Mayo 25, 2006

Festival mopadayon gikan Mayo ngadto Hulyo
PAGSALABUK GIBUKSAN NA

Usa ka dakung parada ang gipahigayon Biyernes sa hapon, May 12 libot sa mga nanag-unang kadalanan dinhi sa dakbayan nga nagtimaan nga ang tinuig nga Pagsalabuk Festival sa Dipolog gibuksan na ug kining pagsaulog sugod ning bulan sa Mayo ug molungtad ngadto sa Hulyo.

Duyog usab niini mao ang pagbukas sa Agro-Industrial, Trade and Food Fair nga magapadayon sugod karong bulana hangtud sa Hulyo diha sa Boulevard sa dakbayan. Ug sa matag gabii adunay mga pasundayag nga ubos sa pag-sponsor sa lain-laing mga buhatan, ahensiya, kahugpongan ug pundok sibiko.

Karong bulan sa Mayo nga mao ang pagbukas ning Pagsalabuk Festival, mao usab ang kahulogan sa pagsaulog sa tinuig nga Pista sa Patron sa dakbayan nga si Señor San Vicente karong petsa 27, usa ka Sabado. Gawas sa boulevard, ang ubang mga kalihokan adto usab ipahigayon sa Plaza Magsaysay.

Tungod niini, nagadapit ang kagamhanang lokal sa dakbayan ubos sa pagpangulo ni City Mayor Roberto Y. Uy sa tanang mga katawhang Dipolognon ug mga dumuduong sa pagsaksi sa mga kalihokan ug pasundayag matag adlaw ug gabii. Nasayran gikan sa lokal nga buhatan sa torismo pinaagi ni OIC City Tourism Officer Cecile Bilog, nga gipaningkamotan gayud sa mga organizers nga ang mga kalihokan mahimong mas mabolokon ug masadya aron ang pagpahigayon sa Pagsalabuk Festival karong tuiga mahalandumon. Gilangkoban kini sa daghanang mga kalingawan ug pasundayag paglingaw sa atong mga katawhan ug sa mga bisita kinsa motuyo gayud pag-anhi sa dakbayan.

Ang Hulyo 1 mao ang Adlaw sa Dipolog nga karon ika-93 na ka tuig nga kasumaran sa dakbayan. Sumala pa sa mga organizers ning maong kalihokan, kining pagpahigayon sa Pagsalabuk Festival sa dakbayan maoy magasilbing legacy o kabiling kalihokan aron mapatunhay sa kanunay ang kulturanhong hiyas nga atong nasunod gikan sa atong mga katigulangan nga gilangkoban sa tulo ka mga kaliwatan: ang Subano, Muslim ug Lumad nga maoy unang mga nanimuyo dinhi sa dakbayan sa milabayng mga katuigan.

Kining kulturanhong pagpatunhay mao usab ang paagi sa padayong pagbukas sa atong dakbayan ngadto sa natad sa torismo aron kini dugang mapalambo. (Dipolog Chronicle, Vol.V No.46)

*

Agri-fair sa Hudyaka Festival angay hugopan

Angayan nga hugopan sa mga dumuduong ug mga katawhan ning lalawigan ang umaabot nga selebrasyon sa ika-54 nga kasumaran sa pagsaulog sa Zamboanga del Norte isip probinsiya tungod sa daghanan nga mga kalihokan sa Hudyaka Festival 2006 diin nanag-una niini ang agri-tourism fair n ga magsugod sa Mayo 30 – Hunyo 10, nga ipahigayon sa Zamboanga del Norte National High School (Main Campus) grounds.

Nagalangbuk niini ang mga nanag-una nga produkto sa duha ka siyudad ug 25 ka lungsod ning lalawigan ug ingon man ang talagsaon nga mga baligya sa mga lalawigan sulod sa Zamboanga Peninsula kon rehiyon 9 nga mosalmot usab niini.

Ang mga mamalitay sulod sa agri-fair mamahimo usab nga mosaksi sa ipahigayon nga Cooking Contest alang sa Banana Kakanin, Squash Leche Flan, Munggo Kakanin, Mango Desserts, native Chicken Dish, Fresh Milk Desserts, Kinason Dish ug Vegetable Dish nga pagasalmotan sa mga mahiligon sa pagluto nga mga sakop sa banay sa mga mag-uuma ning lalawigan.

Sa susamang higayon, makakat-on usab ang mga katawhan sa nagkadaiyang mga teknolohiya may kalabot na sa pagpalambo sa pagpanguma pinaagi sa mga hanas nga mga personahe sa Department of Agriculture-RFU IX lakip na ang mga lumilihok sa non-governmental organizations kon NGO’s ug uban pa.

Ipaambit ang lain-laing teknolohiya sama sa Rubber Propagation & Budwood Garden Management nga pagahisgutan sa Kasanyaang Foundation Incorporated (KFI), Rubber Production Crop Care & Management pinaagi ni Fidel Galeon, Sibuyas Bombay Production sa East-West Seed Company ug Flower Production, Propagation & Flower Arrangement ni Anita Gallebo sa DA 9.

Samtang ang Forage & Pasture pagahisgutan ni Dr. Ken Yee, Off-Season Vegetable Production ni George Vallente, Off-Season Mango Production sa Syngenta, Integrated Pest Management on Rice & Corn Production ni Junas Araya sa DA 9.

