May 5, 2008

 

BANA GIPA-PATAY SA IYANG ASAWA, KABIT

Lisud gyod kung ang asawa makakita nag laing ikadulog panahon sa gabiing matugnaw, tungod kay ang bana gawas nga ma-etchapwera, maminteryo pa! Mao kini ang nahitabo sa usa ka Romulo Matando y Andap, 53 anyos, minyo ug molopyo sa sitio La Baloran, sakop sa Brgy. Imelda sa lungsod sa Sindangan nga matud pa, gipatay sa hinigugma kon kabit sa iyang asawa nga si Magno Bagsican, 18 anyos ulitawo ug molopyo sa susamang barangay.

Sa gihimong inbistigas-yon sa mga sakop sa kapolisan sa lungsod sa Sindangan pinangulohan ni SPO2 Gallo, nahibaw-an nga si Romulo gipatay niadto pang Marso 13, 2008 pinaagi sa pagtikbas sa nagkalain-laing parti sa iyang kalawasan ug diin ang iyang ulo hapit na mabuwag sa iyang lawas. Tapos siya mapatay, ang lawas ni Romulo hilom nga gilubong ni Magno uban sa iyang amahan nga si Rodrigo Bagsican, 52 anyos didto sa sagbotan nga bahin sa sitio La Baloran.

Apan ang igsoon sa biktima nga si Gaudencio wala mahimotang sa kalit nga pagkawala ni Romulo hinungdan nga ila kining kanunay nga gipangita. Sa miaging Abril 24, Huwebes, uban ilang laing mga paryente ila ra gyud nga natoltolan ang patayng lawas ni Romulo sa gilub-ngan niini nga nadugta na. Sa dihang nakaplagan na ang patayng lawas sa biktima, ang asawa niini nga ginganlan ug Marcelina Balawing-Andap, 39 anyos, ang kalit lamang nawala apan si Magno ug ang iyang amahan maoy gidala sa kapolisan sa Sindangan PNP aron moatubang sa imbesti-gasyon isip mga suspetsado.

Si Magno maoy pasiunang gisuspetsahan tungod kay matud pa ni Gaudencio, sa wala pa mawala ang biktima, kini mitug-an ngadto kaniya nga iyang nakit-an ang iyang asawa nga si Marcelina nga naggakos uban kang Magno, usa ka adlaw sa miaging buwan sa Disyembre. Apan tungod tingali kay gisiging-siging sa iyang konsensiya, Si Marcelina ang bolontaryong misu-render ngadto sa buhatan sa kapolisan kuyog ang usa ka miyembro sa lopon sa ilang barangay. Si Marcelina mikompisal nga diha siya sa dihang ang iyang bana nga si Romulo gitigbas sa makadaghan nga higayon sa suspetsado ug nakakita pod siya sa dihang gigolgol ni Magno ang liog niini hinungdan nga hapit na kini mabuwag sa iyang lawas.

Si Marcelina ang gikatahong way gihimo sa maong higayon tungod kay matud pa nagkahini-gugmaay sila ni Magno ug maoy ilang plano ang pagpatay sa iyang bana tungod kay maoy ilang tinguha sa sila nay magpuyo o mag-ipon. Sumbong parridide ang gisang-at kaniadtong mila-bayng semana sa buhatan sa kapolisan batok kang Marcelina, samtang murder usab ang kang Magno Bagsican. Ang duha polos na gitangong karon sa buhatan sa kapolisan sa lungsod sa Sindangan, ning lalawigan. (Mar Uy, The New Nandau, Vol. XVII No.43)

*

 

Pagsumpo sa malaria gihingusgan

Pagsumpo sa sakit nga malaria gihingusgan karon sa kagamhanang probinsyal pinaagi sa pagpakigtambayayong sa Department of Health ug Tropical Deasese Foundation. Angay masayran nga ang Global Fund, usa ka international NGO milugway sa ilang ayuda dinhi sa Zamboanga del Norte partikular sa lungsod sa Siayan kinsa gikatahong maoy daghan ang nataptan sa sakit nga malaria.

Alayon sa pagpakig-tambayayong diha sa pagsumpo sa sakit nga malaria, si Governor Rolando Yebes mihangyo sa Sanguniang Panlalawigan nga kahatagan siya ug otoredad nga motimaan sa usa ka memorandum of agreement sa ngalan sa probinsya sa Zamboanga del Norte ug Department of Health ug Tropical Deasese Foundation aron malugwayan ug serbisyo ang mga katawhan sa lagyong barangay nga adunay insedente sa sakit nga malaria.

Matud ni Governor Yebes adunay report nga ang insedente sa malaria ilabi na sa bukid nga barangay ang gikatahong nagkataas. Gumikan kay gipangitaan ug pamaagi nga malingkawas ang mga katawhan sa maong problema pinaagi sa pag-pakigtambayayong sa ubang government agencies nga adunay susamang pagpapakabana. Ang Department of Health nga maoy lead government agency diha sa pagpatuman sa National Malaria Control Program partikular sa Global Fund Malaria ug Tropical Deasese Foundation Incorporated, si Governor Yebes mihangyo sa hunta probinsyal nga kahatagan siya ug otoredad sa pagtimaan sa MOA tali na sa DOH, regional office ug Tropical Deasese Foundation. 

Gilaraw usab nga tukoron ang Provincial Malaria Management Committee para sa kasegurohan diha sa epektibong pag-implementar sa nagkadaiyang pamaagi diha sa Malaria Management Program dinhi sa probinsya. Board Member Cedric “Adre” Adriatico, Chairman sa Committee on Health sa Sanguniang Panlalawigan nagkanayon nga ang pangkalibutan nag-selebrar sa Malaria Day diin dinhi sa probinsya sa Zamboanga del Norte ang mga kalihukan gilusad didto sa lungsod sa Siayan.

Matud pa ni Board Member Adriatico, si Mayor Siasico mipahibawo kaniya nga ang Tropical Deasese Foundation andam mohatag ug ayuda financial para sa pagbansaybansay lakip na ang kagamitan, dili lamang sa lungsod sa Siayan apil na niini ang ubang lungsod. Tungod niini, ang representante sa Tropical Deasese Foundation mipahibawo nga gikinahanglan ang Memorandum of Agreement ug pag-establisar ug Zamboanga del Norte Malaria Management Committee aron ang financial assistance ikahatag nganhe sa probinsiya nga mao usab ang gipangayo nga otoredad sa gobernador sa Sanguniang Panlalawigan. (Press Freedom, Vol. XX No. 29)

*

 

GEN. YANO BAG-ONG AFP CHIEF, GARBO SA ZANORTE

GIKATAKDANG molingkod na sa iyang bag-ong katungdanan pagka-Chief of Staff sa Armed Forces of the Philippines si Lt. General Alexander Yano nga maoy kasamtangan karong Commanding General sa Philippine Army.

Si Gen. Yano lumad nga taga lungsod sa Sindangan ning atong lalawigan sa Zamboanga del Norte ang gikatakdang i-instalar karong Mayo 7 niining tuiga hulip kang Gen. Esperon. Atul sa gihimong interview kagahapon kang Governor Rolando Yebes pinaagi sa taga 101st Brigade Philippine Army nga anaa sa Del Pilar Piñan alang sa ilang documentary nga i-presentar sa pag-lingkod unya ni Gen. Yanosa iyang bag-ong posisyon, gihulagway sa gobernador nga sa iyang nakita usa ka matinud-anon nga pagkatawo si Gen. Yano nga maoy naghatag kaniya ug maayong kaugmaon nga respitado diha na sa han-ay sa militar.

