January 28, 2008

 

Gov. Yebes ug Mayor Uy nagkasinabot na!
ZMC BUKSAN SUNOD SEMANA
"Kon mahatag na ang Occupancy Permit"

Si Governor Rolando Yebes mikonpermar nga nagka-estoryahanay na sila ni City Mayor Evelyn Uy uban nila ni City Vice Mayor Senen Angeles ug City Legal Officer Cyril Ruiz atol sa Regional Development Council Meeting didto sa Pagadian City sa miaging semana ug kini misanong sa iyang hangyo nga ihatag na ang Occupancy Permit para maka-operate na ang bag-ong tambalanan. Matud sa gobernador ang permiso nalang sa siyudad sa Dipolog ang ilang gihulat para kabuksan na ang ZaNorte Medical Center. “Gitawgan ko ni Mayor Uy nga ila nang i-finalise ang ilang report ug mao nalang ang akong gihulat.”

Si Governor Yebes nagkanayon nga dili una siya mohatag ug dugang detalye kabahin sa Occupancy Permit kay magdungan ra sila ug pagawas ug pamahayag ni Mayor Uy karong semanaha sa higayon nga opisyal nang itunol sa siyudad ang maong permiso, “aron gayud masabtan sa mga katawhan kon unsay hinungdan ngano nga nalangan ang pagbukas sa ZaNorte Medical Center.” Iyang gipahayag nga hinay-hinayon pag-abli ang bag-ong tambalanan ug maoy unahon niini ang ‘out patient department, dialysis department’ ayha mosunod ang ubang departamento. Apan ang sayo nga pagbukas sa bag-ong tambalanan kini nag-agad usab sa sayo nga pagpagawas sa Occupancy Permit nga ilugway sa kagamhanang lokal.

Nagkasinabot na sila si Governor Rolando Yebes ug City Mayor Evelyn Uy nga ilugway na ang Certificate of Occupancy nga mao nalang ang gihulat nga mahatag sa kagamhanang lokal sa dakbayan sa Dipolog pagabuksan na dayon ngadto sa publiko alang sa iyang hingpit nga operasyon ang Zamboanga del Norte Medical Center.

Kon tumanon ni Mayor Evelyn Uy ang ilang gisabutan, hayan niining katapusang semana sa bulan sa Pebrero o kaha sa unang semana sa bulan sa Marso pagabuksan na ang hospital sa Sicayab human matud pa, tapos nang gitun-an sa mga membro sa Pre-Occupancy Inspectorate Task Force ang gilantugian nga Sewerage Treatment Plant kon STP. “Ang akong gusto nga by March ablihan na ang Medical Center para ma-transfer na nato ang mga pasyenti gikan sa Provincial Hospital.” Sa pagkakaron duna pay gitrabaho ang mga personahe sa PEO sama sa paghimo ug lamesa ug lingkoranan. “Sama sa pagbalhin sa bag-ong balay, inig abot nimo daghan pa diayng gikinahanglan…so gihinay-hinay nag trabaho sa engineering.”

Masaligon ang gobernador nga dili na madugay pagabuksan na ang hospital kay nagka-estoryahanay na sila ni Mayor Evelyn Uy ug kini mipasalig nga moduso na sila sa ilang ‘final report’ karong semanaha. “Sa akong tan-aw wala nay problema kay humana ug tuon ang Inspectorate team sa siyudad kabahin sa STP…I think OK nana ang atong hospital.” Kabahin sa gisaad ni Presidente Gloria Maca-pagal-Arroyo nga mohatag siya ug CT Scan, si Governor Yebes mipahayag nga gitawagan na ni PGMA si Health Secretary Doque atol sa ilang panagtagbo sa Malakanyang bag-ohay pa lamang ug gipasalig sa kalihim nga giproseso na ang mga papeles ug sa dili madugay moabot na ang maong pasilidad para sa bag-ong tambalanan. (The New Nandau, Vol. XVII No.33)

Credits: The New Nandau is a member of the Publishers Association of the Philippines (PAPI). Editorial office is located at 076 Quezon Avenue, Dipolog City with Tel. No. (065) 212-3794; Cell No. +639205201041. Email: nandau_1986@yahoo.com

*

 

PANTALAN SA DAPITAN HIMOONG PMO NI PGMA

GIKAN sa kasamtangan nga kahimtang karon nga Terminal Management Office ang pantalan sa Dapitan hayan makonberter na kini ngadto sa pagka Port Management Office nga dili na mag-agad sa iyang operasyon ilalom sa pagdumala sa Port Management Office sa Cagayan De Oro. Sa pinaka-ulahing kalambuan, sa gipatawag nga meeting ni Presidente Gloria Macapagal Arroyo ngadto sa mga kadagkuan sa probinsiya  pinaagi nila ni Governor Rolando Yebes, 1st District Congresswoman Cely Jalosjos Carreon ug 3rd District Congressman Cesar Jalosjos nahisgutan ang kabahin sa ilang gihangyo nga mamahimong Port Management Office ang maong pantalan.

Terminal Management Office sa pantalan sa Dapitan hayan makonberter na kini ngadto sa pagka Port Management Office nga dili na mag-agad sa iyang operasyon ilalom sa pagdumala sa Port Management Office sa Cagayan De Oro.

Gipahayag ni Governor Yebes nga misugot si Presidente Arroyo sa mao nilang hangyo.  Gimanduan gilayon sa presidente pinaagi sa pagtawag niini ngadto kang Secretary Mendoza sa Department of Transportation and Communication (DOTC) alang sa pagluwat ug order ngadto kang manager Sevilla sa PMO-Cagayan aron aprobahan ang pag-konberter niini sa pantalan sa Dapitan gikan sa terminal management office ngadto sa pagka-Port Management Office. Alang kang Governor Yebes nga pabor na unya kini alang sa tibook probinsiya sa Zamboanga del Norte kung mahimo nang PMO ang pantalan sa Dapitan tungod kay dili na kini mag-agad sa PMO-Cagayan sa iyang operasyon. Aduna na siyay kaugalingong pundo matag tuig. Nakita nga hinay ang paglambo sa maong pantalan tungod sa kasamtangan niining kahimtang. Gusto ni Presidente Arroyo nga malihok gilayon ang mga papel aron madali ang pag-konberter sa maong pantalan.

