March 27, 2008

 

Lungsod sa Sibutad nagbangutan:
MAYOR TOLENTINO NAMATAY SA CANCER

Mayor Benito Tolentino sa lungsod sa Sibutad ang namatay niadtung Biyernes, Marso 21, 2008 sa may alas 6:55 ang takna sa gabii sa edad nga 70 anyos human kini gi-atake sa iyang sakit sa cancer. Kini hikabsan sa iyang gininhawa samtang gitabang sa Zamboanga del Norte Cooperative Hospital sa Turno ning dakbayan sa Dipolog. Matud ni Engr. Jade Catubig, masamong ni Mayor Tolentino, ang iyang ugangan taudtaud nang naghambin sa iyang balatian apan niadtung Biyernes sa may mga alas 6:30 sa hapon ilang namatikdan nga luya na kaayo maoy hinungdan nga ilang gidala sa hospital dinhi sa Dipolog mintras maghulat sa eskedeul alang sa session sa Chemo Therapy sunod bulan didto sa Chunghua Hospital sa Cebu City.

Wala sila magdahum nga pag-abot nila sa Zamboanga del Norte Coopetative Hospital mabugtoan sa iyang gininhawa ang mayor. Sumala ni Catubig, ilang nahibaw-an nga si Mayor Tolentino nagbaton ug Lung Cancer human sa eleksiyon niadtung 2007 sa dihang ila kining gipa-biopsy didto sa Makati Medical Center sa kaulohan niadtung bulan sa Hulyo sa miaging tuig. “Kusog man god kaayo siya manabako ang cancer miabot na sa iyang liog.” Sukad niadtong bulan sa Hulyo, si Mayor Toletino napahigayonan na ug tulo ka session sa chemo therapy didto sa Chunghua Hospital sa Cebu tungod kay ingon sa ilang doctor, nakagamot na ug maayo ang maong sakit gikan sa baga, atay ug miabot na sa tilaok sa iyang liog.

“Nabalaka gani kaayo ang doctor ni daddy didto sa Makati Med human nila madeskobrehi nga duna kini cancer kay grabe naman diay kaayo.” Matud ni Catubig, magtuka-tuka na si Mayor Toletino ug moinom kay duna may nakabara sa iyang totonlan nga maglisud na siya ug tulon. “Ubos na kaayo ang iyang platelet. Nakabalo nami nga apiki na jud si daddy apan modalikyat gyud ug dagkot (segarilyo).” Sumala pa ni Konsehal Melvin Ondong, talagsa na kaayo moadto sa iyang opesina si Mayor Tolentino kay nagluya-luya na kini agi sa iyang sakit. Apan niadtung Lunes, si Mayor Toletino miadto pa sa iyang opesina bisan kon luya ang lawas kay maoy nag-supervise sa iyang gipatrabaho. “Nagpakita pa gyud siya sa mga tawo nga eskir pa siya bisan ug luya na.”

Human mabogtoi sa iyang gininhawa sa hospital, si Mayor Toletino gidala sa Gamalinda Funeral Homes alas 10:15 sa gabii ug kagahapon kini gi-imbalsamar. Ang patay’ng lawas ni Mayor Benito Tolentino gidala sa iyang panimalay sa lungsod sa Sibutad niadtung Sabado sa hapon. Matud sa pamilya, si Mayor Tolentino ilubong karong Abril 1, human sa State of the Province Address ni Governor Rolando Yebes kay mangadto ang mga kauban niyang mayor human sa SOPA  sa gobernador karong Marso 31. Si Mayor Benito Tolentino napili nga mayor sa lungsod sa Sibutad niadtung 1991 hangtud gitapos ang iyang tulo ka termino sa 1998. Miholip ug lingkod ang iyang asawa nga si Lolita sulod sa duha ka termino gikan niadtung 2001 hangtud sa 2007 ug siya na usab ang mibalik ug lansar ug mayor ug miadug sa eleksiyon niadtung 2007.

Vice Mayor Roger Dizon kinsa nahimong mayor niadtung 1998-2001 mao na usab karon ang mopoli sa lingkoranan sa mayor samtang ang numero uno nga konsehal nga si SB member Reynaldo Tamparong ang mahimong bise mayor. (The New Nandau, Vol. XVII No.37)

*

 

Darunday ug Mejorada mikomitir ug P50T sa ilang PIF
para sa Participatory Coconut Planting Project

Duha ka mga meyembro sa Sangguniang Panlalawigan sa Zamboanga del Norte mipadayag na daan sa ilang pagkomitir ilang Provincial Identification Fund para magamit sa Participatory Coconut Planting Project nga gipadas-og karon sa Philippine Coconut Authority.