Nailhan ni Governor Yebes si Gen. Yano nga usa ka mahigugmaon nga amahan ngadto sa iyang pamilya. Usa ka tawo nga maki-angayon diha na sa katilingban. Gihatagan ug gibug-aton ni Governor Yebes nga ang pinaka-makahuloganon kaayo nga gikatampo mao nga sa pinaka-unang higayon sa kasaysayan nagagikan sa Zamboanga del Norte o sa Mindanao maoy nahimong pinaka-taas nga opisyal sa armadong kusog sa Pilipinas. Tungod sa maong naangkon nga kalampusan ni Gen. Yano gipaabot ni Governor Yebes ang dako niyang pagsaludo nga bisan nga gikan sa pobreng pamilya nakuha niya ang maong posisyon nga maoy pinaka-taas nga opisyal sa AFP.

Dako ang pagtuo sa amahan sa probinsiya nga magsilbing modelo si General Yano sa mga katawhan dinhi sa Zanorte. Ang iyang naangkon nga kalampusan maghatag kini ug simbolo sa probinsiya diha na sa natad sa public service. Alang kaniya walay question ang paglingkod ni Gen. Yano sa mao niyang bag-ong posisyon tungod kay anaa kang Gen. Yano ang hiyas diha na sa pagdumala sa AFP.

Angayang masayran nga kaniadto gikan sa Luzon ang kanunay nga mamahimong AFP Chief ug karon kini ang nagagikan na sa Mindanao. Alang kang Governor Yebes nagpasabot lamang kini nga nailhan ug nakita ang mga gihimong pagpaningkamot diha na sa pagserbisyo sa mga katawhan. Sa mensahe sa gobernador ngadto kang Gen. Yano nga magpabilin nga dili niya makalimtan ang mga katawhan sa Zanorte ilabina sa lungsod nga iyang gigikanan nga mao ang lungsod sa Sindangan. Tinguha karon ni Governor Yebes uban sa mga mayor sa lungsod ug nila ni 1st District Congresswoman Cely Jalosjos Carreon ug 3rd District Congressman Cesar Jalosjos nga mosaksi sila tanan diha na sa pag-instalar kang Gen. Yano isip pagpakita sa hugot nga suporta tungod kay dakong garbo nga gikan sa atong probinsiya ang mahimong AFP chief. (Southpoint, Vol.1No.18)

*

 
Dr. Ratificar: “Qualified ko pagka secondary principal”

Giangkon ni Dr. Lilibeth Ratificar nga qualified siya isip full-pledge secondary principal kay nagbaton siya ug kualipikasyon sa mao niyang posisyon karon. Mao kini reaksiyon ni Ratificar nga sumala pa niya, ang iyang pagkatudlo nagsumikad sa makuti nga proceso sumala sa lagda sa pagpili ug pag ranking sa mga kuwalipikado nga applicants sa personnel selection board sa maong departamento.

Kahinunduman nga adunay lima ka mga aplikante nga sila si Dr. Lilibeth Ratificar, Mr. Jerry Perong, Mr. Cecilio Lancian, Antonio Liao ug si Justiniano Caemare. Sa maong pag-evaluate sa mga kuwalipikasiyones sa maong mga aplikante migula nga numero unong kuwalipikado si Dr. Lilibeth Ratificar ug kaniadtong April 1,2008 siya natudlo sa maong position nga gidasonan usab sa Civil Service Commission kaniadtong April 16,2008 ug siya gi-instalar kaniadtong April 18,2008 nga gitambongan sa mga kadagkoan sa Department of Education ug sa mga opisyales sa dakbayan sa Dipolog.

Apan karong bag-hoay pa lamang, adunay mga komentaryo nga gituhuang gipasiugdahan sa usa sa mga aplikante nga si Cecilio Lancian nga ang pagkatudlo ni Ratificar sa maong position wala mahisubay sa mga lagda sa appointment. Giakusar ni Lancian si Ratificar nga wala maghuput ug igo nga kuwalipikasyones sa maong position tungod kay ang iyang item, principal lamang sa elementarya ug ang gikasamukang position nagkinahanglan ug secondary principal qualifications o high school.

Apan sumala sa miyembro sa selection board si Ratificar naghuput sa maong kuwalipikasyon kay siya principal sa Gulayon Integrated School nga adunay elementary ug high school level duol sa walo ka mga katuigan. Pinasubay usab sa Dep.Ed Order No. 39, Series of 2007 nga mao ang modified Q.S o “Qualification Standards for head teachers and principals for both elememtary and secondary levels”, ang minimum nga requirement mao nga ang aplikante adunay Bachelors Degree in Secondary Education o kaha “Bache-lors Degree with 18 units professional education and 6 units of management” nga tanan gihuptan ni Dr. Ratificar kay siya graduwado sa Bachelor of Science in Agriculture ug graduwado usab sa Master of Arts in Education ug naghawid usab sa titulo nga Doctor in Educational Management. Sa makatulo nga higayon nga pagpahigayon sa open ranking para sa maong position, migawas nga number one si Dr. Ratificar ug siya natudlo gayud sa maong posisyon pagka principal sa Zamboanga del Norte National High School.Gikatingala ug dako sa mga opisyales sa DepEd ug ngano nga si Mr. Lancian anha man micomplain sa mga karadyohan ug dili sa Civil service commission pinaagi sa usa ka legal nga protesta kung aduna man gani tinuod nga basehan ang iyang mga mulo ug reklamo kabahin na sa maong appointment.

Matud pa ni Ratificar ang pagtudlo sa mga kawani sa gobierno apil na ang mga kawani sa Department of Education anaa o ubos sa gahum sa appointing authority human ma-determinar nga ang usa ka aplikante kumpleto sa minimum requirements nga gilagda sa balaod sa Qualification Standards. Matud pa, bisan ang reviewing authority nga mao ang Civil Service Commission dili makapausob o bisan maka substitute sa gitudlo nga appointing authority kon kini adunay bisan minimum qualifications nga gitakda sa maong posisyon ilabi na gayud kung kini nag-una sa tanang mga aplikante sa mga kwalipikasyones. Si Mr. Lancian migawas lamang nga number 3 sa maong ranking ug bisan si Mr. Perong nga number 2 ug ubang mga aplikante sa open ranking nga gapa-higayon, wala magmulo sa maong pagkatudlo ni Dr. Ratificar ug natingala ngano sa karadyohan mipagawas sa iyang mulo ug reklamo ug dili sa Civil Service Commission, panapus nga pamahayag ni Dr. Ratificar.

Sa samang bahin, gihimakak ni Mr. Lancian nga midangop siya ug media aron iyang dauton si Dr. Ratificar. Matud ni Lancian, wala siyay giduol nga media aron iyang ipadayag ang iyang sentemento mahitungod sa pagka-tudlo Dr. Lilibeth Ratificar isip secondary principal sa Zamboanga del Norte National High School. Giangkon hinoon ni Lancian nga iyang gi-kuwestion ang appointment ni Ratificar didto sa Human Resource Management Office sa rehiyonal nga buhatan sa Zamboanga City atubangan sa iyang pagtuo nga wala kini basehan.

