June 2, 2005

  Tanang hostages gibuhian na, samtang gilakag karon ang mga suspetsado
HOSTAGE-DRAMA SA RURAL TOURS

Gibuhian na kagahapon sa mga alas tres ang takna sa kahaponon sa lungsod sa Lakewood, Zamboanga del Sur ang katapusang pito ka mga hostages samtang ang mga hostage takers nakalighot ug padayon karong gilakag sa kapolisan ug military.

Kini ang gibutyag ni Police Senior Superintendent Jufel Adriatico ang nahimong chief negotiator sa nasangpit nga hostage taking incident. Sukad nahitabo ang hostage taking sa lungsod sa Sapang Dalaga, Misamis Occidental mga alas 10:45 sa buntag sa Martes, Mayo 24 hangtud na kagahapon sa alas 3:00 sa hapon Mayo 25, 2005 didto sa Pulakan, Labangan, Zamboanga del Sur wala gayud mobiya sila si Police Senior Superintendent ug Provincial Attorney Jes Gal Sarmiento, Jr. hangtud nga narelease ang katapusang hut-ong sa mga hostages didto sa lungsod sa Lakewood.

Mitabang usab sa negosasyon mao si Bishop Emmanuel Cabahar sa Pagadian City kinsa maoy mibolontaryo sa paghatud sa mga hostage takers sa ilang distinasyon para buhian ang katapusang mga bihag ginamit ang iyang kaugalingong sakyanan. Ang hostage taking nagsugod sa military checkpoint atbang sa balay lungsod sa Sapang Dalaga sa dihang gimandu ang pagpakanaug sa tanang mga lalaking pasahero sa Rural Tours Bus No. 166 gikan sa Ozamis City paingon sa dakbayan sa Dipolog.

Nalakip na sa pasahero sa maong bus mao ang tulo ka armadong mga lalaki nga maoy nang hostage. Nahimo nilang bihag ang 14 ka mga pasahero diin kadaghanan mga babaye apil na ang tulo ka mga bata. Sigun sa nakuhang talaan gikan sa temporaryong tactical operations center sa crisis committee ang mga nabihag nga mga pasahero mao sila si Michelle Ada taga Dapitan City; Michealo Lopez taga Igot, Estaka, Dipolog City; Harry Tan taga Salug, Zamboanga del Norte; Maria Atad uban sa iyang apo, Charito Cardinas, Lorna Manangquil uban sa duha ka bata, Licelle Lupina nga pulos taga Sapang Dalaga, Zenaida Tersira sa Dumaguete City ug Dureza Plaza sa dakbayan sa Dipolog.

Unang gibuhian didto sa Sapang Dalaga ang usa ka batang babaye bugti sa pagsugot sa driver sa Rural Tours nga mobalik sa pagmaniho sa bus pabalik sa direksiyon sa Ozamis City diin ang mga hostage takers unang nagplano nga mokawas ug molighot. Apan kini nabulilyaso hangtud nga misangko ang hostage drama sa tugkaran mismo sa 1st Infantry Tabak Division Headquarters sa Pulakan, Labangan, Zambo-anga del Sur diin dugang negosasyon ang gipahigayon uban na ni Pagadian City Bishop Emmanuel Cabahar.

Ang ika duhang bihag nga girelease sa mga hostage takers mao si Dureza Plaza ang appointment secretary ni Governor Rolando Yebes, samtang gipadayon ang negosasyon alang na sa pagrelease sa uban pang mga bihag. Matud pa ni Police Senior Superintendent Adriatico nga walay gipangayo nga demanda ang mga hostage takers political or economic demands.

Sa ika duhang hugna sa negosasyon uban na ni Bishop Cabahar ang mga hostage takers nangayo ug laing sakyanan para ilang magamit uban gihapon sa ilang mga bihag paingon sa distinasyon diin ilang giplanohang buhian ang mga biktima. Sumala pa ang sakyanan ni Bishop Cabahar maoy gihanyag niini nga ipagamit ug siya mismo maoy nangunay sa pagmaneho diin una nilang direksiyon paingon sa Pagadian City.

Sa dihang namatikdan nga padayong may misunod kanila ang Obispo miapilar nga tumanon kon unsay may gikasabutan nga walay mosunod sa ilang biyahe. Samtang didto na sila sa Pagadian City unang unom ka mga bihag ang gibuhian ayha sila mipadayon sa pagbiyahe. Sila si Bishop Cabahar gidala ngadto sa lungsod sa Lakewood diin pag-abot sa lugar nga baga ang kalasangan ang tulo ka mga suspetsadong hostage takers nangambak.