Kini ang gipalanog ug gipadayag nila ni Board Member Anecito Darunday ug Ricky Mejorada sa dihang gipresentar atubangan sa balay balauranan ni PCA Provincial Director Ralph Hamoy ang nasangpit nga programa uban sa Office of the Provincial Agriculturist.

Sila si Darunday ug Mejorada mipahibawo na daan nga ilang ikomitir ang P50,000 sa ilang PIF para na sa maong programa bisan ug wala pa madasoni ang lakang nga sagupon kini sa ZaNorte.

Gipadayag nila ni Board Member Anecito Darunday ug Ricky Mejorada sa ilang pagkomitir sa ilang Provincial Identification Fund para magamit sa Participatory Coconut Planting Project nga gipadas-og karon sa Philippine Coconut Authority.

Gipasabot daan ni Ms. Maybel Bustalino, Agricultural Specialist sa OPA nga kini nga programa sa PCA gusto gayud ni Governor Rolando Yebes nga sagupon sa kagamhanang probinsiyal sa tinguha nga mapalagsik ug balik ang industriya sa lubi sa atong probinsiya.

Matud pa ni Bustalino ang nasangpit nga programa gusto nga ilakip ni Governor Yebes sa iyang Hi-Green Program. Matud pa ni Darunday sa una ang ZaNorte maoy numero unang producers sa copra sa tibook Mindanao apan karon nahulog na lang kining ikaduha. Ilawom sa maong programa ang PCA ug ang kagamhanang probinsiyal sa ZaNorte mohatag ug insentibo ngadto sa mga mag-uuma sa lubi nga mopailawom sa maong programa.

Matud pa ni Darunday maoy sabutan karon tali sa PCA ug probinsiya kon si kinsa ang mohatag sa unang insentibo ngadto sa mga mag-uuma sa lubi nga mopartisipar sa maong programa. Si Mr. Hamoy sa PCA mipahayag sa pagka karon maoy ilang gipatuman ang replanting project nga naglangkub na sa pagtanum ug bag-ong mga lubi. Ilawom sa maong programa kinahanglan ang mopartisipar nga mag-uuma magbatun ug nursery nga may 150 ka patumsan diin human sa himoong evaluation ang mag-uuma hatagan ug P5.00 nga incentive kada lubi.

Sa higayon nga ang patumsan mosugod na ug tubo dugang insentibo ang ihatag ngadto sa mag-uuma hangtud na sa pagbonga sa lubi. Si Darunday sa iyang kabahin nagkanayon nga kon sagupon kini nga programa sa probinsiya ang gastohon sa lalawigan mokabat lamang sa P10.00 kada lubi.

Sa higayon nga itanum na ang maong lubi ang PCA na maoy mohatag sa dugang insentibo. Kini nga programa matud pa ni Darunday makatabang ug daku sa pagpalunhaw ug balik sa atong probinsiya nga karon daghan pang mga bakanting lugar nga walay tanum.

*

 

SB Sec. Gipusil patay

Lanog sa lima ka buto sa kalibre 45 ang mibuak sa kamalinawon sa palibot ug ang kamatayon sa usa ka biktima ang nakapahikurat sa katawhan sa lungsod sa Sapang Dalaga, Misamis Occidental sayo sa buntag niadtung Martes, Marso 18, 2008 sa dihang gipusil patay ang Secretaryo sa Sangguniang Bayan sa maong lungsod.

Roland Cardino, 55 anyos, Sekretaryo sa Sangguniang Bayan kalit nga gipusil-patay sa usa ka mamumuno sa dihang nagpadulong na kini sa pag report sa iyang buhatan gikan sa ilang pinuy-anan sa poblacion nga duol ra usab sa munisipyo. Sumala sa nahipos sa kasayuran, sa wala pa mahitabo ang pagpusil-patay sa biktima, adunay usa ka tawo nga gibana-bana lapas 20 anyos ang pangidaron ang miduol sa usa ka tindahan daplin sa national highway sa may crossing atbang mismo sa police station og munisipyo ang mipalit ug sigarilyo, soft drinks ug biscuit dayon nag snacks diha mismo sa maong tindahan samtang nagpaabot sa paglabay sa biktima.

Wala madugay, si Cardino milabay sakay sa iyang motorsiklo. Sanglit kay adunay crossing ug medyo habog ang kilid sa aspalto sa national highway iyang giminoran ang iyang motorsiklong gisakyan aron pagtabok sa karsada.Diha-diha, ang ang suspetsado nga kamulong nag snacks sa tindahan ang midali pagtagbo sa biktima dayon gibuak ang botelya sa softdrinks  nga iyang gibitbit tunga sa karsada ug mipusil gilayon sa biktima sa pipila ka higayon ginamit ang kalibre 45 nga pistola maoy hinungdan nga nahagsa ang biktima gikan sa gimaneho niining motorsiklo.

