March 4, 2008

 

Matoy nangigi sa iyang proyekto giangkon ni Dodoy|
"WALAY DELICADEZA"

Mikunot ang agtang ni kanhi Congressman Roseller “Matoy” Barinaga sa dihang iyang nahibaw-an nga ang iyang mga proyekto nga nasugdan sa wala pa siya mikanaog sa iyang puwesto ang giangkon ni Congressman Rosendo “Dodoy” Labadlabad. Sa interview sa Balita sa Tingpaniudto ni Mar Uy sa DXFL-FM ning semanaha, gihulagway ni Barinaga nga walay ‘delicadeza’ si Labadlabad kay nagpataka lang kini ug angkon sa proyekto nga dili iyang tuwad.

Matud ni Barinaga, duna siyay daghang mga proyekto nga gipahataan ug pundo sa iyang CDF nga nasugdan sa wala pa siya mikanaog sa pagka congressman apan natiwas sa panahon ni Labadlabad ang giangkon kini sa kongresista nga siya maoy naningkamot niini. Sumala pa sa kanhi kongresista wala gani siya imbetaha sa blessing sa maong mga proyekto nga unta sa iya paman kining panahon nga gipahatan ug pundo sa iyang CDF nasugdan ang pagtrabaho sa maong proyekto. Si Matoy nagkanayon nga karon pa kini mahitabo nga ang nagsunod nga magbabalaod moangkon ug proyekto nga dili iyang paningkamot. Iyang gihatagan ug ehemplo ang panahon nila ni Felipe Azcuna, Alberto Ubay, Ernesto Amatong ug Cresente Llorente nga miagi ug congressman apan wala mangangkon ug proyekto.

Ang agtang ni kanhi Congressman Roseller “Matoy” Barinaga ang mikunot sa dihang iyang nahibaw-an nga ang iyang mga proyekto nga nasugdan sa wala pa siya mikanaog sa iyang puwesto ang giangkon ni Congressman Rosendo “Dodoy” Labadlabad.

Usa sa gihisgutan nga proyekto ni Matoy ang cover court sa Siayan ug Sindangan ug uban pa nga iyang nasugdan ug patrabaho sa wala pa siya mikanaog sa puwesto apan giilisdan ug karatola nga gibutangan ug dakong marka, “Throu the effort of Congressman Ro-sendo “Dodoy” Labadlabad. “Ngano man iyang angkonon nga dili mana sa iyang CDF gikan ang budget sa proyekto.” Matud ni Barinaga angayan lang siya respetoan ni Congressman Labadlabad kay nahulog na hinoon nga wala siyay nahatag nga proyekto nianang barangaya kay giangkon naman sa naglingkod nga kongresista nga sa iya gikan ang mga paningkamot. Si Fortunato “Jetjet” Recentes, kanhi congressional staff ni Barinaga nakasaway sa komentaryo sa kanhi kongresista nga nangigi sa iyang proyekto nga giangkon ni Labadlabad.

Sa iyang giluwatang pamahayag sa programang Budyong sa DXFL-FM, si Recentes nagkanayon nga dili kini angayan buhaton ni Matoy kay dili na siya maoy congressman karon. “Dili siya angay masuko (Matoy) kay si Dodoy na gud ang congressman. Ug sa iyang panahon nahuman ang proyekto, natural adto niya mapunta ang merit. Sala rana niya ngano nga wala niya humana ang proyekto sa iyang panahon,” nagkanayon si Recentes. Wala pa hinoon makuhae sa iyang reaksiyon si Congressman Labadlabad kabahin sa komentaryo ni Barinaga tungod kay na-bisi kini sa pagsaulog sa iyang adlaw’ng natawhan niadtung Sabado. (The New Nandau, Vol. XVII No.33)

Credits: The New Nandau is a member of the Publishers Association of the Philippines (PAPI). Editorial office is located at 076 Quezon Avenue, Dipolog City with Tel. No. (065) 212-3794; Cell No. +639205201041. Email: nandau_1986@yahoo.com

*

 

YEBES USA SA MGA GOBERNADOR NGA HUGTANONG MIPALUYO LIDERATO NI PGMA

Atol sa usa ka nationally televised interview sa programang “BOSES” sa NBN Channel 4 sa dakbayan sa Quezon, Metro Manila, si gobernador Rolando E. Yebes, usa sa mokabat 54 ka mga gobernadores sa tibuok nasod nga mipadayag karon sa ilang hugtanong pagsuporta sa liderato ni Presidente Gloria Macapagal Arroyo ang nanawagan sa tibuok katawhan sa nasod nga isalikway ang sobra pamolitika ug suportahan ang kalamboan ug kalinaw.

Gov. Yebes was recently interviewed in the T.V. program “BOSES” where he strongly appealed for progress and peace rather than too much politicking.

