April 21, 2008

 

Mayor Uy gihangyo pahugtan ang seguridad
MGA NEGOSYANTE SA DIPOLOG NA-ALARMA SUNODSUNOD TULIS

MIPALANOG karon sa ilang hangyo ang mga negosyante dinhi sa dakbayan sa Dipolog pinaagi sa Dipolog Chamber of Commerce and Industry (DCCI) pinaagi sa ilang presidente nga si Mr. Edgar Bagarinao nga pahugtan ang seguridad sa siyudad tungod sa sunod-sunod nga nahitabong tulis. Kini maoy usa sa ilang hangyo nga gipaabot karon ngadto sa atong kapolisan ug sa mga hepe ehekutibo sa matag local government unit subay na sa gikatakdang pagpahigayon sa Mindanao Business Conference karong Agosto 27-28 niining tuiga dinhi sa Dipolog, Zamboanga del Norte.

Sa gihimong interview human sa signing sa MOA tali sa kagamhanang probinsiyal ug sa DCCI ug Philippine Chamber of Commerce and Industry (PCCI), gipahayag ni Bagarinao nga moduol sila ngadto kang Police Provincial Director Police Sr. Superinten-dent Mario Yanga aron sa paghangyo nga sulod sa mga panahon nga gipahigayon ang MinBizCon dinhi sa atong dapit ipatuman ang hugot nga segu-ridad o manglimpiyo. Mao usab ang ilang hangyo ngadto na sa 101st Brigade, Philippine Army nga anaa sa Del Pilar, Piñan. Gidugang ni Bagarinao nga kinahanglan mohimo ug mga security measures ang atong mga otoridad ilabina sa mga lugar ug karsada nga posibling ma-agian sa mga negosyante nga maoy maglangkub sa mga delegado sa maong conference nga gikan sa mga nagkalain-laing lugar dinhi sa Mindanao. Alang kang Bagarinao nga ang paghatag ug hugot nga seguridad sa atong dapit dili lamang sa mga adlaw nga ipahigayon ang Mindanao Business Conference, kina-hanglan nga ipatuman kini sa mas sayo nga panahon. Iyang gipasabot nga igo lang silang nagpahinumdom ngadto sa atong kapolisan tungod kay ila kining trabaho ang pagpatun-hay sa kahusay sa lugar. Gihatagan ug gibug-aton ni Bagarinao nga dili sila gusto nga maulawan ang atong dapit tungod lang sa mga binuhatan sa mga dautang tawo.

Para ni Atty. Allan Ranillo, Provincial Chairman sa Tourism Council nga ang nanghitabo nga sunod-sunod nga tulis ug budol-budol dinhi sa atong dapit kini usa lang ka talagsaon nga panghitabo tungod kay dili sama sa ubang mga lugar nga kada-adlaw na adunay mabik-tima. Busa iyang ikapasigarbo nga malinawon ang atong dapit bisan sa maong mga panghi-tabo kung itandi sa ubang mga lugar sama sa Metro Manila. Samtang gipahayag usab ni Governor Rolando Yebes nga andam ang kagamhanang probinsiyal sa Zamboanga del Norte nga motabang sa kapolisan aron mahatagan ug seguridad ang mga negosyante dinhi sa Mindanao nga mag-abot dinhi sa Dipolog karong Agosto 27-28 niining tuiga. Usa ka task force ang tukoron ni Governor Yebes nga motabang sa intelligence gathering sa atong kapolisan.

Angayang masayran nga sa mga nanghitabong tulis dinhi sa Dipolog gikan kaniadto ug hangtud sa pinaka-ulahing biktima niadtong mi-aging adlaw wala pay bisan usa ka mga tulisan ang nasikop sa mga polis. Gikatakda nga mahidangat dinhi sa Dipolog sulod ning bulana si PNP Chief Gen. Avelino Razon. Mahinum-duman nga nahimong biktima karong bag-o ang usa ka miyembro sa prominenting pamilya dinhi sa Dipolog sa budol-budol nga diin nailad kini ug usa ka milyon ka pesos. Ang biktima ang nagpatabang kini kang Executive Secretary Ermita hinungdan nga ang atong kapolisan ang gimanduan kini sa pagsulbad sa maong kaso. (The New Nandau, Vol. XVII No.40)

*

 

MinBizCon ipahigayon sa ZaNorte

PLANTSADO na ang pagpahigayon sa pinaka-unang Mindanao Business Conference (MinBizCon) dinhi sa Zamboanga del Norte nga gikatakda karong Agosto 27-28 niining tuiga. Sa maong mga adlaw mahidangat dinhi sa atong dapit ang mga dagkong negosyante sa tibook Mindanao alang sa maong kalihukan.

Ning semanaha usa ka Memorandum of Agreement ang gipirmahan nila ni Governor Rolando Yebes sa Provincial Government sa Zamboanga del Norte, Edgar Bagarinao, Presidente sa Dipolog City Chamber of Commerce and Industry, Edwin Capili, Vice Chairman sa MinBizCon ug Crisanto Frianeza nga maoy Secretary General sa Philippine Chamber of Commerce and Industry (PCCI).

Unod sa maong kasabutan, ang kagamhanang probinsiyal ang motabang sa Dipolog City Chamber of Commerce and Industry nga maoy host sa MinBizCon sa pagpahigayon niini dinhi sa atong dapit. Alang kang Governor Yebes dako kaayo ug ikatabang ang maong kalihukan aron mabaligya ang atong probinsiya ilabina sa natad sa torismo ug uban pang mga produkto niini. Gilantaw nga sa umaabot nga panahon ang probinsiya sa Zamboanga del Norte maoy ilhong Convention Capital sa Western Mindanao. Ang provincial government sa Zanorte uban sa kagamhanang lokal sa Dipolog ug Dapitan ang nagkahi-usa ug nagkasinabot uban sa DCCI ug sa PCCI nga mahimong molambo ug magmalampuson ang maong dakong kalihukan.

Gipahayag ni Governor Yebes, nga ang pagpahigayon sa MinBizCon dinhi sa atong probinsiya nagpaila lang nga nailhan na ang atong lalawigan sa tibook nasud. Nakita ang kaugmaon sa Zanorte nga molambo ug maoy mag-una sa tibook Mindanao. Kaniadto ang susamang kalihukan ang adto himoon sa mga dagko kaayo nga lugar sama sa Davao, apan karon gihatagan ug higayon nga anhi kini himoon sa atong probinsiya. Ang gikalipay pag-ayo ug dako sa gobernador nga sa tibook Western Mindanao mas nauna pa ang Zamboanga del Norte sa natad sa torismo ug negosyo. Iyang gipasalamatan sila si Bagarinao ug Capili uban sa mga opisyales sa DCCI ug sa PCCI sa ilang pagpaningkamot.

Gipasabot usab ni PCCI Secretary General Frianeza nga ang mga partisipante sa MinBizCon ang naglangkub kini sa 32 ka mga nagkadaiyang chamber dinhi sa Mindanao kansang mga miyembro mga negosyante. Kini ang mag-abot dinhi sa Zamboanga del Norte uban usab sa laing mga chamber nga gikan sa Luzon ug Visayas aron magbinayloay ug mag-umol ug mga programa pagtabang sa gobyerno alang sa kalambuan. Usa sa maayong aspeto sa pagpahigayon sa maong kalihukan mao ang networking sa tanang mga negosyante dinhi sa Mindanao apil na sa Luzon ug Visayas aron makakuha kini ug mga oportunidad kabahin sa ilang matag negosyo.