Atol sa maong okasyon, ipahigayon usab ang “Klinika sa OPA” nga nagtinguha sa paghatag sa dugang pag-laagad sa mga katawhan ning lalawigan pinaagi sa pagpanghatag sa mga nagkadaiyang vegetable seeds, hand-outs ug uban pang agri-materials alang sa 350 ka mga katawhan nga moduaw sa booth sa Office of the Provincial Agriculturist (OPA).

Alang sa mga mahiligon sa mga tanaman ug mga bulak, ipahigayon ang “Garden Show” diin seguradong makadawat sa mga ganting salapi ang mamahimong mananaug sa ornamental booth and product display contest nga pagasalmotan sa mga ornamental growers dinhi sa lalawigan.

Gipasabot ni Provincial Agriculturist-Atty. Bernardo P. Concha nga ang agri-tourism fair karon sa Hudyaka Festival 2006 gipangandaman gayud sa iyang buhatan dinuyogan sa mga city-municipal agriculturists ning lalawigan ilawom sa kamanduan sa mga mayors niini ug labaw sa tanan pinaagi sa paningkamot ni Governor Rolando E. Yebes alang sa kalamboan sa mga katawhan sa tibuok lalawigan sa Zamboanga del Norte. (PAO, Dipolog Chronicle, Vol.V No.46)

*

Airsoft War Games, Poker Challenge ug Sky Diving masaksihan sa Hudyaka festival 2006

Laing tulo ka mga dula ang gimugna sa Tourism Council ug Hudyaka Committee nga makahatag ug kalingawan ingon man maka-aghat usab sa mga taga-laing probinsya ug dakbayan nga mobisita o mosalmot sa mga kalihukan sa umalabot Hudyaka Zanorte Festival 2006.          

Gibutyag ni Atty. Michael Alan Ranillo, Regional Tourism Chairman nga kini mao ang Airsoft War Games, Poker Challenge ug ang gikahinamang Sky Diving nga makapatikbi sa atay sa mga tumatan-away.

Nasayran nga ang Airsoft War Games mao ang klase sa dula nga giyera sa pillet gun ug pagasalmutan sa nagkadaiyang team nga nagagikan sa mga dakbayan sa Dumaguete, Cebu, Cagayan, Iligan, Zamboanga, Dipolog, Dapitan ug pipila ka mga kalungsuran sakop ning lalawigan.

Kini ipaagi sa 10-man team ug adunay mahitabong hostage saving techniques nga ipahigayon didto Zamboanga del Norte Sports Complex. Lain usab nga pinakabag-ong dula nga gisagop sa komitiba mao ang Poker Challenge nga gipasi-ugdahan nila Bokal Joseph Brendo Ajero ug Bokal Norbiderri Edding diin kini naila sa nasud sa America.

Ang si kinsa nga bu-ot mosalmot sa Poker Challenge adunay balayronon nga 2,500 pesos nga registration fee ug bukas alang sa tanan nga gustong mosalmot. Makita usab sa mga katawhan ang Sky Diving sa pagka-Hunyo 6 diin kini pagalangkuban sa mga hanas nga sky divers ning probinsya pinangulohan ni FO2 Jonathan Goite.

Dugang pa ni Atty. Ranillo nga magpakita sa nagkalain-laing exhibition ang mga unom ka mga grupo sa sky divers samtang anaa kini sa kawanangan. Samaong kalambuan, gi-aghat ang tanang katawhan sulod ning probinsya sa ZaNorte ingon man mga dumuduong nga saksihan ang mga kalihukan nga gihan-ay sa Tourism Council ug Hudyaka Committee. (Mindanao Star, Vol.II No.15)

*

"Malipayon unya ang masinati sa pag-abot sa mga dumuduong ug turista dinhi sa lalawigan tungod kay pagatagboon kini sa mga maanindot nga huni ug tukar sa banda, gitara ug rondalla panahon nga sila modunggo diha sa pantalan sa Dapitan ug mo-landing diha sa Dipolog Airport."

Mao kini ang gipahayag ni Regional Tourism Council chairman, Atty. Michael Alan Ranillo atol sa gihimong Regional tourism Council meeting niadtong Lunes.

Ang maong programa ang nahilakip kini sa pagahimoong preparasyon sa kasaulogan sa Hudyaka Zanorte '06 ug Wow Regional Showcase nga dinhi ipahigayon sa dakbayan sa Dipolog. Tuyo usab niini mao ang pagdani sa mga turista ug dumuduong ning lalawigan nga mobalik pagbisita dinhi tungod sa mainitong pagdawat kanila.

Kahibaloan nga ang maong mainitong pagdawat sa mga bisita usa ka tatak pinoy ug nahimo na kini nga tradisyun sa tagsa-tagsa ka Pilipino. Gidugang pagbutyag ni Atty. Ranillo nga sugdan na ang paghimo sa maong pangturismong konsepto karong sunod semana.

Samtang sa laing kalambuan gipahayag ni Provincial Tourism Officer-designate Atty. Ivan Patrick A. Ang nga anaa na sa sila karon sa 80 porsyentong pagpangandam sa himoon unyang Hudyaka Zanorte Festival ug WoW Zampen Regional Showcase.

