pagahimoong Misa alang sa maong kasaulogan.

Ayaw ka…bisan man tuod kon balay sa Ginoo ang imong adtoan, yaw ug kumpiyansa nga dili ka makuotan. Naa diha karon sa atong Simbahan ang mga alimatok ning atong katilingban…mga kiriwan nga mahilig manguot sa bulsa sa uban! Yaw pagtuo nga kanang mga kawatan mahadlok sila  nga gabaan nga manguot sa inyong  mga bulsa bisan diha sulod sa Simbahan. Alang kanila, di na sila dutlan ug gaba ug ning atong panahon karon kanang “gaba” sayon ra nilang pangan-on ug tunlon!

Usab, daghan kita karon ug mga kalingawan ug pihong kining mga sagbot sa atong katilingban anaa sab misanib ug miabin-abin sa mamistahay natong kaigsuonan. Pagbantay mo sa inyong mga pitaka nga gisudlan sa inyong daghang kuwarta. Yaw gyod mo ug pailad ni kumpiyansa kay kon magdinangag mo, mabulilyaso gayod ang inyong pagpamista!

#####

Sa miaging adlaw may gibuhiang pahibalo ang taga PHIVOCS nga kuno, kon may linog nga kusog ang mouyog sa atong nasod, daghan gayong kabalayan ang manga-unlod! Kini tungod kay sumala sa survey, daghan sa kabalayan sa atong nasod karon ang gipangtukod nga wala magsunod sa mga kalagdaan aron malikayan nato kining mangilngig nga katalagman. Daghan sa gipangtukod nga kabalayan ang huyang kay gama lamang sa ubos nga kalidad sa mga construction materials. Lasaw ang gitimplang semento ug tago ug gagmay ang kabilyang gipanggamit. Usab, kadaghanan sa atong kabalayan mga karaan ug sa pagkakaron, gabok na ang kanilang mga pundasyon!

Dinhi sa atua daghan ang mga buildings dinhi nga naagian na sa   mga sunog apan nagpabilin pa kini sila nga nagtindog.Dinhi, daghan ang nangutana: “Sa kainit sa kalayo niadto nga miulbo sa ilang palibot, wala kaha ang mga semento niini nangaluto ug nangadunot?

May panahon pa nga mohimo gyod ug pag-inspection ang atong mga hingtungdang kadagkoan ning dakbayan aron atong malikayan kining maong katalagman! Undangon na nato kining laksot ug maot mga batasan nga ayha pa kita manguros kon mokilat  na.

#####

Sa tinuoray lang, daghan kitag mga Barangay Tanod apan taman ra sila sa ngalan apan way tataw nga mga binuhatan. Kana tungod kay wa silay igong nahibaw-an kabahin sa ilang pagpangatungdanan.Bisan gani sa pag-aresto dili pa sila mahibalo kon unsaon kini sa pagdigamo!

Usa ka epektibo nga lakang aron masumpo kining mga krimen nga nanghitabo sa atong mga barangay mao ang pag-seminar sa atong mga Barangay Tanod. Ug aron dili sila mahadlok nga modakop niadtong nakasala, bansayon kini sila sa mga pamaaging self-defense…ilabi na ning paggamit sa batuta. Mao kini ang gihimo didto sa dakbayan sa Iligan. Bisan kon ang ilang mga barangay tanod didto way mga armas de fuego apan pulos sila mga aresgado nga modakop  niadong mga tarantado nga mga tawo bisan gamit ang ilang mga batuta lamang kay makahimo sila kanila sa pagpiang!

Ngano ba tuod nga dili man nato mabansay niini  ang atong mga barangay tanod dinhi? Daghan ang nakadayeg kang Mayor Evelyn Uy sa iyang pag-guest sa Kapihan sa Dipolog, ang senemanang talk show sa station DXDR. Pintok daw ug straight to the point ang matang sa iyang pagpanubag. Ug matod pa sa nakapaminaw, ang tinubagan sa Mayor simple da apan undanon mao nga nindot kining paminawon! Diha pay miingon nga: “Maayo ug larino man diay mo-Iningles si Mayor Evelyn Uy”.

Well, ikaw na mismo ang graduwado sa Ateneo! Ang proyekto ni Mayor Evelyn Uy alang sa atong kabataan nga naa karon gipabarog sa barangay sa Minaog maoy usa ka timaan nga siya may pagbati sa pagkatiunay nga inahan sa kabataan ning atong dakbayan. Matod pa niya atol sa iyang pag-guest sa Kapihan nga dako niyang tinguha nga kon mahimo matagaan gayod ug igong pagtagad kining mga layaw nga mga bata ning atong siyudad kinsa, kadaghanan kanila ingon sa gisalindot na lang sa atong katilingban.Matod pa niya, pinaagi sa mga kumpletong  kahimanan,  matagaan ug igong pagtagad ug kasiyahan ang atong kabataan.

Maayo unta kon ang uban natong kadagkoan sa kalungsoran mohimo ning susama nga proyekto ni Mayor Evelyn Uy ning atong dakbayan.

Salamat, Mayor Evelyn Uy, sa paghatag nimo ug tabang sa atong kabataan nga kadaghanan kanila anaa naglaroy-laroy na lang sa atong mga kadalanan…mga kabataan nga maingon tang mga sinalikway sa kapalaran! (Dipolog Chronicle, Vol.VII No.49)

*

MORE NEWS NGA BINISAYA

 

 

NOTE: SEND US YOUR NEWS.  Tell us what's going on in your barangays, clubs, schools, businesses and non profit organization. You can also send notices and announcements.
          

 

    Email to webmaster@dipolognon.com

      
Google
WEB THE DAILY DIPOLOGNON