Gipaabot usab ni Governor Yebes ngadto kang Presidente Arroyo ang gikinahanglan nga passenger terminal building sulod sa pantalan sa Dapitan. Gikalipay sa presidente sa dihang iyang nasayran nga aduna nay siyam ka mga roll-on roll-off ug tulo ka depasaheruan nga barko paingon sa Manila ang mogamit sa maong pantalan. Nasurprisa niini ang presidente tungod kay basi sa report sa Philippine Ports Authority ang pantalan sa Dapitan hinay ang paglambo niini kung itandi sa ubang mga Puerto. Nasayran nga mokantidad sa 50 milyones pesos ang gi-proposed nga passenger terminal building ang tukoron sulod sa pantalan sa Dapitan. Sa samang bahin, tungod sa nakita karon nga paglambo sa Zamboanga del Norte pinaagi sa turismo gipasalig usab ni Secretary Mondoza nga mohatag ang DOTC ug Instrument Landing System (ILS) nga anha ibutang sa Dipolog City Airport. Ang ILS usa ka kahimanan aron mamahimong tugpahan ug abyon ang airport bisan panahon sa kagabhion. (Southpoint, Vol.1No.8)

Credits: The Southpoint is the latest weekly news publication circulated in the province of Zamboanga del Norte, Zamboanga Sibugay and Misamis Occidental. It is registered under DTI Permit No. 00282924. The Southpoint can be reached through the following contact info: Sindangan, ZN; Landline: 212 – 4019; Mobile No.: +63 921 458 3830. Email: southpoint8@yahoo.com

*

 

PCI Maclang gi-instalar isip COP-Pagadian
Local Media nanghinaut dili mahisama sa Dipolog

NANGHINAOT karon ug dako ang mga sakop sa local media sa dakbayan sa Pagadian nga dili sila mahisama dinhi dakbayan sa Dipolog nga nakatagamtam kaniadto sa mabangis nga palisiya ni Police Chief Reynaldo Maclang sa dihang kini pa ang hepe sa kapolisan dinhi sa Dipolog.

Kini maoy gipabati sa mga sakop sa local media sa maong dakbayan subay na sa pag-instalar kang Maclang pagka Chief of Police sa Pagadian City niadtong Pebrero 18, 2008. Ang paglingkod ni Maclang pagka hepe sa Pagadian PNP maoy pagtugot ni Mayor Sammy Co. Apan nasayran gikan sa kasaligang tinubdan nga matod pa pugsanon nga gihangyo ni Mayor Evelyn Uy ang mayor sa Pagadian nga si Maclang maoy ipuli nga chief of police sa maong dakbayan. Gidugang sa tinubdan nga si Mayor Co ang ig-agaw kini ni kanhi Mayor Berto Uy nga gituhuan nga matod pa apil sa mihangyo kang Mayor Co alang kang Maclang.

Angayang masayran nga human napalagpot si Maclang pagka hepe sa kapolisan dinhi sa Dipolog kini ang gibutang nga floating status sa kampo sa Provincial Command nga anaa sa barangay Sicayab. Wala magdugay kini ang gilabay na usab ngadto sa rehiyonal nga buhatan sa Zamboanga.  Sa nahitabong pinusilay sa Sibuco karong bag-o si Maclang maoy nagsilbing team leader sa gipadala nga Regional Mobile Group ngadto sa maong lungsod ayha pa kini napunta sa Pagadian City. Sa paglingkod karon ni Maclang pagka-hepe sa kapolisan sa Pagadian, na-intriga pag-ayo ang mga local media sa maong dakbayan nga wala nila damha nga kini maoy mamahimong chief of police tungod kay wala kini mahi-apil sa mga pangalan nga gihugon-hugon nga mamahimong hepe. Ang ubang mga sakop sa local media sa Pagadian ang nasayod na sa nahitabong kaguliyang dinhi sa Dipolog sa dihang hepe pa kini sa atong kapolisan si Maclang hinungdan nga wala sila makapugong pagsukit-sukit ug pangutana ngadto sa miyembro sa ZNUC nga ilang nahimamat atul sa gihimong RDC meeting niadtong mi-aging adlaw. Sila mismo nasayod sa nahitabong pagsumbag ni Maclang kang Broadcaster Joseph Herrera.

Gipabati sa mga local media sa Pagadian ang ilang panghinaot nga dili sila mahisama sa nahitabo dinhi sa Dipolog ilalom sa mga kamot ni Maclang. (Press Freedom, Vol. XX No. 19)

*

 
A Promise is made to be broken?
Mr. Tan naningil sa iyang permit; OPA: Kulang pa sa requirements

“Kompletoha una ang tanang gikinahanglang requirements aron ang mga saad dili pakyason.” Provincial Attorney Jes Gal Sarmiento mibutyag nga ang Mediatrix Homes Inc. nga gipanag-iyahan ni Mr. Ernesto Tan wala pa maka-comply sa gikinahanglang requirements para ikahatag na ang permit nga gi-aplayan niini ngadto sa probinsya.

Kini ang nahimong tubag sa Office of the Provincial Attorney sa dihang naningil na ang tag-iya sa Mediatrix kon hain na ang gisaad nga permit nga ihatag ngadto kanila aron legal na silang makahakot sa balas ug yuta sa ilang gibungkag nga bungtod didto sa Upper Dicayas ning dakbayan sa Dipolog alang sa ilang Housing projects. Niadtung Pebrero 13, 2008 si Mr. Ernesto C. Tan, CEO sa Mediatrix Homes Inc. misulat kang Atty. Sarmiento kabahin sa ilang application for hauling permit nga maoy gisaad niini nga ihatag ngadto kanila niadtung Pebrero 1, 2008.

Si Mr. Tan maoy nag-bulgar sa local media sa iyang seryosong alegasyon nga ang kanhi action officer sa PEDO nangutong kaniya ug maoy mipasalig nga molugwa ang iyang application permit. Matud ni Mr. Tan niadtung Pebrero 4, ang representante sa Office of the Provincial Attorney mipahibawo sa iyang buhatan nga ang hinungdan nga wala ma-aprobahe ang ilang permit gumikan kay wala mahinayon ang pagpahigayon sa ilang session ang mga membro sa Provincial Mining and Regulatory Board sa dihang napaltos sa pagtambong ang chairperson nga si Director Jessica N. Lucero sa Mines GeoSciences Bureau sa Zamboanga City. Gisaad na usab nga pagka Pebrero 8 ang ilang papel tukion na atol sa tigum sa Board. Apan sa dihang gitawagan ang opesina sa Mines and GeoSciences Bureau sa Zamboanga kon hain na ang ilang application, kini mitubag nga wala pa giduso sa ilang buhatan. Gibutyag nga ang gikatakdang session sa Board niadtung Pebrero 8 ang opisyal nga gi-kanselar tungod sa komuni-kasyon nga gipadala sa Provincial Attorney.

Gipasabot ni Mr. Tan nga ang iyang negosyo nagkina-hanglan ug hinanaling pagtagad sa hingtungdang otoredad diin sa taudtaud nang panahon nga kini gibaliwala lamang. “We cannot understand how Provincial Authorities look at our application. As a business entity we have an urgent need for the said permit which was denied from us for quite a long time.” Gipahibawo ni Mr. Tan ngadto sa PMRB ug PEDO nga sunod semana mosugod na sila sa ilang hauling operation tungod kay ilang pahimudsan ang maayong dagan sa panahon.