Sa iyang kabahin matod pa sa gobernador nga walay bisanusa ka mayor sa lalawigan sa Zamboanga del Norte nga wala mosuporta sa administrasyon, ilabi na sa giatobang political crises niini lambigit sa National Broadband Network (NBN) tali usab sa ZTE company nga iya sa nasod sa China. Kini nagsumikad sa mga alegasyon nga nalambigit ang unang pamilya diha sa pagkubra ug kikbak nga mobalor milyones dolyares, sigon sa pagbutyag sa mitumaw nga whistle blower nga si Rodolfo ‘Jun’ Lozada. Ang Gobernador nga maoy usa sa mga guest panel sa maong programa sa television niadtong nakalabay nga Miyerkoles didto sa kauluhan ang mipunting sa mga daghang mehoras ug ang alibyo sa ekonomiya isip nag-una nga hinungdan sa iyang supporta ngadto sa administrasyon.

Iyang gipaklaro nga ang nanghitabo karon sa kauluhan  wala ipasikad diha sa proseso nga legal ug pulos mga alegasyon lamang nga walay lig-ong basehanan. Iyang giklaro nga kini nahisupak sa demokrasya ug sa pagpatigbabaw sa balaod batok emosyon ug hidden agenda sa pipila lamang ka politico ilabi na sa mga senador ug mga walhon pundok. Matod pa ni Gobernador Yebes nga ang mga katawhan sa lalawigan sa Zamboanga del Norte ang hingpit usab nagpaluyo sa kagamhanan, tungod sa mga maayong programa nga gihatod sa nasudnong liderato dinhi sa atong dapit, ilabi na ang may kalambigit sa agrikultura ug panginabuhian nga maoy gitugukan karon sa iyang pagpangulo diha sa kapitolyo probinsiyal. (Southpoint, Vol.1No.9)

 
Credits: The Southpoint is the latest weekly news publication circulated in the province of Zamboanga del Norte, Zamboanga Sibugay and Misamis Occidental. It is registered under DTI Permit No. 00282924. The Southpoint can be reached through the following contact info: Sindangan, ZN; Landline: 212 – 4019; Mobile No.: +63 921 458 3830. Email: southpoint8@yahoo.com

*

 

Tungod kay dugay gi-okopahan
ZMC GIPUY-AN UG ENGKANTO

Aron mopahawa ang dili ingon nato nga gikatahong maoy nag-una ug puyo karon sa bag-ong gitukod nga hospital sa Sicayab, gipa-bendisyonan ug balyan niadtung Huwebes ang Zamboanga del Norte Medical Center. Ang pagbis-bis ug bendita uban na sa pag-abog sa dautang espirito gihimo ni Esteban Zamoras, usa ka balyan, nga gitambongan sa mga nagkadaiyang hepe sa Kapitolyo uban sa mga doctor ug kawani sa Provincial Hospital.

Tungod kay gitagsatagsa ug bis-bis sa bendita ang tanang lawak ug suok ang maong tambalanan, gikan sa ala una sa hapon naabtan pa kini ug kilomkilom tungod sa kadako sa maong edipisyo. Sumala pa sa mga residente haduol sa bag-ong tambalanan, ug mismo ang caretaker sa maong edipisyo mibutyag nga duna silay makit-ang ‘whitelady’ nga nagpuyo sa maong building. Duna usay mibutyag nga anaa sa mangga nga haduol ra sa bag-ong hospital nagpuyo ang dakong agta. Matud pa nga dili bag-o ang gikatahong ‘dili ingon nato’ nga nagpuyo sa maong dapit tungod kay dugay na kini nga anaa diha sa panahon pa nga diha nahimutang ang Provincial Jail.

Giabug sa Balayan ang mga dautang espiritu nga gikatahung nagpuyo sa Zanorte Medical Center.

Sumala pa ni Provincial Atty. Jes Gal Sarmiento, ang gihimo nga blessing sa bag-ong edipisyo maoy pag-tamod sa naandang tinuhoan ug kultura sa mga katawhan nga adesir puy-an dunay blessing nga himoon.

Si Atty. Sarmiento nagkanayon nga wala nay kulang sa mga papeles kay kompleto na ang tanang permiso gikan sa kagam-hanang lokal sa dakbayan sa Dipolog nga gi-isyu ngadto sa contractor, ang Metropolis Construction nga maoy nagtukod sa Zamboanga del Norte Medical Center. Sugdan na sa hinayhinay ang pagbalhin sa ubang departamento gikan sa Provincial Hospital ngadto sa bag-ong tambalanan aron kabuksan na sa publiko ang hospital sa Sicayab.

Hinoon sa dili pa hingpit maka-operate ang bag-ong tambalanan, usa ka Inspectorate Team ang gitukod sa probinsya aron maoy mo-imbentaryo ug mosubay sa maong edipisyo kon nasunod ba sa contraktor ang specification sa program of work sa pagtukod sa maong tambalanan. Kini maoy pinasubay na sa contrata sa PNB ug kagamhanang probinsyal nga adesir kini opisyal nga dawaton gikinahanglan ang Inspectorate Team nga gitukod sa probinsya mohimo ug imbestigasyon ug mohatag ug report ngadto sa gobernador. Human niini, i-validate na usab ang report sa inspectorate team sa laing gitukod nga komitiba nga mao ang acceptance committee.