Dako ang pagpasalamat ni Mr. Edgar Bagarinao, Presidente sa DCCI kang Governor Yebes sa pagtimaan sa maong kasabutan. Matod pa ni Bagarinao nga ang pagpahigayon sa MinBizCon dinhi sa atong dapit, kini maoy katapusan nga panahon sa dugay na nilang gihulat nga mahitabo kini dinhi sa atong probinsiya partikularmente dinhi sa Dipolog. Mahinumduman, tulo na ka tuig ang nakalabay anhi unta sa Dipolog himoon ang maong kalihukan apan tungod sa mga problema nga nahinagbo wala kini mahinayon gumikan sa rason nga dili kaya nga maka-akomodar ang Dipolog sa kadaghan sa mga partisipante. Gi-awhag ni Bagarinao ang tanang mga katawhan ug mga opisyales sa gobyerno nga motabang alang sa kalampusan unya sa maong kalihukan

Misaksi sa pagtimaan sa maong kasabutan mao si PCCI Regional Governor for Northern Mindanao Elvie Tan, taga Department of trade and Industry, ubang mga opisyales sa DCCI, PCCI, PIA, PIC ug mga miyembro sa ZNUC. Masaligon si Mr. Edwin Capili,  PCCI Regional Governor for Western Mindanao ug maoy Vice Chairman sa MinBizCon nga dili mahitabo karon ang nahinagbo nga problema kaniadto nga maoy gihimong rason hinungdan nga wala mahinayon ang pagpahigayon sa Mindanao Business Conference dinhi Dipolog tulo na ka tuig ang nakalabay.

Mahinumduman, nakontrobersiyal ang wala mahinayon nga Minbizcon dinhi sa Dipolog kaniadto tungod kay gi-question ang kapasidad niini diha sa pag-akomodar ug mga dagkong conference. Kulang ug mga lawak ang mga hotels ug mga lodging house pag-akomodar sa mga partisipante. Gikan sa Dipolog City Airport bugtong motorcab lang ang nag-unang transportasyon nga maoy masakyan sa mga partisipante paingon sa sentro nga bahin sa siyudad. Apan alang kang Capili, kung itandi sa tulo na ka tuig ang nakalabay andam na sila karon sa pag-host sa maong conference. Una niini gibati niya ang kahadlok diha na sa pagdumala nila karon sa maong dakong kalihukan dinhi sa Zanorte apan dako ang iyang pagsalig nga kini ang magmalampuson tungod kay anaa ang suporta ni Governor Yebes ug ubang mga opisyales sa probinsiya.

Iyang gidugang nga usa kini ka talagsaon kaayo nga higayon nga ikapakita sa atong probinsiya ang mga maayong talan-awon niini. Gidayeg ni Capili ang lederato ni Governor Yebes nga pinaagi sa pagpaningkamot gipakita sa atong probinsiya ngadto sa tibook Pilipinas ang mga maayong programa  aron malangkat sa talaan nga maoy pinaka-pobre nga probinsiya sa tibook nasud ang Zamboanga del Norte. Ang MinBizCon ang sentro kini nga ipahigayon diha sa Zamboanga del Norte Convention and Exhibition Center nga diin gihulagway ni Capilin nga haom alang sa maong kalihukan. Mas ikapasigarbo pa kini kung itandi sa ubang mga venue kung hain gipahigayon ang Mindanao Business Conference. Dako usab ang kalipay ni PCCI Regional Governor for Northern Mindanao Elvie Tan nga anhi sa Dipolog, Zamboanga del Norte himoon ang maong conference. Atol sa Mindanao Business Conference niadtong mi-aging tuig didto sa General Santos City na-uyonan sa tanan nga ang Dipolog City Chamber of Commerce and Industry maoy host sa MinBizCon karong tuiga. Dako ang iyang pagsalig uban sa suporta sa provincial government sa Zamboanga del Norte ug sa kagamhanang lokal sa Dipolog ug Dapitan nga mahimo dinhi sa atong dapit ang pagpahigayon sa maong kalihukan. (The New Nandau, Vol. XVII No.40)

*

 

Appointment ni Ang gidasonan sa SP-ZN

Gidasonan na sa balay balauranan sa Zamboanga del Norte ang pagkatudlo kang Atty. Ivan Patrick Ang sa pagka provincial tourism officer human usab mamugna ang buhatan sa turismo sa probinsiya.

Kahinumduman sa hinapos nga bahin sa tuig 2007 gipanday sa Sangguniang Panlalawigan sa ZaNorte ang usa ka ordinansa nga maoy nagmugna sa buhatan sa Provincial Tourism Office nga kaniadto naka kabit lamang sa buhatan sa gobernador kay walay separar nga opisina. Pinasikad sa pagka himogso sa ZaNorte Provincial Tourism Office gitudlo ni Governor Rolando Yebes si Atty. Ang sa pagka hingpit nga pangulo sa maong buhatan human nahimo kini designate provincial tourism officer gikan sa Oktobre 2004 hangtud sa iyang pagka tudlo.

Si Atty. Ang sa interview sa mga meyembro sa Zamboanga del Norte United Correspondents mipahayag nga nagpasalamat siya ug daku sa gisagup nga lakang sa atong mga opisyales sa lalawigan nga nagpakita gayud sa ilang dakung tinguha nga mapalambo ang industriya sa turismo sa atong lugar para makatabang sa ekonomikanhong kahimtang sa atong mga katawhan diin opisyal gayud nga gimugna ang provincial tourism office ug nagtudlo ug pangulo niini.

Para ni Atty. Ang kini nga lakang nga gihimo karon sa atong mga opisyales sa probinsiya makatabang ug daku diha sa pagpadas-og pa sa dugang mga programa ug mga lakang nga makatabang sa pagpa-uswag sa industriya sa turismo. Ang provincial tourism officer sa ZaNorte nagkanayon nga nagapadayon karon ang ilang mga pagpaningkamut nga malaksi gikan sa huna-huna sa ubang katawhan sa ubang bahin sa atong nasud nga gubot ug samok ang atong lalawigan tungod sa mga nagpanghitabo sa dakbayan sa Zamboanga diin nadulahig ang pangalan sa probinsiya.

Matud pa ni Atty. Ang kini ang rason ngano nga gipadas-og ni Governor Yebes ang paggamit sa pangalang ZaNorte sa atong probinsiya aron maklaro nga lahi ang atong lugar sa dakbayan sa Zamboanga nga kanunay mabalita nga anaa ang mga kasamok. Pinaagi sa pagpahigayon sa Hudyaka Festival, matud pa ni Atty. Ang maong panglantaw inanay na nga nawagtang human masaksihi ug masinati sa daghanang mga bisita ang kamalinawon sa atong probinsiya.

Sa samang bahin mipalanog usab ang provincial tourism officer sa ZaNorte nga unta mapahigpitan sa siyudad sa Dipolog ang ilang kampanya batok sa mga krimen nga nagpanghitabo karon ug maoy nakapabalaka sa katawhan basin ug kini makaabog o makabugaw ug mga investors taliwala sa higpit nga kampanya sa probinsiya sa pagdani ug dugang mga kapitalista nga mobutang ug negosyo dinhi sa atong lugar. (Press Freedom, Vol. XX No. 26)

*

 
Hudyaka Zanorte ’08 han-ay na!

Gisugdan na sa pagplantsa ang mga nagkadaiyang kalihukan nga magdala ug kalingawan sa pagsaulog sa Hudyaka Zanorte 2008.

