May 10, 2008

 

MAYOR UY PABILING NANGHINGUSOG IBALIK SI MACLANG?

MAHULAGWAY nga bugtong si Police Chief Inspector Reynaldo Maclang ang mao ray gisaligan karon sa administrasyon ni Mayor Evelyn Uy nga makasulbad sa sunod-sunod nga tulis ug budol-budol dinhi sa dakbayan sa Dipolog tungod kay adunay problema karon sa relasyon ang kagamhanang lokal sa Dipolog ug ang kapolisan. Kaniadtong Mayo 7, 2008 sa gipahigayon nga Provincial Peace and Order Council Meeting, napasupot ang pangutana kabahin sa nanghitabong tulis ug budol-budol dinhi sa dakbayan sa Dipolog. 

Gihimong rason ni Mayor Evelyn Uy nga sa karon  nag-operate ang Dipolog PNP sa usa lamang ka Officer in Charge. Busa iyang gipangayo nga hatagan unta siya ug pabor isip maoy hepe ehekutibo diha na sa pagpili ug chief of police. Busa makalaom nga  adunay maayong relasyon ug kooperasyon ang kapolisan ug ang kagamhanang lokal alang sa kahusay ug kalinaw sa siyudad. Ang gipili nga hepe dili maoy gipili sa siyudad hinungdan nga adunay problema. Gipaabot ni Mayor Uy ang iyang hangyo ngadto sa chairman sa PPOC nga si Governor Rolando Yebes nga mo-alayon diha na sa pagpili ug ilang gustong mamahimong hepe sa kapolisan alang sa kahusay ug kalinaw sa Dipolog.

Sa administrasyon ni Mayor Evelyn Uy bugtong si Police Chief Inspector Reynaldo Maclang ang mao ray gisaligan karon nga makasulbad sa sunod-sunod nga tulis ug budol-budol dinhi sa dakbayan sa Dipolog.

Daw sa gusto gayud ni Mayor Uy nga makalingkod ug balik si PCI Maclang pagka hepe sa kapolisan dinhi sa dakbayan nga anaa kaniya ang pagsalig sa mayor pagsulbad sa mga nanghitabong krimen dinhi sa atong dapit. Angayang masayran nga taud-taud nang nagmulo ang Dipolog PNP sa walay klarong suporta nga gihatag ang siyudad diha kanila ilabina sa gasolina. Sa nasayran sa bulan sa Enero niining tuiga adunay 225 litros nga diesel ug 285 litros sa bulan sa Pebrero ang gihatag sa siyudad alang sa service vehicle sa kapolisan.

Apan sa kabahin ni Police Senior Superintendent Mario Yanga, Police Provincial Director sa Zanorte, iyang gipasabot nga depende sa usa ka LGU ang pagtabang sa kapolisan. Ang fuel allocation sa kagamhanang lokal sa Dipolog ngadto sa kapolisan sa pagkakaron ang kulang kini diha na sa ilang operasyon. Ang 225 litros matag bulan nga gasolina hutdon lamang kini sa usa ka semana. Ang Dipolog PNP adunay lima ka mga sakyanan nga maoy gamiton pagpatrolya.

Nakita ni PD Yanga nga nagsugod ang problema sa kapolisan sa Dipolog sa dihang napalagpot sa mga katawhan ang kontrobersiyal nga kanhi hepe nga si PCI Maclang. Giklaro sa police provincial director nga dili siya ang nag-relieved kang Maclang kung dili ang mas labaw pa nila nga buhatan sa PNP. Si Yanga ang aminado nga ang nahinagbo nga problema sa kapolisan sa Dipolog ang nakatampo sa kahuyang pagsulbad sa tulis ug budol-budol ilabi pa nga nagkulang ang gidaghanon sa mga miyembro sa Dipolog PNP. 

Gikompermar ni PD Yanga nga usa na ka sindikato ang nag-operate karon dinhi sa atong dapit. Ang grupo ang nag-import pa gikan sa lungsod sa Tudela, Misamis Occidental. Kini usa lamang ka local group. Sa panahon nga makabiktima dinhi sa dakbayan mosibat na kini paingon sa Misamis Occidental agi sa lungsod sa Polanco ug sa dakbayan sa Dapitan. (Southpoint, Vol.1No.19)

Credits: The Southpoint is the latest weekly news publication circulated in the province of Zamboanga del Norte, Zamboanga Sibugay and Misamis Occidental. It is registered under DTI Permit No. 00282924. The Southpoint can be reached through the following contact info: Sindangan, ZN; Landline: 212 – 4019; Mobile No.: +63 921 458 3830. Email: southpoint8@yahoo.com

*

 

Nag-solicit sa mga tindahan gamit ang RPN DXKD
ESTAKA GIPASAKA SA 8 SUSPETSADO

Kasong estafa maoy giatubang sa walo ka mga suspetsado nga nagsolicit sa mga establisehemento ug mga opisyal sa gobiyerno nga gadala sa RPN DYKC-Cebu ug DXKD-Dipolog sa dihang gireklamo kini sa mga katawhan nga sila nailad sa nagpaka-arong ingnong membro sa media.

Ang mga suspetsado didto gidampot sa mga membro sa kapolisan sa City Information Office sa City Hall ning dakbayan sa Dipolog sa dihang gipaadto ni Ms. Pinky Rabino, Assistant City Information Officer human pasaligi nga mohatag kini sa ilang gi-solicit. Matud ni Rabino, ang mga suspetsado nag-solicit sa ilang opesina pinaagi sa pagtawag sa telepono apan tungod kay dunay daghang nagreklamo iya kining gipaadto aron ipakuha ang kuwarta hinungdan nga nahitabo ang entrapment.

Ang mga suspetsado nga gipasakaan ug kaso giila nga sila si Leone Pilapil-Rondina ‘alias’ Leo, Fermin Cardeño Teofilo, Danilo Ypil-Mingo, Abner Aldion Ratillier, Joel Coronel-Pepito, Jun Lamberte-Velasco, ug sa duha ka mga babaye nga sila si Amelita Broniola-Quinzon ug Gemarie Soquite-Parinasan. Mosubra sa kurenta ka mga katawhan nga mga inilang molopyo ug mga magpapatigayon dinhi sa Dipolog maoy mireklamo sa kapolisan aron pasakaan ug sumbong pagpangilkil ang walo ka mga suspetsado nga nagpaka-aron ingnon nga mga sakop sa Radio Philipines Network kon RPN sa DYKC-Cebu.