Matud ni Sarmiento gikinahanglan maoy sundon ang prosesso sa kontrata adesir kini opisyal nga dawaton gikan sa contraktor ngadto sa probinsya. Sumala pa sa provincial attorney bisan pa kon wala pa opisyal nga gidawat sa probinsya ang maong edipisyo, gihangyo ang contractor nga ablihan ang edipisyo aron kahimoan ug blessing. Gikonpermar ni Atty. Sarmiento nga niadto pang Pebrero 19, gihatag na sa kagamhanang lokal sa Dipolog pinaagi ni OBO Chief Gaudencio Bagolboc ang Occupancy Permit dungan ang lain pang dese sayes ka mga permit para sa bag-ong hospital.

Para sa provincial attorney sa pagkakaron wala nay problema sa mga papeles gikan sa siyudad sa Dipolog ang bag-ong tambalanan tungod kay kompleto na kini sa tanang gikinahanglang rekesitos gawas lamang sa acceptance committee nga morekomendar ngadto sa gobernador nga puwedi nang dawaton ang bag-ong tambalanan. (Southpoint, Vol.1No.9)

*

 
“Dili trabaho sa mga sundalo ang pag-resolbar sa kaguliyang sa Manila”
Gen. Yano mibisita sa mga military units sa ZaNorte

USA lamang ka naandan nga trabaho ang gihimong pagbisita ni Lt.General Alexander Yano, Commanding General sa Armed Forces of the Philippines (AFP) sa iyang paghi-abot dinhi sa Dipolog.

Giklaro ni Gen. Yano nga ang iyang pag-anhi dinhi sa Zamboanga del Norte mao ang pagbisita sa mga military units sama sa 101st Brigade nga anaa sa Del Pilar, Piñan ug sa 102nd Brigade nga anaa sa Ipil, Zamboanga Sibugay. Kini aron sa pagpahinumdom sa mga personahe sa AFP sa ilang responsibilidad nga gisangon ngadto kanila ug ang ilang mga nahimong kalampusan sa ilang trabaho kabahin sa seguridad sa ilang matag area of responsibility.

Si Msgr. Manguiran nakighimamat ni Lt. Gen. Yano.

Iyang gidugang nga walay direkta nga rason kung aduna bay kalabutan sa kaguliyang karon sa kaulohan ang iyang gihimong pagbisita sa mga military units dinhi sa atong dapit. Alang kaniya usa lamang ka routine visit ang iyang gihimong pag-atubang sa mga military personnel sama sa iyang gihimo sa Cebu ug Cagayan aron sa pagpahi-numdom sa mga sundalo sa ilang trabaho.

Gipasabot pag-ayo ni Gen. Yano nga ang kabahin sa nahitabong kaguliyang karon sa Manila, klaro kaayo nga dili mag-apil-apil sa partisan politics silang mga sundalo. Dili trabaho sa mga sundalo ang pag-resulbar sa mga political issues sama sa nahitabo karon sa kaulohan. Adunay daghanang pamaagi pag-resulbar sa maong problema sama sa senado, kongreso ug korte. Gikompermar ni General Yano nga adunay grupo ang nag-aghat kanila nga mo-interbiner sa maong problema apan kini ang hugtanon nilang gisalikway.

Iyang gidugang nga adunay kaugalingong pagtuo ug baruganan ang mga sundalo, nasayod sa tinood karon nga isyu nga adunay kalambigitan sa politika ug dili kini kabahin sa ilang trabaho pagsulbad sa maong problema. Ang trabaho sa mga sundalo mao ang pag-depensa sa constitution, paghatag ug seguridad sa mga katawhan. Nakakat-on na na ang militar sa nanga-ging EDSA People Power, busa gusto nila nga ipaagi na sa hustong proseso kung gusto man gani ug kausaban sa gobyerno. “Kung ugaling adunay mosamok nga dili gusto nga ipadayon ang hustong prose-so kana maoy trabaho sa military pagtubag sa maong problema”, nagkanayon si Gen. Yano.

Dako ang pagtuo sa commanding general sa Phippine Army nga mas dali ang tinguhang kausaban sa constitution pinaagi sa pag-short cut kung gamiton ang military. (Joel Ello, Southpoint, Vol.1No.9)

*

 

Pagmina sa Leon B. Postigo gisupakan sa mga katawhan

HUGTANON nga gisupakan karon sa mga lomolopyo sa mga barangay nga anaa nagpuyo haduol sa mining area pinaagi sa small scale mining nga operasyon nga anaa sa boundary sa barangay Tinoyop ug Midatag sa lungsod sa Leon Postigo.