“Naglibug ko nga migawas ang maong balita nga ako maoy nagreklamo nga unta, gahilom raman ko sa akong pag-kuwestion sa regional office, Zamboanga City.” Gipaklaro ni Lancian nga wala siyay personal nga kasuko kang Ratificar ug ang iyang pagkuwestion nagabase lamang sa qualification standard sa usa ka magtutudlo nga mo-qualify sa maong posisyon nga alang kaniya wala gayo’y basehanan si Supt. Casculan.

Kon minimum require-ments ang hisgutan, si Ratificar diha lamang mo-qualify sa elementary school principal kay siya usa man ka elementary teacher dili sama kanila ni Mr. Perong ug Dr. Liao nga mga secon-dary teacher ug naghupot sa hustong qualifications. Sumala pa ni Lancian nga sa open ranking nga si Ratificar maoy number one atol sa meeting iya kining gikuwestion sa City Schools Division ug mipasalig nga dal-on ang maong isyu sa Civil Service Commission, regional office. Apan miabot nalang ang panahon nga gi-appoint na si Ratificar nga wala gihapon lihoka sa mga membro sa screening committee maoy hinungdan nga mipadala siya ug sulat sa regional office sa Human Resource Management sa DepEd aron pangutan-on kon duna bay basehan ang usa ka elementary school teacher nga matudlo isip secondary principal. Ang ilang rehiyo-nal nga buhatan sa Human Resource Menagement mi-tubag uban sa dakong kati-ngala sa maong appoint-ment.

Iyang gipaklaro nga ‘professional’ ang iyang pag-deal sa maong isyu sa pagkuwestion sa appoint-ment ni Ratificar ug wala siyay tuyo nga kini dauton. Naglaraw si Lancian nga kining maong isyu iyang dad-on sa rehiyonal nga buhatan sa Civil Service Commission. (The New Nandau, Vol. XVII No.43)

*

 

Organized Crime Syndicate nag-operate sa Godod, Salug, Liloy, Labason?

Usa ka grupo nga organized crime syndicate gituhuan sa mga katawhan maoy nag-operate didto sa habagatang bahin sa lalawigan partikular sa mga lungsod sa Godod, Salug, Liloy ug Labason, Zamboanga del Norte. Kini nga pagduda sa mga katawhan ilang gipabate atubangan sa tumang nilang kabalaka karon sa ilang dapit nga dili na sila ‘safety’ sa tanang higayon tungod kay bisan unsang orasaha ang maong grupo mo-strike sa pagpanulis, carnap ug kawat nga hangtud karon wala gayud masanta sa mga otoredad.

Karong bag-o, usa ka batan-ong negosyante didto sa lungsod sa Labason nga si Jonathan Calumba ang gitulis ug giposil patay didto mismo sulod sa iyang panimalay. Kini nahitabo niadtung Abril 21, samtang gitumod ang iyang patay’ng lawas sa sam-ang katoliko sa maong lungsod niadtung miaging adlaw uban sa pagsinggit sa mga ginikanan, pamilya ug kabanay nga kahatagan ug hustisya ang kamatayon sa biktima.

Matud sa report, upat ka mga tulisan misulod sa panimalay ni Calumba ug mition kini sa armas dungan ang pagdeklarar nga tulis. Nakuha sa mga tulisan ang mga alahas ug salaping cash sulod mismo sa lawak sa biktima. Gusto pa sa tulisan nga mosulod sa laing lawak aron kuhaon ang ubang kuwarta apan gibabagan sa biktima hinungdan nga kini giposil sa makaduha ka higayon ug naigo kini duol sa iyang ilong sa nawong nga maoy hinungdan sa iyang hinanaling kamatayon. Matud pa sa mga residente didto sa Labason, ang maong panghitabo sagad na karon nga nasinate sa ubang mga lungsod didto sa Godod ug Salug diin ang mga suspetsado armado sa tag-as nga kalibre sa armas.

Didto sa lungsod sa Liloy gikataho nga ang mga kawatan daw wala nay ‘kaba’ nga mosulod ug balay ug lagwerta kay ultimong polis, opisyal sa lungsod ug prominenting tawo ang biktima sa kawat. Sumala pa nga ang mga suspetsado nga nag-operate sa ilang dapit armado sa tag-as nga armas sama sa mga tulisan ug carnaper nga nag-operate didto sa Godod ug Salug. Ilang gituhoan nga kini usa lamang ka grupo nga organized crime syndicate nga matud pa sa tinubdan, mga muslim nga maoy nag-operate didtong dapita.

Ilang gibutyag nga inutil ang kapolisan sa paghimog mga lakang batok sa maong mga krimen tungod kay hangtud karon nga taudtaud na kining nagpanghitabo sa maong mga lungsod apan namatikdan nga gipasagdahan lamang kay wala pay bisan usa ang nadakpan sa mga otoredad. Matud nila kon ang Barangay Tanod maoy usa sa gisaligan sa pagtabang aron masumpo ang nagkadaiyang krimen didto sa habagatang bahin sa lalawigan, kini magapabiling dili masulbad gumikan kay ang gitahasan sa barangay nga motabang sa pagpahapsay sa kahusay ug kalinaw ang gitugkan nag hubag-hubag kay mitalaw.

Reaskiyon sa mga residente didto sa Godod ug Labason atubangan sa panawagan ni PNP Provincial Director P/SSupt. Mario Yanga nga gamiton sa mga local government units ug sa barangay ang ilang gahum diha sa pagamit ug pundo aron epektibong makalihok ang mga Barangay Tanod sa pagtabang sa kapolisan. Matud pa ni Yanga, diyotay lamang kaayo mga membro sa kapolisan diha sa mga lungsod nga dili makadupa sa tanang panghitabo busa ang Barangay Tanod motabang sa mga otoredad sa pagbantay sa palibot inubanan sa kooperasyon sa mga katawhan nga moila kinsa kining mga tawhana nga nagpahigayon ug pagpanulis, kawat ug pag-carnap sa mga motor.

Matud pa sa mga katawhan, dili makaseguro ang kapolisan nga epektibo ang lihok sa mga Barangay Tanod gumikan kay gawas nga batota lamang ang gidala kay wala kini armas, dosyentos ngadto sa tresyento ka pesos lamang ang suweldo matag bulan. Gawas pa, wala usab kini insurance sa panahon nga adunay mahitabo kanila. Sumala pa nga ang mga katawhan didto hadlok mosumbong sa mga otoredad kay basin sila maoy ma-resbakan sa mga tulisan nga armado sa tag-as ug de kalibreng armas.

Ilang gihangyo ang PNP Provincial Director nga mopadala ug tropa didto sa ilang dapit aron panid-an ug lakagon ang maong grupo kay gibati na sila ug tumang kabalaka sa kahimtang sa kahusay ug kalinaw sa ilang dapit. (Press Freedom, Vol. XX No. 29)

 
 

P2.6 Milyon budget para Hudyaka festival aprub na

Gidasonan sa Sanguniang Panlalawigan sa Zamboanga del Norte ang dos milyones ug sayentos tryanta mil ka pesos (P2,630,000.00) nga budget para sa usa ka semana nga kalihukan sa Zanorte Hudyaka Festival 2008 nga pagabuksan karong Mayo 30 hangtud sa Hunyo 7 niining tuiga.

Ang Hudyaka Festival nga pagasaulogon sa Zamboanga del Norte mao nay ika-upat karong tuiga sukad kini nahimugso niadtung 2005. Ang Provincial Tourism Council Inc. nga gipangulohan ni Atty. Michael “Alan” Ranillo isip Provincial Chairman ug Atty. Flint Concha ug Atty. Ivan Patrick Ang, Provincial Tourism Officer maoy nagdumala sa mga kalihukan sa Hudyaka Festival.