Samtang gipusil-patay sa suspetsado ang biktima, adunay usa ka tawo nga nagsakay sa usa ka motorsiklong SUZUKI RAIDER 110 kolor itom gikan sa poblacion ang mikalit pag-abot duol sa nahitaboan ug ang suspetsado midali pag-angkas sa miabot nga motorsiklo dayon pasutoy og  padagan padulong sa lungsod sa Calamba. Atol sa paglanog sa mga boto sa armas, naalarma ang mga sakop sa kapolisan sa maong lungsod diin naa sulod  sa ilang Police Station mga 50 metros ang gilay-on gikan sa nahitaboan. Sa dihang ilang gitan-aw kung unsay nahitabo mao na lamang  ang ilang nakit-an nga ang suspetsado miangkas na sa motorsiklo palayo sa maong dapit.

Wala usab maglangan ang kapolisan ug ila kining gigukod sakay usab sa ilang motorsiklo samtang gi-alarma ang kapolisan sa lungsod sa Calamba aron sa pag-atang sa dalan apan napakyas sila pag-apas tungod sa kakusog  sa pagpadagan sa mga suspetsado. Nahibaw-an usab nga ang mga suspetsado wala makalahos sa lungsod sa Calamba ug gituhoan sa mga kapolisan nga mitipas kini pagsubay sa national highway hinungdan nga nalipat ang naggukod nga kapolisan. Samtang gipahigayon sa kapolisan ang paggukod sa suspetsado, ang biktima nga si Cardino gidali usab pagdala sa Calamba District Hospital apan gideklara sa Doktor nga patay na kini sa paghidangat sa tambalanan. Ang biktima nakaangkon ug samad pinusilan sa iyang agtang, tuong bahin sa liug ug sa iyang walang braso nga maoy hinungdan sa iyang hinanaling kamatayon.

Sumala sa paghulagway  sa mga nakasaksi sa hitabo, ang suspetsado nagsuot ug fatigue short pants, asul nga T-shirt ug military bull cap. Ang kapolisan sa Sapang Dalaga wala pay matumbok nga motibo sa pagpatay sa biktima apan ang pamilya mismo ni Cardino hugtanong mituo nga pulitika ang nagpaluyo ug hinungdan sa krimen. Sa dugang panginsusi, nahibaw-an nga ang biktima si Roland Cardino nahimong aktibong Municipal Coordinator sa Bayan Muna Partylist ug bokal nga kritiko sa dili makiangayong pagdumala sa lokal nga pangamhanan sa maong lungsod hinungdan nga nakadawat na kini ug mga panghulga  sa iyang kinabuhi pipila na ka bulan nga milabay sa wala pa siya posila. Kahibaloan nga sa miaging duha na ka bulan, ang kapolisan sa maong lungsod adunay nadakpang duha ka mga kadudahang tawo nga nagsuroy-suroy sa ilang lungsod ug sa dihang ila kining giimbestigar, miangkon kini nga si Cardino ang ilang tuyo nga kuhaon apan matud pa walay nahimong aksiyon ang kapolisan batok sa duha tungod kay gidali kini pagkuha sa usa ka politoko sa maong lungsod gikan sa ilang kustodiya.

Ang mga suod nga higala sa biktima misugilon nga sa miaging Dominggo ug Lunes pa unta gustong kuhaon sa mga suspetsado si Cardino apan napakyas sila sa ilang katoyuan tungod kay nakamatikod ang biktima nga adunay mga tawong kanunay magsunod-sunod kniya maoy hinungdan nga wala kini mag kompiyansa. Sa pagkahinabi ngadto sa pipila ka mga membro sa kapolisan sa maong lungsod, sila nagkanayon nga ang suspetsado dili yano nga killer tungod kay matud pa “bold and daring” kining mipusil-patay sa biktima duol mismo sa Police Station.

Nahibaloan nga si Cardino mipasaka ug kaso administratibo ngadto sa Ombudsman batok kang Mayor Animas gumikan kay wala kini hatagi ug katungdanan isip SB secretary kay gipapolihan ug laing kawani nga maoy gihimong acting SB Secretary. Ang nagbangutan nga banay sa biktima  kusganong mikondenar sa linuog nga pagpatay kang Roland Cardino samtang mipasibaw sa ilang singgit nga hustisya alang sa kamatayon niini. (Press Freedom, Vol. XX No. 23)

*

 
Gov. Yebes: Kadaugan ni Pacquiao nagdala ug insperasyon sa mga kabus

Nakab-ot nga kadaugan ni Manny Pacquiao sa ilang rematch ni Juan Manuel Marquez didto sa MGM Grand Hotel Casino sa Las Vegas Nevada maoy insperasyon sa mga kabus apan dunay porohan nga mosikat ug makab-ot ang kalamposan.