Niadtong miaging adlaw gipahigayon ang pinakaunang panagtagbo sa tanang mga tourism officers sa mga nagkalain laing lungsod lakip usab ang duha ka dakbayan, ang Dipolog ug Dapitan. Gituki sa maong tigum ang mga nauna ng gihan-ay nga mga kalihukan sa Provincial Tourism Office sa pagpangulo sa maabtikon sa bag-ohay pa lamang natudlo nga Provincial Tourism Officer ning lalawigan nga si Atty. Ivan Patrick Ang. 

Kahibaloan nga magsugod ang Hudyaka Zanorte 2008 sa Mayo 30 lahos na ngadto sa Hunyo 7. Susama sa mga nakalabayng pagpahigayon sa Hudyaka aduna gihapon kini pagahimoon nga Costume Parade atol sa pagbukas niini sa adlawng biyernes ug pagasundan gilayon kini sa grand fireworks display.

Sa ikaduhang adlaw ang kulbahinam nga off-road competition ug airsoft wargames ang ipahigayon kini sa buntag ug sa pagka gabii mao na unya ang giatangan sa mga kabatan-onan nga Battle of the Bands nga pagapasiugdahan sa Zamboanga del Norte United Correspondents lakip usab sa ipahigayon niini mao ang Balikbayan-Expats Night. 

Sa Hunyo 1 ang golf tournament ang himoon kini sa buntag didto sa Maraz Golf Course ug ang Coca Cola Fun day ang ipahigayon usab kini diha sulod mismo sa Hudyaka area. Atol unya sa ika-upat ka adlaw ang BMX ug drag race ang dungan kining pagahimoon ug usab ang dulang tennis ug boxing. Sa pagkagabii niini daghanang mga sorpresa ang naghulat gumikan kay mao man kini ang night of comedy and magic.

Sa ika-lima ka adlaw himoon usab ang on the spot painting contest, torneyo sa chess ug ang modern dance contest nga pagapasiugdahan sa Dipolog Youth for Progress. Samtang sa ika-unom nga adlaw himoon usab ang tirador shootfest, ang poker challenge ug ang dalit sa Hudyaka nga pagapasiugdahan sa LGBT community ning lalawigan ubos sa pagpangulo ni Ritchie Dagumo.

Sa Hunyo 5 aduna usay ipahigayon nga open sea swimming, airsoft shootfest, dart tournament ug sa pagkagabii niini mao na ang LGU night diin adunay daghanang mga indigay nga pagahimoon diin pagasalmotan kini sa nagkalain laing talento sa nagkadaiyang lungsod ug syudad sulod ning lalawigan. Atol sa pagsaulog sa adlaw sa pagkahimugso sa lalawigan karong Hunyo 6 himoon na usab ang skydiving challenge, regatta, soccer festival, kat-kat hudyaka, shootfest ug ang indigay sa kaanyag sa mga dalaga dinhi sa lalawigan nga mao ang Miss Zanorte 2008.

Ug sa pagka-Hunyo 7 pagahimoon usab ang streetdancing competition ug showdown sa mga nagkalain laing festival sa matag lungsod ug dakbayan. Niining tungura ang streetdancing competition ang aduna kini duha ka kategorya, kini mao ang Inter-LGU ug ang Open Competition nga bukas sa tanang gusto moapil nga dili taga Zanorte. Sa pagkagabii niini aduna usay mga banda ug celebrity nga nagagikan sa Manila nga mohatag ug lingaw sa katawhan nga mosud-ong sa pagtak-op sa maong kasaulogan dayon isunod gilayon niini ang grand closing fireworks display.

Lakip usab sa mga kalihukan nga giapil sa Konseho mao ang Zanorte tour, 4 cock derby, disco Zanorte, basketball tournament. Matud pa ni Provincial Tourism Council Chairman Atty. Michael Alan Ranillo kinsa lakip nga miayuda sa paghan-ay sa mga kalihukan nga gitan-aw nila karon ang posibilidad sa pagpahigayon sa beach volleyball ug ang 40-above basketball tournament, kini maoy makalingaw nga dula sa basketball nga ang pwede lamang mosalmot mao kadtong mga basketbolista nga nag-edad 40 pataas.

Gipabati usab ni Provincial Tourism Officer Atty. Ivan Patrick Ang nga gituyo nila paglakip ang daghanang mga kalihukan sa pagpahigayon sa Hudyaka 2008 gumikan kay gusto niini nga mas lingaw ug sadya ang pagpahigayon karong tuiga. Ngani, ang buhatan sa turismo ning lalawigan ang mihimo na kini sa information campaign sa mga kasilinganang mga probinsya sa Visayas ug Mindanao sa tuyo nga mas modagsa pa ang mga katawhan nga gustong mosud-ong sa pagpahigayon sa Hudyaka niining tuiga ug sa mga sunod pa nga pagsaulog niini.

Dugang pa ni Ang nga sa subsob nga pagpaningkamot sa lalawigan ubos na sa administrasyon karon ni Governor Rolando Yebes hinay hinay ng naila ang probinsya didto sa kauluhan ingon usab sa mga nasud sa Asya, Europa ug Amerika. Niining mga programa nga gihimo ni Governor Yebes hinay hinay unyang makita ug mabati sa katawhan sa umaabot nga panahon ang mga nilugdangan sa gihimong pagpaningkamot nga mapalambo ang natad sa Agrikultura ug turismo dinhi sa lalawigan.  Lakip usab sa mitambong sa maong tigum mao ang OIC sa Department of Tourism dinhi sa Rehiyon IX nga mao si Assistant Regional Director Bernard Gregorio. (Roldan S. Realiza, Southpoint, Vol.1No.15)

*

 

Negosyante gi hold-up P200 mil
TULIS WA'Y HUNONG

Laing negosyante ang gitulis sa wala mailhing upat ka mga suspetsado sa dihang modeposito unta ug kwarta sa banko, apan gi-atngan sa mga tulisan samtang naglabaw sa dalang C.P. Garcia St. mga alasa 10 pasado kaniadtong April 8, 2008.

Ang biktima magpatigayong si Anthony Cheng Lu tag-iya sa 168 Enterprises sa may dalang Rizal Ave. Central Brgy. Sa nasayran ning pamantalaan si Cheng Lu usa ka negosyanteng Taiwanese nag-inosara lamang nga Yano naglakaw gikan sa ilang tindahan bitbit sa gibanabana, salaping cash mokabat sa P200,000.00 ka pesos nga gisulod sa plastic cellophane apan pag-abot sa biktima sa may C.P. Garcia St. corner Echavez St. pipila na lang ka metros ang gilay-on sa Metro Bank sa may daang Gen. Luna, upat ka wala mailhing suspetsado nga armado lulan sa duha ka mga color iton kalit miharang ug gitionan ug pistola ang biktima ug gilabni sa suspetsado ang kwarta nga gisulod sa cellophane lakip sa sulod niini ang Metro Bank checks ug Metro Bank passbook, misulay pa unta ug rebenta ang biktima apan walay nahimo ug na-ilog ang kwarta sa mga suspetsado dayon ug subat palayo sa crime scene sakay sa duha ka motorsiklo maoy get-away vehicle padung sa wala na masayring dapit, ang maong robbery hold-up nahitabo mga alas 10:00 AM apan nareport ang panghitabo mga alas 11:20 na sa udto, hinungdan nga pakyas na ang otoridad paggulod ug pag-ila sa upat ka mga tulisan.