Dugang pa ni Ang nga subsob karon ang gihimo nilang pagpang-apod apod sa mga leaflets ug flyers ug usab ang pagpanapot ug posters sa nagkalain laing probinsya sulod sa nasud. Kahibaloan nga ang information caravan team ang molokop kini paglibot dinhi sulod sa nasud aron hingpit nga ma-promote ang pagpahigayon sa kasaulogan sa Hudyaka Zanorte. (The New Nandau, Vol. XV No. 46)

*

1st district nag-ulan ug mga proyekto gikan sa probinsya

Nagsunod-sunod karon ang paghatag ni Governor Lando Yebes sa mga nagkada-iyang proyekto didto sa unang distrito ning lalawigan sa Zanorte.

Kaniadtong huwebes unang gisubhan ang paghatag sa proyektong dalan didto sa lungsod sa Sibutad nga mikantidad ug 4.9 milyones ka pesos. Kini gisundan sa upat ka mga nagkalainlaing proyekto sa lungsod sa Polanco sulod sa upat ka mga barangay nga gilangkuban sa Barangay New Libangon nga nakdawat ug usa ka daycare center pre-fabricated building, Barangay Guinles nakadawat  ug usa ka multi-purpose building, Barangay Lingasad ang Barangay Hall pre-fabricated building ug concrete shoulder sa Balintawak St. Barangay Poblacion sa lungsod sa Polanco.

Laing tulo ka mga proyekto ang gihatag sa kagamhanang probinsiyal didto sa lungsod sa La Libertad nga naglangkob sa pagkongkreto sa barangay road sa Barangay Santa Cruz, pagtugyan sa bag-ong barangay hall sa Barangay Santa Catalina ug ang pagsubo sa laing barangay hall sa Barangay La Victoria.

Ang maong mga proyekto tipik sa daghanang pang mga mehoras nga nahatag sa kagamhanang probinsiyal. Sa ngalan ni Governor Yebes, si Roney Pacilan, Provincial Information Officer designate nagkanayon nga ang mga proyektong gihatag karon ni Gob. Yebes nagsubay sa prayoridad sa gobernador nga mahatag ang unang gikinahanglang proyekto ngadto sa mga katawhan.Matud pa niya nga ang maong mga proyekto mahatag gayud ngadto sa tanang mga barangay nga nahikawan sa mga grasya kani-adto  sa mga nangaging administrasyon.

Diha sa pagsubo sa maong mga proyekto mipadayag sa ilang dakung pasalamat ang mga opisyales sa matag barangay sa ngalan sa mga katwhan nga ilang girepresentahan. Sa sayo pa gipahibalo na daan ni Gob. Yebes nga ang kinatibuk-ang 695 ka mga barangay sa Zanorte mahatagan ug proyekto. (The New Nandau, Vol. XV No. 46)

6 mag-aawit magtigi sa Grand Finals sa ZNUC Search For A Singing Star season 2

Unom ka mga mang-aawit ang magpakita sa ilang mga maanindot ug mabugnaw nga tingog atubangan sa katawhang publiko alang na sa Search For A Singing Star Season 2 karong Hunyo 4, 2006 didto sa Zamboanga del Norte Sports Complex.

Kining maong panag-tigi ang gipasiugdahan sa Zamboanga del Norte United Correspondents ubos sa pagpangulo ni Mr. Leo H. Cimafranca. Ang unom mao sila Honey Ramos, Laarni Suan, Junrey Saile, Julie Bicoy, Jenny Bantilan ug Cherry Mae Barrogo nga nagagikan sa mga nagkadaiyang lungsod dinhi sulod sa lalawigan.

Nagkanayon pa si Mr. Leo H. Cimafranca nga nga ang ZaNorte bulahan tungod sa pagbaton ug mga maayong mang-aawit ug kining grupo sa media ang nakamatikod sa mga amateur singers aron mahatagan ug higayon nga mapalambo pa ang ilang talento pinaagi sa pagpahigayon ning susamang indigay.

Dugang pa nga gisum-balik ang maong Search For A Singing A Star nga gisugdan kaniadto ni Konsehal Nick Carbonel ug gipaningkamutan karon sa iyang panahon sa tinguha nga matabangan ang mga adunay talento sa pag-awit dinhi sa probinsya.

Namahayag pa si Cima-franca nga karon sa grand finals sa Hunyo 4 mokabat sa 10 mil ka pesos ang naghulat alang sa unang dapit, siete mil pesos alang sa ikadu-hang dapit ug 5 mil ka pesos alang sa ikatulong dapit. (The New Nandau, Vol. XV No. 46)

*

Kahimtang sa mga tambalanan sa probinsyal nga nagkuwang ug doctor sabton –Gov. Yebes

Tumang pagsabot ang gipangayo karon ni Governor Rolando Yebes ngadto sa mga katawhan ning atong lalawigan sa mga doctors nga anaa karon na-assign sa mga tambalanan sa probinsiya. Gipahayag ni Governor Yebes nga sabton ang kahimtang sa mga doctors sa maong mga tambalanan tungod kay dili sila sama sa usa ka robot. Sa kahimtang sa probinsiyal hospital sa pagkakaron adunay pito na lang ka mga doctor ang nahibilin sa maong tambalanan ug kini ang 24 oras nga nagpuli-puli ug trabaho.

