April 3, 2008

 

P14M nga PhilHealth Insurance sa ZaNorte aprubado na

Mokabat sa 25 porciento sa mga indigents karon sa lalawigan sa Zanorte ang gipailawom na sa National Health Insurance Program human gi-aprobahan sa kagamhanang probinsiyal pinaagi ni Gov. Lando Yebes ang 14 milyones ka pesos ug gihimo ang pagperma sa usa ka kasabutan tali sa Philippine Health Insurance Corporation. Si Dra. Carmencita Icao, Provincial Health Officer sa Zanorte mipahayag nga kini maoy unang gihayon nga ang kagamhanang probinsiyal sa Zanorte mipa-enroll sa nailang kabus niini sa nasangpit nga health insurance program para mapalapdan pa ang gilogway nga serbisyo sa probinsiya para kanila.

Kini milangkob na sa 26 mil ka pamilya uban na sa ilang dependents ang mapailawom sa PHIL-HEALTH  nga mikostar ug 14 milyones ka pesos. Si Gov. Rolando Yebes mipahayag nga kini maoy pasi-una lamang kay maoy programa karon sa iyang adminitrasyon nga ang 86 mil ka mga katawhan nga giilang pinakakabus sa Zanorte ang mapailawom sa maong programa. Matud pa ni Gov. Yebes nga pangitaan gayud niya ug paagi nga ang tanan nga giilang pinakakabus nga lungsuranon sa Zanorte ang ipailawom sa maong programa.

All out support for the province’s anti-indigency program, PHCAP through the PhilHealth Insurance doled-out to identified indigents of ZaNorte with the two of the program’s beneficiaries.

Gipahibalo sa gobernador nga karong sunod simana mobisita dinhi sa probinsiya ang mga dagkung opisyales sa Philippine Gaming Corporation o PAGCOR aron sa pag-andam sa pagpahigayon ug medical mission sa presidential yatch ang Pangulo dinhi sa atong lalawigan karong buwan sa Mayo. Sa samang bahin gihulagway ni Gov. Yebes ang gilusad niini karong programa nga usa lamang ka bato sa tirador duha ka langgam ang na-igo kay makahatag man karon ang kagamhanang probinsiyal ug mas halapad nga health Services ngadto sa mga kabus nga katawhan sa Zanorte nga gihikawan sa mi-aging panahon ug sa samang bahin makahatag usab siya ug dugang benepisyo ngadto sa mga medical personnel sa tanang hospitals nga ilawom sa pagdumala sa kagamhanang probinsiyal.

Sa records sa Philhealth sa tibook Zamboanga Peninsula Regiona ang Zamboanga del Norte maoy nagbaton karon sa pinakadaghang lungsuranon nga gilugway o gipailawom sa National Health Insurance Program pinaagi sa City Government. Matud pa ni Mr. Ronilo Pacilan sa Community Assitance Uint nga ang mga beneficiaries sa maong health insurance program naila human ang probinsiya mipahigayon ug kaugali-ngong poverty mapping survey sa paglingkod gayud ni Gov. Lando Yebes sa gahum diin nahimugso usab ang Barangay indigents Benefeciaries Organization o LANDO-BIBO.

Ang seremonyas gisaksihan mismo ni Vice Gov. Francis Bebie Olvis uban sa nagkadaiyang mga hepe sa matag buhatan sa kagamhanang probinsiyal. Sa kabahin ni Dra. Chita Cunanan ang kasamtangang hepe karon sa Provincial Hospital mipahayag nga ang mga meyembro sa Lando-Bibo nga mapailawom sa Philhealth pagailhon na nga paying patients ug adto na kini ibutang sa Medicare Ward sanglit ang nasangpit nga insurance company magbayad sa pagpatambal sa mga beneficiaries niini sa ilang pagpa-ospital, tambal, doctor, laboratory ug uban pa.

Gipatin-aw usab sa Philhealth nga sa matag beneficiary nga magpa-tambal sa mga hospital sa probinsiya adunay gahin sa pundo nga gitawag ug capitation fund nga mabalik sa probinsiya sa Zanorte aron maoy gamiton sa pagpalit ug tambal, ekipo ug dugang benepisyo ngadto sa tanang mga kawani sa hospital gikan sa mga doctor hangtud sa mga yanung impliyado niini. Si Gov. Yebes sa iyang pamahayag nagkanayon nga nahagit siya sa paglusad sa maong programa sa health care kay saw ala pa siya sa gahum nadeklarar na ang lalawigan nga maoy pinakapordoy nga probinsiya sa tibook nasud ug usa sa nag-unang problema mao ang kabahin sa health care nga nahikawan ang mabagang duot sa atong mga kabus nga katawhan nga makatilaw niini gikan sa kagamhanang probinsiyal.

Nagpasalamat usab ang usa sa mga meyembro sa Lando-Bibo nga si Evangelista Galabin, 60 anyos ug lomolopyo sa barangay Olingan ning dakbayan sa Dipolog diin sumala pa niya madugangan ang ayuda nga gilogway sa gobernador ngadto kanilang mga kabus. “Kung wala pa ang philhealth ug si Gov. Yebes wala gyud mi ayuda panahon sa among pagluya kay pobre man kaayo mi, mao nagpasalamat mi ni Gov. Yebes,” dugang pamahayag ni Galabin dihang personal usab kining misaksi atol sa pagperma sa gobernador ug sa Philhealth sa kasabutan para sa maong programa. (The New Nandau, Vol. XVII No.38)

*

 

TVI GIRANSAK BALOR 1-M

Ang buhatan sa Finance Department sa Toronto Ventures Incorporated kon TVI Resource Development Incorporated nga nahimutang didto sa Sitio Canatuan, Barangay Tabayo sakop sa lungsod sa Siocon ning lalawigan gikatahong giransak kini sa mga wa mailhing suspetsado niadtong Marso 25 ning tuiga.

Sa report sa Siocon PNP, nasayran nga ang wa mailhing suspetsado diin miguba kini sa duha ka door jambs sa naasoy’ng buhatan ginamit usab ang wa masayring mahait nga hinagiban.  Ug nahibulong na lang si Mr. Francisco Castro, ang Mine Consultant ug Finance Officer nga nianang pagkabuntag sa dihang misulod na siya sa iyang buhatan, iyang nakita nga abri na kini ang maong pultahan ug iya usab nadiskubre nga wala na ang mga kwarta sa butanganan niini nga maoy ihatag sa suhulan alang sa mga empleyado sa TVI.

Ang Finance Department sa Toronto Ventures Incorporated kon TVI Resource Development Incorporated nga nahimutang didto sa Sitio Canatuan, Barangay Tabayo sakop sa lungsod sa Siocon ning lalawigan gikatahong giransak kini sa mga wa mailhing suspetsado niadtong Marso 25 ning tuiga.

Malampuson gayud nga nadala sa mga wa mailhing suspetsado ang mokabat sa One Million One Hundred Thousand Pesos ( P  1,100,000.00) nga salaping cash. Ilang gituohan sa mga pulis imbestigador nga usa ka inside job ang mihimo niini tungod kay ang naasoy’ng kompanya hugot o sakto man kini sa mga security guards sulod sa 24 oras nakabantay diin usab ang nahimutangan sa Finance Department Office dili ra kini hilayo kon 20 metros lamang ang gilay-on gikan sa guard house.