Sa ilang pag-atubang sa Sangguniang Panlalawigan kagahapon, sila si Atty. Ang ug Atty. Concha mipasabot sa katuyoan sa mga kalihukan sa Hudyaka Festival ilabi na sa budget nga maoy gamiton pagasto sa mga sports activities ug uban pang galastohan. Kagahapon gituki sa hunta probinsyal ang sulat-hangyo ni Governor Rolando Yebes nga siya kahatagan ug otoredad nga motimaan ug Memorandum of Agreement sa ngalan sa probinsya ug sa Provincial Tourism Council Inc. nga mopagawas ug pundo nga mokabat ug subra P2.6 milyones ka pesos diin ang konseho maoy tahasan sa pagamit sa maong salapi para sa mga nagkadaiyang kalihukan.

Gikuwestion ni Minority Floor Leader Edgar Baguio ang tinguha sa buhatan sa gobernador nga adto isalig sa Provincial Tourism Council ang budget sa mga kalihukan sa Hudyaka nga unta pinaagi sa ordinansa sa Sanguniang Panlalawigan nga nagtugot sa gobernador mugnaon ang Provincial Tourism Office, anaa namay gitudlo nga Provincial Tourism Officer para maoy modumala sa maong programa. Matud pa ni Atty. Flint Concha, sila sa Tourism Council gitukod sukad pa sa panahon ni kanhi Governor Isagani Amatong ug karon nabuhi pagbalik sa panahon nga milingkod si Governor Rolando Yebes. Sila sa Provincial Tourism Council maoy nagmugna aron mapahigayon ang Hudyaka Festival ug kini nasugdan niadtung tuig dos mil singko ug kini nagmalamposon. Niadtung panahona nga nasugdan ang Hudyaka, sila sa tourism council isip usa ka Non Government Organization maoy nagdumala sa mga kalihukan sa Festival.

Si Atty. Ivan Patrick Ang, bag-ong gitudlo nga Provincial Tourism Officer mipasabot nga ang pagpakigtambayayong sa Provincial Tourism Council usa ka maayong partnership sa usa ka pribadong sektor nga ilambigit sa mga kalihukan sa probinsya. Matud niya ang mga membro sa konseho nga naglihok sa mga kalihukan sa probinsya walay gidawat nga insentibo gikan sa gobiyerno busa angayan lamang sila pasalamatan. Gipaklaro sa batan-ong Provincial Tourism Officer nga ang gasto sa Hudyaka Festival dili lonlon ihatag sa Provincial Tourism Council kay ang budget niini ilang bahinon uban sa pasalig nga andam silang mohatag ug kopya sa liquidation sa mga board members sa panahon nga mahuman na ang kalihukan sa Hudyaka Festival. (The New Nandau, Vol. XVII No.43)

*

 

30 mil ka sako sa bugas nadawat sa NFA-ZN

NADAWAT na karon sa National Food Authority dinhi sa Zamboanga del Norte ang imported rice nga anaa sa 30 mil ka sako. Kini maoy gikompermar karon ni Jul Akmad Lawama, manager sa NFA.

Ang maong bugas nga nahidangat alang dinhi sa atong probinsiya maoy dugang supply sa nakapundo na daan sa NFA nga anaa sa 42,592 ka sakong bugas subay sa ilang pinaka-ulahing inventory. Gipahayag ni Lawama nga aduna pay laing 30 mil na usab ka sakong bugas ang gikatakdang mahidangat alang gihapon sa atong probinsiya.

Hungry for rice. The high demand for rice sent a myriad of people to the NFA to enlist them to avail of an affordable kilo of rice at P18.25 only.

Angayang mahinumduman nga sa gihimong Rice Consultative Meeting karong bag-o giklaro sa maong ahensiya nga dili angayang mabalaka ang mga katawhan kabahin sa bugas tungod kay igo kaayo ang supply sa NFA alang dinhi sa probinsiya. Ang nakita lamang karon nga problema mao ang kamahal sa presyo sa commercial rice. Apan sa nasayran walay gibaligya karon nga NFA rice sulod sa merkado publiko ning dakbayan sa Dipolog nga maoy gipangita sa mga konsumante gikan pa niadtong mi-aging semana.

Gipahayag ni manager Lawama nga wala sila magkulang sa distribution sa mga bugas ug nakasiguro nga kini ang naabot ngadto sa mga lisinsiyadong retailers. Gidugang ni Lawama nga kung maglisod ang mga katawhan dinhi sa Dipolog pagpangita ug NFA rice aduna silay gibaligya nga bugas diha mismo sa ilang buhatan nga anaa mahimutang sa barangay Gulayon ning dakbayan. Tulo ka kilo sa matag pamilya.

Ang pagpangunay ug baligya sa NFA ug bugas kini magsugod ala-una hangtud alas 4:00 sa hapon. Ang bugas mapalit lamang sa presyo nga 18.25 pesos matag kilo. Niaging semana, nakita nga nanaglinya na ang mga konsumante diha na sa buhatan sa NFA aron sa pagpalit sa maong barato nga bugas. Suportado karon sa NFA ang tinguha sa probinsiya nga mopalit ug bugas sa NFA pinaagi sa PIF sa mga board members. (Southpoint, Vol.1No.18)

*

 

Boksidor para sa umalabot nga boxing tournament sa ZaNorte VS. Norther Mindanao “Test of Power” atol sa Hudyaka Festival han-ay na
“Joel Dela Cruz vs. Dondon Lapuz”

Han-ay na ang tanang mga magdudulang boksidor sa Zamboanga del Norte ug Northern Mindanao alang sa umalabot nga boxing tournament nga ipahigayon atol sa ZaNorte Hudyaka Festival nga diha masaksihan sa Zamboanga del Norte Sports Complex, ning dakbayan sa Dipolog karong Hunyo 2 ug 3, 2008.

Si Nick Carbonel, Presidente sa Zamboanga del Norte Boxing Federation kon ZBF mipahayag nga kagabii palang nila na-final ang tanang boksidor nga magsangka sa duha ka gabii nga kalihukan nga mao ang ZaNorte VS. Northern Mindanao dubbed as “Test of Power”.

Ang mga boksidor gikan sa Northern Mindanao nagagikan sa Lanao del Norte, Iligan City, Cagayan de Oro City ug Bukidnon province kontra sa mga Selected Amateur Best Figthers dinhi sa Zamboanga del Norte. Matud pa sa presidente sa ZBF nga si Nick Carbonel, polos pinili nga mga boksidor gikan sa Northern Mindanao ug Zamboanga del Norte maoy magtigi sa ilang katakus sa kusog sa mahitabo unyang binokbokay sa maong torneyo.

Na-final na ang tanang boksidor nga magsangka sa duha ka gabii nga kalihukan nga mao ang ZaNorte VS. Northern Mindanao dubbed as “Test of Power”.

Ang ZaNorte vs. Northern Mindanao “Test of Power” amateur boxing tournament pagahimoon sulod sa duha ka gabii diin ang mga boksidor nagagikan sa nagkalainlaing boxing stable dinhi sa Zamboanga del Norte nga gilangkoban sa Power House Gym ni Board Member Bullet Jalosjos ug Mayor Noli Sulit sa Lalibertad sa permero distrito, Mayor Cris ug Vice Mayor Eguia sa Katipunan, Boy Sy sa lungsod sa Sindangan ug ZBF talent dinhi sa segundo distrito ug tersero distrito ug sa mga boxing stables didto sa Iligan City ug Cagayan de Oro City.