Gihatagan ug gibug-aton sa gobernador nga kung dili mahatagan sa sento porsiento nga serbisyo nga maoy gipangayo sa pasyente nga dili ikahatag gilayon tungod sa kawad-on sa mga doctors sa atong lalawigan kini ang angayan nga sabton.

Gihisama ni Governor Yebes ang iyang kahimtang diha sa mga doctor nga bisan kapoy na kaayo ang lawas lihok lang gihapon aron nga matabangan ug maserbisyohan niadtong nagkinahanglan.

Apan gipasalig sa gobernador nga sa panahon unya nga mahuman ang bag-ong hospital sa probinsiya kini ang butangan ug daghang mga doctor ug tambal aron makatabang sa mga katawhan sa lalawigan.

Sa pagkakaron mihimo na ug lakang ang kagamhanang probinsiyal aron masolusyonan ang maong problema pinaagi sa pagpa-usbaw sa suholan sa mga doctor.

Angayang masayran nga sa tibuok Pilipinas nakasinati ug pagkulang sa mga doctor tungod kay kini ang atua na nanglangyaw sa laing nasud. (Mindanao Star, Vol.II No.15)

*

 Pabonggahay sa garden show sa Hudyaka Festival

Hayan nga malingaw ug madani gayud sa pagpamalit ang mga katawhan nga motan-aw sa ipahigayon nga Garden Show sulod sa Hudyaka Festival area sa Zamboanga del Norte National High School (Main Campus) Grounds ning dakbayan sa Dipolog sugod Mayo 30 hangtud Hunyo 8.

Kini gihimo usab nga tipik sa mga dagkung kalihokan sa Hudyaka Festival 2006 nga gituyo sa paghan-ay sa Office of the Provincial Agriculturist pinaagi ni Atty. Bernardo P. Concha ilawom sa kamanduan ni Governor Rolando E. Yebes sa tinguha nga matabangan usab nga mapalambo ang ornamental ug flower industry dinhi sa tibuok lalawigan.

Sa pagkakaron, naghinam-hinam na ang mga mahilihon sa mga tanaman ug bulak nga molantaw sa ipahigayon nga Garden Show sanglit masaksihan na usab ang mga ipasundayag nga mga matahum ug maanindot nga mga tanaman ug mga bulak nga seguradong makapadugang sa pagpapaanyag sa mga buhatan, panimalay, simbahan, tindahan ug uban pang dapit diin kini idayan-dayan.

Alang sa mananaug sa Best in Ornamental Booth and Product Display Contest kini makadawat sa ganting salapi nga Kinse Mil Pesos (Php 15,000) isip first prize, Diyes Mil Pesos (Php 10,000) alang sa ikaduhang ganti ug Singko Mil Pesos (Php 5,000) alang sa ikatulong ganti ug ingon man trophy alang sa tulo ka mananaug.

Gipahibalo sa namunoan niini nga indigay nga adunay pagahimoon nga judging of booths kada adlaw pagsugod sa kalihokan pinaagi sa mga pinili nga hurado alang niini kinsa dili una ikabutyag hangtud dili mahuman ang maong kalihokan. Samtang ang criteria for judging mao ang mosunod: Booth Presentation and Artwork -30%; Signage Presentation-20%; Variety & Volume of Products Exhibited Daily-20%; Physical Arrangement of Product Displayed-20% ug Cleanliness of Surroundings-10% nga molangkub sa 100% total points.

Ang mga ornamental growers nga mosalmot sa Garden Show Contest atol sa Hudyaka Festival 2006 nagalangkub sa mosunod: Juliet Carmen sa Jardin del Carmen, Ronnie Mirasol sa Aning’s Botanical Garden, Anecita Benitez sa Green Earth, Elba Villarin sa Elba’s Garden ug Adelina Tindero sa Adele’s Garden.

Mosalmot usab ang GCP Garden ni Belinda Bangot, Jar’s Garden ni Rosemarie Salvacion, Vidal’s Garden ni Erlinda Vidal ug Dole’s Garden ni Letecia Recamara kinsa pulos mga sakop sa Za Norte Gardener’s Association. (PAO, Dipolog Chronicle, Vol.V No.46)

*

 Hepe sa DSF miretiro, dunay bag-ong gitudlo

Gipahigayon ang “Salamat-Paalam” ug “Formal Turn-Over Ceremonies” o pagbansili tali sa bag-o ug daang mga administrator sa Dipolog School of Fisheries ning dakbayan, gipahigayon sa Biyernes sa hapon, Mayo 10.

Ang seremonya gitambongan sa pipila ka mga dagkong personalidad gikan sa nagkalain-laing ahensiya sa kagamhanan ug kahugpungan nga gilangkoban nila ni TESDA Provincial Director Nilda C. Espiritusanto, Gov. Rolando E. Yebes, Dipolog City Mayor Roberto Y. Uy, Olingan Barangay Captain Juanito Cabale, PTESDC Chairperson Evelyn T. Uy, TESDA Regional Director Roberto Braga ug TESDA Executive Director Ma. Susan Dela Rama.