Sa samang bahin gibutyag usab ni Adriatico nga samtang nagapadayon ang negosasyon usa sa bihag nga si Harry Tan nga taga Salug ang ming-ambak agi sa bintana sa bus, hinungdan nga ang mga sundawo nakapaboto sa pagtuo nga ang miambak usa sa mga hostage takers. Gipatin-aw ni Police Senior Superintendent Adriatico ang disisyon nga nakab-ot sa crisis committee kon ngano nga gitugutan nga maka eskapo ang mga hostage takers.

Matud pa niya sa maong mga situwasyon ang unang prayoridad mao gayud ang pagsalbar sa kinabuhi sa mga bihag. Sumala pa niya mag-unsa man unya kon makuha nila ug mapatay ang mga hostage takers apan naapil usab ug kamatay ang ilang mga bihag, mapuno lang unya sila sa mga pagsaway ug pagkondinar.

Si Adriatico midugang sa pagpahayag nga karon nga anaa na sa luwas nga kahimtang ang tanang bihag ang ika duhang hugna sa ilang giplano nga aksiyon mao na ang paglakag sa tulo ka mga hostage takers. Kon madakpan ang tulo kini makasohan ug illegal possession of firearms and ammunition ug kasong kidnapping, dugang sa pahayag ni Adriatico ang chief negotiator. (The New Nandau, Vol. XIV No. 53)

*

 Dumptruck ni Amatong nadakpan sa PEDO

Laing dump truck sa FSA Development Corporation ang nadakpan sa Provincial Environment and Development Office o PEDO tungod sa paghakot ug mga earth fill materials nga walay hustong dokumento.

Kini ang gibutyag ni Mr. Remelo Damuag sa PEDO human masikop sa ilang ginsakupan ang usa ka dump truck, color blue nga nagdala sa plate number TDW-948 nga may kargang 5 cubic meters nga earth fill materials nga gimaneho ni Edgar Gantalao. Ang nasangpit nga dump truck matud pa ni Damuag gipanag-iyahan sa FSA Development Corporation, diin ang karga niining earth fill materials dalhon sulod sa ABC Compound sa Miputak ning dakbayan sa Dipolog.

Matud pa ni Damuag ang driver niini nga si Gantalao napakyas sa pagpresentar sa gikinahanglang dokumento sama sa Delivery Receipts para sa Sand and Gravel nga maoy usa ka paglapas sa Sec. 22 sa Mines Administrative Order Nos. MRD-27.

Girekomendar ni Damuag ang pagpahigayon ug higpit nga imbestigasyon kon asa gikuha ang maong quarry materials lakip na sa pagpakasa ug kaso batok sa hauler ug illegal extractors sa maong earth fill materials.

Kahinumduman sa miagi laing dump truck sa FSA ang nadakpan usab sa PEDO didtosa Lapayang Baha sa Polanco tungod sa pagkarga ug mga balas nga wala masulod sa concession area sa permitee nga ilang gipalita ingon man ang kapakyas usab sa pagpakita sa delivery receipts aron sa pagpakita nga ang gikarga nga sand and gravel nakabayad ba sa tukmang buhis ngadto sa kagamhanan. (Press Freedom, Vol. XVII No. 47)

Credits: Press Freedom is published every Saturday and entered as 3^rd class mail matter in Dipolog City. Printed by Young Printing Press with Editorial Office located at Upper Turno, Dipolog City. Tel. No. (065) 212-4343 or 212-6665

*

 Katawhan giawhagan sa pagmabinantayon –PNP

Mga mudos sa “Salisi Gang”

Nanawagan karon ang PNP Dipolog sa tanang mga katawhan ning dakbayan lakip na sa mga dumoduong nga kanunay mag-igmat diha sa pagbantay sa ilang mga mahinungdanong kagamitan ilabi na panahon sa ilang pagsuroy-suroy aron dili mabiktima sa mga mangungoot nga modagsang panahon nga magpunsisok ang katawhan ilabi na kon adunay mga okasyon sama sa umaabot nga pista karong Sabado ug sa kasaulogan usab sa Pagsalabuk Festival.