Matud ni Carbonel, gawas sa mga local boxers nga masaksihan, ang pinaka highlights sa maong torneyo mao ang Professional Boxing Championship diin ang magsangka polos mga naghawed ug bakus sa Philipine Boxing Council nga sila si Joel dela Cruz ug Dondon Lapus. Si Joel dela Cruz, lumad nga taga Villaramos sakop sa lungsod sa Manukan, Zamboanga del Norte mao karon ang RP Top Rated No. 4 ug naghawed sa bakus sa Super-Featherweight Champion gikan sa Wacky Salud Stable samtang si Dondon Lapus nga usa ka pound-for-pound boxer maoy kanhi PBF Champion.

Matud sa presidente sa ZBF, ang ZaNorte vs. Northern Mindanao “Test of Power” maoy pinaka-una sa kasaysayan sa mga boxing competetion nga gipahigayon dinhi sa Zamboanga del Norte tungod kay ang tanang boksidor sa maong torneyo polos hinashasan gikan sa nagkalainlaing lugar sa Mindanao busa ang tanan nga mosaksi malingaw gayud sa pagtan-aw. Ang ZaNorte vs. Northern Mindanao “Test of Power” boxing tournament atol sa Hudyaka Festival niining tuiga gipasiugdahan sa Zamboanga del Norte Boxing Federation ug Provincial Tourism Council promotion ug sa kooperasyon ni Governor Rolando Yebes. (The New Nandau, Vol. XVII No.43)

*

 

Kliente sa NSO nag-wild sulod sa opesina

Posibli nga nauktaba ang legal nga kaninyoon sa duha ka mga cliente sa National Statistics Office kon NSO gumikan sa kalangan sa pag-punch sa iyang application nga maoy usa sa rekisitos nga gikinahanglan sa ilang kasal sa dihang sulod mismo sa maong buhatan, kini nag-wild, gi-gisi-gisi ang kuwarta ug application atubangan sa cashier.

Mao kini ang drama nga nahitabo sa miaging adlaw, Martes, Abril 29 sa may mga alas unsi ang takna sa udto didto sa buhatan sa Provincial NSO dinhi sa dakbayan sa Dipolog samtang nag-follow-up ang usa ka cliente sa iyang gi-aplayan nga Certificate of No Mariage kon cenomar sa dihang iyang nahibaw-an nga wala pa gihapon maduso ang bayad sa cashiering machine alang sa authentication sa maong dokumento.

Matud pa sa na-suko kaayong kliente, siya mibayad sa iyang gi-aplayan nga cenomar niadtu pang Abril 17, ug gipasaligan sa usa ka empleyado nga giilang maoy ‘fixer’ sa NSO nga makuha ra dayon sunod semana, apan sa iyang pagbalik niadtung Martes, Abril 29, iyang nahibaw-an nga wala pa ma-tender sa cashiering machine ang iyang gibayad.

Gitumbok nga si Mr. Taclap, kawani sa maong buhatan maoy midawat sa kuwarta para bayad apan gikatahong iyang gi-dugay ug hatag sa cashier. Wala pod gi-priority sa cashier ug punch sa cashiering machine for payment hinungdan nga wala gayud nalihok ang maong dokumento nga maoy hinanaling gikinahanglan sa maong cliente sa nagkaduol nilang kasal. Tungod sa kalagot ug sa nagdilaab nga kasuko sa maong kliente nga murag mokilaw na ug tawo, kini wala makaagwanta sa iyang gibate, gi-gisi ang kuwarta apil na ang dokumento atubangan mismo sa cashier ug dayon biya sa NSO nga nagbalon ug dakong kayugot.

Matud pa nga nasuko ang maong kliente kay gawas sa regular nga bayrunon sa cenomar, mihatag pa kinig pakapin sa maong kawani aron lang gayud madali nga makuha niya ang maong papeles. Sumala pa nga ang maong certification maoy requirements sa rehistro sa ilang kasal hinungdan nga wala gayud ma-rehistro ilang kasal kay wala man ma-isyuhe ug cenomar sa NSO.

Sumala pa nga makadaghan na kining mahitabo sulod sa buhatan sa National Statistics Office nga si Mr. Taclap siging gi-away ug gikasab-an sa ilang kliente kay samtang mao kini ang modawat sa bayad para sa authentication sa ilang gi-aplayan nga certification, dugay ihatag sa cashier hangtud mahanaw ang kuwarta. Si Mr. Taclap nga kanunay’ng gi-reklamo sa mga katawhan, usa lamang ka yanong kawani sa NSO kay ang iyang position usa ka driver, apan mao kini ang modawat sa bayad sa mga aplikante nga wala pod badlonga sa ilang hepe nga si Mrs. Ma Lila Daan.

Angay masayran niadtung miaging semana migawas sa DXFL Headline Balita ang garapalan nga pagpangilkil sa pipila ka mga kawani nga nahimong fixer sa maong buhatan hinungdan nga si Mrs. Daan mipagawas ug memorandum sa mga kawani sa NSO aron mo-toltol kini sigun sa ilang job discription. Apan taliwala sa maong memorandum, si Taclap gikatahong padayon gihapon sa iyang ‘monkey business.’ Sulod sa maong buhatan nga wala gayud mabadlong sa maong hepe.

Pipila ka mga kawani sa maong buhatan misaway sa memorandum ni Mrs. Daan nga walay ngipon kay wala motukma sa salaod nga nabuhat sa mga nagpabuyag nga empleyado. (Press Freedom, Vol. XX No. 29)

*

 
PNP, DENR, Phil Army masaligon nga moduyog
sa kawsa sa probinsya batok illegal mining

MASALIGON karon ang mga kadagkuan sa Philippine National Police, Philippine Army ug Department of Environment and Natural Resources (DENR) nga moduyog sa kawsa sa kagamhanang probinsiyal sa Zamboanga del Norte batok sa mga illegal mining ug panalipdan ang kinaiyahan sa Zanorte.

Usa ka Memorandum of Undertaking ang gipirmahan tali nila ni Governor Rolando Yebes, Mayor Rolando Tablezo, SB Member Wilberth Magallanes sa lungsod sa Leon Postigo, Carlito Tuballa sa DENR, Edgardo Callanta sa CENRO Liloy, Col. Romulo Bambao commanding officer sa 101st Brigade, Philippine Army, Police Sr. Superintendent Mario Yanga ang Police Provincial Director sa Zanorte ug Atty. Jes Gal Sarmiento, Jr. sa ZANEMO.

Ang maong kasabutan naumol subay na sa pagpakabana sa mga opisyales sa Leon Postigo ug sa Probinsiya diha na sa operasyon sa small scale mining sa upat ka mga barangay sa maong lungsod. Karong bag-o usa ka team nga gilangkuban gikan sa mga local, provincial ug national officials ang mihimo ug occular inspection sa sitio Matunog sakop sa barangay Tinuyop, Sitio Lupayan sa barangay Midatag, barangay Sipacong ug Sitio Longamitan sa barangay Nasibak nga parehong sakop sa lungsod sa Leon Postigo. Ilang nakita ang anaa sa dos mil ka mga illegal miners nga nag-operate sa maong mga lugar.

Gov. Yebes declares an all out war against illegal mining as he inks a Memorandum of Undertaking with Leon Postigo officials among others.