Kini ang gipabate nga pamahayag ni Governor Rolando Yebes samtang akto nga mingsaksi sa away nila ni Pacquiao-Marquez didto sa Las Vegas. Matud sa gobernador, ang nakab-ot nga kalamposan sa natad sa boxing ni Pacman maoy kapanaminan sa mga katawhan ilabi na sa mga kabataan karon nga dili babag ang kapobrehon basta maningkamot. Sumala pa ni Governor Yebes, si Pacquiao nagagikan sa kabus nga ginikanan, apan naning-kamot sa iyang kaugalingon nga mahimong mosikat ug kini nga damgo ang iyang nakab-ot tungod kay duna kini determinasyon.

Nakab-ot nga kadaugan ni Manny Pacquiao sa ilang rematch ni Juan Manuel Marquez didto sa MGM Grand Hotel Casino sa Las Vegas Nevada maoy insperasyon sa mga kabus.

Mao usab kini ang angayan panaminan sa mga katawhan ug kabataan nga dili babag ang atong kapobrehon basta lang dunay determinasyon inuba-nan sa paningkamot dili imposibli nga makab-ot ang gipangandoy nga kaus-wagan sa kinabuhi. Si Governor Yebes nagkanayon nga iyang paninguhaon sulod sa iyang administrasyon nga mahatud ang serbisyo sa mga kabarangayan, apan iyang giawhag ang mga katawhan nga mo-kooperar sa pagtabang sa ilang kau-galingon sa mga programa nga ihatud ngadto kanila tungod kay kon kini pa-sagdahan lamang, mama-himong mabaliwala ug dili makab-ot ang kalamposan.

Matud niya gikinahanglan ang matag usa dunay paningkamot sa kau-galingon, sama ni Pacquiao nga nagagikan sa kabus nga ginikanan apan walay puas ang paninguha nga makab-ot ang gidamgo nga pag-uswag sa kinabuhi. (The New Nandau, Vol. XVII No.37)

*

 

Dipolognon nagkabahinbahin sa opinion
sa kadaugan ni Pacquiao batok Marquez

Wala magkahiusa sa ilang opinion ang mga katawhang Dipolognon mahitungod sa nahimong desisyon sa tulo ka mga judges sa nakuhang kadaugan ni Manny Pacquiao batok sa mexicano nga si Juan Manuel Marquez sa ilang remacth niadtung Dominggo didto sa MGM Grand Hotel Casino, Las Vegas.

Atol sa tulomanon KASAYURAN, managlahing opinion ang ilang gipabate sa gipakanaog nga desisyon tungod kay dili sila kombensido nga si Pacquiao maoy mogulang mananaug sa ilang kombate gumikan kay si Marquez maoy mas daghan ug gipalupad nga kinumo nga miigo sa nawong sa pilipino boxer. Matud pa nila, dili ‘conbencing’ ang kadaugan ni Pacman tungod kay daghan kining igo sa kinumo nga gibuhian gikan sa mehikanong boksingero nga maoy nakapa-desmolar sa ilang giplanong taktika gikan sa pagsugod sa ilang kombate hangtud natapos.

Apan kadaghanan usab ang mipabate sa ilang lahing opinion sukwahe sa mga diskumpiyado sa resulta. Matud nila, kadaghanan sa nakakita sa matag away ni Pacquiao ang mamahimong kontra niini ang malukapa ug dili na kabakod o kaha mosurender nga maputos ug bun-og ang nawong ug lawas. Tungod lang sa ilang remacth ni Marquez nga wala kaayo mahinayke sa kinumo ang mehikanong boksingero, hinonoa mas daghan pang kinumo ang gibuhian nga nakaigo sa nawong sa pilipinong bokingsero hinungdan wala sila makonbenser sa nahimong kadaugan niini.

Apan matud pa nila, ang gipakitang kaisog ni Pacman sa ring maoy nakapahadlok ni Marquez kay bisan tuod ug sigi kining maigo apan pabilin kining nagbarug nga wala malup-og. Dili sama ni Marquez nga naigo sa walang kinumo ni Pacquiao sa ikatulong round, ang kini nahayang ug natumba. Ang kalig-on ni Pacquiao uban sa iyang power punch nga daw bomba nga miboto maoy nakapa-kombensir sa ikatulong hurado nga angayan ang pilipino boxer maoy mohawed sa titulo sa WBC Super Featherweight champion.