Giawhag ang katawhan nga likayan ang pagpasaya-saya sa ilang mga cellphone, alahas ug mga pitaka samtang nagsuroy-suroy o kaha nangaon sa restaurant. Dili usab magpasagad ug bilin sa bisan asa sa ilang mga mahinungdanong gamit aron dili mabiktima sa mudos usab sa “Salisi Gang” nga magpaabot lang ug malipat ang ilang gipunting nga biktimahon ayha nila ipahigayon ang ilang giplanong pagpangawat.

Lakip usab sa gipahimangnoan sa kapolisan ang mga negosyante nga kanunay mag-igmat diha sa pagbantay sa ilang mga tindahan aron dili mabiktima sa mga lipat-lipat sa mga dautang elemento nga magpatuong kostumer ug kon ma-busy na ang mga tindera, kini mohinay-hinay usab ug buhat sa ilang dautang laraw.

Giawhag usab ang katawhan nga motaho gilayon sa kapolisan pinaagi sa ilang hotline 166 kon adunay mamatikdang mga dautang lihok aron kini marespondihan usab sa mga otoridad. (Dipolog CIO Press Release, lbt)

*

Secretary ni Gov. Lando Yebes naapil paghostage sa Rural Transit, naluwas

Nauli na kaganihang kaadlawon sa iyang ginikanan ang private secretary ni Governor Rolando Yebes, human maapil sa pagkahostage sa napulo ug usa ka mga pasahero sa Rural Transit Bus. Mga alas 9:30 ang takna kagabii nga si Dureza Plaza, nakalighot gikan sa tulo ka mga armadong hostage takers nga maoy naghijack sa Rural Bus No. 166 samtang gipahigayon usab ang usa ka negosasyon sa pagpanguna ni Police Senior Superintendent Jufel Adriatico ug Provincial Atty. Jes Gal Sarmiento, Jr.

Si Dureza nakahigayon sa paglighot gikan sa tulo ka armadong hostage takers human milabay ang kapin sa napulo ka oras diin sila nahimong bihag gikan pa sa lungsod sa Sapang Dalaga, Misamis Occidental hangtud na sa Pulakan, Labangan, Zamboanga del Sur. Gisaysay ni Dureza ang sinugdanan sa nahimo nilang kasinatian hangtud na sa iyang paglighot.

Matud pa niya ang tulo ka suspetsado, kauban niya nga mingsakay sa aircon bus sa Rural Transit didto sa dakbayan sa Ozamis alang na sa panaw Ozamis-Dipolog-Ipil-Zamboanga. Pag-abot nila sa Sapang Dalaga mga alas 10:45 sa kagahapon sa buntag, unahan gamay sa balay lungsod niini ang bus gipahunong sa checkpoint sa military diin gimanduan ang pagpakanaug sa tanang mga lalaki nga pasahero alang na sa pagpahigayon ug inspection may kalabutan na sa kampanya batok sa terorismo ug sa ilang Operation Bakal.

Apan ang tulo ka mga hostage takers pabiling wala mokanaug ug didto ra sulod sa bus. Sa dihang mosaka na unta sa bus ang usa ka sakop sa military aron sa pagpahigayon sa pag-inspection sa sulod sa passenger bus, sa dihang namatikdan kini ang tulo ka hostage takers nagpaboto sa ilang dala nga armas nga pistola, busa midali ug kawas ang sundawo ug mibawos usab sa pagpasalba sulod sa makaduha ka higayon.

Matud pa ni Dureza sa maong punto nga nagsugod na dayon ang tensiyon diin ang mga nahibiling pasahero nga mga babaye ug bata maoy nahimong bihag. Gisaysay dugang sa private secretary ni Gov. Yebes, nga una niyang gitawagan ug gipangayuan ug pakitabang mao si Police Provincial Director Senior Superintendent Adriatico, kinsa wala usab maglangay mingsirit gilayon paingon sa Sapang Dalaga uban na kang Provincial Attorney Sarmiento.

Sa asoy ni Dureza gipasabot niini nga ang tulo ka armadong hostage takers kanila lamang ni Adriatico ug Sarmiento gusto nga makignegosasyon ug makig-istorya kay ang ubang mga personalidad o opisyal sa gobyerno nga misuway sa pagkontak kanila dili man nila istoryahon. Didto pa lamang sa Sapang Dalaga, midagan na ug lima ka oras ang negosasyon diin unang gipangayo sa tulo ka hostage takers nga sila hatagan ug higayon nga makalighot dili nila hilabtan ug pasipad-an ang mga pasahero.