Sa nasayran ang mga suspetsado korsonada ug walay kahadlok nga possibling ganado na sa ilang operasyon taliwala sa daghang mga nadistino nga pulis duol sa crime scene, apan walay bisan usa nga daling naka-respondi aron pagukod sa mga suspetsado. (Southpoint, Vol.1No.15)

Credits: The Southpoint is the latest weekly news publication circulated in the province of Zamboanga del Norte, Zamboanga Sibugay and Misamis Occidental. It is registered under DTI Permit No. 00282924. The Southpoint can be reached through the following contact info: Sindangan, ZN; Landline: 212 – 4019; Mobile No.: +63 921 458 3830. Email: southpoint8@yahoo.com

 
 

11 ka mga Alay Lakad scholars mitapos sa kurso

Mokabat  ngadto sa napulo ug usa ka mga Alay Lakad Scholars ang malamposong nakatapos sa ilang tagsa-tagsa ka mga kurso niadtong nakalabay nga pagtak-op sa nakalabayng tuig tingtungha 2007-2008.

Kining nasangpit nga mga magtutungha malamposong mitapos sa ilang mga kurso isip mga scholars nga gipatungha sa Alay Lakad Council sa Dipolog. Ang mga scholars kinsa migradwar nagtungha sa Jose Rizal Memorial State College (JRMSC-Dipolog Campus) nga gilankoban nila ni Ranell Magallanes, Rosie Mimis ug Nelyn Parami ( BSE); Mary Jane Adaro, Janneth Barbaso, Eva Marie Dela Peña, Madel Gerasol ug Mary Jane Sumambod ( BEED); Benedicto Acopiado, Ronald Ballares ug Leodegario Rectazo sa kursong Bachelor of Science in Criminology.

Sulod sa upat ka tuig nga paningkamot ning nasangpit nga kabataan dinha sa subsob nga pagtu-on ilawom sa pag-abaga sa Alay Lakad Council isip mga scholars, nakab-ot ra gayud nila ang kalamposan nga mao usay ilang gibugti sa kahigayonan nga gilugway kanila sa maong kahugpongan. Matud pa ning maong mga bag-ong professionals nga nagmapasalamaton sila ug dako ngadto kang City Mayor Evelyn T. Uy isip Over-all Chairman sa Alay Lakad Council ning dakbayan, ug lakip na usab ngadto sa mga opisyales niini diin  pinaagi kanila nakab-ot gihapon nila ang ilang mga ambisyon nga motapos sa pagtuon bisan pa man sa ilang kawad-on.

Lakip sa gipasalamatan nila mao usab si kanhi Mayor Roberto Y. Uy kinsa usa usab sa nakatabang kanila, ug labaw sa tanan ngadto sa tanang mga katawhan kinsa wala magpanuko sa paghatag sa ilang suporta ngadto sa mga kalihokan sa Alay Lakad, ilabi na ang “Walk For A Cause” diin maoy gikuhaan sa pondo nga gigamit alang sa ilang pagtungha.(CIO-alb)

*

 

Negosyanteng Taiwanese gitulis

Wala pa gani mag-usa ka semana human mabiktima sa tulis ang usa ka negosyanting babaye nga mi-withdraw ug kuwarta sa bangko didto sa Magsaysay St. niadtung Huwebes, ning semanaha gi-hold-up na usab ang usa ka negosyanteng Taiwanese samtang naglakaw kini padulong sa bangko aron mo-deposito sa halin sa iyang tindahan.

Ang biktima, tag-iya sa 168 Enterprise nga anaa mahimutang sa Rizal Avenue ang gitulis kini mga pasado alas 10 ang takna sa buntag niadtung Lunes samtang naglakaw kini subay sa CP Garcia St. atubangan sa RG Ting Printing Press. Matud pa sa nakasaksi, ang biktima gitiunan ug pistola sa usa ka tawo nga nagsunod kaniya apan wala na tagad makalihok sa dihang may lain pang duha ka tawo ang mitagbo kanila ug pugsanong mimando nga ihatag niini ang gidalang bag nga may sulod kuwarta. Matud pa sa usa ka kawani sa RG Ting Printing Press, kadyot ra kaayo ang maong panghitabo ug ulahi na nilang nahibaw-an nga gitulis ang maong Taiwanese sa dihang abtik pas manatad nga nakasibat ang mga hold-upper.

Sa exclusive interview sa usa ka saksi nga dili magpahi-ngalan mibutyag nga ang maong tulis nahitabo sa may likod nga bahin sa nakaparking nga Panel iya sa Beter Living ug sa lain pang easy ride nga maoy nakapasalipod kanila hinungdan nga wala gayud makita sa mga tawo ilabi na sa mga tendero ug tendera sa usa ka restaurant nga anaa lamang sa kilid sa nahitaboan. Ang biktima nakuhaan ug dosyentos mil ka pesos nga sumala pa, maoy halin sa ilang tindahan sulod sa upat ka adlaw para unta ideposito sa Metro Bank. Bisan paman nga haduol lamang sa police station ang nahitaboan apan ang biktimang Taiwanese ang wala dayon misumbong sa buhatan sa kapolisan hinungdan nga nalangan ang pag-responde sa mga polis.

Matud ni P/Inspector Temothy Aniway, Chief of Police sa Dipolog Police Station nakadawat siya ug report nga may lain na usab nga tulis nahitabo diin ang biktima usa ka negosyanting Taiwanese apan wala pa kini pormal nga misumbong sa buhatan sa kapolisan aron magpa-blotter. Bisan paman niini, gipahayag ni Aniway nga usa ka man-hunt operation ang gihimo karon sa iyang ginsakopan batok sa mga suspetsado nga mihimo ug pagpanulis dinhi sa dakbayan sa Dipolog. Gibutyag ni Aniway nga sulod lamang niining tuiga gikan niadtung bulan sa Enero hangtud karon, mokabat na sa tulo ka tulis ang nagpanghitabo dinhi sa dakbayan sa Dipolog nga wala pa nila masulbad.

Sumala pa sa hepe, aduna na silay gitumbok nga grupo nga maoy ilang gidudahan nga nagpahigayon sa pagpanulis dinhi sa dakbayan sa Dipolog apan dili pa niya ikabutyag samtang padayon pa nilang gihimo ang dugang imbestigasyon. Si Aniway nag-awhag sa mga katawhan ilabi na sa mga negosyante nga kon duna kini transaksiyon sa bangko, mo-withdraw o kaha modeposito ilabi na ug dakong kantidad nga salapi mahimo kining mohangyo sa iyang buhatan aron ma-eskortan ug polis.

Angay masayran nga gawas sa nagpanghitabong tulis, duna usay daghang nabiktima karon sa ilad nga Budol-budol diin ang mga biktima nakuhaan ug dinagko nga salapi diin ang pinaka dako karong bag-o mao ang usa ka retired teacher nga nakuhaan ug usa ka milyon ka pesos samtang ang pinaka-ulahe usa gihapon ka retired employee nga nakuhaan ug linibo nga kuwarta diin hangtud karon wala pa gihapon masulbad sa mga tinugyanan sa kapolisan. (The New Nandau, Vol. XVII No.40)

*

 

Cebu Port gisaway serbisyo dili maayo

Gisumbong karon sa balay balauranan sa Zamboanga del Norte ang salawayong sirbisyo nga gilugway sa Cebu Port Authority ngadto sa mga pasahero sa barko.