Sa pagkakaron, ang mga elemento sa kapolisan sa lungsod sa Siocon padayon pa kining mihimo sa makuting imbestigasyon sa nahitabong pagpangransak sa nasangpit nga buhatan sa TVI.  (PEDMARC OGOC-ANTONIO, Southpoint, Vol.1No.13)

Credits: The Southpoint is the latest weekly news publication circulated in the province of Zamboanga del Norte, Zamboanga Sibugay and Misamis Occidental. It is registered under DTI Permit No. 00282924. The Southpoint can be reached through the following contact info: Sindangan, ZN; Landline: 212 – 4019; Mobile No.: +63 921 458 3830. Email: southpoint8@yahoo.com

*

 

Retired teacher sa DPDS nabiktima sa budol-budol

Daghan ang daw dili makatuo nga usa ka retired teacher sa Dipolog Pilot Demonstration School ning dakbayan sa Dipolog mahimong biktima sa budol-budol o ilad diin mokabat sa usa ka milyon ka pesos ang nakuha nga kuwarta. Kini nga kaso sa nasayran kasamtangan nang giimbestigar sa National Bureau of Investigation ug uban na sa hut-ong military ang gikatahong mitabang usab karon sa pagsubay si kinsa ang responsable sa maong operasyon sa ilad.

Sigun sa inpormasyon ang nasangpit nga insidente nahitabo niadtong Lunes Santo Marso 17, 2008 diin mao pay paggawas sa biktima gikan sa simbahan gitagbo na kini sa tulo ka mga batan-ong babaye nga nagsakay ug van nga nagpa-ila nga sila suod nga higala sa iyang anak nga atua karon sa Amerika. Kini nga kaso sumala pa gidangop sa NBI human madismaya ang biktima sa aktuwasyon nga gipakita sa Dipolog Police sa dihang gipablotter ang nasangpit nga insidente nga daw nagsarcastic pa ang pulis kay dili makatuo sa kadaku sa kantidad nga nalambigit sa maong budol-budol nga mokabat sa usa ka milyon ka pesos.

Tungod sa salawayong aktuwasyon sa Dipolog Police ang biktima sa nasayran misumbong sa paryente niini nga usa ka dakung opisyal sa Malacanang nga maoy mitawag sa NBI ug military para maimbestigar ang maong insidente. Usa ka sakup sa Zamboanga del Norte United Correspondents mibutyag nga natingala siya nga ang pahina diin nasuwat sa blotter ang maong budol-budol nga insidente ang gitabunan ug naka-staple ang palibot para dili gayud mabasa sa uban apan sa iyang gisuwayan kini ug wi-wi nakabutang ang kaso kabahin na sa swindling. Sa dihang gibalikan kagahapon ang blotter sa Dipolog Police aron sa pagsubay sa maong entry misamot ang daku niyang katingala kay ang karaang blotter nga nabutang ang maong kaso sa ilad wala na kay giilisan ug bag-ong libro sa blotter bisan pa man ug wala pa mapuno ang karaan.

Sigun sa nahipos nga inpormasyon ang biktimang retired teacher sa Dipolog Pilot Demonstration School nga nagbatun ug pinuy-anan sa Mediatrix Homes sa Turno, kini gitagbo ug tulo ka mga batan-ong babaye nga nagpa-ila nga kaila ug mga higala sa iyang anak didto sa Amerika. Sumala pa ang biktima giingnan sa tulo ka mga mangi-ngilad nga kon makabisita sila sa Dipolog kinahanglan gayud nga kitaon ang iyang inahan. Tuod man gidala pa sa biktima ang tulo ka mga mangingilad sa ilang pinuy-anan ug gitiwas ang ilang panag-istorya.

Ang kasaligang tinubdan midugang sa pagsaysay nga gipatuo ang biktima nga sila uban sa iyang anak didto sa Amerika nagkasabot nga magbutang ug negosyo diin maoy plano nila nga negosyohon mao ang pagpamaligya ug fire extinguisher. Sa nasayran nakonbinsir ang biktima busa miadto sila sa bangko aron sa pagkuha ug kuwarta, apan tungod sa kadaku sa transaksiyon ug daghang withdrawals tungod kay semana santa mibalhin kini sa lain niyang depository bank diin didto nakuha ang usa ka milyon ka pesos.

Sumala pa taga bangko mismo mao pay naghatud sa usa ka milyon ka pesos nga salapi ngadto sa sakyanang van sa tulo ka mga babayeng mangi-ngilad.

Mismo mga kawani sa bangko wala gayud magduda nga ang ilang kleyente giilad na sa tulo ka mga babaye. Mga tinugyanan sa intelligence community nagtuo nga ang biktima gipanid-an gayud sa husto ug gitun-an ang detalye sa pamilya niini nga nakuha pa ang pangalan sa mga anak niini nga atua sa Amerika para makonbinsir gayud ang biktima sa ilang pag-ilad. Sa kasamtangan wala pa gayuy nakitang padulngan karon ang mga imbestigador si kinsa ang responsable sa maong operasyon sa budol-budol ug ang mga nagpuluyo niini. (Press Freedom, Vol. XX No. 24)

*

 
ABRIL 2 PAGABUKSAN NA SA PUBLIKO ANG ZAMBOANGA DEL NORTE MEDICAL CENTER

Zamboanga del Norte Medical Center nga anaa mahimutang sa national highway sa Sicayab ning dakbayan sa Dipolog pagabuksan na sa publiko sugod karong Abril dos. Kini ang gipahibawo ni Atty. Ivan Patrick Ang samtang tapos nang gihan-ay ang preparasyon sa pagpangdawat sa mga pasyenti sa maong tambalanan sugod karong sunod semana.

Matud ni Atty. Ang, sugod karong Abril 2, kadtong mga pasyenti nga boot magpakonsulta o kaha adunay tuyo sa dispensaryo kon OPD sa karaang provincial hospital sa Barangay Biasong, didto na moderitso sa bag-ong gitukod nga hospital sa Sicayab tungod kay sa maong adlaw, sugod nang pagabuksan sa publiko ang ZaNorte Medical Center. Hinoon gipaklaro ni Atty. Ang nga limitado pa sa mga pasyenti ang pagadawaton tungod kay kutob lamang una sa out patient department ug dialysis department ang paga-ablihan. Ang ubang departamento adto lang una magapabilin sa karaang provincial hospital sa Biasong samtang padayon pang gi-asikaso ang ubang kakulangon ug gimbuhaton nga gikinahanglan sa bag-ong tambalanan.

Sa samang bahin sugdan na usab ang paghatag ug philhealth card ngadto sa mga indigent o kabus nga mga katawhan para sa libreng hospitalisasyon. Kini ang gipamahayag ni Governor Rolando Yebes human gidasonan sa Sanguniang Panlalawigan atol sa ilang regular session niadtung Lunes ang ordinansa mahitungod sa financial assistance ug registration sa philhealth aron mapa-enroll ang mga kabus nga katawhan ilabi na sa mga membro sa Barangay Indigent Benefeciaries  Origanization o BIBO sa lalawigan sa Zamboanga del Norte. Matud ni Governor Yebes samtang tapos nang gi-aprubahan sa hunta probinsyal ang balaodnon kabahin sa philhealth, sugdan na sa iyang buhatan pinaagi sa Community Development Assistant Unit o CDAU ang pagpa-enroll sa kabus nga mga katawhan nga direktang makapahimulos sa maong programa aron sa panahon nga kini magkasakit ug madala sa tambalanan, duna na kini insurance alang sa libre nga pagpa-hospital.