Sumala sa resulta, permero ug ikaduhang round para kang Marquez, ikatulong round natumba si Marquez sa three-punch combinition ug sa left straigths ni Pacquiao. Tungod kay nabate ni Pacquiao nga nabangog sa iyang kinumo si Marquez, kini mipalupad ug daghang kumo apan naka-recover ang mehikanong boksingero. Sa 4th round, ang puntos napunta kang Pacquiao. Sa ikalima nga round, si Marquez nakahimo sa pagpalupad ug daghang kinumo, apan nahitabo ang accidental head but o pagbangga sa ilang ulo nga nakapagisi sa ibabaw’ng bahin sa tuo nga mata ni Marquez. Score 5th round napunta kang Marquez.

Sa 6th round, si Marquez nga naka-recover gikan sa iyang pagkahapla sa 3rd round, ang midas-das kini kang Pacquiao ug mipalupad ug duha ngadto tulo ka sunod-sunod nga  rigth punch combination. Ang maong round napunta kang Marquez. 7th round, ang duruha nagsinukliay ug kinumo, apan mas daghan ug igo si Marquez. Si Pacquiao natsambahan sa makusog nga komo ni Marquez nga miigo sa ubos nga bahin sa iyang tuong mata nga maoy nakapa-gisi niini. Ang score, pabor kang Pacquiao. 8th round, si Marquez nakakita sa iyang target ug maoy siging gi-igo ang samad ni Pacquiao. Ang score, pabor kang Marquez.

Gikan sa 9th round hangtud na sa 12th round sa maong binukbokay, si Pacquiao na ang nakalamang sa score tungod kay mao kini ang nakapalupad ug mas bug-at ug komo ngadto kang Marquez. Sa desisyon sa tulo ka mga hurado, duha niini pareho ug score nga 115-112, samtang ang ika tulo, 113-114 nga maoy mideklarar kang Pacqiuao nga “New Super Featherwight Champion of the World.” Ang rematch nila ni Paquiao-Marquez niadtung Dominggo mao nay ika trese nga away ni Pacman didto sa nasud sa Amerika.

Si Pacquiao mao lang karon ang bugtong boksingero sa history sa sports nga nakakuha pareho sa korona sa flyweight ug super bantamweight ug super featherweight.

Usa sa gitrabaho karon mao na usab ang laing away ni Pacquiao batok kang WBC lightweigth champion David Diaz karong bulan sa Hunyo. (The New Nandau, Vol. XVII No.37)

 
 

Pagpananum ug lobe maoy gitinguha sa OPA –PCA

Pagpananom ug lobe maoy gitinguha karon sa agrikultura para molambo ang panginabuhi sa mga katawhan. Mao kini ang gipresentar ni Maybel Bustaliño sa Office of the Provincial Agriculture atol sa regular session sa Sangguniang Panlalawigan uban ni Mr. Ralph Hamoy sa Philipine Coconut Authority kon PCA kinsa nangayo ug counterpart sa probinsya diha sa kampanya sa pagtanum ug lobe.

Ang nasangpit nga proyekto maoy joint venture sa provincial agriculture ug sa PCA aron katabangan ang mga mag-uuma sa ilang problema diha sa pagtanum ug lobe alang sa ilang panginabuhi.

Matud ni Hamoy, gikinahanglan ang ayuda gikan sa probinsya aron mapalapdan pa ang maong proyekto ngadto sa mga barangay sa tibook probinsya nga wala matamne ug lobe kay maoy gipaninguha sa PCA nga malokop ug tanum sa lobe ang mga bakanteng lugar. (The New Nandau, Vol. XVII No.37)

*

 

DONASYONG PISO UG ITLOG SA MALLARD UG PEKING DUCKS GIDAWAT NI GOBERNADOR YEBES

Miabot dinhi sa Dipolog Airport niadtong Miercoles Santo, sakay sa abyon, ang gatusan ka mga piso ug itlog sa mallard ug Pekin ducks gikan sa Kauluhang Manila nga gidonar sa Bureau of Animal Industry para sa pagsuporta sa Provincial Livestock and Poultry Development Program ni Gobernador Rolando E. Yebes dinhi sa lalawigan sa Zamboanga del Norte. Kini ang nahipus nga kasayuran gikan mismo ni Vicente “Vic” Sanchez, Jr., Hepe sa Provincial Veterinarian Office ug Special Project Unit ubos sa buhatan sa gobernador atol sa usa ka exclusive interview ning pamantalaan.