Kini maoy gipabati karon sa mga katawhan sa maong dapit tungod sa nagkagrabi karon nila nga operasyon sa small scale mining nga diin kadaghanan sa mga operators ang gikan sa Bayug, Zamboanga del Sur, Canatuan sa lungsod sa Siocon, Sibutad, Mt. Diwalwal sa Davao, Surigao ug uban pang lugar nga nag-finance usab alang sa pagpangoykoy ug bulawan sa maong lugar ug anaa na usab sila karon nag-operate sa barangay Tinoyop ug Midatag sa lungsod sa Leon Postigo.

Gibutyag nila ni Kapitan Francisca Pacatang (wala) ug Konsehal Dominador Favillar (tunga) nga sa karon nagkadaghan na ang mga mining operators nga anaa karon sa maong lugar. Sa tuong bahin, gipangulohan ni Mayor Rolando Tablezo ang gihimo nilang ocular inspection sa Leon Postigo, nasaksihan nila nga ang kadaghanan sa mga tunnel nga anaa sa duha na ka ektarya nga puro na buho ang bungtod.

Ang mga miyembro sa ZNUC uban sa grupo sa Zamboanga del Norte Environmental Management Office (ZANEMO) sa pagpanguna ni Marcelino Gargar uban ni Konsehal Wilberth Magallanes sa Leon Postigo ang mihimo unta ug personal nga inspection sa maong lugar apan tungod sa pagbunok sa makusog nga ulan wala na makaabot ang grupo ngadto sa mining area. Kini ang kutob lamang sa poblasyon sa barangay Tinoyop nga magbaktas duha ka oras kapin ayha makaabot ngadot mismo sa mining area.

Gibutyag nila ni Kapitan Francisca Pacatang ug Konsehal Dominador Favillar nga sa karon nagkadaghan na ang mga mining operators nga anaa karon sa maong lugar. Kini ang nagagikan pa sa nagkalain-laing lugar. Aduna nay gipang-instalar nga mga dagkong boul mill sa mining area. Sa ilang gihimong ocular inspection pinaagi sa kagamhanang lokal sa Leon Postigo sa pagpangulo mismo ni Mayor Rolando Tablezo karong bag-o ilang nasaksihan ang kadaghan sa mga tunnel nga anaa sa duha na ka ektarya nga puro na buho ang bungtod. Gawas niini, yano ra usab nga gipamutol ang mga dagkong kahoy sama sa lawaan ug uban pang mga hardwood nga maoy ilang gamiton aron dili mahugno ang tunnel. Sa karon gibana-bana nga anaa na sa 500 ka mga operators ang anaa na sa mining area. Ilang gidugang pagbutyag nga ang mga operators nga gikan sa Bayug, Zamboanga del Sur ang anaa na karon sa Tinoyop human nga misulod na sa iyang operasyon ang TVI sa Bayug.

Giklaro sa mga opisyales sa maong barangay nga wala makabenipisyo sa ilang mga katawhan ang operasyon sa small scale mining. Gani nakahatag pa kini ug kadaot, ang mga mercury ug cyanide nga gigamit gikan sa mining area kini ang paingon ngadto sa dakong suba nga anha manguha ang mga katawhan ug isda para sa ilang masud-an. Aduna nay nahitabo nga nangamatay ang mga isda sa suba. Nakompermar gikan sa buhatan sa ZANEMO ug sa LGU sa Leon Postigo nga illegal ang gihimo karon nga pagpangoykoy ug bulawan sa Tinoyop ug Midatag tungod kay walay bisan usa nga operator ang gihatagan ug permit sa probinsiya. (Joel Ello, Southpoint, Vol.1No.9)

 
 

Facilities preparado na –Engr. Ochotorena
Reg’l Meet ipahigayon sa Dipolog

PREPARADO na ang probinsiya sa Zamboanga del Norte nga maoy host sa Zamboanga Peninsula Regional Athletic Meet alang sa pagpahigayon sa maong kalihukan karong bulan sa Marso.

Ning semanaha, personal nga gisubay ni Governor Rolando Yebes uban ni Provincial Engr. Ramon Ochotorena ang ZaNorte Sports Complex nga diin anha ipahigayon ang kadaghanan sa mga kalihukan ilalom sa regional meet. Nakita sa gobernador ang gihimong pagpangandam niini, ang mga grandstand sulod sa maong sports complex ang gipang-pintalan na human nga gi-ayo ang ubang mga portion niini. Ang oval ang limpiyo ug patag na. Hinoon, sa karon aduna na lay ginagmay nga pag-trabaho sulod sa maong sports complex sama sa pagbutang ug daghanang comfort room ug ang paghimo ug lapad ug manindot nga stage.

Si Governor Lando Yebes (tu-o) uban kang Provincial Engr. Ramon Ochotorena  personal nga misubay sa Zanorte Sports Complex nga maoy gamiton sa Regional Meet.