Samtang gidungog nga kadto lamang mga membro sa LANDO-BIBO ang mahatagan sa philhealth card, gipaklaro ni Governor Yebes nga dili lamang membro sa BIBO ang makapahimus sa maong programa tungod kay apil na niini ang ubang kabus nga mga katawhan nga naapil sa poverty mapping survey sa CDAU. Nasayran nga mokabat sa byenti milyones ka pesos ang gigahin nga pundo sa kagamhanang probinsyal para sa philhealth program. Niining gidak-on sa pundong salapi para sa maong programa, matud pa ni Mr. Roni Pacilan, CDAU Unit Head nga hayan dili tanang kabus nga molopyo sa Zamboanga del Norte ang makapahimulos sa philhealth gumikan kay duna pay ubang lungsod sa probinsya ang wala pa mapahigayone sa poverty mapping survey.

Kon mapatuman ang maong programa, sa byenti milyones ka pesos sa gigahin nga pundo, gibanabana nga anaa sa kinsi mil ka pamilya ang mahatagan sa philhealth card. Hinoon gipaklaro ni Governor Yebes nga dili lamang ang nahatagan sa philhealth card maoy benipisyaryo sa maong programa kay apil na niini ang membro sa pamilya. Gipaklaro sa gobernador nga ang philhealth sa probinsya nga ilang ipanghatag sa mga kabus nga katawhan sa ZaNorte dili ordinaryo nga programa kon itande sa philhealth nga gipanghatag sa nasudnong gobiyerno kay usa man kini ka commercial philhealth. (The New Nandau, Vol. XVII No.38)

Credits: The New Nandau is a member of the Publishers Association of the Philippines (PAPI). Editorial office is located at 076 Quezon Avenue, Dipolog City with Tel. No. (065) 212-3794; Cell No. +639205201041. Email: nandau_1986@yahoo.com

*

 

Kalawit
Duha ka rubber buyers gihold-up

Didto sa may Barangay Daniel Maing sakop sa lungsod sa Kalawit ning lalawigan duha ka rubber buyers ang gikatahong gihold-up kini sa upat ka mga wa mailhing armadong tawo, karong bag-uhay pa lang. Biktimang giila sa pangalang sila si Urbano Bersabal Vallespin, 39 anyos, ug si Ludio Along, 41 anyos, parehong minyo, kinsa usab mga rubber buyers ug nagpuyo sa may Barangay El Paraiso lungsod sa Liloy.

Ilang giasoy sa kapolisan nga sa paghidangat nila didto na sa nasangpit nga lugar sa nahitabuan nga nahisgutan sa unahan matud pa kalit lang adunay upat ka mga wa mailhing armadong tawo nga adunay dalang 45 kalibre nga pistula ang miduol kanila ug mideklara kining hold-up.  Nadala gayud sa mga suspetsado ang salaping cash gikan sa duha ka biktima nga nagkantidad kini sa 73 mil ka pesos lakip usab niini ang cellphone sa mga biktima.

Daling mipalayo usab ang mga suspetsado sa lugar sa nahitabuan nga naglakaw padulong na ngadto sa may Sitio Balas, Barangay Poblacion sa mao gihapong lungsod. Niini, ang mga elemento sa Kalawit PNP padayon pa kining mihimo sa dugang pang imbestigasyon alang na sa posibling pag-ila ug pag-aresto sa mga suspetsado. (PEDMARK, Southpoint, Vol.1No.13)

 

Sicayab
Pulis nakapusil sibilyan, patay 

Usa ka membro sa PNP ang nadistino sa camp Hamac Sicayab ang nakapusil ug civilian nga igso-on sa iyang asawa, didto nahitabo sa Brgy. Minaog sa dihang nagkasinumbagay ang biktima ug suspetsado ug milanit sa iyang pistola ang pulis ug gipusil ang biktima sigon sa spot report nga nahipos nga lasa 8:30 kagabii si SPO2 Vicente Abaa Salaveria II boluntaryong misurender sa sabakan sa balaod human iyang mapusilan ang biktimang si Victor Hampac y Calunsag 46 anyos minyo residente sa Brgy. Minaog ug isgsoon sa asawa sa suspetsado. Usa ka empleyado sa ZN provincial engineering Office.

Base sa pasiunang imbistigasyon sa pagpangulo ni Police Inspector Aniway Jr sa Dipolog PNP nasayran nga mga alas 8:15 kaniadtong Marso 27 nasayran nga si SPO2 Salaveria miadto sa usa ka tindahan nga gipanagiyahan ni Evergesto Taruc didto sa National Highway sa Brgy. Minaog aron pagpalit ug kahoy nga sugnod sa maong dapit. Sumala sa taho, ang biktima nga si Hamac kauban sa usa ka Laurence Elsi nga gitohoang pulos influwensyado sa ilimnong makahubog nga nag stand-by sa maong tindahan. Sigon sa report ang biktimang si Hamac nanghagit ug away ngadto ni SPO2 Salaveria nga maoy hinungdan sa ilang sinumbagay.

Atol sa maong insidente, gisulayan pa unta ug badlong ang biktima ug suspetsa apan wala magpatoo sa nasayran nga tungod sa kombati sa duruha nangatumba kini ug nagkalayog didto atubangan sa panimalay sa usa ka Alvin Rey Apali. Suma pa si SPO2 Salaveria ang nalupig sa Linayugay ug nasakyan ni Victor Hampac hinungdan nga napugos ug lanat sa iyang gitakin nga pistola si SPO2 Salaveria ug gipusil ang biktima sa maka-usa ka higayon  ug na-igo sa walang dughan ginamit ang service 45 pistol ug voluntaryong misurrender sa Dipolog PNP, nga naka-angkon usab ug mga bon-og sa kalawasan tungod sa mga igo sa kinomo. Samtang ang biktimang si Victor Hampac gi rescue pagdala sa ZN Cooperative Hspital sa Brgy. Turno, apan gikatahong dead on arrival tungod sa na-angkon niining fatal nga gun shot wound sa iyang lawas.

Si SPO2 Salaveria II giilawom karon sa restricted custody sa Dipolog PNP pending sa pag-file sa kasong pagpatay nga posibling makadulot sa porwisyo sa iyang nakaong-ong nga retirement sa iyang serbisyo. (Southpoint, Vol.1No.13)

 

Dipolog
Ekonomiya sa ZaNorte miuswag atul ZPRAAM’08

Giila karon ni kanhi vice mayor Engr. Edilburgo Bebs Cheng nga daku ug impact sa ekonomiya sa duha ka dakbayan sa Dipolog ug Dapitan ug sa lalawigan sa Zanorte ang pagpahigayon sa Regional Meet dinhi sa atong dapit.