Matud pa ni Sanchez, ang maong mga mallard ug Pekin ducks maoy tipik sa mubalor ug 2.5 milyones ka pesos nga material grant nga gihangyo ni Gobernador Yebes pinaagi sa project proposal nga gihimo ni Sanchez ug gisubmiter sa gobernador ngadto sa Bureau of Animal Industry kon BAI para sa ilang konsiderasyon. Tipik usab sa maong project proposal mao ang pagpangayo sa gobernador para sa kagamhanang probinsyal ug napulo ka mga dairy cows ug 100 ka mga dairy goats nga gi-endorsar usab sa BAI ngadto sa National Dairy Authority  ug Department of Agriculture para sa ilang tukmang aksyon.

Sumpay pa ni Sanchez, ang maong donasyong itik ug Pekin ducks maoy ilang himoon nga foundation stocks para sila pasanayon ug padaghanon aron ang mga anak niini ang ipang-apud-apud pinaagi sa dispersal program sa probinsya  ngadto sa mga miembro sa LANDO-BIBO ug susamang asosasyon. Sa kabihin sa dairy goat nga gihangyo ni Gobernador Yebes, si Sanchez misugilon nga aduna na siyay gipadala nga additional requirements para sa pag-release niini gikan sa Department of Agriculture. Gilauman ni Sanchez nga sa sunod bulan ang ilang gipangayo nga dairy cows ug dairy goat muabot na dinhi sa lalawigan aron kini unya ang mamahimong tuburan sa gatas aron sa pagkunhod sa problema sa malnutrisyon ilabina sa atong kabataan.

Si Vic Sanchez miapila karon ngadto sa mga pilantropo dinhi sa atong lalawigan sa pagtabang niini pinaagi sa iyang buhatan sa PROVET sa pagkab-ot sa ilang tinguha nga mapadali nila pagpalambo ang industriya sa pangkahayupan pinaagi sa pagdonar ug mga kahoy, plywood, kawayan, nipa ug lansang aron ilang mapatukod ang gikinahanglan kaayo nga animal shelter kon housing para sa mga umaabot pa unya nga mga livestock and poultry donations gikan sa sulod ug gawas sa nasud nga iyang giproponer para sa kagamhanang probinsyal ubos sa liderato ni Gobernador Rolando Yebes. “Think not what the provincial government can do to you; think what you can do to the second poorest province — our province of Zamboanga del Norte”, panapus pa ni Sanchez.

Ang lalawigan sa Zamboanga del Norte, basi sa resulta sa 2006 survey nga gilusad sa National Statistical Coordinating Board, ang karon nahabwa na sa iyang estado nga numero unong pinakapordoy nga probinsya sa Pilipinas basi sa susamang survey nga gilusad sa maong Board sa tuig 2003 sa wala pa mahimong gobernador si Atty. Rolando Yebes. Tungod sa paninguha sa kasamtangang gobernador, inubanan sa hugot nga pagpaluyo sa naglihok nga mga buhatan sa kagamhanang probinsyal sama Provincial Health Office, Engineering, PSWD, Nutrition, PROVET, Special Project, ug uban pa, naila na lang karon ang probinsya nga ikaduhang pinakapordoy. (The New Nandau, Vol. XVII No.37)

*

 

ZaNorte nag-gahin ug P23M para Livelihood karong 2008

Mokapin sa duha ka gatus ka mga barangay ang unang hatagan ug livelihood projects sa kagamhanang probinsiyal sa Zamboanga del Norte lakip na ang tanang 21 ka barangay sa siyudad sa Dipolog. Mao kini ang gipahibawo ni Mr. Ronilo Pacilan ang hepe sa Community Development Assistance Unit o CDAU ilawom sa buhatan sa gobernador.

Matud pa ni Pacilan ang CDAU karon nagpahigayon na ug social preparations sa nagkadaiyang grupo sa LANDO BIBO para hingpit silang maandam diha na sa pagdawat ug pagpalambo sa mga livelihood projects nga itunol sa gobernador ngadto kanila. Giklaro ni Pacilan nga ang unang makadawat sa livelihood program sa ni Governor Rolando Yebes mao gayud ang mga meyembro sa LANDO BIBO kay sila maoy giilang beneficiaries sa programa sa probinsiya batok sa kapobrihon. Matud pa niya direktang itugyan sa probinsiya ang pundong salapi para sa nagkadaiyang livelihood projects ug dili na kini moagi sa barangay.