Ang outgoing nga DSF Administrator mao si Dr. Francisco de la Peña samtang ang iyang puli nga bag-ong DSF Administrator mao si Quirino Tamayo. Ang duha mihatag sa ilang mga pakigpulong atol sa maong programa.

Nasayran nga kining maong programa-panagbansili sa pagka-administrator sa DSF gipahigayon aron sa pag-ila sa mga kaayohan nga nahimo ni Dr. Dela Peòa sa DSF panahon sa iyang paglingkod isip administrador niini ug sa pagpanamilit sa tanang mga personahe sa naasoy’ng tulunghaan, kinsa nasayran nga moretiro na gikan sa serbisyo.

Pormal usab nga mo-turn over ang yawe sa kaakohan ngadto kang Tamayo isip bag-ong OIC administrator sa naasoyng tulunghaan. Nasayran nga si outgoing DSF Administrator Dr. Francisco Dela Peòa nag-alagad sulod sa kapin sa duha ka tuig gikan sa DepEd kaniadto, una kini nahimong school admionstrator sa Dipolog School of Fisheries ning dakbayan. (Dipolog Chronicle, Vol.V No.46)

*

Mokabat sa 200 ka mga membro sa PNP ang ipahimutang sa nagkadaiyang dapit dinhi sa dakbayan sa Dipolog aron maoy mopahiluna sa kahapsay, kahusay ug kalinaw atol sa umalabot nga mga dagkong kalihukan. Kini ang gihimo nga pagpangandam sa PNP Provincial Command dinhi sa Zamboanga del Norte mahitungod sa seguridad sa mga katawhan sa HUDYAKA Festival.

Gipahayag ni P/SSPT Mario Fermindoza nga nagpatawag na siya ug coordinating conference alang na sa pagpangandam diha na sa paghatag ug seguridad atul sa maong dakong kalihukan sa Zanorte.

Gibutyag sa Police Provincial Director nga gawas sa usa ka gatos kapin ka mga polis gikan sa dakbayan sa Dipolog adunay 70 ka mga polis usab gikan sa Provincial Command, samtang laing 30 ka mga polis gikan sa Regional Mobile Group nga nagabasi sa dakbayan sa Zamboanga ang maoy mo-secure diha na sa area nga anha ipahigayon ang nakahan-ay nga mga kalihukan sa HUDYAKA festival.

Gipasalig ni Fermindoza ang paghatag sa hugot nga seguridad sa mga katawhan atul sa maong dakong kali-hukan sa atong lalawigan. (The New Nandau, Vol. XV No. 46)

Gatecrasher
 By: Jun S. Cariño
Pagsalabuk Na!

Sugod karong semanaha, nakita sa mga katawhan ang pagsugod sa tinuig nga pagtimaan sa Pagsalabuk, usa ka festival nga matawag nga iyaha lamang sa mga Dipolognon o taga Dipolog. Gawas nga matagaan ug bili o importansya ang mga lumad nga pagtuo o batasan, kun sa Iningles pa, “cultural practices,” nahimo na ang Pagsalabuk nga usa ka tinuig nga dumdumon sa mga katawhan isip maoy nag-unang mga kalihukan sa dili pa moabot ang kapistahan sa Mayo.

Dako ang mga kaayohan nga nahatag niini sa dakbayan. Nadugangan ang kita sa mga gagmay nga mga negosyante ug natagaan usab ug  bili ang mga lumad nga mga pagtuo sa pagpasalamat sa mga grasya nga nadawat sa tibuok tuig  sa mga katawhan.Nahatagan usab ug higayon ang mga lumad sa pagpakita sa ilang gilas sa natad sa pagsayaw ginamit ang lumad nga mga tugtog.

Sulod sa walo ka tuig nga gisaulog ang pagsalabuk, hinay-hinay nga nahigmata ang mga katawhan ug sila mapagarbohong miangkon nga dako ang ilang kahimuot nga aduna kitay matawag nga kaugalingong festival. Na hala, mosalmot na kita sa maong mga kalihukan. Bisan kun kita dili moapil sa pagpasundayag sa matag gabii nga tanan, kita mosalmot na lamang isip mga tumatan-away. Dili baya magmalampuson ang mga pasundayag kun walay tumatan-away ug mamakpakay.

Sigun sa atong nadunggan sa kahanginan, kining tanang mga kalihukan diha ipahigayon sa Dipolog Boulevard, walay bayad, libre sa tanan. Busa, kun kamo walay lingaw sa gabii, magkita na lang kita didto sa Boulevard aron sa paglingaw-lingaw, gawas nga mabugnaw ang hangin gikan sa kadagatan.

— oo000oo —

Subay niining mga kalihukan sa Pagsalabuk, angay usab nga ang matag usa ka Dipolognon ang magbatun sa hustong pamaagi aron nga siya makatabang sa pagpalambo sa atong dakbayan bisan sa mga gagmay nga paagi. Una, angay nga matag usa dili maghugaw-hugaw sa mga kadalanan kay gipatuman pa gihapon ang ordinance 123. Angay usab nga magbantay nga walay mga dautang tawo nga makasulod sa ilang mga panimalay pinaagi sa pagbatun sa hustong pag-amping. Sa laktud nga pagkasulti, bisan pa man kun kita malingaw sa mga pasundayag, dili hikalimtan sa pagseguro nga sirado ang mga pultahaan ug bintana kun walay tawong mabilin sa panimalay. Ug labaw sa tanan, aron malikayan ang sunog, angay nga palungon ang tanang mga kabtangan nga naggamit sa koryente. Walay kumo sa pag-amping. Dili pasabut nga kita malingaw sa pagtan-aw sa Pagsalabuk, kita magtamhang na lamang, di ba pre?