Tinguha sa administrasyon ni Governor Yebes nga mapalambo pa ang ZaNorte Sports Complex aron anha ipahigayon ang mga dagkong kalihukan sama sa Palarong Pambansa.  Mahinumduman nga taud-taud nang panahon nga wala mapahimusli ang maong sports complex  tungod kay gipasagdan kini sa nangaging administrasyon ilabina ang problema nga mitumaw sa dihang adunay mi-angkon nga pribado ang portion sa luna sa sports complex. Apil nga gisubay usab ni Governor Yebes ang swimming pool nga anaa duol sa convention center anga diin anha ipahigayon ang swimming competition sa nagsingabot nga regional meet. (Joel Ello, Southpoint, Vol.1No.9)

*

 

Lt. Gen. Yano: naka set na karong Mayo ang pagka AFP-Chief of Staff

HAYAN sa bulan sa Mayo ning tuiga opisyal nang molingkod isip bag-ong hepe sa armadong kusog sa Pilipinas si Lt. General Alexander Yano hulip kang AFP Chief General Esperon. Sa paghidangat ni General Yano niadtong mi-aging semana sa Dipolog City Airport, iyang gikompermar atul sa press conference nga naka-set na sa bulan sa Mayo ning tuiga ang iyang paglingkod sa maong posisyon.

Ilalom sa gilugway nga termino ni Presidente Gloria Macapagal Arroyo ngadto kang Gen. Esperon pagka AFP Chief, kini ang kutob lamang karong bulan sa Mayo. Gilauman ni Gen. Yano nga sa maong bulan opisyal na siyang molingkod pagka-AFP Chief. Apan sa karon iyang gipahayag nga nag-focus siya sa iyang trabaho isip commanding general sa Philippine Army ug iya lang hulaton ang panahon alang sa iyang bag-ong tahas. Iyang gikonsiderar nga usa dakong hagit alang kaniya ang naghulat niyang bag-ong posisyon isip hepe sa armadong kusog sa Pilipinas. Dili pa usab niya matugkad kung usa ba ka dakong yugo sa kabaw ang gisangon diha kaniya nga obligasyon sa panahon nga siya na ang mamahimong AFP Chief kung magpabilin pa gihapon ang kaguliyang karon sa Manila.

Iyang gipasalig nga andam niyang dawaton ang unsa mang hagit sa iyang bag-o unyang trabaho. Angayang masayran nga si Gen. Yano lumad nga taga lungsod sa Sindangan, Zamboanga del Norte. Sa iyang paglingkod isip AFP Chief karong bulan sa Mayo kini ang mahipatik sa kasaysayan sa Zanorte nga adunay Zanortean ang naghupot sa  pinakataas nga posisyon sa Armed Forces of the Philippines.

Sa pag-abot ni General Yano sa Airport niadtong mi-aging adlaw, usa sa misugat kaniya mao si Bishop Jose Manguiran, apan hugtanon nga nagmakuli si General Yano sa pagbutyag kung unsa ang ilang gihisgutan atul sa closed door nga panag-inistoryahanay nila ni Bishop Manguiran. (Joel Ello, Southpoint, Vol.1No.9)

*

 

Dipolog tugotan na makakuha sa graba ug balas sa Layawan River

Rekomendasyon nalang sa Provincial Mining Regulatory Board kon PMRB ang gihulat, ihatag na sa probinsya ang gratuitous permit sa kagamha-nang lokal sa dakbayan sa Dipolog para mahimo na ang dredging operation sa nabara nga graba ug balas sa duha ka mga dam sa Dipolog Polanco Irrigators Association sa Layawan River.

Kini ang gipahayag ni Provincial Atty. Jes Gal Sarmiento, OIC-ZANEM-Officer samtang gipahigayon niadtung miaging semana ang panagtagbo sa mga membro sa PMRB sa Zamboanga City ug gi-rekomendar sa board nga hatagan na ug paborabling aksiyon ang naka-ong-ong nga applicaton sa National Irriga-tion Administration kon NIA nga tugotan sila sa dredging process nga pagahimoon sa kagamhanang lokal sa dakba-yan sa Dipolog alang sa duha ka mga irrigation dam nga nabarahan sa yuta ug balas nga maoy nakaingon nga dili makasulod ang tubig sa irrigation canal ngadto na sa mga basakan sa Polanco ug Dipolog.

Ang application sa NIA giduso niadtu pang bulan sa Oktobre apan wala dayon ma-aksiyone kay nagkulang ug mga papeples ug maoy gisugyot sa probinsya nga mokuha kini ug Area Clearance ug Environmental Compliance Certificate sa rehiyonal nga buhatan sa DENR para ma-isyu ang permit diha sa ilang dredging operation. Niadtung Enero gi-isyu ang ACC ug ECC sa DENR hinungdan nga atol sa ilang special session sa PMRB usa sa mga agenda nga ilang gihisgutan mao ang application sa NIA. Matud ni Sarmiento siya mismo ang misugyot sa board nga ang National Irrigation Authority tagaan ug permiso aron makasugod na sa ilang dredging ug dessilting activity sa Layawan River.