Matud pa ni PSI Timothy Aniway, OIC-Chief of Police sa Dipolog PNP, kinsi ka mga kasong estafa maoy una nilang napasaka sa piskaliya sa dihang miduso sa ilang reklamo ang mga katawhan nga nabiktima sa maong mudos-operandi sa nagpatuong mga membro sa media nga mihimo ug illegal solicitation dinhi sa dakbayan sa Dipolog. Gibutyag ni Aniway nga iya nang na-contack ang management sa RPN-DYKC-Cebu sa Mandawe City ug kini nangolipas nga naghatag sila ug otoredad sa mga tawo aron mohimo ug solicitation alang sa ilang pagahimoong singing contest dinhi sa Dipolog atul sa pangilin sa dakbayan. Sumala pa sa hepe nga iyang giawhag ang management sa DYKC sa pagpasaka ug sumbong batok sa maong mga suspetsado tungod kay ang ilang gihimo maoy pagpaka-ulaw sa ilang inilang kompaniya sa radio.

Si Leo Cimafranca, Production Chief sa RPN-DXKD mihimakak nga duna silay kalabotan sa gihimong solicitations ilabi na nga ang iyang ngalan nadulahig sa mga suspetsado kay kon motawag kini sa telepono magamit kini sa ngalan nga Leo sa DXKD hinungdan nga dunay daghan ang mituo ug nailad. Apan ang mga suspetsado nga nahinabe ning pamantalaan kusganong mipanghimakak nga ang ilang gihimo usa ka pangilad kay lihitimo ang ilang programa nga pagahimoon dinhi sa Dipolog pinaagi sa pagamit sa kahimanan sa RPN-DXKD tungod kay nagbaton sila ug kontrata.

Mao kini ang gipresentar ni Mr. Vic “Palito” Pepito, Production Director sa iyang block time program sa RPN-DYKC-Cebu kinsa miabot dinhi sa Dipolog aron pag-responde sa iyang walo ka mga kauban nga gisikop sa kapolisan gumikan sa daghanang nagreklamo tungod sa ilang pagpang-solicit sa mga establishemento ug politiko gamit ang DYKC Cebu ug DXKD Dipolog nga magpahigayon sila ug singing contest nga ilang gitawag “Awit sa Kabataan”  live sa duha ka mga radio stations. Sa interview, si Mr. Vic Pepito mihimakak nga usa ka pagpangilad ang ilang gihimo gumikan kay duna silay contrata sa RPN DxKD dinhi sa dakbayan sa Dipolog pinitsahan ug Mayo 3 ug gipermahan ni Mr. Romeo D. Sangcap, Manager sa maong estasyon aron magpahigayon sila ug singing contest.

Gipasabot ni Mr. Pepito nga ang ilang programa Awit sa Kabataan pagasalmotan sa mga contestants nga nagrepresentar gikan sa nagkalainlaing siyudad nga gilangkoban dinhi sa Dipolog, Dumaguete, Ormoc City, Cebu City ug uban pang siyudad. Matud niya iya kining gihimo aron pag-diskobre sa mga kabataan nga adunay talagsaang talento sa pag-awit. Iyang gipaklaro nga ang ilang pagtaak dinhi sa Dipolog walay sagol pangilad kay adesir kini niya gihimo, iyang gipahimangnoan ang iyang mga sakop nga mokuha ug contrata sa RPN DXKD. Matud pa nga ang ilang singing contest anha pagahimoa sa tindahan sa Emcor Appliance Center sa may Rizal Avenue apan matud ni Pepito gihimakak kini sa DXKD hinungdan nga sila gireklamo ug gidakop sa kapolisan.

Si Mr. Romeo Sangcap, Station Manager sa RPN-DXKD Dipolog sa interview sa DXFL Headline Balita miangkon nga duna siyay gipermahan nga contrata tali sa mga sakop ni Pepito apan walay labot ang ilang estasyon sa maong programa. Iyang gihimakak nga iyang gi-deny sa estasyon nga dunay contrata si Pepito. “Wala namo kana gi-deny nga sila dunay contrata dinhi sa RPN-DXKD apan ulahe na kini nakakuha ug kontrata nga duna nay daghang nagreklamo. Matud ni Sangcap iya nang gipatawag sa iyang opesina ang grupo ni Pepito ug gipahimangnoan nga dili magpataka ug dasmag sa mga tawo sa Dipolog kay segurado gayud nga makasugamak sila ug problema. “Tan-awa, miresulta ra gyud ang akong gipahimangno nila.”

Gipaklaro ni Sangcap nga ang mga tawong gisikop sa kapolisan dili mga empleyado sa ilang kompaniya sa RPN kay kini usa lamang ka block timer program o nagbayad ug oras sa ilang programa sa radio sa DYKC Cebu. Sa dihang iya kining gisukit-sukit, ang mga suspetsado wala pa makaandam unsay component sa ilang programa ug wala usab kini magpahibawo daan sa publiko pinaagi sa announcement sa radio sa DXKD nga duna silay pagahimoon nga kalingawan dinhi sa Dipolog samtang nagsigi na kini ug solicit sa mga tawo. Gibutyag ni Sangcap nga ang mga suspetsado nagamit sa logo sa RPN nga unta dili man kini mga kawani sa ilang kompaniya ug wala usab nila kini gi-otorisar nga modala sa ngalan sa DXKD aron sila mag-solicit.

Ang walo ka mga suspetsado anaa karon kasamtangang gibalhog sa selda sa Dipolog PNP samtang gipasaka na ang kaso batok kanila. (The New Nandau, Vol. XVII No.44)

Credits: The New Nandau is a member of the Publishers Association of the Philippines (PAPI). Editorial office is located at 076 Quezon Avenue, Dipolog City with Tel. No. (065) 212-3794; Cell No. +639205201041. Email: freedom_nandau @yahoo.com

*

 

Domingo, Mayo 11
Makita sa TV kandidata sa Dipolog sa Miss Earth

Gipahibalo sa Buhatan sa Torismo sa Dipolog nga gumikan sa daghanang hangyo gikan sa mga  taga Dipolog nga mamonitor “live” ang selection night sa Miss Earth-Philippines karong umaabot Mayo 11, adlawng Dominggo, pasiugdahan sa maong buhatan ang pag-hook-up “live” via  cable network  ang nasangpit nga selection night.

Si Miss Marie Razel Eguia, usa ka Dipolognon, kinsa usa sa mga contestants sa Miss Earth-Philippines karong tuiga diin siya nakadaog sa Miss Philippines Earth Air 2008 ug mupadayon sa Miss Tourism Queen International 2009 sa China.

Sumala pa ni OIC City Tourism Officer Cecil R. Bilog, nga ilang pangunahan ang maong “live coverage” tungod kay ang usa sa mga contestants ning maong kompetisyon usa ka Dipolognon nga si Miss Razel Eguia, diin nakakuha sa partikular nga atensiyon sa mga manunulat sa nasudnong mantalaan ug mga cameramen sa telebisyon tungod sa iyang maanyag nga dagway ug siya lang ang contestant nga adunay pinakagamay nga sukod sa hawak.