Ang kanhi bise mayor kinsa usa usab ka magpapatigayon dinhi sa Dipolog ang mipaklaro nga nadugangan ang gidaghanon sa ilang mga customers sa ilang patigayon dihang gibuksan ang ZPRAA Meet ni-adtong Lunes. Iyang giila nga milihok ang sector sa ekonomiya dinhi sa atong dapit gumikan kay daghan misaksi sa maong kalihukan. Partikular nga gitumbok sa kanhi opisyal sa Diplog ang sector sa transportasyon, balay pahulayan ug pagkaon.

Midyeg usab si kanhi bise mayor Bebs Cheng sa gihimo ni Gov. Yebes nga bisan resgo ang papghigayon sa maong kalihukan sa parte sa kagamhanang probinsiyal ilabi na sa pagpngandam sa mga pasilidad sa sports apan kini wala magmakuli sa pagdawat niini nga dinhi himoon ang ZPRAA meet 2008. Gi-angkon usab niya nga sukad sa paglingkod ni Gov. Lando Yebes nahimo ang mga dinagkung kalihukan sa probinsiya nga mikabig sa daghanang bisita nga maoy nakapalagsik ang atong ekominya.

Usa sa gitumbok sa kanhi opsiyal ning siyudad nga mi-ani ug maayong resulta ang paningkamot sa gobernador human kita miirog ngadto sa numero dos gikan sa numero uno nga pinakapordoy nga probinsiya sa tibook nasud. Gipaabot usab ni kanhi vice mayor Cheng ang iyang mga panghinaot alang sa kalampusan sa gipahigayong ZPRAA meet 2008 dinhi sa Zanorte. (Southpoint, Vol.1No.13)

 
 

Mga tulisan balonan ra ang nadala

Usa ka magtiayong magpapatigayon ning dakbayan ang biktima sa tulis kaniadtong Domingo Marso 23 ning tuiga. Matud sa kapolisan ning dakbayan ang magtiayong Mr. ug Mrs. William Lee ang gitulis kini sa wala mailhing mga suspetsado sa ilang gayong paghiabot sa ilang gipuy-ang apartment sa may dalan Gen. Luna nga gipanag-iya sa mga Uy.

Paghiabot gayod sa magtiayon sa ilang gipuy-an nga apartment, gitionan gilayon sila sa mga suspetsado sa kalibre .45 nga pistola dungan sa paglabni sa gigakos ni Mrs. Lee nga “cellophane” kay nagtuo ang mga tulisan nga mao kadto ang gisudlan sa ilang halin nianang adlawa. Ang kapolisan nagkanayon nga nahitabo ang maong tulis paghiabot gayud sa magtiayon sa ilang gipuy-an nga apartment sa dalan Gen. Luna ning dakbayan nga gipanag-iya sa mga Uy.

Tungod sa daling pagrespondi sa PNP Dipolog, mipabuto ang usa ka suspetsado nga maoy hinungdan pagkaigo ni Mr. Lee sa ubos nga bahin sa iyang lawas. Matud pa, walay nakuhang cash o mga alahas ang mga tulisan kay ang ‘cellophane’ nga ilang gilbani gikan sa paggakos ni Mrs. Lee, mao man ang ilang balonan nga gisudlan sa ilang pagkaon. Samtang si Mr. Lee na ‘confine’ sa Zamboanga del Norte Cooperative Hospital tungod sa samad pinusilan gikan sa mga tulisan. (Press Freedom, Vol. XX No. 24)

*

 

Nangita ug bakanting yuta para cassava plantation
NEGOSYANTING KOREANO INTERESADO MOPALIT UG BINULTO NGA BALANGHOY

Usa ka negosyanting koreano ang nahidangat ning semanaha dinhi sa dakbayan sa Dipolog uban ni Congressman Jorge Jarnais sa Negros Orriental tungod kay interesado kini nga mobobo ug pohunan para sa pagtanum ug pagpalit sa binultong kamoteng kahoy.

Ang negosyanting Korean national uban ni Congressman Jarnais nakigkita kang Governor Rolando Yebes aron ipaabot ang ilang interes sa pagpangita ug bakanting luna sa yuta nga maoy ilang katamnan ug kamoteng kahoy para himoon ug harina. Ang maong Koreano uban ni Joseph Jatico, Chief Operation sa PROVET sakay sa 4 setters nga eroplano ang milupad-ibot sa mga kalungsoran gikan sa Polanco ngadto na sa lungsod sa Sindangan aron mangita ug bakanting yuta para ilang matanuman ug balanghoy.

Matud pa ni Congressman Jorge Jarnais, ang maong koreano nakasugod na sa iyang pagtanum ug balanghoy sa ilang probinsya sa Negros ug nagbutang na usab kini ug dakong pactorya para sa paghimog ug harina. Tungod kay nagkulang sa supply sa balanghoy ang maong probinsya, maoy gusto sa maong koreano nga mopalapad kini sa iyang pagpamalit ug pagpananum ug kamoteng kahoy ug maoy napilian ang probinsya sa Zamboanga del Norte gumikan kay haduol lamang kini nga lugar sa Negros.

Ang negosyanting Korean national uban ni Congressman Jarnais nakigkita kang Governor Rolando Yebes aron ipaabot ang ilang interes sa pagpangita ug bakanting luna sa yuta nga maoy ilang katamnan ug kamoteng kahoy para himoon ug harina.

Labing minos tres mil ngadto sa singko mil ektar-yas nga luna sa yuta maoy gikinahanglan para katamnan ug kamoteng kahoy. Matud pa ni Congressman Jarnais, kon masugdan na ang maong proyekto dinhi sa Zamboanga del Norte, hayan ang mga katawhan maikag usab sa pagpananum ug kamoteng kahoy tungod kay segurado man nga mahalin ang ilang produkto sa maayo nga presyo. Ang balanghoy nga ilang mapalit dinhi sa Zamboanga del Norte dad-on sa Siaton, Negros Orriental diin atua didto ang ilang paktorya.

Kon ugaling moabot na sa tonilada ang gidaghanon sa produkto nga sapar na kaayo sa supply para sa paghimo ug harina, hayan kini mobutang ug casava factory dinhi sa atong probinsya. Matud pa ni Congressman Jarnais, ang paliton nga kasaba gikan sa mga mag-uuma kadtong presko nga wala pa mabulad, ug kini maoy makahatag kasayon sa mga katawhan nga dili na mahago gikan sa pag-harvest, pagtadtad ug pagbulad sa init ug pagasto sa labor.

Gipasalig ni Congressman Jarnais sigon sa ilang kasinatian karon didto sa Negros, nga dili mahitabo ang nahimong palpak nga proyekto nga gipasiugdahan sa San Miguel dinhi sa probinsya nga nag-awhag sa mga katawhan sa pagpananum ug balanghoy apan sa himan-himan nga aduna nay produkto kini wala na magpatim-aw. Didto sa Negros sumala pa ni Congressman Jarnais, aduna nay sayes mil ektar-yas nga casava plantation apan kini nagkulang pa hinungdan nga magsugod na usab sila ug patanom ug dugang.

Para sa kongresista, kon kini madayon sa Zamboanga del Norte, ang bakanting yuta magamit na sa pagpananum sa mga mag-uuma ug dako kinig ikatabang sa pag-uswag sa ilang panginabuhi tungod kay kini maka-generate ug trabaho ilabi na kon makatukod na kini ug plantasyon dinhi sa atong probinsya nga makahatag ug dugang pagpalagsik sa atong ekonomiya kay kini nasinati na karon sa iyang distrito ug sa probinsya sa Negros.