Matud pa ni Dureza ang tulo mipahibawo kanilang mga bihag nga sila mga meyembro sa New People’s Army ug dili sila mga dautang tawo sama sa mga hold-upper. Tuod man, dugang pahayag ni Dureza bisan usa ka personal nga butang sa mga pasahero wala hilabti ug wala modawat sa gihanyag nilang kuwarta ug mga butang gikan sa kauban niyang mga bihag para lamang nga sila mahatagan ug higayon nga buhian na.

Sa negosasyon didto sa Sapang Dalaga, gipangayo sa tulo ka armadong lalaki nga ang bus padaganon lang ug pipila ka kilometro gikan sa poblacion kay mangita sila ug lugar para sila mokawas ug molighot ug kinahanglan nga wala usay mosunod kanila nga mga tinugyanan sa balaod. Tuod man sa pagka alas 4:00 sa hapon human buhii ang sayis anyos nga batang babaye nga naapil sa pagka bihag ang Rural Transit Bus No. 166, mi-backing ug misirit paingon sa direksiyon sa dakbayan sa Ozamis.

Matud pa ni Senior Superintendent Adriatico ang pagtugot sa mga hostage takers nga makalarga dala ilang bihag para mokawas sa unahan, usa ka collective decision nga nakab-ot sa namugnang crisis committee nga gipangunahan ni Misamis Occidental Governor Leon Ocampos uban usab ang Police Provincial Director Mariano Yanga.

Matud pa sa private secretary ni Gov. Yebes ang plano sa tulo ka hostage taker mga lima ka kilometros gikan sa poblacion sa Sapang Dalaga, mokanaug na sila ug kini ilang namatikdan nga nangandam na, apan nabulilyaso tungod kay wala matuman sa mga sakop ni Governor Ocampos ang gikasabutan nga dili una sila sundan. Sumala pa ni Dureza, nagsunod-sunod gayud kanila ang pipila ka mga sakyanan nga maoy nakapausab sa huna-huna sa tulo ka hostage takers.

Si Dureza mibutyag nga iyaha pang natawagan niini si Gov. Ocampos nga pasibogon ang mga tawo niini nga nagsunod-sunod sa bus ug mismo siya mikanaug ug miapilar sa nagsunod kanila nga dili una mopadayon, apan sumala pa wala sila paminawa. Hinungdan nga nalahos sila paingon na sa direksiyon sa Pagadian City.

Apan sa paglabay nila sa usa ka checkpoint sa military sa lungsod sa Tambulig girakrakan ang ilang bus hinungdan nga nabuak ang salamin niining bintana ug nahiyos ang ang ligid sa unahan. Makita diha sa kongkre-tong dalan ang agi sa yenta sa truck nga nag-ikis-ikis. Sa maong higayon ang driver sa Rural Transit bus misamot ug ka hysterical nga nagsige na ug singgit ug nag-awhag kaniya nga tawagon sila si Col. Adriatico o kaha si Governor Yebes.

Gibutyag usab ni Dureza nga nakatabang sa pagpakalma sa situwasyon ang pagpunay ug tawag ni Governor Yebes ug pagpakig-istorya niini ngadto sa lider-lider sa tulo ka hostage taker nga nagdala lamang sa alyas nga si “Jun-jun”. Ang tulo sa sayu pa mipahibawo ngadto kang Adriatico nga sila armado ug mga pistola, adunay Uzi ug may upat ka Granada. Apan matud pa ni Dureza sa iyang nakita pulos lamang pistola ang gibitbit sa tulo ug ang Granada.

Ang bus pag-abot sa dulhogon nga bahin sa Pulacan sa may kampo sa 1st Tabak Division nawad-an ug preno ug didto kini gidasmag sa driver sa may gate sa kampo ug dayong kagiw niini. Tungod sa pagka tanggong sa tulo ka hostage takers sila nakig negosasyon na usab kang Adriatico nga kon mahimo hatagan sila ug laing sakyanan para ilang magamit kay sa unahan adunay ilang kauban nga naghuwat kanila para na sa ilang pag-eskapo.

Sa maong punto nga si Dureza nasuguan nga maoy mangita ug sakyanan hinungdan nga nakalugar kini sa paglighot ug wala na mobalik ngadto sa bus. Sa sayu pa sa pagpakig negosasyon ni Col. Adriatico, gisuwayan niini ug kompinsir an glider-lider sa grupo nga si Jun, nga motahan na lang sila sa ilang kaugalingon sanglit ang ilang kaso gaan ra kay mahulog lamang kini sa illegal possession of firearms and ammonution dungan sa pasalig nga hatagan sila ug maayo nga abogado ug si Governor Yebes mao pay motabang sa pagbutang ug peyansa para sa ilang temporaryong kagawasan.