Dugang pahibalo ni Bilog nga ang “live coverage” sa “selection night” sa Miss Earth-Philippines ipahigayon didto sa Dipolog Boulevard sa Mayo 11 sa alas-9:00 ang takna sa kagabhion. (cio-prr)  http://www.missphilippines-earth.com/?page_id=34 

*

 
Tungod sa epekto sa Bagyong ‘Butchoy’
NAGPUYO SA KABAYBAYONAN, KASUBAAN, KABUNGTORAN, MAGBANTAY BK KATALAGMAN

Giawhag ang tanang mga katawhan kinsa anaa nagpuyo haduol sa mga sapa, suba, kabungtoran ug sa mga baybayon nga magmabinantayon sa matag karon ug unya aron mabantayan nila ang pagdako sa tubig dulot sa bagyo nga si “Butchoy.”

Lakip usab sa giawhagan mao kadtong anaa nagpuyo duol sa mga kabungtoran sa pagbantay usab batok sa posibleng landslides bunga sa kalit ug kusog nga pag-ulan. Kining maong pahimangno giluwatan sa kagamhanang lokal ning dakbayan ubos sa pagdumala ni City Mayor Evelyn T. Uy, pinasikad usab sa usa ka kopya sa weather advisory gikan sa nasudnong buhatan sa National Disaster Coordinating Council(NDCC) alang sa usa ka halapad nga pagsangyaw niini ilabi na dinhi sa Mindanao diin kining maong bagyo nanukad.

Ang nasangpit nga weather advisory nagpahibalo nga kining maong bagyo gibana-bana nga magpabilin dinhi sa nasud sukad kagahapong adlawa, Mayo 8 (Huwebes) hangtud sa Mayo 10 (Sabado), nga hulga sa rehiyon VI, VII, VIII, IX, X, XI, XII, ARMM ug CARAGA region. Alayon ning maong weather advisory, gipahimangnoan ang tanang mga katawhan dinhi sa dakbayan ug sa tibuok lalawigan sa paghimo ug hugot nga pagmonitor sa ilang mga kasubaan ug kadagatan aron ilang mabantayan sa bisan unsang oras ang pagdako sa tubig dulot sa pag-ulan dala ning nahisgotang bagyo, aron sila makahimo sa temporaryong pag-evacuate ug makalikay gikan sa mga flashfloods ug landslides ug hingpit nga mapalipdan ang ilang mga kinabuhi ug kabtangan batok ning maong katalagman. (CIO-alb) (Dipolog Chronicle, Vol.VII No.46)

*

 

Lt. General Yano hatagan ug laing pasidungog

Lt. General Alexander Yano, ang kasamtangang commanding general sa Philipine Army ug umalabot nga AFP Chief of Staff kinsa gikatakda nga i-instalar karong Lunes ang hatagan ug laing pasidungog isip Most Outstanding Citizen sa Zamboanga del Norte atol sa 56th founding anniversary karong Hunyo.

Si Board Member Edgar Baguio maoy nangamahan sa resolusyon atol sa regular session sa Sanguniang Panlalawigan mipahayag nga si General Yano isip netibo ug lumad nga taga Zamboanga del Norte, nakahuman sa iyang elementarya sa lungsod sa Sindangan ug basic education dinhi sa Dipolog, nakaserbisyo sa Zamboanga del Norte isip usa ka military man, kini angayan hatagan ug pasidungog sa iyang nakab-ot nga kalamposan sa iyang profession.

Sa miaging tuig dos mil siyete, si General Yano gihatagan na ug pasidungog atol sa founding anniversary sa Zamboanga del Norte dihang siya gitudlo isip commanding general sa Philipine Army. Karon nga siya na ang mohulip sa pinakataas nga ang-ang sa posisyon sa militar isip Chief of Staff sa armadong kusog sa pilipinas kinsa opisyal nga i-instalar karong lunes, lain na usab nga pasidungog ang gikatakda nga ihatag kang General Yano gikan sa probinsya sa ZaNorte.

Ang maong resolusyon mao ang “Special Distinguised Plaque of Recognition” ngadto kang full pledge 4 Star General Alexander B. Yano subay sa iyang appointment sa pinakataas nga posisyon sa armed forces of the philipines isip Chief of Staff nga mo-asumer sa iyang posisyon karong Mayo 12, sunod semana. Laing resolusyon nga pasidungog para kang General. Yano mao ang pagdeklarar kaniya isip Most Outstanding Citizen sa Zamboanga del Norte sa tuig dos mil otso ug kini ihatag kaniya dungan ang selebrasyon sa pagkahimugso sa Zamboanga del Norte karong sunod bulan. (Press Freedom, Vol. XX No. 30)

 
 

Barangay Kipit sa Labason nagkinahanglan ug CAFGU

Nanawagan karon si mayor Wilfredo Balais sa lungsod sa Labason ning lalawigan sa Zanorte ngadto sa armadong kusog sa nasud nga nakabasi sa 101st Infantry Brigade sa del Pilar Piñan nga unta kabutangan ug CAFGU detatchment ang pinakahilit nga barangay sa ilang lungsod nga mao ang barangay Kipit. Ang maong hangyo panawagan sa mayor iyang gipasibaw atol sa gipahigayong Peace and Order Concil meeting sa Zanorte ni-adtong mi-aging adlaw sa Convention Center ning dakbayan sa Dipolog nga gitambungan sa mga opisyal sa tibook probinsiya pinangulohan ni Gov. Lando Yebes.

Matud pa sa mayor nga niining mga ulahing adlaw ilang namatikdan nga ang barangay Kipit maoy gihimong pugaran sa mga daotang pundok nga iyang gitumbok nga maoy responsabli sa nahitabong carnapping sa mga motorsiklo, tulis, kawat ug nahitabong patay dalang tulis sa nagsingabot nga pista sa lungsod sa Labason ni-adtong Abril 27 ning tuiga. Positibo usab nga gisanong ni Col. Romulo Bambao ang Commanding Officer sa 101st brigade kinsa mitambong usab sa maong POC meeting kinsa nagkanayon nga sa pagkakaron adunay 200 ka mga civillian ang gibansay alang sa pagka.CAFGU dinhi sa Zanorte ug kini i-apod apod sa mga lungsod nga adunay daghang prisinsiya sa mga dautang pundok.

Ang mga lungsod nga giila ni Col. Bambao nga ilang butangan ug dugang puwersa sa  CAFGU mao ang mga lungsod sa Mutia, Siayan, Godod, Leon Postigo, Salug ug ang bag-ong ipahimutang nga detatchment sa CAFGU sa lungsod sa Labason partikular sa barangay Kipit. Karong bag-o sigun sa report ni Mayor Jesus Lim sa lungsod sa Salug nga adunay nahitabong strapping sa barangay Raba sakop sa ilang lungsod gumikan kay mipalag na ang mga lomolopyo sa maong barangay sa paghatag ug rebolutionary tax ngadto sa maong mga armadong grupo. Samtang sa lungsod sa Mutia upat ka mga barangay usab ang giila ni Mayor Melba Tenorio nga adunay presinsiya sa mga tawo nga ilang gitoho-ang sakop sa mga walhong kalihukan partikular sa barangay Unidos, Tubak ug kasikbit nga barangay niini.