Gisugyot usab ni Sarmiento nga tagaan ug permiso ang Dipolog nga maoy mokuha sa balas ug graba kay duna may kasabutan ang siyudad ug NIA nga ang ekuwepo sa kagamha-nang lokal maoy gamiton para sa dredging operation sa duha ka irrigation dam. Gisugyot usab nga ang kagamhanang lokal sa Dipolog tagaan ug otoredad nga mogamit sa graba ug balas gikan sa makuha nga mga materyales para magamit sa nagkadaiya niining proyekto. Sa nasayran ang mga opis-yales sa Barangay Lapyahan Baha sa Polanco supak nga ang makuha nga graba ug balas sa Layawan River ihatag sa Dipo-log kay maoy ilang gusto nga sa ila rang barangay ibutang.

Apan gisugyot sa kagam-hanang lokal sa Dipolog nga mohatag sila ug ayuda sa Barangay Lapyahan Baha sa Polanco ug Barangay Cogon sa Dipolog. Matud ni Atty. Sarmiento ang resolusyon nalang sa PMRB maoy gihulat aron ila nang maaksiyonan ang application sa NIA. Gipaklaro sa provincial attorney nga ang paghatag ug permit sa NIA para sa dredging process wala magpasabot nga gilibkas na ang moratorium nga giluwatan ni Governor Yebes para sa Layawan River. Matud niya ang application lamang sa NIA maoy exempted sa moratorium tungod kay nagkinahanglan gayud kini ug positibong pagtagad gumikan kay ang halapad nga basakan sa Dipolog ug Polanco maoy apektado.

“Ang exemption sa moratorium mo-cover lang sa application sa NIA ug Dipolog para sa dredging operation. Inplace pa gihapon ang moratorium,” nagkanayon si Atty. Sarmiento. Gipanghinaut ni Asst. City Engr. Richard Kagatan nga ma-isyuhan na gayud ang siyudad sa iyang gihangyo nga gratuitous permit aron nga padayon nang matrabaho ang napondong proyekto impras-traktura ilbi na ang nanga-gubang kadalanan padulong sa mga kabaryohan. Gituhoan ni Engr. Kagatan nga kung padayon nga dili pakuhaan sa provincial govern-ment ang Layawan River tungod sa gipatuman niining moratorium mahimo nga adto nalang ang City Engineering manguha ug graba ug balas sa damp site sa NIA tungod kay ang stock sa maong mga materyales bastante na kaayong makatubag sa mga proyekto sa dakbayan sa umalabot nga katuigan. (Southpoint, Vol.1No.9)

*

 

Dr. Icao dili kapitol ni Dr. Ramos

Giklaro ni Provincial Health Officer Dra. Carmencita Icao nga wala siya’y mahimong aksyon batok kang  Dra. Nida Ramos, Municipal Health Officer sa lungsod sa Jose Dalman subay sa reklamo nga gipabati karong bag-o ni Jose Dalman Mayor Russel Adasa.

Sa interbiyo si Dra. Icao miingon nga ang position sa pagka Municipal Health Officer  taod-taod nang gi-divolved ngadto sa Local Government Unit, kung LGU, hinungdan nga kung dunay disciplinary action nga himoon batok sa masaypanong health officer, ang mayor ra ang makahimo niini.

Si Dra. Icao hinoon mipasalig nga iyang bisitahan si Dra. Ramos sa umaabot nga mga adlaw aron pakig istoryahan mahitungod sa mulo dili lamang sa mayor sa Jose Dalman, kung dili sa katawhan mismo nga matod pa morag naalakanse og dako tungod kay sa ilang gihatag nga dakong sweldo ngadto sa municipal health officer kini wala makahatag kanila ug tugbang serbisyo. Angayang kahinumduman nga karong bag-o gihulagway ni Mayor Adasa si Dra. Ramos nga way polos nga pagka Municipal Health Officer sa iyang lungsod tungod kay kini wala makaalagad sa husto sa iyang mga katawhan.

Sa nahitabong pagsulbong sa LBM sa mga katawhan didto sa Barangay Balatakan ug Lomaping sa nakalabay na nga tulo ka bulan, mas nauna pa ug adto sa gikahisgotang barangay ang mga sakop ni Dra. Icao sa Provincial Health Office kaysa ni Dra. Ramos nga maoy health officer mismo sa maong lungsod. Gikataho usab nga si Dra. Ramos moreport lamang sa iyang opisina sulod sa usa ka oras ug pagkatapos niini daghan nang ipabating mga pasangil ngadto sa iyang mga sakop nga duna pay follow apon nga mga importanteng butang dinhi sa dakbayan sa Dipolog o dili ba didto sa lungsod sa Sindangan.