Apan wala gayud madala ang tulo ka hostage takers ug nagapabilin kini sa ilang hugot nga baruganan nga hatagan sila ug graceful exit dili hilabtan ang mga pasahero. Sa sayu pa sa interview sa media ngadto kang Adriatico didto pa sa Sapang Dalaga, wala isalikway niini ang posibilidad nga ang tulo mao ra ang mga responsible sa unang nahitabo nga hold-up sa bus gihapon nga Rural Transit gikan sa Owaon, Dapitan City kay susamang mga armas ang gidala ug tulo usab ka buok ang mga suspetsado.

Kabahin sa disisyon nga misugot sila sa gipangayo sa mga hostage takers, gipatin-aw ni Senior Superintendent Adriatico nga kini maoy nadisidihan sa crisis committee kay maoy gusto nila nga mapreserbar gayud ang kinabuhi sa mga pasahero nga nahimong bihag. Hangtud nagapadayon ang negosasyon alang na sa pagsurrender sa tulo ka hostage takers.

Dili usab tinood nga adunay namatay sa mga hostages kay gipusil. Matud pa ni Dureza usa sa pasahero nasamad sa ulo ka naigo sa buak nga bildo sa bintana sa dihang nabungkag kini kay naigo sa pagrakrak sa ilang paglabay sa checkpoint sa Tambulig. (The New Nandau, Vol. XIV No. 53)

*

  Pagbukas sa Visual Art Exhibit malampuson

Gihugukan sa mga dumuduong, mga kawani ug opisyales sa kagamhanang lokal sa Dipolog, nga gipangunahan ni Mayor Roberto Y. Uy ug ang Unang Ginang Evelyn T. Uy, lakip na si Konsehal Alton Ratificar, ang Chairman sa Pagsalabuk Festival ug mga Barangay Chairmen ug ang onse ka opisyal nga kandidata alang sa Mutya sa Dipolog, 2005, ang pormal nga pagbukas sa Visual Art Exhibit nga maoy unang kalihokan nga nagabulok sa ika pitong tuig sa pagpahigayon sa Pagsalabuk Festival.

Usa ka ribbon cutting ceremony ang gipahigayon atol sa pagbukas sa visual art exhibit, nga giduyugan sa pagtukar ug neo-ethnic music sa Tribu Dipag, ug   gipartisipahan sa mga grupo sa mga artists nga naglangkob sa Ta Glibon Ini (Lady Artists), Padayonay Art Collective, Goodtimes, Dipolog Artists Consortium ug mga indibidual artists ning dakbayan sa Dipolog. Mokabat sa kapin kun kulang 100 ka mga nagkalain-laing paintings, mga artifacts, mga inukit nga kahoy ug bato ug mga kabtangan nga gihimu-an ug arte sa mga artists,  ang ana-a makita karon sa nasangpit nga visual art exhibit nga molungtad hangtud sa Hulyo 1 ning tuiga.

Gumikan niini nga kalamboan, mapasalamatong mipadayag si Mayor Uy sa iyang dakung kalipay gumikan sa partisipasyon sa mga grupo sa mga artists nga nakatabang usab sa pagpakabana ug pagdayeg sa mga katawhan ning dakbayan ang kabahin na sa cultural heritage sa mga Dipolognon, nga nagpabiling mahinungdanon bisan pa man sa dakung kalamboan sa teknolohiya karong panahona.

Dugang usab gipasupot ni Mayor Uy ang pag-imbitar sa tanang katawhan ug mga dumuduong ning dakbayan sa Dipolog sa pagpahimulos sa paglantaw sa tanang kalihokan nga gihan-ay alang sa Pagsalabuk Festival 2005 hangtud na sa pag-selebrar sa  ika-92 nga anibersaryo sa Adlaw sa Dipolog, karong Hulyo 1, 2005. (Dipolog CIO Press Release, PRR)

*

  Mayor Soriano hilaw nga environmentalist

Gisaway karon sa pipila ka meyembro sa Task Force Kalasangan si Mayor Cesar Soriano sa lungsod sa Siocon nga usa ka hilaw nga environmentalist. Kini ang nahimo nilang reaksiyon sa dihang nabasahan nila sa nasudnong mantalaan nga si Mayor Soriano usa sa mga mipirma sa petisyon nga nag-awhag kang Presidente Gloria Macapagal-Arroyo sa paglibkas sa gipatigbabaw nga ‘total log ban’ sa Zamboanga del Norte.