Hinoon gipahibalo ni Col. Bambao nga ang maong mga dapit nga adunay prisinsiya sa mga daotang grupo ang iya nang gipasubay sa iyang mga kasundalohan ug gikinahanglan na lamang nga kabutangan kini ug mga CAFGU detatchment aron dili na masubli pa ang ilang mga daotang kalihukan. Kahinumduman nga karong bag-o atol sa pagsa-ulog sa World Earth Day hugtanong gimandu na ni Gov. Lando Yebes ngadto sa mga hingtungdang ahinsiya sa gobyerno nga batukan gayud ang tanang illegal nga kalihukan dinhi sa Zanorte ug kini positibo usab nga gisanong sa mga nahisgutang opisyal kinsa sa kanunay katimbang sa gobernador pagpanalipod sa atong lalawigan sa Zanorte. (The New Nandau, Vol. XVII No.44)

*

 

Barangay Sicayab Bucana mopahigayon Tuloy Festival

Tungod sa ka-abunda sa isdang tuloy dinhi sa atong dapit, ang Barangay Sicayab Bucana sakop sa dakbayan sa Dapitan mohimo ug Tuloy Festival atol sa pangilin sa ilang barangay karong Mayo 22, 2008.

Kini maoy pinasikad sa resolusyon sa Sanguniang Pambarangay sa Sicayab Bucana kinsa nangayo ug suporta sa kagamhanang probinsyal aron katabangan ang ilang kalihukan sa pinaka-unang higayon sa pagpahigayon sa maong festival.

Si Governor Rolando Yebes mipadangat sa iyang sulat hangyo ngadto sa Sanguniang Panlalawigan pinasikad sa barangay resolusyon aron kahatagan ug suporta ang hangyo sa mga opisyales sa Barangay Sicayab Bucana. Ang Tuloy Festival nagtumong pag-serbe sa mga katawhan sa libreng sinugba, kinilaw ug uban pang nilutoan sa isdang tuloy. Kini matilawan sa mga katawhan atol sa maong festivity nga libre sa tanan nga moadto.

Si Kapitana Procesa R. Noel sa Barangay Sicayab Bucana atol sa regular session sa Sangguniang Panlalawigan mipasabot sa ilang gipangayo nga supporta sa probinsya alang sa pagpahigayon sa maong festival gumikan kay ang ilang barangay abunda sa isdang tuloy.3Sa resolusyon sa Barangay Sicayab Bucana, gidapit ang Department of Agriculture, Department of Tourism, Department of Trade and Industry nga ka-ayudahan sila sa pagpahigayon sa Tuloy Festival.

Sumala pa ni Kapitan Noel nga atol sa ilang festival magpahimutang sila ug cottages para sa mga bisita sa mga silingan nga barangay ug sa mga katawhan mismo sa maong barangay nga motabang sa maong kalihukan. Matud ni Kapitan Noel kini pa maoy pinaka-unang higayon nga magpahigayon sila sa maong Tuloy Festival ug kini iyang gilauman pinaagi sa supporta sa kagamhanang probinsyal ug uban pang ahensiya sa gobiyerno nga kini magapadayon hangtud sa umalabot nga katuigan.

Gidayeg ni Board Member Ricky Mejorada ang gihimong inisyatiba sa mga opisyal sa Barangay Sicayab Bucana kay kini maoy gikinahanglan sa probinsya sa Zamboanga del Norte nga ang usa ka barangay mohimo ug susama niini nga kalihukan nga mo-promote sa ilang lokalidad nga makamugna ug livelihood potential sa ilang dapit. Si Board Member Edgar Baguio mipabate lang sa iyang kabalaka kon unsaon pagpahigayon sa Tuloy Festival sa Barangay Sicayab Bucana sa panahon nga moabot ang dakong unos ug baguio ug dagkong balud taliwala sa kasinatian nga kon mag-maot ang tiempo minos man ang isda ilabi na ang tuloy.

Si Kapitan Noel nanghinaot uban sa pag-ampo sa kahitas-an nga dili moabot ang dautang tiempo sa pagpahigayon sa ilang Tuloy Festival kay kon kini maoy mahitabo, posibli nga dili “matuloy” ang ilang festival. (The New Nandau, Vol. XVII No.44)

*

 

Mga mayor mi-apilar sa NFA dugangan gialokar nga bugas

Mi-apilar karon atol sa nakalabay’ng Provincial Peace and Order Council Meeting ang mga mayores sa Zanorte ngadto sa National Food Authority NFA nga dugangan ang gidaghanon sa bugas sa NFA nga gi-alokar sa matag lungsod atubangan sa kalit nga pagsaka sa commercial rice sa kamerkaduhan.

Sa maong tigum gipahibawo sa mga mayores nga kulang kaayo ang napulo ka sakong bugas gikan sa NFA nga gibaligya sa mga Bisagsan Natin sa matag lungsod nga ug nag-limit lamang sa tag-tulo lamang ka kilong bugas matag pamilya. Ang baruganan sa mga mayor nagkahi-usa nga kung pun-an pa sa NFA ang gidaghanong bugas nga gi-apod apod sa kalungsuran sa lalawigan, gani mismo si vice governor Francis Olvis ang mipalanog nga paabton ngadto sa 50 ka sakong bugas kada lungsod kay kulang ra ang pulo ka sako. Matud pa sa bise gobernador nga sayang kaayo ang panahon ug kahago sa mga tawo nga magpila sa mga bisagan natin aron lamang sa pagpalit ug bugas apan kini tag-tulo lamang ka kilo.

Gisugyot niya nga gikan sa tulo himoong napulo ka kilo ang i-alokar sa matag pamilya aron dili masayang ang ilang panahon sa pagpila unya gamay lamang nga bugas ang ilang mapalit ug wala na hinoon silay mahimong trabaho para sa ilang panginabuhi-an. Sa iyang kabahin gibutyag usab ni Gov. Lando Yebes ngadto sa NFA nga andam ang matag local government Unit sa Zanorte ug mismo ang kagamhanang probinsiyal nga motabang sa pag-apod apod sa NFA rice ngadto sa mga lagyong barangay aron matabangan ang mga katawhan nga makapalit ug baratong bugas sa NFA taliwala sa gisagubang karon nga krisis sa bugas.

Hinoon ang representante sa NFA nga si Engr. Efren Delantar nagkanayon nga ang tanang gisugyot sa POC meeting iyang ipaabot ngadto sa ilang manager kinsa sa pagkakaron out of town. Sumala pa ni Gov. Yebes nga nagsabot na sila sa manager sa NFA subay usab sa gimandu ni Department of Agriculture Sec. Arthur Yap nga gitugutan ang matag LGU nga maoy mo-apod apod sa NFA rice ngadto sa matag barangay sa ilang lungsod aron dili na makagasto ug daku ang mga katawhan sa lagyong barangay pag-adto sa bisan natin outlet aron lamang pagpalit ug tulo ka kilong bugas sa NFA ilabi na gayud sa mga lagyong barangay nga kinahanglang moplite ug daku para pag-adto sa Pobalcion sa ilang lungsod aron pagpalit ug baratung buags sa NFA nga gibaligya sa 18.25 pesos matag kilo.