Gipasalig ni Vicente Sanchez, ang tinugyanan sa gobernador sa iyang special project nga makahatag sila ug luna sa yuta nga maoy gikinahanglan para katamnan ug balanghoy. Matud niya duna na siyay nakit-ang luna sa lungsod sa Katipunan, Roxas, Manukan, Jose Dalman ug Sindangan sigo sa gidak-on nga gikinahanglan para sa maong proyekto. Masaligon si Governor Rolando Yebes nga dili mapakyas ang mga kataw-han niining tinguha karon sa negosyanting Koreano nga mobobo ug pohunan dinhi sa Zamboanga del Norte pinaagi sa pagbutang ug casava plantation.

Matud sa gobernador, ang pagkuyog ni kanhi Governor ug karon Congressman Jorge Jarnais sa Negros Orriental maoy usa sa dakong timailhan sa ilang interes sa pagpadayon sa maong giplano nga plantasyon sa kasaba ilabi na nga nakagasto na kini sa ilang pag-anhi dinhi libot sa mga lungsod sakay sa eroplano aron lang mangita ug bakan-ting yuta para katamnan ug kamoteng kahoy. Maoy gilaraw karon ni Governor Yebes nga ang iyang pagatotokan sa maong proyekto mao ang segundo distrito samtang tipik lang ang tersero distrito gumikan kay atua na didto ang ethanol plantation. (The New Nandau, Vol. XVII No.38)

*

 

Zamboanga City over – all champion sa ZPRAAM ‘08

Migawas nga kampeyon ang team Zamboanga City sa elementarya ug sekondarya level sa 2008 Zamboanga Peninsula Regional Athletic Association Meet (ZPRAAM) niadtong Marso 24-28, niining tuiga nga dinhi gipahigayon sa Zamboanga del Norte Sports Complex.

Sa pagpakighinabi sa DXFL headline balita ngadto kang Mrs. Aletha Saile, ang Education Supervision for Physical Education and Schools Sports sa DepEd Zamboanga del Norte Division, nga sa elementary level ang dakbayan sa Zamboanga nakaangkon kini ug 295 points, gisundan sa ZaNorte sa 212.5 points, Zamboanga Sibugay, 197.5 points, Zamboanga del Sur 157 points, Dipolog City 84 points, ika-unom ang Pagadian City sa 72.5 points ang Dapitan City sa 57.5 points ug ang ika-walo Isabela City sa 56 points.

Samtang sa Secondary Level ang dakbayan sa Zamboanga nakakuha ug 343.5 points, gisundan sa Zamboanga Sibugay sa 197 points, ZaNorte sa 187.5 points, Dipolog City sa 179 points, Zamboanga del Sur 148 points, Pagadian City 97.5 points, Dapitan City 71 points ug Isabela City 62.5 points. Dugang pa ni Mrs. Saile nga adunay mga magdudula sa ZaNorte ang madala sa Palarong Pambansa, karong Abril 20-26, niining tuiga sa Puerto Prinsesa, Palawan.

Ngani sugod  karong Abril 6 ngadto na sa Abril 16 ipahigayon ang training sa tanang magdudula sa rehiyon 9 dinhi sa ZaNorte, tungod kay sa Abril 17 maoy paggikan nila lulan sa Super Ferry alang na ngadto sa Palawan. Matud pa usab ni Saile nga kapin sa 500 ang naglangkub sa rehiyon 9 athletic delegation ang gikalatid nga musalmot sa Palarong Pambansa.

Sa kalampusan sa 2008 ZPRAA Meet, dinhi sa ZaNorte, nagpasalamat ug daku sa mga opisyales sa kagamhanang probinsyal nga gipanguluhan ni Governor Yebes ug sa DepEd Officials sa ZaNorte sa suporta nga ilang hilugway sa maong kalihukan, ilabi na sa Provincial Engineering Office sa pagpa anindot sa Sports Complex. (Sheng, Southpoint, Vol.1No.13)

*

 

ZPRAA MEET 2008 malamposon

Malamposon napahigayon dinhi sa dakbayan sa Dipolog ang Zamboanga Peninsula Regional Athletic Association meet sulod sa usa ka semana diin ang Zamboanga del Norte maoy nahimong host sa maong kalihukan.

Halos tanang paugnat sa kusog anha gihimo sa ZaNorte Sports Complex sulod sa Zamboanga del Norte National High School. Sa pagbukas sa ZPRAA Meet niadtung Lunes, si Congressman Cesar Jalosjos maoy nahimong guest of honor uban ni Governor Rolando Yebes kinsa maoy mipakayab sa bandela timaan sa panaghiusa diha natad sa paugnat sa kusog.

“LET US DO OUR BEST AND GOD WILL DO THE REST,” nagkanayon si Governor Yebes nga mikutlo gikan sa balaang kasulatan atol sa pormal nga pagbukas sa Zamboanga Peninsula Regional Athletic Association Meet didto sa Zanorte Sports Complex sulod sa Zamboanga del Norte National High School ning dakbayan sa Dipolog. Sumala pa sa gobernador ang subling pag-host sa Zanorte sa ZPRAA Meet 2008 usa ka dakung respon-sibilidad para sa lalawigan bisan kon aduna pay dag-hang butang nga angayang hatagan ug unang pagtagad sama sa pagpa-ngandam sa mga pasilidad ug problema sa mga katawhan taliwala sa kakulangon nga gisagubang sa probinsiya.

Apan iyang gipaklaro nga kining tanan wala niya gi-isip nga babag o kalisdanan kung dili usa ka hagit ug oportu-nidad aron madiskobre ug mabaid ang kapasidad sa atong lalawigan diha sa pagpasi-ugda sa usa ka dakung kalihukan sama sa ZPRAA Meet 2008. “We do not give our back to hosting this event. I do not consider this as an obstruction or another difficulty but a challenge and an opportunity to enhance, intensify, discover and even rediscover our capacities, our strengths and our limitations.”

Gi-angkon ni Gov. Yebes nga sa mi-aging mga semana gihimo ang pagpangandam sa mga pasilidad nga gamiton sa naasoy’ng kalihukan tungod kay gusto niya nga hamugaway ug malinawon ang pagpa-higayon sa pa-ugnat sa kusog diin kini maoy usa sa gikinahanglan para sa mga atletang kabataan diha sa pagkab-ot nila ang kada-ugan alang sa tagsa-tagsa nila ka mga abilidad sa natad sa sports. “We want to give you an atmosphere of ease and confidence, for you to feel served and cared for so that in your struggle for excellence in you chosen field of sports you will reap nothing but the best.” Sa ngalan sa mga katawhan sa Zanorte, si Gov. Yebes ma-initong midawat sa tanang mga bisita ug mga atleta alang sa ZPRAA Meet 2008 diin iyang gipanghinaot nga unta sa ilang pagpa-uli sa ilang tagsa-tagsa ka dapit ilang mabati ug balunon ang maayong kasinati-an sa ilang pagsalmot sa maong kalihukan dinhi sa probinsya sa Zamboanga del Norte.