Alang kanila si Soriano usa ka hilaw nga environmentalist samtang kini hugtanong nagakampanya para mapahunong ang operasyon sa TVI kay maoy makaguba sa iyang gitawag ug paraiso. Apan luyo sa iyang gipakitang pagpakabana kabahin na sa pagprotiher sa kinaiyahan milutaw karon nga kini usa lamang ka takuban ug usa ka gimmick sa politika ni Soriano kay dili diay matinud-anon ang kampanya niini para sa pagpreserbar sa kinaiyahan atubangan sa iyang pagsugot nga makapadayon ang DACON sa ilang pagpamutol ug kahoy sa katapusang lasang sa atong lalawigan.

Hinoon sa sayu pa namatikdan na daan nga si Mayor Soriano talawan kon kabahin na sa DACON ang pagahisgutan. Karong semanaha migawas ang balita nga pipila ka mga religious ug political leaders sa Zamboanga del Sur, Zamboanga City, Sultan Kudarat, Kidapawan ug Cotabato City ang minghangyo karong Presidente Arroyo sa paglibkas sa logging moratorium sa pipila ka mga piniling lugar sa Mindanao nga para kanila nagkinahanglan sa pagpadas-og sa sustainable development sa forest para sa benepisyo sa iyang mga katawhan.

Ang mga mipirma sa petisyon mao sila si Zamboanga del Sur Governor Aurora Cerilles, Zamboanga City Mayor Celso Lobregat, Archbishop Camelo Morelos, Msgr. Crisanto de la Cruz, Rev. Father Sandro Brambilla, Mayor Romeo Carino sa Sirawai, Mayor Cesar Soriano sa Siocon, Sultan Kudarat Governor Pax Mangudadatu, Sultan Kudarat Congressman Suharto Mangudadatu, Kidapawan Bishop Romulo Valles ug Cotabato Archbishop Orlando Quevedo.

Matud pa ni Cerilles ang mga Industrial Forest Management Agreement holders maoy naghatag ug trabaho sa libuan ka mga katawhan sa bukid nga walay laing panginabuhi. Gawas pa ang nasangpit nga mga kompaniya, dugang pasabot ni Cerilles maoy naghatag sa gikinahanglang kalambuan nga wala maabot sa kagamhanan.

Ang gobernador sa Zamboanga del Sur, nagkanayon nga ang Sirawai Plywood and Lumber Corporation ug ang SODACO Agricultural Corporation nga ilawom sa DACON group of companies pulos nagbatun ug igong kapabilidad diha sa pagtubag sa problema sa kahusay ug kalinaw. Samtang si Mayor Lobregat sa Zamboanga City miawhag sa mga lideres sa nasudnong kagamhanan sa pagbisita sa lugar nga gidumala sa DACON.

Matud pa ni Lobregat ang katawhan dili gusto nga biyaan sa DACON ang pagdumala sa kalasangan sa atong lalawigan sa Zamboanga del Norte. Kahinumduman nga gipadas-og sa mga opisyales sa Zamboanga del Norte sa pagpanguna ni Governor Rolando Yebes uban sa tulo ka congressman ug meyembro sa Sangguniang Panlalawigan nga ipabilin sa pagpatigbabaw ang total log ban sulod sa atong lalawigan para mapabilin ang nahibiling lasang dinhi sa atong reheyon. (Press Freedom, Vol. XVII No. 47)

*

Miapilar karon si Governor Rolando Yebes sa pipila ka mga kritiko sa agrisibo karong kampanya sa probinsiya sa pagpalambo sa industriya sa turismo nga hatagan lamang siya bisan gamay nga panahon sa pagprubar nga ang Zamboanga del Norte adunay igong ikabuga para sa pagdani ug mga bisita o turista. Matud pa ni Governor Yebes sayud siya nga adunay mga pagbugal-bugal karon nga gihimo may kalabutan na sa gipadas-og karon sa iyang administrasyon diha na sa pagpromote sa atong potential sa industriya sa turismo.

Si Governor Yebes nagkanayon nga sama ra kini sa miaging mga panahon sa Bohol sa dihang gihingusgan niini ang pagpromote sa ilang industriya sa turismo kini nakahinagbo sa mga pagbugal-bugal gikan sa pipila ka mga sector. Apan ang mga paningkamut sa kagamhanan sa Bohol nagmabungahon diin karon ang nasangpit nga lalawigan maoy nag-una karon sa gidugok sa mga turista.