Sumala pa niya ang livelihood program ni Governor Yebes bukas usab sa ubang mga grupo apan nagkinahanglan kini ug buwag nga mga requirements. Ang paglugway sa livelihood projects sa nagkadaiyang BIBO chapters matud pa ni Pacilan pagadumalahon sa Zamboanga del Norte Livelihood Assistance Program nga gimugna ni Governor Yebes aron maoy motutuk niini sa pagpanguna sa Provincial Planning Office. Sa kabahin sa siyudad sa Dipolog si Pacilan nagkanayon nga andam na sila sa bisan unsa nga scenario nga mahinagbo sa implementasyon sa livelihood projects sa nagkadaiyang BIBO chapters sa 21 ka barangay sa dakbayan nga sukad pa sa pag-organisar sa BIBO higpit nang gibabagan sa lederatu sa siyudad.

Matud pa ni Pacilan natagamtaman na sa mga meyembro sa LANDO BIBO dinhi sa Dipolog nga gilisud-lisud sila sa siyudad uban sa mga kaalyado niining opisyales sa barangay sa nagkadaiya nilang mga kalihukan lakip na sa paghikaw kanila nga makalukat ug permiso para malubong sa mga sam-ang dinhi sa siyudad ang meyembro nga mamatay, wala hatagi ug clearance o kaha wala palukata ug sedula kay meyembro sa BIBO. Sumala pa gipa-ilawom nila karon sa pagtuon ang tanang BIBO chapters sa Dipolog may kalabutan na sa ilang mga katungod aron kon binuangan sila sa ilang mga kapitan o hikawan sila sa ilang mga katungod tukmang kaso ang ilang mapasaka atubangan sa hukmanan kay ang kagamhanang probinsiyal andam mopaluyo sa ilang mga lakang. (The New Nandau, Vol. XVII No.37)

*

 

 HULAGWAY BALITA

 

 
 

 

Mga highlights sa bag-o pa lamang nga nahuman nga 2008 Zamboanga Peninsula Regional Athletic Association (ZPRAA) meet diin ang probinsiya sa Zamboanga del Norte maouy nahimong host.

*

 

Tanang barangay pasug-an

Gitinguha karon sa kagamhanang probin-syal sa Zamboanga del Norte nga makabaton ug sugang dagitabnon ang mga hilit nga barangay pinaagi sa pagtambayong sa kooperatiba sa elektrisidad. Atol sa regular session sa Sanguniang Panlalawigan, gituki ang sulat ni Governor Rolando Yebes nga nangayo ug otoredad aron timan-an ang usa ka Memorandum of Agreement tali sa Zamboanga del Norte Electric Cooperative kon ZANECO para matabangan ang mga barangay nga hangtud karon wala pa makabaton ug elektrisidad.

Matud sa gobernador, ang tuyo ug tumong sa MOA tali sa kagamhanang probinsyal ug ZANECO aron mapaabot ang electric energy sa mga lagyong barangay dinhi sa probinsya. Ilawom sa kasabotan, ang kagamhanang probinsyal maoy mohatag sa materyales sama sa transformers ug wire samtang ang kooperatiba maoy responsible sa pagmintinar sa mga pasilidad sa linya ug uban pa, gawas lamang sa electric service application sa mga residente sa maong dapit.

Matud pa ni Board Member Joseph Brendo Ajero, laing dese nuybe ka mga barangay ang gi-energise diin maoy gusto sa gobernador nga ang gitunol niining ayuda mapunta ang responsibilidad sa kooperatiba sa electrisidad sama sa pagmintinar niini. (The New Nandau, Vol. XVII No.37)

*

 

Pulso Sa Katilingban
Cicer M. Binghay
Kilab lang sa kilat

Nasaulog nato ang Easter Sunday, “Christian Festival Commemorating the resurrection of Christ, and observed by the Churches on the 1st Sunday after the calendar full moon falling on or next after 21 of March week commencing with this day. Mga panghitabo saksak-sagol, nakasamot nakayoring sa atong nasod. Atong nahibaloan nga dunay mga rally nag depensa kang PGMA nga nagpamisa usab. Wala magkahiusa ang ginsakopan sa CBCP. Nagsintakanay ang mga Pro ug Anti PGMA. Samot ang ubang lain relihiyon.