— oo000oo —

Ato usab nga awhagon ang mga sakop sa kapolisan nga mas mag-abtik sa panahon sa kapistahan ug sa pagsaulog sa Pagsalabuk. Angay natong hinumduman nga kun asa ang mabagang duot sa mga katawhan, didto usab moanha ang mga tawong adunay mga dautang laraw sa ilang isig katawo. Dili nato tagaan sa higayon nga sila molampos sa ilang mga dautang tinguha.

Ug tungod kay gamay ra man ang mga kapolisan, kinahanglan nga matag usa kanato ang magmatngon nga dili mokumpiyansa. Lisud na nga magbasol sa kaulahian.Magbantay kitang tanan. (Dipolog Chronicle, Vol.V No.46)

Credits: Dipolog Chronicle is published every Saturday and its Editorial Office is located at 059 Lacaya St., Dipolog and can be reached through the following Tel. No.: 212-2255

*

  Php 1.5M balor nga proyekto, gibubo sa La Libertad

Nakomparar sa tulo ka mga kapitanes sa lungsod sa La Libertad ning lalawigan ang gipakitang mga kalampusan ni Governor Rolando Yebes sa iyang pamunuan karon sa probinsya atol sa gipahigayong inagurasyon sa mga proyekto niadtong Mayo 9, 2006 sa mga barangay nga sakop sa maong lungsod nga mokapin sa 1.5 milyones ka pesos ang kinatibuk-ang kantidad nga napahat sa kagamhanang probinsyal inabagan usab kini sa Sangguniang Panlalawigan ug Congresswoman Cecilia Jalosjos Carreon sa unang distrito ning lalawigan.Si Barangay Captain Rene Guiritan sa La Victoria ang namahayag nga sulod sa 15 ka tuig niya nga opisyal wala gayod sila katilaw ug proyekto bisan pa sa kanhi namunuan sa probinsya. Dako nilang pagpasalamat sa usa ka pre-fabricated multi-purpose building nga mingkatidad ug 505 mil ka pesos.

Si Mayor Manuel Solit sa maong lungsod ang nakakomparar usab sa kalampusan tali na sa pamunuan sa kanhi gobernador ug ni Gov. Yebes sulod sa usa ka tuig ug walo ka bulan niini nga paglingkod isip amahan sa lalawigan

Si Barangay Captain Eric Jabon sa Sta. Catalina ang namahayag ug nagpasalamaton usab sa gobernador sa proyekto nga gitunol ngadto sa ilang barangay nga karon pa lamang sila nakadawat ug dinagkong mehoras gikan sa probinsya nga usa ka pre-fab nga barangay hall nga mokostar  ug 505 mil ka pesos.

Sa barangay Sta. Cruz, tunga usab ka milyon nga concreting of barangay road ang nasubhan sa mga katawhan sa maong barangay. Si Kapitan Elpidio Japos Sr.. ang wala gayod magdahom sa maong proyekto tungod kay wala sila sukad makadawat ug kaayuhan sa kanhi gobernador.

Bisan pa man sa kaapiki sa panahon ni Gov. Yebes tungod sa preparasyon sa umaabot Hudyaka Festival, walay hunong gihapon ang iyang pagbisita sa mga kabaranggayan ning lalawigan aron mahatod ang mga proyekto ngadto sa tanang katawhan. (Mindanao Star, Vol.II No.15)

*

Pulso Sa Katilingban
Cicer M. Binghay
“Of all the queer birds”

“Of all the queer birds” dinhi pa gyod sa Mindanao gitumbok sa Social Weather Station survey and 21.0% sa 2.8 milyones katawhan nga gihungal sa kagutom sa tibook Pilipinas. Nia pa dinhi sa atong Mindanao ang “land of promise” haw-ang ang kaumahan ug abunda ang kadagatan sa isda. Gani nagpabilin nia sa atong isal ang mayoriya nga mga produkto sa pagkaon natampo sa tibook nasod.

Primero bes, dili ikatingala kay ang survey gihimo niining unang quarter sa 2006 diin ang tibook nasod naigo sa nag asod-asod ulan o “niña” ang nakadestroso sa kaumahan dayon gisundan sa tumang kainit nga nakapangliki sa pilapilan-kaumahan.  Ikatulo ang nagpadayon mga polisya sa atong kagamhanan nga nagpabilin nga pulos lamang tambok sa daghang gisaad ayuda sa agrikultura nga wala matuman sa atong namunoan.  Mga nagpatong-aptong saad ayuda alang sa Departamento sa Agrikultura sa atong politiko panahon sa pinilian nga waya yang giimplimentar, nga sama sa nagpatong-patong mga dag-om sa kalangitan nga wala ikabundak . . . wala ipa-ulan.