Niadtong Abril 10 niining tuiga si Governor Yebes ang miluwat kini ug Cease and Desist Order. Nagmando pagbungkag sa tanang matang sa small scale mining sa lungsod sa Leon Postigo. Ang tanang mga tunnels apil na ang mga boul mills, mga payag nga gipangtukod sulod sa mining area ug mga ekipo ang apil kini sa ipabungkag. Human ang gihimong occular inspection ngadto sa mining area dala ang order sa gobernador kadaghanan sa mga small scale miners ang misanong kini sa maong hangyo nga mibiya sa maong lugar apan aduna pa gihapoy pipila ka nila ang nagmagahi.

Sa kabahin sa Philippine Army, gipasalig ni Col. Bambao nga magpabilin silang mohimo ug pag-patrolya sa maong mga mining area aron masiguro nga dili na mobalik pa sa ilang operasyon ang maong mga illegal miners. Susama usab ang gipasalig ni Police Provincial Director Mario Yanga nga magpabilin ang ilang suprta ngadto sa kagamhanang lokal batok sa gitawag nga environmental terrorists. Gipahayag ni CENRO Callanta sa Liloy nga angayan gayud nga i-preserbar ang maong dapit ilabina nga kini usa ka watershed ug anaa pa ang mga dagkong kahoy.

Gikalabak-an nga ma-kontaminado ang Talinga River kung magpabilin ang mining operation. Alang kang Callanta ang maong suba maoy usa sa pinaka-nindot nga suba sa tibook probinsiya. Angayang masayran nga ang provincial government ang maoy adunay gahom pag-issue ug permits alang sa small scale mining operations nga magbasi usab sa rekomindasyon sa Provincial Mining Regulatory Board, apan ang operasyon sa small scale mining sa Leon Postigo giklaro ni Governor Yebes nga walay bisan usa kanila ang nahatagan ug permit sa probinsiya.

 
 

 HULAGWAY BALITA

 

 

*

 


Western Mindanao Reg’l Boy Scout council rank 4 sa tibook nasud

GIKAN sa pinaka-ubos nga bahin misaka na karon sa ika-upat nga ang-ang ang Western Mindanao Regional Boy Scout Council sa tibook Pilipinas.

Kini maoy nag-unang report nga gipadangat sa Regional Scout Committee pinaagi ni Western Mindanao Regional Chairman Governor Rolando Yebes didto sa dakbayan sa Oroquieta sa pagbisita ni Makati Mayor Jejomar Binay, National President sa Boy Scouts of the Philippines. Gibutyag ni Governor Yebes nga sa tuig 2007 mitala ang atong rehiyon ug 92,783 ka mga miyembro nga adunay pagsaka ngadto sa 5, 799 ka mga scouts kung itandi sa tuig 2006 nga mitala lamang ug 86,984. Kini maoy usa sa hinungdan nga nahimo na karon Rank No. 4 ang Western Mindanao sa tanang Boy Scouts Regional Council sa nasud.

Gov. Yebes with Makati Mayor Jejomar Binay

Nakatampo sa maong kalampusan mao ang pagpaningkamot sa ubang mga local councils sa pagpahigayon sa mga kalihukan ilabina atul sa scouting month. Gidugang sa gobernador nga aron magpabalin ang mga miyembro sa maong kalihukan mao nga ipakita sa mga unit leaders nga seryoso diha sa tanang kalihukan sa BSP sama sa pag-panghingusog sa Citizenship training, character building ug ang pagserbisyo ngadto sa uban nga mag-umol sa maayong gawi sa mga kabataan.

Gilantaw nga usa ka dakong hagit karong tuiga sa BSP ang Department of Education Order No. 19 sa hugtanong pagpatuman sa No Collection Policy sa tanang public elementary gikan sa Grade I ngadto sa Grade III ug secondary level. Matod pa ni Governor Yebes nga dili kini maoy babag sa pagpalambo sa mga kabataan ilabina kabahin sa scounting. Gipasalamatan ni Governor Yebes ang tanang mga naglihok sa local council, DepEd, mga ginikanan, mga nagkalain-laing ahensiya sa gobyerno ug mga katawhan diha na sa suporta nga gilugway sa kalihukan sa scouting.

Sa mensahe usab nga gipaabot ni BSP President Jejomar Binay nga dako ang iyang panglantaw alang sa kalambuan sa maong kalihukan. Gani, iyang gihimo karon ang lakang nga mahimong makahulam ug kuwarta sa bangko ang local council pinaagi sa national council aron maoy gamiton alang sa pagpalambo sa maong kalihukan. Matod pa ni Binay nga kung adunay plano ang matag council nga motukod ug BSP building nga nagkinahanglan ug pundo andam siyang motabang. Human sa biyahe ni Governor Yebes sa Oroquieta, ang gobernador ang midaritso kini didto sa lungsod sa Sibuco ning atong lalawigan sa Zamboanga del Norte. Saulogon sa maong lungsod ang ilang ika 49 ka tuig nga kasumaran sa pagkahimugso sa Sibuco. Gipabati ni Governor Yebes ang iyang pagdayeg ngadto sa mga opisyales ug mga katawhan sa maong lungsod tungod sa panaghi-usa. Sa karon ilang gihimo ang Mini-Hudyaka nga anaa nakahan-ay ang daghanang kalihukan. Kini tipik sa ilang pagpangandam sa ilang pagsalmot sa Hudyaka Festival sa Zanorte.

Samtang gipahayag usab ni 3rd District Congressman Cesar Jalosjos nga  dako kaayo niyang kalipay nga pinaagi sa suporta sa mga opisyales, mga miyembro sa 44th IB Philippine army ug mismong mga katawhan walay nahinagbo nga mga dagkong problema sa padayon karon nga pagtrabaho sa coastal road. Sa pagbisita nila ni Governor Yebes ug Congressman Jalosjos kagahapon, gipahigayon usab ang ground breaking sa water supply system sa maong lungsod, pagbukas sa agri-fair ug switch-on sa mga suga palibot sa plaza. Dako kaayo ang pagpasalamat ni Mayor Norbe Edding nga nagpabilin nga gihatagan sa igong pagtagad nila ni governor Yebes ug Congressman jalosjos ang Sibuco.

Apil sa mibisita sa maong lungsod mao sila si 3rd disitrict board member Anecito Darunday ug katipunanan vice mayor Patchi Eguia nga maoy una niyang higayon nga nakataak siya sa maong lungsod. (Southpoint, Vol.1No.18)

*

 

Pulso Sa Katilingban
Cicer M. Binghay
My Congratulations . . . condolences

Congratulation kang Hon. Judge Arturo M. Paculanang, Regional Trial Court 9th Judicial Region, Branch 11, Zamboanga del Norte, awarded the Scroll of Honor, 3rd placer, Commitment To Justice from the Rotary Club of Manila for having shown a high commitment to speedy justice in disposing of cases in the year 2004. Maong pasidungog permado ni Gno. Cesar C. Ubaldo, Presidenti, Gno. Fortunato Gupit, Jr. Past President and Chair Commitment to Justice Annual Awards Committee, Gno. Augusto Z. Fajardo, Club Secretary ug Gno. Alejandro L. Yap, Jr. Immediate Past President, Director, Club Service A.