Si Yebes daku ug pagsalig nga susamang kalambuan ang maangkon sa ZANORTE kon magkahiusa lamang ang tanan sa paglihok tumong sa maong tinguha. Kahinumduman si Tourism Secretary Joseph Ace Durano maoy pinasidungang bisita sa probinsiya sa pagbukas sa Hudyaka sa ZANORTE 2005 Festival karong Mayo 29.

Matud pa ni Governor Yebes aduna gayuy hayag nga kaugmaon ang industriya sa turismo sa lalawigan kay mismo si Tourism Secretary Durano mipasalig sa paghatag ug tabang para sa ZANORTE. Kahinumduman gihatagan sa Department of Tourism ang Provincial Tourism Council sa ZANORTE ug usa ka milyon ka pesos nga pundo para gamiton sa pagpromote sa turismo dinhi sa atong lugar. (The New Nandau, Vol. XIV No. 53)

MATOY GIPASALAMATAN NI YEBES

Gipasalamatan ni Governor Rolando Yebes si Congressman Roseller Barinaga tungod sa gihatag niini nga ayuda para sa Zamboanga del Norte Integrated Provincial Hospital. Gibutyag ni Governor Yebes nga gihatagan karon ni Congressman Barinaga ug P100,000.00 ang provincial hospital para tambal alang na sa mga kabus nga mga pasiente.

Sa iyang kabahin si Congressman Barinaga nagkanayon nga ang nasangpit nga ayuda susama ra sa iyang gihimo sa miagi sa kanhi administrasyon diin nagpahat siya ug pundo para na ipalit ug tambal alang sa mga kabus nga pasiente nga magpatambal sa provincial hospital.

Gibutyag ni Governor Rolando Yebes nga gihatagan karon ni Congressman Roseller Barinaga ug P100,000.00 ang provincial hospital para tambal alang na sa mga kabus nga mga pasiente

Kahinumduman ang probinsiya nagbatun karon ug ordinansa nga nagmandu sa paghatag ug libreng tambal ngadto sa mga kabus nga katawhan nga magkinahanglan ug pag-atiman diha sa mga government hospitals. Samtang karong bag-o gisugdan usab ni Governor Yebes ang pag-apod-apod sa Lando Health Card alang na sa mga meyembro sa Barangay Indigent Beneficiaries Organizations nga gimugna sa nagkadaiyang barangay sa tanang lungsod sa tibook probinsiya.

Unang gilusad ni Governor Yebes ang paghatag sa provincial health card didto sa Barangay Lipay, Jose Dalman ning lalawigan ug kini gisundan sa mga barangay sa Fimagas ug Bulawan sa Katipunan ug Barangay Patagan ug Meses sa lungsod sa Manukan. Kini maoy resulta sa gilusad nga indigent mapping survey nga gipasiugdahan sa Community Development Assistance Unit o CDAU nga gipanguluhan ni Mr. Ronillo Pacilan.

Mokapin na sa duha ka libu ka mga meyembro sa Lando BIBO ang nahatagan sa provincial health card. Gipatin-aw sa gobernador nga ilawom sa maong programa ang mga meyembro sa Lando BIBO kon magkinahanglan ug sirbisyo sa mga hospital sa gobyerno ila lamang ipakita ang ilang gihuptan karong provincial health card ID kay otomatik na ang paglugway kanila sa sirbisyo nga wala na magkinahanglan nga mangita pa sila ug gobernador ug ubang politico kay magpatabang.

Ang maong provincial health card, dugang pahayag sa gobernador mamahimong magamit sa tanang meyembro sa pamilya sa meyembro sa Lando BIBO. (The New Nandau, Vol. XIV No. 53)

*

HULAGWAYBALITA
 

*

Pulso Sa Katilingban
Cicer M. Binghay
“Employment project maoy kinahanglan karon”

Makatarunganon si Dipolog City Mayor Berto Uy nga pugngan si Col Hizon. Tagaan sa panahon nga makapanapo sa iyang pag alagad. Madali-dalion ra kaayo ang mga konsehales pag bugaw kang Col. Hizon. Dili sunod-sunod masulbad ang mga krimen nga halos nagkadikit pag panghitabo. Naa nay mga nadakpan, budol-budol ug hold upper, duna usab ing wala pa. Natural dili makas-a. Atong hatagan ug panahon, higayon ug dugang paningkamot si Col. Hizon. Tabang usab kitang katawhan kon unsay atong mahimo. Malooy kita sa atong kapolisan nga daghang kakulangon kahimanan sa ilang pag serbisyo.