-oo0oo-

Dakog ipekto ang pagbisita ni GMA sa Saudi Arabia. Mga OFWs mga kaigsoonan nato nga natanggong sa kalabuso gumikan sa nagkadaiya nga mga salaod nga mikabat tanan sa 138 ka pilippinhon gipasaylo sa Hari sa Saudi ug gibuhian. Klaro dinhi nga atong embahador o mga tinugyanan sa philippine Embassy sa Saudi Arabia mga dagkong kiko-kiko lang diay. Wala gani makabalita dinhi sa atong nasod sukad niadtong mga DH sa Middle East nga natanggong gumikan sa mga “minor offenses.”  Na klaro pa dinhi nga tinuod ang giingon sa mga pilipina nga mingdangop sa atong embassy pakitabanga. . . pahimusla pa, unayon, mohangyo tagsa ka sungsongan ayha migimok, unya wala pay nahimo. Lagmit dunay ibalhin-balhin sa atong mga tinugyanan sa Middle East inig paoli ni GMA gikan sa biyahi sa Middle East.

-oo0oo-

Nahisgotan ni GMA nga pug-ngan sa tulonghaan pribado ug publiko pagpataas sa “tuition fee” karong tingtungha.  Kini gikalipay sa mga ginikanan ug mga studyanti.  Ang gikabalak-an dinhi kon ipakatawo pag usab ang bali-balit-ad.  Nga ang tuition fee permi ang tako, apan diha sa miscellaneous fee ang magbutirik pagpatubo sa mga balayronon.

Gani namatikdan nga mga nagkalain-laing school supplies nga nag-una pagpakita sa katindhanan nagtangag nag dugang prisyo. Plitihan sa mga sakyanan nagpunting laing dugang plitihan gumikan sa nagpadayon pagsulbong sa prisyo sa gasolina, krudo, spare parts ug mga gikinahanglang sitsiritas.  Dili malalis nga ang maong kahimtang dinhi mao usab ang mabati sa katawhan sa day-ong kanasuran.

Dinhi sa atong Zamboanga del Norte, ang nakasagang nganong walay gidungog nahadagma sa kaluya sa kagutom, dayon namatay kay walay gikaon, kay nagpadayon ang pagtungha sa isda nga tuloy, nga maparisan sa nagkadaiya nga mga lagutmon nga madaw-daw sa atong palibot.  Maanugon pa gani ang mga mananagat nga gumikan sa dili madahan sa kadaghan sa isda nga tuloy ilang makuha, mapugos sila pag yabo niini balik sa dagat kay maatol makuha magabii nga wala nay kasudlan, walay mamalit ug walay asin ug “ice” pag preserbar miyentras.

Mao baya nga naay Pagsalabuk Street Dancing ipahigayon karong Mayo 26, 2006 sa dakbayan sa Dipolog nga salmotan sa 10 ka mga barangay.  Dayon mahasunod dinhi ang Hudyaka Festival sa Zamboanga del Norte diin makita dinhi kanatong tanan ang mga mayoriyang produkto sa 25 ka mga kalungsoran ug duha ka dakbayan sa Dipolog ug Dapitan nga makabarog sa atong lalawigan nga ang kagutom kaha mabati gumikan sa dili kapug-ngan kausaban sa panahon ug pag apektar pagmahal sa lana, apan wala makahatag grabi kabalaka sa gipanghingalan sa pagkaon sa taga Zamboanga del Norte. Gani Zamboanga Sibugay kompirmado mosalmot pag display sa ilang Agri-Tourism booth mga lab-as produkto sa kadagatan, instant calamansi drink, danggit ug ubang giproseso ng mga ilang kaugalingong binuha ug produkto. (Press Freedom, Vol. XVIII No. 46)

Peddlers naghinamhinam na sa umaabot Hudyaka Festival

Daw sa naghinam-hinam na karon ang mga peddlers dinhi sa dakbayan sa Dipolog sa nagsingabot nga Hudyaka Festival nga magsugod karong Mayo 30 hangtud sa Hunyo 10.

Sa nasayran gikan sa License and Permit Division sa buhatan sa Mayor sa Dipolog sa kinatibuk-an adunay 20 ka mga peddlers and adunay permit gikan sa siyudad ug kini maoy usa mabulahan unya atul sa maong dakong kalihukan sa Zanorte.

Mahinumduman nga sa mi-aging tuig atul sa Hudyaka Festival daghang mga peddlers ang mipabati sa ilang dakong kalipay tungod kay dako kaayo ang ilang nahimong income matag gabii tungod sa gidaghanon sa mga tawo nga anaa misaksi sa mga kalihukan atul sa Hudyaka.

Gituhuan nga karong tuiga sa pagpahigayon sa Hudyaka Festival mapuno sa mga tawo ang sports complex nga anaa gipahimutang ang tanan nga mga kalihukan sa Hudyaka festival.

Sa karon padayon pa nga gitun-an sa buhatan sa Provincial Tourism kung hain ipahimutang ang mga peddlers diha na sa sports complex nga maoy site sa Hudyaka festival.