Gi-awhag sa gobernador ang tanang taga-Zanorte nga ipakita ang panaghi-usa ug maayong pagtagad sa atong mga bisita nga ani-a karon dinhi sa atong malambo-on ug malinawong lalawigan aron pagsalmot sa dakung kalihukan sa natad sa pa-ugnat sa kusog. “Let us demonstrate a people of unity and hospitality, and a province of prosperity and peace, panapos nga mensahe ni Governor Yebes. Sa iyang kabahin, sa mensahe nga gipabati ni Congressman Cesar Jalosjos kini nagkanayon dili lamang sa paugnat sa kusog masukod kon giunsa pagbansay ang mga atleta sa pagpahigayon sa ZPRAA dinhi Zamboanga del Norte, kon dili, lakip na niini ang kapabilidad sa panaghiusa tali sa mga silingan nga siyudad ug probinsya sa tibuok rehiyon.

3rd District Congressman Jalosjos kinsa maoy guest speaker sa ZPRAA Meet 2008 mipahayag nga ang pagpahigayon sa maong kalihukan dili lamang alang sa kombati para sa tanang matang sa paugnat sa kusog kung dili lakip usab ang pagsukod sa kapabilidad ug kapasidad alang sa panaghi-usa isip mga silingan nga siyudad ug probinsya. Sumala pa niya ang ZPRAA meet 2008 maoy timaan alang sa hingpit nga panaghi-usa ilabi na sa natad sa sports, lakip na ang pagpaambit sa usag-usa ka kultura ug pagpalambo sa atong ekonomiya. Si Congressman Cesar Jalosjos kinsa mao karon ang Chairman sa committee on Youth and Sports Develop-ment sa ubos balay balao-ranan sa kongreso mipa-hayag ilawom sa iyang komitiba, mohimo siya ug mga lakang sugyot balaod-non para paglambo sa mga kabataan diha sa pagpalig-on sa youth development priority program pinaagi sa pagmugna ug LocalYouth Development Council sa tanang mga kalungsoran kinsa maoy magpalapad ug magbansay sa mga programa para sa kabataan sa tibook nasud sa natad sa pa-ugnat sa kusog.

Lakip niini ang paghatag ug benepisyo sa panglawas para sa mga propisyonal nga mga atleta nga nakahatag ug kada-ugan sa pangkalibutan nga pa-ugnat sa kusog lakip na niini ang uban pang mga benepisyo nga angayang mahatag ngadto kanila. Ang pormal nga pagbukas sa ZPRAA Meet 2008 gihimo ni Dr. Walter Albos, Assistant Regional Director sa Department of Education, Region 9 diin gitambungan sa mga opisyales sa DepEd ug mga piniling opisyal sa walo ka mga deligado nga naglangkob sa Zamboanga del Norte, Zamboanga del Zur, Zamboanga Sibugay, Dapitan City, Dipolog City,  Isabela, Pagadian City ug Zamboanga City. Kini gitambongan usab ni Congressman Tony Cerelles uban sa tanang membro sa Sanguniang Panlalawigan sa Zamboanga del Sur. (The New Nandau, Vol. XVII No.38)

*

 
Gov. Yebes midasig sa taga Leon Postigo i-preserbar ang panaghiusa

GIDASIG ug gipasidunggan ni Governor Rolando Yebes ang mga katawan sa lungsod  Leon Postigo ning atong lalawigan sa Zamboanga del Norte nga i-preserbar ang gipakita niining panaghiusa nga maoy nakatampo sa kalambuan nga naangkon karon sa lungsod.

Kini maoy tipik sa mensahe ni Governor Yebes nga maoy guest speaker kagahapon sa ika 26 ka tuig nga kasumaran sa pagkahimugso sa lungsod sa Leon Postigo. Ang programa ang gihimo sulod mismo sa gymnasium sa maong lungsod nga diin maoy nakapahingangha sa gobernador sa iyang nakitang dakong kausaban sa gym. Alang kaniya kini nagpasabot lamang nga anaa ang panaghiusa alang sa kalambuan. Sagad sa mahitabo nga taman ra sa istorya ang pulong nga “panaghiusa”, gihimong ehemplo sa gobernador ang kaguliyang karon sa nasud nga anaa ang “crab mentality” nga kung kinsa man ang anaa sa ibabaw tungod sa pagpaningkamot kini ang birahon niadtong anaa sa ubos. Iyang gipanghinaot nga ma-usob ang maong mentalidad aron maangkon ang hingpit nga kalambuan sa nasud ug sa probinsiya. Laing ehemplo nga gihatag ni Governor Yebes mao ang pagkabahin-bahin sa mga Filipino sa desisyon nga nagdala sa kadaugan ni Pacquiao.

Mitambong usab sa programa ang anak sa gobernador nga si Rolando “Jun-Jun” Yebes, Jr.

Apan sa nakita ni Governor Yebes sa lungsod sa Leon Postigo nagpabilin ang panaghiusa sa mga katawhan ug mga opisyales sa pagpanguna ni Mayor Rolando Tablezo. Gihatagan ug gibug-aton sa amahan sa probinsiya nga kinahanglang i-preserbar ang panaghiusa sa taga Leon Postigo aron mas molambo pa kini pag-ayo. Ang lungsod ang puno kini sa mga minerales, ang kadagatan ang abunda kini sa mga isda. Kini maoy nakabintaha sa Leon Postigo kung itandi sa ubang mga lungsod sa Zanorte.

Gikalipay ug dako ni Mayor Tablezo ang tabang usab nga ilang nadawat karon gikan nila ni Governor Yebes ug 3rd District Congressman Cesar Jalosjos. Ang maong programa kagahapon, gitambungan kini sa mga kadagkuan, mga empleyado, mga tinun-an, magtutudlo ug mga katawhan sa lungsod. Karong tuiga ang pagsaulog sa ika 26 ka tuig nga Araw ng Leon Postigo kini nagdala sa team “Kahi-usahan maoy yawe sa Kalambuan”. (Southpoint, Vol.1No.13)

 
 

 HULAGWAY BALITA

 

Juan’s World, Southpoint Editorial Cartoon (Southpoint, Vol.1No.13)
 

Pig Boy’s Barkada, Southpoint Editorial Cartoon (Southpoint, Vol.1No.13)

*

 

Gov Yebes gidasig ipabilin pagserbisyo alang sa panglawas

GIPAABOT sa usa ka langyaw nga doctor nga gikan sa nasud sa Amerika ang iyang pagdasig ngadto kang Governor Rolando Yebes nga ipabilin ang pagserbisyo sa panglawas sa mga katawhan dinhi sa Zamboanga del Norte.

Atul sa flag raising ceremony kaniadtong Lunes sa provincial capitol gipabati ni Dr. Simon Solano sa Renewed Life in Jesus Church ang iyang tumang pagpasalamat ngadto sa mga opisyales sa probinsiya sa katumanan sa ilang mission alang sa mga katawhan dinhi sa Zanorte. Angayang masayran, nga si Dr. Simon Solano ang mihimo kini ug mga surgical operation sa provincial hospital nga libre uban nila ni William Raymond Farrace nga naka-asawa ug taga dakbayan sa Dipolog nga si Guadalupe Martalla Farrace. Ang magti-ayon ang mihatag kini ug daghanang mga medical equipment alang sa Zanorte Medical Center.

Gov. Yebes with Dr. Simon Solano, William Raymond Farrace and Guadalupe Martalla Farrace.