Samot ang mayoriyang namunoan sa local pang gobiyerno. Sila nga nagkinahanglan ayuda nasyonal salapi alang sa ilang mga prohekto mitapot sa kinasing-kasing. Pero naay nadutlan gisakitan sa hilabihang pangurakot sa mga dagkong opisyales ubos kang PGMA nagpaahat na lamang paglubay-lubay sama sa mga gapnod. Ang tumong bisan asa ipad-pad basta maangkon nila ang gisaad dagkong binilyon salapi iayuda sa ilang prohekto. Dayag ang “pagpakaaron ingnon” sa mga tawo nga nagpabungol-bungol-buta-buta sa kahimtang sa nasod pagdapig sa pamunoan ni PGMA aron dili malanay ilang mga gipangandoy, gikasaad pahat ayuda. Mas dayag kaayo, artificial tanang kalihokan nga nagpasilong sa administrasyon gumikan sa walay tihik-tihik gisaad binoraska, ka dagko sa kantidad.

Military ug PNP nadutlan sa hustong paglawog gidulot sa administrasyon sama sa dobli dugang sa ialng mga sweldo, allowances ug benepisyo nga wala sukad madalit sa nangaging presidenti. Dili lagi malalis balikon nako makadaghan: “Money is a horror but it can do fantastic things”. Si bisan kinsa nga giahat ma promoted, maahat makadawat dagkong benepisyo nga wala sukad nila matilawi nga karon ilang mapahimusalan..madutlan. Pero kaha ang tawo nagmalipayon, nagkatawa sa gawas, apan sulod sa ilang kahiladman nagahilak…o sama sa awit nga “laughing in the outside, crying in the inside”. Hinoon daghang nagsunod-sunod basta nadawat tagsa kalibo halin sa ilang butos dungo-padayon-paalot bisan magkagidlay ang kahimtang sa nasod.

Nga bisan ang kamatuoran sihag kaayo sa hilabihang “graft and corruption” gihimo sa administrasyon nagpadayon nga wala mag gunok ang halos nahibaloang katawhan. Ugod, walay nakonbikto. Pulos nahungaw lamang ang tanan kay ang nataran sa atong kinatas-ang opisyales sa hustisya mga tinudlo sa namunoan. Walay kapaingnan. Matuman ang giingon balik-balik ni PGMA nga siya manaog kaha karong 2010. Dunay kaha gipakapin, kay kinsay nasayod ang hiniktan pundok sa 174 kogresista sa presidenti nga maoy nakapa papha insigida kang kanhi Speaker JDV maka usab sa batakang balaod, maaprobahan pagdali-dali ang Character Change dayon maka tugot diha sa bag-ong batakang balaod nga ang presidenti nga napili niadtong 2007 hatagan dugang pila pa ka mga tuig. Kinsay nasayod o kinsay makapugong kon magpabilin ang mayoriyang katawhan padayon magpa ka bungol-buta na hangtod “till kingdom come”.

Hinoon dako kaayo ang kahigayonan ni PGMA nga dili na sapayan lawgan sa salapi sa lungsod ang mga lig-ong suporta kaniya sa militar ug PNP kon tanang mga kawani sa national ug lokal goberno hatagan sa hustong sweldo ug allowances nga makasapar makaagpas sa pagtubo sa palaliton karon. Dayon dunay kalihokan task force pag kontrolar sa bili sa palaliton nga atong nahibaloan walay gihimo atong pangagamahanan sukad. Dayon isunod nga makumbikto, inodnod sa hustisya ang mga kukhang opisyales ilabi na ang mga napiling namunoan a gobiyerno local nga ginegosyo ilang pag-alagad alang sa pagpatambok sa kaugalingon. Ipakita na ang tinud-anay nga pag pitol sa pangurakot sa pangagamhanan. Palihokon ang hustisya nga walay pihig, ilabi na ang buhatan sa COA nga gikan pa kaniadto walay mata ug dalunggan. Walay nakit-an, walay nadunggan binuhatan bikilado sigon sa “audinting rules and regulations”. Naa unta…diha na unta…apan pulos unta, kay hangtod karon ilang gipahungaw nga bikil sa mga napiling opisyales miawok gilayon sa usa lang ka kilab sa kilat.

Kon himoon kini ni PGMA ang tinud-anay gukod sa mga korakot, Dan maangkon nato ang katumanan sa kahusay ug pag-uswag ekonomikanhon. (Press Freedom, Vol. XX No. 23)

 
Credits: Press Freedom is published every Saturday and entered as 3rd class mail matter in Dipolog City. Printed by Young Printing Press with Editorial Office located at Upper Turno, Dipolog City. Tel. No. (065) 212-4343 or 212-6665

*

MORE NEWS NGA BINISAYA

 

 

NOTE: SEND US YOUR NEWS.  Tell us what's going on in your barangays, clubs, schools, businesses and non profit organization. You can also send notices and announcements.
          

 

    Email to webmaster@dipolognon.com

      
Google
WEB THE DAILY DIPOLOGNON