Unang mipalanog sa iyang pagsaway si Board Member Cedric Adriatico sa iyang privilege speech sa regular session sa Sangguniang Panlalawigan karong semanaha may kalabutan na sa nahimo niyang subo nga kasinatian uban sa ubang mga pasahero sa nakalabay nga Marso 28, 2008 atubangan sa palpak nga sirbisyo sa Cebu Ports Authority.

Ang bokal misaysay nga gikan siya mitambong sa ilang national convention sa liga sa mga bokal nga gipahigayon sa siyudad sa Sugbu ug midisidir nga sa katapusang adlaw sa ilang panagtagbo mopauli siya sakay sa M/V Georich sa George and Peter Lines nga nakatakdang molawig sa alas 9:00 ang takna sa gabii sa Marso 28. Sayu pa didto na siya sa Cebu Port Authority terminal building diin adunay notisya nakabutang nga ang mga pasahero sa GP Lines kuhaon sa ilang bus alas 8:00 sa gabii.

Nisaway si Board Member Cedric Adriatico sa iyang privilege speech sa regular session sa Sangguniang Panlalawigan karong semanaha may kalabutan na sa nahimo niyang subo nga kasinatian uban sa ubang mga pasahero sa nakalabay nga Marso 28, 2008 atubangan sa palpak nga sirbisyo sa Cebu Ports Authority.

Apan mag-alas 8:50 na lang sa kagabhion ang bus sa Cebu Port Authority wala motumaw hinungdan nga gibati ug kabalisa ang mga pasahero para sa dakbayan sa Dapitan kay hadlok mabiyaan sa barko nga mogikan sa alas 9:00. Tungod niini gipugos sa mga pasahero ang security guard nga ablihan ang gate ug nagbaktas na lang ang mga pasahero paingon sa barko uban sa mga bata, masakiton ug langyaw nga pasahero sa GP Lines. Ang bus sumala pa nahidangat pasado alas 9:00 sa gabii.

Ang mga nagbaktas nga mga pasahero naabtan pa gayud sa pagbunok sa uwan hinungdan nga puerting basa-a nila pag-abot sa barko. Matud pa ni Adriatico kini nga insidente sulod na sa makadaghang higayon nga nahitabo nga malangay ang bus sa Cebu Port Authority sa paghakot sa mga pasahero sa temprano nga oras. Sumala pa ang maong prob-lema masulbad unta kon motu-got pa ang Cebu Ports Autho-rity nga ang kaugalingong passenger van sa shipping companies tugutan nga moha-kot ug pasahero gikan sa ter-minal building paingon sa barko. Matud pa ni Adriatico tataw kaayo nga ang Cebu Port Authority palpak sa ilang paglugway ug sirbisyo ngadto sa mga pasahero sa barko ug sukwahi sa tukmang mga sistima diha na sa pagdani ug mga turista.

Ang nasangpit nga kasina-tian ni Adriatico gidasonan sa iyang mga kaubang bokal kinsa biktima usab sa walwal nga sirbisyo sa Cebu Port Authority. Gawas sa pagpadangat sa maong resulosyon nga gipa-das-og ni Adriatico kopya niini ipadangat usab sa Sanggu-niang Panlalawigan sa Sugbu ug Sangguniang Panlungsod sa dakbayan sa Sugbu hangtud na sa Philippine Ports Autho-rity para tukmang aksiyon ang sagupon aron makorihian ang ilang salawayong sirbisyo ngadto sa katawhang bisita sa Sugbu. Kini nga problema sa sir-bisyo sa Cebu Ports Authority misugod ug tumaw sa dihang misagup sila sa mga lakang sa pagpahigpit sa siguridad atubangan hulgang terorismo. (The New Nandau, Vol. XVII No.40)

*

 

ZaNorteans nagpasalamat sa pagbukas sa Medical Center

Mipalanog sa ilang pagpasalamat ngadto sa kagamhanang probinsiyal sa Zamboanga del Norte ang mga yanung lungsuranon nga karon nakatilaw na gayud sila ug sirbisyo sa usa ka modernong tambalanan nga hamugaway ang ilang pagpanglihok-lihok.

Kini ang reaksiyon nga gipabati sa mga yanung lungsuranon kinsa maoy unang nakapahimulos sa sirbisyo sa pagbukas sa Out-Patient Department ug Dialysis Clinic sa ZaNorte Medical Center sa naka-labay’ng semana. Mismo ang mga doctor ug ubang medical personnel nagpasalamat nga nahiluna ra gayud sila sa tukmang lugar nga dili na sila magkalisud sa paglihok-lihok kay naghuot.

Matud pa ni Ms. Rosevic Lacaya-Ocampo, ZaNorte Medical Center Administrator nga sa iyang nakita dan-ag ang panagway sa atong mga lung-suranon nga nagpakonsulta sa OPD sa Medical Center nga nakalingkud sila sa husto sa haw-ang nga lugar nga fully airconditioned. Sumala pa dili na nimo makita ang panagway sa mga katawhan nga nagkadusingot samtang naghuwat kanus-a maatiman sa doctor sa ilang pagpakonsulta sa OPD.

Samtang pipila ka mga pasiente sa dialysis clinic nga kaniadto wala mopadayon sa ilang pagpa dialyze sa provincial hospital karon mibalik human makita niini ang tukmang pasilidad sulod sa ZaNorte Medical Center. Matud pa ni Ms. Ocampo ang Dialysis Clinic pagadu-malahon sa usa ka pribadong kompaniya nga maoy mobu-tang sa napulo ka mga dialysis machines nga bag-o ug maoy momintinar niini diin mohatag lang ang probinsiya ug porcien-to sa mamahimong kita niini.

Susamang sistima usab ang ipatuman sa diagnostic center sa ZaNorte Medical Center diin mga pribadong kompaniya ang mipadayag sa ilang dakung interest sa pagdumala niini. Samtang ang kanhi station manager sa Radyo Ronda-DXKD nga si Mrs. Sally Dofredo-Elia, mipalanog sa iyang dakung pagpasalamat nga nagsugod na gayud sa iyang operasyon ang ZaNorte Medical Center.

Matud pa ni Auntie Sally siya mismo nakasinati niini sa dihang nagpa dialyze ang iyang apo human gibuksan ang Dialysis Clinic sa ZMC. Gisaysay ni Auntie Sally nga lahi gayud ang paminaw sa iyang apo nga nagpa-dialyze sa bag-ong hospital diin kompor-table gayud ang mga pasiente ug husto usab kabugnaw ang lugar. Si Auntie Sally sa iyang gipadangat nga reaksiyon nagpasalamat sa kahitas-an nga ang lalawigan nakabatun na sa maong pasilidad.

Samtang si Ms. Ocampo mipahayag nga ilang gipa pas-pasan karon sa mga engineers sa provincial engineering ang paghingpit sa pipila ka mga ginagmay nga mga gikinahang-lang rekisitos alang sa opera-ting room ug x-ray room sibu sa gimandu sa Department of Health para hingpit nang mabal-hin ang ubang mga departa-mento sa provincial hospital sulod sa bag-ong medical center. Maoy giplanohan nila nga unahon ug balhin ang charity ward kay sa provincial hospital karon nagsugwak na gayud ang mga pasiente diin ang uban giakomodar na lang sa Medicare Ward kay wala nay kabutangan sa pasiente.