Sa kasamtangan ang presyo sa commercial rice anaa sa 38 ngadto sa 42 pesos matag kilo nga dili gayud masugakod sa mga pobreng katawhan sa pagpalit niini. (Southpoint, Vol.1No.19)

*

 

DIPOLOG ADUNA nay temporaryong puy-anan sa mga batang libod-suroy

Pormal nga gibuksan ang Dipolog City Drop-In Center for Children niadtong Lunes, Abril 28 didto sa Barangay Minaog ning dakbayan, human kini gi-inugurahan ug gibasbasan.  Gitambungan sa mga opisyales sa kagamhanang lokal nga gipangunahan ni Mayor Evelyn T. Uy ang maong kalihokan.

Ang maong Drop-In Center sa mga kabataan usa ka mugna nga child-friendly project ni Mayor Evelyn T. Uy nga na-establisar pinaagi sa iyang Orden Ehekutibo No. 08-01 nga gipagula kaniadtong Enero 8. Ang tumong sa nasangpit nga proyekto mao ang paglugway ug temporaryong puy-anan sa mga kabataan nga pinasagdan o gi-abandona, mga out-of-school children/streetchildren  o miyembro sa usa ka badlungon nga kahugpongan.

Ang gipahaum nga temporaryong puy-anan sa mga kabataang libod-suroy nga iya sa kagam- hanang lokal sa Dipolog (itaas) gibuksan na. Ang inugurasyon gipangunahan ni Mayor Uy (ubos).

Dugang niini, usa usab ka shelter kining maong drop-in center sa mga kabataan nga biktima sa pang-abuso gikan sa pisikal, psychological, mental, economic nga wala mahatag sa ilang ginikanan o mga guardian, o biktima sa dysfunctional or bungkag nga pamilya. Sumala pa ni Mayor Uy, ang mga serbisyo nga ilugway sa drop-in center mao ang home life/group living service, educational services, health/dental services, recreation and other cultural services, religious ug spiritual enrichment, ug social services nga pagadumalahon sa mga assigned Social Workers gikan sa Buhatan sa City Social Welfare and Development Office.

Dugang ni Mayor Uy nga ang maong mga serbisyo maoy ihatag ngadto sa mga kabataan samtang anaa pa sila temporariyong nagpuyo sa center hangtud nga makuha sila ug balik sa ilang ginikanan o mga legal guardian, nga hatagan usab ug after-care activities nga gisabutan nila tali sa center. (cio-prr) (Dipolog Chronicle, Vol.VII No.46)

*

 
Patangan gideklarar sa korte maoy tinuod nga mananaug pagka Kapitan sa Brgy. Diwan

Gideklarar sa hukmanan nga ang matuod nga mananaog sa pagka barangay kapitan sa Diwan ning dakbayan sa Dipolog mao gayud si Nathaniel Patangan.

Kini ang nahasulod sa katluan ug pito ka pahinang desisyon nga gipakanaog ni Judge Rene Dondoyano sa Municipal Trial Court in Cities may kalabutan sa election protest nga gipasaka ni Letecia Bagarinao batok kang Kapitan Nathan Patangan.

Sa desisyon nga giluwatan ni Judge Dondoyano nagkanayon nga si Nathaniel Patangan maoy nidaug sa pagka kapitan sa Barangay Diwan sa gipahigayong eleksiyon niadtong Oktubre 29, 2007 sa walo ka botos nga labaw batok kang Bagarinao. Kahinumduman si Bagarinao mipasaka ug election protest batok kang Kapitan Patangan human maproklamar nga aduna lamay duha ka botos nga labaw kaniya sa nakalabay nga eleksiyon pagka kapitan sa Barangay Diwan ning dakbayan sa Dipolog.

Sa pagproklamar si Patangan nakakuha ug 698 ka botos samtang si Bagarinao nakakuha ug 696 botos diin duha lamang ka botos ang labaw ni Patangan. Sa maong kaso gipadas-og ni Bagarinao ang pagpahigayon ug judicial recount o pag-ihap ug balik sa nakuha nilang botos sa tanang napulo ka presento sa Diwan kay matud pa sa iyang alegasyon adunay sayop ang pag-ihap sa botos pabor kaniya. Sa iyang kabahin si Kapitan Patangan mifile usab ug counter protest sa tanang presento sa Diwan sa alegasyon nga ang resulta sa maong presento pulos bunga sa pagpanikas ug iregularidad.

Tungod niini ang korte nagpahigayon ug judicial recount nga ang resulta maoy gibasihan karon sa gipakanaog nga desisyon diin milutaw nga adunay 16 botos nga nadugang pabor kang Bagarinao hinungdan nga nahimo nang 711 ka botos ang nakuha niya. Apan nadugangan usab ug 22 ka botos ang nakuha ni Kapitan Patangan hinungdan nga nahimo nang 719 botos ang iyang nahipos sa nakalabay nga election sa Diwan. Si Judge Jose Rene Dondoyano mideklarar nga si Patangan maoy tinuod nga nakadaug sa eleksyon pagka kapitan sa Diwan sa nakalabay’ng Oktubre 29, 2007 sa labaw nga walo ka botos batok kang Bagarinao. (The New Nandau, Vol. XVII No.44)

 
 

 HULAGWAY BALITA

 

Mapasigarbohon si Gov. Yebes nga nagpakita sa dakong bunga sa kalabasa nga abot sa kugihan nga mga mag-uuma sa kabukiran.
 

*

 

Kalingawan sa ‘Pagsalabuk’ padayon hangtud sa pista

Padayon karong nagadapit ang kagamhanang lokal sa Dipolog pinaagi sa City Tourism Council ug sa buhatan sa Torism, ngadto sa katawhang Dipolognon ug mga dumuduong sa pagsaksi sa nagapadayong mga kalingawan nga tuyong gipahigayon nunot sa pagsaulog sa 10th Pagsalabuk Festival dinhi sa dakbayan.

Ang mga nagkalain-laing mga kalihokan tuyong gihan-ay sa kagamhanang lokal ning dakbayan aron mohatag ug dugang kasadya sa Pagsalabuk, ingon man usab sa paghatag ug dugang kalingawan sa katawhan. Lakip sa mga kalingawan nga gihan-ay mao ang: Palo Sebo Challenge, Palupad Tabanog, Karang Challenge, Lumba Sikad ug uban pa.

Aduna usay mga paugnat sa kusog nga ipahigayon nga gilangkoban sa 5th Pagsalabuk Football Cup, 1st Pagsalabuk BMX Bike Race, Angler’s Competition, Mountain Bike Race ug Shootfest.