Sa iyang sulat tubag niadtung Pebrero 13, gipasabot ni Atty. Sarmiento nga wala sa iyang gahum isip Zamboanga del Norte Environmental Management Officer kon ZANEMO/PEDO ang pag-aprobar sa application ni Mr. Tan. Ang ZANEMO igo lamang gitahasan nga modawat sa mga requisite documents diha sa application permit. Gipasabot ni Sarmiento nga ang naghatag ug importan-siya sa permit naumol sa usa ka ordinansa sa Zamboanga del Norte nga nagkanayon; “providing, among others, that no person shall take, remove, utilize materials from private and public lands within the province unless authorized under a permit exclusively issued by the Provincial Board. It is Provincial Mining Regulatory Board which the power to process, evaluate and determine the merits of such application, preparatory to its recommendation to the Honorable Provincial Governor to grant the permit.”

Matud pa ni Atty. Sarmiento, si Mr. Manuel A. De Leon, Director for Business Development sa dihang miusisa sa application sa Mediatrix nasuta nga dunay kakulangon ang mga dokumento ug wala kini misubmiter niadtung Enero 28, 2008 sa dugang dokumento nga naglangkob na niining mosunod, Project Study; Environmental Compliance Certificate kon ECC (Mediatrix Homes Inc. / San Jose Valley, Rufina Heights Phase I Housing Project); Certification from the Honorable City Mayor.

Mismo ang Environmental Management Bureau (EMB) sa dihang gipakitaan si Mr. Tan sa mga komunikasyon, gipahimangnoan ang Mediatrix Homes Inc. nga moduso na sa tanang gikinahanglang permiso gikan sa nagkalainlaing ahensiya sa gobiyerno kalabot na sa paghakot sa 500 trucks sa yuta nga anaa mahimutang sa Upper Dicayas, ning dakbayan sa Dipolog. Gipasabot ni Atty. Sarmiento nga ang PMRB isip collegial body wala makakuha sa gikinahanglang quorum atul sa ilang tigum sa miaging Pebrero 8 hinungdan nga wala mahinayon ang session. Matud sa ZANEM-Officer nga si Governor Lando Yebes mipadayag na sa iyang tinguha nga motambong sa PMRB meetings tungod kay maoy panglantaw sa iyang administrasyon nga kahatagan ug pagtagad ang small mining industry dinhi sa Zamboanga del Norte. Apan gipahinumdoman ni Atty. Sarmiento nga mosabot pod si Mr. Tan nga ang gobernador ilawom sa Local Government Code ang gimandoan nga maseguro nga luwas ug ampingan ang mga resources sa iyang probinsya. (The New Nandau, Vol. XVII No.33)

*

 

Yebes mapasalamaton sa kooperasyon ug panaghiusa sa RDC, nagdasig  ipadayon kalambuan sa Region 9

MIPABATI sa iyang dakong pagpasalamat si Governor Rolando Yebes ngadto sa  naglangkub sa Regional Development Council (RDC) sa gipakita niining kooperasyon ug panaghiusa sulod sa tulo ka tuig sa dihang siya pa ang chairman sa RDC. Uban sa pagdasig sa bag-ong chairperson niini nga ipadayon ang kalambuan sa tibook rehiyon.

“Makalaom kamo sa dugang kalambuan sa Rehiyon 9 ilawom sa akong termino isip RDC Chairwoman” – Zamboanga del Sur Gov. Aurelia Cerilles

Kini ang iyang gipabati atul sa gipahigayon nga Joint RDC ug Regional Peace and Order Council Meeting didto sa Pagadian niadtong Pebrero 18, 2008, adlaw nga Lunes. Sa mensahe ni Governor Yebes, iyang gipahayag nga sulod sa tulo ka tuig niya nga pagkupot sa maong posisyon iyang nakita ang panaghiusa sa mga regional directors, Local Government Unit, Chief of Offices ug Private Sector sa tibook rehiyon 9. Nahimo ang daghanang kaayohan. Ang RDC-9 ang nabutang sa mapa sa kalambuan sa nasud hinungdan nga ang mga programa ni Presidente Gloria Macapagal Arroyo ang nagatotok dinhi sa atong rehiyon.

“Thank you for your cooperation and unity sulod sa tulo ka tuig”, nagkanayon ang gobernador. Gidugang ni Governor Yebes nga ang bag-ong chairperson karon sa RDC nga si Governor Auring Cerilles sa Zamboanga Del Sur ang dili bag-o sa public service. Siya ang nanghinaot nga ang gihatag nga kooperasyon  ug panaghi-usa sa nakalabay nga tulo ka tuig mao usab kini ang ipakita sa mga miyembro sa maong konseho ngadto kang Governor Cerilles. Iyang gidasig ang bag-ong pangulo sa RDC nga ipadayon ang maayong panglantaw ug ipakita sa nasud nga ang rehiyon 9  maoy paglaum sa nasudnong kagamhanan. Mas magmalambuon pa sama sa paglambo sa ubang rehiyon pinaagi sa tabang sa presidente sa nasud.

Mapasalamaton ug dako si Governor Yebes sa higayon nga gihatag ug pagsalig sa mga miyembro sa konseho ngadto kaniya pagsulbad sa mga problema alang sa kalambuan sa tibook region 9. (Southpoint, Vol.1No.8)

 
 

Problema sa Sibuco gipadangat ni Mayor Edding sa RDC ug RPOC

ANG pag-deploy ug usa ka platoon sa mga pulis alang sa lungsod sa Sibuco, Zamboanga del Norte maoy hangyo ni Mayor Norbe Edding nga iyang gipadangat atul sa gipahigayon nga joint Regional Development Council ug Regional Peace and Order Council Meeting didto sa dakbayan sa Pagadian sa miaging semana.

Gi-presentar ni Mayor Edding atul sa maong RDC ug RPOC meeting ang nahitabo sa ilang lungsod niadtong Enero 30, 2008 nga maoy nakapatandog sa ilang seguridad sa dihang nahitabo ang pinusilay tali na sa giilang mga miyembro sa criminal syndicate ug sa Sibuco PNP didto sa barangay Lakiki. Iyang gihatagan ug gibug-aton nga kung dili gayud hatagan sa igong pagtagad ang problema sa ilang lungsod batok na sa grupo ni kumander Mulong nga gika-engkuwentro sa mga pulis makakuha kini ug simpatiya sa MILF ug mas mokuyanap pa ang problema sa tibook Zamboanga Peninsula.