Kini karon ang ilang gitun-an ug maayo uban sa mga doctor ug nurses sa Provincial Hospital kon unsay mga implikasyon sa himoon nilang lakang para mahibaw-an unsa usab ang ilang pagabuhaton. (The New Nandau, Vol. XVII No.40)

*

 
City Tourism Officer dili kinahanglan palinaan –CIO

Angayang palinaan ang City Tourism Office aron nga ang masunod nga itudlo isip City Tourism Officer sa Dipolog dili na ma Rest-In-Peace kung R.I.P.

Mao kini ang sugyot sa pipila ka mga empleyado sa city hall kinsa nakamatikod nga duha na ka mga gipangtudlo isip City Tourism Officer sa Dipolog ang parehong minglalin na ngadto sa laing kalibutan.

Nahibaw-an nga ang natudlong City Tourism Officer nga si Danilo Y. Sostinto ang hikabsan sa iyang kinabuhi tapos kini makaserbisyo sa labing menos upat ka tuig sa maong puwesto gumikan sa kidney failure.

Pagkatapos ni Sostinto, siya gipulihan ni kanhi Konsehal Alton Ratificar nga sa miaging Abril 2 ang mingpanaw na usab sa laing kalibutan.

Hinoon si Atty. Alanixon Selda, City Information Officer sa dihang gipabati ang maong sugyot ang wala motoo sa maong panaghap nga dunay daotang tilimad-on sa bisan kinsa nga matudlo isip tourism officer dinhi sa dakbayan sa Dipolog.

Kini tungod kay matud pa ni Atty.Selda, adunay gihambin nang balatian si kanhi Konsehal Ratificar sa dihang siya gitudlo isip tourism officer.

Hinoon si Atty. Selda ang mipabati sa iyang pagka hinugon sa sayong kamatayon ni Ratificar tungod kay kung wala pa kini mamatay, malagmit daghan pa kinig mahimo  alang sa kaayohan og kalamboan sa turismo dinhi sa dakbayan sa Dipolog sanglit nga kini batan-on pa.

Si kanhi Konsehal Ratificar kinsa namatay gumikan sa matud pa hepatic cancer ang giitumod na sa iyang kataposang kapahulayan tapos siya gihaya makadiyot sulod sa Sangguniang  Panglungsod ning dakbayan.

Ang flash report nagkanayon nga hayan si kanhi Konsehal Bert Pinsoy maoy itudlo isip bag-ong tourism officer sa Dipolog. (Mar Uy, The New Nandau, Vol. XVII No.40)

 
 

 HULAGWAY BALITA

 

Pig Boy’s Barkada, Southpoint Editorial Cartoon (Southpoint, Vol.1No.15)

*

 

Dipolog City
Karibal sa gugma gi luba-luba, suspek at large

Gipukaw sa masakit nga insidente ang mananoy nga katulogan sa biktima human giluba-luba ang 26 anyos nga biktima samtang natulog sulod sa iyang kwarto sa usa ka suspetsado didto sa Brgy. Estaka, Dipolog City tungod sa gika-ingong love triangle.

Sa report nga nahipos sa kapulisan giila ang biktima nga si Edver Dionsay y Remedio 26 anyos residente sa Ortega St. sa Brgy. Estaka. Ang biktimang si Dionsya gikaaligar nga giluba-luba sa gitumbok nga usa ka Diosdado dela Cruz, 44 anyos taga Calibo St. sa Brgy. Biasong.

Sa gihimong imbistigasyon ni SPO2 Gesulga sa Dipolog PNP nasayran nga mga alas 7:30 sa kagabhion ang biktima nga si Dionsay naka-inom ug nakatulog sulod sa iyang rented room kauban sa iyang live-in partner giilang si Mera Salaveria 26 anyos sa nahisgutang dapit. Apan sumala pa ang suspect nga di dela Cruz kalit nga mibutho nga armado sa icepick. Unang gidunggab sa suspect ang live-in partner sa biktima nga si Salaveria apan nakalikay ug daling naka-ambak sa ilang kwarto ug nakalingkawas. Sigun sa report ang biktima nga nahinanok sa katulogon. Maoy gi ponterya sa suspek gisakyan ug giluba-luba sa makadaghan nga higayon ginamit ang icepick. Atol sa maong insidente nabaraw ang suspetsado sa dihang ang ig-agaw sa biktima giilang si Jonathan Ceniza ang nakaponit ug botelya ug gibuno ang suspetsado hinungdan nga midagan ug mi-ambak sa bentana ug misibat sa wala na masayring direction. Sa nasayran nga ang biktimang si Dionsay nakaangkon kini sa unom ka mga laglom nga dinogsakan sa kilid sa wala nga bahin sa iyang lawas ug usa sa bokton ang kritikal karon nga nalandig sa tambalanang provincial.

Samtang ang suspek nga si dela Cruz at large pa sa kamot sa otoridad nga ubos karon sa manhunt operation sa Dipolog PNP. Sa nasayran nga ang motibo sa maong madugong krimin, mao ang love quarrel human gikataho nga ang gika-ipon ipon sa biktima kanhi live-in partner sa suspetsado. (Southpoint, Vol.1No.15)

Salug
Habal-habal driver gipusil-patay

Usa ka habal-habal driver ang gipusil-patay sa duha ka wala mailhing suspetsado, didto sa may national highway sa brgy. lipakan, lungsod sa Salug.

Sa pasiunang imbestigasyon nga gihimo sa Salug, PNP nasayran nga samtang nagmaneho ang biktima sa iyang Honda wave nga motorsiklo kolor pula ug adunay duha ka pasahero nga padung sa lungsod sa Salug gikan sa Sindangan. Ug sa paghiabot na nila sa nahisgutan dapit sa unahan, ang mga suspetsado kalit nga mipara sa biktima ug mi-deklarar ug carnap, dayong pusil sa biktima ginamit ang kalibre 45 nga pistula nga naigo sa iyang nawung, nga miresulta sa iyang kamatayon.

Samtang ang mga suspetsado gisakyan na ang maong motorisklo, ug pagsibat unta, apan sa paghiabot na nila sa unahan, nahunong kini gumikan kay wala na mi-andar ang motorsiklo, ug mibalhin na lamang sila sa laing motorsiklo nga ilang dala ug misibat. Na-recover sa ming responde nga kapulisan 300 metros gikan sa nahitabuan sa krimen mao ang usa ka cell phone, duha ka basiyo ug usa ka buhing bala sa maong pistola, ug ang motorsiklo sa biktima. (Southpoint, Vol.1No.15)

Baliguian
Balo gipatay MILF?

Usa ka balo ang nahikaplagang patay didto sa brgy. Tan-awan, lungsod sa Baliguian. Si Brgy. Kagawad Benigno Divinagracia, sa Brgy. Mamad sa maong lungsod, ang mitaho sa Baluguian PNP Station nga si Maximo Sandagan Asan, 31 anyos, balo, molopyo sa maong dapit, ang nakit-an niya kini nga nagbuy-od patay sa yuta, sa hilit nga dapit.

Ang biktima nakaangkon ug tulo ka samad pinusilan sa iyang likod, nga maoy hinungdan sa iyang kamatayon.