-oo0oo-

Mapanaminan nato dinhi kanang buhatan sa Dipolog Fire Fighting. Bag-ohay dunay fireman nakuhaan sa illegal drug nga shabu. Nabaniog pa nga diha mismo sa maong opisina sa Firemen nakuha ang shabu. Taod-taod dihay pronouncement sa SP Dipolog nga muhimog makuti imbestigasyon sa maong panghitabo. Diha tuod, storya lang. Nagpaabot ang katawhan. . . kanus-a ilang gibandilyo nga imbestigasyon. Dinhi mahatagan usab natog panahon ang SP nga maka panapo sa ilang gisaad.

-oo0oo-

Tangkod, karong Hunyo 30, 2005 usa ka tuig puhon mga napiling opisyales niadtong Hukom Mayo 10, 2005. PANGUTANA: Duna bay daghang kausaban atong makita, mahikap ug madungog ang lungsod ug lungsoranon????? Gawas sa daghang giimplementar prohekto dayon nakumpleto ug uban “on going” ni Gov. Rolando E. Yebes sukad sa iyang paglingkod, ang mga barangay nakadawat funding nga tag P500 ka libo, wala sukad nahitabo sukad sa mga miaging administrasyon; ang kalungsoran gawas sa ilang tagsa ka milyones pesos, nakapahimulos sa “collective” ayuda gikan sa Development fund sa Sangguniang Panlalawigan; ug daghang mga nagkadaiyang mga ayuda nahatag sa inato nga paghatag nga walay pabor-pabor kon si kinsa kamong planitaha panahon sa piniliay.

-oo0oo-

Diha sa dakbayan sa Dipolog, dili malalis ang dakong prohekto ni Mayor Berto Uy nga Dipolog Boulevard nga maoy nakahatag kahasway, kanindot ug pag-uswag sa dakbayan. Gipadayon ang pag konkreto sa kadalanan ug mga drainage canal. Gitiwas ang Galas Feeder Port. Nagkataas ang pagkotay sa sugang dagitabnon sa kadalanan ug permaninti mintinado ang kalimpyo sa palibot sa dakbayan.

-oo0oo-

Sa kabarangayan, wala nato mahibaloi kon giunsa nila pagpahimulos tukod sa prohekto ang mga ayuda gikan sa probinsiya. Sa kalungsoran, ilang mga Gymnasium nakumpleto ug nagamit sa katawhan. Nasugdan sa SP gikan sa mga hinabang iapod-apod sa mga napiling mabuot Board Members sa katawhan.

-oo0oo-

Sa nakita natong kausaban, ang pag uswag sa lungsod makita sa gipangtukod prohekto. Atong mahikap ug masingo ang kauswagan kay ang maong mga prohekto nakahatag pasilidadis sa atong kalihokang panginabuhi. PANGUTANA: Ang maong mga prohekto, ang daghang prohekto… nakapauswag pa sa katawhan??? Nakaabot ba sa tiyan nga nagpadayon nga nagkutoy??? Nakatabang ba sa panginabuhian??? Nakataak ba ang daghang prohekto paghatag kasulbaran sa mga pangandoy sa nagping-it ang kahimtang???

-oo0oo-

Sukad, sa kadaghan sa nangaging namunoan, kanunay nilang hikalimtan ang pag programa sa mga kalihokan nga makahatag trabaho sa katawhan. Programa pagsulbad sa “unemployment problem” nga maoy kasulbaran sa kapit-os. Mayoriya sa katawhan walay mga trabaho. Bisan puston kini sila karon sa nagkadaiya nga mga prohekto, pasilidadis ug mga serbisyo sa usa ka tawo nga walay kapanginabuhian? Awhagon nato atong kadagkoan, husto na ang pasiatab sa daghang prohekto. Magprogram “for employment.”  “Employment project” maoy gikinahanglan sa katawhan karon. (Press Freedom, Vol. XVII No. 47)

Sa Ngalan sa Agrikultura
(Formerly Traktora Ug Kubkuban)
By: Vicente “Vic” B. Sanchez, Jr.
 

Saksak-sinagol
 

*

MORE NEWS NGA BINISAYA