Gipadangat ni Sibuco Mayor Norbe Edding  atubangan sa joint meeting sa Regional Development Council ug Regional Peace and Order Council ang pag-deploy ug usa ka platoon sa mga pulis alang sa ilang lungsod.

Giklaro ni Mayor Edding nga usa ka lihitimo nga pulis operation ang sinugdanan sa maong hitabo nga e-serbe unta ang warrant of arrest batok sa pito ka mga tawo sa pagpanguna sa usa ka kumander mulong, apan kalit lamang gipa-ulanan ug mga bala ang grupo sa mga pulis. Nahimong problema usab karon ang gihangyo nga augmentation gikan sa militar tungod kay matod pa maka-apekto kini sa peace negotiation  tali sa gobyerno ug sa MILF.

Una nang gihangyo ni Mayor Edding si Police Provincial Director Mario Yanga alang sa dugang pulis para sa lungsod sa Sibuco. Mahimong aprobahan unta ni Police Regional Director Jaime Caringal apan kinahanglan nga mo-coordinate ngadto sa AFP Western Mindanao Command tungod kay nalambigit niini ang peace negotiation sa MILF. Nagtuo ug nanghinaot si Mayor Edding nga mopaluyo unta ang militar sa mga pulis pagsulbad sa problema. Hugtanon nga gihangyo ni Mayor Edding si Deputy Police Sr. Superintendent Soledad nga maoy nag-representar kang Director Caringal sa maong meeting alang sa dinalian nga action sa gihangyo niini nga pag-dispatch ug usa ka platoon sa Regional Mobile Group alang sa Sibuco ug e-establisar usab ang Community Polis Action Center (COMPAC).

Gipahayag ni Police Senior Superintendent Soledad nga sulod ning bulan sa Pebrero adunay augmentation nga ipadala ang PNP alang sa Sibuco, apan alang kang Governor Rolando Yebes nga dili mahimong maghulat ug dugay ang mga katawhan sa maong lungsod. Iyang gihangyo ang PNP ug militar sa pagsanong sa hangyo ni Mayor Edding sa mas sayo nga panahon. Mas maayo nga sulod lamang sa usa ka semana adunay augmentation force ang ipadala ngadto sa lungsod sa Sibuco. (Press Freedom, Vol. XX No. 19)

*

 

Ubang gasoline stations gilipat ug public bidding
City AccOUNTANT mihimakak dunay hukos-pokos

Misubay sa hustong prosesso ang pagpahigayon ug public bidding sa 36 mil litros nga gasolina para sa nagkadaiyang operasyon sa kagamhanang lokal sa dakbayan sa Dipolog. Kini ang gipamahayag ni City Accountant Liliosa Eway samtang may pipila ka mga tag-iya ug gasoline stations ang mireklamo nga dunay ‘hukos-pokos’ ang pagpahigayon ug public bidding kay sila gilipat-lipat lamang sa pipila ka mga opisyal sa dakbayan ug wala pahibaw-a sa hustong petsa kanus-a pagahimoon ang transaksiyon.

Sa interview, si Eway mipahayag nga niadtung Disyembre 27, 2007, ang tanang gasoline stations gipahibawo nga ang maong petsa maoy katapusang deadline sa pagsubmiter ug Bid form alang sa pagahimoong bidding. Apan bugtong ang Petron gasoline station nga gipanag-iyahan ni Engr. Roland Soliva lamang ang nakaduso ug bid form ngadto sa Bids and Awards Committee kon BAC hinungdan nga didto sa iyang gasoline station na-award ang P1.5 milyon nga transaksiyon. Ilawom sa bag-ong balaod nga mao ang Republic Act 9184, puwedi nga adtu i-award sa lone bidder ang transaksiyon kon walay interesado nga moapil sa bidding. Tungod kay wala nay laing tag-iya sa gasoline stations dinhi sa Dipolog nga misubmiter ug bid form atol sa gikatakdang deadline niadtung Disyembre 27, hinungdan nga ang bugtong bidder nga si Soliva maoy modaug, pagpasabot pa ni Eway.

Hinoon matud pa sa City Accountant nga ila pang e-evaluate ang price qoutation ni Soliva ug iyang gipabalik ang mga dokumento ngadtu sa Bids and Awards Committee kay nagkulang pa kini sa mga requirements sama sa minutas sa pagbukas sa maong bidding. Sa nasayran, pipila ka mga nanag-iya ug gasoline stations dinhi sa dakbayan sa Dipolog ang mipabate sa ilang reklamo tungod kay gilipat sila sa pagpahigayon sa bidding. Si City Engr. Nedelia Magdayao mao mismo ang nagtawag sa usa ka dakung negosyante nga ang pagpahigayon sa bidding ‘e-recall’ ug dili mahinayon hinungdan nga wala usab sila misubmiter ug bidding form.

Matud pa nga si City Treasurer Sancen Caroro, Chairman sa BAC ug Engr. Magdayao maoy nagbuot nga ipa-recall ang pagpahigayon sa bidding. Apan takulahaw lamang pagka-ugma, tapos sila gipahibawo nga dili mahinayon ang bidding ila nalang nahibaw-an nga ang transaksiyon gi-award na ngadtu kang Soliva isip maoy lone bidder. Para kanila, imposibli nga mahimong ‘lone bidder’ si Soliva nga silang mga negosyante nga nanag-iya ug gasolinahan interesado man sa maong transaksiyon.

Gibutyag sa tinubdan nga sa pagbukas sa bidding, ang original government price sa maong panahon anaa pa sa P41.43 centavos, apan sa dihang gi-award na kini ngadtu sa lone bidder anaa na sa P41.80 centavos, misaka ug balig .37 centavos matag litro nga maoy nahimong alakanse sa gobiyerno. Tungod niini, hayan mopasaka ug kaso ang mga hingtungdang mga nanag-iya ug gasoline stations dinhi sa dakbayan sa Dipolog batok sa pipila ka mga opisyal sa City Hall nga sumala pa, mipalusot ug mihimo ug ‘hukos-pokos’ sa maong transaksiyon. (The New Nandau, Vol. XVII No.33)

*

 

Yebes nag-awhag pagpakusog sa produksyon sa mais

Para masiguro nga matabangan sa husto ang mga mag-uuma sa mais dinhi sa probinsya, gimando karon ni Governor Rolando Yebes ang Buhatan sa Provincial Agriculture nga maoy mototok sa pagtabang sa mga farmers pagpananum sa mais aron masiguro ang maayong harvest niini pinaagi sa bag-ong teknolohiya ug mga pamaagi. Giprangka sa gobernador atol sa interview sa mga sakop sa ZNUC nga ang iyang administrasyon maningkamot sa pagtabang sa mga mag-uuma sa pagtanum ug mais ilabi na sa mga membro sa Lando Bibo nga maoy prioridad sa programang panginabuhian.