Angayan, dalayegon kaayo nga nakit-an ang talagsaong accomplishment ni Judge Arturo “Turing” M. Paculanang nga sukad naglingkod sa iyang hawanan sa hustisya daghan ang nakadayeg sa iyang mga paagi o proceso paghusay sa dinagko o ginagmay nga mga kaso sa madaling panahon. Dili katumbasan ang kalipay sa mga nakasang-at sa ilang mga kaso sa iyang hawanan sanglit walay langan-langan ang paghusay dayon dispatsar. Dili ingon sa ubang mga hawanan sa hustisya nga ang mga kaso ilabi na ang civil cases panugkan na lamang ug makapila sa kuyayi, mangamatay na lang ang mga defendants ug plaintiffs hasta mga testigos mga hanaw . . . apan ang kaso naa pa . . . naglagnay ug ang mga dokumento o mga papeles nga gisuporta sa maong kaso nangalata na sa gidugayon.

Atong ipang hinaot nga matakdan dinhi ang ubang mga hues nga madasig sa pasidungog naangkon ni Turing Paculanang nga wala magtanga pagpang alagad sa daling hustisya aron ang mga hingtungdang mga nalambigit sa mga kaso dili mapurdoy pagsamot sa gastos ug pag-antos tinuig panahon sa ilang kinabuhi. Sa katapusan, naimplimentar ang City Ordinance 63 Series of 1988 human nakalabay ang 20 ka mga tuig sukad natikad ang maong balaodnon. Karon pa ni City Mayor Evelyn Uy nga nalihok ang maong balaodnon nga gibali-wala lamang sa mga nangaging mga mayores sa dakbayan sa Dipolog gumikan sa pamolitika, pihig-pihig ug pabor-pabor.

Natong-nan gilayon sa maong ordinansa ang mga naninda sa mga sitsiritas nga nagtungtong na sa mga pedestrian lanes ug mga sidewalks diha sa Rizal Avenue ug Gen. Luna St. Kini kay nasugdan ni Mayor Uy magpadayon ang implimentasyon hangtod mawagtang ang mga magpapatigayon nga nagpahimulos sa ginadili nga mga dapit sa maong balaodnon. So Congratulation Mayor Evelyn Uy. Ang pag implimentar sa setback nakahatag kahusay ug konbenyenti sa trapiko sulod sa dakbayan kadalanan. Sosamang pahalipay kanimo Engr. Gaudencio Bagolboc of the City Building Officials nga maoy nangulo sa malampusong task force pagbugaw sa mga illegal vendors.

Niadtong Abril 24 ning tuiga namatay si Engr. Donato Miranda, suod kauban nako sa kaniadto BPWH diin siya diha sa Planning Section ug ako usa ka Mat’ls. Lab. Aide ubos ni Anhing mga Engrs. Romeo Flores ug Pafnocio Saldariega mga tuig 1955-1971. Nasuod kami kay kanunay kaming mag kauban “on the field” sa makadaghan nga dili nako mahikalimtan ang iyang pagka mangitagdanon sa ingon kanamo nga mga casual Lab. Aide o mga kamaniro.

Niadtong Abril 25 mitaliwan usab si kanhi Bise Gobernador Eduardito S. Pacatang nasuod kaayo nakong kauban diha sa Provincial Capitol pagdaog sa Reform Team nga gipangulohan ni Bise Gov. Vergilio “Lingling” A. Ramos, BM’s Atty. Reuben Maraon ug Fr. Ug Atty. Paulo Briones. Si Guy Pacatang gihimong sekretaryo ni BM Maraon ug ako sekretaryo ni Bise Gov. Lingling Ramos. Tipon kamig opisina ubos ni Gov. Vergilio B. Lacaya. Mao lagi, of all our lives dili malalis death is a fact of life. We are startled into that reality when someone we know and so close dies. We know death is inevitable, yet we live as if we’re never going to die. Grief can be overwhelming, agonizing, numbing. But no matter how terrible, we have to go through it. Akong pahasubo uban sa akong pamilya sa nagbangotang pamilya kanila ni Engr. Miranda ug Atty. Guy Pacatang uban sa pag-ampo nga magmalinawon ilang pagtaliwan ning kalibotan. (Press Freedom, Vol. XX No. 29)

 
Credits: Press Freedom is published every Saturday and entered as 3rd class mail matter in Dipolog City. Printed by Young Printing Press with Editorial Office located at Upper Turno, Dipolog City. Tel. No. (065) 212-4343 or 212-6665

 

ZMC files
by Hisyl Palma
Padayon ang hinabang alang sa ZaNorte: Morelos-Morrisson

 

Nagapadayon hangtud karon ang mga pilantropo sa paghatud sa ilang mga hinabang alang ngadto sa mga kabus nga katawhan dinhi sa Zanorte. Mao kini ang usa sa mga tumong ug tinguha ni Jo Morelos Morrisson nga magpadayon ang paghatud sa  mga hinabang  nga gikan sa nasud sa Scotland human personal niyang  nasugdan ang “Orkney  Helping Hands to the Philippines” kaniadtong tuig 2005 didto sa Kirkwall Orkney Island sa nasangpit nga nasud.

Si Jo Morelos Morrisson usa ka lumad nga taga Dipolognon ug kanhi usa ka nurse sa Balfur Hospital sa Orkney Scotland kinsa minugna sa fund raising sa naasoy’ng lugar aron matunol ang mga hinabang dinhi sa mga kabarangayan ug tambalanan sulod sa lalawigan sa Zamboanga del Norte.  Diin natunol ni Morrisson ang gipangdonar nga mga hinabang gikan na sa nasangpit nga nasud sama sa medisina, medical supplies, sapot sa mga kabataan, nagkadaiyang medical equipments ug uban pa. Kahibaloan nga kaniadtong bulan sa Disyembre 10 sa tuig 2005 didto sa Brgy Tipan sakop sa lungsod sa Mutia, mismo ang managtiayon Morrisson personal nilang gipang-apod-apod sa mga katawhan ug kabatanonan ang  mga sapot ug hinabang sama sa timbangan alang sa puya, diapers, habol ug uban pa, kauban sa grupo sa Tabang ni Lando sa Comunidad kon TLC pinaagi sa buhatan sa Provincial Health Office sa pagpangulo ni Dr. Carmencita Icao, ang Provincial Health Officer ug uban usab sa buhatan sa Provincial Tourism sa pagpangulo ni Atty. Ivan Patrick Ang, ang Hospital In-charge aron mahingpit ang paghatag ug dugang libreng serbisyo sa kagamhanang probinsyal ngadto sa mga katawhan.

Gitinguha ni Jo Morelos Morrisson nga magpadayon ang paghatud sa mga hinabang nga gikan sa nasud sa Scotland human personal niyang nasugdan ang “Orkney Helping Hands to the Philippines” kaniadtong tuig 2005 didto sa Kirkwall Orkney Island sa nasangpit nga nasud.

Atol sa interview ni Jo Morelos Morrisson iyang gipahayag nga ang “Orkney a Helping Hand to the Philippines” ang nakigduyog’ sa “Phili’s Angels” aron sa susamang tumong ug tinguha nga mapadayon ang mga hinabang ug alang kang Morrisson dili niya pakyason ang mga katawhan sa Zanorte ilabina ang mga kabus nga nanginahanglan pag-ayo sa hinabang ilabina ang medisina nga maoy nanag-unang gikinahalan sa panglawas sa mga katawhan. Gipaklaro sa maong Ginang  nga ang gimugna nga charity works sa mga katawhan sa Scotland nga diin ang Orkney a Helping  Hands to the Philippines susama usab kini sa gitinguha sa Phili’s Angels nga diin ang Zanorte maoy prayoridad sa mga pilantropo nga diin mibati sa ilang sensirong pagpangalagad alang sa mga kabus nga katawhan.