Gikatahapan hinoon sa iyang mga sakop nga mas gusto pa ni Dra. Ramos nga adto magpuyo sa iyang balay kaysa magpondo sa iyang buhatan aron moserbisyo sa mga katawhan. Nahibaw-an usab hinoon gikan ni Dra. Icao nga si Mayor Adasa walay intensyon nga mapapahawa o dili ba mopalagpot kang Dra. Ramos ngadto sa laing mga kalungsoran sama sa Siocon, Sirawai, Sibuco tungod sa kahadlok sa mayor nga matud pa dunay political implication o consequences nga mahitabo sa iyang political career sa nasangpit nga lungsod sa Jose Dalman sa umaabot nga eleksyon. Sa pikas bahin gikataho nga hapit na lang mahuman ang usa ka tuig sa tulo ka tuig nga termino ni Mayor Russel Adasa sa lungsod sa Jose Dalman apan hangtod karon wala pa kini’y gikapakita nga tangible nga proyekto o performance.

Mao usab kini ang gipahayg sa usa ka dakong opisyal sa lungsod nga mihangyo nga dili lamang una magpaila. Matod pa sa maong opisyal nga gikan pa sa paglingkod ni Mayor Adasa sa buwan sa Hunyo sa miaging tuig wala pa kini’y nasugdan nga konkretong proyekto samtang nagapabilin nga gubaon ang mga kadalanan padulong sa mga lagyong kabaryohan sa ilang lungsod. Ang kagubaon sa ilang mga barangay roads nakahatag karon og dakong kahasol sa  ilang mga molopyo ilabina kadtong dunay mga grabeng mga pasyente nga dad-on sa Dipolog ug Sindangan lakip na niadtong gustong mobaligya sa ilang mga lagotmon.

Gitohoan  sa maong opisyal nga way maomol nga proyekto sa iyang lungsod inig tapos karong tuiga tungod kay si Mayor Adasa kanunay man usab nga wala sa iyang opisina kay sagad man kini mobisita sa iyang gasoline station didto sa dakbayan sa Dumaguete uban sa mga daghanang mga travels nga nag-ong-ong sa iyang buhatan nga isip hepe ehekutibo. (Mar Uy, Southpoint, Vol.1No.9)

*

 
ZaNorte preparado na sa Reg’l Meet

PREPARADO na ang probinsiya sa Zamboanga del Norte nga maoy host sa Zamboanga Peninsula Regional Athletic Meet alang sa pagpahigayon sa maong kalihukan karong bulan sa Marso.

Niadtong mi-aging semana, personal nga gisubay ni Governor Rolando Yebes uban ni Provincial Engr. Ramon Ochotorena ang Zanorte Sports Complex nga diin anha ipahigayon ang kadaghanan sa mga kalihukan ilalom sa regional meet. Nakita sa gobernador ang gihimong pagpangandam niini, ang mga grandstand sulod sa maong sports complex ang gipang-pintalan na human nga gi-ayo ang ubang mga portion niini. Ang oval ang limpiyo ug patag na. Hinoon, sa karon aduna na lay ginagmay nga pag-trabaho sulod sa maong sports complex sama sa pagbutang ug daghanang comfort room ug ang paghimo ug lapad ug manindot nga stage.

YOUTH FRIENDLY GOVERNOR. ZaNorte Governor Rolando Yebes in a snapshot with high-schoolers from a nearby school during the conduct of an occular inspection at Zanorte Sports Complex where athletic meets and competitons take place such as the upcoming Zamboanga Peninsula Regional Athletic Meet in March.

Tinguha sa administrasyon ni Governor Yebes nga mapalambo pa ang Zanorte Sports Complex aron anha ipahigayon ang mga dagkong kalihukan sama sa Palarong Pambansa.  Mahinumduman nga taud-taud nang panahon nga wala mapahimusli ang maong sports complex  tungod kay gipasagdan kini sa nangaging administrasyon ilabina ang problema nga mitumaw sa dihang adunay mi-angkon nga pribado ang portion sa luna sa sports complex. Apil nga gisubay usab ni Governor Yebes ang swimming pool nga anaa duol sa convention center anga diin anha ipahigayon ang swimming competition sa nagsingabot nga regional meet. (Southpoint, Vol.1No.9)

 
 

 HULAGWAY BALITA

 

Juan’s World
Southpoint Editorial Cartoon(Southpoint, Vol.1No.9)
 

Pig Boy’s Barkada
Southpoint Editorial Cartoon
(Southpoint, Vol.1No.9)

*

 

Pulso Sa Katilingban
Cicer M. Binghay
5 pa ka mga tuig mabuksan ang ZMC

“Top tune” tanang nangaging blue ribbon committee imbestigation sa senado. Nakahatag dakong pasundayag sa publiko. Nakapataas, nakapadaghan manan-aw sa TV. Nakapahungaw sa daghang makatay-og bikil sa pangagamhanan..ilabi karon niining administrasyon ni PGMA.