Giprangka ni Gob.Yebes atol sa interview sa mga sakop sa ZNUC nga ang iyang administrasyon maningkamot sa pagtabang sa mga mag-uuma sa pagtanum ug mais ilabi na sa mga miyembro sa Lando Bibo nga maoy prioridad sa programang panginabuhian.

Gisulti ni Yebes nga iya nang gimanduan ang buhatan sa provincial agriculture nga magkuha ug mga personahi sa maong buhatan aron ipa-ilawom sa igong pagbansay-bansay sa modernong pamaagi sa pagpananum ug mais aron maoy motabang unya ug makigtambayayong sa mga mag-uuma para sa pagsiguro sa maayong abot niini. Matud ni Yebes, kadtong dunay luna apan walay kaya ug ikagasto sa pag-ugmad sa ilang kayutaan pweding moduol lang sa nahisgutang buhatan tungod kay ang probinsya dunay gipatumang ‘program flow’ para niadtong mga farmers nga wala’y kaya sa pagtikad sa ilang luna. Sa kabahin sa abono nga maoy nag-unang problema karon sa mga farmers gipadas-og ni Yebes ngadto sa mga municipal agriculturists sa matag lungsod nga hangyoon ang ilang mga mayor nga gamiton ang gihatag nga financial assistance nga usa ka milyon ka pesos nga gihatag gikan sa probinsya para maoy ipalit ug abono ug ipahulam ngadto sa ilang mga mag-uuma sa matag lungsod.

Samtang ang probinsya mao ang motabang sa pagdaro ginamit ang traktor sa probinsya ug pag-ayuda sa mga hybrid corn nga binhi. Kini nga lakang nga gihimo sa gobernador para iyang masiguro nga maghiusa gayud ug magtinabangay gikan sa sinugdanan hangtud sa kalampusan ang mga farmers ug ang gobyerno ug walang iwanan, dili diya gisto ang kaniadto mahitabo usab sa iyang administrasyon nga gipasagdan ang mga purdoy nga maguuma. Karon nga iya nang nadala ang merkado sa mais dinhi, wala nay problema ang mga corn farmers sa paghandos sa ilang abot tungod sa bagong gibuksan karon nga corn post harvest processing and trading center didto sa lungdos sa Sergio Osmeña. Gipaningkamutan usab ni Yebes nga makapabarog ug laing duha ka dugang post harvest facilities sa lungsod sa Rizal sa 1st district ug sa lungsod sa Liloy sa 3rd district aron mas paborable sa mga mag-uuma ang paghandos sa ilang mga abot sa pinakaduol nga merkado aron makadaginot sa galastuhon sa transportasyon, pinaagi sa panaghiusa nila ni Yebes ug Congresswoman Cely Jalosjos-Carreon sa unang distrito. (Southpoint, Vol.1No.8)

*

 

Bag-ong chairperson sa RDC gidasig ni Yebes

MIPABATI sa iyang dakong pagpasalamat si Governor Rolando Yebes ngadto sa  naglangkub sa Regional Development Council (RDC) sa gipakita niining kooperasyon ug panaghiusa sulod sa tulo ka tuig sa dihang siya pa ang chairman sa RDC. Uban sa pagdasig sa bag-ong chair-person niini nga ipadayon ang kalambuan sa  rehiyon.

Kini ang iyang gipabati atul sa gipahigayon nga Joint RDC ug Regional Peace and Order Council Meeting didto sa Pagadian niadtong Pebrero 18, 2008. Sa mensahe ni Governor Yebes, iyang gipahayag nga sulod sa tulo ka tuig niya nga pagkupot sa maong posisyon iyang nakita ang panaghiusa sa mga regional directors, Local Government Unit, Chief of Offices ug Private Sector sa tibook rehiyon 9. Nahimo ang daghanang kaayohan. Ang RDC-9 ang nabutang sa mapa sa kalam-buan sa nasud hinungdan nga ang mga programa ni Presidente Gloria Macapa-gal Arroyo ang nagatotok dinhi sa atong rehiyon.

“Thank you for your cooperation and unity sulod sa tulo ka tuig”, nagkanayon ang gobernador. Gidugang ni Governor Yebes nga ang bag-ong chairperson karon sa RDC nga si Governor Auring Cerilles sa Zamboanga Del Sur ang dili bag-o sa public service. Siya ang nanghinaot nga ang gihatag nga kooperasyon  ug panaghi-usa sa nakalabay nga tulo ka tuig mao usab kini ang ipakita sa mga miyembro sa maong konseho ngadto kang Governor Cerilles. Iyang gidasig ang bag-ong pangulo sa RDC nga ipadayon ang maayong panglantaw ug ipakita sa nasud nga ang rehiyon 9  maoy paglaum sa nasudnong kagamhanan. Mas magmalambuon pa sama sa paglambo sa ubang rehiyon pinaagi sa tabang sa presidente sa nasud.

Mapasalamaton ug dako si Gov.Yebes sa higayon nga gihatag ug pagsalig sa mga miyembro sa konseho ngadto kaniya pagsulbad sa mga problema alang sa kalam-buan sa tibook region 9. (Press Freedom, Vol. XX No. 19)

*

 
Dipolognon nabahin-bahin sa issue pangilabot
sa simbahan kabahin sa ZTE-NBN scandal

Kon nagubot ang Metro Manila mahitungod sa laing mitumaw nga ‘wistleblower’ sa ZTE broad bond deal controversy, natay-ug usab ang mga katawhang Dipolognon sa dihang nalambigit na usab ang simbahang katoliko. Atul sa tulomanon Kasayuran program sa DXFL, nagkabahin-bahin sa managlahing opinion ang mga katawhang Dipolognon sa isyu sa “The Jun Loazada expose” diin maoy unang gidangpan niini ang La Salle Brothers sa De La Salle University diin anaa nagpuyo ang mga pari ug madre.

Unang gituki ang issue kabahin sa pagkalambigit sa simbahang katoliko nga miapil-apil sa maong eskandalo nga wala usab uyoni sa kadaghanan.

Matud sa nagkadaiya nilang pamahayag, dili angayan mabasol ang simbahan nga manggilabot sa expose ni Jun Loazada mahitungod sa gipangayo nga komisyon sa pipila ka mga opisyal sa Malakanyang diin naduhalig ang first family tungod kay ang maong isyu naglambigit sa moralidad. Sumala pa sa opinion sa uban, dili na unta angayan pa nga mag-apil-apil ang simbahang katoliko sa maong kontrobersiya gumikan kay mao lamang kini ang makahaling sa kagubot ug kaguliyang sa mga katawhang pilipinhon ug itugyan nalang kining maong isyu ngadto sa hingtungdang ahensiya sa gobiyerno nga maoy mo-imbestigar ilabi na nga ang senado nagpahigayon na sa ilang senate legislative inquiry. Matud pa nila, dunay separadong gahum ang simbahan ug estadu, ang simbahan maghatag ug maayong pagtulon-an kabahin sa balaod sa labaw’ng makagagahum samtang ang estadu maoy iyang totokan ang mahitungod sa mga programa panggobiyerno diha sa paghatud ug maayong serbisyo sa mga katawhan.