Sa dugang imbestigasyon sa kapolisan sa Baliguian nga ang biktima gituhuang gipatay sa grupo ni Inteng Bacabis, alyas Commander Cordova, usa ka MILF field commander kinsa nagpundo sa maong dapit. (Southpoint, Vol.1No.15)

Agri files
by Hisyl S. Palma
Tibook ZamPen makapahimulos sa bio-tech economic program

Dili lamang ang Zamboanga del Norte kong dili ang tibook Zamboanga Peninsula ang mabubu-an ug makapahimulos sa bag-ong teknologya ang gipaila ug gipasiugda sa buhatan sa Department of Agriculture pinaagi usab sa pagsuporta sa Provincial Agriculture Office sa pagpangulo ni Ms. Maybel C. Bustaliño diin gipahigayon ang 2 ka adlawa nga Seminar Workshop on Biotechnology Economic Opportunities for Zamboanga Peninsula kaniadtong April 3 ug 4 ning  tuiga didto sa Mibang Holtel ning dakbayan.

Ang maong program ang gitanyag sa naasoy’ng  buhatan may kalabot sa bag-ong pamaagi diha sa pag-ugmad sa pang-agrikultura nga maoy usa sa mag prioridad nga program nga gitutukan usab ni Governor Rolando Yebes aron mapalambo ilabina diha  sa nagkadaiyang panginabuhian sa mga katawhan ilabina ang industriya sa pang-agrikultura. Atol sa interview niadtong unang adlaw sa maong workshop si Ms. Alicia Ilaga ang Director sa DA for Biotechnology Program nga  matud pa adunay 13 ka mga rehiyon  ang ilang nasabwagan sa maong impormasyon aron masayran sa mga pobring mag-uuma ug masayud sa bag-ong teknologiya ug pamaagi diha sa paglambo sa ilang panginabuhian ug usa na niini ang Zamboanga Peninsula ang nakabinipisyo sa program sa DA.

Dugan pa ni Director Ilaga nga  Biotechnology usa ka buhing organismo nga maoy magsilbing mohatag ug modernong  tecknologiya gamit ang Biotechnology diha sa pagpa-baskug sa mga livelihood product nga maoy gigamit karon sa mga katawha. Usa na niini  ang gitanyag ngadto sa mag-uuma ang Boitech Network nga diin ang mamahimong produkto pinaagi sa Argicultural Biotechnology nga maoy gi-ugmad sa maong mag-uuma nga adunay nay mamahinong merkado alang sa ilang produkto pinaagi sa pag-umol ug kasabutan tali sa mag-uuma, negosyante ug ang Local nga pangangahanan. Atol sa maong kalihukan mitambong ang nga partisipante gikan sa Zamboanga Sur,  Zamboanga Sibugay, Zamboanga City, Zanorte, mga nagkadaiyang Governor sa naasoy’ng lugar, municipal Agriculturist, TLDC, buhatan sa DTI, PENRO ug ubang pa lakip usab ang misaksi si Bise Gobernador nga  si Francis H. Olvis. (Shily, Southpoint, Vol.1No.15)

*

 

Pulso Sa Katilingban
Cicer M. Binghay
Mga lungsod nga sikat apan nagkayamokat

Kon mabahin ang Zamboanga del Norte. Dihang dapita sa habagatan kalungsoran nga dakog purohan mahimong Kabisira o Capital mao ang lungsod sa Sindangan, Lilloy ug Siocon. Kana kon maayos ang nagwakat, nagkayuring, walay hustong “arrangement” sa merkado publiko diin ang talanawon makapuling sa saksak-sagol sa mga tindahan plantada namaligiya kahoy’ng sugnod ug uban pang mga sitsiritas.

Mga dumudoong, makadaghan makaingon sa maong lungsod kon duna bay market supervisor o nagdumala sa ilang merkado publiko sa poblacion o kon kinsa man ugaling ang gitahasan, misugiyot sila nga pangitaan mga paagi nga husay ang talan-awon polis a nagwakat nga makitang bistado matag adlaw. Sagdi lang ang bus nga mabiyahi-an matag adlaw nga wala magpahilona kumportabling hulatanan sa mga pasaheros nga magkadiin-diin lang mangitag kasilongan ug stanbayanan. Walay kumpetensiya ang bus liner karon mao tingali nga wala na sa buot nila ang paggastog dapit hulatanan sa pasahero. Ilang gihimong terminal diha na lang sa gitumod sa dapit sa usa ka hapitanan. Igo na ang ticketing booths. Walay katarongan tuod nga sila mogasto pag salapi alang sa mga pasaheros.

Husto si kanhi Cardinal Sin nga miingon: “Sa politika ang katawhan magkabahin-bahin. Apan ang kalihokan sa simbahan sa mayoriyang katoliko sa nasod kon dunay mga saulogon adlaw sa mga santos o mag piyesta tanan magkahiusa…walay bikil. Kini nagnuod. Nakita nato nga bisan unsay buhaton karon sa administrasyon pagsumpo kang Jun Lozada nga maoy hinagiban sa pagpangita sa labing tinuod nagpanghitabo sa atong pangagamhanan, nagpabilin magkahiusa ang mga katawhan nga nagsunod sa kaparian sa kalihokan sa simbahan nga napaluyo kang Lozada ug sa krosada pagpalugwa sa kamatuoran.

Hinoon dili malalis nga duna usab kini kunohay ligdong ministro sa simbahan sama sa kaparian ug Obispo nga miapil sa kampanya sa Malakanyang pagsumpo kang Lozada. Kini dili ikatingala. Matod pa ni Hermilinda R. Dizon: “Money, although very useful in its place, does not solve problems. People do, since it’s people who create them in the first place.” Usa ka anonymous nagkanayon: “One trouble with the world is that so many people who standup vigorously for their rights fall down miserably on their duties”. Tungod sa tinaginting. Hinoon usab miingon si kanhi Presidenti Aquino nga: “The good we do is never lost. Some of it remains, if not in material goods, then in deeper experience, a more practiced hand, and spirit made stronger by that which failed to break it-stronger to meet greater challenges ahead”. Nagpasabot nga kanang ginsakopan sa mayoriyang simbahan sa nasod nga nagpaluyo kang Lozada…nanggimbisog aron madungog. Ang uban kamila nga nadunggan, nahaploy aron mangahilom.

Nahitabo sa lalawigan sa Cebu nga dunay mga kaparian nga wla gyod mopamisa pag-abot ni Lozada. Matod pa sugo sa ilang dako-dako. “There lives more faith in honest doubts. Believe me, than in half the creeds.” Matod pa ni Tennyson. Bugas sa NFA mao nay bag-ong kaplag isyo nasodnon. Maantigo gyod ang usa ka presidenti who must be strong as she must be. Diha usab makit-an na sa tinuod ang dugay rang “idlomatic” pangorakot sa taga NFA kanhiay pa konsabo sa mga dagkong negosyanti sa bugas tibook Pilipinas.

Kanako, husto ang gihimo sa usa ka tawo nga dunay himsog “kidney” mobaligiya sa usa pagsalbar sa iyang isig ka tawo nga nanginahanglan. Dunay krosada karon nga sumpoon kini. Kanhiay pa nga gigutom ang tawo. Kaniadto pa nga walay trabaho sa kapalpakan sa atong pangobiyerno nga matod pa ni PGMA ang pangurakot gihimo nang ligasiya sa atong nasod. Namaot dinhi kay dunay namu-aya, mga buaya sa pagbaligyag kidney. Kini sila mikantidad sa usa ka kidney tagsa ka milyon pesos sa sapiang nanginahanglan, dayon, paliton sa tag-iya sa kidney sa 250 mil pesos o kaha 300 mil pesos. Ang nakasapig dagko ang mga buaya sa kidney, dili tag-iya. Kana maoy lutoson, sumpoon sa interesado mapitol pagpamaligiyag kidney. (Press Freedom, Vol. XX No. 26)

 
Credits: Press Freedom is published every Saturday and entered as 3rd class mail matter in Dipolog City. Printed by Young Printing Press with Editorial Office located at Upper Turno, Dipolog City. Tel. No. (065) 212-4343 or 212-6665

 

Infrastructure Development Projects sa ZaNorte mobaha ug balik 2009 –Gov. Yebes

 

Mobaha ug balik ang daghang mga infrastructure development projects sa tanang barangay sa tibook Zamboanga del Norte karong sunod tuig 2009.