Nakasalikwaot lamang kay walay otoridad ang senado pag sentensiya, himog desisyon dayon makatakdag hukom ikasumpay human sa imbestigasyon alang sa mga kinahanglanong unod, dugokan, bukog ug dugo pagmugnag usa ka balaodon.

Ang gihimong imbestigasyon niadtong Febrero 26 diin “starring” sa tabil sa senado permaninti si Engr. Rodolfo Lozada Jr., ug Deputy Executive Secretary Manny Gaite. Tanang mga senadores nga mihimo’g mausisong mga pangutana kabahin sa tunga ka milyon pesos nga nahatag ni Gaite kang Lozada daghang mga haguka, kalu-ag ug katingad-ang mga tubag. Kaha ang naminaw dunay nakutlo, dunay ikahatag opinion nga sa mga starring witness dunay daghang salaag. Pero walay makahukom kon unsa ang kamatuoran?  Unsa ang Tinuod. Dunay miingon magsusulat:  “Nganong importanti ang matuod o kamatuoran?  Sometimes it seems that the end objective is more important than telling the true facts, whether by individuals or governments. Lack of truthfulness is sometimes labeled “public relations” or politics. “If it is either of these, such professionals are indeed poorly and unjustly used. The public is most responsive to the truth, the big truth. Savvy politicians have found that out and used it with joy as a weapon to slug their opponents. And as a weapon, few objects have an impact greater than the truth”.

Atong mahinumdoman dinhi sa usa ka Leo Durocher, manager sa Dodgers dihang kausa gisinggitan siya sa katawhan sa hawanan dulaanan sa paugnat sa kusog nga gihulbot niya ang “pitcher” pag-abot sa eight innings  sa panagtigi sa naggukod ang ilang puntos. Human sa dula dihay usa ka “reporter” sa peryodiko o mantalaan nagutana kon unsay iyang gibati sa “raction” pagsinggit sa nanan-aw. Siya mitubag, “Baseball is like church. Many attend. Few understand”.

Headline sa top tune local mantalaan The New Nandau Today, nagkanayon: Gov. Yebes ug Mayor Uy makasinabot na! Zanorte Medical Center buksan sunod semana. Pero dunay gipakapin “Kon mahatag na ang Occupancy Permit”. Ang maong balita naka pamakpak sa mayoriyang katawhan sa lalawigan ilabi na ang taga dakbayan sa Dipolog nga maoy kinadaghanang nagpahimulos sa hospital sa provinsiya kanhiay pa.  Hinoon wala silang tanan mosalig nga ang gihinabi ni Gov. Yebes nga ilugway na ang Certficate of Occupancy mao lamang sila si City Vice Mayor Senen Angeles ug City Legal Officer Cyril Ruiz atol lamang sa Regional Development Council Meeting didto sa Pagadian City. Pero lungsod ug lungsoranon sa tibook lalawigan ug duha ka dakbayan sa Dapitan ug Dipolog igo lamang nagkadungan pagkabati sa balita pag-ingon tagsa-tagsa nga kadtong gipanulti ni Angeles ug Ruiz “usa ka agiw nga gipatara niadtong panahona nga plantada sa upat ka buhangin sa kalibotan. Nga inig tayhop hinay sa hangin tanan nilang gipanulti mapadpad ug mahanaw.

Daan nang nasayod ang katawhan sukad natuboy pagka City mayor si Roberto Uy, ang tinuod namunoan nga nagpahipi sa iyang luyo mao ang iyang asawa. Nagpsabot nga ang gipamulong ni Angeles ug Ruiz nasulti niadtong panahona nga pagka taod-taod mahanaw sama sa agiw nga giwaslik sa huyohoy. Tingog ni Mayor Uy ang sentensiyador. Atong nahinumdoman nga gikadudahan nga ang paglangan sa Occupancy Permit sa ZMC gumikan kay nalangan ang gratuitous lisensiya pagpanghakot sa graba sa layawan river. Kon gitagalan si Mayor Uy nga unya lamang sa lima ka tuig gikan karon makubkoban sa balas ug graba, dunay posibilidad nga moabot usab lima ka mga tuig mabuksan ang ZMC kay dili ikahatag ang Occupancy Permit. (Press Freedom, Vol. XX No. 20)

 
Credits: Press Freedom is published every Saturday and entered as 3rd class mail matter in Dipolog City. Printed by Young Printing Press with Editorial Office located at Upper Turno, Dipolog City. Tel. No. (065) 212-4343 or 212-6665

 

*

MORE NEWS NGA BINISAYA

 

 

NOTE: SEND US YOUR NEWS.  Tell us what's going on in your barangays, clubs, schools, businesses and non profit organization. You can also send notices and announcements.
          

 

    Email to webmaster@dipolognon.com

      
Google
WEB THE DAILY DIPOLOGNON