Kon dunay motumaw nga isyu sama niini, sumala pa nila, kini angayan lamang itugyan sa mga hingtung-dang ahensiya sa gobiyerno nga maoy mo-imbestigar ug ang mapamatud-an paham-tangan ug tukmang silot. Ilang gihatagan ug panag-ingnan ang nakalabay’ng people power nga gipangu-nahan sa simbahang katoliko sama sa Edsa Uno, Edsa Dos ug Edsa Tres gikan pa ni Marcos, Aquino, Estrada hangtud naloklok sa puwesto si Gloria apan hangtud karon walay nahitabong kalainan ug kausbanan ang pagpa-dagan sa atong panggo-biyerno kay sa matag karon ug unya, anaa gihapon ang isyu mahitungod sa pangu-rakot ug pagpangawkaw ug salapi sa mga katawhan diin ang nalambigit ang mga opisyal nga anaa sa gahum.

Ang maong opinion gikontra usab sa kadaghanan tungod kay dili mahimong isalikway sa simbahan ang issyu kabahin sa moralidad. Ang pagpangawkaw ug salapi naglambigit kini sa issyu sa moralidad diin ang simbahan nagtudlo sa pagkamatarong. Matud pa nila, kon wala pa ang simbahan manggilabot sa singgit sa kinabag-ang katawhan nga sila gilupigan, hayan hangtud niining panahona wala pay kagawasan ug demokrasya ang maangkon sa atong nasud nga pilipinhon. Gihimong ehimplo niini mao ang pagpalagpot sa diktadoryang presidente nga si Marcos diin ang simbahan maoy nangulo aron palayason kini sa palasyo hinungdan nga nakab-ot sa mga katawhang pilipinhon ang kagawasan ug demokrasya sa atong nasud. (The New Nandau, Vol. XVII No.33)

 
 

 HULAGWAY BALITA

 

Southpoint Editorial Cartoon(Southpoint, Vol.1No.8)

*

 

Sindangan
Kumbento giransak!

Gumikan kaha sa kapit-os karong panahona, pati kumbento sa madre ang giransak sa wala mailhing suspetsado, didto sa lungsod sa Sindangan diin mokabat sa 63 mil ka pesos ang kantidad sa nawala. Ang maong kumbento gipuy-an kini nila ni Sister Clarita Vergara, Sister Bernadette Casipon ug Sister Clarita Saclot, sa Brgy. Bitoon. Sumala pas taho nga ang maong mga madre, mibiya kini saa maoy kumbento sa madre, sa lungsod sa Siayan.

Apan sa ilang paghibalik, nadiskubrehan na lamang nila nga naguba ang padlock sa pultahan sa maong kumbento ug nawala ang silver blessed sacrament nga nagkantidad ug 35 mil ka pesos, chalice sa kantidad nga tres mil ka pesos, daghanang kagamitan sa kusina sa kantidad nga 25 mil, kidney machine, singko mil ka pesos, PDX wire, singko mil ka pesos, mga kurtina ug uban pang personal nga mga butang.

Sa pagkakaron, ang kapulisan sa Sindangan padayon pang mihimo sa imbestigasyon aron sa pag-ila ug pagsikop sa mga suspetsado. (Southpoint, Vol.1No.8)

 

Piñan
Ulitawo giluba, patay!

Patay ang usa ka ulitawo human kini lubaa sa kauban sa usab niya sa panag-inum, didto sa Poblacion South, lungsod sa Piñan.

Ang biktima giila sa ngalan nga usa ka Montahis, 40 anyos, ug molopyo sa Poblacion North. Ang suspetsado gitumbok nga usa ka Romel Rivera, 27 anyos, minyo ug molopyo sa Brgy. Dionum.

Sa pasiunang imbestigasyon nga gihimo sa Piñan PNP nasayran nga ang duruha kuyog kining nag-inum sa usa ka birthday party sa ilang pasyente. Apan gumikan kay nangahubog na kini, ang suspetsado matud pa nag-wild ug kalit nga giluba ang biktima ginamit ang pito ka pulgada nga kutsilyo.

Si Motahis nakaangkon kini ug samad-nilubaan sa iyang likod ug dali pa kining gidala sa tambalanang probinsyal apan pagka-ugma, nakabsan kini sa iyang kinabuhi. Hinoon, ang suspetsado nasikop ra usab kini sa kapulisan nga gipanguluhan ni SPO4 Jimmy Galleposo. Ang kasong murder gipasaka na kini ngadto sa korte. (Southpoint, Vol.1No.8)

 

Dipolog
Mayoma o problema sa matris? Libreng operasyon ipahigayon

Adunay ipahigayon nga libreng operasyon alang sa mga kababayen-an nga adunay gihambin nga sakit sama sa mayoma, ovarian cyst o sakit sa matris dinha sa tambalanang probinsyal dakbayan sa Dipolog, karong umalabot Marso 9 hangtud na sa Marso 19 ning tuiga.

Mao kini ang gibutyag ni Mrs, Aida Dy, ang Chief Nurse sa maong tambalanan diin ang Renewed Life in Jesus Christ inabagan usab sa kagamhanang probinsyal ang mopahigayon kini sa naasoy’ng operasyon.  Gikinahanglan lamang ang mga kababayen-an nga nagpangedaron kini sa 55 anyos paubos ug aduna na’y resulta sa ultrasound examination nga nagpamatuod nga aduna siya’y mayoma, ovarian cyst o sakit sa matris.  Labot pa niini, ang mga interesadong mopahimulos gikinahanglan nga mag-andam daan og duha ka blood donor nga kapareho sa iyang tipo sa dugo tungod kay sa panahon sa operasyon ang duha ka dugo sa tawo magamit kini.

Mipaklaro usab si Mrs. Dy nga kadto usab nga mopahimulos sa naasoy’ng pagpang-opera ang kini dili libre sa mga tambal nga ihatag human sa operasyon.  Gawas lamang sa doktor nga maoy opera ang kini libre nga nagagikan sa nasud sa USA nga si Dr. Sigmund Solano. Adunay ipahigayon nga laboratory screening dinha sa tambalanang probinsyal dakbayan sa Dipolog karong umalabot Marso 3 hangtud na sa Marso 7 ning tuiga. Ug alang sa mga interesado niini makisayod lang kang Mrs. Aida Dy, ang Chief Nurse sa nasangpit nga hospital alang na sa dugang pang impormasyon. (PEDMARK, Southpoint, Vol.1No.8)

*

 

Pulso Sa Katilingban
Cicer M. Binghay
“I’ll Be Seeing You”

Na-kontrobersiya ang paglihok sa CBC Kapunongan sa simbahang katoliko sa ilang gihimong nagkadaiyang suporta kang “star witness” sa duha ka adlaw nga blue ribbon imbestigasyon gihimo sa mga senadores. Nagkabahin ang panahon sa katawhan. “Nga ang mga simbahan ilabi na ang mayoriyang religious order sa nasod mibali wala nianang giingon “Separation of Church and State”.