Alang kang Dr. Solano, dako ang iyang pagpasalamat kang Governor Yebes uban sa iyang pagdasig nga magpabilin ang pagserbisyo niini sa mga katawhan sama sa ilang mission sa Renewed Life in Jesus Church, USA. Gidugang ni Dr. Solano nga iyang ipadayon sa grupo kung unsa ang ilang nasugdan. Iya usab nga gipasalamatan ang gilugway nga tabang o suporta sa mga doctors sa Provincial Hospital ug ang mga kahimanan sa maong tambalanan. Tungod sa mao nilang mission iyang nakita kung unsay angayan pang itabang alang sa kalambuan sa operasyon sa hospital. Iya usab nga gidayeg ang Zanorte Medical Center. Gipahayag usab ni William Raymond Farrace nga dili sila magpanuko sa padayon nga pagtabang sa mga katawhan sa Zanorte.

Mapasalamaton ug dako si Governor Yebes sa gilugway nga tabang sa Renewed Life in Jesus Church. Pinaagi ni Guadalupe Martalla Farrace nga taga dinhi sa Zanorte wala kini magkawang pagtabang sa atong probinsiya. Mas gikalipay pag-ayo ug dako sa mga opisyales sa probinsiya sa Zanorte sa dihang gibutyag ni Dr. Solano nga mo-umol ug usa ka kasabutan tali sa kagamhanang probinsiyal ug sa ilang hospital sa Springfield, Vermont alang sa  sisterhood relationship. Subay niini ang mga doctors sa ilang tambalanan ang mo-anhi dinhi sa Zanorte aron sa paglugway sa ilang serbisyo, samtang ang mga doctors dinhi sa probinsiya ang ipailalom sa training o dugang pagtuon ngadto na sa Amerika. (Southpoint, Vol.1No.13)

*

 

Pulso Sa Katilingban
Cicer M. Binghay
“Like drifting dead leaves”

Pila pa ka dupa ang piniliay 2010. Pero mga mokandidato migimok nag sugod. Hinoon dili matabang mga mokandidato pagka presidenti nangimaw na. Hasta dinhi sa atoa nagpang waslikay’g mga apan. The candidates aren’t campaigning yet. They’re just praising themselves at the same time firing a demolishing forces against their would-be opponents.

Pero walay mga nagpakita timailhan nga mokandidato pagka mayor sa dakbayan sa Dipolog. Wala usab ing kwalipikasyon maka kandidato nga makapiyong sa iyang mga mata mopalit mas pa sa tagsa ka bulig ipalit butos sa mayoriyang Dipolognon. Kaha nagpakahilom daghang tinigom, pero dili luog, dalo ug makaako pag negosyo pagbawi sa salapi sa lungsod ug lungsoranon.

Sa ato pa klaro kaayo nga sa piniliay pagka mayor sa dakbayan sa Dipolog bugtong kwalipikado lamang makakandidato mao usab si Berto Uy ang kapikas sa atong mayor karon. Nga miyentras tanto walay maka atbang sa ilang duha ka pwersa sa tinagingting, pahimuslan ang pagdula-dola pagka permaniniti mga actor ug aktres sa political cinema sa taga Dipolognon. Unya sa mga mokandidato pagka Sangguniang Panglungsod permaninti mapili gihapon “ang mga manageable SP” nga permanent usab mga gapnod lamang sa ilang pagka SP nga kon asa ang sulog ug hapak sa mga balod adto usab sila mohuwatid pag abay-abay. Kining mga manageable SP sa kalibotan sa lehistatiba sa gamhanan sa Dipolog, kinahanglan magpasilong nga mag-upoy-upoy nga…hiniktan kay kon sila makaminaot, HAGIT dili makabalik. Dili masala unya sa takos sa tinagingtinganay panahon sa piniliay.

Bitaw, kining mga “manageable SP sa mayor” nakasabot nga kitang katawhan kanhiay pa sukad sila nangapili nga mga kikoy-kikoy lang. nakamatikod sa ilang pagpaanod-anod bisan ang ilang pagpaanod-anod kon unsay tuyo sa mayor ilang tabangan pa pag analisar nga mahasway, ma legal o ma justify sa mga bikil bisan daghan ang timailhan, daghan ang kabanginan batok sa naandang natagik sulondon mga balaodon. Imposibli nga magpadayon kini silang gitan-aw sa nakasabot sa ilang pagka “manageable sa mayor pagka SP”. Magpa baga usa lang sa nawong. Mao baya sa makadaghan ang mayoriyang katawhan makapangutana sa kaugalingon: Kon hain kaha dinhi taman magpaanod-anod na lamang kining mga “manageable SP sa dakbayan sa Dipolog sa mayor”? Basta na lang sila napili, paghatag butirik nga sila mga napili, bisan mga anino lamang sa ilang kaakohan ug responsibilidad pagka magbabalaod tingog sa lungsod? For their own convenience lang?

Hinoon nianang pundok “manageable SP” karon naghulat sa hustong panahon. Kon kanus-a mauso o usohon na sa mayoriyang katawhan ang pagpilig kandidato sigon sa hustong kwalipikasyon sa edukasyon ug pagka service oriented 90% alang sa pag alagad 10% lamang pagpabutirik, diha na tingali kini sila manglupad pagpangitag laing batuganan. Kay kon magpaabot sila kon kanus-a manghupas ang kahakog pag negosyo politico layo pa ang pagpaabot. Hinoon nay dili malalis nga “nothing is forever. Nga dunay tumoy sa kinatumyan sa tanan ning kalibotan. ipaalaot miyentras tanto ilang pagka tal kawlipikadong mamunoan hangtod kini abton nga bukbokon na lamang nga dili na ikatayada. Husto kaayo ang pagbali-balit-ad sa atong Bise Mayor. Sa iyang pagkuyog sa sulog, nanoy walay babag iyang pagpili pag usab. Dayon ang iyang iampo lamang ubanan sa pagdagkot black and white kandila nga mahatagan…..kahigayonan maahat pagka mayor. Matod pa sa usa ka magsusolat si Will Rogers usa ka humorist: “The man with the best job in the country is the vice president. All he has to do is get up every morning and say, “HOW IS THE PRESIDENT?”

“Manageable elected officials to me are like dead leaves drifting by the window ubos sa landong sa dakong punoang kahoy. Walay bili sa gitugpahang yuta, “no phoenix in its ashes”. They needed a reformation of their present administration. Ingon na lang pagka ginawngan sa ilong atong mga napiling SP sa dakbayan sa Dipolog? (Press Freedom, Vol. XX No. 24)

 
Credits: Press Freedom is published every Saturday and entered as 3rd class mail matter in Dipolog City. Printed by Young Printing Press with Editorial Office located at Upper Turno, Dipolog City. Tel. No. (065) 212-4343 or 212-6665

 

Sisterhood tali sa ZNMedical Center ug
Springfield Hospital sa Vermont gitun-an

 

Kasamtangan na karong gipatun-an sa gobernador ang planong pag-establisar ug sisterhood tali na sa Zamboanga del Norte Medical Center ug Springfield Hospital sa Vermont didto sa Amerika.