Kini ang gipahibawo ni Governor Rolando Yebes atubangan sa mga kapitan sa lungsod sa Roxas diin sa iyang pagtugyan sa napulog usa ka mga proyekto alang sa siyam ka mga barangay sa maong lungsod nga mobalor ug P6.6 milyones ka pesos. Sa iyang pakigpulong gidasig ni Governor Yebes ang tanang barangay kapitan sa Roxas sa pagsumitir sa ilang mga proposal para sa livelihood projects sa ilang barangay kay karong tuiga maoy gusto niya nga tutukan sa probinsiya ang pagpatuman sa nagkadaiyang mga proyekto para sa tiyan sa tawo o para sa ilang panginabuhi.

Gipasabot sa gobernador nga ang maong mga livelihood projects nga ipadas-og sa barangay ipa-ilawom sa pagreview sa Zamboanga del Norte Livelihood Assistance Program nga gilangkuban sa mga tinugyanan sa nagkadaiyang ahensiya sa kagamhanan aron sa pagsiguro nga ang proyekto molungtad gayud ug makahatag ug tabang sa bagang duot sa katawhan sa barangay. Si Board Member Cedric Adriatico nga maoy mirepresentar kang Vice Governor Francis Olvis ug iyang mga kaubang bokal sa 2nd district mikonpirmar usab nga mismo ang ilang PIF karon gitagana para na sa pagpatuman ug mga liveli-hood projects diha sa barangay.

Matud pa ni Board Member Adriatico kini ilang gisagup sa balay balauranan sa ZaNorte aron sa pagsu-porta sa mga paningkamut nga gipadas-og karon ni Governor Yebes nga makata-bang ang probinsiya sa mga yanung lungsuranon nga makabatun sa ilang pangina-buhi nga malungtaron. Ang unang proyekto nga gitugyan sa gobernador kagahapon didto sa lungsod sa Roxas nagsugod gikan sa Barangay Piao sa ilang barangay water supply system nga  mobalor ug P420,000 ug Barangay Nabilid nga mobalor ug tunga sa milyon ka pesos ug gisunod ang P2.2 milyones ka pesos nga asphalting project sa Barangay Pangologon. Pagkahuman ang grupo ni Governor Yebes uban sa iyang igsoon nga si Engr. Ed Yebes, kanhi Konsehal Nick Carbonel, Provincial Engineer Ramon Ochotorena ug 17 ka mga kapitan misirit na usab paingon sa pinaka layu nga barangay sa maong lungsod ang Tantingon nga nahimutang sa utlanan sa Roxas ug Fimagas sa Katipunan diin sulod usab sa 19 ka higayon nga miubog ug suba ang ilang panun aron sa pagtugyan sa bag-ong nakomponi nga dalan niini nga mobalor sa tunga sa milyon ka pesos.

Ang grupo sa gobernador minaug ug balik didto sa Barangay Marupay aron sa pag-inugurar sa ilang P580,000 nga 1 unit pre-fabricated multi-purpose building ug gisunod ang tunga sa milyon ka pesos nga susamang proyekto didto sa Barangay Capase ug laing tunga sa milyon ka pesos nga school building project sa Barangay Banbanan. Gikan sa bukid si Governor Yebes mikanaug sa mga barangay nga daplin na usab sa baybayon aron sa pagtugyan sa laing school building project sa Barangay Upper Irasan nga mobalor ug tunga sa milyon ka pesos ug asphalting project sa Barangay Dohinob nga mokantidad usab ug P870,000 diin didto mipalanog sa ilang tagsa-tagsa ka mga pagpasalamat ang mga kapitan sa mga proyekto nga ilang nadawat gikan sa probinsiya.

Si Governor Yebes sa iyang pakigpulong midasig sa mga barangay kapitan sa Roxas nakadaug man siya o wala sa ilang barangay sa nakalabay nga eleksiyon sa pagsumitir ug proposal para sa ilang tagsa-tagsa ka livelihood projects kay nagpabilin ang iyang sum-banan sa pangagamhanan nga “Una sa tanan ang Katawhan.” (The New Nandau, Vol. XVII No.40)

 
 

Pagpatunhay sa ‘endangered species’
Nadakpang mga pawikan gibuhian isip tipik sa padayong programa sa Dipolog

Ang pagbuhi balik ngadto sa kadagatan sa mga pawikan nga madakpan dinhi sa kabaybayonan sa Dipolog mao karoy tipik sa nagapadayong programa sa kagamhanang local tampo sa nasudnong programa pagpana- lipod sa gitawag ug mga “endangered species” o nagkawala na nga mga mananap resulta sa pagpangabuso sa pipila.

Sa mga nakalabay nga mga higayon, ang mga pawikan nga napadpad dinhi ginasubay sa lokal nga buhatan sa agrikultura diin ang pangisda nahaapil, ug dayon kini gipangbuhian balik ngadto sa kadagatan. Nasayran nga ang lokal nga kagamhanan naghatag ug mga insentibo ngadto sa mga makadakop niini nga mangingisda nga motaho ug mouli dayon niini sa buhatan sa fishery sa city agriculture.

Pagkakaron, mokabat ngadto sa 36 ka mga gagmayng pawikan ang gialimahan sa usa ka pamilya kinsa maoy nakakita niini didto sa Purok Ofisco, Barangay Olingan, ning dakbayan. Kini nasayran human ang usa ka barangay opisyal sa Olingan mipahibalo sa buhatan ni City Mayor Evelyn T. Uy alang sa tukmang koordinasyon kabahin niini, sanglit kini naglambigit sa buhi gikan sa dagat nga nahilakip sa gitawag ug “endangered species.”

Ang maong mga gamayng pawikan ana karon ilawom sa pag-alima nila ni Mr. & Mrs. Ian ug Josephine Morrison kinsa maoy naka-kaplag sa maong mga pawikan. Sumala pa sa maong pamilya nga kining maong mga buhi sa dagat ila rang ibalik ngadto sa dagat kon kini modako-dako na kay bag-o pa kining napusa gikan sa pagka-itlog niini.

Subay niini, nalipay ug dako si Mayor Belen Uy tungod sa gipakitang bug-os nga suporta ug koordinasyon ngadto sa kagamhanang lokal ning dakbayan, kinsa personal gayud nga mibisita sa panimalay sa mga Morrison sa nasangpit nga dapit. Lakip sa nakasaksi sa maong mga gagmayng pawikan uban ni Mayor Uy mao sila si City Information Officer Atty. Alanixon A. Selda, Teresa Sañado, ang kasamtangang Fish Warden Designate sa buhatan sa agrikultura, ug OIC City Agriculturist, Dionisio C. Mandawe.(CIO-alb)

*

MORE NEWS NGA BINISAYA

 

 

NOTE: SEND US YOUR NEWS.  Tell us what's going on in your barangays, clubs, schools, businesses and non profit organization. You can also send notices and announcements.
          

 

    Email to webmaster@dipolognon.com

      
Google
WEB THE DAILY DIPOLOGNON