Dugang saysay ni Morrisson nga adunay 3 ka mga foriegner  nga gikan sa nasud sa London, Australia  ug Scotland ang mohatag ug dolyares nga salapi pinaagi na sa pagpahibalo kaniya sa usa ka e-mail aron madungagan ang mga hinabang niini. Sanglit ang Phili’s Angels sa Zanorte ubos sa pagpangulo sa Chairman nga si Morrison iyang gipasalamatan si Governor Rolando Yebes diha sa iyang administrasyon tungod sa kinakangkasing niining pag-abi-abi diha sa mga kauban ni Morrison ug suma  pa, giplanohan sa taga Phili’s Angels nga mobalik sila dinhi sa lalawigan alang na sa paghatud sa susamang serbisyo.(Shily,Southpoint, Vol.1No.18)

 

Credits: The Southpoint is the latest weekly news publication circulated in the province of Zamboanga del Norte, Zamboanga Sibugay and Misamis Occidental. It is registered under DTI Permit No. 00282924. The Southpoint can be reached through the following contact info: Sindangan, ZN; Landline: 212 – 4019; Mobile No.: +63 921 458 3830. Email: southpoint8@yahoo.com

 
 

ZaNorte Investment Code giamendahan

Giamendahan sa Sanguniang Panlalawigan ang Zamboanga del Norte Investment and Incentives Code nga pa-ubsan ang tuig sa paghatag ug tax exemption ngadto sa mga kompaniya o corporasyon nga mobobo ug pohunan dinhi sa atong probinsya. Kini maoy pinasikad sa sulat-hangyo nga gipadangat ni Governor Rolando Yebes ngadtu sa hunta probinsyal sa tinguha nga sayong makahipos ug buhis ug income ang probinsya pinaagi sa mga negosyante nga gustong mobutang sa ilang negosyo dinhi sa atong dapit.

Ang Zamboanga del Norte Investment and Incentives Code pinaagi sa ordinansa na-aprubahan niadtung 1997 kon unsi na ka tuig ang milabay. Sa iyang sulat ngadtu sa hunta probinsyal, gipasabot ni Governor Yebes nga samtang ang kagamhanang probinsyal pinaagi Provincial Planning and Development Office ug ang Dipolog, Dapitan, Polanco, Katipunan, Roxas ug Manukan kon DDPKRM Project Ma-nagement Office padayon nga nag-awhag ug nag-promoter sa incentives diha sa maong balaod ang wala pa sukad mausab sibo sa kasamtangang kahimtang karong panahona.

Niadtung Oktobre 7, 2005, ang buhatan sa gobernador mipagawas ug executive order No. 05-06 aron pagpa-epekto sa reorganization ug reconstitution sa maong incentives code. Pinasikad sa review ug recommendation sa Zambo-anga del Norte Investment and Incentives Board nauyonan ang pag-amendar sa pipila ka probisyon sa maong balaodnon gikan sa lima ka tuig ngadto nalang sa duha ka tuig ang libreng buhis sama niining mosunod; non-refundable filing fee nga dos mil ka pesos pagabayran sa Provincial Treasurer; Incentives to registered enterprises, sulod sa duha ka tuig nga rehistrasyon, kini dili pabayron ug mayors permit, business sales taxes ug uban pang buhis nga gi-imposar sa siyudad ug lungsod diin nahimutang ang maong negosyo.

Dili pabayran ang abang sa yuta sulod sa duha ka tuig sa unang tulo ka qualified enterprises diha sa Provincial Agri-Industrial Center kon PAIC, sa Barangay Irazan sa lungsod sa Roxas. Ang abang sa yuta pagabayran ug dose pesos matag metros kuadrados sa ikatulo na ka tuig nga operasyon ug pagatuboan ug dyes porsyento sa ika upat ka tuig ug dugang dyes porsyento sa ika lima ka tuig.

Alang kang Board Member Ricky Mejorada, angayan una tun-an ug maayo sa hingtungdang komitiba ang proposed ammendments nga giduso sa gobernador ilabi na nga nakabutang niini ang full exemption sa mayors permit nga bayrunon nga gi-imposar sa siyudad ug lungsod ilawom sa DDPKRM. Si Minority Floor Leader Edgar Baguio nagkanayon nga dili na kinahanglan langanon pa sa pagtuon sa komitiba ang hangyo sa gobernador ilabi na nga ang sulat gi-certipayan nga “urgent”. Para ni Baguio, ang proposed ammendments dili komplikado ilabi na ang pag-usbaw sa bayranan ug pagpa-ubos sa tuig nga libreng abang sa yuta gikan sa lima ka tuig ngadto nalang sa duha ngadto sa tulo ka tuig.

Matud ni Baguio dunay daghang aplikanting magpapatigayon ilabi na ang mga langyaw nga dunay dakong tinguha ug interes nga mobobo ug pohunan dinhi sa atong probinsya. Bisan tuod kon dunay pipila ka tuig nga tax exemption apan ang maka-benepisyo niini mao ang lungsod ug sa iyang katawhan kay daghan man ang makasulod ug trabaho. (The New Nandau, Vol. XVII No.43)

 

Credits: The New Nandau is a member of the Publishers Association of the Philippines (PAPI). Editorial office is located at 076 Quezon Avenue, Dipolog City with Tel. No. (065) 212-3794; Cell No. +639205201041

*

MORE NEWS NGA BINISAYA

 

 

NOTE: SEND US YOUR NEWS.  Tell us what's going on in your barangays, clubs, schools, businesses and non profit organization. You can also send notices and announcements.
          

 

    Email to webmaster@dipolognon.com

      
Google
WEB THE DAILY DIPOLOGNON
 

THE DAILY DIPOLOGNON
DIPOLOG CITY, PROVINCE OF ZAMBOANGA DEL NORTE PHILIPPINES
www.dipolognon.com www.dipolognon.net  www.dipolognon.org  Keyword: dipolognon
www.dipologcity.com  www.dipologcity.net  www.dipologcity.org  www.dipolognon.com  www.dipolognon.net  www.dipolognon.org    www.dipolog.org  www.dapitan.com   www.eartajo.com  www.cagayandeoro.us 
www.artajo.us www.artajo.info www.eddie.artajo.name www.zamboangadelnorte.com  www.zambonorth.com  www.pagsalabuk.com  www.dipolog.biz www.artajo.biz  www.plasticextrusion.us www.cebu.org
www.davao.us  www.tagum.com  www.giscard.us  www.pagadiancity.com www.malaybalay.net  www.ozamis.com  www.tangub.com  www.oroquieta.net
 www.nabunturan.com www.znuc.org www.znch.ph
www.gingoog.com  www.ozamiz.us www.general-santos.com  www.surigao.net  www.kidapawan.com  www.iligan.us www.raelene.us  www.cagayan-de-oro.com   www.mutyasadipolog.com
 
www.zamboanga.net   www.palmbeachgardens.us   www.islandgarden.net  www.cotabato.net  www.tacurong.com  www.butuan.us  www.pagadian.com  www.dipolog.us
www.zamnai.com
www.dipologhotels.com
   www.dipologpress.com  www.dipologsardines.com   www.extrusion.us www.ozamizcity.com  www.marawi.net www.dipologchamber.com

Copyright©2008 by The Daily Dipolognon All Rights Reserved  PRIVACY POLICY & DISCLAIMER
Email : webmaster@dipolognon.com  Since October 18, 2000