Dugang nasayran gikan sa buhatan sa Torismo nga ning kasamtangan, aduna nay 12 ka mga entries alang sa Pagsalabuk Street Dancing and Showdown Competition nga gikatakdang ipahigayon karong umaabot Mayo 23, bisperas sa kapistahan.

Alayon ning maong kalamboan, gidapit ang katawhan sa pagbisista sa Boulevard panahon sa ilang pagpahayahay aron sa pagsaksi sa mga kalingawan nga tuyong gimugna alang kanila. (CIO-alb) (Dipolog Chronicle, Vol.VII No.46)

 

Bag-ong talaan sa kalihokan sa Pagsalabuk

Alayon sa nagapadayong mga kalihokan sa P’gasalabuk Festival 2008, mihatag karong semanaha ug katin-awan ang Buhatan sa Torismo ning dakbayan nga adunay mga kabag-ohan sa mga schedule sa ubang activities niini.

Ang gitakda nga elimination round ug finals sa Battle of the Bands karong Mayo 8-9 ipahigayon na lang sa usa ka adlaw, sa Mayo 9 sa mao gihapong gitakda nga oras sa alas 8:00 sa kagabhi-on. Ang maong Battle of the Bands gipangunahan sa Greater Dipag Jaycees ug SVC Junior Jaycees. Samtang ang pagpahigayon sa P’gsalabuk Singing Idol ipahigayon na matag Sabado sugod sa Mayo 10 alang sa Kids ug Teen-Plus Categories, hangtud sa gitakdang grand finals niini karong umaabot Mayo 24.

Padayon ang mga kalihokan sa Pagsalabuk Festival 2008

Dugang gipaklaro sa Buhatan sa Torismo nga ang Battle of the Bands nga gipahigayon usab  matag Sabado usa gihapon sa mga  kalihokan sa P’gsalabuk Festival 2008 nga gipangunahan sa San Miguel Beer (SMB), diin ang grand finals niini ipahigayon sa Mayo 24, adlawng pista ni San Vicente Ferrer sa Simbahang katoliko. Sa gihapon, ang P’gsalabuk Streetdancing ug Showdown ipahigayon karong Mayo 23 sugod sa alas 3:00 ang takna sa hapon.

Alang sa kinatibuk-ang kalihokan nga gihan-ay sa P’gsalabuk Festival 2008, giawhag ang mga katawhan sa pagsusi sa mga schedule nga anaa gibutang sa tarpaulin nga gibitay anaa sa Dipolog Central Market (Rizal Avenue) ug sa Dipolog Boulevard. (cio-prr)

 

Mananaog lumba sa bisikleta gipagula

Atol sa bag-ohay lang nga gipahigayong P’gsalabuk Invitational Mountain Bike Circuit Race kaniadtong Mayo 4 nga ubos sa pagpasiugda sa Bicycle Association of Dipolog (BADI), migula nga nahatagan ug kahigayunan ang tanang misalmot nga makuha nila ang kadaugan ilabi na ang mga unang ganti sa nagkalain-laing kategoriya.

Ang mga partisipante nga nakadaug sa mga unang ganti sa lain-laing kategoria mao ang mosunod: sa kategoriyang JUNSEN nakuha ni Alfretz Gascon sa Iligan City; sa BEGINNERS nakuha ni Jun Jun Pajamutan sa Gingoog City; sa VETERANS nakuha ni Alberto Alpeche sa Iligan City; sa TOURING nakuha ni Rodel Tacujan sa Dipolog City; ug sa kategoriyang FAT BOYS nakuha ni Justine J. Una sa Lamitan, Basilan.

Ang maong P’gsalabuk Invitational Mountain Bike Circuit Race gisalmutan sa 13 ka mga hut-ong sa mountain bike racers gikan Iligan City, Lamitan (Basilan), Gingoog City, Zamboanga City, Dapitan City, Cagayan de Oro City, Pagadian City, Mapang, Z.N., Iloilo City, Calamba (Miss. Occ), Plaridel (Miss.Occ.), Oroquieta City ug Dipolog City. Dugang nasayran nga gipahigayon ang nasangpit nga mountain bike race didto sa San Jose Valley sa Mediatrix, Upper Dicayas. Kini anaa na sa iyang ika-unom ka tuig pagpahigayon sa Invitational Mountain Bike Circuit Race nga ilang giapil nga usa sa mga kalihokan nga nagabulok sa P’gsalabuk Festival sa Dipolog  ug nagkadaghan ang hut-ong nga misalmot niini matag tuig. (cio-prr) 

*

 

Pulso Sa Katilingban
Cicer M. Binghay
Torismo dakong kalihokan sa tibook kalibutan

Natukod ang Provincial Tourism Office. Sa ato pa obligado ang kagamhanan sa lalawigan makagahin salapi gawas sa Personnel Services, Maintenance & Office Supplies. Dinhi dili na magpanagana ang natudlo Provincial Tourism Officer, Atty. Ang paghimog mga Up-to Date Provincial, City, Municipalities, detailed St.indexes, Historical sites, churches & festivals, attractions, landmarks to keep travelers better informed.

Dinhi mahibaloan sa mga torismo nga ang silinganan sa Dakak Park sama sa Silinog, Aliguay ug Penyahon Islets sa Dapitan City manag silingan lamang. Kon madiskobrihan kini sa mha torismo, masayon ilang pag-ilin-ilin nga bisitahan. Magkadaiya usab ilang makitang pagka natural sa mga eskina sa gihinganlang mga dapit.

Dili usab hikalimtan nga gikinahanglan dinhi ang hustong transportation facilities, fully maintained, extensive information on road accomoditions and conditions. Mga stand-by pumpboats, motorized o maglayag, nga paga ubanan sa mga tourism guides mayoriya pili-on ang mga patsading with personality makamao mo sulti sa ininglis, ginagmay’ng Hinapon, Koreano ug uban pang adunay kabangkaagan pag abi-abig taga day-ong bisita.

Kanang Aliguay, kon ugaling nakaanha kamo, diha ka makakita sa mga natural guhit ug mga sinilsil talan-awon nga nagpabilin gikan pa sa kanhiay. Ang maong isla nagahulat lamang nga maatiman sa atong pangagamhanan nga dili mapasagdan nianang nagsugod karon nga katawhan pagtukod mga barong-barong ug gihimo ang palibot nga dangpanan sa mga mangingisdaay nga taga lagyong dapit.Kinahanglan kaayo nga dunay himoong Fish Sanctuary, mga dapit nga dili panagatan aron magpabilin ang itloganan, dangpanan ug kapaurarayan sa nagkalain-laing matang sa isda nga dili nato makit-an sa ubang kadagatan.

Naa diha ang daghang itloganan sa eels nga gikinahanglan ug “balakasi” ang dugay rang nahibaloan sa mga mananagat nga usa ka matang sa eel nga natural ang aprodisiac kon makakaon ang tawo. Mga kinhason nga nagga lublob sa ginsuokan sa mga nakwebang coral reefs nga dili maabot sa mga mananalomay nga mama-anay isda panagat. Nakanindot diha nga dili mapiri sa ubang tourism spot kay ang scuba diving mahimo 365 days a year. Ugod kon maghabagat makabalhin diha-diha ang mga divers sa pikas nga masampungan sa hanging habagat. dayon kon panahon sa amihan balik sa habagatan.