Clearly, our Philippine Constitution declares the separation between church and state to be inviolable. Yet the same constitution provides for religious instruction in high schools and state-remunerated military chaplains. Matod pa kang Eminence Jaime Cardinal Sin, D.D. Naay “Gaudium et Spes, the Pastoral Constitution on the Church on the Modern World. It described the real relationship between Church and State more accurately.  That the political community and the Church are autonomous and independent of each other in their own fields. Nevertheless, both are devoted to the personal vocation of man, though under different titles. This service will redound the more  effectively to the welfare of all insofar as both institutions practice cooperation according to the local and prevailing situation. The proper field of the political community “exist for the common good this is its full justification and meaning and the source of its specific and basic right to exist”. Unto the common good, the political community when necessary COERCES COMPLIANCE.

Atong mahinumdoman nga ang EDSA No. 1 22 anyos kanhi, maoy ugat nakabugkos sa mayoriyang katawhan pagpugos sa rehimen ni kanhi Pres. Marcos ang gantoong pundok sa simbahang katoliko. Niadtong panahona nagpasulabi ang pag abuso sa pang gobiyerno. Walay gihimo sa katawhan, gawas lamang sa pagduko, paalot sa gusto sa namunoan. Gikinahanglan dunay pagabuhaton sa katawhan. Pero tanan pagsulay pagpitol sa pag abusar sa naghitak krimen, graft & corruption, no organization of such, obviously, cannot tackle the problem. Sa maong panahon diha moapil ang simbahang katoliko. Nahimo ang suliran pag-abuso sa katawhan panahon sa Martial Law.

The church mustered the resources of the faithful. There is so much goodness and strength in this country. The problem is how to tap it. The Filipino is still religiously-not politically-motivated. Ang “election” maka bahin-bahin sa nataran sa katawhang pilipinhon. Pero dili malimod, “religious celebrations unite them. “Politics is aggravating,” dihay miingon, “not alleviating, the plight of our people.  Karong nia na usab ang simbahan, matod pa sa administration ni PGMA nag-apil-apil sa kalihokan sa pang gobiyerno.

Baya atong mahinumdoman, nga bisan giunsa pag singgit ang opposition sa daghanh gihimong “foul” sa administrasyon karon tanan igo lang gipasibaw sa lungsod ug lungsoranon, apan walay mga resulta. Walay timik ang gipabutong explosibong “fertilizer Scam” nga migordog bilyones salapi sa katawhan nga nahanaw lamang. Walay gihimo, walay mga resulta ang daghang mga imbestigasyones gihimo sa senado gikan pa sa ‘hello garci’ hangtod karon. Pero naa karon ang simbahan, nakakita nga puno na. Husto na. Igo na ang daghang bikil ug pangurakot sa administrasyon karon. Walay mahimo ang political community. Something must be done about the hopeless investigations of the blue ribbon committee responsive. Something must be done to support credible witness Engr. Rodolfo Lozada Jr.. Let us see or maybe join the church which we all believe is the only ultimate alternative to solve the hunger of change of government in this country.

Among kinasingkasing pasubo sa kamatayon ni kumpanyero Rene Patangan ug sa nagbangotang pamilya. “Rene, hangtod nagpabilin ang awit “I’ll be seeing you” dili kami mahakalimot kanimo. RIP. (Press Freedom, Vol. XX No. 19)

 
Credits: Press Freedom is published every Saturday and entered as 3rd class mail matter in Dipolog City. Printed by Young Printing Press with Editorial Office located at Upper Turno, Dipolog City. Tel. No. (065) 212-4343 or 212-6665

 

ZaNorte misubang na sa torismo
By: Ronilo Pacilan-PIC/CDAU Unit Head

 

Human sa duol upat ka tuig na nga paningkamot ning lalawigan sa Zamboanga del Norte aron ibutang sa mapa sa torismo ang lalawigan diha sa nagkadaiyang probinsiya ug siyudad sa Mindanao, namatikdan karon nga misubang na ang bitoon niini, human sa tibuok Zamboanga Peninsula ang ZANORTE mao ang kanunay gipunsisokan sa mabagang duot sa katawhan diha sa mga WOW ZAMPEN Showcase, sukad nga kini gihuptan na sa Provincial Tourism.

Bag-ohay lang sa dihang kining inyong tigsuwat ang mibisita didto sa lungsod sa Ipil, Zamboanga Sibugay, kinsa nagsaulog sa ilang ika 7 nga Foundation Day niadtong miaging semana, ug diin gipahigayon usab ang WOW ZAMPEN showcase, ang ZANORTE booth and products niini ang giilogan gayud sa mga katawhan. Sa unang adlaw pa lang matod pa ni Atty. Ivan Patrick Ang, Provincial Tourism Officer sa ZaNorte ang mibutyag nga top grosser ang booth sa halin ug mga dumoduong kumpara sa ubang mga booth sa tibuok ZAMPEN.
 

“It’s a positive sign that ZANORTE had already inched into the psyches of the peninsula, it is because of our constant participation and exposure to this type of undertakings, “ matud pa ni Atty. Ivan Patrick Ang, Provincial Tourism Officer sa ZaNorte.

Matud pa ni Atty. Ang nga kini ang pinakadako nga halin sa ZANORTE booth kum-parar usab sa mga milabay nga WOW showcase sa Pagadian City niadtong nakalabay nga tuig, sa Zamboanga ug Isabela City sa Basilan niadtong mga nanglabay pang pagpa-higayon niini. Matud pa sa maong opisyal nga ang ZANORTE tungod sa way lurang nga suporta sa gobernador, kini ang padayon nga mipakita ug pagpangulo diha sa natad sa turismo dinhi sa peninsula Zamboanga.

Matod pa ni Atty. Ang nga karon nga showcase ang tema sa booth sa ZaNorte mao ang Disneylando, diin mga Disney characters mao ang nagpalibot sa ZaNorte booth, nga gipunsisokan usab sa mga ginikanan ug mga bata sa lungsod sa Ipil. Si Atty. Ang nagkanayon nga kini usa ka dako kaayong positibo nga tilimad-on nga ang mosunod HUDYAKA karong tuiga ang mas dugokon na sa mga turista gikan sa ubang probinsiya tungod kay nadungog na ang ZANORTE diha sa penin-sula-wide showcase nga iyang gitambongan.