Gibutyag ni Governor Rolando Yebes nga kini nga plano unang gipasibaw ni Dr. Simon Solano sa Renewed Life in Christ Movement nga nagatabang karon gikan sa karaang Provincial Hospital hangtud sa ZaNorte Medical Center sa nagkadaiyang mga ekipo ug kahimaNan nga gidonar niini para sa katawhan sa ZaNorte. Ang nasangpit nga grupo nga gipanguluhan ni Mr. Bill Farace, nga nakapangasawa ug taga Dipolog kasamta-ngang nagpahigayon karon ug medical mission sulod sa Provincial Hospital pinaagi sa paglugway ug libreng operasyon ilabi na kadtong adunay mayoma nga mga kababayen-an.

Sa iyang kabahin si Governor Yebes miklaro nga pabor kaayo siya sa pagsagup sa maong ideya nga adunay sisterhood tali sa ZaNorte Medical Center ug Springfield Hospital sa Vermont kay makatabang kini ug daku sa pagpalambo ug dugang sa sirbisyo ug kahibawo sa mga medical personnel sa probinsiya.

Aminado ang gobernador nga kon mahinayon ang maong sisterhood kini maoy pinaka una nga panag-dugtong nga mahitabo tali sa duha ka mga tambalanan. Ilawom sa maong sisterhood ang mga doctor sa medical center mamahimong mapa-ilawom sa dugang pagtuon sa ilang hospital sa Springfield, samtang makapahigayon usab ug medical mission ang mga doctor gikan sa Vermont, USA dinhi sa atong medical center.

Sa samang bahin gipatin-aw ni Governor Yebes nga ang pagpa-ilawom sa PHILHEALTH insurance dili lamang limitado sa mga meyembro sa Barangay Indigent Beneficiaries Organization sa probinsiya kon dili bukas kini sa tanang mga kabus nga katawhan sa atong lalawigan sa ZaNorte. Kini ang giklaro ni Governor Yebes human madasoni sa Sangguniang Panlalawigan karong semanaha ang resolusyon nga naghatag kaniya ug gahum alang na sa pagtimaan ug kasabutan tali sa Philippine Health Insurance, Inc. para sa implementasyon sa National Health Insurance Program alang sa mga regular in-patient ug out-patient consultation ug diagnostic package alang sa mga kabus nga katawhan.

Sa sayu pa higpit nga gipadas-og sa committee on health sa Sangguniang Panlalawigan nga gipanguluhan ni Board Member Cedric Adriatico ang pagpanday sa maong resolusyon sa ilang plenary session niadtong Lunes. Si Governor Yebes naghisgut nga ang probinsiya mogastu ug P20 milyones ka pesos para sa pagpa-enrol sa PHILHEALTH alang sa unang 15,000 ka mga beneficiaries.

Giklaro usab sa gobernador nga dili usa ka ordinaryong PHILHEALTH insurance ang kuhaon sa probinsiya kay mas lapad ug daku ang coverage niini. Matud pa ni Governor Yebes kon ang mga beneficiaries niini magpatambal sa medical center ug magbatun ug excess nga dili na ma cover sa PHILHEALTH ang laing programa sa probinsiya maoy mosalu sa pagbayad niini.

Hayan mapahigayon ang pagtimaan sa kasabutan tali sa ZaNorte ug PHILHEALTH karon nang sunod buwan, dugang pahayag sa gobernador. Sa samang bahin gipahi-bawo niya nga nangabot na ang pipila ka boxes sa mga tambal gikan sa mga German doctors nga mopahi-gayon na usab ug medical mission dinhi sa atong probinsiya.

Sumala pa sa gobernador daghan nang mga German doctors ang mosalmot karong tuiga sa nasangpit nga medical mission nga iyang gituhuan nga mapa-higayon sa buwan sa Mayo karong tuiga diin sama sa miagi molugway sila ug libreng pagpang-opera. (Press Freedom, Vol. XX No. 24)

 
 

Roll-on roll-of port ipahimutang ni Rep. Arnaiz sa Katipunan, ZN

Wala itago sa kongresista gikan sa Negros Oriental ang daku niyang interest nga mapahiluna na karong tuiga ang roll-on roll-off port sa lungsod sa Katipunan, Zamboanga del Norte aron makasugod na kini sa iyang operasyon.

Gibutyag ni Congressman George Arnaiz, nga ang nasangpit nga proyekto personal niya mismong gisubay sa Department of Transportation and Communications ug sa Deparment of Finance bisan tuod ug dili na kini niya sakup sa iyang congressional district. Si Congressman Arnaiz midugang sa pagpahayag nga ang gipahat nga pundo para sa roll-on roll-off port sa Katipunan uban sa laing duha pa ka proyekto para pagtukod ug pantalan ang kasamtangang gigamit karon sa DOTC nga garnishment sa kontrobersiya sa puerto sa Batangas.

Wala itago ni Congressman George Arnaiz gikan sa Negros Oriental ang daku niyang interest nga mapahiluna na karong tuiga ang roll-on roll-off port sa lungsod sa Katipunan.

Matud pa ni Congressman Arnaiz gipasaligan siya ni Secretary Gary Teves sa Finance nga kon makadawat lamang ang ilang buhatan ug order nga mahimo nang irelease ang maong pundo sa walay paglangay ipagawas gilayon kini niya para kasugdan na ang pagtrabaho sa maong pasilidad. Gipatin-aw sa kongresista sa Negros Oriental nga maoy kanhi gobernador usab sa maong probinsiya nga bisan ug dili sakup niya ang Katipunan apan sa miagi pa siya dakung interesado nga mapatindog na ang maong pasilidad kay kini maoy makatabang sa pagpasutoy sa lakat sa komersiyo sa ilang probinsiya ug sa ZaNorte kay mga negosyante sa ilang lugar nga nagpunay kaniya ug aghat nga paspasan ang pagpahiluna sa maong kutay tali sa lungsod sa Katipunan ug Siaton.

Usa na niini, matud pa ni Congressman Arnaiz mao ang Ceres Bus nga gusto mobutang ug biyahe sa ilang kompaniya gikan sa Negros paingon sa Zamboanga City ug laing biyahe gikan sa Bacolod paingon sa Davao City. Sa iyang nakita gikina-hanglan gayud nga mabuksan ang roll-on roll-off port sa Katipunan kay dili kaya sa pasilidad sa Pulauan Port sa dakbayan sa Dapitan ang bul-og sa trapiko karon sa mga sakyanan nga interesado mopahimulos sa Strong Republic Nautical Highway bisan pa man ug sulod sa 24 oras ang operasyon niini karon.

Sa iyang kabahin si Governor Rolando Yebes, mibutyag nga iyaha nang sige nga gikuhit ang mayor sa Katipunan nga kon mahimo mangutang na lang sila sa gikinahanglang pundo para kasugdan na sa pagtrabaho ang maong pasilidad kay usik kaayo ang dakung oportunidad. (Press Freedom, Vol. XX No. 24)

 

Credits: The New Nandau is a member of the Publishers Association of the Philippines (PAPI). Editorial office is located at 076 Quezon Avenue, Dipolog City with Tel. No. (065) 212-3794; Cell No. +639205201041

*

MORE NEWS NGA BINISAYA

 

 

NOTE: SEND US YOUR NEWS.  Tell us what's going on in your barangays, clubs, schools, businesses and non profit organization. You can also send notices and announcements.
          

 

    Email to webmaster@dipolognon.com

      
Google
WEB THE DAILY DIPOLOGNON