Sigon sa natala sa Dapitan City Assessors Office kadaghanan sa kayutaan diha mga titulado. Nahimong unang nakapuyo ang bansagon nga Bendaño. Naay daghang ma establisar mga balay o mga kamalig sa atong pangagamhanan ubos sa Provincial Torismo buhatan tukoran accommodations, dining and entertainment o kaha ihatag diha sa makabutang kapital alang niining tanan. Makasugod gilayon dinhi si Atty. Ang sa iyang mga kalihokan to keep travelers Better Information sama sa ang Shrine city of Western Mindanao kang Dr. Jose Rizal nga na distiero (exiled) sulod sa lima ka mga tuig niadtong 1897-1896, Linabo Park, Sicayab Sunset, Dapitan Sunset, Pamansalan Oisca Forest Park & Wildlife, Dakak Park ug Bayangan Island.

Walay suliran sa hustong condition sa kalsada paingon sa Dakak kay hapit na makumpleto ang pagsemento niini. Dili lang i-apil dinhi ang pagka Orchid City sa Dipolog kay mga nagkalain-laing orchid nga diha na unta gilarawan sa miaging mga administrasyon wala ipadayon. Dili maglisod dinhi atong Provincial Tourism Officer gahin alang sa iyang buhatan, samtang nagpabilin nga si Gov. Rolando E. Yebes ang gobernador nga gipaluyohan sa mga Board Members nga mahigugmaon o mga lovers of nature. Ikaduha nakita karon sa atong local opisyales nga ang Torismo usa ka dakong kalihokan tibook kalibutan nga nakahatag dako income tinuig. (Press Freedom, Vol. XX No. 30)

 
Credits: Press Freedom is published every Saturday and entered as 3rd class mail matter in Dipolog City. Printed by Young Printing Press with Editorial Office located at Upper Turno, Dipolog City. Tel. No. (065) 212-4343 or 212-6665

 

Kalinaw nahibalik na sa Sibuco, mini hudyaka gipahigayon

 

Nahibalik na karon ang kamalinawon sa lungsod sa Sibuco, Zamboanga del Norte gikan nga natugaw kini niadtong Enero 30, 2008 sa dihang na-engkuwentro sa mga kapolisan sa maong lungsod ang pipila ka mga armadong tawo nga mikutlo ug pipila ka mga kinabuhi ug nahimong samdan ang mismong hepe sa Sibuco PNP.

Sibuco’s mini hudyaka. Gov. Yebes graces Araw ng Sibuco on its 49th Founding anniversary with Mayor Norbe Edding escourting him to the artistic booths adopted from ZaNorte’s Hudyaka festival. (Inlet) Export quality mats specially woven by Sibuco residents as showcased in one of the booths.

Gipahayag ni Mayor Norbe Edding nga sa karon naangkon na ug balik sa ilang lungsod ang kalinaw ug kahusay. Kung kaniadto giila ang ilang lungsod nga “No Mans Land”apan ila karong gipaningkamutan nga mawagtang ang maot nga imahe sa Sibuco. Ilang ipaila nga usa ka malinawon ang ilang lungsod.

Sa karon gisaulog sa maong lungsod ang ilang ika-49 ka tuig nga Founding Anniversary. Subay niini ilang gihimo ang Mini-Hudyaka nga anaa nakahan-ay ang daghanang kalihukan. Sa pinaka-unang higayon gihimo usab nila ang Search for Miss Sibuco. Matod pa ni Mayor Edding nga dili nila makalimtan ang nahitabo niadtong Enero 30 sa ilang lungsod, apan tungod sa Cease Fire agreement gi-undang nila ang operasyon batok sa maong mga armadong tawo ug gihimo ang pagpadala ug imisaryo aron pag-istorya ug paghangyo sa maong mga armadong grupo nga moduyog kini sa malinawon nga pagselebrar sa Araw ng Sibuco.

Gidugang ni Mayor Edding nga iyang ipadayon ang deplomasiya nga pamagi alang sa maong mga armadong grupo alang sa kaayohan sa tibook katawhan sa lungsod. Pinaagi sa suporta sa mga katawhan nagpadayon karon ang pag-abri sa mga dalan gikan sa Sibuco paingon sa dakbayan sa Zamboanga ug Sibuco paingon sa lungsod sa Sirawai. Ang maong proyekto ang kabahin sa coastal road project ni Presidente Gloria Macapagal Arroyo. (Southpoint, Vol.1No.19)

 
 


Ang Kinabuhi, Inse Menang, Weather-Weather Lang

Alas sayis sa buntag, nag-atubang ang magtiayon nga si Alberto ug Consolacion sa ilang TV set kay nalingaw silang nanan-aw sa mga bisita sa programa sa ABS-CBN - - -ang Umagang Kay Ganda. Misamot ang ilang kahimuot dihang gi-focus sa TV camera ngadto sa host nga si Edu Manzano kinsa, nakigsayaw ug Tango kang Rica Peralijo duyog sa tugtog sa combo.

Unya mipakli ug laing segment ang programa pinaagi sa announcement ni Bernadette Zambrano nga nagkanayon: “Ating alamin ngayon ang lagay ng panahon…Kuya Kim, ano na ba ang lagay ng ating panahon?”

Samtang naghatag ug weather up-date si Kim Atienza sa maong programa, mipasakayli pod si Consolacion sa iyang bana nga nagkanayon: “Haaaaay…maayo pa ning programa ni Kuya Kim karon, naa pay lagay ang panahon. Kining akong bana hinuon, naa man untay lagay pero wa gyoy panahon!”

He he he…ato kining gikutlo nga sugi-medya gikan kang Bobby Azcuna kinsa, hapit matag adlaw di gyod mopalta sa pagpadala kanakog mga txt messages nga pakatawa nga saktong panakot sa nagkalaay mong pag-inusara. Thanks, Bob!

— oo000oo —

Weather-weather lang nga sa sinugarol pa nga hubad, panahon-panahon lang! Yes, Ingko Moises, ang kinabuhi baya ikatandi sa atong panahon. . . usahay maayo ang buot, usahay usab ang dagway magkulismaot. Karon lang ay... summer unta ug atong makita ang mga dahong laya nga nagpasad diha sa yuta! Apan dili mo kini makita karon kay nausab na man ang dagan sa atong panahon kay imbis madimdim nato ang kalalim sa summer, ato na hinuong nasum-okan ang panahon nga tingulan!

Sama sab sa kinabuhi sa tawo, di mo sab masabot ang dagan niini. Usahay ang tawo naglunang sa kalisod ug kapit-os ug gani imong makita nga nagtamoy na lang siya sa bahaw binahogan sa “una” sa ginamos apan sa kalit  imo na lang naalimadmaran nga mikalit na lang siya ug kaadunahan!