“it’s a positive sign that ZANORTE had already inched into the psyches of the peninsula, it is because of our constant participation and exposure to this type of undertakings, “ matud pa sa maong official. Sa dihang ang kining inyong tigsuwat ang misuse pinaagi sa usa investigative research sa maong kaliho-kan, atong nasuta nga ang pulong “ZaNorte” ang gi-adaptar na sa atong mga silingan dinhi sa region. Bisan mga batan-on, hamtong ug mga bata, didto sa lungsod sa Ipil ang mosinggit na’g “Abante ZaNorte!” sa panahon nga litokon ang pangalan sa atong probinsiya.

“Ilado na ang inyong lalawigan, ug nakahibawo na usab mi sa HUDYAKA, basin mobisita kami sa inyong festival,” matod pa ni Boboy Sayon, usa ka yanong molupyo sa hilit nga lungsod sa Payao, Zamboanga Sibugay sa dihang nahinabi ning tagsuwat. Ang WOW Showcase didto sa Ipil ang gitambongan usab sa dakbayan sa Zamboanga, Dapitan City, Isabela City, Basilan, Zam-boanga del Sur, Zamboanga del Norte, Zamboanga Sibugay ug Pagadian City. Wala magpatim-aw sa iyang suporta ang dakbayan sa Di-polog sa paglapad sa iyang torismo didto sa Ipil sa wala pa masayreng hinungdan.

Sa pikas bahin tungod kay ang maong kalihokan nahisubay man sab sa “Adlaw sa Sibugay” ang 16 ka mga lungsod niini ang miplastar usab sa ilang mga showcase diha sa mga booth nga gihimo alang kanila. Sukwahi hinoon sa ZANORTE ang mga lungsod sa Sibugay ang adonay mga nindot nga mga produkto nga halinon gayud sama sa Paje kon ulang nga dagko sa lungsod sa SIAY dagkong Lapu-lapu nga isda sa lungsod sa Tungawan ug mga dagkong Tangkig sa lungsod sa Ipil.

Karon usab nga kalihokan ang LANDO-BIBO products nga gigalam karon sa TLDC ang milambigit usab sa maoing kalihokan hinungdan nga mas daghang halin karon ang booth sa ZANORTE. Matud pa ni Atty. Ang nga usa sa mga nag-unang rason nga milambo ang halin mao ang maayong produkto sa ZALABAVE usa ka organizasyon sa mga LANDO_BIBO nga adona nay mga negosyo sama sa Antipolo ug Larayan Dapitan City, ingon man sa Calube, Sibutad chapters sa mga Lando-Bibo. (The New Nandau, Vol. XVII No.33)

 
  

Diocese sa Dipolog misalmot sa  lihok protesta batok ‘corruption’
“Noise Barrage” gipahigayon

Ang Obispo ug mga kaparian sa Diosesis sa Dipolog miduyog sa nasudnong lihok protesta pinaagi sa ‘noise barrage’ nga gihimo niadtung Biyer-nes sa alas 6:00 sa gabii. Bishop Jose Manguiran sa Romanong Katoliko sa iyang gipadangat nga sulat Awhag Alang sa Kahiu-sahan atubangan sa mitu-maw karon nga kaguliyang nga nasinati sa atong nasud kabahin sa kurapsiyon human gibulgar sa giilang ‘wistleblower’ nga si Jun Loazada ang pagpangilkil ug salapi sa mga opisyal sa Malakanyang diha sa ZTE Broadband Deal.

Ang Obispo uban sa mga kaparian sa Diosesis sa Dipolog naghimo karon sa ilang tinuig nga maampoong pamalandong didto sa Rivier Retreat House, Catalunan Grande, dakbayan sa Davao. Sa milabay’ng tulo ka adlaw, sila namalandong sa dagan sa kinabuhi sa ilang pagkapari ug nag-ampo sa kahitas-an nga sila pasayloon sa ilang mga kalapasan. Namalandong usab sila sa dagan sa kinabuhi sa Simbahan sa Diosesis sa Dipolog ug nag-ampo nga buligan sa kahitas-an ang mga paningkamot nga mapalig-on ang mga gagmay’ng Katilingbang Simbahanon. Matud sa obispo, lakip sa ilang gipama-landong ang kahimtang sa atong nasud labi na niining milabay nga mga semana, ang gibutyag nila ni kanhi House Speaker Jose De Venecia ug Engr. Jose Noel “Jun” Loazada kabahin sa grabe nga ‘corruption’ nga gihimo sa mga tag-as nga mga opisyal sa nasud.

Pinasubay sa baruganan sa Kahugpongan sa mga Katolikong Ka-obispohan sa Pilipinas kon CBCP sa pagsuporta sa gihimo nga pagbutyag pinaagi sa mga ‘mass actions’ sama sa mga lihok protesta aron mapagawas ang gibati sa katawhan sa ilang pagsupak batok sa ‘corruption’, ang Roman Catholic Bishop of Dipolog nanawagan sa mga katawhan sa Diosesis sa Dipolog nga mobulig sa pagahimoon nga nasudnong protesta. Matud ni Manguiran, dinhi sa Diosesis sa Dipolog ang pagsalmot sa maong panawagan mao ang pagbagting sa mga lingganay o kampana sa tanang mga simbahan ug kapilya. Ang madungog nga bagting sa kampana, ipabati usab sa mga katawhan ang pagsupak sa ‘corruption’ pinaagi sa pagpatingog sa mga busina sa sakyanan, pagdokdok sa kaldero, taro, baril ug uban pa nga masaba nga butang.

Ang obispo naglaum nga ang pagbulig sa mga kataw-han niining makatarunganon nga lihok alang sa pagpatun-hay sa kamatuoran maoy makapalingkawas sa atong nasud. Ang panawagan sa simbahan nga ‘noise barrage’ niadtung Biyernes sa gabii wala maghimpos kay namatikdan nga daw walay pakialam ang mga katawhan kay walay madungog nga mga dahunog ug bagting sa mga butang motingog. (The New Nandau, Vol. XVII No.33)

 

Credits: The New Nandau is a member of the Publishers Association of the Philippines (PAPI). Editorial office is located at 076 Quezon Avenue, Dipolog City with Tel. No. (065) 212-3794; Cell No. +639205201041

*

MORE NEWS NGA BINISAYA

 

 

NOTE: SEND US YOUR NEWS.  Tell us what's going on in your barangays, clubs, schools, businesses and non profit organization. You can also send notices and announcements.
          

 

    Email to webmaster@dipolognon.com

      
Google
WEB THE DAILY DIPOLOGNON