Usa sa plano niini nga ipahimutang kini nga dili makabalda sa agi-anan sa mga bisita nga sulod-gawas sa sports complex. (Mindanao Star, Vol.II No.15)

PAGHATAG UG PROYEKTO

Kung maghisgut ta ug proyekto kana usa ka nindot nga butang para kanako, nganu man? Kinsa ba gud ang dili malipay kung maghisgut kita ug mga proyekto nga gikan sa pangagamhanan ug ihatag sa mga katawhan? Ma-lokal man o Nasyunal nga pangagamhanan kung dunay proyekto kana mas labing maayo, pero kung wala maayo gihapon, nganu man? Kita man ang nagpili kanila nga maoy modumala sa renda sa atong pangagamhanan.

Apan karong panahuna mga sano ug sana, nakita nato ang daku kaayong kala-inan, kini, tungod sa mga daghanang mehoras ug mga maayong programa nga nahatag sa atong lokal nga pangagamhanan sa pagpangulo sa atong gobernador Lando Yebes.

Sayud kita nga linghod pa kaayo ang panahon sukad milingkod ang atong gobernador sa Zanorte, apan nasayud usab kita ug atong makita ang mga daghanang proyekto ug programa nga anaa na karon sa mga nagkadaiyang kabarangayan dinhi sa atong probinsiya.

Ning mga adlaw nga nilabay, niadtong Mayo 4 ning tuiga giturn-over ang aspaltadong dalan didto sa lungsod sa Sibutad nga nagkantidad ug 4.9 milyones ka pesos, kini gisundan sa upat ka mga proyekto didto sa lungsod sa Polanco diin niadtong Mayo 5, 2006 mao usab ang pagsubo niini partikular sa mga barangay New Libangon nga nakaangkon ug usa ka Day Care Center nga Pre-Fabricated Building, samtang sa barangay Guinles usa ka Multi-Purpose Building.

Didto sa barangay Lingasad sakop gihapon sa lungsod sa Polanco nakadawat usab sila ug usa ka barangay Hall nga usa ka Pre-Fabricated Building, samtang sa barangay Poblacion anaa usab ang concrete shoulder sa dalan Balintawak sa maong barangay.

Kini gisundan sa tulo ka mga proyekto didto sa lungsod sa La Libertad ni-adtong Mayo 9, 2006 diin unang gisubhan ang pagkongkreto sa barangay road didto sa barangay Santa Cruz, paghatag sa bag-ong Barangay Hall sa Barangay Santa Catalina ingon man ang pagsubo sa laing barangay Hall sa barangay La Victoria.

Kining maong mga proyekto mga sano ug sana tipik lamang sa daghanang mga proyekto sa kagamhanang probinsiyal nga nahatag na ngadto sa mga katawhan diha sa mga nagkada-iyang barangay sulod ning lalawigan sa Zanorte.

Kabalo na ta mga sano ug sana nga sa dihang bag-o pa lamang gayud milingkod si Gob Yebes mipahibalo na siya nga hatagan gayud ug proyekto ang kinatibuk-ang 695 ka mga barangay dinhi sa lalawigan.

Ang mga proyekto nga atong nakita karon nagpamatoud na kini sa mga pulong nga giluwatan sa atong Gobernador kani-adto, mao ni giingon mga sano ug sana nga “AKSYON AGAD, DILI KAY AKSYON TAGAD” hehehe! Ambot pod bitaw ngano nga daghan na man kaayo ug mga maayong agi ang atong Gobernador, kini nagpamatuod lamang gayud nga sinsiro ang atong Gobernador diha sa iyang pag-alagad di ba? Lisud man gud ning mosaad ta unya mapakyas, mura rapod na nga nanguyab ta dayun siging saad pero way agi sigurado gyud nga bokya pag-abot sa ending.

Hinoon depende pod na sa saad, kay kung mosaad ta nga imposibleng matuman, kana di na gyud mahitabo, sama anang saad nga kab-uton ang bulan ug ipa-ubos kana imposible na gyud nga mahitabo, apan kung mosaad kay moserbisyo ngadto sa mga katawhan, misaad nga mohatag ug mga maayong mehoras ug programa ngadto sa mga katawhan kana tinuod gyud ug kining maong saad mga sano ug sana gituman na sa atong Gobernador.

Makita man nato kung asa dapit kining mga proyekto ug mga programa sa atong pangagamhanan karon, mao gani nga mihatag kita ug sampol sa unang yugto ning atong tagik nga naghingalan gyud ta ug mga lungsod ug mga barangay. sa mga gustong masayud, bukas ang ang tanang hingtungdang buhatan sama sa Provincial Engineering, Provincial Budget, Provincial Accounting ug uban pang mga buhatan nga maoy gitahasan sa mga talaan alang sa mga prgrama ug mehoras nga gihatag sa atong lokal nga pangagamhanan.

Kining tanan maoy pagpaningkamot sa atong Gobernador inabagan sa tanang mga piniling opisyales sa atong probinsiya sa Zanorte. Sa kanunay mga sano ug sana atong ihangad sa KAHITAS-AN nga unta buligan pa kita sa atong mga plano ug tinguha aron sa umaabot kita ra usab ang mabulahan.

Bueno mga sano ug sana manikaysikay napod ta ani aron ugma damlag naa na sad tay makoot, lahi raman gyud nang naa tay koot-kouton ug hikap-hikapon diba? Hehehehehe!!!!!  Hangtud sa sunod tagik….. Baboooooo….. take care……….. (Mindanao Star, Vol.II No.15)

*

MORE NEWS NGA BINISAYA