Usa lang ka ehemplo mao kadtong akong kliyente kanhi nga naputos ug daghang kaso kay lagi tungod kaha sa kapait ug kapit-os sa ilang panginabuhi, kanunayng galabad ang iyang ulo maong sigeng makalabuso. Kay lagi amigo, akoy iyang gikuhang abogado ug kaluoy sa Diyos, ako siyang napa-absuwelto sa tanan niyang mga asunto didto sa husgado. Kaha naka-amgo nga nagka-edad na siya, mihangyo siya kanako nga mohulam ug dos mil pesos kay iya kunong ipamuhonan sa usa ka negosyo isip unang lakang kuno sa iyang pagbag-o.Uho man tuod, gitagaan ko siyag dos mil pesos ug sukad niadto, wa ko na siya makita ni madungog kon buhi pa ba. Apan nakurat na lang ko kay human sa napulog-unom ka tuig namong wala magkita, mikalit siyag tungha didto sa among opisina sa miaging semana ug haskan na kaayo niyang pustoraha! Sa akong panginsusi, sugid pa niya, sa gamay niyang puhonan apil na kadtong akong gipahulaman niyang dos mil pesos, iyang gipuhonan pagpangompra ug bulad ug ginamos ug iya kining gitumod didto sa Dumaguete ug Cebu. Kay milambo, didto na siya magtumoran sa bulad ug ginamos didto sa kaulohan ug karon, ang kanhing tarantado usa na ka adunahan!

Ay na lang pangutana kon giulian ba ko niya sa gihulaman niyang kuwarta! Ang mahinungdanon nga kon makaadto ako sa Manila adto ko niya pa-estara sa ilaha ug adto na daw ko niya aregloha!

Kining akong gisugid dili  tuyo aron nga ipanghambog ko ang pagka-asenso sa ako kanhi nga kliyente.Ang akong tuyo mao nga ang sugilanon sa kinabuhi niining tawhana mapanaminan unta niadtong mga tawo nga tungod kaha sa kapakyasan nga ilang nakamtan ug nahiagoman, nalusno na sa dayon ang ilang paglaom nga matigayon sa pagpangligid na sa panahon. Kining paglarawan ko sa kinabuhi sa kanhi kong kliyente mao lamay usa sa mga kamatuoran nga way imposible ning atong kalibutan. Ang kinabuhi, usbon ko, sama sa panahon. . .usahay  hinay ang hanging gihuros apan usahay sab hadlaon kita  sa makalilisang nga unos! Sa laktod nga pagkasulti, dili permanente ang estado sa kinabuhi sa tawo. Kon kabus ta karon, may purohan nga ugma-damlag mahimo tang adunahan. Kon kita karon usa lang ka yanong lungsoranon. . . ni wala gani ing ambisyon nga mamahimong opisyal sa usa ka lungsod, dakbayan o lalawigan, yet, mao na lay atong maalimadmaran nga usa ka adlaw niana, kita na diay ang mayor sa lungsod o dakbayan o kaha gobernador sa lalawigan!

Usa ka panag-ingnan niini mao si Mayor Evelyn Uy. Palitik akong lubot kon sukad niadto nag-ambisyon ba kining mahimong mayor sa dakbayan sa Dipolog. Yet, iya na lang naamgohan nga siya na karon ang alkalde ning atong dakbayan! Busa, niadtong nagtuo nga gihikawan na siya sa kapalaran, isalikway na kana nga panghunahuna kay matod pa sa uyoan kong sugarol nga si Iyo Mente, “Don’t underestimate the man under the mango tree,” nga sa iya pang hubad pa: “Way seguro ang bata!”

Tinuod tong gisulti sa mga karaan nga hamubo lamang ang lugway sa atong pagpakabuhi ning kalibutan busa kinahanglan nga ato kining pahimuslan.

— oo000oo —

Mitaliwan na si Atty. Eduardito “Guy Pacatang ngadto sa laing kalibutan. Askil ug alegre pa man to si Sir Guy nga akong nakauban sa buhagtan sa IBP ning lokal nga kahugpungan sa mga manlalaban. Kaingon mo gyod nga wa siya takboyi ug balatian. Ahhh...ang kinabuhi usahay, Inse Menang, weather-weather lang!

— oo000oo —

Pangawat, panulis ug panglungkab dinhi sa dakbayan karon milausag na sab. Basta gani magsingabot na ang pista dinhi, manghitabo gayod kini. Ang pangutana: Wala ba diay ang atong mga polis nakaatik ning matang sa “modus operandi” nga sige na mang nanghitabo kini?

Niadto lang miaging adlaw, didto mismo sa compound sa City Hall, gilungkab ang usa ka sakyanan sa adlawng dako gayod…plastada pang giparking ang sakyanan, yet nakahimo pa panglungkab niini ang mga kawatan! Ug kagahapon sab, sa pagsulat ko ning tudling, gitulisan ang gasoline station sa Petron didto sa Minaog nga unta dili ra man kini halayo kaayo sa poblacion sa Dipolog!

Prangka lang, sa trabahong pamolis, dili man tanan kusog ni kaisog ang saligan aron gayod masulbad ang nahitabong salaod. Ang gikinahanglan karon ning nagkakumplikado nga sitwasyon sa atong panahon mao ang paggamit sa atong sentido-komon!

Kapila na man ni manghitabo nga matang sa krimen . . .nga magsingabot gani ang kapistahan ning atong dakbayan, motumaw kining panulis, pangawat ug panglungkab sa mga kabalayan. Nganong wala man kini tun-i ug preparahi nga sa giingon na sa unahan, sige na mang nanghitabo kini? Ang ipasabot ba nga ang nangaging mga nanghitabo sa atong dakbayan ingon pananglit sa kawat ug tulis samtang magsingabot na ang kapistahan sa dakbayan ibali-wala lang sa atong kapolisan?

Sa magdanga-danga na gani ang kapistahan sa atong dakbayan preparahan na kini sa atong kapolisan pinaagi sa pagpalihok sa ilang intelligence network! Kay mausab man gayod kadtong mga matang sa krimen nga nanghitabo niadtong miaging mga kapistahan, planohan na kining daan sa atong kapolisan kon asa kini mahimong atngan.

Wala may kausaban ang matang sa krimen nga nanghitabo karon sa atong dakbayan kon itandi niadtong nangaging mga kapistahan. Sa laktod, karaan na man ning kansiyon apan nganong maglisod man gyod ang atong kapolisan nga kapangitaan kini ug kasulbaran? (Dipolog Chronicle, Vol.VII No.46)

*

MORE NEWS NGA BINISAYA

 

 

NOTE: SEND US YOUR NEWS.  Tell us what's going on in your barangays, clubs, schools, businesses and non profit organization. You can also send notices and announcements.
          

 

    Email to webmaster@dipolognon.com

      
Google
WEB THE DAILY DIPOLOGNON